رواية انكسار الياسمين الفصل السابع 7 بقلم أمل مهدي
رواية انكسار الياسمين الجزء السابع
رواية انكسار الياسمين البارت السابع
رواية انكسار الياسمين الحلقة السابعة
انا المبيوك انا المامش
انا البس اسمه بشر عايش
انا الثكلت عليه روحه
وانا الكل تايها وكل عابره تلوحه
**********
ابتسام _
دك الجرص كرار..فتحت الباب بنيه
كرار _ جبتلكم ضيفه
ازهار _ اهلا وسهلا
كرار _ اقدملج خاله ام رافع جايه وجايبه ريحة العراق وياها
ابتسام _ كلنه ضحكنه
شلونج ازهار….
_ هله خاله تفضلي يا هله ومرحبه
ابتسام _ وبيج اكثر بنيتي
كرار _ سحب الجنطه ودخلها
ما وصيج ازهار اريد اشيليها بالصلوات يله اني اروح
ابتسام _ يوم كرار
كرار _ امريني خالتي
ابتسام _ ما يأمر عليك ظالم وليدي
باجر لا تتأخر عليه
_ من الصبح اني يمج خاله
حجه وهو يباوعلي وعينه دمعت
اتأكدي ما اعوفكم الا تخلصون وبيدي اصعدكم الطياره
لا تخافين خالتي انتي بنص العراقين كل احنه ولدج
ابتسام _ الله يحرسك
ازهار _ تعالي خاله بهاي الغرفه ارتاحي اسبحي بدلي اني بالمطبخ
بس تجي رغد اصيحلج نتعشه
ابتسام _ دخلت وهيه جابتلي الجنطه
الحمد لله اطمنت على رافع من خابرته
سبحت وبدلت ملابسي تعبانه
والتعب البراسي اكبر من تعب جسمي
توضيت وكعدت اصلي مال الظهر والعصر قضاء
دعيت وبجيت وتوسلت بكلب خايف وخاشع ربي لا تخذلني تعنيت للبلاد الغريبه الخاطره اخذ عافيتي
وحيلي ونطيهيا بس كون يكوم على حيله واشوفه يمشي على رجليه
بيدي القرآن وحسيت وحده وكفت
قريبه عليه
رفعت راسي لكيت ازهار واكفه ودموعه نزلت
_ اسم الله حبيبتي ليش تبجين
ازهار _ ذكرتيني بامي هم هيج حنينه وطيبه ودوم جانت تدعيلي
ابتسام _ لعد وينها هسه
ازهار _ السنه الفاتت ماتت واني ما شفتها ولا حتى ودعتها
غطت وجها بايدها تمسح دموعها
ابتسام _ الله يرحمها ويصبرج حبيبتي صدكي هسه هيه تحس بيج وتفرحلج
ازهار _ دنكت مايده كلامها
يله خاله كومي نتعشه واعرفج على صديقتي رغد توها اجتي
ابتسام _ نزعت حجاب الصلاه وطلعت وياها للصاله
كعدت على الميز مال طعام طابخه باميا وتمن
هاي شنو عدكم هنا باميا….؟؟؟
رغد _ كلشي موجود هنا اشتردين موجود
ابتسام _ التفتت على الصوت
بنيه شكره حلوه لابسه بنطرون وقميص وظافره شعرها
انتي رغد مو
رغد _ اي اني رغد اهلا بيج خاله
ابتسام _ ابتسمتلها ذكرتيني بياسمين بنتي هم مثلج شكره وتظفر شعرها
ازهار _ ها عندج بنيه هم بياصف
ابتسام _ ثالث متوسط سوده عليه جانت تريد اصير دكتوره مثلجن
بس هاي شكم شهر حتى ما تقره
مقهوره على اخوها
ازهار _ الله كريم خاله انشالله يسوي العمليه ويشافه ويمشي
ابتسام _ الله كريم يسمع منج
ربي فدوه الحلكج
مانمت ليلتي التفكير موتني برافع وخفت يحتاج حمام ويستحي
من الممرضات
هسه لو اني يمه
سوده عليه منين اجتك يعمري
غفيت ويه الفجر اشويه ولأن بالي يم الصلاه اخاف تفوتني فزيت
هنا لا جامع ولا اذان يكعدني
صليت وبدلت ملابسي وكعدت انتظر كرار
كعدو البنات لكوني مسويه الجاي
ازهار سوت ريوك
وكعدنه نتريك
اندكت الباب كرار
رغد _ تعال اكل ويانه
كرار _ اي والله تسلم الايادي
شلونج خاله نمتي زين
ابتسام _ اشلون انام ووليدي بعيد عني وهاي حالته
كرار _ يله خاله
ابتسام _ يله يمه
دخلت المستشفى متلهفه كانه مضيعته الرافع
صعدنه بمصعد وصلنه الغرفه
دخلت لكيته كاعد ولابس ملابس المستشفى
ويمه سستر توكله
حضنته يمه اليوم منور وجهك
رافع _ هله يمه الحمد لله واحنه نحجي….
دخل علينه الطبيب وحجه ويه كرار
وكرار يترجم
كملنه كل الفحوصات وانشالله باجر العمليه
فرحت يعني بلكت الله وترجع تمشي على رجليك
رافع _ الله كريم
ظليت نهاري كله يمه عافنه كرار ورجع عليه المغرب اخذني رجعني يم البنات
العرفته
ازهار عدها بس اخوانها ابوها وامها متوفين وهيه متفوقه وحصلت هاي المنحه مال الدراسه
اما رغد موجودين أهلها وامها عدها معمل زغير مال خياطه وشغله ناشطه بحقوق المرأه
ومأسسه دار لمساعدة المحتاجين
وابوها متقاعد وعدها ثنين خوات
مزوجات
مانمت ليلتي فرشت سجادتي
وللصبح اصلي وبيدي القرآن وادعي
ما عندي غيرك إلهي اجبر بخاطري
وخاطر وليدي
اجاني كرار من الصبح وطلعنه
وصلت لكيته يجهزو للعمليه
ظليت فوگ راسه اقرأ آيات وحصنته بأسم الإمام علي عليه السلام
ودموعي نزلت من
اجو الممرضين واخذو من يمي على السديه واحنه متلازمين بدينه هو يبوس بأيدي واني ابجي وادعي
لمن دخلو لصالة العمليات
مرالوقت ثكيل اباوع للساعه كأنه متمشي
من بعد أكثر من ثلاث ساعات
انفتحت الباب وجابو الرافع
نيمو بسريره جان بعده بالبنج
كعدت يم راسه
اباوعله واحجي ويا
اجتي الممرضه ما قبلت طلعتني
وحجت ويه كرار
_ ممنوع لازم نكعد بغرفة الانتظار
ابتسام _ كلبي ما ينطيني اعوفه
كرار خاله لا تخافين هو بايدي امينه
امشي ويايه
مر يومين ما شايفين الدكتور مالته بس هو العنايه بي مستمره
وكل ما اسأل كرار يكول هو راح يجي ويحجيلكم كلشي
ثالث يوم العمليه اني جنت كاعده ويا بالغرفه
دخل علينه الطبيب هو وكرار
فحصه وغيرله الدوه وبده يحجي عن العمليه…
_ رفعنه الضغط عن الاعصاب ونجحت العمليه من ناحية الرجوله يكدر يمارس حياته طبيعي
وكذلك حالات الأدرار والإخراج رجع الاحساس بيهن
والحمد لله تلاحكتو بالعمليه والا
الاعصاب اذا انتركت تصاب بضمور
اما المساله الأكبر تضرر الحبل الشوكي ومع الاسف لن يستطيع المشي نهائيا
رافع _
جنت اباوع الوجه كرار من يحجي
وافهم حالتي
تيقنت مراح امشي من البدايه
لازم اكون قوي لان امي انهارت بالبجي وادري بيها شكد متأذيه يمكن اكثر مني
راح الطبيب واني فتحت اديه الها
_ يوم هذا أمر رب العالمين ليش تبجين
_ جنت اتأمل ترجع تمشي
_ احنه من البدايه كالو صعب امشي
كافي لا تبجين اني راضي بقضاء الله
_ ونعمه بالله
اواسيها واني من داخلي متمزق منهار يعني انتهت حياتي لا شغل ولا عمل
اني مو مهم بس ولدي ايمان ياسمين امي خالتي
نزلت دمعتي واني عيني على الشباك المطل على الفضاء الخارجي
اشلون راح يعيشون ويكبرون
امتحانك صعب ربي
ابتسام _ رجعني كرار للشقه مال البنات
جانن بالدوام
دخلت الغرفه ونهاريت بجيت وشكيت الربي
الحمد لله كل اليجي من ربي راضيه بي
مرت اسبوعين على العمليه وبدينه نتهيئ حتى نرجع
رافع تحسن اشويه وشتريتله أحدث كرسي كهربائي المثل حالته
وتحدد اربع ة أيام موعد خروجنا من المستشفى وراح ابوجهنه نطلع للمطار
كانت كعدتي ويه البنات احلى شي
هواي واسوني وغيرولي جو وكت محنتي
وتعرفت عليهن وعلى ضروفهن وهن كلشي حجيتلهن عني وعن بنتي ياسمين
وعن رافع ووضعنه
كلش حبوني واني هوايه حبيتهن
رغد _ خاله هذا عنوان امي اشتحتاجين روحيلها
واني كدامي سنتين واتخرج وانشالله ارجع للعراق
تيقنت ايامي الجايه مراح
تكون راحه وسعاده مثل قبل الحمل الينتظرني ثكيل ولازم اصير كدها
ودعت البنات وسحبت الجنطه
وطلعت للمستشفى
لكيت رافع منتظرني
بدلتله ملابس المستشفى ولبسته
ملابسه
وودعنه الممرضات والطبيب
وطلعنه للمطار بسياره من المستشفى وطبعا كله بحسابه هناك عنايه فائقه بس كلشي بفلوس
واخيرا كرار
_ والله اتمنه ماعوفكم
_ يمه كفيت ووفيت الله يوفقك واشوفك دكتور
_ امانه خاله اشتحتاجون اتصلي عليه
رافع _ تصور شنو بعد نحتاج هيه عمليه وما نجحت
كرار _ لا خلي إيمانك بالله تره الطب يتقدم وسألني آني ادرس طب وعندي معلومات اكو دراسات
حول الخلايا الجذعيه هذا الاختراع
قيد التجارب اذا نجح راح يسوي ثورة بعالم الطب يعني بعد محد يكعد على هذا الكرسي
وانته تكدر تمشي ساعتها
رافع _ وشتصور اشوكت تثبت التجارب نجاحه
كرار _ انشالله عن قريب بس كول يا الله
توادعنه ويا ومشينه متجهين للطائره وهلمره رافع يمشي بالكرسي الكهربائي مالته يعني هو يوجها محد يدفعه
ابتسام
صعدت الطياره راجعين للعراق من بعد ٢٥ يوم بعيده عن بيتي
وخايفه من ردة فعل رافع من
يدخل بيت غير بيتنه ذاك ويعرف بعته على حساب العمليه
من وصلنه نزلنه بمطار بغداد ودخلنه بالصاله لاحظت عيون رافع تدور بين الناس
بتسام _ عليمن ادور محد يدري بينه جايين
رافع _ نسيت تمنيت احمد يتلكاني شتاقيتله
ابتسام_ دنكت راسي وبكلبي اكول
بينك وبين احمد طريق طويل الله يعيني ويعينك
من تسمع بايعه البيت
رافع – يمه ليش تصفنين
ابتسام – ما كو شي يابعد كلب امك
وكف تكسي كلتله على منطقتنه وعاملته على الكروه
السايق – حجيه والله قليل المنطقه طسات ومبهذله
يتفلش الصدر
ابتسام – ردت بس اسد حلكه ما يحجي كلتله موافقه
يله بس ساعد اخوك يصعد
السايق – بعيني
صعد رافع وشال الكرسي والجنطه وربطهن على السيبايه
واني هم صعدت بصف رافع
صعد السايق وشغل السياره وطلع
رافع – يمه ليش رايحين +++++ اشعدنه هناك
ابتسام – باوعتله والعبره بصدري كانه اترجى
ما ينقهر
لان بيتنه صار هنا
رافع – بعتي بيت ابويه على حسابي…..؟؟؟
ابتسام – وشتريت بيت صح هو مو مثل ذاك
بس اهم شي انته سويتلك عمليه
رافع – شنو التغير الكرسي…..!!!!
ما جان لازم اسويها والفلوس النصرفت انتو اولى بيها
ابتسام – لا يمه نسيت جم شغله طبت منها ومهمات
بقت رجليك وعد راح اظل اشوف هذا العلاج
الجديد الجذع مدري شسما ومن يعالجون بي المثلك لو اعرف ابيع هدومي العليه وامشيك
على رجليك
رافع – ابتسمت على فطاريت امي
ابتسام – اي اضحك من اروح فدوه الضحكتك
لا تهتم يمه احنه والبيت اروحلك فدوه
مشت السياره ودخلت منطقتنه مثل الغريب اباوع وين توكف بينه السياره
دخلنه بشارع بي سوگ ونهايته دربونه ثالث بيت وامي كالتله
هنا اوگف هذا البيت
اباوع من شكله امبين قديم وتعبان
نزلت امي اول وحده ودكت الباب فتحها
حسن هو شافنه وشهك يصيح
ابويه اجه ابويه اجه
طلعو كلهم بالباب
السايق نزل الكرسي وساعدني اكعد عليه
وامي حاسبته وراح
دخلت وولدي صعدو بحضني فرحانين
ابتسام – ولكم انزلو بعده عمليته جديده
ايمان – حضنته وبجيت جان عندي امل يطب للبيت ولو بعكازه مو بكرسي
ياسمين – حضنت امي ابجي عمرها ما فاركتني هلكد
ورجعت على رافع ابوسه وابجي
رافع – حضنتها اشم بيها هاي بنيتي عزيزتي ومسحت بأيدي دموعها
لا تبجين اني زين
ياسمين – اشتاقيتلك انته وامي
ابتسام – يله كافي تعبان خلي يرتاح وخرن منه
رافع – اباوع للبيت امشي بالكرسي وافتر
ساكت
ما بيدي شي الوكت خآني وحطمني وحقها امي
اني ادري شكد مقهوره عليه
ما حجيت اي شي ما ردت اقهرها وزيد همها
ايمان _ شلونك رافع الحمد لله على سلامتك شتاقيتلك
رافع _ رفعت راسي باوعتلها وبكلبي
احجي
جنت بعافيتي وجيبي متروس فلوس
وبيت وخير وما راضيه بعد هذا الوضع اشراح يطلع منج يأيمان
_ اشو تباوعلي ….تعال ارتاح بغرفتك شوف اشلون فرشتها
رافع _ حركت الكرسي بي يدات احركها بأيدي ويمشي على البطاريه
دخلت الغرفه الاشرت عليها
فعلا تعبان قربت الكرسي من السرير
ايمان _ دنكت على رجليا نزعت الجواريب وحضنته ووكفته من الكرسي وفريته على السرير كعدته وخليت ورى مخاد
رافع _ شكرا تعبتج
ايمان _ جنت صدك مشتاقتله وظلت أبالي حجاية محمد من كال انتهى كرجل
جنت اريد اكتشف صحيح ما عنده رجوله
بس حسيته تأثر من حضنته وباوعلي مثل مشتاق…
راح اجيبلك الاكل
رافع _ اي والله جوعان
ايمان _ صبيت الاكل وخليت الصينيه كدامه على السرير واني تربعت وكعدت كباله اساعده ياكل
رافع _ بطني نشفت من أكل المستشفى
ايمان _ بعد بفرنسا اشينطوك اكيد اكلهم ما ينجرح
رافع _ الحمد لله خلصت وهاي رجعت
ماسالته شي خلص شلت الصينيه
و رجعت الخالتي
ايمان _ بشري خاله اشو مدا اشوف رافع يمشي
ابتسام _ جريت حسره وباوعت الياسمين وايمان وحسن ورضى
ودمعتي نزلت
ما يمشي بعد على رجليه الله يعينه اشلون راح يتحمل كعدته على الكرسي
ياسمين _ نزلت دموعي
يعني عمليته فشلت…..؟؟؟
ابتسام _ لا نجحت واشافه من ثلاث شغلات بس رجليه ما الهن حل يبقى نفس وضعه
ايمان _ اسمع مقهوره
يعني بعد ما يرجع يشتغل…..!!!
خاله اشلون راح انعيش
شلون اربي ولدي منين ناكل
ابتسام _ مسحت دموعي بقهر هسه هاي شحجي وياياها بس هيه هم حقه….
يمه كولي ياالله لا يسمعج وينقهر اني
اشتغل وصرف على البيت
ايمان _ عزه بعيني لو ضامه ذهباتي الهذا اليوم عاد ناكل بيهن
ابتسام _ بساع منيتي بيهن ولج كل احنه نروح فدوه الرافع نسيتي حنيته
علينه مو هذا رجلج وابو ولدج….!!!!
ايمان _ واني شگايله كذبت لو مبقيهن نعيش بيهن عاد
ياسمين _ احمدي الله وشكري بعده عايش بنصنه
ما تكولين اشلون نفسيته راح تتحطم وهو على هذا الكرسي يكعد اربعه وعشرين ساعه
ابتسام _ كافي اسكتن ما ريد اسمع اي شي هاي قسمته وقسمتنه ولازم نرضه بيها
ابتسام_
ثاني يوم واني حايره رجعت بكم فلس لو خلصن شسوي
كاعده واباوع التنور مال راجحه بالحوش وغراض الخبز
دخل محمد بيده علاكة مسواگ
يعني مو راجحه تصرف صارت عيشتنه بيد محمد
رافع غير يموت لو عرف هذا المسربت
يعيشنه
راجحه شنو بطلتي تخبزين
راجحه _ غير الكالي معاميل لو اخبزه ويظل على كلبي
ابتسام _ معليج راح اني اجيب المعاميل
ونخبز سويه
راحجه _ انتي صدك تحجين تخبزين وياي
ابتسام _ اي احجي صدك لو اعرف أخذه ابيعه
بالسوك ما گدامي غير هاي الشغله وياهو يجينه اگله اني خياطه وانشالله تدبر العيشه
راجحه _ من باجر أحسبيني عجنت وخبزت
ابتسام _ لكيتلي خمس محلات اخبزلهم
وكم بيت جوارين بضرف شهر صارو عدنه معاميل والناس عرفتنه
نكعد من الغبشه اني وراجحه نخبز ونقسمه بجياس ومن يفتحون المحلات اودي الهم
وارجع اسوك للبيت
راجحه ما قبلت تتقسم الفلوس بينه رغم هيه تتعب ويايه
تكول اني وحده من هلبيت وعايشه وياكم
رافع _
كاعد على الكرسي بالطرمه واباوع لأمي وخالتي يخبزن حتى يصرفن على البيت
شگد حاولت ابعد امي عن الشغل والتعب وما رهمت
كأنه القدر يعاندني
ساكت ما الي نفس بكلشي تحطمت
ابني لو طلب مني فلوس يشتري نستله ما عندي انطي صرت حالي حال اي غرض بالبيت ماالي اي فايده
بالعكس صرت عاله على امي وخالتي
رغم صرت زين بس صار اكثر من شهرين بعد العمليه ما متقرب من ايمان
الليله عيني ما أخذت نوم ايمان بصفي نايمه وظهرها عليه
اجاني شعور محتاج قربها
مديت ايدي تلمست ظهرها وزنودها جانت لابسه دشداشه خفيفه
التفتت عليه وكأنه كانت منتظرتني تقربت مني ونامت على صدري
إيمان _ جنت منتظرتك طولت هوايه
رافع _ بيج حيل تقومين بالواجب
ايمان _ رفعت راسي وباوعتله
اشلون يعني….
بعدت نظري مهما يكون محرج اگولها
رافع _ يعني اني ما عندي رجلين بس انتي عندج
ايمان _ صفنت بوجهه شويه بعدين فهمت
نزعت فانيلته وظليت اتلمس صدره
إلى أن حرك ايديا وسحبني فوكا
رافع _ ما اعرف احد بالمنطقه جديده عليه
مرتين طلعت بالكرسي مالتي بالباب
اتفرج على الرايح والجاي إلى أن اتعب وادخل للبيت
ابو زين _ السلام عليكم
رافع _ اهلا عليكم السلام
ابو زين _ يابه اني جيرانكم الركن ابو المحل
رافع _ هله بيك اتشرف بيك يابه
ابو زين _ واني يابه اهلا بيكم وعتبرني اخوك شتحتاج اني عدكم
رافع _ رحمله والديك اشكرك
ابو زين _ تعال يمي بالمحل نسولف نقضي وكت تدري اني ما اكدر اعوف المحل
رافع _ انشالله اجيك ليش لا
راح ابو زين واني حركت الكرسي ودخلت
ابتسام _ ها يمه منو جان يمك
رافع _ ابو المحل يبين خوش انسان اجه يتعرف عليه
_ اي ابو زين خوش رجال ياخذ مني خبز
حجيتها وخليت ايدي على حلكي ياريتني ما حجيت رغم رافع يدري نخبز
ونصرف على عيشتنه بس ما نحجي كدامه احسه يتاذه وخصوصا من أگله فلان ياخذ خبز من عدنه
ما كادر يتعدى انو صار عاجز واحنه نصرف على البيت
ياسمين _
استلمت النتيجه ومثل ما توقعت راسبه
رجعت من المدرسه ودموعي على خدي
امشي واباوع للسيارات صار سنه ما شتاقيتلي سيد ليش عفتني
تعال وشوفني هاي الجانت اشطر طالبه هسه راسبه
تعال شوف حياتي اشلون انكلبت من الدلال للألم والهم والحاجه
شوف ياسمينتك الربيتها وعلمتها محتاره بزمانها
تعال واسي صاحبك وصديق عمرك
طول الطريق امسح دمعه تنزل الثانيه
وصلت البيت امي وخالتي يخبزن بالطرمه
ورافع وايمان والجهال بالهول كاعدين
دخلت كبل الغرفتي وسديت الباب
ونهاريت ابجي
رافع _ شبيها ياسمين دخلت ركض
ايمان _ تلكيها رسبت….!!!
رافع _ حركت الكرسي للغرفه مالتها
دكيت الباب وفتحته
لكيتها اموته نفسها من البجي
اخذتها بحضني
لا تبجين تعوضيها السنه الجايه
ايمان _ عليمن اموته روحج شتفيدج الشهاده تاليتج تزوجين وتكعدين بالبيت
رافع _ ايمانننن
ايمان _ شكو حجيت كذب عدك فلوس تصرف عليه صدريه وكتب ….؟؟
رافع _ اسكتي وروحي على شغلج لا تدخلين
ايمان _ رايحه حجي الصدك محد يريده
رافع _ مسحت دموعها
لا تبجين الضرف المرينه بي مو عادي
شدي حيلج السنه الجايه ومعليج بكل شي دراستج ومستقبلج اهم شي
يله اشو كومي وياي لا ظلين وحدج
ياسمين _ اخذني غسلت وجهي ورجعت ويا للهول كعدنه
ابتسام _
شايله علاكة المسواگ واحس وجع صار بصدري اريد اجر النفس ما اكدر گوه امشي ماصدكت اوصل البيت
اباب المطبخ وحسيت الدنيا اسودت بعيني ونفسي انگطع….
ووكعت….. ما حسيت بشي
إيمان _ خاله
الحگ عليه رافع…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
