رواية عانس الفصل الثالث 3 بقلم إيمان شلبي
رواية عانس الجزء الثالث
رواية عانس البارت الثالث
رواية عانس الحلقة الثالثة
فاتت لحظه اتنين تلاته
كنت بحاول استوعب الكارثه اللي عملتها
بلعت ريقي وبصيت يمين وشمال لقيت الكل بيبصلي بصدمه اترسمت علي ملامحهم
رجعت بصيت تاني ليوسف اللي كان واقف قدامي مربع أيده وبيبصلي بكل برود ولا كأني عملت حاجه
جايز يكون ده الهدوء ما قبل العاصفه !
دمعه شارده نزلت من عيوني وقتها ومن غير اي مقدمات لفيت النحيه التانيه وجريت
لسه هخرج من باب الشركه سمعت صوته وهو بينادي بكل قوه وحده
-اقفي عندك
وقفت مكاني وانا بتنفس بسرعه والعرق اتكون فوق جبيني
-الكل يحضر نفسه بعد ربع ساعه عشان عندنا اجتماع
سمعت صوت خطوات رجله اللي كان صوتها مع كل ثانيه بتقرب مني
وفجأة وقف ورايا مباشره وهمس في ودني بهدوء :
-حضري نفسك انتي اللي هتقدمي المشروع
برقت عيني ورمشت اكتر من مره وانا بهمس :
-انا ؟؟
-ايوه انتي
قال جملته وبص للجميع وهو بيقول بحده
-الكل يرجع لشغله يالا
بعد ربع ساعه كنت واقفه في الحمام قافله عليا الباب وكل اصحابي بيحاولوا يخرجوني بس أنا رافضه
-إيمان ياحبيبتي افتحي يالا الكل في الاجتماع مستنينك
هزيت راسي بخوف :
-لا يعني لا انا مش هقدم مشاريع ومش هقدم زفت واللي عايز يعمله يعمله
-والله؟!
رديت بضيق :
-نسمه متحاوليش تقلدي صوت البني آدم برأس بخاخه ده عشان اخاف وأخرج انا مش خارجه
-ا احم إيمان ياحبيبتي يوسف بيه واقف هنا
-هه كذب
رد بخشونه :
-بقي انا برأس بخاخه
-ومش بس كده برأس حم*ار
-كمان !!
-بصراحه مش زي الشخص اللي كان في الحلم ده حماده وده حماده تاني خالص
-حلم ايه اللي بتتكلمي عنه!
-اصل انا حلمت بيك
-والله؟؟
-امممم بس كنت لطيف في الحلم
سمعت صوت نفسه العالي ومن بعدها هبد علي الباب بكل قوته وهو بيجز علي أسنانه
-اخرجي يا انسه وبلاش شغل اطفال احنا مش حضانه !
رجعت خطوه لورا وانا ببلع ريقي وبهمس بخوف
-ياسوادك ياقرمط اي الفيلم الرعب اللي الواحد دخل فيه ده
اخدت نفس طويل وانا بحاول اشجع نفسي
-اهدي اهدي يا ايمان ومتقلقش واخرجي ولا يهمك
عايزاكي تخرجي وتقوليله بأعلي صوت عندك انا مستقيله من الشغل
وفعلا فتحت الباب ولسه هتكلم صرخت بفزع اول ما سحبني من ايدي من غير ما ينطق حرف
ومن غير لا سحر ولا شعوذه لقيت نفسي في الاوضه اللي فيها الاجتماع
بصيت حوليا لقيت ناس كتير جدا لابسه بدل سوداء وباين عليهم الوقار
همست في نفسي :
-منك لله يا بعيد كشفت راسي ودعيت عليك
-ا احم م مساء الخير ا انا…
مكنتش عارفه اقول اي
بصيتله لقيته بيبصلي وبيهزلي رأسه بتشجيع
اخدت نفس طويل وبدأت اشرح المشروع ..وفي الحقيقه انا مكنتش عارفه انا جايبه الجرأه والثقه دي كلها منين !
كان باين في عيونه نظره اعجاب وذهول في نفس الوقت
وفي الحقيقه عنده حق
اذا كان انا نفسي مستغربه انا عملت كده ازاي
انا اه قبل كده قدمت المشروع ده لكن كان للناس اللي في الشركه واللي معظمهم اصدقائي فعشان كده مكنتش حاسه بتوتر أو خوف
انما دي المره الاولي في حياتي
اقف قدام الكم الهائل من الناس المريبه دي …
انا كنت بشرح بكل براعه وكأني سيده اعمال زي زيهم !
خلص الاجتماع وخرج الكل وهما علي وشهم ابتسامه رضا عن اللي اتقال علي لساني
الكل خرج مفضلش غيري انا وهو
قرب مني وهو بيسقفلي بأعجاب
-لا برافو
حطيت وشي في الأرض وانا بفرك ايدي :
-ش شكرا
-بس غريبه !
رفعت راسي باستغراب :
-هي اي اللي غريبه ؟؟
-قدمتي المشروع بكل براعه ولا كأنك سيده اعمال
-احم ا انا ….
رفع حاجبه بابتسامه خطفت قلبي :
-انتي ايه
-انا اسفه
-علي ؟؟
-ا اسفه علي الكلام اللي قولته
-حصل خير
-عن اذنك
-طب مش عايزه تعرفي اجابتي
رديت باستغراب :
-اجابتك علي اي ؟؟
-علي سؤالك
ضحكت بذهول :
-ودي محتاجه اجابه ؟؟
اكيد هترفض يعني
رد بغموض:
-مش يمكن اوافق
-توافق!!!!
قرب مني ووقف قدامي وهو بيبتسم بهدوء :
-انا موافق
رفعت راسي ورديت بذهول :
-موافق علي اي
-موافق اتجوزك
-ده اللي هو ازاي يعني ؟؟
-زي السكر في الشاي
ضحكت وانا بشاورله بأيدي:
-هو حضرتك طبيعي !
-جدا
-لا بجد انت طبيعي
-امممم تحبي الشقه تكون فين
-كمان
-تفتكري البس بدله لونها ابيض ولا اسود
رديت بشرود :
-ممكن الاتنين
-طب وانتي هتجيبي فستانك منين ؟؟
بصيت قدامي وابتسمت نص ابتسامه وانا بتخيل نفسي في فستان فرح
-مش عارفه لكن اتمني ابقي مختلفه
نفسي اكون زي سندريلا
نفسي وقتها اكون ماسكه في أيد شخص قلبي مرتاح لوجوده
نفسي نهايه قصتي تبقي سعيده
-وايه اللي مانعك !
رفعت راسي بصيت في عيونه وعيوني بتلمع بالدموع
-قولتلك في الحلم
ابتسم بتفاهم:
-احكيلي تاني
-خوفي مانعني يا يوسف
-مش كل الناس زي بعضها ؟
ضحكت وانا بهز راسي
-كنت متوقعه نفس الرد
-هو اي حكايه الحلم ده ؟
-لا دي حكايه طويله اوي
-مستعد اسمعها
-والشغل؟؟
-اعتقد انتي اهم
-انا اهم !!
-طبعا
-يوسف انت تعرفني منين ؟
-اعرفك من زمان
-ازاي وانا عمري ما شوفتك
-بس أنا شوفتك كتير جدا
-فين
-هنا
في نفس المكان
-برضو ازاي
-انا اخو المدير عبد الجواد
-وبعدين ؟
-من حوالي تلات شهور عملت حادثه وللاسف مكنتش بقدر اتحرك
لكن كنت قادر اتابع الشغل من البيت
خليته يحطلي في كل مكان كاميرات عشان أراقب الوضع
وقتها كان في اكتر من موظف شغلهم مش عاجبني ،طلبت أنهم يتغيروا ،عملنا الاعلان وانتي قدمتي
و وافقوا عليكي بناء علي رغبتي
ومن وقتها وانا براقبك من الكاميرات
رفعت حاجبي :
-وبعدين
-وبعدين حبيبتك !
رديت بصدمه وذهول :
-منين يودي علي فين بس
غمزلي بمشاكسه:
-كله بيودي علي بيتي أن شاء الله
-يا استاذ يوسف انا مش بحب الهزار
-بس انا مش بهزر
-والله انت مجنون
-مقبوله منك ياعسل
-لا انت ربنا يعينك علي المهلبيه اللي في دماغك
-تسلم يابا الله يخليك
-انت متأكد انك مدير وكده ؟
رد بهمس :
-كلام في سرك
أنا اصلا تافه بس عمري ما اروح أقول
اتنهدت ورديت بحزن :
-هتستحملني؟
-هستحمل
-هتقدر خوفي وتحاول تطمني
-لو بأيدي أخرج قلبي تشوفي اللي جواه هعمل كده
-هتتحمل عياطي اللي بدون اسباب؟!
-مفيش عياط بدون اسباب
-اوقات مش هقدر احكيلك عن سببه!
-وقتها هاخدك في حضني ومش هنطق حرف
-مش هتزهق
-اعتقد اللي بيحب مش بيزهق
-انا معيشتش طفولتي
-نعيشها من جديد انا وانتي
-يوسف
مسك ايدي وبص في عيوني بحب :
-سامعك
-انا قلبي ضعيف مش حمل خبطات
-انا بحبك
-الكلام حلو
-بمعني؟؟
-يعني الكلام حلو وسهل يتقال من اي شخص
انما صعب يتصدق
-للدرجادي مريتي بناس مؤذيه
-تخيل أنهم اقرب الناس لقلبي !
-انا بعتذرلك
-بتعتذر علي اي ؟؟
-بعتذرلك بالنيابه عن كل اللي خذلوكي
اتنهدت وعيوني بتلمع بالدموع :
-توعدني
-بأيه
-انك مش هتبقي زيهم
-اوعدك
ابتسمت وضغطت علي أيده وكأني بستمد منه الامان
وفي الحقيقه يوسف كان أول شخص يوفي بوعده
حاليا بقالنا تلات شهور مع بعض !
عرفته كل حاجه عني ،عرفته سبب خوفي من الناس ،وسبب خوفي من الجواز ،عرفته اني بتعالج
وقف جنبي ،استحملني ،عمره ما زهق
قرأت مره عباره قالها ” نزار قباني”
وأعلم أن الحب ليس بأن يكون المحبوب بلا عيوب ،وانما الحب أن يظل المحبوب برغم عيوبه محبوب
والجمله اتحققت بالحرف في وجوده !
كان اكتر شخص مناسب لقلبي
كان اكتر شخص مناسب لاحتواء خوفي
وفي الخلفيه صوت الست بتقول
عمري ما دوقت حنان في حياتي زي حنانك
ولا حبيت يا حبيبي حياتي إلا عشانك
وقابلت أماني وقابلت الدنيا وقابلت الحب
أول ما قابلتك واديتك قلبي يا حياة القلب❤️
تمت
لقراءة الرواية كاملة اضغط على : (رواية عانس)
