رواية انتقام شيطاني الفصل التاسع 9 بقلم هنا عادل
رواية انتقام شيطاني الجزء التاسع
رواية انتقام شيطاني البارت التاسع
رواية انتقام شيطاني الحلقة التاسعة
كلهم نظرهم اتوجه لجمال
لأن من وجهة نظرهم محصلش منه
اللى يوصل جو انه يهاجمه بالشكل ده
جمال بمنتهى الهدوء.لاء مش معقول يا دكتور
هو انت الصدمة اثرت على قواك العقلية للدرجة دى
بتدور على حد تحمله نتيجة اخطائك
جو بأنفعال.انا مش مجنون يا جمال
وانت عارف ومتأكد انى مش مجنون
ولا بتجنى على حد علشان احمله اى مسؤلية
بالعكس
انا قولت انى على اتم استعداد لأى مسألة واى عقاب
لكن انت اللى رافض تخلينا نخرج من هنا
انت اللى ورا كل اللى بيحصل
انا متأكد
معرفتك الغريبة بالمكان ده
بتأكدلى احساسى
جمال بنفس الهدوء.هو انت شايف ان المنظر اللى قدامنا ده
يتحمل كل اللى انت بتقوله
واحدة مقتولة فوق فى اوضة
والتانية مقتولة ومرمية تحت رجلينا
ومحدش عارف الدور الجاى على مين
وجاى تقول ان انا السبب
خلاص اثبت
بس اتمنى ان انت تحل الوضع اللى احنا فيه ده
وبعد كده لو قدرت تلاقى حاجة تثبتها
اتمنى ده يحصل
نايا.احنا مش عايزين اى حاجة دلوقتى
ولا اى اثباتات
احنا لازم نخرج من هنا
كيرو.انا هطلع اجهز حاجتى وهخرج من هنا حتى لو محدش جه معايا
نايا.استنى هطلع معاك
ليان.وانا كمان
كان مايكل وجو مصدومين من اللى حصل مع روز
غير طبعا صدمتهم من كل الاحداث
جمال.بلاش يا دكتور تحاول حاجات مش هتفيدك
صدقنى
اللى اتكتب عليكم فى القصر ده هتشوفوه
مش هيتغير
سواء كان الكل شايف ان انت المتهم او حاولت تقنعهم انى انا المتهم
مش هيحصل اى حاجة غير اللى اتكتب انه يحصل
انتم مجرد اموات ماشيين على الارض
مايكل بأنفعال.انت مريض
انت مستحيل تكون طبيعي
وراك ايه انت علشان توصل لكل اللى بيحصل ده
ايه الهدف بتاعك
فهمنا
جمال بمنتهى الهدوء والاستفزاز.اعتقد ان انتم شايفين الهدف بعنيكم
بس بتحاولوا تظهروا ان انتم مش فاهمين
دايما بتحاولوا تكدبوا كل حاجة فيه دلائل انها موجودة
ومحيطة بيكم من كل اتجاه
يمكن مش اى حد مكتوب له يصادف انه يلمس بنفسه وجود الحاجة دى
بس وقتها بيكون فات وقت كبير
على انك ترجع تحاسب نفسك على عدم اقتناعك ده
يمكن لو كنت لثوانى تنازلت عن فكرة الجهل والتخاريف
مكنتش بقيت موجود هنا دلوقتى
ولا حصل كل اللى حصل ده
لأشخاص مالهاش علاقة بأى حاجة
غير انها صدقت فكرتك
وقبلت تيجي مكان متعرفش عنه اى حاجة
مايكل.هو ليه انا مش قادر افهم كلامك
جو بتركيز.انا بحاول افهم
او بحاول اقنع نفسى ان اللى فهمته من كلامك مش صح
جمال.لاء صح
كل حاجة انت كنت مش مصدقها
وكل حاجة انت لغيت وجودها
هى موجودة فعلا
قدامك
جو.انت عايز ايه
وازاى عملت كل ده
وانت مين
جمال.لسه مش ده الوقت اللى هتعرف فيه انا مين
لسه باقى شوية وقت قدامنا
كل واحد فينا هيعرف ياخد حقه
بس عايزك تكون متأكد ان انت مش هتقدر تتغلب عليا
حتى لو معاك اكتر من اللى موجودين هنا بكتير
صدقنى يا جو
انت هنا اسير
جو بيبص لمايكل اللى واقف مصدوم من كلام جمال
ومش فاهم هو فى ايه بيحصل
لكن اللى قطع كل الكلام اللى بيتقال فوق جثة روز
النور اللى اتقطع لدقايق
وحس فى اللحظة دى مايكل
ان جسمه بيرتعش من الخوف
حس بحاجة مفاجأة زودت الخوف جواه
جو.مايكل انت هنا
مايكل.ايوة يا دكتور
جو.جمال موجود
مفيش رد
جو.واضح انه مشى يا مايكل
اختفائه ده قلقنى
لو طلع فوق انا واثق ان هتحصل مصيبة جديدة
مايكل بتوتر.انا حاسس بكده
طيب خلينا نطلع
جو.طيب طلع الكشاف بتاع موبايلك
خلينا نعرف نشوف مكان خطواتنا
مايكل مد ايديه فى جيبه
علشان يطلع تليفونه
وبمجرد ما طلعه وبيشغل الكشاف
شاف جمال واقف قدامهم
وهو مبتسم ابتسامته المستفزة
لدرجة ان جو ومايكل اتخضوا من وجوده
الغريب ان جمال طبيعي
او شكله طبيعي
يعنى مجرد شخص
مفيش ف يه اى حاجة تخوف
ولا تدل على انه كائن مختلف
فى اللحظة اللى جو ومايكل شافوا قدامهم جمال
سمعوا صوت صرخة
وهنا اتأكد جو
ان المصيبة اللى كان خايف منها حصلت
والنور رجع مرة تانية
جو بخوف.جمال
عملت ايه تانى
مستحيل تكون اتخلصت منهم هما كمان
جمال بهدوء وثقة.للأسف يا جو
كانوا مصممين يخرجوا
وهما مش هينفع يخرجوا
فيه حاجات مطلوبة منهم
لازم تخلص
هما مش عارفين ان ده المكان اللى هيستقروا فيه
للأبد
مايكل بخوف.يعنى ايه المكان اللى هيستقروا فيه
على فكرة احنا هنخرج من هنا
يلا بينا ياجو
جمال.طيب مش تودعوا اصحابكم الاول
مش انتم السبب فى وجودهم هنا
جو تجاهل الرد على جمال
وطلع يجرى على فوق
وطلع معاه مايكل
كان المنظر بشع
فى الممر بتاع الغرف
نايا
ليان
كيرو
مرميين على الارض
ليان ونايا موتتهم بنفس الطريقة اللى روز وجيجي اتقتلوا بيها
اما كيرو
فغير انه مقتول بنفس الطريقة
الا ان رأسه مفصولة عن جسمه
المنظر يدمر اعصاب اى حد
مخيف جدا
والدم مالى الممر
والتعبيرات اللى واضحة على ملامح ليان ونايا
تدل على انهم كانوا مرعوبين ومصدومين
قبل الجريمة
جمال مطلعش معاهم
سابهم يطلعوا لواحدهم
جو.خلاص يا مايكل
احنا مش هنخرج من هنا
مبقاش فيه غيري انا وانت
كان لازم حاجات كتير متحصلش
مكنتش اعرف ان ممكن اى حاجة من دى تكون حقيقية
ولا كنت اتخيل ان ده ممكن يحصل
مايكل برعب وحزن ودموع واقفة فى عنيه.تفتكر جمال ده مريض نفسى
تفتكر شخص معقد
ولا هو حاجة تانية
جو.حاجة تانية
قصدك ايه يعنى يا مايكل بحاجة تانية
مايكل بتوتر.انا مش عايزك تقول عليا جاهل
لكن حاسس انه مش انسان
جو.مش هقول عليك جاهل يا مايك
علشان ده مش مجرد مرض
مفيش شخص طبيعي عنده القدرة انه يقتل 3 اشخاص بالشكل البشع ده وفى نفس المكان
من غير اى محاولة مقاومة منهم
وانه يقدر يتغلب عليهم
هو فعلا جمال ده مش شخص طبيعي
او مش شخص من الاساس
وباللى حصل ده
واللى انا شوفته فى الدور اللى فوق
انا عارف
ان الكائنات الخفية دى موجودة حوالينا
او معانا
بس انا مش عارف
هل جمال ده
الشبح بتاع القصر اللى انت اتكلمت عنه
ولا هو عبارة عن ايه بالظبط
وليه عمل كده
فيهم
مايكل.جو انا دلوقتى عارف ان احنا صعب نخرج من هنا
هنحاول
لكن وسط كل اللى حصل
عارف ان احنا هنفشل
عايز بس منك لو قدرت تخرج من هنا
بلاش تسيب اللى كان سبب فى كل اللى حصل هنا ده
بلاش تسيب جمال لو فعلا هو السبب
حاول توصله لحبل المشنقة
تجيب حقى وحق كل اللى اتقتلوا بالطريقة الوحشية دى
جو متوتر وعارف ان كلام مايك حقيقي.بص يا مايك
لو فيه طريقة نخرج بيها من المكان ده
هنخرج سوا
وهننتقم من جمال سوا
لكن لو مفيش الطريقة اللى هتخرجنا مع بعض
صدقنى يبقى انا وانت هنكون بنواجه نفس المصير
مايك.انا خايف يا جو
جو.انا خايف اني اتقتل قبل ما اعرف حقيقة اللى احنا فيه
عايز تفسير لكل حاجة حصلت
حتى لو هتكون دى اخر حاجة اواجهها
فجأة لاحظ جو ان مايك اللى واقف قصاده وبينهم كيرو ونايا وليان واقف فاتح عنيه على اخرها
وهو باصص ورا جو
جو بتوتر.فى ايه يا مايك
مايك بيشاور بأيديه لجو علشان يبص وراه
جو بمنتهى الهدوء والحركة البطيئة
بيلف رقبته
وهو خايف من اللى هيشوفه
ماهو مفيش اى انسان طبيعي هيعيش كل ده وميحسش بالخوف والرعب كمان
لكن بمجرد ما لف جو وشه
وقطعت الكهربا
ظهرت اضاءات حمرا خافتة جدا
وكأنها اضاءات عيون
او شموع
لكن مش ظاهر اى حاجة تانية
وفجأءة صوت جماعى مخيف
بيردد تراتيل مقبضة
مش فاهمين منها او من نبرة الصوت نفسه طبيعة الكلام اللى بيتذكر فيها
لكن اتفاجئ جو بحلقة شموع حواليه
على الارض
فى شكل دايرة كبيرة
لكن قبل ما يركز على الشموع او يدور على اللى كانوا بيترلوا
قرر الاول يطمن على مايك
اللى للأسف كان قتيل بنفس طريقة كيرو ومش بس كده
دى روز وجيجي كمان مرمية على الارض فى نفس الممر
ومن مكان قتل مايك
لحد دايرة الشمع
كاسات مليانة بالدم
والاصوات لسه بتزيد
وجو بينهار
وبرغم ان فيه صوت رسالة وصلت على تليفون
لكن جو كان مش عارف يحدد ده تليفونه او لاء
وحتى لو حدد هو مش عنده القدرة اللى تخليه يحاول يعرف تليفون مين
المنظر مخيف
ويدل على ان جمال مش بيعمل ده لواحده
مستحيل هينقل روز من تحت لفوق فى الممر
وجيجي خرجت من اوضتها من غير ما يحس بحركته او اى ارتباك
واتقتل مايك حتى من غير ما يصدر عنه اى صوت
كاسات الدم
الشموع
الاصوات اللى كان سامعها
الاضاءات الحمرا
كل ده يدل على ان جمال مش لواحده
جو بصوت عالى.اقتلنى
خلصنى بقى من اللى انت عيشتنى فيه
مش عايز اخرج من هنا
انا عايز اموت
وفجأة ظهر جمال بضحكة مستفزة
وهدوئه الغريب
وهو بيبص لجو بنظرات مريبة
جو.اقتلنى
مش هو ده اللى انت عايز توصله
انا جاهز ومستعد
جمال.معقول
بالسهولة دى عايز تموت
احنا لسه عندنا طقوس لازم تتم علشان
توصل للمرحلة دى
بس معقول عايز تموت من غير ما تعرف حياتك هتكون تمن لأيه
جو بأنهيار.مش عايز اعرف
عايز اخلص
لو حياتى كانت هى التمن اللى انت عايزه
ليه مش من الاول خلصت عليا انا
وموصلناش اننا نخلص على حياة اشخاص مالهمش اى علاقة بأى حاجة
جمال بهدوء.ومين قال ان انت كمان ليك علاقة بحاجة
محدش منكم له علاقة بحاجة ولا لازم يكون حد له علاقة
جو.انت الشبح بتاع القصر
جمال بيضحك ضحكة غريبة غليظة.شبح
انت للدرجة دى مش قادر تحدد قدرة اللى بتواجهه
للدرجة دى مش بتعرف تفرق بين الاشباح
وقدرات
الشر الاعظم
يتبع…
لقراءة الفصل التالي : اضغط هنا
لقراءة الرواية كاملة اضغط علي : (رواية انتقام شيطاني)
