رواية انكسار الياسمين الفصل الثلاثون 30 بقلم أمل مهدي
رواية انكسار الياسمين الجزء الثلاثون
رواية انكسار الياسمين البارت الثلاثون
رواية انكسار الياسمين الحلقة الثلاثون
اذا عقلي تعب ونمحت ذاكرته
كلها تروح من بالي وتظل انته
💖💖💖💖💖
وكلها تصير ذكرى يطولها النسيان
وانته الغايب جنى أصبح شفته
💟💟💟💟💟💟
ويسألوني عليك شعجب فضلته
گتلهم هوى اختنگ لو عفته
*************
ياسمين _
اباوع على السيارتين
المدنيه رقمها اجنبي وبيها علم
والثانيه عسكريه وبيها جنود…… گلبي رجف وعقلي وداني الحسن
رغم اني ما احبه ولا اطيقه بس خفت عليه وفكرت برافع
بس الهدوئ شويه طمني
فتحت الباب ودخلت تلكاني رضى ياشرلي بأيده ويحجي همس
رضى _ عمه الحگي ابيتنه اجانب
ياسمين _ بالبدايه ما فهمت بس من وصلت باب الاستقبال
شفت ام رغد ابتسمتلي
هيه نفسه بنظراتها التشع حنيه وانسانيه وشخصيتها
القويه وكلمتها التوفي بيها لو مهما تكون الضروف
حضنتني بحنيه احس
كلشي بيها يذكرني بامي
ام رغد _ هاي اصاير بيج هوايه متغيره
ياسمين _ العبره بصدري گوه احجي
شلونج خاله والله مشتاقتلج
ام رغد _ واني أكثر حبيبتي ولتفتت على رافع اني اعتذر ابو حسن ما متصله عليكم والله كل فتره بدوله تعرفون شغلنه
انساني
اعرفكم بفريقي أيلينا والدكتور فيصل
ياسمين _ التفتت بنيه شگره مبينه اجنبيه وولد وياها
ابتسنت اهلا وسهلا
ام رغد_ هذا ابنج حبيبي………؟؟؟
ياسمين _ هذا علاوي
ام رغد _ الله يحفظه
اتاثرت هوايه من شافت خالتي ضريره ونطتني كارت الدكتور تابع الهم حتى يعالج عيونها بلكت يرجعلها بصرها وانطتني ضرف بي دولارات ما ادري شكد
ام رغد _ افتحي المشروع وشتحتاجين اتصلي عليه وعتبريني مكان امج
ياسمين _ من حضنتني نزلت دموعي شكد طيبه ياربي
صعدو سيارتهم وكل احنه طلعنه نسلم عليهم الجيران كله
مستغربه منو ذوله وليش اجونه
دخلت البيت الفرحه ما سايعتني…..
لكيت رافع ساجد سجدة الشكر
رفع راسه
رافع _ مبتسم الله جازه صبرج شوفي تعويض رب العالمين
هدالج الناس الطيبه
ياسمين _ الحمد لله
رافع _ هسه تكفيج الفلوس……..!!!!
ياسمين _ ها نسيت خلي احسبهن…….!!!
طلعت الضرف كله دولار حسبتهن ٣٠ ورقه بست ايدي وحطيتها على جبيني الحمد لله التفتت الرافع على العندي انشالله يكفن
تجي وياي اروح أأجر محل…….؟؟؟
رافع _ ارتاحي وباجر اروح….
ياسمين _ يگولون خير البر عاجله اكو أكثر من هذا البر
مو گلبي انفت واني انتظره….
رافع _ هههههه يله امشي
وصلنه السوگ وگبل على الحجيه
ياسمين _ وگفت اباب المحل ورافع بصفي… جانت اتصف بطوال القماش وتسولف ويه مره
صحت….
اشلونج حجيه
الحجيه _ رفعت راسي …. ام علي….. هله ومرحبا
ياسمين _ هذا اخويه ابو حسن
الحجيه _ بهتت السيد گال گرابتي انصاب بحادث ويمكن مشلول
ليش من گلتله على ام علي كال ما اضنه هيه
اسولف بگلبي….
ياسمين _ اليوم الحجيه مو ويانه صافنه
رافع _ اخاف مشغوله دلينه بس على المحل الإيجار اريد نشوفه
الحجيه _ ياع مو بالحيف اعوفكم امشو وياي
سدت المحل ومشت ويانه بنفس الشارع مالتها راوتنه
محل وبالشارع الثاني هم اخذتنه على محل
بعد أكبر من الاول والشارع ما بي قماش اني
اختاريته لان واسع وهم ما اريد ازاحم الحجيه برزقها
اتفق رافع ويه صاحب المحل وقع العقد ونطينا أيجار
شهرين
رافع _ المحل عوزه صبخ ورفوف وكهربائيات بسيطه
الحجيه _ طلعت الموبايل من جيبها دگت على رقم وحجت
الو حيدر يمه……
هسه تجيني
اگلك تعالي بساع عندي الك شغيله يله ابني
الحجيه _ باجر نجهزه ونشالله يومين ونمشي نجيب القماش
ياسمين _ اشوف رافع مهتم يفحص الكهربائيات ويباوع على
المحلات احسه مثلي فرحان
اجه حيدر ابن الحجيه اتفق ويه رافع على الصبغ
والرفوف يم النجار سهله
يومين المحل جهز ورافع صار واهسه بي الصبح ياخذ
رضى ويفتحه والعصر هم يروح يغسلون الارضيه ويرتبون
تعرف على كم صاحب محل من القريبين يمنه
فرحتي بطلعته من البيت وتغير نفسيته أكبر من
فرحتي بتحقيق حلمي التمنيته سنين…..
الحجيه _ صلوات على محمد والي محمد بالمبارك عليكم
رافع _ مشكوره حجيه رحمله والديج
ياسمين _ ما ادري اشلون اجازيج حجيه على وگفتج ويانه
الحجيه _ اليجازي الله بنيتي
تعالي جاي اريد اسالج اخوج اشلون انشلت رجليه
لو هو من زغره هيج
ياسمين _ لا حجيه جان اسطه ومقاول الناس تحلف باسمه
وصار حادث ويا
الحجيه _ ها يا وسفه شبابا
ياسمين _ ها حجيه المحل وكمل بعد القماش يمته نروج نشتري
الحجيه _ هانت هذا الاسبوع الج عليه اخذج وترس المحل قماش
الحجيه _
صار يومين ادگ على السيد يطلعلي سيد اركان
يگول سيد علي مشغول امريني…… يوم يگول بالنجف يوم
يگول يم عمامه
اشلون اوصله وانه متأكده ام علي واخوها گرابته المضيعيهم
اريد ابشره…
سيد علي _ صار ثلاث شهور ما يرجعون زينب الا يردوني اني اروح اتخضعلهم واني دگيت رجل مثل ما اخذوها يجيبوها
اليوم مصطفى ضارب اختي آلاء من وره سوالف نسوان
كاشفته ومهددته وهو گاضي بيها التوبه
طلعت للنجف جبتها هيه وجهالهاورجعت اريد اشوف
اريد اشوف شيسوي عمي باقر ويه مصطفى
ثاني يوم حرگو الموبايل عليه اشلون وبأي حق تأخذها
ومصطفى ترجعه وباي حق تأخذها وتأخذ جهالي
واني سويتها وحده بوحده
مثل ما مسوين ويايه اسوي وياهم يومين وعمي الجبير
اجاني للبيت وكعده طويله حاول يرجعها رفضت
اني من زمان ادري مصطفى واحد صاحب علاقات
وهاي عيب عدنه بس
ساكت الخاطر اختي وبما انو انفضح وتعدى على بنت سيد
حسين فقررت ما اعديها الهم
من بعد سبوع طلايب
ادخلو الساده عمامنه وحلوها وراضونا اجه عمي باقر
بنفسه وو يا مصطفى رجع زينب وراضو آلاء واخذوها
ورجعو للنجف
صار كم يوم عايف الشغل على أركان ملتهي بالمشاكل مال عمامي
سيد علي _ شكو ماكو بالشغل
سيد أركان _ كلشي ماشي تمام
اذكرت سيد ام حسين اتصلت ثلاث مرات تسأل عليك
سيد علي _ ما عرفت شتريد
سيد أركان _ ما گالت
سيد علي _ سحبت الموبايل وتصلت عليها
الو حجيه
ام حسين _ هله بالسيد وينك
سيد علي _ والله جانت عدنه شغله وحليناها
ام حسين _ خير انشالله اريد اجيك اتسوك وجيبلك وياي
ناس
سيد علي _ خير انشالله أركان موجود
ام حسين _ اريدك انت موجود……!!!!
سيد علي _ خير لكيتيهم……؟؟؟؟
ام حسين _ والله يا سيد ما اريد افرحك وتالي اطلع جذابه انته ب. بس تعال اريد اشوفك
هسه اشتاقيتلك دخيل جدك جا ما يصير……..!!!!
سيد علي _ ههههه هله بيج يصير ويجرالج بس مو باجر بعده
ام حسين _ ها هيه اتفقنه مع السلامه
ياسمين _
توقعت اليوم اروح نسوك بس الحجيه اجلتني بعد يومين
ما ادري ليش يوميه مأجله روحتنه للشورجه واني لازم
ابقى وياها لان هيه تعرف هواي تجار وتعرف نوع القماش وعدها خبره كافيه اتعلم منها
للظهر عزلنه المحل ورجعنه للبيت اني ورافع ورضى وعلاوي كايدته بيدي
ياسمين _ اليوم راح انتهز الفرصه واخذ خالتي للطبيب اخاف
الايام الجايه بعد ما عندي مجال ياخذني الشغل
رافع _ اي اخذيها بلكت الله ويرجعولها بصرها
ياسمين _ والله لو شما اسوي ما اجازيها لام رغد احس
جنت ميته وحيتني من جديد
رافع _ الحمد لله الله ما يترك عبده محتار..
دخلنه بشارعنه نتمشه ودخلت ورانه سياره عسكريه بيكم
بيها عسكريين اربعه بالبدي وثنين بالصدر
رافع _ هذوله جماعة حسن
رضى _ هذا حسن وياهم
سبقونه و كفو اباب البيت وعلت أصواتهم بالضحك والشقه
نزل من السياره حسن وسلاحه بكتفه من شافنه اقتربنه منه
تلگه رافع حضنه وبوس ايده بكل احترام اليشوفه ما يصدك هذا حسن
اني عرفته يتفيك گدام جماعته
نزل من الصدر شاب ثلاثيني ملتحي لاف على رگبته يشماغ
اسود نزل من السياره وسلم على رافع
والباقين هم نزلو سلمو
واني نسيت نفسي ظليت واگفه ومتعجبه من تصرفات
حسن يبين نفسه شكد بار بابو وشگد مؤدب
ما حسيت الا رافع اشرلي ادخل بالبيت… مشيت بسرعه
دخلت ….
دخل ورايه حسن مخبوص بسرعه مي بارد وجاي
ويأشر بايده تعرفون هذا منو القائد مالتنه
عفته خبصها الإيمان واني رحت الخالتي
راجحه _ ها يمه اجيتي …
ياسمين _ اي خاله اجيت احسبي حساب اليوم اوديج للطبيب
راجحه _ اروح فدوه لعيونج الحلوات وفتحت صدرها ودعت
ربي كون يفرحج باليتمنى گلبج يا ياسمين بنت ابتسام
قادر رب العالمين
ياسمين _ صفنت احجي بگلبي…
بس هو الگلبي تمنى وتخلى عني من يومها الدنيه
سوده بعيوني وينك سيد لو تدري بعدك الدنيه اسوت
بيه….
وتنهدت مستهزأه…… هسه يذكرني يسال وين صرت
تغديت ورتاحيت اخذت خالتي ووياي رضى وعلاوي العنوان بيدي
الشارع المشجر وين صاير ما ادري بس تعودت اسال واوصل لاي
مكان
اخذت تكسي وقريتله العنوان وطلع بينه
وصلنه العماره البيها الطبيب
دخلنه للعياده لكيت هواي ناس قبلنه انطيت الكارت للسكرتيره
من قرته كالت اكعدو هسه ادخلكم….
كعدت خالتي وكعدت يمها اباوع على البنات يتسابقن باللبس والاناقه
والمكياج وحدتهن جايه الحفله مو للطبيب
واني عباتي صح نظيفه بس بسيطه وحتى كاشف لونها من الغسل
ابد ما فكرت من اطلع اشلون اكون لو اهتم بنفسي حتى أعجب احد
فززتني السكرتير من صاحت اسم خالتي
بقيت علاوي بيد رضى وأخذت خالتي اكودها الغرفة الطبيب
رحب بينه من شاف الكارت وبدأ يفحص بعيون خالتي
الاجهزه كلها حديثه مالته سالني صار اشگد من فقدت بصرها
گلتله سنتين
دخلها بجهاز مثل السونر
بالاخير گال مع الأسف صاير ضمور بعصب العين بسبب فايروس
يعني ما يرجعلها بصرها
انقهرت على خالتي صار عدها امل
ترجع تبصر مره ثانيه وخاب أملها بسرعه
اجرت تكسي ورجعنه
دخلنه البيت ابو زين ورافع كاعدين بالهول وحسن
يحجيلهم عن المعارك الشاركو بيها خلال هذا الشهر الخلصه
ابيجي
حسن _
تدرون اني شنو سلاحي…..!!!
سلموني آر بي جي سفن من اهدف على المفخخه اسويها
مية وصله
وهذا القائد الوصلني للباب رفع اسمي راح يكرموني
حتى قناة فضائيه اجت زارتنه ولتقت ويانه
جان سلاحي قناص لهوجتهم للدواعش واحدهم ما يگدر يطلع راسه من جحره
رافع _ صافن استعمله حجيه ما بي ربط مدري صدك يحجي
مدري يهمبل گدام ابو زين اني ما اريد اساله واخجله
ترخص ابو زين وطلع
وحسن بعده شكالت المفخخه وشحجت القاذفه الى ان
طلع مبايله
مصور ويه قتلى الدواعش
حسن_ شوفوهم كلهم ذوله اني قنصتهم
رضى _ اكلك حيرتنه نوب اتفجر مفخخات نوب
تقنص بالدواعش انته لحگت تدرب على السلاح كله صار
شهر من لتحقت
طلعت محرر مصفى بيجي الوحدك
لعد جماعتك شيسون
حسن _ انجب شنو اجذب اني لو اوديك هناك تب…. ل
على روحك من الخوف جماعتي كلها استشهد ت وان
ابد ما استسلمت
إيمان _ ولك انته جلب شلون تحجي ويه اخوك هيج
رضى _ متشوفينه جنه داخل گيم كلانش سواها ظلمه
حسن _ گم لا تكعد ويانه على اساس جاي احجيلك لك
ياسمين _ اسمعهم واضحك حتى رضى ما مقتنع
هسه مجبور تجذب والله ياالله
سيد علي _
صار اسبوع من رجعت زينب متغيره هادئه مهتمه بنفسه
من ارجع تتلگاني بلهفه مهتمه بيه وبالبيت وبأمي
الي درجه قنعتني كل هذا التغير ندم
زينب _ الله يساعدك سيد……
السيد _ ابتسمت هله بيج اي هيج اريدج يمته ما افوت للبيت
ألگه الوجه منور
زينب _ مو تدلل شعندي غير السيد زوجي وحبيبي وابن عمي
السيد _ اباوعلها متعجب شنو البراسه اتمنه اعرفه بس يله
دامها جاره عدل شأريد منها
ليث _ بابا عمتي نسرين وأركان جوه يردوك
السيد _ اي جاي هسه انزل…….
زينب _ متگلي هذا أركان بالوكاله وياك وبالبيت هم
السيد _ خزرتها
مو جارين عدل وعين الله علينه شبيج كلبتي على الرجال
زينب _ تدري أركان اني ما ارتاحله احسه مشاركني بيك
السيد _ شنو هلحجي الرجال غير لازم الوكاله ومأمنه عليها
زينب _ يعني مو اسرارك كلها عنده………..؟؟؟
السيد _ ولج اشعدي أسرار غير كله شغل
واشرت باصبعي على راسها
ريحيلي هلراس وحتاري ابيتج وجهالج
زينب _ سوت حركه بحلكه ما عاجبها نزلنه ثنينهن
ورحت للهول كاعد أركان ونسرين وامي
سيداركان _ ابويه يكول باجر الجمعه معزومين عدنه بالمزرعه
السيد _ اي والله يرادلنه هيج طلعه نغير جو شتگولين يمه
اميمه _ بكيفك
السيد_ التفتت الزينب لعد تحضري باجر تتونسون
زينب _…….!!!!
اكلك مشوفلي مزرعه يمكم على شرط بيها بستان
زينب _ شنسوي بيها….. صدك تحجي…
السيد _ خزرتها…..سكتت
سيداركان _ اذا تريد اگول لابويه يعرف ناس يوصيهم الك…
السيد _ اي والله عاد نتونس بيها بأيام الجمع
راحو نسرين وأركان
واشوف زينب وگفت على راسي
زينب _ احسب حسابك اذا اشتريت مزرعه تشتريلي بيت النجف
باسمي
السيد _شنو ها قوانه جديده
زينب _ قوانه ما قوانه گلت ما تشتري مزرعه شنسوي بيها
لو فلوسك هوايه تطشر بيهن ومن توصل يم زينب
اصيح ماعندي كل فلوسي بالسوگ
السيد _ هاي جديده مال بيت النجف بله منو حطها براسج
ابوج لو مهيمن
زينب _ لا تحاول
تشتريلي بيت يعني تشتريلي احسن من المزرعه شنو
راح تكعد بيها……؟؟؟
السيد _ لازم ناويه تكعدين بالبيت التردي بالنجف
زينب _ اي من اروح زياره اناثثه ونقفله
السيد _ وهاي جم بيت عدنه محد يتحمنله ليله وحده
اني صوجي اريد مزرعه اونسكم بس خلص
سدي الموضوع ما اشتري بطلت
ياسمين _
كان يوم عادي ولكن بالنسبه الي غير عادي
اليوم شعوري موطبيعي احس روحي تفيض امل ونشاط وفرح
حاضنه الجنطه البيها الفلوس على صدري وامشي ويه الحجيه
وصلنه الشورجه ازدحام مو طبيعي
اني اول مره اشوف هذا المكان جنت بس اسمع بي
الحجيه _ ايدج على الجنطه ديري بالج عليها لا اصيرين
فاهيه بتي
ياسمين _ واني احضنها للجنطه أكثر ااحس روحي مضمومه بيها
دخلنه سوگ القماش ماكو شي أبالي بس
لازم اختار أرقى الاقمشه واحسنها لازم اكسب معاميل
من البدايه
وبكل خطوه ادعي ربي يوفقني
عيوني على المحلات المتزينه بالاقمشه والوانها
والحمالين يجرون بالعربات المحمله بطوال القماش
شي يجذبني من اني زغيره
الحجيه _ هاي وكالة سيد حسين وصلناها
ياسمين _ رفعت راسي على القطعه كبيره مكتوب عليه وكالة
سيد حسين الموسوي للاقمشه المستورده
وجواها أرقام تليفونات
دخلنه المحل جوه عماره كان عادي بدايته مثل المكتب
بس من باوعت جوه أشكال الاقمشه مابين مفتوح
وقسم بعده بنايلونه
ام حسين _ السلام عليكم
سيد أركان _ هله بالحجيه اشلونج
ام حسين _ انه زينه دام الساده زينين
اشلونه السيد اشو ماكو
سيد أركان _ يجي انشالله هسه اتصل عليه
الحجيه _ جبتلكم وياي معميله جديده
سيد أركان _ باوعت بنيه شابه… اهلا بيج وبيها…. تفضلو
شوفو شتاخذون وهسه السيد على جيه
ياسمين _ تمشيت بداخل الوكاله أشكال الاقمشه وام
حسين توجهني
هذا زين وهذا ثگيل بيعه وهذا مرغوب وهذا غالي
واني استمع واتفرج
عيني وگعت على صوره كبيره طفله گصايبه شگره
حلوه وبصفها شاب راكع بالكاع ومبتسم
كانت نظره عابره واستمريت امشي رغم عجبتني الصوره
بس حسيت اعرفهم تمشيت خطوتين ورجعت
اتمعنت بالصوره
وكل ما اركز ترجعني ذاكرتي سنين
رجف كل جسمي واني انظر وراهم الباب مال البيت
وين وشايفتها….
كانت مميزه بزخرفتها
تذكرت باب بيتنه القديم نفسه…. همست سيد علي
الحجيه _ شبيج ام علي تسمعيني
ياسمين _ أشرت على الصوره برتباك…. اريد اسالها
منو هذا….
اجاني صوته….
اليوم منور المحل هله بالحجيه ام حسين
الحجيه عافتني وراحت اسلم عليه
واني وگفت بمكاني كل جسمي يرجف ثلجت اطرافي احس رجليه ثگلت ما اگدر احركها
وگلبي يدگ مثل الطبل
هو هذا صوته……
جرت حجايته…..
لهجته النجفيه الورثها من ابو…..
اريد التفتت عيوني تريد تشوفه بس كلشي بيه خايف
اريد الملم روحي التبعثرت ما كادره المها
صوته فزز كل سنين الفراگ المرن بحياتي
بيني وبينه مسافه التفتت اريد اصدك هو
هيه نظره بس رجعت بيه كل ذكرياتي
كلشي حلو بحياتي
هو بطوله بوسامته بضحكته بمحابسه العقيق المميزه بكفه
بفرت السبحه بيده
اسمعه يضحك ويه الحجيه يداهرها ويرحب بيها
اني من يمي ابتسمت
احس گلبي ينتفض مو يدگ كأنه يريد يطلع من صدري
ام حسين _ شنو هلغيبه يمته ما اجي ما الگاك
سيد علي _ والله ملتهي البيت والشغل
الحجيه _ الله يعينك ادري بيك مشغول جا ما ادري…….!!!!
اليوم جايبتلك رفيجتي معميله جديده بروح السيد لا تردها وتخجلني وياها آنه گلتله السيد ينطي حتى على التصريف
سيد علي _ اذا تكفليها ماكو مشكله وكون تعرفين محلها
الحجيه _ جا شلون انه اجرتلها المحل
السيد _ ماكو مشكله وينها
الحجيه _ وگفت واشرت
ام علي….. تعالي……. واني اراقبه لو جانت گرابته الضيعها راح يعرفها ولو ما عرفها معناتها اني غلطانه
سيد علي _ التفتت بتجاه ما تباوع الحجيه
شفت بنيه شابه…
بعدت نظرها للجهه الثانيه
حسيت شايفها واني كتاجر لازم اتأكد ويه كل الاتعامل
وياهم
ظليت كاعد على المكتب بس عيني عليها
اتمعن بملامحها
صاحت عليها الحجيه مره ثانيه
هالمره اللتفتت كل جسمها وصارت گدامي
قشعر جسمي واني اركز
انتفض گلبي بصدري ورجفت اديه وگعت السبحه من ايدي
أركان _ دنگ شالها وحطها على الميز وهو يباوعلي
بيك شي سيد
السيد _ ما جاوبته تقدمت بخطوات متردده
الملامح والشبه هيه بس هوايه ضعيفه وذبلانه
طلعت من المكتب وفتريت امشي
بتجاها
الحجيه ظلت ويه أركان تسولف
واني گلبي ثبرني يگول هيه هاي ياسمينتي
رفعت راسها ونظرتلي بطرف عينها
آخخخ
آخخخخ يا هلعيون الياما حلمت وسافرت بيهن
خطواتي ترجف
معقوله الحظ يجيبه اليمي
اقتربت بلهفه بينها وبيني خطوات همست…..
هيه بنت روحي الربيتها وكبرتها وتالي ضيعتها
ياسمين………………!!!!
انتي ياسمين
ياسمين _ لمعت الدمعه بعيني والعبره خنگتني
اي ياسمين…….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
