رواية امبراطورية بابا الفصل الثاني عشر 12 بقلم هنا محمد
رواية امبراطورية بابا الجزء الثاني عشر
رواية امبراطورية بابا البارت الثاني عشر
رواية امبراطورية بابا الحلقة الثانية عشر
_________________________
“اهدأ فوالله فرج الله قريب”
__________________________
“في مكان بيتولد فيه حد جديد أو بيموت فيه حد، مكان في الامل واليأس بنفس الوقت، في مكان ممكن انفاسك تتقطع فيه وانت بتستنى طبيب يطمنك أو بتتقطع وانت بتفقد حد عزيز عليك.. حسيت انكوا بتخمنوا تخميينكوا صح يا قرائي الاعزاء المكان المستشفى”
روان كانت قاعدة مصدومة من منظر باباها اللي شافتوا وسليم كان مستغرب ازاي قدر يتصرف بسرعة في الوقت ده حتى كان ناسي ازاي اتصل بالاسعاف وازاي ساعدهم في حمل عبدالله فاق من شروده على صوت جميلة وهي بتصرخ في ممرض
– عشان خاطري سيبوني ادخل انا هعرف اتحكم في مشاعري والله بس سيبوني ابقى معاه
– انا اسف والله يا دكتور جميلة بس المدير رفض دخولك
– ده ابويا خلينا ادخل
– اهو ده السبب بالظبط اللي مينفعش تدخلي عشانه يا دكتورة
سليم مسك ايد جميلة وضغط عليها عشان تطمن وقال: عبدالله هيقوم منها مش هيسيبنا يا جميلة
جميلة ببكاء: مش عايزة بابا يحصله حاجة يا سليم
سليم: مش هيحصل كان عضمه جامد وانا بشيله اطمني هيلزقلنا سنين كمان
جميلة ابتسمت بحزن: انا دكتورة ياسليم مش عيلة عشان اهدى بالكلمتين دول
سليم: انتِ في نظرنا كلنا عيلة
جميلة حضنته وقعدت تعيط كتير وسليم كان بيحاول يتماسك عشانهم وبص لروان اللي كانت بتبص للفراغ حتى دموعها مبتنزلش.. بص ليها بحزن وكان مُدرك ان هي كتومة بتكتم كل حاجة في نفسها
لمح طارق وبيري جايين فساب جميلة وراح لطارق اللي قاله بخوف: بابا كويس يا سليم؟
سليم: هيبقى كويس
طارق: ايه اللي حصل؟
سليم: معرفش لقيته مغمى عليه و….
سكت لما افتكر شكله وطارق محبش يضغط عليه وحط ايده على كتفه وبيري كانت بتسند جميلة اللي داخت من كتر العياط
اسلام جه عليهم وقال: ايه اللي حصل؟
جميلة راحت حضنته وقالت ببكاء: بابا يا اسلام كان شكله صعب اوي
اسلام: اطمني يا جميلة مش هسيبوا يمو، ت من غير ما اقوله انه ابويا ومفيش حد تاني ابويا غيره
طارق: زين وملك ومريم عرفوا؟
روان: زين وملك عرفوا وجايين بس مريم لا دي ممكن تروح فيها
الدكتور خرج وكلهم راحوا ناحيته بسرعة والدكتور قال: اتصاب بأزمة قلبية بس جت سليمة المرة دي حالته بس كانت خطيرة في الاول خصوصا انكوا جبتوه متأخر وكان لازم يتعملوا اجراء الانعاش القلبي بس الحمدلله هو كويس دلوقتي
جميلة: الحمدلله
الدكتور: هكتبله على ادوية لازم ياخدها بانتظام وهتفق مع الدكتورة جميلة على نظام لازم يمشي عليه ولازم يعمل رياضة
طارق: بس رجله بتوجعوا يا دكتور
الدكتور: على اقل يتمشى على قد ما يقدر مبقولش رياضة صعبة بس لازم يتحرك
جميلة: تمام يادكتور شكرا ليك جدا
الدكتور: واجبي يا دكتورة جميلة
سليم: ينفع ندخل؟
الدكتور: ينفع هو دلوقتي اتنقل لاوضة 502 تقدروا تروحوا بس هيفوق كمان ساعة.. عن اذنكوا
طارق: اتفضل
جميلة: انا هروح ليه اسأله على بابا بشكل كويس اسبقوني
ملك وزين وشادي جم وملك قالت بلهفة: بابا كويس؟
جميلة بابتسامة: ايوا يا ملوكتي حصل ازمة قلبية بس هروح للدكتور اطمن اكتر تمام
ملك: الحمدلله قلبي وقع
شادي: سلامة قلبك من الوقعة
ملك: رومانسيتك بتطلع في الوقت الغلط دايما؟
شادي ضحك وكلهم راحوا للاوضة وروان فضلت قاعدة
سليم قعد جنب روان وقال: مش هتروحي؟
روان بهدوء: هروح
سليم: كلهم مشيوا تقدري تطلعي اللي في قلبك
روان بصتله بدموع: خفت يروح قبل ما يسامحني خفت يروح قبل ما يشوف تخرجي زيكوا ويفتخر بيا واني اقدر اشرفه.. خفت يروح مني يا سليم
سليم: هو كويس دلوقتي يا رورو بابا ب7 ارواح متقلقيش
روان: مش هيسيبني؟
سليم: مش هيسيبنا غير لما يطمن علينا متقلقيش
روان: انا حسيت فجأة ان عايزة اقوله كلام كتير حسيت ان لو مشي هتدمر وهندم الف مرة ان مقولتلوش
سليم بابتسامة: احنا فيها اهو لما يفوق وعد هخليكي اول واحدة يشوفها وتتكلمي معاه براحتك اتفقنا؟
روان حضنته: سليم انت احن اخ في الدنيا ربنا يخليك ليا
سليم: ويخليكي ليا يا احلى روان.. يلا نروح للاوضة
روان: يلا
________________هنامحمد________
بعد ساعة
عبدالله كان بدأ يفوق وشافهم حواليه وقال: انا في الجنة وانتوا سبقتوني ولا ايه؟
زين بمرح: لا في النار ياحج كلنا بنتحاسب
عبدالله: طب صحوني لما ييجي دوري
زين وسليم ضحكوا جامد وطارق قال: البنج شغله عالي اوي بجد
زين: اوي اوي
عبدالله بدون وعي: روان.. روحي هاتي حاجة ساقعة
روان: هجيب اللي انت عايزه وعد بس فوق
عبدالله: اسلام فين؟
اسلام: انا هنا يابابا
عبدالله: ايوا انا باباك
اسلام: ايوا بابايا يا احلى اب
ملك: هو هيفوق امتى؟
جميلة: فاق بس هو بيستعبط
عبدالله بدأ يفوق اكتر وقال: مبستعبطش
جميلة: شوفتوا؟
طارق: بابا يعمل اللي هو عايزه
عبدالله: انت ابني الوحيد عامةً
طارق: تسلم ياحج
عبدالله: بقول لاسلام
طارق بصدمة: ايه ده!!
كلهم ضحكوا بس اسلام مكنش عنده طاقة يضحك فاكتفى بابتسامة مجاملة
عبدالله: اسلام
اسلام: نعم يابابا
عبدالله: انا بحبك متسبنيش
اسلام بدموع: ابقى كلب لو عملتها مستحيل اسيبك
عبدالله: قبل ما يغمى عليا شوفتكوا.. كنتوا بتضحكوا دعيت ربنا ان يديم الضحكة ليكم.. مش عايز اشوفكم مدايقين من حاجة تاني
جميلة بدموع: انا اسفة ان سيبتك مكنش لازم اسيبك واروح للاهطل المكتأب ده
ملك: اتفق لما روحنا ملقناش غير المشاكل اصلا
عبدالله: ضـ ربكوا ولا ايه؟
اسلام بص لنور وقال بضيق: يخربيت اليوم اللي مديت ايدي عليكي فيه بقالي سنين بتذل منه من..
عبدالله: من مين؟
اسلام: من ابويا
عبدالله: فين احفادي؟ فين مريم
زين: محدش قالها انت عارف لو عرفت اللي حصل هتعمل ايه؟
عبدالله: وانت عارف لو عرفت انكوا خبيتوا اللي حصل هتعمل فيكوا ايه؟
زين: هتمرجحنا المرجيحة
ملك: من تحت
سليم: لفوق
جميلة: والله انتوا عبط وانا اعبط منكوا عادي
عبدالله: فين احفادي؟
طارق: على فكرة كنت حاسس انك بتحبهم اكتر مننا بعدين ياحج هنجيبهم ازاي في المستشفى انت عايزنا نتطرد
عبدالله: طب هتروحوني امتى؟
زين: في ايه يابابا نام انت ونشوف الدكتور هيكتبلك على خروج امتى بعد يومين ولا اسبوع ولا ايه
عبدالله بخضة: انتوا بتهزروا اسبوع مين انا مش مستحمل دقيقة واحدة
بيري: يابابا عبدالله اكيد مش هتخرج دلوقتي
عبدالله برفض: اكيد هخرج دلوقتي خرجوني
جميلة: ممكن بكرا الصبح بس لازم تبقى هنا الليلة دي عشان تبقى تحت الرعاية
عبدالله: انا هعرف ارعي نفسي
ملك: ما تبطل بقا يابابا هتلحق نفسك ازاي لو حصلك كارثة.. عرفت تلحق نفسك المرة دي؟
عبدالله: دي استثنائية
سليم: يابابا مش هينفع دلوقتي اتقبل الامر الواقع
عبدالله: مين اللي ضحك عليك وقال مش هينفع ها هينفع ونص وتعالى بص
جميلة: ايه الامثال الغريبة اللي بتقولها دي يابابا تؤتؤ؟
عبدالله: متجيش جنبك في امثالك المتخلفة ياحبيبتي
طارق: هقول للدكتور يشوف نأكلك ايه
عبدالله: عايز اخرج انا
اسلام: خلاص بقا يابابا هنخرج الصبح استحمل الليلة دي
عبدالله: حاضر يا سيمو
كلهم بصوا بصدمة واستنكار وعبدالله قال: في ايه قلت اني بحب سيمو اكتر منكوا
شادي ضحك: اسلام واخد امتيازات عشان هو الابن الكبير
عبدالله: طبعا
طارق: هروح اجيب الاكل قبل ما يجيلي جلطة
عبدالله: هاتلي 5 سندوتشات حواوشي وطحينة كتير وحاجة ساقعة
طارق بصدمة: ومستغربيين جاله ازمة قلبية ليه؟
جميلة: جيب فراخ مسلوقة وشوربة
عبدالله: لا ده اكل عيانين هات
كلهم قاله بحدة: بابا انت عيان
عبدالله بتذمر: خلاص جيب اللي تجيبه متقرفنيش
______________هنامحمد __________
وعدى اليوم بسلام ومعظمهم باتوا في المستشفى روان مشيت متحججة ان وراها مذاكرة وسليم هزق نفسه انه نسي وعده ليها بس الكل كان مقتحم الاوضة فمعرفش وجه الليل والخبر انتشر للي مكنش يعرف واول حرف من اسمها مريم
كلهم اتجمعوا بليل عشان يتطمنوا على عبدالله
لقوا خبط على الباب كتير وسليم راح فتح بسرعة لقاها مريم
مريم ببكاء: هو فين بابا خبيته عليا ليه؟
سليم: في ايه اتخضيت من كتر الخبط ده اهدي شوية
مريم بعصبية وقالت بصوت عالي: اهدى ايه يا حيوان بقا محدش يقولي ان بابا راح المستشفى ايه محدش قالي ليه؟ يا ناس حقيـــــــرة
سليم حط ايده على ودنه: صوتك خرم طبلة ودني
حسام: شوفت اهو بعاني من الحوار ده من ساعة لما عرفت من ساعتين
سليم: ده ربنا يعينك عليها ايه ده ايه البوكس ده
حسام رفع البوكس وقال: سيمبا.. بقى فرد من العيلة خلاص لازم اجيبه في مناسبة زي دي
سليم ضحك: كان نفسي اقول خايف على العيال منه بس بجد انا خايف عليه منهم
حسام بقلق: ربنا يستر مريم اللي اصرت اجيبه
سليم: مريم دي عليها حركات
مريم: هو فيـــــن؟
جميلة: اهدي يابت هتخلي بابا يجيله ازمة قلبية تانية في الاوضة
مريم كانت لسة هتجري بس عبدالله طلع وقال: مين مات؟
طارق: محدش يابابا كمل نوم
مريم راحت هجمت على طارق وضر بته وقالت بعصبية: يعني محدش يقولي
طارق: طب وانا مالي ابعدي عني
مريم راحت لزين وشدته من شعره: انا اللي اعتمد عليك تقولي اخبار الكوكب كله متقوليش يا حلوف
زين: مكنتش اعرف انك مش عارفة اعرف منين ما تروحي تهزقي سليم ولا اسلام
مريم مسكت قزازة الماية وحدفتها على اسلام وهجمت على سليم جامد لدرجة انه وقع على الارض وقعدت تشده من شعره وسليم بيصرخ
عبدالله في الوقت ده كان نفسه يقولها انها مسلمتش عليه حتى بس سابها تاخد انتقامها منهم فهي بنته الشرسة وقت اللزوم
في الوقت ده الجرس رن ومريم مكانتش مبطلة اللي بتعمله في سليم وجميلة راحت تفتح لقتها اميرة
اميرة باحراج: ازيك يا جميلة انا جيت عشان اطمن على…
سكتت لما سمعت صرخة سليم وجميلة ابتسمت بسخرية: لا ولا حاجة متستغربيش سليم بيتهان بس
جميلة صوتت فجأة والكل سكت
واميرة كانت بتبص باستغراب شديد وكانت بتقول في نفسها انها تجري وتهرب لحد لما جميلة قطعت حبل افكارها وقالت: في ضيفة اسكتوا
مريم بصت ليهم: لما الضيفة تمشي مش هسيبكوا بس حاسة ان انا ناسية حاجة
عبدالله ابتسم بسخرية ومريم بصتله وقالت بدموع: بابا
عبدالله ضحك وهي حضنته وقالت: انت كويس ياقلبي
عبدالله: كويس يا ميرو متقلقيش
سليم قام وهو بيتوجع وقال: مني لله بجد
اميرة راحتله وقالت بخجل: انت بخير؟
سليم غمض عينه وحس انه بيتخيل صوتها يا الله حبها للدرجة وبص لجميلة اللي كانت بتبتسم ليه بطريقة غريبة اثارت شكه وبص وراه لقى اميرته بالفعل مكنش بيتخيل صوتها
اميرة اول ما بصلها بصت لجميلة وابتسمت: جيت عشان اطمن على والدكوا لما عرفت حبيت ان اجي ليكي يا جميلة
جميلة: فيكي الخير والله
عبدالله: لمؤاخذة يابنتي بس معرفكيش
جميلة: دي البنت اللي كانت بتغني مع سليم في النادي يابابا
عبدالله: اههه سليم حكالي عنك وقال قد ايه أنتِ جميلة طلع عنده نظرة
اميرة اتكسفت وحطت وشها للارض وجميلة قالت بابتسامة: هي قمر اوي فعلا
سليم باندفاع: لا شمس
كلهم بصوا ليه بعدم فهم وسليم قال: اا الشمس الشمس هتطلع علينا واحنا لسة متعشناش
اميرة كانت بتبص ليه بحب وهو مش شايف ده وجميلة وعبدالله كانوا ملاحظين
طارق: عندك حق تعالوا يلا ناكل انا ميت من الجوع
اميرة: طب انا فرحانة ان عمو كويس سلامة حضرتك وعن اذنكوا
عبدالله: استني يابنتي اتعشي معانا يلا
اميرة: مرة تانية بقا ياعمو
سليم قعد على كرسي السفرة وكان متوتر من وجودها قدام العيلة ومش عارف يتصرف ازاي
عبدالله: مفيش حاجة اسمها كده هتتعشي يعني هتتعشي دي روان مجهزة العشا فل النهاردة
روان كانت بتحط الاطباق و اتصدمت ان عبدالله جاب سيرتها بحاجة وسليم غمزلها وروان ابتسمتله
جميلة: ايوا وبالمرة تتعرفي على الكل احنا كتير اوي يارب تحفظي ده طارق وده زين وده اسلام اخوات سليم الولاد.. ودي ملك ودي روان ودي مريم اخوات سليم البنات.. وده شادي جوز ملك وده حسام جوز مريم.. ودي هدير ودي نور ودي بيري زوجات اخوات سليم الولاد
وكملت بغمزة: بس سليم نفسه سنجل عادي
اميرة كانت تايهة بس لما جميلة قالت الجملة دي ضحكت وقالت: واظن ان روان صغيرة
روان: تالتة ثانوي
اميرة باستغراب: غريبة مع ان يبان عليكي 3 اعدادي بجد
روان بابتسامة: حبيتك على فكرة
اميرة هزت راسها بهدوء ليها وكانت مبتسمة وجميلة قالت: واخيرا ده فادي خطيبي وحبيبي واي طفل فهو حفيد مش فارقة بقا ابن مين والله انا ذات نفسي بحاول احفظهم
اميرة ضحكت وعبدالله قال: اتعرفنا؟ يلا ناكل ومفيش اعتراض
اميرة: تمام
كلهم بدأوا يقعدوا وجميلة شدت اميرة وقعدتها على الكرسي اللي قدام سليم وقعدت جنبها عشان محدش يشك وسليم ابتسملها واميرة عملت نفسها بتاكل وبتبص في كل حاجة الا عيونه
بدأ الهزار وشقاوة الاحفاد مع جدهم نسيت اقولكوا؟ السفرة كبرت مبقوش 9 كراسي بقوا اكتر بكتير بس الاحفاد اتعودوا يفرشوا مفرش على الارض وياكلوا عليه وحسام طلع القط وكان بياكل مع الاحفاد
اميرة كانت بتبص عليهم بحب واتمنت في نفسها تبقى معاهم للابد عيلة جميلة مليانة بالدفء اللي كانت دايما بتدور عليه مليانة بالحب والمودة
اسلام كان بيبص للعيلة بابتسامة بس كان جواه نقطة سودا موقفاه انه يقدر يفرح من قلبه فعلا بس هيتخطى مع مرور الزمن هو واثق من ده
فادي مكنش مهتم بحد حواليه غيرها ضحكتها وشكلها وهي بتتكلم ومرحها وطيبتها وجنونها حب كل حاجة فيها وقال في نفسه هي فعلا جميلة
نور كانت ماسكة ايد اسلام بتحاول تفهمه انه مش لوحده مهما كدب على الكل وقال انه كويس مش هيقدر يكدب عليها هي اسلام ابتسملها بهدوء وهي بصت لولادها اللي كانوا بيلعبوا ويونس اللي اكتشفت انها لازم تربيه من اول وجديد عشان بدأ يخبي عليها حاجات
شادي كان بيبص للعيلة بحب وافتكر انه كان ممكن يخسرهم خالص بسبب طيشه وغبائه مسك ايد ملك وباسها هو فعلا ممتن ليها
ملك مكنتش متخيلة ابدا انها تتجمع معاهم بس لامحبة الا بعد عدواة حبت اخواتها اوي لدرجة انها تفديهم بحياتها
سليم كان في عالم تاني بنظراته لاميرة وحس ان لسة في امل ولو عرض عليها تاني ممكن توافق اتعهد على نفسه انه مش هيسيبها دقيقة واحدة من غير مايعرف ردها للمرة التانية في وسط سرحانه ركز مع روان اللي مكنتش بتاكل وكانت بتلعب في الاكل
روان ممكن اللي يشوفها يقول انها حزينة بس هي بتفكر في طريق الهداية طريق سليم وهو التوبة بصت لهدير اللي كانت محجبة وبدأت تفكر فيه وبدأت تفكر انها تقرب من ربنا عموما الغلط فوقها من الضلمة اللي عايشة فيها
زين كان بيحمد ربنا ألف مرة على النعم والعوض اللي ناله في الحياة وكان هما كلهم العوض ليه
جميلة قعدت تفتكر كل الذكريات اللي مروا بيها بمرها وحلاوتها لسة هيجيلهم مصايب وكوارث تجيب اجلهم بس الاحلى انهم هيبقوا مع بعض كالعادة ايد واحدة
مريم ابتسمت على منظرة عيلتها الجميل وقالت بصوت عالي: يلا يا جماعة نتصور
طارق: اشطا
مريم مسكت الفون والاحفاد وقفوا ورا كرسي جدهم وصورتهم صورة عائلية كاملة بس مش مكتملة لسة في اللي هيدخلوها 😂مريم كان في دماغها تعمل اللي بتحبه وترسمهم وهتعلق صورتهم بس هتبقى مرسومة بايدها مش مجرد صورة بكاميرا
عبدالله كان بيبصلهم بدموع اخيرا قدر يحقق حلمه معاهم هما حلمه فعلا.. اخيرا ارتاح وهيقدر يقابل ربنا وهو مش مخبي سر وحمد ربنا على ان اسلام سامحه وعينه جت على اسلام اللي كان بيبصله برضو بامتنان وعبدالله اتنهد براحة
_________هنامحمد_______________
كانت اميرة رايحة النادي كالعادة واتصدمت لما شافته على الstage واول ما شافها بدأ يغني لمغنيه المفضل
” انا مش زي امبارح ”
” طمعت في الحجات ”
” من امتى كانت فرقالي؟ ”
” غير لما الاميرة جت ”
” نويت اجيب الجمر والماس ”
” واقول يا عشق في وسط الناس ”
” واقضي حبس واغنى المال ”
” اعيش وجع واميرة ترتاح ”
” تايه في بحرك عيني فداك ”
اميرة ضحكت وهو اتشقلب ونزل فجأة وقال: مش عارف ايه سبب رفضك للمرة الاولى بس تتجوزيني يا اميرة وانا والله هعملك كل اللي تتمنيه يا اميرتي
كل الاصوات اللي حواليها كانت تصقيف وناس بتهتف ب”وافقي” وهي قالت اخيرا: موافقة
سليم فرح وقعد يتنطنط وحضن كل اللي كان قدامه تعويضا عن ارادته انه عايز يحضنها بس هي لا تحل له للاسف
اميرة: انا معرفش يعني ايه عيلة ومش عارفة هقدر ابقى زوجة ناجحة ولالا
سليم: هعرفك.. هتبقي احلى زوجة ناجحة اساسا
اميرة بخجل: شكرا
سليم: بحبك
اميرة بمرح: وانا كمان بحبني
سليم: انتِ رخمة على فكرة
اميرة: اكتر
سليم: انا اللي رخم اكتر يعني؟
اميرة: تؤتؤ بحبك اكتر
سليم ابتسم وعينه كانت بتطلع قلوب واميرة قالت: ضيعت عليا شغلي
سليم: مفيش حد هيسمع صوتك ده غيري تاني دي كانت الخاتمة بتاعتنا هنا
اميرة بضيق: والله طب ماحد هيسمع صوتك غيري انا برضو انت مش شايف البنات كانت بتتلزق فيك ازاي
سليم: محدش قالي ان الغيرة على الحبيب شمس كده
اميرة ضحكت ونسيت كل عصبيتها: مش هتبطل تقولها؟
سليم: ليه؟ انتِ الشمس اللي بتنور القمر حقيقة علمية
اميرة: انت كده بتخلينا ميكس غريب
سليم غمزلها: وهو ده المطلوب نبقى كريتيف ياحب حياتي
اميرة ضحكت جامد واتمشت معاه وعاشوا حلاوة البدايات اليوم ده
____________هنامحمد _____________
عبدالله: بتتهربي مني ليه؟
روان: مش بتهرب
عبدالله اتنهد بضيق: لا بتتهربي.. انا سامحتك يا روان
روان: سامحتني؟
عبدالله: ايوا انا مسامحك من اول يوم اصلا.. بس كان لازم اعرفك ان اللي عملتيه كبير اوي يا روان كان لازم ده
روان بدموع: صدقني عرفت
عبدالله: عارف بأمارة انك كلمتي هدير على حوار الحجاب
روان: هي قالتلك
عبدالله بابتسامة: ايوا وخدي كل الفلوس اللي تحتاجيها وهاتي لبس كتير براحتك.. تعرفي لما قالتلي حسيت ان انا فخور بيكي اوي يا روان ربنا يهديكي يا حبيبتي
روان دموعها خانتها ونزلت وقالت: انا بحبك اوي يابابا
عبدالله حضنها: وانا بعشقك يا روحي واسف على القلم اللي ادتهولك
روان: متتأسفش انا كنت استحقه
عبدالله: غلط يانورعيني انتِ تستحقي كل حاجة جميلة.. ومتستعجليش على نصيبك هيجيلك في الوقت المكتوب ومتاكد انه هيبقى راجل كويس وهيصونك ان شاءلله
روان: لا هقعد معاك دايما عشان مش هقبل بحد غير لما يكون زيك
عبدالله: مفيش مني اتنين
روان ضحكت: اهو عشان كده بالظبط هقعد في ارابيزك
عبدالله: ربنا يحفظك ويحفظ اخواتك ويسعدكوا يارب
روان بابتسامة: آمين
خبت اللي في قلبها كعادتها ومقالتش اللي كان مدايقها في الاول بس روان من الشخصيات الكتومة محدش يقدر يعرف اللي في قلبها بسهولة وهي مبتحبش حد يشوفها ضعيفة عشان كده عبدالله مقدر ده ومبيحبش يضغط عليها بس ده خلاه يبقى غلط في التهاون معاها
” بنوتاتي الحلوين بلاش ترموا نفسكوا في النار لمجرد تقصير من اهلكوا قربوا من ربنا افضل واعرفوا الصح من الغلط لأن كل حاجة غلط نهايتها وحشة 🫶 ”
___________________هنامحمد __________
الامبراطورية كبرت اكتر واكتر يؤسفني اقول ان سندهم بالفعل راح بس دي سنة الحياة وده المعروف انه هيحصل بس مش عارفين ازاي ولا امتى.. نفذوا وصيتوا واختاروا ان كل جمعة يتجمعوا هما ال8 بس يخرجوا كل اللي في قلبهم لحد لما ولادهم كبروا واتجوزوا وكمان خلفوا.. اتعودوا دايما يحكوا عن عبدالله لاحفادهم وقد ايه كان اب جميل
خصوصا اسلام اللي كان دايما بيروح للاماكن اللي عبدالله بيقعد فيها ويجيب لاي حد في سيرته
عبدالله كجسد مبقاش موجود بس هو فضل موجود بروحهم وفضل عايش وهما دايما بيحكوا للي حواليه عليه ويحكوا لاحفادهم والامبراطورية كبرت اكتر واكتر
والجزء ده كان تحت عنوان سند الاخوات لبعض ومش كل اب اب ❤️🩹
وبكل حزن بقول دي كانت نهاية
إمبراطورية بابا اللي هيفضلوا عايشين في قلوب اللي حواليهم دايما ♡
لقراءة الرواية كاملة اضغط على : (رواية امبراطورية بابا)
