رواية اه يا حلم العمر الفصل الأول 1 بقلم حلم حياة
رواية اه يا حلم العمر الجزء الأول
رواية اه يا حلم العمر البارت الأول
رواية اه يا حلم العمر الحلقة الأولى
لبست وجهزت نفسها عشان تروح الحضانه اللى بتشتغل فيها بعد ما زهقت من قعدة البيت ،وفي طريقها لازم تاخد رسالة النهاردة اللى بيها بيحلي يومها ووشها بينور مدت ايدها في قصيص الزرع اللى في السكه وخدت الكارت وقرايته وهي هيمانه
(صباحي نور بشمس حبك اللى أشرقت علي قلبي &في حفظ الله وجوه قلبي )
طوت الكارت وحضنته وكأنها بتحضن صاحبه ،دخلت الحضانه وهي مبتسمه وقالت : السلام عليكم ورحمه الله وبركاته ،صباح الخير يا حبايبي ؟
الأطفال بصوت واحد : صباح النور يا ميس علا
علا بابتسامه: يالا حبايبي كله يطلع النوت عشان نبدأ الدرس ؟
في الاستراحه دخلت عليها صاحبتها جنه وقالت: يا صباح الروقان عامله ايه يا لولو ،واخبار مرسال الغرام ايه ؟
علا بهيام: كويسه اوي اوي ،وبعدين بطلي تتريقي لو سمحتي ماشي ؟
جنه بضحكه: طب بس بس ده انتي حالتك حاله ،اه يا خوفي لحد يقفشك ولا يقفشه وهو بيبعتلك الرساله بتاعة كل يوم دي ،ساعتها وقعتكم هتبقي سودة ،
علا باستياء: ايه اللى انتي بتقوليه ده يا جنه ،بتدعي عليا ،الله يسامحك ،مكنش العشم أبدا
جنه بخوف وزعل : ايه ده ايه انتي زعلتي ،والله العظيم مقصدش كده خالص انتي عارفه انا بحبك اد ايه ونفسي ومني عيني اشوفكم مع بعض حقك عليا لو اللى وصلك اني بحقد عليكي متزعليش مني!
علا بابتسامه صافيه:خلاص انا بس مدايقه وكشرت وقالت: انا كمان خايفه لحد يكتشف حاجه وساعتها مش عارفه هعمل ايه !
جنه : مش انتي اللى تعملي هو اللى لازم يعمل بقالكم اد ايه بتتراسله عن طريق الكروت وبعدين آخرة التعليقه دي ايه ؟لازم ياخد موقف حاسم كفايه مماطله بقي
علا: لاء يا جنه متظلمهوش هو ان كان عليه عايز النهاردة قبل بكرة ،بس من و عايز يجهز من كله وبعدها يتقدم ٠
جنه: ربنا يتملك علي خير ويجعله من نصيبك لو فيه خير ليكي ٠٠
علا بتمني: يارب يارب
عند معاذ في ورشة الالمومنتال اللى بيشتغل فيها ،قاعد في وقت الاستراحه بيشرب الشاي مع أخوه الصغير وكاتم اسرارة أدهم ،
ادهم: ايه يا معاذ سرحان في ايه كده ومش معايا ؟
معاذ: هاه ولا حاجه ،يعني هسرح في ايه !
أدهم بغمزة: عليا انا برضوا ،ههههههه
معاذ : ولاه اتلم انا بقولك اهو ؛وبعدين يا معفن بدل مترمي عليا كلام شوف شغلك أحسن ؟
أدهم: مانا شايف شغلي ولا انت بترازي فيا وخلاص ؟
معاذ : عايزك راجل تقف وتسد في كل حاجه ،فاهم عشان لما اغيب عنك تسد بدالي فاهم ،،
أدهم: طب بجد بقي امتي هتاخد خطوة رسميه في موضوعك ؟
معاذ بتنهيدة: ان كان عليا نفسي النهاردة قبل بكرة ،بس ما باليد حيله ،لازم اجهز كل حاجه ،وانت شايف الفلوس مش هتكفي حالياً جوازي مع جوازة شروق أختك ،عشان كده لازم اصبر بعد فرح شروق!
أدهم: اخص عليك يا معاذ وانا روحت فين ،هو انت مش معتبرني راجل ولا ايه ؟
معاذ بابتسامه حنون: لاء طبعاً ده انت سيد الرجاله كلهم كمان ،بس فلوسك لجامعتك ومصاريف دؤاستك غاليه قوي ولازم تبقي زي زمايلك ولا ايه ،وبعدين مانت بتدفع ججزء منها في مصاريف البيت ولا نسيت ياض انت ؟!
في بيت معاذ قاعده ام معاذ مع جارتها ام أمل ،،
ام أمل:بقولك ايه يا ام معاذ ياختي منفسكيش تفرحي بإسم النبي حارسه وصاينه معاذ إبنك ،وتشوفي خلفته علي حياة عينك ؟
ام معاذ بطيبه نفس: ياه ده يوم المني يا ام امل بس اقول ايه محكم رأيه ميتجوزش ولا يفكر في نفسه غير بعد ما يطمن علي شروق اسم الله عليه ٠٠
ام امل: راجل وزينة الرجاله امال ايه لازما يسترها مش اخته ولا ايه هي دي الأخلاق اللى مبقتش موجوده ،ده انا والنبي جاني عريس لامل بس ايه ملوش عازة زي قلته سالت عليه قالو مطلع عين اهله ،قولت علي ايه من قلة الرجاله ،
ام معاذ: يالهوي مطلع عين أهله ،امال معاها هي هيبقي ايه ربنا يستر علينا ،لاء ياختي قعدة الخزانه ولا جوازة الندامه ،،
ام امل : اه انا قولت كده برضوا ،بس البت حلوة وبيجلها كتير ،وانا مستخسراها في اي حد ،عايزةلها راجل مجدع يصونها دي الحيله ياختي ،،،
ام معاذ : ربنا يبعتلها اللى يسر خاطرها يارب ،،
في بيت علا ،رجعت من الحضانه بعد محطت الكارت بتاعها في قصيص الزرع عشان معاذ ياخده كالعادة وهو راجع من الشغل ،،
علا: مساء الخير يا ماما ،مساء الخير يا بابا ،
مديحه امها : مساء النور يا قلب ماما عامله ايه ؟
الاب حمدي: مساء السعادة يا علا ٠٠
علا بابتسامه: الحمدلله على كل حال انا جعانه اوي يا ماما هدخل اغير هدومي واجهز الاكل ماشي ٠٠
مديحه: متتعبيش نفسك يا قلبي الاكل النهاردة مش محتاج تجهيز ،غيري وتعالي بسرعه انتي بس ؟
علا بحيرة،: ليه هو الاكل ايه النهارده ؟لتكوني اتهورتي يا مديحه وجبتي لحمه ،وخبطت علي دماغها بهزار وقالت ، يالصاعقه مديحه بنت عامر طبخت لحمه يا رجاله ٠٠
حمدي ومديحه ضحكوا علي كلامها جداً ،واتكلمت مديحه بقلة حيلة من عمايل بنتها المجنونه وقالت : يا ميلة بختك في بنتك يا مديحه البت الحيلة اتهبلت ،يابت روحي غيري هدومك وخلصيني بقي ،،
علا: فوريرة ،،
علا غيرت هدومها وطلعت من اوضتها لاقت امها حاطه الصينيه وعليها رنجه وفسيخ وبصل اخضر وكل حاجه بتعشقها ،،برقت عينها وجريت علي الصينيه بلهفه وقالت: دهب مرجان ياقوت احمدك يارب ،وبدات تاكل بشراهه،
ضحك حمدي علي طريقتها وكملوا اكل في جو كله ضحك وحب وهزار
معاذ راجع من شغله وقرب من قصيص الزرع اللى قدام باب بيت عم حمدي ابو علا وخد الكارت اللى سيباه علا زي كل يوم ،هو يكتب كارت الصبح ،وهي كارت بليل ،
خد الكارت ومشي بسرعه قبل ماحد ياخد باله وحطه في جيبه ودخل بيتهم: مساء الخير والسعادة يا ست الكل ؟
كوثر أمه: يسعد مساك يا قلب أمك ،حمدالله على السلامه يالا غيرو هدومكم عقبال مااحط الأكل ،،
أدهم بمشاكسه: يا صلاة النبي أحسن ،فوريرة وتلاقيني قدامك يا ست الكل ،،
ضحك عليه معاذ ودخل اوضته وقفل الباب وطلع الكارت وبدأ يقراها بدقات قلب عاليه وانفاس عاليه دليل على شوقه ولهفته لصاحبة الكارت (إن كنت قدري فهذا من سعد قلبي وان لم تكن فرحمة الله علي قلبي)
اتبسم براحه وهمس بحب : يارب أجعلها من نصيبي ،،
كوثر حطت الاكل علي السفرة وقالت: يالا يا ولاد ،يا معاذ يا أدهم يا بت يا شروق يالا الاكل هيبرد ٠٠
شروق: ايوة يا ماما كنت بأكل العصافير ،امال القوم فين
أدهم: انا جه انا هنا اهو ،الله محشي كوسه حبيب قلبي تسلم ايدك يا ماما ٠
كوثر بمحبه: بالهنا يا حبيبي ،هو اخوك أتأخر ليه ؟
معاذ: انا اهو يا امي جيت اهو كنت بصلي العشاء
شروق: تقبل الله يا ابي
معاذ:منا منكم يا شوشو ،هاه اخبار خالد ايه كويس ولا مزعلك ؟
شروق بهدوء: كويس الحمدلله ،
كوثر بتهكم: اه كويس ،بامارة مامنعك تروحي عند خالتك وتباتي مش كده !
معاذ بحكمه: يا ماما عنده حق إذا كان انا اخوها وكنت رافض الموضوع هيقبله هو ،
كوثر: ليه أن شاءالله تكونشي خالتك بتخنق فيكم ولا ايه ؟
شروق : يا ماما يا حبيبتي خالد بيدايق عشان ولاد خالتي كلهم شباب ووجودي معاهم غلط وهو بيغير جداً وبعدين أصلا مينفعش ابات هناك والبيت كله رجاله ،كده ولا ايه.
معاذ: صح جداً ماما خالتي علي عيني وراسي بس اختي مينفعش تبات عندها في وجود رجاله شحطه كده الناس تاكل وشنا يرضيكي انتي كده ؟؛
كوثر: انا محسبتهاش كده انا قولت انها خالتها ومش اول مرة يعني مفكرتش كده أبدا ،وبعدين انا بقي مش عاجبني ان خطيبها يتحكم في خروجها ودخولها كده ايه ملهاش رجاله تحكمها ولا ايه ،،
أدهم: حقه مش خاطبها ومكتوبه علي إسمه يبقي حقه ،،
معاذ : لاء طبعاً مش في كل حاجه ،يعني لو انااو ماما موافقين يبقي خلاص مش عمال علي بطال كده غلط
شروق: وهو مش بيتحكم إلا في الأمور الكبيرة زي موضوع خالتوا كده وبس
أدهم: يعني انا لما اخطب مقولش لخطيبتي اقعدي في البيت ومتخرجيش ايه الكلام ده!
معاذ: يا حبيبي ،انت المفروض واخدها من بيت رجاله يعني ثقه انها مش هتعمل حاجه غلط ولا هتخرج إلا بعلمهم ،كده ولا ايه ،يبقي المفروض واحتراماً للبيت الى انت دخلته والرجاله اللى قعدت معاها متدخلش إلا في الضرورة زي خالد كده ،فهمت؟
كوثر: بس خلاص كفايه كلام كلوا ٠٠
كملوا اكل وخلصوا وقعد معاذ مع أمه يشربوا الشاي في البلكونه اللى قدام بيت عم حمدي ابو علا وكانوا بيتكلموا
معاذ: بقولك يا امي أن شاءالله الجمعيه هتتقبض اخر الأسبوع جهزي نفسك عشان تاخدي شروق وتجيبلها الأجهزة بتاعتها مش عايز حاجه تنقصها ماشي يا أمي ؟
كوثر: ربنا يعطيك يا ابني ويزيدك يارب ،وانت يا ضي عيني مش ناوي بقي ؟؛وغمزت بعينها علي بيت علا بابتسامه حنون!
معاذ: باذن الله يا امي بعد فرح شروق هكلم عم حمدي ٠
كوثر : وليه بعد الفرح خير البر عاجله ،واكملت بتوتر ،وبصراحه كده في ناس عايزين يتقدموا للبنت !
معاذ : ناس !ناس مين دول ؟وانتي عرفتي منين ؟وحصل أمتي الكلام ده ؟امي اتكلمي لو سمحتي ؟.
كوثر: والله يا ابني انا عرفت النهاردة بالصدفه وانا في السوق ،ام عادل جيرانا القدام شوفتهم النهاردة في السوق وكلمه في ضحكه وسهرايه عرفت منها انها ناويه تكلم امها وتتقدم عشان ابنها عادل مانت عارفه ،سالتني عليها ان كانت مخطوبه ولا لسه ،فانا لا قولت ولا عدت كل اللى قولته اني مشغوله مع بنتي وتجهيزها ومعرفش حاجه عن حد!
معاذ مقدرش يسمع اكتر من كده ودخل اوضته بيتنفس بالعافيه مصدوم علي خايف علي متوتر وعمال يسأل عقله : طب إزاي ؟ازاي بعد كل ده متبقاش من نصيبي ؟ازاي بعد كل الحب ده تبقي لواحد تاني ؟اه يارب قلبي واجعني اوي يارب يارب اكتبها من نصيبي يارب انا مش هقدر انافس واحد زي ده إمكانياته اعلي مني ومستقبله اكبر مني إختبار صعب اوي يارب ارحمني يارب !!
قعد علي السرير والهم راكبه فكر يتصرف إزاي وازاي يطمن فكر يتصل بيها ،بس هيقول ايه ،طب ماهي بتكتبله الكروت وبتقبلهم منه يبقي اكيد مياله له ،طب ماهو ممكن ابوها يضغط عليها وخصوصاً انه لسه مش جاهز وقدامه وقت يعمل ايه ويتصرف ازاي ،وبعد وقت ربنا هداها لفكرة ؟؟
علا سهرانه زي كل يوم بتقرا الكروت اللى بيبعتها معاذ وهيمانه فيه وفي أخلاقه ،عمره متجاوز معاها في اي كلام وعمره مفكر يتصل بيها ويعرضها لمشاكل وافتكرت ازاي بدأت موضوع الكروت وازاي (فلاش باك)
علا وشروق قاعدين عند شروق في البيت بيجهزو البيت عشان خطوبة شروق وبيتكلموا ::
شروق: عقبالك يابت يا علا ماربنا يرزقك بواحد قيمه وسيمه زي اخويا معاذ كده ههههه
علا بهيام : يااه يا شروق نفسي أوي
شروق : نفسك في ايه في معاذ يابت
علا بارتباك: ايه اللى بتقوليه ده يا شروق انا قصدي في عريس
شروق بغمزه شقيه: طب ومالوا معاذ اخويا وحش ؟
علا بخجل وتوتر: لاء طبعاً هو انا قولت كده !
شروق: بت يا لولو احنا اخوات يابت ومتربين مع بعض ايه هتخبي عليا !,وبعدين ان جيتي للحق انا حاسه باهتمام اخويا معاذ بيكي
علا بفرحه وخجل : بيه انا انتي متاكده ؟
شروق: اه ياختي متاكده امال بجس نبضك ازاي
علا بحب: هو قالك ؟
شروق: مقالش صراحه بس قال تلميح يعني ماما سألته امتي هتفرح بيه وهو قالها ربنا يسهل ولما رشحتله عروسه قالها انه مختار عروسته وبيدعي ربنا يجعلها من نصيبه ،ولما سألته مين هي قالها واحده جارتنا وبتحبنا اوي وبنحبها أوي
علا بعبوس: وده معناه انها انا ،مش يمكن واحده تانيه غيري ؟
شروق: لاء ماما فضلت وراه لحد ما قالها عليكي ومش بس كده ده كمان نفسه مموت روحه في الشغل عشان يقدر يخلص شقته ويطلب إيدك ،فانا بقي بجس نبضك عشان لو في قبول يبقي اخويا عرف يختار هاه قولتي ايه
علا قلبها دق بفرحه وقالت: هبلغك بردي وانا بسقي الزرع!!!
وتاني يوم الصبح وعلا بتسقي الزرع اللى قدام بيتهم في نفس توقيت خروج معاذ للشغل صبح عليها هو وادهم كالعادة ،،
معاذ بأدب: صباح الخير يا انسه علا؟
علا بخجل : صباح النور !ازيك يا أدهم ؟
أدهم: الحمدلله انتي ازيك ؟
علا: بخير تمام ٠٠٠٠اه
معاذ بفزع: ايه مالك ؟
علا بألم مصتنع: يمكن انجرحت من شوك الورد ،
معاذ: طب عنك انا هكمل سقي الزرع !
علا بضحكه شقيه لانها وصلت للى عايزاه : طيب
معاذ خد خرطوم المياه منها وقرب يسقي الورد شاف كارت صغير بين الغصون بصلها بطرف عينه لاقاه متوترة وبتبص عليه ،ابتسم بحب عليها وخد الكارت وسقي الزرع وسلم عليها ومشي ،، ومن يومها وهما كل يوم يكتبوا كارت لبعض وبقالهم سنه علي ده الحال ،لا عمره كلمها فون ولا حتي بينهم وبين بعض !
فاقت من ذكرايتها علي صوت رساله من الواتس من رقم مش متسجل (ازيك يا علا ،انا معاذ ،اسف لاني بكلمك كده بس انا محتاج أسألك سؤال وعايز اجابه شافيه ).
علا استغربت من الرساله وبعد كده ردت وقالت ( الحمدلله ،خير يا معاذ أسأل)
اتنهد بارتياح لما ردت عليه وقال(علا ،انا بحبك ومني عيني تبقي من نصيبي ،بس هل يا تري هتصبري عليا كمان كام شهر لحد مخلص شقتي وابقي جاهز ؟ محتاج اجابه صريحه )
علا قلبها دق جامد من كلمة بحبك وفضلت سرحانه فيها كتير ،لدرجة ان معاذ خاف لتكون رافضاه ومش هتستناه فكتب وقال( علا ،ارجوكي ردي عليا انتي مستعده تصبري عليا )
علا انتبهت علي حالها وقرت الرسالتين وللى باين فيهم اد ايه هو متعذب قلبها واجعها عليه وكتبت وقالت ( مستعده استناك لاخر العمر) معاذ قرأ الرساله وعينه دمعت من الفرحه انه أخيراً خد اجابه صريحه منها واتاكد وقتها انها زيه بتحبه فكتب (حتي لو اتقدملك واحد جاهز من كله ؟اسف بس محتاج أتأكد إنك معايا حتي لو أهلك ضغطوا عليكي!)
علا قلقت من كلامه وسألته بترقب: (مالك في ايه ؟وليه كل القلق ده ؟وعريس مين اللى هيجي وجاهز كمان ؟انا مش فاهمه!؟
معاذ اتنهد بأسف واتطر يقولها علي كل حاجه امه قالتله عليها وهي تختار!
علا سمعت رسالته لانه المرة دي بعت فويس صوت عشان يقدر يشرح فيه كل حاجه،علا خدت نفس طويل وقلبها دقاته عاليه اوي وبتقول لنفسها معقول معاذ الشخص الخجول اللى في حاله ده وعمره مرفع عينه في حد يبقي بيحبها اوي كده ابتسمت بحب وردت عليه وقالت ( اللى يلاقي الحب والاهتمام ده كله ويبعد عنه يبقي غبي وانا مش غبيه وعمري ماهبقي غبيه أبدا،ولازم اقفل دلوقتي عشان انام 🙈😂)
معاذ قرا الرساله وضحك من قلبه علي مشاغبتها ليه وفرح من كلامها وثقتها فيه وقال(وانا عمري ماهخيب ظنك فيه وربنا يقدرني واسعدك العمر كله ،تصبحي علي جنه وفرحه لقلبك وأيامك يا نبض قلبي ❤️)
علا ومعاذ من كتر فرحتهم بكلامهم ده وان ده اول كلام مباشر يتم بينهم فضله كل الليل سهرانين بيفكروا ويحلموا بيوم اللقا لحد ماناموا علي نفسهم ٠٠
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية اه يا حلم العمر)
