رواية السيميائي الفصل الخامس 5 بقلم بيتر نيدفيد
رواية السيميائي الجزء الخامس
رواية السيميائي البارت الخامس
رواية السيميائي الحلقة الخامسة
رياض فتح عينه وأتلفت حواليه ، وأستغرب لما ملاقاش باهر جانبه ، وبعد محاولات من تذكر الاحداث اللي مرت عليه ، أكتشف انه لسه موجود في الكهف ، انتفض من فراشة ، وخرج من الكهف وفحص بعينيه المنطقة ، لكن ملاقاش أثر لاي شخص غيره ، مسك راسه وضغط عليها بايده وكأنه بيحاول يعصر دماغه عشان يفتكر ايه اللي رجعه للكهف وبعد وقت بسيط أدرك انه كان مجرد حلم ،
وقال ” معقول كل ده كان حلم ؟”
واثناء سرحانه وتفكيره سمع صوت بيناديه ، ومع تكرار الصوت عرف أنه الدرويش ، اتحرك رياض من مكانه وأستقبله بترحاب كبير وبعد عبارات السلام والترحيب قال :
– زيارة كريمة منك أنك تيجي لعندي النهاردة
= انا قولت أجي وأجبلك معايا أكلة سمك انما أيه معتبره ، حاكم انا عارف ان مافيش حد بيخدمك هنا
– كل مرة بتجبلي فيها سمك زي ده بيبقى عندي سؤال بيلح عليا ، بس بتراجع عنه وبسكت
= أسأل وانا هجاوبك ، قولي أيه اللي بيلح عليك
– ازاي السمك بيكون سخن وطازة بالطريقة دي ؟!
= ماهو طبيعي السمك يبقى سخن ، مش مشوي ؟!
– انت فاهم قصدي كويس
= لاء مش فاهم قصدك ياريت أفهم كنت ع الاقل ريحتك من الفكر والسؤال
– بقالي اكتر من سنتين عارفك ، لكن ماعرفش عنك حاجة ، لا أسم ولا حكاية ، اوقات بشك انك مش بشر زينا
= انت بتشغل بالك بحاجات مش مفيدة ولا هتفرق معاك ، يعني مثلا يفرق ايه ان السمك سخن ولا بارد مادمت هتاكل سمك في النهاية ، ركز ديماً في النتيجة يارياض ، انما أسمي ، حكايتي ، صفتي كلها حاجات ملهاش إفادة ولا هتأثر في الهدف والنتيجة
– طب انا حلمت حلم ومحتاجك تساعدني فى تفسيرة
= خير إن شاء الله ، قولي الحلم وربنا قادر يكشفلنا المعنى والمخزى اذا أراد
– شوفت اشخاص ماعرفهاش بس كأني جوه قصة واقعيه ، قصص انا مش فيها لكن شايفها وسامعها وماعرفش منهم غير شخصين بس سمر وحليم والاحداث بتدور في قرية أسمها الندمان ودي ماسمعتش عنها قبل كده ابتدا الحلم بان شخص اسمه مريد كان بيحضر ملك من ملوك الشياطين اسمه أشيائيل والقرية من بعدها دخلت في ظلام شديد وأن في شخص اسمه باهر كان بيحاول ينقذ الاهالي واولهم أهله وكان في حد اسمه فرج غريب عن القرية شخص مريب وغامض لكن بيقول انه منهم ويعرفهم برغم انكارهم ليه ، باهر قابل بعد كده بنت اسمها جيهان كان بيحبها لكن هي اتجوزت حد تاني ، ومع ذلك وقف جنبها وكان بيحميها وهي قالتله عني وان هي تعرفني من خلال حكايات صديقة ليها اسمها سمر زميلتها في البنك ، وان سمر وحليم كانوا قلقانين من انهم يطلبوا مساعدتي لأهل القرية ، لكن حليم قرر انه لازم يوصلي الرسالة ، وجه زارني وحكالي لكن انا رفضت المساعدة ، وفجأة لاقتني فى القرية بنقذ باهر من الانتحار فى الثواني الأخيرة من قراره ، وبعدها لاقتني معاه في بيت أتحرق بفعل الشياطين وسكانه ماتوا ، وكانت فى رموز وارقام وحروف فسرتها وفهمت معانيها ، وحصل بعدها ان اشيائيل كلمني من خلال طفلة صغيرة ودار بنا حوار انتهى بأنه قالي روحك ملعونة يارياض .. و ..
= مش مهم الباقي ، واضح انك فاكر تفاصيل الحلم في دماغك لكن مش قادر تحكيه بنفس الدقة والتفاصيل ، بس معنى كده إن دي رؤيا مش مجرد حلم ..
– ايه المقصود منها وانا ماعرفش اغلب الاشخاص اللي فيها ولا حتى أعرف القرية دي فين وماسمعتش عنها قبل كده
= العلم عند الله يارياض ، واضح انك هتتكلف بمهمة كبيرة خلال الأيام الجاية بس ماحدش هيعرف المقصود غيرك ، واللي سمحلك تشوف في منامك التفاصيل دي كلها اكيد هيرشدك للمعنى والمطلوب..
– انا قولت انك جتلي في التوقيت ده بالذات عشان تفسرلي اللي شوفته
= انا جيتلك عشان السمك .. انت مش هتاكل ولا أيه ؟
– تفتكر ربنا قبل توبتي عن كل اللي عملته ؟ وهل فعلاً الروح بتتلعن ومابيبقاش ليها توبة ؟ ممكن في النهاية ادخل الجنة ولا ممنوع ..
= الاجابة كانت في منامك يارياض ، افتكر الحوار اللي دار بينك وبين باهر ، ومن بعدها بينك وبين الشيطان وهتلاقي اجابات لأسئلتك
– انا ماحكتلكش عن الكلام اللي اتقال بيني وبين باهر ولا بيني وبين الشيطان انا ماحكتلكش اي حوارات دارت في حلمي
= انا كده بالنسبالي اطمنت عليك ووقتي معاك خلص ، بس عايز اقولك اطمن واثبت في ايمانك وماتسمحش لمخلوق يهزك ، ان كان في بوادر لعاصفة شديدة جاية فانت لازم تكون زي الجبل ، المثل بيقول ” ياجبل مايهزك ريح ”
– طب اروح لحليم وسمر ولا افضل في مكاني ؟
= اللي تلاقي نفسك متساق ليه اعمله من غير سؤال ، سلام يارياض اشوفك على خير
– استنى بس أسمعني ، انا حتى لو عايز اتحرك من مكاني هنا فانا مش معايا فلوس ، تخليني أتحرك في أي مكان
= السمك كله رزق وخير ، كل منه وهتلاقيها محلوله ، وماتغلبنيش معاك انا ورايا مشواير كتير
مشي الدرويش من قدام رياض وسابه في حيره أكبر بسبب أجاباته الغير مفهومة وقال في نفسه ” ياترى انت مين ياعم الدرويش وأيه حكايتك ”
فتح رياض لفة السمك ولاقى قدامه كيس صغير على وش السمك ولما فتحه لاقى جواهم 10 لفف من الفلوس ابتسم وسرح للحظات في كلام الدرويش وبدأ يعد الفلوس ولاقى أن كل لفة فيها 370 جنيه
” 370 ؟ ” ليه مقسمهم بالطريقة دي ؟ اشمعنا 370 !!
حيرة شديدة تملكت من رياض وضربت افكاره بامواج من التساؤلات ، ولكنه قرر في النهاية أنه يتحرك من الكهف ويسافر ويقابل حليم يمكن يلاقي عنده الأجابات او على الاقل اول طرف الخيط ..
*******
على قهوة بلدي فى احدى المناطق المتواضعة قعد باهر مع صديقه مريد بعد فترة غياب دامت لـ ٨ شهور تقريباً ، بعد اسئلة متبادلة عن الحال والاحول ، أبتسم مريد وقال :
– يعني انت عايز تقول ان احوالك ماتغيرتش عن أخر مرة شوفتك فيها ، لسه خالي شغل ومش عارف تتجوز وعايش مع أهلك ..
= يعني انت اللي بقيت سفير الامارات ، مانت زي حالات مانجحتش في حاجة ولا أتجوزت وقعد زي القرد قدامي أهو بتأزأز لب وسوداني
– هاهاها ، لا انا أخترت طريق العلم ونويت أبقى عالم والفلوس هتنزل عليا زي المطر بعدين ووقتها هبقى بنقي وأختار من بين بنات كتير مين اللي تنفعني كل حاجة جاية ماتقلقش المهم اني نويت ..
= عالم ايه ؟! مين ده اللي هيبقى عالم وعلم ايه اللي اخترت طريقة ده انت ساقط اعدادية ٧٧ مرة
– علم ملوش علاقة بالمدارس
= ده ايه العلم اللي مبني على جهل ده !! علم ايه ماتقول
– علم الارواح والطاقة
= لاء معلش فهمني اكتر انا فهمي على قدي مش عالم زيك ، يعني ايه اللي بتقول عليه ده
– يعني انك تقدر تسخر الارواح وطاقات الكون لحسابك وتبقى طلباتك في الدنيا مجابة ، انك تتحول لشخص قوي صعب يتهزم والكل يحتاجك ويعملك الف حساب ، انك تملك المال والشهرة والحب وحاجات كتير ماتتعدش
= لا يا راجل !! ارواح وطاقة الكون ، يعني قريب هشوفك ناجح ومشهور وغني ودكده
– قريب اوي ، هتلف الايام وهرجع الاقيك زي مانت وهتشوفني محقق كل اللي قولتلك عليه دلوقت
= ربنا يوفقك لما نشوف
– لو مسموح ان يتحققلك أمنيه وحدة دلوقت ، هتتمنى أيه ؟
= أني اتجوز جيهان دي أمنيتي وبس
– يعني مش عايز تبقى غني ، هتضيع امنيتك في الجواز !!
= الفلوس ان كانت كتيره او قليله مش هتحققلك السعادة الاتنين واحد ، الفرق بس انك بتاكل احسن بتسكن في مكان احسن بتلبس احسن بتركب عربية ..الخ وكلها حاجات عادية سهل تعيش من غيرها ، لكن من غير جيهان هعيش مكسور وبدون قلب
– وايه اللي منعك تتقدملها وتتجوزها ؟!
= هتقدم اقول لاهلها أيه ، جوزوني بنتكم ولما ربنا يسهل واشتغل هبقى أجبلها شقة وشبكة وعفش ، انا عاطل يابني مين هيرحب بيا في ظروفي دي
– يعني لو كان معاك فلوس كنت هتقدر تتقدملها ، دي من ضمن القوى السحرية للمال كل مشاكلك بالفلوس بتتحل
= خلاص ياعم يبقى امنيتي اني يبقى عندي فلوس عشان اتجوز جيهان حلوه الصيغة دي كده
– جيهان مستعده تستناك وتصبر
= جايلها عريس وبتقولي لو مخدتش خطوة هتضطر توافق عليه ..
– بسيطة نبوظ الجوازة وتفضل مستنياك غصب عنها وعن اهلها
= وده ازاي يابتاع الطاقة هندعي على العريس لحد مايموت
– جيبلي حاجة من حاجاتها الشخصية ، زي ساعة يد ، سلسلة ، خاتم ، غويشة او حاجه من لبسها ماتكونش اتغسلت بعد ماقلعتها وهتسبني يومين وهتشوف اني قد كلامي
= ايه يابني اللي بتقوله ده ، انت هتعملها عمل سفلي ولا ايه
– حاجه شبه كده بس بطريقة علمية وموثوقة مافيهاش ضرر
= لا طبعا ايه الافكار السودا دي ..لا ياعم ماينفعش
– انت حر خليك مستني لحد مايتجوزها غيرك وتعيش مكسور ومن غير قلب طول عمرك
= ماهو انا مش فاهم ايه اللى هتعمله بحاجه شخصية من عندها ، ده زي طريقة الدجالين اللي يقولولك هاتلنا حاجه من قطر فلان ..
– اديك قولت الدجالين ودول مالناش دعوه بيهم ، وأكيد انا مش هعمل حاجه تضرك ولا تضرها ، انا يادوبك هبقى سبب فى ان مشكلتكم تتحل وتتجوزها في النهاية من خلال طاقة الكون
= لو افترضنا اني طاوعتك هبقى كده اتجوزتها غصب عنها ، وانا عايز اتجوزها عشان بتحبني زي مابحبها
– غصب عنها ازاي ! ،مش هي بتحبك فعلاً لكن مشكلتكم الفلوس ومتطلبات الجواز
= ايوه بتحبني بس القصد إن ….
– انت بتقول اي كلام ومش فاهم اللي بتقوله ، ركز ياباهر انتوا الاتنين بتحبوا بعض وانا هساعد في انكم تتجوزوا وان ماحدش ياخدها منك ، فين المشكله ؟
= مافيش مشكلة !! ياريت طبعاً , بس انا هجيب حاجه شخصية منها ازاي هسرقها مثلاً
– لا دي بتاعتك بقى ماعرفش ، قدرت تعمل ده كلمني او عدي عليا في البيت اي وقت
******
..بعد مرور ٣ شهور
..في بيت حليم وسمر ..
بعد مكالمة تنسيقية سابقة زارت جيهان سمر في بيتها ، عشان تحكيلها عن مشكلة شخصية محتاجة لمساعدتها فيها ورحبت سمر بالزيارة وتبادلوا الاحاديث الهامشية لحد ماتكلمت سمر وقالت :
– مش هتقوليلي بقى المشكلة اللي انتي اصلاً عيزاني عشانها ؟
= بصى ياستي ، انتي دلوقتي عارفه اني بحب شخص أسمه باهر والمفروض اننا كنا نرتبط رسمي ونتجوز واني رفضت عرسان قبل كده بسببه
– تمام وايه الجديد ؟
= أني مش بحبه
– أنتي بتقولي ايه ؟ بعد ٦ سنين حب بنكم اكتشفتي انك مش بتحبيه ..
= ماعرفش ! شعوري اختلف من ناحيته مابقتش برتاح معاه في الكلام ، بقيت شيفاه شخص مليان بالعيوب ولا يمكن ينفع يكون زوج ، بحس بقبضة قلب في وجوده معرفش سببها
– خلاص ياجيهان سيبك منه وعيشي حياتك ، وافقي بقى على اي عريس مناسب من اللي بيجولك ولا تحبي اختارلك انا ؟
= لا ماهو موجود و ده الموضوع التاني اللي جيالك فيه
– هما كام موضوع بالظبط
= تلاته
– طب قولي الموضوع التاني خير ..
= في حد مرتاح مادياً وشكله نوعاً ما مقبول وباين عليه من عيلة كبيرة اوي وموافق اني أكمل شغل بعد الجواز بصى هو في مميزات كتير كويسه بس مشكلته السن بس
– ليه هو كام سنه ؟
= عنده حوالي ٥٠ سنة
– كبير عنك بكتير بصراحة ، بس خايفه اكون غبية لو اتكلمت في حكاية السن دي ، انتي اللي لازم تقرري ياجيهان اذا كان يناسبك ولا لاء
= شكلي هوافق بس كنت محتاجه حد يشجعني ع الخطوة دي
– يعني لو قولتلك بلاش كنتي هتنفذي كلامي
= مش عارفه
– عشان كده بقولك لو شيفاه مناسب ليكي وافقي … قرارك انتي لوحدك ..
= طيب هشوف
– طب ايه هتسكتي فين الموضوع التالت ..
= فاكره الشخص اللي حكيتيلي عنه اللي فك عمل كان معمولك وساعدك تتجوزي حليم
– أه قصدك رياض الدمشقي ماله ..
= ايه هو ده ، انتي تعرفي مكانه ..
– اظن حليم يعرف بس ليه في ايه ؟
= لان مؤخراً بقى بيحصلي حاجات غريبة ملهاش تفسير وكنت محتاجه حد فاهم زيه
– حاجات غريبة زي ايه ؟ قوليلي وانا هقولك اذا كان يقدر يفيدك ولا لاء
= بحلم بكوابيس مرعبة وديما بحس ان في حد معايا في الاوضة بحس بانفاس شخص نايم ورايا وزي مايكون بيحضني بحس بلمسات وبقوم مفزوعه وبصرخ لكن مش بلاقي حد ، غير ان من قريب باب اوضتي مسكت فيه النار بدون سبب وبرغم ان الموضوع عدى لكن دماغي مابطلتش تفكير ايه اللي ممكن يتسبب ان باب اوضتي بس اللي تمسك فيه النار ، عايزه اعرف تفسير لكل ده وغير حاجات تانيه بتحصلي في الحمام وغير اني بقيت ديما عصبية وبخسر ناس كتير من اقل سبب يمكن انتي بس اللي لسه ماجربتيش حالتي العصبية الغريبة دي
– مممممممم
= مالك ياسمر سرحتي في ايه ؟!
– لا أبدا بفكر معاكي وبحاول الاقي تفسير منطقي
= رياض ده ممكن يساعدني لو وصلتله
– انا في احداث كتير ماحكتش عنها ليكي ، خلاصتها ان رياض يقدر على اللي انتي ماتتخيليهوش حتى ، انا بشوفه سوبر مان العوالم السفليه
= انا محتجاه ياسمر من فضلك ساعديني اوصله ..
– المشكله انه بعيد اوي اللي اعرفه انه عايش في كهف ومنعزل عن الناس كلها وبنا وبينه سفر لكن هقول لحليم لو ينفع يسافرله زيارة
= تسلميلي يارب الله يخليكي ماتنسيش وتساعديني ..
– حاضر ، إن شاء الله
= طيب هسيبك انا بقى عشان الطريق هياخد مني ساعتين لسه ، ادعيلي اني استقر في القاهرة بقى وابقى قريبة من البنك بدل المرمطة دي
= ماهو البركة في اللي ماتقدملك ده يجبلك شقة قريبة من شغلك الا صحيح هو اسمه ايه ؟
– أسمه رومانتيكي اوي ، أسمه فرج
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية السيميائي)
