رواية انكسار الياسمين الفصل التاسع 9 بقلم أمل مهدي

رواية انكسار الياسمين الجزء التاسع

رواية انكسار الياسمين البارت التاسع

رواية انكسار الياسمين الحلقة التاسعة

انا….العينه عله دكة باب
انا المايدري اشكبره
انا الفدوه
انا الماله عمر يسوه
انا البلغربه يتغنى
انا الماينشد عنه
انا الينشد….انا اليفكد
انا المجتوف ما يفتك
انا الينشاف جنه بخير
وانا الجذاب من يضحك
**********
رافع صدمني
وكأنه متحضر للجواب كلهن كالهن وهو يراقب ردة فعلي بحذر
_ ياسمين زغيره مو مال زواج
محمد _ باوعت لامي ورجعت حجيت
ابو حسن لعد ايمان وامي وخالتي وين كلهم يمها
يعلموها وهيه مو كلش زغيره هوايه بكدها مزوجات
رافع _ ليش انته من تزوج تبقى تعيش ويانه….
محمد _ والله كيفكم تردوني وياكم تردوني أاجر عادي وانشالله عن قريب اشتري بيت
رافع _اي الله يوفقك بس
مثل ما كلتلك ياسمين زغيره
مو مال زواج
محمد _ التفتت على امي نظرتها اليه وكأنه تكول
مو كلتلك….!!!
طلعت من رافع بدون حجي بس شنو من حقد بكلبي
رافع قطع كل امل اليه
ايمان _ ماتحملت اشوف محمد بهلحاله
دخلت على رافع واني اعصاب
ليش عود ما تنطي المحمد شبي شعوزه
مو رجال
رافع _ باوعتلها واكفه كبالي ومتخوصره
سمعتيني كلت ياسمين زغيره أريدها تكمل دراسه
_ من يا فكر تكمل و،تدرس دبر مصرف جهالك بالاول
لو تستنكف تنطي اختك لاخوي
ياسمين _ سمعتها تتعارك ويا بسببي طلعتلها….
كافي ايمان اني ما موافقه
_ ليش يابه ماعاجبج اخويه لو شايفتلج شوفه
ياسمين _ عيب عليج شنو هلحجي
رافع _ سدي حلكج وكافي ما انطيها وخلص
كوهههه
ايمان _ ليش مو بعينك اخويه فهمني…
اشمعنا اني أنطوني الك وهاي مطيح حظي وياك
رافع _ زهكتني عصبتني
لان اخوج حرامي تكدرين تكوليلي منين جاب السياره….
ايمان _ يشتغل ليل ونهار وجمع وشتره
شنو عجبه
رافع _ اي عجبه لمن اشوفه يصرف اكثر مما ينطو
اكيد اكول منين جابها واكيد يمد ايده
ايمان _ انته تحجي على اخويه واني
المتحمله فكرك وعاهتك وأهلك
فوك ما يصرف عليه وعلى جهالك…..
ولك انته حتى واجبك بالفراش اني الاقوم بي …..
رافع _ عيرتني بعجزي مخلت كلمه تعتب عليها انسانه ناكره للجميل وللعشره هذا طبعها من زمان جنت بقوتي وصحتي واحوالي وصعب ترضه فكيف هسه
حركت الكرسي بتجاها واني بقمة غضبي
وعيني بعينها…
تمنيت ما كاعد على هذا الكرسي
جان سويت الماشايفته بحياتج
من اليوم حرمتي عليه
مالج شغل بيه ولا تدنيني واذا تردين حريتج هم كولي هسه اطلكج
وروحي ويه اخوج
ايمان _ بعد ما فرغت البكلبي حسيت
على روحي …سكتت خفت صدك يطلكني…. وين أولى يم ابويه الايوم تذكرني سكتت
بس بكلبي حقد لو اطلعه احرك البيت
بلي بي
باوعت بعيونه تريد تنفجر من العصبيه اول مره اشوفه واصل الهاي الحاله والسبب كلامي جرحه هوايه
ياسمين _ ركضت عليه ينزف خشمه
رافع هاي شنو الدم
رافع _ حسيت بصداع مفاجأ وراها
نزف خشمي بغزاره
ايمان _ ركضت اخذت الخاولي واجيت امسح الدم
لزم ايدي
ابتعدي عني……!!! اياج تقتربين مني بعد
والأفضل روحي وره اخوج اني ما فيدج
معوق وعايش عاله
ايمان _ …..!!!!
محمد _
طلعت من البيت يومين ابات بالمخزن مال ابو فهد
اتصلت عليه ايمان بليل
_ ليش ما اجيت….؟؟؟
_ مالي عين ابقى يم رافع وهو رفضني
رافع يكرهني وما ينطيني لو اموت شفت بعينه حقد كأنه كاتل ابو
ثاني يوم رجعت للبيت فاجأتني امي
راجحه _ أريدك تاجر بيت الي والك
محمد _ شعجب هسه ترديني ااجر
شنو انطردنه
_ لا يمه شنو انطردنا بس بعد ما خطبت وما انطوك ماترهم كعدتنه بنفس البيت صعبه
_ كولي اني ماترهم ابقى انتي منو يمج
_ خالتك وشتغلت ويه ام رغد اني بعد المن اخبز هم تعبت
اجر بيت حتى اشوفلك بنت حلال تزوج وترتاح
_ انشالله يمه بس اصبريلي كم يوم
ابتسام _
اشتغلت بمعمل الخياطة
ام رغد كلش كريمه ويايه
تنطيني راتب اكثر من العاملات تحترمني هوايه من تجيها مساعدات اني اول وحده تعزل حصتي
حتى ملابس تجيب الياسمين لان عدها بنيه بكدها بس بالجامعه
تحسن وضعنه من اشتغلت وياها هوايه
بس لازم اغيب عن البيت للاربعه او خمسه العصر
ايمان استهترت بغيابي وخصوصا من
رافع رفض محمد
بدت اتأذي ياسمين ومحاربتها بدراستها
كم مره شكت ياسمين اليه وتعاركت وياها وطلعت السانها رغم اني مداريتها بمصرف وبكل شي تحتاجه هيه وولدها
ونحاول ما نوصلها الرافع
نخاف عليه لان ندري بي اشكد مأثره عليه كعدة الكرسي
محمد اجر بيت وراحت ويا راجحه بعد
عنه شارعين
راجحه كل يوم يمنه بس محمد كطع رجله من البيت
وهذا الشي كلش ريحني لان جنت ما ارتاح الوجوده ويانه بالبيت واخاف على ياسمين
ياسمين _
مايوم نسيته ما ادري ليش هلكد حبيته رغم الفوارق البينه فتحت عيني عليه وشفت بي الاب والأخ والحبيب شفت بعيونه الحب الطاهر النظيف الجنت ما اعرفه وهو علمنيا
بس هو الأثر بيه…..
طال انتظاري الشوفته ويوميه طول طريق المدرسه اباوع بالوجوه بلكي اشوفه
يفاجأني مثل قبل
ويطلع كدامي….
هوايه مشتاقه اسمع صوته ينصحني ويخاف عليه ويوصيني
اظل طول الطريق هذا تفكيري ومن اوصل يخيب أملي
يعني معقوله نساني…..!!!!
كل هاي التساؤلات والأشواق جنت اكتبه بدفتري يوميه بليل اكتبله كل شعور احس بي كل دمعه نزلت من عيني عليه
كل لهفه ذبلت وماتت لان هو بعيد عني
وشكد جنت محتاجته يوكف ويايه ويحميني لو يقويني
ولو بكلمه تطمني عليه
واكول اذا يوم اجه واستحي احجيله انطي الدفتر يقرأ ويعرف شكد جنت اتعذب
ليش كطع بينه فجأه هو بالشورجه شغله ورافع يدري ليش ما يسأل عليه
ليش من تحولنه الهاي المنطقه كل أصدقاء رافع محد وصلنه
دائما اسأل نفسي!!!
ايمان _ لو ادري شعدها تختل بالغرفه وسد الباب موتتني هلياسمين
رحتلها للغرفه دفعت الباب حيل
ياسمين _جان الدفتر بيدي فزيت ورتبكت
شبيج متعرفين ادكين الباب
ايمان _ لا عيني منو كلج اني مثقفه مثلج وادك الباب…
شبيج لج ليش كمزتي من شفتيني
ياسمين _ بيدي الدفتر سديته وخليته بنص الكتب
جنت اكتب دروسي وانتي هجمتي عليه
ايمان _ ما خلصت هاي الدروس…..
التالي وياج ما تملين من الكعده بهلمهجومه كومي ساعديني المن اصير
ابتليت بيكم بلوه
خدامه طول النهار اركض
ياسمين _ كافي صياح اجيت شتردين
ايمان _ امشي اغسلي الطرمه ونظفي البيت
ياسمين _ توني جايه من المدرسه وتعبانه حتى غده ما متغديه كفيت ردان دشداشتي وطلعت اغسل بالطرمه
نظفته ورجعت للبيت
هم كنس ومسح ما خلصت الا اني والساعه ثلاثه
دخلت الغرفه بدلت دشداشتي التبللت
ونمت جفي على وجهي من التعب
شويه نمت رغم جوعانه وهم اجتني
دكت الباب حيل
كمزت من صوت الباب
ايمان _ شنو كل ما اجيج راح تكمزين
ياسمين _ جنت نايمه وانتي فلشتيها للباب
اشتردين مو كملت تنظيف
ايمان _ كومي اغسلي اماعين الغده
ياسمين _ لعد انتي شسوين ….؟؟؟
ايمان _ كومي فضيني شنو تحاسبيني
ابتسام _ دخلت تعبانه راجعه من المعمل
شبيج صوتج واصل السابع جار
ايمان _ باوعت رافع يخزر بيه
ماكو شي بس اريد ياسمين تغسل المواعين…
ايمان _ اجيت الرافع اريد أخذه يسبح
هو بسرعه صاح ياسمين….
رافع _ تعالي ياسمين اخذيني للحمام
ياسمين _ رفعته من الكرسي وكعدته بالحمام وطلعت
هو سبح وكمل صاح عليه ساعدته بالبس
وكعدته على الكرسي
ايمان جابت الاكل تغده هو وامي
ونام بالهول
من يوم تعاركو هو ينام بالهول ما يقبل ينام يمها
رافع _ يوميه الصبحيه احرك الكرسي
واروح يم ابو زين نفس عمري وخوش انسان
اقضي ويا وقتي سوالف
جنت اشتاق للسيد والاحمد بس حالي التغير خلاني ما اريد اسأل عليهم
ما احب احد يعطف عليه لو يساعدني
شفقه
من بعد شهرين قاطعت ايمان لا كلام ولا انام يمها ولا اسمح الها تساعدني مثل قبل
غسل وتغير ملابسي اني اقوم بيهن
عودت نفسي عندي أدين اساعد نفسي بيهن
اجتني الظهريه كان محد موجود وحاولت تراضيني
صديتها وتعاركت وياها
بس هيه ظلت تبجي وتشكي وتحاول
إلى أن كسرة خاطري وفكيت شويه عنها وتراجعت بقراري
رجعت انام بغرفتنه وهيه هم رجعت تهتم بيه
محمد _ رحت اليوم المدرسة ياسمين
وركنت بالشارع انتظر يخلص الدوام وتطلع
شويه وطلعو الطالبات
واني عيني تدورها بين الوجوه
إلى أن شفتها طلعت تتمشه نزلت من السياره ووكفت … من شافتني
ثكلت خطواتها تباوعلي
تمشيت بتجاها….هلو ياسمين
ياسمين _ ليش جاي
محمد _ اريد احجي وياج شويه
_ التفتت منا ومنا .. اشوف الطالبات يباعولي
احنه ما ابينه اي كلام
_ تره اني ابن خالتج وما يوم اذيتج
ماكو داعي تخافين مني
هن حجايتين ما أخرج
_ ظليت محتاره كلامه خجلني صح هو بي كل المساوء من صغره بس مجان يجي يمي ولا يوم اذاني
_ كول اسمعك
_ هيج بالشارع……؟؟؟
_ لعد وين تريد…..!!!
_ تعالي اروح نكعد بمكان
_ انته شتكول شنو اروح ابمكان اني صوجي واكفه واحجي وياك
وتحركت اريد امشي
_ يله محروح اي مكان اوكفي
زين ممكن نصعد بالسياره بس نكعد عيب بالشارع
_ التفت حواليه ماكو كلها مشت
شلون يربي
وافقت كعدت بالكرسي البصفه وعيني تراقبه…نترت بي
بسرعه تره اتاخرت….!!!
_ لحظه …دخل ايده بجيبه وطلع علبه
هاي الج…..
_ شنو هاي….؟؟؟
_ فتحها كلاده ذهب هاي اشتريتها الج
_ امبينه غاليه
_ ابتسم فرحان غاليه بس ما تغلى عليح
_ خزرته… اني…ما اكدر اخذها
محمد _ ليش تخافين من رافع …ضميها لا تخلي يشوفها
_ لا رافع ماله دخل اني ما ريدها
_ بين عليه انزعج ….
انتي ليش تكرهيني…. اني رايدج انتي ليش هيج تعامليني
_ واني ما أريدك …..!!!! شنو كوه تريدني اقبل بيك
_ باوعلي بحقد احجيلي الصدك منو تحبين
_ ما احب احد هسه ارتاحيت
جنت متردده احجي بس ما ادري شنو خلاني اكوله يمكن ردت اخلص منه
محمد انته منين اجيب هاي الفلوس…
سياره وكلاده ذهب
وتصرف بدون وجع كلب
هو راتبك اشكد….لو صدك مثل ما يكول رافع ….وسكتت
_ بسرعه وجها تغير ونكلب شيطان
شنو يكول رافع ابوگ مو…
اريد اعرف شنو احد مخلي وصي عليه
ليش دايما يحجي عليه
ليش ما يحتار بحاله خلك واحد مگرم
لا شغله ولا مشغله موزين بعدها اختي
ويا….
_ ما اسمحلك تحجي على اخويه…
قبل ما اكمل …انهد بيه
_ تسمحين واله ما تسمحين عبالي انتي هم آدميه طلعتي مثله انتو مو وجه نعمه
بس اذا ما اكسر خشمكم اني ما اطلع محمد
_ خفت من عصبيته كانت ايدي على يدة الباب….فتحتها
لزم ايدي……!!! خفت بالبدايه…بعدين
نترتها ونزلت
بعد اذا جيتني للمدرسه اكول الرافع
_ يطبج مرض انتي ورافع على اساس اشكد اخاف منه
_ شوف هاي خلاقك الحقيقيه بينت
ضربت الباب حيل ومشيت…
هو فر السياره بسرعه وفات كلش بصفي
شحطها إلى درجه وكعت بالكاع
باوعت الشارع فارغ والطالبات كلها رايحه همزين محد شافني
وكفت ونكتت صدريتي من التراب
ومشيت والعبره بصدري
وصلت البيت …باوعت ايمان بالمطبخ
رحت الغرفتي بدلت ملابسي وطلعت انظف ما ريد مشاكل ويه ايمان
دك تليفونها …
_ الو حمودي هله يبعد اختك
وسكتت تسمعله وتباوعلي وتخزر بيه
_ كملت ودخلت غرفتي اكيد اتصل عليها حتى يحجيلها الصار بينه
ايمان حيه اخاف منها اكثر من محمد
من يومها ماتحبني وقررت اكول الامي عليه
رجعت امي العصر تعبانه رحت جبتلها الاكل بالصينية وخليته كبالها وكعدت
ابتسام _ شبيج اليوم مو على بعضج
ياسمين _ يمه محمد اجاني للمدرسه من حليت
ابتسام _ مجرد اسم محمد ينذكر كدامي اخاف على ياسمين لان اعرفه واحد حرامي وصاقط مثل ابو
اسمع واني اعصابي تفور هذا اذا محد يوكفه عد حده راح يظل يلزم البنتي الطريق
ما رتاحيت طلعت البيت راجحه
دكيت الباب
فتحته راجحه
دخلت عصبيه
راجحه _ جنج تعبانه شنو الجابج
ابتسام _ جابني محمد وينه اريده
راجحه _ ذاك هوه ابغرفته شمسوي……؟؟؟؟
_ دخلت كبل عليه دفعت الباب هو تفاجأ بيه
اذا ما تبطل من ياسمين والله يامحمد اندمك
محمد _ وكفت واني شمسويلها
_ يوم تنطيها مبايل يوم ذهب لو تروحلها للدوام شتريد منها
ما نريدك ما ننطيك بطل من بنتي
تره لحد الان ما كايله الرافع …..
_ روحي كوليله
هو منو رافع شنو خايف منه
خل يحتار بنفسه واحد مشلول صكط مسوي فاندام
وهو مصدگ نفسه
ماتحملت يحجي على رافع نزعت نعالي وضربته بي…
_ ولك انته الصكط ياحرامي…..
تروح فدوه لاسم ابني….
راجحه سحبتني منه
بعد ما مسحت بي الكاع وهددته اشتكي عليه
رجعت للبيت مهدود حيلي رحت الغرفتي نمت ما اريد رافع يشوفني ويسألني….
ايمان _ معقوله حتى الكلاده ما اخذته
وجه فكر مو وجه نعمه
عوفها والله اجيبلك احسن بنيه وراح تشوف
محمد _ ولج اني اذا أأشر اجيبلي عشره شنو محتاجلها بس اني متأكد عدها واحد تحبه
ايمان _ ياسمين….!!!! لا ما اضن ما تطلع من البيت بس للمدرسه وحابسه نفسها بالغرفه بعد منين يجي هذا التحبه
محمد _ شكد غشيمه لعد اني متأكد عدها واحد دوري وراها
حطيت راسي براس رافع ولج يستنكفون مني اشلون باقيه انتي ويا ما ادري
ايمان _ شسوي هاي قسمتي بعد
محمد _ الكلاده الج بس شوفيلي اشعدها ومقبلت بيه…. بلكت تلكين مبايل شي…
ايمان _
اذكرت من دخلت عليها كم مره فزت
جانت تكتب
معقوله عدها مبايل ….
ما جنت اكدر ادخل غرفتها
انتظرت من راحت للمدرسه دخلت
اباوع منين ابدي
فتحت الكنتور وفتشت ملابسها وغراضها كلهن مالكيت شي دورت جوه فراشها ماكو
رجعت على كتبها مصفطات كلبتهن
ماكو شي
بالصدفه شلت المخده اريد اعدل الفراش تخربط
حسيت اكو شي بداخلها
تلمستها بيها دفتر
طلعته مكتوب على اول صفحه بي رسائل شوق
اخذني الفضول وفتحته
شنو هاي…..!!!! كل هذا يطلع منج يا ياسمين
واني ادافعلها واكول فقيره والله محمد
طلع يفتهم عرفها
اخذت الدفتر وطلعت
اتصلت بمحمد
_ والله يا محمد طلعت داهيه ولك اشلون عرفتها
_ لكيتي مبايل مو…..!!!!!
_ لا احسن من المبايل اعترافات بخط ايدها
_ شنو رسايل مكاتيب شكد عتك ذولي
_ ولك دفتر كاتبه كلشي بي
_ والله…..!!!!! هو هذا الاريده عفيه عليج امونه
_ أمونه…ايمان مو مهم الكلاده وانطيك الدفتر
_ هههه لا تخافين تعالي وجيبي وياج
وحلال عليج الكلاده
اخذت الدفتر ونطيته لمحمد
_ فتحت الدفتر اكلب بي واقرأ….
إيمان _ عليمن ادور…
_ اريد اسمه…. لج هاي ياسمين شكد ذكيه كل هذا كاتبته واسمه ماكو
_ وانته شسوي باسمه… المهم شراح سوي…….!!!!
_ بعدني افكر
_ اني اكول تعوفها احسن متفيدك
_ مو قبل ما اواجها واعرف منو هذا العينتين التحبه مو بس
يبيعون براسي مثاليات هيه واخوها…..
اريد منج شغله وحده بس
_ شنو هيه
_ أريد اشوفها وحدنه
_ اشلون يعني وحدكم
_ اريد احجي وياها اهددها بالدفتر ماكو افضحها
واخذها واكسر خشمها وبالكوه
_ اشلون….. ولك بالگوه
_ هاي اشلون عوفيها عليه ….!!!
وسوي مثل ما كلتلج شوفيلي وقت لا رافع ولا خالتي موجودين بالبيت بس هيه
_ تدري بديت اخاف منك
_ لاتخافين اريد احجي وياها شويه
_ روحلها للمدرسه وحاجيه اخاف رافع يعرف
وتوكع المصيبه براسي
_ وين بالشارع اگدر الزمها تصيح وتفضحني
_ امونه الحلوه انتظر منج أتصال زين….
_ لك انته شيطان…. وبعد لا تسميني امونه فتهمت…..!!!!
محمد _ والله يلوكلج امونه هههههه
ايمان _ لعد شوف منو اليوكفلك بعد
محمد _ لا يمعوده ايمان ونص همين
لا تزعلين
هسه اشوكت انفذ
ايمان _ انتظر مني تلفون لازم يفرغ البيت اني ادري شعاجبك بيها هلصفره
محمد _ بس سؤال أمونه لا لا قصدي ايمان هههههه
ايمان _ گووووول …
محمد _ انتي ليش تكرهيها هيه ما مأذيتج
ايمان _ ولك من جانت هلكدها يفضلوها عليه خصوصا رافع عده لا راحت ولا اجت هلياسمين
ورم كلبي منهم
وتالي طلعو يستنكفون يطوها الك
ابتسام _
كومي المدرستج ياسمين
ياسمين _ يمه ما عدنه شي اليوم اغيب
_ لعد اني اخذ رافع واروح عدنه مراجعه بالمستشفى
_ طلعت امي ورافع وايمان بغرفتها وولد رافع بالمدرسه
رجعت للفراش انام ….شويه
سمعت صوت باب غرفتي ينفتح لان حديد ويطلع صوت
ظليت بفراشي كل ضني ايمان
لحظات بين النايمه والكاعده حسيت
احد قريب عليه…
كشفت الغطى….وتفاجأ
محمد…
هاي شسوي بغرفتي …اطلع بره
_ ارسمت على وجهه ابتسامه صفره
مد ايده لزم خصلات شعري
_ ضربت ايده والخوف تملكني صحت
ايمان…
_ لا تصيحين وتتعبين محد بالبيت بس اني وانتي…
_ شنو…….!!!! صحت بصوت خايف يرجف
ايمان الحكيلي…
ردت ابين قويه
اطلع بر تره والله اگول الرافع عليك
_ ههههه وكعدت على الفراش سحبت الجرجف المغطيها بقوه جانت لابسه دشداشه ربع ردن بيضه ونقشه بيها لعابات مقسمه جسمه كل تفاصيلها مخصره وواضحه
_ نزلت دموعي واني اشوفه ياكلني بنظراته
طلع من جيبه دفتري مطبكه
ورفعه بوجهي….
_ طلعتي مو هينه …منو هذا التحبي
ومنتظرته … عافج مو ..
_ هذا دفتري منين جبته…..!!! منو سمحلك….
_ قبل ما تكمل ضربتها راشدي
صار شكد اتوسل اجيتج بكل درب وانتي تتكبرين عليه
واخوج المعوق يذل بيه يستنكف يناسبني
دموعي نزلت خايفه حاصرني على سريري يحجي ويتلذذ بنظراته حسيت جاي ينتقم
_ اذا يدري بيك هنا رافع يموتك…
مد ايده يتلمس خدي
_ بعدج تهددين برافع ههههه
_ نفرت ايده من وجهي …وخر ايدك
_ تدرين وانتي تبجين احلى يربي شنو هلكيمر…
_ بده يتمادى بلمساته بقرف واني اقاومه باديه واضربه صرخت….!!!
خله ايده على حلكي خنكني واني اقاومه مديت ايدي الركبته ونبتت اضافري بالجلد حسيت شلعت الجلد مال
ركبته
_ جرحتني باضافرها ماتملكت نفسي
ضربتها على راسها بايدي مره مرتين
فقدت
_ غبت عن الوعي اشويه ما عندي اي مقاومه حتى صوتي راح
وكأنه بحلم
شك دشداشتي وتلمس جسمي بشراها
وسحبني بالكاع
وذبحني….اي حسيت روحي انسحبت مني
من اخذ أغلى شي عندي…