رواية العشق الأبدي 2 (توأم روحي) الفصل الرابع عشر 14 بقلم لبنى دراز

رواية العشق الأبدي 2 (توأم روحي) الجزء الرابع عشر

رواية العشق الأبدي 2 (توأم روحي) البارت الرابع عشر

رواية العشق الأبدي 2 (توأم روحي) الحلقة الرابعة عشر

عندما لا يبقى لدينا أمل ينبغي ألّا نيأس، فأجمل وأروع هندسة في العالم أن تبني جسراً من الأمل على نهر من اليأس، الأمل ليس حلماً، بل طريقة لجعل الحلم حقيقة.
توأم روحي بقلمى ✍️________لبنى دراز
فـ ڤيلا المنصورى
بعد مرور كام يوم كمان رجعت فيهم كل العيلة من المركز الطبي الا فارس و حلم و ولادهم قعدوا مع تسنيم لغاية ما أطمنوا عليها و دكتور يوسف
سمح لها تخرج معاهم رجعوا الڤيلا و اول مادخلت تسنيم حست برعشة فـ جسمها مش عارفة سببها و شايفة خيالات قصادها مش عارفة تحددها
وقفت و فضلت تلف بعينيها فـ المكان كله
فارس:: بخوف لـ تسنيم .. مالك يا حبيبتى وقفتى ليه ؟
تسنيم:: بصت له بتعب .. حاسة بصداع شديد و فى خيالات بتروح و تيجى قصاد عينى بس مش عارفة أحدد هى ايه
حور:: بحب .. أهدي يا حبيبتى ده طبيعى، تعالى نطلع اوضتك خدى علاجك و نامى يا قلبى ، و بلاش تجهدى نفسك عشان تفتكرى صدقينى كل حاجة هتيجى بهدوء واحدة واحدة هترجعى تفتكرى كل حاجة
تسنيم:: هزت دماغها بابتسامة هادية و سكتت و فجأة
أحمد:: شالها يطلعها اوضتها .. توتة حبيبتى توأمى من النهاردة لغاية ما تخف مش هتخطى خطوة برجليها الحلوة دى ع الارض طول ما اخوها حبيبها موجود، انتى تؤمرى بس و احمد يقول شبيك لبيك
جاسر:: بمرح .. ليه هتشتغل لها اسانسير؟ و لا يكونش هتسيب الجهاز وتشتغل شيال يا قناص؟
أحمد:: بغيظ مالكش دعوة يا بارد انا و اختى حُرين فـ بعض
جاسر:: مش اختك لوحدك يا برنس، ع فكرة، هى اختى حبيبتى انا كمان، يعنى مشكرين لخدماتك ياخويا روح شوف شغلك وانا قاعد لها، هعمل لها بيبى سيتر وكل أوامرها تتنفذ فى التو و اللحظة
و أثناء ما هما بيتناقروا طلعت فاتن من جوة المطبخ بتزغرط
حلم:: بسرعة .. بس يا فاتن أسكتى
فاتن:: بفرحة .. اسكت ليه يا ست الستات، ده النهاردة عيد، ست البنات رجعت بالسلامة و الحمدلله كانت غمة و انزاحت، و لـ تسنيم حمدالله ع سلامتك يا توتة نورتى بيتك يا بنتى
تسنيم:: بابتسامة .. الله يسلمك
أحمد:: لـ تسنيم و هو شايلها .. دى دادة فاتن يا توتة، هى اللى مربيانا مع ماما و بتحبك وتخاف عليكى زي ماما بالظبط
فاتن:: مش فاهمة أحمد بيقول كدا ليه و لـ حلم .. ايه اللي بيقوله أحمد ده يا ست الستات انا مش فاهمة حاجة
حلم:: لـ أحمد أطلع وصل أختك يا حبيبي، واستنت لما مشي بيها و بصت لـ فاتن اللى واقفة مش فاهمة .. تسنيم فقدت الذاكرة يا فاتن
فاتن:: هااا، يعنى ايه!!
فارس:: بتنهيدة وجع .. يعنى مش فاكرة حاجة خالص يا فاتن ولا عارفة هى مين و لا أحنا نبقى مين
فاتن:: بذهول .. يعنى اللى بنشوفه فـ الافلام ده حقيقى يا سي فارس؟! و أسم الله عليها تسنيم مش فاكرانا خالص
حلم:: ايوا يا فاتن، بطلى رغى بقى و روحي المطبخ حضري الغدا و اعملى الشوربة اللى بتحبها توتة
فاتن:: بحزن .. حاضر يا ست حلم، يا كبدي يا بنتى كان مستخبي لك كل ده فين بس
حلم:: وبعدين معاكى يا فاتن يلا روحى اعملى اللى قولت عليه، و متجبيش سيرة لحد خالص ان تسنيم رجعت او انها عايشة اساسا فاهمة ؟
فاتن:: باستغراب .. اللاه !! ليه بقى ؟
فارس:: بهدوء .. شوية بس كدا يا فاتن لغاية مانعرف مين اللى عمل فيها كدا
حلم:: بغيظ منها كالعادة .. يلا ع المطبخ و بطلي كتر كلام يا ست انتى و اعملى اللى طلبته منك و انتى ساكتة
فاتن:: وهى ماشية .. حاضر يا ست الكل انتى تؤمرى، و جواها يا فرحة ما تمت ربنا ينتقم من اللى كان السبب و وكـ ـسر فرحة البيت بالشكل ده
فـ أوضة تسنيم
بعد أحمد ما وصل تسنيم اوضتها، نزلها على سريرها وقعد جنبها، و دخل معاهم جاسر و حور اللى قعدت جنبها من الناحية التانية، اما جاسر فتح درج الكمود بتاعها، طلع منه ألبوم صور ليهم سوا و نط ع السرير قصادها، و أبتدا يفرجها ع الصور و يحكي لها حكاية كل صورة، عشان تفتكر، تسنيم بتضحك ع جاسر و ريأكشناته و أسلوبه فـ حكاية كل موقف، لكن فجأة حست بصداع جامد من شدته بقت تصرخ، حور قامت جرى وحقنتها بمسكن قوى عشان تهدى بسرعة و بصت لـ جاسر
حور:: خلاص كفاية يا جاسر، كدا غلط عليها يا حبيبى .
أحمد:: بغيظ لـ حور، معلش يا حبيبتى، أصله بنى أدم بـ راس قرد، مابيفهمش .
جاسر:: بغيظ لـ أحمد ، هو ما عشان انت اخويا الكبير هتغلط براحتك يعنى و لـ حور ، كدا يا حورية قلب بابا تخلى كئيب أفندي ده يتريق عليا يعنى؟
حور:: بهدوء لـ جاسر .. ماتزعلش يا حبيبى، بس اللى انت بتعمله ده ممكن يسبب انتكاسة لتوتة.
جاسر:: ببراءة و عينه ع تسنيم اللى نامت من شدة المسكن .. بس انا كان قصدي انها تفتكر يا حور عشان ترجع لنا بسرعة.
أحمد:: يا بنى أدم أفهم، انت عايز تساعدها بس هى هتضغط ع نفسها لأنها هتبقى عايزة تفتكر و ده هيسبب لها انتكاسة زى ما قالت حور، فهمت
حور:: بهدوء، طيب يلا بينا بقى نسيبها تنام و كل واحد ع اوضته.
أحمد:: روحوا انتوا اوضكم و انا هنزل أكلم سامر و فارس و نروح مكان الحادثة، يلا سلام
فعلا خرجوا التلاتة من اوضة تسنيم بعد ما اطمنوا عليها، حور و جاسر كل واحد فيهم راح اوضته، اما أحمد اتصل بـ سامر و فارس أدهم و خرج من الڤيلا عشان يقابلهم و يروحوا مكان الحادثة يفرغوا الكاميرات اللى فى المكان و يعرفوا منها شكل العربية و رقمها و كمان يعرفوا مين البنت اللى دفنوها بدل تسنيم.
_____________________
فـ اوضة فارس
طلعت حلم أوضتها بعد ما أطمنت على تسنيم، دخلت وقعدت على سريرها بتعب و دموعها نازلة و شريط حياتها مع ولادها بيمر قصاد عينيها، فارس طلع وراها وقعد جنبها قرب منها و ضمها لحضنه و أتكلم بوجع
فارس:: انا عارف أنك لسة زعلانة منى يا حلم، بس صدقينى يا حبيبتى غصب عنى، انا بدور ع شبح مش عارف اوصل له، و من بين أسنانه .. بس بعد اللى حصل ده و غلاوتك عندى ما هرتاح ولا يهنالي بال، إلا ما أجيبه و اخلص عليه بنفسي.
حلم:: بوجع و خوف.. قلبي واجعنى أوى يا فارس، اليومين اللي فاتوا دول كانوا اصعب أيام تمر عليا، حتى يوم وفاة بابا و ماما ما كانوش كدا، ااااااه أحساس بشع أوي انك تشوف حتة منك و هى بتروح قصاد عينيك فجأة كدا.
فارس:: اتنهد بوجع..عارفة يا حلم لما وصلنا المقابر، وشوفت أحمد و جاسر بينزلوها التربة حسيت روحي بتروح مني وراها، كنت عايز اصرخ و اقولهم لأ ماتعملوش كدا، دى بنتى حورية قلبي، ماينفعش تحطوها و تقفلوا عليها و تسيبوها لوحدها، كنت عايز اقولهم دخلونى معاها، و لما عرفت انها عايشة رغم كل الوجع اللي عشناه، حسيت روحي رجعت لي تاني ونسيت كل اللى حصل كأنه ما كانش، أيوا نسيت، بس رجعت أفتكرت البنت اللى أندفنت بدل تسنيم، و فكرت فـ اهلها يا ترى حالتهم ايه دلوقتى؟ خصوصا انى عشت الاحساس ده قبلهم
حلم::انت لازم تعرف مين البنت دى و توصل لـ أهلها بأسرع وقت، زمانهم دايخين عليها، و مش عارفين عنها حاجة، لا عارفينها عايشة و لا ميتة.
فارس:: أكيد يا حبيبتى أول حاجة هعملها الصبح هروح القسم التابع لمنطقة الحادثة و أشوف اى بلاغات أختفاء فى اليوم المشئوم ده بنفس مواصفاتها او حتى قريبة منها
_________________________
فـ مكان الحادثة
أحمد راح مع سامر و فارس أدهم لمكان الحادثة و ابتدوا يدوروا ع اقرب كاميرات فى المكان تكون صورت الحادثة بالتفصيل و بوضوح و شافوا فعلا 3 كاميرات صورت الحادثة من 3 زوايا مختلفة و ابتدوا يفرغوها و كان تفريغ أول كاميرا صور العربية اللى كانت بتطارد تسنيم.
أحمد:: اتعصب جدا لما شاف تفريغ أول كاميرا و ضم قبضة إيده و خبطها فـ كف إيده التانية بغضب، أه يا أبن الـ….. عامل حسابه، العربية متفيّمة كلها مش باين منها أى حاجة
سامر::بعصبية، العربية كمان من غير نمر، يعنى صعب نوصل له
فارس أدهم:: والعمل يا شباب هنحلها أزاى
أحمد:: من بين أسنانه، أنا مش هرتاح غير لما أحلها و أعرف هو مين بالظبط، و لـ سامر شوف الكاميرا التانية جايز نلاقي حاجة توصلنا للحيوان ده .
سامر:: شغل الكاميرا فعلا و كانت زاوية تانية قريبة صورت عربية تسنيم و العربية الضخمة من قريب و فجأة.
فارس أدهم:: وقف الصورة يا سامر و ارجع شوية و ادخل زووم ع العربية
سامر:: عمل زى ما قال فارس و شاف وش سواق العربية بشكل واضح من الشباك اللى سايبه مفتوح
أحمد:: أخد نفسه و قال لـ فارس و سامر، كدا مسكنا طرف الخيط، الواد ده لازم يجي بأى طريقة
فارس:: هنعمل عنه تحريات ونجيبه ونحقق معاه لغاية ما يقر و يقول مين اللي وراه
سامر:: بتريقة لـ فارس و أحمد، انتوا متأكدين انكم ظباط فـ أكبر جهازين فـ البلد!؟
فارس::لـ سامر بغيظ، ايه اسلوب التريقة ده يا استاذ انت، مش عاجبينك أحنا ولا ايه
سامر:: عايزني اقولك ايه يا فارس يعنى؟ يا ابنى اللى قاصد تسنيم حد عامل حسابه كويس انه مايتكشفش، يعنى حتى لو السواق غلط و فتح شباك العربية، فأكيد اللى مشغله لو عرف حاجة زى كدا مش هيعمل حاجة غير انه يصفيه، ده لو معملش كدا فعلا اول ما خلص مهمته، يعنى أكيد هتلاقوا السواق ده الله يرحمه من وقتها.
أحمد:: بتركيز لـ فارس سامر بيتكلم صح، اصلا اللى بيلاعبنا واحد من المافيا يعنى لو عرف بالغلطة دى مش هيسيب السواق عايش، عشان كدا لازم نتحرك بسرعة و نستغل الغلطة دى و نوصل للسواق قبل ما ياخد باله.
سامر:: بأمل.. أتمنى ظني يخيب يا أحمد و توصلوا فعلا للسواق و تلاقوه عايش.
و بعد شوية وقت كمان فرغوا الكاميرا التالتة و شافوا عربية تسنيم و هى بتتقلب، و شافوا يزن و هو بيحاول ينقذها قبل أنـfـجار العربية و فى نفس اللحظة صادفت وجود بنت كانت خارجة من الصيدلية اللى انقلبت العربية قريب منها و طالها الانـfـجار .
أحمد:: شاف الحادثة و قلبه وجعه ع توأمه اللى عاشت اصعب لحظات حياتها حاربت فيهم الـmـوت، و بغضب، أااااه لو اطوله هخليه يعيش نفس اللحظات اللي عاشتها تسنيم، هخليه يقول أبوس إيدك أرحمنى و mـوتني
فارس أدهم:: لـ احمد .. لازم نتحرك بسرعة يا أحمد كفاية تضييع وقت.
سامر:: بالظبط كدا يا فارس ابتدوا دوروا ع السواق و انا هدور ع أهل البنت دى و اشوفهم عرفوا بالخبر و لا لسة.
و فعلا ابتدوا التلاتة يتحركوا يدوروا ع الراجل اللى كان سايق العربية و على أهل البنت اللى اندفنت مكان تسنيم.
تاني يوم راح فارس المنصوري القسم التابع له منطقة الحادثة عشان يدور فـ بلاغات الاختفاء فـ يوم الحادثة قابل سامر بيدور هو كمان و لاقيوا بالفعل أكتر من بلاغ عن غياب بنات فـ نفس سن تسنيم و قريبين من مواصفاتها و ابتدوا يدوروا ع اهل كل بنت و يعرفوا حكايتهم و سر غياب بنتهم، لغاية ما وصلوا لأهل البنت اللى اندفنت و عرفوا إنها كبيرة أخواتها و عائلهم الوحيد بعد وفاة أبوها و مرض أمها وكانت فـ وقت انفـgـار العربية خارجة من الصيدلية بعد ما اشترت علاج امها، قرر فارس بعد ما بلغ أم البنت باللى حصل، انه يساعد أخواتها لما عرف حكايتهم ويتكفل بيهم و بعلاج أمهم، و فـ نفس الوقت أحمد و فارس أدهم دوروا و أتحروا عن سواق العربية اللى قلبت عربية تسنيم، وبالفعل قدروا يوصلوا له، لكن كالعادة كان داغر سابقهم بخطوة، و فعلا صفى السواق و اللى كانوا معاه فى العربية بمجرد ما رجعوا بعد تنفيذ مهمتهم
_______________________
فـ ڤيلا قصى
بعد مرور كام يوم كمان قاعد آدم مع قصى و ياسمين فـ الجنينة بعد المغرب و فجأة و من غير مقدمات قال لـ قصى
آدم:: صاصا، أنا عايز اتجوز
قصى:: باندهاش.. عايز ايه!!!
آدم:: بتأكيد.. أتجووووز، عايز اتجوز يا أبا الحاج
قصى::برفعة حاجب.. تتجوز مرة واحدة كدا يا أبن ياسمين
آدم:: اللاه هو الجواز قسموه ولا ايه يا صاصا.
قصى:: بغيظ.. أه يا حيلتها قسموه، مافيش حاجة بتيجي خبط لزق كدا، لازم الاول تخطب و تتسحل خروجات وهدايا وبعدها تبقى تتجوز.
ياسمين:: بتريقة لـ قصى .. و هو انت كنت اتسحلت خروجات يا قصى!؟
قصى:: بغيظ.. هو اخوكى كان سايب لي فرصة ياختى ، ده انا كنت كل ما اقوله عايز اخرج انا وياسمين يرد يقول مافيش خروج لما تبقوا تتجوزوا ابقوا أخرجوا براحتكم.
آدم:: لـ قصى.. بقول لك إيه يا عم انت، كل ده شكليات ماليش انا فيها، انت تاخد بعضك انت و المزة القمر دي و …..
قصى:: قاطعه بـ لسعه ع قفاه، شوف المرة الجاية هديلك بـ دى ع دماغك و هو بيشاور ع رجله، لو عاكست ياسمين تاني فاهم ياض انت
آدم:: يا عم صاصا هو انا كلمتها عشان تدينى باللى فـ رجلك!؟ و لـ ياسمين .. عايز اتجوز يا سمسم، ابوس ايدك خدي الراجل ده وروحوا لـ أبو البت و هاتوها منه قبل ما حد تاني يجي ياخدها و يجري
قصى:: بيخبط كف ع كف .. ايه الكلام اللى انت بتقوله ده يا اهبل يا ابن الاهبل ، هى تلاجة نروح نجيبها قبل ما حد ياخدها!؟
ياسمين:: بضحك لـ قصى.. استنى بس يا حبيبى نعرف هى مين سعيدة الحظ دي اللى اختارها الاول و لـ آدم ..مين يا دومي اللى جننتك بالشكل ده يا حبيبى .
قصى:: لـ ياسمين .. بتتكلمى ع أساس ان ابنك عاقل أصلا مش كدا
آدم:: لـ قصى .. انت مستنصدني ليه يا أبا الحاج
قصى:: بذهول.. مستنصدك!!
آدم:: اه مستنصدني
قصى:: أيوا انا مستنصدك ايه قولك بقى.
ياسمين:: استنى بس يا قصى لما نعرف مين البنت اللى عايز يتجوزها الاول و بعدين ابقوا اتناقروا .
آدم:: الله عليكي يا سمسمة هو ده الكلام يا قمر
ياسمين:: هى مين طيب يا آدم، حد نعرفه؟
آدم:: روفيدة بنت طنط هاجر صاحبة طنط حلم
ياسمين:: بخضة.. بتقول مين!! هاجر!!
لالالالا ع gـثتي تتجوز بنت المجنونة دى.
آدم:: بحزن .. ليه بس يا ماما
ياسمين:: بعناد .. هو كدا امها مش طبيعية فيها ربع ضارب وأكيد بنتها زيها.
آدم:: بس انا بحبها يا ماما و عايز اتجوزها.
ياسمين:: يا آدم يا حبيبى دول عيلة مخهم ضارب شوية مجانين و انا اخاف عليك منهم يا حبيبي، بلاش منها البنت دى .
قصى:: لـ ياسمين.. انتى ليه محسساني ان أبنك سيد العاقلين، يا حبيبتى ده kـارثة متحركة، اهو ع الاقل يلاقى واحدة تستحمل جنانه ده
ياسمين:: انا مش موافقة و بعدين يا قصى مش وقته الكلام ده، تسنيم بنت فارس لسة تعبانة و زعلان عليها هو و حلم، ازاى نفرح احنا بقى و هما زعلانين كدا يعنى.
آدم استأذن منهم و قام يطلع اوضته و هو حزين و مش عارف يعمل ايه عشان ياسمين توافق انه يتجوز روفيدة
قصى:: بعد ما طلع آدم قال لـ ياسمين..عايز افهم بقى انتى رافضة البنت ليه، مع انها ماشاء الله عليها أدب و أخلاق و جمال مافيش كدا
ياسمين:: بغيظ .. مش وقته قولت، لما تسنيم تخف و ترجع لها الذاكرة نبقى نشوف الموضوع ده
قصى:: بجدية .. رافضة البنت ليه يا ياسمين و ماتعمليش بنت اخوكى حجتك و تتلككي بيها، فارس نفسه لو عرف هيقول لك فرّحي أبنك و جوزيه البنت اللى بيحبها .
ياسمين:: بصراحة بقى كان نفسي ياخد هنا بنت خاله أدهم، زى ياسين ما حب حور و خطبها.
قصى::بهدوء.. أديكى قولتيها بنفسك، ياسين حب حور و خطبها، لكن آدم ماحبش هنا و حب واحدة تانية، هتقفى فـ طريق سعادته عشان خاطر بنت اخوكى يعنى
ياسمين:: بحزن .. بقى انا برضو هقف فـ طريق سعادة ابنى يا قصى
قصى:: يا حبيبتى لما ترفضي ارتباطه بالبنت اللى بيحبها عشان خاطر هنا يبقى واقفة فـ طريق سعادته، ثم مش شرط عشان أخوه خطب بنت فارس هو يخطب بنت أدهم، انا عارف انك بتحبي اخواتك و حابة بناتهم، بس كمان ولادك سعادتهم أهم ولازم نفكر فيهم شوية و لا ايه
ياسمين:: اكيد طبعا يا حبيبي دول حتة من روحي و يهمني سعادتهم.
قصى:: يبقى قومى أطلعى لـ آدم و فرّحيه بموافقتك و خليه ياخد ميعاد من دكتور أمجد عشان نزورهم
وافقت ياسمين ع كلام قصى و فعلا طلعت لـ آدم و بلغته بموافقتها و خرجت من الاوضة بعد ما آدم اتصل بـ زياد و طلب منه يحدد مع امجد ميعاد يزورهم فيه مع قصى و ياسمين .
_________________________
فـ المزرعة
بيت حازم نفس الوقت
عامر قاعد مع حازم و الاء و عمر فـ الليڤنج، بيلف و يدور فـ الكلام و يحمحم، حازم حس ان ابنه عايز يقول حاجة ومش عارف، ضيق بين عينيه وقال
حازم::أدخل فـ الموضوع ع طول من غير مقدمات يا عامر.
عامر:: بتوتر و هو بيراقب رد فعل حازم .. زوما هو انت مش كان نفسك يكون عندك حفيد يشيل اسمك.
حازم:: بفرحة .. أكيد طبعـ…. و قطع كلامه فجأة و بخضة.. ايه!!؟ اوعى تكون عملتها فـ السر و لا تكون غلطت و عايز تصلح غلطتك ابن يا الاء، أقـtـلك و اخلص من عارك
الاء:: باندهاش لـ حازم ..كلام ايه اللي بتقوله ده يا حازم، عامر مايعملش كدا، ولادى متربيين كويس و مستحيل يعملوا حاجة تغضب ربنا
حازم:: بعصبية..انتى مش سامعة يا هانم أبنك بيتكلم ازاى و لـ عامر انطق ياض انت و قول الحقيقة من غير لف و دوران .
عامر:: بحزن .. جرا ايه يا بابا، كل ده عشان سألتك سؤال؟ خلتني اتجوزت فـ السر او غلطت مع حد، قد كدا فاقد الثقة فيا!؟ ده انا تربيتك حتى يعنى المفروض تبقى عارفنى أكتر من كدا.
الاء:: بتبرير .. يا عامر يا حبيبي بابا ميقصدش، هو بس عايزك تتكلم ع طول من غير مقدمات و تقول عايز ايه، و بصت لـ حازم بغيظ .. مش كدا حازم.
حازم::بتنهيد .. ايوا يا الاء كدا بالظبط و لـ عامر بابتسامة.. ياض يا حـmـار انا واثق فيك أكتر من نفسي، أنت حتة مني و زى ما قولت تربيتي و حافظك، بس بنكشك عشان تتكلم ع طول، و بغمزة، مين بقى اللى جابتك ع بوزك كدا و خلت عامر حازم يغير رأيه و يفكر يتجوز!؟
الاء:: بذهول .. إيه!! عايز يتجوز!!!
عامر:: بذهول هو كمان .. انت عرفت ازاى!!!
حازم:: بضحك.. مش بقولك حـmـار، ده انا لسة بقولك حافظك، لفك و دورانك ده و شقلبة حالك الفترة الاخيرة دي بتقول ان فى واحدة دخلت حياتك و عايز تتجوزها، مش كدا ياض.
عامر:: بتنهيدة راحة و سعادة .. هو كدا بالظبط يا زوما، و بصراحة كنت ناوى اتكلم من فترة بس اللى حصل لـ تسنيم خلاني اسكت، دلوقتى الحمدلله بعد ما عرفنا انها عايشة قولت اتكلم بقى عشان تيجي معايا تخطب لي البنت اللى بحبها
الاء:: بقلق.. بس يا عامر أسكت متجيبش سيرة تسنيم، حلم و فارس مش عايزين حد يعرف حاجة زى كدا دلوقتى .
عامر:: يا ست الكل انا عارف والله بس بتكلم بيني و بينكم مش أكتر، المهم بقى انا عايزكم تكلموا طنط هاجر و تحددوا معاهم ميعاد نروح نزورهم فيه.
حازم:: هاجر!!
عامر:: بسعادة.. ايوا يا زوما، ما هى اللى شقلبت كياني و خلتني غيرت رأيى تبقى دكتورة رودينا بنتها .
الاء:: بخضة.. بتقول مين!؟ رودينا!؟
مش ممكن مستحيل ده يحصل ابدا.
عامر:: قرب من الاء و مسك إيدها بهدوء .. ليه بس يا ماما؟ انتي مش كان نفسك تفرحى بيا!! ليه دلوقتي رافضة؟
الاء:: يا حبيبي انا مش رافضة فكرة جوازك ونفسي اشوفك عريس و افرح بيك و اشوف ولادك النهاردة قبل بكرة، بس بنت هاجر لأ يا عامر لأ
عامر:: بحزن .. مالها بس يا ماما، هى مش طنط هاجر صاحبتك انتي و بابا و عارفينها مربية ولادها ازاى!؟
حازم:: بهدوء .. عامر يا حبيبي، هاجر بالنسبة لينا مش مجرد صديقة دى أخت و عشرة عمر، وأكيد عارفين هى مربية ولادها ازاى، بس تقريبا كدا الاء عندها سبب لرفضها ده .
الاء:: لـ حازم بالظبط كدا رفضى له سبب و لـ عامر .. يا حبيبي انا بحب هاجر جدا و زى ما قال باباك، هى أخت مش صديقة، بس يا عامر بنتها وراها مشاكل يا ابنى بسبب شغلها و متعرضة للأغـtـيال فـ اى لحظة، وانا خايفة عليك لو ارتبطت بيها يطولك أذى لا قدر الله
عامر:: يا ماما يا حبيبتى، مش أحمد قال ان قضيتها خلاص قربت تخلص و هتبقى فـ أمان، خايفة من ايه بقى
عمر:: اخيرا أتكلم بعد ما كان ساكت و بيسمع حوارهم من غير تدخل منه، قرب من الاء وقعد جنبها وبابتسامة .. يا ست الكل دكتورة رودينا مشاكلها كانت برة مصر، و خلاص طالما طنط هاجر رجعت بيتها يبقى القلق اللى عايشة فيه الدكتورة خلص و مشاكلها اتحلت، ليه بقى تكسري قلب عامر بسبب خوفك ده
الاء:: بغيظ لـ عمر و مين قالك يا استاذ ان هاجر رجعت بيتها عشان مشكلة بنتها اتحلت، هى رجعت بيتها لما حصلت حادثة تسنيم و حلم وقعت من طولها و فارس و ولاده فضلوا قاعدين قصادها فـ المستشفى، اكيد يعنى مش هتفضل قاعدة و اصحاب البيت نفسهم مش قاعدين .
عمر:: بهدوء .. تاهت ولاقينها يا لؤلؤة، احنا نسأل احمد فـ الموضوع ده و لو الدنيا أمان حواليها نروح لطنط هاجر و دكتور امجد ونتمم الجوازة، قولتى ايه؟
الاء:: بمشاعر مختلطة لـ ولادها .. خلاص ماشي اللى تشوفوه، انا مايهمنيش غير سعادتكم، و أكيد مش هلاقي زى رودينا فـ أدبها و أخلاقها رغم انها متحررة شوية فـ لبسها .
عمر:: بمداعبة .. هى متحررة كتير يا لؤلؤة ياختى بصراحة، و بغمزة لـ عامر و هو بيستعد عشان يجري برة البيت، الله يعينك بقى يا مارو و تخليها تتلم شوية، اصل الشباب عندنا محروم من الحلويات دى .
عامر:: وقف بغيظ و طلع يجري وراه ، ماشي يا عمر الـkـلب والله ما هسيبك
حازم:: بقلق لـ الاء .. اهو ده بقى اللى انا خايف منه مش قضيتها، البنت فعلا مؤدبة و متربية كويس بس زى ما قولتى متحررة شويتين و انا خايف انها ما ترضاش تغير طريقة لبسها و ابنك رغم جنانه، بس مش هيقبل انها تفضل كدا و ممكن يحصل بينهم مشاكل
الاء:: بثقة .. انا بقى النقطة دي مش خايفة منها لأنى واثقة ان عامر هيقدر يغيرها، ده غير ان هاجر هتعمل كدا هى كمان لانها كانت نفسها ان بناتها يبقوا محجبات بس هما متأثرين بالمجتمع اللى اتولدوا و اتربوا فيه، و أكيد هتنبسط جدا لما تلاقي ابنك بيحافظ ع بنتها، المهم بس انهم يوافقوا عليه.
حازم:: افهم من كدا يا حبيبي انك وافقتى ع رودينا؟
الاء:: يا حبيبي انا مش معترضة عليها كعروسة بالعكس، بس قلقانة من حكاية شغلها دى مش أكتر
حازم:: خليها على الله يا لولو، ماحدش بياخد اكتر من نصيبه، كلمي هاجر يلا و خدى منها ميعاد نروح نزورهم فيه .
اتصلت الاء فعلا بـ هاجر و حددت معاها ميعاد يروحوا يزوروها كلهم بس ما قالتش سبب الزيارة و هتخليها مفاجأة
___________________________
ڤيلا فارس
راحت عاليا و سيف و معاهم ولادهم يزوروا فارس و حلم و يطمنوا ع تسنيم و بعد الترحيب و السلامات سألت علا عن البنات
علا:: لـ حلم .. حور و تسنيم فين يا طنط؟
حلم:: فوق يا حبيبتى فـ اوضة تسنيم، اطلعي لهم
استأذنت فعلا علا من سيف و فارس و طلعت السلم جرى وصلت اوضة تسنيم و خبطت ع الباب خبطة خفيفة بعدها فتحت و دخلت ع طول، شافتها تسنيم واستغربت من دخولها اوضتها من غير ما تسمح لها
تسنيم:: أنتي مين و ازاى تدخلى كدا من غير ما اسمحلك
حور:: بهدوء لـ تسنيم ..توتة حبيبتي دى علا بنت عمتو عاليا، هى متعودة ع كدا تخبط و تفتح الباب وتدخل من غير احنا ما نقولها
تسنيم:: ببراءة .. ازاى يعنى يا حور افرض كنت نايمة او بغير هدومى!!
ض
علا:: مقدرة حالة تسنيم و بتوضيح.. توتة حبيبتي كل بنات العيلة كدا حتى انتى بتعملى كدا
تسنيم:: بعصبية ..انا بعمل كدا ازاى يعنى مش فاهمة.
حور:: بحب ..أحنا اتربينا كلنا يا توتة ع اننا اخوات لما علا و باقى البنات بيجوا هنا بنتجمع كلنا عندى او عندك و اللى بتوصل بتعمل زى لولو كدا تخبط و تدخل ع طول و احنا كمان لما بنروح عندهم بنعمل كدا نخبط و ندخل ع طول
تسنيم:: لـ حور .. بس ده مش صح يا حور افرضي اللى جوة الاوضة عندها خصوصيات مش عايزة حد يعرفها، فجأة كدا تلاقى حد بيقتحم عليها اوضتها
علا:: بهدوء ..يا توتة احنا طلعنا كلنا كدا كيان واحد مافيش حد بيخبي حاجة عن الباقي سواء احنا البنات مع بعض او حتى الشباب مع بعض
تسنيم:: بعدم اقتناع .. معلش اعذروني انا مش فاكرة حاجة و بصراحة مش قادرة اقتنع بكلامكم
حور:: بابتسامة.. حبيبتى ان شاء الله تفتكري كل حاجة قريب و لـ علا .. قوليلى يا لولو عملتي ايه لما روحتي قابلتى الوزير؟ معلش كنت مشغولة شوية وقتها، بعد كدا حصلت حادثة توتة و معرفتش انتي عملتي ايه
علا:: بحزن .. أنا رفضت الترشيح يا حور
حور:: بذهول.. نعم!! رفضتي ليه!؟
علا:: المكان اللي رشحوني ليه معجبنيش، رفضت من غير تفكير
حور:: ازاى يعنى، ايه المكان ده اللى رفضتيه من غير تفكير، وبعدين ركزت شوية فـ كلام علا و قالت.. أوعي يكون اللى فهمته.
علا::هو يا حور، عشان كدا رفضت و كمان قررت أرجع تانى اشتغل فـ الجامعة و أسيب الشغل فـ الخارجية
حور:: بحزن ..طيب و طموحك يا علا
علا:: بتنهيدة .. مش كل حاجة بنتمناها بنقدر نحققها يا حور، المهم ابقى راضية و مقتنعة بقراري
تسنيم متابعة كلامهم بس مش بتتدخل فيه لانها مش فاهمة بيتكلموا عن ايه.
حور:: لـ علا.. رأي فارس و عمو سيف إيه؟
علا:: ميعرفوش لغاية دلوقتي، ومحدش خالص يعرف حاجة، انتي اول واحدة تعرف الكلام ده
حور:: ازاى بقى هما مش راحو معاكي المقابلة؟
علا:: راحوا فعلا بس ما طلعوش معايا ولما نزلت قولتلهم اني هفكر الاول قبل ما ارد بالموافقة، وطبعا مافيش كام يوم و حصل اللى حصل و كلنا انشغلنا بتوتة و لسة بفكر اقولهم ازاى الخبر ده
حور:: بضحك .. عمتو هتفرح اوي بالخبر ده .
علا:: بغيظ .. هى مامى بس اللى هتفرح، ده بابي و فارس كمان هيتنططوا من الفرحة ياختى لما يعرفوا.
عند حلم و فارس فـ الليڤنج
قاعدين مع سيف و عاليا و فجأة دخل جاسر و شادى بدوشتهم كالعادة شافهم فارس و سألهم
فارس:: جايين منين كدا انتوا الاتنين؟
جاسر:: كنا بنذاكر يا باشا، الامتحانات خلاص قربت و عايزين نجيب امتياز
سيف:: بتريقة .. بذمتك انت و هو، انتوا أشكال تجيب امتياز
شادى:: اللاه، جرا ايه يا عمونا قارش ملحتنا ليه؟
سيف:: عشان مش مرتاحلك يا حيلة انت وابن خالك و شكلكم كدا لا كنتوا بتذاكروا و لا نيلة
جاسر:: بقلق لـ سيف..طب ليه كدا طاه، يعنى فارس باشا ساكت و انت يا عمو اللى بتتكلم.
سيف:: بغيظ .. و ما اتكلمش ليه يا ابن فارس، مش عاجبك انا ولا ايه
فارس:: بضحك لـ سيف..حد قالك اتكلم، تستاهل اللى يجرالك
سيف:: بنفس غيظه .. اه، هو ابن مين يعنى ما هو لازم يطول لسانه زى ابوه
فارس:: قام وقف .. بقى انا لسانى طويل يا سيف، شكلك نسيت كنت بتتعلق ازاى و محتاج تنشيط ذاكرة
حلم:: بضحك .. نفسي يعدي يوم من غير ما تتناقروا
عاليا:: يا لومى يا حبيبتى مينفعش، ابيه فارس و سيف ناقر و نقير و كمان الـkـوارث دول بيزودوا النقار بمصايبهم اللى بيعملوها
جاسر:: بشقهة مصطنعة..ييييييييه بقى احنا بنعمل مصايب يا عمتو
عاليا:: لأ، خااااالص، انتوا ملايكة يا حبيب عمتو
شادى:: ببراءة مصطنعة .. شكلك بتتريقي علينا يا مامى، و هذا الامر لا ينكن ان نقبله انا و الواد ده أبتاً أبتاً
حلم::بضحك..لا يا حبيبى ماما مش بتتريق عليكم ولا حاجة هى بتوصفكم بس مش اكتر .
جاسر:: بتأثر مصطنع.. حتى انتي يا ماما و لـ شادي، يلا يابنى نطلع فوق ملناش مكان وسط الناس دى .
وفعلا طلع جاسر اوضته ومعاه شادى يكملوا مذاكرة .
شوية و رن جرس الباب، فاتن فتحت وشافت مجدي الحارس بيستأذن يدخل و معاه عفاف عايزين يقابلوا حلم
حلم:: بجدية.. تعالى يا مجدي، خير
مجدي::دخل و باصص فـ الارض و هو بيتكلم و بيشاور ع عفاف.. دى البنت اللى جات من فترة يا هانم و حضرتك أمرتيني اتحرى عنها، جات تاني النهاردة تسأل عن حضرتك.
حلم:: عينيها ع عفاف و لـ مجدي .. اممممم لما سألت عليها لاقيت ايه
مجدي:: كل كلامها مظبوط يا هانم و انا روحت بنفسي سألت فـ العنوان اللى ساكنة فيه.
حلم:: طيب روح انت يا مجدي
مجدى:: و هو باصص فـ الارض.. تحت أمرك يا هانم، و استأذن منها وخرج
حلم:: لـ عفاف.. عشان تشتغلي هنا هيبقى فى قواعد هتمشي عليها، اهمها الأمانة فاهمة؟ ما تتدخليش فـ اللى مالكيش فيه، ومهما حصل او شوفتى حاجة هنا ما تتكلميش حتى مع نفسك مفهوم؟
عفاف:: بتوتر .. مفهوم يا هانم
حلم:: تمام .. اتفضلي دلوقتي، من سابعة الصبح تكوني هنا
عفاف:: طيب متأخذنيش يا هانم، المرتب هيكون كام
حلم:: بجدية.. لما تيجى الصبح ان شاء الله هعرفك كل حاجة اتفضلى دلوقتى ومتتاخريش بكرة
بالفعل مشيت عفاف بعد ما اطمنت ان حلم وافقت تشغلها، و فارس اتكلم بغيظ مع حلم
فارس:: من امتى بتاخدى قرار لوحدك يا حلم، مش قولنا بلاش اى حد جديد يشتغل هنا الفترة دى.
حلم:: بهدوء .. و من امتى حبيبى بيمنع الخير و يصد حد محتاج، ثم ان البنت شكلها غلبانة و محتاجة الشغل فعلا.
فارس::يا حبيبتى انتى عارفة انى عمري ما صديت حد محتاج، بس إصرار البنت دى انها تشتغل هنا غريب جدا، خصوصا اننا ما نعرفهاش وجاية من نفسها مش تبع مكتب و لا حد نعرفه
حلم:: فارس حبيبى، أرجوك بلاش حسك الأمني وطبيعة شغلك تغلب عليك، دى مش اول مرة حد يجي و يطلب يشتغل عندنا سواء فـ المزرعة او الشركة او حتى هنا، و اكيد بنعمل تحريات عنه عشان نتأكد من صحة كلامه، و ده بالظبط اللى عملته مع البنت دى، واعتقد انت سمعت مجدي قال ايه.
سيف:: فارس عنده حق يا حلم، خصوصا الايام دي و القلق اللى محاوطكم، مش اى حد يطلب شغل توافقى و تشغيله
حلم:: بغيظ لـ سيف.. انت هتعمل زى صاحبك ولا ايه يا سيف، شغل المخابرات و التحقيقات بتاعتكم دى خلوها فـ شغلكم مش هنا، انسوا هنا انكم ظباط الله يكرمكم
فارس:: بهدوء و جواه حاسس بحاجة غريبة مش عارف يفسرها.. ماشي يا حلم هنسى خالص طبيعة شغلى، بس انا مش مرتاح للبنت دى، و عشان ما تقوليش انى بمنع خير، موافق انها تشتغل هنا لكن هتفضل تحت عينيا لغاية ما اتأكد منها و من كلامها.
و بالفعل وافق فارس ع شغل عفاف فـ الڤيلا رغم تخوفه و قلقه منها، بس عشان خاطر حلم عمره يوافق ع اى حاجة لأنه واثق فـ اختياراتها و قراراتها، فعلا تانى يوم جات عفاف فـ نفس الميعاد اللى قالت عليه حلم و استلمت شغلها، فارس نبه ع فاتن تاخد بالها من الشغالة الجديدة و تركز معاها كويس .
توأم روحي بقلمى✍️_________لبنى دراز
ياسمين:: نععععععم!!؟
الاء::………….؟؟؟؟؟؟