رواية انكسار الياسمين الفصل الخامس والثلاثون 35 بقلم أمل مهدي

رواية انكسار الياسمين الجزء الخامس والثلاثون

رواية انكسار الياسمين البارت الخامس والثلاثون

رواية انكسار الياسمين الحلقة الخامسة والثلاثون

تعرف غلاتك لوبعد
محتاج ابينهه اكثر
يالبيك لهاني العمر
ماركزت بي من مر
يمكن إذا گتلي اشگثر
تهواني راح اتحير
الليل اعد امحبتك
بس باچر اتزود اكثر
*****************
ملاحظه : نسيت اذكر بالبارت الفات ان استبرق تلبس بوشيه بحكم همه معروفين كل نسوانهم امبوشه بس زينب عاشت بغداد فما ملتزمه
ياسمين _ تفضلو
ستبرق _ رفعت البوشيه كشفت عن وجها
نتفضل ليش لا… غير عدنه حساب اريد انصفي وياج
_ استغربت حجيهن….. ياحساب شتقصدين
زينب _ الرجال البگتي من مرته يا بواگة الزلم…
ياسمين _ منو انتن وشتردن مني
استبرق _ معليج بينه المهم جاين نحذرج…
ياسمين _ أطلعن بره…………!!!
خزرتها على كيفج اسمعي بالأول لا تطردين
زينب _ اباوعلها حلوه وازغر مني شتعلت بنار هيه هاي الزرعلها شجره وسماها باسمها وجان يسهر الليل كله وياها وسمه بنتي على اسمها حتى خلاني اكرها الياسه من ورى
اشرت باصبعي…..
شوفي كلمه وحده ما اصير ثنين تعوفي للسيد
والا والله اندمج اخليج تتحصرين على الهوى التشمينه
اشوهج اموتج أضيعج من هاي الدنيا اشلون جنت ضايعه
ويدور عليج هالمره اخلي حتى اهلج يدورونج ومايلگوج
باوعت ايدها بيضه والحلقه تلمع باصبعها لزمت ايدها
ولويت اصبعها اريد انزعهيا واخذها
دفعتني بثنين اديها بكل قوتها وگعت بالگاع
استبرق _ من دفعت زينب ضربتها على عينها وگبل ما تفتح عينها
ضربتها بالثانيه والضربه اللاخ على راسها دوختها
ولزمت ايدها وهي تدفع بينه وتضرب ايدها وتصيح
زينب لوت أصبعه بالعكس ليفوگ كسرته وسحبت الحلقه
اخذتها
تاخذين رجال من مرته وجهاله ياصاقطه يابر+++گ
ما عليج عتب دايحه بالسواگه الخا+++ه ام الو+++د
الناس واگفه محد ادخل أكثرهم زلم واني ماخليت كلمه
تعتب عليه فشرت وغلطت وزينب ويايه شهرناها شهيره
زينب _ احس گلبي بعده موجر عليها عيني صارت على المگص
لزمته وضربتها بخاصرتها حسيت بوجعها من صرخت
ولزمت أيدي ولو ما تهجم علينه هاي الحجيه ام حسين وتخلصه
من اديه جان جلبت بخوانيگها
ام حسين _ لا يابرابيك ياعرمات عرفت سالفتجن مو خاليه
فكيتها من اديهن وأخذتهن طرد بره المحل الا هن
فشرن فشار ما يلبس عليه ثوب يلعلعن بصوتهن
ويهددن
تانني اتصل بالسيد يجي الا يطيح حظجن
طلعت الموبايل وهن بسرعه شردن من بين الناس
ركضت على ياسمين وحده من عيونها انگلبت دم
صار بيها نزف ولازمه اصبعها وروحها امفرفحه وتبجي
اشوف عبايتها من الصفحه ناگعه دم
ولج هذا منين الدم……..؟؟؟
ياسمين _ ضربتني بالمگص…
الحجيه _ ام البوشي
ياسمين _ لا الثانيه
الحجيه _دگيت على السيد كلتله ظل يصيح جيبيها بتكسي
للمستشفى واني الاگيج…. هناك،
اجه رضى يركض
رضى _ هاي شكو گالو عركه صايره بالسوگ…
الحجيه _ وما گالولك العركه ويه عمتك……!!!!
رضى _ لا صدگ عمه ويامن تعاركتي
الحجيه _ خايب دولي من جيره بفرگك النسوان كتلنها وجاي من
تالي وين جنت عايف عمتك وين مولي
رضى _ رحت اكل لفه اني شمدريني تصير عركه وين راحن………
اني رايحه اخذها للمستشفى وانت سد المحل وروح العلاوي
ياسمين _ الوجع البجسمي كوم والوجع البگلبي كوم ثاني ….
احساسي بالأهانه رجعني للبدايه التخطيته بفضل علي
ليش فرحتي دومها ناقصه ومعلعله لازم يطلعلي واحد
ينغص عليه
بس طلعت المحل كلها تلگتني سلامات
محتاجه شي
ام حسين _
ماكو شي… طلعنه السوگ و الناس تتهامس وعيونهم
علينه اول تكسي مر من يمنه صعدتها ومشت بينه
وصلنه المستشفى اهليه قريبه علينه السيد بعده ما واصل وكل اشويه يتصل اشلونها حجيه….
ديري بالج عليها حجيه…..
اني بالزدحام تلاحگيلها حجيه….
هو والحجيه ظل على الاتصال اخر شي من وصلنه گاللها دخليها واني قريب عليكم گبل دخلتني الطوارئ
اجه الطبيب فحص جروحي اخذو اشعه لاصبعي طلع
مكسور عدلو وصبو عليه واني
روحي مفرفحه من الوجع وبس عيوني تهمل دموع وقهر
عيني صاير بيها جرح ونزف لازم اختصاص عيون بشوفها
وخاصرتي الجرح عميق الحمد لله ما واصل للكله
بعده الطبيب يخيط بالجرح وسمعت صوته بره يريد
يدخل والممرض يگوله ممنوع
اخر شي الطبيب صاح… إذا زوجها خلي يدخل
اول نظرته وكعت عليه يتفقدني وجها احمر محتقن من
العصبيه عدل حجابي وماحجه اي كلمه وياي ظل يسال
بالطبيب واني نمت ما ادري تخدرت من الابر والمغذي
صحيت على صوته يحجي بالموبايل عن تصوير وشي ما
فهمته فتحت عيني نايمه على سرير بالغرفه وهو كاعد
على الكرسي وام حسين ماكو
سيدعلي _ كمل اتصاله وتقرب مني… اشلون صرتي شتحسين
ياسمين _ نزلت دموعي كأنه ذكرني…
سيد علي _ لزم أيدي وقرب راسه يمي حتى حسيت بنفسه
لا تبجين والله لدفعهن ثمن كل دمعه من عيونج
ويهز براسه ويتوعد….. ارتاحي واني اتصرف
شويه ودخل رافع ورضى وعلاوي وياهم
رافع _ يباوعلى والخوف امبين بوجها عليه سحب راسي بحظنه
واني مو اجبجي گمت اناشغ مثل الطفل
وهو يبجي وياي انقهرت عليه اكثر من اشوفه خايف عليه
وما يگدر يسويلي شي احسه يتعذب
لليل طلعوني للبيت دخل وياي السيد الغرفتيشاف مابيها سرير
اني يوميه انام بالكاع وخالتي هم
ما قبل طلع للشارع العام اشتره سريرين وميز طعام وزوليه جابهن وبيده فرش الغرفه ووكلني بيده ونيمني
وكل شويه يجي اتصال يطلع بره يحجي
سيد علي _ رحت للسوگ ثاني يوم افتريت على المحلات القريبه
منو عنده كامره بالمحل حصلت تسجلين واحد مصور
باب المحل والثاني كاشف الوجوه والاعتداء كله
شفت اول تسجيل زينب و ياها وحده مبوشه تفاجأت… والله يازينب كل هذا يطلع منج…….!!!! واكيد الوياج اختج ماكو غيرها
ما صورت يجن من النجف الهنا
والتصوير الثاني كشف ستبرق مثل ما توقعت رافعه البوشيه وتلعلع اباب المحل صايره فرجه للرايح والجاي
ظليت محتار اذا اشتكي صعبه ادخل مرتي وبنت عمي
السجن ولو تستاهل حررت شكوه وقدمت التصوير ووقفته
معارفي هوايه
دزيت التسجيل الزوج استبرق سيد عامر والعمي باقر والمهيمن
بسرعه اتصل عليه سيد عامر يرجف
انجن ما مصدگ هاي مرته المبوشه بنص السوگ مكشوف وجها
واصيح
سيد علي _ انته تدري هذا يا سوگ…….؟؟؟
سيد عامر _ يا سوگ يمعود… فضحتني
سيد علي _ بغداد وهذا السوگ بالمنطقه ++++ وهاي الاعتدن عليه
خطيبتي مو وعدتني ما تدخل مرتك باي شي يخصني
ويخص زينب
سيدعامر _ شنو……………….!!!!! شوداهن البغداد
سيدعلي _ هذا السؤال توجها الها أجيب اختها وتجي من النجف
البغداد حتى يحاولن يقتلن بنيه لا يمهم ولا بكرباهن
سيد عامر _ يقتلن…….!!!!!
ثاني يوم كعدني اتصال من آمنه
آمنه _ صباح الخير سيدنه
السيد_ صباح النور….. اخيتي
آمنه _ هاي شصاير البارحه بيت عمي انگلب گلاب
السيد _ خير شصاير
آمنه _ اول گول الصدگ انته خطبت
السيد _ اي ليش حرام
آمنه _ لا تستاهل وعليك بالخير والله غير بعد العرفته تستاهل
زينب
السيد _ شفتي اسون بنات عمج
آمنه _ البارحه عامر اموتها لستبرق وطلگها وجابها عمها ذبها
علينه وحتى جهاله اخذهم
سيدعلي _ بعد أيدي رجال عامر من ظهر رجال تستاهل اكثر
آمنه _ وانته شراح اسوي ويه زينب
سيدعلي_ ردي جاي بالدرب انتظريني يومين
سديت الاتصال وگمت بدلت ملابسي ورحت الياسمين اشوف ليش مبايله مغلق
ما لگيت احد رافع ورضى بالمحل تلگتني ام حسن وخالتها سلمت
ودخلت عليها الغرفه
_ ياسمين گاعده
_ اي تفضل…..
_ اشلونج اليوم
_ تنهدت بحسره الحمد لله ودموعي نزلت
_ ابشرج اول وحده اخذت جزاتها انكتلت واطلگت ونحرمت من جهالها والثانيه باجر توصلها ورقتها خليهن يگابلن سيد باقر
_ سكتت……… وما بينت مني اي ردت فعل
_ ما فرحانه اخذت حقج
_ هزيت راسي…. لا
_ ليش هاي الدموع … اقتربت منها مسحت دموعها
اخذتها بحضني كافي اريدج تتعافين بسرعه انسي الصار مبايلج
وين ليش مغلق
_ التفتت عليه وتعدلت… ما ادري جان بيدي وقت المشكله
_بوعتلها عيونها صفره صافيه اشگد جنت احبهن هلعيون والثانيه قطعه حمره دم أثر الضربه
احس الضربه بگلبي بعدت نظرها عني ونزلت راسها ما تريدني
اشوفها
رجعت نامت نفسها مكسوره… غطيتها وعفتها ترتاح
واني طلعت الرافع بالمحل سالتهم على الموبايل محد يعرف وين سألنه ام حسين هم ما تدري فتشنه المحل الموبايل اختفه والخط مغلق
اتصلت بعمي باقر تعاركت ويا وحذرته الموبايل بي صور اذا ما رجع
باجر زينب توصلها ورقتها وشيصير خلي يصير
السوي هاي المصايب من وره ظهري وظهر أهلها ما الها مكان ابيتي
سيدباقر _ تريد تزوج عليها وتسكت
سيدعلي _ مو مصطفى تزوج على آلاء اشو ما كلت ميصير لو عليكم حلال وعلى سيد علي حرام
سيدباقر _ منين جبت هذا الحجي
سيدعلي _ ليش مو انته الرحت ويا وخطبتها تريد اكلك وين
مكعدها وللعلم لو ما حامل منه جان ما
تزوجها وهاي مو اول مره يزوج بيها مصطفى يوميه
ماخذله وحده يتمتع بيها
انته يبين راضي على بناتك الموبايل باجر يمي والا
تعرفون شسوي
سيد باقر _ شتريد تحبس بنات عمك……………؟؟؟
سيد علي _ اني ما سويها بس اخوها مصر ومشتكي والخاطري اخر
الدعوه
ياسمين _
اليوم نزل حسن اجاني للغرفه وضحكة الشماته بوجها
حسن _ حيل بعد أيدي بعدج عايشه ما موتنج
ياسمين _ حسن اطلع بره
حسن _ لو تدرين أشكد فرحان ومشمت بيج مي بارد زلال نزل على
گلبي
ياسمين _ انته ليش تكرهني اني ما اذيتك فد يوم بالعكس دومك
انته امأذيني
حسن _ هيج من الله ما احبج لو راضيه بابو فاطمه من أحسن بس
هذا حسن جابه ما تردينه
حيل وابو زايد…. بعد أيدي كون اعرفهن الا ابوسهن من
راسهن
راجحه _ امشي اطلع يا صگط تشمت بعمتك ماتخاف الله
مو انته بالحرب ياساعه تموت
ياسمين _ عوفي خاله النبي محمد ( ص) قال
( لا تظهر الشماته لأخيك فيرحمه الله يبتليك)
راجحه _ لا عاب حلگج فدوه لاسمه النبي محمد صلى الله عليه
وآله وسلم
ما يفيد الحجي الاعوج اعوج من يومه ما يتغير
ياسمين _ ديحجي دگ مبايله اشوفه فرح يمكن يحجي ويه
فاطمه والله لو اعرفها الا افضحى واخليها تعوفه
زينب _ رجعنه للبيت محد سال ولا عرف وين جنه الكل مشت
عليه جنه بكربلاء
ثاني يوم كاعد اثرم زلاطه للعشى ودخل ابويه يصيح
سيدباقر _ زينب ولج زنوبه اليوم الا اذبحج هاي شمسويه
ودخل عليه المطبخ يرعد
ولج ويامن متعاركه مصوريجن ورجلج ودازلي التصوير
بنات القنادر من شوكت تطلعن بكيفجن وتتعاركن بالسوگه
زينب _ فدوه بس خل افهمك انطيني مجال
ودخل مهيمن هم يتحلفلي من الباب بس مصطفى ما مهتم
زينب_ بس افهمكم اطوني مجال
مهيمن _ ليش كاتلات هاي البنيه ادبسزيات تدرين بهذا التصوير
تكدر تسجنجن
زينب _ هاي حبيبة السيد الگلتلكم عليهاخطبها تردوني اسكت وهو
يزوج عليه
سيدباقر _ علي خطب هاي من يمته……..!!!!
زينب _ تعال أقره شوف الرسايل والصور كلهن عندي مصورتهن
قروهن الرسائل مال مصرف وبين على وجم تاجر وشاف
الصور
سيد باقر _ وخريهن من وجهي حرام بت الناس مصلخه
مهيمن _ اها هذا السيد شلوم ماخذله وصله مرمر
واحنه نحجي دخلو علينه استبرق وعمها ابو عامر
واصلهم التصوير وعامر گاتلها لستبرق وماخذ الجهال
ومطلگها
البيت كله انخبص وابوي عصاب وكل شويه هاد علينه يريد
يگتلنه
سيدباقر _ تدرن لو يشتكي عليجن ويقدم التصوير تنحبسن وحدها
ضربة المگص تنحسب قتل خزيتني هاي العرامه
مال بنات شارع م مال علويات
طلعلي الموبايل خل أسد ها لا تطلك الثاني
استبرق _
اني كل الخططتله نبصطها بصطه زينه ونفضحه بالسوگ
بلكن تعوفه بس زينب زودته من ضربتها بالمگص خفت
تكبر ويكشفونه خذت الجزدان بايدها وسحبت زينب
طلعنه وصلنه الشارع واول تكسي صعدنه بي أخذنا
للكراج وقبل ما اصعد سيارات النجف انطيته الوحده
تجدي لا فتحته ولا شفت شنو بي
سيدباقر _ تنطي للمجديه اشلون غير تفتحي وتشوفين شكو بي
ذهب فلوس انه وين الگه هاي المجدايه هسه…
مهيمن _ گله موعدنه ما ماخذاته شنو يگص راسنه صار شهرين
ما قدرك واجه رجع بنتك ليش تهتمله منو هو وتحسبله
حساب
آمنه _ اخويه ما غلط ليش هيج تحجي عليه
مهيمن _ انتي اسكتي والله اذا طلك زينب اثنينجن تطلگن وتلحگنه
سيد باقر _ اي وهذا تعب سيد حسين يصفه للغربه يرتعون بي
اني لو اعرف هاي المجدايه وين جا رحتلها وجبت
الموبايل من عيونها…. اشلونها وين كاعده تعالن احجلي
باجر اغبش البغدادي
مصطفى _ هههه وين تلگاها وشعبالك لو لگيتها راح تنطيكيا الله
اليدري هسه باعته وحولته ورق
مهيمن _ لا تروح اخاف يطلعون عصابات وتالي احنه نطيح بيها
محد أخذا وانتهت…
سيد باقر _ الله يبشرك بالخير جا لو عصابات راح يرحون العلاوي
والمصيبه هم ترد علينه…. ولتفت على زينب تف عليج
الله يصخم وجهج ولج رجال لو بي جرذام هم اجرعه
فوگه وجوى فلوس يوميه تعالو اخذوني
زينب _ واذا ياخذ عليه مره عادي …….!!!
سيدباقر_ هل اخذ مره وطيحتنه بمصيبه بكد راسجن حليها
يلفهيمه
سيد علي _ اني وعمي وولده وصلت للتهديد طالبتهم بالموبايل
وزينب وستبرق يگولون ما ماخذي هددتهم اذا ما رجعو
اطلك زينب وعمي گال
اطلك زينب خواتك هم يطلگن وحده بوحده لا عبالك
نسكت
يعني يطلگون آمنه وآلاء اذا طلگت زينب
لزموني من ايدي التوجعني دخلو خواتي بالمشكله
والموبايل اختفه خايف يوگع بيد واحد صگط يهددني
بالصور البي….
محتار بشغله اشلون وصلن لام حسين ومنين حصلن رقمها
وشلون عرفن ياسمين خطيبتي اني حتى آمنه وآلاء ما گلتلهن
كاعد بالوكاله وصافن افكر…
أركان _ خير سيد ما نحلت شغلة الموبايل
سيدعلي _ الموبايل راح بس الله يدري بيا أيد وكع…. المحيرتني
غير شغله
أركان _ شنيه
سيدعلي _ أشك موبايلي مراقب
أركان _ لا صدك تحجي….!!! على هشكل كل أسرار شغلك
مكشوفه
سيدعلي _ تعرف تكشفلي اذا احد يراقبني لو لا…….؟؟؟
أركان _ اي انطيني موبايلك…..
سيدعلي _ اول ما فتح الواتساب دخل كم صفحه وطلع
أركان _ آيفون تسعه ويه موبايلك طلع عندي…
سيدعلي _ صدك تحجي هذا مبايل ام ليث…… يعني مراقبه كل
مسجاتي ومكالماتي
أركان _ الغي الك….
سيدعلي_ صور وبعدين الغي…. بعد شوفلي المازنجر
أركان _ وهذا المازنجر آيفون تسعه هم فاتح حسابك
سيدعلي _ صور قبل ما تلغي والانستا والفيس كل موبايلي
طلعت مراقبته زينب…. ياحيف تعاشر بشر عمر وتالي
تطلع ما تعرفه لحد قبل يومين مسويه مصيبه بگد راسها
وگلبي ما ينطيني اطلگها هين
دزيت كل الصور وتصوير الاعتدائهن على ياسمين العمى
الجبير احيطه بعلم
رجعت للبيت مهموم وتعبان ياسمين صار مرتين اروحلها يگولون نايمه ماادري صدگ ماادري ماتريد اشوفني
اميمه _ اشبيك يمه مو على بعضك
سيدعلي_ تدرين يمه طلعت زينب مراقبه كل حساباتي وتعرف
كل زغيره وجبيره عني
اميمه _ زينب من يومها غياره
سيدعلي _ لاء هاي مو غيره هاي مرض حقاره وخباثه أكبر غلطه
ارتكبها ابويه من ناسب عمي باقر لان عمره ما حبنه
ناسبه طمعان بحلاله ليش يروح للغريب لان يعتبروني
غريب مو منهم يكرهوني على كرهج انتي
اميمه _ الله موجود يشوف ويسمع وهاي الله موفقك ورازقك
شلك بيهم لا تنقهر تعدي وصير سوالف اريدك تفرح
وتستعجل بزواجك
سيدعلي _ ديشتغل المهندس انشاء الله عن قريب اخذكم تشوفون
المكان شلون صار
( كراج العلاوي)
حياوي _ يله امشن الخط واگف…. يله حليمه الخاطر الله دمشي
قابل ادفعج
حليمه _ طلعت بيدي عباتي خبصني حياوي واني رجل صاحيه
ورجل عرجه گوه امشي
اخذنه الخط وفرقنه كلمن بمكان انه اباب الكراج حطيت كارتونه
وكعدت عليها الناس تدري بيه صگط رجلي تساعدني السواق
والرايح والجاي ظليت كاعده لمن اذن الاذان خفت الرجل
بالگراج باوعت بعلاكتي خير وبركه اخذتلي صفطه من الخرده وكعدت اصفط بيهن هاي يوميه ابوگلي عشره أكثر لان بس اوصل الحياوي الربع ما يراويني
كاعد احسب ونشمر بحظني جزدان من هذا الجبير لونه ازرگ
باوعت ثنين نسوان راحن مستعجلات ما شفت غير گفاهن
فتحت الزنجبيل زغللن عيوني صفطه فلوس وموبايل ظليت
التفت يمنه ويسره واعاين فوگ للسمه اشلون رزق ربي حار ومكسب
حتاريت ما اريد انطي الحياوي طول النهار كاعده اجدي مثل الدجاجه الگافه على بيضاتها وتالي يجي علحاضر ياخذهن
طلعت الموبايل حطيته بالجنطه مالتي والجزدان دحيته فلوس
وتمشيت ورى الكراج اكو خرايب بيها سيارات عاطله ومدعمه
نيشنت مكان يم سياره حفرت ودفنته عاينت محد
رجعت الخط جاي وماخذهن ورايح ظليت اتمشه على كيفي
تالي وگف تكتك يمي…. انتي حليمه
كلتله اي كال حياوي يريدج
صعدت ويا وصلني للبيت لگيتهم كلهم يتغدون لفات فلافل تلگاني
حياوي _ ها حليمه اليوم وين موليه وفاتج الخط
حليمه _ اليوم ما حصلت وگمت اجدي بالكراج ولگيت هذا المبايل
حياوي _ اي والله عفيه عليج بعد حطي الحصلتيهن هنا وروحي تغدي
حياوي _
فتحت الموبايل مابي رمز فرحت دخلت كبل على الصور اعاين
هلله هلله هاي خوش صيده
شلون عروس حلوه مبينين زناگين ذوله
بس هذا العريس وجها مو غريب عليه… طلعت الأرقام قليله
طلعت السيم كارت كسرته والموبايل حطيته بجيبي
…
كاعد افكر المن اروح منو اسال…. اي تذكرت حمص هذا يعرف الناس كلها…. سالت عنه گالو بالگهوه
من بعيد شفته صلعته وكرشه والاركيله يشفط بيها صدك يشبه الحمصايه
_ هلو حمص
_هلو ياب هاي اشعجب جايني لازم عندك سالفه
_ اكيد لعد شتدري فارغلك واجيك
_ شوف الاستشاره بفلوس مو ابلاش اي من هسه اگلك
_ اي مو على اساس انته دكتور… خلك حرامي الاستشاره
_ صحيح اني حرامي بس خبره أكثر من ثلاثين سنه نشال
عدك انت هيج خبره ههههههه
_ كول اشعندك……
_ طلعت بس صورة الولد هذا ماما عليك تعرفه……؟؟؟
_سحب نفس قوي وقلص عيونه يذكر
_ ها تعرفه…..
_اصبر خل اذكر زين….. اي تذكرت
_ هذا تاجر بالشورجه مره بگت السبير مال سيارته والا شويه يسلمني للنجده هاي قبل هوايه حوالي خمصطعش سنه…
ايباااا شلون ايام حلوه حتى البوگ اله طعم
_ اشلون بله اله طعم هو بوگ
_ جان النشال على نيته والمنشول گلبه طيب يسامح بساع
هههههه ههههههههه
_ هسه ما كلتلي منو هذا
_ ما اكول الا تحجيلي شعدك ويا
_ عندي صور عروسته اريد اساومه عليهن…