رواية النصيب الفصل الثاني عشر 12 بقلم رحاب القاضي
رواية النصيب الجزء الثاني عشر
رواية النصيب البارت الثاني عشر
رواية النصيب الحلقة الثانية عشر
#النصيب
_الحلقه الـ ١٢
ـــــــــــــــــــــــــــــــــــــــــــــ
وأخذتُ أنظرُ للطَّريقِ مُعاتبًا..
ـــــــــــــــــــــــــــــــــــــ
_في بيت الفيومي كان ادهم ورحمه قاعدين قدام فؤاد وهاله اللي كانت متوتره جدا وقربت من فؤاد وقالت بصوت واطي…
هاله
أسر لو جه وشاف الراجل ده هنا هيولع في البيت كله
فؤاد
واعمل ايه يعني، بس انا حاسس ان البنت هتختار الراجل المحترم ده..
هاله بغيظ
فشررر هو يجي ايه ده في أسر اخويا القمر..
فؤاد
علي أساس انه بجد ما انا وانتي عارفين ومتأكدين ان اخوكي بيعمل حوار والله واعلم في نيته ايه؟..
اتوترت هاله وردت عليه
لا لا علي فكره انا كلمت شهد وقالتلي انها هي وأسر من اول ما جات هنا وهما معجبين ببعض..
فؤاد بسخريه
اممم بأمارة انه حاول يتحرش بيها اكتر من مره..
هاله بغيظ
اهي هتبقي مراته وحلاله وهما حلو الموضوع مع بعض ما تبقاش انت عامل بس زي عواجيز الفرح
قاطع حوارهم ادهم لما قال
لو سمحت يا فاروق بيه لو هي مش موجوده قول وانا هدور عليها
فؤاد
فؤاد الفيومي مش فاروق، وهي موجوده وجايه حالا والا ما كنتش هطلب منك تستني انت والمدام..
رحمه
انسه والله العظيم..
هاله بخبث
هو انتي مش مراته؟..
رحمه بتوتر
هاا لا انا مش متجوزه..
هاله
اومال انتي مين وهو مين وايه علاقتكم بشهد؟..
مال عليها فؤاد وقال
انتي هتستعبطي ما شهد حكيالك. كل حاجه..
هاله
اسكت انت شويه، هاا انتو مين؟..
كانت رحمه هترد بس سبقها ادهم وقال
دي الانسه رحمه صاحبة شهد، وانا الدكتور ادهم خطيبها وهبقي جوزها قريب ان شاء الله
فؤاد
ان شاء الله بعد اذنكم هروح استعجلهم..
مسكت هاله في ايده وقالت بغيظ
ده. كان بيقول خطيبها يعني شهد مش هتتجوز اخويا
فؤاد
ده من حسن حظها وسيبي دراعي كده اوعي
_وسابهم وطلع وقف في الجنينه وكلم أسر تاني وبدأ يقلق بسبب تأخريهم، وفي الوقت ده كان أسر سايق العربيه بسرعه كبيره وشهد قاعده جنبيه وبتعيط بخوف ورعب حقيقي باين اووي عليها بسبب خوفها من اهلها واللي ممكن يعملوه فيها، وقف أسر بالعربيه فجأه اول ما شاف اسم فؤاد اللي كان بيرن عليه وبص بغضب لشهد اللي اتخبطت في الشباك بسبب وقوفه المفجئ بالعربيه وقال بجمود..
أسر
ساعتين تلاته بالكتير وهكون في بلدكم..
شهد برجاء وخوف
ارجوك بلاش توديني هناك وانا قولتلك والله هعملك كل اللي انت عايزه..
أسر بهدوء
هرد علي فؤاد واقوله اننا في الطريق، وهنروح البيت تقابلي الواد اللي عامل فيها حبيبك ده وتقوليلو انك مخطوبه ليا انا وبتحبيني وهتتجوزيني انا فاهمه؟..
شهد ببكاء
هو انت مش كنت بتقولي اختاري اوافق ولا لا، دلوقتي بتغصب عليا ليه؟..
أسر بحده
لا يا روحمك انا قولتلك اختاري يا توافقي بيا يا هوديكي لابوكي ده اللي قولته..
ما ردتش عليه شهد وفضلت تعيط وهو قال بخبث
هااا هتعملي ايه؟..
ردت عليه بحزن
اللي انت عايزه هعمله..
أسر ابتسم بأنتصار وقال
ايوه بقي هو ده الكلام..
شهد بقلق
هنرجع البيت مش كده؟..
أسر بخبث
تؤ هنروح نعمل. حاجه. مهمه اووي الاول…
شهد بحده وخوف
لا لا انا مش هتجوزك بسرعه كده انا عارفه انك دلوقتي هتجبرني اتجوزك…
أسر
هو. مين جاب سيرة الجواز؟..
وبصلها من فوق لتحت وقال بسخريه
وخايفه اووي كده ليه من الجواز هي اول مره يعني ما انا عارف اللي فيها وانك مطلقه..
شهد بدموع
وهتتجوز ليه المطلقه بقي ما تدور علي واحده غيري..
أسر بجمود
اختار اللي عايزه بمزاجي وانا عاجبني اللعب معاكي يا شوشو، بس مش تلعبي انتي بيا شويه ااه وشويه لا كده انا هزعل وزعلي انتي مش قده…
ردت عليه شهد بنبره وكأنها تحمل حزن العالم
انا ما بلعبش بحد انا الدنيا كلها بتلعب بيا حتي اهلي ما رحمونيش…
ضحك أسر بسخريه وقال
انتي كان نفسك تطلعي ممثله مش كده؟..
ردت عليه بتجاهل لسخريته وقالت
احنا هنروح بيتكم دلوقتي صح؟…
أسر
لا هنروح مشوار مهم الاول..
شهد بجمود
طيب..
أسر
مش عايزه تعرفي هاخدك فين؟..
شهد بدموع
مدام مش هتوديني عند اهلي يبقي عادي مش فارقه اروح فين..
اتحرك أسر بعربيته فقالت هي بسرعه وخوف
ما تسوقش بسرعه معلش انا بخاف..
أسر بهدوء
حاضر…
_واخدها ومشيو ووقفو بعد شويه قدام اتيليه ملابس راقي اووي، وبصلها أسر وقال بجديه..
أسر
انزلي يلااا..
شهد
هنعمل ايه هنا؟!
أسر
اكيد يعني مرات أسر الفيومي المستقبليه ما ينفعش تبقي بالمنظر ده..
شهد بغيظ
خلاص دور علي واحده يكون منظرها لايق بيك..
أسر
هو انتي كل شويه تقوليلي دور علي واحده دور علي واحده..
وقرب منها بحركه سريعه وقال بخبث
انا اختارتك انتي ومش هختار غيرك فبطلي تقولي كلامك اللي مالوش لازمه ده..
شهد بتوتر وخوف من قربه
ابعد عني…
_ابتسم بهدوء وبعد عنها ونزل من العربيه وفتحلها الباب وقال بهدوء..
أسر
يلا بسرعه عشان نلحق نرجع البيت…
_نزلت شهد من العربيه ودخلت معاه الاتيليه ولاحظت ان في اهتمام كبير بأسر من صحاب المكان، وبعدين بدأ يختارلها فساتين شكلها حلو جدا بس ما تناسبش لبسها ولا حجابها…
أسر
دول حلوين اووي ومناسبين لحجمك الصغير ده..
شهد باحراج
احترم نفسك لو سمحت، وبعدين انا مش هلبس الحاجات دي..
رد عليها أسر بسخريه وقال
اومال انتي عايزه تلبسي ايه يا سكر اجيبلك شوال تلبسيه..
شهد بضيق
انا محجبه ومش هينفع البس الحاجات دي ولا اي حاجه من اللي هنا..
أسر
بصي لنفسك في المرايا بالحاجات اللي لابساها دي باين وكأن عندك فوق ال30سنه مع انك اصغر بكتير..
شهد
الحجاب مش مخلي شكلي كبير وحتي لو انا مرتاحه كده..
أسر بحده
وانا مش عاجبني شكلك كده وتقلعي البتاع اللي علي شعرك ده وبعد كده تقولي علي اي حاجه اقولهالك حاضر والا هنروح نزور اهلك ماشي يا شوشو..
شهد بدموع
طيب انا هعملك كل حاجه بس ما تخلنيش اغير لبسي بالشكل ده، علي فكره كده حرام و..
أسر بحده
خلصنا ومش هتعملي شيخه عليا يا بت انتي ده انتي هربانه من اهلك مع عشيقك ولا انا فاهم غلط..
شهد بدموع
لا والله هو اا..
مسكها من دراعها جامد وقال
ما اسمعش صوتك بكلمة لا دي خالص ومن النهارده اللي انا اقوله انتي تقولي عليه حاضر وبس..
شهد بألم ودموع
حاضر..
_اداها الهدوم وطلب منها تدخل تقيسهم وتوريه، وراح هو قعد علي الكنبه اللي قصادها، وزي عادته حط رجل علي رجل وطلع سيجارته وبدأ يشرب فيها ببرود..
_ودخلت شهد الاوضه اللي هتغير فيها هدومها ودموعها ماليه عيونها بألم وحزن علي كمية الزل اللي بتتعرض ليها من أسر، وبصت لنفسها في المرايا وقالت بجمود..
شهد
زي ما هربت من اهلي لازم اهرب منك انت كمان يا أسر بيه…
_وبعد شويه فتحت شهد باب الاوضه وطلعت وهي لابسه فستان من اللي اختارهم أسر وكان لونه بني يصل لاسفل الركبه وواسع شويه من غير اكمام ومقفول من فوق بطريقه لطيفه وشعرها لسه زي ما هي ملموم ومربوط، ابتسم هو بأعجاب وقال…
أسر
طيب ما انتي حلوه اهو مخبيه كل ده ليه؟..
شهد بتوتر ودموع
انا مش هينفع امشي كده في الشارع..
قام أسر وقف قدامها وقال
طول ما انتي معايا اعملي اللي عايزاه وما حدش هيقدر يدايقك..
شهد بحده
انا مش كده ولاده لبسي ولا دي طريقتي..
أسر بغيظ
انتي ليه عنيده كده ما تسمعي الكلام وخلاص وافردي شعرك ده..
شهد بتوتر
لا انا عاجبني كده…
_قرب منها ومسك ايدها بعتف وشال توكة شعرها وفرده ليها بهدوء وابتسم بخبث وقالها بهدوء…
أسر
تسمعي الكلام بعد كده عشان ما اتصرفش انا بنفسي معاكي..
بعدت عنه وقالت بحده
ما تقربش مني كده وما تلمسنيش خالص..
أسر بهدوء
يبقي تسمعي كلامي عشان اسنع كلامك، هناخد باقي الحاجات اللي اختارتهالك دي وهنمشي يلاا..
ــــــــــ #بقلم_الكاتبه_رحاب_القاضي ــــــــ
_وفي بيت حما محمد اخو سعيد، كان قااعد هناك سعيد مع فتحي ابو نسمه ونعمه مرات محمد وقال بجديه..
فتحي
يعني انت يا سعيد جاي تطلب ايد نسمه بنتي؟..
سعيد
ايوه يا عم فتحي ده بعد اذنك طبعاً…
فتحي
بس انا بنتي دي اول جوازه ليها انما انت كنت متجوز ومطلق و..
قاطعه محمد وقال
لامؤخذه يا عم فتحي بس اخويا لا معاه عيل ولا غيره والحته كلها عارفه ان العيب من بت صابر اللي كانت زاعمه علي العيشه بتاعتنا واهي كمان طفشت من اهلها..
فتحي
طيب يا سعيد امك فين مش واجب كانت تيجي معاك؟..
محمد
احنا بس نتفق يا عم فتحي وبعدين امي هتيجي ونقرا فاتحه وكل حاجه..
فتحي
بص يا سعيد انت ابني زي محمد اخوك كده ما انا بعتبره ابني من يوم ما اتجوز نعمه بنتي، ونعمه ونسمه دول اغلي حاجه في حياتي وانا بتعب وبشرب المر عشان اريحهم..
سعيد
انا تحت امرك يا عم فتحي في اللي تطلبه..
فتحي
ما يأمرش عليك عدو يا ابني، وانا مش هطلب غير الاصول، انا سمعت عن المشاكل اللي عملتها الست امك مع البت شهد وانها كانت سبب ان البت تطفش من اهلها، فانا لو هوافق هتتعهدلي انت واخوك ان امك مالهاش دعوه ببنتي ولا حتي تدخل عليها شقتها، انت عايز تروح لامك براحتك مش هنمنعك بس المثل بيقول ابعد عن الشر وغنيله وانا عايز امك لو حصل نصيب ما يبقاش ليها علاقه ببنتي وعلي فكره واخوك يشهد ان نسمه غير نعمه خااالص، ها قولتو ايه؟..
بص سعيد لمحمد بقلق، ومحمد رد علي حماه وقال
واحنا موافقين يا عم فتحي نتفق بقي علي الشبكه والمهر والمؤخر..
فتحي
نتفق يا ابني علي بركة الله..
_وبدأ فتحي يقولهم علي اللي عايزه ويتناقش معاهم تحت خوف سعيد من رد فعل امه واللي ممكن تعمله فيهم بعد ما تعرف انه خطب من وراها وكمان لما تعرف بشروط فتحي، وفي نفس الوقت في اوضة بطلتنا الجديده نسمه اللي عندها 29 سنه وملامحها جميله وبسيطه جداً وباين اوي عليها الهدوء، وكانت قاعده بتعيط وامها قالتلها بحده..
ناديه
ما تتهدي بقي يا بت انتي هو انتي ليه محسساني اننا بنرميكي في النار..
ردت عليها نعمه وقالت
قوليلها يا ماما دي خايبه ومش عارفه مصلحتها فين…
نسمه بحده
وفين مصلحتي في اني اتجوز واحد زي سعيد ابن امه ومالوش كلمه لا مع امه ولا اخوه..
نعمه
اولا محمد جوزي بيحب اخوه وعمره ما يعمله حاجه وحشه، ولو علي حماتي فانتي وشطارتك بقي تخليه يرمي الدنيا عشانك..
ناديه
ده كلام مالوش لازمه يا نسمه وبصي لنفسك يا حبيبتي انتي خلاص هتدخلي التلاتين سنه اهوو ويمكن انتي وسعيد في سن بعض..
نعمه
لا وكمان اللي اصغر منها اتجوزو وخلفو، واحنا فيها البت شهد مرات سعيد الاولي كانت اصغر منك بكام سنه؟..
نسمه بدموع
هو انا تعباكم في ايه انا مش عايزه اتجوز سعيد ده انا حره..
ناديه
لا مش حره وتسمعي الكلام اللي نقولك عليه، انا زهقت من كلام الناس اللي عماله تقولي بنتك البايره راحت بنتك البايره جات..
نسمه بحزن
ماشي يا ماما هتجوز سعيد زي ما انتو عايزين وابقي افرحي لما ابقي مطلقه مش بايره..
نعمه
فال الله ولا فالك..
ناديه
تبقي خيبتك لو اطلقتي….
نعمه
ما تخافيش يا ماما انا معاها ومش هسمح ابدا ان اختي تطلق لاي سبب..
ــــــــــ #بقلم_الكاتبه_رحاب_القاضي ــــــــ
_وفي بيت الفيومي..
قالت رحمه بصوت واطي لادهم
بقولك ايه يا دكتور انا متأخره وعايزه ارجع البيت والا ابويا هيعمل مني بطاطس محمره للقطط..
وقف ادهم وقال
واضح كده انكم بتطردونا بشياكه ومش عايزينا نشوف شهد، بس انا هعرف اخدها من هنا بطريقتي برضو..
رد عليه فؤاد بهدوء وقال
مهما كانت طريقتك دي مش هتقدر تعمل حاجه مع عيلة الفيومي يا دكتور ادهم، بس انا مش هاخد كلامك ده علي سبيل التهديد وشهد جايه في الطريق انت والانسه اللي معاك عايزين تستنوها يا اهلا وسهلا البيت بيتكم، ولو مش عايزين في اي وقت البيت بيتكم برضو..
هاله
ده صوت عربية أسر اهم وصلو..
قعد ادهم تاني في انتظار انه يشوف شهد اللي هربت منه من غير ما تديله فرصه يبرر الغلط اللي كان هيرتكبه معاها، وكانت صدمته كبيره اول ما دخلت شهد بهيئتها الجديده وهي ماسكه ايد أسر اللي بص لادهم بضيق وقال لفؤاد..
أسر
عندنا ضيوف ولا ايه يا ابو نسب؟..
هاله بصدمه
شهد ايه اللي انتي عملاه ده؟..
قام ادهم وقرب منها وقال
شهد انا ااا..
وقف أسر قدامه وقال بجمود
يا نعم انت ايه؟..
خافت شهد جداً وادهم بصلها بضيق وقال
انا بتكلم معاها هي مش معاك انت، تعالي يا شهد احنا لازم نتكلم..
أسر بحده
انت اتهبلت يالا في دماغك تروح معاك فين، شهد مش هتمشي من هنا..
فؤاد بحده.
أسر سيب شهد. تعمل اللي هي عايزااه وانا من. رأيي اسمعي الدكتور ادهم يا شهد لان واضح ان كان بينكم. سوء تفاهم…
بصلها أسر بخبث وقال
ردي يا حبيبتي عليهم..
أدهم بحده
حبيبتك ايه، هو ايه اللي بيحصل ده يا شهد؟..
شهد بدموع بصت للارض وقالت
زي ما سمعت…
ادهم بحده
هو ايه اللي زي ما سمعت، هو ايه اللي حصل اصلا عشان تسبيني وتمشي ما كنتيش موافقه انا ما كنتش هغصبك علي حاجه وكنا هنشوف حل تاني..
رد عليه أسر بحده وقال
ما خلاص بقي يا نجم بتلت كتير ليه ما هي قالتلك انها تخصني..
فؤاد بحده
اسكت يا أسر وسيبها هي اللي تتكلم..
أسر بعصبيه
لا مش هسكت وخطيبتي مش هتتكلم معاه ولا مع اي حد غريب ويتفضل بره هو واللي معاه بدل ما اخليه يطلع بطريقه تانيه..
رحمه بسرعه قالت
لا لا انا صاحبة شهد وجايه اطمن عليها، ما تتكلمي يا شهد..
شهد بدموع
ايوه دي صاحبتي..
قامت رحمه وحضنتها وقالت
يا فرج الله وحشتيني يا بت والله..
شهد بدموع
وانتي كمان وحشتيني اووي .
وبصت لادهم اللي كانت نظراته ليها حزينه جدا وقال
مبروك يا شهد يارب البيه يقدر يعوضك عن اللي حصلك زمان، بعد اذنكم..
رحمه
همشي انا كمان يا شهد وهبقي اجيلك وقت تاني بس عشان بابا ما يقلقش عليا..
شهد بنبره حزينه
ماشي هستناكي اوعي ما تجيش..
رحمه
لا ازاي من النجمه هكون عندك، سلام عليكم..
_ومشيت رحمه ورا ادهم وقبل ما يركب عربيته قالتله..
رحمه
دكتور ادهم استني..
ادهم
نعم يا رحمه؟..
رحمه
هو حضرتك مصدق اللي حصل جوه ده انا متأكده ان شهد. مغصوبه علي الراجل اللي جوه ده، ما حدش يعرف صحبتي قدي..
ادهم.
شهد ما بتعرفش تتغضب علي حاجه والا كانت وافقت علي قرارات اهلها او اللي طلبته منها في الاول اننا نتجوز في السر، فلو كانت مغصوبه كانت هتقول..
رحمه
طيب وانت هتسيبها خلاص..
ادهم بحده
هي اللي سابتني يا رحمه بعد. اذنك..
اخد عربيته ومشيت وهي قالت بغيظ
طيب حتي كنت استني وصلني الوقت اتأخر يا بجم…
جه فجأه من وراها السواق بتاع فؤاد وقال
اتفضلي معايا يا انسه..
رحمه بفزع
سلام قول من رب رحيم، في ايه يا حج حد يخض حد كده..
السواق
انا السواق بتاع فؤاد بيه وهو طلب اني اوصلك لبيتك…
رحمه بقلق
لا لاانا هروح لوحدي، اصل انا عارفه الخطط بتاعتكم دي يا ناس يا اغنيه انتو..
السواق
اتفضلي يا انسه لو سمحتي وما تقلقيش فؤاد بيه راجل محترم جدا مش زي ما حضرتك فاكره..
رحمه
بص انا همشي معاك بس انا عارفه الطريق كويس اي لحظة غدر هتلاقيني ماسكه في زمارة رقبتك..
السواق بغيظ
اتفضلي لو سمحتي…
ــــــــــ #بقلم_الكاتبه_رحاب_القاضي ــــــــ
_وبعد شويه في اوضة فؤاد وهاله، طلعت هي من الحمام وهي بتقفل الروب بتاعها وقالت لفؤاد اللي كان قاعد قدام اللابتوب بتاعه..
هاله
وبعدين يا فؤاد؟..
فؤاد بضيق
وبعدين في ايه هو مش انتي مبسوطه باللي بيعمله اخوكي وهو عمال يلعب بالبنت دي وبيستغل ضعفها، يبقي خليني ساكت احسن..
هاله بتوتر
انت ايه اللي بتقوله ده، ممكن أسر يكون اتسرع شويه بس هو اكيد مش هيأذي شهد ده هيتجوزها..
فؤاد
انتي مصدقه الكلام ده، هو أسر بتاع جواز ولا استقرار..
هاله بحزن
وليه لا ما يمكن شهد تغيره وو..
فؤاد بحده
احنا مش في مسلسل تركي يا هاله من بتوعك عشان الكلام ده يحصل، وأسر مش هيتغير بسهوله ولا هثق فيه وفي كلامه غير لما يبعد. عن كارم والطريق اللي ماشي فيه…
قعدت هاله قدامه وقالت بدموع
طيب خلينا نصدقه المره دي بس يمكن يتغير يمكن شهد تكون هي طوق النجاه ليه، البنت طيبه وتعرف ربنا وانها تبقي في حياة أسر اكيد هيتغير بيها هي..
ضحك فؤاد بسخريه وقال
بامارة انها قلعت حجابها هو كده مين اللي هيغير مين، روحي شوفي ابنك نام ولا لسه وتعالي نامي يا هاله..
هاله بضيق
انت ليه مش عايز تفهم اني خايفه عليه وعايزه اشوف اخويا احسن واحد في الدنيا، هو انت فاكر يعني اني مبسوطه وانا بسمع عنه انه صايع ومش كويس انا الكلام ده بيتعبني اووي وانا بسمعه وبسكت ومش بقدر ادافع عن اخويا…
فؤاد بحزن
انا مش قصدي يا هاله كده انا كمان زيك عايزه يبقي كويس بس مش معني كده اشوفه بيغلط واسكت علي الغلط ده انا كده ببقي بشجعه علي الطريق اللي ماشي فيه..
هاله بدموع
خلاص يا فؤاد احنا نقفل الموضوع احسن واللي انت شايفه صح اعمله، هروح اشوف تيام وجايه..
_قالت كلامها وسابته وخرجت من اوضتهم وكانت رايحه لاوضة صغيرها بس سمعت صوته جاي من اوضة شهد الجديده اللي صمم أسر ان شهد تقعد فيها لحد ما يتجوزها بدل ما تقعد مع الشغالين، راحت هاله عندهم واول ما فتحت الباب لقيت ابنها نايم في حضن شهد والاتنين بيتكلمو بشكل برئ وطفولي جداً..
ابتسمت هاله وقالت
اكيد تعبك اكتر ما انتي تعبانه..
قعدت شهد وقالت بضيق
لا عادي انا اللي جيبته اصلا عشان يبات معايا هنا مش عايزه اقعد لوحدي هنا..
هاله بتفهم لخوفها
علي فكره أسر مش وحش زي ما انتي فاكره كده انه ممكن يأذيكي هنا و…
قاطعتها شهد بدموع وقالت
لا ممكن يعمل كده واكتر من كده، انتي عشان هو اخوكي مش عارفه تشوفي انه شيطان، اللي يهددني بأنه يوديني لاهلي يا اتجوزو يبقي يعمل اكتر من كده اللي يجبرني اقلع حجابي وابقي بالمنظر ده يبقي يعمل اكتر من كده…
هاله بحزن
انا اسفه بجد مش عارفه اتصرف ازاي..
شهد بجمود
انا هربت من اهلي ليه مش عشان ما اتجبرش علي حياه كنت هتدمر وهتعب فيها، اكيد يعني انا ما عملتش كده. عشان اجي اتجوز أسر بالطريقه دي..
هاله
قصدك ايه؟..
وقفت شهد قدامها وقالت
قصدي انك تساعديني امشي من هنا، انا مش عايزه منكم فلوس ولا عايزه اكمل تعليمي ولا عايزه اي حاجه، انا بس عايزه شوية حريه اقدر اعيش براحتي من غير ما حد يتحكم في حياتي ولا يفرض عليا حاجات انا مش عايزاها، انا لو اهلي كانو خدو رأيي في جوازي من سعيد ما كنتش وصلت للوضع اللي انا فيه ده، لكن هما كانو بيجبروني علي كل حاجه زي ما أسر بيعمل بالظبط..
مسحتلها هاله دموعها وقالت بهدوء
بطلي عياط طيب وانا هساعدك. تمشي من هنا، انا كنت حابه ان اخويا يتجوزك بس واضح ان ما فيش نصيب..
شهد
انتي هتخليني امشي من هنا، بالله عليكي هتساعديني بجد؟…
هاله
والله العظيم هساعدك ومش هخلي أسر يوصلك خالص، نامي بقي واهدي وانا مش هخليه يأذيكي تاني ان شاء الله، بس انتي هتروحي لدكتور ادهم مش كده؟..
شهد بحزن
لا مش قادره ارتاح من ناحيته خالص، هحاول اتصرف بس مش هقعد هنا مش عايزه اقعد هنا..
هاله
حاضر خير ان شاء الله يا شهد، يلاا تصبحي علي خير..
_وسابتها هاله وطلعت، وشهد رجعت نامت جنب تيام، وبعد شويه في اوضة أسر كان قاعد علي الكنبه اللي في اوضته وهو بيضحك وقدامه تالا..
أسر
هاا وقالت ايه تاني؟..
تالا
ما قالتش حاجه غير اللي قولتهالك دي ومدام هاله قالت انها هتساعدها…
أسر ببرود
تمام خليها تساعدها اما نشوف بقي هتساعدها ازاي..
تالا راحت قعدت جنبيه وقالت
هو انت ليه ماسك في البنت دي كده، ما فيهاش حاجه مميزه عشان تبقي مرات أسر الفيومي..
أسر ببرود
مالكيش دعوه وانتي اخرك معايا اللي بيحصل بينا في السر ده ولو مش عاجبك بلاش..
تالا بغيظ
ماشي يا أسر يبقي بلاش احسن وشوف مين يجيبلك اخبار حبيبة القلب والحاجات اللي بتعملها من ورا ضهرك..
_قالت كلامها وسابته وطلعت، وهو قام ووقف في البلكونه وطلع سيجاره وولعها ببرود وضحك بهدوء وقال…
أسر
فاكره نفسك اذكي مني يا شهد، طيب اهربي اما نشوف هتروحي فين مني؟..
ــــــــــ #بقلم_الكاتبه_رحاب_القاضي ــــــــ
_وتاني يوم في بيت ام سعيد..
كان الوضع صعب جدا وخصوصا لما سعيد قال لامه انه خطب نسمه اخت مرات اخوه..
سعيد بقلق
طيب ممكن توطي صوتك يا امي..
ام محمد
لا مش هوطي صوتي انت ايييه فاكرني متت مش عاملي اي قيمه، قولي عملولك ايه ولا البت دي دخلت عليك ازاي عشان ياخدوك مني..
سعيد بضيق
ولا حاجه انا اللي روحتلهم، انا اللي عايز اتجوز وانا اللي اختارت نسمه..
مسكته امه من هدومه وقالت بحده
وما تجيش تقولي ليه، من امتي وانت بتعمل حاجه من ورايا ده انت يومك اسود..
_الباب خبط في الوقت ده وبعد عنها سعيد بسرعه وهو بيبصلها بخوف وراح فتح الباب ودخل محمد وقال بقلق..
محمد
في ايه مالها امك صوتها عالي كده ليه؟..
ام محمد بحده
انت جيت يا خرابه انت، ما هو ما حدش غيرك بيقويه عليا يا عاق..
محمد
ما هو انتي يا اما ما ينفعش معاكي غير اني ابقي عاق، بس عرفتيها منين دي اوعي تكوني بتتفرجي علي قنوات ديني من ورايا..
قلعت ام محمد شبشبها وقالت
اوعي من وشي، انا هربي ابني بمعرفتي وانت مالكش دعوه بينا بعد كده..
مسك سعيد في محمد وقال
اوعي تمشي يا محمد انا مش قد امك..
محمد وقف قدام اخوه وقال
ما تخافش يااد وانتي ياما هتضربي راجل طولك عيب عليكي نزلي الشبشب وخلينا نقعد نتكلم زي البني ادمين..
نزلت ام محمد الشبشب وقالت بعصبيه
نزلته اهوو بس مش هنتكلم في حاجه غير لما تكلم حمااك وتقوله اننا مش عايزين بنته لسعيد..
محمد بحده
لا سعيد عايز البت وهينجوزها وانتي مالكيش دعوه بيه تاني وبحياته بعد كده، اتقي الله شويه كفايه اللي عملتيه في جوازته الاولي سبيه بقي يعيش حياته ويعيش سنه زي باقي الشباب..
ام محمد.
بطل يا واد انت الشويتين اللي واكل بيهم دماغه دول، ما انا كنت هجيبله عروسه وتكون بنت حلال وغلبانه مش عقربه اخت عقربه بنت عقارب زي اللي جبتوها..
محمد
اولا انا نعمه مراتي مش عقربه بالعكس دي الوحيده اللي تنفع معاكي، ثانيا بقي كنتي هتجيبي مين بنت واحد فقير تشتريها بالفلوس وبعدين تزليها وتكسريها عشان تبقي خدامه تحت رجلك زي ما كنتي عايزه تعملي في بنت صابر، ده انا كان وشي في الارض من الناس بعد. ما خليتي البت شهد تروح تخدم في البيوت مع اني دفعتلك الدين بتاع خالي كله..
سعيد بصدمه
ايه الكلام ده يعني انتي كنتي بتخلي شهد تخدم في البيوت واحنا مش محتاجين اصلا؟..
ام محمد بتوتر
كنت بربيها وبعلمها تبقي شاطره وناصحه..
محمد. بسخريه
اتفضل يا عم اهي امك اهي وعمايل امك، وانت اصلا كنت عيل واقل من العيل لما سيبت مراتك من يوم صبحيتها تطلع تخدم في البيوت، بس ما علينا اهو اللي حصل نتعلم بقي وما نكرروش في اللي جاي..
ام محمد
تعالي يا واد يا سعيد عندي هنا نتكلم انا وانت ومالكش دعوه بأخوك ده بيكرهك وبيغير منك..
سعيد بحده
حرام عليكي كفايه بقي، انا طالع شقتي ومش هقعد معاكي تاني وهتجوز نسمه يعني هتجوزها يا اماا..
وسابهم ومشي ومحمد قال لامه بشماته
اللهم لا شماته بس انا شمتان ولسه يا اما لو ما سبتيش الواد في حاله وتطلعي نفسك من حياته هخليه يبطل يقولك يا امي اصلاً..
ام محمد بغيظ
روح منك لله تلاقيه في عيالك ياريتني قعدت عليك وفطستك وانت عيل، لو كنت اعرف انك هتكبر وتكيدني كده والله كنت عملتها..
محمد بنبره حزينه
هو انتي اللي زيك تعرف الله بس، خليني ساكت..
_وطلع هو كمان وقفل الباب وراه وقعدت ام محمد لوحدها وقالت لنفسها بغيظ…
ام محمد
ماشي يا محمد. ان ما خليتك تطلق مراتك وتخرب بيتك قبل ما بت فتحي تدخل بيتي ما ابقاش انا…
ــــــــــ #بقلم_الكاتبه_رحاب_القاضي ــــــــ
_وقدام بيت الفيومي..
كان واقف اكرم بالموتسيكل بتاعه ومعاه رحمه اللي قالتله بحده..
رحمه
ادي كل الحكايه يا جدع يا متربي يا ابن الاصول..
اكرم
اممم يالهوي علي ذوقك وانتي عايزه مني حاجه..
رحمه
هتساعدنا مش كده بص هو انا ممكن اتصرف لوحدي بس اوقات الظروف بتبقي محتاجه دكر..
اكرم بصدمه
دكر!! يا بت انتي شكلك بنت ناس لكن مخارج الفاظك دي تقول انك تربية شوارع..
رحمه
سيبت انت بقي الموضوع كله ومسكت في مخارج الفاظي اللي هتقل منك دلوقتي..
اكرم
استغفر الله العظيم يارب، طيب هي قالتلك انها مغصوبه عليه البيه الجامد اللي جوه ده؟..
رحمه
لا ما قالتش بس انا حسيت وبرضو مش متأكده اصله البيه ده ولا الممثلين ده لو عم صابر شافه هيشيله ويلف بيه مصر كلها ويقول عريس بنتي اهو، بس انا برضو عارفه صحبتي هي مش في حالتها الطبيعيه..
اكرم حط ايده علي خده وقال
خلصتي ولا لسه هتقولي حاجه متناقده تاني..
رحمه
لو سمحت بطل تسخر مني مش عايز تساعدني قول وانا هدور علي غيرك..
اكرم
بعيد عن الدبش اللي بينقط منك ده، تعالي ندخل ونكلمها ونشوف ايه الموضوع، انا عارف ان حياتي هتنتهي علي ايدك وايد صحبتك اللي كان يوم اسود يوم ما شوفتها…
_ودخلو فعلا هما الاتنين، وفي اوضة شهد كانت نايمه بنفس هيئتها من امبارح ودخلت عندها هاله وقالت..
هاله
شهد.. شهد قومي يا حبيبتي..
قامت شهد وهي مفزوعه وقالت
في ايه…
هاله بقلق
ما فيش حاجه اهدي دي انا، مالك في ايه؟..
اخدت نفسها بصعوبه وردت عليها بدموع وقالت
ما فيش بس كنت بشوف حلم وحش، ما فيش حاجه..
قعدت هاله جنبيها علي السرير وقالت
ما تخافيش من حاجه انا مش هسيبك ابدا، والنهارده قبل بكره انا هبعدك عن أسر خالص وعن اهلك وهخليكي تبدأي من جديد لوحدك فأطمني..
عيطت شهد وقالت بألم
مش قادره ومش هعرف اطمن بعد كل اللي شوفته صدقيني..
حضنتها هاله بهدوء وردت عليها بحزن وقالت
الايام كفيله تنسيكي كل حاجه، وهيبقي كل اللي حصل ده ذكري وحشه تفتكريها وتقولي الحمد لله انها عدت وخلصت..
وبعدتها عنها بهدوء وقالت
شوفتي نسيت اقولك ان صاحبتك البنت الاموره اللي كانت امبارح هنا هي واخوها..
شهد بقلق
ايه اخوها… اخوهل مين؟..
هاله
مش عارفه اخوها مين بس هي قالت كده، علي العموم في عندك ديرس حلو جيبتهولك الصبح وانتي نايمه ومعاه حجاب حلو خدي شاور واجهزي عشان هنمشي بعد ما تطمني صحبتك عليكي..
شهد
مم مكن اخد رحمه معايا، دي اختي واكتر من اختي وانا بثق فيها جداً..
هاله
ما عنديش مشكله بس خليها وقت تاني اكون ظبطلك الدنيا وبقيتي في امان بعيد عن العيون كلها تمام..
شهد بهدوء
تمام ومعلش بتعبك معايا..
هاله بأبتسامه بسيطه
لا تعب ولا حاجه يلا اجهزي وانا مستنياكي تحت..
_وسابتها هاله وخرجت وهي راحت اخدت شاور بسرعه وغيرت هدومها ولبست حجابها وابتسمت لنفسها في المرايا وقالت..
شهد
ايوه بقي هي دي شهد، منك لله يا أسر علي االي خليتني اعمله امبارح ربنا ينتقم منك..
_ونزلت تحت واول ما شافت اكرم مع رحمه اتصدمت وقالت..
شهد
ااا انت بتعمل ايه هنا؟..
ردت عليها رحمه وقالت
انا اللي جيبته يا شهد علي فكره اكرم اكتر حد ساعدني الاقيكي..
شهد
كتر خيره بس خير هو جاي هنا ليه؟..
اكرم
صحبتك بتقول انك مغصوبه علي قعدتك هنا، واحنا هنساعدك ما تقلقيش ده لو كان كلامها صح..
شهد
حتي لو كان كلامها صح، انا مش محتاجه مساعده منك وطلع نفسك من الموضوع عشان ما تحصلكش مشاكل وابقي سلملي علي الست كوثر وخليك جنبيها هي محتجالك..
رحمه
خلاص يا شهد هو تعب والله عشان يعرفني مكانك وو..
اكرم بجمود
لا سبيها براحتها انا في نظر الكل واحد ندل وواطي، بس حطي نفسك مكاني انا واحد بيشرب المر في اليوم كله عشان بس يوفر تمن اكل وشرب وعلاج للست اللي زي امه واقل غلطه بيعملها هيقعد عاطل مش لاقي شغل، انا ماشي جنب الحيطه ولو لقيت مكان جوه الحيطه همشي فيه عشان اعيش وخوفت تكون وراكي مشكله وبعدين انا كنت فاهم جزء كبير غلط منك انا فكرتك هربتي عشان الدكتور وانك بتعملي حوار في باقي الحكايه عشان تصعبي علينا، وهو ده الغلط اللي فهمته وانا اسف..
شهد بتأثر بكلامه
حصل خير وشكرا بس خليك في حالك بجد. عشان ما تحصلكش مشاكل من تحت راسي، وانتي كمان يا رحمه انا لما هبقي كويسه هكلمك واطمنك عليا واخليكي تيجي ونتقابل بس دلوقتي خليكي بعيد احسن..
رحمه بدموع
حقك عليا يا شهد انا ما عرفتش اقف جنبك زي ما انتي ما كنتي متوقعه..
شهد
كنت هزعل منك لو كانت في ايدك حاجه تعمليها وما عملتيهاش، علي العموم اطمني مدام هاله اللي شوفتيها امبارح واقفه جنبي وبتساعدني فوق ما تتخيلي..
رحمه
طيب هاتي رقمك عشان اطمن عليكي..
شهد
بصي الحارس بره معاه رقم مدام هاله خديه منه وكلميها وهي هتوصلك بيا..
رحمه
ماشي واما كل يوم هكلمها اطمن عليكي ولو ما ردتش عليا هجيلك هنا..
شهد
ان شاء الله خير يا رحمه وسلميلي علي امك اووي ولو هي عارفه انك هنا قوليلها انها وحشتني اووي هي والموز باللبن بتاعها…
ابتسمت رحمه بدموع وقالت
حاضر هقولها يلا سلام وخلي بالك من نفسك..
اكرم
انا هكون علي تواصل مع رحمه واللي ما عرفتش اساعدك بيه قبل كده مش هقصر فيه في اللي جاي يعني في ناس في ضهرك ما تقلقيش..
ابتسمت شهد بهدوء وقالت
ان شاء الله خير يا اكرم…
_ومشي اكرم مع رحمه، وقعدت شهد في الصاله مستنيه هاله اللي جات بعد شويه وقالت..
هاله
بصي هو فؤاد ما يعرفش حاجه عن اللي احنا هنعمله دلوقتي ده، وأسر النهارده اول يوم ليه في الشغل مع فؤاد وفؤاد حالف ليطلع عينه فاحنا براحتنا وما حدش هيشوفنا..
شهد
انتي هتقولي لفؤاد بيه علي الحقيقه واللي أسر كان عايزه مني؟..
هاله بضيق
بصراحه لا هسيب أسر هو اللي يقول عشان مش عاوزه ابان قدامهم اني اتصرفت بتسرع او اقول علي مكانك ولة فؤاد عرف مكانك أسر هو كمان هيعرفه فانا هعمل نفسي ما اعرفش حاجه..
شهد
تمام كده احسن..
_ومشيت شهد مع هاله وراحو شقه بسيطه وصغيره شويه في مكان راقي ومتروقه ومترتبه بشكل حلو…
هاله
ده بيت جدي ابو ماما، هو علي قده شويه بس ما حدش هيجي في باله انك هنا اصلا، انتي في وسط البلد هنا والمكان هنا شعبي شويه بس كل واحد في حاله، هحاول بقي ارتبلك امورك الفتره الجايه واسمك ذات نفسه هيتغير والجامعه زكل حاجه في الجمعيه هتمشي زي ما هي..
شهد بقلق
ان شاء الله خير يا مدام هاله..
ابتسمت هاله وقالت
احلي حاجه فيكي انك بتقولي ديما ان شاء الله خير، وهو فعلا ان شاء الله خير يا شهد..
شهد
انتي هتمشي دلوقتي؟..
هاله
ايوه عشان ما حدش ياخد باله من حاجه وهجيلك بكره في الوقت المناسب والفون ده هكلمك عليه هو جديد وبخط جديد..
اخدت منها شهد الفون وقالت
حاضر..
هاله
والتلاجه فيها اكل والدولاب جوه فيه هدوم جديده بيتي عشان تقعدي براحتك هما مش كتير بس مشي حالك بيهم مؤقتاً..
شهد
لا كده تمام اووي..
_ مشيت هاله وشهد راحت فتحت الشباك وجات تقف فيه بس خافت حد. يشوفها برغم انها متأكده ان ما فيش حد هنا يعرفها، بس كل اللي حصلها زرع جواها خوف وقلة امان ناحية كل حاجه، فقفلت الشباك تاني وراحت قعدت في الصاله بتاعت الشقه وكالعاده بدأت تتعاد علي ذاكرتها وكل اللي حصل معاها من طفولتها لحد اللي وصلت ليه دلوقتي، وكأن ذكرياتها قاصده تزيد همومها هموم اكتر..
_فضلت علي حالها ده لحد ما الليل جه وبدأت الشقه تبقي ضلمه عليها فقامت بسرعه وفتحت النور، وبعدين دخلت الاوضه اللي قالتلها عليها هاله وطلعت هدوم من الدولاب ودخلت الحمام عشان تغير هدومها…
_وغيرت فعلا هدومها ولبست بجامه فضفاضه من اللون الازرق وفردت شعرها الطويل وطلعت عشان تنام، بس اول ما طلعت اتنفضت برعب وشهقت بخوف اول ما شافت أسر قاعد قدامها علي السربر وبيشرب في سجارته بكل برود زي عادته….
أسر
مفجأه مش كده يا شوشو؟..
_اتخشبت مكانها وما كانتش عارفه ترد عليه من خوفها، وهو رمي سجارته علي الارض ووقف وبصلها بغضب وقال..
أسر
حذرتك تلعبي بيا وانتي ما سمعتيش كلامي، لا وروحتي قولتي لاختي كل حاجه ومتوقعه مني اسكت واستسلم يا خساره ما تعرفيش مين هو أسر الفيومي..
شهد بدموع وخوف
اااا انا همشي ومش هتشفوني تاني بس سيبني في حالي..
أسر ببرود
تؤ تؤ مستحيل اسيبك لحد ما اللي عايزه يخلص وازهق من اللعب بيكي، شوفتي انا صريح ازاي معاكي..
شهد بخوف
اختك بقيت تعرف كل حاجه وانا مش عايزاك، انت عايز مني ايه دلوقتي؟…
أسر بجمود
انتي كده كده هترجعي معايا، بس مش وانتي شهد اللي لسه هتبقي خطيبتي وبعدين مراتي لا وانتي مراتي علي طول..
_وقرب منها بخطوات بطيئه وهو بيفك في زراير قميصه، وهي رجعت لورا بخوف وبتبصله برعب وعدم تصديق و و؟…
_تفتكرو هيحصل ايه؟…
ـــــــــــــــــــــــــــــــــــــ
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية النصيب)
