رواية انكسار الياسمين الفصل الحادي والعشرون 21 بقلم أمل مهدي
رواية انكسار الياسمين الجزء الحادي والعشرون
رواية انكسار الياسمين البارت الحادي والعشرون
رواية انكسار الياسمين الحلقة الحادية والعشرون
الله يساعده جم قسم يتقسم
مابين المكابر والخجل والشوك
والحب والشرف والنسب وابن العم
تره الدنيه كصيره والسنين اخفاف
من تتبده منك بعد ما تلتم
***************
ياسمين _
فزيت على ايد علاوي تتحرك بحركه لا اراديه
كفيت البطانيه وركضت فتحت الضوه اشوف ابني ينفض
يشمر بأديه
وجسمه يهتز وعيونه ماكو السواد بس البياض
وجسمه نار من الحراره
صحت يمه علاوي
فزت خالتي راجحه انام وياها بنفس الغرفه
_ ولج اشبي علاوي
ارجف فتحت الباب ودخلت على غرفة رافع
رافع _ شكو شبيج
ياسمين _ الحكلي علاوي ديموت
كل ضني اليموت هشكل يصير بي ما جنت اعرف الشمره
رافع _ بسرعه اخذي لابو زين يوديج للمستشفى اني راح اخابره…
وشال الموبايل من الكومدي اليم راسه وتصل
رجعت بسرعه لبست العبايه حتى ما سديتها
وغطيت راسي بالشال
وحضنته هو وبطانيته وركضت للشارع
وصوت خالتي تصيح ولج إيمان امشي وياها…..
وإيمان ولا تحركت من فراشها
بينه وبين ابو زين ثلاث بيوت هو الركن واحنه بالفرع
الوقت كان نهاية شهر اثنعش نصف الليل برد يجمد الاطراف
واني ولا حسيت بي
وصلت بابهم دكيته حيل
طلع ابو زين يلبس بسترته ومرته ام زين ورى واكفه
ياسمين _ فدوه بسرعه ابني راح يموت
ابو زين _ اي اي يله اصعدي…. وفتح لي باب السياره
صعدت ابجي وباوع العلاوي صار كل جسمه يهتز
_ بسرعه الله يخليك
_ باوع عليه وحجه هاذا مشمور تلمسي جبينه مو مصخن
_ تلمسته نار… اي كلش مصخن
_ لا تخافين هاي من وره الحراره
_ عفيه ابني راح يموت بسرعه
_ گولي ياالله انشالله ما بي شي
أشكد جان يمشي سرعه بس احسه بطيئ
بجيت واني عيوني عليه
_ يابه هسه نوصل لا تبجين
الشوارع كانت فارغه قليل سيارات ورغم هذا هم اشويه طولنه
وصلنه قبل ما يركن السياره نزلت
اركض دخلت قاعه جبيره
صار بوجهي شرطي….
ياسمين _ وين الطبيب
…. اشرلي جوه
ركضت بتجاه ايده وين أشر دخلت قاعه ثانيه بيها اسره ومرضه وناس
صحت اريد طبيب
التفتو عليه ثنين لابسين صداري اطباء بسرعه اشرولي
تقدمت عليهم اخذو من ايدي
الأول كال _ شبي اختي
والثاني قبل ما انطق جاوبه مصخن
واكفه اني وراهم ودموعي تنزل وافرك باديه من التوتر والخوف
وهمه يسحبون ابر ويضربو
اخير شي علكو المغذي بس هو هده وكانه نايم
ابو زين _ بعد اخوك اشلون صار
الممرض _ زين زين
ظل الطبيب يفحص بي بعدين عافه وراح الغير مريض
كعدت يمه امسح بدموعي اشوف ابو زين يباوعلي
انتبهت شعري كله طالع والشال مفتوح والعبا هم مفتوحه
وجايه بنعال البيت
سديت دكم العبايه ولفيت الشال وكعدت يمه وابو زين رايح جاي
خلص المغذي وعلاوي ما كعد….
اجه الطبيب
فحصه من جديد ولتفت على ابو زين
الطبيب _ انته ابو
ابو زين _ لايابه اني اقاربهم
الطبيب _ هاااا راح ينام يمنه حالته ما تسمح نطلعه وباجر راح اكتبله تحاليل حتى نعرف اشبي
ابو زين ظل يباو على…
الطبيب كتب بأوراق ونطاهن للممرض
باوعلنه الممرض وكال تعالو ورايه
اخذنه صعدنه بالمصعد معرف لاي طابق ووصلني للردها انطوني سرير وكال باجر يشوفه
الطبيب
كمل ابو زين الأوراق مالته واجه انطانياهن
ظل رايح جاي بالردها ومبين عليه نعسان وكل اشويه يباوعلي
ابو زين _ ناميلج اشويه ليش كاعده
ياسمين _ ما اگدر اشلون انام وابني ما اعرف شبي
ابو زين _ انشالله مابي شي
ياسمين _ ظليت خايفه ومحتاره اول مره ادخل مستشفى وحسيت ابو زين يريد يروح بس مستحي يكول
اخر شي كالها
_ ام علي اني بقائي ما يفيد بشي اجيج باجر وهذا تلفوني يمج
اخاف تحتاجين شي اتصلي على ام زين مكتوب اسمها مها
ياسمين _ حسيت راح يعوفني بالشارع كلش خفت
غرغرت الدمعه بعيني اني ما احس بالأمان بس ويارافع
ابو زين اريد رافع يجيني
ابو زين _ وين يجي خطيه يتعذب لا اني الصبح يمج
سلم وراحح، ططيسطط، ططط، ي،
واني ظليت اتلفت عمري مداخله مستشفى ولا ليله بايته بره البيت
ألردهه بيها بس مره نايمه بابنه والباقي كل الاسره فارغه
اذكرت اني جايه لا عندي فلوس ولا ملابس العلاوي ولا اي شي
مكدرت انام ظليت كاعده يم راس علاوي للصبح اشوف صعبه اتمدد بمكان مفتوح
محد اجاني لا سستر ولا طبيب بعد
سمعت صوت الاذان من بعيد عرفت هذا اذان الفجر تقدمت
للشباك الجام اباوع الاضويه مال البنايات والبيوت هوايه جوه لان
احنه ما ادري بيا طابق صعدنه يمكن الرابعش
نزلت دموعي وحيده خايفه ما ادري شنو ينتظرني باجر
ربي انته تعلم بحالي تحملت كلشي الخاطر علاوي لا تأخذه مني بعد ما زرعته بروحي
اتحمل كلشي الا فراگه اني ما عشت النفسي عايشه اله
التفتت للمره ألنايمه بالردهه كعدت
_ صباح الخير
ياسمين _ صباح النور باوعتلها مره بالاربعين تطلع
_ هاي البارحه دخلوج همزين تردين الوحشه عليه
شويه وبدت حركه اصير بين الردهات ينظفون الممرات والسسترات تفتر بالعربه مال الدوه تنطي للمرضه مغذيات
وادويه
واني محد اجاني
لا نوم ولا اكل وشبعت خوف وبجي احس كل اشويه اريد اوگع
حوالي الساعه تسعه اجه طبيب و يا ممرض
فحص الطبيب علاوي وسالني عدة اساله من ضمنها وين ابو موجود
لا متوفي
اشو هذا حرك راسه مثل متحسف وسكت
ظل يحجي ويه المضمد كتب تحاليل كال باجر اريدهن كاملات وكتب دوه هم كال من اليوم تبدون ويا
ياسمين _ دكتور شبي ابني
الطبيب _ لحد هسه منعرف يسوله التحاليل واذا ما بيها شي باجر تطلعين البيتكم
وبتسم يطمني وراح
الممرض _ انطاني ورقه وگال….
هاي الابر اشتروها من بره ولازم اليوم جيبيهن
رجعت اشوف علاوي هم ما كعد …. سمعت موبايل يدك
تذكرت الموبايل النطانيا ابو زين
أخذته بيدي
هذا رافع…..
_ الو رافع
_ عبالي ابو زين ليش الموبايل عندج
_ هو انطا نيا اخاف احتاج شي
حجيتله لازم ابقى بالمستشفى وصيته على ملابس وفلوس
لان الطبيب كتبيلي علاج من بره
سديته منه….. وفكرت اتصل على ام زين حتى من يجيني ابو زين يجيبلياهن من بيتنه
طلعت اسمها مها وتصلت
ياسمين _ مرحبا
ام زين _ هلا گالتها بنتر
ياسمين _ ارتبكت ردها من وره خشمها هاي اشبيها……!!!!
ولو اصير زحمه عليج بلغي ابو زين من يجيني يجيبلي ملابس ابني من بيتنه
ام زين _ اي راح ابلغه
وسدته بوجهي…. خجلتني هسه هاي شبيها اني حتى ما اعرفه
هذا هم حظي
ابو زين _ منو اخت ابو حسن اتصلت……؟؟؟؟؟
مها _ اي مو اسمها ياسمين
ابو زين _ اي بس اشلون ياسمين مثل الورده هيج وحده تنعاف بالمستشفى والله صعبه
مها _ شنو اليوم هم تروحلها
ابو زين _ لعد اشلون خطيه ما عدهم احد وابو حسن يستاهل اقومله بالواجب
مها _ اي وهو اشلون واجب زغيره وحلوه وارمله
ابو زين _ شنو هلحجي عيب لا طلعين غيرتج ويه البنيه
لومزوج من وكت جان بنتي بكدها انتي كل عقلج اباوع الهلمسكينه
مها _ ليش ما تبا وع مو هسه تكول مثل الورده يعني امباوعلها
ابو زين _ مو النظره البالج اني خايف عليها بالمستشفى الوحدها
مها _ لعد مر على بيتهم اخذلها غراض وياك
ابو زين _ ابقي انتي بالمحل ما اتأخر بس اوصل وارجع
ياسمين _
كاعده وعين على ابني وعين على الساعه راح يأذن الظهر واني حتى للحمام ما واصله احس روحي مسحونه
منو يفكر بيه خالتي عميه ورافع مشلول وإيمان وحسن يشوفون العمى وما يشوفوني
الممرض _ ها جبتي الابر
ياسمين _ لا والله بعد اهلي ما جايين
باو ع الساعه وكال
_ ادري اشلون عايفيج وحدج شنو زايده عدهم هههه
ياسمين _ ما جاوبت يريد يسولف شكل المغذي وراح
شويه واشوف
دخلو لمت نسوان و زلم جايين للمره المشاركتني الردهه
اسمها ام موسى
اخوانها وأخواتها التمو على ابنه يسألون ويطمنون ويسولفون
شكد حلو من دخلو عليها اشوفها فرحانه بيهم
جا يبيلها اكل
وكل واحد انطاها مبلغ ويتوسل اشتعتازين تلفون واحد واني يمج
وبوسوها وراحو…. شفتها فرحانه تتفاخر ذوله اخواني وخوات
شكد سولها هيبه
من طلعو التفتت عليه ما عرفت انتي ام منو
ياسمين _ ام علي
ام موسى _ هله بيج ياعمري اني ام موسى صارلي اسبوعين هنا
والحمد لله ابني جاي يتحسن
ياسمين _ الحمد لله
ام موسى _ تعالي اكلي و ياي هذا هواي اكل جابولي
ياسمين _ خجلت منها رغم جوعانه
اشكرج والله ما اشتهي
ام موسى _ ادري بيج مقهوره على ابنج انشالله ما بي شي تعالي اكلي حتى تتقوين
ياسمين _ اشكرج لو جوعانه اكل تسلمين
تالي عرفت خجلانه كلتلي ماعون ونطتنيا اكلت منه كم لكمه وعفت الباقي
رايحه جايه اباوع ابوجه علاوي. ما كعد صارت الساعه دعش ومحد اجاني لا ابو زين ولا طبيب
اترخصت من ام موسى تراقب علاوي لحظات ردت اروح للحمام
وبسرعه رحت غسلت وجهي ورجعت لكيت ثنين أطباء واكفين يمه
الطبيب _ انتي امه
ياسمين _ اي اني امه
الطبيب _ نحتاج عينه من ماء الظهر للتحليل لازم نسحبله
ياسمين _ ليش
الطبيب _ لان احتمال كبير ابنج مصاب بالسحايا ولازم نحلله حتى نتلاحكله بالعلاج
ياسمين _ ظليت محتاره أوافق لو لا اني قاريه بكتب المدرسه
شي بسيط عن هذا المرض اليصيب الدماغ
شرحلي الطبيب شرح مبسط عن المرض وان هذا السحب مجرد تحليل ميخوف
اخذو علاوي للغرفه الثانيه واني تركوني بره
من سمعته صرخ ما كدرت ابقى بمكاني فتحت الباب ودخلت بخوف
ودموعي تسابق الخدي
كانو ساحبين منه أخذته بحضني ابجي رغم هو رجع نام
بس احس اني توجعت بمكانه
أخذته لفراشه
لكيت ابو زين جاي ويا رضى
انطاني علاكه بيها ملابس وطلع من جيبه ٥٠ الف ومبايل
بيده علاكه بيها لفتين هاج اكلي اليوم عندي شغل وتأخرت عليج
وهذني حليب وحلويات العلاوي اذا كعد وكلي
ياسمين _اشكرك صارت زحمه
ابو زين _ لا يابه رحمه اني هم مثل اخوج
شنو باجيه شخيره علاوي
ياسمين _ سوله تحليل احتمال بي سحايا
ابو زين _ لااااا مع الأسف منين اجته هاي عدوى
ياسمين _ ما ادري
فتحت العلاكه بيه كيك وعصير وباكيتات حليب زغار وبسكت
هاي من المحل مالك اكيد
تعبتك
ابو زين _ تعبج راحه يابه اني كل يوم راح اجي…. تمام……!!!!
_ ابتسمت …….. تمام
راح ابو زين و يا رضى
فتحت
العلاكه اريد اشوف شنو دزيلي… لگيت ملابس العلاوي وجدر زغير بي شوربه
فتحت الموبايل الحمد لله رافع معبي رصيد اليه
تذكرت الابر لازم اجيبهن امنت علاوي يم ام موسى
ونزلت جو طلعت مقابل المستشفى صيدليه اشتريت الابر وصعدت
اجه الممرض العصر ونطا الدوه
ثاني يوم اجه الطبيب وقره التحاليل وتأكد من شكوكهم علاوي عنده سحايه
نهاريت بالبدايه بس دموعي تنزل رغم كان عندي علم بس كان أملي شي بسيط
علاوي بده يوعه لحظات يبجي انطي الحليب لو البسكوت ويرجع ينام
بدينه رحلة العلاج مكثفه
الدوه انزل اشتري من من بره ثلاث وجبات شتريتله
َمن اول اسبوع خلصت الخمسين الف واني ادري رافع من راتبه انطاني
يعني ما عنده بعد ظليت محتاره لو كتبولي دوه جديد اشلون
ابوزين يجيني كل يومين وهل مره اربع ايام ما اجاني طول عليه
خلصت فلوسي بينما ما اشتري اكل معتمده على أكل المستشفى
اما علاوي اشربه بس حليب باكيتات كان أبو زين يجيبهن االي
اتواصل ويه رافع بالموبايل والعرفته متعارك ويه إيمان وحسن
لان محد يجيني ولا يسالون عليه
ام موسى طلعت اليوم ابنه اتشافه كانت مساعدتني بهواي اشياء اقلها من اروح للصيدليه او للحمامات تبقى هيه يم علاوي بالردهه هسه ظليت وحدي
حسيت بوحشه خصوصا بليل
كأنه فارغه المستشفى قليل مرضه بغير ردهات
سديت باب الردهه وحضنت ابني ونمت
حسيت على صوت الممرض يكعدني عندي
ابره ياخذها علاوي ويه المحلول المغذي ب٣ بليل
لفيت حجابي وكعدت والنعاس بعيوني
لاحظت نظرات الممرض اليه مو طبيعيه وكل ما يتحرك
يجي يحاول يطخني …… ويسأل هوايه
اساله شخصيه
من زوجتي شكد عمرج لو زوجج اشوكت توفه لو اشلون ووين عايشه
واني ساكته مره اجاوب ومره اسكت وگوه أقوى بنفسي
تحرك علاوي فز التفتت كل جسمي عليه اسكته
وظل الممرض ورايه يلملم بأدواته لان كمل
فجأه حسيت ايد حاطتني من وره وطبك جسمه على جسمي
وايديا لامس صدري….
كانه كهرباء انتفض كل جسمي ورجفت
هيه فزه وهيه دفعه
رجع للخلف وصطدم بالعربه مال الادويه
وتطشرت قسم من الأدوات مالته
الممرض _ شبيج لججججج……….
ياسمين _ امشي اطلع والله هسه اصيح وألم عليك كل البلمستشفى
الممرض _ انجبي شمسويلج
ياسمين _ انت تعرف شمسوي ياله ولي منا
الممرض _ يحاجيني ويلتفت للباب حقيره اني اعلمج
اخذ العربه يدفع بيها وطلع واني دمى نشف من الخوفه
تلفلفت بصف علاوي بس طار النوم من عيني
وجسمي بعده يرجف رغم هو راح
ظليت لحد ما طلع النهار عيني على الباب والخوف تملكني
والأفكار تنغبش براسي هذا گالي اني اعلمج اخاف ياذي علاوي
واني الوحدي بالردهه اشلون اعوفه الوحده لو حتاجيت اروح للحمام لو انزل للصيدليه
تعبت القلق دمرني اليوم كله ما طلعت من بالردهه كانت خفارته ليله بيوم كامل يالله تجي سستر تبدله
حفظت دوامهم لان صار اسبوعين مقيمه هنا
كم مره يمشي من گدام الردهه وعينه عليه مبتسم بستفزاز
ومره اجه ويه الطبيب انطى العلاوي الابره وراح
للعصر ابو زين دخل من باب الردهه مبتسم
السلام عليكم…
_حسيت رافع دخل عليه العبره بصدري خنگتني وعيوني انتر ست دمع
عليكم السلام…. گوه نطقتها متقطعه
_ اعتذر يابه هالمره تأخرت عليج
_ لاااااا لا تعتذر فضل منك عايف اشغالك وتجيني احجي ومهجه ما عندي
_ اشلونج يابه هاي ليش هيج وجهج شاحب
ديري بالك على صحتج ابنج محتاجج
_ أشرت براسي مايده
_ هاج هاي جبتلج لفتين اكيد اكل المستشفى فاهي ما يشبع
وهاي علاكه مني العلاوي
وهاي علاكة خالتج دزتلج ملابس واكل
_ والله زحمه عليك مبتلى بيه
اشكرك ما تقصر كلتها بقلق عبالي يگول ودولج فلوس
افرك بأيدي ومحتاره اطلب منه لو لا
صفت احجي ويه نفسي لو مخابره رافع اشلون بيه
_ نظراته عليه ويحجي …. وكانه قره افكاري
محتاجه فلوس…..؟؟؟؟
_اي العندي خلصن
يمكن باجر يعيدون الابر كال الطبيب لان كله من بر اشتريهن واني من اطلع انشالله
_ عليمن تشرحيلي يابه دخل ايده بجيب الستاره وطلعها هاج هاي فلوس انطاني ٧٥ الف…. بعد تردين…..؟؟
_ لا كافي
_ ولا تشيلين همهن اعتبريني ابو حسن
التفت باوع على الردها…..
هاي شنو وحدج هنا ولا مريضه وياج
_ اي ام موسى ابنها صار زين وطلعت وظليت وحدي حتى ما اگدر
انام الليل كله…..
_ باوعلي مهتم وليش ما تنامين صاير شي وياج
_ لااااا بس اخاف لان وحدي……!!!!
_ هز راسه مثل التفهم قصدي… اني شويه واجي……..!!!!!
راح حوإلى نص ساعه واجه هو وواحد ويا لابس قاط وبيده جهاز
ومبين ميانه ويا سوالف وضحك
_ راح ننقلج للردها الهناك
نادى بالجهاز اجه موظف اخذ الأوراق وكال تعالو ورايه
بسرعه لملمت كل ملابس علاوي وحاجياتنه وتبعنا
دخلني ردهه مقبطه
انطاني سرير نيمت علاوي ورتبت مكانه
هسه رتاحيت رغم المكان مزدحم بس احسن من وحدي
ابو زين _ هنا مو احسن……؟؟؟؟
ياسمين _ اي اكيد احسن احجي مبتسمه تعبتك….
_يله اني اروح بعد محتاجه شي اجيبه وياي
_ لا اشكرك…..
مها _
وگفت بالمحل بمكان ابو زين
هناء _ مرحبا اليوم انت هنا
لعد ابو زين وين
مها _ ابو زين رايح جاي للمستشفى صاير ولي أمر علاوي بعد گلبي
_ ياستار منو ابنج بالمستشفى…..!!!!
_ يا ابني…..
شنو ما تدرون ياسمين اخت ابو حسن راح يصيرلها شهر نايمه بابنها
_ ايييي گالت عمتي ام طارق
و ابو زين شعلي بياسمين
_ ماعندهم احد أخوها معوق وتعرفين ابو حسن صاحبه
ما يرده بشغله
_ ما يرده لو ما يرد ياسمين
_ شنو قصدج يمعوده
_ مالي قصد اني شعليه…
_ لا تذبين الحجايه وتمشين…..!!!!! احجيلي اشايفه على رجلي
اني بليه شي گلبي لاعب منهم
_ والله شوفي……!!!!!
ياسمين ما شايفه منها شي بس الزلم عينهم فارغه
ذاك اليوم تعاركت ويه ام حسن جابتها عمتي يمنه شافها طارق لو اكلها بعيونه
كل اشويه وگال اشبيه الزلم عميه ماتشوف هلجمال
ديري بالج على زلمتج فتحي عيونج زين
ياسمين حلوه و زغيره وارمله وفوگها فقيرة حال يعني لو حصللها
واحد مثل زلمنه ما اضن تكول لا
_ نعلة الله عليك يا شيطان خليتيها براسي بعد شيطلعها
_هسه گلتلج فتحي عيونج خوما گلتلج اتزوجها
يله اني اروح تاخرت
_هيه هم عايزه يتزوجها غير ادهر هم دهر
ياسمين _
اليوم علاوي فتح عيونه وحاجاني الحمد لله الله كتبله الشفاء
بعد ما شفت الويل طول هاي الاربع اسابيع واني بالمستشفى
اجه الطبيب فحصه صحته زينه والتحليل الاخير نظيف
كتبلي على خروج
اتصلت برافع گال اجري تكسي وتعالي زحمه هم نتصل بابو زين
لملمت غراضي ونزلت جوه وابني بالكرسي الفراشه تدفعه
اجرت تكسي
ورجعت للبيت لكيت رافع وخالتي بالباب تلكوني فرحانين
وإيمان ولا رفلها جفن على ابن اخوها
هاي الانسانه كتلة حقد اتجاهي وحسن مطبع بطبايعها نفس الحقد والكره
تلكاني رضى بوسني واخذ علاوي من ايدي
رضى _ گلت لأبويه اجيج ما قبل…..
ياسمين _ اي حبيبي لان ما يرضون بس مرافق واحد
رافع ذبح دجاجه على سلامة علاوي وطبخوها وكلنه التمينه على الغدى اكلنه
اني صار شهر تاركه الروضه رحت عليهم استلم باقي راتبي مال الشهر الفات
تفاجأت معينين منظفه بمكاني
يعني استغنو عن خدماتي…. كلش انقهرت وين الكالي شغل هسه
اخذت مستحقاتي ورجعت بطريقي محل ابو زين
مريت عليه……
اوفي ال٧٥ الف الاخذتهن منه
ياسمين _ هواي ممنونه منك وگفتك وياي ما انساها
وهاي الفلوس الساعدتني بيهن
ابو زين _ ما اخذهن اعتبريهن هدية علاوي على سلامته
_ مايصير هواي صرفت كافي عايف اشغالك وتجي وتروح
عليه
ظليت احاول ويا تالي اخذ بس الداينتهن منه بالمستشفى
واني احجي ويا لاحظت مها واكفه بصف الباب المتصله بين البيت والمحل تتسمع…….
رجعت للبيت تلكاني رافع بعدني اباب الهول وندفعت باب الحوش بقوه
التفتت اشوف منو
دخلت مها وصاحت
ياسمين….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
