رواية المتعة الحرام الجزء الثالث الفصل الحادي عشر 11 بقلم عادل عبدالله

رواية المتعة الحرام الجزء الثالث الجزء الحادي عشر

رواية المتعة الحرام الجزء الثالث البارت الحادي عشر

رواية المتعة الحرام الجزء الثالث الحلقة الحادية عشر

وبعد مرور اكثر من ساعة دخلت سهام لزوجها سامي الذي كان يجلس
في حزن وجلست بجواره مباشرة ثم ابتسمت وقالت له : انا موافقة اني ابيع الارض .
نظر لها سامي باندهاش : بتتكلمي بجد ؟؟
سهام : ايوه .
اخذها سامي في احضانه وقال لها : يا حبيبتي … انا بحبك اوووي .
سهام : بس مش كلها .
سامي : يعني ايه ؟
سهام : يعني هنشوف المشروع اللي انت عايز تعمله هيتكلف كام ونبيع جزء من الارض علي قد الفلوس اللي محتاجها ، وهنسيب باقي الارض مش هنبيعها .
سامي : انا مش مصدق !! انتي بتتكلمي بجد ؟؟
سهام : ايوه يا حبيبي ، يلا بقي قولي مشروع ايه اللي عايز تعمله وعايز كام ؟
سامي : انا عايز افتح شركة ديكورات و تشطيبات هندسية .
سهام ” بتعجب ” : وانت تفهم حاجة فيها ؟؟
سامي : لا ، لكن انتي فاكرة مروان صاحبي ؟
سهام : مروان مين ؟
سامي : مروان صاحبي اللي زارنا يباركلنا هو ومراته في اول جوازنا .
سهام : ايوه افتكرته .
سامي : هو مهندس ديكور ، وكلمني اكتر من مرة اننا نعمل شركة مع بعض وكنت بتهرب منه ومكسوف اقوله اني مش معايا فلوس .
سهام : لكن انت مش بتفهم حاجة في الشغل ده يا سامي !!
سامي : انا هتولي الامور المالية و الادارية وهو هيتولي الامور الفنية والهندسية وان شاء الله ربنا يكرمنا .
سهام : الصراحة انا مش مقتنعة ، لكن مش عايزة ازعلك يا حبيبي !! ما تحاول تشوف اي مشروع تاني بتفهم فيه يكون احسن .
سامي : المشروع ده حلو جدا ومكسبه مضمون ، ده مروان دلوقتي ما شاء الله ربنا فتحها عليه وبقيت حالته المادية مرتاحة جدا .
سهام : وهو لما حالته المادية مرتاحة مش عمل الشركة دي لوحده ليه ؟
سامي : هو فعلا عنده مكتب كبير لكن هو عايز يحوله لشركة ومحتاج لحد زيي معاه يكون شريك له و مضمون .
سهام : طيب يا سامي اللي تشوفه صح اعمله ، وفلوسي وفلوسك واحد ، في الاخر هي فلوس اولادنا ، شوف محتاج فلوس قد ايه و بلغني .
بعد عدة ايام سامي قال لسهام انا عازم مروان صاحبي ومراته عندنا .
سهام : ليه يا سامي ؟
سامي : مش قولتلك هعمل معاه شركة ؟! لازم نقرب من بعض ويبقي فيه علاقات بين الاسرتين ده هيفيدنا في شغلنا جدا ويوطد العلاقة بينا .
سهام : والله يا سامي انا مش شوفت من ورا العلاقات اللي بالشكل ده الا المشاكل والهم .
سامي : مين اللي بيقول كده ؟؟ معقول سهام اللي بتقول كده !!!
سهام : ايوه انا اللي بقول كده ، مستغرب ليه ؟ مفيش حد بيتعلم من اخطاؤه ولا ايه ؟؟
سامي : لا يا حبيبتي اكيد الواحد كل يوم بيتعلم حاجة جديدة وخصوصا لما بيغلط ويتعلم من غلطته ، لكن ده صاحبي من زمان اوي يعني زي اخويا وانتي شوفتيه هو ومراته قبل كده ، يعني مش ناس غريبة عننا .
سهام : علي العموم اعمل اللي انت عايزه وانا معاك .
سامي : تسلميلي يا حبيبتي .
سهام : طيب كنا عزمتاهم بره البيت احسن ، مفيش داعي لعزايم البيوت .
سامي : عزومة بره هتتكلف كتير اوي والظروف دلوقتي مش حلوة زي ما انتي عارفة ، ولا ايه رأيك ؟
سهام : رأيي من رأيك يا سامي شوف انت عايز تعمل ايه .
سامي : يبقي نعزمهم يوم الجمعة الجاية علي الغداء .
سهام : طيب ايدك بقي يا سمسم هات فلوس نشتري فراخ ولحمة و باقي طلبات العزومة .
سامي : معلش يا قلبي خليها عليكي اتصرفي انتي دلوقتي من معاكي وانا هبقي ارجعلك اللي هتصرفيه اول ما يكون معايا فلوس .
ضحكت سهام : ماشي يا سمسم انا وانت واحد مفيش فرق بينا .
سامي كلم مروان صاحبه وعزمه والمدام علي الغداء يوم الجمعة .
حضر مروان وزوجته مروة لمنزل سامي وسهام .
استقبلتهم سهام بالترحاب ولكنها لاحظت تغير كبير في مروان وزوجته عن سابق عهدهم بها !!!
فقد اصابهم الغرور بشكل ملحوظ خاصة زوجته مروة التي وضح عليها علامات الثراء والغرور بصورة مبالغ فيها !!!
حاولت سهام استيعاب غرور الضيوف حتي تناولوا الغداء وبدأ سامي في الحديث مع مروان حول امكانية بداية مشروعهم الذي يحلمون به .
فاجئتهم مروة بكلام مثل طلقات الرصاص فقالت : سوري يا سامي المشروع ده هيتكلف مبلغ كبير اوي وانا شايفة أن ظروفكم اكيد مش هتسمح تدبروا المبلغ المطلوب !!!
قاطعتها سهام بحدة : فلوس كتير ايه يا حبيبتي اللي بتتكلمي عنها ، احنا علفكرة نعمة ربنا مغرقانه ومعانا اي فلوس ممكن تتخيليها .
مرورة ” بارتباك ” : انا اسفة مقصدش حاجة ، ربنا يذيدكم يا حبيبتي ، لكن مشروع زي ده علشان يبدأ مش عايز اقل من ٢ مليون جنية .
سهام : اعتبري المليون حصتنا في الشركة موجودين دلوقتي ، لكن انا الأول كنت عايزة أسألك سؤال .
مروة : يا تري انتي بتفهمي في الشغل ده علشان تقولي المشروع يتكلف قد ايه ؟
مروان : يا مدام سهام مروة مراتي مهندسة ديكور زيي بالظبط وبتشتغل معايا في المكتب وعندها خلفية تامة عن كل شغلي .
سهام : انا كنت بسأل بس مش أكتر ، وعلي العموم اعتبروا الفلوس موجودة لكن كنا عايزين دراسة جدوي للمشروع علشان اعرضها علي ابن عمي لانه متخصص في عمل دراسات الجدوي للمشاريع اللي بالشكل ده ، ولو مفيش دراسة جدوي معاكم ممكن اقوله يعمل دراسة جدوي للمشروع بالكامل وفي وقت قياسي .
مروة : ماشاء الله يا مدام سهام ، شكلك بتفهمي في المشاريع والاعمال .
قاطعها سامي : سهام مراتي بكالوريوس تجارة شعبة ادارة اعمال ، لكن هي حبت تتفرغ ليا و للبيت ولتربية الاولاد .
مروان : مدام سهام حضرتك ممكن تعرفينا بابن عمك ونقعد معاه ونكلمه في كل تفاصيل المشروع وهو يجهزلنا دراسة جدوي زي ما قولتي .
وفجأة يقطع حديثهم صراخ صادر من شقة جيرانهم فيندهشوا جميعا وبعد لحظات يفاجئوا بشاهي تدق عليهم باب الشقة بلهفة شديدة وعندما فتحت سهام الباب صرخت شاهي في وجههم جميعا : ألحقوني نشأت مات !!!!