رواية القطة الغريبة الفصل الثالث 3 بقلم اسماعيل موسى

رواية القطة الغريبة الجزء الثالث

رواية القطة الغريبة البارت الثالث

رواية القطة الغريبة الحلقة الثالثة

وهى أختى بتتكلم بقها كان بيتعرض لتقلصات قاسيه كأنها بتقاوم عشان تفتح بقها وتتكلم
والدتى نزلت على الأرض وفضلت تلطم بأيديها على دماغها
لما سمعت صوت أختى الطبيعى بعد الصوت المرعب الأولانى، تجرأت وقربت منها عشان ابعد جثة القطة المتحلله عن بقها
انفتح فم أختى بضحكه بشعه وشفت اللحم المتعفن داخل بلعومها وضربتنى بأيدها الشمال فى معدتى، طرت فى الهواء وخبطت فى الحيطه.
ريحت عفونه بشعه ظهرت فى الغرفه وش أختى كأنى معرفهوش، عنيها متغيره وضحكتها مقدرش اوصفها
جريت والدتى لبرا الاوضه وققلناها من بره
كلمت والدى والدكتور إلى متابع حالة هند وانا منهار، والدى وصل بسرعه ومعاه الدكتور ومساعد ليه، لما فتحنا الاوضه هند كانت قاعده على السرير قعده غريبه ضهرها متقوس لفوق ودماغها لمسه السرير ومعدتها فوق
الدكتور وقف لحظه مبلم، والدى صرخ فيه اعمل حاجه يا دكتور
الدكتور كان محضر عقار مخدر وطلب منا نثبت أختى عشان يحقنها
انا والمساعد ثبتنا أختى بالعافيه وكانت بتقول كلام كتير، سريع وقصير مفهمتش منه حاجه لأنه كان برطمه بلغه معرفهاش
وضحكتها البشعه مفرقتش وشها وحقنها ب٨٠ ملم سيليون مره واحده
شويه وحركتها خفت وجسمها همد وريح على السرير
الدكتور قال هى مش هتفوق دلوقتى هتنام مده طويله
فى الصاله والدى قال للدكتور انا عايز توضيحات، تفسيرات للى بيحصل ده
الدكتور قال انا محتاج فحوصات تانيه قبل ما اقرر
والدى صرخ مفيش فحوصات تانى انا عايز اعرف بنتى مالها؟
الدكتور سكت لحظات لحد ما والدى هدى وقال انا ممكن اقلك بنتك مريضه نفسيه او حتى متلبسه بشيطان او روح شريره زى كلام الناس الجاهله
لكن العلم ميعرفش الكلام ده، انا محتاج اعمل فحص تانى وتحاليل دم
والدتى وهى بتعيط قالت دى كانت بتتكلم بصوت راجل؟
البنت بتضيع مننا يا ابو احمد، هند هتموت
كنت قاعد ساكت بفتكر صوت أختى وبحاول افهم الكلام إلى كانت بتقوله بلغه غريبه
المساعد قال انا لاحظت كده كمان! دى تعويذه طرد أرواح فرعونيه استخدمت لسقم الأطفال انا درستها فى الجامعه
بتقول!
ارحل يا من تأتى فى الظلام، يا ذا الأنف المقوسه للخلف، يا ذا الوجه المقلوب، هل أتيت لتقبل هذا الطفل؟، لن اسمح لك بتقبيله
هى اخدتك دارسه ايه؟ سألنى المساعد وهو بيبص ناحيتى
آثار فرعونيه جاوبته من غير تفكير!
المساعد نقر بصباعه على دقنه وهو بيبص على غرفة هند، معقول تكون اختك بتوجهلنا رساله؟ يمكن بتطلب مساعده
الدكتور زعق، اسكت يا فهمى، بلاش الكلام المتخلف ده، انا محتاج افحص هند مره تانيه
وطلب من والدى ياخد هند بكره على مصحه نفسيه وقال انه هيكون بأنتظاره ومعاه دكتور نفسى خبير ومشهور
وهما خارجين، المساعد إدانى كارت فيه اسم شخص وقالى فى حالة الأوضاع ازددات سوء اعتقد الشخص ده ممكن يساعدكم