رواية العشق الأبدي 2 (توأم روحي) الفصل الخامس 5 بقلم لبنى دراز
رواية العشق الأبدي 2 (توأم روحي) الجزء الخامس
رواية العشق الأبدي 2 (توأم روحي) البارت الخامس
رواية العشق الأبدي 2 (توأم روحي) الحلقة الخامسة
عن جابر بن عبدالله رضي الله عنهما قال قال رسول الله صلى الله عليه وسلم : «اتقوا الظلم؛ فإن الظلم ظلمات يوم القيامة، واتقوا الشُّحَّ؛ فإن الشُّحَّ أَهْلَك من كان قبلكم، حملهم على أن سفكوا دماءهم، وَاسْتَحَلُّوا محارمهم».
توأم روحي بقلمى✍️_________لبنى دراز
فـ مكتب حلم
راحت حلم المجموعه تانى يوم بعد ما بلغوا شركة (REA) بموافقتهم ع العرض المتقدم منهم و انها منتظراهم و اول ما دخلت مكتبها قالت لـ نادين
حلم:: صباح الخير يا نادين
نادين:: صباح الخير يافندم
حلم:: جهزيلى ملف شركة (REA) و هاتيه و ابعتى لـ هشام و قصى
نادين:: حاضر يافندم
دخلت حلم مكتبها فعلا و دخلت وراها نادين سلمتها الملف اللى طلبته و خرجت و بعد شوية دخل هشام و قصى المكتب
هشام:: صباح الخير يا حلم
حلم:: صباح الخير يا هشام
قصى:: صباح الخير .. ايه الأخبار
حلم:: صباح الخير يا قصى .. كله تمام بس قلقانة شوية
قصى:: قلقانة من ايه بالظبط
حلم:: مش عارفة الشركة دى اول مرة أسمع عنها و شكل أصحابها داخلين السوق بتقلهم و ده قالقنى جدا
هشام:: بجدية .. ماتقلقيش انا سألت و أتحريت عنهم هما ناس جد جدا و بيلتزموا بالمواعيد و الاتفاقات و بعدين كلها شوية و هنقعد معاهم لو كلامهم ما عجبكيش خلاص بلاش منهم و نشوف العرض اللى بعدهم
قصى:: هشام بيتكلم صح يا حلم اصبرى شوية و اسمعى كلامهم الأول و بطبيعة الحال انتى بتشترى الأول و بتسمعى للأخر قبل ما بتردى يعنى أكيد لو فى حاجة هتبان و هتعرفيها
حلم:: تمام .. شوية و الباب خبط و أذنت بالدخول
نادين::دخلت .. مدير شركة(REA) و معاه المحامى بتاعهم برة يافندم
حلم:: تمام يا نادين خليهم يتفضلوا و مش عايزة اى اتصالات لغاية ما يخلص اجتماعنا معاهم
نادين:: حاضر يافندم و بالفعل خرجت نادين و دخل مدير شركة(REA) و معاه محامى الشركة
حلم:: وقفت استقبلتهم .. اهلا وسهلا اتفضلوا
رشاد:: أهلا بيكى حلم هانم انا سعيد جدا بمقابلتك و بالشغل معاكى أحب أعرفك بنفسي انا رشاد عماد المهدى صاحب و مدير شركة (REA) و ده استاذ راضى عبدالله محامى الشركة و المسؤول عن كل ما يخص الشركة هنا فـ مصر
حلم::بجدية .. أهلا بيك رشاد بيه و اهلا بأستاذ راضى و هى بتشاور ع هشام و قصى أحب أعرفك أستاذ هشام الرشيدى محامى و مدير الشؤون القانونية فـ المجموعه و باشمهندس قصى النويرى نائب رئيس مجلس الادارة
رشاد:: بأبتسامة أهلا بيكم يافندم
هشام:: بعملية .. ممكن نبتدى الإجتماع
حلم:: لحظة يا استاذ هشام قبل ما نبتدى قالت لـ رشاد قهوة حضرتك ايه
رشاد:: مافيش داعى حلم هانم خلينا نبتدى إجتماعنا
حلم:: تمام .. أحنا طبعا شوفنا العرض بتاع شركتكم و لاقيناه افضل عرض متقدم بس أسمحلى اسألك ايه اللى يخلى شركة جديدة زي شركتك تنزل بتقلها و تقدم عرض مغرى زى ده
راضى:: أسمحيلى يا هانم اوضح لحضرتك نقطة مهمة
حلم:: أتفضل
راضى:: شركة رشاد المهدى مش جديدة فـ السوق الشركة موجودة من زمان بس طبعا مقرها الرئيسي فـ إيطاليا و ليها فروع فـ أكتر من دولة
و ده سبب أسمها بـ (REA)
قصي:: معنى كدا يا استاذ راضى انكم شركة عالمية
رشاد:: بالظبط كدا يا باشمهندس أحنا شركة عالمية و لينا فـ كل المجالات
هشام:: طيب أسمحلى انت ليك فـ أستيراد و تصدير الأجهزة الكهربائية و الحديد و الصلب و السيارات ايه اللى يخليك تغير مجالك و تتجه لتصدير المنتجات الغذائية ؟؟
راضى:: بتوضيح .. أحنا بنفتح فرع جديد و سوق جديد لينا و ده معناه اننا بنزود مجالاتنا مش بنغيرها و طبعا عشان نقدر نفتح اى سوق جديد لينا بنختار افضل شركات فـ المجال اللى هنشتغل فيه
حلم:: دى حاجة كويسة بس ليه أحنا
رشاد:: لأن زى ما قال راضي لحضرتك بنختار أفضل شركات و طبعا الحلم جروب اشهر من نـ ـار ع علم و صاحبتها غنية عن التعريف فـ نزاهتها و التزامها و ده كل اللى يهمنا عشان كدا قدمنا عرضنا و متأكدين انكم هتختاروه
حلم:: اممممم دى شهادة اعتز بيها .. بس حضرتك واثق اوى كدا ازاى انى هأختار عرضك ؟؟
رشاد:: لأنى درست السوق كويس و عرفت كل الشركات اللى بتشتغل فـ مجال صناعة الأغذية و استيرادها و تصديرها و امكانياتهم ايه و كمان الحلم الجروب لما بتعمل صفقة جديدة و مزايدات ع منتجات مزارعها و مصانعها بتعملها ازاى و مين الشركات اللى بتدخل المزايدات دى
هشام:: بأستغراب لـ رشاد ..ده انت مذاكر كويس بقى
راضى:: طبعا يا هشام بيه لازم نكون مذاكرين كويس عشان نعرف نوصل لهدفنا و نحقق غايتنا و إلا ما كناش نجحنا وبقى لينا اسم و فرع فـ كل دولة
رشاد:: ايه رأيكم نمضى العقود ؟؟
هشام:: بس أحنا لسة ما جهزناش العقود يا رشاد بيه
راضى:: بأبتسامة ولا يهمك هشام بيه احنا مجهزين العقود تقدروا تراجعوها قبل الامضا و لو فى اى بند مش عاجبكم تقدروا تغيروه
هشام:: بص لـ حلم و قصي و أخد العقود راجعها كلها ولـ راضى .. يااااه انتوا ما بتضيعوش وقت
راضى:: بثقة .. طبعا يا استاذ هشام بيزنس إذ بيزنس .. الوقت عندنا بفلوس و كل ما كان بدرى كل ما كان المكسب أكبر
هشام:: واضح جدا فعلا انكم بتحسبوها كويس و قال لـ حلم كله تمام و تقدرى تراجعي العقود بنفسك
حلم:: راجعت فعلا العقود مرة تانية قبل ما تمضى
و بالفعل بعد شوية وقت مضت عقود صفقة تصدير منتجات مصانعها و مزارعها مع رشاد المهدى و اتفقوا ع تسليم الطلبيات بعد اسبوع و خلص الاجتماع و مشى رشاد و راضى اما هشام و قصي كل واحد رجع مكتبه
و فضلت حلم فـ حيرتها و قلقها
___________________________
باربادوس 🇧🇧 أمريكا الشمالية
وصل أحمد مطار باربادوس و دخل البلد بهوية غير هويته الحقيقية و سمى نفسه يوسف و بعد ما خلص إجراءات الجوازات خرج من المطار وقف تاكسي و قاله ع عنوان الاوتيل اللى رايحه و بالفعل وصل و أكد حجز الاوضة اللى كان حاجزها من خلال النت و طلع أوضته فضل فيها يومين ما بيخرجش لغاية ما يتأكد أن مافيش حد يعرف بوجوده و بيراقبه و بعدها ابتدا يتحرك و يخرج و يراقب كل حاجة و كل حركة بتحصل حواليه و يتابع هدفه من بعيد لـ بعيد لغاية الوقت المناسب و بعد مرور شهر و هو داخل الأوتيل خبط عن قصد فـ
رودينا:: بغيظ .. مش تفتح يا غبى و تشوف انت ماشى أزاى
أحمد:: بغيظ مصطنع .. انا برضوا اللى أفتح و لا أنتى اللى تفتحى .. اييييه ماشية تخبطى فـ البنى أدمين كدا و كمان مش عاجبك
رودينا:: بتوتر و قلق .. انا مش هرد عليك لأنى مستعجلة و مش فضيالك
أحمد:: لاحظ توترها و بعيون الصقر راقب المكان كله فـ ثانية .. و بزعيق لااااااا انا مش هسكت انا لازم أخدك ع الشرطة اشتكى عليكى
رودينا:: بقلق .. تشتكى عليا !! تشتكى عليا ليه بس انا عملت ايه لكل ده
أحمد:: و هو لسة متابع قلقها و بيراقب كل تصرفاتها .. خبطتينى و كنتى هتوقعينى
رودينا:: بنرفزة .. اوقعك ايه و انت زى ضلفة الباب كدا وسع خلينى أمشى قولتلك مش فاضيالك
أحمد:: لأ ما أنا مش هسيبك الا لما أخدك ع الشرطة تجيبلى حقى منك
رودينا:: برجاء .. طيب يا سيدى حقك عليا انا أسفة بس أرجوك سيبنى أمشى لو سمحت
أحمد:: اممممم انا هسيبك تمشى دلوقتي بس أسمعى انا مش هسيب حقى أنتى فاهمة ؟؟
رودينا:: اوووف .. طيب يا اسمك ايه
ماشى ماتسيبش حقك بس تسمح بقى تسيبنى أمشى دلوقتي ؟
أحمد:: بأبتسامة مصطنعة و هو بيوسعلها عشان تمشى .. أسمى يوسف و بيقولولى چو يا قطة
رودينا:: و هى بتمشى من قصاد أحمد .. لـ نفسها واحد غبي كنت ناقصاه انا ع الصبح كدا مش كفاية اللى انا فيه
يوسف:: بعد ما رودينا مشيت مشى وراها بخفة من غير ما تحس بيه و فجأة شاف عربية بتقرب منها بسرعة و فـ أقل من الثانية شدها عليه و أنقذها
رودينا:: بغيظ .. أنت تانى .. أنت أهبل يا أبنى أنت ولا شكلك كدا .. ايه اللى انت عملته ده بتشدنى ليه كدا
يوسف:: بقى بتغلطى فيا و تطولى لسانك بدل ما تقولى شكرا يا چو مش كفاية خبطتينى و سكتلك كمان بتغلطى و مش عاجبك
رودينا:: لأ انت فعلا بنى أدم لا تطاق .. انا مش عارفة عملت إيه فـ دنيتى ياربى بس عشان تبلينى بـ البنى أدم ده
يوسف:: بغيظ أكبر .. تصدقى أنا غلطان انى شديتك ياريتنى كنت سيبتك تمـ ـوتى تحت العربية و أرتحت من طولة لسانك دى
رودينا:: طيب يا سيدى خلاص عرفنا انك اتنيلت و انقذتنى من المـ ـوت تسمح بقى توسع من طريقى
يوسف:: قبل ما يسيبها تمشى قرب منها و بهمس .. خلى بالك يا دكتورة أنتى متراقبة و العربية كانت هتخبطك عن قصد لو خايفة ع حياتك قابلينى فـ العنوان ده ضرورى و حطلها ورقة فـ إيدها و سابها فى حيرتها و مشى من غير ما يبص وراه
___________________________
فـ مصر 🇾🇪
فـ مستشفى الحلم
دخلت هنا المستشفى وراحت ع اوضة الكشف و ابتدت تتابع حالات المرضى و هى بتكشف ع راجل كبير فـ السن صادف مرور أدهم و شاف
هنا:: قاعدة قصاد الراجل و بتغنيله جدو جدو يا أحسن جد تعال نكشف يلا يا جد .. أسمك ايه يا جميل
المريض:: أسمى على يا بنتى
هنا:: بغُنى .. جدو على يوم الجمعة أيا أيا اه هنروح ع مزرعته الخضرا أيا أيا أه .. بتشتكى من ايه يا جدو
المريض:: مش بقدر أخد نفسى و دايما حاسس بهبوط و ضربات قلبي سريعة
هنا:: بعد ما سمعت المريض و كشفت عليه و هى بتكتبله الروشتة .. امممم شكلك بتحب تيتة الحاجّة كتير و هى اللى عاملة فيك كدا
المريض:: بأبتسامة لـ هنا طبعا بحبها مش عشرة عمرى أم أولادى و أحفادى
هنا:: بهزار خلاص بقى كفاية عليها كدا يا جدو غيرها عشان تخف و اتجوز مزة صغنونة كدا تجدد شبابك و ترجع أبن العشرين ههههههههههه
المريض:: بضحك خلاص هسمع نصحيتك و لو سألتنى هقولها انك أنتى اللى نصحتينى ههههههههههههه
هنا:: بحركات طفولية .. مين ؟؟ انا ؟؟ اسسسكت مش انا اعتزلت المهنة ههههههههههههه
أدهم:: بنفاذ صبر من هنا .. مهنة إيه اللى اعتزلتيها يا دكتورة
هنا:: بخضة .. بابى ؟! قصدى دكتور أدهم ؟!
المريض:: و هو خارج من اوضة الكشف .. بأبتسامة لـ أدهم ربنا يبارك لك فيها .. بسبب ابتسامتها الحلوة دى أنا حاسس انى بقيت كويس
أدهم:: بأبتسامة رضا .. ربنا يبارك لك و يشفى عنك يا حاج و لـ هنا بعد ما مشى الراجل أنا مش عارف بصراحة اعمل معاكى ايه واخدة جنان أمل فـ كل حاجة
أمل:: من وراه .. و مالها أمل يا سي أدهم بقى مش عاجباك فـ ايه
أدهم:: بمرح لـ أمل .. كلك عاجبنى يا ولا كلك عاجبنى
أمل:: أيوا كدا و لـ هنا أحلى حاجة يا هنوشة الجنان استمرى يا قمرة
هنا:: بتحدفلها بوسة فـ الهوا .. أيوا بقى يا مامى هو ده
أدهم:: بنفاذ صبر عوض عليا عوض الصابرين يارب انا ماشى قبل ما يجرالى حاجة بسببكم
هنا:: ببراءة .. بابى يا بابى استنى عايزة اقولك حاجة
أدهم:: بجدية .. بابى دى فـ البيت يا دكتورة أحنا هنا فـ المستشفى مفهوم ثم اى حاجة عايزاها ليها علاقة بالشغل تمام تعالى ورايا ع المكتب و اطلبيها اما لو حاجة خاصة بيكى يبقى لما نرجع البيت اوك
هنا:: لنفسها و هى بتدب رجلها فـ الارض .. ايه هو ده كل شوية شخط و زعيق كدا و بتلقده بابى دى فـ البيت احنا هنا فـ المستشفى يوووه بقى حاضر يا سي بابى
أدهم:: سمعها و بغيظ و عينيه ع أمل مش عارف انا يارب كان كفاية عليا واحدة كدا كتير بجد و لـ هنا وطى صوتك و انتى بتبرطمى بعد كدا و اتفضلى كملى شغلك
هنا:: اوك يا دكتور بعد أذنك
و بالفعل سابته و مشيت رجعت تانى تكمل كشف ع المرضى و كالعادة مجنناهم
________________________
باربادوس🇧🇧
فـ المطعم
أحمد بعد ما ساب رودينا رجع الأوتيل غير شكله تماما و خرج بعد ما أتأكد ان مافيش حد بيراقبه و راح المطعم اللى كتب عنوانه فـ الورقة لـ رودينا و اللى كان مطعم متطرف برة المدينة قبل الميعاد اللى قالها عليه عشان يأمنه قبل المقابلة و بعد شوية جات
رودينا:: دخلت و فضلت تدور ع يوسف و مش شايفاه و فجأة
يوسف:: بأبتسامة .. هاللو رودى
رودينا:: بخضة .. أنت مين !! و عايز ايه ؟؟
يوسف:: قعد بهدوء و صوت أقرب للهمس .. أهدي يا دكتورة أنا يوسف
رودينا:: بأندهاش .. عامل فـ نفسك كدا ليه ؟!
يوسف:: أحتياطات أمنية مش أكتر
رودينا:: طيب تمام .. ممكن تقول بقى عايز مني إيه بقالك فترة كبيرة بتلف و تدور ورايا ليه يا يوسف
يوسف:: مبدئيا كدا قبل ما اقولك عايز منك ايه عايزك تفهمى ان كل اللى بعمله ده لمصلحتك و حمايتك من الناس اللى عايزين يقـ ـتلوكى
رودينا:: بتوتر و هى بتتلفت حواليها .. انت بتتكلم عن أيه انا مش فاهمة حاجة
يوسف:: بثقة .. دكتورة رودينا لازم تفهمى ان أنا عارف عنك كل حاجة و معاكى ما تقلقيش فـ أرجوكى أهدي عشان ماتلفتيش الانظار
رودينا:: بقلق .. و أنا ايه يضمنلى أنك بتتكلم لمصلحتى أساسا
يوسف:: لما هتعرفى أنا مين هتتأكدى من كلامى
رودينا:: و انت مين بقى ان شاء الله أحب أعرف
يوسف:: بيتلفت حواليها بعينيه و بصوت واطى .. أسمى أحمد المنصورى ظابط مكلف بحمايتك ورجوعك مصر بسبب البحث بتاعك
رودينا:: ضحكت بسخرية .. و دى لعبة جديدة بقى دى و لا ايه
أحمد:: بجدية .. دكتورة رودينا أنا مش سايب شغلى و بلدى و جاى من مصر لغاية هنا كل المسافة دى عشان ألعب او أهزر اعتقد انتى عارفة كويس ان حياتك فـ خطر فـ ياريت تتعاونى معايا عشان أقدر أحميكى
رودينا:: بأستنكار .. و إيه اللى يثبتلى صحة كلامك ؟؟
أحمد:: التهـ ـديد ات اللى أتعرضتيلها بسبب بحثك اللى عملتيه فـ الفترة الأخيرة و لو عايزة أثبات أكتر من كدا .. بيتك اللى اتقلب عليه واطيه و النجفة اللى حضرتك وهمتى بيها مدير مركز البحوث أنك مخبية فيها البحث بتاعك و هو فـ السلسلة اللى سيادتك لابساها و الأوتيل اللى قاعدة فيه بعد بيتك ما اتفتش .. ها لسة عايزة أثبات كمان
رودينا:: بذهول .. أنت قدرت تعرف كل ده أزاى و أمتى ؟؟
أحمد:: ده شغلى يا دكتورة و بنفذه .. و زى ما واجبك تخدمى بلدك من خلال أبحاثك انا واجبى أعرف عنك كل حاجة عشان أقدر أحميكى
رودينا:: و أنت هتقدر تحمينى أزاى
أحمد:: قولتلك ده شغلى أنا ما تقلقيش
رودينا:: بس أنت كدا حياتك هتبقى فـ خطر
أحمد:: انا متعود ع المخاطر المهم انك تسمعى كلامى و تنفذيه بالحرف الواحد
رودينا:: بتوتر و قلق .. حاضر حاضر قول مطلوب مني ايه و انا أنفذه
أحمد:: انا هعمل نفسى داخل الحمام و هخرج من الباب الخلفى للمطعم و انتى بعد ما أقوم تخرجى بسرعة و تدخلى الأوتيل اللى بعد المطعم هتلاقى أوضة محجوزة بأسمك تدخليها و ما تخرجيش منها و ما تفتحيش لـ أى حد لغاية ما أتصل بيكى او أجيلك مفهوم
رودينا:: مفهوم مفهوم .. بس أشمعنى الأوتيل ده بالذات
أحمد:: لأنه متأمن كويس و هأقدر أخد بالى منك و أعرف أحميكى لغاية ما ترجعى مصر ان شاء الله
و بالفعل قام أحمد مشى ناحية الحمامات و بسرعة خرجت رودينا من المطعم عشان تنفذ اللى طلبه منها أحمد و راحت جرى ع الأوتيل و أتأكدت انه حاجزلها أوضة بأسمها و طلعت فعلا أوضتها و ما خرجتش منها زى ما قالها
__________________________
فـ مصر 🇾🇪
ڤيلا سيف
قاعد سيف فـ الليڤنج بعد ما رجع من من شغله هو و عاليا و كالعادة ضحك و هزار و فجأة دخل
شادى:: مسسسساء الخيييييير يا عصافيييير
سيف:: بغيظ .. مساء الخير يا خويا كنت فين كدا ياض أنت
شادى:: ببراءة .. كنت بذاكر مع جاسر
سيف:: اممممم بتذاكر مع جاسر ولا بتعمل مصيبة مع جاسر اصلها تفرق
شادى:: بخضة مصطنعة .. ايه ؟! بقى انا برضوا وش ذلك يا سيفو
سيف:: بغيظ أكبر .. ده انت ذلك نفسه يالا .. قر و أعترف كنت فييين
عاليا:: بضحك لـ سيف .. جرا ايه يا جدع ما قالك كان بيذاكر مع جاسر ههههههههههههه
شادى:: لـ عاليا قولي له يا لولا .. انتى برضوا تصدقى عنى كدا
سيف:: لـ عاليا بتتكلمى انتى ع أساس مش عارفة أبنك و أبن أخوكى و معاهم الفاشل التالت أبن أختك بيعملوا ايه مش كدا ؟!
شادى:: بغباء .. ع فكرة أدم ما كانش معانا فـ المصيبـ …… اوبااااا و قـ ـطع كلامه بسرعة لما حس بتسرعه
سيف:: أيواااا تعالالى بقى مصيبة ايه اللى عملتوها انت و ابن خالك
شادى:: مصيبة !! انا قولت مصيبة ؟؟ انت اللى قولت ع فكرة مش انا خاااالص
سيف:: ولاااااااا أخلص هببت ايه انت و جاسر
شادى:: بدموع مصطنعة و هو بيلف عشان يطلع أوضته .. اه يا مظلوم يانى كل شوية يظلمونى كدا و يقولوا عليا اللى مش فيا يانى سأخبر الله بكل شيء و طلع السلم جرى قبل سيف ما يمسكه
عاليا:: لـ سيف الواد ده وارث كل چينات الجنان منى و منك ههههههههههههه
سيف:: اه ياختى ده وارثه و طمع فيه لوحده .. ع رأى أخوكى فارس لما قال أنت و عاليا أخركم عيلين بس و كفاية جنانكم
عاليا:: عندك حق يا حبيبى تخيل كدا لو عندنا أربع خمس عيال نفس نوعية شادى كدا كنا عملنا ايه ههههههههههههه
سيف:: أبدا يا روحى كنا نقلنا إقامتنا فـ العباسية يا قلبى ههههههههههههه بس تصدقى بقى انا فرحان فـ أخوكى اوى
عاليا:: فرحان فـ أبيه فارس ؟! هقوله انك فرحان فيه ع فكرة
سيف:: بغيظ .. ياختى اتنيلى ده طول النهار مطلعه ع عينينا فـ المكتب و لما بيرجع البيت جاسر بيخلص منه اللى بيعمله فينا يستاهل أحسن هههههههههه
فارس أدهم:: دخل من وراه مش خايف أقوله أنا يا باشا انك فرحان فيه
سيف:: بغيظ .. طيب فكر كدا بس تقوله يا أبن أدهم و أنا ارميك برة الڤيلا دى و ماعنديش بنات للجواز قولت ايييه
فارس أدهم:: و أهون عليك يا جوز عمتى تعمل فيا كدا و انا اللى كنت جاى احدد ميعاد عشان أجيب بابا و نقرا الفاتحة تقول ماعنديش بنات للجواز
سيف:: انت مش عايز تفتن لـ عمك روح بقى افتن و قوله اللى سمعته يا أبن أدهم و شوف مين هيجوزك البت
فارس أدهم:: حقك عليا يا باشا عيل و غلط بس بلاش البت ابوس ايدك
عاليا:: فارس حبيبى تعال أقعد قولى اتغديت و لا لسة
فارس أدهم:: تفتكرى يا عمتو يا قمر انتى أمل العربى هتسيبنى انزل من غير غدا يعنى
عاليا:: مستحيل طبعا تعملها دى بتوقف كل حاجة عشان خاطرك انت
سيف:: بتريقة .. اه طبعا هى خلفت غير فارس و بس اومااااال
فارس أدهم:: مالك بس يا سيف باشا مأير منى ليه ها عملت لك ايه بس
سيف:: هو كدا غلاسة و خلاص و ان كان عاجبك مش عاجبك امشى
فارس أدهم:: عاجبنى يا باشا انا أقدر اتكلم برضوا و لـ عاليا بعد ما باس إيدها عمتو حبيبتى ممكن تندهى علا عايز أسلم عليها عشان مسافر كام يوم كدا
سيف:: مسافر رايح فين ياض
فارس أدهم:: يومين كدا تغيير جو يا عمى تحب تيجى معايا
سيف:: بغلاسة .. لأ
فارس أدهم:: ليه بس تعال معايا و انا هدلعك أخر دلع و أوريك اللى عمرك ما شوفته ههههههههههههه
عاليا:: ولاااا يا فارس سيب سيف فـ حاله و امشى أستنى علا فـ الجنينة قال تدلعه قال ده اللى كان ناقص كمان
فارس أدهم:: بضحك لـ سيف و هو خارج ع الجنينة .. عاليا بتمـ ـوت فيك و بتغير عليك أوى يا باشا
سيف:: بثقة .. طبعا يا أبنى اومال ايه دى عشرة تأبيدة 25 سنة لازم تمـ ـوت و تحيا فيا كمان
فارس أدهم:: يا سلام ع الثقة أوعدنا يارب .. و خرج فعلا الجنينة أستنى حبيبته و توأم روحه علاه اللى منورة حياته
___________________________
باربادوس🇧🇧
فـ مركز البحوث
دكتور چورچ مدير المركز قاعد فـ مكتبه هيتجنن بسبب رودينا و بيفكر أزاى ياخد منها البحث اللى عمتله بأى طريقة و شوية و سمع خبط ع الباب و أذن بالدخول
مارك:: دخل و قال صباح الخير بروفيسور
چورچ:: صباح الخير مارك .. طمنى عملت ايه مع دكتورة رودينا
مارك:: أختفت من بيتها بروفيسور من بعد ما فتشنا فيه
چورچ:: بغـ ـضب يعنى اييييييه أختفت .. أزااااااى مارك تختفى و انت كننننت فيييين
مارك:: ماشيين وراها زى ضلها بروفيسور بس ……..
چورچ:: بمقاطعة بسسسس ايييييه .. بس حضرتك غفلت عنها شوية مش كدا و لا شوفت واحدة معدية قصادك و ريلت عليها زى عوايدك .. أننننطق بس اييييه
مارك:: بتوتر .. لاحظنا فـ الفترة الأخيرة فى حد بيدور وراها و كل ما نحاول نقرب منها يظهرلنا فجأة و يبوظلنا مخططنا
چورچ:: بأهتمام مصحوب بغـ ـضب .. حد مين ده انننططططق
مارك:: بتوتر أكبر و صوت مهزوز .. ظـ ظـ ظـ ظابط مخابرات مصرى
چورچ:: وقف بعصبية و من بين أسنانه .. أنت لاااااازم تتصرف بسرعة و تشوف رودينا دى فيييين بأى طريقة مش لازم البحث ده يخرج من هنا مفهووووم لااااااازم أخد البحث ده بأى شكل حتى لو تقـ ـتلها هى و الظابط اللى معاها
مارك:: بأستفسار .. هو البحث ده مهم أوى كدا بروفيسور ؟؟
چورچ:: بص للفراغ قصاده و قال بشرود .. مهم جدا مارك البحث ده فيه تركيبة علاج لـ مرض نادر جدا مافيش حد بيخف منه و ماحدش قدر من كل علماء العالم يوصل لـ علاجه و هى قدرت توصل و جربته و نجحت .. لااااازم يكون البحث ده معايا أنا و أنا اللى أعلن عنه و أسمى أنا اللى يشتهر مش المصرية الفلاحة دى
مارك::تمام بروفيسور أنا مراقب تيلفونها وقت ما تعمل منه أى مكالمة هنعرف هى فين و نجيبهالك ع طول
چورچ:: بزعيق .. غبي مااارك غبييييييي أنت فاكر ان المخابرات هيعدي عليهم الموضوع ده .. دول أكيد طالما وصلولها يبقوا غيرولها الفون كله و مش بعيد يكونوا رجعوها بلدها
مارك:: بتساؤل .. أسأل فـ المطارات و الموانى بروفيسور ؟؟
چورچ:: مش بقوووول أنك غبييييي .. غوووور من وشي و أتصرف لاااااازم تعرف فييييين دكتورة رودينا و تجيبهالى عايشة او ميتة فاااااهم
مارك:: فاهم بروفيسور چورچ مش هرجع غير و هى معايا
و بالفعل خرج مارك من مكتب چورچ و سابه لتفكيره فـ رودينا و البحث اللى عملته و أزاى ياخده منها
_________________________
فـ مصر 🇾🇪
نفس الوقت ڤيلا سيف
خرج فارس أدهم الجنينة و منتظر علا حبيبته تخرج له بعد ما بعت لها خبر مع عمته عاليا و شوية و شافها جاية
علا:: بأبتسامة صافية .. اتأخرت عليك ؟؟
فارس أدهم:: بنفس الأبتسامة .. اتأخرتى كتير أوى يا علا
علا:: بأندهاش .. كتير أزاى دول خمس دقايق بس
فارس أدهم:: بنظرة عاشق .. الخمس دقايق دول مروا عليا كأنهم خمس سنين يا علا
علا:: ياه يا فارس قد كدا انت بتحبنى
فارس أدهم:: بحبك بس ده انا بعشقك يا علا مش بس بحبك..
أحبك نبضاً يـدق بقلبى فيحيينى
أحبك شمساً تشرق أيأمى وسنينى
أحبك ليلا يختال سكونى و يكوينى
أحبك صبحاً فى أول يومى يهدينى
..أحبـــك بيتاً فى برد شتائى يأوينى
أحبك شعراً بقصيدة كلماتها تغوينى
فيجرى هواكِ فى شرايينى
أحبك عمــراً أذوب فيه
أحبـــك قدرأ يخـ ـطفنى
وقــطرة مــاء ترويني
علا:: بسعادة .. ايه الكلام الجميل ده يا فارس
فارس أدهم:: مسك إيديها و حطها ع قلبه .. الكلام ده خارج من هنا و جميل عشان خارج ليكى أنتى و بس يا علا
علا:: بتذمر .. بس انا مش بعرف أقول كلام حلو زيك كدا
فارس أدهم:: و أنا مش عايز من حبيبتى غير انها تحبنى و بس و ده عندى كفاية
علا:: طيب ما أنا بحبك يا فارس
فارس أدهم:: خلاص و ده عندى كفاية يا قلب و روح فارس
علا:: لأ مش كفاية يا فارس عايزة أتعلم اقول كلام حلو زيك كدا
فارس أدهم:: بهزار ..اممممممم اعتبر دى معاكسة بقى و لا ايه
علا:: انا مابهزرش يا فارس ع فكرة بجد عايزة أتعلم اقول زيك كلام حلو عشان أعرف أرد عليك
فارس أدهم:: باس إيدها اللى ماسكها .. حبيبتى غمضى عينيكى و سيبى نفسك لـ أحساسك و قولى اللى انتى حاساه هتلاقى نفسك قولتى كلام أجمل بكتير من اللى انا بقوله
علا:: بابتسامة .. خلاص هجرب أستنى كدا و غمضت عينيها فعلا و تخيلته و بعد شوية و هى بتفتح عينيها اللى مركزاها عليه .. حبيبــــــــى
قَسماً بِعينيك التي هي
عِندي كُل ما أَملك
لو كَان لِي ألفُ قلبٍ
ما نَبض واحدٌ بِغير حُبك
ولو كَان لي ألفُ عينٍ
مَا رأت بِالعشقِ غَيرك
ولو كَان لي ألفُ أذنٌ
ما استَطابتْ غيرَ صوتكْ
اقسمت بك.. يا قلبي النابض.
إذا ڪان النبض في قلبي دليل الحياة
فانت الحياة التي ينبض بهـا قلبي
فارس أدهم:: بتنهيدة عشق .. اااااااه يا علا هتوحشينى أوى مش عارف أزاى هسافر و أغيب عنك يا نبض قلبي بعد الكلام الجميل ده
علا:: بحزن .. أنت مسافر يا فارس
فارس أدهم:: مضطر يا قلبي أسافر مأمورية صغيرة كدا و راجع
علا:: هتغيب كتير ؟!
فارس أدهم:: لأ يا حبيبتى أسبوع بالكتير أن شاء الله
علا:: تروح و ترجع بالسلامة يا حبيبى
خلى بالك من نفسك و أبقى طمنى عليك
فارس أدهم:: حاضر يا حبيبتي يلا بقى أسيبك عشان ألحق الطيارة
علا:: بأستغراب .. أيه !! أنت ماشى دلوقتي ؟؟
فارس أدهم:: أيوا يا علا حبيت تكونى أخر حاجة تشوفها عيونى قبل ما أسافر و بهمس .. لما اقرب أرجع هقولك عشان تكونى أول حد تشوفه عينيا
علا:: و أنا هستناك يا فارس
و بالفعل مشى فارس بعد ما قالها تسلم ع عاليا و سيف و طلع ع المطار ع طول عشان يبتدى رحلته
____________________________
فـ النادى
بعد مرور أكتر من شهر ع أمضاء عقود صفقة الأغذية مع شركة رشاد المهدى خرجت تسنيم رايحة النادى تقابل صديقاتها و تتمرن معاهم تنس و هى داخلة بعربيتها الباركينج الخاص بالنادى دخل وراها شخص فـ نفس الوقت و خبطها بعربيته
تسنيم:: نزلت و بزعيق .. انت يا حيواااان مش تحاسب اييييه أعمى مش شايف
يزن:: بنرفزة .. يعنى انتى اللى غلطانة و كمان مش عاجبك
تسنيم:: فتحت عينها ع الأخر بذهول .. أنا اللى غلطانة؟! و بزعيق أنت أزااااااى تجرؤ تتكلم معايا اصلا و تقول أنى غلطانة
يزن:: بغـ ـضب .. أيوا غلطانة و لازم تعتذرى كمان و مش مرة واحدة لأ مرتين
تسنيم:: حطت إيدها فـ وسطها .. و ده ليه بقى ان شاء الله و بعدين أنت مييين اصلا عشان اعتذر لك يا بتاع انت
يزن:: عايزة تعرفى أنا مين ماشى .. أنا ابقى يزن العوضى صاحب شركات العوضى و كمان عضو مجلس إدارة النادي ده
تسنيم:: ولا يهمنى مش تسنيم المنصورى اللى تعتذر حتى لو كنت وزير الشباب و الرياضة نفسه .. أنت اللى لازم تعتذر و مش شفوى كمان لأ ده انت تقدم أعتذار رسمى فـ كل الجرايد و السوشيال ميديا
يزن:: بغيظ و غضـ ـب أكبر .. يعنى مش كفاية انك غبية و مابتعرفيش تسوقى و بتقفى بغباء و لسانك طويل كمان مغرورة و متكبرة
تسنيم:: بغـ ـضب أكبر و فـ أقل من ثانية رفعت إيدها ضـ ـربته بالقلم و سابته و دخلت النادى من غير ولا كلمة
يزن:: فجأة الدنيا ضلمت قصاد عينيه و حط إيده ع خده و بص ع أثرها و قال و رحمة أمى لا أندمك و أدفعك تمن القلم ده غالى اوى و دخل النادى و هو متنرفز جدا و قابله صديقه
باهر:: يا ستار مالك يا عم ضـ ـارب بوز ليه كدا
يزن:: بغيظ و هو بيكلم نفسه .. بنى أدمة غبية محتاجة تتربي و انا بقى اللى هربيها
باهر:: بعدم فهم .. مين دى اللى غبية و عملتلك ايه منرفزك كدا
يزن:: أنتبه لـ باهر .. واحدة اول مرة أشوفها .. داخل اركن العربية فـ البارك كانت داخلة قصادى و وقفت مرة واحدة فاجئتنى خبطت فيها غصب عني
باهر:: بأهتمام .. و بعدين عملت ايه معاها
يزن:: عينك ما تشوف اللى النور يا ستار ع طولة لسانها و ابتدى يحكى اللى حصل لـ باهر
باهر:: بضحك انت وقعت مع تسنيم المنصورى ههههههههههههه ما كانش يومك يا يويو يا حبيبى
يزن:: بغيظ ممكن أفهم بتضحك ع ايه دلوقتي يا استاذ انت
باهر:: بضحك عليك يا يويو و ع اللى هيجرالك من بنت المنصورى
يزن:: برفعة حاجب .. ليه يعنى هى بنت مين فـ البلد
باهر:: ليك حق ما انت معذور يا يويو .. انت ما تعرفش ان أبوها سيادة اللوا فارس المنصورى رئيس قطاع الأمن الوطنى و أخوها التوأم مخابرات عامة و أمها تبقى الأسطورة حلم الرشيدي
يزن:: بغيظ اكبر .. حتى لو كانت بنت رئيس الجمهورية لازم أدفعها تمن القلم ده اضعاف مضاعفة
عند تسنيم
بعد ما دخلت النادى متنرفزة بسبب خناقتها مع يزن راحت طلعت غضـ ـبها و نرفزتها فـ تدريب التنس و لما خلصت لسة يادوب بتقعد و بتفتح النت تتابع الفيس شافت خبر بيتكلم عن حالات تسمم و مـ ـوت ناس كتير جدا بسبب أغذية فاسدة و منتهية الصلاحية نزلت الاسواق و جارى البحث وراها لمعرفة مين صاحبها
تسنيم:: بغـ ـضب .. ناس ماعندهاش ضمير للدرجة دى أرواح الناس البريئة دى مالهاش أى قيمة عندهم
راندة:: للاسف يا توتة عشان يكسبوا شوية ملايين زيادة بيتاجروا بأرواح الغلابة
ندا:: بيستغلوا غلا الاسعار و بيلبعوا ع
أحتياج الناس و بينزلوا الأكل الفاسد بأسعار رخيصة و الناس يا حرام مابتصدق تسمع ان فى أكل و حاجات رخيصة بيجروا يشتروا من غير ما يتحققوا من صلاحيتها
تسنيم:: للاسف دى حقيقة يا بنات بس ما فكروش هيقفوا قدام ربنا أزاى و هما قـ ـاتلين كل الناس دى
ندا:: يا بنتي لو كل واحد فكر فعلا فـ اليوم اللى هيقف يتسأل فيه قدام ربنا كان فكر ألف مرة قبل ما يعمل أى حاجة و كان يحاسب نفسه قبل ما يتحاسب
تسنيم:: و هى بتقف عشان تمشى .. عندك حق يا نودى والله كلامك عين العقل بس فين يا بنتي اللى بيعمل كدا دول بقوا قليلين اوى
راندة:: لـ تسنيم .. قومتى ليه لسة بدرى
تسنيم:: لأ خلاص كفاية كدا مصدعة و تعبانة و عايزة أروح أرتاح يلا سلام
و سابتهم من غير ما تسمع ردهم و مشيت رجعت الڤيلا و هى متنرفزة بسبب يزن و بسبب الخبر اللى قرأته فـ النت
_________________________
ڤيلا فارس
قاعدة حلم هى و فارس فـ الليڤنج و معاهم جاسر و حور و بيتفرجوا ع التليفزيون و فجأة شافوا خبر عاجل
المذيعة:: أعلنت مديرية الصحة في محافظة السويس عن ضبط 50 طن من الأغذية الفاسدة و منتهية الصلاحية و ذلك بعد أصابة الكثيرين بحالات التسمم مما أدى الى وفاة 20 شخص و أصابة 20 أخرون بالأعياء الشديد و 10 اشخاص حالات حرجة
فارس:: بغـ ـضب .. لا حول ولا قوة إلا بالله مين البنى أدم معدوم الضمير اللى عمل كدا
حلم:: بقلق و قبضة قلب .. للاسف يا حبيبى فى ناس كتير كدا عايزين يوصلوا و يحققوا هدفهم بسرعة و اللى بيروح ضحيتهم الناس البسيطة اللى بتصدقهم و تشترى من منتجاتهم
حور:: عندك حق يا ما…… و قطـ ـع كلامها جرس الڤيلا و جرس فون فارس فـ نفس الوقت
فارس:: رد السلام عليكم فـ نفس الوقت فتحت
فاتن:: بخضة من شكل الظابط و الحملة اللى معاه .. البببوليس ؟! خير يا باشا
ظابط المباحث:: دخل جوة الڤيلا .. فين حلم الرشيدي
فارس:: لـ المتصل بحزن .. تمام اقفل انت و لـ الظابط خير يا سيادة الرائد عايز حلم فـ ايه
الظابط:: معايا أذن بالقبض عليها
حور:: شهقت و حطت إيدها ع بؤقها و مش قادرة تتكلم
حلم:: بذهول .. تقبض عليا انا !! ليييه عملت اييييه
الظابط:: ياريت تتفضلى معانا بهدوء و من غير شوشرة و فـ النيابة هتعرفى كل حاجة
حلم:: و كمان نيابة !! أنا عملت ايه لكل ده .. انا مش فاهمة حاجة
فارس:: ممكن أشوف أذن النيابة ؟؟
الظابط:: بتفهم .. طبعا اتفضل
فارس:: أخد الأذن من الظابط و اتأكد منه و لـ حلم بوجع .. الأذن سليم
حلم:: بعدم فهم و بتوهان لـ فارس انا عملت ايه يا فارس عشان يتقبض عليا انا طول عمري شغلى سليم و بما يرضى الله و عمرى ما عملت حاجة غلط
جاسر:: بعصبية و زعيق .. أنتى مش هتخرجى من هنا يا أمى و اللى هيفكر يقربلك هقـ ـتله و لـ الظابط حلم الرشيدي ما عملتش حاجة عشان يتقبض عليها انت فاااااهم
فارس:: بزعيق .. جااااااسر ما ينفعش اللى بتعمله ده اسسسسكت خاااالص
جاسر:: دى ماما يا بابا حلم عمرك ازاى هتسيبهم يقبضوا عليها ازااااااى
فارس:: غمض عينيه بوجع .. حلم هى صاحبة الأغذية الفاسدة اللى نزلت الاسواق و اتسببت فـ حالات التسمم و الوفيات اللى فـ المستشفيات
حلم:: بصريخ و أنهيار .. مستحيييييل انا لاااااااا مستحيييييل أنااااا عمرى ما استوردت أى أغذية قولهم يا فاااااارس مش انا اللى أعممممل كدا مستحيييييل لااااااااااااااااااااااا
الظابط:: تعاطف معاها .. أرجوكى يا مدام حلم اتفضلى معانا بهدوء
فارس:: برجاء .. ممكن تسيبها و انا هوصلها بنفسى
الظابط:: أسف يا سيادة اللوا حضرتك عارف القانون كويس ماينفعش الهانم متهمة و مطلوب القبض عليها
فارس:: أنا عارف و فاهم القانون كويس بس انت عارف برضوا هى تبقى مين و مرات مين فـ أرجوك تقدر الموقف انا واثق انها مالهاش علاقة بالموضوع فـ لو سمحت اتفضل انت و أحنا هنيجى وراك
الظابط:: صدقنى يا سيادة اللوا انا عارف و مقدر موقفك بس حضرتك ما ترضاش بأذيتى سامحنى مضطر أقبض عليها
حلم:: بدموع لـ فارس .. خلاص يا فارس انا هروح معاه و انت كلم هشام و حصلنى و لـ الظابط أسمحلى بس أغير هدومى مش معقول يعنى هاجى معاك بهدوم البيت
الظابط:: تمام بس ياريت بسرعة
فارس:: لـ حلم و هى طالعة تغير هدومها حبيبتى ما تخافيش هشام عارف و مستنينا هناك
جاسر:: بدموع .. خالو عرف أزاى يا بابا
فارس:: بوجع أكبر .. من سامر لان هو اللى أصدر الأذن بالقبض ع حلم
جاسر:: حضرتك قولت مييين سااااامر سااااامر هو اللى عمل كدا هو اللى قبض ع ماما و الله ما هسييييبه هقتـ ـله و خرج يجرى زى المجنون فـ نفس وقت دخول
تسنيم:: بخضة .. فى ايه جاسر بيجرى ليه كدا و الناس دى هنا ليه ؟؟
حور:: بدموع .. دول جايين يقبضوا ع مامى
تسنيم:: أيه !! لييييييه مامى عملت ايه عشان يتقبض عليها
فارس:: أخد بناته فـ حضنه أهدوا يا حبايبى .. مامى ماعملتش حاجة و انا واثق من ده جدا .. بس ده أكيد سوء تفاهم و الموضوع كله سؤالين كدا و هنرجع ع طول ما تقلقوش
حلم:: فـ نفس اللحظة دى نزلت و لـ الظابط انا جاهزة اتفضل و بتمد إيدها ع اساس يحط فيهم الكلبشات
الظابط:: لا يافندم الكلبشات مش لـ حضرتك بس هتركبى معانا العربية مش أكتر و بالفعل خرجت معاهم
حور و تسنيم:: بصريخ ماااااامى ماااااامى سيبوهااااا حراااام عليييكم
تسنيم:: بأنهيار .. لااااااا سيبها هى ما عملتش حااااااجة خدنى انا .. انا اللى عملت مش هى مااااااامى
فارس:: أهدوا و خلوا بالكم من بعض لغاية ما نرجع و لـ فاتن اللى واقفة مش قادرة تنطق من كتر ما بتشهق من العياط .. حاولى تهدى و تاخدى بالك منهم و لـ الظابط أستنى انا جاى معاك فـ نفس العربية مش هسيبها لوحدها
و بالفعل خرجت حلم مع الظابط و ركبت عربية الحملة اللى جاية تقبض عليها و فارس ركب معاها ماسبهاش
توأم روحي بقلمى✍️________لبنى دراز
# :: عايزنى افوووووق ليييييه عشان اتعاير طول عمري بيها
@:: ………….؟؟؟؟؟؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية العشق الأبدي 2 (توأم روحي))
