رواية الجوازه التانيه الفصل الثالث 3 بقلم إيمان شلبي
رواية الجوازه التانيه الجزء الثالث
رواية الجوازه التانيه البارت الثالث
رواية الجوازه التانيه الحلقة الثالثة
امشي يازين ارجوك امشي وابعتلي ورقه طلاقي
كنت قاعده في اوضتي سانده راسي علي الباب اللي كان بيفصل ما يبني وبين “زين”
همس بحزن :
-مش هقدر ،مش هقدر اسيبك تاني
رديت بصوت مبحوح :
-عشان خاطري ارجوك امشي
-ارجوكي انتي ارحميني بقي ارحميني وافتحي الباب
هزيت راسي بنفي:
-انا مبقتش انفعلك صدقني مش هتقدر تعيش معايا و…
هبد علي الباب بعصبيه ونبره مخنوقه بالعياط:
-حد اشتكالك انا راضي بكده راضي اعيش معاكي وانتي كده
عيطت وانا بقوله بعصبيه:
انا واحده مش هقدر اتحمل مسؤوليه نفسي ازاي عايزني اتحمل مسؤوليه بيت وزوج وعيال وانا و وانا
ضغطت علي ايدي وغمضت عيني بقوه وانا بكمل بهمس :
-وانا عاميه
-انا معاكي ،ه هفضل معاكي صدقيني مش هسيبك لحظه
ارجوكي يارهف كفايه بقي عشان خاطر ربنا كفايه اللي بتعمليه فيا انا مش عايز عينك ولا عايز شكلك ولا عايز اي حاجه انا عايزك انتي عايز روحك وقلبك اللي بيسيعني عايز حبك افتحي يارهف افتحي ياحبيبتي
قومت وقفت وانا بحسس علي الباب عشان اقدر افتحه
اول ما فتحته لقيت نفسي بتشد وبستقر في حضنه اللي كله امان ودفا
غمضت عيني وانا بمسك في قميصه وبدفن راسي في صدره وبعيط بحرقه
ضمني لقلبه وهو بيهمس بحنان :
-هششش وغلاوتي عندك متعيطيش ،انا عايزك زي مانتي وبحبك زي مانتي ليه بتعذبيني وتعذبي نفسك ليه!
رديت بعياط :
-مش هقدر اتحمل مسؤوليه نفسي ولا…
قاطعني بهدوء :
-هتقدري لاني مش هسيبك ولا لحظه ،وهنلف علي اكبر دكاتره ونظرك هيرجعلك باذن الله
سندت راسي علي صدره وانا بهمس بتوسل :
-يااارب يارب
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-رهف انا كنت عايز اتكلم معاكي في موضوع
قلبي اتنفض من نبره صوته اللي كانت كلها خوف وتوتر
بلعت ريقي ورديت بتوتر :
-ا اتكلم
-انا احم ا انا عايز
سكت لحظه يحاول يجمع كلامه وفي اللحظه دي اتجمع في عقلي الف سيناريو وسيناريو كلهم اسوء من بعض
حاولت أوصله وامسك أيده وانا بسأل برعب :
-ا انت ايه يازين ا اتكلم
ضغط علي ايدي ورد بهدوء :
-انا عايز اكون اب
سيبت أيده كرد تلقائي مني وعيوني لمعت بالدموع وانا بهمس :
-ت تكون اب
مسك ايدي تاني ورد بتوسل:
-ايوه يارهف نفسي اجيب منك حته عيل نفسي اسمع كلمه بابا وانتي كمان اكيد نفسك تكوني ام و…
قاطعته بجمود :
-بس انا مش عايزه اخلف
-يعني ايه
-يعني زي ما سمعت يازين انا مش عايزه اخلف
-بس انا عايز اكون اب
-تمام وانا مش هقدر اكون ام
-رهف لو لو علي حالتك يعني انا موجود وممكن كمان نجيب مربيه تعيش معاكي وتربي البيبي و….
رديت بصوت مخنوق بالعياط :
-لا يازين لا مش عايزه اخلف
-بس…
-لو عايز تخلف روح اتجوز
رد بصدمه :
-انتي بتقولي ايه انتي مجنونه ؟
-لا مش مجنونه انت من حقك تبقي اب و…
قاطعني بهدوء وهو بيشبك صوابعه في صوابعي :
-انا عايز ابقي اب بس منك انتي مش من حد تاني
-وانا كمان نفسي ابقى ام بس حط نفسك مكاني
تخيل حامل واشيل مسؤوليه بيت وزوج وطفل لازم احافظ عليه ،صدقني يازين صدقني مش هقدر اعمل كده ابدا وانا مش بشوف
البيبي ده لما أولده هيبقي عايز رعايه ،هيبقي عايز حد يفضل معاه طول الوقت وده مسؤوليه الام وطول مانا مش قادره اراعي نفسي مش هقدر اراعي ابني أو بنتي ولو حد فيهم حصله حاجه ،وقع ،اتعور ،اكل حاجه ،مش هقدر اشوفه ولا امنعه ولا هقدر حتي أنقذه ،وقتها هفضل الوم في نفسي وعمري ما هسامحها ابدا
-حبيبتي انا قولتلك هبقي معاكي مش هسيبك لحظه وهنجيب مربيه للبيبي كمان تفضل معاكم علي طول
-مش هقدر اثق في أي حد يازين ،مش هقدر اشوف ابني أو بنتي حد تاني بيرعاهم وبيحبوه اكتر مني صعب اوي صعب صدقني
اتنهد بحيره:
-طب والحل
بلعت ريقي وانا بضغط علي ايدي ورديت بصوت مخنوق بالدموع :
-انك تتجوز وتخلف يازين ده حقك
-رهف انتي ملاحظه انتي بتقولي ايه ؟
-ايوه ملاحظه انا مقولتش حاجه غلط انا انا…
-انتي مش بتحبيني
رديت بلهفه :
-لا طبعا بحبك
رد بسخريه :
-لا واضح واضح اوي الحب
قال كلامه وحسيت من خطواته أنه بيبعد عني وفعلا اتأكدت حواسي لما سمعت صوت باب الشقه بيترزع
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-الو ،ايوه ياماما
-مالك صوتك يارهف أنتي معيطه
حاولت اتكلم بصوت طبيعي :
-لا لا ياحبيبتي انا كويسه انتوا عاملين ايه
-لا انتي مش كويسه انتي صوتك معيط
ضغطت علي شفايفي وانا بحاول منفجرش من العياط
-مفيش حاجه انا تعبانه شويه بس
ردت بشك:
-زين مزعلك يارهف قوليلي يابنتي انا امك يمكن نقدر نوصل لحصل
اتنهدت وانا بقولها بحزن :
-لا ياماما انا اللي مزعله زين
-ليه ايه اللي حصل ؟
-زين عايز يبقي اب
-طيب وايه المشكله من حقه!
-بس انا مش عايزه اخلف
-ليه يابنتي مش عايزه تشوفيلك حته عيل ويقولك ياماما
ضحكت بسخرية :
-اشوف؟!
سكتت لحظه وبعدها ردت بتوتر :
-احم ر رهف حبيبتي م مش معني أن حصلك ظروف ا أنك متبقيش عايزه تخلفي ياما ناس مش بتشوف مخلفه مره واتنين وتلاته وبعدين ده وضع مؤقت
عيطت وانا برد عليها بحسره:
-ايوه بس انا ا انا عايزه اشوف كل حاجه عايز اعيش كل لحظه وأشوف تفاصيل البيبي وهو بيكبر في بطني وقدام عيني ع عايزه اشوفه اول ما يتولد عايزه اعيش معاه كل تفصيله لما يكبر لما يضحك لما يبصلي ببراءه من حقي انا كمان اعيش معاه تفاصيل حياته وهو قدام عيني!
-انتي بتكلمي مين ياوليه؟
ده كان صوت بابا اللي دخل البيت علي غفله وماما بتكلمني
-هه د ده ده
خطف منها الفون بعصبيه وهو بيقولوا من غير ما يقفل الخط :
-هو انا مش قولتلك متكلميش البت دي تاني خلاص بنتك ماتت من اللحظه اللي قررت تعصي أوامر ابوها ومتطلقتش من الحقير اللي اسمه زين اللي خدعنا
ماما بعصبيه:
-يا اخي حرام عليك مش مكفيك اللي عملته فيهم زمان مش مكفيك انك فرقتهم وجوزتها واحد مش بتحبه صايع وبيشرب مخدرات وبيخونها واتطلقت واللي رايح واللي جاي بقي يتكلم عنها حرام عليك انت عايز اي تاني ما الواد سافر واشتغل وبقي راجل ملو هدومه ويقدر يعيش بنتك في مستوي كويس ليه عايز تفرق قلوبهم تاني انت ايه يا اخي قلبك ده ايه حجر ؟؟
ومع كل كلمه كانت ماما بتقولها كنت بعيط بصوت مكتوم لحد ما الخط اتقطع وهما بيتخانقوا
حطيت ايدي علي قلبي وفضلت أعيط لحد ما صوت عياطي غطي علي الأوضه اللي كنت قاعده فيها
وفجأه سمعت صوت الباب بيتفتح قومت اتنفضت من مكاني بخوف وانا بلف حوالين نفسي
-مين مين
رد بجمود :
-هيكون مين يعني
غمضت عيني براحه وقعدت مكاني من غير ما انطق حرف
-انتي كنتي بتعيطي ؟
هزيت راسي بنفي وانا بمسح دموعي بسرعه :
-لا
حسيت بيه وهو بيقرب مني وقعد جنبي علي الكنبه ومسك وشي وقال بهدوء :
-اومال اي الدموع دي ؟
-ا انا كويسه مفيش حاجه
سند ظهره علي الكنبه وشدني لصدره وهو بيطبطب علي راسي برقه :
-ممكن تنسي اللي حصل وكأننا متكلمناش فيه وتقولي مالك؟
حاوطت وسطه وانا بسند راسي علي صدره وبقول بهمس :
-انا بحبك
-وانا كمان بحبك بس برضو مالك؟
-ا انا اسفه اني زعلتك وقولتلك روح اتجوز غيري انت اكتر واحد عارف أنه مش سهل عليا اقولك كده بس بس انت كمان من حقك تبقي اب وانا من حقي ارفض لأسباب قولتلك جزء منها
اتنهد تنهيده طويله وهو بيطبطب علي راسي :
-طب خلاص كفايه كلام في الموضوع ده النهارده وسيبي كل حاجه علي ربنا
هزيت راسي من غير ما انطق حرف وغمضت عيني ونمت وانا مقرره اني محكيش اللي حصل بين ماما وبابا لاني عارفه أنه هيتضايق وممكن يقول كلام مش كويس عن بابا وانا مهما اللي بابا عمله اكيد مش هسمحله يقول عنه حاجه لانه في الاول وفي الاخر ابويا!
ـــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور شهر
-ممكن افهم انتي بتعيطي ليه دلوقتي ؟
عيطت اكتر وانا بحط وشي بين ايديا:
-عشان انا حامل
سكت لحظه وبعدها رد ببلاهه:
-يعني دي دموع فرحه ولا حزن ولا اي بالظبط
-الاتنين
-اصلا !
-ايوه انا فرحانه اني حامل فرحانه اني شايله حته منك بس بس في نفس الوقت انا مش عايزه انزل البيبي عشان …
قاطعني بزعيق :
-انتي مجنونه بيبي ايه اللي تنزليه
رديت بعصبيه ودموع :
-انا مش هقدر اشيل مسؤوليه طفل افهمني بقي
اتنهد تنهيده طويله وقعد جنبي وهو بيمسك ايدي :
-رهف حبيبتي مش احنا اتكلمنا في الموضوع ده وقولنا أنه وضع مؤقت وانك هتعملي عمليه في اقرب وقت ونظرك هيرجعلك أن شاء الله
-ا ايوه ا انت قولت كده ب بس بس
-بس ايه ياحبيبتي بس ايه ليه يارهف مُصره تعذبي نفسك وتشيلي نفسك هموم فوق همومك ليه
سكت لحظه وبعدها اتنهدت وانا بضغط علي أيده بخوف :
-خايفه يازين خايفه اوي
-انا معاكي انتي مش واثقه فيا
هزيت راسي بلهفه :
-لا طبعا واثقه فيك
-يبقي تسيبي كل حاجه علي ربنا وان شاء الله تعملي العمليه بعد ما تولدي
رديت بحزن :
-ي يعني مش هشوف البيبي لما يتولد
حاوط وشي ورد بهدوء :
-حبيبتي الايام جايه كتير لسه هتعيشي تفاصيل كتير اوي معاه ،ده رزق من ربنا يارهف احمدي ربنا عليه ياحبيبتي
هزيت راسي وانا بهمس بحزن :
-ا الحمد لله
-بت يارهف
-نعم؟
-هو اين يذهب الإنسان عندما يشعر أن مراته ست عيوطه
مطيت شفايفي بطفوله :
-يطمنها يا استاذ زين وياخدها في حضنه
-تصدقي صح
قال كلامه وشدني لحضنه وانا اخدت نفس عميق وحاوطت وسطه وانا بغمض عيني براحه وبفتكر كل اللي حصل وكل اللي مرينا بيه انا وزين
بفتكر حبه ليا اللي بالرغم من فراقنا سنين مقلش بالعكس ده زاد !
بفتكر وجوده جنبي في كل لحظه حزن وضعف ويأس
في الحقيقه وجود زين في حياتي أشبه بطوق النجاه ،قبل ما يظهر كنت غرقانه ،متخبطه يمين وشمال ،مش لاقيه اللي يحنن قلبه عليا أو يبقي في ظهري
مش لاقيه الشخص اللي يحبني بجد ويستحملني ويستحمل تقلباتي المزاجيه
الشخص اللي يطمني بكلمه او حضن دافي او ابتسامه بالرغم اني مش بشوفها بس حفظاها وبتخيلها وبتديني امل للحياه وان كل حاجه هتكون تمام طول ما هو معايا وجنبي وقلبه بيحبني حب يسيع العالم
ــــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور عشر شهور
-زين خلي بالك من نوح ابننا عشان خاطري
قولتها بخوف وانا داخله اوضه العمليات عشان اعمل عمليه في عيني
مسك ايدي وهو بيبوسها برقه :
-متخافيش ياحبيتي نوح في عيني وان شاء الله هتقوني بالسلامه وهتشوفيه وهو زي القمر زيك
هزيت راسي بابتسامه مهزوزه :
-ي يارب
-ر ربنا يقومك بالسلامه
سكت لحظه لما سمعت صوت بابا ،كان في اعتقادي اني بتخيل لكن لما اتكلم مره تانيه اتأكدت انه موجود
-متقلقيش نوح ابنك في حضن جده مستنينك تقومي بالسلامه
همست بدموع :
-ب بابا
سمعت خطوات بتقرب مني وقعدت علي طرف السرير
باس راسي وهو بيهمس بحزن :
-سامحيني يابنتي حقك عليا
هزيت راسي بدموع وانا بمسك أيده :
-مسامحاك يابابا مسامحاك
ودعتهم كلهم ودخلت اوضه العمليات وانا بدعي بقلبي ان العمليه تنجح وارجع اشوف من تاني
مرت ساعه في التانيه في التالته وانا مش حاسه بأي حاجه
بدأت افوق بعد فتره كبيره جدا
-امممم اه زين
قرب مني بلهفه :
-حبيبتي انا معاكي اهو
-نوح نوح ابني
-هتشوفيه ياقلبي هتشوفيه أن شاء الله
شويه وجه الدكتور وشالوا الشاش اللي كان علي عيني والكل واقف قدامي علي أعصابه
مرت لحظه اتنين تلاته وكلهم واقفين يبصولي بتوتر وخوف
وجهت نظري لنوح ابني اللي كان علي ايد بابا وانا بهمس بدموع :
-نوح حبيبي
زين بفرحه وهو بياخده من بابا وبيقرب مني والدموع بتلمع في عينه:
-شوفي شوفي جميل زيك ازاي
رفعت راسي أبص في عيونه باشتياق:
-هو جميل عشان شبهك انت
اتنهد ورفع رأسه للسما وهو بيهمس :
-الحمد لله يارب
ماما وعيونها بتلمع بالدموع :
-حمدلله علي سلامتك ياحبيبتي
ابتسمت وانا بفتحلها دراعاتي :
-وحشتيني اوي ياماما
اخدتني في حضنها وقعدنا نعيط احنا الاتنين وزين يعيط وبابا يعيط نوح يسكت؟
ابدا عيط هو كمان احنا اصلا عيله نكد نعشق المعاناة نموت فى ضيق التنفس
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور سنه
-زين حبيبي
-نعم ياقلبي
-عندي ليك خبر انما اورجانيك
زين باستغراب:
-خير ياحبيبتي في ايه
قربت منه وحطيت ايدي علي بطنه وانا ببتسم :
-في ضيف كمان تسع شهور هيشرفنا
بلع ريقه ورد بتوتر :
-ا انتي حامل
هزيت راسي بدموع :
-اه
اخدني فى حضنه وهو بيضحك بفرحه :
-مبروك ياحبيبتي الف الف مبروك ربنا يقومك بالسلامه
-ربنا يخليكي ليا ياقلبي
-ويخليكي لينا ونملي البيت ده بخمستاشر عيل ولا حاجة
رديت بتذمر :
-ليه متجوز ارنبه؟؟
غمزلي بمشاكسه:
-واحلي ارنبه كمان
سمعنا صوت نوح وهو بيضحك بصينا لقيناه بيزحف تحت رجلينا وبيبصلنا ببراءه
شاله وهو بيبوسه بفرحه :
-قلب بابا
رديت بحزن مصطنع :
-وانا مش قلب بابا انا كمان ؟
-لا انتي روح بابا وقلب بابا وكل دنيته
-زين
-عيونه
-بقولك ايه ياحبيبي المحن ده بيموع النفس ما تنزل تجبلي رنجه كده ترطب علي قلبي
بصلي من فوق لتحت بقرف:
-رنجه؟
-اااه وفحل بصل بقي ياااه علي الروقان
ضحك عليا وبعدها باس راسي وهو بيقولي بحنان:
-من عنيا ليكي ياقلب زين
ابتسمت وانا بسند راسي علي صدره :
-ربنا يخليك لينا ياحبيبي
هافضل باحميكي من الدنيا و آخد ضرباتها وانا مكانك
انا قبلك ضيعت حياتي والباقي مخليه علشانك ♥️
تمت..
لقراءة الرواية كاملة اضغط على : (رواية الجوازه التانيه)
