رواية بنت امينة الفصل الخامس عشر 15 بقلم شيماء عبدالحكم عثمان
رواية بنت امينة الجزء الخامس عشر
رواية بنت امينة البارت الخامس عشر
رواية بنت امينة الحلقة الخامسة عشر
شيرين افتكرت ترجيها وتوسلها لقاسم وحازم اللى كانوا بيتفننوا بتعذيبها .قاسم وخد جزائه .طب وحازم ……..؟
حازم اللى كان في بينهم حاجات كتيير . وذكريات اكتر . اه حازم شخص سيئ . لكن مش بسوء قاسم ..ومتنكرش انها كانت مضايقه انها رفعت القضيه . وكان ضميرها بيأنبها . بس دلوقتي عندها فرصه تعفي وتسامحه وتتنازل قبل ما الوقت يفوت فضلت تفكر طول الليل وما نامتش ابدا وتاني يوم كانت اخذت قرارها راحت لسليمان عمران وقالتله ان هي هتتنازل حاول كثير معاها يقنعها ان هي كده بتجيب حقها من حازم لكن رفضت وبشده وقالت له كفايه كده مش هنسى ان كان في بيننا ذكريات وكنا في يوم من الايام زي اي زوجين وبالفعل راحت شيرين ومعاها سليمان عمران واتنازلت عن القضيه واسقطت حقها…
سليمان : ممكن اعرف احنا قاعدين مستنيين ايه مش خلاص عملنا اللي انت عايزاه واتنازلتي مستنيه ايه ثاني
شيرين : هقابل حازم يا سليمان في بينا كلام لازم اقوله له.
سليمان بضيق : بينكم انتم بقى مش بيني وبينه انا بصراحه مش هقدر اقعد واستناه واشوف وشه بعد اذنك( وقام سليمان وخرج من الغرفه اللى شيرين منتظره حازم فيها)
بعد دقائق باب الغرفه خبط دخل احد الضباط ومعاه حازم اللي اول ما شاف شيرين اتسمر مكانه كان لابس البدله البيضاء طبعا اتضايق انها شافته بالمنظر ده وهي كمان اتضايقت جدا جدا ما كانتش تتمنى ابدا تشوفه بالوضع ده قامت وقفت في مكانها مع تقدمه ليها والضابط اللي احضره للغرفه سابهم مع بعض شويه وخرج….
حازم قعد قصادها: اخر حد كنت اتوقع اشوفه هنا ،،،جيتي ليه ؟؟؟ولا انت جايه تشمتي فيا …
شيرين : جيت اقول لك بنفسي اني اتنازلت عن القضيه
حازم بسخريه : تصدقي فيكى الخير والله… تعرفي انك خلفتي ظنوني… بس تعبتى نفسك كان ممكن المحامي بتاعك يقوم بالمهمه دي زي ما كلفتيه يرفع القضيه …
شيرين بسخريه : بتتكلم وكأني انا بس اللي اذنبت في حقك مع انك لو فكرت شويه وبطلت غرورك ده هتتلاقي ان اللي عملته ده رد فعل لعمايلك معايا اللي من واضح جدا انك نسيتها !!!
حازم بجمود : اتنازلتي ليه ؟؟؟ ما اخذتيش حقك ليه !
شيرين : انت عارف ان القضيه لو اتحكم فيها مش هينفع اتنازل بعد كده
حازم بسخريه : امم . ضميرك انبك صح او يمكن سرحت فيا وافتكرتي لحظه حلوه جمعتنا مع بعض
شيرين بثقه : تصدق اه افتكرت فعلا لحظه حلوه شفعتلك عندي.مش زيك دوست على كل حاجه حلوه ما بينا ودوست عليا انا كمان…وتابعت بغرور .. والدتك اترجتني وكانت شويه وهتبوس ايدي عشان اتنازل واخرجك وكفايه عليك المصيبه اللي اخوك حبيبك غرقك فيها…
حازم بغضب : جيتي هنا عشان تقولي لي كده شمتانه فيا زي ما قلت ..
شيرين : جيت هنا عشان اقول لك اتنازلت عشان مش هقدر اتحمل ذنبك لكن حقي انا مش مسامحه فيه ومش هاخده بالظلم ربنا هيجيبه لي
حازم بغضب : وحق ابنى اللي انت قتلتيه في بطنك عشان ما يربطكيش بيا مين اللي هيجيبه.
شيرين بحزن : رغم كل اللي عملته فيا انا جربت اسامحك عارف ليه عشان خاطر ابني يوم اللي عرفت اني حامل قررت ابدء معاك بدايه جديده واول حاجه حضرتك عملتها انك ما صدقتنيش وهديت كل حاجه في لحظه ومع ذلك قلت لما يعرف الحقيقه لوحده هيصدق عملت ايه يا حازم بعد ما اتاكدت بنفسك من صدق كلامي واللي مها حكيتهولك
(حازم بص لها بتساؤل وكانه بيقولها عرفتى ازاي) تابعت ما تستغربش حسام اللي كان بيحقق معاها لما اتحولت على النيابه وهي اللي حكت له كل حاجه لما ضغط عليها وسالها…وببكاء .. انا نسيت كل الاهانه نسيت كل الضرب والبهدله اللي حضرتك
عملتها فيا وحطيت لهم اعذار تخيل عملت لك مبررات واقنعت نفسي بيها انك كنت مجروح وغضبان مني وحملت نفسي السبب لكن اللي ما لوش عذر عندي ابدا ولا يمكن يكون لي اي مبرر انك تطلقني بكل سهوله قلتها واتخليت عني في لحظه
انا ما تخلتش عن ابني زي ما انت فاهم ما قدرش يتحمل وجوده فى رحمى وانا كل خليه فيا كانت بتنهار انا كنت بنزف بنزف وجع والم وقهر كنت بنزف دموع وجرح انا خسرت يا حازم انا اللي خسرت …خسرت كتير قوي خسرت ابني وخسرتك وخسرت شغفي للحياه كل حاجه بتمر عليا احساسي معاها مش بيختلف احساس واحد مش حاسه باي حاجه وكل ما اقول لنفسي خلاص بكره جديد برجع لنقطه البدايه تاني كم مره حسيت فيها ان خلاص تجاوزت محنتي واتعافيت وفجاه لو سرحت وافتكرت بنهار،، بنهار لوحدي عشان مش عايزه اوجع قلب حد عليا،،
حازم بحزن وبعد ما كلام شيرين اثر فى قلبه : اوعي تفتكري ان حالي احسن من حالك كثير بالعكس لو انتى زعلانه عشان انا فرطت فيكى وسبتك بسهوله احب اقول لك اني سبت قلبي معاكي يمكن صعب تصدقيني لكن دي الحقيقه انا الندم بيلف حبله حوالين رقبتي ندمت على كل حاجه حصلت من البدايه كنت فاكر ان لما اتجوزتك غصب عنك اني بقربك مني لكن انا طلعت غبي وبعدتك عني ومش بس بعدتك انا بنيت بيني وبينك الف سور وسور ..
شيرين بدموع : انا مش جايه هنا عشان اسمع منك الكلام ده انا جيت اقول لك اني اتنازلت عن القضيه واديلك ده ( طلعت عقد التنازل ومدت ايديها بيه )
حازم بأستغراب : ايه ده
عقد التنازل اللى سليمان مضاك عليه.. املاكك ورجعت لك …
حازم هنا ضحك ضحك جدا وقال وهو بيضحك : تصدقي بقى ان سليمان خدمني في النقطه دي بالذات وهو فاكر انه بيضرنى
شيرين بعدم فهم : ازاي ؟؟
حازم : انتى ناسيه انهم ا تحفظوا على كل ممتلكاتنا خليه معاكي ..
شيرين برفض: لا ما ليش دعوه خليه مع المحامي بتاعك يتصرف هو فيه..
حازم : اسمعي الكلام وما تنشفيش دماغك روحي سجليه في الشهر العقاري وانا هخلي المحامي بتاعي يساعدك في الاجراءات دي خليه باسمك حاليا ( شيرين مستغربه منه) ايه مستغربه اني واثق فيكى مش كده انا ما بثقش في حد في الدنيا دي قد ما بثق فيكى على فكره،،،، وبعدين يا ستي حتى لو كنت خدتيهم كنتى فاكراني هزعل ده ولا حاجه قصاد اللي عملته فيك …
شيرين بتصميم : لا برده اتفضل عقدك اهو اعمل فيه اللي يريحك عن اذنك
ويا دوب لسه هتتحرك من قدامه مسك ذراعها وقال : وانت هتعملي ايه دلوقتي
شيرين باستغراب اعمل ايه في ايه مش فاهمه !!!
حازم : سليمان افندي الاهبل بتاعك ده ..هيثبت وضعك ازاي حضرتك بغبائك ما معاكيش اللي يثبت دلوقتي وضعك لا انت كده متجوزه ولا مطلقه … اساليه بقى مرتبها ازاي عامل نسخه من العقد العرفي ولاهيعمل ايه تانى !
شيرين بلامبلاه وعدم اهتمام : ما سالتوش على العموم عادي مش فارقه كتير ..
حازم : خلاص انا هخلي المحامي بتاعي يكلمه ويتفقوا يشوفوا حل للموضوع ده..
شيرين : على فكره انا طلبت من سليمان يمسك القضيه بتاعتك اللى اخوك مورطك فيها …سليمان الوحيد اللي هيقدر يخلصك منها ما ترفضش لمجرد الرفض خذ بالك انا اقنعته بصعوبه جدا يا ريت انت كمان توافق ..
حازم بحب : عملتى كده ليه ؟؟؟
عشان مامتك ،،، مامتك مش قادره على مسؤلية قاسم لوحدها ومحتاجاك معاها ،،،،، وبحزن.. دلوقتي انا دوري انتهى معاك وكلامي معاك خلص ،،،
حازم بحب : اوعدك اول ما اخرج من هنا لينا كلام تاني مع بعض الكلام لسه ما خلصش ولو اللي انا شايفه في عينيكى ده صحيح يبقى انتى لسه مكرهتنيش ..
شيرين اتبسمت بحزن : اللي بيحب يا حازم ما بيعرفش يكرهه ،،،،وبعدين لما تخرج من هنا انا مش هكون موجوده ..
حازم بصلها بتركيز وتفاجئ بردها وسالها ليه
شيرين انا قررت اسافر وابعد عن هنا ابدء حياتي من اول وجديد في حته تانيه….
…………………………………………………………………..
تسافررري !!! قالتها امينه بحزن وصدمه لما شيرين قالتها هي كمان( احنا كده دلوقتي اتنقلنا الفيلا تحديدا اوضه شيرين)
شيرين : ايوه يا ماما هسافر انا هنا بتخنق مش قادره اعيش عايزه ابعد ..
سها بحزن : ليه يا شيرين مش انت كنت خلاص اتجاوزتي ازمتك ..
شيرين : انتوا كنتوا فاكرين كده او انا حبيت اوصل لكم كده بس الحقيقه لا انا لسه مش قادره اتجاوز ازمتي ( هنا بكت )
نادين : معقوله يا شيرين لسه بتحبيه !!! بعد كل اللي عمله فيكى؟؟ طب ليه .. ازاي ؟
شيرين : عشان انا مش آلا . انا بني ادم وممكن جدا اكون اساءت اختياري وحاولت على فكره.. حاولت اكرهه لكن ما قدرتش ما عرفتش ..حاولت اتظاهر اني نسيته .برضو مقدرتش ..
نادين : طب وادهم هتقولي له ايه
شيرين : هو فين ادهم ده ؟ قال لي شهرين بقوا سته ويمكن على راي باباه يبقوا ست سنين وبعدين ادهم بالنسبالي صديق مش اكثر ممكن يكون لي كاخ لكن عمره ما هيبقى اكثر من كده ادهم رجع لابنه ومراته وحل مشاكله معاها وده شيء يسعدني ويفرحني على فكره . ربنا يوفقه …
امينه لسه مصدومه وناويه تسافري امتى بقى
شيرين : ان شاء الله بعد فرح نادين ،،، ماما حبيبتي ،،، سيبيني اخوض التجربه …
امينه بحزن يعني قررتي تكملي حياتك لوحدك بعيد عني ليه ما بدءتيش هنا مش يمكن تقابلي حد تاني يستاهلك ويستاهل قلبك…
شيرين : ليه يا ماما رابطه الحياه بوجود راجل ليه لازم اتجوز عشان تكوني مطمنه عليا انا ممكن ابقى لوحدي وابقى كويسه جدا مش لازم الامان يبقى شخص ..
امينه بحزن ودموع عشان انت لسه صغيره ما عشتيش اللي انا عشته انتى يا حبيبتي متقويه بينا عشان احنا حواليك صدقيني يا شيرين انا لو جرى لي حاجه غصب عنكم الدنيا هتاخدكم من بعض وهتصفي في الاخر لوحدك انا مش عايزاكى تحسي اللي انا حسيته انا كنت بقفل بابي عليكم واتمنى الليل يخلص عشان كنت بمل من وحدتي وما رضيتش ادخل عليكم راجل غريب يتحكم فيكم ولا يضايقكم .وبالنهار وانا في شغلي كنت بحس بنظرات الناس ليا بتخترقني انت هتبقي معرضه لكده هتبقي مطمع بالنهار وبالليل هتبقي في قلق. عشان الوحده قلق .. اوقات كتير كنت بدخل اوضتي واطلع صوره ابوكي واقعد اتكلم معاه واحكي له واشكي له واعيط واضحك لحد ما النوم يضحك عليا ويغلبني هتبقى محتاجه تفضفضي مع حد وقت زعلك وهتحتاجي لحد يشاركك فرحك وضحكتك. عدت الايام والسنين لحد ما كبرتى انتى وبقيت اشاركك كل حاجه بقيت افضفض معاكي واعيط واضحك معاكي بقيتي صاحبتي واختي مش بس بنتي… دلوقتي عايزه تسيبيني وتمشي بكل سهوله ..
شيرين قامت حضنتها وبكت . وقالت : عمو امين معاكي يا امينه هيملا الخانات الفاضيه دي واعتقد يعني ان ده فعلا اللي يتقال عليه العوض الجميل بعد الصبر الطويل…
وبعدين يا امينه ظروفي تختلف عن ظروفك انت ما كنش عندك اخوات ولا كنتى تعرفي حد انا عندي بنوتين زي القمر هما اخواتي وظهري وسندي وعندي حضرتك وعمو امين وحسام وفاتن وسليمان وادهم كمان كل دول اصدقائي …
امينه بحزن : ولو كل دول مش هيبقوا معاكي في ضلمه الليل …
شيرين بهزار : امينه رزق.. انا مش هترهبن دي فتره بس لحد ما اقدر اقف على رجلي واقدر افتح قلبي للحياه من تاني ..
نادين بتأثر وهزار : منك لله يا شيرين بعد ما كنت بعد الايام وبتمنى تجري عشان اتجوز دلوقتي هتخليني اتمنى ان اليوم ده ما يجيش ابدا وتابعت بغيظ منك لله يا حازم يا ابن سوزي انت السبب …
عدت الايام،،، ايام جت،، وايام راحت ،،حازم لسه ما خرجش سليمان مسك قضيته بس متحفظ شويه من ناحيته قاسم وضعه بيسوق ونفسيا بيتدمر كل ما يبقى عايز حاجه لا عارف ينطق ولا قدر يشاور وبقى يبكي زي الاطفال وسوزي تبكي منه وعليه وجه يوم فرح نادين والكل مستعد نادين طلت بالابيض وكانت زي الملايكه امينه فرحانه ببنتها الصغيره لكن فرحتها مش كامله بسبب شيرين…
كتبوا الكتاب وكان امين وكيلها وبدات مراسم الاحتفال والفرحه سها كانت خلاص بطنها وصل لحلقها زي ما بيقولوا ومع ذلك مش مبطله تنطيط وحسام كل شويه يشدها يوقفها.
. فاتن كانت موجوده مع خطيبها اه هي كمان اتخطبت لدكتور زميلها استلم شغله جديد في المستشفى اصطاف البنات اللي بتشتغل في سلسله المطاعم كلهم كانوا موجودين وعملوا فقره ليهم يشجعوا بعض وغنوا لامال ماهر (اللي قادره)
الاجواء كلها كانت سعاده وفرح وابتسامات من القلب بداوا احتفالهم باغنيه خاصه معانيهالفئات كتير كلها سعاده وفرحه اغنيه عمرو دياب (شكرررا من هنا لبكره ) وكل كوبليه فيها بيتهدي لفئه معينه غنوها بنات امينه مع بعض هيصوا واتفاعلوا واتاثروا كل حاجه كانت بتقودها مشاعر حقيقيه وصادقه قلبوها شعبي .مع اغنيه ( اللى جاي بتاعنا ) .
بدئوا برقصهم السلو . كل كابلز مع بعض ما عدا شيرين اللي فضلت لوحدها تماما افتكرت كلمه مامتها في الاخر هتصفي لوحدك
خرجت لوحدها تشم هواء البحر جه سليمان جنبها وبمناغشه قالها : هربتى ليه ؟؟
شيرين ابتسمت : ما هربتش بس قلت على ما تخلصوا فقره الرومانسيه بتاعتكم دي ما بقاش عزول … عشان انا سنجل وكده
سليمان كمان ضحك : لا وانتى فارق معاكي قوي مش كده!!
شيرين ضحكت: جيت ورايا ليه ياللي فاهمني اكتر من نفسي ..
سليمان بحزن: لسه مصممه تسافري وتبعدي عننا كلنا !!
شيرين اتنهدت وقالت بهدوء: انت اكتر واحد عارف اللي عشته كنت معايا لحظه بلحظه من اول ما الحكايه بدءت ولغايه دلوقتي
سليمان بجديه : طب حيث كده عايزك تراجعي نفسك الفرصه لسه قدامك!
شيرين فهمت تلميح سليمان : يعني عايزني اعمل ايه اروح اقول له خليك معايا.متسبنيش
سليمان : انا شايف ان الراجل عمل اللي عليه وقدم السبت ..
شيرين بسخريه : سبحان مغير الاحوال!! ايه سليمان بيه شيفاك بقيت حمامه سلام ووقعت في حبه كمان ..
سليمان ضحك : بصراحه اللي عمله يوم خروجه واصراره قبل ما يروّح بيته كبروه في نظري وخلاني اشوفه بنظره تانيه
شيرين بوجع : طب هو هيعمل ايه دلوقتي هينفذ وعده ولا ما صدق …
سليمان بمراوغه : هو انا ليه حاسس انك بتتمني من جواكي المره دي بالذات يخلف وعده وما ينفذهوش على العموم يا ستي انا من رايي نصبر شويه الراجل اخوه لسه متوفي ما كملش اسبوع يعني لسه ما فاقش لنفسه
شيرين بحزن : سبحان الله مين يصدق انه في نفس الليله حازم يروح بيته يلاقي اخوه بيموت
(اه قاسم مات قبل فرح نادين باسبوع وهنعرف دلوقتي ازاي)
سليمان سبحان الله تدابير ربنا (هو على كل شيء قدير) يلا يا شيري يلا قبل ما يلاحظوا غيابك زمان بسبس قلبه الدنيا عليا دلوقتي…
شيرين بامتنان :سليمان بيه انا بشكرك من قلبي على كل حاجه عملتها معايا ،،،كل حاجه ،،،وقفتك معايا في محنتي وحتى وقوفك جنب حازم رغم انك كنت متضايق منه ومش طايقه بس عملت ده علشان خاطري انا …
سليمان بهزار : وحياتك ومش طايقه اكتر دلوقتي بس كله عشان خاطر عيونك يا شيري يهون…. وبعدين انا خلاص شديت ودنه وعلمته الادب وعرفته تمامه ما اظنش انه يتعوج تاني …
شيرين : اتمنى انه يكون اخذ درس من محنته واتعلم وما يكررش اخطائه تاني…
سليمان بتأكيد : اكيد اكيد . ده كان درس قاسي اوى . وخسّروا كتير …
( بعد مرور ثلاث ساعات) انتهى الفرح والمعازيم كلهم مشيوا ونادين وجوزها راحوا على عشهم شيرين كانت مجهزه شنطتها وخلاص طيارتها قبل الفجر ،،،سلمت عليهم وكانت بتبكي انها خلاص مودعه اسرتها وكل حاجه بتربطها بهنا ما معهاش حد غير قلبها قلبها اللي مشغول بحب حياتها اللى غصبا عنها ما قدرتش تمحيه وصلت المطار مع اسرتها اللي صمموا يوصلوها وكانت بتتلفت حواليها بس من غير فايده.. اللي كانت منتظره تشوفه ما جاش …
سليمان كان معاها وقال لها مش هيجي بعت لك معايا سلام وبيقول لك ما تقلقيش اللي قال لك عليه هينفذه شيرين هزت راسها بحزن ودخلت من صاله المطار كان معاها سليمان خلصلها كل اجراءات سفرها ..وطلعت الطياره !
قعدت في كرسيها غمضت عينيها وحطت الهاند فري في ودنها وكانت بتسمع اغنيه لاصاله بتقول ايه…
[ وفكره اكمل وانا مش معاه ما بتجيش في بالي كأن الحياه خلاص واقفه عنده ورفضاني اعيش وبفضل مكاني وبستناه انا كل مدا بلاقي اللي فات مصمم ما يقلبش ليه ذكريات وبتاكد اني في غيابه ما ليش نصيب تاني ارجع احس بحياه]
كانت حاسه بكل كلمه وتقريبا كانت بتبكي وما حسيتش باللي قعد جنبها غير وهو بيقول لها لو سمحتى يا انسه ممكن تربطي الحزام عشان الطياره هتقلع . فتحت عيونها تستوعب صوت مين ده بس عيونها اتفتحوا على اخرهم من المفاجأه…….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية بنت امينة)
