رواية الخطيئة الفصل الخامس 5 بقلم ولاء حامد
رواية الخطيئة الجزء الخامس
رواية الخطيئة البارت الخامس
رواية الخطيئة الحلقة الخامسة
وفجاءه قطع كلامهم دخول الرجاله
محسن : في ايه تاني صوتكم جايب لآخر الشارع
مديحه: مفيش حاجه يا حاج ده البنات بيدردشوا مع بعض ولا إيه وبصتلهم بتحزير
علا قامت من مكانها: انا مروحه هاتوصلني يا محمد ولا اروح لوحدي
محمد: لا يلا بالاذن يا جماعه
واخد مراته وعياله ومشي
وأمل وميرفت استاذنوا ومشيوا مع اجوازهم وعيالهم
وصفا وخلود استاذنوا علشان يمشوا
مديحه: لما كلهم خد بعضه ومشي مين اللي هايشطب المطبخ اللي مليان كوم مواعين داه يا هانم منك ليها ولا على إيدك منك ليها نقش الحنه قاعدين أكل ومرعى وقله صنعه
خلود: احنا يا ماما الله يسامحك احنا جينا من بعد العصر نضفنا البيت كله وجهزنا الأكل من الألف للياء
صفا بحزن وكسره من معامله أمها: متقلقيش حضرتك المطبخ اتشطب وبقى زي الفل بس يظهر حضرتك مخدتيش بالك
محسن: انتي جايبه البنات هنا تخدميهم
مديحه: وايه يعني لما يساعدوا امهم اومال كل واحده منهم تبقى قاعده على حيلها لما راحت قد الفيل
محسن: أقسم بالله انتي ام جاحده وبص لبناته يلا يا بنتي منك ليها اجوازكم بره
خرجت صفا هي وخلود وكل واحده منهم جواها كسره من كلام امها ومحدش عارف السبب ليه امهم بتعاملهم بكره ليه طول عمرها بتفرق بينهم وبين ندا في المعامله
محسن: وانتي يا هانم بقى مش ناويه تتعدلي وتتقى الله في نفسك ولا هاتفضلي طول عمرك تافهه وماشيه ورا كلام أمك اللي يودي في داهيه
ندا: انا يا بابا شكرا اوي لحضرتك انا الحمد لله معدوله ومحترمه انا اللي مش لاقيه سبب لكره حضرتك ليا طول عمرك على أقل سبب بتهاجمني وبتعاملني معامله زي الزفت طول عمري بشوفك بتحب كل اخواتي وتدلعهم الا انا طول عمرك قاسي عليا مستكتر عليا حب ماما ليا
محسن بصدمه: انا بكرهك من أمته دانتي طول عمرك الدلوعه كل طلباتك أوامر حتى لما كنت بقسي عليكي كان بيبقى من مصايبك اخواتك اللي بتتهميني اني بفرق بينكم كام مره اذيتيهم وسكتوا ومحدش اتكلم والست ماما كانت بتحاميلك وتقف في صفك ضد اخواتك كأنها مرات ابوهم مش امهم وكأنك بنتها الوحيده وبس افكرك لما عماتك يوم حنه اخوكي قالوا داه شعر صفا جميل النار مسكت فيكي ومن سوادك قصيتي شعرها وهي نايمه وطبعا الست هانم أمك حامتلك وقالت وايه يعني بكره شعرها يطول وكسرتي انتي وأمك نفس اختك وقهرتوها
ويوم فرح اخوكي التاني لما عجبهم فستان خلود وقبل ما تلبسه قطعتيهولها بالمقص علشان محدش يبقى احسن منك وغيرها كتير اوي طول عمرك مبتحبيش الا ندا وبس والباقي يولع مش مهم بس خدي بالك انتي وأمك النار لما مبتلاقيش حاجه تحرقها بتفضل تحرق في نفسها لحد ما تبقى رماد يطيره الهواء والناس مبتفتكرش منه إلا الخراب اللي سابه وراه
مديحه بخنقه: وانتا بقى شوفتنا نار طيب يا سيدي متشكرين كتر الف خيرك والله
ندا بلا مبالاه: كنت عيله صغيره يا بابا واظن انا معملتش حاجه لحد تاني
محسن بسخريه: اه عيله 18 سنه عيله ومعملتيش حاجه تاني يا شيخه متأكده يعني مثلا لما صفا نقلت البيت الجديد محطتيش فوطه مبلوله على غطا حلة الضغط لما انفجرت وحرقت ضهر اختك كله وقعدت شهور تتعالج لا لسمح الله ولا ابن اخوكي اللي كبيتي عليه اللبن المغلي علشان اخد اللبن بتاع البرنسيسه اللي كانت هاتعمل بيه النسكافيه صح
لالا انا ابن كلب ظالم يعني مش انتي اللي حطيتي ملين لخلود لما جوزها جه يتقدم وكانت هاتموت ودخلت المستشفى في دور جفاف بسبب الإسهال داه من جبروتك محطتيش برشامه ولا اتنين لاء حطيتي شريط كامل تؤ تؤ مش انتي امي الله يرحمها طلعت من قبرها وحطتهم
ندا: ماخلاص بقى يا بابا في ايه لداه كله عمال تيجي عليا بالقوي
محسن: وياريته بفايده وخبط على كتف مراته يارب بكره متندميش بعد فوات الأوان وتعضي الارض من الندم
وسابهم ومشي
ندا بخبث: شايفه يا ماما بابا عمال يزعق فيا ازاي مش عايز ينسى اني كنت عيله طايشه
مديحه: ولا يهمك هو طول عمره كده قلبه اسود سيبك منه المهم طمنيني عليكي يا قلب ماما
ندا: زعلانه يا ماما عمر من نحيه وبابا من نحيه وختمت باخواتي كمان شكل محدش بيحبني هو انا وحشه يا ماما
مديحه بشهقه: وحشه ايه دانتي قمر سيبك منهم دول غيرانين والنار بتاكلهم منك المهم راحتك انتي وبس محدش هايعيش في عيشتك بس خلي راحتك في المستخبي علشان ميوصلش لجوزك وعلى قد ما تقدري تاخدي منه وامني نفسك ومستقبلك
ندا :يعني اعمل ايه يا ماما
مديحه: حطيلك قرشين في البنك بإسمك هاتيلك كل فتره حتتين دهب وشيليهم مهو تلاقي البيه سايبك هنا وبيبعت لأهله شيئ وشويات
ندا بذهول: تفتكري يا ماما
مديحه: الا افتكر داه اكيد واكيد كمان
ندا: لا يا ماما عمر اهله وأخواته مرتاحين ماديا يعني مش مستنيين منه فلوس يعني
مديحه: يا بت البحر يحب الزياده
ندا بإقتناع: تصدقي ممكن
مديحه: داه ممكن وممكن كمان يابت متخلكيش عبيطه قرش جوزك حلو وكتير وهو شاب وفي الغربه يعني ممكن واحده كده ولا كده تشوف عليه فأنتي تعملي ايه تقصقصي ريشه أول بأول علشان ميبقاش معاه حاجه تخليه يتنمرد عليكي وبجمالك ودلالك تخليه زي الخاتم في صباعك
ندا بإنصات شديد وتفكير: يعني اعمل ايه طيب
مديحه: كل شهر اطلبي من فلوس زياده عاجبني فستان عاجبني خاتم عايزه اغير الغوايش وكده يا خايبه يعني هو متغرب وسايبك هنا كده وانتي ساكته على القرشين اللي بيبعتهوملك كل شهر
ندا: لا يا ماما بصراحه عمر كريم جدا جدا وبيبعت كل شهر فلوس كتير اوي
مديحه: وماله يبعت كمان وكمان وكله حوشيه للزمن
ندا بإقتناع: عندك حق يلا هاقوم انا اروح الوقت اتأخر اوي وسرقنا
مديحه بحب: طيب متباتي هنا انهارده
ندا: لا بابا اصلا مش طايقني خليني في بيتي احسن
وقبل ما تمشي سمعت صوت
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية الخطيئة)
