رواية انكسار الياسمين الفصل السادس والعشرون 26 بقلم أمل مهدي
رواية انكسار الياسمين الجزء السادس والعشرون
رواية انكسار الياسمين البارت السادس والعشرون
رواية انكسار الياسمين الحلقة السادسة والعشرون
*******************
تعال اكرب حبيبي اذنوب عندي هواي
اريدك ذنب اكبر تكلب الميزان
اسولفلك سوالف ما لمسهن بال
وذبحلك غزل ميذبحة ياهو الجان
انا صاحب قصيدة تشبع الاحساس
مو صاحب قصيدة تشبع الديوان
******************
علييييي
عليييي ماما وين رحت
طار عقلي ارگض منا واروح منا وصلت الباب المدرسه اسال
الحرس گالو نعرفه ابنج يجي وياج كل مره
بس ما شفنا
رجعت طلعت للشارع اصيح وصوتي يرجف
علاوي ماما وين رحت…
واجه أبالي هو…
ماكو غيره الولد العسكري يمكن هو خطفه…
أخذتها ركضه للصيطره
الولد الوكفين يفتشون هوايه بحدود السته……. اباوع بوجودهم وصحت وينه
أمير _ هاي ام الخبز شبيها تصيح…. اجيت اشوف شكو جان واجبي العصر
ياسمين _ وينه صاحبكم الياخذ الخبز مني يوميه
ميثم _ ليش اشسوه
ياسمين _ صيحه اريده
أمير _ گولي كل احنه جماعته شمحتاجه
ياسمين _ ارجف واحجي خطف علاوي ابني الله يخليك شوفه وين
أمير _ ظافر……….!!!!!!
يمعوده گولي غيرها ظافر مجاز بعد يومين يجي
تفاجأت يعني مو هو
ياسمين _ صوتي يرجف بجيت لعد وين راح منو أخذه ابني ماكو دخيلكم اريد ابني
أمير _ ساحبه الحجاب على وجها وگع….. رغم الحاله الهيه بيها واضحه معالم جمالها
كل المنتسبين مركزين وياها يحاولون يهدوها
على كيفج راح گلبج يوگف
امشي ندوره يعني وين يروح
ياسمين _ عفته يسال ويدور واني عبرت الشارع اركض منا واروح منا
واصيح علاوي وينك
وين رحت ماما
الناس بدت توگف وتسال شكو….
واني مفرفحه روحي حتى الكلام صار صعب يطلع مني احس الساني تيبس
رجعت المكاني روحي راحت جسمي يرجف
كعدت بالكاع كانه فاقده بس عيوني مفتحه حجابي انفتح شعري طلع
ظاع مني ابني….. اهمس ويه نفسي
اني ضيعته اشلون غفلت عنه
أمير _ على كيفج هسه نلكا وين يروح
وفتح بطل مي ورش على وجهي
حسيت اشويه بديت اصحصح
الناس واكفه تسأل وهذا اليگول خطيه وهذا اليگول وين جنتي
اشلون تعوفي
واني بين الواعيه والتايهه بس استنجد بأهل البيت ودموعي تنزل
بدون شعور اهمس ويه روحي
يا رب….
يامحمد ياعلي يا زهراء ياحسين يا ابو فاظل اريده اليوم منكم
مخليت أمام وسيد ما ذكرته ونخيته
وهذا الاسمه أمير احتار بيه
خيتي اصبري هسه نلكا وين يروح… حجابها وگع
سحبته على راسها…. تبهذلت…
وصوته حشر من الخوف گوه تحجي
شويه واسمع رضى يصيح…. ياسمين لكيته
هذا علاوي…
الكل التفت للجهه الثانيه…….
باوعت شفت رضى گايده من ايده ويمشي
نزلت دموعي اريد اوگف اتلگا ما گدرت
اجه يرگض عليه
فتحت اديا ثنينهن وحضنته….. شگد جنت خايفه
لا مرعوبه بمجرد اختفى من گدامي الف فكره اجت ابالي
وذكرت اني تهمت الولد شگد عيب اسرعت
باوعت الامير
أمير _ الحمد لله على سلامته مو گلتلج لا تخافين نلگا
ياسمين _ هو صحيح الولد الياخذ الخبز مني مجاز……..؟؟؟
أمير _ ظافر…… اي والله بعد يومين يجي
بس فهميني ليش تهمتي خطف ابنج شمسويلكم
ياسمين _ خجلت شرد عليه
ماكو شي بس من كثر ما اسمع اخبار صارت خوفه بيه
أمير _ على كل ابنج رجعلج سلامات ديري بالج عليه
رجعت للصيطره….. وأاني اگول ليش خافيه وجها
نعلعلا غيرتك ظافر اثاري حاط عينه عليه اگول ليش ما يقبل احد يحجي بيها
اني بعد الخوف والهبطه مابيه ابقى رجعت للبيت والكم كيس البقن ويايه
ليلتها بس افكر
اسمه ظافر …. حلو اسمه
بس اشگد عيب من راح يداوم راح يحجوله اصدقاءه
واكيد راح يجي يعاتبني
حتى خجلانه من نفسي لان تسرعت
باوعت لخالتي رايحه بسابع نومه
اوف يا خاله كلها من وراج خليتيها براسي وشككتيني بالولد
راجحه _ شنو اليوم ياسمين ما كعدت تخبز
شو اليوم نايمه
يا سمينه طر الفجر گومي
ياسمين _ عوفيني خاله اليوم مابيه حيل ما عجنت
راجحه _ والله حگج ارتاحي رجفتي على علاوي
نامي
اليوم ما خبزت احس روحي تعبانه من هبطة البارحه
ظليت نايمه
إيمان _ شو اليوم ماكو خبز
راجحه _ تعبانه المسكينه ملازم اليوم خلها ترتاح
إيمان _ والمسواگ اشلون انظل بلا اكل
راجحه _ مو يوميه تسوگلج شنو خلص المسواگ
ايمان _ اليسمعج يگول اني اكله غيرخلصنه
راجحه _ دبريها شبيج ما تعرفين ادبرين
الرسول يگول
ثلثين المعيشه الاقتصاد….. صدق رسول الله
إيمان _ اروح احسن بس تريديلج احجايه عليه
راجحه _ عوبه ما تصيرلج جاره
ياسمين _
كعدت على المناگر مال خالتي وايمان
شعدج خاله ويه إيمان من الصبح……
راجحه _ شوفي نصيحه اخذيها مني حطيلج قاصه واجمعي بيها
مو ترديلج محل مال قماش……!!!
يوميه هالله يرزقج بي تره يجي يوم تحتاجين وظلين تفرين براسج
ياسمين _ والبيت والمسواگ……!!!
راجحه _ اسوگي بس مو تفتگيها فتگ
تره البطن يامه اكلت
وهاي دنيا وانتي بيها وحيده واخوج بس يحرگ بدمه لا حول ولا قوه سوده عليه
وهتشوفين البيت شما تحطين بي ما يشبع عبن إيمان عوبه
مو مدبره
ياسمين _ صفنت بحجي خالتي
صدك اني هواي احصل بالخبز وامنيتي افتح محل قماش
والله حتى لو زغيروني وبعدين اكبره
كعدت ثاني يوم نشطه خبزت وجيست الخبز اني وخالتي حضرته بعلاليگ كبار
وكعدت رضى وعلاوي اريگهم حتى الحگ انبيعه ونرجع لان رضى مدرسته ظهري
طلعنه وصلنه للشارع
وديت خبز ست هاله بيد رضى واني ظليت أصف بالخبز
وكل اشويه عيني تروح للصيطره….
ماكو هو…. واحجي ويه نفسي هسه لو اجه وعاتبني شگول
بدت الناس تاخذ مني التهيت بينهم وبين علاوي
وگفت سيارة اخو ست هاله ونزل منها
د. أمجد _ ها الله يساعدج
ياسمين _ اهلا وسهلا شلونك دكتور
د. أمجد _ الحمد لله
اخذ ت كم كيس نحفظه بالتجميد
صدت عيني على الطفل خدوده حمر من الشمس
هذا ابنج……؟؟؟؟
ياسمين _ اي هذا علي
د. أمجد _ خلي بالبيت ليش يجي وياج خطيه يتعب
ياسمين _ ما يفارگني ميقبل
د. أمجد_ مد كفه مسح على رأسه …. انقهرت اكيد ست هاله حاجيله ان ابو متوفي
طلع من جيبه فلوس الخبز وعشرةالاف گال هاي العلاوي
ياسمين _ اخذت فلوس الخبز ورجعت العشره
راد حاول ما قبلت
ما احب احد يصدق على ابني واني موجوده
هو هم فهمني سلم وراح
تدنيت على علاوي حضنته
اليوم طولنه وبعد أكياس الخبز ممبيوعه
ظافر _
اشلونج يابه…. هاي شنو طلعت خاطف علاوي
ياسمين _ التفتت فازه على صوته اني امغطيه نص وجهي بس بين من عيوني ضحكت
ظافر _ هنيالك ظافر اليوم ضحكت ست ياسمين
ياسمين _ تفاجأت من نطق اسمي
اشلون عرفت اسمي…..؟؟؟
ظافر _ تقربت من علاوي اشاقه ويا صرنا أصدقاء وگلت
الصراحه ما اعرف بس أمير گلي سمع رضى يصيحلج
وعرفه
ماكلتيلي شنو الخلاج تتهميني خاطف ابنج يعني لو موجود
جان دهرتيني
ياسمين _ خجلت من كلامه
اعتذر ما ادري شلون حجيت هيج انته ماتدري اصار بيه من ضاع
علاوي
ظافر _ يله راح اعديها واسامحج من باب المايعرفك ما يثمنك
هسه عدج النه خبز لااااا
حجاها وهو ضاحك ويباوعلي
ياسمين _ اني هم ضحكت
اي عندي اليوم هوايه ظل منباع ولازم نرجع للبيت رضى عنده مدرسه
ظافر _ اني اريده كله جيبي
ياسمين _ كل مره تاخذ جيسين اشو هالمره كله
شنو دجاملنه
ظافر _ هسه انتي شعليج أحنه هوايه وناكله
يله اشو اخذيهم وروحي وهاي الفلوس
ياسمين _ حسيت يريدني ارجع للبيت ولهذا اشتراهن كلهن
اخذت علاوي ورجعت اني ورضى
امشي وافكر بي شگد شخصيته حلوه ومرحه
استمريت يوميه اخبز وابيعه على الشارع صارو عندي معاميل
يوصوني واجهزه الهم ثاني يوم
واحلى لحظاتي من يجي ظافر هواي رتاحيتله ولد شهم ومرح
تعود علاوي عليه
من يجي يشاقي ويلاعبه
عرف هواي اشياء عني واني هم جنت كلش منجذبه اله
حبيت غيرته من يشوف احد طول واگف يمي يجي بسرعه ويوگف فوگ راسي عبالك الحارس مالتي
اني للان ما اعرف شي عنه
فاجأني اليوم بطلب
ظافر _ حتاريت الافكار توديني وتجيبني واخيرا قررت أعرض عليها الموضوع وشيصير خلي يصير
يگولون….. لو بالهدف لو بالنجف
شفتها جايه تمشيت عليها
سلمت وأخذت منها الخبز وظليت اشاقه ويه علاوي
وهي تعزل الأكياس على الصبه
شفت مجال محد اكو حجيت
ظافر _ ياسمين عندي موضوع اريد احجي وياج
ياسمين _ گول تفضل……!!!!
ظافر _ آني عسكري بهاي الصيطره
_ اعرف
_ قبل كم سنه طلقت وما عندي أطفال……!!!
_ والسبب….
_نزلت راسي مو خجل بس خفت اگول السبب وترفضني
باوعتلها اشوف ردة فعلها
بيه السبب… لان عقيم
_صفنت بوجهه معرفت شنو ارد….
ظافر _ من سكتت استرسلت اسرد قصتي ويه مهجه لازم كلشي تعرف عني قبل ما فاتحها بموضوع الزواج
بديت من حبيتها إلى زواجي منها إلى موضوع الخلفه إلى أن تزوجت من بعد الطلاق بسنه
وهاي اخر شي اعرفه عن أخبارها
هذا كلشي عن وضعي حجيته الج
واني ناوي اتقدملج فإذا توافقين حتى افاتح اخوج
_ ليش اختاريتني اني….
ظافر _ كلشي بيج عجبني وخصوصا علاوي اريد اني اربي
واعلمه اريد اكون اب اله اذا تسمحين طبعا
ام حسين _
اليوم رحت اتسوگ للمحل كل ضني سيد علي الاگي
صار فتره ما شايفته
اگلك شنو سيد علي بايعها للوكاله اشو ما كو صار كم مره اجي
ما اشوفه
سيد أركان _ گولي حجيه شمحتاجه اني موجود ابداله
_ يعني بعده هذا المكان اله……؟؟؟؟
_ اي الوكاله مالته وهو يكعد بالفرع الثاني بالكاظميه
_ ها الله يحفظه ويزيده… جا لو اريد اشوفه شلون
_ آني نسيبه زوج اخته تأمريني هنا ابمكانه
_ ما يأمر عليك ظالم
گله ام حسين تسلم عليك وتريد تشوفك وخله يجيني
سيد أركان _ وين يجيج حجيه
_ هو يعرف أنت بس لا تنسه ….
_تدللين اشلون انسه
ام حسين _ تسوگت ورجعت ياحيف ما موجود السيد
الا ردت احجيله على هاي البنت يمكن هيه گرابته الي يدور عليهم
سيد علي _ صار سنه حياتي انگلبت گلاب
زينب العاقله الهادئه صارت نگناگيه و غيوره وعصبيه
كلشي عدها طبيعي من اني ما موجود بس مجرد ادخل البيت
تخلق اي سبب حتى تتعارك وتخلصه صياح وبجي
غيرتها مستحيل احد يتحملها
مره لگيته تشمشم بهدومي ورتكبت عليه شميت بيها عطر نسائي
وگبت للستار عركتنه
ومره اشوفها تفتش بجيوبي
لو الموبايل وصلت بيها تتصل على الأرقام المامثبتها باسم
وتسمع منو يرد أذا رجل عادي بس اذا اجاها صوت بنيه هاي الا لله كتبه عليه
واني معاميلي من النساء أكثر من الرجال
من سگت شجرة الياسمين بالنفط وموتتها اعترفت ان هيه سمعت كل الكلام الكان بيني وبين امي
كانت تفكر تخلفلي اولاد هوايه تربطني بيهم… بس
وضعها الصحي وحرمانها من ان تخلف….
ولد عدها هاجس ازوج عليها
ياسمين
لان سمعتني ادور عليها
حتى بنتنه ياسمين غيرت اسمها وختصرته ياسه
صارت الساعات الاقضيها بالبيت جحيم لا يطاق
سيد أركان زوج اختي نسرين يشتغل وياي لازم الوكالة البلشورجه
بحكم شغلي ويا صار روتين يومي نلتقي
بيته قريب علينه اغلب الليالي يجيب
نسرين والجهال ويجينه
نحجي بالشغل شويه لان بالنهار ماكو مجال نشاوف
سيد أركان _ تعرف وحده اسمها ام حسين…..؟؟؟
سيد علي _ جنت منتجي على القنفه وبيدي استكنان الجاي
تعدلت مهتم
_ اي اعرفه شبيها…
_ اليوم اجتي تسوگت للمحل مالته…. وگالت
_ شگالت…. احجي
_ گالت تريد اشوفك روحلها….
_ صفنت…..
معقوله عرفت شي عن رافع وياسمين
ياريت… هيج ربي والگاهم…..
سيد أركان _ هاي وين صفنت هيج مهمه هاي المره
سيد علي _ انتبهت يحاجيني
هيج شغل لان هاي معميلتي من زمان
سيد أركان _ تگول صار هوايه ما شايفتك
سيد علي _ التفتت كلهم منتبهين على حجينه امي وزينب ونسرين
اي غير اني رحت الفرع الكاظميه بعد وين اشوفه يا اركان
شلحيت دعوف هالموضوع وغيرته
ظليت ليلى ما نمته اتگلب واتخيل اروحلها باجر وتگول لگيتهم
كعدت الصبح وطلعت لأم حسين مناطق شعبيه بأطراف بغداد
تمشي السياره ساعه ياله وصلت
وتحسفت يا ترى شنو الحال الوصللها رافع حتى يترك منطقته وناسه ويسكن هنا
ركنت السياره بالكراج ونزلت دخلت السوگ
هوسه جنابر وبياعه وأصوات بعد سوگ شعبي
طخت رجلي عربانه كان يدفع بيها ولد
السيد _ آخخخ يمعود على كيفك…. التفتت
شفته ولد يطلع عمره ١٢ سنه يدفع بعربانه بيها گونيتين طحين
گوه
الشارع معكر الزباله بكل مكان مالت السوگ
رضى _ العفو عمو ما ادري بيك…
سيد علي _ تمعنت بملامحه مشبه عليه
اساعدك بابا
انطيني مجال ادفع وياك…..
رضى _ اخاف تتوصخ هدومك
سيد علي _هذني المن ماخذهن كروه……؟؟؟
رضى _ لا العمتي……
سيد علي _ شسوي بيهن عمتك تخبزوهن….؟؟؟
رضى_ اي تخبزهن ونودي على الشارع نبيعه
سيد علي _ليش ابوك وين….؟؟؟
رضى _ ابويه مشلول ما يگدر يشتغل
_ حيل اتاثرت من كلامه وگفت اوعله
اني شايفك…. وين
رضى _ ما ادري اكيد بالسوگ
سيد علي _ دفعت ويا العربان طلعتها من السوگ
هسه تگدر توصلها لبيتكم…..؟؟؟
رضى _ اي أكدر شكرا
سيد علي _ طلعت من جيبي خمسين الف هاك هذني انطيهن العمتك
رضى _ سحبت ايدي لا عمو ابويه ميرضه
سيد علي _ دخذهن بابا اشتري بيهن هدوم مدرسه
رضى _ لا والله عمو اهلي ميقبلون
شكد انعجبت بهذا الطفل…. سلملي على ابوگ گله السيد يگول رحمله والديك على هاي التربيه
رضى _ ههه
_ يله الله وياك حبيبي
رجعت اتمشه على ام حسين هواي تأذيت على حال هذا الطفل
المنطقه ناسها كلهم تعبانين
رغم ضرفهم اشلون عنده عزت نفس
_ دخلت المحل مثل عادتها كاعده والنسوان داير مدايرها
السلام عليكم
ام حسين _ التفتت عليه وضحكت كل معالم وجها
هلا ومية هلا بالسيد
عاش من شافك اشو گطعت بيه فرد نوب…. تحجي وسحبتلي الكرسي….. تفضل ارتاح
وصاحت رشيد وينك ستكان جاي للسيد
_ والله ضروف وشغل وتدرين بيه الوحدي
_الله يعينك والله انه من اسوگ احب اشوفك
_ هسه اجيت واراج بشاره لاااااء
_ ما ادري اني شبهت عليها
_ كنت منتجي بكعدتي تقربت عليها مهتم اريد اسمعها
گولي حجيه اسمعج….
اجتني بنيه تقريب عمرها فوگ العشرين العيون شهل وشگره
وجانو گبل اجم سنه ابذيج المنطقه الكتلي عليها
السيد _ ما سألتيها على اسمها
_ جا اشلون اسمها ام علي
السيد _ ام علي……….!!!!! يعني مزوجه
ام حسين _اي و وياها وليد يطلع عمره خمس سنين لو سته الله لا يجذبني
السيد _ وبعد شعرفتي عنها ……..
ام حسين _ عدها اخو واحد وعايشه ويا
السيد _ صفنت افكر ما اعتقد هيه…..
زين وين بيتهم اند ليتي………
_ لا والله بس اشرتلي بهلصوب من السوگ
السيد _ صفنت مزوجه…. معقوله رافع يزوجه جان مصر تكمل دراسه
ما اعتقد هيه
حجيه قصرتي غير تاخذين رقم تلفون لو تندلين بيتها ولو
ام حسين _ والله يا يمه الوحيدي بالمحل
بس انتظر راح تجيني بعد
لان رادت شغل وانه وعدتها الگالها
السيد _ واذا ما اجت يعني راحت….!!!
_ اشلون ما اشوف انته قصتك ويه هلبنت مو ويه اهلها
ما تحجيلي سيد
سيد علي _ شحجي قصه طويله……!!!!!
ظافر _
انتظرت يومين ورحت عليها
الله يساعدج
ياسمين _ ابتسمت ويساعدك اهلا
_ جاي وكلي امل اسمع موافقتج
_ضحكت بخجل مو مستعجل…..!!!
_صار اربع سنين منفصل ما كافي اريد استقر وارتاح
واريد انتي هم ترتاحين وگفتج هاي بالشارع حيل ماذيتني
انتي المثلج مكانها ابيت معززه مكرمه
_بس الشغل مو عيب……!!!!
ظافر _ اكيد مو عيب لا تفهميني غلط
القصد اشياءنه الثمينه ما نعرضه بالشارع لعيون الرايح والجاي
بالعكس نحفظها بالقاصه حتى تبقى بس النه فاهمتني
ياسمين _ اي فاهمتك بس انته ما تعرف عني شي
ظافر _ الردت اعرفه عرفته وهذا كافي ها قررتي……!!!!!
_ خليني احجي الأخوي رافع واردلك خبر
_ وانتي…..
_آني شنو…
_ شنو رايج موافقه……؟؟؟ يعني ميهمج كوني ما اخلف
_ اول شي هذا رزق وبيد الله واني عندي علاوي كل حياتي
_ الحمد لله گالها وهو يضحك
انشالله ادللكم انتي وعلاوي
التفت يمنه ويسره يشوف الشارع ….. وگال
مراح تنزلين الشال مشتاق اشوف الگمر بالنهار
_ ابتسمت على الغزل…. ونزلت الحجاب
_ صفنت وحجيت بگلبي…
مو حرام هاي توگف بالشارع والله ظلم
ياسمين احجي ويه اخوج باجر انتظر منج جواب حتى من انزل مجاز اجيب امي واجيكم
ياسمين _ رجعت للبيت وبصدري فرحه بس ناقصه
غصه احس من افكر ازوج واترك رافع وخالتي
اني من اشتغل هواي يفرق يصير انفراج بمعيشتنه
اذا ابطل واترك الخبز… شلون ما ادري…..
تغديت ورتاحيت وكل اشويهاباوع الرافع مستصعبه احجيله
رافع _ تعالي ياسمين اشوف بعيونج حجي گولي بويه اشعندج
ياسمين _ گمت من گباله وكعدت بصفه باوعت بعيونه
طول عمرك تفهم عليه وتقره ملامحي
تعاملني بنتك واختك ما ادري اشلون راح احجي
رافع _ ابتسم احجي من الاخير اسمعج
ياسمين _ اكو شخص يريد يتقدملي
رافع _ منو اعرفه
ياسمين لا ما تعرفه… العسكري البلصيطره
رافع _ تغير وجها للجديه
وهذا اشلون عرفتي
ياسمين _ صار شهرين يتردد علينه ياخذ خبز مني وصار يومين فاتحني يريد يخطبني منك
وسترسلت وحجيت كل الكلام الكاله عن حياته
رافع _ انتي متأكده موافقه عليه تره بعدج زغيره تنحرمين من
من الاطفال
ياسمين _ مايهمني اهم شي علاوي يحبه ويساعدني اربي
رافع _ خلي يجي اشوفه بس ها لا تعتبريها موافقه
ياسمين _ واني هم ما أوافق الا انته توافق
رافع _ عفيه عليج بويه
ياسمين _
ثاني يوم اخذت الخبز واني متفائله بلكت الله بعثلي الييعوضني
عن التعب الشفه بحياتي
وصلت انطيت الخبز الست هاله ورجعت كعدت علاوي على الصبه
وصفطت الباقي التفتت للصيطره كلشي عادي بس ظافر
ماكو
وره اشويه اجه يتمشى مبتسم
بوس علاوي وطلع من جيبه كيكه انطا
ظافر _ الله يساعدج
ياسمين _ ابتسمت اهلا
_ بشري حجيتي ويه اخوج…….!!!!
_ يريد يقابلك…..
_ شنو هاي خوفتني اخاف يرفض من يشوفني
_ لا بس يريد يتعرف عليك
ظافر _ انشالله العصر اني يمكم
_ ماسالتني على بيتنه… اشلون تجي
_ تقرب عليه وعلى وجها ابتسامه تعبر عن فرحته
تصورين لليوم ما اعرف وين ساكنه
صار شهرين عرفت وين عايشه وشلون عايشه و يامن عايشه
رفع ايده مسلم العصر اني يمكم
راح يتمشه المكانه واني اباوع الطوله اسمر عيونه سود ملامحه
مرحه عنده غمازه وحده من يحجي ويضحك
تبين
مربوع وجسمه مرتب وعمره فوق الثلاثين يمكن بسنتين او ثلاثه
عيني عليه ووكفت سياره بيها واحد هو وزوجته
صاحو عليه من الجامه انطيتهم كم كيس ورجعت
خليت فلوسي بالجزدان وكلت الحمد لله
اليوم كلش مرتاحه حضنت علاوي
ورضى يمي واگف
فجأه دوه صوت انفجار احس اخترق كل مسامه بجسمي رجف المكان كله وكانه زلزال شال السيارات ورگعها بالكاع وتبعثرت اشلاء السيارات والناس
والدخان والتراب حجب كل المكان كلشي ما ينشاف
فتحت عيني بالجهه الثانيه من الصبات
والدم تارس أيدي…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
