رواية انكسار الياسمين الفصل التاسع والثلاثون 39 بقلم أمل مهدي
رواية انكسار الياسمين الجزء التاسع والثلاثون
رواية انكسار الياسمين البارت التاسع والثلاثون
رواية انكسار الياسمين الحلقة التاسعة والثلاثون
خسرانه رجعت من هذيج امالها
جرحو احساس السولفولي احوالها
يكولون هسه عيونها وذيج الجفون
الدمع بيهن كلشي ما خلالها
————————–
سيدعلي –
نزلوا الاكل على الميز وكلنه التمينه
ناكل واني فكري كله يمها اضحك واركان ينطيني بسامير وابو اسد
يغمزله ويدفعه عليه
اليوم ناصبين عليه شيخلصها وياك أركان…
– اليوم ابات يمك ما اروح
-شعدك يمي كمل عشاك وراويني عرض جتافك
-لا ما اروح مو بالحيف اعوف خوي بليلته منو ينغص عليك
قصدي منو يدير باله عليك
– انعل يومك إذا بقيت ابيتك بره البستان
بين شقانه وضحكنه دگ مبايل أركان
اركان -هذا الحارس بوكالة الشورجه شيريد
سيدعلي – رد وشوف شعنده
أركان – الو شنو… الوكاله تحترگ…………..!!!!
سيدعلي – وگفت وأخذت الموبايل من ايد أركان وصحت
منين اجه الحريق… اتصل بالاطفائيه اني جايك
فزعنه نركض للسيارات الحارس فتح الباب و طلعنه بقى بس ابو أركان رجال جبير
سيدعلي _ ليث راد يصعد ويانه يجي صحت بي
ابقى يم عماتك…
وطلعت بكل سرعتي لو يرهم اطير طرت اسوق وبيدي المبايل
مره ادگ على الاطفائيه مره على الحارس
اقل الساعه وصلت… لكيت سيارات الاطفائيه ثلاثه شغاله
الوكاله باديه النار من الامام وجاره جوه منين ادخل وانقذ البضاعه اباوع النار تسعر قماش وأكثرها بي نايلون التهمته النار
حاويتين ترست المخزن بيهن بس وحده وديتها الفرع الكاظميه فلوسي السيوله كلها حولتها بضاعه
احس النار بگلبي مهما يكون هذا تعبي اذكرت الصوره كانت النار بعد مترين عنها
ركضت دخلت والكل يصيح ورايه ركض ورايه أركان
رفعتها وسحبتها انگطع الخيط ويه طلعتي وگعن عليه طولين
مشتعله بيهن النار…
تلگيتهن بأيدي حسيت بالنار ووگعت الصوره اجه أركان وبرجله
دفرهن عني اخذت الصوره و طلعنه اديا ثنينهن بيهن حروق
واني ما حاس…. احس النار تاكل بيه مو بالبضاعه
منو ممكن يحرگهن وليش شعندي ويه الناس
التجار البصفي بدت تخلي بضاعتهم اخاف النار توصلهم همزين
الطوابق الفوگي بعدها ما كامله…. ومحد ساكنها
واگف اراقب حلالي يتحول إلى رماد لان ماكو فايده النار وصلت الكل البضاعة بساعه وحده وصار الهدف اخماد النيران ومنعها تتوسع وتوصل المحلات الباقيه كلمتين بس اردد بيهن ظليت
الصبر يارب
ابو أسد _ ماكو فايده من وجودك امشي للمستشفى وصلت
الاسعاف
سيدعلي _………!!!!
مابيه حيل حتى اجاوب ثلاث ساعات
موبايلي ما سكت واني ما ارد… على گد ما جنت فرحان
حزنت والقهر كسرنفسي
الضابط _ راح اسوي كشف يجوز الحريق مفتعل او مس كهربائي
سيدعلي _ قبل متكشف ااني اتهم ولد عمي همه الحركو الوكاله
الضابط _ بيناتكم مشاكل تهديد
سيدعلي _ هددوني مباشر بوجهي والبارحه جانو هنا جايين عليه
الضابط _ اكو شهود احد شافهم
أركان _ اي اني وسايق تريله نعرفه
الضابط _ تمام احنه راح نعمل اللازم… روح انته بالاسعاف
عالج الحروق البيدك
ياسمين –
اسمعهم هوسه صارو تقربت من الباب اريد اسمع ما ميزت بس كلمة شكو…شكو
ووحده منعهم صرخت….
فتحت الباب وطلعت… تلگاني علاوي خايف كانه كان منتظر افتح الباب… حضنته اباوع الباب مفتوح وليث وابو أركان واكفين بالطرمه والسيارات ماكو
والسيد والباقين محد بيهم موجود
آمنه _ الله يستر شحرگها الوكاله
طيبه _ بيدها الموبايل ادك وتحجي ويه ابو اسد
بعدهم ما واصلين
اميمه _ تبجي يمه علاوي ما تهنيت سوده عليه راح حلالك
اني وبدلتي تقربت يمها وعلاوي بيدي كعدت يمها
شكو اصاير….
آلاء _ التفتت تخزر بيه ماسمعتي الوكاله احترگت رجلج خضره
على اخونه…..
ياسمين _ التفتت متفاجأه منها …. شأرد واگول
نسرين _ شنو هلحجي آلاء عيب تحجين هيج هيه شعليها
طيبه _ تحجي ويه ابو أسد تساله عن الحريق
وآمنه تهون على امها والجهال كلها كاعدين يستمعون الكل مترقب الاخبار…. وباله مشغول
ياسمين _
انسحبت بهدوء انزع البدله شكلي نشاز وهمه بهلوضع دخلت الغرفه اني وعلاوي نزعت البدله واني اذكره يحجي بلهفه لا تبدلين عوفي
كلشي على ايدي
نزلت دموعي يمكن كلامها صح والا الا بهذه الليله يصير الحريق
طلع حظك مثل حظي صفطت البدله وعلگتها بالكنتور لان اشتراها اليه ما قبل ااجر وأخذت كلينكس وشويه كريم ومسحت المكياج وشعري گوه فكيته ومشطته وبدلت ملابس علاوي لبسته تراك وظليت بالغرفه بيدي الموبايل ادگ على السيد ما يرد
وعلاوي راسه على رجلي غفه سحبته على الفراش وغطيته
گلت اطلع وياهم عيب
فتحت الباب غرفتي گبال الصاله كلهم التفتو عليه ما ادري حسيت الكل يتهمني بالصار او جانو يحجون بسيرتي… ما ادري اني تأثرت بحجي آلاء
اميمه _ تعالي يمه تعالي انتي هم ما تهنيتي وين جانت لك علاوي
يمه كلشي فدوه بس هو سالم…. تحجي ولتفتت عليه
روحي اكليلج لگمه هسه يجي علاوي انشالله بردا وسلاما
بجاه الحبيب محمد….
ياسمين _ انشالله
اميمه _ نسرين خابري رجلج شوفي طفو النار لو لا
نسرين _ يمه ما ينطون حجي يگول من نجي نحجي
الجهال نامت اخذوهم لفراشهم واحنه كلنه كاعدين ننتظر
آمنه _ يمه گومي لفراشج راح تتخربطين من يجون اكعدج
اميمه _ ما انام اذا ما اشوف علاوي بعيني همه ليش ما يحجون
اخاف احد تاذه بيهم
آمنه يعني خمس ساعات وين صارو غير يطمنونه
نكك
سمعنه الباب انفتحت باوعت الساعه ثلاثه ونص كلهم راحو بره
ابو أسد واخوان أركان ثنين والفلاح رجعو وياهم سيارة اركان
اميمه لبست عباتي ووگفت ونسرين وطيبه واكفات بس آلاء وآمنه
ظلن وره الباب يسمعون
واني واگفه هم اشويه عنهم
اميمه _ وين علاوي ليش ما رجع وياكم
ابو أسد _ انشالله يجي ورانه…
اميمه _ احجيلي الصدگ بداعت جهالك ابني صار بي شي گلبي ما
مطمن
ابو أسد _ ظل يتنهد حجيه كله فدوه الكم المال يروح ويجي المهم
انتو سالمين
اميمه _ ليش اتيهني بالحجي اني سالتك على المال احنه كلنه نروح
فده العلاوي مو بس المال احجيلي وينننه
نسرين _ گول تره گلبنه نار وامي متسكت اذا متعرف
ابو أسد _ والله مابي شي مجرد حروق بسيطه بايده ونشالله ساعه
ويجي
اميمه _ يمه علاوي اخذوني آله اريد اشوفه صرخت تبجي وكلنه
بجتنه وياها
ابو أسد اشوفه اخذ طيبه بره ما ادري شنو راد منها…. دخلت وجها ما يتفسر للغرفه مالتي بدون حتى ما تحجي وياي…. تبعتها… وورايه دخلت نسرين
ياسمين _ احجيلي الصدك السيد متاذي……؟؟؟؟
طيبه _ لا بس اديه وضغطا كلش صاعد
نسرين _ لعد ليش ضايجه شكو
طيبه _ ولد عمنه اسم الله طلعو همه الحارگين الوكاله
نسرين _ لطمت على خدها عزا بعينهم انشالله
طيبه _ اسكتي لا تحجين گدام آمنه وآلاء لان عدهن امل يرجعن
نسرين _ يرجعن بعد ما حرگو حلالنه الا اصخم وجوهن
آلاء _ دخلت علينه غفل… شكو اشعدجن تشاورن صاير شي….
طيبه _ ماكو شي اخذ هدوم العلاوي
آلاء _ رجلج مو گال ساعه ويجي……؟؟؟
طيبه _ هدومه كلها وسخ هو رايد هدوم
ابو أسد اخذ الهدوم وراح بعد ما قنع خالتي يجيبه ويجي..
كعدت بغرفتي لوحدي اشكي لدموعي مدري دموعي تشكيلي
بيدي الموبايل اتصلت
أركان _ هله اخيتي
ياسمين _ عرفته أركان… وين السيد اريد احاجي
أركان _ والله نايم… انطو مسكن
ياسمين _ افتح كامره اشوفه الله يخليك
أركان _ تنهد وفتح الكامري عليه نايم وايديا ملفلفه من الكف
للعكس متحملت انهاريت ابجي بخنگ ما اريد يسمعون
بعدها انسد الاتصال
بديت أأمن اني فگرته بليله وحده صحته وحلاله راح اني
شؤم على كل واحد يقترب مني طلع الفجر واني بمكاني
غفيت
ثاني يوم هم ما طلع من المستشفى مو بسبب الحروق لا بسبب الضغط
مالته يقره ٢٠ وفوگ ويحاولون ينزلو اخاف ينضرب جلطه
ابو أسد اخذ بس خالتي تشوفه يگول مگلوبه الشورجه عليه
ناس طالعه وناس جايه
وتفقو يسون حملة تبرعات ويجمعو له كم مليون بس هو ما قبل گال عوضي على الله
للعصر اجه اتصال من زينب
فتحت الخط نسرين كل ضنها تتصل على اولادها
تبجي وتصيح اجت الشرطه وأخذت مهيمن ومصطفى هو مو طلگني وزوج ليش يتهم اخواني ويشتكي عليهم الله لايوفقه
ولا يهني ولا يربحه ظلت تدعي عليه
نسرين تعاركت وياها اخوانج حرگو تعبه وجد عمره وهم ظلت
تدعي وتحجي
آمنه وآلاء عرفو السيد مشتكي وتاهمهم
ما صدگن وخصوصا آلاء انجنت امبينه تحبه الرجلها
آمنه _ اني اعرفه المهيمن رغم كل المساوء البي ما يجرأ على هاي
الأفعال ولا يسويها
نسرين _ قبل ليله جايين للوكاله وشايفين أركان ينزل بالبضاعه
آلاء _ گوه تردون تلبسوها براسهم عيب عليه أركان يحجي عليهَم
ظلن وحده اجاوب الثانيه ودخلت طيبه بيناتهن تهديهن
اشو آلاء طلعت متحمله اشلون أركان يحبه السيد وقريب منه
گلتله مصطفى مو مثل رجلج لوگي لازگله وين ما يروح….
نسرين ردت عليها احسن من رجلج الفاسد يوميه ويه وحده
تالي نزل ضره عليج
صاحت عليهم آمنه رزلتهن وسكتتهن لحظات واشوف آلاء
هجمت عليه بالحجي كله منج من خطبج اخونه لليوم ما
ارتاحينه منين اجيتينه فرقتي العمام وهجمتي بيته
وهجمتي بيوتنه زينب اطلگت من وراج واحنه تطلگنه
ما شفنه الخير من فالج گبلنه……
آمنه صاحت عليها اسكتها أسمع علاوي صرخ اباوع غيث
نايم عليه ودك على وجها
رگضت عليه اني ونسرين گوه فكينا من ايده
اباوع وجها احمر
ومخرمش ويبجي خايف ومهضوم لان عمره ما احد ضاربه
حضنته ودموعي نزلت حسيت غريبه بنصهم وإذا صار شي للسيد ميرحمني هسه بيناتهم خوات ووحد تهد على الثانيه
اخذت علاوي ودخلت غرفتي محتاره بأمري اتصلت على رقمه رد عليه أركان گال هوسه يمه ما اكدر افتح كامره لا تخافين يحجي وواعي بس ضغطه بعده عالي والطبيب ما يقبل يطلعه الا يتأكد
ضغطه طبيعي بلكت بلليل يكدر يحجي وياج
بجي وقهر واكل ما ماكله من البارحه
وكل اشويه اسمع اصير هوسه آلاء
انجنت بيدها الموبايل وكلشويه تتصل بزينب صارن حبايب من تالي
صارت الساعه ثمانيه ومحد اجانه
ونتصل محد يجاوب
طلعت للمطبخ اريد اشوف شعدهم
اعشي علاوي كعدته يمي اشوف ياسمين اجتي يمي
– جوعانه حبيبتي
-اي
– اكعدي هسه اعشيج ويه علاوي
دخلو بنات آلاء وراهم ولد نسرين وطيبه احتلو الكراسي كلها
– حبايبي ما متعشين بعدكم
كلهم ردو لا
شفت الاكل مال قبل يوم كله موجود بالثلاجه والمجمده طلعت الگص كله حميته والمقبلات والسلطات كلها وترست الميز اخذت طلعت بصينيه ازغيره اليث وديته الا بره
رحت الغرفه مالتهن دكيت الباب وطبيت
أمنه نايمه وآلاء تحجي بالمبايل
ونسرين وطيبه يسولفن
– تعالو تعشو
نسرين – حتى انشغلنه ما سوينه عشه
طيبه _ هو منو مشتهي ياگل
ياسمين _ اخذت لفه وگلاص جاي ووكفت على صفحه اكل
كملو اكل واني نظفت المطبخ ويه الخادمه الافريقيه مالتهم وأخذت علاوي ودخلت غرفتي
ساعه وسمعت اصواتهن يبجن ويصيحن ياربي ارحم بحاله
يدعت ويبجن طلعت ارگض
_ بدون ما اسال عرفت حالته متأزمه ومحولي للعنايه المركزه
لان طيبه بيدها الموبايل وتحجي ويه ابو أسد
كلنه انخبصنه بجي ودعاء
شويه وابو أسد رجع خالتي متخربطه ومنطيها علاج گال ترتاح
بالبيت احنه محتارين بالسيد
من شفت خالتي بده الخوف والياس يتسلل الداخلي وحسيت مراح اشوفه بعد
فرشت السجاده صليت ركعتين هديتها لأهل البيت وتوسلت بيهم عند الله بدموع وخشوع وگلب مكسور يتيمه ماعندي غير الله وهو سندني وغير كل حياتي املي هو ووجودي لا تكسرني بي
هلمره ما اگدر اعيش ما اتحمل خسرت كل الحبيتهم وحبوني كافي
تعبت واني احارب الدنيه
بجيت بگلب مفجوع وفاقد هاي اللحظات مرت عليه هوايه كل ما أسند روحي واگوم تجيني ضربه بس هلمره غير هاي الضربه حاسه مراح اگدر اكمل واعيش…..
هن اسمعهن يبجن ويدعن وخافن أكثر من حالة امهن
الاتصالات ما بطلت ناس تتصل بناس والحجي كل اشويه شكل
يحجون…
بعد اني ما طلعت كعدت اصلي واسبح عسى رب العالمين يگومه اليه بسلامه
انفتحت الباب ودخلت عليه آلاء وحالتها حاله ونهدت بيه الماگالته
أصبح هسه كملته
آلاء _ شايفه لو علي مات ومصطفى انحبس الا اهجج بليله ظلمه كل هذا الديصير من جوه راسج…. لو عندج ذرة كرامه لا تبقين
ارجعي منين ما اجيتي
خواتها يسحبوها ويسكتنها…. وههيه مدري منو مهيجها عليه
ياسمين _ اطلع بس يجي الصبح… بس سؤال انتي مقهوره على
رجلج لو على اخوج بس اگول ياحيف اخوج حنين
وجان شايل همج انتي بالذات
رادت تتعارك…
اخذتها آمنه بره الغرفه اجتني نسرين
نسرين _ هاي من سمعت السيد بالعنايه انجنت خافت على
مصطفى يظل محبوس حقيره طلعت تحجي ويا
بالموبايل وشگد علي نبهه مانتواصل وياهم
لاتزعلين معليج بيها هذا بيت رجلج
ياسمين _ سكتت بس بگلبي اغلى ارجع البيتنه احسن ومن يگوم السيد بالسلامه يصير خير
ما نمت ليلتي بس افكر اباجر اتصلت باركان
الو
أركان _ اهلا أخيتي اعذريني ما ارد عليج ناس هواي تجي
ونشغلت
ياسمين _ ميهم بشرني اشلون صار…
أركان _ بعده والله اذا ظل باجر هاي حالته احجزله على اربيل
اني وآبو أسد ناخذه
_ افتح كامره اشوفه………..؟؟؟
_ يمه أطباء ثنين والممرضين يغسلون أيدي ويعلجوهن
رحت اطمن على خالتي نسرين گالت نايمه رجعت مباقي شي على الفجر اصلي واطلع
شويه تمددت يم علاوي غفيت فزيت الشمس طالعه
كعدت علاوي بدلتله واني لبست العبايه والشال وطلعت البيت هادئ
الكل نايمين
بس الخادمه الافريقيه كاعد اتنظف
وصلت للباب مقفول بزنجيل بعدني احركها وطلع الفلاح
_ ها عمي خير
_ عمو افتحلي الباب
_ وين رايحه عمي بهلصبح شيمشيج للشارع اخاف ما تلگين سياره
_ لا انشالله الكه بس افتحلي الباب
_ تاني اخابر ولد عرف صاحب تكسي يوصلج
_ ياريت اذا ثقه وتعرفه بعد احسن
_طلع مبايله من جيبه من هذا القديم تصفح الأسماء وتصل
حمزه عمي اشلونك
تطلع كروه…ضروري عمي جماعة سيد علي
يله انتظرك لا تتأخر…. خوش
ياسمين _ كعدت انتظره على الدرجات مال الطرمه وعلاوي يغفي
ما شابع نوم همزين ما نقلته ما اعرف وضعي شنو
صافنه ومحتاره اذكرت اني حتى ما اتصلت برافع وكلتله
على الصار…
يله هو اني رايحه اله بنفسي
الفلاح _ يله عمي وصل التكسي هذا الولد صاحبنه يعرفه السيد
ياسمين _ تشكرت منه وصعدت وطلعنه الطريق اقل الساعه
وصلنه..
وگفت السياره بالباب الشارع فارغ نزلت وگوه اخذ مني كروه
السايق لان من بيت السيد
علاوي فرح لان رجعنه ما ارتاح ابد هناك
دگيت الباب مره مرتين واجاني صوت رضى
رضى _ اي جيت… فتح الباب بعيونه النوم تفاجأ عمه……..!!!
شنو حلمانه بينه
ياسمين _ شتاقيتلكم ميصير
علاوي حضن رضى يضحك
رضى _ انته هم رجعت ولك عبالي اخلص منك… يشاقه ويا
دخلت من باب المطبخ كلهم كاعدين يتريگون من شافوني تفاجأو
ياسمين _ صباح الخير…. ردو بتسائل. .. صباح الخير
راجحه _ خير يمه ولج عروس اشجابج….
ياسمين _ اول ما تلاگت عيني بعينه ما گدرت اتحمل نزلت دموعي
رافع _ عاقد حاجه منتظر مني احجي من شافني بجيت فتح اديي
ثنينهن واخذني بحضنه ساكت
واني بجيت بشهگه احس حسره بصدري كاتمه على انفاسي
وطلعتها نحظنه
إيمان _ ما تحجين شكو مثل الطفله نايمه بحضنه وتبجين
رافع _ سحبني بأيده وكعدني گدامه احجي…..
ياسمين _ احترگت الوكاله مالت السيد وهو هسه بالمستشفى
رافع _ شنو شوكت
ياسمين _ قبل يومين
رجحه _ يبو على حضج ما تهنيتي
رافع _ انخبص بسرعه رضى اطلع جيبلي تكسي… گومي ايمان
ساعديني ابدل
وطلع مبايله يتصل…..
_الو أحمد…. اشلونك يابا… تدري بالسيد بالمستشفى
والله عبالي تدري وما گايلي
المهم اني هسه رايحه نلتقي هناك
ياسمين _ اروح وياك اريد اشوفه
رافع _ لا بويه اشوف الوضع شنو يالله اخذج
امييمه _
كعدت حسيت الدوخه رايحه مني وشويه احسن
آمنه _ اكلي سويتلج شوربه
اميمه _مرت اخوج فگدتنها وفگدتن وليدها اليتيم
نسرين _ اي يمه اكلو البارحه وهسه بغرفتها….
اميمه _ روحي شوفيها اذا كاعده اريدها
نسرين _ دگيت الباب ودخلت الغرفه مرتبه ومحد بيها طلعت
ادورها ماكو بيدي ألمبايل اتصلت عليها ياسمين امي
تريدج… كل ضني بالحديقه… تفاجأت من كالتلي هي
ابيت اهلها
اشلون تطلعين بدون علم احد منو وداج
ياسمين _ اعذريني بعد حجي آلاء ما أگدر ابقى وانشالله علي
يصير زين ونحجي
نسرين _ وامي اشلون
ياسمين _ سلميلي عليها وفهميها بطريقتج
نسرين _ اجيت آلامي ومحتاره شحجي
اميمه _ ها وين ياسمين…….!!!!
نسرين _ باوعت الآمنه ورجعت حجيت… يمه نسرين رجعت ابيت
اخوها
اميمه _ جانت تاكل شوربه تركت الخاشوگه ولتفتت تباوعلنه وحده
وحده
ليش منو وياها ليكون سمعتها حجي…. سكتنه ما نريد نقهرها
آلاء _ اني تعاركت وياها
اميمه _ عقدت حاجبها مستفسره ليش….
آلاء _ يعني كل الصار وتسألين ليش انهجمت بيوتنه وهسه ابو
جهالي انحبس وعلي بالمستشفى
اميمه _ وهيه ياهو مالتها شمسويه تحمليها ذنب بنات وولد عمج
العوجان
تدرين البارحه اخوج مريض وبس يوصيني بيها وبوليدها
اليتيم
ماعدج خوف من الله اشلون انتي بت سيد حسين الي العالم
كلها تحلف باخلاقه
هسه لو رجع وسألني شجاوبه اگله خواتك هججنها ولجن
عروس وما تهنت بعرسها هيه واخوجن
نسرين _ يمه مو خواته آلاء بس احنه معلينه
أميمه _ وانتن اشلون ترضلها… خافت على ابو النسوان بعدها
اتحن اله
آلاء _ ابو نسوان اي بس يحرگ الوكاله ما اصدگ متاكده
مو هو ولا مهيمن مو همه ليش يتهمهم علىي
رافع _ وصلت المستشفى اهليه دخلنه اني ورضى
سالنه گالو بالطابق الثاني… صعدنه صار بوجهي سيد اركان
أركان _ اهلا ابو حسن تفضل
رافع _ اقتربت من الردها مو العنايه المركزه دخلت كاعد على
السرير ويمه احمد وثنين ما اعرفهم
حرت اشلون اسلم عليه واديا ملفوفات ثنينهن بس هو
ابتسم وبادر مد ايده الكفه سالم بيها سلم عليه
أشلونك هسه
سيد علي _ زين ابو حسن كلشي راح احترك
رافع _ فدوه الك بس انت گوملنه بالسلامه وكلشي يرجع
سيدعلي _ هز راسه مأيد ظل مركز يباوعلى حسيت يريد يسالني
على ياسمين بس زحمه من الكاعدين
ساعه وطلعو جماعته الثنين بقى بس احمد…
سيدعلي _ اشلونها ياسمين
رافع _ والله حالتها حاله دخلت علينه من الصبح تبجي
ورادت تجي وياي بس اني ما قبلت
سيدعلي _ ياسمين شسوي يمكم
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
