رواية انكسار الياسمين الفصل الرابع عشر 14 بقلم أمل مهدي
رواية انكسار الياسمين الجزء الرابع عشر
رواية انكسار الياسمين البارت الرابع عشر
رواية انكسار الياسمين الحلقة الرابعة عشر
ياأعز جتال
يتمايل غنج لو بيه . . ثكل نوحي
تعاتبني اعله حالك . .
صار بيك الصار
****************
ياسمين _
تاكل وعيونها مبتسمه تنتقل بيني وبين رافع كانت تحجي ويه رافع
سكتت باوعتلها كل ضني صافنه على رافع
بس من ايدهانزلت بهدوء حسيت بيها شي
صحت يمه…….!!!!!!
وكنت متوقعه راح تلتفت عليه
ماكان ابد على بالي الموت بعدها الابتسامه بوجها
وعيونها شاخصه على رافع تريد ترد عليه
فجأه
سكتت وكلشي بيها أنساب بهدوء
التفت رافع من سمعني گلت يمه… وحرك الكرسي بتجاها وهو مركز ينظرلها….
نتظرت رافع يگلي شي مثل جيبي مي اشربها
لو شوفي احد ناخذها للمستشفى
بس ما حجه
حط أصابع على رگبتها لحظه ونزل ايده
جان متفاجأ بس متيقن من حالتها
تشاهد ابوجها
لزم اديها بوسهن ونزلت دموعه….. ما حجه اي كلمه
غير ساعديني اقبلها
كانت كاعده على القنفذه مالت على صفحه
رافع _ سحبتها على القنفه ومددتها
تأكدت اتوفت من نبضها لازم اديها وابجي بهدوئ
حتى كفوفها تبللت من دموعي
ياسمين _ اباوع الرافع مستغربه…
رافع شنسوي انجيب طبيب احجي بتوتر
نوديها للمستشفى…. اشو ساكت احجي شي امي شبيها
وهو ولا كأنه يسمعني….
صرخت حيل……!!!
رافع اشو ساكت
رافع _ ياسمين بدت تتهستر سحبته من ايدها وحضنتها
ودعيها امنه ماتت
ياسمين _ جفلت ما مصدكه
ورجعت خطوه ليوره انكلبت الصينيه بالكاع
ونزلت عليها احركه واصرخ
لا انتي ما تموتين كذب اكعدي
اكعدييييي…… يمه لاتعوفيني
اصرخ بدون وعي وحاضنتها
ورافع يبجي بحرگه
بده يطلع صوتنه…. فقدت اصيح بعلو صوتي يمه لا تعوفيني
جيرانه ام طارق مره كبيره بالعمر
سمعت صراخي واجت…
دخلت علينه
وگفت والدمعه بعينه متفاجأه مثلنه
ياسمين _ خاله سويلها شي اريدها تكعد اني اموت ولا هيه
سحبتني منها جابت عبايتها معلكه بالشباك وغطتها حتى وجها
هنا فقدت اصرخ واضرب على وجهي
وام طارق تحاول تلزم اديا
الجوارين التمو وكل واحد يسأل شكو وشلون ومع الاسف
واني بحضن ام طارق ابجي
سمعت صراخه من الشارع
هاي خالتي راجحه دخلت مفزوعه تلطم
وراها إيمان ورضى
ياسمين _
گوه شلعوني منها حاضنتها وابجي
اخذوها مني….
لحظات كلشي تم بسرعه الناس أكثرها تدري ما عدنه احد ويعرفون رافع وضعه
ابو زين والجيران قامو بتجهيزها واخذوها دفنوها
الجيران كلهم اجونه للفاتحه بالأخص ام رغد ما عافتنه
من غير كل مصاريف الفاتحه شالتها
ثالث يوم البيت فرغ علينه اني ورافع وخالتي وايمان
رافع عزل روحه بالغرفه أشكد ضروف مرت علينه ما شفته ينهار إلى هاي الدرجه
دخل بدوامه حزن إلى درجه قطع الاكل والكلام واهمل نفسه بس دموعه تجري
كلنه نعرف أشكد متعلق بأمي وامي متعلقه بي من بعد وفاة ابويه
كانت كلشي بحياته
رافع _
لأول مره احس بروحي وحيد احساس طفل ضايع من امه
المفروض هسه بيدي اقبلها اشيلها واشيعها وادفنها
مو كسيح على كرسي ينتظر ولد الحلال يجىون
ياخذونها ويدفنوها
حسيت شگد اني عاجز وقليل حيله اشگد عاله ومالي اي نفع
غير مصدر الجادر والناس تجي تعزيني. وتواسيني
روحي راحت وياها مالي نفس اعيش
كرهت وجودي حتى ياسمين ما فكرت بيها
تمرضت إلى درجه صرت طريح الفراش
_ واني رغم حملي وحزني وتعبي كنت اعيش الخوف لا افقده هو هم تعلقت بي بشكل
إداري اسهر على راحته اتكلم ويا طول اليوم
ان يهتم النفسه الخاطري
بس ما يستجيب كنت اشاركه غرفته حتى اكون قريبه عليه
خالتي وايمان ما رجعو تركو بيتهم
لان خالتي المسكينه رجعت تصرف علينه هاي الفتره…
اليوم الاربعين مالت امي اخذنه ابو زين نزورها
اني ورافع وخالتي
جبل الحنيه والأمان الكان يحيطني اني ورافع مالگينه منه بس اسمها باقي منقوش على الحجر
رجعت واني مهدود حيلي قهر وبجي وطريق طويل
حسيت بليل على وجع قوي تحملت اشويه بالبدايه بس ما گدرت انام
رحت على خالتي بالغرفه الثانيه نايمه هيه وايمان كعدته
_ خاله وجع عندي مو عادي
راجحه _ اخاف تولدين
_ ما ادري اول مره احس بهذا الالم
_ اي هذا وجع الطلوگه امشي تحركي بلكت الله يسهلج
_ خاله احس روحي تعبانه فراگ امي ما خله عندي حيل
_ ذكرتيني بأمج الله يرحمها هم من جابتج اني وياها تطلگ
ومهدود حيلها على فراگ ابوج
لا تخافين هسه الله يسهلج ويجيج البضحكته ينسيج هموم الدنيا
_ اني ما اريد غير رافع يرجع مثل قبل كافي عليه تيتمت من امي وابويه ماريد اتيتم من اخويه هم
_ لعد ادعيله بلكت الله ياخذ ابأيده ويگوم بحيله وصحته هسه انتي بحاله الله يستجاب دعائج
_ رفعت أيدي واباوع للسماء من الشباك كانت فجريه يارب.. يارب انته تدري ما باقيلي من اهلي غيره هو ابوي واخوي وسندي وسترى
شافي……… و رجعليا
آههههه آههههه يما يما
خاله الحكيلي بعد ما اتحمل وبجيت
_ إيمان عينج عليها رايحه اجيب القابله واجي
إيمان _ ياقابله دخذيها للمستشفى
ياسمين _ من الوجع صرخت حيل……!!!!
وخالتي وايمان يجادلن على القابله
اباب غرفة رافع
اجانه صوته تعبان بس يحاول يوصله انه ونسمعه
خالتي اخذيها للمستشفى
سكتنه متفاجأين
صار شهرين ما سامعين صوته…
راجحه اللهم صلي على محمد وعلى آل محمد
بركه من حجيت يا عيون خالتك
حاضر هسه آخذها تدلل انته وياسمين ولفت عباته وراحت تركض
اجيب تكسي
ياسمين _ نسيت وجعي اجيت يمه ودموعي على خدي خايفه لزمت ايده بستها
الحمد لله بسرعه ستجابلي رب العالمين ورجعك اليه
رافع _ ابأيده مسح دموعي اني زين لا يظل بالج يمي المهم تگومين بالسلامه
دخلت خالتي تركض لبستني العبايه وسحبتني
ولج امشي… التكسي بالباب
إيمان _ ركضت ورانه بالجنطه
ساعات مرت عليه والألم يگطع بيه ودموعي تهمل
كان الرجاء الوحيد المصيطر عليه يموت ما أريده يعيش وينظلم وياي
الممرضه _ انقهرت عليه
متگوليلي شنو اهلج ما عدهم يوكلوج وينج وين الطفل انتي شگداتج
سهليها ماما راح يموت ابنج
ياسمين _ بقيت اتلاوى ويه الوجع إلى أن الله سهلها اسمعهن انخبصن
ويضربن بي…
الممرضه _ بسرعه صيحيلي الدكتوره
ياسمين _ انتبهت أكثر وباوعت عليه ما يتحرك بلحظه حسيت بتأنيب الظمير لان حملته كل المر بيه
اجت الدكتوره بسرعه ورفعته من رجليه وبدت تضربه بقوه على ظهره
واني احس تضرب على گلبي
زغير و تايه بالهوى وهيه شايلته من رجليه
حسيت بلهفتي تحاوطه همست ويه نفسي
ربي سامحني ما أريده يموت
صرخ صوته ناعم يرجف ابتسمت الدكتوره وباوعتلي
لا سبع من صوته ملئ الغرفه بصراخه
شي بيه اطمن ورجعت راسي على السديه ممتنه من ربي رغم كل الشفه يستجيب دعائي
راجحه _
بيدي الطفل ملفلف اخاف احطه بحضن ياسمين وترفضه
الممرضه _ ابنكم شنو اسمه
راجحه _ ما ادري خل اسال امه
شسمي وليدج ياسمين
_ انتبهت اني حتى ما ختاريتله اسم دمعت عيوني واني ابا عله حسيت من هسه مظلوم هذا الطفل اجه على الدنيه لا اب فوگ راسه ولا ام تريده
الممرضه _ شنو ما مختارين اسم اسمي الكم……..!!!!
راجحه _ باوعتلها أكدر اسمي بس اريدها تحن عليه هذا المسكين
بجه…. وهيه التفتت عليه بلهفه
من شفتها تباوعله
فتحت ايدها وخليته بحضنه…..
ياسمين _ باوعت بوجها زغير ملامحه بريئه
اجه أبالي سيد علي….
اسمي علي….
راجحه _ سلام الله عليك يا امير المؤمنين
خير اسم سميتي
تحجي وفرحانه انو تقبلته وسميته…
_ رجعت بالليل من بعد معانات الله سهلي بيه ويايه علي
الغريب كل ذاك احساس الرفض راح
أخذته بحضني كان أكبر سعاده بحياتي الله يوهبنياها بين الظلم العشته
لازم اشوفلي شغل علاوي هواي مصاريف
يرادله وخالتي رجعت تخبز وشايله البيت كله متلحك
مصرف البيت وكل كم شهر تروح لمحمد هم لازم مصرف تاخذله
وجكاير وملابس
كم مره زارتنه ام رغد ومن تجي لازم تجيبلنه وياها مواد غذائيه
ومساعدات
اني ادري هاي من جيبها الخاص لان المنظمه انسحبت وسدت ملف المساعدات باعتبار خلصت فترة الطائفيه وعم الأمان على البلد
من عرفت اني اريد اشتغل عرضت عليه اشتغل بالمعمل مكان امي الله يرحمها واني رحبت بالفكره
لان إيمان وخالتي تعهد و علاوي…
كانت تريد تساعدني باي طريقه حتى يتحسن وضعي شجعتني وعلمتني لان اني اعرف اخيط بس ما امارسه
وبديت اداوم بالمعمل الشغل بسيط اهم شي اساعد خالتي بمصاريف البيت ومصاريف علي
إيمان _
من راحت خالتي امي عافتنه وگابلت رافع وياسمين تنفذ وصية المرحومه
فضطرينه ننجمع مره ثانيه ونعيش سويه تركنه بيتنه
امي تخبز و تصرف علينه كلنه
بعد وفات خالتي رافع انصاب بالسكر وبده ياخذ علاج لان حالته بالبدايه تأزمت
بس الحمد لله هسه احسن مستقره
بالبدايه كنت اتحاشا لان ياسمين قايمه بواجباته بس من اشتغلت گمت اقترب منه
بالبدايه ما كان يباوعلى بس مرات يستسلم لان ماكو غيري
يساعده
رافع _ سبحت ورجعت على الكرسي وطلعت من الحمام احرك بالتايرات بيدي
إيمان _ مشيت بسرعه اريد ادفعه
رافع _ رفعت أيدي بمعنى عوفيني…..
إيمان _ رفعت أيدي من الكرسي وهوه حركه بأيده ودخل بالغرفه
رحت ورى ووكفت بالباب…
رافع _ فتحت الكنتور ادور بجامت التراك ماكو اكلب بالملابس زهگت…
وين صارت البجامه وين
إيمان _ بسرعه طلعتها اله جانت جوه ايده
هاك هايه البجامه
سحبها من ايدي بعصبيه ساكت
_ التالي رافع لشوكت اظل زعلان عليه
رافع _ إلى أن الله ياخذني مراح اسامحج
إيمان _ من حجه اشجعت… افتريت اگباله وركعت يم رجليه
اسم الله عليك انته رجلي وابو ولدي عمرك طويل انشالله
كلشي ما اريد منك بس تخليني اعتني بيك واداريك
قنعتني بتبريراتها وندمها ان محمد خدعه وكذب عليها وهيه مستحيل ترضاله بالسوى
معاملتها الياسمين غيرت رأي انو إيمان تغيرت مو إيمان الصلفه الوكحه
رافع_ سكتت اني فعلا محتاجه اكذب على روحي رغم كلبي هواي شايل منها
من بعد أشهر رجعت علاقتي بأيمان طبيعيه
وحياتنه ماشيه بشكل هادئ وبسيط معتمدين على راتب ياسمين
وشغل خالتي بالخبز
اما حسن كان مشكلتنه الوحيده ترك الدراسه وصايع بالسوك يوميه
بشغله والفلوس يصرفهن حتى ما ينطي لايمان
بس رضى كان عاقل وظل بمدرسته
ياسمين _
من شتغلت حسيت براحه لان عندي راتب واصرف على ابني واشارك بالبيت ومصاريفه
خالتي تتعب هوايه وتضغط على روحه حتى كل كم شهر تجمعها كم فلس تاخذهن مصرف لمحمد ومن ترجع
تجيني اظل تحجي لو تشوفي صاير يصلي متغير هواي محمد
ندمان محمد وبس يحجي بيج
يگول ظلمتها اريد اسعدها واريحها
منتظر اشوكت الله يفرجله ويطلع يشوف ابنه
واني ساكته ما ارد بعده كلبي مقفول من ناحيته
رافضته …..
كارهته……
بس مجبوره أرضه بواقع فرضه عليه
علاوي كبر وصار عمره سنتين احسه الشي الوحيد الحلو بحياتي
اليوم فاجاتني ام رغد انو طلع اسمهم بالهجره لامريكا وراح يسافرون عن قريب
قهرتني هوايه لان طيبه وحنينه تعاملني مثل بنتها
ام رغد _ لاتخافين على شغلج راح تبقين تشتغلين انتي والبنات
لان الرجال المشترى المعمل يريدكم تبقون بي
وانتي بالذات اني وصيته عليج
شهر وستلم المعمل سلوان..
اليوم اجه ويه ام رغد يفتر بالمعمل يتعرف على العمال والبنات
كنت كاعده اخيط من وصلت يمي ام رغد
ام رغد _ وهاي ياسمين الحجيتلك عنها
التفتت عليهم كل ضني رجال جبير بس شفته من عمر رافع ويجوز ازغر يعني ثلاثيني ووسيم وانيق شكله مال واحد مرتاح
سلوان _ ها واخيرا شفتج
اشلونج ياسمين
ياسمين _ رديت مبتسمه الحمد لله
ام رغد _ باوع سلوان ياسمين تعتبرها بنتي وشتحتاج اريدك
ما تقصر
سلوان _ يبا على مبتسم واشر على عيونه تأمرني من هاي العين الهاي العين
ياسمين _ رجعت المكاني واني مرتاحه يبين خوش ادمي
الحمد لله
سافرت ام رغد ودعته اني والعاملات بدموعنه انسانه طيبه
ودائما تساعدنه
اخذتني البيتها وحملتني غراض وفراش وملابس لان كل اثاثها تبرعت بي الدور الايتام
وأخير شي انطتني مبايل وحفضت بي رقمها حتى نظل على اتصال
يوميه اداوم بالمعمل كل شي عادي ما عدى عيون سلوان التزعجني منين ما ارفع راسي الگا يباوعلي
واني اتحاشه نظراته
اجه راس الشهر والمفروض اكو محاسبه تسلمنه الراتب
سلمت الكل البنات الا اني
استغربت ومن سالتها…..؟؟؟
_ استاذ سلوان يريدج بمكتبه والراتب مالتج يمه
بنهاية الدوام رحتله
_ مرحبا استاذ
_ ابتسم مرحب اهلا ياسمين تعالي تفضلي
_ رايدني استاذ…. گلتها مرتبكه
_ اي اشو من راحت ام رغد لا جيتي ولا سلمتي احنه هيج اتفقنه
_ ارتبكت… شنو اتفقنه…. عبالي ناسيه شي
_ ههه ماكو شي…. اشمحتاجه گولي مو اتفقنه تجيني
_ ما محتاجه شي اشكرك
_ زوجج ما طلع من السجن….
_ تفاجأت بسؤاله طلعت ام رغد كلشي حاجيتله
_ نزلت راسي محرجه لا استاذ بعد سنه
_ ها الله يسهله اشلون مخلصتها بدونه….. ههههه
_ جاوبت بكل سذاجه واني مبتسمه
عادي شسوي يعني
_ مدلي ايده بيها ضرف ابيض
هذا راتبج اني انطيتج علاوه هذا الشهر
_ تشكرت منه و اخذت الراتب
وطلعت…..
يعاملني طبيعي بس نظراته تخوفني احس عيونه تتفقدني
يبا على بتركيز معقوله حاط عينه عليه
همزين لعد مزوجه حتى ما يقترب مني
احجي ويه نفسي
رجعت للبيت قمت سعادتي من عندي فلوس واصرف على علاوي حبيبي مريت بالسلوك اشتريتله دشداشه بيضه اريد اطهره هذا الشهر واشتريت الرافع تراكسودواليه شغلات
واني امشي شفت سياره حلوه عجبني اشتريها اله رغم غاليه بس ما يهم اقتصد اشويه بس اريد افرحه
هاي اول مره اجيبله لعبه
رافع كلش يحبه وهو متعلق بي ياخذه يخلي بحضنه ويطلع بالشارع
اليوم بالشغل كاعده اخيط على المكينه اجاني الفراش
_ المدير يريدج بمكتبه
_ رحت عليه دكيت الباب ودخلت
مرحبا استاذ
_ اهلا ياسمين تفضلي
_ طالبني استاذ
_ اي اكعدي استريحي…. اشلونج شخبارج
_ استغربت هو يوميه يشوفني…. كعدت متوتره
_ الحمد لله
_ هو كله شغل لا تعبين نفسج انتي بالذات الج معزه خاصه عندي
والج مطلق الحريه تشتغلين ما تشتغلين تره عادي…
_ تعجبت حتى ابوكت ام رغد ما كلتلي هيج كلام كان الشغل اهم
من كل شي والا المن جايين
بس اني فاهمته
لا استاذ مايصير اني آخذ راتب مقابل هذا الشغل
_ هههه هسه اني صاحب الشغل واعفيج ارتاحي يابه
وتعالي يمي نشرب ستكان جاي انسولف
_ عليمن انسولف…..؟؟؟
_ على كلشي
احجيلي اشلون امدبرته بدون رجال اكيد صعبه
_ َوكفت استاذ اني اترخص عندي شغل
_ وگفت انتي ليش تتهربين من الحجي
_ الخوف البيه ما ينوصف بس حاولت ابين قويه لان امبين يحاول يستغلني…
استاذ اني ما احب احجي خصوصياتي وانته دتلح شنو قصدك ما فاهمه
_ هههه خلص بطلت ما اسال اني قصدي اساعد لا اكثر
اكعدي….
_ لا اريد اروح البنات ينتظروني.. كان الوقت نهاية الدوام
_ طلع علاگه من المجر هاي هديتج من سافرت حسبتج ويه المقربين العزاز
_ ما أكدر أخذها اشكرك
_ تردين ام رغد تزعل مني وهي موصيتني عليج انتي ما تقبليها
_ من كال ام رغد اشويه اطمأنيت بس بعدني حذره منه
افتر من وره الكرسي وسحب أيدي وخله العلاكه بيها ولزم كفى وظل يطبطب عليه ويلمسه
مسوي روحه يطمني…
سحبت أيدي من بين اديا وأخذت الهديه وطلعت
اريد انهز م
طول الطريق ظليت افكر هذا اشلون بي اخابر ام رغد اخاف
تتعارك ويا ويبطلني واني والله بحاجه للراتب
رجعت للبيت تعبانه ومقهوره حتى الهديه ما فتحتها منين طلعلي سلوان افندي
اخذت علاوي بحضني ونمت بعدني ما واصله العشرين والدنيا راوتني المحد شافه ذلتني وتعبتني
ثاني يوم رحت للمعمل اشتغل وكل اشويه سلوان يفتر يكلب بالاقمشه يباوع على الشغل
اتأكدت هو حاطني ابراسه
بس والله لو يموت ما يطول شعره من راسي واظل احارب على عيشتي لاخر يوم
خالتي لاحظت عليه اصفن ومهمومه
سألتي وحجيتله كلشي
راجحه _ ديري بالج تنطي مجال واذا بيوم سواها صدك وتحرش بيج
اني اروح اصخمه والطمه انت مو وحدج عندج اهل
_ خاله هذا يرتكب علينه ويدخلنه السجن
_ لعد اشجاريلج بطلي والعيشه على الله
_ شنو اشجاريلي غير محتاجه الراتب
بهذا الشهر مرتين دز عليه واحجي ويا بحذر واطلع شكد حاول يجرجرني بحجي بسوالف ما نطيته وجه بلكت يمل ويعوفني
اجه راس الشهر والكل استلمو الرواتب الا اني ومن سالت المحاسب ليش اني الوحيده راتبي ماكو
گالي اسألي استاذ سلوان ما ادري
يومين ظليت بحاجة للمصرف وما رحتله ضني راح يدز عليه وينطينيا
جان علاوي مريض ودته خالتي للمستوصف وهم بعده
اليله ما نام الگحه والصخونه خلتني سهرانه ويا للصبح
طلعت للمعمل واني تعبانه ما نايمه ولازم اخذ الراتب اليوم حتى
أخذ علاوي للدكتور
استاذ سلوان كان يجي بالعشره على راحته
اول ما كعد على المكتب دخلتله
_ صباح الخير استاذ
_ صباح النور
_ استاذ راتبي ما استلمته ويگول المحاسب يمك
_ ضرب على گصته باصابعه
اهوووو اني شلون نسيت ما موقع عليه اسف وبده يعتذر
ممكن تجيني بنهاية الدوام…….؟؟؟
_ نزلت راسي لصمني بعتذاراته يبين حمل وديع بس هو ذيب
رجعت مكاني اشتغل واني ما نايمه انتهيت كل اشويه اروح اغسل وجهي وارجع
احس روحي خويت ياساعه انام واني كاعده
ما صدكت دگ الجرص يعلن انتهاء العمل بسرعه اخذت جنطتي
ورحت للمكتب
_ واني واكفه استاذ ممكن الراتب اريد اروح
_ تعالي استريحي أوقع الأوراق وانطيج
_ استاذ البنات ينتظروني اروح سويه
_ أشر للفراش روح كلهم يرحون نوصلج بسيارة المعمل
_ظليت واگفه ومحتاره اطلع اشلون منين اودي علاوي للطبيب
بعدين شفت السايق والفراش موجودين اضطريت أبقى
جان يكتب التفت عليه…..!!!!
_ هاي بعدج واكفه تعالي اكعدي لحظه بس انتظري واشر للفراش
جيب جايات لو غده شتكولين
_ كلشي ما اريد استاذ شكرا بين عليه متوتره
_ كمل كتابه وطلع ظرف خلى على المكتب ووگف وفتر من مكتبه
واجه للباب يسدها
_ التفتت بالممر لا السايق ولا الفراش احس جسمي رجف من الخوف ورجليه صارت اشثگلهن اريد اوگف ما اكدر
_ ليش سديت الباب…..؟؟؟؟
اجه گعد بصفي
_ عندي حجي وياج
_وكفت حسيت دخت من التوتر
اذا ماكو راتب اروح….
سحبني من ايدي بقوه وكعت عليه وبسرعه طوقني بثنين اديه
_ كلشي انطيج مو بس الراتب بس اسمحيلي ابوس عيونح
موتني….
_ مطوقني بادياوانفاسه بوجهي
صرخت حط ايده على حلكي قاومته وحاولت أفلت منه
وكعنه اثنينه على المكتب صار فوگايه وراسه برگبتي
بجيت اتوسله لان ما عندي قوه اقاومه
كانت ايديا وحده لواها جوايه والثانيه لازمها على المكتب وجسمه ضاغط
عليها
اجت ابأيدي گترمال ورق لزمته زين بقبضة أيدي ماعندي مجال على جسمه بس الوح راسه ضربته بكل قهر
سلوان _ آخخخخخخ
تركني ووكف وعينه تخزرني والدم
ينفر من رگبته…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
