رواية امبراطورية بابا الفصل العاشر 10 بقلم هنا محمد

رواية امبراطورية بابا الجزء العاشر

رواية امبراطورية بابا البارت العاشر

رواية امبراطورية بابا الحلقة العاشرة

عبدالله كان قاعد بيتفرج على التلفزيون ولمح سليم دخل وهو مدايق عبدالله قال: عمتلك المكرونة بالبشاميل على الله يطمر
سليم قعد جنبه وقال: هو انا وحش يابابا؟
عبدالله: ايوا
سليم بصدمة: ايه ده مش المفروض تهون عليا والكلام اللي بسمعه في الافلام اللي بتتفرج عليها
عبدالله: لا اصل انا معنديش د، م
سليم: حسيت
عبدالله شده من ودنه: بتقول ايه يا حيوان
سليم: بقول انت عندك مكان الد. م عسل والله يا حج
عبدالله سابه: اه بحسب.. زعلان ليه طردوك؟ طردوك اكيد
سليم: بعد الشر عليا وبعدين كمل بحزن: ياريت وجع الطرد كان بدل وجع الفراق
عبدالله بعدم فهم: مش فاهمك
سليم بابتسامة: ولا حاجة ياحج كمل عبدالحليم وشادية
عبدالله بادلوا الابتسامة: اوعى تقول انه فراق الحب
سليم: ايوا قصدي لا حب ايه وكلام فارغ مين
عبدالله: هي مين؟
سليم بتنهيدة: مفيش يابابا
عبدالله: مش عليا قول مين
سليم: البنت اللي بغني معاها
عبدالله: والله حسيت انك هتحبها مش عارف ليه
سليم بسخرية: بيقولوا قلب الاب
عبدالله: لا ده قلب عبدالله يا ولد.. عرضت عليها الجواز ورفضتك؟
سليم: عرفت منين انها رفضتني؟
عبدالله: بأنك مش عايز تجيب سيرتها وقلتلي من دقيقتين وكمل وهو بيقلده: هو انا وحش يا بابا؟
سليم ضحك: اعمل اللي تعمله مش هتعرف تقلدني
عبدالله: عرفت سبب رفضها ليك
سليم: اكيد عشان مش بتبادلني المشاعر
عبدالله: بالضبط القلب حاجة مبنعرفش نتحكم فيها يابني
سليم: بس انا حبيتها
عبدالله: مش كل حاجة بتاخدها في الحياة
سليم: وشوفت فيها نظرة اعجابها ليا
عبدالله:ممكن او ممكن برضو تكون دي نظرة اعجابك انت اللي انعكست في عينها
سليم: يعني اعمل ايه دلوقتي؟
عبدالله: حاول معاها للمرة الاخيرة ولو موافقتش ده النصيب يابني وهتلاقي الاحسن
سليم: بس انا مش عايز الاحسن انا عايزها هي
عبدالله: حبيتها للدرجة؟
سليم بحزن: واكتر يابابا
عبدالله: ربنا يعوضك يابني
سليم: شكرا يابابا ارتحت لما اتكلمت
عبدالله: متزعلش ها او ازعل بس مش كتير
سليم بابتسامة حزينة: حاضر
عبدالله: يلا عشان تاكل المكرونة بالبشاميل هتاكل صوابعك وراها
__________________هنامحمد__________
يونس كان قاعد بيلف حوالين اسلام عشان يقنعه يروحوا لجدهم: بابا يا بابا يا ابويا ياماي دادي يا ماي فازر ياوالدي.. اقول ايه تاني؟
اسلام: خليها بكرا يا يونس مش قادر
نور (مرات اسلام): اسلام يونس عنده حق خلينا نروح النهاردة وكمان انا زهقانة
مروج: ايوا يابابا عايزة اقعد مع روان بليز
اسلام:اتكلمي عربي يامروج و ياجدعان تعبان ارحموني
نور بحدة: ماتقوم يا اسلام بطل رخامة ما انا كمان تعبانة مش كفاية متحملة ولادك
اسلام: ما انا كمان مطحون في الشغل يعني اهبب ايه يعني
نور: انا بتعب اكتر منك قدر ده شوية
اسلام: والله؟ وانا مش بقدر يا نور بعدين ايه يعني بتنضفي وتهتمي بعيالك اي ست تقدر تعمل ده
نور: وانت مش مقدر اكيد ان اي ست بتتعب عشان ترضيكم
مروج بصت ليونس وقالتله: اوبس بابي بيتخانق مع مامي
يونس: بقول نركب تاكسي ونروح احنا
نور واسلام لفوا وقالو ليه بحدة: لا
يونس بملل: كنت عارف ان ده الرد
_____________________________
سليم بعد ما نام شوية نزل يتمشى في جنينة الكومباوند وعمال يجري بسرعة كإن بجريوا هيتخلص من الحزن اللي في قلبه وهيبطل يفكر في البلاء.. بس لقى البلاء قدامه بيتوجع على الارض.. عهد على نفسه انه لو شافها في شارع هيتخطاها ويروح للشارع التاني بس قلبه غبي ومعندوش كرامة عادي جدًا
سليم: انتِ كويسة؟
اميرة بوجع: لا رجلي وجعاني اوي
سليم: ايه اللي حصل؟
اميرة بصتله واتفاجئت انه هو وقالت: وايه فرق اللي حصل طلما النتيجة واحدة يا متخلف؟
سليم بغضب: مش وقت حكمك يا بنت اينشتاين يإما هسيبك متوجعة على الارض كده
اميرة بغضب مماثل: سيبني مطلبتش منك مساعدة
سليم: ايوا وريني هتقفي لوحدك ازاي
اميرة: هقف لوحدي من غير مساعدتك وملكش دعوة بيا
سليم بلا مبالاة: براحتك
وسابها فعلا ومشي واميرة قالت في نفسها: حقير وخدت بالها اخيرا من رجلها اللي بتوجعها وافتكرت لما كانت بتمشي بسرحان باللي حصلها وطفل كان راكب عجلة كان جاي ناحيتها وهي لما خدت بالها رجعت ورا بسرعة واتكعبلت في صخرة واتقلبت على وشها قعدت تهزق سليم في سرها وتقول انه السبب ولقته في وشها.. ابتسمت لما افتكرت اللي حصل وحاولت تقوم معرفتش
لقت فجأة بنت جاية جري عليها وقامت ساعدتها وقعدتها على اقرب كرسي واميرة قالتلها بامتنان: شكرًا
البنت: رجلك ورمت وايدك كمان متعورة تعالي نروح المستشفى
اميرة: مش لازم هتبقى كويسة
البنت: لا مستحيل هوديكي انتِ عايزاه يقـ تلني؟
اميرة باستغراب: هو مين
البنت بخبث: القمر.. بالمناسبة انا اخت القمر
اميرة مكنتش فاهماها وضيقت عينها بس لما فهمتها ابتسمت وقالت: سليم!!
البنت: وانا اخته جميلة دكتورة وعشان كده بقولك ضرورة انك تروحي المستشفى او حتى صيدلية قريبة.. يلا بينا نروح؟
اميرة: تمام
ولسة هيتكلموا لقوا عربية بتقرب عليهم وكانت عربية واللي سايقها قال باختصار: هوصلكم
جميلة: ماشي يا اسطا سليم هديك جنيه
سليم: خليهولك
اميرة: شكرا هروح مشي
جميلة شدتها وركبتها غصب: بطلي غباء اقرب صيدلية لينا بعيدة ورجلك مش هتستحمل
اميرة لقت نفسها بتركب معاهم من غير اعتراض وكمان بتبتسم لجميلة ودي حاجة لا تبشر بالخير
____________هنامحمد___________
هدير كانت قاعدة زهقانة وقررت تنكد على زين واول ما راحتله: وقفي عندك مفيش نكد النهارده
هدير: لا انا جالي هرمون النكد ولازم انكد
زين بابتسامة: حتى لو هوديكي الملاهي
هدير: حتى لو.. ايه!
زين: ايه؟
_____________هنامحمد _________
عبدالله كان بيوضب البيت اللي بقا كبير عليه انه يقدر ينضفه لوحده وراح لاوضة روان وخبط على الاوضة جامد لدرجة ان روان اتخضت وقامت فتحت بسرعة وكانت خايفة: في ايه؟
عبدالله لقته بيقدملها ادوات التنضيف وبيشاور للبيت ومشي من غير ولا كلمة وروان اتنهدت وقالت: بابا لو سمحت على اقل اتعلم لغة الاشارة طلما عاجز عن الكلام
عبدالله مردش عليها وروان راحت وراه: ممكن انضف بكرا ورايا مذاكرة
عبدالله بصلها بحدة ومتكلمش وروان قالت: طب ده اعتراض ولا موافقة ولا ايه يعني؟
عبدالله قعد على الكنبة وقعد يتفرج على الافلام وروان اتنهدت وقالت: ورايا واجبات والله
عبدالله شاور ليها بمعنى ” خلاص ” وقعد ياكل فشار اللي كان جنبه
وروان طلعت الاوضة وسمعت صوت الجرس وجت تفتح لقت عبدالله سبقها.. للدرجة مش عايز يكلمها ويقولها تفتح الباب حتى؟ دخلت الاوضة بحزن وقررت مش هتطلع منها مهما حصل
عند عبدالله
عبدالله: ايه اللي جابك؟
اسلام: ايه المقابلة دي؟
عبدالله لما لمح حبايبه التانيين اللي كانوا مش باينين من جسم اسلام: ابعد يابني ادم ملاحظتهمش.. حبايبي وحشتوني
واحفاده التلاتة حضنوا جدهم وعبدالله حضنهم بحب وحنان ونور قالت بمرح: طب وانا يابابا عبدالله مليش نصيب؟
عبدالله ضحك وحضنها بحب هي كمان فهو بيعتبرها بنته الخامسة
اسلام: اومال فين المجانين؟
عبدالله: سليم خرج يجري وكلم جميلة في حاجة معرفش ايه هي وخرجت تلحقه
نور: والمجنونة التالتة؟
عبدالله بتغيير الموضوع: يونس حبيبي عامل ايه في المذاكرة اوعى تكون فاشل
يونس بابتسامة: اطمن يا جدو بطلع من الاوائل دايما الحمدلله
عبدالله بفخر: بارك الله فيك يابني
اسلام همس لنور: روان تلاقيها في اوضتها اطلعيلها
روان حركت راسها بمعنى حاضر واستأذنت عبدالله وطلعت
عبدالله: وانتِ يا مروج؟
مروج بثقة: بقفل الرسم الحمدلله
عبدالله ضحك: فكرتيني بواحدة كده
يونس: اول حرف من اسمها عمتو مريم
عبدالله: بالظبط.. وانتِ يا قمر اتصاحبتي على ناس في الحضانة
قمر: ايوا يا كبير متقلقش هددتهم وصاحبوني كلهم
عبدالله بصدمة: مين البت دي؟
اسلام: اخت يونس يابابا
يونس: وانا مالي دلوقتي!
عبدالله: ايوا هو مالو صحيح ما انت كنت كده برضو
اسلام شاور على نفسه: انا؟
عبدالله: ايوا انت مصدوم ليه؟
اسلام: كان زين والله
عبدالله: تصور اه هو اللي كان بلطجي
اسلام: شوفت ظالمني ايدك على 500 جنيه
عبدالله: يخربيت ال500جنيه اللي من اول ما اتولدتوا بتتخانقوا عليها وفي الاخر بديها..
يونس ومروج: لمريم
عبدالله بمرح: الله ينور عليكوا
سليم وجميلة دخلوا: السلام عليكم
عبدالله: وعليكم السلام ورحمة الله وبركاته كنتوا فين؟
سليم: اا كنت بوريها حاجة معينة في شغلي الجديد وكده
اسلام: عملت ايه في شغلك
سليم: تمام ماشي حاله
جميلة حضنت قمر وقالت: نور فين؟
اسلام: عند روان
جميلة: طب تعالي ياقمر ومروج نروحلهم نخضهم يلا
وكان اسلام وسليم بيتكلموا عن شغل سليم الجديد ويونس استغل ده وراح لعبدالله وقال: جدو عايزك في حاجة مهمة
عبدالله: ايه هي؟
يونس: مش هينفع حد يعرف
عبدالله بص باستغراب وقال: طب تمام تعالى نتكلم في المكتب
____________هنامحمد___________
اميرة دخلت بيتها البسيط وقعدت على اقرب كرسي ليها سمحت بدموعها انها تنزل وافتكرت خوف سليم عليها برغم انه كان بيحاول انه ميبينوش بس كان واضح ليها.. اول مرة تحس انها تهم حد فهي دايما عايشة لوحدها.. حتى متعرفش معنى العائلة! عشان تخوض تجربة زي دي مع سليم.. بيقولوا ان اللي فاقد الشيء بيعطيه بس بالنسبالها المقولة دي غلط هي حتى متعرفش او مجربتش الشيء ده عشان تعطيه لغيرها.. بتحبه؟ حبته بس الخوف سيطر على المشاعر الحلوة اللي بتحسها معاه وهي جنبه مشاعر بتظهر ليه بس مش لحد تاني..
______________هنامحمد __________
عبدالله كان مصدوم من اللي قالوا يونس ليه.. الراجل اتجرأ وقرب من حفيده
كان يونس مستني منه اجابة واحدة وان ده كدب لكن توتر عبدالله وانه مش عارف يقول ايه عشان ينكر ده خلت يونس يشك فيه
عبدالله: الراجل ده كداب يايونس متصدقهوش هو مريض عقلي اساسا
يونس: مريض ازاي؟
عبدالله بتوتر: عنده مرض في العقل نسيت اسمه والله حتى هو هرب من المصحة
يونس: واشمعنا بابا؟ وليه بيجي تحت بيتنا وليه قالي الكلام ده
عبدالله: عشان مريض بيتخيل الحجات دي انا هبلغ عنه وهيبعد متقلقش
يونس: تمام يعني كلامه مش حقيقي
عبدالله: اكيد يا يونس هيبقى حقيقي ازاي يعني؟ ده بيخرف
يونس: ماشي يا جدو متتعبش نفسك هقول لبابا يتصرف
عبدالله باندفاع: لا
يونس بشك: ليه؟
عبدالله بتوتر: ليه نشغل ابوك في حاجة هبلة زي دي يعني هو فيه اللي مكفيه يا يونس انا هتصرف اسمع الكلام
يونس: تمام يا جدو اللي يريحك شكرا انك طمنتني
عبدالله: اياك تصدق حاجة زي دي تاني اسلام ابني الاول وده مجرد عدو عايز يهد امبراطوريتي بس مش هنسمح لده يا يونس فاهم؟
يونس: فاهم
ويؤسفني ان اقول ان يونس مفهمش واستغل انشغال جده بكلام سليم واسلام ودخل اوضة عبدالله من غير ما حد يحس.. مش عارف اللي بيعمله صح ولا غلط بس محادثته مع عبدالله كانت غريبة.. واللي عبدالله ميعرفوش ان يونس دارس لغة الجسد عشان يعرف يتوقع حركات المنافس ليه بسهولة في الملاكمة.. كان سهل عليه جدا انه يعرف ان عبدالله بيكدب
قعد يدور كتير على امل انه يلاقي حاجة تدل على العكس بس ملقاش حاجة ولما قرر انه يطلع سمع صوت حد بيقوله
– يونس بتعمل ايه؟
يونس: اا عمتو جميلة كنت.. كنت عايز ادخل اوضة سليم عشان اجيب منها كتاب بس دخلت اوضة جدو بالغلط
جميلة بابتسامة: اوضة سليم فوق مش تحت
يونس: ايوا اتلخبطت مهو البيت يلخبط
جميلة: اعمل ايه في جدو اللي جاب بيت ب9 اوض عشان لو حد بات.. حقك تتلخبط
يونس بابتسامة: طب عن اذنك يا عمتو
يونس خرج وحمد ربنا ان جميلة مش من النوع اللي بتاخد اي حاجة بنية وحشة ودايما لطيفة فهي العمة القريبة منه وراح لاوضة سليم عشان جميلة متستخدمش عقلها وتشك
يونس لنفسه: بقيت محقق كونان من ورا العيلة دي داخلين على ايه تاني؟
_____________هنامحمد_______________
ملك دخلت على شادي لقته قاعد بينضف سلاحه ابتسمت وقالت: احلى ظابط في الدنيا
شادي بصلها وقال: عايزة ايه
ملك: على فكرة على طول ظالمني
شادي: انا اسف ياستي عايزة ايه برضو
ملك: وبتفهمني برضو
شادي ضحك: اخلصي
ملك مسكت ايده وقالت بدلع: تقبض على زميل روان اللي في السنتر اسمه رامي
شادي: اقبض؟
ملك حركت راسها بمعنى ايوا وحضنته بحب: مش انت ظابط؟
شادي: بوظتي المشهد الرومانسي اللي كنا داخلين عليه يا ملك الله عليكي
ملك بعدت عنه: مش بساعدك في شغلك؟
شادي بضيق: دي مساعدة وبعدين ماتروحي تعملي بلاغ في القسم انا مالي
ملك: لا عشان تجيب حقي وحق اختي
شادي: عملها ايه ده؟
__________هنامحمد _____________
تاني يوم
يونس خلص مدرسته اللي بقى بيروحها بانتظام الايام دي عشان يقابل سليمان وبس
سليمان: قلت لجدك؟
يونس: ايوا
سليمان: وايه اللي حصل؟
يونس بضيق: الموضوع طلع حقيقي بس عشان اتأكد منه بنسبة 100٪ محتاج مساعدتك يا جدو سليمان
سليمان باستغراب: وانا هعمل ايه؟
يونس بصله وباين عليه بيفكر في شيء: هقولك
___________________هنامحمد _________
بعد 48 ساعة
يونس دخل الاوضة على باباه بتوتر وبيفكر يتراجع عن قراره واسلام كان بيبصله باستغراب: في حاجة يا يونس؟
يونس: ايوا
اسلام بابتسامة: اقعد يابني متخفش مش هعضك
يونس وكان بيحاول ان دموعه متنزلش: بابا لازم اقولك على حاجة مهمة.. انت عارفني اني مش بحب اكدب عليك عشان كده لازم تعرف
اسلام بقلق: في ايه يا يونس مالك؟ ايه اللي حصل؟!
يونس:………
____________هنامحمد__________
مفيش سر في الحياة بيدوم مهما حاولت بكل جهدك تخبيه عن اللي حواليك هييجي يوم وينكشف بس السؤال الحقيقي هنا؟ هتتعامل ازاي لما السر ينكشف والحقيقة هتبان؟ هل هتواجه العالم ولا هتختار الهروب من الكل؟