رواية بيت النجاحي الفصل الرابع 4 بقلم هند عبدالله
رواية بيت النجاحي البارت الرابع
رواية بيت النجاحي الجزء الرابع
رواية بيت النجاحي الحلقة الرابعة
قدام البيت وقفت سنية تستنى عرفة يجيب العربية وهى زرابينها طالعة
جاب العربية وركن قدام البيت وهو بيقولها
: اتفضلي يا امي
هبدت نفسها على الكرسي ورزعت الباب وهى بتقوله
: توبة ان كنت اجي بيتك تاني هو انا عاد فيا صحة لحرق الدم ده لا والنبي ابدا ما يكون
: صلي عالنبي بس يا امي هو كان حصل ايه لده كله
: حصل ….!!!! لهو انت مكنتش قاعد وسامع ولا عامياك بالسحر اللي بتسقيهولك
: أستغفر الله العظيم تاني ياما تاني هنعيده تاني
: نعيد ايه ياخويا
: يا امي انتي ايه غيتك ان اكون متعكنن وتعيس في حياتي ايه اللي بيزعلك من انبساطي
دقت سنية على صدرها وردت عليه وهى بتبكي
: انا برضه يابني دنا منى عيني اشوفك متهني
وقف عرفة العربية وبصلها بغضب
: مش صحيح يا امي مش صحيح مانا كنت مبسوط مع ليلى والبنت كانت صغيرة وحلوة فضلت تناقريها وتقولي عاوزة أكسر جناحها عشان تبقى طوع
: يابني مانت كنت صغير وكنت بربيهالك عشان تبقى منكسرة
: طب اهى منكسرتش وطفشت بأمينة ياما وحاولت ارجعها ورفضت وانا سكت وقولت نصيب وخدت كريمة نقاوة عينك وقولت حلوة والعشرة هتحليها مش فاهم لازمته ايه كل ما تشوفيها نقرزة بالكلام وتهينيها قدام ولادها ليه كده يا امي
: هو انت يابني مبتشوفش ردها
: اديكي قولتي ردها يعني بترد على كلامك ترضيها لأختي عفاف ياما ترضي عسكرية تروح تهينها وتنكد عليها كل خميس كده يهون عليكي …؟
: انا يابني طب توبة ان كنت ادخل بيتك
: ياستي ما تدخلي واشيلك على راسي من غير نقرزة بالكلام وتعويج ده انتي حتى علا العيلة مسلمتش منك يا امي خلي شوفتك تفرح عيالي ده العيال بقو يخافو من يوم زيارتك
دور عرفة العربية وكمل الطريق على صوت نهنهة سنية
: انا ماليش بخت في ولادي ما اصلي ربي يا خايبة للغايبة بتي ماشية تحت طوع عسكرية وابنها وابني الكبير واخداه كريمة على جنب ده حتى بركات اخر العنقود ماشي ورا خطيبته وامها ومغمي عنيه انا ليا ربنا إهئ إهئ عليكي وعلى بختك يا سنية يابنت الوكيل دنا فنيت عمري عليكم
في البيت كانت كريمة بتسخن الاكل وندهت على ولادها
:تعالو ياولاد كلو براحتكم
مدحت : ياماما مبحبش الاكل المتسخن
علا وسمير : ولا احنا ياماما
كريمة : بلاش دلع هو اصلا ملحقش يبرد
سمير : هى ليه تيتة كل مرة تعمل خناقة ياماما هى بتحبناش؟
كريمة : لا يا حبيبي ده اعز الولد ولد الولد بس هما الناس الكبار كده خلقهم ضيق معلش
علا : امال تيتة راضية مش بتعمل كده ليه
كريمة : عشان هى راضية فعلا يا حبيبتي ربنا مراضيها
مدحت : هو بجد أمينة هتيجي تعيش معانا هنا
كريمة: معرفش لكن ان جات هى اختك الكبيرة وده بيتها زي ماهو بيتك واهلا بيها اوعى تتضرر منها يابني
عرفة وصل امه لحد بيتها في قصر الطاهرة ورجع عالحلمية يسهر مع صحابه عالقهوة
قابله الحج فكري : مالك يا نجاحي شايل طاجن ستك ليه
رفع عرفة ايده يشاور للقهوجي : هات خمسينة وتعميرة يابني الله يرضى عليك
وبص للحج وقاله ابدا كالعادة: أمي ومراتي وخناقة كل جمعة
ضحك الحج فكري مع أنفاس الدخان وهو بيقول : اما نسوان فاضية امال لما يعرفو بقى بحكاية بيت عين شمس واللي فيه
عرفة : بس يا حج الله يكرمك النخورة بتجيب ورا
وفي مكان تاني
أمينة: مما انتي بجد هتوديني اعيش عند ابويا
ليلى : والله يابنتي ان كان عليا مرضاش ابدا لكن ستك سنية مصممة
أمينة وهى بتبكي : ياماما انا كش عاوزة اعيش بعيد عنك خليني معاكي والنبي
ليلى : يا ضنايا يابنتي منها لله ستك بوظت حياتنا اول وتاني انما ولا يهمك انا هتصرف
باليل رجع عرفة البيت متأخر الولاد نايمين والدنيا هس هس دخل على البلكونة علطول لقى كريمة قاعدة زي عادتها حاطة عدة الشاي قدامها ومولعة الوابور ابو شرايط وحاطة عليه البراد وقدامها حزمة نعناع أخضر في وسط الكوبيات المرصوصة
وقالت من غير ما تلتفت: حمدلله عالسلامة يابو مدحت
: تسلمي ياست الستات ايه عاملالي شاي ولا مخاصماني بقا
: لا عيشت ولا كنت لما اخاصمك ياخويا هو انا ليا غيرك
ومدت ايدها قطعت عود نعناع في كوباية وصبت فوقه الشاي وناولته الكوباية وهى بتقوله : خد يا حبة عيني
: كريمة انا مش عايزك تزعلي من امي
: يوه ياخويا لهى اول مرة ما خلاص كلمتين وراحو لحالهم قولي البت عاملة ايه
: كويسة بس ياعيني اتنكدت لما ستها قالتلها هوديكي تعيشي عند كريمة
: معلوم طبعا حد يسيب امه وتلاقي امك برضه قالتلها هتخدمي كريمة وعيالها
: دهدي انتي كنتي معانا ولا ايه
رقعت ضحكة وهى بتقوله : هو انا تايهة عن امك وكلامها
ان منكدتش عالخلق يجيلها كرشة نفس
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية بيت النجاحي)
