رواية بنتي فين الفصل السابع 7 بقلم مارينا عطية
رواية بنتي فين البارت السابع
رواية بنتي فين الجزء السابع
رواية بنتي فين الحلقة السابعة
حضنت شنطتي ورجعت لورا من الخوف كنت لازقة في الباب، كنت مرعوبة جدًا.
كان بيقرب مني ببطء.
_ أبعد عني.
“- أبعد عنك أزاي وأنتِ جيالي لغاية عندي”
_ لو مبعدتش هصرخ والم عليك الناس.
“- جربي، جربي محدش هيسمعك”
جريت بعيد عن الباب كنت شايفة البلكونة قصادي بس مقفولة جريت عليها وحاولت أفتح فيها كانت مقفولة خبطت عليها وفضلت اصرخ ولكن فجأة لقيته ورايا! وبيمسك إيدي.
زقيته بعزم قوتي، وحاولت أجري على الباب علشان أبعد عنه لكن فشلت..فشلت معرفتش!
كان سيطر عليا ومسك شعري وحاول يكتفني، ولكني! لكني عرفت أكون أقوى منه وأزُقه برجلي وأنا برجع أخبط وأصرخ على الباب وهدومي متقطعة من هجومه عليا.
“- بقى بتعملي كدة !”
ولسه بيقرب مني لمحت فازة فوق التلفزيون جريت عليها ومسكتها علشان أدافع عن نفسي.
ضحك بسخرية.
“- ودي بقى اللي هتعمل لك حاجة ؟ محدش هيقذنك مني”
_ لو قربت مني هق*تلك!.
قرب عليا بدون خوف منه، كان فكرني ضعيفة وجبانة لأن صوتي كان بيترعش وكنت بعيط بأنهيار وإيدي بتترعش ومش عارفة امسكها كويس.
وفي غمضة عين وهو بيقرب رزعتها فوق دماغه بقوتي.
“- ااااه، د*م د*م”
زقيته ووقع على الأرض وقع على ركبته وهو ماسك راسه.
جريت في كل حتة احاول أفتح الباب لكن مكنتش عارفة.
“- مش هسيبك، مش هسيبك”
لما وقع ريموت الباب وقع منه في الأرض، وهو كان مستسلم لأن الخبطة كانت شديدة، جريت عليه وسحبته وفتحت الباب! كان لسة بيقاوم علشان يمسكني.لكن أنا كنت أقوى..أنا فتحت الباب وخرجت!
شطنتي كانت متعلقة في رقبتي، علاقتها في رقبتي جايز تكون الحاجز بنا وتحميني.
قطعت على الرصيف بحضنها.
ببص في السما ومش عارفة ده أزاي حصل ليا! ومن ثواني بس كنت هضيع.
طلعت الموبايل
_ آلو روان الحقيني.
° في أية!
مردتش أرد.
صرخت في التليفون لأن صوتي كان بيروح.
تماسكت أعصابي وفتحت الفون وبعت لها اللوكشن.
وبعد شوية وقت لقيتها وصلت!
لاطمت على وشها.
° جميلة!
أترميت في حضنها وأنا بعيط
كانت بحاول تهديني بس جسمي كله كان بيترعش، ركبنا العربية وروحنا على أقرب كافية.
بعد مهديت وهي جمبي وطمنتني بوجودها حكيت لها الموضوع كله..
كانت ملامحها المرة دي غاضبة جدًا مني وكان باين عليها أوي.
° جميلة إنتِ غبية!! غبية !!
كان صوتها عادي أوي وهي بتزعق فيا.
° أنا المرة دي مش هاخدك في حضني أنا لو اطول اقت*لك بإيدي هعمل كدة.
عيطت اكتر وحطيت راسي في الأرض.
_ روان…أنا..
° أسكتي، أسكتي أنتِ كنتِ هتضيعي نفسك! أنتِ فاهمة أنتِ فاهمة!
_ روان وطي صوتك الناس بتبص.
° ملكيش دعوة بالناس، الناس أخرتها تبُص.
طب أفرض مكنش ده حصل كنتِ هتعملي أية؟ أفرض معرفتيش تعملي كدة! أفرض…
قطعتها في الكلام.
_ ربنا نجاني.
° ربنا مقالش تتصرفي تصرفات غبية فاهمة!! فاهمة ولا مش فاهمة يا جميلة! وكمان من ورايا طب قوليلي خديني معاكِ! جميلة أنتِ…
عيطت بحرقة.
_ خلاص أنا آسفة.
قامت من مكانها وطبطبت عليا، عيطت معايا على عياطي كانت بتحضني أوي.
° يا حبيبتي أنا آسفة بس..طب خلاص متعيطيش.
_ روان متزعليش مني.
° يا جميلة أنتِ صاحبتي وعُمري والله بحبك وخايفة عليكِ، علشان خاطري أسمعيني.
بصيت ليها وهزيت راسي.
قعدت جمبي وهي ماسكة إيدي..
° أنا عارفة انك في حالة صعبة و عارفة ان أهلك مفيش توافق بينكم، و عارفة أنك اتحطيتي في موقف صعب ومفكرتيش ولو كنتِ فكرتي لحظة مكنتيش عملتِ كدة، وعارفة كل ده والله أنا بحبك وعارفاكِ كويس.
بس يا حبيبتي لو عاوزة حقك وعاوزة تجيبه بحق ويدافع عنك حد فهو مش هيكون أي حد يا جميلة، كنتِ تقوليلي كنت هوعيكِ والله وهقولك.
مش اي حد يا حبيبتي كاتب كلمتين على الفيس يحسسك بيهم أنه شخص كويس وخدوم وهيساعدك، محدش هيساعدك في الخفا يا جميلة محدش هيعمل حاجة خير ويقول لك أوعي تقولي لحد علشان أعرف اساعدك زي ما هو قال لك.
ومحدش هيطلب منك فلوس مقابل مساعدة، ولا حد هيطلب منك تطلعي شقته علشان تديله الفلوس.
سكتت شوية وطبطبت على إيدي.
° أسمعي يا جميلة كلامي ومتخافيش، الموضوع منتشر قوي وناس كتيرة عارفة ده وعارفة أنه مبيكنش حقيقي وحتى ياستي نفرض أن في بنات تانية حصل فعلًا الكلام ده وكان حقيقي فـ في مؤسسات مخصوصة للبنات بيساعدوهم فيها و بيخلوا الاشخاص اللي عملوا كدة ميتعرضوش لهم تاني.
_ بجد!
° أيوة صدقني.
_ زي مين!
° هبعتلك كل الصفحات دي ولما تروحي تشوفيهم.
حضنتها.
_ يعني هيساعدوني!
° وهيجبولك حقك كمان.
_ أنا بحبك.
° ممكن لو بتحبيني بجد متعمليش حاجة من دماغك علشان خاطري!
أبتسمت لها وحضنتها.
° قومي يلا ظبطي نفسك وهدومك.
بصيت للساعة.
_ دلوقتي مش هلاقي حد في البيت، هرجع أروح علشان محدش يشوفني كدة.
‘دخلت الحمام أغسل وشي وإيدي وأظبط نفسي وهدومي، روان أدتني الجاكت بتاعها علشان البسه علشان كانت بلوزتي فيها قطعات.
مسحت كل دموعي اللي نزلت مني وحاولت أبين أني تمام و بخير ومحصلش أي حاجة وحشة ليا!
باستني من خدي.
° كدة قمر.
_ في حاجة باينه عليا؟
° لا متقلقيش.
مسكت إيدي.
° جميلة ممكن أتكلم معاكِ شوية!
سحبت شنطتي..
_ معلش يا روان سبيني الحق أروح دلوقتي علشان محدش يشوفني كدة.
إبتسمت ليا وقامت توصلني.
فضلت تتمشى معايا الطريق كُله وهو على لسانها.
” مش أي حد نأمن له”
” مش أي حد ممكن يساعدنا”
” ومش اي حد كاتب كلمتين على الفيس أحس بيهم أنه شخص محترم فـ اقوم مكلماه وحكايه له كل حاجة!”
” مش أي حد يقول ليا كلمتين حلوين هجري وراه لأنه ممكن يأذني”
” صاحب الحق صوته عالي وقوي مبيخفش!”
حفظتني كل الكلام ده وفهمتهوني.
جالها مكالمة تليفون وأضطرت أنها تستأذن وتمشي وتسبني قبل ما أوصل بشوية.
كنت بتمشى لوحدي وأنا خايفة! بس لا.
أقدر أقول لنفسي دلوقتي أني قوية، أنا مش ضعيفة..أنا عملت حاجة صعبة محدش يقدر يعملها.
كنت بردد جملة من كلامها ” صاحب الحق صوته عالي وقوي مبيخفش”
خلاص يا جميلة عرفت.
أنه صاحب الحق صوته عالي ومبيخفش!
طالما على حق هجيب حقي.
طالما على حق مينفعش أخاف.
مينفعش حد يستغلاني ويخليني ضعيفة.
أنا قوية!
طلعت الهاند فيري من شنطتي.
حطيتها علشان أسمع أغنيتي.
بس لحظي الوحش مشتغلتش،
دخلت عند السيبر اللي جمب بيتنا علشان أشتري واحدة،
“- يا داي النور يا داي الهنا”
أبتسمت له.
_ عاوزة هاند فيري يا سعيد.
“- أمرك يا ست هانم”
سابني واقفة شوية كنت ببص على موبايل جديد شكله كان حلو بصيت ليه وأتمنيت اغير تليفوني اللي بيبوظ كل شوية وبطاريته مبتقعدتش!
رجع بص ليا وأنا ببصله.
“- عجبك!”
خضني وقطع تفكيري.
_ هو أية ده!
“- الموبايل يا ستهم لو عجبك يعني أجبهولك”
سحبت منه الهاند فيري.
_ شكرًا يا سعيد بكام دي؟
لقيته بيلمس إيدي فرجعتها لورا بسرعة وبصيت ليه وعلى وشي علامات أستفهام.
“- لو عجبك من غير فلوس خالص”
رفعت حواجبي وبصيت ليه بإستغراب.
_ ومن غير فلوس لية؟
“- أنتِ متعرفيش أنتِ غالية عليا أزاي!”
سكت ومردتش أرد.. على كلامه وغيرت الموضوع.
_ بكام دي يا سعيد ولا أمشي؟
“- يعني قصدي….
بص عليا ولقيته بيميل على التربيزة اللي قدامه وبيسند على دراعه.
لفهالي في كيس ومد إيده ليا وبعد مقال ليا السعر وهو بيبتسم وباصص ليا.
“- أخبار تليفونك أية يا ست البنات!”
رديت بإستغراب.
_ تليفوني!
“- يعني لسة بيعلق، لية التاتش تقيل ولا الإسكرينة باظت تاني احنا في الخدمة هاتيه بس لعيون سعيد وهو يصلحهولك تاني وتالت ورابع!”
‘سحبت منه الكيس وإبتسمت بتكلف.
_ شكرًا.
خرجت من باب المحل، شغلت الهاند فيري لقيتها شغالة تمام فرجعت البيت ولحُب ربنا ليا ووقفته جمبي ملقتش حد في البيت، رميت كل حاجة في اوضتي ودخلت بسرعة تحت المياه.
كانت دموعي بتنزل معاها، مكنتش عارفة أوقفها.
مسحت المرايا اللي جه عليها غبار من المياه السخنة.
ولسه الدموع في عنيا، أتكلمت.
” صاحب الحق مبيخفش، صاحب الحق مبيخفش صاحب الحق صوته عالي”
رجعت امسح دموعي تاني، مش هتبقى الناس قاسية عليا واهلي وانا!
أنا مينفعش أكون قاسية عليا، مينفعش أخدني وأكمل ضرب في قلبي اللي مش قادر يقوم وياخد نفسه.
لازم أكون حنينة عليه.
لابست هدومي ووقفت أشكر ربنا وأصليله
” يارب، أنت عارف يارب أني معملتش حاجة وحشة وماشية تحت الحيط رغم معاملة أهلي ليا، أنت عارف أني بحبك وبخافك وبخاف أعمل حاجة غلط لتحاسبني أنت وحسابك انت صعب قوي لأنك بتدينا فرص كتيرة في الحياة وأحنا بنضيعها، بس ده كتير قوي عليا كتير وأنا معدتش قادرة أستحمل، أنا لغاية دلوقتي متماسكة ومفكرتش في الانت*حار ومش عارفة أزاي مفكرتش فيه لغاية دلوقتي، يمكن علشان روان بعتهالي تهون عليا..
بس يا رب لو حصل وم*وت نفسي تسامحني، ومتخلنيش أعيش في ن*ار على الأرض وفوق”
حسيت وكأن في طيب خاطر بينزل على قلبي حسيت أني كنت محتاجة أعمل كدة من زمان.
كملت كلامي.
” فتح عنيا يا رب وخليني أشوف كويس، متخلنيش ضعيفة والناس تدوس عليا يارب اظهر ليا الشخص اللي كان بيحاول يأذيني وبعده عني وخليه ينساني خالص أنا مش حمل بهدلة، قويني يارب ومتخلنيش اخاف من اي حاجة غيرك حتى أهلي قويني عليهم ومتخلنيش ضعيفة قصادهم! خليني أخد حقي باللي يرضيك”
خلصت صلاة وقعدت على الكرسي أفكر فضلت سرحانة شوية لغاية ملقيت روان بترن.
° وصلتِ؟
_ وصلت.
° حاسة أن صوتك أحسن.
_ أيوة الحمدلله أنا بقيت كويسة.
حسيت بمسدج على الموبايل
_ أستني يا روان.
فتحتها لقيتها واتساب.
كانت من رقم غريب معرفهوش، فتحتها لقيت ٣ صور ليا وتحتهم جملة ” أية رأيك لو وصلوا لأهلك؟ شوفي ممكن يعملوا فيكِ أية”
الصور مكنتش محملة بسبب النت بس عارفة خلفيتهم كويس.
حاولت احملهم لغاية ما حملوا!
دي صوري وأنا في البيت! دي صوري وأنا بلبس البيت ومنهم صورة اخدتها بعد ض*ربة امي في اليوم اياه، مخدتهاش بقصد ده الموبايل اللي خدها لما حاولت افتحه ومعرفتش بسبب توتري لأني كنت عاملة ببصمة وشي فـ أتخدت بغفلة!
أول ماشافني فتحت المسدج كتب ليا ” ولسة عندي صور تاني أحلى”
رجعت بسرعة للمكالمة بتاعت روان.
_ روان الحقيني.
° في أية تاني!
حكيت لها الموضوع كله.
° طب أهدي.
في المرة دي بالذات مكنش قلبي بيدُق، لأن صاحب الحق مبيخفش وأنا مش هرجع ضعيفة تاني علشان مكونش قاسية على نفسي زي ما كل الناس اللي حواليا وأهلي قاسين عليا وبيأذوني نفسيًا وجسديًا.
في المرة دي فكرت! كنت هتجنن من التفكير مين ممكن يكون عنده صور زي كدة!
وقعتها قعدت على الكرسي وأنا سامعة صوت روان بس في الحقيقة مش مركزة في أي حاجة هي بتقولها نهائي! أنا بفكر وبس.
وقتها حاجة غريبة كدة نبضت جوه قلبي ونورت عقلي وأفتكرت جملة سمعتها من ساعات قليلة!
“- يعني لسة بيعلق، لية التاتش تقيل ولا الإسكرينة باظت تاني احنا في الخدمة هاتيه بس لعيون سعيد وهو يصلحهولك تاني وتالت ورابع!”
ضربت على قورتي.
_ سعيد الو*اطي!!!
ردت روان فورًا.
° أية!!
_ أنا عرفت مين بيعمل كدة يا روان.
° مين!
_ سعيد..سعيد صاحب محل الموبيلات اللي جمبنا.
اتخضت اللي سمعته.
° بتهزري!
_ وربنا لأخرب بيته.
° جميلة أنتِ متأكدة!
_ أيوة.
° طب عرفتِ أزاي!
_ في اليوم اللي ماما ض*ربتني فيه ولأن طبعًا مكنتش واخدة نفسي منها والموبيل كان في جيبي ودايسه عليه شبه الموبايل حصله حاجة معرفش أيه هي، سعتها حاولت أفتحه مكنش راضي يفتح طبعًا لأني عاملة ببصمة وشي ووشي كان متبهدل فـ اضطريت احط الرمز ولأني مكنتش شايفة كويس فـ الرمز اتحط غلط وفي صورة اتاخدت ليا منه لأن انا عاملة كدة علشان لو حد في البيت حاول يمسكه ولا يفتحه أعرف.
اتنهدت وأنا بتكلم وخدت نفسي بطلوع الروح.
° كملي على مهلك.
_ بس وقتها الأسكرين اتد*مرت، وفتحته وكلمتك بالعافية.
° أيوة فاكرة انك قولتي ليا حاجة زي كدة.
_ روحت بعدها أصلحه لأنه كان التاتش بتاعه تقيل جدًا وبيتحرك مع نفسه دانا شكيت أن حد مراقبني.
وغير الأسكرين بتاعته طبعًا.
° وطبعًا وديته للعيل الص*ايع سعيد.
_ بالظبط ووقتها قالي ساعة وتعالي خديه علشان محتاج موال وأنا وقتها عقلي مكنش فيا فسبتهوله ده غير طبعًا أن وقتها شيلت الرمز لأنه قال ليا كدة علشان يعرف يظبطه!
° ينهار!!
_ هو والله هو.
° طب أية خلاكِ تفكري كدة دلوقتي.
_ لحسن حظي روحت له أنهاردة أشتري هاند فيري وكان موجود وكلامه مكنش مظبوط وسألني أية أخبار الموبايل ولو باظ تاني تعالي والكلام ده.
° اااه يا حيوان.
_ أنا عاوزة حقي منه يا روان، عاوزة أشفي غليلي.
° جميلة أقفلي بسرعة بسرعة هجيلك دلوقتي.
_ لية في أية!
° بقولك أقفلي.
مفهمتش هي عملت كدة لية بس قفلت معاها بصيت في الوقت كنت خايفة لاحد من أهلي يجي وده مش وقته خالص.
وبعد وقت قليل لقيت الباب بيخبط فتحت لها ولسه هتكلم لقيتها بتحط إيدها على بوقي.
وبتشاور ليا إني أديلها الموبيل من غير أي كلمة.
ادتهولها.
قفلته فصلت الواي فاي خالص وطلعت لازق من شنطتها وحطت على الكاميرات اللي فيه.
وسابته برة ودخلت بيا الأوضة.
° لربما يكون مه*كر الموبايل.
أتخضيت واتفزعت.
_ ينهار أسود!!
° متقلقيش يلا ننزل.
_ هنروح فين!
° هنتأكد بنفسنا.
نزلنا أنا وهي من البيت، وروحنا عند محل قالت ليا أنه يعرف باباها ومضمون وشرحنا له الموضوع وشاف الموبايل وعملت حاجات فيه مفهمتهاش.
وبعدين طمنا.
“- متقلقوش مفيش حاجة”
سألته.
_ يعني مش ه*كر؟
“- لا متخفيش الشخص اللي خده ده اغبى من كدة هو بس عاوز شوية حاجات زي داتا وكدة على الموبايل علشان يهددك”
_ حضرتك متأكد!
“- أيوة والله يا بنتي متخفيش مفيش خاجة”
_ الحمدلله.
أطمنت شوية وشكرت ربنا كانت روان بتبص عليا بإعجاب.
_ بتبص ليا كدة لية؟
° مبسوطة أنك طلعتِ ذكية مش غبية زي ما كنت عارفة.
ضربتها على كتفها.
_ وقته ده! وقته!
ضحكت.
° طب يلا ناكل.
ضربت كف فوق كف.
_ يا شيخة حسبي الله.
° بس طلع صاحبي جامد والله.
_ يا روان دي أشارة من ربنا، والله اشارة أنا صليت كتير قوي بعد ما روحت بجد أنا بحب ربنا قوي.
° طب وحياة ربنا لتعزميني جعانة.
بصيت ليها ورفعت حواجبي.
_ ياشيخة أية ده ياشيخة!
روان الريشة الخفيفة اللي مهونة على قلبي، شبه نسمة الريح اللي ريحتها حلوة اللي بعرف أخد نفسي منها.
_ هنعمل أية دلوقتي!
° هناكل.
_ خفي، خفي بدل ما أزعلك.
° خلاص يووه.
طلعت تليفونها وورتني كل الصفحات اللي تخُص المرأة اللي ممكن اكلمهم.
_ مين أسرع في الرد؟
° بُصي دي!
وفعلًا كلمتهم وشرحت لهم الموضوع كله من اوله لأخره وطلبوا مني كل بيانات الأشخاص اللي أعرفها والباقي عليهم وبالفعل ساعدتهم بيها كلها وطمنوني.
حسيت أني بقيت أهدا شوية بعد ما كلمتهم وحسيت إني جاهزة إني اعمل محضر عادي جدًا!
بعدها بوقت في بنت كلمتني تبعهم وقالت “ليا بعد ما نزلنا البوست تبعك في حد تواصل معانا وساكن في نفس المنطقة اللي الشاب كان فيها اللي كان طالب مني فلوس، وهيساعدنا أكتر في أننا نوصله ومحتاجين يقابلوني”
كنت مفهماهم كل حاجة ومفهماهم ان عندي خوف اعمل أي محضر بسبب أهلي..
تالت يوم من مكالمتها كنا متقابلين أنا والبنت دي وواحد من المؤسسة وشخص تالت مكنتش شايفه ملامحه لأنه مديني ضهره.
وروان طبعًا اخدتها معايا.
_ روان أنا قلقانة.
مسكت إيدي.
° أنا معاكِ.
وصلنا لعندهم وأتصدمت لما شوفته شهقت من الخضة.
_ أنت !!
رد بصوت عالي.
= أنتِ!
روان أتكلمت.
° أنتوا تعرفوا بعض؟
رديت بإبتسامة.
_ أستاذ آدم مش كدة؟
إبتسم وهو بيمد إيده ليا.
= لسة فكراني يا آنسة…
_ اللي عملته حضرتك ميتنسيش.
جميلة اسمي جميلة.
‘إبتسم.
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية بنتي فين)
