رواية البر التاني الفصل الرابع والستون 64 بقلم لولو محمد
رواية البر التاني الجزء الرابع والستون
رواية البر التاني البارت الرابع والستون
رواية البر التاني الحلقة الرابعة والستون
كوثر / لو روحتى وراهم لا انتى بنت اخويا و لا اعرفك
خديجه / ربنا يهديكى يا عمتى … سلام يا اما
ام مغاورى / سلام يا ضنايا
كوثر / بكره يبكوكى على مغاورى زى ما خدوا منى عباس
ام مغاورى / الصبر من عندك يا رب
ام مغاورى تمشى و ماجده تبص لكوثر تقعد تعيط و ماجده تطبطب عليها و تعيط معاها
……………………….
على السلم
سماح / الوليه اتجننت
فاطمه / ما اسمعش حسك
سماح / والله محتاجه علاج
خديجه تنزل تجرى و وراها ام مغاورى
خديجه / استنوا استنى يا اما
فاطمه تبص
فاطمه / خليكي جنبها هى محتاجه الكل حواليها
خديجه / غصب عنى مش هستحمل كلامها كلنا فينا اللى مكفينا و اللى مات ده كان اخويا الكبير
خديجه تعيط فاطمه تاخدها فى حضنها و تطبطب عليها
ام مغاورى / ربنا يصبرها من ساعه ما جوزها مات و هى فى دنيا تانيه و احنا صابرين و نقول بكره ربنا يهديها و اهو موت عباس الله يرحمه كمل عليها
سماح / بس دا اجله يا عمتى عباس نجى من حاجات اصعب من دى بكتير
ام مغاورى / تعددت الاسباب و الموت واحد بس وجع الفراق بيقتل العقل يا بنتى و الله الواحد ما هواش مصدق اللى جرالنا ده
فاطمه / بكره ربك يعدلها
ام مغاورى / ما تاخديش على خاطرك منها راعى اللى هى فيه
فاطمه / من غير ما تقولى و لا كانها قالت حاجه يلا فتكوا بعافيه
ام مغاورى / خليكي شويه
فاطمه / لسه ورايا هم ما يتلم عاوزه اعدى على الناس اشوف لو ناقصهم حاجه لو كان الكبير بخير كانت انتصار قامت بالواجب بس مش هتقدر تسيبه فى الحاله دى
خديجه / تعبان اوى يا اما تعبان اوى
ام مغاورى / ليه خير سلامته الف سلامه انا سمعت انها طلقه فى الكتف و طلعوها
سماح / لو كان على الطلقه كانت هانت بس هو شايل هم كل الناس اللى ماتوا
ام مغاورى / ابو مغاورى راخر بكلمه فى التليفون بيرد عليا بالعافيه و ما هوبش من البيت من ساعه اللى حصل
فاطمه / ربنا يعدى الايام دى على خير و ان شاء الله حقهم راجع
ام مغاورى / ما تاخذيناش يا اختى على اللى حصل
فاطمه تبتسم و تطبطب على ايد ام مغاورى و يطلعوا بره يلاقوا عباده بيركن عربيته
عباده / الله رايحين على فين
فاطمه / روح اختك و مراتك و انا ورايا كام مشوار و احصلكوا
عباده / انتى مش عاوزه تقعدى شويه يا خديجه
خديجه / روحنى يا عباده ابوس ايدك يلا
عباده يهز راسه و الكل يركب و يتحركوا
……………………..
فى شقه بره البلد
رشيد بيفتح الباب سمر واقفه شايله شنطه صغيره رشيد يبتسم سمر تدخل و تقفل الباب
سمر / شقه مين دى ؟
رشيد / ايجار
سمر تهز راسها
رشيد / عامله ايه ؟
سمر / كويسه
رشيد / مالك ؟ حد عمل معاكى حاجه ؟ حد قالك حاجه؟
سمر / مفيش لا انا بس … العادى بتاعى ما تشغيلش بالك
رشيد / طب اقعدى كليلك لقمه انا طابخ النهرده بايدي
سمر تبتسم
رشيد / ثوانى هجيب الصينيه من المطبخ و تشوفى بنفسك رشيد لما بيبدع
رشيد يدخل المطبخ سمر تدخل الاوضه و تحط الشنطه على السرير و تفتح جيب فيه ازازه البرفيوم و شريط الحبوب تفضل بصالهم كتير رشيد يدخل و يقف على الباب
رشيد / الاكل
سمر ترمى الحاجه فى الشنطه و تبصله بتوتر
رشيد / صينيه بطاطس بالفراخ انما ايه عجب العجاب
سمر / تسلم ايدك
رشيد / تعالى
رشيد يدخل يمسك ايدها و تمشي معاه لحد السفره يمسكلها الكرسي يقعدها
رشيد / انا فى الجنتله ما عنديش ياما ارحميني
سمر / عرفت اللى حصل فى بلد صاحبك
رشيد/ مصر كلها عرفت انا مش هعرف … فيرا بتلعب بالنار و هتتحرق بيها ان شاء الله
سمر / ما افتكرش سيباهم اخر انبساط و ضحك و سخسخه و لا كان فى حاجه
رشيد / حلاوه روح مش اكتر كلى كلى
رشيد يغرف لسمر
رشيد / الحكومه هتهجم عليها و هتجيب عليها واطيها دول فجروا القسم و احرجوا الحكومه و خلو اللعب على المكشوف
سمر / هى عامله حسابها لكل ده
رشيد يبص لسمر
سمر / هاديين اوى الاول الرجاله كانوا بيتحركوا زى النحل و فجاه كلو بقي هادى اوى اكيد عاملين حسابهم لكل ده
رشيد / و الناس اللى ماتوا دول اهليهم مش هياخدوا بتارهم دول صعايده عارفه يعني ايه صعايده
سمر / انا مش جعانه كل انت بالهنا و الشفا عن اذنك
سمر تيجي تقوم رشيد يمسك ايدها
رشيد / فى ايه ؟
رشيد يشد سمر يقعدها
سمر / مفيش
رشيد / بت اتعدلى بدل ما اللبسك الطبق ده فى وشك فى ايه
سمر / والله ما فيش ما عدتش حاسه بحاجه و لا حتى جوايا
رشيد يسيب ايدها
سمر / خيط رفيع رابطنى بالدنيا هاين عليا اقطعه و ارتاح
رشيد / سمر
سمر / ايوه يا رشيد
رشيد / فتره و هتعدى
سمر / ان شاء الله عن اذنك
سمر تقوم و تدخل تقفل على نفسها الاوضه
رشيد / كان نفسي اقول نكديه بس للاسف انا راخر شرحك
رشيد يتنهد و يسيب الاكل و يقوم
…………………..
فى اوضه هند
هند / دا انتحار عارف ده
مختار / بالعكس
هند / انت بتفكر بدالها بدماغك انت واخد بالك من ده
مختار / اى مساله فى الدنيا بتبقي معطايات هتطلع نواتج
هند / لا لا لا مش وقتك خالص تمام فيرا بتفكر بره الصندوق انت كدا مش بس من جوه الصندوق انت بتقفل على نفسك جواه كمان
مختار / احتمال برده
هند / انا رايي انك تسمع لزياد و
مختار / مش هيلاقوا حاجه هناك و هو عارف ده كويس
هند / لو انت ساعدته
مختار / برده مش هيلاقوا حاجه هناك الحل القانونى مش هيجيب نتيجه يا هند
هند / انت بس صعبان عليك ان حد تانى ياخد تارك صح
مختار / انا بفكر بعقلى
هند / وفيرا هتفاجاك زى ما طول الوقت كانت بتعمل و هترجعلى زى ما روحت زى ما جيت دا ان رجعت
مختار / ابقي فكريني اجيلك كل ما احتاج تشجيع عشان انتى … محبطه
هند/ انا مش بعرف اطبل تمام
مختار يبتسم و لسه هيقول حاجه يسكت
هند / ايه ؟
مختار/ مش وقته
هند / لا بجد فى ايه ؟
مختار / كنت هقول ما بتعرفيش تطبلى بس بتعرفى ترقصي بس
هند / انت مزاجك رايقك خطه عباده مخلياك حاسس ان فى طريق قصير تاخد بيه حقك
مختار / و جريت عليكي اقولك و انتى فى المقابل
هند / تراهنى انها هتفشل
مختار / من قال لأخيه تعال أقامرك فليتصدق
هند / ايه ؟
مختار / حديث الرهان حرام
هند / انا فى ايه و هو فى ايه … تمام انت صح سورى بس فكر فى كلامى و اتكلم مع عباده تانى و فكروا فى فكره تانيه تكون احسن
مختار / تمام … ممكن ننام بقي
هند /ممكن … تصبح على خير
هند و مختار يناموا فى السرير و هند تديله ضهرها يعمل بيكح
مختار / نكحديه
هند تبصله
هند / قولت حاجه
مختار يرفع حاجبه ببراءه مصطنعه هند تديله ضهرها تانى و تعمل بتكح
هند / كحبان
مختار يبتسم و ينام على ضهره و يبص للسقف و هو بيفكر الابتسامه تروح من وشه يبص على هند تانى مش بتتحرك يرجع يبص لفوق
……………………
فى اوضه خديجه تانى يوم
خديجه لابسه الاسدال و قاعده على سجاده الصلاه بتقرا قران و عباده بيتابع كاميرات المراقبه على اللاب بتاعه
خديجه / صدق الله العظيم
خديجه تقفل المصحف و تقوم تقف تروح تحط المصحف على الترابيزه و تقلع الاسدال و تلبس عبايه سوده
خديجه / بيقولوا مغاورى هيخرج بكره
عباده / ايوه
خديجه / مش هتروح الدفن
عباده / اكيد رايح امين معاهم اول ما الاجراءات تخلص هيكلمنى
خديجه / بتعمل ايه
عباده / بشوف الشوارع مداخل و مخارج البلد خايف الخسه تخليهم يهاجمونا فى الدفنه
خديجه / حسبى الله و نعم الوكيل
خديجه تتنهد عباده يقفل الباب
عباده / ما تقلقيش الجيش و الحكومه رادمين الطرق و رجالتنا فى كل حته … انا بس … زياده امان يعنى
خديجه بتلبس الطرحه
عباده / انتى بتلبسى ليه من دلوقت
خديجه / دا ابن عمتى و جوز اختى يا عباده مش هروح الدفنه زيي زي الناس
عباده / اذا كانت اختك اللى هى مراته فى السرايا هتروحى فين انتى بقى
خديجه / هروحلها ما عرفتش اقعد معاها و لا اواسيها بسبب عمتى و الحاله اللى كانت فيها
عباده يقوم يشد العبايه و يلبس
عباده / تمام تعالى اوصلك و اطلع عليهم
خديجه تهز راسها عباده يروح يلبس الجزمه بتاعته و هو بيبصلها
……………………….
على سطح سرايا الزنايته
ناصر قاعد على كرسى هند تدخل شايله صينيه عليها فنجان قهوه تحطها جنبه ناصر يشوفها يبتسم
ناصر / مش وقته يا هند
هند / عرفت هيعملوا ايه
ناصر / ايوه عرفت
هند / و موافق ؟
ناصر / سبيهم يتلهوا فى حاجه
هند تشد كرسى و تقعد و ناصر باصص قدامه
هند / يعنى عارف انها فكره فاشله يعنى عارف ان فيرا مش هتقع فى الفخ ده و هتبعتهولها
ناصر / ما دام ما حدش هيتاذى هعترض ليه
هند / مختار هيبقى لوحده
ناصر/ و هى اتجرات تهجم على البلد الا اما مختار خرج منها ما تخافيش عليه
هند / احنا لازم نحط ايدينا فى ايد الظابط الجديد اللى اسمه زياد ده ما دام الحكومه عاوزه تحاربها
ناصر / الحكومه متكتفه بقوانينها
هند / ايوه بس احنا نقدر نساعد برده احنا نقدر نفك القيود دى و نديهم المعلومات اللى تخليهم يهجموا صح
ناصر / و نحرق رشيد صح
هند / سورى يا كبير و هو رشيد نفعنا بايه مش كان المفروض يحزرنا من الهجوم ده
ناصر يبصلها
ناصر / ما كانش موجود بذكائى كنت باعته حته تانيه
هند / فين
ناصر / مش وقته انا بجد مش قادر اتكلم يا هند
هند / انت الوحيد اللى يقدر تمنع الهبل ده
ناصر يقوم يقف
ناصر / الناس اللى حواليكي النار قايده جواهم الهبل ده هو الحاجاه الوحيده اللى هتلهيهم يومين تلاته لحد ما الحكومه تشيل عينها من علينا و نعرف ناخد حقنا صح
هند / مش فاهمه
ناصر / لا فاهمه
هند / و انت كدا مش هتبقى بتحرق رشيد
ناصر / رشيد مش هناك اصلا سحب سمر و بعد
هند / يعنى ما عدلناش عين جوه
ناصر / عشان ما نبقاش كدابين لما قولنا للظابط مش هنقدر نساعده يرضيكي نبقى كدابين
هند / الصبر من عندك يارب …. انا ما عدتش فاهمه حاجه
ناصر يبتسم
ناصر / لازم امشى عشان اللحق الدفن و العزا و ان شاء الله لينا قاعده تانيه وقت تانى اجاوبك فيها على كل اللى عاوزه تعرفيه
هند تبص لناصر يسيبهم و يمشى و يقف و يبصلها
ناصر / هند
هند تبصله
ناصر / انا بثق فيكي
هند تهز راسها ناصر يبتسم و يمشى هند تقعد على الكرسى و باين عليها التوتر
………………..
فى سرايا الجوارحه
ماجده قاعده مربعه على السرير بتقرا قران باب الاوضه يخبط
ماجده / صدق الله العظيم
ماجده تقفل المصحف خديجه تفتح الباب ماجده تبتسم
خديجه / ادخل ؟
ماجده / تعالى
خديجه تقعد جنب ماجده على السرير
خديجه / عامله ايه ما عرفتش اقعد معاكى … عمتى
ماجده / ربنا يصبرها .. الصدمه كانت شديده عليها
خديجه / و انتى ؟؟
ماجده تتنهد و هى مبتسمه
ماجده / والله ما عارفه … يمكن لسه مش مستوعبه الدنيا … يمكن لما يغيب فتره … بس انا اصلا واخده على فراقه ما انتى عارفه كان بيبات هنا ليله و عشره بره
خديجه تطبطب على ماجده
ماجده / اقولك حاجه و ما تقوليش عليا مجنونه
خديجه / قولى
ماجده / زمان لما كان يبات بره كنت ببقي عارفه هو فين وبيعمل ايه … كنت بدعيله كنت بقول ربنا يهديه … عمرى ما دعيت عليه … عمرى ما فقدت فيه الامل
خديجه / و اهو ربنا استجاب
ماجده تمسك ايد خديجه بحماس
ماجده / استجاب يا خديجه … استجاب اتغير و انصلح حاله حتى لو كان لفتره قصيره بس اهم حاجه هى الخواتيم صح
خديجه / الحمد لله ان شاء الله يبقي شهيد اخره مات تحت ردم
ماجده / كان نازل مستحمى و متوضي … انه يموت نضيف مريح قلبي يا خديجه … قضيت سنين و انا مرعوبه يموت سكران و لا وهو … اقولك سر
خديجه / قولى حف
ماجده تقوم تقفل الباب بالمفتاح و تفتح الدولاب و تطلع شنطه هدايا و تروح تقعد جنب خديجه
ماجده / كان عاملى مفاجاه عيد ميلاد انا و هو و بس و جابلى ورد وبلالين و تورته … كان بيودعنى
ماجده تعيط
خديجه / ربنا يرحمه
ماجده / امبارح نمت على سجاده الصلاه و انا بعيط حلمت بيه
خديجه / بجد !!!
ماجده تبص فى الارض
ماجده / دى هتبقي الحاله الوحيده اللى هبقي بشوفه فيها
ماجده تعيط
خديجه / ان شاء الله يكون فى مكان احسن دلوقت
تليفون ماجده يرن تمسح دموعها و تقوم ترد
ماجده / ايوه … تمام … انا جاهزه … تمام
ماجده تقفل السكه
ماجده / يلا عشان نلحق الدفنه
ماجده تقوم تلبس الطرحه و خديجه متبعاها بحزن
………………………
فى فيلا فيرا
فيرا قاعده و عساكر كتير بيفتشوا الفيلا و فى ظابط بيبص فى ورق يرجعه لفيرا
فيرا / فى حاجه ناقصه ؟
الظابط / هنشوف
فيرا / دورتوا فى الدور اللى فوق ؟
الظابط / احنا عارفين شغلنا كويس
فيرا / بحاول اساعد بس
تليفون الظابط يرن فيرا تبتسم
فيرا/ دى اكيد المدام … هم بس اللى بيتصلوا فى الاوقات دى
الظابط يبص الناحيه التانيه و يرد على التليفون
الظابط/ ايوه يا باشا .. لا لسه .. اعمل ايه .. ان شاء الله .. ما تقلقش سعادتك … فى حفظ الله
الظابط يقفل و يبص يلاقي فيرا واقفه بتصب عصير فى كاسه
فيرا / تشرب ؟
الظابط / شكرا
فيرا / انا لو اعرف بس حضرتك بتدور عليه ايه اساعدك انا اصلي بحب مصر اوى انا لفيت الدنيا على فكره حقيقي مصر ام الدنيا
العساكر ينزلوا من فوق
عسكرى / ما لقيناش حاجه يا فندم
فيرا / تؤ تؤ و ورق الفيلا و ورقى سليم … هتعمل ايه فى المشكله دى؟
الظابط / يلا يا جماعه
الظابط يمشى و العساكر وراه و فيرا مبتسمه باستفزاز
فيرا / طب اشربوا حاجه طيب … طب هشوفك تانى … براحتك … هههههههههههههههههه
…………………
فى الدفنه
كوثر تشوف مختار و عباده بيساعدوا فى الدفنه تبص بقرف
كوثر / يقتلوا القتيل و يمشوا فى جنازته
ام مغاورى / مش وقته ما تجيبيلناش الكلام
كوثر/ انا ما عدش فى حاجه تفرق معايا هيجرالى ايه اكتر من اللى جرا هتموتونى ياريت اهو على الاقل ابقى مع الغاليين بتوعى
ام مغاورى / ربنا يهديكى ادعيله احسنله
كوثر / دعياله .. و انا عندى اغلى منه ادعيله
ام مغاورى / على الاقل سابلك عياله من ريحته ربيهم مع امهم يصبروكى على فراقه و يحفظوا سيرته من بعده
كوثر تبص لام مغاورى و ترفع حاجبها انتصار تدخل
انتصار / البقاء لله ياختى … حقك عليا ما عرفتش اجيلك قبل كدا انتى عارفه الظروف
كوثر / انا مش اخت حد
كوثر تسيب المكان و تمشى
ام مغاورى / اعزريها الصدمه كانت
انتصار / ربنا يصبرها و يصبرنا كلنا على فراقه
ام مغاورى / تعيشى و تسلمى
………………………..
فى سرايا الزنايته
سماح / لا طبعا ازاى حاجه زى دى يتسكت عليها
عباده / سماح
سماح / انت ما شوفتش كلمت امى امبارح ازاى و النهرده تعمل كدا فى قلب الدفنه ان ما كانش فى احترام لكل الرجاله اللى واقفه مفيش احترام للميت كمان دا بدل ما تدعيله
شاكر / خليكي فى حالك يا سماح ربنا ما يكتب عليكي تشوفى اللى هى فيه
سماح / سكت
عباده يجى يطلع بره السرايا سماح تجرى وراه
سماح / عباده عباده
عباده يقف
سماح / بقولك ايه يا عباده
عباده / خير
سماح / مغاورى خارج بكره
عباده / انسى
سماح / هو انا لسه قولت حاجه
عباده / اى كان انا مش فاضى و كمان اكيد هيبقى خارج تعبان و محتاج يتشطف و يريح نومه البورش مش سهله
سماح / ما انا بقول اعمله لقمه
عباده / و هو بيته ما فيهوش اكل و لا هى وقفت عليكي
سماح / يا عباده هم فى ايه و لا فى ايه
عباده / اللهم طولك يا روح
سماح / بص انا هظبط الدنيا مع خديجه مهى اخته اكيد هتروح تشوفه و لا هتمنعها يعنى
عباده / لا مش همنعها بس انتى وضعك مختلف
سماح / هروح معاها لو هتروح
عباده / ما تخشى تزنى على ابوكى جوه مصدعه دماغى انا ليه
سماح / الله مش اخويا حبيبى هو انا ليا بركه غيرك يا عوبد
عباده يرفع حاجبه
عباده / صبرنى يارب
عباده يسيبها و يمشى سماح تدخل تجرى على شاكر
سماح / بقولك يابا
شاكر / لو عباده قال لا
سماح / لا وافق بس ما يمنعش اخد اذنك برده يمكن ليك راى تانى و لا حاجه
شاكر / لا ما ليش ما دام اخوكى وافق خلاص انا موافق
سماح / ربنا يخليك ليا انت و هو و ما يحرمنيش منكوا ابدا ابدا ابدا
شاكر / تشكرى يا ستى روحى بقى اعمليلى فنجان قهوه لحسن انا الصداع هيفرتك دماغى
فاطمه / سلامتك ياخويا مالك
شاكر / شكل الضغط عالى عليا
خديجه / سلامتك يا بابا انا عندى جهاز ضغط فوق هطلع اجيبه و اقيسهولك
سماح /لا خليكي انتى ارتاحى انا هطلع … لو سمحتيلى يعنى … اصل انتى حامل و تعبتى اوى النهرده فانا بتكلم من خوفى عليكي يعنى
خديجه / تسلمى يا ستى هتلاقيه فى دورج الكومدينو اللى على يمين السرير الدرج اللى تحت خالص هتلاقى الجهاز و السماعه هتيهم الاتنين
سماح / فوريره
سماح تطلع تجرى
فاطمه / اللى يشوفها ما يقولش راجعين من دفنه و عندنا عزا بالليل نص روقانها يارب
خديجه / عريسها خارج بكره يا امى لازم تفرح يعنى
فاطمه / نص روقانها و نص عقلك يا بنت الجوارحه
شاكر / البت طلعت تجيب الجهاز و نسيت القهوه بتاعتى
خديجه / استنى ياوالدى اما اقيسلك الضغط لو عالى القهوه هتتعبك زياده
شاكر / ما فيش حاجه ممكن ترفعه اكتر من كدا
ناصر / ما تسمع الكلام يا عمى انت مش عاجبنى خالص الفتره دى لازم تاخد بالك من نفسك اكتر من كدا
فاطمه / قوله ابوس ايدك غلبت معاه دا حتى الدوا بقى بياخده بنشفان الريق
شاكر / امال هند و مختار فين يعنى مش شايفهم
ناصر / فى اوضتهم بتحضرله الشنطه
انتصار / انت برده هتسيبه يطلع بطوله كدا
ناصر / نتكلم بعدين
فاطمه / الصبر من عندك يارب سبتوه يغير الموضوع و ضحك عليكوا
شاكر / يا وليه اتلمى
فاطمه / سكت
ناصر / ههههههههههه ضحكتونى و انا و الله ما قادر
سماح تنزل شايله جهاز الضغط و السماعه و تديهم لخديجه خديجه تقعد جنب شاكر يشمر كمه و تقيسله الضغط
……………………….
فى اوضه مختار
هند بتطبق هدوم و تحطها فى الشنطه
هند / طب اجى معاك
مختار / لا .. انتى لا .. حتى الخروج من باب السرايا لا و لا حتى مع مين ما مكان انتى فاهمه و لا لا
هند / فاهمه فاهمه بس
مختار / هند … ابوس ايدك يا بنت الناس ما بقاش هناك و بالى عندك هنا
هند / ما يبقى و انت عندك اغلى منى بالك يبقى عنده
مختار / انا فى ايه و انتى فى ايه
هند / ايه ؟ ايه
مختار يقفل الشنطه
هند / طب هتقعد كام يوم
مختار / حسب ما تاخد
هند / طب افرض
مختار / هند … مش انتى اللى كنتى بتقولى خطه هبله و مش هتنجح
هند / قلبى … اعمل فيه ايه ده يا سى مختار
مختار يبتسم و يتنهد
هند / ارجعلى بالسلامه ممكن ؟
مختار / ان شاء الله
مختار يبوس راسها و ياخد شنطته و يمشى و هى متبعاه بحزن
………………………..
فى فيلا فيرا
فيرا حاطه الموبايل على المكتب و فاتحه الاسبيكر و بتمشى على طراطيف صوابعها على حبل فى الارض و بتتوازن بايديها
فيرا / قولتك انت مكبر المواضيع
رشيد / يعنى خلاص كدا ؟
فيرا / لا طبعا خلاص ايه
رشيد / الله
فيرا / دى فيلا عضو مجلس شعب و دى حصانه و انا اجنبيه و ليا سفاره
رشيد / مش للدرجادى
فيرا / امال يفتكروها سهله هو انا شويه يا ابنى
رشيد / ما تعاديش الحكومه يا فيرا لمى الدور بقى
فيرا / الضعيف بس هو اللى بيلم الدور و انا عمرى عمرى
فيرا تنزل على الارض بالغلط تنفخ
فيرا / عاجبك كدا
رشيد / ايه ؟
فيرا / وقعت
رشيد / يا مرارتى اللى اتفقعت يانا
فيرا / سلامه مرارتك … قولى بقى مش هترجعلى … و لا انا ما وحشتكش
رشيد / انك تفلتى من الحكومه دا مش معناه ان الجوارحه و الزنايته هيسكتولك
فيرا / هههههههههههههههههه لا هيسكتوا
فيرا تروح تفتح علبه مكسرات و تاخد حبه فى ايدها و تحدف فوق و تشقط ببقها
رشيد / ايه الثقه دى يا شيخه تنقطى
فيرا تبتسم و تحدف واحده تانيه
فيرا / يا ابنى البلد مليانه بوليس و جيش و عساكر و كل اللى داخل و اللى خارج بيتفتش هيخرجوا ازاى هيهجموا عليا ببومب العيد ههههههههههههههه
رشيد / بومب العيد !!!
فيرا تحط باقى المكسرات فى العلبه و تسند على المكتب
فيرا / ايه ما تعرفوش ؟ ايه عمرك ما روحت مولد قبل كدا
رشيد / روحتى ؟
فيرا / يووووه كتير دا الفلكلور المصرى دا عشقى كدا
رشيد / المهم ناويه على ايه تانى
فيرا / و لا حاجه انا شخصيا مش ناويه على حاجه
رشيد / لا يا شيخه
فيرا / بقولك ايه لم حاجتك و ارجع و لا بتعمل حاجه مع سمر كنت بتتكسف تعملها وسطينا
رشيد / سمر مش زيك
فيرا / ما حدش زيي ههههههههههههههه
رشيد يقفل السكه
فيرا / الو الو .. ههههههههههههه خلقك ضيق اوى … امال الحيوانه دى بتعمل ايه هناك … بنات البلد دى خيبه اوى حاجه صعبه اوووف
راجل يدخل
فيرا / وات ( ايه ؟)
الراجل / مختار جست ليفت هيز تاون ( مختار ساب البلد )
فيرا / جست فولو هيم دونت ليت هيم نوتيس انى ثينج ( راقبوه و ما تخليهوش ياخد باله )
الراجل يهز راسه و يطلع بره و فيرا بتفكر
……………………….
فى سرايا الجوارحه
شاهين قاعد فى الجنينه ام مغاورى تروح تقعد جنبه
ام مغاورى / و اخرتها يا خويا هتفضل فى الحال ده لحد امتى
شاهين / و هو لسه فاضل فى الواحد حال
ام مغاورى / والله فراقه قطع بينا كلنا
شاهين / كان فى غلاوه مغاورى و اكتر
ام مغاورى / عارفه يا خويا و الكل عارف
شاهين / امال اختى بنت امى و ابويا بتقول انى بضيع حقه ليه يا ام مغاورى
ام مغاورى / منكوبه يا خويا و اللى فيها ربنا ما يكتبه على حد ما تاخدش على كلامها بكره لما ربنا يهديها هتيجي و تراضيك
شاهين / انا مش عاوزها تراضيني انا مش زعلان منها انا عمرى ما ازعل منها
ام مغاورى / طب قوم كلك لقمه دا انت من ساعه اللى حصل ما حطيتش حاجه فى بقك كدا هتقع مننا
شاهين / و مين ليه نفس للاكل و لا للشرب حتى دا حتى النفس تقيل على قلب الواحد
ام مغاورى / ما ينفعش كدا و لما تقع مننا مين هيجيب حقه يا سيد الناس
شاهين / انا طالع اوضتى افرد ضهرى يمكن … يمكن ادوق للنوم طعم فى الدنيا دى
ام مغاورى تبصله بحزن شاهين يقوم و يدخل السرايا يطلع على السلم و هو بيتسند يقابل اخته نازله
كوثر/ على فين يا كبيرنا
شاهين / خير يا ام عباس عاوزه حاجه
كوثر / شيفاك طالع تنام و ترتاح قولى هتعرف ترتاح بعد ما دفنت ابن اختك الوحيد
شاهين يطبطب على كتف اخته و يطلع
كوثر / حقك … مهو مش ابنك حقك
شاهين يقف ثانيه و يتنهد و يكمل طلوع كوثر تنزل تحت
…………………………
فى عربيه مختار
مختار سايق و فى عربيه ماشيه وراه و مختار واخد باله تليفونه يرن يفتح الاسبيكر و يسيبه جنبه
مختار / طمنى
عباده / طمنى انت
مختار / فى عربيه ماشيه ورايا من اول ما خرجت من البلد
عباده / انت على السريع ايه عرفك انها وراك ما يمكن مسافرين مصر هم كمان
مختار / جايز … بس ليه مصرين يفضلوا ورا كان ممكن يعدونى فى اكتر من فرصه دا غير المسافه بينا ثابته مهما غيرت السرعه وقفت امون فى محطه وقفوا ايه كل دى صدف
عباده / طب ايه ؟ ناوى على زوغان و لا ايه ؟
مختار / لا اهم صحبه فى الطريق بدل الهو اللى احنا فيه
عباده / قولتلك اجى معاك
مختار / محتاجك عندك اكتر .. هند عامله ايه
عباده / اخر مره شوفتها كانت فى المطبخ مع الحريم ليه
مختار / بطمن بس
عباده / اطمن كدا كدا النهرده مش هيعرفوا يعملوا حاجه الحكومه ردمه البلد
مختار / و اخبار الخطه بتاعه زياد باشا ايه
عباده / فشلت زى ما توقعنا
مختار / تمام عدى عليه و اتكلم معاه خليه يساعدنا لو حابب
عباده / هتقلب بعكننه
مختار / سبها على الله يلا اقفل بقي عشان الطريق بدا يتزحم
عباده / تمام ربنا معاك
مختار يقفل و يبص فى المرايه و يبتسم و يكمل سواقه
…………………..
فى شقه رشيد
سمر قاعده على السرير رشيد يفتح الباب بالراحه تقوم تقف بفزع
رشيد / الغدى
سمر / حاضر
رشيد / مالك
سمر / لا ما فيش حاجه خالص يلا
رشيد / تمام يلا
سمر و رشيد يروحوا يقعدوا على الاكل
سمر / هو احنا هنرجع لفيرا ؟
رشيد / لا
سمر / انا سمعتك بتتكلم معاها
رشيد / خلينا هنا لحد ما الدنيا تهدى شويه
سمر / تفتكر الدنيا ممكن تهدى بجد
رشيد / مش عارف
سمر / هو انت ما لكش اهل خالص
رشيد / كدا احسن مش كدا
سمر / احيانا .. ان ما يكونش ليك غالى يعني ما لكش ايد بتوجعك
رشيد / كلنا لينا ايد بتوجعنا الفكره فى حاجه من اتنين الاولى اننا ما نعرفش الناس انهى ايد هى اللى بتوجعنا او اننا نكتم الوجع جوانا لحد ما يسيبوها و ندعى ربنا انهم ما ياخدوش بالهم
سمر / انت بتقول اى كلام على فكره
رشيد / وجهات نظر وانا ما بحبش الجدال على الاكل بحب اشغل بقي بالمفيد
رشيد ياكل سمر تبصله بابتسامه
سمر / انت بتحبني يا رشيد
رشيد يسيب المعلقه و يبصلها و يعوج بقه سمر تبتسم و تاكل
رشيد / بحبك … و للاسف بقيتي واحده من الايدين اللى بيوجعونى بس الايد الواضحه
سمر / ليه هو انت ليك كام ايد
رشيد / تعرفى ام اربعه واربعين … انا جوزها
سمر تبتسم و تبص الناحيه التانيه
رشيد / انا مش مستغرب انى احبك على فكره
سمر تبصله
رشيد/ انتى تتحبى … انا بس مستغرب انى دون الستات دى كلها اللى شوفتها و عرفتها نقيت اكتر واحده نكديه مع انى واد فرفوش فى نفسي كدا
سمر / لا و طباخ ما شاء الله
رشيد / انا بقدم السبت بس لكن بعد كدا هسحلك فى المطبخ
سمر / بكره اعملك المحشي
رشيد / ايوه بقي خليني احس انى اخترت صح
سمر / بس انت معاك حق فى حور انك ما تقولش لحد على ايديك اللى بتوجعك
رشيد / احيانا ما بتكونيش عارفه اصلا انها موجوده لحد ما حد يتك عليها زيك كدا بالظبط اخر حاجه كنت اتخيلها هى انى اقابلك واحبك
سمر / فارس
سمر و رشيد يبصوا لبعض بملامح مبهمه
سمر / كان بيقول الايد اللى توجعك اقطعها
رشيد/ لا و هو فى القطع الصراحه ما حصلش و لا هيحصل استنى هوريكي حاجه
رشيد يقوم يجيب موبايله و يفتح فيديو و يوريه لسمر فارس نايم على الارض بالكورسي بيصرخ و يتلوى سمر تبص لرشيد
رشيد / تحت عيني و بعيد عن عين فيرا هى فكرانى قتلته لكن انا كنت محتاج حد تانى غيرك عشان التبطيل ان مات ما يلزمنيش و ان خف يبقي مصلحه
سمر / بس دا بيتعذب
رشيد / صعب عليكي مش دا نفس الوجع اللى وجعهولك و وجعه لاخوكى
سمر / انا مش زيه و انت مش زيه
رشيد / انا اسوء منه هو ابن ناس متعلم و ظابط و انا ايه؟ … شوارعجى و مهرب هو لقى كل اللى انا ما لقيتوش و مع كدا اختار انه يبقي ابن كلب واطى خان صاحبه و خان بنت الناس اللى المفروض كانت هتبقي شرفه
سمر / تبقي مش زيه يا رشيد … انا ما جبتش سيرته عشان اقارنك بيه انت عملت عشانى اللى ما فيش حد فى الدنيا عمله بس انا مش عاوزه اكون سبب فى اى حاجه وحشه تحصلك لو انا ايدك اللى بتوجعك اقطعها اقتلنى و
رشيد / ابو النكد على اللى اخترعوه على ابو اللى يفكر يتكلم معاكى يا شيخه على ابو اللقمه اللى الواحد تعب فيها انا داخل انام
رشيد يدخل الاوضه و يرزع الباب
سمر / رشيد انا ما اقصدش … رشيد
سمر تروح تخبط على الباب رشيد يفتح
سمر / ما اقصدش .. اسفه .. تعال كمل اكلك
رشيد / ما انا هكمل طبعا انا جعان و الاكل ده انا تعبت فيه يبقي هاكل اوعى كدا
رشيد يروح يقعد و يكمل اكل تليفونه يرن فيرا
رشيد / هى لقمه و منظوره انا عارف
رشيد يرد
رشيد / افندم
فيرا / ازيك
رشيد / خير خشي فى الموضوع باكل
فيرا / الف هنا خلاص اشوف حد تان بقي
رشيد / كنتى عاوزه ايه
فيرا / عندى عيل صغير عمال يعيط و قارفنى
رشيد / و كان حد قالك انى بشتغل داده بعد الضهر
فيرا / داده ايه انا عاوزه حد يخلصنى منه و مش قادره استامن عليه حد من رجالتى يخلص عليه او ياذيه
رشيد / ايوه يعنى عاوزه ايه
فيرا / خلاص خلاص هشوف واحده من حبايبي تاخد بالها منه خلاص
رشيد / ابن مين الواد ده
فيرا / خلاص يا رشيد كمل اكلك
رشيد / طب و الواد
فيرا/ هو كان ابن اخوك يا رشيد خلاص سلام
فيرا تقفل
رشيد / ابو شكلك يا شيخه
رشيد يبص لسمر
رشيد / جنسكوا كلوا عاوز الحرق بجاز ربنا مدى لكل واحده فيكوا موهبه فطريه تخرج الواحد عن شعوره و تسد نفسه عن الدنيا انا داخل انام
سمر / واد مين اللى بتتكلموا عنه
رشيد / انا عارف بتقول عيل صغير نازل عياط انا عارف جابته منين بنت المفكوكه دى
سمر / طب هى كانت عوزاك تعمل فيه ايه هتقتله ؟
رشيد/ لا شكله مهم بتقول خايفه تسيبه مع حد ياذيه
سمر / هاته يا رشيد خده منها و هاته انا هاخد بالى منه خده منها
رشيد / عيل ايه اللى ابلى نفسي بيه انا عارف ابن مين ده و لا جيباه ليه
سمر / ابن اللى ابنه ابن اب و ام زمان قلبها مقهور عليه عشان خاطرى يا رشيد ما تسيبهولهاش
سمر تعيط
رشيد / يا سمر مت ينفعش
سمر / عشان خاطرى ابوس ايدك ابوس رجلك
سمر توطى على ايد رشيد يسحب ايده و يبصلها باستغراب
سمر / ما لوش ذنب عشان خاطرى
رشيد ينفخ و يروح يجيب التليفون و يتصل بيها و هو بيبص على سمر و هى وشها اصفر و بتاخد نفسها بالعافيه
فيرا / حبيبي لحقت اوحشك
رشيد / انا هاخد بالى من العيل
فيرا / لا خلاص يا حبيبي ما فيش لزوم اتعبك انا خلاص اتصرفت
رشيد / لحقتى
فيرا / امال انا هنا بلعب …و بعدين ايه اللى غير رايك كدا
رشيد / عارف حنيه قلبك
فيرا / لا ما تخافش فى الحفظ و الصون يلا سلام بقي عشان عندى وايتنج مهم سلام
فيرا تقفل
سمر / ايه
رشيد / لقتله تصريفه بس ما تخافيش شكله مهم و هتحافظ عليه
سمر / يعني مش هتقدر تساعده
رشيد / وانا حمل مسؤليه عيل يا سمر ما كفايا عليا انتى وسعى اما انام
سمر تقف فى سكته
رشيد / وزعته خلاص هعمل ايه هتحايل عليها تديهونى انا ما اعرفش الواد ده ظروفه ايه و لا هيجيلى ايه من وراه
سمر / هتعرف تنام و فى عيل مخطوف من امه يا عالم هيجراله ايه هتعرف تنام قلبك هيطاوعك تنام
رشيد / اه هعرف عشان انا شوفت حاجات اسوء من دى بكتير انا مش هغير الكون لوحدى حتى لو حاولت مش هعرف
سمر / اشمعن انا ايه ما شوفتش بنات حصلهم اسوء من اللى حصلى اشمعن انا ساعدتنى رجعنى ليها و خد العيل هو اولى انه يعيش منى هو ما لوش ذنب
رشيد / يووووه انتى ما بتبطليش زن انا طهقت
رشيد يسيب البيت و يمشي و يرزع الباب وراه و سمر تعيط
…………………
فى المران فى سرايا الزنايته
هند بتتمرن و مريم بتشغل الجهز عبد الله يدخل يتفرج من بعيد هند مش واخده بالها و مريم شيفاه تشاورله يشاورلها و يروح يقعد جنبها و هند مركزه عبد الله و مريم يتوشوشوا
عبد الله / ايه الاخبار
مريم / الاخبار عندك انت ايه ما وراكش مزاكره
عبد الله / دا على اساس انى مقطعها مرواح
مريم / طب ما فيش حد يجي يديك درس فى البيت
عبد الله / ما اعرفش .. امين قالى انه هيظبط الحوار ده بس ربنا يسهل بقي … هى بقالها قد ايه بتتمرن
مريم / كتير اوى والله عندى واجب درس كتير و ما عملتوش بس قولت اهو بدل ما تفضل متوتره تلهى روحها فى اى حاجه
عبد الله / طب روحى انتى وانا هقعد معاها
مريم / هتعرف تشغله
عبد الله / يلا يا بت من هنا يلا
مريم تبتسم وتمشي عبد الله يوقف الجهاز هند تبص
هند / الله امال مريم فين
عبد الله / اولا يا ست هانم شغل الهواه ده ما ينفعش انا دخلت وقعدت ومريم مشيت وانتى فى البلالا لاند افرضي حد جايلك من ورا مش تبقي واخده بالك
هند / ما انا مديه الامان يعني انا عارفه انا فين
عبد الله / يعني لو فى مكان تانى هتعملى حسابك يعني
هند / انت ايه اللى جابك
عبد الله / كنت جاى اعاكس البت مريم شويه بس لقيت وراها واجب ومزاكره و سعادتك معطلاها سبتها تزاكر و قولت ارخم عليكي
هند / وانت ما وراكش مزاكره
عبد الله / لا فاضيلك
عبد الله يلعب حواجبه هند تنفخ و تسيبه و تمشي يضحك
……………….
فى فيلا فيرا
فيرا / انت بتهزر يا رشيد و لا بتتكلم جد
رشيد / يا ستى ما بنيلش هاتي الزفت هخلى سمر تقعد بيه
فيرا / ماشي … برنج ذا بيبي ( هاتو النونو )
بنت تدخل شايله نونو فى لفه وشنطه
فيرا / اتفضل
رشيد / دا صغير اوى جبتيه منين ده
فيرا / ابوه عليه مبلغ كدا مش عاوز يدفعه قولت اجرى الدنيا شويه دفع ياخده ما دفعش خلاص يبقي رزق و جالى
رشيد / رزق !!
فيرا / فى ناس كتير اوى نفسها يكون عندها بيبي حلو زى ده تربيه تعرف انا لولا انى ما بحبش الزن كنت اخدته
رشيد / كام يعني المبلغ ده
فيرا / عشرين الف
رشيد / دولار
فيرا / جنيه
رشيد/ خطفتى الواد على عشرين الف جنيه
فيرا / و على اتنين جنيه كمان لو حكمت انا مش فتحاها سبيل هنا
رشيد / هديهملك و رجعى الواد لامه ترضعه و تاخد بالها منه
فيرا / حنيه قلبك دى مش فى مكانها
رشيد / و انتى مالك مش خدتى فلوسك
فيرا / يا رشيد سمر كانت بنت كويسه لكن ابو الواد ده ما يستهلوش …اصله مدمن يعنى شهر كمان بالكتير و هروح اخده منه تانى
رشيد / صبرنى يارب رجعى الواد لو عملها تانى
فيرا / هيعملها لانه ما حسش بوجع الفراق
رشيد يزعق
رشيد / ابقي عملت اللى عليا خلصينا بقى من زن الحريم ده الواد يرجع لامه
فيرا / تايك هيم باك تو هيز موزر ( رجعوه لامه )
رشيد يبص لفيرا و يمشي و فيرا مبتسمه اوى
…………………..
فى القسم
عمال كتير شغالين عباده و امين يدخلوا عسكرى يقابلهم
عباده / زياد باشا فين يا ابنى
العسكرى / فى المكتب اللى هناك ده يا سي عباده ثوانى اديله خبر
العسكرى يخبط على مكتب و يدخل ثوانى و زياد يطلع بيجرى يسلم عليهم
زياد / اهلا و سهلا أهلا و سهلا انا اسف الدنيا مكركبه
عباده/ لا الحق يتقال الله ينور دا كدا هيخلص فى مفيش
زياد / ان شاء الله عندنا تعليمات مشدده بخصوص الموضوع ده
امين / ربنا معاكوا
زياد / اكيد عرفتوا اللى حصل
امين / يا باشا الداخليه ملطوطه
عباده / امين
امين/ لا مؤاخذه … اقصد ان فى حد ابن حرام وسطيكوا بينقلها الكلام
عباده / المشكله فى القانون ان لازم الورق يعدى على كذا نفر و من نفر لنفر الدنيا بتضيع الحاجات دى لازم تبقي خبط لزق
زياد / حصل و عدد اللى كانوا عارفين كان يتعد على الصوابع
عباده / هى كانت مستنياكوا اساسا متوقع بعد اللى هى عملته اكيد كان هيبقالكوا رد فعل
زياد / ما ينفعش الكلام على الواقف اتفضلوا جوه نتكلم على روقان احسن
عباده / ما لوش لزوم مش هنطول انا بس جاى اقولك كلمتين فى السريع و ماشي علاطول
زياد / تمام نقولهم جوه … اتفضلوا
التلاته يدخلوا جوه و زياد يقفل الباب
………………….
فى شقه رشيد
رشيد يفتح باب الشقه و يدخل و هو شايل اكياس كتير و محتاس بيها
رشيد / اهل البيت … يا حجه … سمر
سمر تطلع من الاوضه تاخد منه
سمر / ايه دا كله
رشيد / اعمل ايه فى قلبي الحنين كل ما اعدى على حد بيبيع حاجه اجبلك منها على الله يتمر و تبطلى نكد
سمر / شكرا
رشيد / الواد رجع لامه
سمر تبصله
رشيد / ابوه كان عليه فلوس و كانوا بيحاولوا يضغطوا عليه و انا دفعتهاله على الله يتمر فى اللى جابوه و يقدر النعمه اللى عنده
سمر تتعصب
سمر / و انت كنت شوفت ابوه و لا تعرفه عشان تتكلم عنه كدا
رشيد / هو انتى غاويه نكد و خلاص ما فيش حاجه بتعجبك ابدا كدا
سمر / مهو مش موجود عشان تغلط فيه
رشيد / و هو كان من باقي عيلتك عشان تتحمقيله اوى كدا
سمر / انت بتقول ايه انت .. بقولك ايه انت شوفت الولد ده
رشيد / اه شوفته ماله راخر مهو اليوم بيبان من اوله
سمر / كان عامل ايه اكيد كان مرعوب يا قلبي
رشيد / و لا دريان بالدنيا هى العيال فى السن ده ليها فى حاجه اخره يرضع و ينام
سمر / يرضع !!!!
رشيد / اه يرضع ايه مالك مستغربه ليه يرضع ما لهاش معنى تانى بالعربى بريست فيدينج اقولهالك بالفرنساوى
رشيد يحط ابهامه فى بقه
سمر / هو عنده قد ايه ؟
رشيد/ مهو عشان كدا نسبه الطلاق عاليه الست تستقبل جوزها على الباب و هاتك يا لوك لوك لوك لوك لما تخرجوا الواحد عن شعوره
سمر / اخر سؤال والله اخر حاجه عشان خاطرى قولى
رشيد / ما اعرفش عيل فى لفه ممكن كام شهر سنه حاجه كدا
سمر / بيبي !!!
رشيد يروح يقعد و هو بيتزهق
رشيد / اه يا ستى بيبي خلاص
سمر تروح تقعد باستسلام و حزن
سمر / خلاص
رشيد / انا مقدر انك مش واخده على الحاجات دى بس لازم قلبك يجمد فيرا معاها حق مش كل عيل ابوه هيداين هروح اخلص الليله مش مال سايب هو
سمر / انا اسفه
رشيد / انا تعاملى مع الحريم سطحى فى اضيق الحدود فبحاول و الله افهمك مره اقول هرمونات مره اكتئاب مره جينات النكد بس انا برده بشر و ليا طاقه انا مقدر وجعك و اللى انتى فيه بس انا بعمل كل اللى اقدر عليه حاولى شويه انتى كمان
سمر / انا بجد اسفه اوى انا عارفه انى تعباك معايا بس
رشيد / انا عمرى ما هقتلك يا سمر انا حتى عمرى ما هاذيكي ما تطلبيهاش تانى باى صوره و لاى سبب
سمر / انا اسفه انا عارفه انى جيت عليك جامد اوى … انت ما اكلتش هقوم اسخنلك الاكل و اعملك عصير او حاجه حلوه
رشيد / ايوه بقى ايوه بقى فينك من بدرى بحبك انا
سمر تبتسم و تقوم و رشيد متابعها
رشيد / ربنا يهديكى و يكفينا شر قلبات هرموناتك
…………………
فى القسم
زياد / ايوه بس خروج القوات دلوقت
امين / مش هتعمل حاجه و بعدين احنا هنزود الكماين بره حدود البلد كمان يعنى هنبقى فى الامان و البركه فى جنابك
زياد / و يا ترى راى الجوارحه ايه فى الموضوع ده
عباده / اسالهم لو تحب بس عشان اوفر وقت سعادتك هم موافقين احنا ما بنعملش حاجه من غير ما يكون بينا اتفاق
زياد / انا هصعد الموضوع و ان شاء الله
عباده / احنا اتكلمنا مع الباشا المحافظ و ان شاء الله البركه فى جنابك تمشيلنا الموضوع
زياد / و انا هعمل اللى اقدر عليه … بخصوص كاميرات المراقبه اللى فى البلد
امين / كلو فى السليم يا باشا و بالقانون
زياد / هههههههههههه اكيد يا باشا انا بس كنت بستاذنكوا يتعملى اكسيس على السيرفر بتاعها
امين و عباده يبصوا لبعض
زياد / انا عارف انها كلها كونكتيد بسيرفر واحد
عباده / و ماله يا باشا نديك الباسورد
امين يبص لعباده
عباده / بس الاول لازم نبلغ الجوارحه زى ما قولنا ما نقدرش نعمل حاجه من غير شورتهم
زياد / تمام و انا هستنى ردكوا
عباده يقوم يقف زياد يقف امين يقف
عباده / عطلنا جنابك ما تاخذناش
زياد / ما تقولش كدا امال احنا هنا ليه و صدقنى التعاون اللى بينا هيخلينا نعدى المحنه دى اسرع
امين / باذن الله بالاذن احنا بقى
زياد يحيهم امين و عباده يمشوا و اول ما عباده يطلع بره القسم امين يشده من ايده
امين / انت ازاى توافق انه يدخل السيرفر انت بكدا
عباده / يا بجم افهم انا قولت هديله الباسورد قولتله هديله انهى باسورد ؟
امين / هاه ؟
عباده / تعال معايا نروح لفتوح و هناك هتعرف كل حاجه
امين / و ماله ادينى وراك اما نشوف
امين و عباده يروحوا يركبوا العربيه
……………
فى شقه رشيد
رشيد بياكل و يشرب عصير و سمر قاعده جنبه مرتبكه و بتفرك فى نفسها
رشيد / مالك ما بتاكليش ليه
سمر / مش جعانه .. يعنى … اصلى اكلت من شويه لما لقيت نفسى مضايقه و انت بره فشيت غلى فى الاكل اهو بقى اللى حصل
رشيد يبتسم و يكمل اكل سمر تحط ايدها على ايده رشيد يبص على ايدها سمر تسحب ايدها بسرعه رشيد يبص لسمر
سمر / اااام هو انت زعلان منى
رشيد / اكيد لا طبعا و ان كان فى شويه … بقول شويه زهق كدا من عمايلك راحوا خلاص
سمر / طب الحمد لله … هدخل الحمام ثوانى و جايه
رشيد / خدى راحتك بس ما ترجعيش تعيطى لما تلاقى الاكل خلص
سمر / الف هنا قولتلك اكلت
سمر تقوم تروح الحمام و تمد ايدها ورا الغساله و تشد ازازه البرفان و تبص لنفسها فى المرايه
/////////////////
سمر / هتعمليها تانى يا سمر … غصب عنى … قوليله هيساعدك … لو ما عملتش اللى بتقولى عليه هتقتلهم هم الاتنين … تفتكرى هيقف جنبك بعدها تفتكرى هيبصلك بعدها هيشوفك واحده زى كل الزباله اللى عرفهم فى حياته … ما يبصليش ياريته يكرهنى و يخلص نفسه من الوحله اللى وحلته فيها انا اللى ربطاه بفيرا انا ايده اللى بتوجعه خليه يرمينى فى الشارع خليه يقتلنى حتى اهو ابقى نجيتهم هم الاتنين … فكرى تانى لسه فى وقت .. رسالتها وصلت كدا كدا ما عدتش تفرق
/////////////////
سمر تبص لنفسها و تمسح دموعها و ترش البرفيوم على شرايين ايديها ورقبتها و ترجع تخبى الازازه و ترجع تبص لنفسها فى المرايه و تمسح دموعها و تطلع و تبص على رشيد بياكل
…………………..
فى عربيه عباده
امين / يا ابن الجنيه … لا مؤاخذه … يخربيت شيطانك يا جدع ايه الدماغ دى عظمه على عظمه بصحيح
عباده / عجبتك للدرجادى
امين / اوى بس تفتكر الواد فتوح هيعرف يعمل الحكايه دى
عباده / ما يعملهاش غيره و بعدين مش هو اللى عمل السيرفر الاولانى اكيد هيعرف يعمل السيرفر التانى اللى هنحط عليه الحكومه
امين / بس لو الباشا الظابط عرف الحكايه دى
عباده / جرا ايه يا بتاع القانون انا اللى هقولك الباشا ما لوش اى صفه قانونيه انه يدخل على كاميرات المراقبه دى صح و لا لا
امين / هو لحد دلوقت صح بس لو عاوز صفه فالحكايه مش هتاخد فى ايده غلوه
عباده / ساعتها كام نبله على كام عيل صغير تحل الموضوع و كفى المؤمنين شر القتال و بعدين الباشا هيعرف منين اولا الباشا مش من البلد يعنى ما يعرفش الشوارع كلها و بعدين هو هيراقب ايه و لا ايه و بعدين برده احنا مش هنغلب يعنى
امين / صح والله العظيم تلاته صح انت صح
عباده / المهم فى الحوار ده سرعه الاداء الواد فتوح لازم يخلص الحوار ده فى اسرع سريع
امين يركن العربيه قدام سرايا الجوارحه
امين / ادينا وصلنا و هفضل على دماغه لحد ما يخلص الموضوع
عباده / تمام يا ابن الزيني
امين / دا انت اللى زيني بدماغك دى
امين و عباده ينزلوا و يدخلوا السرايا
……………………
فى شقه رشيد
سمر قاعده جنب رشيد بيتفرجوا على مسرحيه و رشيد كل شويه يبصلها من تحت لتحت
سمر / بقولك ايه
رشيد / هاه ؟
سمر / هقوم اجبلنا حاجه نشربها تحب اجبلك حاجه معينه
رشيد / اى حاجه منك حلوه
سمر تبتسم و تقوم تروح المطبخ و رشيد متابعها و بعدين يبص فى الارض سمر ترجع شايله صينيه عليها كبايتين حاجه ساقعه و فيهم تلج توطى ناحيته
سمر / لقيت الازازه سخنه قولت اسقعها و لا اجبلك واحده تانيه
رشيد ياخد الكبايه سمر تحط الصينيه على الترابيزه و تعدى تقعد جنبه و تمسك كوبايتها و تبص لرشيد تلاقيه باصصلها سمر تبتسم
سمر / بتبصلى كدا ليه
رشبد / مفيش
سمر / امال مالك
رشيد يحط الكبايه و يقوم يدخل الحمام و سمر متبعاه
………………………
فى سرايا الجوارحه
فتوح / يا عم دا حوار اهبل اخلصهولكوا فى نصايه على ما تشربوا الشاى يكون باذنك يا رب منهى
امين / اقسم بالله دماغ متكلفه كنت بقولك ايه انا فى العربيه قولتلك مش هيجيبها الا فتوح حصل و لا لا
عباده / امال
فتوح يفتح اللاب و يشتغل عليها
فتوح / مسافه ما تشربوا الشاى اكون خلصت باذن الله
امين / خد راحتك و لو تحب نروح و نفوت عليك وقت تانى
فتوح / يا جدع دا انتوا منورين
امين / تكون يعنى بتحب تشتغل فى رواقه كدا و تاخد رحتك و كدا
فتوح / ما انا واخد راحتى اهو عادى
عباده / بقولك يا فتوح ما تعرفش حد من حبايبك دخل الطب مع عبد الله
امين يبص لعباده
فتوح / اعرف خير
عباده / كنت عاوزله المحاضرات اللى بتفوته دى
امين / يا عم قولتلك انا هظبطله الحوار ده
فتوح / دا انا اعرف اللى يظبطلك الحوار ده احلى ظبطله
عباده / اللحقنى
امين / يا عم سيب الراجل يركز فى شغله و بعدين نتكلم
فتوح / الواد شريف ابن عطيه الحلوانى اخته دخلت كليه الطب الواد شريف حبيبى و كان فى مره قالى ان اخته دحيحه و موس
امين / الا ما سمعنا حتى زغروطه فى بيتهم و لا حد جاب سيره ان البت ورده كانت فى الثانويه اساسا دا انا كنت مفكرها فى اعدادى … اكمنها قصيره كدا و مش باينه من الارض
فتوح / اصل امها بتخاف من الحسد فما قالتش لحد و قالت يبقوا يعرفوا بعدين حتى انا عرفت بالصدفه كانت عدت من قدامنا و حته بيضه كدا باينه من شنطتها الواد شريف نداها و شخط فيها مدت ايدها و دارتها علاطول … اتاريه البالطوا لابيض ههههههههههههههههههه
عباده / و انت عرفت ازاى
فتوح / و انا هشوف المنظر و اسكت البت ما عملتش حاجه عشان يشخط فيها كدا و يخرها فى الشارع قدام الخلق و انا لما زنقته كدا حكالى الليله كلها
عباده / و دى هتصورلنا المحاضرات ازاى دى فى الهم اللى هى فيه ده لا خلينا ورا امين و مجايب امين بقى
امين / ايه يا عم فى ايه مالك ما بالراحه علينا
فتوح / انا هكلم شريف و اخليه يتوسط بينكوا و برده الحوار يبقى فى السر زى ما هم عاوزين و شريف يبقي يودى و يجيب الورق
عباده / لا ما تتعبش نفسك كفايا عليك اللى انت فيه ربنا يقدرك عليه انت بس
فتوح / براحتك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
