رواية البر التاني الفصل السابع عشر 17 بقلم لولو محمد
رواية البر التاني الجزء السابع عشر
رواية البر التاني البارت السابع عشر
رواية البر التاني الحلقة السابعة عشر
محمود / اشترى منى للاخر و بعدين ردى
هند تهز راسها
محمود / انتى ما بتحبيش يوسف و مش عاوزه تتجوزيه حقك و احنا مش هنجبرك عليه بس يا بنتى ما تروحيش ترمى نفسك فى التهلكه و اى جوازه و السلام
هند / ممكن ارد دلوقت
محمود / العيله كلها مش موافقه على مختار اى عريس تانى هنبقي فى ضهرك و نجهزك و نسلمك لباب بيتك كمان
هند / مش مهم انا عاوزه مين يعني المهم العيله عاوزه مين
محمود / احنا اكبر منك و نفهم فى الحاجات دى عندك
هند / بابا الله يرحمه كان بيحبه و موافق عليه
محمود / قولتلك بسبب المشاكل كل واحد كان بيعند
هند / هيعند على حساب مصلحتى يعني
محمود / يا هند افهمى هتروحى هناك بلد فى اخر بلاد المسلمين و تعيشي فى الارياف و بيت عيله و تكنسي و تمسحي و تنضفى ورا البهايم … ليه يا بنتي ما دام ممكن تاخدى اللى يستتك و يسكنك جنب امك
هند / مختار اشترى الشقه اللى جنبنا و هنبقي نيجي نقعد فيها و ما افتكرش ان فى اقرب من كدا دا الفرق حيطه طوبه
محمود / و هو بقي فهمك انه هيجيبك كل قد ايه
هند / وقت ما ماما توحشني
محمود / و انتى صدقتي
هند / عمره ما كدب عليا
محمود / انتى تعرفيه من قد ايه
هند / حضرتك كارهه ليه عمل ايه
محمود / كام مره اجر بلطجيه دا خطف عمامك و عيالهم و اجواز بناتهم و خطف ابن عمك قبل كدا
هند / رد فعل على تصرفاتكوا و لا حضرتك نسيت اللى يوسف عمله
محمود / ما تغيريش الموضوع و تحطى يوسف فى النص
هند / الله
محمود / انا عند كلمتى اى واحد غير مختار انا و العيله كلها هنبقي معاكى
هند / تمام هسيب مختار و اجيب واحد تانى اضمن منين ان حضرتك هتوفى بوعدك
محمود / اتكلمى عدل يا هند
هند / ما حضرتك رفضت مختار اللى ما فيهوش غلطه اضمن منين بقي ان حضرتك هتوافق على غيره
محمود / بقي ده ما فيهوش غلطه دا كله على بعضه غلط
هند / ماشي يا عمى هاتلى عيب فى مختار يخليني اسيبه و انا هسيبه بس اى كلام مرسل كدا مش هاخد بيه اعذرنى
محمود / هو فى حاجه حصلت بينك و بين الواد ده
هند تقوم تقف بانفعال
هند / عمو محمود انا ما اسمحلكش
محمود / احنا اهلك يا هند
هند / هو حضرتك خليت فيها اهل بكلامك ده مش لاقي فى مختار عيب هتوسخنى انا امال لو ما كنتوش اهلى بقي
هند تعيط
محمود / انا بطمن عليك يا هند
هند / ما تطمنش انا تعبت منكوا و من تدخلكوا فى حياتي انا مش عاوزاكوا فى حياتى
الباب يتفتح و شريهان تدخل و معاها ياسمينا هند تجرى على اوضتها و شيري بتبص لمحمود بعدم فهم
شيري / هو فى ايه بالظبط
محمود / كنت بتكلم مع هند
شيري / بصفتك ايه انتوا لسه ليكوا عين تيجوا لحد هنا
محمود / انا لولا انى مقدر حالتك الصحيه
شيري / انتوا ما بتقدروش حاجه خالص ما بتحسوش و لا فى عندكوا دم
محمود / اتكلمى عدل يا شريهان بدل قسما بالله
شيري / اطلع بره بيتي
محمود / انا كدا كدا ماشي
محمود يمشي و يرزع الباب وراه شيري تروح تفتح باب اوضه هند بتعيط اول ما تشوف مامتها تمسح دموعها
شيري / ايه اللى خلاكى تفتحيله و انتى لوحدك
هند / ما عملش حاجه يا ماما خلاص
شيري / و احنا هنستناه لما يعمل احنا ما عدش لينا علاقه بالناس دول لا نكلمهم و لا لينا دعوه بيهم انتى فاهمه
هند تهز راسها شيري تبصلها بحزن و تروح تحضنها
شيري / قالك ايه الحيوان ده زعلك كدا
هند تبص لمامتها و تعيط شيري تاخدها فى حضنها و تطبطب عليها
……………………
فى السرايا
فى اوضه مختار
مختار لابس سديرى مضاد للرصاص و بيلبس فوقيه القميص و بيزرره و عباده واقف جنبه و بيشيك على السلاح
عباده / اسمع الكلام و ما تروحش يا مختار الليله دى كبيره عليك
مختار / قطمه احسن من نحته و البت دى مش هبله لو ما شافتنيش مش هتقرب و كل تعبنا هيضيع
عباده / بس مرواحك خطر عليك يا ابن عمى فكر فى هند
مختار / و عشان بفكر فى هند هروح عشان بفكر فى كل الناس اللى هتتاذى طول ما الست دى بتنخور فى البلد هروح
عباده / فوق يا ابن عمى الحكومه لازم هى اللى تتحرك و تفتح عنيها مش تحطك فى وش المدفع عشان ظابط ياخد ترقيه و دبوره
مختار / مهى لازم تتمسك متلبسه يا بنيأدم
عباده / احنا كدا بنفتح على نفسنا فتوحه لما العمليه تتم و تنجح و الجرايد تتكلم تقدر تقولى هتقول ايه لهند و اهلها ساعتها
مختار / هقولها الحقيقه و الخبر هيكون واضح و هتفهم
عباده / و لو جرالك حاجه
مختار يبص لعباده
عباده / انا و انت عشنا عمرنا كله نتنافس و هنفضل نتنافس بس لو كان مرواحك خير يا ابن عمى كنت سابقتك عليه مش منعتك عنه
مختار يبص فى الارض و يبص لعباده
عباده / تفتكر لما هبقي الكبير هبقي مبسوط اكتر و لا منافستي معاك على مين هيبقي الكبير ممتعه اكتر
مختار / ههههههههههههههههه يديله طوله العمر و يفضل الكبير علاطول
عباده / امين … ما تروحش
مختار / انا خلاص لبست و نازل
عباده / اجى معاك
مختار / حتى دى هتنافسنى فيها
عباده يبتسم و يبص الناحيه التانيه
مختار / ما تخافش هنسحبها زى الشعره من العجين
تليفون مختار يرن يبص فيه فيرا مختار يورى عباده و يرد
مختار / لسه بدرى على معادنا
فيرا / العمليه اتلغت فى جاسوس فى بيتك بينقل اخبارنا للحكومه
مختار يبص لعباده و عنيه توسع
مختار / ايه الكلام ده
فيرا / المره اللى فاتت كمان حد كان مبلغ و المرادى كمان حد بلغ
مختار / انتى متاكده من الكلام ده
فيرا / انت فاكرنى بلعب يا مختار فاكر انى وصلت للى انا فيه ده بالحظ انا ليا رجاله فى كل حته دور على الخاين اللى وسطيكوا و لو ما عرفتش تلاقيه قولى و انا اجيبهولك سلام
فيرا تقفل و مختار يحدف الموبايل فى الارض الشاشه تتكسر و يصرخ و عباده مصدوم و مش فاهم حاجه
مختار / يا بنت الكااااالب
مختار يقعد على اقرب كرسي
عباده / فى ايه يا مختار فهمنى
مختار / بنت الكلب ليها عيون فى الحكومه عرفت ان فى كمين و لغت العمليه
عباده / لعله خير ما كنتش مرتاح اصلا
الباب يخبط و ناصر يدخل
ناصر / فى ايه يا مختار
مختار / العمليه اتكشفت و لغتها
ناصر / هههههههههههههههههه دى طلعت هبله
مختار / انا بغلى و انت بتضحك انا قولت خلاص هنخلص منها
ناصر / مستعجل على ايه كلو باوانه المهم ان عرفنا ان ليها عيون فى الداخليه دلوقت بقي دورهم يدوروا على الخاين اللى وسطيهم
مختار / مهى كمان عرفت ان فى حد مننا بلغ
ناصر / حد واحد بس
مختار و عباده يضحكوا
عباده / ما دام كدا بقي اروح انام
مختار يشيل الموبايل من الارض و يبص على الشاشه
ناصر / تصبح على خير
مختار / و انتوا من اهله
عباده و ناصر يطلعوا بره و يقفلوا الباب و مختار يغير هدومه
……………………..
فى اوضه شاكر
فاطمه و شاكر نايمين فى السرير و بيتكلموا
فاطمه / بس انا عقلي برده مش راضي يفهم اشمعن مختار اللى الوليه دى مصره عليه اوى كدا
شاكر / الله مش مختار اللى كشف حوار السلاح البلاستيك و هو اللى وقع رجالتها و لا نسيتي
فاطمه / لا ما نسيتش بس عباده ياما عمل و لو هنعدله مش هنخلص و ان كان على حوار السلاح اللعبه مختار كان لاهى عباده و عمال يتنطت زى فرقع لوز عشان يكسب بونطايه على قفاه
شاكر / عباده راجل ابن راجل
فاطمه / اكيد
شاكر / و ربنا بيحبه انه مش مكان مختار
فاطمه / انت بتقول فيها انا من الاول ما كنتش موافقه على حوار دراسته فى مصر ده تعرف لو كانت الوليه دى لقت سكه مع عباده ما كانتش راحت لمختار انما هى عارفه و متاكده ان عباده ملوش دراع يتلوى
شاكر / ما تنامى شويه يا فاطمه
فاطمه / ما انا هنام بس قولت اتكلم معاك شويه ما انت عارف انى ما ليش غيرك اخد و ادى معاه براحتى
شاكر يبتسم و يبوس راسها وينام و يديها ضهره تبصله بحزن
فاطمه / بقولك ايه يا حج
شاكر يبصلها
فاطمه / ما تيجي انا و انت لو فاضي يعني نسافرلنا كام يوم فى اى حته نجدد بيه شبابنا و كدا يعني بعيد عن العيال و قرفهم
شاكر / ههههههههههههههه والله انتى فايفه و رايقه
فاطمه / و هى اللى تتجوزك ما تروقش ليه
شاكر/ عاوزه تسافرى فين يعني يا فاطمه
فاطمه / يا اخويا اى حته معاك جنه شوف انت
شاكر / ماشي يا فاطمه
فاطمه تبتسم شاكر يلف و ينام و فاطمه تنام على ضهرها و تفكر
……………………
على السلم فى بيت هند تانى يوم
هند نازله شايله شنطه التمرين تقابل مختار تتفاجئ و يبتسموا لبعض
هند / انت جيت !!
مختار / لا لسه جاى فى الطريق
هند / بطل بقي انت كل مره تعملها فيها
مختار / على فين كدا
هند / رايحه الجيم
مختار / اممممم لا حلو النشاط بس حاسس ان علاقتك بدينا اتحسنت يعني منعتينا نروح و بتروحى انتى
هند /بقولك ايه ما دام جيت بقي ما تيجي توصلنى بدل ما اقف اتحايل على التكسيات
مختار / هههههههههههه ما قولت لسه ما جيتش
هند تبوز
مختار / ايه ده انا جيت يلا لحسن تتاخرى
هند تبتسم و ينزلوا يركبوا العربيه
مختار / امال يعني ما جابوتيش على سؤالى
هند / بخصوص ايه
مختار / مرواحك التمرين انتى مش قولتى مش هتروحى تانى دلوقت ما شاء الله كل يوم اهو
هند / الظروف اختلفت
مختار / مش فاهم
هند / الله يرحمه … بيقولك الواحد ما يعرفش قيمه الحاجه الا لما تروح منه … بس انا والله كنت حاسه بقيمته
مختار / برده مش فاهم ايه علاقه التمرين بوالدك الله يرحمه هند انتى خايفه من حاجه ؟ فى حاجه حصلت امبارح و انا مسافر ؟
هند / مش حاجه مهمه عمو محمود جه اتكلم معايا شويه و مشي
مختار / قالك ايه خوفك اوى كدا … هند ما فيش حد فيهم له كلمه عليكي و لا يقدر يقربلك
هند / عارفه ربنا يخليك ليا و صدقني عموا ما قالش حاجه
مختار يبص لهند تبص من الشباك و تبعد بعنيها عنه
مختار / على العموم الرياضه مش وحشه هو انا قولتلك الرياضه بتخلى الجسم يفرز هرمونات ايه
هند / هستاذنك ناجل حصه الاحياء دى للمرواح عشان وصلنا
مختار يركن العربيه هند تنزل
مختار / هروح اغير هومى و ارجعلك
هند تهز راسها و هى مبتسمه تشاورله باى و تمشي تدخل جوه و مختار متابعها و بعدين يمشي
………………….
فى محل محمود
حمدى / والله فيك الخير يا محمود طول عمرك ابن اصول
محمود / بس انت اللى هتوديهالهم و تحاسبهم انا مش داخل البيت دا تانى
حمدى / لا اله الا الله ليه بس
محمود / يا عم روحت اشقر عليهم و اشوف ان كانوا محتاجين حاجه طردونى
حامد / دا بعد اللى حصل يوم العزا
محمود / دا لسه امبارح
حامد / و لسه عاوز تبعتلهم فلوس
حمدى / دا حقهم يا حامد فى ورث ابوهم
حامد / ما تاخذنيش بقي يا حمدى هم ما لهمش عندنا اى حق محمد و فض الشراكه و اخد فلوسه فى حياته
حمدى / دا على الورق بس
حامد / على الورق و غيره الناس دى مش عاملين احترام لا لكبير و لا صغير اقوم اروح انا اديهم فلوس تقوى قلبهم عليا
حمدى / لحمك يا جدع انت ايه قسوه القلب اللى فيك دى
حامد / يا عم و هم يعني فى الشارع ما ليهم معاش محمد و الدكان بتاع البقاله دا غير عريس الهنا
محمود / دا حق ربنا خد الفلوس و الدفاتر و روح حاسبهم يا حمدى
حامد / براحتكوا انا ماشي
حمدى / على فين
حامد / ورايا كام مشوار كدا هخلصهم فى السريع سلام
حامد يمشي
حمدى / عمره ما هيتغير
محمود / انا كمان تعبان مش قادر اقعد هروح ارتاح شويه هتعوز منى حاجه
حمدى / سلامتك يا خويا مالك بس
محمود / مخنوق و مش طايق الدنيا اخوك قطع بيا اوى يا حمدى
حمدى / قطع بينا كلنا و الله
محمود / انا قايم سلام
محمود يمشي و حمدى متابعه لحد ما يختفي يفتح الدفاتر و يبص فيها
……………………..
فى السرايا
عصام قاعد و العيال حواليه بيزاكروا مريم تدخل
عصام / امال سماح فين
مريم / تعبانه خالص و مش قادره تنزل
عصام يتاثر و يحاول يدارى
عصام / تمام وريني الواجب اما اصححهولك
مريم تديله الكشكول يقعد يعلمه و يبص لمريم
عصام / هى كشفت كانت تعبانه اوى الحصه اللى فاتت برده
مريم / لا ما كشفتش اصل المره اللى فاتت كان داخل عليها برد فخدت مضاد حيوى تقيل و ما كانتش فطرت فهبطت لكن المرادى شكلها برد فى معدتها عماله ترجع و ما بتخرجش من الحمام
عصام / ما دى برده مش حاجات يتسكت عليها
مريم / اكيد لو استمرت هيجيبولها دكتور اكيد مش هيسيبوها يعني
عصام يهز راسه و يكمل تصحيح
………………………
فى الجيم
هند فى الحمام بتظبط الطرحه و تلم حاجتها و تطلع تلاقي مختار مستنيها يبتسموا لبعض و يمشوا سوا
مختار / عاش يا وحش
هند تبصله و تبتسم و تكمل مشى فى صمت
مختار / هو انتى زعلانه منى فى حاجه
هند تبصله باستغراب
هند / ابدا ايه اوحالك بده
مختار / كلامنا قل جدا الفتره دى و بتصل بيكي مش بتردى و حتى لما بنبقي مع بعض بحس انك مش موجوده فى ايه يا هند قوليلى لو عملت حاجه قوليلي
هند / ابدا والله يا مختار انت ما عملتش اى حاجه
مختار / امال ايه بقي
هند / انا تعبانه الفتره دى
مختار / اكيد وفاه والدك مش حاجه سهله بس احنا هنا عشان نساعدك تعديها مش هتقدرى لوحدك
هند / مش هقدر خالص
مختار يفتح لهند باب العربيه تركب يروح يركب يلاقيها بتمسح دموعها
مختار / انا اسف
هند / على ايه بس … تعرف انا اول مره افهم يعني ايه الحياه ما بتقفش على حد
مختار / لا بتقف
هند / لا يا مختار ما بتقفش بابا اتوفى و ما فيش حاجه وقفت مفيش حد اتاثر حتى ما حدش ادانى فرصه ازعل
مختار / فاهمك
هند / لازم اكون قويه و ادارى حزنى عشان ماما و ياسو لازم اكون عادى عشان عبد الله لكن لما النور بينطفى و الكل بينام ساعتها بس بحس انى حره بعيط بزعل بس اول ما ياسو بتتقلب او بحس بحركه بعمل نفسي نايمه
مختار / فاهمك
هند / عارفه
هند تتنهد و تبتسم
مختار / مش عارف كلامى ده ينفع اقوله دلوقت و لا لا بس حزنك على ابوكى عمره ما هيقل انا ياللى ما اوعاش علي ابويا بزعل عليه و ساعات كتير بسال نفسي لو كان عايش يمكن حياتي كانت اتغيرت … مش عارف كانت هتتغير ازاى و لا هتتغير للاحسن و لا الاوحش … بس اهو احاسيس
هند / بالظبط
مختار / تعرفى انا بتغلب على الاحاسيس الوحشه دى ازاى
هند / بتشغل نفسك
مختار / مش بس كدا بفتكر قد ايه كانوا بيحبونى و قد ايه كانوا بيتعبوا عشان يسعدونى هم مش عاوزينا نحزن و لا يرضولنا الحزن زعلنا بيزعلهم بدعيلهم هو ده اللى هيفرحهم
هند / بحب اتكلم معاك اوى
مختار/ يبقي اتكلمى
هند / اقول ايه
مختار / اى حاجه نبدء مثلا بايه اللى مخوفك
هند / مش خايفه
مختار / تمام
مختار يسوق و هند تبص من الشباك
……………………
فى شقه هند
حمدى / و دى الفواتير راجعيها و شوفى مظبوط و لا لا
شيري تبص للورق و تبص لحمدى
حمدى / الفلوس فى الظرف عديها و ان شاء الله كل شهر هجبلك نصيبكوا بالفواتير لحد هنا
شيري تهز راسها
حمدى / احنا مش وحشين زى ما بتقنعى عيالك
شيري / عيالي مش صغيرين عشان اى حد يسيطر عليهم و يلعب فى دماغهم عيالي كبار و شايفين و فاهمين
حمدى / انا مش هجادلك بس بكره الايام تثبتلك ان كل الكلام اللى قولتوهولنا غلط
الباب يتفتح و عبد الله يدخل يشوف عمه
عبد الله / خير
شيرى / عمو حمدى جايب نصيبكوا فى ايردات المحل الشهر ده
عبد الله / لا والله و يا ترى حنيه القلب دى وراها ايه بقى
شيرى / عيب يا عبد الله
عبد الله / انا داخل ازاكر
عبد الله يدخل الاوضه و يرزع الباب
حمدى / انا ماشى
شيرى توصل حمدى للباب يمشى تقفل الباب وراه عبد الله يفتح الباب
عبد الله / ممكن افهم بقى ايه اللى حضرتك بتعمليه ده
شيرى / بعمل ايه
عبد الله / حضرتك ازاى تفتحيله الباب اصلا
شيرى / دا عمك و بعدين
عبد الله / حضرتك لوحدك فى البيت ما يصحش
شيرى / انا
عبد الله / حضرتك مش صغيره و مش انا اللى هعلم حضرتك الصح و الغلط بس الناس دول ولاد حرام ما ينفعش نتعامل معاهم بحسن نيه بس طبعا حضرتك ادرى بالصح منى
عبد الله يدخل اوضته و يقفل الباب و شيرى متبعاه و الحزن مالى وشها
……………………………
قدام العماره
مختار بيركن العربيه و ينزل هو و هند حمدى خارج من العماره يبصوا لبعض
حمدى / ايه ده انتى كنتى بره !!! دا انا كنت فاكرك نايمه
هند / كنت فى الجيم
حمدى / جيم !!! ابوكى لسه ما بردش فى تربته و انتى خارجه مع الباشا و رايحين الجيم
هند / و ايه المشكله انا مش فاهمه
حمدى يبص لمختار
حمدى / و انت يا استاذ مختار كمان ما بتفهمش فى الاصول طب دا انا اعرف ان فى الصعيد لما بيكون عندكوا ميت بتغطوا التليفزيون و تمنعوا حتى المحشى و الفواكه من البيوت و انت واخدها ورايح الجيم صحيح ما هو الميت مش من عندكوا
مختار / مش كل الصعيد لسه متخلفين يا عمى
حمدى / قصدك انى متخلف يا
مختار / استغفر الله انا ما قولتش كدا انا بتكلم عن اللى بيعملوا كدا و حضرتك اكيد مش منهم
حمدى / اطلعى على فوق يا هند ليا كلمتين مع الاستاذ
هند تبص لمختار
مختار / اسبقيني يا هند انا هحصلك
هند تبص لعمها و تبص لمختار تانى و تطلع لفوق و حمدى و مختار متابعينها
مختار / بقينا لوحدنا يا عمو
حمدى / اسمع يا ابنى ارتباطك بهند غلط هتفتح على نفسك و علينا مشاكل احنا كلنا فى غنا عنها
مختار / ممكن اعرف نوع المشاكل دى
حمدى / اختلاف الثقافات لا هند هتقدر تتحمل جياه الصعيد و لا اهلك هيسيبوك تيجي تعيش بيها وسطينا
مختار / بيتهيالى القرارات دى انا و هند اللى ناخدها لاننا احنا اللى هنتحمل نتايجها و لا ايه يا عمى
حمدى / يا ابنى انا بكلمك كاب كل واحد فى الدنيا عاوز يجوز بنته جنبه مش فى اخر بلاد المسلمين
مختار / الدنيا اتغيرت و الطريق ما عدش صعب زى زمان و انا و هى صغيرين و اكيد هنحتاج كل فتره نغير جو و الشقه فوق ملك هنيجي نقعد فيها من وقت للتانى
حمدى / و لما تحصل مشاكل البنت تبقى هناك لوحديها احنا من حقنا نطمن عليها نزورها نعرف هى مبسوطه و لا لا
مختار / تنورونا عربيه من باب بيتكوا لباب السرايا و عندنا المضيفه كبيره و مكيفه و تساعى من الحبايب الف و صدقنى يا عمى احنا كرما اوى و بنعرف نكرم الضيف كويس ما بالك بقى لما يبقوا اهل
حمدى / اسمع يا ابنى يا تنقل محل اقامتك هنا فى مصر و تعيش انت و هى فى الشقه اللى فوق يا مفيش جواز و دا اخر كلام عندى
مختار / بص يا عمى انا ممكن اقولك موافق و اتجوزها و ادخل عليها و نقضى شهر العسل هنا و هوب اخدها و نرجع الصعيد
حمدى / تضحك علينا يعنى
مختار / استغفر الله انا اقصد انى مش ناوى اقولك كلام يريحك و خلاص انا و هند هنعيش فى المكان اللى يريحنى انا و هند مش لا مؤاخذه يعنى يريح حضرتك بس و بعدين والدتها موافقه و اخوها موافق و ابوها الله يرحمه و يحسن اليه كان موافق انا مش فاهم ايه اللى اتغير
حمدى / اللى اتغير انها دلوقت بقت مسؤله مننا احنا
مختار / هند مش قاصر
حمدى / يعنى هتتجوزها غصب عن اهلها يعنى
مختار / استغفر الله اهلها موافقين
حمدى / و احنا بنقولك مش موافقين
مختار / انا ما شوفتش حضرتك فى ولا اتفاق و لا فى خطوبه و لا فى شرا الشبكه انا ما شوفتش حضرتك غير فى المستشفيات و بس
حمدى / انت ولد قليل الادب و اوعى تنسى اننا هننسى كل تصرفاتك الواطيه اللى عملتها معانا انا كنت بحاول اتكلم معاك بالادب بس قسما بالله
مختار / اتا كمان كنت بتكلم معاك بالادب و كمان لا انا و لا اهلى هننسا اللى عمله معايا ابن اخوك و بعدين ما تاخذنيش يعنى انا مش فاهم هو حضرتك مصلحتك ايه ان الجوازه ما تمش كدا كدا هند عمرها ما هتبقى ليوسف و حتى لو بقتله حضرتك مش هتستفيد حاجه يبقى بتقف قدام سعاده هند ليه عملتلك ايه مش خايف يتردلك فى بنتك
حمدى / ما تقولش كلام انت مش فاهمه هند دى زى عيالى بالظبط و لو ما كنتش خايف على مصلحتها ما كنتش اتكلمت
مختار / و انا مش هسيب هند و دا اخر كلام عندى
حمدى / و الكلام خلص عندى انا كمان
حمدى يمشى و هو متعصب مختار يطلع فوق يلاقى هند واقفه على السلم
هند / كل ده
مختار / انتى ما دخلتيش ليه
هند / قلقت عليك دا انا كنت هنزل اناديك
مختار يبتسم
هند / كان بيقولك سبنى صح
مختار / انا عمرى ما هسيبك
هند / فهمت بقى انا ليه كنت بقولك ان الخطوبه دى حاجه رخمه اوى لانها ممكن تتفك
مختار / مش بمزاجهم
هند تعيط
هند / مش هيسكتوا مش هيسمحولنا نبقى مع بعض عرفت ليه بقى بتمرن عرفت ليه عاوزه ابقى قويه عرفت بقى خايفه من ايه
مختار / انا جنبك و مش هسيبك
هند / مش حقيقى انت مش جنبى لسه فى بينا حواجز لسه بعاد لسه بتسافر و تسيبنى انا لسه لوحدى
مختار يتنهد
مختار / تعالى نطلع البلكونه عاوز اوريكى حاجه
هند تمسح دموعها
هند / حاجه ايه
مختار / حاجه يمكن تريح قلبك شويه تعالى
مختار يضرب الجرس شيرى تفتح الباب مختار يبتسم
مختار / مساء الخير يا امى
شيرى تشوف هند تبص لمختار مفزوعه
شيري / مالك يا هند انتوا اتخانقتوا و لا ايه
مختار / و انا اقدر ازعلها برده
هند / انا قابلت عموا حمدى تحت
شيرى / حسبى الله و نعم الوكيل فيهم محمود امبارح و النهرده حمدى …. عبد الله جوه تمام ؟؟
هند تمسح دموعها
مختار / هنستاذنك نقف فى البلكونه شويه هند تشم هوا على ما تعمليلنا كبايتين شاى
شيرى / من عنيا يا حبيبى اتفضلوا ادخلوا
مختار يدخل هو و هند و يروحوا البلكونه
هند / هتوريني ايه
مختار يشاور على بلكونه فى اول الشارع
مختار / شايفه دى
مختار يشاور على بلكونه فى البيت اللى قدامه و واحده تالته فى اخر الشارع
مختار / و دى و دى انا ما سكنتش فى الشقه دى بالصدفه اه انى ابقى جارك صدفه و انى ابقى معاكى فى نفس الكليه و نفس الدفعه دا نصيب عشان نعرف بعض و نحب بعض و نتجوز بس انى اسكن هنا ما كانش صدفه دا الشارع الوحيد اللى لقينا فيه اربع شقق فى التوزيعه دى
هند/ مش فاهمه
مختار / مهو اهلى مش هيبعتونى مصر لوحدى يعنى من غير حراسه
هند تبص على البلكونات و تبص لمختار
مختار / انتى مش لوحدك انا لو عاوز امنع عمامك يخطوا الشارع همنعهم حتى و انا مسافر دول موجودين بيحموكى انتى و عبد الله و امى و ياسو طبعا
هند / انا ازاى ما اخدتش بالى
مختار / من بكره هخلى اتنين منهم يشتغلوا مع خالتى فى الدكان يشيلوا عنها حاجه يوصلولها حاجه يجيبولها حاجه و بالمره ياخدوا بالهم منها هى و ياسمينا عشان تبقى مطمنه عليهم اكتر و انا كمان ابقى مطمن مع انى متاكد انكوا مش هتحتاجوا اى نوع من انواع الحمايه بس انا مش عاوزك خايفه و لو عوزانى مسافرش البلد تانى لحد ما نكتب الكتاب و تبقى رجلك على رجلى انا مش هخطى البلد تانى و لو عوزانى افرش و انام على باب اوضتك هفرش و انام فى الارض
هند تبتسم و تبص فى الارض
مختار / تعرفى انى اول ما خلصت اللى فى ايدي فى البلد جيت جرى ما قدرتش ابعد عنك يا بت الايه
هند تبتسم اوى
مختار / الا حتى ما جبت معايا رغيف عيش البركه فيكي بقى تاكليني من ايديكى الحلوه و لا انتى ناويه تجوعيني و لا ايه
هند / عنيا ليك
مختار / تسلملى عنيكي يا ست الكل
هند / بس واضح ان المسلسل التركى عامل معاك شغل بتتكلم حلو اهو
مختار / بلا تركى بلا نيله دا صعيدى اصلى
هند / هههههههههههههههههههههههههه اجدع ناس
شيرى تدخل بالشاى تلاقى هند بتضحك تبتسم
شيرى / الشاى
هند / لا شاى ايه انا هدخل احضرلنا لقمتين على السريع على ما تاخد دوش كدا و تجيب كتبك نزاكر سوا
مختار / و ماله
هند تبتسم و تدخل جوه
شيرى / ربنا يهدى سرك يا بنتى
………………………………………..
فى شقه يوسف
اسراء / و الله انا قولت ما حدش سمع كلامى عمالين تطاطوا تطاطوا لما افتكركوا
محمود / الشاى يا اسراء
اسراء / اتوزعت
اسراء تدخل المطبخ
حمدى / الواد واثق من نفسه اوى و منفوخ على الاخر
محمود / طبيعي مش الست هانم مدياله الامان و مفهماه اننا ما لناش كلمه عليها
حمدى / بقولك ايه يا محمود ما تيجي نسمع كلام حامد و نسيبها تشرب يمكن ساعتها تفوق لروحها و تعرف ان الله حق
محمود / على جثتى شوف على جثتى
حمدى / ما فيش فايده من كل اللى بنعمله الواد مش عيل ورور و مسنود بفلوسه و اهله احنا جربنا معاه بكل الطرق
محمود / برده العيب مش عليه العيب على اللى مشجعينه
حمدى / و دى نقطه تانيه هند مش ناويه ترتجع و لا هى و لا امها و لا اخوها دا الواد عبد الله لما دخل و شافني كان ركبته مليون عفريت
اسراء / و حلها عندى بس اللى يطاوعنى
اسراء تقعد و تبصلهم
…………………………..
فى شقه هند
هند تقفل الكتاب مختار يبصلها
هند / انا تعبت و مش عارفه اركز خالص بجد
مختار / خلاص كفايا احنا الحمد لله انجزنا
مختار يقوم يقف هند تقف بسرعه
هند / انت رايح فين
مختار يبص فى الساعه
مختار / هروح
هند / خليك معايا شويه
مختار / انتى تعبانه و عندك كليه الصبح و ما ينفعش نسهر مامتك اكتر من كدا
هند / عبد الله كدا كدا بيسهر يزاكر خليك شويه عشان خاطرى
مختار / نعوضها بكره
هند / هتروح تنام يعني
مختار يبتسم
مختار / يعني بيتهيالي موبايلي مشحون ممكن يعني
هند تبتسم و تتكلم بحماسه
هند / هكلمك
مختار يهز راسه عبد الله يفتح الباب و يطلع
عبد الله / ايه ده واقفين كدا ليه
مختار / هروح
عبد الله / دا انا كنت طالع اقول لدودو تعملنا لقمه ناكلها
هند / حالا اعملكوا
مختار / استني يا بنتي احنا مش اتعشينا
عبد الله / نتعشي تانى احنا بنشقي
مختار / كدا تكرش و دينا تزعل
عبد الله / كدا نقضيها ذبادى بلمون بقي
مختار / ههههههههههههههههه تصبحوا على خير
هند / و انت من اهله
هند توصل مختار و تقفل وراه
عبد الله / عمك جابلنا فلوس قال ايه نصيبنا فى الايرادات و ماما اخدتهم بجد مش عارف اقول ايه
هند / ما لناش دعوه يا عبد الله سيب ماما تمشي الدنيا زى ما هى شايفه حاول ما تزعلهاش
عبد الله / هو احنا ليه ما لناش عيله زى عيله مختار كدا
هند / النصيب عن اذنك بقي عشان ادخل انام
عبد الله يبتسم باستهزاء
عبد الله / تنامى برده
هند / ادخل زاكر يا عبد الله
هند تسيب عبد الله و تدخل اوضتها تلاقي شيري بتقوم من السرير و تشاورلها هششش و يتوشوشوا
شيري / بشويش ما صدقت راحت فى النوم حبيبتي عماله تسال على ابوكى و بتقولى ما بنروحش نشوفه فى المستشفي ازاى
شيري و هند عنيهم تتملى دموع
هند / قولتلها ايه
شيري / قولتلها الحقيقه حاولت افهمهالها بابسط الطرق و برده ما قدرتش تفهم
هند تطبطب على مامتها
شيري / تحبي انام جنبها و تنامى فى اوضتي النهرده
هند / زى ما حضرتك تحبي بس اشمعن يعني
شيري / لو هتسهرى شويه تكلمى مختار انتوا طول الوقت بتزاكروا .. مش انتوا كنتوا بتزاكروا برده
هند / لا من النحيادى اطمنى مختار فى المزاكره يخنق ما بيرحمش
شيري / كويس مش احسن من واحد يعطلك
هند / احسن من الدنيا بحالها
شيري / يا بت اتلمى يقول عليكي واقعه
هند / هو لسه هيقول يلا نامى جنب بنتك تصبحى على خير
هند تمشي و شيري مبتسمه
شيري / ربنا يصلحلك الحال يا مجنونه
…………………….
فى شقه يوسف
محمود / انتى اتجننتى يا وليه عريس ايه اللى نجبهولها هو احنا شغالين خاطبه
حمدى / و بعدين هنلاقيه فين ده العريس اللى احسن من مختار
اسراء / يا جدعان هو احنا هنجبلها عريس بجد
محمود / امال هناجر واحد نخطبله بنت اخويا
اسراء / يا سيدى و لا نخطبله و لا ننيله احنا بس
حمدى / يعني لا هتبقي خطوبه و لا هو احسن من مختار امال هتسيب الجدع ده ازاى دى فكره مش تمام خالص يا اسراء
اسراء / سيبوا الموضوع ده عليا و انا هخليها تدى مختار ده سكه
حمدى / يا جماعه احنا كل محاولاتنا اللى فاتت و لا محاولات يوسف جت على دماغنا انا بقول نخلينا فى حالنا و نسيب البت تمشي مستقبلها زى ما هى عاوزه
محمود / اسيبها تتجوز بلطجى و مجرم
حمدى / والله ارحم من اللى مراتك عاوزه تعمله انا مش معاكوا اللى ما ارضاهوش على بناتى ما ارضاهوش لبنت اخويا
محمود / و احنا قولنا اننا هنعمل كدا هى اقترحت و احنا قولنا لا خلص الموضوع
محمود يبص لاسراء بصاله
اسراء/ هقوم احضر العشا
اسراء تقوم
…………………….
فى شقه مختار
مختار نايم على السرير بيتكلم فى التليفون
مختار / بس انا فعلا محتاج انك تيجي معايا البلد قبل كتب الكتاب عاوزك تشوفي البلد
هند / اكيد هتعجبنى و بعدين عبد الله شافها و عجبته اوى
مختار / عبد الله ما شافش كل حاجه
هند / تمام اول حاجه هعملها لما ناخد الاجازه هنزل معاك البلد
مختار / لا يا قطه اول حاجه لما تاخدى الاجازه هتبقي الفرح
هند / بس كدا بابا هيبقي
مختار / خلاص نكتب الكتاب و ناجل الفرح شويه
هند / سبها لله وقتها نبقي نتكلم مع ماما و نشوف هنعمل ايه
مختار / انا بحب اتكلم معاكى و ما صدقت بس اقسم بالله بغفل غضب عنى
هند / طب ليه كدا ما تنام يا قلبي
مختار / تمام يا ست الكل ان شاء الله اصحيكي تصلى الفجر
هند / تمام تصبح على خير
مختار / و انتى الخير كله
مختار يقفل و يحط الموبايل فى الشاحن و ينام
…………………
فى شقه هند
هند تطلع من اوضه مامتها تروح اوضتها تلاقي ياسمينا و شيري نايمين تعدل الغطا و تروح تفتح باب اوضه عبد الله تلاقيه بيزاكر
هند / اعملك حاجه قبل ما انام
عبد الله / انتوا قفلتوا بدرى ليه
هند / ما تنساش انه كان على سفر و راح الجيم عشان خاطرى و روح زاكر مش قادر
عبد الله / انا بكره ما عنديش الا درس واحد هاجى معاكوا الجيم
هند / لا بكره مش هنروح
عبد الله / ليه هى جت عليا يعني ما انتى بقالك يومين بتروحى
هند / ههههههههههههههههههههه هو انا قولتلك ما تروحش
عبد الله / هاخد مختار معايا
هند / هو انا منعاه سبها لله اما نشوف بكره اليوم هيمشي ازاى
عبد الله / هيمشي زى الفل يا ست الكل انتى بس اضحكى
هند تبتسم
عبد الله / عجبك البق ده صح … مختار يعرف يقول زيه ؟
هند / ههههههههههههههه حاليا لا بس بيتعلم يعني
عبد الله / ههههههههههه طب قومى بقي اعمليلى كام ساندوتش و كبايه نسكافيه عشان اشوف اخره الاحياء دى فين
هند / ههههههههههه من عنيا حاضر
هند تقوم و تروح المطبخ و عبد الله يكمل مزاكره
…………………
فى شقه مختار
نور الشقه كله مطفى باب الشقه يتفتح و حد بيتحرك فى الضلمه و يدخل اوضه مختار و يايد النور فيرا مختار نايم و رايح فى النوم فيرا تبتسم و تروح تنام جنبه و تراقبه و هو نايم تبتسم و تعدى ايدها بالراحه على خده يصحي و يفتح بالعافيه فيرا بصاله و مبتسمه
فيرا / نومك عميق اوى زى الاطفال
مختار يشوفها يتفزع و يقوم يقف
مختار / انتى !!!
فيرا / مالك شوفت عفريت ههههههه
مختار / عفريت اما يركبك هى حصلت انتى دخلتى هنا ازاى
فيرا / هو الدخول و الخروج مشكله و بعدين مش انت اللى قولتلى عاوزنى فى حوار مهم
مختار / تقومى تجيلى هنا
فيرا / ما تخافش ما حدش شافني و انا داخله و لا هيشوفونى و انا خارجه ما تقلقش و ان كان على خطيبتك فهى نايمه فى سابع نومه دلوقت الا بقي لو فضلت تتعصب كدا و تصحيها
مختار يمسك دماغه و يروح و يجي
فيرا / انا جيت خلينا نتكلم فى الشغل عرفت مين بيبلغ
مختار يبصلها و كله غضب
مختار / انا مش طايق ابصلك انتى عاوزه منى ايه
فيرا / بحبك
مختار / حبك بورص اتعدلى
فيرا / يا مختار هعوز منك ايه يعني انت اللى قولت محتاجنى فى حوار
مختار / الله الغنى مش عاوز منك حاجه
فيرا / اخص عليك بعد ما قطعت المشوار ده كله
مختار / قطعوا راسك عن جسمك يا بعيده
فيرا تنفخ و تقوم تقف
فيرا / خلاص خلاص كمل نوم انا لو كنت اعرف انك بتبقي عصبى كدا لما بتصحي من النوم ما كنتش جيتاك
مختار / و ما تجيش هنا تانى انتى فاهمه
فيرا تقف قدام مختار بالظبط
فيرا / انت فاهمنى غلط يا مختار انا اكون ما كان احب اكون و ان كنت على غير عادتى بسيبك تفضي العصبيه اللى جواك فدا فعلا عشان حبيتك
مختار / هرجع
فيرا تبتسم
فيرا / لما تعرفنى اكتر هتعرف انى مش بسمح لاى حد يبص فى عيني حتى
فيرا تطلع الموبايل بتاعها و تتصل بحد
فيرا / ناو
النور يتقطع و مختار يحسس لحد ما يجيب موبايله من الشاحن و يايد الكشاف مفيش حد يطلع البلكونه مفيش حد النور يرجع يبص حواليه يلاقي عبد الله بيفتح البلكونه
عبد الله / ايه ده انت صاحي
مختار يبسم
عبد الله / الواحد مش عارف النور ماله دى تانى مره يقطع
مختار / ما افتكرش انه هيقطع تانى
عبد الله / تمام تصبح على خير
مختار / و انت من اهله
مختار يدخل جوه و قفل البلكونه و هو بيحاول يكتم غضبه جواه
……………………
تانى يوم قدام الدكان
شيري و معاها ياسمينا يقفوا و شيري تطلع المفتاح من شنطتها اتنين رجاله يروحوا يقفوا جنبها
الاول / عنك يا ست الكل
شيري توسع و الراجل يفتح المحل و يدخلوا يساعدوها و هى مستغربه
شيرى / انا اسفه بس
الاول / احنا اللى من طرف مختار بيه يا ست الكل اللى باعتنا نساعد حضرتك انا فاروق
التانى / و انا عيسي يا ست الكل هو ما قالكيش و لا ايه
شيري تهز راسها لا
التانى / تحبى اكلمهولك تتاكدى بنفسك
شيري / لا انا هكلمه شكرا
شيري تمسك ياسمينا فى ايدها و تتصل بمختار
مختار / صباح الخير يا امى عيسي و فاروق وصلوا
شيري / انا مش فاهمه حاجه يا مختار
مختار / انا قولت لهند امبارح شكلها نسيت تقولك
شيري / ايوه يا مختار بس الدكان
مختار / ان كان على الماهيه فلو جودتى بجنيه يبقي كرم منك انما مرتبهم واصل يا امى
شيري تبص للرجاله
شيري / تمام
شيري تقفل و ترجعلهم
فاروق / انا بقول نعلق رقم تليفون لتوصيل الطلبات انا حافظ المنطقه فوريره
شيري تبتسم و تدخل و الرجاله ترص الحاجه و تظبط الدنيا
……………………..
فى كافيه
يوسف و وسام قاعدين
وسام / شكرا انك وافقت اخيرا تقعد معايا فى مكان نتكلم
يوسف / على فكره احنا كنا احلى و احنا صحاب
وسام / مش انا اللى بوظت العلاقه دى
يوسف / بس ما افتكرش نقدر نرجعها
وسام / و المطلوب
يوسف / زى ما دخلنا بالمعروف نخرج بالمعروف
وسام / و انا موافقه و جايه هنا اشوف هنفذ ده ازاى
يوسف / اى كان اللى هيرضيكي انا موافق عليه
وسام تبتسم بسخريه و تبصله
وسام / تعرف المشكله عمرها ما كانت فيك يا يوسف كانت فيا بس صدقنى عمرك ما هتلاقي اللى تحبك قدى
يوسف / رجعنا تانى للسكه السد دى
وسام / هند طبعا هند مفيش زيها انا خسرتها عشانك
يوسف / بجد !!!
وسام الابتسامه تروح من على وشها
يوسف / بصي بلاش نخرج عن الموضوع و نزعل بعض خلينا ننهيها بشكل حضارى خلينا نفضل فاكرين لبعض زكريات حلوه تمام
تليفون وسام يرن
وسام / ثوانى دى ماما .. الو .. مين ؟ .. ايه !!!
وسام تقوم تقف يوسف ينتبه وسام بتبصله
وسام /مستشفي ايه.. انا جايه حالا
يوسف يشاور للمتر الحساب و يقف
يوسف / فى ايه يا وسام
وسام / ماما تعبت جامد فى الشغل و نقولها المستشفي
الوايتر يجيب الحساب يوسف يحاسب و يمشوا
……………………..
فى شقه هند
هند بتحط اكل على السفره و مختار و شيري و عبد الله و ياسمينا قاعدين
هند / و ادى احلى صينيه بطاطس بالفراخ
مختار / تسلم الايادى
عبد الله / ندوق الاول و بعدين نحكم
هند / دا على اساس انك اول مره تدوقها
مختار / اخبار الدكان ايه يا امى
شيري / الحمد لله بصراحه الناس اللى بعتها طلعوا مش قليلين خالص فاروق اشترى كراسه و قام و كتب بخط كبير على الورق ورقه ورقه رقم تليفونه و اسم المحل و راح لف على العمارات وزعوها على البوابين واضح ان علاقتهم حلوه اوى بسكان المنطقه
مختار / اصلهم هنا من سنين عيسي حافظ المنطقه بشوارعها بزخانقها يرسملك خريطه من دماغه لو تحبي
شيري / مهو قال فعلا انه هيوصل الحاجه بنفسه و انا قولتله فلوس التوصيل دى بتاعتك بصراحه ولاد حلال
عبد الله / انا بحاول اجمع معاكوا
شيري / مختار بعتلى اتنين من اهله يساعدونى فى المحل
عبد الله / كويس
هند / ما تتقلوش فى الاكل عشان فى حاجه حلوه فى التلاجه جوه
مختار / هاخد على الدلع ده
عبد الله / لا يا عم ما تاخدش ما لهاش امان
هند / ما تبس بقي يا بتاع انت اقولك هات الاكل ده
هند تشد طبق الرز من قدام عبد الله و عبد الله متبت فيه
مختار / وحدوا الله يا جدعان
شيري / هههههههههههه لا اله الا الله سبهم هم من يوم ما اتولدوا كدا قط و فار
عبد الله / بس القط ما يحبش الا خناقه عشان كدا بتموت فيا صح يا دودو
هند / كل و انت ساكت ياله
عبد الله/ شايف بتموووووووت فيا
مختار / هههههههههههههههههههههه
…………………….
فى السرايا
الرجاله متجمعين فى المكتب
عباده / و احنا هنسكت على الكلام الفاضي ده دا احنا نروح ندفنها فى ارضها و نخلص من الهم ده هو فى ايه
شاكر / الحاجات دى ما بتتحلش كدا يا عباده انت لا عارف ارضها فين بالظبط و لا عارف هتلاقي ايه هناك
عباده / يا ابويا اللى حصل ده ما يعديش بالساهل
ناصر / و ما كانش هيعدى لولاش بس مختار مش عاوز شوشره و مشاكل الفتره دى
عباده / الوليه كل مادا بتسوق فيها و فاكراها سهله نسكها عشان تعرف ان الله حق
شاكر / مش وقته يا عباده
عباده / امال امتى اما يدبحوه فى فرشته
ناصر / اهدى يا عباده اهدى عشان نعرف نفكر كويس
عباده / والله لو كنت مكانه ما كانت خرجت من الشقه الا على نقاله و ما خدش فيها يوم واحد
ناصر / هدى ابنك يا عمى خلينا نعرف نفكر
شاكر / اهدى يا عباده
ناصر / بقولك يا سليمان
سليمان يبص لناصر
ناصر / مفيش اخبار عن حوار وهدان القط
سليمان / امان يا كبير
ناصر يهز راسه
ناصر / خليه يفتح عنيه و اى جديد يبلغنى
امين يوطى على ابوه
امين / هو ايه حوار وهدان يا ابويا
سليمان / ششش
امين يتعدل و يسكت
…………………..
بره المكتب
فاطمه بتحاول تتصنت انتصار تقفشها
انتصار / بتعملى ايه يا مجنونه انتى لو حد فتح الباب فجاه رقبتك هتطير
فاطمه / الكبير لم الرجاله كلهم و قافلين على نفسهم من الصبح اقطع دراعى من هنا هو ان ما كانتش مصيبه كبيره حصلت
انتصار / و انتى مالك بكلام الرجاله هما هيحلوها سوا
فاطمه / و ان كانت المصيبه دى تخص مختار برده ما لناش دعوه
انتصار ترتبك و تلم نفسها
انتصار / برده ما نتصنتش هما هيقولولنا على كل حاجه لما يجى وقتها
فاطمه / براحتك انا طالعه اوضتى
انتصار تتابعها لحد ما تمشي
انتصار / جيب العواقب سليمه يا رب
…………………….
فى اوضه سماح
سماح بتتكلم فى التليفون و هى بتبرد ضوافرها
سماح / والله انا ما عارفه اقولك ايه
عصام / انتى لازم تكشفي يا سماح ما ينفعش تسيبي نفسك كدا دا انتى كل يوم تعب جديد
سماح / ما انا اخدت علاج و بتحسن
عصام / لازم تاخدى بالك من نفسك اكتر من كدا
سماح / ربنا يخليك يا استاذ والله انت الوحيد اللى سال عليا فى رقدتى ما تتصورش سؤالك فرق معايا قد ايه طب تصدق و تؤمن بايه
عصام / لا اله الا الله
سماح / انا فى الرقده دى ما بزاكرش غير مادتك حتى باخد الواجبات من مريم و بعملها انما باقي المواد ما ليش نفس حتى ابص عليها
عصام / ارتاحى يا سماح اى حاجه تانيه تتعوض المهم ترتاحى
سماح / انت خايف عليا و لا ايه ما تخافش عمر الشقى بقي و انا ما فيش فى شقاوتى
عصام / هههههههههههههههه ماشي يا ستى
سماح تحس بحركه بره الاوضه
سماح / انا لازم اقفل مع السلامه
سماح تقفل و تحط الموبايل تحت المخده مريم تخبط و تفتح الباب
مريم / ادخل
سماح / تعالى
مريم / بتعملى ايه
سماح / هعمل ايه يعني اديني قاعده اما نشوف اخره السجن ده ايه
مريم تبصلها و تروح تقعد جنبها
مريم / الامتحانات قربت و بدات اتوتر
سماح / انتى !! تتوترى من ايه طب سيبي التوتر ده للى زيي انما انتى ما شاء الله يعني لتقولى بحسد
مريم / اللى يسمعك يفكرك بليده امال لو ما كنتيش اشطر منى
سماح / لاهو بالشطاره و لا بالخيابه يا مريم انتى لو جبتي ايه باللذى هيفرحوا بيكي و يقولوا مبروك انما انا … انتى يعني مش عارفه امى
مريم / بتخاف عليكي و عوزاكى احسن حاجه
سماح / و انا مش عاوزه ابقي احسن حاجه انا عاوزه احس ان ليا اهل بيحبونى عاوزه اخرج من سجن السرايا ده عاوزه اخرج و اتفسح
مريم / هنخرج لما الاجازه تيجي و نروح اسكندريه زى كل سنه
سماح / تعرفي ان ابويا و امى رايحين الغردقه اللى احنا ما شميناش ريحتها حتى
مريم / يا ستى هما دلوقت و احنا بعدين
سماح / انتى طيبه اوى انا اللى زيي من السرايا على التربه
مريم تبصلها بصدمه سماح تكمل برد فى ضوافرها
…………………………………………..
فى الجيم بعد كام يوم
دينا و هند بيلبسوا فى الحمام
دينا / لا بس انتى بسم الله ما شاء الله بتتعلمى بسرعه اوى و مستواكى كويس احنا الفتره الجايه عاوزين نشد فيتنس بس
هند / للاسف الفتره الجايه مش هقدر اجى كتير زى دلوقت بسبب الامتحانات
دينا / مفيش مشكله على العموم التمارين اللى بنعملها ممكن تعمليها فى البيت عادى لو لقيتي اى وقت فاضي و مع بعض على تليفون بقي
هند / تمام يا كوتش
هند تلم حاجتها و تطلع بره تلاقي عبد الله و مختار على التريدميل تروح تزود السرعه لعبد الله
عبد الله / بس يا رخمه
هند / حد فيكوا معاه ميه بتاعتى خلصت
مختار ينزل من على التريدميل و يناولها بتاعته ما فيهاش كتير تشربهم
هند / شكرا بس انا محتاجه اكتر بقولكوا ايه هنزل اجيب ازازه ميه من السوبرماركت قدام الجيم لحد ما تلبسوا تمام
عبد الله / ياريت سقعه لحسن انا كمان عطشان اوى
هند تنزل تروح السوبرماركت تجيب ازازه ميه كبيره و تحاسب الراجل و تشرب
هند / الحمد لله على نعمه المايه
البياع و هند يبصوا لبعض و يبتسموا الناحيه التانيه فى شباب متابعين هند يشوفوها راجعه الجيم و هى واخده الازازه
الاول / ممكن اشرب
هند تديهم الازازه و ترجع تشترى واحده تانيه و تيجي ترجع الشاب يرجعلها الازازه
هند / خليها
هند تيجي تعديه يقفوا فى طريقها
الشاب ١ / مستعجله على ايه بس
هند / يعني انا الغلطانه انى اديتك تشرب فى الحر ده يعني
الشاب ٢ / و ما دام واخده بالك انها حر ما تطريها و لا احنا مش قد المقام
هند تحاول تعديهم شاب ٣ يمسك ايدها هند تلويهاله و تلفه تزقه بعيد
شاب ١ / انتى قد الحركه دى يا بت
شاب ٢ يجي يديها بالبوكس تمسك ايده و تتنيها و تضربه بالرجل بين رجليه يقع فى الارض و تلف تضرب الاول بايدها فى فم معدته ينزل على ركبه تديله بالبوكس فى مناخيره لفوق يقع على ضهره التالت يرجعلها يحاول يضربها بايده تفاديه يديها بالتانيه تمسكها و بالرجل فى بطنه توقعه على الارض الكل يطلع من الجيم عبد الله يجى يروحلها مختار يمنعه الشاب ٢ يقوم و يحول يضربها تمسك ايده و تقلبه فى الارض و تضربه بالرجل فى بطنه يتلوى تبص حواليها و هى بتنهج التلاته بيتلوا فى الارض و مختار و عبد الله بيبصوا عليها و مبتسمين مختار يروح يناولها ازازه الميه من الارض عبد الله يسقف
عبد الله / حلاوتك يا دينا
عبد الله يبص جنبه يلاقي دينا واقفه مبتسمه و بتبصله
عبد الله / احلى شغل والله يا كوتش شايفه تعليمك
دينا / ههههههههههههههههههه
هند / انتوا واقفين تتفرجوا من امتى
مختار / ايه الحلاوه دى ايه الجمديه دى ايه العسل ده ايوه بقي
هند / انت مبسوط كدا ليه دول كانوا بيعاكسونى على فكره
مختار يبص عليهم بيحاولوا يقوموا بعض و هم مش قادرين يقعوا فى الارض تانى
مختار / هعملهم ايه دا حتى الضرب فى الميت حرام هههههههههههههههه
عبد الله يروح يقف جنب مختار
عبد الله / انا عمرى ما هتخانق معاها تانى ابدا
مختار / و لا انا العمر مش بعزقه
هند تبتسم
هند / بطلوا بقي على فكره كنت مرعوبه
عبد الله / مرعوبه ايه دا هم اللى قطعوا الخلف عاش يا وحش بجد
هند تبص الناحيه التانيه
مختار / احلى ايسكريم بقي احتفالا باول خناقه لهند
هند / بطل
مختار / يعني بلاش ايسكريم
هند / لا بلاش تحفيل
مختار يهز راسه حاضر و يمشوا التلاته مبتسمين واحد منهم بيحاول يقوم يقف عبد الله يكعبله يقع تانى
عبد الله / بتعاكس واحده دينا بتمرنها يا عبيط
مختار يفتح العربيه
هند / مش مهم انها اختك يعني المهم ان دينا هتمرنها و نعم الاخ والله و نعم الاخ
عبد الله / على فكره كنت هدخل بس مختار منعنى
هند / يعني انتوا واقفين من بدرى
الكل يركب
مختار / لقيتك مسيطره قولت مصلحه تزودى ثقتك بنفسك بس اكيد لو كنت حسيت بحاجه كدا و لا كدا ما كنتش هسكت يعني
هند / بس انا ضربتهم جامد صح
هند متحمسه جدا
مختار / وحش
هند مبسوطه
……………………..
فى السرايا
عصام قاعد سماح تدخل عصام يبتسم
سماح / مساء الخير يا استاذ
عصام / مساء النور اخبارك ايه النهرده احسن
سماح / تمام الحمد لله اتفضل الواجب
سماح تقعد و عصام يفتح الكراسه و يصحح
عصام / برافو عليكي انتى حتى حاله الحاجات اللى غبتى فيها
سماح / ما انا خليت مريم شرحتلى الحاجات الجديده
عصام / احلى حاجه فيكي يا سماح انك ما بتخليش حاجه تعطلك بجد ياريت كل البنات يبقوا زيك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
