رواية انكسار الياسمين الفصل الثامن 8 بقلم أمل مهدي
رواية انكسار الياسمين الجزء الثامن
رواية انكسار الياسمين البارت الثامن
رواية انكسار الياسمين الحلقة الثامنة
الما همه اهتمامي سقط حقه
بعد يحلم دقيقة ابالي يبقه
اريد اليسهر ويتعبلي و يذوب
عندي الحب على قدر المشقه
*****************
إيمان _
وا كفه اغسل مواعين من شفت خالتي دخلت والعلاكه بيدها بس شنو گوه تتنفس وشفايفها زرگه
ركضت عليه اخذت العلاكه من ايدها
شبيج خاله
ابتسام _ الحكيلي بكلاص مي
إيمان _ بسرعه فتحت الثلاجه وطلعت الدولكه
فرغتلها بالكلاص ….
وكبل ما تشرب وكعت….
صحت _ رافع الحكلي
اجتني ياسمين ووراها رافع يحرك بالكرسي
اخذ راسها بحضنه غسل وجها وياسمين تفرك صدرها
رافع _ بسرعه جيبو مخدتين خليهن جوه رجليها
عدها هبوط بالضغط
سويت مثل ما گلي وكعدت افرك رجليها وايدها
فتحت عيونها واستقرت شويه
رافع _ ارتاحي يمه ليش هلكد تتعبين
ابتسام _ مابيه شي لا يظل بالك هسه اشرب مي واكل انسحنت روحي من الحر
ياسمين _ عدت علينه لان اشوفها ما تشكي ولا تحجي ولا ترضى تروح طبيب
ياسمين _ رجع محمد عادي ويانه عايش
اني من هو موجود اختفى بغرفتي ما احب اشوفه
محمد _
كعدنه كلنه تغدينه وياسمين ما طلعت ولا شفتها
ليش تكرهني هلكد ما ادري بس اشلون صايره
كل مره اشوفها بعد احلى
كملت اكل وكفت…الحمد لله
وكمت اغسل على المغسلة بره
لمحتها بالمطبخ
استغليت انشغالهم بالأكل ورحتلها جانت
تخدر الجاي
وكفت وراها أتأمل طولها وتقسيم جسمها بياض ركبتها لو الكصيبه اشلون
مضفوره
بدون شعور اقتربت اكثر شميتها
ياسمين _ حسيت احد ورايه التفتت
وفزيت مفزوعه
هاي شسوي ورايه…!!!
محمد _ من فزت حتى اني فزيت ورجعت ليوره
اشبيج كل ما تشوفيني تفزين الخاطر الله
بيه شي يخوف…
ياسمين _ …..!!!! مارديت بس اباوع بوجها ما ارتاح النظراته
محمد _بدلت بسرعه وصرت هادئ
شلونج…
_ زينه….
انتي ليش ما سلمين عليه تره اني ابن خالتج مو غريب
_ معليك بيه حتى لو ابن خالتي
لا تقترب مني
وركضت دخلت بالغرفه وسديت الباب
محمد _ رجعت كعدت بالهول يمهم واحجي بگلبي اشلون كيكه صايره
هين ياسمين تستاهلين اصبر عليج
ياسمين _
رغبتي بالدراسه مو مثل قبل بس امي ورافع مصرين اعيد السنه واكمل
اول ايام دوامي راجعه من المدرسه الجو حار واني ما عندي خط اخلصها مشي الناس كلها سوت خطوط البناتها يخافون عليهم
واني اعرف الوضع ما يسمح مخلصتها اروح وارجع مشي
شحطت سياره بصفي
_ فززتني ووكفت….اباوع محمد….!!!!
_ نزل الجامه اصعدي اوصلج ياسمين
_ ماكو داعي..ارجع مشي
_ نزلت من السياره….. شنو تخافين مني
_ وليش اخاف منك بس الناس شتكول من يشوفوني وياك
اكيد راح يضنون ضن سوء بيه وبيك
_ الناس كلها تعرف اني ابن خالتج وعايش وياكم
ابيتكم اصعدي اوصلج الجو حار
وبعدين اريد احجي وياج بموضوع
_ وليش متحجي ويايه بالبيت…؟؟؟
_ واني اشوفج اصلا ارجع بليل وانتي خاتله بغرفتج
_ كأنه قنعني… فتحلي الباب مبتسم
صعدت
هو هم صعد وشغل السياره
_ هاي السياره مالتك…؟؟؟
_ لا منيلي مال ابو الشغل بس انشالله اجمع واشتري مثلها
هههه واخذج انتي وايمان اونسكم
_ خزرته… كول شتريد مني
_ طلع من جيبه مبايل … زغير
تعرفين هذا شنو….؟؟؟
_ اي اعرفه تليفون
_ هذا جبته الج وخليت بي خط ورصيد…
_ ومنو كلك اني أخذا منك
اني جبت واحد الإيمان وهذا هم الج
والصراحه اريد احجي وياج لان بالنهار اني بالشغل ما اشوفج
_ ما اريده ولا اريد احجي وياك
_ حقج اني اعرف اخلاقج والله
بس انتي عاجبتني وعندي حجي هواي اريد اكوله الج
_ باوع محمد لا اتعب نفسك اني ماحب احجي ويه ولد
وبعد لا تجيني للمدرسه سمعت
_ اريد اعرف ليش هلكد كارهتني
سولفي وياي تعرفي عليه اني والله رايدج
_ اوكف نزلني هنا
_زين اخذي هذا هديه مني ولج كل الناس عدها مبايل مشوفين
كل واحد حاطه بحزامه يتباها بي
_ كلتلك ما اريد لا اتعب نفسك ويايه
اوكف نزلني كلتها بنتر
_ اصبري وصلنه البيت
سكتت أبين قويه بس ابداخلي ارجف
وصلنه اني نزلت
وهو شخط السياره وطلع
دخلت المطبخ تلكتني ايمان مبتسمه
ايمان _ هذا محمد وصلج…؟؟؟
ياسمين _ خالتي وامي كاعدات يتغدن
وباب الحوش جان اشويه مفتوح يعني بينت السياره
_ اي ….
باوعت على امي خزرتني
راجحه _ ومنين جاب السياره
ايمان _ مال ابو اشغل اخذها حتى يجيب ياسمين يكول خطيه حاره عليها
ابتسام _ وانتي شمدريج بكل هذا
ايمان _ يا شنو هو تحقيق وطلعت من صدرها مبايل نفس الراد ينطينيا تراوي الهن
مو محمد جابلي تليفون وحاجاني كبل لا يجي
راجحه _ وانتي شسوين بي بعد كلبي
منو عدنه عمام خوال نحجي وياهم
اشو كل احنه وكرايبنه ملمومين ابيت واحد
اصيح عليج منا تسمعيني مناك
ايمان _ هسه انتي شعليج بلكت اريد احجي ويه ابويه
ابتسام _ عيب هيج تصيحين بوجه امج امونه
ايمان _ حجت بصياح
كم مره كلت اني ايمان مو امونه اشلون يوميه اكوله
راجحه _ صايره رعنه فرد نوب اني اعلمج…
ياسمين _
عفتهم ودخلت الغرفه ابدل ملابسي
دخلت ورايه امي وسدت الباب حيل
ابتسام _ اشلون اصعدين ويه محمد ولج
ياسمين _ كلتله ما اصعد وهو اصر
عليه
_ اسمعيني زين محمد ما اريدج تحجين ويا ابد واذا شفتي بالهول انتي طبي بالغرفه وسدي الباب
لا تنطي مجال ابد التهي بدروسج
_ يمه اذا هيج تخافين عليه منه ليش لعد كاعد ويانه
_ يعني وين يولي غير امه ويانه….
ترديني اطرده وخالتج شايله الحمل وياي
محمد _
_ ايمان أخيتي رايد ياسمين دبريها…..!!!!
_ شنو مالكيت غير هاي الصفره تاخذها
_ صفره خضره رايدها احجيلي ويه رافع
_ ما تقبل ولا ينطوها لا تعب روحك
_ اني ادري كلهم ما يحبوني بس الوضع تغير
_ اشلون بلله…..!!!
_ ياسمين وخالتي جانو مستقوين برافع وعايشين بسده
هسه رافع انتهى اخو الميت لا شغل ولا عمل ولا رجال حاله حال اليدارون بيوتهم
هو يرادله واحد يشيله ويداري
فهمتيني
وحط ايده على صدره وبتسم
هسه يرادلهم رجال بالبيت
_شوف أخذها نصيحه من اختك ياسمين لا توصلها رافع ما ينطيها وخصوصا انته يموت منك….
وصفنت لحظه الا اذا………!!!!
_ الا اذا شنو
_ غيرت فكرتهم عنك
_ اشلون يعني…..!!!!
_ تغير نفسك وتمشي عدل
وتخلي ياسمين تحبك…
رافع _
يوميه احس من الفجر على صوت امي وخالتي وهنه يتعاونون على الخبز اظل اتألم واني بمكاني
سبحان الله شكد حاولت اريح امي وهم
لحكها التعب وضطرت تشتغل
بليل اشوفها تخيط وبالنهار تخبز
ايمان تغيرت من بعد ما جانت تنام بحضني وحتى لو نفسيتي ما متقبله جانت تتحرش بيه وتأخذ حصتها مني
بطريقتها
واني ما امانع مو من أجل ارضي شهوه
بداخلي
لا حتى ما تكول تعوق وقصر ويايه
رافع _ ايماننننن
ايمان _ شتريد ….بيدها المبايل وتكلب بي
_ تعالي ساعديني انام
_ روح كدامي هسه جايه
_ الكل نامو حتى حسن ورضى غفو بالكاع
_ ما حجيت شغلت الكرسي ووصلت للسرير ظليت انتظرها وهيه ملتهيه
تكلب بالموبايل
لشوكت اظل محتاجلها
حاولت اتجه على ايديا وانقل جسمي للسرير ما كدرت افتر ووكعت على وجهي
صحت بألم…
ربي ليش ما خذت امانتك وخلصتني من الذله
ربي تدري بيه ما اكدر الهاي الكعده
جان لازم اموتتت
اموتتت ولا هاي حالتي
على صوتي اجت امي وياسمين
ابتسام _ اسم الله يمه شبيك
شوكعك
ايمان _ ركضت عليه خايفه ردت اكومه
رافع _ وخري مني عوفيني
ياسمين بجيت واني اشوف رافع منهار وعصبي
هذا الجان واكف للكل بحيله وصحته هسه ذليل
وبحاجتنه ما يستاهل
ابتسام _ هذا الخايفه منه ما يتحمل وينفجر
وين جنتي ايمان ليش ما شلتي من الكرسي لو ملتهيه بالتليفون
ايمان _ وهو ليش ما نتظرني
ابتسام _ ولج رجال مريض تعوفين
البيدج وتنيمي
ولو همه ولدج ذولا بالكاع نايمين
انتي شنو ما تحسين
ايمان _ طلعتنيي فدنوب مو يوميه اشيله ومحتاره بي فوكاها ماراضين
ابتسام _ اسكتي كافي روحي شيلي جهالج نيميهم وعوفي هذا الغضب البيدج حتاري ابيتج ورجلج
ايمان _ يابيت يارجال اشو اربعه وعشرين ساعه منسدح لو نايم لو على الكرسي
واني محتاره حتى بشغلته
ابتسام _ سدي حلكج وسكتي مو نفكيتي
نزل محمد من سمعها وصاح بيها
محمد _ اسكتي متستحين صوتج عالي وصيحين بليل
ايمان _ باوعتله وكلت بكلبي يرزلني
الخاطر الخاتون… هه راح يتغير براسي
معليك محمد لا تدخل
ابتسام _ كافي ما طلعت حجايه وحجيتها
رحت الرافع كومته ونيمته ابمكانه
يهد حيلي من اشوفه مكسور ومقهور
لا تنقهر يمه انته تعرفه الامونه
قصدي ايمان
رافع _ صايره مهمله وما متحملتني
ابتسام _ اعذرها جهال وبيت
رافع _ لا يمه حتى هسه من كلتي امونه خفتي تسمع وعدلتيها
لا عبالج ما سمعت ذاك اليوم من صيحت عليج وعلى خالتي
ايمان مو صاحبة طويله وياي اني الوكت غدر بيه وصرت ما فيد
ابتسام _ انته مؤمن وتعرف المؤمن مبتلى
_ الحمد لله والشكر على كل حال
_ اصبر يمه
محمد _ من شفت ايمان وهوستها ويه خالتي وياسمين
حبيت أبين اني ما راضيلها صحت عليها
وسكتتها
وباوعت الياسمين واكفه بره ودموع بعينها
رحتلها
ليش تبجين اكسر راسها ايمان اذا تحجي وياج
ياسمين _ التفتت عليه مو ويايه ويه رافع هاملته وذالته حجايه والثانيه تعيره بعوقه
محمد _ اني احجي وياها لا تهتمين
باوعت نظراته اليه مو طبيعيه رجعت بسرعه الغرفتي
محمد _
التاجر ابو فهد الاشتغل عنده فجأه تمرض وأولاده حتارو بي بين المستشفى وعمليات
ظل المكتب بيد ابنه واني بالمخزن ومحد فارغ يراجع ورايه كلهم خريجين وعدهم شغل
ابو فهد عنده ثقه بيه واني مشيت عدل ويا بس من غاب عن الشغل
صفه المخزن بيدي شفت لا شئ راتبي
بالنسبه للارباح اليجنيه من التجاره
بديت اخذ من المبيعات
خمس وصولات اسجلها وواحد احوله بجيبي
ومن كثر البضاعه اضيع ما تبين
ستغليت ثقتهم بيه ومشت الفلوس بيدي
ياسمين _
اليوم راجعه من المدرسه
وافكر سيد علي هم يذكرني ليش ما يسأل علينا معقوله مزاعل ويه رافع
لا ما اضن….!!!
احنه من تحولنه الهاي المنطقه حتى احمد ما سأل على رافع
الناس ما عدها وفه بسرعه تنسه
وكفت سياره بوجهي …بيضه عاليه
للحظه فكرت هذا سيد علي
وكفت وردت بس اشوف منو بيها شمس
بوجهي
انفتحت الباب ونزل منها محمد
خاب أملي…ونقهرت
محمد _ هلو ياسمين
ياسمين _ ما رديت اكتفيت واكفه ومبين عليه مزعوجه
محمد _ شنو رايج… ويأشر بيده على السياره
ياسمين _ شنو
محمد _ اشتريت هاي السياره اشلونها
ياسمين _ باوعت للسياره متعجبه
امبينه غاليه….
محمد _ اي طبعا
ياسمين _ التفتت عليه منيلك فلوس….؟؟؟
محمد _ ههه الناس تكول مبروك علخير
مو منيلك فلوس
عندي وشتريتها قابل بگتها
يله امشي اوصلج للبيت
ياسمين _ ما اكدر اصعد وياك روح
محمد _ انتي شبيج اعتبريني خط واوصلج ليش دائما ترديني وتكسرين خاطري
تدرين انتي اول وحده اراويها السياره حتى ايمان ما تدري
ياسمين _ ما يهمني روح الها راويها
محمد _ اقتربت منه وعيني بعينها
اني رايدج بس وافقي اغركج فلوس كلشي بنفسج اشتريلجيا
جربيني وشوفي
ياسمين _ واني ما ريدك عندي دراستي وبس
جوز عني….!!!
محمد _ اخليج تكملين وعد اني ما عندي مانع حتى كليه تدخلين
ياسمين _ عوفني محمد اني ما أريدك
انته بالذات ما أريدك تره اكو هواي بنات
غيري
محمد _ بديت ازهك عصبتني
واني ما رايد غيرج افهمي
ياسمين _ واني شعليه بيك
تحركت اريد امشي
محمد _ بدون شعور لزمت ايدها اريد اوكفها راح اعتبر نفسي ما سمعت كلشي
لان ادري بيج بعدج زغيره وما تعرفين مصلحتج
ياسمين _ نترت ايدي منه ومشيت
اسابق ويه خطواتي
وصلت البيت لكيته طابك السياره بالباب
وايمان وحسن ومرتضى فرحانين
بيها وهو واكف بنصهم
دخلت كبل للمطبخ ما سلمت
ايمان _ شبيج يحظي حتى سلام ما تعرفين تسلمين
محمد _ عوفيها ايمان ما ريد تداكرين ويا ها
ايمان _ باوعتله عشتو يدافعلها
ابتسام _ شنو مشتري سياره محمد……!!!!
محمد _ اي خاله حضرو نفسكم اريد اخذج انتي وامي لزياره
ابتسام _ بهتت ظليت صافنه بوجها…
شنو أشكد تاخذ شهريتك تبين غاليه هاي السياره….؟؟؟
محمد _ شكو خاله فدنوب گولي بايگها غير اشتغل وألم فلوس
صار سنه
راجحه _ ما طول الله رازقك ما حنيت على امك وعتقتها من حر التنور
يمته ما اجيك تگول ما عندي
محمد _ الله وكبر گولو على الخير الف مبروك
عود اني جاي افراحكم اريد اخذكم للزياره بطلت ما روح
ابتسام _ من رجعت من فرنسا نسيت رغد وحتى رقم امها النطتنيا ما اذكر وين صار
ما احب اثگل على الناس واشكي وامد أيدي التهيت بالعيشه
نكعد من الغبشه اصلي ونبلش نخبز اني وراجحه مكتوب علينه الشگه
اني وياها
راجحه _ بس لو ادري أمي بيا مخبز ذبت صرتي جان رتاحيت
ابتسام _ هههه الناس اذب الصره بالمستشفى بالمدرسه احنه بالمخبز
راجحه _ حتى انتي عداج حظي
وصرتي خبازه مثلي
ابتسام _ اني ما يهمني لو محصله شغله غيرها جان اشتغلت بس نعمه ما طول معيشتنه
وكفت سياره بالباب ونزلت مره مرتبه
وكفت بالشارع تباوع
ابتسام _ احنه من نخبز نردها الباب الحوش
لان الناس تجي تأخذ من عدنه خبز حار من الصبح
هاي المره غريبه المن جايه
راجحه _ عفت ابتسام ورحت وكفت بالباب اشوفها محتاره تسأل وتحجي ويه السايق مالتها
راحو للمحل مال ابو زين حجو ويا
اني بعد رجعت اخبز
شويه وندكت الباب نفسها المريه
ام رغد _ مرحبا عيني
راجحه _ هله ومرحبا عيني
ام رغد _ هذا مو بيت ام رافع
راجحه _ اي يعيني وصلتي وهاي كدامج
ام رغد _ انتي ام رافع….!!!!
ابتسام _ ذبيت قبق التنور ومسحت ايدي ملوثه بالطحين بثوبي وتلكيتها
تفضلي عيني اني ام رافع
ام رغد _ الحمد لله والله تعبتيني
صار شهر اسأل وادور عليكم
ابتسام ظلينه اني وراجحه وحده تباوع على الثانيه ما فاهمين شكو
_ عيني اني ام رغد بنتي القابلتيها بفرنسا يوميه تسأل عنج ما اتصلت عليج ام رافع واكلها لا
وتالي خبصتني الا ادور عليج
ابتسام _ دمعت عيوني
رغد ياعيوني بعدها تذكرني…
ام رغد _ دكولي نستج
انتي مثل ما وصفتج حتى اشتاقيتلج واني ما اعرفج
ابتسام _ فوتي حبيبه تفضلي جوه
فتحت باب الاستقبال ودخلت
ابتسام _ الولد الوياج خلي يدخل
ام رغد _ هذا ابني مهند
رافع _ سمعت امي ترحب وتهلي
منو يمنه….
ايمان _ خالتي تكول تعال
رافع _ حركت الكرسي ودخلت الاستقبال
شفت مره تطلع بكد امي بس سافره ومرتبه وولد شاب
سلمت عليهم وعلى وجهي سؤال منو يبينون يعرفونه
ام رغد _ هذا رافع اكيد
ابتسام _ اي والله هذا ابني رافع وهاي زوجته ايمان وذوله ولده حسن ورضى
ام رغد _ بعد عدكم ياسمين بنتج
ابتسام _ اي صح وهسه هيه بالمدرسه
ام رغد عدها منظمه انسانيه تساعد الناس الفقراء والمحتاجين
ومعمل خياطه عايشه عليه بي عاملات تديره هيه وابنها
من شافت وضعنه عرضت علينه اني وراجحه نشتغل بالمعمل مالته
اني وافقت لان خوش راتب واعرف للخياطه
بس وراجحه ما رضت
كانت جايبه انه مواد غذائيه
وملابس وحتى فلوس ووعدتنه كل شهر
راح تجيبلنه حصه من توزيعات المنظمه
ابتسام _ صدك الدنيا بعدها بخير شوفي هاي المره مسيحيه وجايه تدور عليه والله شنو بنته وصتها عليه الحمد لله
شو ف الناس الطيبه ابد ما تنسه هنه كم يوم عاشرتهن وما نسني
راجحه _ الله ما يگطع ما ضيج الا تفرج
رافع _ اسمع كلامهم والحجي يگلبي
لعد السيد واحمد ليش نسوني ليش گطعو وياي اسنين احنه سويه
وتالي نسو العشره
واني مستحيل اروحلهم….
محمد _
يمه اني احوالي عال العال ولميتلي جم فلس اريد ازوج
_ تريد تزوج ابن عباس…..!!!!
اي بيها الخير بس مو بعد وكت
مو لازم يصير عدك بيت وتاثثه حتى تتزوج بي
لو تريد اعرسلك ابيت خالتك
_حاليا اشوف هنا اتزوج ما اطلع
لان الاريدها مو غريبه…. عايشه هنا ويانه
_ صغرت عيوني مستفسره لا يكون
تريد اخطبلك
ياسمين…..!!!!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
