رواية النصيب الفصل التاسع عشر 19 بقلم رحاب القاضي
رواية النصيب البارت التاسع عشر
رواية النصيب الجزء التاسع عشر
رواية النصيب الحلقة التاسعة عشر
الحُـب لمن أعز مقامنا ❤
_في صباح يوم جديد كانت واقفه شهد قدام المرايا بتظبط في حجابها وجه في الوقت ده أسر ووقف عند باب اوضة اللبس وهو بيبصلها بهدوء، وخصوصاً للبسها المحتشم والغريب بالنسباله وهي لابسه جيبه طويله وبلوزه بأكمام طويله وواسعه وبتلف حجابها بطريقه لطيفه مناسبه لـ لبسها، ولما شافته من المرايا اتنهدت بضيق وسابته وجات تطلع بس هو مسك ايدها بسرعه وقربها ليه بهدوء..
اتوترت شهد جداً وقالت
في ايه ابعد عني…
رد عليها بهدوء وقال
بلاش الطريقه دي عشان بتقفلني..
وزاد من قربها ليه وتابع كلامه وقال بخبث
والنهارده بالذات مش عايزين نتقفل من بعض يا شوشو….
_لمعت عيونها بالدموع واتنفضت بين ايديه بخوف واضح وقالت بنبره حزينه…
شهد
ابعد عني لو سمحت..
أسر بجمود
اوكي هبعد دلوقتي بس بالليل مش هبعد يا شهد، وبلاش والنبي الجو ده هي مش اول مره ليكي يعني عشان تخافي اووي مني كده..
ذقته جامد وقالت بنبره غاضبه
انا مش عايزاااك..
أسر بغيظ
ليه؟..
شهد بحده
هو ايه اللي ليه، انا ليه اخلف منك وليه اخليك تقربلي وانا مش عايزه كده ده ما كانش اتفقنا من الاول..
أسر بنبره غاضبه
سيبك من اي زفت اتفاق انا جوزك واللي بطلبه مش عيب ولا حرام، ييقي تسمعي الكلام يا شهد..
شهد بسخريه
لا حرام عشان جوازي منك بأتفاق وده شرعاً حرام وجواز باطل وو..
قاطعها أسر بحده وقال
قولتلك ما فيش اتفااق انسيه، وانا مش هتنازل عن اللي عايزه تمام يا مدام شهد..
جات تمشي من قدامه بس هو قال بجديه
استنيني تحت هاجي اوصلك للمعهد بتاعك..
شهد وهي تكتم دموعها
مااشي..
_ وبعد شويه نزل أسر وكانت شهد قااعده مع فؤاد وهاله بيفطرو، وقعد هو جنب شهد وقال لهاله..
أسر
فين تياام؟..
هاله
طيب قول صبااح الخير الاول يا قليل الذووق، وتياام راح المدرسه من قبل ما تنزل علي طول..
فؤاد
أسر تسيب الولد يركز في مذاكرته بلاش تطلعله اللعب اللي هاله شيلاهم وتلهيه عن المذاكره..
هاله
انت بتقول لمين ده انا هطفش من البيت اياام الدراسه بسبب اللي بيعمله في ابني، اقولهم قولتله ايه امبارح..
أسر بتوتر
ما قولتش حاجه انا اصلا امبارح ما شوفتوش.
هاله بغيظ
البيه باعتله علي الوتس بيقوله هاتلي رقم الميس اللي بتلبس. جيبه قصيره..
ضحكو كلهم حتي شهد ابتسمت فـ فؤاد قالها
انتي بتضحكي يا شهد ده المفروض تلبسيه بالطبق في وشه علي اللي بيعمله ده..
شهد
والله ده اللي نفسي اعمله بس نقول ايه تبقي الامنيات مُعلقه لحين تحقيقها..
هاله بشماته
اللهم عَجل في تحقيقها يااارب..
بص أسر لشهد بهدوء وقال
يعني بتغيري عليا ولا ده بسبب حاجه تانيه؟..
اتوترت شهد وردت عليه وقالت
لا عادي انا بهزر انت براحتك..
فؤاد
ايوه ما احنا عارفين ان بعد براحتك دي هيبات علي الكنبه النهارده..
_ضحك أسر بصوت عالي وبدأو يكملو فطارهم ومال هو علي شهد وقالها بصوت واطي وخبث….
أسر
مسكين فؤاد ما يعرفش ان الكنبه امر واقع عليا، بس اهو هانت ومش هتبقي في كنبه بينا خالص يا شوشو..
اتوترت شهد جدا وقالت
انا شبعت همشي بقي وو..
قام أسر وقال
وانا كمان شبعت هوصل شهد وهجيلك يا فؤش بيه..
مشي اسر وشهد وقالت هاله بفضول
هو بيقولك فؤش في الشركه اوعي تقول انه بيقولك كده؟..
فؤاد
انا مش عايز اتكلم البيه بيقولي هناك يا ابو نسب.. بس بصراحه اخوكي شاطر لو ركز في شغله شويه واشتغل بضمير هيعمل قد اللي عملو ابوكي واضعاف كمان..
مسكت هاله ايد فؤاد وقالت
انا واثقه انه هيبقي كده مدام اخوه الكبير فؤاد الفيومي في ضهره ومش هيسيبه..
فؤاد بهدوء
ان شاء الله خير يا حبيبتي، بس لايقين هو وشهد علي بعض شكلهم حلوو..
هاله
اووي ده انا هموت ويبقي الموضوع بجد ووو..
_سكتت بصدمه وخوف اول ما استوعبت اللي قالته وفؤاد سألها بعدم فهم..
فؤاد
يعني ايه بجد؟..
هاله حاولت تداري توترها وقالت
اا قصدي يعني يبقي عندهم بيبي..
فؤاد
اااه قولتيلي كده، بصي انتي كلمي شهد فكري فيها كده يا هاله أسر لو بقي اب وهو طيب وحنين وانا وانتي عارفين كده وقتها هيبدأ يخاف علي نفسه عشان ابنه او بنته هيبدأ فعلا يتحمل المسؤليه، انتي كلمي شهد انها تكلم أسر في الموضوع ده..
هاله بتفكير واقتناع
انت معاك حق يا فؤاد ده حتي لو زهق من شهد مثلا يعني وقرر يطلقها ممكن ما يطلقهاش عشان البيبي وفعلا دي فرصه لأسر يتغير، خلصااانه ان شاء الله زي الاياام دي هشيل ابن اخويا علي ايدي..
فؤاد
استني… انتي من امتي بتقولي خلصاانه وبتتكلمي كده؟..
ضحكت هاله وقالت
ههههه كله من البنت رحمه صاحبة شهد بنت مسخره والله وكلامها كده ديما وشكلي كده لقطت منها كام كلمه..
فؤاد
ربنا يستر منها بقي دي هاله بتاعت الايتيكيت والكلام الشيك..
هاله
انا زي ما انا علي فكره بس معاكم هنا ببقي براحتي، خلاص بقي يا فؤاد في ايه؟..
ضحك فؤاد ومسك ايدها وباسها وقال
انتي في كل حلاتك زي القمر، وكل يوم تستاهلي انك تتحبي فيه اكتر من اللي قبله..
_ابتسمت هاله بهدوء وبدأت تحطله في الفطار قداامه وهي بتتكلم معاه بكل سعاده وحب..
“فهل ستدوم سعادتهم ام للقدر رأي اخر؟”
ــــــــــ #بقلم_الكاتبه_رحاب_القاضي ــــــــ
_وبعد. شويه في شقة سعيد ونسمه، طلعت من اوضتها وكانت لسه هتدخل المطبخ بس لقيت سعيد نايم علي الكنبه اللي في الصاله، قربت منه وقعدت علي الكرسي اللي قدامه وبصتله بهدوء وقالت..
نسمه
علي قد ما انت معصبني ومدايقه منك بس صعباان عليا من اللي امك بتعمله ده…
_ورن في الوقت ده الموبيل بتاعه عشان معاد شغله فقفلته هي بسرعه وقامت جهزتله فطار وحطته علي الترابيزه اللي جنبيه وقالت بهدوء.
نسمه
سعييييد يا سعييييد…
فتح عيونه ببطئ ورد. عليها
في ايه يا نسمه؟..
نسمه
قوم عشان تفطر وتروح شغلك، جهزتلك الفطار اهو…
وجات تمشي بس هو مسك ايدها وقال بأبتسامه بسيطه
حقك عليا يا نسمه ما تزعليش من اللي حصل امبارح..
قعدت نسمه جنبيه وقالت
بص يا سعيد. انت خايف علي زعل امك ومش عايز تتخانق معاها همشيها انها كده، بس انا مش هسكت لو غلطت فيا وانت ما تدخلش هي عندها ابويا لما اغلط فيها تروح تقوله تمام كده..
سعيد
طيب ما تكبري دماغك منها خااالص وهي في حالها واحنا في حالنا..
نسمه بسخريه
بالله عليك يا شيخ هي امك في حالها وسيبانا في حالنا، قوم يا سعيد اغسل وشك او شوف هتعمل ايه عشان تيجي تفطر وتروح شغلك..
سعيد
طيب هتغديني أيه النهارده؟..
نسمه
هو انت لسه فطرت يا سعيد. عشان تفكرلي في الغدا؟..
سعيد
لاا ما انا عشان اعمل حسابي هجيب اكل معايا ولا هتعملي اكل كويس؟.
نسمه
لا اطمن ماما جايه تقعد معايا شويه وجيبالي اكل معاها وهتعلم يا سعيد واتحملني شويه مانا متحملاك انت وامك اهو وكاتمه في قلبي وساكته..
سعيد
علي ايه بس ده طلعت القعده مع امي ارحم من الاكل بتاعك..
نسمه بغيظ
بقي كده طيب ما فيش فطار روح لامك تفطرك…
قرب منها سعيد وقال بخبث
ما المشكله برضو ان عند امي ما فيش الحلاوه دي كلها..
قبل ما ترد عليه نسمه خبطت ام محمد علي الباب وقالت
سعييييد انت لسه ناايم..
نسمه بغيظ
اقسم بالله امك بتستني انك تقرب مني وتيجي..
سعيد بضيق
روحي افتحيلها وقوليلها هفطر وانزلها.
نسمه بخبث
بس كده من عينيا..
_وراحت نسمه فتحت الباب لام محمد اللي اول ما شافتها قالت بغضب..
ام محمد
يا ساتر ليه تخليني اصطبح بوشك كده،ربنا يستر علي اليوم ده؟..
نسمه
بس كده ده انا كل يوم هخليكي تصطبحي بوشي يا طنط..
ام محمد
روحي اندهيلي جوزك ولا اقولك انا هدخل اشوف ابني لوحدي..
جات تدخل بس وقفت نسمه قدامها وقالت
لا معلش يا حماتي مش هينفع تدخلي اصل الشقه جوه مكركبه وانا ما بحبش ادخل ضيوف عندي في شقتي غير وهي متروقه..
ام محمد
شقة مين يا بت انتي مالكيش شقق هنا ده بيتي انا وادخل في المكان اللي عايزاااه وقت ما احب، يا سعييييد تعالي شوف اللي ما تتسمي دي..
نسمه بحده
طيب اللي ما تتسمي دي يا ام محمد بتقولك بكل ذوق اهو اتفضلي انزلي وسعيد هيفطر وينزلك وبصراحه كده انا مش عايزااكي تدخلي شقتي عشان بتغلطي فيا والكلام ده لو وصل لابويا مش هيحصل كويس، فانتي لو عايزه ابنك هيفطر وينزلك بعد اذنك بقي عشان مش فاضيه..
_قالت كلامها وقفلت في وشها الباب ودخلت لقيت سعيد طالع من الحمام وسألها بقلق.
سعيد
اي ده هي امي نزلت انا توقعت هطلع من الحمام القيها قااعده هنا..
نسمه
لا ما هي مستنياااك ابقي انزلها بعد ما تفطر قبل ما تروح الشغل.
قرب منها سعيد وقال
انا لا هنزل ولا هروح الشغل، انا قاعد هنا مع مراتي..
نسمه بتوتر
ايه يعني هتوقف اكل عيشك وكمان اا ماما جايه وهتقعد معايا وو.
سعيد
لا ما انتي هتكلمي امك وتقوليلها تيجي بالليل..
نسمه ابتسمت وقالت
انت كده هتاكل من طبيخي انا في الغدا ومش هتحبه..
سعيد بخبث
لا ما احنا نتعلم الطبيخ سوا بس تعالي نفطر الاول..
ــــــــــ #بقلم_الكاتبه_رحاب_القاضي ــــــــ
_بعد شويه وصل أسر بعربيته قداام المعهد بتاع شهد اللي كانت متوتره جداً وقالتله..
شهد
رجعني البيت خلاص مش عايزه اروح..
أسر
ايه الهبل ده يلا يا شهد ما تخافيش ما حدش هيعملك حاجه هناك ولو حد دايقك كلميني..
شهد بقلق وحزن
ما هو انا من لما دخلت المدرسه وانا معايا رحمه ومش عارفه اكون هنا لوحدي..
أسر
لازم تتعودي يا شهد لازم تعتمدي علي نفسك مش ديماً هتلاقي حد يساعدك وبعدين هو انا اللي هقولك الكلام ده، انتي شوفتي كتير المفروض تكوني اتعلمتي منه..
اتنهدت شهد بحزن وقالت
معاااك حق انا شوفت كتير ولسه بشووف ولازم اكون اتعلمت، شكرا تعبتك معايا..
مسك أسر ايدها قبل ما تنزل وقال
ما تخافيش وهبقي اكلمك اطمن عليكي..
سحبت ايدها من ايده وقالت بجمود
شكرا كتر خيرك مالوش لزوم..
_وسابته ونزلت من العربيه وهو بصلها بضيق ومشي بعربيته من قدامها، وهي راحت وقفت قدام المعهد وقبل ما تدخل ابتسمت بهدوء وكانت مبسوطه جدا ان حلمها خلاص بيتحقق..وفجأه وقفت جنبيها رحمه اللي قالت وهي بتحط ايدها علي كتف شهد..
رحمه
ما هو انا مش هسيبك في يوم زي ده وكنسلت اول يوم ليا في الجامعه النهارده وجايه اقضي معاكي اليوم كله هنا…
_بصتلها شهد بدموع وابتسمت بسعاده وحضنتها وقالت بدموع وفرحه كبيره..
شهد
كان اليوم هيبقي نااقص حاجات كتير من غيرك، ما كنتش هعرف احب المكان ده لو دخلته لوحدي من غيرك..
بعدت رحمه عنها وقالت
عارفه انك بتتوتري لوحدك، انا السنه اللي فاتت لما دخلت لوحدي الجامعه وانتي ما كنتيش معايا فضلت اعيط وكنت خايفه وقولت النهارده مش هسيبك تحسي الاحساس الوحش ده، المهم انتي هتكملي تعليمك يا شهد دي حاحه حلوه لازم نفرح بيها..
شهد بحمااس
مش مصدقه لحد دلوقتي اصلا انا افتكرت لما اتجوزت سعيد ان خلاص كده احلامي كلها انتهت بس فعلا ربنا كبير وطلع مأخر تحقيق حلمي عشان ابقي هنا في مكان ما كنتش احلم ادخله اصلاً..
رحمه
انتي تستاهلي كل خير يا بت يا شهد، تعالي ندخل المعهد ده فيه نااس نضيفه من بتوع ايجيبت يارب بقي اطلعلي بعريس النهارده..
_ضحكت شهد ودخلو هما الاتنين جوه وبدات رحمه فعلا تساعد شهد انها تعرف اماكن محاضراتها فين والتفاصيل بتاعت المكان المهمه، وكانو قاعدين في الكافيتريا وشهد قالتلها بحمااس..
شهد
انا مبسوطه اووي يا رحمه، عارفه لو كان كل ده حلم وصحيت منه علي الجزء السئ اللي في روايتي هتشل والله..
رحمه
ده انا نفسي اتشللك، بس بصراحه شكله أسر بيحبك اووي كفايه انه بيحققلك في احلامك اهو وكمان بيدافع عنك اهي فيه حاجات حلوه تغطي علي رخامته لو شويه..
اختفت ابتسامة شهد لما سمعت أسم اسر وقالت بسخريه
اممم معاكي حق، بس ما فيش حاجه ببلاش..
رحمه
ازاي يعني مش فاهمه؟..
شهد بجمود
كنت هكون مبسوطه اكتر لو حلمي بيتحقق من غير ما يبقي أسر في حياتي..
رحمه
ليه بتقولي كده طيب بصي هو حلفني ما اقولش بس انا ما كنتش هاجي يعني النهارده دي كانت فكرة أسر امبارح هو اللي كلمني وقالي اجيلك عشان ما تبقيش لوحدك النهارده، وفعلا هو معاه حق انا ما كانش ينفع اسيبك النهارده…
شهد بضيق
والله هيجنني معاه اصلا من امبارح منكد عليا، بصي غيري الموضوع انا اصلا هروح عند اهلي اليومين دول ويخبط دماغه في الحيط هو واللي عايزه..
رحمه بعدم فهم
ليه هو عايز ايه؟..
شهد بتوتر
هاا اللي عايزه بقولك ايه قومي هاتيلنا حاجه ناكلها انا جعانه…
رحمه
لا الحاجات هنا غاليه وانا ما حلتيش غير 100 جنيه وهروح منها كمان..
شهد
استني انا معايا هنطلب حاجات كتير كمان، فاكره يا رحمه لما كنا بنحوش من مصروفنا عشان أخر الاسبوع نجيب حاجه حلوه ناكلها مع بعض.
رحمه ابتسمت وقالت
ايوه فاكره وكنتي برضو تقسمي معايا وتقسمي منابك عشان توديه لاخواتك..المهم هاتي الفلوس وانا هروح اجيب بقي هظبطنا…
_وراحت رحمه فعلا تجيب الاكل ومره واحده جات بنت في سن شهد وقعدت معاها وقالت بضيق..
البنت
سوري بس ما فيش مكان فاضي هنا غير علي الترابيزه دي، هيجي اخويا وهقوم علي طول..
شهد بهدوء
براحتك عادي..
البنت
انا شيري في سنه اولي وانتي؟..
شهد
انا شهد في سنه اولي برضو..
البنت
بجد يعني طلعنا زمايل اهو، اخويا معانا برضو في نفس السنه هو توأمي اصلا واسمه شريف حرف الشين مسيطر علي الدفعه..
ابتسمت شهد وجات رحمه وقالت
ايه ده يا بت يا شهد شقطيها منين دي؟..
شيري
لا لا انا اللي شقطها هي شكلها كيوت و Peaceful اووي، انتي معانا هنا؟
قعدت رحمه معاهم وقالت
لا انا في تانيه أداب بس جايه مع شهد عشان اول يوم وكده..
شيري
يعني انتو اخوات، انتو نفس الاستايل اصلا اكيد اخوات..
رحمه
اااه في الرضااعه..
_ضحكت شهد غصب عنها وجه ولد في الوقت ده شبه شيري جدا بس علي ملامح رجوليه وقعد معاهم وقال..
شريف
سوري اتأخرت عليكي يا شيري بس بابا كان ااا هاي الاول..
اتوترت شهد ورحمه قالت بجمود
هاي ورحمة الله وبركاته مين الاخ اللي فاكرها وكاله من غير بواب قوووم ياااه..
شيري
Wait wait يا بنتي ده اخويا شريف….
رحمه
يا مرحب يا حبيبتي ايه اللي يقعده معانا..
شريف
علي فكره ممكن تقولي قوم بالراحه وانا هقوم، انتي معانا هنا ازاي اصلا..
رحمه
جرا ايه يالااا انت شايف نفسك عليا، لااا يا سكر اقلع النضاره اللي بتشوف بيها دي واعرف مقامك كده وانت بتكلمني ده انتو بالليله دي كلها حياله معهد انما انا في كلية أداب قسم أثار يعني جيباها من زمان اوووي من ايام جدك خوفو من ايام مين كده عيد معايا عشان ما تنسااش..
_اتصدم شريف من كلامها وشهد فضلت تضحك وقامت شيري قعدت جنب رحمه وقالت بحمااس..
شيري
بلييييز انا عايزه اتعلم منك الطريقه دي انا من زمان نفسي ابقي بيئه..
ضحك شريف هو وشهد ورحمه قالتلها بغيظ
هي مين دي اللي بيئه يا اا..
شريف
اهدي صوتك بدأ يعلي وكده عيب، بصي احنا ممكن نبقي زمايل ليه نتخانق من اول يوم يعني انا شريف ايمن ودي شيري اختي التوأم انتو مين بقي؟..
رحمه
انا رحمه بس مش من هنا البت دي هي اللي معاكم، بصو انا هكت لاني مستعجله وانتو بقي خدو بالكم من البنت شكلكم عيال نااس وهي علي فكره بنت نااس لا اهلها ولاد ستين في سبعين بس هي كويسه وتحسوها منكم كده فخلوها معاكم..
شيري
انتي اسمك ايه طيب انا عايزه اشوفك تاني..
رحمه
انا محسوبتك رحمه وهبقي اشوف جدول اعمالي وارد عليكي..
مشيت رحمه وهما ضحكو عليها وشريف قال
مش معقول البنت دس فظيعه، علي فكره احنا عندنا اول محاضره بعد نص ساعه..
شيري
اووو انا Excited اووي، وانتي يا شهد شكلك كده خايفه..
شريف
ده طبيعي تخااف لانها داخله علي مرحله جديده، بس احنا معاكي وما نعرفش حد هنا ومش عايزين نعرف بس لو انتي بس ما فيش مشكله..
شهد
شكرا جدا انا فعلا ما اعرفش حد هنا وخايفه ابقي لوحدي….
شيري
سووو كيوت بص رقيقه ازاي يا شريف، انتي ازاي انتي ورحمه صحاب انتو عكس بعض خااالص..
شريف
فعلا انتي شكلك بنت ناس وهاديه انما هي انا خوفت منها..
شهد
لا انا وهي من نفس المستوي يمكن كمان هي من مستوي احسن من مستوايا بس هي عفويه حبتين..
شيري
طيب يلا بينا نحضر المحاضرع، شهد انتي هتاخدي الاكل ده..
شهد
لا خلاص هندخل المحاضره..
شريف
هو انتو كنتو مستنين حد. ايه كمية الاكل دي؟..
شهد
اا كانت رحمه يعني مستنيه ناس صحابها وما جوش،وبعدين نفطر احنا الاول وبعدين نروح المحاضره اعتبروني عزمتكم…
شيري
اوكي اهو يبقي بينا عصير مانجا وسندوتشات جبنه وشيبسي..
شريف بسخريه
اضحكي يا شهد واجبري بخاطرها وخلاص علي اساس انها دمها خفيف وكده يعني..
_ ضحكت شهد بهدوء وفطرت معاهم وقضت اول يوم دراسي بصحبتهم وكانت مبسوطه جدا من اليوم والتعامل معاهم.، ولما خلصت قالت للسواق اللي باعته ليها أسر انه يوصلها لبيت اهلها…
ــــــــــ #بقلم_الكاتبه_رحاب_القاضي ــــــــ
_وبالليل في بيت فتحي ابو نعمه ونسمه، كانت قااعده في اوضتها مدايقه ومحمد قاعد مع ابوها بره، ودخل عندها فتحي وبصلها بحده وقال…
فتحي
مش كبرنا علي التصرفات اللي بتعمليها مع جوزك دي يا نعمه؟….
نعمه بحزن
يا بابا انت مش فاهم حاجه، انا مش عايزه اسيب بيتي وازعل بالعافيه ما هو من عمايله وفي الاخر يقولي امشي وامه تقولي لو عندك كرامه امشي..
فتحي
وانتي من امتي بتاخدي علي امه وليه تصدقيها وتخليها تخرب عليكي..
نعمه بدموع
وانا استني ايه يا بابا لما يتجوز عليا يعني ويدخل عليا بيها..
فتحي
ايه الغباوه دي يا بت انتي، من امتي ودماغك صغيره كده، وبعدين هو انا اللي هقولك محمد ما يعملش كده هو انتي مش عارفه جوزك، بلاش نقول جوزك يعني ما كنتيش تعرفيه قبل الجواز..
اتوترت نعمه وقالت
يا بابا ده كان معرفه من بعيد يعني..
ضحك فتحي وقال بنبره حنونه
ما علينا اهو بقي جوزك وابو عيالك، واقولك علي حاجه لو كانت نسمه اختك اللي جات وقالت الكلام ده علي جوزها انا كنت هصدق لان سعيد تربية امه انما محمد ده نسخه من ابوه الله يرحمه وراجل الحته كلها بتشهد بأخلاقه وبتحبه وانا نفسي قبلت اجوز اختك لسعيد عشان عارف انه لو غلط قبل ما انا اتكلم محمد هيقف مع نسمه لانه جدع..
نعمه بهدوء
طيب والبت اللي اسمها حنان دي يا بابا هو ما بقاش عايزني…
فتحي
بأمارة انه قااعد بره بيحلفلي ان عمره ما شاف واحده غيرك وان امه هي اللي قاصده توقع بينكم وبنتي غبيه ومشيت وراها..
نعمه بغيظ
هو قال عليا غبيه؟!…
ضحك فتحي وقال
لا ده انا اللي بقول، قومي يا نعمه خدي عيالك وروحي مع جوزك وما تدخليش حد بينكم ولو حماتك جات وقالتلك حاجه زي كده تاني قوليلها انا عارفه وهو قايلي وراضيه وبلاش الغيره الزياده دي بتخنقنا احنا كرجاله..
محمد من بره
هستني كتير انا يا عم فتحي ولا اقوم امشي..
نعمه بغيظ
شاايف يا بابا بيغيظني ازاي..
فتحي
يا بت بينكشك يلا قومي يلااا وما تبقيش عبيطه الموضوع ما يستاهلش..
_سمعت نعمه. كلام ابوها ورجعت مع محمد البيت، وكانو طالعين علي السلم وشافتهم ام محمد اللي فتحت باب شقتها بسرعه وقالت بغيظ..
ام محمد
هو انتي رجعتي عرف يضحك عليكي ويرجعك..
اتنهدت نعمه بضيق ومحمد قال بجمود
اطلعي يا نعمه فوق انتي والعيال انا هتكلم مع امي شويه وجاااي..
نعمه
حااضر يا محمد..
وطلعت فوق ومحمد بص لامه بخبث وقال
ادخلي يا اما خلينا نتكلم سوا شويه..
ام محمد بقلق
عايز ايه يا واد انت انا ما بحبش اتكلم معاك امشي من هنا..
محمد بخبث
ليه يا اما اوعي تكوني خايفه مني ده انتي امي يعني لا هخنقك لقدر الله ولا هبعتك للي خلقك متعبيه في اكيااس مثلا ونطلع تريند، انتي عارفه لو عملنا كده هتاخدي كام…
ام محمد
الله يخربيت امك يا واد انت، هو انت عايزني اموت عشان الفلوس..
محمد
هو انا مش عايز بس نفسي يا امااا، والنفس اماره بالسوء..
دخلت امه بسرعه وقفلت الباب وقالت بخوف
غور من وشي بدل ما اصوت والم عليك الحته كلها، قال تعبيني في اكياااس قال…
_ضحك محمد وسابها وطلع شقته واول ما دخل لقي بنته الصغيره في الصاله ، راح قعد جنبيها وقال بصوت عالي..
محمد
انتي يا زفته ياللي جوه خدي هنا..
طلعت. نعمه بعيد. ما غيرت هدومها وقالتله بغيظ
انت كمان ليك عين تغلط فيا..
_ميل محمد علي الارض وقلع الكوتشي بتاعه وحدفه عليها وهي جريت بسرعه وقال بعصبيه..
محمد
هو انتي لسه شوفتي حاجه ده انتي يوم ابوكي اسود..
نعمه وهي متخبيه ورا كرسي الانتريه
انت اتجننت يا محمد ده بدل ما تصالحني..
محمد بعصبيه
اصالحك علي ايه انا عملت ايه اصلا، وكمان انتي عارفه اني بكره تبقي حاجه بيني وبينك وحد يعرفها وحذرتك كتير يا نعمه بلاش كده،وقولت تروحي بيت اهلك تهدي اعصابك شويه وتتلمي وترجعي، بس لا طبعا الاقي بنت الجزمه ابوها عارف وامها عارفه واخويا واختك ايييه كان ناقص تطلعينا في المسامح كريم..
نعمه بخوف
والله العظيم كنت بعمل كده عشان تيجي وتصالحني ما انت ما كنتش هتيجي يا محمد انا عارفاك يا اخويا، وو وبعدين هو انا قولت ايه يعني مش ده كلام امك..
محمد بجمود
تعالي هنا يا نعمه..
نعمه بخوف
احلف انك مش هتمد ايدك الاول..
محمد
مش همد ايدي تعالي..
نعمه بقلق
لا يا اخويا احلف الاول..
محمد بحده
ما تخلصي يا وليه..
_قربت منه نعمه وهي خاايفه وهو مسكها من دراعها جامد. وقال بغضب..
محمد
هو انا لو بعمل زيك وبمشي ورا كلام. امي عليكي كان زمانك لسه مراتي يا بت؟..
نعمه. بدموع
لا..
محمد بحده
يبقي في ايه بتتغابي ليه وتصدقيها، بتمشي ورا كلام امي ليه يا نعمه وتخليها تخرب بينا..
ردت عليه ببكاء وقالت
عشان بغير عليك يا محمد، وما كنتش هصدق امك في اي حاجه الا انها تقولي انك ميال لوحده غيري وو..
قاطعها محمد لما حضنها بهدوء وقال
يا عبيطه انا اميل لوحده غيرك ليه هو انا عمري شوفت ولا حبيت واحده غيرك، طيب انتي فاكره لما روحت اخطبك من ابوكي قالي ايه وقتها، قالي انت جاي تخطبها دلوقتي ده انا فاكرك خاطبها من زمان وناسي، وقال كده من كلام الناس علينا، يا بت ده احنا قصة حبنا الحته كلها كانت بتحكي عليها وفي الاخر تقوليلي اروح ابص لحنان او غيرها ليه عبيط زيك انا..
بعدت عنه نعمه وقالت بابتسامه بسيطه
هو انا كنت لازم اعيط يعني عشان اسمع منك البوقين دول، علي العموم خلاص انا مش هفتح السيره دي تاني عشان واثقه فيك..
محمد
لا ما هي باينه الثقه ياختي، المهم العيال اتعشو قبل ما ينامو ولا لا..
نعمه
ايوه اتعشو بس فرح لسه ما اتعشتش روح هاتلنا عشا من بره يلااا..
محمد
لا بقولك ايه انتي هتمشوريني ارجعي بيت ابوكي احسن..
_ضحكت نعمه وهو كمان ونزل جابلهم اكل وهو ورااجع خبط علي امه اللي ردت عليه من جوه وقالت..
ام محمد
مييين؟..
محمد
انا يااما افتحي..
ام محمد
امشي من وشي انا مش طيقاااك..
محمد
انا افتحي يا اما جايب كفته وجايبلك معايا..
ام محمد
بالناقص مش عايزه حاجه منك طفحه لمراتك اللهي تطفحه انت وهي وعيالك..
محمد بنبره حزينه
الله يسامحك يا اما ده بدل ما تقوليلي هات عيالك وتعالي اتعشي معايا وكأني مش ابنك يا شيخه،علي العموم الاكل اهو قداام الباب كليه او ارميه براحتك..
_وسابلها فعلا الاكل وطلع شقته وهي فتحت الباب واخدت الاكل وقبل ما تدخل قالها محمد اللي نزل من فوق تاني..
محمد
طيب مدام جعانه يا اما بتتقلي عليا ليه ده انا ابنك هو انا غريب..
ام محمد بتوتر
ده انا كنت هجيبه ليه انا ناقصه يلم عليا القطط قدام الباب….
محمد بهدوء
اعتبريني زي ابنك يا ستي واتعشي يا اما..
ام محمد بخبث
وريني كده جايب ايه لبنت ناديه وانت طالع..
محمد بغيظ
تصدقي انا غلطااان يا اماا، انا طااالع من وشك احسن..
ام محمد
فاكر انك هتضحك عليا بلقمتين بس علي مين والله لاخليك تطلقها وتتجوز اللي علي مزاجي انت واخوك وابقي انا هنا الكل في الكل والكلمه كلمتي والشوري ليا وبس..
ــــــــــ #بقلم_الكاتبه_رحاب_القاضي ــــــــ
_وفي بيت الفيومي كان قااعد أسر في عربيته ومش راضي ينزل وهو بيشرب السجاره بتاعته بضيق، وبص لاوضته اللي نورها مطفي من بعيد وابتسم بسخريه وقال لنفسه..
أسر
انا اتوتر كده بسببك يا شهد، وقافله النور وعامله نفسك نايمه اكيد..
قرب منه الحارس وقال
في حاجه يا أسر بيه حضرتك بتكلمنا؟..
أسر
لا بكلم. نفسي يا حبيبي، قولي يا ااا..
الحارس
مؤمن يا باشا..
أسر
قولي يا مؤمن انت متجوز؟..
مؤمن ابتسم وقال
لا لسه يا اسر بيه بس قايل علي واحده..
نزل أسر من العربيه وقاله
طيب نصيحه ليك لو مش عايز تكلم نفسك زي حلاتي ما تتجوزش..
_ضحك الحارس بهدوء ودخل أسر البيت ولقي هاله قاااعده بتشرب قهوه وحاطه رجل علي رجل وبتبصله بطريقه مستفزه، فاتجاهلها وجه يطلع اوضته بس هي وقفته لما قالت..
هاله
استني يا أسر هي شهد فين؟..
أسر بعدم فهم
شهد فوق هتكون فين يعني؟..
ضحكت هاله بسخريه وقالت
هههه لا يا حبيب اختك شهد مش فوق هي ما رجعتش من لما طلعت معاك الصبح،وانت كمان اتأخرت وانا قولت لفؤاد انكم مع بعض بتتعشو بره عشان كان هيبقي شكلك وحش لو كنت قولتله ان شهد ما رجعتش وانت يا جوزها ما تعرفش هي فين….
أسر بضيق
ما رجعتش ازاي راحت فين يا هاله؟..
هاله ببرود
ما اعرفش وبعدين ما بحبش اتدخل بين واحد ومرااته مش ده اللي انت طلبته مني..
_اتنهد أسر بغيظ وطلع موبيله ورن عليها بس ما ردتش عليه، وهاله بصتله بسخريه وكتمت ضحكتها، وهو راح مسك موبيلها وقال..
أسر
كلميها امسكي يلاا..
هاله
لا مش هكلمها انا ماليش دعوه، وبعدين انت زعلتها في ايه ولا عملتلها ايه يخليها تسيب البيت كده وكمان مش راضيه تحكيلي اي حاجه انت عايز توصل لايه يا أسر؟..
_ما ردش عليها وفتح أسر موبيلها ورن هو علي شهد اللي ردت علي طول وقالت وهي فاكره ان هاله اللي بتكلمها…
شهد
ايوه يا هاله هو اخوكي رجع اصله رن عليا وانا مش عايزه ارد عليه؟..
أسر بغيظ
انتي فين يا روح امك ده انتي يومك اسود. النهارده، انتي فين لحد. دلوقتي؟..
هاله بغيظ
تصدق انك قليل الذووق والله لاغير الباسورد عشان ما تعرفش تفتح موبيلي تاني..
أسر بحده
اخرسي انتي كمان، وانتي يا شهد هانم ما تنطقي انتي فين؟..
شهد بقلق
في بيت اهلي يا أسر ومش راجعه تاني مدام مش ملتزم بأتفاقك معايا..
أسر بعصبيه
انتي اللي جبتيه يا شهد وخلص الكلام كده..
_وقفل الفون في وشها ورماااه في وش هاله وطلع من البيت وهو ناوي انه يروح لشهد، وهاله كلمت شهد تاني وقالتلها..
هاله
ايوه يا شهد يا حبيبتي ليه كده اخويا مش بيجي بالعند..
شهد بضيق
اهو اللي حصل بقي يا هاله، هو فين دلوقتي؟..
هاله بقلق
طلع من البيت وشكله كده جايلك ويومك اسود بجد…
شهد بخوف
يا نهار. اسود طيب انا اعمل ايه دلوقتي؟..
هاله
ما تعمليش حاجه استنيه وحاولي تهديه شويه واتكلمو بالعقل وأسر والله هتعندي معااه هيبقي وحش بجد مش هيرضي يتفاهم..
شهد بخوف
طيب اقفلي وانا هحاول اتصرف..
ـ قفلت معاها شهد وراحت وقفت في البلكونه وهي خايفه من رد فعل أسر، وهي واقفه شافت سعيد خارج مع نسمه من بيتهم وهو ماسك ايدها وشكلهم مبسوطين جداً، اتملت عيونها دموع وفضلت بصالهم بحزن وما اخدتش بالها من مامتها اللي كانت واقفه جنبيها وقالتلها..
فاطمه
بت يا شهد مالك بتبصيلهم كده ليه، اوعي يا بت تكوني بتحبي الواد سعيد يس مدام بتحبيه ليه سبتيه وهربتي..
_بصتلها شهد بدموع ودخلت قعدت جوه وفاطمه راحت وراها وقالت بهدوء…
فاطمه
بس انتي ربنا رزقك بالاحسن منه جوزك بمليون واحد زي سعيد..
شهد ببكاء
هما مش دول ظلموني مش هو وامه ظلموني، ليه طيب هما مرتاحين وحياتهم ماشيه تمام وانا بس اللي مش عارفه اعيش، هو العيب فيا انا طيب انا غلطت في ايه عشان يحصل فيا كل ده..
فاطمه بعدم فهم
مش عارفه تعيشي ازاي يا بت انتي، ده انتي متجوزه جوازه عمرك ما كنتي تحلمي بيها..
شهد بحزن
فعلا ما كنتش احلم بيها، انا كل حاجه كتيره عليا ياريتني كنت وصلت للي بحلم بيه ومش عايزه اللي ما حلمتش بيه ده…
فاطمه
بقولك ايه انا داخله اكمل تجهيز العشا لحسن ابوكي يجي يطين عيشتي..
_وفضلت قااعده شهد مستنيه أسر يجي ورن موبيلها برقم غريب فمردتش بس لما رن تاني مسحت دموعها وردت بهدوء وقالت..
شهد
الو..
شيري
ايه التقل ده يا شوشو مش بتردي عليا ليه، اوعي تكوني ما سجلتيش رقمي عندك..
شهد
معلش والله يا شيري نسيت انا هسجله علي طول اهو..
شيري
اوكي بقولك انا بعتلك الجدول بتاعنا هو نزل علي الجروب بتاع الدفعه والادمن بتاعه شريف اخويا وهخليه يضيفك معانا اوكي..
شهد
تمام معلش تعبتكم..
شيري
لا تعب ولا حاجه.. بقولك ايه ممكن تبعتيلي رقم صحبتك المجنونه رحمه بصراحه البنت دي فظيعه وانا عايزه نبقي صحااب..
ابتسمت شهد وقالت
حاضر هبعتلك رقمها حالاً..
شيري
ميرسي اووي يا شوشو يلا باي باي..
_قفلت معاها شهد وبعتتلها رقم رحمه واول ما سمعت صوت عربية أسر قامت بسرعه وراحت بصت من البلكونه واول ما نزل هو من العربيه بصلها بحده فدخلت بسرعه، وقرب منه في الوقت ده صابر اللي كان واقف في المحل بتاعه وقال..
صابر
اهلا اهلا يا ابو نسب نورت الحته كلها..
أسر
بنور حضرتك يا عمي، انا كنت جااي اخد شهد..
صابر
لا مش هتمشي غير لما تتعشي معانا النهارده ام شهد عامله دكر بط ومحشي انما ايه يستاهلو بوقك..
أسر بسخريه
هي ايه الحكايه يا حج صابر ده انت ما كنتش طايقني قبل كده ايه الطريقه دي؟..
صابر
ههههه قلبك ابيض بقي احنا خلاص بقينا اهل وانت بقيت جوز بنتي يعني زي ابني وكمان جوازك منها خلي كل واحد كان بيتكلم عليها يحط لسانه جوه بوقه ومدام بنتي مرتاحه معاك فانت واحد من البيت ده وتبقي فوق راسي، استني هقفل المحل واطلع معاك ولا اقولك اسبقني انت وانا جااي ورااك..
أسر بهدوء
حاضر يا عمي..
_وطلع أسر فووق وخبط علي الباب وتوقع ان شهد اللي هتفتحله بس اللي فتحت فاطمه اللي قالتله..
فاطمه بأبتسامه واسعه
اهلا وسهلا يا ابني ايه النور ده تعالي اتفضل..
دخل أسر وهو بيدور علي شهد بعينيه وقال
ازاي حضرتك يا طنط…
ضحكت فاطمه وقالت
ههههههه يا اختي علي كلامك زي بتوع التلفزيون، بس اي حاجه منك حلوه يا جوز بنتي تعالي اتفضل لحد. ما البت ملك تنزل تنده لابوها من تحت..
أسر
لا ما هو شافني وهيقفل المحل وجااي ورايا..
فاطمه
طيب استناه هو هيطلع علي طول، بت يا ملك خشي اندهي اختك لجوزها..
ملك بغيظ
يوووه مش هعرف اشوف المسلسل منكم انا..
فاطمه
يا بت اسمعي الكلام وقومي يلاا..
_كان بيبصلهم أسر بابتسامه مصطنعه ورااح قعد في الصاله البسيطه بتاعت بيت شهد وبص للحيطه لقي صوره متعلقه مرسوم فيها تلات اشخااص بشكل وحش، وطلعت شهد. من اوضتها وقالتله بقلق..
شهد
يا نعم؟..
أسر بصلها بحده وقال
بتهربي مني انتي كده فاكره اني مش هعرف اوصلك و اخدك او اخاف منك واقولك خلاص اعملي اللي انتي عايزااه..
شهد بقلق
لا ما هو انا هعمل اللي عايزاااه يعني هعمله…
أسر بخبث
طيب اندهي امك كده ونستني ابوكي وناخد رأيه في الكلام ده..
بصتله شهد بخوف وقالت بحزن
يا عم هو بالعافيه قولتلك مش عايزاااك..
مسكها من دراعها جامد وقال بغيظ
ليه هو انا مش عاجبك في ايه؟..
شهد بتوتر وخوف
سيب ايدي وبلااش قلة ادب انت هنا في بيتنا اتلمم..
دخل في الوقت ده ابوها وقال
احممم منورنا يا ابو نسب..
بعد عنها أسر شويه وقال
ده نور حضرتك والله..
قعد صابر قدامهم وقال
ايه بقي يا ولاد مش ناويين تفرحونا بحتت عيل..
_بصت شهد لابوها بصدمه وضحك أسر بصوت عالي ورد علي صابر وقال بخبث..
أسر
ههههههههه قولها يا عمي انا نفسي وهي مش راضيه…
صابر
وانت تاخد رأيها ليه، هما النسوان دول حد ياخد عليهم دول يا ابني ناقصات عقل ودين..
شهد بغيظ
علي فكره الكلام ده غلط يا بابا وو..
صابر بحده
انتي هتغلطيني ولا ايه يا بت انتي، ادخلي استعجلي امك في العشا عشان جوزك هيتعشي معانا..
_بصتله شهد بدموع واحراج وقامت دخلت المطبخ بس قبل ما تدخل سمعته بيقول لأسر…
صابر
بقولك ايه يا ابني ابقي فاكرني اخدك اوريك المحل اصله محتاج شوية تعديلات وانا الفلوس معايا قصرت شويه وكمان كنت عايز اعدل الشقه دي يعني يرضيك نسايبك يبقو قاعدين في مكان زي ده..
_اتملت عيون شهد دموع وفي اللحظه دي بصلها أسر بخبث وقال..
أسر
تمام يا عمي واهو كله بتمنه، شوف اد ايه المبلغ اللي انت عايزه وانا هجيبهولك..
صابر بفرحه كبيره
تسلم يا ابن الاصول وما تقلقش مش هشيلك هم حاجه تاني بعد كده..
_دخلت شهد المطبخ وهي بتعيط وأسر رد علي صابر بجمود وقال…
أسر
بقولك ايه يا عم صابر انا هديلك اللي انت عايزه وكمان اللي يحتاجوه اخوات شهد انا تحت امرهم فيه بس ما تطلبش مني حاجه قدام شهد تاني ولا تقولها انك هتاخد مني فلوس، اصلها عندها كرامه وبتحس وانا بخاف علي زعلها تمام..
صابر
اللي انت عايزه، بس بلاش تبقي طري اووي كده معاها انشف كده عشان تعرف تمشي كلامك عليها..
طلع أسر سجاره من العلبه بتاعته وولعها بهدوء وقال
ما تقلقش يا عمي انا بعرف اتعامل مع مراتي كويس.
_وبعد شويه كان قااعد أسر بيتعشي مع ابو شهد وامها وملك اختها وشهد كانت قااعده مع اخواتها اللي نامو جوه اوضتهم وأسر قال بفضول..
أسر
هي شهد فين مش هتتعشي معانا؟..
فاطمه
لا بتقول مش قادره تاكل وقاعده عند اخواتها اللي اتعشو ونامو من شويه اصلهم صغيرين وبينامو بدري وبيصحو من نجمة ربنا يطلعو عيني..
أسر بهدوء
ربنا يخليهمك..
فاطمه
طيب كل بقي ولا طبيخي مش عاجبك..
أسر
لا بالعكس تسلم ايدك الاكل حلو جدا..
صابر
البت شهد كمان نفسها حلو في الاكل بس هي بتقول ان عندكم شغالين في البيت ومش بتطبخ..
أبتسم أسر وقال
لا لو علي كده بقي انا هخليها تطبخلي مخصوص وادوق اكل مراتي..
ملك قالت بصوت واطي لأسر
علي فكره شهد بتعيط جوه ولما قولتلها تيجي تاكل معاك قالتلي خليه يطفح لوحده بالسم الهاري..
ضحك أسر بهدوء وقالها
طيب ادخلي قولي لاختك جوزك حبيبك بيقولك اجهزي بالذوق عشان تروحي معاه..
ملك بغيظ
هو انت مش شايفني بااكل يا عم، اصبر شويه اصل لو قومت ابويا هياكل منابي وهو بيقضي علي الاخضر واليابس كأنها اخر اكله ليه..
كتم أسر ضحكته وقال
قوليلي يا ملك هي ايه الصوره اللي علي الحيطه دي؟..
ردت عليه فاطمه وقالت
الصوره دي رسمتها شهد قبل ما تدخل المدرسه وما كناش لسه خلفنا غيرها انا وابوها ورسمت قال ايه نفسها وانا وابوها في الملاهي اللي كانت بتشوفها في التلفزيون ونفسها تروحها، وقتها صابر كان فرحان بيها وراح عملها في برواز وعلقها ليها علي الحيطه زي ما انت شايف..
بص للصوره وابتسم بهدوء وقال
طيب انا شبعت الحمد. لله، ممكن اغسل ايدي..
فاطمه
ايوه طبعا تعالي معايا..
أسر
لا قوليلي بس اروح فين وياريت تستعجلي شهد عشان لازم نمشي..
فاطمه
من عينيا يا ابني..
_وبعد شويه كانت قاعده شهد جنب أسر في عربيته وراجعين البيت وبصلها بضيق وهي سانده براسها علي شباااك العربيه وعيونها الخضرا غطاها لون احمر أثر دموعها وحزنها..
أسر بهدوء
جيبتي كل حاحه بتاعتك من هناك، اوعي تكوني نسيتي حاجه؟..
تجاهلته خالص وكأنه مش بيتكلم وهو قال بجمود
عملتي ايه النهارده في اول يوم ليكي المعهد بتاعتك، كنتي لوحدك ولا اتعرفتي علي حد؟..
ما ردتش عليه برضو وهو قال بضيق
بكلمك انا علي فكره..
ردت عليه بنبره حزينه وقالت
وانا مش عايزه اتكلم مع حد…
_اتنهد بضيق وبعد شويه وصلو لبيت الفيومي واول ما دخلو كان البيت فااضي معادا تالا اللي كانت واقفه مستناهم وقالت لأسر بهدوء..
تالا
أسر بيه انا عايزه اتكلم معاك شويه لوحدنا..
_سابتهم شهد وطلعت فوق بهدوء شديد استفز أسر اللي قال لتالا بضيق..
أسر
عايزه ايه؟..
تالا
انا هسافر ايطاليا وو..
أسر بحده
وانا مال امي ناقص كمان اشيل همك انتي كمان..
تالا بحزن
كنت فاكره ان وجودي هنا هيفرق معاك..
أسر بهدوء
لا ما يخصنيش وانتي عارفه كده كويس..
_قال كلامه وطلع اوضته فوق واول ما دخل كان متوقع انه هيلاقي شهد قاعده او نايمه علي الكنبه بس الكنبه كانت فاضيه، قفل الباب ودخل لاوضة النوم ولقاها قاعده علي السرير وبصتله بدموع وقالت بنبره حزينه..
شهد
انا جاهزه يا أسر بيه لاي حاجه انت عايزها او دافع تمنها..
اتكئ أسر بكتفه علي الحيطه جنبيها وبصلها بهدوء وقال
طيب اقعلي الطرحه دي والشوذ بتاعك..
_نفذت اللي قاله ودموعها نزلت علي وشها وكان باين عليها رفضها الشديد ليه، واول ما خلصت بصت للارض ببكاء ما قدرتش تسيطر عليه..
اتعدل أسر في وقفته وقرب منها وقال بجمود
نامي يا شهد تصبحي علي خير انا هنام علي الكنبه بره..
بصتله بعدم. تصديق وقالت
انت عايز مني ايه، ومدام هو كده جايبني هنا ليه؟..
أسر بجمود
عشان بينا اتفااق يا شهد، ولو كنتي صبرتي شويه وما روحتيش بيت اهلك كنت هاجي واقولك ما تخافيش مش هعمل حاجه غصب عنك…
شهد بتوتر
وفؤاااد؟..
أسر
عادي هتصرف وقريب اووي هنخلص من اللعبه دي كلها وهترتاحي مني خااالص..
ومسك ايدها وقال بهدوء
انا مش وحش اووي كده يا شهد انا لو كنت عايز اذيكي كنت مثلت مثلا عليكي اني بحبك وكان حصل بينا كل حاجه برضاكي،بس مدام انتي رافضه يبقي ما فيش داعي.. تصبحي علي خير…
_قال كلامه وسابها وطلع راح قعد علي الكنبه وحط ايده علي قلبه وتلقائياً اتملت عيونه دموع وقال بصوت واطي لنفسه..
أسر
مش هظلمك. زي هما ما ظلموكي يا شهد، انتي مجرد وجودك جنبي اصلا ظلم ليكي وكفايه عليكي ده…
ــــــــــ #بقلم_الكاتبه_رحاب_القاضي ــــــــ
_وتاني يوم الصبح خبطت تالا علي باب اوضة شهد وأسر وما سمعتش رد فدخلت وفي ايدها الفطار وحطته في الصاله وابتسمت بخبث اول ما لقيت أسر نايم في الصاله..
_قربت منه وقعدت جنبيه الي الارض وحطت ايدها علي شعره وقالت بهدوء..
تالا
لو تعرف بحبك اد ايه ما كنتش هتخلي اي واحده تبقي مراتك غيري وقتها..
فتح أسر عيونه بانزعاج ولما شافها قال بحده
انتي بتعملي ايه يا بت انتي؟..
تالا
انا قررت ما اسافرش مش هقدر اسيبك..
أسر
وانا قررت لتااني مره اقولك انا مال امي، انتي ايه اللي جابك هنا دلوقتي؟..
تالا
ده من حسن حظي عشان اعرف انها لعبه وان البنت دي مش مراتك بجد، طبعا انت مش هتنزل بمستواك لحتت عيله بيئه زي دي..
_في الوقت ده كانت شهد واقفه بعيد عنهم بشويه بس سامعه كلامهم، وابتسمت بتلقائيه لما أسر بعد عن تالا وقال بحده..
أسر
وانتي بقي بنت الحسب والنسب اللي ما حدش قادر يطولها، انا اختارت شهد لاني واثق ومتأكد انها بأخلاقها وعزة نفسها تليق تبقي مرات أسر الفيومي مش لاقيه كرامتها في صندوق زباله وجات ورمت نفسها عليا قبل كده من غير ما تبقي بينا اي حاجه، اطلعي بره يا تالا وما اشوفش وشك. هنا تاني..
_بصتله تالا بغيظ وقامت وطلعت من عندهم، وشهد طلعت من جوه وقعدت علي الكرسي جنبيه وقالت بهدوء..
شهد
شكراً..
أسر
انتي كنتي سامعه بقي؟..
شهد
لا هو انا مش بشكرك. عشان دلوقتي بس، واللي حصل امبارح..
أسر بضيق
هو للدرجه دي قربي منك بيدايقك يا شهد؟..
بصتله شهد بتوتر وقلق وردت عليه
في وضعنا ده هيدايقني طبعا..
أسر بجمود
ولو طلبت منك ان جوازنا يبقي حقيقي وعلي طول ، هيبقي ايه الوضع؟..
شهد بضيق
مش عارفه بس ده طبعا مش هيحصل..
أسر بهدوء
هو انتي ليه طلبتي الفطار هنا؟..
شهد
مش انا اللي طلبته دي هاله اختك وبعتالي رساله بتقولي صباحيه مباركه يا عروسه..
ضحك أسر غصب عنه وقال
هههههه هبله اووي اختي، وانتي طبعا اهبل منها ومش فاهمه حاجه؟..
شهد ببراءه
لا مش فاهمه بس هي بتهزر..
أسر بشك
انا عايز افهم انتي كنتي متجوزه بجد قبل كده ولا بتكدبي علينا؟..
شهد
والله كنت متجوزه واطلقت ومعايا القسيمه كمان..
أسر
امم طيب افطري انتي انا ماليش نفس..
شهد
ولا انا واجهز بسرعه لو هتوصلني زي امبارح عشان ما اتأخرش علي محاضراتي..
أسر
خلي السواق يوصلك النهارده وقوليلي هتخلصي امتي وهبقي اجي اخدك..
شهد
لا ما فيش داعي هبقي ارجع مع صحاابي..
أسر
وبقالك صحاب كمان هناك من اول يوم..
شهد بتذكر
ايوه صح نسيت اشكرك علي اللي عملته امبارح برضو انك خليت رحمه تيجي معايا وكده..
أسر بهدوء
عادي يا ستي انا برضو بهتم انتي مهما حصل اسمك مراتي وتخصيني..
شهد بفضول
هو انت عملت ايه في موضوع الناس اللي انت متورط معاهم؟..
أسر بجمود
لسه بدري يا شهد مش عارف بس هانت وكل حاحه هتخلص..
_وقام وفضل يجري علي الجهاز الرياضي بتاعه اللي في الاوضه، وهي قامت ودخلت جوه تاني وبصلها هو بهدوء وغمض عيونه بضيق واستنكار لمشاعره اللي بدأت تتحرك لشهد بشكل كبير…
_فتفكرو هيحصل ايه؟..
ــــــــــ #بقلم_الكاتبه_رحاب_القاضي ــــــــ
_وبعد شويه في شقة سعيد ونسمه كانت قاعده مع صحابها اللي جم يباركولها هي وسعيد، وكان سعيد برضو قااعد معاهم مع جوز واحده صاحبتها وبيتكلمو وقالتلها ريم صاحبتها بهدوء..
ريم
طيب ما جوزك كويس اهو يا بنتي وشكله حلو وراجل كده، اومال ايه حوار ابن امه اللي قولتهولي قبل كده، ده انا افتكرت هاجي الاقيكي اتجوزتي الواد خبره اللي كان مع عادل امام..
نسمه
اتلمي يا بت واتكلمي علي جوزي كويس ده سيد الرجاله وطيب والله انا كنت قلقانه علي الفاضي هو كل الحكايه انه بيحترم امه زياده شويه عن اللزوم..
مروه
ايوه ما احنا شوفناها واحنا طالعين ووقفت احمد جوز ريم وفضلت تحقق معاه ومعانا وتسأل بقي طالعين عند مين وعايزين ايه وايه اللي جايبينه ده، بجد ست فظيعه..
نسمه بأحراج
ست كبيره بقي ودماغها علي قدها، وبعدين هي اخرها كده تحت ما بتطلعش هنا خالص…
_خلصت كلامها وفجأه دخلت عليهم ام محمد بالمفتاح اللي معاها، وقالت وهي بتبص لنسمه بخبث..
ام محمد
السلام عليكم ايه ده هو انتو لسه هنا؟..
بصتلها نسمه بقلق وقالت
في ايه يا طنط دول صحابي جابين يباركولي انا وسعيد..
قعدت ام محمد جنب سعيد وحطت رجل علي رجل وقالت
ايوه ما انا عرفت يا اختي بس انتي ازاي تدخلي نااس غريبه بيتي من غيرما تيجي وتاخدي اذني..
ادايقو صحاب نسمه جدا وقالت هي بغيظ
بقولك صحابي يا طنط ما فيش حد غريب ولا حاجه ما تشوف امك يا سعيد..
سعيد بحده
في ايه يا اما ما يصحش كده..
ام محمد بحده
انت تخرس خالص بقي مراتك جيبالك راجل لحد البيت واتنين ستات الله واعلم بيهم اصلهم ايه وفصلهم ايه وانت قاعد معاهم تضحك وتهزر اخص عليك وعلي رجولتك..
قام احمد جوز ريم وقال بضيق
اتكلمي كويس يا حجه انا جاي مع مراتي نبارك لصحبتها والله واعلم بأصل وفصل النااس اللي ما بيحترموش ضيوفهم..يلا بينا يا ريم وايااكي اعرف انك جيتي هنا عند النااس دي تاني..
_قال كلامه ومسك ايد مراته وطلع وطلعت وراهم مروه اللي قالت لنسمه بحزن علي حالها..
مروه
الله يعينك يا نسمه علي ما ابتلاكي..
وطلعت مروه وام محمد قالت بصوت عالي
في ستين داهيه ده ايه الاشكال اللي بتدخل بيتي دي بس، وانتي يا بت انتي اول واخر مره تدخلي ناااس غريبه هنا انتي فاهمه ولا لا..
نسمه بدموع وغيط
انتي ايه يا ست انتي انا عملتلك ايه عشان تعملي فيا كده وتفضحيني قداااام صحاابي..
قامت ام محمد وقفت قدامها وقالت
انتي بتعلي صوتك عليا يا قليلة الادب، بس العيب مش عليكي العيب علي ابني اللي سامع وساكت..
بص سعيد للارض وسكت ونسمه قالت بسخريه وغضب
لا ما هو ده اخره يسمع ويسكت هو انتي لو ابنك راجل اصلا كان بقي ده حالي..
ابتسمت ام محمد بخبث وقالت لسعيد
سامع مراتك يا سعيد بتقول ايه، مش شيفاااك راجل يا عين امك..
قام سعيد وقال بجمود
انزلي يا اما تحت وانتي يا نسمه خلصنا خلاص ادخلي جوه..
نسمه بحده
لا مش هدخل وانت وامك ما حدش فيكم ليه كلام عليا، ودلوقتي تقول لامك ما تجيش هنا تاني وتاخد منها مفتاح شقتي والا والله ما هقعدلك فيها…
ام محمد
يا اختي ما في ستين داهيه، ومن بكره اجيب لابني ست ستك دوري انتي بس علي نفسك ده بدل ما تحمدي ربنا انه رضي بيكي واتجوزك يا بايره ياللي ما كنتي لاقيه حد يبص في وشك..
نسمه بغيظ
ياريت ما كان رضي بيا علي الاقل كنت استني شويه كمان واتجوز راجل بجد مش ابنك..
خلصت كلامها وضربها سعيد بالقلم وقال بحده
ما تخرسي بقي وغوري ادخلي جوه..
ضحكت ام محمد بسعاده وقالت
ههههههههه جدع يا واد اهو انت كده راجل وسيد الرجاله اديها وعلمها الادب وخليها تتعلم ازاي تتكلم معاك..
بصتله نسمه بدموع وصدمه وقالت
انت بتمد ايدك عليا يا سعيد، والله العظيم ما هقعد علي ذمتك دقيقه واحده تاني بعد اللي عملتو ده واشبع بأمك..
قالت كلامها ودخلت اوضتها وام محمد قالت لسعيد بخبث
جدع يا واد خليها تغور تمشي، وهترجع تاني هما يلاقو احسن منك فين وده العيب هيبقي فيها هي اللي ما كملتش شهر متجوزه وماشيه غضباانه..
سعيد بحده
ارحميني يا اما اقولك علي حاجه انا كمان هسيبهالك وماشي عشان تفرحي اووي…
_واخد موبيله وساب الشقه ونزل ووراه نزلت نسمه اللي غيرت هدومها ومشيت وهي بتعيط..
_تفتكرو بقي هيحصل ايه؟..
ــــــــــ #بقلم_الكاتبه_رحاب_القاضي ــــــــ
_وفي بيت رحمه كانت راجعه الجامعه بتاعتها وموبيلها رن برقم أكرم وهو طالعه علي السلم، فأبتسمت بأشتيااق شديد وردت عليه وقالت..
رحمه
الو مين؟..
أكرم
انتي مسحتي رقمي من عندك..
رحمه
ايوه مسحته مين انت؟..
أكرم بخبث
طيب مسحتيه ماشي مش عارفه صوتي بقي، علي العموم انا أكرم يا رحمه وتحت بيتكم ممكن تطاعي تاني انا لسه شايفك وانتي داخله عايز اتكلم معاكي شويه..
رحمه بتوتر
ايه تحت بيتنا، استني عندك اوعي تتحرك ..
_وسمعت صوت ابوها نازل من فوق فنزلت فعلا وطلعت بره العماره ولقيته واقف بعيد شويه عند بيتهم جنب الموتسكل بتاعه ولما شافها ابتسم بأتساع فراحتله بسرعه وقالت…
رحمه
يخربيتك حبكت تيجي النهارده امشي بسرعه يلاا..
أكرم
امشي بسرعه ليه ده انا جاي اقولك اني اشتغلت في شركه كويسه وباخد مرتب كويس كمان وو..
رحمه
يا ابني افهم ابويا نازل ورايا وانت ما تعرفش ابويا..
أكرم
ماله يعني ابوكي هتعرف عليه عادي وو..
رحمه
لاااطبعا بابا مش كده ده صعيدي درجه اوولي وو، تعالي نستخبي بسرعه احسن يشوفنا اخلص.
_واتخبت رحمه هي وأكرم اللي ما كانش فاهم حاجه ورا عربيه مركونه قدامهم، وطلع ابوها من البيت في الوقت ده…
اكرم
انتي عبيطه ده ابوكي لو مش هيشك فينا بالمنظر ده شارعكم كله هيشك فينا..
رحمه
انت مش فاهم حاجه، ووو..
_قبل ما تكمل كلامها العربيه اللي واقفين وراها ركب حد فيها ومشي بيها وكان ابو رحمه قدامهم وبص لبنته ولاكرم بصدمه ورحمه قالت بخوف وصدمه..
رحمه
يالحظ المنيل بس هو المفضوح مفضوح طول عمره..
اكرم بعدم فهم
عجبك كده شايفه ابوكي بيبصلك ازاي؟..
رحمه بخوف
شايفه ولو خايف انت علي عمرك اجري بابا ده لاعب كمال اجسام قديم وايده طرشه..
_وقرب منهم ابو رحمه في الوقت ده وهو متعصب ووو؟؟..
_تفتكرو بقي هيحصل ايه لابطالنا وايه حكاية شهد مع ابطالنا الجداد شيري وشريف، وايه اللي هيحصل لو أسر اعترف بحبه ليها،وهل حب شهد هيخليه ينسي انتقامه ولا القدر مخبيلهم حياه مؤلمه كعادته؟…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية النصيب)
