رواية امبراطورية بابا الفصل الثالث 3 بقلم هنا محمد
رواية امبراطورية بابا البارت الثالث
رواية امبراطورية بابا الجزء الثالث
رواية امبراطورية بابا الحلقة الثالثة
روان وهي بتكنس الارض: انا الاميرة روان والامير ريان هييجي ينقذني من مرات ابويا الشريرة وبناتها التانيين
ملك وهي بتلوي بقها وبتمسح قزاز الشباك: وانا بقا بنتها الشريرة
روان: تؤتؤ للاسف مامتك ماتت ملحقتش اعيش دور الغلبانة ومرات ابوها الشريرة وبنتها الحربوقة
ملك بسخرية: يا حرام صعبتي عليا بس وعلى ايه ما انتِ عايشة حياة الاميرات اهو كلهم كنسوا في حياتهم
روان وبان عليها الاقتناع وقالت بجدية: تصوري اقتنعت
ملك بهمس: يعيني عليك يا ابويا انت عايش في الهبل ده 24 ساعة
روان: بتقولي حاجة
ملك: مبقولش يختي واكنسي كويس عايزة الارض بتبرق
روان: مرات ابويا ماتت اه بس الظاهر سابتلي بنتها العقربة
ملك بصتلها بصدمة: انا عقربة ياللي لون شعرك لون الجزر
روان: لا مسمحلكيش كله الا شعري ده انا دفعة فيه نص كليتي
في الوقت ده خرجت جميلة وهي سرحانة والدموع في عينها
روان: فين المفتاح
جميلة: مفتاح ايه
روان: البدروم يابنتي انتِ كل ده بتجبيه
جميلة: اه لا ملقتوش لما بابا.. يجي لما يجي بقا
روان بصت لملك باستغراب وملك قالت: جميلة انتِ كويسة؟
جميلة بنبرة حزينة: كويسة هو بابا فين
ملك: في المطبخ
طارق جه عليهم فجأة: خبوني بسرعة
سليم: وانا معاه
روان: هببته ايه تاني يا باااباااااااااااااا
عبدالله خرج من المطبخ بسرعة: في ايه يا ولاد المجنانين
اسلام دخل الشقة وجري ناحيتهم: وربنا ما انا سايبكم يا ولاد الكلب
عبدالله ضربه بالقفا: خاف بقا من الكلب يا حيوان لحسن اضربك بالبندقية اللي جوا
اسلام بوجع:اسف يابابا بس طارق الجزمة ده
عبدالله: هو جزمة فعلاً عمل ايه
طارق: ربنا يسامحك يا ابويا ياللي كنت فاكرك ابويا
ملك: هي هدومك مبلولة كده ليه
اسلام: البيه قالي عندي فكرة هتخلي مراتك تصالحك بسرعة
روان: اتطلقت ولا لسة؟
سليم: فال الله ولا فالك.. لسة
عبدالله: كانت ايه الفكرة دي يعني
اسلام: رقصت في الشارع على اغنية وخلينا الشارع كله يرقص ويهيص معانا وطيرت ورقة مكتوب فيها سامحيني يا نوري وبدل ما تسامحني عارف عملت ايه؟
عبدالله وهو بيبص لهدومه بسخرية: من غير ما تقول باين اوي
اسلام: كله بسبب طارق
طارق: الله وانا مالي اش عرفني ان الخناقة كبيرة للدرجة
ملك: بس عندي فضول هي اغنية ايه اللي خلت الشارع يهيص
سليم وهو بيغني: عارفة اللي عليها رمش عين تجيب رخل التخين
روان: الله يخربيتك انت شغلت اغنية بتقول كده ومستنيها تصالحك
اسلام: مهما اللي قالولي
عبدالله وهو بيقعد على الكرسي بتعب: منك لله حقها تعمل كده يا بعيد ده بدل ما تشغلها عبد الحليم
روان: عبد الحليم ايه انت كمان يابابا ده انت قديم اوي كان يشغلها عمرو دياب
ملك: لا انا بحب امير عيد
سليم: انا برأيي كان ويجز احسن وهو بيقول سحرتني ولا سحرتلي
روان بتفكير: فكرة حلوة برضو
اسلام بزعيق: وكان فين افكاركوا والزفت ده بيختارلي اغنية
طارق: عيب الفاظك يا اسلام تقول كده قدام بابا
سليم وعبدالله: بعد كده قوله من وراه
عبدالله بملل: حتى بقيت أقلد قلش سليم الملزق يارب اسمع يا واد انت هروح لحماك اصلح كل حاجة واجيب العيال
اسلام وهو بيبوس ايده: ربنا يخليك ليا يا ابويا
عبدالله ربت على كتفه بحنان: ويخليك ليا يا اخرة صبري ده انت اللي بيهم
جميلة بصت ليهم بدموع وعدم استيعاب واتمنت ان الورقة تكون مزورة وعبدالله لاحظ شرودها وقال: مالك يا جميلة مش عادتك السكوت
اسلام قال بابتسامة: اصل انا صعبان عليها هي الوحيدة اللي متريقتش عليا اللي مني
جه اسلام يحضنها رجعت هي خطوة لورا والكل بص عليها باستغراب واولهم اسلام اللي خاف يكون عملها حاجة زعلتها وسألها بسرعة: في ايه يا جميلة انا زعلتك في حاجة
جميلة بصت عليه بدموع وحاولت تبتسم وقالت: لا يابني بس انت هدومك مبلولة وانا لسة مغيرة البيجامة
اسلام ضحك: تمام افتكرت في حاجة
سليم: هي دي اللي منك ها
اسلام: اسكت يلا جميلة الجميلات تعمل اللي هي عايزاه
جميلة: تسلم يا سيمو عن اذنكوا هتأكد ان الاكل تمام
ملك: وانتِ كملي كنس
روان: يووهه ماشي يا بنت مرات ابويا الحربوقة
عبدالله: اتصل بزين شوفوا اتأخر ليه
اسلام: اتصلت قالي انه مستني مريم تخلص وهيرجعها
عبدالله: تمام ربنا معاكي يامريم يارب واللهم لو غلطت في سؤال المصحح يتعمي كدهو وميشوفهوش
كلهم قالوا وهما رافعين ايدهم: آمين
عبدالله: أما اروح اشوف جميلة بقا لحسن تولع في المطبخ
___________________هنامحمد_________
عند المدرسة كانت مريم بتمشي وهي بتتنطنط وترقص وبتقول: رسميا مبقتش في وزارة التربية والتعليم الليلة هنعمل هوليلة
جه واحد عليها: هشوفك بقا ازاي انا كده
مريم: عارف ايه احسن حاجة في اني خلصت الثانوية العامة يا حسام؟
حسام: ايه هي
مريم: اني مش هشوفك تاني
حسام: والله!؟ اتقلي انتِ بس واول ما هكون نفسي هاجي اتقدملك
مريم وقفت فجأة: هتتقدملي ازاي يعني
حسام: هروح اشرب شاي مع باباكي هو ايه اللي ازاي
مريم: معندناش شاي
حسام بابتسامة: خلاص هجيب وانا جاي
مريم: حسام انا مش فاضية لهزارك ده وزين مستنيني برا
حسام بغيرة: زين مين!!
مريم بخبث: وانت مالك مين
حسام: بت يا مريم اتظبطي وقوليلي مين البأف اللي برا
مريم بضحك: زين لو سمعك بتقول عليه بأف مش هيخليك تعرف تتجوز في حياتك كلها اصلا
حسام: انجزي يامريم
مريم: اوفف اخويا يبقى اخويا خلصت كده
حسام: اخوكي ازاي مش هما سليم وطارق
مريم: لا في زين واسلام كمان يا اخويا
حسام: مريم اتظبطي انا مش اخوكي وبجد لما ازبط نفسي في شغل الورشة واكبرها هتقدملك
مريم: وانا هستناك
حسام بابتسامة: انتِ قولتي هتستنيني صح
مريم وهي بتبلع ريقها وبتمشي عشان تروح لزين:
انت وحظك
حسام بصوت عالي: وانا متأكد انك هتستنيني يا مريم
مريم مشيت بسرعة وبخجل وطلعت برا البوابة وشافت زين واقف ساند على العربية بصت ليه بابتسامة وهو اول لما لاحظها قال بقلق واضح: ها يا مريم عملتي ايه
مريم بفرحة: الحمدلله الامتحان عرفت احله كان في كام سؤال وقفت فيهم بس الحمدلله عرفت احلهم ف الاخر
زين حضنها وقال: اختي الدحيحة تعالي اما اعزمك على سبيرو سباتس
مريم: اشطا يسطا
زين: يلا اركبي
ركبوا العربية وهي سرحت في ان ممكن تجيب مجموع ايه واتوترت بس جه على بالها حسام وابتسمت بسرحان
____________________
عبدالله: ايه يا جميلة الاكل مظبوط
جميلة: اممم
عبدالله: طب ايه اللي مدايقك؟
جميلة: مفيش يابابا
عبدالله: عليا انا يابت انجزي وقولي
جميلة بدموع: هو اسلام ابنك ولالا
عبدالله بتوتر: انتِ بتقولي ايه
جميلة قربت منه: بسأل يابابا اسلام ابنك قول انه ابنك وقول ان الورقة اللي شوفتها عندك دي مزورة
عبدالله كتم بقها بسرعة وقالها بهمس: شش هفهمك كل حاجة يا جميلة بس ارجوكي مش هنا مش هينفع حد يعرف ارجوكي
جميلة بصدمة وحزن لأنها كان عندها امل ان ده كدب:
يعني دي حقيقة؟
عبدالله بص عليها بحزن وحرك راسه بمعنى ايوا وقال:
ارجوكي يا جميلة اتمالكي نفسك كلنا هنتدمر لو حد عرف خصوصا اسلام ها
جميلة بصوت خافت: حاضر
عبدالله طلع البلكونة ودمع وهو بيفتكر الماضي وجه اسلام وبص عليه باستغراب: بابا انت كويس
عبدالله مسح دموعه بسرعة: متقلقش يا اسلام كويس هروح اصلح اللي هببته مع مراتك وجاي
اسلام: اجي معاك؟
عبدالله: تعالى هيبقى احسن
ومشيوا هما الاتنين وروان وسليم قعدوا يتخانقوا كعادتكم
جميلة خرجت من المطبخ وبتقلع الشبشب: اقسم بالله لو ما سكتوا هفرمكم يا كلاب
روان: هو اللي عايز ياخد البلايستيشن
طارق بص ليها بصدمة: بلايستيشن مين يا ساقطة فيزيا خشي جوا ذاكري يلا
روان: يا طروقة
جميلة بحدة: يلا روان يا جزمة لو سقطتي تاني هجوزك وانتِ قاصر ومش هيهمني قانون ولا غيره سامعة
روان: وماله البت ملهاش الا بيت جوزها
ملك بصدمة: انتِ مستحيل تكوني طبيعية
روان: ايوا ودوني العباسية بس متخلونيش اذاكر
جميلة زعقت فجأة والكل اتخض: طارق ربيها مش ناقصة
طارق بتوتر: هدي اعضائك يا جميلة هربيها اهو همس لملك اللي كانت جنبه: جاتلها الحالة النيلة
ملك: جميلة؟
طارق حرك راسه بمعنى ايوا
ملك بهمس: ماشاءالله طلعت العيلة اجن منها مفيش
جرس الباب رن وسليم راح يفتح لقاه زين ومريم وسليم قال بسرعة: مريم جت
كلهم جريوا ناحيتها وقعدوا يسألوها وجميلة تطبطب عليها بدون سبب وطارق يجبلها ماية مريم في الاخر قالت: خلااااااااااااص يا باااابااااااااا الحقنيييي منهمم
جميلة بحزن: مش موجود
مريم بخضة: ايه بابا ماله مات
سليم ضربهم الاتنين: بعد الشر يا حلوفة عملتي ايه
مريم: حليت والله اهدوا
روان: اصل الفيزيا دي مكارة زي الثعلب فمستحيل تبقى سهلة
مريم بسخرية: مستحيل تبقى سهلة على الاغبياء فعلا
روان بغيظ: ايش تقصدي
جميلة: يعني الامتحان كان سهل
مريم: كان في مستوى المتوسط
جميلة: طب الحمدلله روح ياسليم وطارق هاتوا الحاجة
طارق وسليم راحوا وغابوا دقيقتين ورجعوا بمستلزمات تنضيف
جميلة: بما انك خلصتي يلا نضفي الشقة اللي فوق بقالك سنة منضفتيش حاجة
مريم: فكك مني دلوقتي يا جميلة
روان: يلا يا ميرو لاحسن هتلبسهالي انا
جميلة: والله فكرة رجعت في قراري انتِ لازم ترتاحي برضو يلا يا روان نضفيها
روان: ايه!! انا نضفت الشقة كلها متهزريش
ملك بسخرية: مش كنتي عايزة تعيشي عيشة الاميرات
روان بحزن: ربنا على الظالم والمفتري
___________________________
كانت سعاد بتجهز الغدا وسمعت الجرس بيرن راحت فتحت لقيته عبدالله وابنه اسلام
عبدالله: السلام عليكم اسفين ان احنا جينا من غير معاد يا سعاد هانم
سعاد: حضرتك تيجي في أي وقت يا استاذ عبدالله البيت بيتك اتفضل هنادي على نور ووليد باشا وجاية
ودخلوا قعدوا في الصالون وعبدالله قال لاسلام: اول ما مراتك تيجي تدخل للعيال تتكلم معاهم وتهزر وتعتذرلهم سامع؟
اسلام: سامع يابابا
وليد دخل عليهم بهيبة وسلم على عبدالله باحترام وعبدالله اعتذرله ووليد اتقبل الاعتذار والموضوع بقا لين من ناحية وليد وسعاد شوية
نور دخلت عليهم في وسط كلامهم وتجاهلت اسلام تماما و راحت لعبدالله وباست ايده وقالت: ازي حضرتك يا بابا عبدالله
عبدالله: كويس الحمدلله يا بنتي الحلوة يا عسل
اسلام: وانا مفيش ازيك ولا السلام عليكم حتى
نور ببرود: سوري مختش بالي
عبدالله: خش يا اسلام لولادك يلا
اسلام بضيق: حاضر يابابا
عبدالله بهدوء: بعد اذن حضراتكم ممكن اتكلم مع نور لوحدنا
وليد حرك راسه بالموافقة وعبدالله راح مع نور البلكونة وقالها: انا مش هقولك ارجعي لاسلام على فكرة ولا انك تيجي على نفسك وتسامحيه.. اسلام حكالك حاجة عن مامته او اهله عموما
نور: قالي انها ماتت وان عند حضرتك 5 عيال تانيين بس مش فاهمة ايه علاقة ده بالخناقة
عبدالله اتنهد جامد: ليه علاقة اسلام اتعذب كتير في حياته عرف عن مامته انها خانتني و كانت خناقة كبيرة عايز انه هو اللي يحكيهالك ابتسم بسخرية: على رأي ملك تلاقيه اتعقد فعلا وعرفت ده لما شك فيكي بس صدقيني ميقصدش يابنتي غصب عنه اللي شافه من اللي مفروض تبقى قدوته وتبقى حضنه لما يحتاجها يخليه يعمل كده
نور جت تتكلم لكن عبدالله قاطعها: انا مبقولش انه مش غلطان لا ده غلطان ونص كمان وانا ربيته ورديت الضربة ليه اقولك سر
نور: ايه هو؟
عبدالله فتح الشنطة اللي كانت معاه وطلع فيها حزام غليظ: خدي ده اضربي اسلام بيها لما يجي ينام لو رجعتي
نور ضحكت باعلى صوتها: انت كده بتحمسني ارجع
سليم كان في الاوضة بيصالح ولاده وبيلعب معاهم
مروج: بث انت كنت جتنل مان يابابي
اسلام بضحك: اسمها جنتل جنتلل يا عيون بابي
وفجأة سمع صوت ضحك نور العالي وقال بغيظ: ماشي يا نور بتضحكي مع ابويا وانا لا
يونس: بتغير ولا ايه يا ابويا شكل الحب ولع في الدرة
اسلام بص ليه باستغراب: انت ابن مين يا ولد
يونس: ابنك للاسف
اسلام بصدمة: للاسف يا حيوان انا معرفتش اربي
يونس: معلش بقا انت مكنتش فاضي
اسلام بص لبنته اللي كانت بتاكل الشوكلاته بطريقة كيوت ضحك عليها وقال: انا عرفت بابا كان مدلع البنات اكتر ليه يا خوفي تقعد مع يونس كتير تتلوث
يونس بصدمة: هتبعدني يا ابويا عن اختي اللي مليش غيرها
اسلام غمزله وقال: لا لما امك ترضى عني هعمل إمبراطورية زي جدك
يونس: اذا كان كده ماشي عايز 20
اسلام ضحك وقال: لا كده امك هتفلسع
نور دخلت عليه وقالت بحدة: يلا عشان هنرجع
اسلام نط من على السرير: انتِ بتتكلمي بجد
يونس: ايه يا ابويا برستيجك
اسلام وهو بيفتكر اللي عمله من ساعات: هي امك خلت فيا برستيج.. يعني انتِ سامحتيني يا نور
نور: خايفة اسامحك وتكررها تاني
اسلام راحلها وباس ايدها: والله ما هكررها تاني
نور بدموع: عموما الولد اللي شوفتني معاه ده كان
اسلام مسح دموعها بحنية: مش عايز اعرف هو مين انا واثق فيكي
نور: بس..
اسلام: شش خلاص يا نوري مش عايز اعرف انا متأكد انك كنتي حاطة حدودك معاه.. ويلا هنوصل بابا والعيال وهاخدك افسحك عارفة هنروح فين
نور: فين؟
اسلام: هنروح يومين بحر اسكندرية
نور: بتهزر صح والعيال
اسلام: ما انا قلت مع جدهم الله الله
نور بحماس حضنته وقالت: شكرا يا سيمو
اسلام: العفو ياروح سيمو
يونس: احنا هنا على فكرة
اسلام ضحك وقال: تعالى يا لمض
والاربعة حضنه بعض وكان شكلهم شكل عائلي لطيف🥹
نور همست في نفسها: شكلي هتخلى عن حزامك يا بابا عبدالله
__________________________
عبدالله راح لبيته وكان معاه احفاده اللي قعدوا يلعبوا مع روان ومريم كانت نايمة طول اليوم وملك طلعت للشقة اللي فوق وجميلة كانت طول يوم سرحانة في الحقيقة المؤلمة وزين كان قاعد مع سليم وطارق اللي اندمج معاهم اوي برغم اختلافهم في التفكير
كانت ملك بتتفرج على مسلسل تركي ورن فونها باسم “شادي” خطيبها وردت عليه
ملك: معلش يا شادي معرفتش اكلمك النهاردة اصل..
شادي: ملك انا مش هقدر اكمل في العلاقة دي
ملك: انت بتهزر صح؟
شادي: انا اسف يا ملك انا حاسس اني مش مرتاح معاكي وكنت فاكر اني هحبك بس طلعت غلطان وظلمتك معايا
ملك: كنت فاكر؟ يعني انت اصلا محبتنيش وكنت بتوهمني بده!
شادي: انا عارف اني غلطان في حقك وبجد انا ندمان بس انا لو كنت كملت معاكي يا ملك ودوست على قلبي هظلمني وهظلمك معايا فنهايتها من البداية احسن
ملك بدموع: اسكت يا شادي انت بتعك في الكلام اكتر اصلا وكإنك حافظ مش فاهم.. تعالى خد حاجتك من بابا وربنا يوفقك في حياتك عامةً وهفتكرلك الحلو اللي عملته معايا متقلقش
شادي بحزن: وانا برضو يا ملك.. سلام
ملك قفلت معاه وقعدت تعيط جامد وحست ان كل حاجة مش بتمشي معاها زي ما هي عايزة حتى خطيبها اللي حبته اهو فسخ الخطوبة اتمنت انه مقلب لكن صوته كان واضح عليه الجدية.. بكت كتير وكان قلبها بيبكي قبل عيونها
جرس الباب رن وهي افتكرته زين مسحت دموعها باهمال عشان مش فارق معاها منظرها قدامه فهو شافها بكل احوالها بس فتحت واتصدمت انه سليم
ب بتعمل ايه هنا
سليم بصدمة: مالك ايه اللي معيطك بالشكل ده
ملك: مفيش دي حاجة دخلت في عيني.. عايز حاجة
سليم مد ايده ليها بصور وهي خدتها وقال: مستنتش لبكرا بصراحة وعملتهملك نسخة النهاردة
ملك بابتسامة: شكرا ليك
سليم وهو بيبص للارض بتوتر: مفيش حاجة في الدنيا تستحق زعلك على فكرة دموعك اغلى من اي حاجة بجد
ملك ابتسمت بدموع وقالت بصوت مبحوح: هو انا حلوة؟
سليم بص ليها باستغراب مين اللي اتجرأ يهز ثقتها بنفسها وهو موجود قال بسرعة: مفيش احلى منك في الدنيا اصلا ومتخليش حد يبينلك العكس انتِ جميلة في شكلك وروحك يا ملوكة
ملك وهي على وشك الانهيار: شكرا.. ع عايز حاجة تانية قبل ما اقفل؟
سليم حضنها فجأة وهي حضنته جامد وقعدت تعيط وهو قال بدموع: مين اللي زعلك يا ملوكة وانا افرمه ومش هخلي في حتة سليمة
ملك ضحكت وقالت: ربنا يخليك ليا يا سولي
سليم: من ساعة من واحنا صغيرين وانتِ مقولتيش الدلع ده
ملك: هقولوا على طول متقلقش
سليم بمرح: اشطا
ملك: انا اسفة اني خليتك تحس ان انا مش بحبك.. بس كنت شايفة ان بابا بيحبكوا اكتر فكنت بتصرف كده بدافع الغيرة
سليم: مش لازم تبرري على فكرة المهم علاقتنا اتحسنت مش كده؟
ملك بدموع: ايوا
سليم حضنها بحنان تاني وقال وهو بيضحك: خلاص متعيطيش يا عيوطة.. دموعك دي تنزل لما روان تسقط تاني بس
ملك ضحكت جامد: تعالى ادخل يسطا واحكيلك على همومي
سليم بمرح: يلا اصل انا الدكتور النفساني بتاع العيلة
” لما تلاقي حد بيطبطب عليك في عز حزنك وتعبك اعرف قد ايه انت محظوظ.. سليم هنا مقدرش يمحي وجعها لكن قدر يخففه من كلامه برغم انه مش عارف سبب عياطها ❤️🩹”
____________________________
في السطح
عبدالله بشرود: عايزة تعرفي ايه يابنتي
جميلة: افهم الحقيقة
عبدالله: قبل ما احكيلك أي حاجة .. الحقيقة مؤلمة ولو الناس عرفتها بتتوجع يابنتي بتبقى في حجات مينفعش تتعرف الا وهتسيب مكانها قلب مكسور.. اوعديني انك عمرك ما هتعرفي اسلام لأنه لو عرف هيتدمر واخواتك كمان خصوصا ملك وزين اللي هياخدوا صدمة كبيرة لو السر ده اتكشف.. اوعديني ياجميلة
جميلة: بوعدك يابابا ان مستحيل اقول لاسلام
عبدالله: يبقى هحكيلك
________________________________
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية امبراطورية بابا)
