رواية بنت امينة الفصل الثالث 3 بقلم شيماء عبدالحكم عثمان
رواية بنت امينة البارت الثالث
رواية بنت امينة الجزء الثالث
رواية بنت امينة الحلقة الثالثة
قاسم قدر يوصل للست امينه وبالفعل اتفق معاها تيجي القصر بتاعهم تعمل اكل العزومه . امينه متعوده لما بتتزنق فى الشغل بتاخد معاها بناتها .شيرين ..وسها علشان يساعدوها . وبالفعل راحت امينه ومعاها بناتها وبدئوا يجهزوا اكل العزومه كل ده وشيرين متعرفش انها فى بيت حازم .ولا تعرف ان قاسم عايز يوريها حجمها قدام عيله حازم ..
امينه بأستعجال : ها يابنات خلصتوا ولا لسه
شيرين : ياماما متقلقيش كله تحت السيطره
امينه : سها خلصتى الحلو
سها : خلصته ياماما .اطمنى بقا
شيرين : ياماما هو احنا اول مره نشتغل معاكى . احنا خلاص حفظنا
امينه : لا مش اول مره ،بس البيت اللى بدخله اول مره بحب اسيب بصمتى فيه .وابقي مميزه عن اللى جه قبلي واللى هيجى بعدى . عشان كده بحب كل حاجه مثاليه وانجز شغلي بأعلى جوده واقل وقت فهمتوا .
شيرين : بموووت فى ثقتك بنفسك يا ست امينه .
دخلت عليهم والده حازم وتدعي السيده سوزان
سوزي : ها ايه الاخبار طمنونى .كله تمام .
امينه : اطمنى ياهانم .كله تمام وزي الفل ..(سوزان بدئت تلقي نظرتها على الطعام وانبهرت بشكله وتزينه وبدئت تلاحظ ان كل بنت فيهم بتعمل حاجه معينه . وكانت فاكره ان البنات مساعدات امينه )
سوزان: واضح ان المساعدات بتوعك فاهمين شغلهم كويس .
امينه بأبتسامه حب : دول بناتى . (وبدئت تعرفها بيهم ) شيرين الكبيره وديه ليسانس حقوق .وسها الوسطانيه وديه فى طب اسنان . وعندى نادين الصغيره ثانويه عامه بس ديه مش بتطلع معايه عشان المذاكره .
سوزي بأعجاب : ماشاء الله ماشاء الله .واضح كمان انهم شطرين فى الدراسه زى الشغل بالظبط . وبتساءل انا ملاحظه ان كل واحده فيهم بتعمل حاجه معينه .
امينه : اه فعلا . شيرين شاطره اوى فى الصوانى والطواجن والحادق عموما . اما سها بقا الحلويات بكل انواعها .
سوزى بأبنهار : هايل . هايل . حلو ان انتو مقسمين نفسكم وعاملين نظام لشغلكم .وتابعت .. طب انا ضيوفى فاضلهم ساعه وهيوصلوا .
شيرين : اطمنى حضرتك .كل حاجه جاهزه .اول ما الضيوف يوصلوا السفرجى يقدر يجهز السفره على طول
سوزى بتردد : معلش ممكن تستني انتى واختك معانا شويه . لأن بصراحه مش كل الخدم موجودين .وهبقا محتاجه حد يقدم مشروبات .وهدفع اللى انتو عايزينه . (وديه كانت لعبه قاسم اللى قرر يدى اجازه للخدم عشان يجبر شيرين واختها يخدموا على الضيوف فى وجود حازم . )
شيرين بضيق : بس ده مش اختصاصنا . احنا مبنخدمش على حد . متأسفين جدا .
سوزان بترجي : انا متأسفه خانى اللفظ . بس اقصد اقول انى لوحدى وهبقا محتاسه اوى و محتاجه مساعدتكم معايه .من فضلكم …
امينه : خلاص ياهانم اللى حضرتك عيزاه .اطمني (شيرين نظرت لأمها بأعتراض)
سوزان : ميرسيه اوى . ومتقلقيش انا هدفع اللى انتى عيزاه … وتابعت بتردد بعد اذنك لو مش هتقل عليكم ممكن حد يعمل فنجان قهوه مزبوط لأبنى وانا هاجي اخدها له .
امينه بصت لشيرين وقالت : اعملى قهوه للبيه ياشيرين .
شيرين بغضب : حاضر … شيرين فعلا عملت القهوه وخرجت بالصنيه تدور على سوزان لكن مشفتهاش حد من الجارد كان شايل اشياء كتيره فى ايده . قالها البيه فى المكتب . وشاورلها عليه . اتجهت نحو المكتب وطرقت الباب . وفتحت ودخلت بالقهوه كل ده وهو مديها ضهره وبيتكلم فى الفون لف جسمه وبقا مقابلها وبينهم المكتب .واقف بكل هيبته اللى تخض . وثباته اللى اشبه بالبرود .اول ماعينه جت عليها بصلها من فوقها لتحتها بتفحص شديد .شاف بنت جميله ولابسه محتشم جدا لبساها طويل وفضفاض . وشكلا هي جميله . وكانت لابسه مريول مطبخ . مرسوم عليه قبعة طباخ .حطت القهوه على المكتب شاورلها تقف مكانها .بصلها بأعجاب شديد
قاسم : انتى مين .بتشتغلي هنا جديد ولا ايه .
شيرين : مش بالظبط . انا هنا ليوم واحد فى شغل للمطبخ
قاسم بمغازله : واحده زيك انتى تقف فى المطبخ وسط البصل والتوم . والله ميصحش
شيرين بتحاول تقصر فى الكلام معاه : انا جبت لحضرتك القهوه . بعد اذنك . ولف وشها لسه هتخرج .
استنى عندك . قالها بعلو صوته ونبره محتده .انا لسه مخلصتش كلامى معاكى . عشان تمشي .
شيرين بثقه وكبرياء : حضرتك ملكش كلام معايه اصلا .انا جبت لحضرتك القهوه .ذوق منى لأن العاملين عندكم اجازه انهارده .. وده مش معناه انى بشتغل عندك وتدينى الأمر انى اقف عشان تكمل كلامك معايه .
قاسم ابتسم بأعجاب لتلك الشرسه وقال بهدوء : اسمك ايه . وتابع بسرعه . على سبيل التعارف مش اكتر .
شيرين : اسمي شيرين .وابقا بنت الشيف امينه .
قاسم سرعان ما تلاشت ابتسامته لما عرف ان ديه تبقا شيرين البنت اللى حازم بيحبها .وانها هنا بسببه لاحراجها قدام حازم .عقد حاجبيه وقال : خلاص تقدرى تروحي انتى لشغلك .(شيرين مستغربه من تعابير وشه اللى مقدرتش تفهمها )
يدوب بتلف عشان تخرج . اتفاجئت بحازم قدامها .حازم بص للصنيه الفاضيه اللى فى ايديها ولمريول المطبخ . غمضت عنيها بحزن وقالت بهدوء : حازم
حازم : شيرين . بتعملي ايه هنا .
شيرين ابتسمت بسخريه : انا هنا فى شغل مع ماما . يا حازم بيه . بعد اذن حضرتك .وخرجت من المكتب .اتقدم حازم بخطوات مهزوزه نحو قاسم وقال بغضب : عايز افهم هتستفيد ايه من عمايلك ديه .جايبها هنا عشان توريها الفرق بينا وتحرجها قدامى . ولا عشان تحسسنى بضعفي قدامها .
قاسم بحده : عشان اوريك هما فين وانت فين ياحازم باشا ولا نسيت مركزك ايه
حازم بغضب : لاء مش ناسي .فاكر كويس انا مين ومن عيلة مين وعارف مركزى ايه ..واللى شيرين فيه ده مش ذنبها والشغل مش عيب . وامها ست مكافحه وربتهم احسن تربيه . انت اللى عندك خلل
قاسم بسخريه : احسن تربيه .بتشغلهم معاها فى خدمة البيوت وتقولى احسن تربيه . فوق ياحازم البنت متنفعكش . ومستحيل اوافق تتجوزها على جثتى .
حازم بعناد : مش بمزاجك انا اللى اقرر مش انت .ديه حياتى وانا حر فيها .
قاسم بتحذير : انت كده هتقف قدامى . وهتطرنى اعمل كل اللى اقدر عليه عشان امنع الجوازه ديه ..
حازم بصله بغضب وتوعد ولسه هيتكلم .دخلت سوزان تبلغهم ان الضيوف وصلوا .
سوزان : حازم انت كمان هنا .كويس اوى . وتابعت …قاسم الضيوف وصلوا .
قاسم : طب تمام .. انتو جهزين !! يعنى كل حاجه تمام ..
سوزان : اطمن كله تمام . وتابعت بأعجاب . الست اللى انت جبتها ديه وقعت عليها فين . ماشاء الله عليها هي وبناتها كتلة نشاط . خلصوا كل حاجه مطلوبه منهم . على اكمل وجه (حازم رمق قاسم بغضب ) وتابعت سوزان تتصور ياقاسم ان البنت الكبيره محاميه والبنت التانيه دكتوره
قاسم بمفاجأه : دكتوره معقول ديه !!
سوزان : اه طالبه فى كليه طب الاسنان . وهي اللى عملت جميع اصناف الحلو لوحدها .بصراحه انا مشفتش كده هي فرحانه ببناتها وهما فخورين بأمهم جدا . وبيكافحوا كلهم وايديهم فى ايد بعض ،
قاسم بسخريه : ايه ياست سوزي .انتى وقعتى فى حب امينه وبناتها ولا ايه .
سوزي : بصراحه الست امينه ديه عظيمه جدا . انا اعجبت بيها وبأصرارها . ان بناتها يكملوا تعليمهم .وسط كل الظروف اللى مرت بيها ..
قاسم بخبث : طب بما انك معجبه بكفاح امينه اوى كده . تقبلي تجوزى بنت من بناتها لواحد من ولادك .
سوزي برفض قاطع : لاء طبعا مش معنى انى معجبه بيها . انى انزل لمستواها وتبقا حماة ابنى . (قاسم بص لحازم بسخريه )وتابعت سوزي . يلا بقا احنا بنتكلم هنا وضيوفنا لوحدهم . وخرجت سوزى . وحازم لسه هيخرج قاسم واقفه وهو بيقوله بسخريه : شفت بقا حبيت اوريك .انك ممكن تعجب بيها . تنبهر بيها . لكن ترفعها جنبك وتبقا مراتك . لاء كتير عليها .
حازم نظر له بلا مبالاه وكأنه مقلش حاجه . وخرج وقاسم وراه …. استبقلوا ضيوفهم بحفاوه شديده واخدوهم للسفره . وقاسم قعد يترأس الطاوله . وكان الضيوف اللى موجوده . اهل خطيبة قاسم والدها ووالدتها وشقيقها ..
هدي حماة قاسم بأنبهار : شكل السفره يجنن ياسوزي . تسلم ايديك .
سوزي : يسلم ايد اللى طبخوا . بصراحه فاقوا توقعاتى .
هدي : ده شغل مطاعم . انتى جايبه مطعم يطبخلك ولا ايه .
سوزي : لاء .ديه شيف وبناتها . بصراحه مفجأه .معرفش قاسم عرفهم ازاي واتفق معاهم . بس بصراحه كانت مفجأه بالنسبالى … وزي ما انتى شايفه شكل الأكل يجنن ..( كل ده وحازم قاعد وبيفكر فى كسرة شيرين ووجعها )
وفجأه شيرين دخلت ومعاها سها بصنيه كبيره وفيها بولات كانت فيها نوع شوربه كريمه معينه اختراع من امينه وبدئت شيرين ترص الاطباق قدامهم بدءا من قاسم اللى ابتسم بشر وهو بيبص لشيرين وحازم . وسوزي بتسئلها هو ايه ده ياشيرين
شيرين : ديه شوربه خاصه بماما . بتقولك هتعجبك جدا . (بمجرد ماشيرين اتكلمت فورا صوتها كان مألوف لشخص يدعي حسام وده شقيق فاتن خطيبه قاسم )
حسام بمفجاه : شيرين . ..شيرين مكنتش واخده بالها . وابتسمتله بهدوء . اهلا ياحسام .
حسام قام وقف فى مكانه : ازيك ياشيرين عامله ايه .
شيرين : من فضلك ارتاح ياحسام بيه . انا دلوقتى فى وقت شغل .(حازم بصلها بمنتهي الغيره وبيلعن ضعفه اللى خلاه مش قادر يقوم يرمى الصنيه ويمشى بيها من قدامهم كلهم عشان محدش يبصلها بأستصغار .)
حسام كان بيبص لشيرين بأعجاب انها متصالحه مع نفسها وبص لسها بأعجاب بس نظره مختلفه .. شيرين قدمت لكل الموجودين وخلاص كده انهت عملها .
شيرين : مدام سوزان احنا كده خلصنا شغلنا ..حضرتك تأمري بحاجه تانيه .
سوزى : بجد تسلم ايديكم ياشيري . الاكل يجنن .بلغي مامتك سلامى واشكريها عني .
شيرين بأبتسامه حزينه . احنت راسها قليلا للتحيه …ولسه هاتمشي وقفها قاسم .
قاسم بأستفزاز : لو سمحتى . انتى عارفه ان انهارده الخدم اجازه . فا لو فيه اي حاجه فى المطبخ محتاجه تنظيف ممكن تنظفوها قبل ما تمشوا .
شيرين غمضت عنيها بحزن ووجع . هي ممكن تكون بتتعرض لسخافات بس المره ديه مختلفه ، المره ديه المقصود انه يتقلل منها .حازم غمض عينه بغضب .سها لسه هتتكلم بأندفاع .مسكتها شيرين من ايديها وسكتتها ..
شيرين بأبتسامه وثقه عكس اللى جواها : اطمن ياقاسم بيه .ده شغلنا من زمان ومتعودين عليه . وعمرنا ماسبنا اي قذاره فى المكان اللى بنروحه ..احنا نضاف .نضاف اوى . (وطبعا المعنى شارح نفسه ) حضرتك تامر بحاجه تانيه .
قاسم ببرود : لاء شكرا تقدروا تمشوا انتوا . اه . على فكره انا حاسبت والدتك . ولأن الأكل عجب سوزى وطبعا ضيوفنا . انا راعتكم كويس . ودفعت لوالدتك اكتر من اللى طلبته .
شيرين بقهر ووجع : كتر خيرك يا قاسم بيه . ومشيت بسرعه من قدامهم . حازم كمان كان حاسس بقهر . بس مش عارف يقول ايه ولا يعمل ايه . شيرين مقدرتش توري نفسها لأمها بدموعها .ودخلت حمام الضيوف وانهارت باكيه .
حسام بغضب : ليه ياقاسم كده احرجتها . مكنش في داعي تقولها كده قدامنا . لعلمك كلنا عارفين ان شيرين متصالحه مع شغل مامتها ومش بتتكسف منه .
راشد العامرى وده والد حسام وحما قاسم : هي ديه نفس البنت اللى انت دايما بتكلمنى عنها ياحسام
حسام : ايوه يابابا هي ديه شيرين (حازم مكنش طايق يسمع كلمه ولا كان طايق يسمع اسمها بيتنطق على لسان حد )
قاسم ببرود : انت تعرفها منين يا حسام
حسام : شيرين كانت زميلتى فى الجامعه . انا وهي نفس الدفعه . كانت الاولى ع الدفعه وكانت مفروض تتعين معيده بس طبعا لو ليها واسطه .
راشد : حسام بيقول انها شاطره اوى فى شغلها . واتحايل عليها تشتغل معانا فى الشركه بضعف مراتبها . بس رفضت تسيب سليمان عمران .وقالت انه وقف معاها كتير وساعدها . فا مش هترد ده وتتخلى عنه
حسام لسه متضايق وقام من على السفره .
قاسم : على فين ياحسام لسه مخلصتش اكلك . ولا شيرين شاطره فى الدراسه بس والاكل معجبكش .
حسام بعفويه : لاء بالعكس الأكل حلو جدا . بس هشوف شيرين شكلها اتضايق من كلامك .(ومشى عند شيرين )
قاسم هنا ضحك بسخريه وبص على حازم اللى كان قاعد وهيولع نار من الغيره ،وقام هو كمان يشوف شيرين .
بس وقف فى مكانه لما قاسم قاله .على فين ياحازم انت مكملتش اكلك . حازم بصله بغضب وسابه ومشي .
حسام كان واقف مع شيرين وبيعتذرلها عن كلام قاسم السخيف .واتعرف على سها وامينه
شيرين : ديه مامتى ياحسام . واختي سها الصغيره
حسام بص لها بأعجاب : اهلا وسهلا ياانسه سها (سها اكتفت بأبتسامه )
شيرين : ده حسام ياماما كان زميلى فى الجامعه واول منافس ليا فى التقدير . وبقا وكيل نيابه
حسام بهزار : دايما متواضعه يا شوشو . وحضرتك برضو كنتي بتتفوقي عليا .
امينه بحب : اهلا ياحسام بيه . اتشرفت بيك
حسام : الشرف ليا انا طبعا . وبعد اذنك ممكن بلاش بيه ديه . وتابع . ايه ياست شيرين . اختفيتى ومبقاش حد يشوفك .
شيرين : انت عارف بقا شغلي فى المكتب . وزي مانت شايف كده . اوقات كتير بطلع مع ماما . فا مفيش وقت خالص .
حسام بأسف : انا بعتذرلك عن اللى قاسم قاله جوا .
شيرين بسخريه : عادي .بنقابل النوعيه المستفزه ديه كتير . مفكرتش فى كلامه اصلا ..
سها : شيرين يلا الكابتن رن عليا وجه بره
حسام : انا ممكن اوصلكم .
شيرين : مافيش داعي .زي ماسمعت كده كابتن اوبر وصل بره . خلينا نشوفك بقا . بعد اذنك . (وبتشيل الشنط مع سها . اخدها منها حسام ومن سها وخرج يوصلهم للعربيه )
مشيت امينه ومعاها سها وحسام . وشيرين كانت خارجه وراهم . نده لها حازم وقفها .
حازم بأسف وحزن ومش عارف يقول ايه : شيرين . ( شيرين بصتله والدموع فى عنيها)
شيرين قبل ماينطق تانى قالت : متقولش حاجه ياحازم . اخوك كتر خيره . خلانا نشوف الحقيقه انهارده . انا معنديش مشكله فى شغل امي . انت اللي هيكون عندك مشكله . واعتقد انت شفت بعينك اهو . قول لاخوك هو فعلا معاه حق احنا فعلا مننفعش لبعض . انت حازم باشا . وانا بنت امينه . من اللحظه ديه انت فى طريق وانا فى طريق . ..بس عيزاك تقول لأخوك حاجه على لسانى . قولوا انت مريض ومحتاج تتعالج . هو كان فاكر انه جابنى هنا عشان يكسرنى . بس ميعرفش انى قبلت من عينته كتير ولا بتأثر فيا . قولوا كمان ان الفقر مش فى الفلوس . الفقر فى النفوس بقله الرضا . وانا را ضيييييييه لأبعد الحدود
حازم : شيرين استني . لسه الكلام مخلصش .
شيرين بدموع : لاء خلاص الكلام كده خلص .وجاب اخره . بعد ازنك . وسابته ومشيت وهى بتسمح دموعها ..
(باااااك )
العربيه بتاعه الشرطه كانت وصلت للمديريه . وعربيه البوكس كمان وصلت . محمود ومعاه بعض افراد الشرطه بدئوا ينزلوا البنات من البوكس . واتحركوا كلهم للداخل .
حازم نزل من عربيته وفتح باب شيرين وقال بمنتهي الغضب : انزلي .
شيرين كانت سانده رأسها ومغمضه عنيها ومش بترد عليه
حازم قال بزعيق وغضب : ايه انتى كل ده مش سامعه بقولك انزلى يلا .. شيرين لسه مغمضه ومفيش رد .
السواق قرب من حازم وقال :حازم باشا شكلها غميت .حازم بلهفه مسك ايديها لاقاها متلجه …..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية بنت امينة)
