رواية بين شقي الرحى الفصل الثامن عشر 18 بقلم مورو مصطفى
رواية بين شقي الرحى الجزء الثامن عشر
رواية بين شقي الرحى البارت الثامن عشر
رواية بين شقي الرحى الحلقة الثامنة عشر
اقترب أدهم من روؤف بقامته الطويلة فجعله يرتد للخلف
– لو فكرت توقف في طريقه صدقني ح تندم كمان نص ساعه كل السوشيال ميديا ح تتكلم عن روؤف بيه أشهر محكم في سباقات الخيل اللي كان عارف ان ابن اخته بيدي الحصان بتاعة منشطات وساكت رايك ايه ح تمشي عدل ولا اخليهم يشطبوك من كل لجان التحكيم جوه البلد وبراها ياروؤف بيه ياريت تخلي عندك ضمير شوية واتمنى من نفسك كده تعتذر عن التحكيم في النادي هنا وتاخد ابن اختك في ايدك وانت ماشي بدل ماتبقى فضيحتكم بجلاجل فأنصرف روؤف وهو يجر اذيال الخيبه على تلك الفضيحة ونظر سليم لأدهم وابتسم
– بجد مش عارف اقولك ايه
– ولا كلمه ياسليم عيب انا اعتبرتك اخويا ودلوقتي حياة وأولادها في رقبتي يالا نروح لهم
وذهب الاثنان معا لهم وكان الجميع يجلس ومعهم يوسف وهم لا يعلمون شيئا حتى المدرب أيضاً فقص سليم كل شئ عليهم فوقف المدرب
– ياولاد ال…. فنظر له سليم
– اهدي ياكوتش دلوقتي خلاص الدنيا امان ويوسف خلاص كده جوه المسابقة عايزك تشد حيلك معاه مبروك ياجو فقفز يوسف في أحضان سليم
– ياحبيبي يابابا مانحرمش منك ابدا يارب… انا مش قادر أصدق كل ده فضرب أدهم على كتفه
– صدق حبيبي صدق ولازم تعرفوا كلكم انا في ضهركم زي سليم بالضبط فأبتسمت له حياة
– مش عارفة اشكرك ازاي ياسياده العميد
– عميد ايه بقى أدهم وبس واعتبريني اخوكي زي ياسين بالضبط ياحياة
– ده يشرفني يا أدهم
وكان سليم قد بدء يغتاظ من كلامهم سويا فلكز أدهم في جنبه وهو يهمس
– خف ياخويا مش كده فضحك أدهم بقوة ومال عليه
– مستني ايه يابيه فنظر له سليم بغيظ
– لسه خمس تيام خمس تيام بس وبعدها تبقى معايا اه يا أدهم حاسس ان لسه دهر فأبتسم ادهم
– قصة حبك دي تدرس يا سولم عارف انا لما حكيت لمراتي ماكنتش مصدقه ونفسها تشوفكم
– اكيد طبعا هو حضرتك مش ناوي تيجي الفرح ده انت الشاهد ياعم
– ده انا ح اكون قبل منك ووقف أدهم ونظر للجميع
يالا اسيبكم انا بقى معلش عندي شغل وياريت
تعتبروني زي سليم وياسين اي حاجة انا معاكم سامعين وانتم ياشباب ياصغير فضلكم شوية وبعد كده ح يبقى في يوم في الأسبوع ح تدربوا فيه مع ولادي انا اللي ح ادربكم بنفسي فصرخ البنات بجد ياعمو فضحك أدهم بجد طبعا يالا اسيبكم انا بقى سلام عليكم جميعاً فرد الجميع عليه وعليكم السلام ورحمه الله
…………………………..
وبعد انصراف أدهم نظر سليم للجميع
– يالا بقى معايا كلكم علشان نشوف هدية الاستاذ يوسف
فقام الجميع وذهبوا معهم واتجهوا الي اسطبلات الخيل وقف سليم في الإمام وسحب يوسف بجواره ونادي فين ياكوتش فخرج المدرب وبيده حصان يسير بخيلاء لونه اسود وبه غره بيضاء بين عينينه فكان يشبه حصان الأساطير فأقترب يوسف منه فأخذ الحصان يحرك رأسه لأعلى واسفل حتى لامسه يوسف فهدء
– أيه ده يابابا ده جميل قوي
– دي هديتك يايوسف حصان عربي أصيل فرس بجد وعايز فارس زيك هو اسمه فهد وهو فعلا فهد حركته سريعه جدا وخفيف فدمعت عين حياة وأخذت دموعها تتساقط وكذلك يوسف الذي جري على سليم واحتضنه بقوة
– بابا ده كتير قوي الحصان ده معروف انا لما كنت بقراء مع الكوتش عن الخيل جه ادامنا وقالي انه حصان أصيل ومن سلاله اصيلة كلها وغالي جدا فأمسك سليم رأسه بين يديه ونظر له بحب وهو يقبل راسه
– الدنيا كلها ماتغلاش عليك انت واخواتك حبيبي فقبل يوسف يده وهو يحتضنه
– ربنا ما يحرمنا منك يا أعظم اب في الدنيا ويقدرني دائما اكون عند حسن ظن حضرتك وماما ونظر لأمه فوجدها تبكي فنادي عليها بقلق فالتفت سليم أيضا وعندما راءها تبكي ترك يوسف واتجه لها فورا ورفع رأسها ونظر لها
– ممكن اعرف ليه عيونك بتبكي كده فحاولت إنزال راسها ولكن منعها سليم ونظر لهم ممكن بقى تسبقوا على العربية علشان نروح نتعشى وانا ح احصلكم مع الست هانم فذهبوا جميعا
وهنا امسك سليم يد حياة ونظر لها
– عارفه لم دموعك بتنزل قلبي انا اللي بينزف حرام عليكي توجعي قلبي كده
فوضعت حياة يدها على قلب سليم دون تفكير ونظرت له ووجهها غارق بالدموع
– سلامة قلبك ياسليم وشعرت بدقات قلبه قوية جدا تحت يدها فأرتبكت وشعرت بفعلتها وعندما حاولت سحب يدها كان سليم يضغط بيده على يدها الموضوعه على قلبه
– قلبي خلاص تعب قوي ياحياة بس هانت كلها ايام ويرتاح خمس تيام بس ويرجع تاني يعيش
وكان يري وجهه حياة الذي تلون باللون الأحمر فأصبح شكلها مغري بشده بوجهها الأحمر ورموشها المنسدله على عيناها والتي تلمع بالدموع فرفع يده ومسح وجهها بيده ورفع راسها وابتسم
– ارجوكي من هنا ورايح مش عايز اي دموع نهائي ولو حصل يبقى دموع فرح فاهمه فهزت رأسها له وابتسمت فأبتسم وأشار لها بيده يالا ادامي ياليدي حياة فضحكت بقوه فهمس بجوار اذنها الضحكة دي بعد كده مش عايز اسمعها بره وصمت قليلاً…. بعدين ح اقولك وصرخ الصبر يارب فضحكت حياة وجرت أمامه للسياره
……………………………..
بعد جري حياة من يوسف وصلت للسيارات فراءت ياسين يركب سيارته ومعه يزيد وجاسمين ويوسف في سيارة ومعه يارا وايلان وحياة أما آمنه وعنايات ففي سيارة سليم يركبون في الخلف فوقفت حياة بجوار عنايات
– انزلي يا عونا اركبي جنب ابنك علشان تعرفي تلجميه في السواقه فنظرت لها عونا بابتسامة
– امشي يابت اركبي أدام مش عايزه دوشة انا قاعدة جنب حبيبتي
فضحكوا وهم يروا سليم يقف خلفها وهو يربع يده وهي لا تشعر به فالتفت فوجدته خلفها ففزعت وتحركت فكادت تقع لولا انه امسكها فكانت بين يديه والتقت عيناهم فتشابكت العينان سوياً ولم يشعرا سوا وعونا تقول
– يالا ياخويا انت وهي جوعنا
ففك سليم اشتباك عيناهم بصعوبه وهو ينظر لأمه بغيظ فضحكت عنايات وآمنه بقوة وشعرت حياة بالخجل وركبت وهي تشعر ان مشاعرها مفضوحه للكل وذهبوا لتناول الطعام فدخلوا المطعم بجمعهم هذا وجلسوا جميعا وكانوا يضحكون على نكات إيلي التي تلقيها عليهم وكان الجميع ينظر لهم بابتسامة على جمعهم هذا وسعادتهم وكان سليم يجلس وبجواره حياة من جهة والجهة الأخرى يارا وبجوار حياة ايلي ثم يويو ويوسف وجاسمين ويزيد ثم ياسين ف عنايات وآمنه وفجاءه شعر سليم بيد حياة تضغط على يده بقوة فنظر لها وجدها تنظر أمامها ف التفت فشاهد كرم ومعه مي وعبير فضغط على يدها بهدوء ونظر لها وابتسم ثم مال عليها
– اهدي خالص وخليكي زي ماكنتي فاهمة فنظرت له حياة وابتسمت ونظر سليم لإيلي وهمس لها أن تبدل مكانها مع يوسف بهدوء فاشارت له إيلي بالموافقة ونظرت ليوسف
– جو تعال مكاني ثواني عايزة جاسمين في حاجة
– تعالي ياغلاباوية وقام وتحرك فنظر سليم لحياة
– حياة اتحركي وخلي يوسف يقعد مكانك وقام هو واجلس يارا مكانه فأصبح يوسف ويارا بين حياة وسليم ولاحظ يوسف تلك التحركات وجاء ليتكلم فشاهد كرم ومعه مي وعبير وجاء ليقف فأمسكته حياة
– حبيبي ولا كلمة فاهم
– ياماما ولاحظ سليم انفعال يوسف فعلم انه راءهم فمهس
– يوسف خليك مكانك انا اللي ح اتصرف ماشي وهنا كانوا قد وصلوا الثلاثة وكان كرم يحتضن مي وهي تتمسح فيه بشكل منفر وبجوارهم عبير وعندما شاهدت تجمعهم والسعاده على وجههم وشاهدت سليم فشعرت انه ذو شأن عال فأغتاظت وحاولت إثارة غضبهم فنظرت لآمنه
– ازيك يامرات اخويا بقى تبيعي ابنك علشان فنظر لها سليم نظرة جعلتها لم تستطع تكمله جملتها
– كلمة واحدة بس كمان وح تندمي ندم عمرك ماشفته فأحتد كرم
– انت ازاي تكلم عمتي كده وبعدين ماهي عندها حق عمري ماشفت ام تسيب ابنها علشان طليقته وكمان ياريتها محترمة وهنا وقف سليم واقترب منه
– عارف انا ممكن حالاً اخلي المكان كله بيتفرج عليك وابهدلك وآخرها أبلغ انك اتهجمت علينا والكل ح يشهد خليك محترم مره في حياتك وخد السنيورة اللي شكلك جايبها من الشارع دي بلبسها المحترم يامحترم وخد الست دي معاك كمان وغور من وشي بدل ما ابهدلك بجد انا كل ده ساكت بس علشان ولادك وكانت يارا تسمع الحوار لأنها التي بجوار سليم فأمسكت يد سليم ونظرت له
– بابي انا جعانة بقى ممكن تقولهم يجيبوا الاكل بسرعه
فانحني سليم مقبلاً راسها
سليم: عيون بابي حاضر ياقلبي وكان سليم قد حضر اكثر من مره في المحل فيعلمونه جيدا فنظر للمتر ايه يا حسين الاولاد جاعوا
– حالا ياباشا عيونا للأولاد
وكان كرم ينظر للاصطاف الذي تحرك سريعا لإحضار الطعام
– ياريت تتفضل من هنا علشان نعرف ناكل فنظر كرم لأمه فرفعت راسها له بقوة
– روح يابني ربنا يبعد عنك شيطانك فشعرت مي انها تتحدث عنها فنظرت لها
– قصدك ايه بكلامك ده ياطنط ممكن توضحي فنظرت لها بسخرية
– هو حد كلمك ولا ده نظام اللي على راسه بطحه ثم نظرت لابنها ياريتك تفوق قبل ماتنزل في الوحل اكتر واكتر وترجع كرم ابن علي الشهاوي روح يابني ربنا ينورلك طريقك وهنا تحدثت يارا
– بابي فنطق كرم وسليم في نفس التوقيت ولكن يارا نظرت لكرم بحزن انا بكلم بابي سليم بابي اللي بجد بابي اللي خدني في حضنه وطبطب عليا بابي اللي مسح دموعي بابي اللي بيهتم بيا وبيوسف على فكره يا فنظرت لها حياة
– يارا
– حاضر ياماما ثم أعادت نظرها لكرم على فكرة يابابا كرم الاب مش هو الاب اللي اسمه في شهادة الميلاد الاب هو اللي بيداوي ألم ولاده اللي بيحتويهم اللي بيهتم بيهم وحضرتك يعني عمرك ماعملت حاجة من دي ابسط حاجة حضرتك عارف انا في سنة كام فنظر لها بارتباك ثم أراد أن يخرج من هذا الموقف فنظر لحياة بسخرية
– هي دي تربيتك العظيمة ياهانم سامعه بنتك بتكلم معايا ازاي وساكته مش تقومي تلطشيها قلمين لا كمان سامحه لها تقول لواحد مالوش اي لازمه بابا
فوقفت حياة بهدوء واقتربت من سليم ووضعت يدها في يده بقوة واحتضنت يارا وقام يوسف وامسك يد ايلان وحياة ووقف بجوار سليم
– اعرفك ياكرم بيه سليم بيه الهواري خطيبي وطبعا انت عندك فكره عن يوسف ويارا اعتقد اما الامورتين دول إيلان وحياة ولادنا شرفت وانست كرم بيه معلش ح نستأذنك الاولاد جاعوا وعايزين ياكلوا يالا ياولاد الاكل جي اهو خلونا نروح نغسل ايدنا احسن اتربت بزياده ثم نظرت لسليم برقة عن اذنك حبيبي فنظر لها سليم بحب
– جي معاكم حبيبتي عن اذنكم ياجماعة خمسه وراجعين وذهبوا جميعا وبمجرد تحركهم بعيداً عنه اخذت حياة تتنفس بقوة ثم نظرت لسليم والاولاد
– حقكم عليا اني قلت كده بس كان لازم فاقتربت يويو منها وضمتها بقوة
– مامي حضرتك مامي يبقي اوعي تعتذري وبعدين ليه الاعتذار حضرتك مامي وبابي بابي يبقى عادي يالا بقى يامزه علشان انا جوعانه جدا فابتسموا جميعاً واقترب يوسف من يويو
– كان تخطيطنا ح يضيع يالا خليهم فاهمين انهم ح يتخطبوا مش ح يدبسوا ياعين امهم فضحكت يويو ولكزته في كتفه
– والله احنا مصايب يا يوسف صحيح بقولك مابقاش عندنا وقت فاضل خمس ايام بس وكل اللي عملناه حجزنا بس القاعة عايزين نتحرك بقي
– بصي انا ظبط مع كل التدريبات بتاعتنا أجلتها من بكره وفي مواعيدها ح نتحرك ماشي خلينا ندخل قبل مايخرجوا وفهمي باقي البنات
– اوك بوص
وعادوا جميعاً مكانهم وكان اصطاف المطعم نصفه يتابع فقط سليم واسرته حتى انتهوا من الطعام وكان ياسين بعد الطعام جاء له استدعاء للمستشفى فاخبره سليم ان الاولاد سيذهبون معهم للبيت ويأتي لهم هو غداً فانصرف وانتهوا من الطعام والتحليه ثم طلب سليم شيك الحساب وحاسب وترك للعاملين مبلغ خيالي فشكره حسين كثيرا وكان كرم يشعر بالغضب و مي تشعر ان حياة تركت كرم وفازت برجل اخر أقوى واغني فأغتاظت بقوة وشاهدت عبير سليم وهو يتجه لآمنه وعنايات ويمسك كل واحده في يد فثارت غيرتها اكثر على آمنه التي دائما ما تفوز عليها اما كرم فشاهد الاولاد كلهم يلتفون حول حياة وهم يضحكون ووجههم ينطق بالسعادة فشعر بالحنق عليها وعلى سليم وبذلك كانت سهرة حياة وسليم رائعه الجمال وسهرة كرم تعيسه ولا يدري ان كل واحد ينال ما يستحقه ف لطيبة حياة استحقت سليم ولانانية كرم استحق مي
………………………………
عاد كرم و مي للمنزل بعد أن قام بايصال عمته لمنزلها وعندما وصل المنزل تذكر عندما كان يدخل ويسمع حياة وهي تجري عليه تحتضنه بقوه وهي تنادي الجميع تبلغهم انه عاد وكيف كانت ابتسامتها ورقتها وكيف كان اولاده ياتون له ويقبلونه بحب فشعر بالغضب منهم كيف يحرمونه منهم بهذه الطريقه ولكنه عاد وتذكر كيف كان يقابلهم دائما بفتور وإهمال وخاصة في آخر أيامهم وكانت مي تحدثه وهو لا يسمع لها اصلا حتى هزته
– كرم….. كرم في ايه روحت فين
– في ايه يا مي
– عماله اكلمك وانت ولا انت هنا
– معلش سرحت شوية خير في ايه يا مي
– سرحت في ايه بقى ان شاء الله اوع تكون سرحت في الهانم ولا حنيت لها فنظر لها
– حنيت ايه انتي كمان بقولك ايه يا مي انا تعبان ومجهد وعايز ارتاح حضري لي الحمام خليني اخد دش وارتاح شوية وبعدين اعملي حسابك محتاج اركز في شغلي شوية الفترة الجاية مش كل شوية خروج وفسح ياريت نركز شوية بقى ممكن فنظرت له وهي تتصنع الدلع
– كده حبيبي خلاص مابقاش عجبك نخرج سوا ونتفسح سوا فأقترب منها
– حبيبتي مش قصدي بس لازم تعرفي اني عندي شغلي ولازم اخد بالي منه واهتم بيه علشان اكبره ولا ايه رايك
– طبعا حبيبي انا نفسي تكبر وتكبر وتكبر وانا جانبك ووراك وجانبك ياروحي فقبل راسها ويدها ونظر لها
– طيب يالا حبيبي روحي حضري لي الحمام
– حالاً ياروحي
ذهبت مي وجلس كرم يفكر فيما حدث وتغلب عليه شيطانة ان حياة هي السبب في كل هذا هي من حرمته من أمه وأولاده وتوعد ان يحاربها هي وسليم حتى يقتص منهم
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية بين شقي الرحى)
