رواية البر التاني الفصل الرابع 4 بقلم لولو محمد
رواية البر التاني الجزء الرابع
رواية البر التاني البارت الرابع
رواية البر التاني الحلقة الرابعة
هند / طب ما تصليلك ركعتين
عبد الله / صليت .. انتى كويسه يا هند
هند / ايوه كويسه الحمد لله كانت لحظه وراحت لحالها
هند تقوم و تقف جنب عبد الله و تحط ايدها على دراعه
عبد الله / المشاكل بتزيد كل يوم عن اللى قبله
هند / كل البيوت فيها مشاكل يا عبد الله ما حدش مرتاح يعني و بعدين احنا احسن من غيرنا بكتير الحمد لله
عبد الله يبص فى الشارع
عبد الله / هى دى عربيه يوسف
هند / و هو يوسف هيعمل ايه هنا السعادى اكيد عربيه شبها هو اللى خلق عربيه يوسف ما خلقش غيرها يعني
عبد الله / و اللى اشترى عربيه زى بتاعه يوسف هيشترى كمان ساعه زى بتاعته وسعى
هند / عبد الله استني يا عبد الله تعال هنا يوووووه بقي
عبد الله ينزل يجرى على الشارع هند تدخل اوضه باباها نايم تروح تقعد جنبه بالراحه
……………………….
فى السرايا
انتصار / و انت سايبه هناك لوحده بيعمل ايه تبعت تجيبه حالا
ناصر / انا غلطان انى قولتلك يعني
انتصار / يا ناصر احنا هنا على ارضنا وسط اهلنا و ناسنا انما هو هناك بروحه هيستفردوا بيه
ناصر / عيل و لا ايه
انتصار / راجل و سيد الرجاله و زينه رجاله الزيني كلهم بس الكتره تغلب الشجاعه
ناصر / و انتى مش عارفه مختار على العموم انا ما سكتش بعتله ناس و سلاح
انتصار / سلاح ؟؟ دا مبيشيلوش معاه خالص
ناصر / من النهرده لازم يشيله ما دام وصلوله فى مصر و ما دام دخلوا بيتنا هنا كل الرجاله هتشيل سلاح من الكبير للصغير
انتصار / هى وصلت للدجادى
ناصر / ايوه وصلت و كلمى مريم بالمستخبى ان مختار عنده ظروف و هياجل السفريه شويه
انتصار / مختار لازم يرجع يا نروحله كلنا
ناصر / نروح فين كلنا بقولك ايه يا انتصار اهدى كدا و ما تبينيش حاجه و ياريت تفتحى عينك فى البيت تشوفي مين داخل و مين خارج
انتصار / فى الحريم ما حدش غريب دخل و لا يستجرى يدخل وسطينا ما انت عارف كلهم معروفين نفر نفر و اى غريب هيبان و ما حدش من اهل البلد يقدر يخون و لا ينقل كلمه سمعها جوه البيت بره هما حريم البلد جداد عليك
ناصر / يبقي اتكلمى مع مريم شوفيها حكت لمين و لا اتكلمت مع مين
انتصار / ما يمكن حد من الرجاله هو اللى اتكلم عن نزولنا مصر
ناصر / وارد بس برده عينك على البت
انتصار / يا مصيبتي هى ممكن توصل لكدا
ناصر/ يا وليه اهمدى مش هتوصل لحاجه بس على راي المثل حرص و لا تخونش هو انا هستني لما حاجه تحصل
انتصار / اسمع يا ناصر انا هقفل السرايا على الحريم و انت يا خويا زود الحراسه
ناصر / انا زودت الحراسه بس ما فيش حاجه هتتغير اللى ليها مدرسه تروحها مش عاوز حد يحس بحاجه مش على اخر الزمن رجاله الزيني مش هيعرفوا يحموا حريمهم
انتصار / يا قلبك يا ناصر
ناصر / مش هعيد كلامى تانى انا كدا كدا منبه على الرجاله و حكيتلك عشان كنت عاوز اعرف ايه اللى حصل وسط الحريم غير كدا ما حدش غيرك يعرف كلمه تتنطر كدا تتنطر كدا انتى اللى هتقفى قدامى يا انتصار
انتصار / حرام عليك يا اخويا و انا من امتى امنتنى على سرك و طلع بيني و بين نفسي حتى
ناصر / عارف يا ست الكل بس معلش بقولك بس بنبه عليكي يعني
انتصار / ما تقلقش ان شاء الله خير
ناصر يهز راسه و انتصار باين عليها التوتر
……………………
فى الشارع عند عبد الله
عبد الله يطلع من العماره يخبط جامد على عربيه يوسف
عبد الله / دا اللى هو ازاى يعني فهمنى
يوسف ينزل من العربيه
يوسف / فى ايه يا عبد الله مالك
عبد الله / بتعمل ايه هنا السعادى والله هاين عليا اطلبلك البوليس يلمك انت و شويه الصيع اللى معاك
شاب ينزل من العربيه
الشاب ١ / جرا ايه يا يوسف ما تشوف قريبك دا يا عم بيقول ايه
يوسف / ما لكش دعوه انت يا على اركب العربيه .. و انت يا عبد الله اطلع فوق هتصحي الناس
عبد الله / و انت غور من هنا يلا
يوسف / بقولك ايه يا عبد الله انا ساكتلك عشان خاطر ابوك ما تسوقش فيها
عبد الله يزق يوسف يوسف يمسك فيه مختار يدخل و يفصل بينهم
مختار / عيب كدا يا رجاله انتوا برده اهل
محمد ينزل من فوق يفصل هو كمان
محمد / خد عبد الله فوق يا مختار
عبد الله / والله ان كررتها لاطلبلك البوليس احنا فين هنا
محمد / اطلع فوق يا عبد الله اطلع فوق
مختار يشد عبد الله لفوق
محمد / انت بتعمل ايه هنا يا يوسف السعادى و مين دول هو فى ايه
يوسف / ما فيش حاجه يا عمو خلاص احنا بس كنا معديين و ماشيين
محمد / ماشي يا يوسف طريقك اخضر
يوسف يركب العربيه و يمشوا و يبص فوق يلاقي هند و شيري واقفين فى البلكونه و مختار و عبد الله واقفين فى البلكونه اللى جنبهم يتنهد و يطلع
……………………
فى شقه محمود
محمود / انت متاكد … انا مش فاهم حاجه … لا طبعا هكلمه … لا ما انا لازم افهم منه الاول … لا لسه ما جاش طبعا انت مش بتقول لسه ماشي من عندك … لا هكلمه لما يوصل الحاجات دى ما ينفعش نتكلم فيها فى التليفون … لا ما تقلقش … لا ما تحكيش اللى حصل لحد من اخواتك خلينا نلم الموضوع … خلاص بقي يا محمد ما تكبرش الموضوع قولتلك هكلمه و مش هتتكرر … سلام يا اخويا سلام
الست / فى ايه يا محمود بيشتكوا من يوسف فى ايه السعادى
محمود / بيقولوا يوسف لامم صحابه و سهران تحت بيتهم هناك
الست / هو سهران فى بيتهم مهو سهران فى ملك الحكومه
محمود / مش وقته يا ام يوسف مش وقته البت لسه مروحه من المستشفي و محمد عيان مش وقت مشاكل
الست / و هو كل ما يوسف يعمل حاجه هيعملوا منها فيلم و لا هو لما يعمل لمصلحتهم يبقي حلو و غير كدا وحش مين دفع فلوس المستشفي هاه
محمود / بلاش الكلام فى الحاجات دى
الست / ليه انت هتحابي لاخوك على حساب ابنك الحيله
محمود / و لا هحابي لاخويا و لا هحابي لابني انا قولت هستني اما يوسف يجي و افهم منه على الاقل عشان اعرف ارد
الست تسيب المكان و تقوم و محمود مضايق
…………………
فى شقه مختار
مختار قاعد فى البلكونه بيزاكر هند تطلع معاها طبق الغسيل شيلاه بايد واحده ترزعه فى الارض مختار يبص تمسك اول قطعه و تيجي تنشرها تشوف مختار تتخض
هند / مش كل مره بقي
مختار / هبقي احط الكاسيت فى البلكونه عشان تعرفي انى هنا
هند / لا هو انا بس مش واخده انك تطلع البلكونه كتير
مختار يقوم يقف و يلم حاجته
مختار / لو مضايقك
هند / لا لا لا مش قصدى انا اقصد انك ما كنتش انا عادى انا مش هكتفك فى بيتك يعني انا شخصيا طول الليل كنت بزاكر فى البلكونه الجو كتمه جدا جوه تعرف انا خلصت الكتاب امبارح نقلت كل الملاحظات و الورق بتاعك
مختار / صحيح انا صورتلك باقي الورق اللى عندى
هند تبصله و يبقوا قدام بعض
هند / تعبت نفسك كنت اديتهم لبابا و لا عبد الله يصوروهم كلفوك كام
مختار يروح يقعد و ما يردش و يبص فى الكتاب
هند / طب هتديني باقي الكتب انقل الملاحظات اللى فيها
مختار يبصلها و يبتسم
مختار / حاضر اخلص اللى فى ايدي و ابعتهملك
هند تكمل نشير و مختار متابعها هند تبصله يتحرج و يبص في الكتاب بسرعه
هند / دى هدوم ياسمينا شكلها كيوت اوى مش كدا
مختار / فعلا هدوم العيال بتجيب البهجه الوانها و احجامها
هند / دى كدا كبرت ما شاء الله ما شوفتش انت هدومها لما اتولدت
مختار / كنت بشوف هدوم ولاد اخواتى و احفادهم فعلا شكلها لوحده يفرح
هند / عقبالك
مختار / امين و انتى كمان
هند / شكرا
هند تكمل نشير
هند / بابا هيفك الشراكه النهرده
مختار / عشان كدا مبسوطه
هند / ههههههههههههههههه بصراحه اه
مختار / بس انتى على كلامك ان الموضوع مش هيبقي سهل
هند / بابا قال انه كدا كدا مش هتفرق اداله فلوسه كان بها ما ادهالوش مش عاوزها هياخدها منه يوم القيامه و نعيش على قدنا
هند تكمل نشير
هند / بصراحه اى كان اللى هيحصل هيبقي ارحم عندنا كلنا من اللى شوفناه الفتره اللى فاتت
مختار يقوم و يروح يقف قدامها
مختار / ممكن اطلب منك طلب
هند / اؤمر لو اقدر ما اتاخرش
مختار / عارف ربنا يكرمك و يزيدك بصي الواحد لما بيبقي بره بيشوف الدنيا سهله لكن لما بيبقي اب بيبقي الموضوع مختلف ممكن يتنازل عشان خاطر عياله ممكن
هند / بابا وعدنى
مختار / ممكن يفك الشراكه و برده يوسف ما يبطلش تحكم المشكله مش فى الفلوس المشكله فى يوسف نفسه ما لوش كبير بالعكس اللى شوفته انهم بيشجعوه
هند / ساعتها مش هيبقالهم عين هياخدوا حقنا و كمان يتحكموا فينا
مختار / اللى ما خافوش من ربنا و خدوا حقكوا هيتكسفوا يتحكموا فيكوا
هند تبصله بحزن
هند / انت ليه بتقولى كدا
مختار / انا مش قصدى اكسر فرحتك والله انا بس خايف تتعلقي بحلم و لما تفوقى منه تتعبي زياده
هند / مهواش حلم دا حقيقه خلاص الموضوع انتهى انا مش هقبل تحكمات يوسف تاني مهما حصل خلاص
مختار يهز راسه
هند / عن اذنك
هند تسيب باقي الغسيل و تدخل تجرى على جوه حتى ما تقفلش باب البلكونه و مختار متابع بحزن
……………………
فى شقه محمود
محمد / دا اخر كلام عندك يا محمود
محمود / انا مش هضيع تعب السنين دى كلها عشان دلعكوا فى عيالكوا ايه اللى حصل لكل ده
محمد / دلعنا احنا فى عيالنا و هو اللى يوسف بيعمله ده نتيجه ايه
محمود / و ايه دخل يوسف فى الموضوع عملك ايه يوسف دا بيتمنالكوا الرضا ترضوا لما بقي حق مكتسب و مش عاجب
محمد / ضغط البت لما خلاها تموت روحها و مكفاهوش جايب صحابه تحت البيت ليه
يوسف / ما قولتلك يا عموا كنا بنلف العربيه و انا كنت مضايق من اللى حصل لقيت نفسي جيت عندكوا
محمد / بطل كدب يا يوسف انت جاى تتخانق مع مختار جارنا
يوسف / ما حصلش مهو كان قدامى امبارح ما لمستوش و لا كلمته بالعكس دا هو اللى ضربني و الدفعه كلها تشهد على كدا
ام يوسف / يا لهوى يضربك يعنى ايه … ليه هى الكليه ما فيهاش امن … البلد ما فيهاش حكومه نقوم دلوقت نعمله محضر و نطلع عينه و عين اهله
محمود / شايف يا سي محمد مش دا اللى بنتك ركبت معاه العربيه و خلته يوصلها و زمايلها شافوها راكبه معاه
محمد / انا ابوها و موافق ما حدش له دعوه
الست / يعني ايه ابوها و موافق
محمد / يعني ابوها و موافق و مختار شاب زى الفل و انا اضمن اخلاقه بعنيا طب ياريت عيالنا يبقوا فى اخلاق مختار الزيني الا ما بيفوت فرض و لا القران بيتقطع من بيته
يوسف / اه صح باماره البت الشمال اللى كان بايت عندها امبارح
الست / يا لهوى هى حصلت لكدا شايف يا ابو عبد الله اللى بتضمن اخلاقه بعنيك
محمد / انت عيل كداب و غلاوى
محمود / لا بقي يا محمد انت زودتها اوى انت بتغلط فى ابن اخوك عشان جارك طب انت قولت ان يوسف كداب على اساس ايه انت عارف سي مختار باشا كان بايت فين امبارح
محمد / و سي يوسف معاه دليل و لا بيتهم الناس بالباطل
يوسف / الكليه كلها شافته و اسال اي حد
محمد / لا يا راجل و هى الكليه كلها بتراقب مختار تشوفه بايت فين
شيري / يا جماعه ما لناش دعوه بمختار انتوا خرجتوا عن الموضوع
محمود / هو ده الموضوع
محمد / لا شيري معاها حق نرجع لموضوع المحل انا ليا ورث عندك
محمود / ورثك فى ايدك و دلوقت حالا اديك فلوسك
محمد / فلوس ايه الورقه اللى من عشرين سنه
محمود / اه نصيبك اللى انا سهرت و شقيت و كبرته و كنت بتاخد حقك كل شهر و بزياده و لا هو اللى بيشتغل زى اللى ما بيشتغلش
محمد / ماشي يا محمود كتر خيرك خليهالك و الورقه اهى تجيب اللى فيها و لا ما تجيبوش
محمود / خشي هاتى الفلوس من جوه يا اسراء
الست تقوم
يوسف / يا جماعه استهدوا بالله انتوا اخوات ايه اللى وصل الموضوع بينكوا بكدا استهدى بالله يا عمى انا اسف والله ما هعمل كدا تانى
محمد / انت فعلا مش هتعمل كدا تانى و ما لكش دعوه بهند لا تكلمها و لا ليك دعوه بيها
يوسف / يا عمو الموضوع مش مستاهل والله طب بص انا هبعد خالص و مش هكلم هند خالص بس انت و بابا اخوات قول حاجه يا بابا
اسراء تدخل شايله كيس و تديه لمحمود محمد ياخده و يمشي و شيري تمشي وراه
اسراء / كان المفروض تمضيه انه اخد الفلوس
محمود / ما الوصل معايا همضيه على ايه انتى كمان
محمود يمشي و هو متعصب
يوسف / عاجبك كدا يا ماما
اسراء / بكره يصرفوا الفلوس و يرجعوا يبوسوا رجلينا زى الجزم دول عايشين فى قته محلوله
يوسف يبص لامه و ينزل و هو مضايق
……………………….
فى شقه هند
هند حاطه حله مايه على النار و عماله تقلب فى الارفف تروح تجيب الموبايل و تتصل بحد
هند / ايوه يا ماما ازيك … طب الحمد لله … ماشي يا عم الله يسهلوا … المهم المهم قبل ما تشتمي انتى حاطه المكرونه الاقلام فين … والله و لا كيس مفيش غير عاديه و اسباكيتي … يا فرحتى طب اقفلى اما انزل اشتريلى كيسين … معايا يا ماما هو يعني كيسين المكرونه بكام … انجوى يا ست الكل … هعمل بشاميل اه … لا مش هشيل حاجه تقيله ما تخافيش انا خلاص غليت اللبن و عصجت اللحمه فاضل اعمل البشاميل و اسلق المكرونه و نشرت الغسيل و غسلت اللى فى الطبق … احسدونا بقي ههههههههههههههههه … لا اوعى ما تاخديش على كدا … هههههههههههههههه سلام
هند تقفل التليفون و تروح تبص على ياسمينا تلاقيها نايمه تلبس الاسدال و تسيب الموبايل جنب ياسمينا
هند / خلى الموبايل جنبك عشان لو صحيتي تتلهى بيه جيل اخر زمن
هند تشد شنطتها و تنزل و تقفل الباب وراها
……………………..
فى شقه مختار
جرس الباب يضرب مختار يروح يفتح يلاقي عباده و راجل كمان
مختار / ايه المفاجاه الجامده دى تعالوا ادخلوا
الاتنين يدخلوا و مختار يقفل الباب
عباده / انت مستحمل الزحمه و القرف اللى فى البلد دى ازاى انا ما بحبش مصر من كدا الواحد صدره قفل
مختار / اتعودت ايه الاخبار عندكوا
عباده / مفيش جديد الكبير وزع على البلد كلها سلاح و قفلها و منع دخول اى غريب
الراجل / طوارئ يعني زى ما بتقولوا و زود الحرس في السرايا
مختار / مصلحه زياده امان ما تضرش
عباده / انا رايي ترجع معانا البلد لحد ما نشوف الست دى اخرها ايه احنا سالنا عنها بصراحه الكلام مش حلو مش حلو ابدا
مختار / اقعد كدا بالراحه و احكيلى تشربوا ايه الاول
الراجل / يا جدع طب قول تاكلوا ايه
مختار / يا جدع امال لو ما كنتش جاى بايدك فاضيه
الراجل / معلش اصلنا جايين تفليته ما حدش من الحريم عارف اننا هنا الكبير مكتم على الموضوع على الاخر
عباده / انت عارف الحريم مش هيبطلوا ولوله و يقرفونا
مختار / المهم هعلق على شاى و اطلع بتاو يفك ثوانى
عباده / كبدى عليك يا ابني بتاكل مالفريزر
مختار / ادعيلى ربنا يتوب عليا من الاكل البايت
مختار يدخل المطبخ
عباده / يا عم ما قولتلك شوفلك بت حلوه تتجوزها تيجي تخدمك
صوت مختار / ما كنت شوفت لروحك يا خويا
عباده / هيحصل قريب
صوت مختار / ايه نويت خلاص
عباده يقوم يدخل لمختار
عباده / انا لسه ما لقيتش بس نويت اتجوز يعني
مختار / على البركه
عباده / و انت مش ناوى و لا هتستني تخلص المدرسه الاول
مختار / انا مش بفكر فى الموضوع دلوقت بصراحه نهائي انا مش جاهز و لسه في جيش و فيلم انت عارف
عباده / ايوه عارف
مختار يصب الشاى و يطلع هو و عباده يطلعوا بره يلاقوا الراجل بيقرا فى كتاب
مختار / احكولى بقي عرفتوا ايه عن الوليه اللى اسمها فيرا دى
الراجل يحط الكتاب و ياخد كبايه الشاى
الراجل / مش سايبه حاجه ما بتشتغلش فيها حتى العيال الصغيره ان ما كانتش لا مؤاخذه قله ادب تبقي اعضاء مخدرات سلاح حريم اى حاجه ممكن تتباع بتبيعها
عباده / مجرد ما قولنا اسمها و اوصافها الناس اترعبت سمعتها زى الزفت الراجل اللى بيغلط من رجالتها ما بتموتوش بس بتعمله … اسمها ايه ؟ اسمها ايه
الراجل / فار تجارب بتجرب فيهم المخدرات الجديده اللى بتصنعها او الاسلحه او بتفككهم و تبيع اللى ينفع من اعضائهم المهم
عباده / الراجل اللى مسكناه فى العمليه كان بيفرفر فى الارض اول ما شافها
مختار / ما لهاش كبير يعني اخرها ايه
الراجل / ابوها كان كبيرها و اتخانقوا مع بعض قتلته و مسكت مكانه وليه قادره انا بقول نخلص منها و نكفى الناس شرها
مختار / مش دلوقت مش عاوزين نفتح على نفسنا فاتوحه
عباده / ما بيتعلمش قال نفس الكلمتين دول قدام الكبير و سمع نفس الرد
مختار / و هو فى كلام بيتقال بعد كلام الكبير
……………………………..
قدام شقه هند
هند تطلع السلم و ماسكه كيس فيه كيسين مكرونه كبار تقف قدام الباب و تفتح الشنطه و تدور على المفاتيح و تطلع الفلوس و الكارنيهات و تقعد فى الارض و تفضي كل اللى فى الشنطه و تتخض
هند / لا لا لا فين المفاتيح
هند تدور فى الحاجه اللى فى الارض و تروح تقف قدام الباب و ترجع تدور تانى فى الشنطه الفاضيه و تدور فى الحاجه اللى فى الارض
هند / الموبايل الموبايل … لا ياربي الموبايل جوه
هند تبص على باب مختار و تحط ايدها على الجرس كتير مختار يفتح الباب و عباده و الراجل يقوموا و يتاهبوا
هند / موبايلك دقيقه ارجوك نزلت و نسيت المفتاح و النار قايده على حله الميه و ياسمينا لوحدها نايمه جوه اكلم بابا و لا اى حد يلحقنى
مختار / ثوانى
مختار يدخل يجرى على جوه و عباده يطلع يبص عليها هند تشوفه تتفاجئ عباده يبص فى الارض الحاجه مبعتره تحت رجليها و هند بتبصله برجاء يوطى يلملها الحاجه توطى تلمها معاه
هند / هو اتاخر جوه كدا ليه كل ده بيجيب الموبايل
عباده يطلعلها موبايله
عباده / طب ما تستخدمى موبايلى لو تحبى
هند / شكرا خالص شكرا جدا انا حقيقى مش عارفه اشكرك ازاى
عباده / لا مفيهاش حاجه
هند تاخد منه الموبايل و هى شايله الشنطه و الكيس فى ايدها تلاقي باب الشقه بتاعها بيتفتح و مختار طالع منه
مختار / ياسمينا نايمه و البوتجاز الحله لسه فيها ميه
هند / انت !!! ازاى !!!
……………………..
هند تدخل الشقه جرى تبص على ياسمينا نايمه و تطفى العين على البوتجاز تطلع تلاقي مختار و اللى معاه دخلوا شقتهم تدخل الشقه و تبص على باب البلكونه مفتوح و تحط ايدها على بقها و تروح تبص من جوه على البلكونه عند مختار مفيش حد واقف
هند / هو فى حد فى الدنيا يعمل كدا
هند تدخل المطبخ و تفتح الفريزر و تطلع فرخه تحطها فى حله ميه فى الحوض و تحط حله كبيره و تملاها ميه
………………..
فى كافيه على النيل
شيري و محمد قاعدين و قدامهم اتنين ليمون
شيري / بحلفك بالله لا تزعل و لا تشيل فى نفسك عشان خاطر العيال
محمد / انا كنت طول الوقت بكدب احساسي و اقول مستحيل يعملها دا اخويا الكبير
شيري / هى بس لحظه انفعال لكن هو يعني عمره اتاخر عنك فى حاجه اصبر عليه شويه لما الدنيا تهدى
محمد / خلصت يا شريهان خلصت
شيري / بقولك ايه سيبك من اللى فات و نركز فى اللى جاى انت ناوى تعمل ايه
محمد / اعمل ايه فى ايه هو المبلغ ده يعمل حاجه
شيري / بص انا ممكن ابيع حتتين دهب و نعمل مشروع
محمد / الدهب ده بتاع العيال فلوس جهازهم
شيري / ربنا يفتحها علينا و نبقي نردهلهم
محمد / طب هو مفيش مشروع صغير بالمبلغ اللى معايا اى حاجه تجيب مصاريف اليوم حتى
شيري / معرفش بس ايه رايك فى دكان بقاله صغير اقف فيه و انت فى الشغل
محمد يبصلها
شيري / ياسمينا خلاص كبرت و كلها كام شهر و تروح الحضانه و انا هبقي طول الوقت لوحدى اهو اتسلى و ان كان على الغدى هبقي اجهزه من بالليل و اهو العيال يبقوا يساعدونا لما يبقوا فاضيين
محمد / العيال هتفرح بالمشروع ده هيلاقوا فيه خلاصهم ان كان عبد الله و لا هند
شيري / والله يوسف جدع و طيب بس عصبيته و دماغه الناشفه هى اللى مضيعاه
محمد / دلعهم فيه و موافقتهم لكل رغباته هى اللى بوظته طول عمرهم مبقينه على اخواته البنات بقي انانى و ما بيفكرش غير فى نفسه و بس
شيري / ربنا يهديه
محمد / شوفتى كان بيقول ايه على مختار
شيري / ملناش دعوه بقولك ايه اشرب بقي كبايه اللمون دى و روق دمك امال انا جيباك هنا ليه مش عشان نستعيد ايام شبابنا دا زمان البت هند رشقتنا و لا مليون عين دلوقت
محمد يبتسم و يبص الناحيه التانيه
…………………….
فى شقه هند
هند تفتح الفرن صينيه مكرونه بشاميل تجيب الحته و تحاول ترفعها ما تعرفش تقفل الفرن تاني و تجيب صينيه كبيره و تحط عليه اتنين سرفيس و تغرف فى واحد تلت قطع فراخ بالصوص بتاعهم و تغرف بوله سلطه و تفتح درج و تجيب كام كيس كاتشب و تقف تتفرج على المكرونه و الصينيه
هند / ايه الحوسه دى
هند تروح تجيب الموبايل
هند / ايوه يا عبد الله انت فين
عبد الله / داخل درس الفيزيا اهو
هند / لسه هتدخل
عبد الله / ما ورقه المواعيد عندك على الدولاب هو فى حاجه و لا ايه
هند/ لا يا حبيبي ما فيش حاجه ركز انت فى الدرس بتاعك
عبد الله / ماشي هكلمك لما اخلص يمكن تعوزى حاجه اجيبهالك و انا جاى
هند / ربنا ما يحرمنى منك ابدا …. مع السلامه
هند تقفل و تحط الموبايل
هند / ما بدهاش بقي
هند تلبس الاسدال و تروح تحط المفتاح فى الباب و تروح تضرب الجرس بحرج مختار يفتح
هند / بص انا محرجه منك جدا
مختار / الباب اتقفل
هند / لا لا لا هو انت ممكن تيجي ثانيه
مختار / اتفضلي
هند تدخل الشقه و تروح المطبخ و مختار واقف على الباب هند تطلع من المطبخ
هند / تعال هنا
مختار / ما ينفعش الحج ابو عبد الله مش موجود و لا عبد الله موجود ادخل ازاى
هند / الصينيه فى الفرن مش عارفه اشيلها عشان ايدى … اممم طب ادخل انت و انا هبقي بره لو ده ينفع
هند تطلع تقف بره
مختار / امرى لله
مختار يدخل يطلع الصينيه من الفرن يحطها على الرخامه و يطلع
هند / استنانى هنا ثوانى لو سمحت
مختار يبصلها باستغراب تسيبه و تدخل عباده يطلع من الشقه
عباده / هو فى ايه
مختار / والله ما اعرف
عباده / هتفضل واقف عندك كتير يعني
مختار / هى طلبت منى استناها
عباده / لا ما دام طلبت يبقي لازم تنفذ امال ايه ههههههههههههههههه
عباده يدخل و مختار واقف يخبط كف على كف هند تطلع بره
هند / فى صينيه جوه عليها اكل ليك و للضيوف اللى عندك
مختار / يا خبر والله ما له داعى ابدا احنا
هند / انا عملت الاكل ده بايد واحده لو سمحت قدر المجهود و ما تحرجنيش
مختار يبتسم و يدخل يجيب الصينيه و يطلع هى تدخل
مختار / شكرا
هند / الف هنا
هند تقفل الباب و مختار ياخد الصينيه و يدخل
عباده / يا عيني يا سيدى
الراجل / لا ليك حق تحب مصر و سكن مصر و اكل مصر
عباده / و احنا اللى قاعدين نعيط عليه هناك انه يا عيني عايش على البتاو و الجبنه و الطعميه عشان ما بيحبش اكل الشارع
مختار / تصدقوا خساره فيكوا
مختار يجي يشيل الصينيه الراجل يمسكها
الراجل / عيب عليك يا ابو نسب دا احنا فى بيتك
عباده / بس غريبه اوى بنات مصر تخبط عليك و تدخلك بيتها و اهلها مش هنا
مختار / لا على فكره دى بنت محترمه خالص هى اصلا اول مره تخبط عليا و دا كان غصب عنها اختها الصغيره دى تلت سنين باين و لا حاجه و روحهم كلهم فيها حتى الاكل دى تانى مره اول مره كانت لما جيت ساعدونى اشيل الحاجه اطلعها فما كانش ينفع يشموا ريحه الاكل اللى جوه الحاجه و ما يدوقوهوش فبعتوا تاني يوم اكل و بعتوا النهرده
عباده / والله فيهم الخير … بس اكلها دلع كدا لا سمنه و لا قشطه لا ليك حق ما ترتاحش فى الاكل غير فى البلد
مختار / ما كنتش اعرف انها بتعرف تطبخ اصلا كنت كتير اسمع اخوها بيقولها بصوت عالى اتعلمى الطبخ الاول و بعدين اتكلمى
الراجل / يا عم كتر خيرها البت دراعها مربوط و عملت اكل هنتقمر على ايه هى ايدها دى من ايه ما تعرفش
مختار / حادثه كدا
الراجل / الطف يا رب
عباده / كل كل خلينا ندخل نريح ساعه قبل ما نسافر
مختار / تسافروا فين انتوا لحقتوا
عباده / احنا جينا بس نطمن عليك و على الرجاله انما انت عارف المشاغل
الراجل / لعلمك اختك ما تعرفش انى هنا انا روحت مع عباده اجيب بضاعه لحسن تغلط قدامها و لا حاجه
مختار يهز راسه و ياكل و هو ساكت
……………………….
فى شقه يوسف
يوسف بيكلم وسام فى التليفون
وسام / دى اتكلكعت خالص هتحلها ازاى دى
يوسف / مش عارف بس اكيد هحلها يعني
وسام / طب باباك و عمك مش هيتصالحوا يعني الموضوع كبر بينهم اوى
يوسف / بصراحه اه اصلك ما تعرفيش عمى يعنى عصبي و اهم حاجه عنده ولاده
وسام / كل ده عشان شديت مع عبد الله
يوسف / لا عشان مختار بيه غاسله دماغه
وسام / يادى مختار اللى طلعلنا فى البخت
يوسف / دا واد ابن كلب مش مظبوط و بتاع بنات بس قدام عمى بقي عامل الشيخ مختار
وسام / قدامنا كلنا بصراحه
يوسف / بس انا مش هسكت والله
وسام / لا يا يوسف اوعى بص انت لو عاوز نصيحتي اى احتكاك بمختار بيزود الطين بله
يوسف / يعني اسكتله
وسام / انت مشكلتك فى مختار و لا هند مين فيهم اللى يهمك اكتر
يوسف /هند طبعا
وسام / يبقي ما تخليش حاجه تشتتك
يوسف / معاكى حق بس
وسام / بس ايه بس بس ايه ركز ازاى تصالح هند بدل ما تضيع كل اللى عملته
يوسف / يعنى اعمل ايه
وسام / هقولك و انت تعمل زى ماهقولك بالظبط
يوسف / ماشي قولى
…………………………
فى شقه هند
هند / يعني انتوا مش زعلانين مني
محمد / اكيد لا طبعا بالعكس انا شايف انك اتصرفتي صح بس لو كنتى استنتينا نيجي و نوديهاله احنا كان بقي احسن
هند / كان الاكل هيبرد و هما كمان اكيد كانوا هيجيبوا اكل لو ياكلوا اى حاجه ده اللى جه فى بالى
عبد الله / بس بصراحه محترم اوى عجبنى لما مرضيش يدخل
شيري / عجبك دا مجنون فى حد ينط من البلكونه
عبد الله / الحق عليه يعني انه لحق بنتك
شيري / كان كسر الباب كان ممكن يقع يموت
هند / ما كانش هيموت كان هيتكسر و اسوء حاجه يتشل
شيري / الصبر من عندك يا رب
هند / ههههههههههههههههههه هو اللى قال كدا انا مالى
عبد الله / سيبكوا من مختار عملتوا ايه مع عمى
محمد / المتوقع ادانا فلوسنا و خد الوصل
عبد الله / نعم يعني ايه
شيري / احنا هنشوف محل ناجره و نفتح محل بقاله بالفلوس اللى معانا و هنمسك ايدنا فى المصاريف شويه
عبد الله / ان شالله ناكل عيش حاف المهم يخرجوا من حياتنا
هند / هما فعلا هيخرجوا من حياتنا ؟
عبد الله / نعم يا اختى
محمد / يوسف فى الاول و الاخر ابن عمكوا
عبد الله/ يعني ايه يعني هيفضل كل شويه ينطلنا يقرفنا بجنانه
محمد يتنهد و يقوم يدخل اوضته و كلهم عينهم عليه
شيري / ابوكوا عمل كل اللى يقدر عليه ابوكوا تعبان ضغطه عالى ماعدش فى فى ايده حاجه يعملها
شيري تبتسملهم و تقوم عبد الله يبص لهند
عبد الله / يعني ايه
هند / يعني كل واحد فينا يعمل اللى عليه يا عبد الله نزاكر و نركز فى مستقبلنا و ما نتعبهمش اكتر من كدا
عبد الله يهز راسه و يدخل اوضته و هند تلبس الاسدال و تطلع تقف فى البلكونه مفيش حد تبص فى الشارع تلاقي مختار بيسلم على عباده و جوز اخته و يركبوا عربيتهم و يمشوا مختار يبص لفوق يشوف هند يبتسموا لبعض و مختار يركب عربيته و يمشي هند تتابعه لحد ما يمشي هند تدخل جوه
…………………..
فى السرايا تانى يوم
انتصار / طب الحمد لله طمنتنى بس مش كنت قولتلى كنت بعت معاك زواده و لا حاجه دا تلاقيه
الراجل / برده يا ام فاتن برده امال انا بقول ايه من الصبح
انتصار / و انا يعني هفرح لما اعرف ان جيرانه بيبعتوله اكل الا قولى حلوه
الراجل / هى مين دى
انتصار / هند اللى انتى حكيتلى عنها
الراجل / لو على الحلاوه فهى حلوه بس خلاصه القول عشان تقولى سليمان قال البت مصرويه فى الاول و فى الاخر لا هتقدر على عيشتنا و لا احنا هنستحمل طبعها
انتصار / يا خويا ايه الكلام ده
ناصر يدخل
ناصر / يارب يا ساتر
انتصار / تعال يا خويا
ناصر / و اجى ليه انتى مش خطفتى اخوكى من على الباب و هاتك يا ودوده كلتى ودان الراجل مراته ما شافتوش
انتصار / الله مش بطمن على مختار
ناصر / و اطمنتى
انتصار / اهو هعمل ايه يعني
سليمان / انا هقوم انا بقي ابص على جماعتى
ناصر / ليه يا راجل ما انت قاعد منورنا
سليمان / ههههههههههههههههه ماشي يا كبير
سليمان و ناصر يبصوا لبعض و يضحكوا سليمان يمشي و يقفل الباب وراه
انتصار / عباده حكالك
ناصر / حكالى
انتصار / طب و ناوى تعمل ايه
ناصر / فى ايه
انتصار / الله دا اللى ادى ابني تمره نزلت حلاوتها بطنى مش لازم نكرم الناس اللى كارمين ابننا
ناصر / شوفى عاوزه تعملى ايه و اعمليه ما تشغلينيش بالحاجت دى يا انتصار
انتصار / ايه رايك نعملهم زياره نشكرهم و اهو يبقي عيش و ملح
ناصر / عيش و ملح برده يا انتصار
انتصار / جرا ايه يا راجل هو انا قولت حاجه
ناصر / و هو لازم تقولى عشان افهمك برده عيب عليكي
انتصار / والله قصدى خير دا بيقول البت عملتله اللقمه و ايدها مربوطه يا كبدى
ناصر يتنهد و هو مبتسم انتصار تبتسم بخجل
…………………….
فى الكليه
هند قاعده مع وسام ويمني فى المدرج
وسام / والله ان ما كنتى جيتي النهرده لكنت طبيت عليكي فى البيت
هند / اديني جيت يا اختى
يمنى / المهم سلامتك و ابقي خدى بالك يا بنتي
هند / ساعه القدر بقي الكبايه وقعت فجاه بس الحمد لله
وسام / قدر و لطف الحمد لله
يوسف يدخل المدرج يروح ناحيه هند
يوسف / كنت عاوز اتكلم معاكى يا هند لو سمحتى
هند / ممكن بعد المحاضره الدكتور زمانه جاى
يوسف / تمام هعزمك على الفطار فى الكافتريا بعد المحاضره لحد السيكشن ما يبدا
هند / انا فطرت ممكن نشرب شاى لو تحب
يوسف / احب عن اذنك
يوسف يمشي يروح يقعد جنب صحابه عينه تيجى فى عين مختار متابعه
وسام / هو ايه اللى حصل ده هو انتوا متخانقين
هند / العادى يعني
وسام / بس شكله زعلان اوى
الدكتور يدخل
هند / الدكتور جه الدكتور جه
الكل يتعدل فى قعدته و يركزوا
……………………….
فى شقه محمد
شيري بتتكلم فى التليفون
شيري / ان شاء الله على الساعه ٨ نكون عندك … لا مش هنتاخر ان شاء الله … مع السلامه
شيري تقفل باب الشقه يتفتح و عبد الله يدخل شيري تبص على ساعه متعلقه على الحيطه
شيري / جاى بدرى يعني
عبد الله / الدرس اتلغى المستر تعب و وده المستشفي
شيري / لا اله الا الله
عبد الله/ قولت اروح ادخل الحمام و اكل لقمه و انزل بدل ما اقعد التلت ساعات دول بلف فى الشوارع
شيري / مرزق من يومك انا لسه طافيه على الاكل خش الحمام على ما اغرفلك
عبد الله / هو انتى كنتى بتكلمى مين
شيري / سمسار هيفرجنا على محلات فى المنطقه اهو يمكن
عبد الله / و هتجيبوا البضاعه منين
شيري / سالت كذا حد قالولى الموضوع سهل الحاجه بتجيلك لحد عندك قولت يا مسهل الحال يارب
عبد الله / ان شاء الله خير
شيري تبتسم و عبد الله يدخل الحمام
………………
فى الكافتريا
يوسف يسحب الكرسي لهند هند تسحب كرسي قدامه و تقعد
يوسف / انا كنت
هند / احنا فى الكليه يا يوسف الكل هيبص علينا
يوسف / ماشي يا ستى اللى يريحك ها تحبي تاكلى و لا تشربي ايه
هند / اقعد بس قولى كنت عاوزني في ايه
يوسف / طب اجيب حاجه نشربها و احنا بنتكلم طيب احنا فى الاول و الاخر ولاد عم يعني مش معنى اللى حصل بين بابا و عمى اننا هنقضيها انا و انتى رسمي
هند / شاى يا يوسف
يوسف يبتسم و يقوم يجيب الشاى و هند بتبص حواليها تلاقي مختار و صحابه بيقعدوا على ترابيزه قريبه تبتسم و تكتمها و تعمل بتلعب فى الكتب اللى معاها
……………..
عند ترابيزه مختار
ماجد / و دا من ايه يعني
مختار / ملناش دعوه
ماجد / هى مش لسه متخانقه معاه و قاطعه شريانها دا حتى الجرح لسه ما لمش
هشام / ولاد عم فى الاول و الاخر ولاد عم
مختار / قوله
فيرا تدخل الكافتريا و تشد كرسي و تقعد قدام مختار و تبتسم مختار يبان على وشه الغضب
فيرا / هاى شباب
ماجد / هاين تلاته اربعه مليون هاى
فيرا / هههههههههههههههههههه
مختار / احنا فى الجامعه
فيرا / احلى ايام حياتكوا انجوى بجد لان الايام دى مش هتتعوض
ماجد / افهم من كدا انك خلصتي كليه
فيرا / حتى صحابك حبيتهم يا مختار انا شكلى يدى فى الجامعه ؟؟ هههههههههههههههههه
مختار / بعد اذنك ثوانى
مختار يقوم و فيرا تبتسم لماجد و تقوم وراه
ماجد/ ليه ليه يا رخم ليه
هشام / البت دى شمال
ماجد / لا يا جدع مختار ما لوش فى السكه دى دا الواد المؤمن بتاعنا
هشام / و انت شايف ان مختار مظبوط معاها شكلها يا مزقوقه عليه يا راميه روحها
ماجد / مزقوقه من مين
ماجد يبص على يوسف قاعد مع هند و متابعين مختار
ماجد / يا ابن الكلب يا واطى
هشام / مش بعيد عليه
ماجد و هشام يبصوا لبعض و يبصوا على مختار واقف مع فيرا و مضايق و بيخبط برجله فى الارض
…………………..
عند هند
يوسف / عشان تصدقونى لما قولت انه ابن كلب واطى
هند تشرب من الشاى و تعمل مش مهتمه
هند / ما لناش دعوه المهم انت كنت عاوز تتكلم معايا فى ايه
يوسف/ انا مش مبسوط من اللى حصل بين بابا و عمى خصوصا انه حصل بسببنا
هند / كان لازم هيحصل لو مش النهرده يبقي بكره
يوسف / انتى عاوزه ايه يا هند انتى بجد مش عوزانى فى حياتك
هند / يا يوسف انت عصبي اوى و عنيف
يوسف / انتى يعني مش شايفه تصرفاتك و لا انتى عاوزه واحد بارد بقي
هند / ممكن تهدى احنا مش بنتخانق انا مش بعرف اتكلم معاك
يوسف / انتى اصلا مش بتحاولى تتكلمى معايا مش بتحاولى تقربي منى و لا تفهميني يا هند انا عمرى ما كنت اقصد حاجه وحشه
هند / الغايه لا تبرر الوسيله
يوسف / ازاى يعني يعني انا لما اخاف عليكي لما احميكي و احافظ عليكي
هند / دا مش معناه تخنقنى و تتحكم فيا
يوسف / ما انتى ما بتسمعيش الكلام يا هند
هند / فى كلام ما بيتسمعش يا يوسف فى حاجات مش من حقك تتكلم فيها اصلا
يوسف / و اخرتها يا هند الدنيا هتفضل توسع بينا و اهلينا يخسروا بعض على ايه
هند / انت عاوز ايه
يوسف / بصي ماشي معاكى حق فى حاجات بعملها بتدايقك و انتى فى حاجات بتعمليها بتضايقني ايه رايك ندى لنفسنا فرصه بصي يا هند انا لو حاجه مضيقانى هقولك و جربي مره تغيرى و شوفي انا صح و لا لا بصي للحاجه بعنيا انا راجل و بشوف العيال بتبص عليكي بتجنن
هند / هو انا ماشيه عريانه و لا بتمايص في ايه يا يوسف
يوسف / و هما مش بيبصوا غير على العريانه بس بصي يا هند انا اوعدك انى ابقي اهدى و انتى بس اسمعيني
هند / تمام هحاول
يوسف / اعدى عليكي
هند / لا يا يوسف ما تعديش عليا انت مش ملزم توديني و تجبني انا حتى مش فى طريقك
هند تبص على مختار تلاقي البنت اللى معاه بتدحك على اخرها
……………….
عند مختار
فيرا / ههههههههههههههههههههههههه انت بتتكسف ما يبانش عليك خالص
فيرا تفتح شنطتها و تطلع ازازه برفيوم و ترش على رقبتها و ايدها
مختار / لو كنتى فاكره ان الجامعه ايدي اللى بتوجعنى لا فوقي نطك ليا هنا كل شويه مش فى صالحك انتى
فيرا / اخص عليك دا انا كنت جايه اسلم عليك قبل ما اسافر بصراحه كنت فاكره ان المصري الصعيدى شهم و كريم بس انت بتعاملنى وحش اوى يا مختار هو انا عملتلك حاجه
مختار / كل خير هو انتى اللى زيك يجي من وراه الا كل خير باماره الجيم و لعلمك لسه ما جاش اليوم اللى رجاله الزيني يعملوا فيه حساب لحرمه
الابتسامه تروح من وش فيرا
فيرا / اوعى تزعلنى يا مختار هتزعل اوى لو انا زعلت
مختار / والله انا مش عاوز ازعلك و لا ازعل غيرك بس ان اردت ان تطاع فامر بما يستطاع و لا ايه
فيرا / انا ما بامركش انا بطلب منك بادب اسمع يا مختار الشحنه اللى داخله مصر لا هى سلاح و لا مخدرات انا ممكن ادخلهم قانونى بس هيكلفونى كتير
مختار / شحنه ايه
فيرا / شويه بنات غلابه ظروفهم صعبه في بلدهم قولت اساعدهم مصر ام الدنيا برده
مختار / حريم !!! بتهربى حريم
فيرا / ما تبقاش عنصري ما شباب مصر بيغرقوا فى البحر كل يوم و هما بيحاولوا يهاجروا هجره غير شرعيه ايه الجديد
مختار / هيدخلوا امتى
فيرا / كدا احبك
مختار / اتعدلى هيدخلوا امتى
فيرا / الشهر الجاى
مختار / هتكلم مع الكبير و ارد عليكي
فيرا / انا مسافره النهرده هكلمك انا اعرف ردك
مختار / اتفقنا
فيرا تلبس النضاره الشمس و هى مبتسمه
فيرا / اتفقنا .. سلام
فيرا تمشي مختار يبص على هند قاعده مع يوسف متبعاه و مش مبسوطه يروح يقعد مع صحابه
ماجد / ايه حكايه البت دى
مختار / قولتلك عاوزه خدمه تبع ابن عمى
هشام / لا وقفتها و لا ضحكتها مريحانى
مختار / ربنا يتوب علينا محتاج قهوه ضرورى مصدع
ماجد / هقوم اجبلك
……………….
فى حمام البنات
وسام بتظبط طرحتها
وسام / بيقولوا الجيرل فريند بتاعته من اداب
يمنى / مختار الزيني !! مستحيل عمرى ما اصدق
وسام / ليه يعني مش شاب على فكره سمعت كلام انه كان بايت عندها اول امبارح باين
هند / ما حصلش لو كنتى قولتى اى يوم تانى كان يمكن اصدق بس اول امبارح لا اول امبارح كان فى الجيم و روح متاخر سهر كتير مع عبد الله
يمنى / انتوا ايه حكايتكوا صحيح بقاله قد ايه ماجر جنبكوا و الفتره اللى فاتت كل حاجه اتغيرت فجاه
هند / ما فيش حاجه اتغيرت هو علاقته ببابا و عبد الله كويسه من اول يوم هو بس يوسف و المشاكل اللى كان بيعملها هى اللى جابت رجل مختار
وسام / يوسف و لا انتى لما طلبتي منه يوصلك
هند / انا اللى دخلته فى مشاكلى ارتاحتى و بعدين ركزى فى طرحتك دى يمكن نلحق المحاضره في يومنا
وسام / خلاص خلصت يخربيت اللى يعصبك
هند تبتسم و تمشي هى و البنات
…………………..
فى شقه مختار
مختار بيتكلم فى التليفون
مختار / انا عارف انى كان لازم اقولك الاول بس ما كانش ينفع اسكت
ناصر / و انت عارف الحريم دول دخلين برضاهم و لا مجبورين و لا جيباهم هنا تعمل بيهم ايه
مختار / قدامنا اسبوعين نعرف فيهم
ناصر / انت كدا بتجر نفسك و بتجرنا كلنا معاك فى سكه ما لناش دخل بيها يا مختار
مختار / ما كانش ينفع اسكت كدا كدا كانت هاتدخلهم بس احنا نقدر نساعدهم
ناصر / ازاى و احنا اللى هندخلهملها
مختار / فى حاجه فى دماغى بس مش هتعجبك
ناصر / يبقي ما تقولهاليش فى التليفون قولهالى لما نيجي احنا جاينلك بكره
مختار / خير
ناصر / جاينلك بزياره ليك و لبيت الحاج ابو عبد الله
مختار / مش فاهم
ناصر / هى انتصار غريبه عليك قالولها انهم بعتولك اكل قالت اللى يكرمنا نكرمه و الحق يتقال البت مريم قافله على روحها الاوضه من ساعه ما قولنالها مش هتنزل مصر
مختار / ما انا كلمتها و قالت مش زعلانه
ناصر / انت عارف انى مليش خلق للدلع ده بس انتصار و قلبها هى جديده عليك
مختار / و سماح هتيجي ؟
ناصر / مش عارف هكلم عمى و اشوف
مختار يطلع البلكونه يلاقي هند واقفه و بصاله
مختار / تمام يا خويا اشوفكوا بكره .. سلام
مختار يبص لهند
مختار / رضاكى
هند / ان جائكم فاسق بنبئ فتبينوا .. مين دى
مختار/ البنت اللى كنت بكلمها فى الكليه النهرده
هند تهز راسها
مختار / فاكره عباده اللى كان عندى ابن عمى اللى كان واقف معاكى بره
هند / ما كنتش اعرف ان اسمه عباده المهم
مختار / دى بقي من طرفه و بخلصلها ورق عشان هى مش من مصر و بالمناسبه هى اكبر منى يعني بس بما انها اجنبيه فبتلبس كدا
هند / و سورى انت تخلصلها ورق ازاى يعني
مختار / مش انا انا بس بوصلها بمحامى كويس حد معرفه كدا يعني عشان ما تتبهدلش حتى عباده كان هنا بيطمن الموضوع وصل لايه
هند / على فكره انا بسال عشان فى كلام مش لطيف اتقال عنكوا فى الكليه
مختار / الناس ما بتبطلش رغى
هند / اجتنبوا الشبهات
مختار / حبيبك يبلعلك الظلط و عدوك يتمنالك الغلط
هند / انا قولت اقولك و خلاص يعني
مختار / تشكرى و لو اى حد كان سالنى قبل ما يتكلم كنت هقوله عادى
هند / فاكر يوم خناقه يوسف و عبد الله فى الشارع
مختار / اه فاكر
هند / انت قولت لعبد الله انك كنت فى الجيم
مختار / اه دا انا كنت هطبق هناك بس حصلت خناقه و كنا هنطلب البوليس
هند / يا خبر ليه ايه اللى حصل
مختار / الناس بقي خلقها ضيق ما حدش طايق حد
هند / معاك حق
مختار / الحمد لله روحت من خناقه جيت لقيت خناقه مرزق اوى
هند / ههههههههههههههههههه معلش بكره تتعدل
مختار / عارفه مريم بنت اخويا اللى وريتك صورتها
هند / اه مالها
مختار / جايه زياره بكره هبقي اعرفك عليها
هند تبتسم مختار يبص فى الشارع يلاقي عربيه يوسف داخله
مختار / يوسف جه انا هدخل عشان ما يعملش حوار على الفاضي
هند تبص في الشارع و هى ماسكه فى السور مختار يدخل جوه يوسف ينزل من العربيه و معاه ورد و علبه جاتوه و يدخل المدخل
……………………
فى السرايا
فاطمه / قولت لا يعني لا هو فى ايه
سماح / عشان خاطرى يا اما نفسي اشوف مصر و اتفسح
فاطمه / رجلى على رجلك انا لقياكى فى الشارع
سماح / هو انا هبقي لوحدى ما خالتى انتصار و عمى ناصر و مختار و مريم هيبقوا معايا سبيني اروح
فاطمه / يا بت هناك بيخطفوا البنات و يبيعوا اعضائهم
سماح / مش هفارق ايد خالتى خالص بس سبيني اروح معاهم
فاطمه / شوفى اخوكى لو هيروح معاكم روحى
سماح / الله يعني هو عمى ناصر مش كفايه
فاطمه / هو انتى مش هتبطلى زن الا اما اقوم اديكي باللى فى رجلى غورى من وشي
سماح تبص لمامتها و تقوم تطلع بره و تقفل الباب تقابل مريم
مريم / انتى هنا و انا قالبه عليكي الدنيا
سماح / عاوزه ايه
مريم / استاذ عصام تحت عشان الدرس انتى في ايه مالك
سماح / يووووه دا انا نسيته خالص ثوانى هجيب حاجتى و انزله اسبقيني انتى انا جايه اهو
مريم / ماشي عن اذنك
مريم تمشي و سماح تبص على اوضه مامتها و تمشي
……………………..
فى شقه هند
يوسف / انا والله مضايق جدا من اللى حصل
محمد / يا يوسف
يوسف / يا عمى انت لو شوفت بابا يصعب عليك ان كانت زعلان منى حقك عليا و لو عاوزنى ابوس راسك والله ما اتاخر بس انت و ابويا ما تزعلوش من بعض
محمد / انا مش زعلان يا يوسف
يوسف / بابا قالى ان نصيبك فى المحل ماشي زى ما هو و نسبتك ثابته و الفلوس هتوصلك بصوره من الحسابات اول كل شهر زى ما كانت ماشيه هو بس ما كانش عاوز تعب السنين يضيع فى لحظه غضب
محمد / خلاص يا يوسف فضها سيره بقي
يوسف / يعني اقول لابويا يجي و لا ايه اصله خايف يجي تحرجه الموضوع يكبر لكن انت عارفه يا عمى بيحبك قد ايه دا هو اللى مربيك
محمد / و الله ما فى حاجه زعلتنى من ابوك قد الكلمتين دول بقى انا عمرى حد جالى بيتي و احرجته
يوسف / طول عمرك ابن اصول يا عمى و ما فيش لا فى كرمك و لا اخلاقك
هند تدخل تحط صينيه الشاى و تقعد
محمد / هند قالتلى انكوا اتكلمتوا و حليتوا المشاكل اللى بينكوا
يوسف / والله يا عمى هو سوء تفاهم مش مقصود و انا قولتلها وجهه نظرى و الحاجات دى ياما بتحصل يعني مش جديده علي حضرتك
محمد / اهم حاجه عندى انكوا تبقوا مبسوطين و هاديين المشاكل ما بتجبش الا وجع القلب
يوسف / ربنا ما يجيب مشاكل ابدا يا عمى
…………………..
فى شقه مختار
جرس الباب يضرب مختار يروح يفتح و فى ايده كبايه شاى يلاقي عبد الله شايل صينيه اكل عليها محشي
عبد الله / اوعى تكون اتغديت
مختار / هو انا اتغديت بس اتغدى تانى ادخل ادخل
عبد الله يدخل يحط الصينيه على الترابيزه و يقعد يقلب فى القنوات
عبد الله / انا قولت اجى افتح نفسك بدل ما انت لوحدك و بصراحه انا جيت عشان اطفش من يوسف دخلت لقيته قاعد و فارش و لا كانه عمل حاجه
مختار يقعد جنب عبد الله
مختار / حاول ما تاخدش الموضوع على اعصابك ياما بيحصل بين الاهل
عبد الله / لا يا عم مش للدرجادى
مختار / و اكتر والله و فى الاول و الاخر بتتراضوا اصل اللى بينكوا دم مش ميه
عبد الله / كان ممكن اللى بينا يبقي دم فعلا لولا ستر ربنا
مختار / تسلم ايدها دا اكيد طبيخ الحجه ام عبد الله
عبد الله / انت ليه بتقول الحاجه ام عبد الله ما تقول شيري زى باقي الناس
مختار / عيب ما يصحش
عبد الله / يا سيدي قول طنط شريهان لما بتقول الحجه ام عبد الله بحس انها فارشه بجرجير على ناصيه الشارع
مختار / انت اللى مكبر الدنيا و بعدين الست الوالده دى ليها حرمتها يعني حتى اسمها مش اى حد ينطقه و لا يجيبه على لسانه لا بخير و لا بشر
عبد الله / ليه يعني ما عادى
مختار / انت عارف ليه بنقول عليهم حريم
عبد الله / اهى دى كمان بستغربها فيك ما تقول بنات و لا ستات عادى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
