رواية انكسار الياسمين الفصل الخامس 5 بقلم أمل مهدي

رواية انكسار الياسمين الجزء الخامس

رواية انكسار الياسمين البارت الخامس

رواية انكسار الياسمين الحلقة الخامسة

وعتنيلك وانه ما عندي مجال
وانت ما تجيني ولا حتى بحلم
عندي الك شوك ومحبه وذكريات
كلشي عندي وانت ما عندك علم
**********
السيد _
البيت فرغ بس اني الرجال البي ابويه جان الحايط الساند ظهري جان خيمتي وعشيرتي
جان صديقي واخويه قبل لايكون ابويه
بيتنه ما فرغ للاربعين ناس رايحه جايه ابويه معروف بالشورجه وبالنجف هم
تجار ومعارف وكرايب والعشيره
هواي ناس كان مواصله اجتني
طلعت للمحلات رغم كسرتي لازم انفذ وصية ابويه واهتم بحلاله
واهتم بخواتي وخصوصا خواتي من مرت ابويه رغم تزوجن بحياته من اولاد عمامي بس كان يوصلهن حقهن وشهريتهن هن وامهن
من بعد شهرين طالبت مرت ابويه بحقها وحق بناته بالورث ودزت اخوها ابن عم ابويه يتحاسب وياي
يردون احصر التركه واقسمه
ما توقعت بهاي السرعه يطالبوني بالورث
وحقهم النصف بكل ما يملك والدي
اضطريت ابيع البيت الكاعدين بي وانطي الهن لان هم ياله يساوي حقهن
وافرغ بيت باب الشيخ
الجان مخزن للقماش واجهزه حتى ننتقل بي اني وامي وخواتي الاثنين نسرين وطيبه
رافع واحمد طول هاي الفتره ويايه
حتى شيلوني البيتنه الجديد
من بعد ما صلحته وصبغته
ضطريت أأجر مخزن للقماش
ابداله بداخل الشورجه حتى يكون قريب على المحل الرأئيسي
بقى المحل القديم البسوك مرات اروحله مسلمه بيد سالم يديره واني اجهزه قماش
من يوم الراح ابويه واني تعبان بين حزني وترتيب وضع اهلي
عمامي وأولاد عمي شكد ابويه جان زين الهم بس همه ظلو عينهم على حلاله ورغم اني
ابن عمهم بس مجانو يتعاملون ويايه مثل ما بيناتهم والدك كله لان امي غريبه ومو علويه
انتقلنا البيت باب الشيخ منطقه شعبيه جديده وناس جدد
وين جنه بيتنه جبير ومعروفين ومتعودين على الناس هناك
امي من بعد موتت ابويه وكعت ويوميه عارضها على طبيب وزاد تعبه من كعدو بناته وعمامي يحاسبوني ويردون ورث اختهم الهيه مرت ابويه
وهو لسه ترابه أخضر مثل ما تكول حتى ما نتظرو تطلع السنه
من اروح أزور قبر ابويه أمر اشوف خواتي آمنه ورقيه وارجع بنفس اليوم حتى ما ابات مرتين طلعت سلمت عليه زينب ودخلت واني لا سئلت ولا اريد اسأل
كرهت تصرفهم ويانا وتمنيت تجي منهم ويبطلون لان اني ما اكدر أرفض زينب حتى لو ما أريدها ابويه وصاني اخذها
قريب السنه مالت ابويه اجانه
عمي باقر ابو زينب يبلغني اخذ زينب ماكو داعي باقين الهسه
حاولت أفهمه اني ما مستعد
للزواج حاليا انطيني مجال
بعدنه بالبيت ما مجاوزين حزنه
بس هو ما قبل وكال يمكن أفضل حتى شويه تنسون حزنكم
وضطريت ازوج سكته بسيارتي رحت وجبته وحدها من بيتهم ماكان ويايه بس اختي نسرين
من النجف البيتنه وازوجنه لا جار ولا صديق عرف
ولا صفكه ولا هلهوله ولا اي معالم للفرح
ضروفي بعدتني هوايه عن ياسمين بس ما بعدتها عن تفكيري
كل مره اكول افرغ روحي يوم واروح اشوفها
وازور رافع وما ترهم
زينب كلش حبابه مطيعه وفقيره وتاقلمت بسرعه ابيتنه
وتعتني بامي وهذا اهم شي
اليوم واني بالمحل مال الشورجه
اتصل عليه سالم
_ سيد يردون يطلعونه من المحل
السيد _ اليوم جاي واشوف ابو الملك
عفت كل شغلي وصعدت سيارتي ورحت المنطقه القديمه
ولكيت فعلا ابو الملك يريد المحل
حاولت ويا ازيد الايجار ما قبل وكال اريده الابني
وصيت سالم يدورلي على محل واذا ما الكه اعزله وافظه هو اني اصلا ما فارغله
باوعت الساعتي بالوحده …
رحت البيت احمد لكيته شايل عازل من اهله بغير منطقه مشتري بيت ومتحول
رجعت تمشيت البيت رافع
وصلت وكل أملي اشوف ياسمين…
دكيت الباب…
فتحه ابن رافع كبران
السيد _ انته منو
_ اني حسن انته منو…؟؟؟
_ هههه شدعوك عصبي ابوك موجود
_ لا بالشغل…
_ روح كللهم السيد بالباب
دخل الطفل امبين وكح
ابتسام _ يا هله ومرحبه بالسيد
تفضل يمه هسه على جيه رافع
دخلت كعدت بالاستقبال
وسوالف حلوه ويه ام رافع
اني ادري ياسمين باي صف واندل حتى مدرستها بس ردت افتح موضوع
السيد _ وين صارت ياسمين باي صف
ابتسام _ هاي بعدك تذكرها السنه ثاني متوسط
كبرت ياسمين وصارت مره
السيد _ من هاي ما تطلع اسلم عليه خجلانه
_ لا هسه تجي اسلم عليك
واحنه نحجي دخل رافع
_ شنو هاي منين طالعه الشمس
السيد عدنه ..وينك يمعود مشتاقيلك ما بينت بعد
_ تدري بأحوالي انكلبت من راح ابويه لليوم
_ والله …الله يساعدك ايد وحده ما تصفك اسالني اني
كعدنه اشويه انسولف وبعدين
صاح رافع يحضرون الغده
وترخص كال ابدل واجيك
_ فززني صوتها
اشلونك عمو
التفتت بلهفه……..!!!!
_ ياسمين يا هلا ومرحبا بيج
هي ابتسمت….. واني ضاعت مني كل الكلمات حتاريت بيش ابدي
كل مره اشوفها زايد جمالها وكبرانه أكثر…. عيوني تتفقدها من سنين واني إداري هذا الحلم واربي لمن كبر وبده يتحقق راح من ايدي
جانت بيدها السفره
تقدمت فرشتها مدنكه خجلانه
واني عيوني ما تقبل تغض بصرها شلون صايره الطول الجسم الوجه
كلشي بيها احلى
_ اشلونج بالمدرسه
_ باوعتلي مبتسمه زينه
_ دخل رافع وكعد يمي
يكولون مزوج صدك….؟؟؟
_ صدمني بسؤاله مو هذا وكته باوعت الياسمين اختفت ابتسامتها وحسيت تباوعلي منتظره بشنو اجاوب….!!!
جريت حسره وجاوبت
_ اي تزوجت…
كلته وعيوني عليها…كزت على شفتها اسنانها حيل متألمه
وقبل ما اكمل طلعت وبعد ما شفتها
مره ثانيه اجرحها وأذيها
ياسمين _ من كال ازوجت
كلبي وكع بين اديه…
طلعت منهم وصعدت بالسطح
كتمت بجيتي خنكتها
اريد اصرخ اصيح وجعني كلبي كلش
سديت الباب ورايه ونهاريت بفقدان وألم
ما جنت اعرف راح ياخذ كلبي
حبيته و تعلقت بي
ما اعرف اول مره ايصير بيه هيج
حسيت روحي تريده رغم اخجل اكول احبه حتى النفسي
الكل يعتبرني زغيره بس اني كبرني كلامه ونصايحه واهتمامه بيه
ما جنت اعرف الحب شنو بس احساسه الطاهر النظيف وصلني
وولع كلبي
رجعت الغرفتي دخلت بسريري وتغطيت بس اريد اهرب بدموعي
السيد _
طلعت راجع للبيت واني كل تفكيري بيها
مره اواسي نفسي واكول بعدها زغيره تنساني وارجع ألوم بنفسي واني كلبي اليريدها من زغرها شيصبره
صراع ابداخلي ما يعلم بي بس الله….
رجعت للبيت مخنوك ما كدرت انام
ثاني يوم طلعت قبل الدوام مالتها ونتظرتها يم المدرسه مالتها
ساعه ونص انتظر إلى أن بدو الطالبات يجون
وعيني على دربها إلى أن شفتها جايه تمشي وحيده
حركت السياره وتلكيتها صرت كدامها
من رفعت راسها وشافت السياره وكفت وظلت عينها عليه
نزلت من السياره…
السيد _ اشلونج ياسمين
ياسمين _ اهلا عمو
السيد _ باوعتلها ليش تاكدين على كلمة عمو
ياسمين _ من اني زغيره اكلك عمو
شتريدني اكلك
السيد _ كولي السيد بس
ياسمين _ ما اكدر نزلت راسيي ماريد يشوف عيوني والعبره خنكتني
السيد _ تذكرين من كلتلج مرات انسوي اشياء ننجبر عليها
ياسمين _ هزيت راسي باي
السيد _ ابويه قبل ما يموت اختارلي بنت عمي زينب
ووصاني بيها
ما راد انفصل عن عمامي لان حسب ما يكول اني وحيد ويخاف عليه
جنت اتمنه يعوفني اختار
واخذ الاريدها
ياسمين _ رفعت راسي واجت عيني بعينه ما كدرت نزلت دموعي
وبايدي تلكيتهن امسحهن وتهمل عيني شفت صورتي بعينه
السيد _ لا تبجين من عساهن
يغسلني هلدموع
ياسمين _ اسم الله عليك
السيد _ تخافين عليه …..!!!
اني ما استاهل لان بجيت عيونج
ياسمين _ لا تجي للمدرسه بعد
السيد _ ليش….؟؟؟
ما تردين اشوفيني
ياسمين _ لا بس خطيه مرتك
السيد _ سكتت ودرت وجهي كلشي يخنقني واني اشوفه تتألم
تعاني ومستسلمه
اني السبب خليتها تحبني وتتعلق بيه
فززت كلبها البريئ وتالي تزوجت وعفتها
راحت وعيونها عليه واني صعدت السياره وحركت ومشيت
ناقم على نفسي
ياسمين _
رغم حسيته ودعني اليوم وبينلي انو صارت عنده زوجه يعني لا تنتظريني
بس ظليت كل يوم من اطلع من المدرسه اتفقد الوجوه بالشارع بلكت اشوفه
تعبت من الافكار التعبث بداخلي
اشتاقله هوايه واشتاق لخوفه عليه
اتمنه يكودني مثل قبل وياخذني يشتريلي الكيكه والعصير
كلشي بي جان مختلف حسيت بي الاب والأخ والحبيب
ما اعرف شسوي تركني وبتعد
بعد ما صار كل دنيتي….
مستوايه الدراسي بده ينزل كل ما افتح كتاب اشوفه گداميحتى بالشارع اتخيله بأي لحظه يطلع بوجهي
رافع _ يمه اريد اوديج عمره
ابتسام _ اوي فدوه حجيت البكلبي عسى الله يفتحه بوجهك
_ وناوي اودي خالتي هم وياج
ابتسام _اي والله يمه خطيه
هاي المسكينه تركض على العيشه ومحمد مابي كل خير
_ لعد بلغيها واني رايح احجزلكم
_ ياريتك انته هم تجي ويانه
_ لا يوم وياسمين والجهال اشلون اعوفهم
هلمره انتي والمره الثانيه اني
انشالله
اني فلوس شغلي اضمهن يم امي متعود من راحت للعمره
كمت احسب فلوسي واحطهم بكنتوري جوه هدومي وايمان
تدري بيهن
هاي الفتره محمد يجي يمنه يتغده يتعشه بس ينام ابيتهم
اجيت بليل أضيف فلوس فوك العندي حسبت الموجودات ناقصات
رافع _ ايمان…
ايمان _ ها شبيك اصيح
_ ماخذه فلوس من كنتوري
_ لا
_ ناقصات الفلوس
_ او يا رافع تلكيك حاسب غلط وناسي
_ صفنت معقوله غلطان
لان اول مره اصير عدنه
شككتني بنفسي…سكتت بكل الاحوال مراح اعرف
جمعت كل الفلوس وحسبته وخليت نيشان بيهن
اذا احد ياخذ منهن يبينن
ياسمين _ رجعت من المدرسه تعبانه وعطشانه كبل دخلت للمطبخ جانت ايمان والجهال ورافع بالهول يتغدون
وكفت وبيدي الكلاص اشرب
شفت محمد طلع من غرفة رافع مستعجل ومرتبك من شافني خزرني
اني محمد ما احجي ويا ابد اكرها
ظلت أبالي اشعنده بالغرفه بس لان رافع موجود ما اهتميت ولا حجيت
رافع _ وره يومين هم استلمت فلوس شغل واجيت احطهن ويه فلوسي طلعتهن لكيتهن متخربطات حسبتهن ناقصات مبلغ بعد اكبر من القبله…..!!!
_ لج ايمان
_ شكو يا ستار
_ انتي شنو تبوكيني
هم كولي حاسب غلط
_ والله رافع ما جايستهن
_ لج منو يدري بمكان الفلوس بس اني وانتي
شنو يطيرن…
_ صدكني ما واصله الهن صار اسنين اكو يوم نقصن فلوسك
حتى تتهمني
_ لعد منو الشيطان دخل وباكهن اليوم اذا ما طلعن الفلوس احركج تمدين ايدج على فلوسي ليش اني مقصر وياج
_ بجيت شنو بس اني بالبيت يجوز اختك مدت ايدها لو اني الحايط النصيص شيصير يوكع براس ايمان
_ حتى ترتاحين راح اسألها كدامج
ياسميننننن
_ جنت اقرا سمعت رافع
ها صحتني…
_ هم ماخذه فلوس من كنتوري
_ لا وليش اخذ
_ حبيبتي مو ناقصه فلوسي
مدري وين صارن
ياسمين _ اذكرت من شفت محمد طالع مرتبك من الغرفه
شنو هواي ناقصات….؟؟
ايمان _ اي خاتون هاي ثاني مره تنشال فلوس من اخوج
كولي ماخذتهن ولا تخافين
تدرين برافع ما يحاسبج يكلج بالعافيه حبيبتي….!!!
رافع _ اسكتي ايمان…ولتفتت على ياسمين حسيت عدها حجي
كولي ياسمين عادي اذا اخذتي منهن
ايمان _ تباوعلي وتفر بأيدها
ياسمين _ جنت ما رايده احجي بس من شككته بيه حجيت
البارحه شفت محمد طلع من غرفتك ومن شافني ارتبك
رافع _ شنو
ايمان _ انتي كذابه
حقيره تذبيها براس محمد…!!
ياسمين _ اني مو كذابه اني شفته بعيوني من رجعت من المدرسه
ايمان _ ما تحملت هجمت عليها وجريتها من شعرها
طول عمرج حقوده وتكرهينه
رافع _ مگدرت اشوف ايمان تضرب ياسمين بلحظه جرتها من شعرها ونامت فوكها
ماتحملت تصرف ايمان سحبته
وملختها دفرات وراشديات
جنزتها اجنز
صارت هوسه عياط ايمان وبجي الجهال
واني فقدت اصدك بمنو اول مره اصير عدنه بالبيت
مايوم فقدنه فلوس
ياسمين حجتلي اشلون شافته لمحمد
يستغفلني النذل خوش يختار اوقات
ايمان اخذت ولدها وراحت أبيت امها زعلانه
واني انتظرت يجي محمد
مااجه رغم يدري باجر عدنه شغل
هو هذا دايما من اصير عده فلوس يغط ويه ربعه يصرفهن على سوالفه الناقصه
استغفرت ربي ورحت على ايمان حاولت اصالحها وارجعها ما قبلت
وتهمتني متفق ويه ياسمين حتى نتهم محمد
عفتها ورجعت للبيت
يومين وطلعت اجيب امي وخالتي كملو عمره ورجعو
حضرت خروف
اول ما دخلن الكصاب ذبحه على سلامتهن
وياسمين تشمر الجكليت عليهم فرحانه وجيرانه تهلهل
امي وخالتي انتبهو ايمان ما تلكتهم ولا جهالي
ابتسام _ ظليت اباوع الرافع
واسأله بعيوني
راجحه _ الله اليستر
اشو ايمان ماكو لا محمد…..؟؟؟
رافع _ اكعدي ارتاحي خاله وتشوفيهم انشالله
راحو الجيران وهن استلمني سين وجيم
حجيتلهم كلشي
ابتسام _ لا يمه اشلون تمد ايدك عليها امونه ما عدها هلسوالف
رافع _ ادري يمه واني ما ضربتها الا من ضربت ياسمين كدامي ما احترمتني
والبارحة رحت عليه اراضيها وارجعها تلكتني بذاك اللسان
راجحه _ اكوم اروح الها واذا محمد مسويها الا اصخم وجها
رافع _ خاله فدوى الج الفلوس ابقي ارتاحي
_ لا يمه انته حقك غير بيتك ومامن بي إذا ابيتك ماكو امان لعد وين واحد يضم ماله وحلاله
ولزمت كتفي لا تهتم امونه فطيره تحبك هسه ترضه
رافع _ بست راسه اعذريني خالتي صارت ابوجهج
ايمان _ سمعت الهلاهل والهوسه ادري رجعت امي وخالتي من العمره بس ما طلعت
اندكت الباب…
فتحته هله يمه….
_ وين محمد….؟؟؟
_ اسلم عليج وابارك وانتي تسأليني على محمد
_ احجي وين اخوج الحرامي
_ يمه انتي صدكتي بياسمين
_ ولج اني امه ويبوكني لا مره ولا مرتين ويدري بيه اجيبهن بالضيم
وينه هذا الصاقط….وين راح
_ ما ادري صار يومين ماكو
_ طبعا اخذ فلوس الرجال
وراح يتبرمك بيهن على الخايسات
_ يمه انتي ليش ترجعين علينه بكل مشكله
_ لان ياحيف ما غزر تعبي بيج وبأخوج دم عباس يمشي بعروكم عوجان
يله كومي جيبي جهالج امشي ارجعي البيتج بسرعه
ايمان _ ارجع بس ابوس ايدج
لا تحجين على محمد ولا دكولين يبوك منج ترى تزغريني كدام رافع
_ دمشي هو اني الزغرتوني كدام الولد وداني للعمره وابني يبوكه وبنتي تكتل اخته
ما يجي من وراكم بس الهم ولد عباس
خبر حمل زينب هواي فرحني هاي الايام وتبدد جو الحزن المخيم على البيت شويه
امي هم فرحت وتمنت ولد
حتى ما ابقى وحيد
المحل عزلته وبعت البضاعه
البي مالي وجه اوصل هناك واشوف ياسمين احس روحي لعبت بمشاعرها
اقتنعت بنهاية الطريق بيني وبينها وبعدت حتى لا بيوم اسمع خبر زواجها وانقهر
عدنه بالبيت حديقه زغيره
جنت بليل من اذكر واحن الياسمين اطلع اكعد بيها
واكلب بالماضي محد يشاركني غير جكارتي وذكرياتي التواسيني
وذكرت مره من كانت زغيره سألتني شنو معنى اسمها
كلتلها اكو ورد جميل جدا وعطره حلو ومميز اسمه الياسمين وانتي اسم على مسمى
تشبهين ورد الياسمين
يومها صعدت سيارتي ورحت للمشتل وجبت شتله ياسمين
وزرعته بالحديقه وظليت يوميه اراعيها واسكيها إلى أن كبرت وصارت شجرة مورده
شجرة الياسمين….
كانت ملاذي الوحيد لو هاجمني الذكريات اتلمس وردها وتخيل اتلمس خدها بايدي
احاجيها اهمسلها اشعرلها
لحظات الاقضيها ويه الشجره
تنسيني تعبي وتهود كلبي
الذايب بحب ياسمين
فترة ابتعدت وستسلمت للواقع الانفرض عليه
التهيت بشغلي وبحياتي
وحتى بتعدت عن أحمد ورافع حتى ما اشوفها واحن….
ولدت زينب ابني البكر ليث كنت بقمة السعاده واني احضنه بين اديه
راضي بقسمتي ومكتفي وقانع القسمه الله اليه حتى لو على حساب گلبي
ومن بعد شهرين بشرتني بحملها الثاني كنت متوقع امي مراح تعوفها تتنفس تظل تزن براسها
السيد وحيد
اريد تخلفين هوايه تجيبين ولد يشدون ظهره ويقوو
سويله عائله جبيره
واجه ابني الثاني سيد غيث نور دنيتي بوجها النوراني
بعد غيث اتأخرت زينب اربع شهور واجتني تبشرني بحملها الثالث
فرحانه وكانه من تجيبيلي الولد راح تكبر بعيني واحبها أكثر
هملت نفسها وهملت صحتها
حاولت أفهمه هوايه اني راضي وقانع لا تتعبين نفسج بس ما يفيد مسيطره عليه أكثر مني وتطيعها بكلشي
هالمره جابتلي بنيه…
اميمه _ جبت الطفله وخليتها بحضن ابوها
سميها سيد…..
_ من حملتها بايدي فرحت وتذكرت ياسمين حبي الوحيد
وسري المايعلم بي بس هيه والله سبحانه وتعالى
اسميها ياسمين….!!!!
زينب _ حلو هذا الاسم
حياتي هادئه مرتاح بيها وسعت شغلي وفتحت فرع ثاني هم بالكاظميه واحوالي عال العال
خواتي نسرين وطيبه تزوجن ساده هم مثل ما وصى ابويه بس ابغداد ولد تجار قماش نفس كارنه
ومرتاحات الحمد لله
كلشي عندي البيت السياره الولد الفلوس بس شي ناقصني احس كلبي مو عندي
ابيوم اجتني زينب
وبيدها صووره
_ سيد هاي منين المصور وياها
السيد _ باوعت الصوره مالتي اني وياسمين
هاي وين لكيتيها صار اشكد ادور عليها
_ عزلت الغراض ولكيتها بس ما كلتلي هاي منيه الحلوه
_ احس كلبي رجعلي من شفتها أخ يا ياسمين اباوع مركز بيها اخذتني الصفنه
_ شنو هيج صعب ما تريد اجاوب
_ هاي اخت صديقي رافع
الله اليدري هسه وين صارت هاي صورته من كنت بالاعداديه
_ لعد اكيد كبرت وتزوجت هسه
_ جريت نفس واحس مختنك….. اي اكيد….!!!
اخذت الصوره بجيبي
ثاني يوم واني بالمحل على مكتبي طلعت الصوره وعلكتها
على الحايط كدام عيني
وتذكرت رافع واحمد صدك واحدهم بذات دسألو اذكروني صار اشكد متفاركين
وقررت افرغ نفسي ساعه واروح اشوفهم
اليوم عفت كلشي بيدي
وطلعت المنطقتنه القديمه
مشيت من يم بيتنه وذكرت طفولتي هنا ربيت وكبرت
وفتت بالسوك متغيره المباني
والوجوه
طلعت البيت رافع استغربت بيتهم هواي متغير مجددي
دكيت الباب وكلبي يدك
وكأنه راح تنفتح الباب واشوفها گدامي
_ منوووو
_ سيد علي يابه
_ فتحت الباب مره جبيره
تفضل يمه…..!!!!
_ باوعت مو ام رافع
حجيه هذا بيت رافع مو
_ لا يمه من زمان اشترينه البيت منهم وشالو….
_ وكفت متعجب …
رافع يترك المنطقه مستحيل……!!!!!
زين متعرفين وين شالو
_ لا والله ما اعرف
_ شكرا حجيه اخذي راحتج
باوعت للشارع هواي متغير تمشيت ادري خالته ساكنه كم بيت عنهم
سالت عنها خبازه ابنها محمد
محد عرفها
شنو معقوله الناس تنسه بسرعه
كان اكو فرن صمون براس الشارع دخلت عليه
_ السلام عليكم
الرجل _ وعليكم تفضل
_ اسأل عن رافع جان ساكن هنا يمكم
الرجل _ هذا العنده خباطه يصب بيوت….
_ اي هو تعرفه…!!!
الرجل _ شالو صار هوايه
_ متعرف وين….؟؟؟
الرجل _ لا والله بس هو صار ويا حادث حسب ما سمعت
_ شنو حادث يعني بالسياره
الرجل _ لا وكع من السكله
وأعتقد تاذه وراها باعو البيت وشالو
صعقني الخبر
واني اعتب عليهم طلعت اني البذات الما سالت عليهم
احتاريت وين اروح محد يعرف عنهم شي
وطلعت لأهل احمد لكيت ولد اخو رحبو بيه
وطلبت منهم يوصلوني لاحمد
وفعلا صعد ويايه ابن جاسم ورحنه عليه
شايل بغير منطقه
وصلنه دخل ابن جاسم واني واكف بالباب
احمد _ يا اهلا بالسيد اشلونك
وحضني مشتاق ومسلم
دخلت كعدت واني امبين عليه القلق
اشلونك سيد
_ ابروح ابوك عوفني واحجيلي صاحبنه رافع وين صار…..؟؟؟
احمد _ ارتاح وشرب الجاي واحجيلك
سامع دولاب الدهر من يفتر
رافع افتر بي دولاب الدهر
ولوى لوي
سيد علي _ ……!!!!!!