رواية انكسار الياسمين الفصل الحادي عشر 11 بقلم أمل مهدي
رواية انكسار الياسمين الجزء الحادي عشر
رواية انكسار الياسمين البارت الحادي عشر
رواية انكسار الياسمين الحلقة الحادية عشر
جروحي محطه وناس تدفع ناس
ركب بيه الحزن والنوح والدمعه
وجرى بروحي الحزن مجرى النهر لو فاض
وغرق ناعور حزني وما نشف نبعه
*************
ابتسام _
المفروض اليوم العرس مال ياسمين ما كانت أجواء فرح
بالعكس خلصت يومي اهون على ياسمين واحاول انطيها
امل بلكن باجر يكون احسن
واني نفسي ما مقتنعه
_ گومي اسبحي وبدلي ام رغد والبنات على جيه
يردن يحضرنج ويحتفلن بيج
_ منو گلهم اريد احتفل اني احس راح يزفوني الگبري
_ اسم الله عليج يمه گومي وربج هو اليحلها من عنده
صدكي ماخليج يمه بس خلينه نعدي هاي الليله
طلعت بره فكيت صدري مفرفحه روحي
ها يبو خيمة الزرگه اريد منك تحلها ما بيه حيل بعد وتحمل
اريد تخلص ياسمين من محمد وحوبتها ما تتعداهم اثنينهم
بحق الزهره ام الحسين
رجعت دخلت على ياسمين تبجي…. حطيت كفوفي على راسي وظليت رايحه جايه بالغرفه وألم بصدري كل اشويه يجيني ويروح
اشلون بيه اشلون اقنعها
_ يمه حبيبتي كفى دموعج الزواج لابد منه
ووعد لازم الگه طريقه واخلصج منه
_ ما كادره اتخيل اشلون راح تنسد علينه باب وحده ما طيقه هيه گوه
وذكرت السيد من كلي بعدج زغيره من تكبرين راح تعرفين مرات تنفرض علينه قرارات ننجبر ننفذها الخاطر ناس مهمه بحياته
هسه افتهمتك سيد انته جنت مجبور بزواجك من زينب مثل ما اني هسه مجبوره اقبل بمحمد لان منو يستر عليه وياخذني
محمد عرف اشلون يكسرني حتى يجبرني اقبل بي
ام رغد وصلت ويه العاملات صاحت….
_ نزلن الغراض بسرعه
ابتسام _ شنو هل الزحمه ما مخليه شي ما جايبته افضالج برگبتي كثرن
_ يا افضال حبيبتي وصفكت بايدها
يله بنات لبسوها ومكيجوها اريد اشوفها احلى عروس اليوم
ولو اني ما راضيه بعدها زغيره مدرستها أوله بيها
حجت وتباعلى كأنه تعاتبني
ابتسام _ بعد قسمتها اجتي وانتي اعرف بالحال
ام رغد _ الرب يسعدها حبيبتي
ياسمين _ اخذني للغرفه لبسني بدله بيضه وفلن گصيبتي
وسرحنها
ومكيجني من وكفت گدام المرايه اني ما عرفت نفسي
البنات يسالني ليش وجهج حزين اضحكي وافرحي الليله ليلتج
واني ساكته ما اعرف شجاوب
شغلن اغاني وگامن يركصن
واني صفنه تجيبني وصفنه توديني احس مثل واحد ماخذي للموت
المفروض هاي احله ليله بعمري اباوع بالوجوه كلها فرحانه تضحك وتغني واني مخنوگ النفس بصدري
ما فزيت الا من سمعت
صوت الزفه بدت تقترب
جسمي كله رجف….
عيوني تتنقل بين البنات ادور امي
التفتت لكيتها ورايه حضنتني ودموعها نزلت
ياسمين _ ليش تبجين اني ما اعوفكم
ابتسام _ ولا اني اعوفج شعندي غيرج
اريدج قويه اصبري والله مراح يتخلى عنج
وباوعت لام رغد….
ام رغد _ يله بنات الزفه جايه….
ياسمين _ رافع ماكو اريد اشوفه
ابتسام _ أخوج بغرفته ما يريد يشوف احد
ياسميت _ شلت بدلتي ومشيتله….
دكيت الباب_ ……!!!!! ماكو رد
_ فتحت الباب الغرفه شبه ظلمه
ورافع على الكرسي منزل راسه وحاضنه بثنين كفوفه من شافني مسح دموعه بردان دشداشته
تقدمت عليه….
ليش ما تريد اتسلم عليه….؟؟؟؟
باوعلي
_ اليوم احس روحي ماتت….
اعذريني ما كدرت احميج ولزم الكرسي بكفوفه شوفيني
مسجون بهذا الكرسي اللعين مالي كل فايده
جنت اتمنه بحيلي الأول…..
_ لا تكمل بعدك انته اخوي وحزام ظهري الحنيه
العندك كافي تقويني لا تخاف عليه الله وياي
گلتها اطمنه واني ارجف
بوست راسه وايده وطلعت
تلكتني ام رغد وامي
ام رغد_ الرب يحميج يابنتي
رجعت المكاني كعدت…
دخل محمد فرحان وايمان جايه ويا وعينها تدور على رافع بالبيت
انتبهت الكلاده الجابلياها ورفضتها من اجاني للمدرسه مزينه صدرها
اكيد هاي ثمن مساعدتها آله حتى يكسرني
ناس قليله الجايين ويا من عمامه وجيرانه
_ مد ايده يريد يكودني ما نطيت أيدي
اله جنت شابكه ايديه ثنينهن
من آيس لزمني من وره ظهري و طلعنه صعدت بسيارته وورانه سيارتين. افترو اشويه بين الدرابين ورجعو البيتهم
دخلت البيت بس عمامه وعوائلهم وملتهين يصبون بالاكل
تلكتني خالتي راجحه اخذتني الغرفتي دخلتني
وسدت عليه الباب
ما ادري شكد ظليت ساعه اقل واني بس ادعي ربي خايفه
اسمع البيت صار هدوئ ماكو هوسه
نفتحت الباب دخلت عليه إيمان
صابغه شعرها اصفر
حطت بالكاع صينيه بيها تمن ولحم
إيمان _ اكلي يا عروسه أشبعي اكيد من الصبح ما ماكله
ياسمين _ خزرتها……
إيمان _ اشرتلي بأيدها…. لاااا لاااا
هاي الخزره عفناها بذاك البيت هنا لا عبالج تدللين وتتنعوصين
انفتحت الباب ودخل محمد
سكتت إيمان…. حسيته ارتبكت….
إيمان _ الف مبروك حبيبي اتهنه بليلتك هههه
محمد _ كملتي يله الله وياج وسدي الباب وراج
باوعتله مثل المعاجبها وراحت
محمد _ التفتلي وهو ينزع الستره هاي شنو بعدج ما نازعه البدله اجنتي اسوين
ياسمين _ ما اريد ابدل….
محمد _ وتنامين هيج…. اتقدم خطوتين
ياسمين _رفعت أيدي بوجه
لا تتقدم خليك بعيد عني رجعت ليوره صار كومدي السرير بصفي
محمد _ بيده سترته شمرها وفتح الرباط بعصبيه
دك مبايله
باوع بالشاشه ولتفتلي يهز براسه….. حظج بالمبايل الدك
اطلع وارجع الكاج امبدله ماكو هاي البدله اشككها عليج
طلع واني قفلت الباب
نزعت البدله بسرعه لگيت سيت نوم على السرير شمرته الكنتور وطلعت دشداشه ردان طويله مال بيت لبستها
انتظرت تأخر يالله اجه
رجع يصفن وكل شويه داك وحاجي بالمبايل بس حجيه ما فهمت عليه بلالغاز
تمدد وهو يباوع للساعه على الحايط
_ تعالي نامي مالي خلكج
الليله ما فارغلج عندي شغل اهم منج
_ عيونه كبار وضعيف و دمرات رگبته ناطه ولوزته تصعد وتنزل من يحجي
من خوفي كل قسماته انطبعت براسي
_ ما صدكت كال ما فارغلج بكلبي اكول بلكت الله لهى عني الليله
بسرعه اخذت المخده من السرير والجرجف اريد انام بالكاع
_ ويننننن
رجعيهن… هذا مكانج هنا بصفي …..
_ بين الخوف والكره تمددت بهدوء وتغطيت
دك مبايله…
محمد _ ها شسويت…..
ظل يسمعله شويه…..
_يعني وصلن لو لا
هم سمع اشويه….
_ اي فهمت فهمت روح……..
سمع اشويه
_ وانته شعليك…. باجر نتحاسب
روح لبيتكم ولا جنك تعرفني…. سد الخط…. وظل
يسب ويلعن بواحد اسمه عزيز
ياسمين _ اسمعله وما فاهمه شي ما كدرت انام مشنجه وخايفه
طفه الضوه وظل متوتر كل اشويه يكوم يفتر بالغرفه
بعدين بدل ملابسه وطلع….
من طلع شويه رتاحيت و اخذتني النومه
ويه الفجر فزيت على ايده تتلمسني….
تيبس جسمي من الخوف سحبني عليه ورفع راسي على ايده وحضني ونام
من صار نفسه قريب عليه شميت ريحه مو طيبه بي
وذكرت من رافع مره گال كشفته يشرب خمر
زاد خوفي يعني لمن طلع راح شرب خمر
خفت اتحرك ظليت ساكته إلى أن حسيته نام بهدوئ سحبت نفسي منه
نزلت من السرير بحذر وهو ولا حس التفتت اشوفه
نايم بالبنطرون بدون تيشرت جسمه اسمر ولابس زنجيل ذهب
شوكت اجه…..!!!!!. ما حسيت عليه
طلعت من الغرفه لكيت
خالتي راجحه واكفه على التنور تخبز
وايمان الصينيه كباله تتريك وحسن ورضى وياها
باوعولي ما حجو شي حتى ماكالولي اشلونج عمه…. تربية إيمان ما اعتب عليهم
رحت لخالتي كبل…. صباح الخير
راجحه _ يمه فدوه الهلصباح اليفتح النفس
اشلونج حبيبتي
ياسمين _ الحمد لله خاله
باوعت الإيمان تفر بديها ما عاجبها
كعدت على بطانيه فارشتها بالكاع تشمر عليها الخبز من تطلعه من التنور
لميت الخبز وسحبت الجياس….
راجحه _ هاي شسوين گومي
ياسمين _ اريد اجيس الخبز….
راجحه _ لا يمه گومي تريگي…
ياسمين _ اجيسلج الخبز يالله حتى نتريگ سويه
كعدت احسب كل ثمان گرص بجيس واشده تودي هيه للمحلات ياخذو منها
ابتسام _
من محمد اخذ ياسمين وطلع
روحي فرفحت اشوف ايده على ظهرها ماشيه ويا مغصوبه
حسيت وجع بكلبي
لزمت صدري ودموعي تجري
ام رغد _شبيج اشو وجهج اصفر ابقى يمج…..؟؟؟
ابتسام _ كفيتي ووفيتي ربي يحفظلج مهند والبنات
ام رغد _ شجاج ام رافع كافي تبجين يا عيني بنتج تزوجت يعني وين راحت…..!!!!
اني هسه راح اخذ البنات واروح باجر الصبح اني يمج
يله بنات لملمو الأغراض خل انروح
ابتسام _ فرغ البيت الكل راح ظليت بس اني ورافع
فتحت باب الغرفه لكيته بيده القرآن يقره ودموعه تنزل من شافني
صدق وسد القرآن وحطه على الميز
_ ها يمه تتعشه….
_ منو اله نفس ياكل
_ على كيفك صحتك رغم كل السوى محمد وادري بي واحد مسقط بس مراح يأذيها
_ محمد….!!! لعد انتي ماتعرفي
انسان حقود يكرهني وايمان تكره ياسمين
اني هسه خايف عليها أكثر من قبل
_ اريد من الله احد يا ذيها حتى ما خليها لحظه يمهم وفجأه اجاني وجع حيل اذاني
لزمت صدري و اون….
_ التفت عليه رافع مفزوع يمه شبيج…..!!!!
_ غمضت عيوني اشويه ارتاحيت وحاجيته
مابيه شي يا ضوه عيوني لا تخاف اروح اجيبلك العشه
_ حركت الكرسي مالتي
لا يمه ارتاحي ونامي اني اشويه وانام ما اريد اكل
_ لا لازم تاكل ما ريدك تهمل صحتك اريدك قوى بظهر اختك لو ضامها الضيم
_ ههههه والله ضحكتيني يا ضيم بعد أكثر من الشافته حتى اساعدها
واحميها
يمه اني منتهي اني ما مني فايده
حتى ولدي عافو ني ونسو دلالي وطبكو ويه امهم
_ لا تيأس انشالله ربك يردهم الك
عفته ورحت توضيت وفرشت مصلايتي وكعدت اصلي وادعي ربي
يحمي بنيتي من محمد وايمان
صدك كالها أمامنه على عليه السلام اتقي شر من أحسنت اليه
ربو ابيتي واكلو من خير هلمسكين وتالي يهجمون بيته
مانمت كضيتها صلاة الليله احس روحي تنسحب مني رجعلي الوجع بصدري وهل مره قوي شنجني اريد اتحرك ماكو
واخاف اطلع صوت ادري رافع يتأذه حطيت أيدي على حلكي
ووگفت شربت مي وغسلت وجهي
اشويه ردتلي روحي كل الوجع وما فكرت هذا گلبي جان تفكيري كله ببنيتي أشلون تخلص ليله ويه الضربه وغتصبها
انه ادري لازم ياخذه بعد الصار ياهو يستر عليها بس انغدرت ونظلمت
اريد من الله كون حوبته ما تخطيهم أيمان واخيها الجلب الحرامي
جانت فجريه تمددت شويه اريد ارتاح نمت ماكعدت الا على صوت ام رغد جايه تشوفني كاعده ويه رافع تسولف
ابتسام _ ليش ما كعدتوني الهسه نايمه…..!!!!
وكفت بسرعه ولبست عباتي
ام رغد _ وين رايحه مو جايه اطمن عليج اشلون تعوفيني
ابتسام _ گلبي نار على ياسمين رايحه اشوفها
ام رغد _ لعد اخذيني وياج…. من رخصتك رافع
رافع _ سلمولي عليها
ام رغد_ يوصل كالتها وهيه تمشي بسرعه وره ابتسام
على كيفج طايره راح تموتين شوفي نفسج تلهثين
ابتسام وصلت بابهم دفعتها ودخلت
شفتها كاعده تجيس الخبز وتسولف ويه خالتها من شافتني وگفت
وابتسمت…..
اجتني حضنتني واني دموعي تهمل واللهث
ياسمين _ يمه على كيفج جنتي تركضين ليش هيج
كلبج يدك سريع
ام رغد _ جيبيلنه مي امج جابتني ركض
ياسمين _ اشربي مي ورتاحي اني زينه لا تخافين رافع اشلونه
ابتسام _ زين
راجحه _ هله ابتسام هله عيني ام رغد اشلونج
ام رغد _ هاي بعدج تخبزين مكافي متعبتي….
راجحه _ مكتوب عليه خيه ما ارتاح
ابتسام _ شفت ولد رافع صحت علىى حسن ما قبل يجيني
رضى اجه احسن من اخو
طلعت من جزداني فلوس ونطيتهيا
رضى _ بيبي خالو ينطينه
ابتسام _ هذا راتب ابوك
اخذو مصرف الك ولاخوك ولا تاخذ من خالك
راح ركض جوه يم امه….
ام رغد _ اخذت ابتسام ورجعت.. گوه تمشي
ام رافع أوديج طبيب اشو ما عاجبتني صحتج
ابتسام _ البيه قهر كلشي ما بيه
ام رغد _ وحدي الله اذا هيج صعبه عليج ليش تزوجيها
ياسمين الرب يحميها عاقله وكالت زينه ارتاحي انتي
فهد
اكو بضاعه عدنه بس احنه نجيبيها علامه تجاريه حتى انوع عن بقية التجار اكو ناس وصلولي دتنباع بالسوق السوده ما صدكت….!!!!
ورحت بنفسي اشوف لكيتها نفس بضاعتنه
اني ادري محد مدخلها غيرنه لعد هذا منين جابها
دماغي فتر محمد عدنه ثقه بي ملزمي المخزن واني بالمكتب
معقوله يبوكنه شغلت السياره وطلعت للمخزن
كلت اطمن بنفسي
لكيت محمد مخبوص يجهز ويوقع كعدت اشويه
كلبت بالدفتر شغله سليم ولا غلطه
وهو كلش طبيعي
محمد _
المخزن كله بيدي تجي تريلات انزل البضاعه وابيع منها
الناس تشتغل سوق سوده
ابن الحجي ما يجيني والحجي مريض بالبيت اليجي يسوك يقطع وصل من المكتب يجيني اجهزه ويروح
الحجي عنده ثقه بيه وهاي صار أكثر من سنتين اني اشتغل وياهم
عزيز سايق سياره حمل ادز بيده بضاعه وانطي هالله قاسمه
اجاني بخبر ابن الحجي جاي ورايه وسائل عن شغلي وسائل المن يوصل البضاعه من ياخذها
لان ناس شايفي يحمل من مخزنه
وبضاعتنه لكيناها بالسوق السوده
يعني من اجه ذاك اليوم كان يفتش ورايه
حسيت يشك بيه
اني كل شغلي سليم ماكو ولا غلطه مستحيل
يكشفني
بس شي واحد اخاف منه…..!!!!
كعدت من النوم ياسمين مو بالغرفه
راسي يوجعني ومتأخر بالنوم
صحت عليها
راجحه _ يمه رجلة يريدج گوميله
رحت للغرفه دخلت….
_ رايد شي…..
_ اول گولي صباح الخير
حتى نلاگي الخير…..
_
شفت بيده التليفون يكتب بي
وكل اشويه يرن
ومبين مهتم
التفت عليه
_ بسرعه حضري هدومي
رحت للكنتور ما ادري ياهدوم يقصد طلعت قميص وبنطرون معلكات
لبسهن واخذ سويجه وطلع
فات من يم خالتي
راجحه _ وين رايح
محمد _ للشغل غير
راجحه _ تعوف عروستك وتطلع من صباحيتك ما يصير اكعدلك يوم
محمد _ عندي شغل عروستي ما اطير خليني اعوض فلوسي الصرفتهن على العرس
وطلع…..
راجحه _ الله يستر وما تجيبلي مصيبه جديده
محمد
طلعت للشغل مالي واهس ابقى بالبيت حتى واهسي بياسمين
انكسر
بعت وحملت مطمن اريد اعوض الفلوس الصرفتهن على العرس
وهذا عزيز قلقني ما ادري صدك لو يكذب عليه يكول فهد يسال وراي
اني كل شي سليم الحمد لله
اخر سياره حملتها المغرب سديت المخزن وطلعت ويه جماعتي
تعشينه وشربنه للتسعه گلتلهم كافي اروح العروستي
شنو نسيتو اني عريس
رجعت للبيت دخلت غرفتي لكيت ياسمين كاعده من شافتني وگفت
محمد _ گولي الله يساعدك تلگيني جيبيلي البجامه لو اخوج بس علمج تكرهيني
ياسمين _ اخذت البجامه انطيهيا….
كلشي اتحمل ولا يحجي على رافع……
لا تحجي على رافع من اصير مثله عود احجي
محمد _ ها….. مو اشوفه من الصبح دزلنه صينية الگيمر والكاهي يحبج خطيه
يحجي ويجر الكلمه وريحته تموت نفس ريحت البارحه
ياسمين _ من شفته هيج هميت اطلع من الغرفه بالباب سحبني من دشداشتي
محمد _ شنو ما عاجبج الحجي تعوفيني وتطلعين
ياسمين _ هد ثوبي اريد اطلع ختنكت بيك ريحه مو طيبه
محمد _ سحبني وقفل الباب اني ريحتي الماطيبه لو تردين تشلعين
تره البارحه عفتج بمزاجي اليوم لو تنطبگ السما على الكاع ما عوفج
_ عوفني شتريد اسوي
_ اسوي المفروض يسونه بليلة العرس لو نسيتي انتي عروس
_ دفعته اريد افك دشداشتي من ايده
باوعلي وخنزر عيونه كانه صحه
_ لزم رگبته عبالج ناسي هاي
وبده يضربني راشديات بثنين أيدي
يضربني باليمنه ويرجع يضربني باليسره
لزم الدشداشه من يم صدري شگها
واني اصرخ واضرب بي بأيدي
ضربه منهن اجت على خشمي شاغت روحي والدم نفر على وجهي
خالتي راجحه تدك الباب وتصيح يعوفني وايمان تمنعها واني اصرخ جوه ايده
حاصرني بلزاويه شگ ثوبي ويجر بيه يريد يسحبني للسرير
أيدي صارت وراي اجت على سراحيه استيل بيها مي كانت على الميز
بلحظة ما فكرت كان كل همي اخلص نفسي منه
سحبتها وضربتها براسه
باوعتله داخ ووكع بالكاع والدم والمي ينزل على وجها
ركضت للباب فتحتها
إيمان وخالتي بالباب من شافنه مدمه
إيمان _ گتلتي ولج……؟؟؟؟
وصرخت
ياسمين _ وگفت مذهوله خايفه كل ضني مات يعني معقوله گتلته…..
من الخوف طلعت اركض وصلت الباب انتبهت دشداشتي مشگوگه وشعري مكشف
شيلت خالتي على الحبل جريتها وخليتها على راسي ولزمت دشداشتي من يم الشگ
وطلعت اركض بالشارع
بينه وبين اهلي شارعين اخذتها ركض ليل وناس كلش قليله….
وصلت الباب دكيتها حيل
ابتسام _ يا ستار منو وووو…..
ياسمين _ الرجفه والخوف وصحت يمه اني افتحيلي الباب
ابتسام _ ياسمين…..؟؟؟.
فتحت الباب
دخلت…
اشوف الدم تارس وجها وهدومها مشگوگه وحافيه
يمه ابنيتي منو مسوي بيج هيج
ياسمين _ حجيت بصوت يرجف
والعبره خانتني…..
يمه گتلت محمد…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
