رواية البر التاني الفصل الخامس والسبعون 75 بقلم لولو محمد
رواية البر التاني الجزء الخامس والسبعون
رواية البر التاني البارت الخامس والسبعون
رواية البر التاني الحلقة الخامسة والسبعون
فيرا تسيب رشيد و تمشي رشيد يبص فى موبايله على صوره مختار و هند و يبتسم و يفتكر
////////////
رشيد قاعد على كبوت عربيه فى الصحراء و مختار بيولع نار
مختار / ما اعتمدش عليك فى حاجه ابدا و تنصفنى
رشيد / يا عم ما تولعها بالبيره
مختار يبصله و يرفع حاجبه
رشيد / انت مش عاوز سبرتوا للنار الجيش قالك اتصرف
مختار / دخلت الجيش انت اوى
رشيد / و انت يعنى اللى دخلته وسع وسع و لا هتولع فى سنتها دى
رشيد يقوم يجيب يفتح شنطه العربيه و يطلع ازازه البيره و يفتحها
مختار / قسما بالله امشي
رشيد / هو انا هشربها دا انا هحرقها هولع فيها
مختار / انت اساسا بتشتريها ليه و جايبها ليه
رشيد / بقولك ايه يا ابله الناظره انت اهدى عليا احنا خارجين ننبسط
رشيد يكب البيره على الخشب و يولع
رشيد / البيره ما فيهاش كحول كتير دى بقي لو كانت فودكا كانت ايه
مختار / انت حد قالك قبل كدا قد ايه انت مستفز
رشيد / انت قولت لاخوك انك خارج معايا … شكلك ما قولتلوش عشان كدا متوتر
مختار / لا قولتله
رشيد / و سابك
مختار / انا مش صغير على فكره … على فكره كمان ناصر مش بيكرهك هو بس خايف تسحبنى فى سكتك
رشيد / اهلك مش هيسيبوك تمشي فى سكتى انا نفسي مش هسيبك تمشي فى سكتى مش عشان انا وحش لا عشان انت ما تعرفش تسلك فيها انت ابن بيوت يا مختار و ابن البيوت ما داقش كحرته الشوارع
مختار / بس الوضع اتغير دلوقت تقدر تفتح بيت و تتغير
رشيد / هو مش سيدنا محمد قال كل جسم نبت من سحت فالنار اولى به … و انا يا مختار من فوقى لتحتى من الحرام
مختار / حلو ما دام بقي دخلت من السكه دى يبقي تسمحلى ارد عليك
رشيد / قول يا مولانا
مختار / سيدنا محمد عليه الصلاه و السلام قال برده التائب من الذنب كمن لا ذنب له … و قال كمان قال الله تعالى : إذا ابتليت عبدي المؤمن ولم يشكني إلى عواده أطلقته من أساري ، ثم أبدلته لحما خيرا من لحمه ، ودما خيرا من دمه ، ثم يستأنف العمل … يعني اللى يتعود على اكل الحرام و يتوب بجد ربنا بيطهره و يغفرله كانه ما عملش حاجه اقولك حاجه كمان
رشيد/ قول
مختار / عليه الصلاه و السلم قال أَلا وإن في الجسد مضغة إذا صلحت صلح الجسد كله وإذا فسدت فسد الجسد كله ألا وهي القلب … و انت لو ما كانش قلبك نضيف ما كنتش صاحبتك ربنا قال قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم
رشيد / صدق الله العظيم بس برده من شب على شئ شاب عليه و ما حدش بيتغير يا صاحبى انت هتفضل مختار النضيف و انا هفضل رشيد النجس
مختار / ما حدش عارف مش يمكن ربنا مخبيلك حاجه احسن مش يمكن تصحى الصبح و تتوب انا بدعيلك على فكره و عمر ما دعوتى خيبت
رشيد / طب ما تدعى لروحك ببت حلوه بدل حالتك اللى تصعب على الكافر دى
مختار يبتسم
رشيد / اوعى لا … اه يا واطى ما حكتليش
مختار / مفيش حاجه تتحكى
رشيد / لا فى انا برده حاسس ان فيك حاجه متغيره
مختار / والله ما فى حاجه انت هتكدب الكدبه و تصدقها
رشيد / طب ما تقولش انا هخمن
مختار / انت شايف دبله فى ايدي … مفيش … يبقي مفيش حاجه اهدى بقي
رشيد / شوفتها فين
مختار / صبرنى يارب
رشيد / مصر و لا البلد قول بقي
مختار / انت مش هتسكت صح
رشيد / مصر … الكليه و لا الجيم
مختار / مفيش اصلا
رشيد / الكليه
مختار / جارتى
رشيد / اوعى اوعى اوعى
مختار / و معايا فى الدفعه فى الكليه
رشيد / يا عم هو فى احلى من كدا رايحين سوا جايين سوا مزاكرين سوا
مختار / احلى حاجه فيك طموحك العالى دا انا لو قولتلها صباح الخير يبقي كرامه
رشيد / خبتى فيك راكبه جمل دا اللى علمتهولك انا ربيتك على كدا صباح الخير!!! دا اخرك !!!
مختار يبص الناحيه التانيه
مختار / ما قولتلك مفيش حاجه
رشيد / بس البت داخله دماغك عنيك لمعت لما قولت بت حلوه
مختار / الموضوع معقد
رشيد / مرتبطه بواد سيكى ميكي شاقطها … لا ما كانتش عجبتك
مختار / ابن عمها متكلم عليها … مفيش حاجه رسمي و بحس ساعات ان هى مش موافقه … ساعات … مش عارف هى الليله كلها مكلكعه كدا
رشيد / ادعى يا ابو دعوه رشقه لو فيها الخير ربنا يجعلها من نصيبك تلف الايام و ما تعرفش ازاى و لا امتى بقت حلالك و بتاعتك
مختار / دعيت بس شكلها ما فيهاش خير
رشيد / جربت تنشف كدا و تسترجل و تخش فى الصوره بصدرك
مختار / بصدرى !!
رشيد / هى مش معاك فى الدفعه روحلها كدا و اطلب منها كشكول المحاضرات عشان تنقل منه حاجه و اشكرها يا عم عيب على السيكس باكس بتوعك دول يوقعوا اجدعها مزه
مختار / سطحى اوى اوى يعني و بعدين انا اصلا الغلطان انا على اخر الزمن هاخد نصايحي منك
رشيد / انت تعرف نسوانجى غيرى ينصحك
مختار / لا اله الا الله
رشيد / يا عم الدنيا حر خش عليها بتيشيرت نص كم فى نيك ابو ام قمصانك يا جدع واد زيك طول بعرض مش عارف يسلك فى حوار زى ده
مختار/ انا الغلطان و الله
رشيد / ما انت لو ما ظهرتش فى الصوره الحته هتطير منك
مختار / ما تتكلم عدل يا جزمه انت ايه حته دى
رشيد / لا حقك عليا فلتت منى دى … دى مهما كان هتبقي مرات اخويا و ليها احترامها
مختار / ممكن نغير الموضوع
رشيد / ممكن طبعا بقولك ايه ايه رايك انشلك ابن عمها طلقه
مختار / انت بتقول ايه يا ابنى
رشيد / صح هى حادثه سير قضاء و قدر
مختار/ لا اله الا الله
رشيد/ اسمهولك ما تزعلش و لا ياخد فى ايدي غلوه اقولك حاجه هعملهالك محبه مش عاوز منك حاجه
مختار / ابو دماغك دى هتقتل الجدع عشان متكلم على بنت عمه
رشيد / و اقتل عيلته كلها كمان ما عدا ست الكل عشان تخصك بس دا انت اخويا يا جدع و اللى يجي جنب منك اشلوحه
مختار / ههههههههههههه دا انت لاسع
رشيد / ايه رايك اخطفهالك و انتى تيجي تنقذها جامده دى ما تخيبش
مختار يقوم و يسيب المكان و يمشي و رشيد يجري وراه
رشيد / هبقي مؤدب والله مش هلمسها والله دى مرات اخويا يا جدع ما تخفش
مختار يقف و يمسك رشيد و يكعبله يوقعه فى الارض
مختار / بس بقي بس
رشيد / يعني دا جزاتى انى عاوز اساعدك
رشيد يربع ايديه تحت راسه
مختار / كتر الف خيرك
مختار يرجع يقعد جنب النار و رشيد نايم على الارض مكانه بيتفرج على النجوم فجاه يبص لمختار و يقوم يقعد مربع فى الارض
رشيد/ طب ما تخطفها انت
مختار يقوم رشيد يقوم يجرى و مختار بيجرى وراه
رشيد / يا عم بحاول اساعدك بحاول اساعدك بحاول اساعدااااااك
//////////////////
رشيد يبتسم
رشيد / دعوتك ما بتخيبش
رشيد يشغل التريدمايل و يطلع يجرى عليها
……………………
فى مطبخ الزنايته
هند بتغرف شوربه فى سلطانيه كبيره
انتصار / يا بت خديله صابعين محشي يتقوت بيهم شوربه ايه و فراخ مسلوقه ايه هو عنده دور برد
فاطمه / انتى لسه هتتكلمى معاها دى لو سبناهولها هتجيبه الارض اغرفيلها طبق حلو كدا الراجل ينقنق فيه
هند / على فكره الاكل ده ما ينفعش مع المضاد الحيوى اللى هو بياخده
انتصار / مهو المضاد ده بيهفت فلازم قباله لقمه حلوه تصلب طوله
هند / خلاص اللى انتوا شايفينه صح اعملوه
انتصار تجيب عدليه كبيره و تملاها على اخرها محشي
هند / و دا مين اللى هياكل كل ده ان شاء الله
فاطمه / انتى هتعدى على الراجل يا منيله امال لو ما كانش خسران دم كتير و لازم يعوض
هند / لا دا تعويره صغيره خدش سطحى
فاطمه/ خدش سطحى و هو السى سطحى ده بياخدوله غرز و مسكن و مضاد حيوى مختار واخد طلقه فى رجله
انتصار تزغرلها و هى تكمل
فاطمه/ الواد عباده بيحكيلى طلع وقف على العربيه كدا و بقي يضربهم الطلقه منه براجل منهم
إنتصار تعمل كانها بتلطم و عماله تغمز لفاطمه تسكت
هند / فوق العربيه ازاى يعني … يعني مش واخد ساتر
فاطمه / ساتر ايه دا ملقيوش طريقه ينجدوا روحهم بيها غير انهم يضربوه طلقه فى رجله اكمنه كان لابس قميص واقى
فاتن / لا مهو اخد واحده فى صدره قبل ما يطلع على العربيه
انتصار / حلو اوى الرغى ده لما الرجاله تيجي تاكل هنقولهم معلش اصلنا كنا بنرغى فى المطبخ
هند تاخد الصينيه و تطلع
انتصار /انا خلاص حطيت صوابعى العشره منك فى الشق اهى هتطلع تنكد عليه و هو عيان اهو
فاطمه / انتى يعني عاجبك كلامها خربوش و سطحى و حاجه اخر قله قيمه طب والله انا ما برد نارى الا كميه الرجاله اللى وقعهم مختار عقبال راس الحيه يارب
إنتصار / اقولك ايه و انتى فيكي كل العبر
فاطمه / اهو ده اللى بناخده منك دا انا كنت بطله امبارح بطله
انتصار تبتسم و تمشي و هى بتضرب كف على كف
……………………
فى اوضه هند
مختار ممدد على السرير بيقرا فى كتاب هند تدخل بصينيه الاكل مختار يتعدل على السرير و يحط الكتاب على الكومدينو هند تحط الصينيه على الترابيزه و تبصله
هند / انا لا هتعصب و لا هزعق
مختار / استر يارب
هند / انت خدت رصاصه فى صدرك
مختار يرفع التيشيرت و يشاورلها على جسمه
هند / وقفت فوق العربيه مكشوف عشان تضرب نار
مختار / كانوا كتير و محصرينا
هند / انت بتفكر ازاى
مختار / ما كانش قدام حل تانى لو كنا فضلنا نضرب من ورا العربيات كان واحده واحده سلاحنا هيخلص و ما كنت عارف امين و الرجاله هيلحقونا امتى
هند / وريني الواقى بتاعك
مختار/ مش معايا قلعته فى المستشفي هبقي ادور لك عليه
هند / هتدور عليه و لا هتجيب جديد
مختار / ايوه اخدت طلقه فى صدرى بس كنت مامن نفسي و لعلمك خدتها و انا مدارى ما كنتش مكشوف و ده اللى جرائني
هند / طب ما دام ضربوك فى صدرك ما حستش و لو للحظه ان الحوار بتاع ان فيرا عوزاك عايش ده فايك و انك خلاص ما عدتش حياتك مهمه اوى كدا
مختار / انا عايش قدامك
هند / عشان ليك عمر عشان ربنا بيحبنى عشان انا ما ليش غيرك ما فكرتش فيا
مختار / فكرت بس كمان فكرت فى عباده و مراته و ابنه و كل راجل من اللى كانوا معايا فكرت فيهم و فى اللى مستنينهم الناس دى ما لهاش اى ذنب انها تروح هدر لمجرد انى
هند / على فكره انت اللى بعتنى مصر انت اللى خلتنى اخرج بره البلد انت جازفت بيا و بيهم و بنفسك
مختار / ما قولتلك ان ما كانش رشيد كان هيبقي غيره
هند / انت لسه بتثق فى رشيد بعد كل اللى حصل انت كنت هتموت و لولا ستر ربنا معايا كان ممكن انا كمان اموت
مختار / و الحمد لله كلنا بخير مفيش لا خساير و لا اصابات
هند / عرفت ليه انا كان نفسي اوى فى الخلفه عشان انا لوحدى مش قادره اربطك فى الدنيا دى
مختار / ربطانى بس هى
هند/ انت ازاى تثق فى كلام واحده مهدده كل عيلتك بالقتل مهدده كل اهلك بالقتل بجد متخيل انها مش هتاذيك اهى اذتك و لولا ستر ربنا كنت اتاذيت اكتر انت بجد عقلك صورلك انك لما تقف وش لوش لواحد و كل واحد ماسك سلاح للتانى ان التانى هيسيبك تقتله عشان ست فيرا هانم عوزاك عايش
مختار / انا مقدر خوفك و انفعالك بس انا كويس اهو
هند / اسكت يعني
مختار / انا غلطان مش هنكر و الكبير و ام فاتن و كل اللى فى السرايا و انتى فى مصر بهدلونى و انتى خدتى دورك اهو مش فاضل غير ياسمينا و العيال الصغيره بس ماشي انا مقدر لانى فعلا غلطت بس صدقيني يا هند وقتها عقلك بيتصرف بطريقه تانيه الادرينالين بيبقي عالى و الناس حواليكي و صوت ضرب النار و انتى فى القطر لازم اللحقك انا ما كنتش بعمل ده عشانى عشان حد يقول بصوا مختار قتل كام واحد انا مفكرتش فى نفسي لحظه
هند / تخيل لحظه لو كان جرالك حاجه انا سافرت و عرضت كل دول للموت عشان اخلف و فى الاخر جوزى مات
مختار / انا عايش
هند / انت بجد
مختار/ انا عايش جرح صغير فى رجلى هيلم بسرعه و هرجع زى الاول واحسن ما موتش لسه عايش ما موتش و انتى بخير و كلنا بخير فاهدى
هند تهز راسها و تكتم جواها
هند / تقدر تروح للترابيزه و لا اجيبهالك هنا
مختار / هقدر انا كويس انا ركبت الطريق و جيت مش هقدر اتمشي الخطوتين دول
مختار يقف هند تسنده يبصلها
مختار / طب مفيش حاجه كدا تفتح نفسي على الاكل
هند / حاجه زى ايه
مختار / يعني اضعف الايمان ضحكه
هند / انا زعلانه منك
مختار / طب عشان خاطرى دا انا حبيبك
هند تسنده يقعد و تشد كرسيها جنبه بالظبط و تسند عليه بركبتها و هى لسه واقفه بتساعده ياكل
هند / انا عوزاك تمسح الاكل ده كله
مختار / بحبك يا بت
هند تبصله
مختار / طب قسما بالله بحبك اكتر من اى حاجه تانيه فى دنيتي
هند تقعد على الكرسي
هند / اوعدنى ان اللى حصل مش هيتكرر تانى
مختار / اوعدك انى هحاول اخد بالى من نفسي اكتر المره الجايه
هند تحضنه يقعدها على رجله السليمه تبتسم
مختار / بقولك بحبك يا بت مالك جايبه التقل ده منين
هند تاخد صابع محشي و تحطه فى بقه اللى هو اسكت مختار يمسك ايدها و يبوسها
مختار / طب والله العظيم بحبك
هند / و انا كمان بحبك كل بقي عشان تعوض الدم اللى خسرته
مختار / هاكل ما دام من ايديك هاكل
هند تاكله و هى مبتسمه بخجل
………………….
فى اوضه سماح
سماح قاعده بتتكحل قدام المرايه باب الاوضه يخبط سماح تخلص بسرعه و تقوم تفتح الباب تلاقي كوثر واقفه و شايله صندوق
كوثر / الصندوق ده جه عشانك على البوابه
سماح / تسلمى دا انا مستنياه من بدرى
كوثر / و انتى اى حاجه تيجي كدا تستلميها مش يمكن فيها قنبله و لا حاجه
سماح / مهو قنبله فعلا هههههههه دا قميص نوم تحبى اوريهولك
كوثر / لا ياختى بناقص
سماح/ مهو انا مش هصدق انك خايفه عليا انتى طلعتى الصندوق بنفسك عشان نفسك تعرفى اللى جواه و انا هريحك
سماح تفتح الصندوق و تطلع قميص نوم تتك على الكب ينور
سماح / ها يا عمتى اتاكدتى انه قنبله
سماح تتك على الكب تانى ينور بشكل مختلف
سماح / لا مؤاخذه عرسان بقي و كدا
كوثر / افرحيلك يا اختى يومين قبل ما تغورى من هنا
سماح / اغور على فين على سرايتي الجديده لا لسه بدرى على ما تخلص و يا عالم من يعيش مش يمكن تحصل فى الأمور امور و ناس تانيه اللى تمشي و افضل انا هنا قاعده و متستته
كوثر / عشم ابليس فى الجنه
سماح / لا مؤاخذه يا عمتى كان نفسي نفضل واقفين على الباب كدا بس عاوزه اقيس القميص الجديد قبل ما مغاورى يوصل لو ما عندكيش مانع يعني
كوثر / ياختى هموت على وقفتى معاكى يعني قيسي اياكش يتفتق و انتى بتقيسيه
سماح / و احنا لسه هنستنى اما يتفتق
سماح تفتق القميص نصين فى ايدها
كوثر / اه امال ايه و طبعا هتقولى انى انا اللى فتقته زى ما اتبليتى عليا فى المطبخ انى ضربتك
سماح / فداكى يا عمتى دا حياله قميص نوم
كوثر / الكدب ما لوش رجلين يا بنت فاطمه مسير الكل يشوف حقيقتك
سماح/ نورتى يا عمتى ورايا مزاكره عن اذنك
سماح تدخل و تقفل الباب ماجده تدخل
ماجده/ بتعملى ايه هنا يا عمتى
كوثر / اقطع دراعى ان ما كانتش البت دى ساحره لاخوكى
ماجده / لا اله الا الله ليه كدا بي
كوثر / بديها العلبه اللى جت قامت فتحاها و قطعاها
ماجده / هى اللى قطعتها ؟
كوثر/ والله العظيم
ماجده / يمكن الحاجه ما عجبتهاش
كوثر / لا و انتى الصادقه عشان تتبلى عليا و تقول انى انا اللى قطعته
ماجده / طب و انتى إيه اللى خلاكى انتى اللى تطلعيهولها ما كنتى بعتيه مع اى حد من العيال و خلاص انتى غاويه تجيبي لنفسك المشاكل
كوثر / دا بيتي و اعمل فيه اللى انا عوزاه
ماجده / و بيتها هى كمان يا عمتى بصي انا هدخل اتكلم معاها و اشوف هى عملت كدا ليه
كوثر / مش محتاجه كلام بتوقع بيني و بين اخويا و اخوكى عاوزه تخلص منى
ماجده / طب هتكلم معاها و نشوف برده
كوثر / براحتك انا رايحه اوضتى انا اساسا قرفت منها و من عيشتها
ماجده / ربنا يهديها و يهدينا جميعا
كوثر تمشي و ماجده تخبط على الباب
…………………..
فى سرايا الزنايته
عباده يدخل يلاقى الغفر بيتكلموا اول ما يعدى يسكتوا يقف و يبص عليهم
عباده / السلام عليكم
غفير ١ / و عليكم السلام يا سي عباده اؤمر
عباده / ما يؤمرش عليكوا ظالم مالكوا فى حاجه و لا ايه
غفير ٢ / سلامتك يا سيد الناس
عباده / لا صحيح فى حاجه ؟ حد فيكوا محتاج اى حاجه ناقصه فلوس اى حاجه … ابنك عامل ايه
غفير ١ / الحمد لله بقي كويس و كلنا بندعيلك
عباده / لا بجد قول انت اخويا
غفير ١ / خيرك سابق يا سي عباده والله لو محتاج هقول احنا لينا غيركوا
عباده / على العموم انا جوه ان احتاجتوا حاجه نادولى
غفير ٢ / كتر الف خيرك
عباده يجى يدخل بنت صغيره توقفه
البنت / عمى عباده عمى عباده
عباده يشيلها
عباده / خير يا بسمله اؤمرى استنى خديلك حاجه حلوه
عباده يمد ايده فى جيبه و يديها بومبنايه
بسمله / انا عارفه الغفر كانوا بيقولوا ايه
عباده / بسمله قولنا مليون مره ما ندخلش فى كلام الكبار
بسمله / كانوا بيتكلموا عن عمتى سماح
عباده يعدلها على ايده و يبص على الغفر
عباده / انتى متاكده من الكلام ده دى تطير فيها رقاب دى
بسمله / كانوا بيقولوا عموا مغاورى بيضربها جامد
عباده / كدا … طب روحى اللعبى مع اخواتك و ما تقوليش الكلام ده لحد تانى
عباده ينزل بسمله تجرى على الجنينه اللى ورا و يرجع للغفر و يقف قدامهم و ايديه ورا ضهره
………………………
فى اوضه سماح
ماجده / يعني انتى اللى قطعتيه بجد
سماح / ايوه انا يمكن ترتاح و تنبسط مش عماله تدعى اللهى يتفتق اللهى يتفتق اديني فتقته اياكش ترتاح انا مش فاهمه هى مالها و مالى هو انا درتها و لا اكونش هلبسه لحد غريب اهو اترمى فى الزباله ارتاحت هى كدا
ماجده / انا مش فاهمه والله انتوا الاتنين اخره حكايتكوا ايه
سماح / كل شويه بكره تغورى بكره تمشي هى فاكره انها بتطردنى لوحدى و لا عشان انا ساكته هى مش من حقها تطردنى اصلا انا مش قاعده فى بيتها انا فى بيت جوزى انا مش جايه من الشارع انا كنت عايشه فى سرايا زى دى
ماجده / يا سماح ما تكبريش المواضيع
سماح / طب والله يا ماجده و اسالي خديجه هتقولك امى بتلمهم و تقعد تزوقهم بايديها و تجبلهم احلى لبس و تعلمهم كل واحده ازاى تدلع على جوزها و تدلعه ازاى هى الواحده ليها ايه غير ان عيالها يبقوا مبسوطين و هو ايه هيبسط الراجل اكتر من ان مراته تعامله حلو و تدلعه مش دى اللى اتشالت واتهبدت لما عرفت انى شرياله قميص جديد
ماجده / والله ما عارفه اقولك ايه
سماح / يا ماجده افتحى دولابى هتلاقيه مليان اشكال و اللوان انا مش ناقصنى حاجه و مع كدا قولت و ماله ما يغلاش عليه دا انا كنت بستاذنها اقيسه قعدت تدعى عليه ما حستش غير و هو بيتفزر فى ايدي
مغاورى يدخل
مغاورى / السلام عليكم … ازيك يا ماجده اتارى الاوضه منوره
سماح / حمد الله على السلامه جيت بدرى
مغاورى/ امشي و لا ايه
سماح / لا ازاى بيتك و مطرحك ثوانى اغرفلك و اهو ماجده تاكل معانا عامله كباب حله و رز ابيض يستهلوا بقك
ماجده / لا الف هنا انا اكلت و بعدين اكيد مغاورى تعبان و محتاج يرتاح
مغاورى/ تعبان ايه يا بت اقعدى جابرى الزاد سماح نفسها حلو اوى فى الاكل
ماجده / مره تانيه يلا فتكوا بعافيه
ماجده تمشي
مغاورى/ مالها البت دى … و مالك انتى كمان
سماح / مفيش خش غير هدومك على ما اسخن
مغاورى / فى ايه يا سماح قالولى ان جالك طرد فى البريد النهرده ايه يا قمر هتاكلى عقلى بايه النهرده
سماح / بالكباب و الرز انا جعانه و ما رديتش ادوق لقمه من غيرك يلا بقي خليني اللحق اسخن
مغاورى / شكلها مفاجاه ههههههههههههههههه
مغاورى يدخل الحمام و يقفل الباب و سماح تروح تسخن
……………………..
فى مكتب ناصر
عباده / يعني ايه سماح ليها لسان ومعاها تليفون ما يمكن خايفه
ناصر / بنت الزنايته تخاف من مين يا عباده اسمع سماح عندى زيها زى مريم بالظبط بس يا ايها اللذين امنوا ان جائكم فاسق بنبئ فتبينوا تاخد امين و تطلعوا تلفوا البلد كعب داير لحد ما توصل لاصل الحكايه و مش بس اصلها انا عاوز مصدر الكلام من بيت الجوراحه
عباده / بس الحكايه دى هتاخد وقت
ناصر / تاخد قد ما تاخد و ان كان يريحك انا هطلع دلوقت على سماح اتكلم معاها و اطمنها ان كانت خايفه
عباده / اجى معاك انا مش هعرف اقعد بعد اللى سمعته
ناصر / ما تكبرش الدنيا يا عباده قبل ما نتاكد و حسك عينك امك تاخد خبر يلا خد اخوك و الليله قرار الموضوع ده يكون عندى يلا ما تضيعش وقت
عباده يهز راسه و يمشي
…………………
فى اوضه مغاورى
مغاورى و سماح قاعدين بياكلوا
مغاورى / يا ست بكره الصبح اجبلك بداله عشره و لا تزعلى روحك
سماح / انا مش زعلانه انا أصلا ما كنتش ناويه اقولك
مغاورى / امال تقولى لمين يا بت انا عارف ان عمتى صعبه بس عدنها جارتنا فى بيت بره و ياما الناس بتشوف
سماح / انا عشانك استحمل اى حد
مغاورى / و عشان البق الحلو ده مدى ايدك الناعمه دى فى جيبي
سماح تمد ايدها تطلع علبه صغيره تفتحها تلاقي فيها خاتم تبص لمغاورى
مغاورى / كنت معدى من قدام الصاغه لقيتهم بيوضبوا الفاترينه و منزلين شغل جديد قولت ابدا احلى حاجه لست البنات
سماح / يخليك ليا تاعب روحك علاطول كدا هو انا ناقصنى دهب
مغاورى / و ان ما كنتش انت تتاقل بالدهب يا قمر انت امال مين طب دا حتى مش مقامك
سماح / بقي انت تجبلى خاتم حلو كدا و انا معنديش حاجه اديهالك
مغاورى / و انا مش عاوز حاجه غير انى اشوفك مبسوطه
سماح / طب والله دخلتك عليا كفايا هو انا عندى اغلى منك … بقولك ايه انا شبعت كمل انت اكلك و حصلنى و لا هو يعني عشان القميص اتقطع ما ندلعش
مغاورى / اموت فى دلعك يا مدلع
سماح / ما تتاخرش عليا
مغاورى / شبعت
سماح / ههههههههههههههههه يا لهوى عليك
……………………..
فى مكتب سرايا الجوارحه
ناصر قاعد مع شاهين و شاهين باصص فى الارض
ناصر / يعني حصل
شاهين / والله كانت مره واحده و رضاها و لمينا الليله
ناصر / باماره ما البلد كلها ما لهاش سيره غير الحكايه دى
شاهين / يا ناصر يا خويا سماح زى بنتى و انا
ناصر يخبط بعكازه فى الارض و يقوم يقف
ناصر / لا مؤاخذه يا حج تبعت حد يستعجل سماح عاوز اتكلم معاها كلمتين
شاهين / حاضر
شاهين يقوم و يطلع بره المكتب سماح تنزل على السلم
سماح / خير يابا فى ايه
شاهين/ الكبير عاوزك جوه
سماح / قالولى خير امى جرالها حاجه
شاهين / امك بخير ربنا يديها الصحه ادخلى هو عاوز يكلمك فى حاجه تانيه
سماح تهز راسها و تدخل و مغاورى نازل
شاهين / الزنايته عرفوا انك ضربت سماح
مغاورى / مش سماح اللى قالت
شاهين يبص لفوق و يتنهد مغاورى يخبط و يدخل المكتب
سماح / مين بس اللى قالك الكلام ده
ناصر / انتى خايفه من ايه الحج شاهين قالى كل حاجه
سماح / قالك ايه بس دا حوار و عدى و احنا اتراضينا
ناصر / يعني ايه اتراضيتوا عادى يعني يمد ايده عليكي
مغاورى / كانت لحظه شيطان والله يا كبير و مش هكررها
ناصر / لا ابقي كررها ما انت واخدها من بيتنا تهينها فى بيتك و لا تكونش فاكر انها كان ناقصها ارض و دهب و فلوس
سماح / يا كبير الموضوع غير كدا خالص انا قولت كلام فى لحظه عصبيه كنت غلطانه فيه
ناصر / ليكي كبير يشتكيكي ليه
سماح / و لا يشتكيني و لا اشتكيه مشاكلى انا و جوزى المفروض ما تطلعش بره
ناصر / و اهى طلعت و بقيتي لبانه كلنا بقينا لبانه فى بق البلد
سماح / منكادين منى الكلام ده قديم اشمعن دلوقت بيتكلموا فيه لما جابلى السرايا
ناصر / لو خايفه من كلام الناس
سماح / انا ما يهمنيش كلام الناس موقف حصل بين واحد و مراته و انا نسيته و هو نسيه انتوا بتقلبوا فى اللى فات ليه
ناصر / يعني دا كلامك يا سماح
سماح / يا كبير مجيتك على راسي بس لا انا صغيره و لا ناقصنى لسان و ربنا يخليكوا ليا عارفه انكوا فى ضهرى بس انا مش هقتل جوزى من اول غلطه خصوصا انه شاريني يعمل ايه اكتر من كدا ما كلنا بنغلط يا كبير
ناصر / المهم انها تكون اخر غلطه يا سماح المهم انك بجد تكونى عارفه انك بنت الزنايته و ان وراكى الف راجل ما يستحملوش عليكي الهوا
سماح / و جوزى اولهم يا كبير جوزى كمان ما يستحملش عليا الهوى
ناصر / ربنا يهدى سركوا
سماح / ما تاخذنيش يا كبير بس كنت عاوزه اعرف الكلام ده وصلكوا ازاى
ناصر / اخوكى شغال على الحكايه دى بكره و لا بعده بالكتير و هعرف مين فى بيت الجوارحه بيطلع اسرارهم بره مع انها مش شغلتى و لا ايه يا مغاورى
مغاورى / حقك عليا يا كبير
ناصر / انا مش مراتك يا مغاورى هتراضيني بكلمتين انا اب بنته اتهانت و حتى لو هى مسامحه و باقيه على بيتها انا مش مسامح
ناصر يمشي سماح تروح تقف جنب مغاورى
سماح / ما تزعلش هو ما يقصدش انت عارف غلاوتك عنده قد ايه
مغاورى يبص لسماح
سماح / هم ما يعرفوش انت بتعاملنى ازاى اللى نقلهم قاصد يولع الدنيا حريقه انا هتكلم معاهم و لما هيعرفوا انا قد ايه سعيده معاك الدنيا هترجع زى الاول و احسن
مغاورى / ربنا يكملك بعقلك يا بنت الاكابر
سماح / و يخليك ليا يا سيد الناس كلها
…………………….
فى اوضه عباده
عباده / يعني ما كنتيش عارفه
خديجه / و الله ما كنت اعرف بس حتى لو عرفت ما كنتش هقول
عباده / تمام كفايا كلام بقي و نامى
خديجه / راجل و مراته و اتراضوا
عباده / اختى قبل ما تبقي مراته
خديجه / دى حياتها
عباده / سماح صغيره و ما تعرفش مصلحتها
خديجه / و ما دام صغيره جوزتوها ليه
عباده / كنت فاكر اخوكى راجل و هيصونها
خديجه / ربنا يسامحك
عباده / عيني فى عينه عيني فى عينه كدا و قولتله فى حاجه يا مغاورى؟ فى حاجه ؟ و كدب فى عيني كدب فى وشي
خديجه / من حقه يحافظ على خصوصيات بيته
عباده/ و فالح اوى ما شاء الله عليه ما عرفش بالموضوع الا خمسه سته فى البلد
خديجه / انا متاكده انه غصب عنه انت عارف مغاورى كويس ناشف شويه بس والله حنين انت عارفه
عباده / يعني امد ايدي عليكي دلوقت و بعدين اطبطب و نقول حنين
خديجه / لو دا هيهديك انا قدامك اهو بس ابعد عن بطنى
عباده يبصلها و يبص الناحيه التانيه
عباده / نامى يا خديجه انا مش طايق روحى
خديجه / هو مش الكبير كلمها و قالت انه رضاها افرض دلوقت كبرت المواضيع و خربت عليها هتفرح يعني
عباده / تعيش فى بيت ابوها متصانه
خديجه / مش مهم هى عاوزه ايه يعني
عباده / لو كانت ماجده لقت اللى يقف فى ضهرها من اول مره عباس الله يرحمه مد ايده عليها ما كانش اتجرا و عملها تانى
خديجه / صوابعك مش زى بعضها و مغاورى مش زى عباس
عباده / و اختى مش زى أختك
خديجه / دى حقيقه اختى اغلب بكتير من اختك اختى كانت عاوزه بس تعيش لكن اختك عارفه ازاى تعيش
عباده / قصدك ايه يعني
خديجه / يعني اختك عرفت تدفع اخويا تمن القلم ده جامد اوى بغض النظر عن الطريقه بس مفيش واحده فى الصعيد كله اتكتبتلها ارض يرمح فيها الخيل
عباده / و احنا كان ناقصنا ارض يعني
خديجه / لا ربنا يزيدكوا بس انت تقدر تقول لماما بطه انا هسيبك و اخد بيت لوحدى مين فى الزنايته كلهم عمل زى مغاورى ما حدش فينا يعرف حقيقه اللى حصل و سماح قالت انها غلطت تفتكر لو ضغط عليهم و قالولك الحقيقه مش يمكن عصبيتك دة كلها تنزل على مفيش مش يمكن يا عباده بدل ما انت اللى مركبهم الغلط هم اللى يركبوك
عباده / ليها اهل ليها كبير
خديجه / جوزها هو أهلها و هو كبيرها جوزها يا عباده بينها و بين جوزها
عباده/ مفيش الا الضرب يعني
خديجه / غلط و هو اعترف بده و هى نفسها سامحته يعمل ايه يعني
عباده / انتى بتدافعى عنه عشان اخوكى
خديجه / و هى اختى سماح اختى و انت جوزى ما تجبرش سماح تختار بينكوا و بين مغاورى سماح اللى هتخسر اى كان اختيارها لا انت خسران حاجه من خراب بيت اختك و لا هتقدر تعوضها
عباده/ دا انا اجوزها سيد سيده
خديجه / سهله هى يعني شيل ده و حط ده ما لهاش قلب هى ما لهاش راى
عباده / احنا لسه على البر قبل ما تحمل و يبقي الكلام على مستقبل العيل اكتر من مستقبل سماح
خديجه / و انت اش عرفك أنها مش حامل
عباده يمسك ايد خديجه باهتمام
عباده / هى قالتلك حاجه ؟
خديجه / لا بس ممكن الله اعلم اسمع يا عباده انت جوزى و ضهرى و سندى و مغاورى اخويا انا لا بقف معاه و لا بقف ضدك بس انت ليك عليا المشوره يا عباده انا والله ما عاوزه غير مصلحه سماح سبها تقرر حياتها عشان ما تجيش يوم تلومك و تقولك كنت مسامحه و انت اللى خربت عليا
عباده يبصلها
خديجه / اقف فى ضهرها و طمنها قولها اى كان قرارك هقف معاكى خد موقف من مغاورى و ربيه بالأدب مع انى متاكده انه ندمان بس دا حقك بس بالله عليك يا شيخ ما تخربش على اختك خليها تختار حياتها هى اللى هتعيشها
عباده / مش هتنامى يعني فى الليله دى اسيبهالك خالص
خديجه / لا هنام … تصبح على خير
خديجه تنام فى السرير و تستغطى و عباده يقعد على كرسي فى جنب و يحط ايده على خده و يفكر
………………………….
فى اوضه ناصر
ناصر / لما نجيب اللى طلع الكلام من بيت الجوارحه هيبقي لينا كلام تانى مع اللى طلعه
فاطمه / و انا هسيب اللى مد ايده على بنتى و امسك فى اللى طلع الكلام
انتصار / مهو ده العدو الحقيقي لبنتك هناك ده اللى عاوز يخرب عليها
فاطمه / انا الكلام ده ما يلزمنيش ابوها لو كان عايش
ناصر / ما كانش عمل اكتر من اللى عملته سماح زيها زى مريم الاتنين عندى واحد و بعدين سماح مش عيله
فاطمه / مرايه الحب عاميه يا كبير
ناصر / و مفيش اسهل من خراب البيوت
انتصار / اقولكوا الحق انا عاجبنى تصرف البت سماح
فاطمه / هتبقي هفيه و كل من هب و دب
انتصار/ الكلام ده ما يمشيش مع ولاد الاصول و مغاورى مأصل
فاطمه / على العموم كدا كدا هروحلها الصبح اتكلم معاها و اشوف انا حكايتها ايه و اصل الموضوع و عملت ايه خلى مغاورى يتعصب عليها
ناصر / مش هتقولك حاجه ما حدش هيقولك حاجه فاطمه/ يبقي البت ما عملتش حاجه مهم مش هيشيلوا الليله لوحدهم و يداروا عليها يعني
انتصار / استنى بس اما نعرف اصل الحكايه و بعدين نتصرف
فاطمه / من النجمه هكون عند بنتى واللى يحصل يحصل
ناصر / ماشي بس بالهداوه
فاطمه / ما تخافش انا عارفه ازاى اخد حق بنتى يلا فتكوا بعافيه
فاطمه تسيب الاوضه و تطلع بره انتصار تبص لناصر و تتنهد
………………….
فى شقه ام داوود
الراجل/ و ما دام ما قولتيش لحد تروحى و تفتحى على روحك ليه
ام داوود / انا ما قولتش بس ما اضمنش انت و لا عيالك حد فيكوا يكون قال
الراجل / قسما بالله ما قولت حاجه
ام داوود / و لا وسط الكلام على الشاى فى الغيط
الراجل / و لا جبت سيره لجنس مخلوق
ام داوود / برده اسبق و ما دام كدا كدا هيتعرف اسبق انا و اقولهم
الراجل / يا وليه عيالك حلفوا ما حدش منهم نقل الكلام و بكره يوصلوا للى قال بعيد عننا ما تدخليناش فى مشاكل احنا فى غنى عنها
ام داوود / و انا مش مصدقاهم و هعمل اللى قولتلك عليه دا ما عدش الزنايته بس اللى بيدوروا على اللى قال دا الجوارحه كمان يعني يا نترمى فى حضن الزنايته يا هنقع بين دروس الاتنين و احنا ما فيناش نفس
الراجل / لا اله الا الله منك لله يا ام عباس عليكي و على الكام جنيه اللى بيجوا من وراكى
……………………
فى اوضه سماح
سماح واقفه فى البلكونة مغاورى يدخل يحط عبايه على ضهرها تبصله
مغاورى / الدنيا برد النهرده
سماح / شوفت اهل البلد بيقولوا عنى ايه
مغاورى / اللى طلع الكلام هيتجاب
سماح / اللى طلعه من اهل البلد و لا من جوه السرايا يا مغاورى؟ اى كان و بعد ما يتجاب هيحصل ايه
مغاورى / البلد كلها ما لهاش سيره غير تكديب الكلام كلنا كدبناه
سماح/ ماشي
مغاورى / طب قوليلى ايه يرضيكي اطلع فى حديده المسجد و اقول انى غلطت و اطلب السماح
سماح / وانا ارضاهالك برده … عباده عرف و ما جاش و سكوته مش مطمنى
مغاورى / عباده عاقل و عارف انى بحبك
سماح / تفتكر امى عرفت
مغاورى يبص الناحيه التانيه و يسند على السور
سماح / اديني الامان اقولك حاجه من غير ما تتعصب
مغاورى يبصلها
مغاورى / مش هتعصب قولى
سماح / لا خلاص
مغاورى / هو ايه اللى خلاص قولى
سماح / اللى حصل ما شافوش غير عمتك و اختك
مغاورى / بس وصل لابويا و الحيطان من ورق يا سماح و البيت كبير و مليان ناس
سماح / بس ما حدش منهم بيكرهنى غير عمتك
مغاورى / الحريم ما بيبطلوش لت و عجن و الكلام مفيش اسهل منه
سماح/ بس انا قلبي دليلى و بيقولى عمتك اللى طلعت الكلام بره
مغاورى / ايوه يعني عاوزه ايه
سماح / مش عاوزه حاجه انا بس … لو اهلى عرفوا انها عمتك لو امى عرفت انها عمتك
مغاورى / حريم فى بعض
سماح / دا كلامك
مغاورى / ان كانت هى عمتى فامك تبقي امى
سماح / بس ابويا الحج مش هيسكت دى اخته و انا مش عاوزه المشكله تكبر بينا و بينكوا انا اللى هتوجع فى الاخر لا هستحمل عليكوا و لا عليهم
مغاورى / سبيها لله تبات نار تصبح رماد
سماح / و نعم بالله
مغاورى / خشي جوه شكلها هتشتى
سماح / المطره خير
مغاورى / طب خشي لتعيي
سماح تهز راسها و تدخل
…………………….
فى شقه يوسف تانى يوم الصبح
يوسف بيلبس الجزمه على الباب
محمود / صباح الخير صاحى بدرى يعني
يوسف / عن اذنك
محمود / يوسف
يوسف يبصله
محمود / على فين بدرى كدا
يوسف/ هدور على شغل عاوز منى حاجه
محمود / لا ربنا يوفقك بس هو انت ناوى تسيب الشغل فى المحل و لا دا جنب ده
يوسف / لا هسيب المحل و لما ربنا يكرمنى هسيبلك البيت كله و خد انت بقي اجواز بناتك فى حضنك خليهم ينفعوك
محمود / ما حدش بينفع حد
يوسف / عن اذنك
محمود / يوسف
يوسف / عاوز منى ايه انت مش دمرتلى حياتى سبنى اغور بقي
محمود / انا دمرتلك حياتك!!!
اسراء تطلع من جوه مصدومه
يوسف / كل الناس اهاليها بيساعدوهم الا انا ابويا بيعجزنى قصقصت ريشي و رمتنى
محمود / ايه اللى انت بتقوله ده
يوسف/ ما تسخفش كلامى لما اشوف كل اب بيساعد ابنه و انت بتساعد الغرب و ابنك لا
محمود / ما حصلش قولتلك هديك مقدم العربيه و مقدم الشقه و هساعدك
يوسف / هتساعدنى و لا تسحلنى انا ليا حق عندك و مش مسامحك فيه انت سرقتى
اسراء / يوسف
محمود / سبيه يا اسراء … تحب نقعد و نتحاسب بالورقه و القلم ونشوف حقى و حقك يا يوسف تحب تشوف صرفت عليك كام و صرفت على اخواتك كام و نشوف ظلمتك و لا لا
يوسف / انت هتشتغلى بقي انا ماشي
يوسف يمشي و يرزع الباب
اسراء / لا اله الا الله انا مش عارفه الواد ده جراله ايه دا اكيد اتحسد
محمود / قال و انا اللى كنت فرحان اوى بالواد
اسراء / بكره يكبر و يعقل معلش الشباب فى سنه كلهم كدا
محمود / كلهم !! ليه مش شايفه حواليكي … دا تربيتي انا اللى مالت
اسراء / يا خويا على راى المثل ان كبر ابنك خاويه
محمود / نعم !!!
اسراء / بدل مقدم شقه و مقدم عربيه اشتريله العربيه و راضيه و قوله يجيب التانيه من معاه يوسف جدع و طيب و لما بيحط حاجه فى دماغى بيعملها
محمود / كان ممكن يا اسراء بس بعد اللى عمله ده ما لوش عندى حاجه
محمود يفتح الباب و يمشي و يرزعه وراه
……………….
فى سرايا الزنايته
فاطمه تركب العربيه و عباده يسوق خليفه يفتح البوابه فاطمه تشوف ام داوود
فاطمه / اقف يا عباده اقف
عباده يركن و فاطمه تفتح الشباك
فاطمه / ام داوود … ام داوود تعالى
ام داوود تروح لشباك فاطمه
فاطمه / ازيك و ازى عيالك
ام داوود/ شكلى جيت فى وقت مش مناسب دا انا كنت عاوزاكى فى كلمتين
فاطمه تفتح الباب و تنزلها
فاطمه / فى ايه مالك حد من العيال جراله حاجه محتاجه حاجه
ام داوود / انا مكسوفه منك اوى بس والله العظيم ما انا اللى طلعت الكلام يتقطع لسانى لو كنت نطقت بحرف
فاطمه / كلام ايه يا وليه انا مش فاهمه حاجه
ام داوود /الكلام اللى اتقال عن الست سماح فى سرايا الجوارحه
فاطمه / ااااه طب ما دام مش انتى اللى عملتيها جايه ليه هو حد قالك انى شاكه فيكي
ام داوود / لا يا ست الكل بس انا عارفه مين اللى قال و كا اعرفش قالت لغيرى و لا لا فخايفه يشيلونى انا الليله بس والله العظيم انا سمعت كانى ما سمعتش ما نطقتش بحرف
فاطمه / يعني هتقولى سمعتى من مين و لا جايه تضيقي خلقى و خلاص
ام داوود/ ادينى الامان يا ست الكل انا مش قدكوا و لا قدهم
فاطمه / عليكي الامان مش هجيب سيرتك مين
ام داوود / ستى ام عباس الحجه كوثر الجرحى
فاطمه / هى الحكايه كدا بقي ماشي خشي جوه شوفى ستك ام فاتن قوليلها الست ام عباده بعتانى و انا هكلمها فى التليفون
ام داوود تهز راسها و تدخل و فاطمه تدخل و هى بتطلع الموبايل
عباده / خير فى حاجه و لا ايه
فاطمه / لت حريم اطلع على اختك اطلع
عباده يهز راسه و يسوق
……………………..
فى محل محمود
حمدى / طب خلينى انا اتكلم معاه
محمود / تتكلم معاه فى ايه هو بيسمع لحد و لا بيعمل حساب لحد
حمدى / يوسف طيب هو بس عصبى شويه و مدلع و بعدين هو لو ما ادلعش عليك هيدلع على مين ربنا يخليك ليه
محمود / انا كبرت يا حمدى و ما عدتش قادر انا محتاجه يسندنى
يوسف يدخل
يوسف / السلام عليكم
حمدى / و عليكم السلام ابن حلال مزعل ابوك ليه يا يوسف
يوسف/ مش مكانه يا عمى معلش مش هننشر غسيلنا الوسخ قدام العمال و الزباين
حمدى / عندك حق طب والله عندك حق … بقولك ايه ما تيجي نشرب كبايتين سحلب فى القهوه اللى هناك دى انا عازمك
يوسف / ماشي
يوسف و حمدى يروحوا القهوه و محمود باصص الناحيه التانيه
………………….
فى سرايا الجوارحه
عباده يركن العربيه
فاطمه/ ما تفتحش بقك بكلمه لا مع مغاورى او غيره لحد ما اتكلم مع اختك و اشوف ميتها ايه
عباده / يعني لو قالتلك زى ما قالت للكبير
فاطمه / دى حياتها و هو فى الاول و الاخر جوزها احنا بس عاوزين نبان فى الصوره بس فى الخلفيه احنا نقف فى ضهرها اه لكن نغطى عليها لا
عباده / و ان كررها
فاطمه / ان كررها يبقي ما اترباش كفايه و ساعتها العين بالعين و البادى اظلم
عباده / ماشي
فاطمه تنزل و عباده لسه فى العربيه ام مغاورى تستقبل فاطمه
ام مغاورى / يا الف مرحب يا الف نهار نادى السرايا نورت
فاطمه / منوره باهلها مع انى عاتبه عليكي فما تفتكريش انك هتاكليني بالشويه دول
ام مغاورى / ليكي حق بس والله احنا ما بيتناش الموضوع حتى انتوا جيتوا تانى يوم
فاطمه / جينا نتراجكوا تسامحوا البت
ام مغاورى / قطع لسان اللى يقول كدا
فاطمه / طب بس ما تدعيش عليها و لا انتى عارفه هى مين
ام مغاورى / قسما بالله ما اعرف و احنا لو كنا نعرف كنا سكتنا
فاطمه / على العموم انا عرفت بس هعمل ما عرفتش اصل انا ما يفرقش معايا الخباصين بتوع نقل الكلام انا اللى يفرق معايا اللى اتجرا و جه على بنتى انا مش لقياها فى الشارع يا ست ام مغاورى و اللى يرشها بالميه ارشه بالنار
ام مغاورى / والله و ما ليكي عليا حلفان الدنيا مش كدا خالص دا مغاورى شايلها من الارض شيل و كل يوم جايبلها اكل جاهز و هدايا و دهب و مدلعها اخر دلع حتى اساليها
فاطمه / ما انا هسالها هطلعلها و اتكلم معاها لوحدينا و اشوف
ام مغاورى / بيتك يا اختى بيتك و مطرحك … الا هو عباده مش هيدخل
فاطمه / عباده روحه فى مناخيره دى مهما كانت اخته الصغيره دلوعته فسبيه لما يهدى و ما تاخذيهوش انتى عارفه غلاوتك عنده
ام مغاورى / خلاص اللى تشوفيه اتفضلي اتفضلي
فاطمه و ام مغاورى يدخلوا جوه
……………….
على القهوه
حمدى / لا طبعا غلطان دا انت و مالك لابيك تقولى ابويا سرقنى و ابويا ظلمنى دا ابوك عمره ما حرمك من حاجه
يوسف/ برده بعد كل اللى حكيتهولك
حمدى / يا ابنى ما هو قالك هيديك مقدم العربيه و الشقه و بعدين هو انت يعنى لو اتزنقت مش هيساعدك
يوسف/ لا مش هيساعدنى عارف ليه عشان هو بكدا شايف انه بيربيني دا فاضل يحاسبنى على اللقمه اللى باكلها فى البيت دا انا لو اتاخرت على الشغل بيخصملى
حمدى / مهو بيعلمك اصول الشغل
يوسف/ دا غير بقي لو لا قدر الله غلطت فى الشغل يبقي يوم ما يعلم بيه الا ربنا اللى رايح و اللى جاى يتفرجوا عليا دا حتى العمال اقولك ايه بس انا بحفر فى الصخر عشان الاقى شغلانه تانيه بعيد عنه عمال الف على مشاريع عشان ابدء حياتي و هو رافض يساعدنى دا ساعد جوز اختى و انا لا دا لو جوز امى مش هيعاملنى كدا
حمدى / انت كمان اسلوبك معاه وحش و عنيف و دا ابوك و لازم تاخده بالراحه
يوسف / يعني انتى ما بتساعدش ممدوح
حمدى / و انا حيلتى ايه يا حسره أساعده بيه
يوسف / اهو المصيبه بقي ان ابويا عنده
حمدى / طب اطلب منه الحاجه تانى بالراحه و انا هكلمهولك دا برده ابوك و ياما جابلك و دلعك و انت صغير تيجي لما يكبر تكلمه بالشكل ده
يوسف / فى دى معاك حق هو فعلا كبر
حمدى / يا يوسف
يوسف / خلاص يا عموا خلاص انا أساسا كنت جاى اصفى حسابى و امشي اداهونى اداهونى ما اداهونيش براحته
حمدى / لا اله الا الله يا ابنى ما تهدى كدا و تصلى على النبى
يوسف / عليه الصلاه و السلام بس انا خلاص جبت اخرى
حمدى / لا اله الا الله لا اله الا الله
……………………
فى اوضه سماح
فاطمه / و انا ليه ما اعرفش حاجه عن الحاجات دى كلها انا فين من دا كله
سماح / و انتى كنتى هتعملى ايه لو عرفتي
فاطمه/ كنت هجيبها تحت شبشبى و اعيد ربايتها
سماح / شوفتى عشان كدا ما قولتلكيش انا غلطت لما رديت عليها لما سمحتلها تستفزنى بس من هنا و رايح هى اللى هتغلط و ادى اول غلطه اهى
فاطمه / انتى ناويه على ايه يا بنت بطه
سماح / والله مفيش حاجه محدده بس اللى خدته لحد دلوقت مش وحش و مغاورى واهله شايليني من على الارض شيل اقوم انا انولها اللى فى بالها و اشمتها فيا و امشي دى تكسر ورايا زير
فاطمه / دا انا اللى هكسر مصنع القولل كله على نفوخها
سماح / بقولك ايه يا بطه اهدى كدا و شغلى الجمجمه هى اساسا بتعمل كل ده عشان انتى تجيلها
فاطمه / طلبتها و نالتها يا عنيا
سماح / يا بطه
فاطمه/ ماشي خليني وراكى بس برده مش همشى الا اما افش غلى فيهم و احط كل واحد فى مقامه
سماح/ حقك
فاطمه / ايه يا بت الايلاينر ماله مش مظبوط كدا ليه هاتى القلم اما اعدلهالك قبل ما امشي
سماح تقوم تبوسها من خدها و تجرى تجيب القلم
………………….
فى جنينه السرايا
عباده قاعد مغاورى يخبط على ازاز العربيه عباده يبصله و يفتح الشباك
مغاورى / انت قاعد هنا ليه
عباده / همشي مستنى امى تطلع و هاخدها و امشي
مغاورى / ايه يا جدع اللى بتقوله ده انت عارف انى ما اقصدش الكلام ده ده بيتك و مطرحك ليك فيه زى ما ليا بالظبط
عباده يفتح الباب و ينزل
عباده / عينك فى عيني و سالتك و كدبت عليا
مغاورى/ ما انت عارف مشاكل الحريم و الله العظيم عملت كل اللى اقدر عليه
عباده / دا تمامك يعني تمد ايدك على الحريم
مغاورى / غلطه و راديتها و بوست راسها
عباده / انا ما كنتش فاهم هى وافقت عليك ليه دلوقت هتجنن هى مكمله معاك ليه
مغاورى / ربنا يسامحك … بس لعلمك انا بحب سماح زى ما هى بتحبنى و لو اطول اجبلها نجمه من السما هجيبهالها
عباده / لم بس ايدك و اتقى ربنا فيها مش عاوزين منك اكتر من كدا
مغاورى / حصل و كل اللى بتشاور عليه بعملهولها و من غير ما تطلب كمان حتى اسالها انا عارف انى اتعصبت جامد و غلطت بس
عباده / ما بسش انت بتتكلم عشان ضامن انها مش هتمشي معانا اقنعتها ازاى هددتها بايه
مغاورى / والله ابدا
عباده / ما يخصنيش انا اللى يخصنى انى اقولك قسما عظما لو اتكررت تانى ما ابيتها فى بيتك حتى لو غصب عن عين التخين فاهم و لا لا
مغاورى/ مش هيحصل مش هتتكرر يمين بالله ما هتتكرر
عباده / ماشي يا مغاورى عشان هى باقيه عليك بس ماشي
………………….
فى السرايا جوه
فاطمه قاعده مع شاهين و ام مغاورى و مغاورى
فاطمه / هى جيالكوا جعانه هى بنتى جيالكوا جعانه عشان كل ما تنزل تحضر لقمه ليها و لجوزها تعملولها مشكله لو لقمتها تقيله نبعتلكوا من عندنا
ام مغاورى / ليه بس الكلام ده يا ام عباده
فاطمه / مهو البت تتشتم بابوها و امها و تستكوا تتهان تسكتوا يتنكد عليها تسكتوا تفتح بقها و تجيب سيره حد فيكوا تنضرب ليه لقينها و لا لقينها
مغاورى / والله انا
فاطمه / انا كلامى مش معاك اوعى تفتكر ان الحاجات اللى جبتها لسماح هتنسينا اللى عملته اقوم اضربك قدامهم و اقل منك و اجبلك سرايا
مغاورى / كانت لحظه شيطان
فاطمه / بس الشيطان ما انصرفش و لسه قاعد فى السرايا هنا وسطيكوا بياكل و يشرب و ينام و لا كانها عملت حاجه
شاهين يبص لفاطمه
فاطمه / ايوه يا حج بتكلم عن اختك ايه مالهاش كبير و لا ايه و ما تقوليش ظروفها اتجنت ودوها مستشفى المجازيب انما تطليقوها كدا على الخلق ليه احنا مالنا
ام مغاورى / عيب كدا يا ام عباده احنا
فاطمه / عرفتوا مين اللى بيطلع الكلام من بيتكوا يا كبير عرفت يا جوز بنتى مين اللى مطلع سرك بره
مغاورى / قريب هعرف
فاطمه / قريب !!! عمتك يا ضنايا
شاهين / مين اللى قالك الكلام ده
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
