رواية البر التاني الفصل السادس والسبعون 76 بقلم لولو محمد
رواية البر التاني الجزء السادس والسبعون
رواية البر التاني البارت السادس والسبعون
رواية البر التاني الحلقة السادسة والسبعون
ام مغاورى / ليه بس الكلام ده يا ام عباده
فاطمه / مهو البت تتشتم بابوها و امها و تستكوا تتهان تسكتوا يتنكد عليها تسكتوا تفتح بقها و تجيب سيره حد فيكوا تنضرب ليه لقينها و لا لقينها
مغاورى / والله انا
فاطمه / انا كلامى مش معاك اوعى تفتكر ان الحاجات اللى جبتها لسماح هتنسينا اللى عملته اقوم اضربك قدامهم و اقل منك و اجبلك سرايا
مغاورى / كانت لحظه شيطان
فاطمه / بس الشيطان ما انصرفش و لسه قاعد فى السرايا هنا وسطيكوا بياكل و يشرب و ينام و لا كانها عملت حاجه
شاهين يبص لفاطمه
فاطمه / ايوه يا حج بتكلم عن اختك ايه مالهاش كبير و لا ايه و ما تقوليش ظروفها اتجنت ودوها مستشفى المجازيب انما تطليقوها كدا على الخلق ليه احنا مالنا
ام مغاورى / عيب كدا يا ام عباده احنا
فاطمه / عرفتوا مين اللى بيطلع الكلام من بيتكوا يا كبير عرفت يا جوز بنتى مين اللى مطلع سرك بره
مغاورى / قريب هعرف
فاطمه / قريب !!! عمتك يا ضنايا
شاهين / مين اللى قالك الكلام ده
فاطمه / اللى قالى قالى على العموم هو مش جوز بنتى بيدور و اللى بيدور بيلاقى المهم لما يتاكد هتعملوا ايه هتقولوا ظروفها و ست كبيره و نستحملها و لا هتعملوا ايه
شاهين ساكت
فاطمه / مهو انا مش هقدر انام هناك و انا مش مطمنه على بنتى فوجود اختك يا كبير دا حتى بتنط للبت فى اوضتها البت تقعد فين
شاهين / انا والله محرج عليها
فاطمه / و هى ما بتسمعش كلامك هى مش شيفاك الكبير مش عشان انت مش كبير حاشا لله انما عشان هى فجرت
ام مغاورى / ليه الكلام ده بس
فاطمه/ تحبى اروح اجبلك بنتك من شعرها و ابهدلهالك يا ام مغاورى و تيجي اقولك ليه الكلام ده احبسها فى اوضتها و اعد عليها انفسها و ادعى عليها فى الرايحه و الجايه و ما اعملش حساب لحد و اطلع اسرارها هى و جوزها بره و تيجي تكلميني
شاهين / والله سماح زيها زى بنتى بالظبط
فاطمه / انا مش عوزاها زى بنتك هى مش زى بنتك و لا انا زيك يا كبير انا مش هقدر اسكت واشوف بنتى سيره على لسان اللى يسوى واللى ميسواش مش هقدر اشوفها بتتهان و لا بتنضرب انت قدرت انا ما اقدرش
مغاورى / الله يرحمه كان
فاطمه / الله يرحمه ما يخصنيش انت جيت طلبت ايد البت و لا احنا غصبناك عليها
مغاورى / طب ما انا لسه شاريها يا امى هو انا قصرت
فاطمه / شاريها يبقي تحميها
مغاورى / جبتلها سرايا بره تخلص و اخدها تقعد فيها
فاطمه / يا ترى من يعيش يا جوز بنتى انا بنتى خست النص من النكد اللى عايشه فيه و ما بتفتحش بقها دا انا لولا الكلام طلع بره ما كنتش عرفت و كل ما اكلمها تعملى البحر طحينه و عايشه فى الجنه و شايليني من على الارض شيل و انا نايمه فى العسل هناك و مصدقه لحد ما افوق على المرار الطافح ده
شاهين / ايه اللى يرضيكي يا ام عباده
فاطمه / انت مش بتقول سماح زى خديجه اللى هتقبله على خديجه فى بيتنا اعمله لسماح فى بيتك
شاهين/ ماشي يا ام عباده
فاطمه / انا مش جايه لمشاكل و غلاوتكوا عندى ما يختلفش عليكوا اتنين انا اديتكوا عنيا الاتنين جوزت البكر لبنتكوا و اخر العنقود لابنكوا ماستخسرتش فيكوا روحى و عقلى خدت البت و حطيتها فى عيني و ربنا يشهد انى كنتلها ام مش حماه
ام مغاورى/ و انا والله ربنا شاهد و اساليها
فاطمه / اماطه الازى عن الطريق صدقه و دى يتيمه انا مش عاوزه منكوا لا دهب و لا ارض ابعدوا بس الاذى من سكتها لا بقول خلوها هانم و لا شيلوها على الرأس انا بس بقول ما تنغصوش عيشتها كتير اللى بطلبه يا ناس
شاهين / اقل من حقها يا ام عباده و وعد منى اللى حصل ده مش هيتكرر
فاطمه / كتر خيرك يا كبير و انا مش عاوزه اكتر من كدا … فتكوا بعافيه
فاطمه تقف ام مغاورى و الكل يقفوا
ام مغاورى / على فين خليكي شويه نراضيكي
فاطمه / مرضيه يا اختى و عتابى محبه مفيش اسهل من خراب البيوت و انا باقيه على نسبكوا
ام مغاورى / ان كنتى باقيه قيراط احنا باقيين اربعه و عشرين
فاطمه تهز راسها و تمشي مغاورى يمشي وراها و يفتح باب العربيه
فاطمه / القلم اللى نزل على خد بنتى سكينه اتغرزت فى قلبي لا ينفع فيها معلش و لا حقك عليا
مغاورى / ايه اللى يرضيكي
فاطمه / يا سماح يا عمتك فى البيت ده هات مراتك و تعال اقعد عندنا لحد ما السرايا بتاعتك تتوضب
مغاورى / ازاى بس يا امى
فاطمه / اهو نخدمكوا و ناخد بالنا منكوا هى تشوف مزاكرتها و انت تشوف اشغالك يا سيدى لو مضايق من وجودنا اقعد فى المضيفه اوضبهالك و اخليها على سنجه عشره و ان كان على عبد الله السرايا جوه واسعه
مغاورى / وجودكوا على راسي و يسعدن ما يضايقنيش بس انتى عارفه انى مش هقدر اسيب ابويا و اهلى
فاطمه / يبقي تشوف مكان تانى لعمتك تقعد فيه مكان نضيف يليق بقيمتها انا ما بحرضكش عليها لا سمح الله و لا بقولك هينها فى اخر أيامها انا بس بقولك شيل دا من دا يرتاح ده عن دا
مغاورى يبص فى الارض
فاطمه /اقولك خد لسماح شقه بره ان شالله اوضه و انا هبقي اروح و اجى عليكوا اشوف طلباتكوا
مغاورى / سبيها لله يا امى
فاطمه / كلو على الله يا ابنى فكر فى كلامى احنا داخلين على حرب يا ابنى و مش هينفع عمايل عمتك دى فى وسط المشاكل و الهم دا كله
مغاورى يهز راسه فاطمه تطبطب على كتفه و تركب يقفل الباب و عباده يسوق و يمشي و مغاورى متابعهم
…………………….
فى اوضه كوثر
كوثر / انا ما قولتش غير اللى حصل هم بقي كل واحد يزود من عنده دا مش ذنبى
شاهين / و بتقوليها عادى كدا بتقوليها عادى كدا انا عمرى ما طاطيت راسي بالشكل ده عمرى ما لسانى اتشل بالشكل ده و انتى بتقوليها عادى كدا
كوثر / عاوزنى اكدب يعني هخاف من ايه يعني
شاهين / صحيح تخافى من ايه خافى من ربنا يا اختى
كوثر / يخافوا هم منه انا لا كدبت و لا عملت حاجه غلط الكلام جاب بعضه روح حاسب اللى زود على الكلام
شاهين / انا نبهت عليكي قبل كدا ما تروحيش اوضه سماح اى كان السبب و روحتى نبهت عليكي اللى حصل ما يطلعش بره و طلعتى ايه ما ليش كلمه عليكي و لا ايه
كوثر / هى جايه تسخنك عليا جايه توقع بين الأخوات هى دى وصيه امى الله يرحمها ليك
شاهين / فكريني تانى كدا وصيه امى كانت ايه عشان مش فاكر ايه جيت عليكي و لا انتى اللى دوستى عليا و على هبتى بالجزمه
كوثر / ما عاش و لا كان
شاهين / جبتيلى الكلام و بقت سيرتى على كل لسان شاهين الجارحى مش عارف يحكم حريم بيته
كوثر / انت اللى جبتلنا بوز الاخص دى و حطيتها وسطينا
شاهين/ اللى بتتكلمى عليها دى الكبيره مرات الكبير
كوثر / على جثتى
شاهين / انتى مش قتلتيني يا اختى مش كسرتى كلامى و صغرتيني وسط الخلق انا ما عدتش قادر عليكي و اللى ما يقدرش على اهل بيته ما يستاهلش يبقي الكبير و من النهرده مغاورى بقي الكبير و سماح مراته الكبيره مرات الكبير و كلامها يمشي على الكبير قبل الصغير
كوثر / ما يمشيش عليا انا كوثر الجارحى
شاهين / يبقي اشوفلك شقه على البحر فى الاسكندريه شرحه و برحه و هواها يرد الروح
كوثر / هتطردنى من بيت ابويا يا شاهين دة اخرتها يا ابن ابويا
شاهين / ما عاش و لا كان اللى يطردك دا بيتك و بيت جوزك و ابنك و احفادك انا بس هبعتك تغيرى جو تشمى يود البحر و تتفسحى
كوثر / بتنفيني بتشتريها و تبيعينى
شاهين / لا بشترى و لا ببيع انتى اللى اختارتى انتى اللى قفلتى كل السكك فى وشي كتفتيني و عجزتيني
كوثر / لا مش انا اللى عجزتك انت اللى عجزت و خرفت انت اللى ضيعت هيبتنا هيبه الجوارحه ابوك الله يرحمه كانت بتتهزله شنبات مش انت اللى حتى مش قادر ترد حتى على الحريم
شاهين/ ما كبرتش لوحدى و لا خرفت لوحدى الناس كلها سكتالك و نقول ربنا يصبرها على ما بلاها ربنا يهديها انما انتى عماله تسوقى فيها تسوقى فيها و ما حدش مالى عينك
كوثر / ما انت ما تملاش عين حد ضيعت دم جوزى و دم ابنى و مطاطى خدك مداس لمرات ابنك و جاى عليا و عاملى راجل
شاهين / مفيش اسهل من انى اسكعك قلم يوقعلك صف سنانك بس انا بقي مش هعمل كدا مش ههينك على كبر لمى حاجتك العربيه هتاخدك بكره الصبح
كوثر / مش رايحه فى حته
شاهين / مهو يا اسكندريه يا سرايه المجازيب يشوفولهم صيرفه معاكى
كوثر / هتدخل اختك السرايا السفره يا شاهين هتضحك الناس عليك و عليا يا شاهين
شاهين/ شوفى اللى يريحك و اعمليه انا معدش فيا نفس لكلام
شاهين يطلع بره كوثر تجرى وراه
كوثر / دا بيتي و لا انت و لا الاتخن منك هيخرجونى منه دا بيتي انت فاهم و لا لا بيتي و بين ابويا و امى مش هسيبه لبنت زى دى تبرطع فيه انت فاهم و لا لا فاهم و لا لا
شاهين يبصلها و يمشي كوثر تقف تصرخ
كوثر / دا بيتي انا فاهمين بيتي بيتي انا بيتي
كوثر تقع على الارض ماجده تجرى عليها و سماح واقفه تتفرج تتحرك نحيتها ببطئ
ماجده / عمتى اللحقنى يابا اللحقونى يا ناس
سماح/ هى مالها كفاها الله الشر
ماجده / يا مغاورى يا فتوح ياما
سماح / هروح اجبلها شويه ميه تطسي بيهم وشها
سماح تمشي و مغاورى يدخل بيجرى
مغاورى / مالك يا عمتى مالك
مغاورى يشيلها و ينزل بيها يعدى من جنب ابوه قاعد على كرسي ما بيتحركش و الكل بيجرى ورا مغاورى و سماح نازله بالراحه تشوف شاهين قاعد تجرى عليه
سماح / مالك يابا
شاهين / مفيش حاجه يا سماح
سماح / لا فيك وشك اصفر خالص استنانى انا جايه
سماح تطلع تجرى على بره تقابل واحد من الغفر
سماح / شوفلى عربيه بسرعه ابويا الحج تعبان و لازم ننقله المستشفى
الغفير / الجماعه خدوا كل العربيات و مشيوا
سماح / شوف تاكس روح وقف اى عربيه من الشارع اتصرف انت ايه ما بتفهمش بقولك ابويا الحج تعبان و لازم ننقله المستشفى حالا اتحرك
الغفير يجرى و سماح تشاور لغفير تانى و تصرخ فيهم
سماح / بسرعه تعالوا سندوه بسرعه انتوا مستنين عزومه
الغفر يدخلوا السرايا و سماح بتجرى وراهم
…………………..
فى المستشفى
البلد كلها موجوده و سماح قاعده جنب فاطمه بتتوشوشها كوثر تدخل و ماجده بتسندها
كوثر / ابوك عامل ايه يا مغاورى
مغاورى / انتى عامله ايه يا عمتى احسن دلوقت
كوثر / الحمد لله لسه مكتوبلى فى الدنيادى عمر
مغاورى / ربنا يطول فى عمرك و يديكى الصحه
كوثر / من قلبك يا ابن اخويا و لا زمانك كان نفسك تخلص منى عشان عيون ست الحسن
مغاورى / عمتى ابوس ايدك ابوس ايدك احنا فى المستشفى و ابويا تعبان و لسه ما اطمناش عليه ابوس ايدك
كوثر / ماشي سكت
كوثر تروح تقعد فى جنب و تبص لفاطمه و سماح
فاطمه / سلامتك
كوثر / الله يسلمك
فاطمه / ازيك يا ماجده يا حبيبتي عامله ايه
ماجده / الحمد لله بخير طول ما انتى بخير
كوثر / و هيجي منين الخير صحيح يقتلوا القتيل و يمشوا فى جنازته صحيح
مغاورى يخبط كف على كف و يبص لامه تطبطب على كتفه
ام مغاورى/ ما تقومى ترتاحى فى اوضتك يا اختى بدل ما التعب يحل عليكي تانى
كوثر / انا قاعده على بابا اخويا و مش همشي الا اما اطمن عليه مش هتقوميني و تسبيها
سماح / هروح اجيب مايه تيجي معايا يا خديجه
خديجه تهز راسها و يمشوا سوا كوثر و فاطمه يبصوا لبعض فاطمه تقوم و تروح تقف جنب هند
فاطمه / تعرفى ان الواحد لو قتل فى الظروف دى الحكومه تكافئه
هند تبتسم و تبصلها
فاطمه / فى ناس كدا اللهم احفظنا الصرم لما بيسيطر عليهم بيعميهم
هند / مش سهل ان الانسان يكون وحيد
فاطمه/ بقي كل العيله دى و وحدانيه دا كفايا عليها احفادها بتعلمهم ايه هى بتربيهم على ايه هضيعهم زى ما ضيعت ابنها
هند / ماجده عاقله و
فاطمه/ اهى ماجده دى اغلب واحده فى الدنيا هى مش بنت جوارحه و عز بس شافت اللى لا انا و لا انتى شوفناه و مع كدا ما فتحتش بقها حتى ان فتحت بتطلع تطلع و تنزل على ما فيش
هند/ خراب البيوت مش سهل برده
فاطمه / خراب البيوت ما فيش اسهل منه الصعب هو الحفاظ على البيت هو انك تستحملى عشان البيت يفضل موجود
هند / فى حاجات الواحد ما يقدرش يستحملها
فاطمه / و انتى بره غير و انتى جوه ما تشوفى سماح … هى مش بنتى؟؟ … بس طلعت بنت ابوها طيبه و غلبانه انما تعرف تخليكي تلفى حوالين نفسك كدا و توديكي البحر و تجيبك عطشانه
هند تبتسم
هند / دا عمو شاكر الله يرحمه ده
فاطمه / ما انتى اصلك ما توعيش عليه فى شبابه حكم السن برده يلاهوى يا هند على سى شاكر فى عزه … الله يرحمه الا ما كانله زيي
هند و فاطمه يبتسموا
كوثر/ شايفين مش قادرين يخبوا الفرحه … الراجل لسه ما ماتش يا غجر
هند / احنا كنا
فاطمه / شششش انتى هتردى و لا ايه سبيها تاكل فى روحها
كوثر / دا انا هقوم اكلك دلوقت
فاطمه تزق هند بعيد كوثر تمد ايدها تمسكها فاطمه تمسك ايدها و تلفها ورا ضهرها و تزنقها فى الحيط
فاطمه / انا مش سماح يا ام عباس … انا … مش … سماح
يحاولوا يحوشوا
فاطمه / اللى هيقرب هكسرهولها
ناصر / فاطمه
فاطمه تبصله و تسيب
فاطمه / ان كانت البت بتعمل اعتبار لفرق السن فانا لا هتمدى ايدك هقطعهالك مع ان والله انا كمان لازم اعمل حساب لفرق السن بس اهو
ناصر / كفايا قولت احنا فى المستشفى
هند / والله ابتسمنا لما افتكرنا عموا شاكر والله مش اكتر من كدا
كوثر / اعمليهم عليا يا بت يعملوها و يخيلوا يا بت فاكرين لما يموت سماح هتبقي كبيره العيله
مغاورى/ بتتكلمى فى ايه يا عمتى
كوثر / سبناها مع ابوك لوحدهم دقيقه اخدت روحه
فاطمه / اخدت روحه ايه يا وليه يا مهبوشه انتى انا بنتى هى اللى نجته لو كانت سابته ما كانش زمانا واقفين هنا كان زمانا بندفنه
كوثر / دفنوكى و صلوا عليكي يا بعيده انتى بتفولى على الراجل
مغاورى / كفايا بقي كفايا بقي يا عمتى هو انتى ما بتعمليش حساب لحد خالص
ام مغاورى/ ابدا هو رقد ابوك غير انها ما بتعملش حساب لحد
كوثر تبصلها
كوثر / بتقوميه عليا !!!بتقوميه على عمته !!!
ام مغاورى / يا شيخه ارحمينا بقي تعبنا
كوثر / هى دى اللى تعبته هى اللى جت و عصبته هى
ام مغاورى / ما انا كنت شايفه كل حاجه انتى اللى وقفتى تردحيله و صوتك كان جايب اخر البلد ارحمينا بقي مره من نفسك تحسي بحد غير نفسك فضل يدلع فيكي يدلع فيكي لما اتمرعتى
مغاورى / ابوس ايدك يا اما الراجل راقد جوه … فتوح … روح عمتك
كوثر / انا مش رايحه فى حته اخويا انا اللى راقد جوه ده اخويا
مغاورى / هبقى اطمتك عليه اول بأول
ماجده / طب سيبها انا هاخدها اوضتها
مغاورى / انا قولت كلمه ما دام قامت على رجلها و بقت كويسه تروح بيتها اولى بيها
كوثر / هى بقت كدا يا ابن اخويا …حقك
كوثر تمشي
ماجده / هروح اراضيها بكلمتين
ماجده تجرى وراها
ام مغاورى / الوليه دى انا جبت أخرى منها انا تعبت
مغاورى / مش وقته يا اما مشيت خلاص ابويا يقوم بالسلامه و بعدين ربنا يسهل
……………………..
فى سرايا الزنايته
خليفه قاعد سرحان و قدامه قصعه فيها فحم و عليها براد عبد الله يروح يقعد جنبه
عبد الله / السلام عليكم
خليفه ما يردش
عبد الله / مالك يا حج فيك ايه
خليفه ينتبه
خليفه / بتقول حاجه يا سى الدكتور عبد الله
عبد الله/ ههههههههههههههههه اللى واخد عقلك ما تعملى معاك كبايه شاى
خليفه / حاله يا سي الدكتور
عبد الله / هو احنا مش قولنا مليون مره اسمى عبد الله بس
خليفه يصب الشاى و ديه لعبد الله
عبد الله/ مالك بقي كنت سرحان فى ايه
خليفه / ابدا و لا حاجه
عبد الله/ انا برده على فكره زعلت اوى على الحج شاهين ان شاء الله يقوم بالسلامه
خليفه / ان طبعا ان شاء الله الا انت ما روحتش معاهم ليه
عبد الله/ انا اصلا مش عارف هند راحت ليه مش لما يقوم كدا يبقوا يروحوله و لا هى زحمه فى المستشفى و خلاص
خليفه / الاصول اصول برده و الزنايته زين من يفهم فى الاصول
عبد الله / الحاجات دى لازم تتغير المستشفى مش مكان للتجمع الدكاتره و الاستاف مش هيعرفوا يشوفوا شغلهم من الزحمه
خليفه / لا مؤاخذه ايه الاستف ده البنج يعني و كدا
عبد الله / لا اسف انا اقصد الفريق الطبى معلش
خليفه / اه معلش فهمتك غلط
عبد الله / انت عندك عيال يا خليفه
خليفه / هاه !!!
عبد الله/ فى ايدك دبله متجوز يعني بس ليل نهار واقف هنا انت ما بتروحش؟
خليفه / بروح بروح طبعا بس مش كل يوم اصل انا هنا من زمان يمكن من وانا اصغر منك و انا واقف هنا
عبد الله / دا انت قديم بقي
خليفه / ايوه من ايام السرايا القديمه اللى عملوها مدرسه البنات النموذجيه
عبد الله / كانت كبيره برده يا خليفه
خليفه / ما كانتش كبيره اوى اياميها سنه فى سنه بيهدوا السور و يبنوا مبانى جديده و يوسعوها
عبد الله / تسلم ايدك والله الشاى يعدل الدماغ
خليفه / الف هنا
عبد الله/ هستاذنك اقوم اكمل مزاكره
خليفه يهز راسه عبد الله يقوم خليفه يمد ايده فى جيبه و يطلع محفظته و يفتحها و يبص على صوره بنت شابه صغيره دمعه تنزل من عينه يمسحها علاطول
……………………..
فى المستشفى
هند و خديجه و سماح فى الكافتريا
هند/ مش للدرجادى
سماح / يمين بالله حصل لما شافت القميص بقت تتشال و تتهبد و لا كانى درتها و ما هديتش الا اما فتقته قدامها دى فضلت تدعى عليه كانى هلبسه لجوزها
خديجه / انا والله ما عارفه هى بتعمل معاكى كدا ليه
سماح / دا على اساس انها كانت ملاك اوى ما احنا متربين فى بيتكوا و عارفين كل حاجه هى بس الدنيا زياده معايا حبتين
هند / ربنا يهدى بس برده ما انكرش انها صعبانه عليا مش سهل ان الانسان يخسر اهله … جوزها و ابنها … ربنا ما يكتبها على حد
سماح / عندها اهل كتير بيحبوها بس هى مصره تسود عيشتهم و تخسرهم هم كمان دى ما بتحسش انها السبب دى وقفت لابويا الحج شاهين و فضلت تقوله على جثتى مغاورى يبقي الكبير على جثتى و دا بيتي و تصرخ فيه لما الراجل يا كبدى ما استحملش و فى الاخر جايه تقول امى السبب
خديجه باصه فى الارض
هند / فكرتونى بعمى محمود فضل يتخانق مع ابويا لحد ما جاب اجله و ياريته سكت بعدها
خديجه تبصلها تلاقيها زعلانه
خديجه / ما تعرفيش اخبارهم ايه
هند / مش عاوزه اعرف مش عاوزه افتكر اللى عمله فيا و فى اهلى مع اننا عمرنا ما عملناله حاجه و لا ابويا كان عمله حاجه بس عادى لازم كدا فى كل عيله حد كدا
سماح / الحمد لله احنا ما فيناش
فاطمه تدخل
فاطمه / ابوكى فاق لو عاوزه تطمنى عليه
خديجه تقوم تجرى
فاطمه / بالراحه يا بت لتقعى و لا يجرالك حاجه .. انتى قاعده هنا ليه يا بت الجزمه بقولك ابوكى فاق
سماح / قايمه اهو الله
سماح تمشي
فاطمه / تنحه ما شاء الله عليها
هند تضحك فاطمه تقعد
فاطمه / الوليه اللى اسمها كوثر هترجع كلموها و هترجع هى و ماجده
هند / انا بقول نمشي قبل ما تيجي عمو شاهين اكيد تعبان و مش حمل خناق
فاطمه / و اسيب بنتى لوحدها
هند / ناخدها معانا
فاطمه/ و تسيب ابوها راقد !!! ليه ما بنفهمش فى الاصول و لا يه
هند / لا بنفهم خديجه و سماح يطمنوا و يمشوا خديجه حامل و محتاجه راحه و سماح هتمشي عشان المشاكل اكيد هيفهموا حاجه زى دى
فاطمه / عوزانى اسيبهالها مخضره
هند / مش احسن ما تسبهالنا هى سوده صدقيني يا بطه انا عشت الايام دى و عارفه كويس اللى هيحصل يزعلوا شويه والراجل يعيش احسن من لا قدر الله
فاطمه تبص لهند
فاطمه / ماشي تعالى اما نشوف هنعمل ايه
هند تهز راسها و تقوم مع فاطمه
……………….
فى اوضه شاهين
مغاورى / مش وقت الكلام ده يابا
شاهين / وقته يا مغاورى حتى لو ربنا كرمنى و مد فى عمرى انا مش هرجع فى كلامى انا كبرت و من حقى ارتاح
مغاورى / تمام اللى تشوفه بس دا ما يمنعش انك هتفضل طول العمر كبيرى يابا
شاهين / انا عارف انها مش سهله بس اهم حاجه لازم تعملها انك توفق بين مراتك و عمتك انا عارف انها غلطانه بس ما لهاش غيرك يا ابنى ما لهاش حد
مغاورى / دى فى عيني يا سيد الناس انت توصيني على مين
شاهين / بس اوعاك تيجي على بنت الناس اللى سيبتها بيتها و جبتها بيتك راضي ماجده و قولها تسامحنى انا ياما جيت عليها
مغاورى / انت ليه بتقولى الكلام ده ان شاء الله هتبقي كويس و الحكايه دى تعدى
شاهين / و هو الواحد هيعيش العمر كله يا ابنى
مغاورى / بس انا من غيرك اتكسر يا ابويا من غيرك ما اقدرش
شاهين / الدنيا ما بتقفش على حد يا ابنى و انت مش لوحدك ياما اصغر و اقوى منى سبقونى و ما حدش بيتاخر عن معاده
مغاورى / انا هنادى الدكتور يبص عليك تانى
شاهين / لو اخواتك البنات بره و امك دخلهم خليني اطل عليهم
مغاورى / بقولك ايه اجمد كدا و بلاش الكلام الماسخ ده ما توجعش قلبي انت هتقوم بالسلامه ان شاء الله هتروح بيتك و تقعد على كرسيك ما حدش هيلبس عبايتك غيرك سامعنى و لا لا
شاهين / نادى اخواتك و امك
مغاورى / لا اله الا الله لا اله الا الله حاضر
مغاورى يطلع بره امه بتبصله
مغاورى / عاوزك انتى و اخواتى … هى ماجده لسه ما جاتش
ام مغاورى و خديجه يدخلوا سماح تحط ايدها على كتف مغاورى يبصلها بحزن
ناصر / انا كلمت الدكتور لو حالته استقرت على بكره الصبح هيبقي الخطر زال باذنك يا رب
مغاورى / ادعيله يا كبير ابوس ايدك دا ما كانش بيحب حد قدك
ناصر / والله داعيله من غير ما تقول
سماح / ان شاء الله خير
مغاورى / مش باينلها خير يا سماح مش باينلها خير
عباده يطبطب على كتف مغاورى مغاورى يبصله و يرجع يبص فى الارض
…………………….
فى شقه مفروشه
بنت خليفه قاعده بتعيط يدخل راجل بدى بيلدينج يديها موبايل
الراجل / كلمى
البنت تقوم تقف و ترد
البنت / الو
فيرا / سورى جدا على الطريقه اللى جبتك بيها بس صدقيني هم ما سابوليش اى حل تانى
البنت / انتى مين
فيرا / انا واحده معرفه بابا ما تقلقيش هرجعك ليه تانى انا عاوزاكى تطمنى انتى هتبقي ضيفتى فتره صغيره و ما تخافيش من الحراسه بتاعتك ما دام انتى شاطره و بتسمعى الكلام ما حدش منهم هيقربلك
البنت / انتى عارفه ابويا بيشتغل عند مين دول هياكلوك نيه
فيرا / عارفه و صدقيني ما كنتيش هتبقي هنا لو ما كانش دادى بيشتغل عند الناس الوحشين دول على العموم انا قولت اللى عندى عاوزه تفضلي تعيطي لحد ما باباكى يجي ياخدك اتفضل بى ماى جيست عاوزه تستغلى وقتك فى حاجه مفيده انا جبتلك حاجتك من السكن هدومك و كتبك … تحبى اجبلك حاجه من البيت
البنت / انتى اكيد مش طبيعيه
فيرا / و مين فى الدنيا دى طبيعي يلا انجوى يور تايم … اه سورى ان مفيش واى فاى المنطقه اصلها لسه جديده و مش كامله الخدمات بس التى فى شغال و بيجيب كل القنوات و فى كمان جايمز لو تحبى فى الاكس بوكس بس انا افضل انك تزاكرى مش عاوزين دادى يقول اننا عطلناكى و لا حاجه
البنت / انا اكيد بحلم مستحيل الكلام ده يكون بجد
فيرا / اه الرجاله اللى برا حدودهم باب اوضتك و اوضتك بحمام طول ما انتى جوه هتبقي فى امان هتخرجى بره … مش هقدر اللحقك انا بعيد و انتى حلوه و صغيره و انتى فاهمه الباقي بقي عاوزين نرجع لدادى سلام مش عاوزين نحط راسه فى الارض و لا ايه
البنت / حاضر
فيرا / شاطره كدا انا احبك … اتوضى و صلى و ادعى ابوكى يعمل اللى طلبته منه و الا هزعل عليكي اوى يلا اسيبك ترتاحى … سلام
فيرا تقفل و البنت تبص للراجل ياخد منها الموبايل
الراجل / عندك ميه و اكل فى التلاجه و ان عوزتى اى حاجه نادى عليا انا قاعد بره
البنت / هو احنا فين
الراجل / فى بيت فى عماره فى شارع اكتر من كدا ما يخصكيش خليكي فى حالك لو عاوزه تروحى لامك تانى انتى فاهمه و لا لا
البنت تهز راسها الراجل يطلع بره و يقفل الباب
…………………….
فى المستشفى
مغاورى قاعد فى جنب بعيد و سماح قاعده جنبه بتوشوشه
سماح / حاسه بيك اوى و عارفه ان كل الكلام مش هيخفف نقطه من بحر وجعك و عارفه انه مش وقته بس انا كنت مكانك
مغاورى يبصلها
سماح / كنت بعشم روحى و انا على بابه نفس القاعده و نفس اللمه و نفس الناس … نفس الدعا و البكا و النواح … يارب يا مغاورى تبقي النهايه مختلفه يارب يقوم بالسلامه
مغاورى / هيعيش يا سماح هيقوم بالسلامه و يعيش
سماح تهز راسها و تبص الناحيه التانيه
مغاورى / ابويا امنى امانه تقيله اوى يا سماح و ما حدش غيرك يقدر يساعدنى
سماح / عيني ليك يا خويا ما اتاخرش و انت عارف
مغاورى / لا اجى عليكي و لا اجى على عمتى و ان راضيتك هزعلها و ان راضيتها هبقي بظلمك
سماح تبتسم
سماح/ دى الامانه التقيله انا قولت هتبقي حاجه كبيره اوى على العموم يا مغاورى ريح قلبك و راضيها و انا عشان عيونك دى استحمل العفاريت الزرق مش بس عمتك
مغاورى يبتسم
سماح/ و لما ربنا يكرمنا و نروح بيتنا بالسلامه و يتقفل علينا باب واحد ابقي راضيني زى ما بتعمل علاطول كلامك الحلو و حنيه قلبك ربنا ما يكتب عليا اشوف فيك حاجه وحشه ابدا
مغاورى يبص حواليه الكل واقف يتعدل فى قاعدته و يرجع يوطى عليها
مغاورى/ والله ما فى حاجه مهونه عليا دنيتي الا لسانك الحلو ده يا بنت الاصول
سماح / هقوم اقعد جنب امى عشان عمتك بتبص علينا
مغاورى يهز راسه سماح تقوم و خديجه تقعد مكانها
خديجه / عامل ايه
مغاورى / انتى لسه هنا ليه انتى حامل و لازمك راحه و انتى بقالك ياما ما فردتيش ضهرك
خديجه / انا كويسه اتكلمت مع الدكتور
مغاورى ينتبه خديجه تعيط ياخدها فى حضنه عباده ينتبه يروح ناحيتها و الكل يروح ناحيتها
مغاورى / دول ما يفهموش حاجه يا بت لسه بدرى يا بت
عباده / خديجه
خديجه تمسح دموعها و تتعدل عباده ينزل على ركبته
عباده / انتى كويسه
خديجه تهز راسها
مغاورى / ما حدش ضامن عمره عشان يتكلم فى عمر غيره ادعيله بدل ما تعيطي عليه و هو عايش ابوكى عايش جوه انتى فاهمه و لا لا
خديجه تهز راسها بس ما تقدرش تمسك دموعها
انتصار/ لا اله الا الله لا اله الا الله يا بنتى اللى بتعمليه ده غلط على اللى فى بطنك
ام مغاورى / قعادك لا هيقدم و لا ياخر قومى روحى ارتاحى و افردى ضهرك
فاطمه / والله بنقولها من الصبح مش راضيه
عباده / مهى مش سهله برضه يا جماعه دا ابوها
مغاورى / ابوكى لو عرف باللى بتعمليه ده هيزعل دا انتى اخر العنقود يا بت
خديجه / و انا عملت ايه بس
عباده / طب الدكتور قالك ايه لكل ده
خديجه/ قالى يروح يرتاح فى بيته احسن ما فيش فى ايدهم حاجه يعملوها
عباده / لا اله الا الله
مغاورى / و لا بيفهموا حاجه ما يقولوا انهم ما بيفهموش حاجه من بدرى شوفلى يا ابنى عربيه اسعاف ننقله مستشفى تانيه يكونوا بيفهموا
فتوح يمشي
ناصر / الناس عملت اللى عليها و كلو على يدك
مغاورى / و انا ما اتعودتش ارضي بالامر الواقع هحاول ان شالله ابعته مصر ان شالله اسفره بره
ماجده / و ابوك هيستحمل البهدله دى
مغاورى / و انا هسفره على رجليه هسفره فى احسن عربيه اسعاف و معاه احسن دكاتره
ام مغاورى / ابوك هيموت فى بيته و على سريره مش على طريق فى عربيه يا عالم هتوصل و لا لا
مغاورى / لما يجي اوانه انما ابويا دلوقت حى اسيبه يموت ليه
مختار / خلاص سيبه هنا و ابعت هات الدكاتره على الاقل لو حصل حاجه يتلحق
فاطمه / عين العقل
عباده يوطى على ركبته قدام خديجه لسه بتعيط
عباده/ اللى أصله طيب و عمله طيب ما بيموتش … بيفضل عايش حتى لو بسيرته وسط الناس يفتكروه و يترحموا عليه
مغاورى يشد عباده يقومه
مغاورى / ابويا لسه عايش انت فاهم ما تتكلمش كانه مات
كوثر و ناصر يتكلموا فى وقت واحد
كوثر / مش قادرين يداروا فرحتهم
ناصر / الرحمه تجوز على الحى قبل الميت اهدى يا مغاورى ما تخليش حزنك يعمي عنيك هو بيحاول يهدى اختك عشان ما تاذيش اللى فى بطنها
فاطمه تقوم هند تمسكها و تشدها
هند/ مش وقته
فاطمه / سبيني اربيها اللى فكرانا زيها دى
هند/ ما انتى لو رديتى هتبقي زيها ما ترديش
فاطمه تقعد و تبص الناحيه التانيه و كوثر متبعاهم فتوح يدخل
فتوح / عربيه الاسعاف جاهزه هتوديه فين
مغاورى واقف ساكت و بيبص حواليه مش عارف و الكل متابعه باهتمام كوثر تفتح الباب و تدخل لشاهين ام مغاورى تقوم تقف
ام مغاورى / على البيت
مغاورى/ ياما
ام مغاورى / ما كانش بيرتاح الا فى فرشته يلا ما نجيلكوش فى حاجه وحشه
خديجه / انا هاجى معاكوا
ام مغاورى/ بيتك يا بنتى بعد اذنك يا عباده
عباده / تؤمرى يا امى
ام مغاورى / روح يا اخويا اللهى لا يسيئك خليهم يكتبوله خروج خلينا نروح و انا هاخد الحريم و نسبق على البيت نحضرله اللازم
اتنين رجاله يمشوا من ناحيه و ام مغاورى تمشي من ناحيه تانيه انتصار و فاطمه يجروا وراها يسندوها و وراهم باقي الستات ما عدا هند و سماح مغاورى يقعد على اقرب كرسي تايه و عباده واقف قدامه
مغاورى / يعني اروحه و اعيش عمرى كله بقول كان يمكن يقدروا يعملوله حاجه بس انا اللى ما عرفتش اتصرف
عباده / ما هياش سهله انا عارف كنت فيها قبلك
مغاورى / بس انا غيرك انا …
عباده / فى ايدك ايه تعمله و ما عملتوش لا انا و لا انت بنفهم فى الطب و اللى بيفهموا قالوا كلمتهم
مغاورى / ما بيفهموش
راجل / مش سهله يا ابنى لا عليك و لا علينا و ان كان ده هيريحك هاتله يا سيدي بدل الدكتور عشره و لو هترتاح انك تسيبه هنا سيبه اى كان قرارك احنا معاك فيه
ناصر / و ما حدش فينا هيبقي احن على ابوك منك
عباده / ها نويت على ايه ؟
مغاورى / مش عارف … مش عارف اعمل ايه مش عارف اروح فين و لا اجاى منين … يارب بصرنى
ناصر يروح يقعد جنب مغاورى
ناصر / امك و اخواتك و العيله كلها محتاجاك تسندهم ما ينفعش تنخ و انت الكبير
مغاورى / انا مش الكبير ابويا الكبير ابويا الكبير انا عمرى ما اتمنتها عمرى ما كنت اتمنى ان اليوم ده يجي
ناصر / و لا حد فينا كان يتمنا بس النصيب … حمل و لازم تشيله و انت قده
مغاورى / مش عارف ما عدتش عارف
مختار / يعني هتفضل تايه كدا و لا هتروح البيت و تتلموا حواليه و تلحقوا تشبعوا منه
مغاورى/ و هو الاب بيتشبع منه يا مختار ما انت معزور ماتوعاش عليه من اساسه
مختار / معاك حق بس كان عندى ناصر اخويا الكبير اللى شالنى و كبرنى زى ما عندك اخواتك البنات تشيلهم و تراعيهم … اديك شوفت اختك عامله فى روحها ايه
عباده / يا جماعه الجدع لسه وجعه طازه ما تضغطوش عليه ربنا يصبره على اللى هو فيه
هند / لو تسمحوا لى
الكل يبص على هند واقفه لوحدها فى جنب بعيد
هند / على فكره مش عيب انك تعيط و تنهار ما حدش هيقول اللحقوا دا مغاورى كان بيعيط على ابوه اصل ما فيش اغلى من الاب يتبكى عليه يعني بس والدك ما ماتش انت معاك حق انت لسه ما بقتش الكبير بس انت اكيد اكتر واحد عارف والدك كان هيتصرف ازاى فى موقف زى ده اكتر واحد عارف والدك كان نفسه فى ايه و هيرتاح فين و ازاى
مغاورى / فى بيته
مغاورى يقوم الرجاله توسعله يدخل اوضه ابوه و يقفل الباب كوثر قاعده تعيط جوه
كوثر / هيروح؟
مغاورى / ما فيش فى ايدي حاجه تانيه
كوثر تهز راسها
مغاورى / اخر حاجه قالهالى كان بيوصيني عليكي
كوثر تمسح دموعها
مغاورى / قومى يا عمتى اما نروح قومى
كوثر / هيتبقالى مين بعده
كوثر تمسك ايد شاهين و تبوسها مغاورى يحط ايده على ضهرها تبصله
كوثر / و كل ما اقول نارى بردت تزيد
مغاورى / حقك عليا يا عمتى
كوثر / كنت فاكره انها لما تبقي قصادك هتشوفها على حقيقتها و انجيك منها
مغاورى / مش وقت الكلام ده يا عمتى ابوس ايدك
كوثر/ اتاريها زى ما سحرتك سحرته و زى ما عمتك عمته قتلت اخويا بايدى يوم ما دخلتها حياتنا
مغاورى / لا اله الا الله
مغاورى يقعد على ركبه
مغاورى / تمام يا عمتى تمام نروح البيت و نطمن على ابويا و بعدين نشوف ايه يريحك و نعمله
كوثر / تطلقها
مغاورى يبص لكوثر
مغاورى / قومى يا عمتى معايا قومى كلهم مشيو ما فاضلش غيرى انا و انتى
كوثر / و ابوك
مغاورى / هناخده معانا
كوثر تبص لشاهين مغاورى يقوم و يحط ايديه على كتاف عمته و ياخدها و يطلعوا بره سماح واقفه مغاورى يحوط على عمته و ياخدها تحت باطه و يمشوا بعيد سماح تبص لهند
هند / انا بقول تخليكي معانا النهرده احسن
سماح / البت عندنا ما بتسبش بيت جوزها خصوصا لو محتاجها … و ما افتكرش انه ممكن يكون محتاج حد قد ما هو محتاجنى دلوقت
هند / بس هى مش هتسيبك فى حالك
سماح / فاكره اول ما دخلتى بيتنا ؟ انتى و امى كنتوا ناقر و نقير
هند / دى غير بطه خالص يا سماح بطه حتى لو كان ليها حركات بتحبنى و ياما وقفت جنبى
سماح / ما انا برده غيرك يلا يلا
سماح تمشي هند تمشي وراها
…………………..
فى سرايا الزنايته
خليفه واقف مع ست عند البوابه
الست / مهو يا تقلهم يا هقولهم انا
خليفه / انتى عاوزه تضيعي البت بقولك اسكتى
الست / يعني هتعمل اللى هم عاوزينه
خليفه يبص للست بنظره انكسار الست تعيط
الست / قولتلك بلا تعليم بلا هم قولت لا قولتلك بنتى ما تبعدش عن حضنى قولتلى بكره تبقي مهندسه قد الدنيا ضيعتنى و ضيعت البت و ضيعت روحك
خليفه / اسكتى يا وليه اسكتى هتودى بنتك فى داهيه اسكتى
عربيه مختار و هند جنبه جايه من بعيد
هند / مين دى
مختار / مرات خليفه شكلهم متخانقين
هند / ربنا يهدى سرهم
مختار / هدخلك و احاول اشوف فى ايه لحد ما ام فاتن يرجعوا
هند / مش هتحتاجنى اسندك
مختار / ما اتحرمش خليها على عكازى النوبادى
هند تهز راسها مختار يركن العربيه و ينزل هو و هند خليفه يجرى يسند مختار و الست واقفه فى جنب بتعيط
هند / السلام عليكم
الست تهز راسها و تبص فى الارض هند تدخل
مختار / فى حاجه و لا ايه يا خليفه
خليفه / لا يا سي مختار ما فيش حاجه
الست / لا يا سيد الناس البت البت يا سيد الناس
خليفه / اخرسي يا وليه بقولك سى مختار راجع تعبان يا عديمه النظر و الاحساس
مختار / استنى يا خليفه .. مالها بنتك يا ست الكل
خليفه / عشان حوار البيات و المدينه الجامعيه ده يا سي مختار و هى مش واخده على فراقها و كل اسبوع تقعد تعددلى كدا
مختار / هى طبعا صعبه فى اولها بس معلش كلو يهون عشان الشهاده الكبيره
الست / يا سيد الناس انا بنتى
خليفه / ما كفايا بقي ما تخلينيش اتغابى عليكي
مختار / اهدى يا خليفه الله
خليفه / ما خدش خلف غيرها ما حدش علم عياله غيرها … قسما بالله ان ما خدتى بعضك و رجعتى على البيت حالا
مختار / اهدى يا خليفه ما بتتحلش كدا الحاجات دى … بص روح انت النهرده و خليك جنب مراتك و عيالك
الست واقفه تعيط خليفه يهز راسه يشدها من ايدها و يمشوا و مختار متابعهم
مختار / لا اله الا الله ربنا يهدى
مختار يدخل جوه و يشاور لغفر قاعدين
مختار / اقفلوا البوابه
الغفر يقوموا يقفلوا البوابه و مختار يدخل جوه
…………………..
فى فيلا فيرا
فيرا بتتكلم فى التليفون
فيرا / لا لا خليه يكلمها طبعا و فيديو كول كمان و يطمن عليها … اه اوعى حد يضايقها او يبقي ناقصها اى حاجه
رشيد يدخل
فيرا / اى جديد كلمنى يلا سلام
فيرا تقفل و تبصله
رشيد / العمليه اتاجلت
فيرا / ايه الكلام ده
رشيد / شاهين الجارحى بين الحياه و الموت و البلد مقلوبه
فيرا / طب ما دا كويس
رشيد / ازاى يعني
فيرا / رشيد حبيبي الفوضي دى السيزون بتاعنا و لازم نستغله صح
رشيد / يا ستى فاهمك امال انا جايلك ليه … ناويه على ايه
فيرا / انا !!! ابدا … دى كلها حاجات قضاء و قدر انا ماليش اى دخل بيها
فيرا تيجي تمشي و هى بتضحك رشيد يشدها من ايدها ترمى نفسها فى حضنه يزقها
فيرا / الله !!! مالك كدا متردد و مش محدد موقفك
رشيد / ما تصيعيش عليا انا مش عيل من بتوعك
فيرا / لا عيل و لا من بتوعى و لا اقدر اصيع عليك
فيرا تحط ايديها بحنيه على كتاف رشيد يشد ايديها يبعدها
رشيد / ممكن نتكلم فى الشغل شويه
فيرا / اعرفلى المعاد الجديد مش مطلوب منك اكتر من كدا
رشيد / و البلد
فيرا / ما قولتلك سبها للقضاء و القدر انت مش مؤمن و لا ايه ؟ انت غريب اوى يا رشيد
فيرا تسيبه و تمشي ادواردو يدخل و يبص على رشيد و هو مبتسم
رشيد / وات ( ايه ؟)
ادواردو / نوثينج ( مفيش )
رشيد / انا بعمل ايه هنا ؟
رشيد يسيب المكان و يمشي
……………………………………
فى اوضه شاهين
شاهين نايم متوصل باجهزه حواليه و بناته و اخته و مراته حواليه بيقروا قران ام مغاورى تقفل المصحف و تطلع بره تنزل تلاقى الرجاله قاعدين مغاورى يشوفها يجرى عليها
مغاورى / خير ياما فى ايه
ام مغاورى / ابعت حد ينادى فى البلد كل اللى محتاج فلوس يجي و كل اللى محتاج يجوز بنته يجي و كل اللى ناقصه حاجه يجي و ما تردش حد الا و انت جابر خاطره و انوى صدقه عشان ربنا يشفى ابوك خلى الناس تدعيله
مغاورى يهز راسه و يمشي الست تبص لعباده يروحلها
عباده / اؤمريني يا امى
ام مغاورى / ما يؤمرش عليك ظالم يا ضنايا ما تاخذوناش اتلخمت عنكوا و انتوا فى بيتنا و ما ضيفناكوش ناديلى معلش حد من الغفر يعملولكوا شاى و لا اى حاجه انت مش غريب
عباده / شاى ايه و غفر ايه يا امى الحجه ام فاتن و امى و سماح فى المطبخ انتوا كمان لا كلتوا و لا شربتوا حاجه انتوا اللى ما تاخذوناش بس مغاورى اذن لسماح و هم دخلوا يساعدوها
ام مغاورى تبتسم و تطبطب على ايد عباده و تدخل المطبخ
انتصار / ايه الاخبار يا اختى طمنيني
ام مغاورى / على حطه ايدك
فاطمه / خير ان شاء الله حتى لو مش بيتحسن اهو على الاقل مش بيسوء
ام مغاورى / الحمد لله على كل حاجه
سماح / انا بقمر عيش و عملت شوربه عدس الدنيا برد
ام مغاورى / تعبناكى يا غاليه
فاطمه / ما تقوليش كدا قوليلى يا اختى اعملك حاجه و لا ناقصك حاجه ابعت اجيبهالك
ام مغاورى / تسلموا تاعبين روحكوا و دا واجب علينا احنا لا ضايفناكوا و لا
انتصار / انا عملت شاى للرجاله اللى بره و الكبير بعت يجيب فراخ مشويه من السوق اصل مش هنلاحق هنا و اكيد الكل جعان فقولنا على ما تيجي ندفى بطننا بشويه عدس ما تاخذيناش انتى دخلنا مطبخك كدا و كركبنالك الدنيا
سماح / انا هروقها ما تقلقيش
ام مغاورى / انتوا بتقولوا ايه دا انا اللى عيني منكوا بقت فى الأرض دا واجب عليا انا و بعدين دا بيتكوا برده
انتصار / اطلعى يا اختى ارتاحى و خليكي جنب راجلك و انا هخلص و اغرفلكوا و اجبلكوا لحد عندكوا
ام مغاورى / هبعتلكوا البنات يساعدوكوا
فاطمه / و لزمتها ايه الزحمه فى المطبخ احنا خلاص خلصنا اهو اطلعى انتى بس ارتاحى و ما تشيليش هم اى حاجه
ام مغاورى / ما اتحرمش منك ابدا
ام مغاورى تبتسم بكسره و تمشي
فاطمه / قلبي البت العدس للشعريه تلزق فى القعر
سماح / ما تخافيش صحيالها اهو
…………………..
فى فيلا فيرا
فيرا تنزل السلم و يفتحولها مكتب تلاقى خليفه واقف
فيرا / ايام امبريسد ريلى ( انا منبهره بجد )
خليفه / بنتى فين
فيرا/ بنت قصاد بنت بس انت بجد جاى لوحدك
خليفه / انا جايلك يا قاتل يا مقتول
فيرا/ اقتلنى و اقتل كل اللى فى الفيلا لو قدرت و اقلبها من فوق لتحت لو لقيت بنتك تبقي جدع
خليفه / هقتلك يا وليه كلو الا الحريم
فيرا / ما دام جاى لوحدك يبقي ما قولتش للى مشغلينك و ما دام ما قولتش يبقي متفقين على المبدا
خليفه / يا وليه بقولك كلو الا الحريم اطلبى اى حاجه تانيه مش هقدر والله ما هقدر
فيرا / خلاص مش لازم هشوف غيرك تقدر تمشي
خليفه / و البنت
فيرا / انهى بنت
خليفه / يا وليه هتغابى عليكي
فيرا / اه اه افتكرت … ما تقلقش هترجعلك بس ما اضمنش بقي بصراحه هترجع ازاى هى وصحتها هههههههههههههههه
خليفه يحاول يهجم على فيرا الرجاله يمسكوه
فيرا / فى ظروف تانيه كنت فتحت الكاميره و خليتهم يغتصبوها قدام عنيك
خليفه / هقتلك قسما بالله لاقتلك
فيرا / هخليك تسمع صريخها بودانك و عجزك عن انك تساعدها هيخليك تقعد فى الارض تعيط زى العيال الصغيرة هتبوس رجلى عشان اخليهم يوقفوا و هعمل مش سامعه و هستمتع بوجعك اكتر من وجع بنتك
خليفه / اطلبى اى حد تانى خديني مكانها ست هند ما بتخرجش لوحدها ابدا و ان خرجت بيامنوها اكتر من اى حد تانى البلد بتتقلب يوم ما بتطلع من السرايا مش هقدر
فيرا / مين يقدر يساعدنى اخرجها
خليفه / ما حدش ما بتخرجش غير تحت عنين سى مختار و باقى رجاله العيله بيبقوا محاوطينها من بعيد و ست ام عباده او ست ام فاتن معاها
فيرا / اختها الصغيره امها أخوها
خليفه / سي عبد الله بس اللى بيطلع من السرايا يروح الجامعه انما الباقي لا ما بيخرجوش و ان ست ياسمينا خرجت تلعب فى الجنينه ما بتبقاش لوحدها اكمنها صغيره كدا و خصوصا الفتره دى شتا و برد و طينه و لا مؤاخذه
فيرا / تمام تقدر تروح و تابع معايا بالتليفون
خليفه / يا ست اديني بنتى و بعدين نتكلم
فيرا / بنتك ضيفه عندى معززه مكرمه بتزاكر و تاكل و تتفرج على التليفزيون و عندها احسن اكل و بتتخدم احسن خدمه مش عوزاك تقلق عليها خالص طول ما انت شاطر و بتسمع الكلم بنتك بخير و دا وعد
خليفه يبصلها بانكسار
خليفه / حسبى الله و نعم الوكيل
فيرا / يلا يا خليفه على شغلك و بلاش تروح و تيجي عليا انت عارف انهم مراقبين الفيلا و لو حد شافك مش هيكون كويس معاك … تايك هيم اوت ( خدوه بره )
الرجاله تشد خليفه يصرخ و يقاوم
خليفه / طب خليني اكلمها اسمع صوتها حتى خليني اكلمها سبونى بقولكوا سبونى يا كفره سبونى
يشدوا خليفه بره و يقفلوا الباب فيرا تمسك الموبايل و تتصل بحد
……………..
فى شقه سمر
رشيد يفتح الباب و يدخل مفيش اى صوت يحط الاكياس اللى فى ايده فى الارض و يقلع الجاكت يرميه على كرسي و يدخل يفتح باب الاوضه المتوارب بالراحه يلاقي سمر نايمه يبص عليها و يروح يقعد بره و يحط ايده على خده و يفكر
/////////
رشيد / و اخرتها يا شيد و اخره اللى انت فيه ده ايه لا منك شايف حالك و لا منك عارف تساعد بحاجه و متعلق كدا زى خيبتها و الوليه عماله تدحلب على كل لون و ملاعيبها كتير و كلها من تحت مناخيرك و برده ما انتش شايفها مالك فيك ايه خبت و لا ايه … الكتره تغلب الشجاعه و انا لوحدى … بس هى معاها حق انت ما عدتش زى زمان … ايوه ما عدتش زى زمان عشان زمان كنت بقف مع اللى شايفه صح انما دلوقت انا واقف معوج لا منى مع الصح و لا منى مع الغلط و لا عارف اساعدت الجماعه و لا قادر اشوفهم بيتاذوا … يعني هتفضل كدا لحد امتى الوليه دى مش هتديك الواد و انت عارف و انت مش هتقدر تديها حد من الجماعه دول اخواتك حتى لو بينك و بينهم مصانع الحداد بس بتحبهم … و لا البت اليتيمه اللى علقتها فى رقبتك دى خدتها من نقره رميتها فى ضحضيره و مش باين لمستقبلها ملامحك … مش ده اللى انت وعدتها بيه و لا حتى اللى انت حلمت بيه … بس بس بس مالك كدا بتنخ و تعدد زى الحريم ما تنشف ياض دا انت رشيد مش حد تانى انت يعني عيشتك كانت ازاى مهى طول عمرها كدا
رشيد يقوم يقف على باب الاوضه يبص على سمر و هى بتتقلب و نايمه يبتسم
رشيد / ايوه حياتى طول عمرها ضايعه على ما فيش و ما فيهاش اللى اعيش عشانه انما دلوقت عندى
////////////////////
رشيد يدخل ينام جنبها تتفزع
رشيد / انا انا اهدى
سمر / حرام عليك يا رشيد مش هتبطل حركاتك دى بقي
رشيد يحط راسه فى حضنها تستغرب و تحضنه و تلعب فى شعره
سمر / شكلك تعبان مش هسالك فى اى حاجه نام دلوقت و ارتاح
رشيد / مش عاوز اكون متشائم بس هى عمرها ما هتديني الولد
سمر / عارفه
رشيد يرفع عينه و يبصلها
سمر / عمرها ما هتريحنا عمرها ما هتسيبنا فى حالنا هى قالتها هى بتستمتع بوجع الناس
رشيد / الست دى وراها حاجه اكبر من كدا بكتير انا متاكد انا اتعاملت مع مافيا كتير دايما ليهم حدود لممالكهم بيحاربوا عشان يحافظوا عليها انما دى سابت الدنيا و جايه ترسم خريطه جديده هنا و تصرف فلوس ما لهاش اول من اخر
سمر / قصدك حد بيمولها
رشيد / سمعتها بره معروفه بس اللى بتحاول تعمله فى مصر مختلف
سمر / مش فاهمه
رشيد / و لا انا و كل ما اقول قربت افهم تفاجئنى بحاجه جديده قاعده فى مكانها و بتلعب بالدنيا حواليها كانها عرايس مريونيت و من غير حتى ما تحرك صوابعها
سمر / تعال نمشي
رشيد / ازاى
سمر / انت مش قولت مش هتديك الواد يبقي خلاص ما لوش لزمه تعرض حياتك للخطر
رشيد / هتقتلهم حطاهم فى دماغها و هتقتلهم
سمر / انت مش قولت انهم مش بيحبوك
رشيد / عدو بيتقى ربنا و لا صديق ما يعرفوش
سمر / يعني هتعمل ايه هتروح تساعدهم
رشيد يبتسم و ينام على ضهره و يبص للسقف
رشيد / لا هقدم و لا اخر لو على الرجاله حتى حريمهم رجاله و لو على الامكانيات عندهم احدثها و بيعرفوا يستخدموها
سمر / يبقي نمشي
رشيد/ هنروح فين
سمر / ارض الله واسعه
رشيد / و البلد دى ائمن مكان على وش الارض
سمر / ازاى بس
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
