رواية البر التاني الفصل الخامس 5 بقلم لولو محمد
رواية البر التاني الجزء الخامس
رواية البر التاني البارت الخامس
رواية البر التاني الحلقة الخامسة
مختار يقعد جنب عبد الله
مختار / حاول ما تاخدش الموضوع على اعصابك ياما بيحصل بين الاهل
عبد الله / لا يا عم مش للدرجادى
مختار / و اكتر والله و فى الاول و الاخر بتتراضوا اصل اللى بينكوا دم مش ميه
عبد الله / كان ممكن اللى بينا يبقي دم فعلا لولا ستر ربنا
مختار / تسلم ايدها دا اكيد طبيخ الحجه ام عبد الله
عبد الله / انت ليه بتقول الحاجه ام عبد الله ما تقول شيري زى باقي الناس
مختار / عيب ما يصحش
عبد الله / يا سيدي قول طنط شريهان لما بتقول الحجه ام عبد الله بحس انها فارشه بجرجير على ناصيه الشارع
مختار / انت اللى مكبر الدنيا و بعدين الست الوالده دى ليها حرمتها يعني حتى اسمها مش اى حد ينطقه و لا يجيبه على لسانه لا بخير و لا بشر
عبد الله / ليه يعني ما عادى
مختار / انت عارف ليه بنقول عليهم حريم
عبد الله / اهى دى كمان بستغربها فيك ما تقول بنات و لا ستات عادى
مختار / يا ابني الحرمه دى من التحريم يعني حرام حد يقربلها شرفك و عرضك انت مستهون بيها كدا ليه
عبد الله / و انا اللى مكبر الدنيا يا ابني دا حياله اسم طب اللى ما خلفتش مش حريم و اسمها عادى
مختار / اهو ده سبب تانى يعني الست تحمل و تتعب و فى الاخر تتساوى بغيرها
عبد الله / يا سلام مهو رزق من ربنا هو بمزاجها و بعدين هو العيل اللى جه ده يلغى امه
مختار / لا ما اقصدش بس انت ما ينفعش تقول لحد يا ابن فلانه تتفهم غلط استغفر الله العيال بتتنسب لابهاتها
عبد الله / فاهمك بس احنا بنتكلم فى ان الاسم مش عوره ما تبقاش زى اللى بيكتب فى دعوه الفرح الانسه اتش و تروح الفرح تلاقي الانسه اتش شعرها كله باين و لبسه حمالات و نازله رقص و لا اجدعها رقاصه
مختار / مهو اللى يغطى لازم يغطي كله يا عبد الله بص يا عبد الله لما بقول للست الوالده يا ام عبد الله دا مش تقليل قسما بالله دا احترام دى ست كبره و على راسي تسلم ايدها والله اه صحيح على فكره فى جماعه من عندنا فى البلد جاين يزورونى بكره و عاوزين يتعرفوا عليكوا
عبد الله / ينوروا اهلا وسهلا
مختار / الله يكرمك تسلم ايدها الحجه اقسم بالله
عبد الله / الف هنا كل و اجبلك تانى فى كتير هناك
مختار / احنا بس نخلص دول قال و انا اللى كنت ناوى اروح الجيم
عبد الله / انا من ساعه ما الدروس بدات و انا نسيت باب الجيم منين اصلا
مختار / لو فاضي بالليل نروح سوا انا بروح واحد حلو اوى و هيعجبك
عبد الله / اجى انا موراييش حاجه من بعد تسعه
مختار / على البركه و انا نازل هعدى عليك
………………..
فى السرايا
ترابيزه كبيره فى اوضه و استاذ قاعد بيصلح كراسات و عيال و بنات و كلهم قاعدين بيزاكروا كل واحد فى ناحيه بعيد عن الاستاذ
عصام / تعالى يا سماح
سماح تسيب الكراسه اللى بتكتب فيها و تروحله
عصام / ليه كدا يا سماح الواجب كله غلط ليه كدا امال لو ما كنتش شارحلك الحاجه دى بدل المره اتنين
سماح / والله يا استاذ كنت تعبانه خالص حتى اسال مريم
عصام / لا يا سماح انا كدا ليا كلام تانى مع الحج شاكر انتى مستواكى فى النازل و كل ما اكلمك تقولى تعبانه يا
بنتي لو عيانه ياخدوكى للدكتور انما كدا ما ينفعش
سماح تبص فى الارض و تعيط
عصام / يا سماح انا بكلمك لمصلحتك مش عشان تعيطي
سماح / انا كرهت المدرسه و الدنيا كلها
عصام / لا اله الا الله طب استهدى بالله كدا و امسحى دموعك دى خدى منديل
عصام يناول سماح منديل
سماح / انا مش فالحه فى حاجه و الكل بيقول عنى انى غبيه و خايبه
عصام / مين قال كدا بس طب والله انتى ذكيه و لهلوبه بس انتى اللى مش بتركزى
سماح / و اركز ازاى بس يا استاذ امال لو كنت غريب عن البلد كنت قولت ايه دا احنا كل يوم و التانى دبيحه و الناس تيجي و تمشي مين بيعمل كل ده
عصام / يا سماح الخير اللى بتعمليه فى الحاجات دى بيقعدلك و بعدين ما مريم اهى نفس ظروفك و نفس البيت و بسم الله ما شاء الله
سماح / مريم غيري نفس البيت اه بس مش نفس الظروف اقولك ايه بس يا استاذ
سماح تتنهد
عصام / قوليلي يمكن اقدر اساعدك و نحل المشكله
سماح / لا ما يصحش خلاص بقي انا على العموم هحاول اركز و ان شاء الله الواجب بتاع النهرده هحله صح
عصام / لو فى حاجه مش فهماها قوليلى نعيدها
سماح / ما انا ببقي فاهمه كل حاجه بس باجى و انا بحل الواجب ببقي نسيت اعمل ايه
عصام / اساليني عنها
سماح / ازاى و حضرتك مش معايا
عصام / كلميني فى التليفون هشرحهالك بسرعه
سماح / يا لهوى يا استاذ عصام اكلمك فى التليفون بالليل
عصام / يا ستي ابعتي رساله على الواتس و انا هبعتلك الحل و الشرح و اساعدك و بعدين انا مش غريب يعني
سماح / عارفه والله بس
عصام / بصي يا سماح اعتبرني زى عباده و خليني اساعدك
سماح / ربنا يخليك يا استاذ عصام والله انا بستني حصتك دى بفارغ الصبر
عصام / روحى يلا حلى التمارين اللى اديتهالك و تعالى وريني عملتى ايه
سماح / حاضر عن اذنك
سماح تقوم تقعد جنب مريم
مريم / كنتوا بتقولوا ايه كل ده
سماح / الواجب كله غلط و كان بيمسح بيا الارض كالعاده ايه مش باين عليا انى كنت بعيط يعني
مريم / باين ما عشان كدا بسال
سماح / حلى حلى خلينا نخلص فى يومنا
مريم / بحل اهو
مريم و سماح يكملوا حل
………………….
قدام شقه هند تانى يوم
هند و مختار يفتحوا الباب فى نفس الوقت
هند / صباح الخير
مختار / صباح النور
هند / بيقولوا فى كويز النهرده
مختار / اه الدكتور كان قايل
هند / دا انا كنت ناسيه و يوسف فكرنى امبارح
مختار / الحمد لله اتراضيتوا
هند / بس اكيد مش زى الاول عن اذنك
هند تشد الباب تقفله و تنزل تلاقي يوسف بيركن العربيه مختار يطلع من العماره وراها يروح يركب عربيته و يوسف متابعه
يوسف / انا عارف انك ما كنتيش عاوزه انى اوصلك بس النهرده يوم مهم اوى بالنسبالى فلو ينفع اتقل عليكي النهرده
هند تروح تركب يوسف يركب العربيه
يوسف / ما سالتينيش يعني ليه النهرده يوم مهم بالنسبالي
عربيه مختار تعدى و عين هند معاها
هند / انت هتوصلنى صح
يوسف / ماشي خليها مفاجاه احسن برده
هند / انا برده بقول كدا
يوسف / انا مجهزلك مفاجاه هتنسيكي اسمك
هند / استر يا رب
يوسف / ههههههههههههههههه ايه ما بتحبيش المفاجات و لا ايه
هند / بحبها بس بخاف منها
يوسف / لا ما تخافيش انا متاكد انها هتعجبك
هند / طب سوق سوق بدل ما نتاخر
يوسف يسوق و هند بتبص من الشباك
………………
فى السرايا
سماح قاعده مضايقه فى اوضتها تروح تقعد على المكتب و تفتح كشكول و تمسح حته و تغيرها و تمسح اللى بعدها و تغيره و تصور الورقه و تبعتها واتس ثوانى و توصلها رساله على دايره على الجزء اللى غيرته
عصام / كنتى ماشيه كويس و جيتي هنا اتلخبطتى
سماح تمسح اللى عدلته و ترجعه زى ما كان و هى مبتسمه و تبعت لعصام
سماح / فعلا مش عارفه ازاى غلطت فى حاجه زى دى
عصام / زى ما قولتلك انتى مش بتركزى
سماح تصور باقي الواجب و تبعته و تقوم تتمشي فى الاوضه و هى بتفكر توصلها رساله
عصام / برافو عليكي مش قولتلك يجي منك
سماح تكتب
سماح / والله ما حد ناصفني غيرك ربنا يخليك يا استاذ عصام
سماح توصلها رساله
عصام / يا ترى مريم خلصت الواجب هى كمان
سماح / لا مريم بتتفسح فى مصر
سماح تبعتها توصلها رساله
عصام / و انتى ما روحتيش معاها ليه
سماح / لا انا ما ليش لا فسح و لا خروج ليا شغل البيت و بس اصلى ما عنديش اللى يخرجنى
عصام / ازاى يعني
سماح / امى مشغوله فى البيت طول النهار و عباده و ابويا فى الارض ليا مين تانى
عصام / ما تروحى مع مريم
سماح / يلاهوى اخرج من غير ابويا و لا امى ازاى دول كانوا يدبحونى ايه يا استاذ هو حضرتك مش عارف هما شداد عليا قد ايه دا الحمد لله انهم سايبيني اروح المدرسه
عصام / مش للدرجادى حرام عليكي
سماح / تعرف انا كل يوم بدعى ربنا ما يجيليش عريس لحسن يجوزونى و اسيب المدرسه
عصام / انتى بتفكرى فى حاجات لسه بدرى اوى عليها
سماح / ازاى يعني طب دا امى خلفتني و هى اصغر منى
عصام / الزمن غير الزمن و العقليات اختلفت
سماح / يمكن عندكوا انتوا انت استاذ قد الدنيا و خريج جامعه الا هى الجامعه دى حلوه يا استاذ
عصام / اكيد حلوه
سماح / تفتكر هجيب مجموع و ادخلها
عصام / ان شاء الله قولتلك انك ذكيه بس مش بتركزى
سماح / والله عاوزه اركز بس مش بعرف اول ما بسمع كلمه عريس بتلبش
عصام / ما تفكريش فى حاجه غير مستقبلك انا متاكد ان اهلك مش هيعملوا حاجه يضروكى بيها
سماح / عارفه بس اهلى شايفين ان الجواز ستره للبنت فمن وجهه نظرهم انى اتجوز دا مصلحتى مش ضرر
عصام / ما تقلقيش لو حصل انا هتكلم معاهم
فاطمه تفتح الباب و تدخل
فاطمه / بقالي ساعه بنادى عليكي يا مقصوفه الرقبه
سماح / كنت بزاكر ما سمعتكيش
فاطمه / بتزاكرى على الموبايل يا حيله امك قومى يا ختى قومى ساعديني ورانا هم ما يتلم
سماح / حاضر حاضر
سماح تمسح المحادثه و تحط الموبايل فى الدرج و تنزل ورا مامتها
…………………….
فى الكليه
الدكتور يخلص المحاضره و يمشي و الكل بيلم حاجته
يمنى / طول اوى النهرده
وسام / هموت و ادخل الحمام وسعوا
وسام تجري و تسيبهم
يمنى / انتى يا بنتي استنى جايين اهو
هند / قال يعنى هتعرف تعدى من الزحمه اللى عند الباب
هند تقوم و يمنى وراها و الطلبه يطلعوا و اول ما هى تطلع من الباب تليفونها يرن تطلعه و تبص فيه و تبص يمين و شمال
يمنى / مين
هند / يوسف .. الو
يس / ايوه يا هند وسام وقعت مغم عليها فى الهول بتاع المبنى و احنا مش عارفين نعمل ايه
هند / انا جايه حالا
هند تبص ليمنى
هند / وسام اغم عليها فى الهول
هند و وسام يجروا يلاقوا ناس كتير متجمعين يحاولوا يعدوا اول ما يوصلوا للنص يلاقوا يوسف شايل بوكيه ورد وسام تفرقع مدفع ورق فى الهوا هند و يمنى يتخضوا و يصرخوا فجاه بنرات تتعلق من فوق صوره هند او يوسف و بحبك و تتجوزيني هند بتبص حواليها و مصدومه بلالين كتير تنزل عليها من فوق وسط صفير و تسقيف من الكل يوسف ينزل على نص رجل و يفتح علبه فيها دبله هند عماله تتلفت حواليها وسط الطلبه كلهم و هى مخضوضه و الطلبه شغالين صفير يوسف يقوم و يمسك ايدها تتخض
يوسف / ههههههههههههههههههه اهدى اهدى
هند / انت ازاى تعمل كدا
يوسف / ايه رايك فى المفاجاه دى
يوسف ينزل على نص رجل و الكل بيصفر و ماسك علبه الدبله مفتوحه
يوسف / تتجوزيني
هند / انت بتحرجنى قدام الدفعه فى حد يعمل كدا
هند تقفل العلبه يوسف يقوم على رجله
هند / استني بقي لما اقول لبابا على عملتك الجديده اصل ما ليش اهل تطلبني منهم
يوسف / حبيت اعملهالك مفاجاه زكرى نفتكرها طول عمرنا
يوسف يقرب اوى من هند
هند / و انا مش موافقه يا يوسف وريني بقي هتلم الفضيحه دى ازاى
يوسف يمسك هند من كوعها
يوسف / بعد كل اللى عملته
صوت الصفير يسكت و الكل يبص لبعضه و مختار يعدى بينهم هو و صحابه يشوفوا فى ايه
هند / سيب ايدى كفايه فضايح
يوسف / انا برده اللى بعمل الفضايح اعملك ايه اكتر من كدا
هند / ما تتعصبش عليا يا يوسف اقولك انا الغلطانه انى لسه بتعامل معاك لم بقي فضايحك لوحدك
هند تشد ايدها و تيجي تمشي يوسف يشدها من ايدها
يوسف / استني هنا بكلمك
هند / سيب ايدى انت اتجننت
يوسف يتعصب و يرفع ايده على هند مختار يدخل يمسك يوسف من ايده جامد
مختار / ما بتكتفيش فضايح انت مش كدا ايه ما لهاش اب هى تطلبها منه
يوسف / للمره المليون ما تدخلش نفسك فى حاجات ما انتش قدها
مختار / وريني نفسك يا دكر
يوسف يحاول يضرب مختار بالبوكس مختار يمسك ايده فى كفه يحاول بالتانيه مختار يمسكها و يلويهم و يقرب يديله بالدماغ يوسف يقع فى الارض
مختار / انا عملت حساب للعشره و للجيره و لكل كيليه بس انت عيل واطى ما اتربتش و هستناكى انت و شويه العيال صحابك تحت بيتى وريني اخرك … يلا كل واحد يشوف اللى وراه الفيلم خلص
الناس تبص لبعض مختار يصرخ فيهم
مختار / قولت الفيلم خلص اتفرقوا
صحاب يوسف ينزلوا من فوق الامن يدخل الطلبه تتفرق و هند واقفه تبص على يوسف بيقوم و يمسح دمه مختار يعدى من جنبها و هى واقفه يعديها بخطوتين و يرجعلها
مختار / تحبي اروحك
هند / لا شكرا هروح لوحدى
مختار يمشي و يروح يقف مع صحابه بعيد هند لسه واقفه مكانها و يوسف بيقوم يبصلها تسيبه و تمشي يقف يبص على مختار يمشي وسام تروحله
وسام / قولتلك اللى زى دى مش وش نعمه مش هتفهك اللى انت بتعمله عشانها فى الاخر الفلاح ده هو اللى هيعجبها
يوسف يبصلها
وسام / انا اسفه ما اقصدش بس هو بيدخلها ليه الا اذا كانت هى مشجعاه طب دا حتى بيقولوا انا و ابن عمى على الغريب انما هى ابدا مع اى حد عليك
يوسف / ما كنتش متخيل انها هتقف تتفرج عليا كدا عادى
وسام / الحمد لله انها ما مشيتش معاه انساها يا يوسف انت تستاهل واحده احسن منها بكتير واحده بتحب و بتقدرك و مستعده تديك اكتر منها بكتير مقابل انك تقدملها ربع اللى بتقدمه لهند الجاحده دى
يوسف / انا اسف يا وسام انا مش فى مود انى اتكلم مع حد
صحاب يوسف ينزلوا من فوق لمين اليفط و الحاجه يس يحاول يديهم ليوسف
يوسف / ولعوا فيهم
يوسف يمشي
يس / قولتله والله دى بت تنكه هو اللى مصمم يعملها قيمه
وسام تبصله و تمشي
……………………..
فى شقه هند
جرس الباب يضرب شيري تروح تفتح تلاقي انتصار
انتصار / السلام عليكم يا حجه ام عبد الله
شيري / ما دام الحجه ام عبد الله تبقي قريبه مختار هو مش جوه
انتصار / لا لسه مجاش من الجامعه بس هو كان قالى انه قالكوا انى عاوزه اتعرف عليكوا و اشكركوا على كرمكوا مع مختار
شيري / انا اسفه جدا اتفضلي اتفضلي
شيري توسع انتصار تدخل و تقعد و شيري تقفل الباب
شيري / سامحيني يعني الواحد ساعات بتطلع منه حاجات مش مظبوطه
انتصار / سبيه مفتوح
شيري / مفيش حد غريب
انتصار / ما اقصدش اصل الحج ناصر و مريم بنتى طالعين بالزياره
شيري / انا مش معايا مفتاح شقه مختار بس تقدروا تستنوه هنا زى ما تحبوا طبعا تحبى تشربي ايه و لا اقولك انا عامله صينيه مسقعه و رز معمر يستاهلوا بقك و زمانكوا جايين من سفر تعبانين ثوانى اغرف
انتصار تلحقها قبل ما تدخل المطبخ
انتصار / يا ست الكل ارتاحى احنا مش محتاجين ضيافه دا بيتنا
شيري / انا عارفه طبعا ان اكلنا مش زى اكل الصعيد و خير الصعيد بس انتوا اهل كرم و لازم يتوجب معاكوا
انتصار / طول عمركوا سباقين بالواجب و احنا جايين نتشكركم على اللى بتعملوه مع مختار
شيري / و احنا عملنا حاجه
انتصار / عملتى كل خير
صوت ناصر / يارب يا ساتر
ناصر ينزل قفصين كبار فاكهه على باب الشقه و تدخل مريم شايله سبتين
انتصار / سيبى واحد هنا و التانى وديه شقه عمك
ناصر يفتح باب شقه مختار
انتصار / فطير مشلتت عمايل ايديا فلاحى سمعت انه عجب الدكتور عبد الله
شيري / من بقك لباب السما بس دا كتير اوى طب سيبوهم لمختار
انتصار / يكرم اصلك جيبنله معانا
شاب يخبط على الباب و يحط قفصين فى الارض
انتصار / ودى واحد لخالك فى شقه مختار و سيب واحد هنا و ابعت مريم و روح اقعد مع خالك
الشاب / حاضر يا عمتى
انتصار / دا امين ابن اخويا اصلنا اخين متجوزين اختين ابوه اللى كان هنا من يومين
شيري / اهلا و سهلا اهلا و سهلا بس الحاجات دى كتير اوى احنا ما عملناش حاجه لكل ده
انتصار / انتى هتكسفيني من اولها و لا ايه
مريم تدخل
انتصار / اقفلى الباب يا مريم دى بقي اخر العنقود الشيكولاته اللى بتبقي فى اخر حته الايسكريم زى ما مختار مسميها
شيري / اللهم بارك اللهم صلى على النبى واضح جايبه جمالها منين
انتصار / تعيشي يا اختى تعيشي
………………
قدام بيت مختار
مختار يركن العربيه يلاقي عبد الله ماشي مش قادر
مختار / مالك يا عبد الله
عبد الله / تلت دروس ورا بعض حاسس انى هنجت و ما تنساش انى مكسح من التمرينه اياها
مختار / هههههههههههههه طب تعال تعال عشان اول مره بس انت طلعت خفيف اوى
عبد الله / اتنطت اتنطت ليك يوم
عبد الله يبص ورا مختار يلاقي هند نازله من تاكس و الحزن باين عليها يروحلها
عبد الله / مالك يا هند تعبانه و لا ايه
هند تبص على مختار و تبص لعبد الله
هند / شويه صداع هطلع اخد حبايه و انام
عبد الله / تعالى تعالي
مختار يسبق و عبد الله و هند يحصلوه يسمعوا صوت ضحك و سخسخه من شقه شيري
مختار / شكل الجماعه و صلوا
مختار يضرب الجرس على باب شيري و يفتح الباب بتاعه و يدخل عبد الله يفتح الباب يلاقي شيري فى وشه
شيري / دا عبد الله و هند جم اهم تعالى يا هند سلمي على الحجه انتصار مرات اخو مختار الكبيره و دى
هند / مريم
مريم / انتى عرفانى
هند / مختار ورانى صورتك مره على موبايله
شيري / روح يا عبد الله اقعد مع الرجاله هناك دا ابوك كمان هناك معاهم
عبد الله / حاضر … عن اذنكوا
عبد الله يمشي و هند تدخل مبتسمه
انتصار / بسم الله تبارك الله تعالى يا بشمهندسه جنبي تعالى
هند تقعد جنب انتصار
شيري / لا تقعد ايه قومى يا دودو ساعديني نغرف و نبعت اكل للرجاله اللى هناك
انتصار / عندهم اكلهم قومى يا مريم طلعى الصوانى عملالكوا فضله خيرك صينيتين رز معمر بالحمام انما ايه
هند تقوم تطلع الصوانى ملفوفه فى السبت
شيري /انتى جايه توقفى حال اكلى و لا ايه يا حجه ما يصحش كدا
انتصار / يا ست الكل عشان يبقي في بينا عيش و ملح طب والله قعدتك ما يتشبع منها لا انتى و لا القمر دى
انتصار تلعب فى دقن هند هند تبتسم
انتصار / مالك يا نور عيني مين زعلك
الابتسامه تروح من وش هند
هند / مفيش مرهقه شويه من الكليه
انتصار / على العموم احنا هناكل لقمه و نسيبك ترتاحى
هند / انا ما اقصدش والله
مريم / احنا هنروح نتفسح ما تيجي معانا انا اول مره انزل مصر و عمى مختار حلف انه هيفسحنى تعالى معانا
انتصار / و انتى كمان يا حجه ام عبد الله تعالي خلينا نغير جو و ننبسط
شيري / والله انا مش عارفه ظروف عبد الله عنده دروس و انا مش قادره اعزريني خليها مره تانيه ان شاء الله و لا انتوا مش ناويين تزورونا تانى و لا ايه
انتصار / يا خبر ازاى الكلام ده لا طبعا دا احنا هنقرفكوا زيارات
شيري / على قلبنا زى العسل بس انتوا اعملوها
انتصار / ان شاء الله
هند / ثوانى هجيب اطباق و معالق من جوه
هند تدخل و مريم تدخل وراها تساعدها يبصوا لبعض و يضحكوا
………………….
فى المحل
يوسف بيتكلم مع العمال
يوسف / خمسميه جنيه للى هيعوره
شاب ١ / يا يوسف بيه احنا ما نتاخرش عنك بس
يوسف / بقولك ايه يا ابني انا خلقي ضيق النهرده و روحى فى مناخيرى لو خايف روح على امك
الشاب ١/ طب ليه الغلط دا بس يا يوسف بيه
يوسف / اهو كدا عاجبك عاجبك مش عاجبك صفى حسابك و امشي
الشاب ١ يبص ليوسف و يمشي
يوسف / المحل خرب لما الباشا مشي دا الرجاله مرطرطه على القهاوى اروح افكك بتلاته منهم
ط ٢ / يا يوسف بيه محمد بياع شاطر و شايل المحل على كتافه و معاكوا بقاله سنين
يوسف / بقولكوا ايه انا مش عاوز منكوا حاجه انتوا اللى قطعتوا برزقكوا انا بكره الصبح يكون عندى بدل الراجل عشره انا غلطان اصلا انى بتكلم معاكم
يوسف يمشي و هو مضايق
شاب ٣ / الجدع ده اتجنن و لا ايه مشكلته بس انا مش عارف
…………………..
فى شقه يوسف
اسراء / بتت الجاحده قولتلك الاشكال الزباله دى ما تديهاش اكبر من قيمتها
محمود / استنى بس يا اسراء البت برده ليها وجهه نظر و محمد لا اتصل و لا عاب فى تصرف يوسف
يوسف / يعنى ايه
اسراء / ما تعشمش الواد بحاجه مش هتحصل البت شايفه روحها
يوسف / اسكتى بقى يا ماما قول يا بابا
محمود / يمكن هند ما حكتش لابوها و يمكن ابوها كان نفسه تمشي بالاصول و تدخل البيت من بابه
يوسف / طب ما احنا فيها قوم بينا نروحله
اسراء / نروح فين انت عاوز تهزقنا
محمود / اسكتى يا اسراء بص يا يوسف خليها الصبح اتصل بعمك و احدد معاه معاد و اكلمه و نروح شايلين و محملين
اسراء / و هما عاوزين مننا ايه تانى غير كدا
يوسف / اولعلك فى روحى يا اما ما تسكتى بقى يا تقولى كلمه حلوه يا بناقص
محمود / اعمليلنا شاى يا اسراء مش وقتك دلوقت
اسراء / سيباهالكوا مخضره بيضالك فى القفص يا بنت شريهان على الله يتمر
اشراء تقوم و يوسف يلزق فى ابوه
يوسف / طب هتكلمهالى امتى يا سيد المعلمين كلهم
محمود / الوقت اتاخر دلوقت زمان عمك نام هكلمه بكره الصبح
يوسف / تمام طب و انا
محمود / لو عاوز رايي ما تكلمش هند خالص و الجدع جارها ده مختار تبعد عنه اليومين دول لحد ما الموضوع يهدى ما تخليهوش ياخد على قفاك بنط عندهم و يطلع شكلك انت اللى وحش
يوسف / يعنى عاوزنى اسكتله دى مش اول مره
محمود / القديم و الجديد و كل المشاريب هيحاسب عليه نوبه واحده ما يعرفش يقوم منها تانى بس انت تهدى الجو اليومين دول لحد ما الخطوبه تتم و بعد كدا ليك عليا اجيبهولك مربط خلف خلاف
يوسف / ماشى يا بابا و انا مصدقك و مش هكسر كلمتك و هسكت بس والله العظيم
محمود / من غير ما تحلف انا ما حدش يقرب من ابنى و اسيبه
يوسف / ربنا يخليك ليا يا بابا
يوسف يبوس ايد محمود و يقوم يدخل جوه
……………………………….
فى شقه مختار
ناصر / لا دا بلادنا حاجه تانيه البركه فى البيه الباشا المحافظ البلد بتاعتنا مش زى الارياف اللى فى بالك دا فيها كل اللى نفسك فيه مستشفيات على اعلى مستوى و مدارس حتى الجامعه اياكش بس مختار اللى حابب مصر و احنا قولنا ماشى اهو يمشيلنا الشغل اللى هنا حكم التجار اللى هنا اجارك الله يسحب المحصول و ينشف ريقك فى الفلوس تقولش بيجبى عليك لازم انت بقى كل شويه تنطله و احنا مش قريبين عشان نقطع المسافه كل شويه و لا فوت علينا بكره تقولش بنشحت
محمد / كان الله فى العون انا كنت بتاجر برده مع اخويا بس فى الملابس بس ما حصلش نصيب و ما كملناش
ناصر / تصدق و تؤمن بايه
محمد / لا اله الا الله
ناصر / احنا عندنا مصنع هدوم فى البلد بيورد لكل حته فى الجمهوريه احنا بلدنا ما فيهاش عاطل واحد و لا ست محتاجه طب تصدق و تؤمن بايه
محمد / لا اله الا الله
ناصر / انت تعرف فى مصر تسمع عن حاجه اسمها الغارمات ما تلاقيش عندنا حد دخل السجن بسبب دين اصلا اللى بيدخلوا السجن يتعدوا على الصوابع ممكن من الحتت اللى حوالينا انما من عندينا ما تلاقيش
امين / الحمد لله فى الكام سنه اللى فاتوا البلد اتغيرت خالص شوارع اترصفت و مشاريع اتبنت دا غير ان البلد تقريبا كدا زى ما بتقولى مقفوله على نفسها بنعمل كل حاجه بايدنا من اول الزرع لحد التصدير
عبد الله / ما شاء الله اهى دى مصر اللى بجد
ناصر / احنا بنحكى فى ايه اللى يسمع غير اللى يشوف انتوا لازم تشرفونا يوم تتفرجوا على البلد
محمد / اكيد ان شاء الله هنرتب يوم و نيجي نزوركوا
ناصر / تنورونا
مختار / هقوم اعمل شاى
امين / يبقي كتر الف خيرك
مختار يدخل المطبخ
عبد الله / هقوم اساعده
عبد الله يدخل ورا مختار
…………………..
فى شقه يوسف
يوسف بيكلم وسام فى التليفون
وسام / انت بجد ناوى تعمل كدا
يوسف / انا فعلا اتسرعت يا وسام ما كانش المفروض احرجها كنت مستني ايه يعني تقوم تحضني قدام الدفعه يعني اكيد ما يصحش هى اكيد انكسفت
وسام / و فرجتها عليك و سى زفت ده بيتهجم عليك
يوسف / ما انا كمان اتعصبت عليها مع انى لسه واعدها انى هتغير
وسام / يعني هتتقدملها بكره بجد ؟ طب افرض رفضتك ؟ انت كدا بتحرج اهلك يا يوسف و بتزل نفسك ليها اكتر و بتمرعها اكتر
يوسف / ما ينفعش اياس بالسرعه دى انتى ما تعرفيش هند بالنسبالي ايه
وسام / يا بختها بيك بجد ياريتها تقدر اللى انت بتعمله عشانها
يوسف / ياريتها تحس باللى جوايا ياريتها تفهم ان عصبيتي دى من حبي فيها
وسام / انت تستاهل كل خير يا يوسف بجد انا فى حياتي ما شوفتش واحد زيك
يوسف / و انتى كمان يا وسام طيبه و تستاهلى كل خير
وسام / اقفل يا يوسف هند بتكلمنى اما اشوف عاوزه ايه و اكلمك تمام
يوسف / تمام
يوسف يقفل و يطلع صوره هند على الموبايل و يتنهد و يحط الموبايل جنبه
………………..
فى شقه مختار
مختار قافل على نفسه الباب هو و ناصر
ناصر / هى فكره بنت لذينه بس خطره
مختار / دى الطريقه الوحيده اننا نضرب كل العصافير اللى على الشجره
ناصر / بس الحريم دول يمكن يعني
مختار / ما يمكنش يا خويا احنا ما لناش دعوه بيهم يا عالم هنعرف نساعدهم و لا لا بس بالطريقه دى كلنا هنبقا فى امان
ناصر / و الرجاله اللى هتعمل العمليه
مختار / لا هى اول و لا اخر مره و الف من يتمنى نطلب منه حاجه زى دى
ناصر / سبني افكر
مختار / تمام يا كبير فكر
ناصر / اتكلمت مع انتصار
مختار / فى ايه
ناصر / لما تبقي تكلمك بقي انا يادوب ادخل اريح جتتي شويه قبل ما نسافر الصبح
مختار / طب بخصوص ايه طيب
ناصر / هههههههههههههههههه من امتى كنت فضولى يا سي مختار
مختار / هى بقت كدا على العموم يا خبر النهرده بفلوس بكره يبقي ببلاش و لا ايه يا كبيرنا
ناصر / على رايك يلا تصبح على خير
ناصر يقوم و يطلع بره و يقفل الباب ثوانى و امين يدخل
امين / هنام جنبك الليله
مختار / تعال تعال
امين يدخل يقعد جنب مختار و مختار بيقلب فى الموبايل
امين / بتقرا عن ايه
مختار / مركب كيميائي كدا
امين / لا معاك ربنا مليش فى الكميا انا
مختار / ههههههههههههههههه ماشي نام نام
امين / تصبح على خير يا خالى
مختار / و انت من اهله
امين يفرد ضهره و يدى مختار ضهره و مختار مكمل قرايه فى الموبايل
……………..
فى شقه هند
هند بتتكلم فى التليفون
هند / و انتى ازاى تعملى كدا فيا انا بجد مش قادره اصدق
وسام / و انا اعرف منين انكوا هتقلبوها غم كدا بقي فى واحده عاقله تعمل كدا
هند / يا سلام و انتى كنتى متخيله انى هعمل ايه غير كدا
وسام / كنت متخيله انك تفرحى لما تلاقي حد بيعبرك
هند / انتى بتقولى ايه
وسام / الراجل يعمل اكتر من كدا ايه عشان تفهمى انه بيحبك الراجل عمل البدع و صرف دم قلبه و عملك مفاجاه تحسدك عليها اى بنت و انتى كل اللى عملتيه انك احرجتيه قدام الناس
هند / انا مش مصدقه اللى انتى بتقوليه ده بصراحه
وسام / يا بنتي انتى ما سمعتيش البنات قالوا عنك ايه قالوا انك جاحده و مش وش نعمه
هند / دا اخرتها يعني تمام انا يا ستي زى ما بتقولوا عنى اصل انا لازم اتمايص و اتمرقع فى الكليه ما ليش اب يطلبني منه ما ليش اهل يقعد معاهم مش كدا
وسام / اهو جايلك بكره هو و اهله و هيعملك اللى انتى عوزاه قوليلى بقي حجتك ايه ساعتها
هند/ انتى بتقولي ايه
وسام / بقولك الحقيقه بكره الصبح عمك هيكلم ابوكى و يطلبك رسمي من ابوكى
هند / و انتى عرفتي منين
وسام / يوسف قالى
هند / و انتى من امتى بتتكلمى مع يوسف
وسام / ايه حلى فى عينك لما عرفتي انى بكلمه ايه مش كنتى مش عوزاه و مطلعه فيه القطط الفاطسه لما بقي يكلمنى خلاص اترش عليه سكر
هند / انا مش متخيله ان الكلام ده طالع منك و حقيقي مش بعرف ارد على نوعيه الكلام دى فمضطره اقفل
وسام / سلام
وسام تقفل السكه و هند تروح اوضه محمد و شيري تخبط بالراحه
صوت محمد/ ادخل
هند تفتح الباب بالراحه و تدخل
محمد / تعالي يا هند تعالى
هند / كنت عاوزه اتكلم معاكوا فى حاجه مهمه
محمد / خير تعالى
هند تروح تقعد جنب باباها و تبصله و هو و مامتها بيبصولها
…………………………………
فى شقه مختار تانى يوم
انتصار / لميتي كل حاجه يا مريم
مريم / يا ماما دى عاشر مره تساليني
مختار / يا ست الكل لما توصلى البلد و لاقيتي حاجه ناقصه كلمينى اجيبهالك معايا و انا جاى
انتصار / يا حبيبي مش القصد
ناصر يطلع من الاوضع
ناصر / جهزتوا كل حاجه
انتصار / اهو شوفا
ناصر / شاف ايه
مختار / سوق على مهلك و خد بالك من الطريق
ناصر / خد انت بالك من نفسك و لو فى جديد بلغني
مختار / تمام
ناصر يدخل الحمام
مختار / الا يعني الكبير كان لمحلى امبارح انك ناويه تكلميني فى موضوع
انتصار / مش وقته هبقي اكلمك بعدين الحيطان ليها ودان
امين / و الحيطان دى اسمها مريم و لا امين
انتصار / الله يعينها امك
امين / هههههههههههههههههههههههه
مختار / سيبك منه المهم اول ما توصلى كلميني
انتصار / ماشي و انت خد بالك من روحك
مختار / تمام
ناصر يطلع من الحمام
ناصر / انا جاهز
امين يشيل الاسبته الفاضيه و يسبق على تحت و هو نازل يقابل يوسف و ابوه طالعين
امين / السلام عليكم
محمود / و عليكم السلام
يوسف و محمود يوصلوا لشقه هند و مختار واقف بيسلم على اهله و عينه على يوسف و محمود و يوسف عينهم عليه يوسف يضرب الجرس
مختار / توصلوا بالسلامه لما توصلوا كلمونى
انتصار / ان شاء الله
محمد يفتح الباب
ناصر / السلام عليكم يا حج ابو عبد الله
محمد / و عليكم السلام يا حج ناصر نورت و انست اتفضل
ناصر / مره تانيه لسه هنركب طريق
محمد / توصلوا بالسلامه
ناصر / مع السلامه مع السلامه
ناصر يمشي هو و مريم و انتصار
محمد / اتفضلوا
محمد يوسع لمحمود و يوسف يدخلوا و يوسف شايل علبه جاتوه فى ايده و بوكيه ورد محمد يدخل وراهم و هو بيبص على مختار متابعهم فى صمت محمد يقفل الباب و يروح يقعد
محمد / تاعب نفسك يا يوسف مش كل شويه ورد و جاتوه
يوسف / ازاى بس يا عمى
محمود / اقعد يا محمد احنا عاوزينك فى موضوع
محمد / و انا كمان انا كنت ناوى اعدى عليك اصلا بس لما انت اتصلت و قولت جاى استنيتك تشربوا ايه
محمود / و لا حاجه مش دلوقت الا هى هند فين
محمد / خرجت مع امها راحوا مشوار
يوسف / خير فين
محمد / سيبك انت قولى يا يوسف ايه اللى انت عملته فى الكليه امبارح ده
يوسف / كل الشباب فى سني
محمد / كل الشباب فى سنك عارفين الاصول و الصح و الغلط
محمود / هو كان عاوز يفرحها
محمد / طب كنت شورت عليا و لا سالتني على الاقل كنت جسيتلك نبضها
يوسف / انا عارف انى اتسرعت بس صدقني يا عمى انا اجلت الموضوع كتير اوى لما ما عدتش قادر
محمد / على العموم احنا اتكلمنا معاها كتير امبارح و مفيش نصيب
محمود / هو ايه اللى ما فيش نصيب احنا لحقنا نتكلم
محمد / الكلمه فى الموضوع ده الاولى و الاخيره لهند هى اللى تقرر و هى رفضت
يوسف / ليه ان شاء الله
محمد / دى كمان رفضت تتعامل معاك من اساسه
محمود / و انت موافق على الهبل ده
محمد / و انا مالى هو مش ابنك قالنا بيني و بين هند ما حدش يدخل احنا مش هندخل خصوصا لو هندخل عشان نجبرها على حاجه مش قبلاها و دمرتها نفسيا
يوسف / دا اللى هو انا
محمد / تحويل علاقتك بيها لاى حاجه غير انك تكون ابن عم مرفوضه حتى ابن العم له حدود يا يوسف
يوسف / طب هى فين و انا اتكلم معاها
محمد / مش هتتكلم معاها يا يوسف و لو قربتلها هبلغ البوليس انك بتضايقها و اعملك محضر عدم تعرض
محمود / تعمل محضر لمين يا محمد انت اتجننت
محمد / الموضوع لحد كدا و خلص يا محمود ما فيش نصيب الجواز مش بالعافيه
محمود / بناقص يا خويا خليهالك خللها و خليها جنبك اياكش تنفعك و لا ينفعها دلعكوا فيها
محمد / بنتى و انا حر فيها و طول ما انا عايش مش هيحصل غير اللى هى عوزاه لما ابقي اموت ابقوا اعملوا فيها اللى انتوا عاوزينه
محمود / دا اخر كلام عندك يا محمد
محمد / اعتبره زى ما تعتبره
محمود / تمام ما ترجعش تزعل بقي
محمد / اللى تشوفه يا خويا
محمود / يلا يا يوسف
يوسف يبص لعمه
محمود / قولت يلا يا يوسف
يوسف / هو فى حد تانى يا عمى
محمد / لا يا يوسف مش لازم يبقي فى حد تانى عشان اقولك ما فيش نصيب انت و هند مش متفقين اذا كنتوا كدا قبل الجواز امال بعد الجواز هتعملوا ايه
يوسف / هتغير
محمد / سمعتها منك كتير دا انت بتقولها الصبح و تتعصب الضهر يا يوسف اسمع يا ابني انت عندى فى غلاوه عبد الله
محمود / مهو باين
محمد / لا باين يا محمود باين اوى كمان
يوسف / يا عمى اديني فرصه
محمد / ابعد فتره يا يوسف
يوسف/ مش قادر
محمد / مهو انت كل شويه تحط البنزين على النار و كل ما تهدى تشعللها يا يوسف
يوسف / انا برده
محمد / انت ما اكتفيتش انك كنت هتضربها هنا دا انت كنت هتضربها فى وسط الكليه وسط زمايلها
يوسف / و هى لما شتمتنى قدامهم و قدامكم كان عادى
محمد / مهو من عصبيتك و عمايلك دا البت ورتنى امبارح ايديها زرقه من مسكتك ليها دا الحمد لله انها ما حكتش قدام عبد الله كانت علاقته بيك باظت هى رخره
محمود / يلا يا يوسف ضيعنا وقت كتير
يوسف / طب لو انا اتغيرت لو اثبتلها انى هبقي احسن
محمد / اتغير لنفسك يا ابني قبل اى حد و بعدين ما حدش بيهرب من نصيبه لو ليك نصيب فى حاجه هتاخدها
محمود / كفايا ملاوعه بقي عمالين تعشموا فى الواد و تبيعوا و تشتروا فيه امال لو كان باير و لا معيوب كنتو عملتوا فيه ايه
محمد / مش هرد عليك
محمود / يلا يا يوسف انا اتخنقت
محمود يفتح الباب و يمشي
يوسف/ قولها انى هتغير قولها انى هرجع تانى لما اثبتلها انى اتغيرت قولها انى بحبها و شاريها و مش شايف غيرها قولها انى مستعد اعمل اى حاجه عشان اسعدها يا عمى قولها يا عمى عشان خاطرى لو بتحبنى زى ما بتحب عبد الله زى ما بتقول كلمها و قولها انا هعملها كل اللى نفسها فيه هحققلها كل احلامها
محمد / ربنا يصلحلكوا الحال يا ابني
يوسف يبص فى الارض و يمشي و محمد يروح يقفل الباب وراهم و هو زعلان و حزين
…………………..
فى الكليه تانى يوم
يمنى قاعده جنب هند
يمنى / انا كلمتها برده لانى استغربت جدا ازاى تشترك فى مصيبه زى دى و كلمتنى بكل وقاحه انا بجد مصدومه فيها اوى
هند / انا تعبت يا يمنى تعبت بجد و مش عارفه اعمل ايه و لا اروح فين ضغط فى البيت و الكليه تعبانه بجد و مش قادره استحمل كل اللى بيحصل ده
يمنى / مش عارفه اقولك ايه ربنا معاكى بصراحه دا انسان مش طبيعي معقول بعد اللى حصل يجي يتقدم برده
هند تنفخ
يمنى / اقولك حاجه بيني و بينك و ما تزعليش
هند / ما جتش عليكي قولى
يمنى / بصراحه كان نفسي توافقى
هند / لا اله الا الله حتى انتى
يمنى / مش قصدى والله بس يعني انتى فاهمه بصي زى ما بيقولوا التصرف الصح جاى من الشخص الغلط فهمانى
هند / مع الاسف مع الالم و الوقت الغلط و المكان الغلط
يمنى / اكيد ربنا شايلك حاجه احسن
هند / ان شاء الله
بنتين يعدوا من جنب هند و يمنى و بيتكلموا بصوت مسموع
بنت ١ / انا عارفه شايفه نفسها على ايه
بنت ٢ / بكره تتجوز واحد يندمها
بنت ١/ على رايك
…………………
فى الجيم
عبد الله شغال هو و مختار على اتنين تريدميل جنب بعض
عبد الله / ماما شايفه انه مش وقته و ان الوقت ده اولى انى اذاكر فيه بس بصراحه انا شايف انه احسن حاجه تغير مود الواحد
مختار / الرياضه مهمه بتحسن التركيز
عبد الله / هو انت دخلت زراعه عشان المجموع و لا عشان انتوا صعايده و الارض بتاعتكوا و كدا
مختار / اساسي مجموع اصل احنا مش بنهتم اوى بالتعليم زيكوا كدا للاسف الحياه عندنا مختلفه و الله هو مش للاسف احنا حياتنا اه مختلفه بس ما عندناش عيال يعني
عبد الله / يعني انا عيل ؟
مختار / لا مؤاخذه مش انت برده بتاخد مصروف
عبد الله / ما انا لسه بدرس و بعدين انت يعني بتشتغل اوى
مختار / انا مسكت الفاس و عزقت فى الارض اول مره و انا سبع سنين قبل كدا كنت بروح اودى و اجيب طلبات بيتهيالي اول مره كان عندى اربع سنين
عبد الله / اربع سنين ايه يا عم النخع انت
مختار / طب والله يا عم كنت شايل يوميها عمود اكل كمان للرجاله كنت بوصله من السرايا للارض
عبد الله / اربع سنين و تخرج فى الشارع لوحدك
مختار / يا ابني احنا البلد عندنا مقفوله على نفسها كل الناس عارفه كل الناس يعني اى حد معدى كان عارف ان انا مختار الزيني اخو ناصر الزيني كبير عيله الزيني و بعدين اكيد ما كنتش لوحدى هعرف السكه ازاى نزلت مع باقي العيال كل واحد فينا كان شايل حاجه يوديها اللى شايل عيش و اللى شايل غموس كدا يعني
عبد الله / و كان بيطلعلك فلوس من الموضوع ده
مختار / بيطلع طبعا بس مش شرط فلوس ممكن حلاوه ممكن اى حاجه على حسب يعني
عبد الله / انتوا غراب اوى على فكره
مختار / احنا صح على فكره بنطلع الراجل راجل من صغره يعرف قيمه القرش و يعرف يشيل مسؤليه يتكسف يمد ايده لابوه يطلب جنيه
عبد الله / انت بترمى كلام و لا ايه
مختار / هههههههههههههههههههههه لا يا عبد الله الحياه هنا مختلفه هنا انت لازم تركز فى المزاكره عشان لو ما فلحتش فى العلام هتقعد على القهوه انما احنا ما لكش فى العلام اجرى على الغيط
عبد الله / ممكن برده
مختار / تعرف احنا ناس كتير من عندنا ما بتكملش تعليم بمزاجها هو رستق نفسه فى شغلانه و خلاص يتجوز بقي و يفتح بيت
عبد الله / يتجوز ازاى يعني ؟ من غير ما يتخرج ؟
مختار / اه عادى مش قادر يفتح بيت و كسيب يجوزوه
عبد الله / و اللى معاه دى مهى ما خلصتش تعليم هى كمان هو انتوا عندكوا جواز قاصرات و كدا
مختار / هو للاسف موجود بس عندنا فى البلد مش بالشكل اللى فى دماغك طب ما هو موجود هنا مش بيكتبوا على بنات عرفي لحد ما تبلغ سن الجواز يسجلوهولها
عبد الله / لا طبعا ايه الكلام ده
مختار / بيحصل و اسال الحج محمد هيقولك
عبد الله ينزل من على التريدميل
عبد الله / مش قادر خلاص
مختار ينزل هو كمان و يمسح بالفوطه
عبد الله / كفايا كدا النهرده انا تعبت
مختار / كفايا يلا بينا
عبد الله و مختار يروحوا الحمام
…………………
فى شقه محمد
شيري بتحط العشا
محمد/ امال عبد الله لسه بره و لا ايه
شيري / راح الجيم مع مختار عوزاك تكلمه فى الموضوع ده
محمد / موضوع ايه
شيري / الجيم مع مختار يا محمد هيكون ايه
محمد / اكلمه فى ايه هو رايح كباريه دا رايح يلعب رياضه مش احسن ما كرشه يدلدل و لا انتى قصدك على مختار نفسه
شيري / مزاكرته يا محمد بيرجع هلكان يدخل ينام
هند / بيصحي بدرى تانى يوم يزاكر
محمد / عبد الله بيعرف ينظم وقته سبيه براحته و لعلمك بقي انا فرحان بخروجه مع مختار
شيري / ابتدينا وصله المدح فى مختار و اخلاقه و صلاته و تفوقه
محمد / ههههههههههههههههههه الله مش حقيقه و ادينا شوفنا اهله ناس اكابر اخلاق و زوق و لسانهم كويس
شيري / ما تنساش الكلام اللى قاله يوسف
هند / دا كدب على فكره مختار قال لعبد الله انه كان فى الجيم و سهل عبد الله يسال فى الجيم و يتاكد ان يوسف بيتبلى على مختار
محمد / بقي واحد ما بيفوتش صلاه الفجر فى الجامع هيبقي مرافق برده يا ناس اذا كان المتحدث مجنون يبقي المستمع عاقل و لا ايه
شيري / صحيح لقيت محل كويس عوزاك تيجي معايا نمضي العقد بكره
محمد / اجى ما اجيش ليه
………………………
فى شقه يوسف
يوسف بيكلم وسام فى التليفون
وسام / دى طريقه قديمه و متجربه صدقني دا اخر امل ليك بقي
يوسف / انا مش هعرف اعمل كدا
وسام / الغايه تبرر الوسيله
يوسف / طب و ذنبها ايه البنت دى اعمل فيها كدا
وسام / هو انت هتعمل كدا غصب عنها ما هو برضاها
يوسف / يا سلام و الاقيها فين بقي اللى تخسر سمعتها عشانى
وسام / و ايه علاقه سمعتها بالموضوع انت هتمشي رسمي
يوسف / يفتح الله رسمي ايه قصدك ادبس نفسي
وسام / يا اخى اسمعنى و افهم كل حاجه بالاتفاق
يوسف / يا بنتي فاكس
وسام / انا ممكن اساعدك
يوسف / انتى بتقولى ايه يا وسام
وسام / صدقني ما فيش حل تانى
يوسف / و انتى ذنبك ايه ليه تدخلى نفسك فى مشاكل بسببى و الناس تتكلم عليكي طب و اهلك هيقولوا ايه
وسام / هيقولوا كانت مخطوبه و فسخت و مفيش نصيب
يوسف / انتى مبسطه الموضوع اوى
وسام / انت اللى مكلكعه هو احنا اول و لا اخر اتنين نتخطب
يوسف / يا بنتي دخول البيوت مش لعبه و بعدين دى هتتحسب عليكي خطوبه
وسام / انت غريب اوى انت عاوز هند و لا لا
يوسف / ايوه بس مش على حسابك
وسام / لو عندك غيرى هاتها بس لازم واحده تكون جامده عشان هند تغير يعني مش اى واحده و السلام
يوسف / يعني عشان اتجوز هند اخطب غيرها
وسام / يا ابني بقولك اتشالت و اتهبدت لما عرفت اننا بنتكلم امال لو عرفت انك هتخطبنى هتعمل ايه دى هتيجى ترمى نفسها تحت رجليك
يوسف / انا مش عارف اقولك ايه
وسام / الموضوع كله مش هيكلفك حاجه بس بالله عليك لما ترجعوا لبعض تقولها انى كنت بمثل عشان اوفق بينكوا و اصلح بينا لحسن دى ما عدتش طايقه تبصلي و قلبت يمنى عليا و انا دلوقت ما عدليش صحاب غيرك و انت كل اللى حواليك شباب فهفضل طول الوقت فى الكليه لوحدى
يوسف / لوحدك ازاى بس ما انا معاكى اهو
وسام / بجد يا يوسف
يوسف / صدقيني يا وسام انا ما فيش حد عمل معايا اللى بتعمليه عشانى و انا عمرى ما نسيت جميله حد عملهالى
وسام / جمايل ايه بس ما فيش بينا الكلام ده
………………………..
فى شقه هند
هند واقفه فى المطبخ جنب لبن بيغلى و سرحانه اللبن يفور تتنهد و تطفى و تشيل الحله و تنضف البوتجاز عبد الله يدخل
عبد الله / هند فى ريحه … هههههههههههههههههههههه انتى فورتى اللبن يا فالحه دا الحجه ام عبد الله هتنفخك
هند تنضف البوتجاز من غير ما تبصله
عبد الله / فى حاجه مضيقاكى و لا ايه سي زفت عمل حاجه جديده
هند / لا
عبد الله / امال مالك
هند / اتخانقت مع وسام صحبتي
عبد الله / عادى بكره تتصالحوا ما تزعليش نفسك بتحصل
هند / عمرنا ما هنتصالح بجد ما كنتش اتخيل انها كدا
عبد الله / يبقي ما يتبكيش عليها
هند / انا مش زعلانه عليها انا زعلانه على انى كنت هبله و وثقت فيها دى تعرف عنى ادق تفاصيل حياتي دى كانت اقرب واحده ليا
عبد الله / اقربلك منى
هند / ياله بتكلم جد
عبد الله / راحت وسام عبد الله موجود هى وسام دى كانت بتنزل مخصوص تجبلك شيكولاته بتحبك قدى
هند تبتسم
عبد الله / سيبك من وسام دى دلوقت انتى نضفتي البوتجاز و داريتي اثار الجريمه بس لما امك تسالك عن اللبن هتقولى شربناه و لا ايه عشان كلامنا يبقي واحد
هند / هههههههههههههههههههههه
عبد الله / امال انتى فاكره ايه تظبيط الشغل اهم من الشغل نفسه
هند تضحك
………………..
فى شقه يوسف
محمود قاعد بيتفرج على التليفزيون و اسراء جنبه يوسف يطلع من اوضته
اسراء / تعال يا حبيبي الفيلم ده اكشن و هيعجبك
يوسف يطفى التليفزيون و يقعد قدام ابوه و مامته
محمود / فى ايه يا يوسف فى حاجه و لا ايه
يوسف / انا عاوز اخطب
محمود / يا ابني مش هنفضها سيره بقي قولتلك ابعد حره تزيد محبه
يوسف / لا يا بابا انا مش عاوز اخطب هند انا عاوز اخطب واحده تانيه
اسراء / لولولولولولولولولولولولولى
محمود / استني يا وليه اهمدى انت بتقول ايه يا يوسف
يوسف / اللى حصل الفتره اللى فاتت خلانى اخد بالى انى كنت ظالم نفسي اوى يا بابا انا مش هشترى اللى بايعني و لا هجرى ورا واحده مش عوزانى
اسراء / لولولولولولولولولولولولولى
محمود / يا ابني انا مش عاوزك تتسرع و لا تاخد الدنيا عند الجواز مش لعبه و دخول البيوت مش سهل
يوسف / انا عارف يا بابا والله بس فعلا فى بنت شريانى جدا و اكتر واحده اعرفها وقفت جنبي
اسراء / حلوه
يوسف / جميله
اسراء / ابوها بيشتغل ايه بنت ناس يعني
محمود / يا وليه استني … اسمع يا ابني البنت دى ان كانت شرياك حرام تظلمها ادى لنفسك وقت تفكر
اسراء / ما دام البت شرياه يبقي هتقدر تنسيه هند و سنين هند السوده قولى يا يوسف عرفتها ازاى و امتى
يوسف / معايا فى الكليه و باباها مدرس جغرافيا و اهلها ناس محترمين
اسراء / خلاص يبقي على البركه
محمود / يا ابني فكر تانى
يوسف / هو انا كل ما اطلب حاجه تتعبونى كدا
محمود / يا حبيبي انا مش عاوز غير مصلحتك
يوسف / و انا عارف مصلحتي فين
يوسف يقوم يدخل اوضته و يرزع الباب وراه محمود يبص لاسراء و يقوم وراه يفتح باب الاوضه
محمود / حددلى معاد مع اهلها
……………………..
فى شارع ضلمه
مختار ماشي يوصل لحد بيت قديم يبص يمين و شمال و يدخل يطلع السلم و يخبط على شقه تلت خبطات ثوانى و الباب يتفتح و شاب يسلم على مختار
الشاب / الباشا تعال ادخل
مختار يدخل يلاقي معمل كيميا و انابيب و تفاعلات
مختار / انت هتودى نفسك فى داهيه باللى بتعمله ده
الشاب / انا جبتلك اللى طلبته
مختار / حبيبي
الشاب يشاور على كوم ورق
الشاب / دى كل الابحاث اللى اتعملت
الشاب يطلع كرتونه
الشاب / و دى معظم المنتجات اللى فى السوق بس انا جربتها شغل اعلانات بعيد عنك
مختار يمسك ورقه
مختار / يعني الفرمونات دى ما لهاش وجود؟؟؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
