رواية البر التاني الفصل الحادي عشر 11 بقلم لولو محمد
رواية البر التاني الجزء الحادي عشر
رواية البر التاني البارت الحادي عشر
رواية البر التاني الحلقة الحادية عشر
فى شقه مختار
مختار نايم على الارض جنب عباده و امين توصله رساله يمسك الموبايل و يبص
هند / انا مش جايلى نوم
مختار يبص جنبه و يقوم يلبس الجزمه و ياخد المفاتيح و يتسحب و ينزل يقعد فى العربيه و يتصل بهند
مختار / مساء الخير
هند / صحيتك
مختار / لا ما كنتش نمت
هند / احنا هنروح الكليه سوا الصبح صح
مختار / اه فى حاجه و لا ايه
هند / مش عارفه يعني
مختار / دا هى محاضره يتيمه هنخطفها لحد ما المحلات تفتح و بعد كدا نتسحل فى حوار الفستان و البدله و اهم حاجه الجرفاته لون الفستان قال يعني لو لون تانى هنبقي مغصوبين على الجوازه مثلا بس ماشي
هند / ههههههههههههههههههه انت متاكد انك مش مغصوب
مختار / هههههههههههههههههههههه انا راجل عملى الحب فى القلب مش فى اللبس جوازنا علاقه بيني انا و انتى بس الناس ملهاش حق لا تحكم و لا تدخل ما لهمش دعوه انا جبتلك ايه هديه و لا عملتلك مفاجاه شكلها ايه و لا قولتلك ايه جوازنا مش لبانه فى بق الناس كل واحد يتفها فى بق التانى
هند / يع ايه القرف ده
مختار / بالظبط حاجه مقرفه انا بشوفها كدا بقرف جدا من الناس اللى ناشرين غسيلهم كله قدام الناس ان كان بقي نضيف و لا وسخ علاقتى بيكى هدفها تنبسطى و انبسط مش نغيظ البنات التانين و نتباهى
هند / ايوه بس
مختار / كام علاقه بين اتنين كانت مولعه على النت و فجاه على تفاهه فشكلوا يا بنتي بيبقى الحب مولع فى الدره قدام الكاميره و جايبين بعض من شعورهم فى الكواليس
هند / انا شيرت صوره الورد و الشيكولاته اللى جبتهوملى
مختار / سيحتيلى يعني
هند / ايه !!! هههههههههههههههه
مختار / كدا كل بيت فى البلد اللى شافني و اللى ما شافنيش هيعرف انى جبت ورد
هند / ايه الجريمه فى الورد
مختار / بنموته بقطف ورد و اجبهولك يدبل قدام عنيكي بالظبط زى ما تكون هديتي ليكي اكل تاكليه و تخشي الحمام تصرفيه
هند / يخربيت تشبيهاتك
مختار / الهديه لازم تكون حاجه تعيش
هند / الذكريات الحلوه بتعيش
مختار / يا شيخه اتقى الله دا اكتر اهل النار من النساء عشان بيكفرن العشير عوزانى اجبلك هديه تدبل و لا تتهضم عشان تقوليلى ما شوفتش منك حاجه لازم تبقي حاجه معمره عشان وقت الخناق احطها فى عينك
هند / ههههههههههههههههههههههه على فكره انت مجرم و مش هتكلم معاك تانى
مختار / سبحان من فك عقده لسانى معاكى
هند / دا باماره ايه ما انت بقالك فتره بتكلمنى عادى
مختار / اللى بيطلع على لسانى فسفوسه من اللى كان جوايا
هند / طب ما احنا فيها ما تقوله
مختار / ما لو كنت اعرف اطلعه ما كنت طلعته
هند / انا فى البلكونه على فكره
مختار يفتح باب العربيه و ينزل يقعد على الكبوت
مختار / بصي فى الشارع بس حاسبى تقعى
هند / بعيد اوى
مختار / الدنيا فوق لحم فوق بعض
هند / انا نزلتك الشارع لما بعتلك الرساله صح بجد اسفه اوى
مختار / عاوز اقولك حاجه
هند / سمعاك
مختار / انا مش وحش
هند / عارفه
مختار / بس برده مش حلو انا مش ملاك و لا طالع من فيلم انا راجل زى كل الرجاله ابلعى عيوبي و ما تحاوليش تغيريها و لا تقارنيني براجل تانى و لا تطلبي منى اغير جلدى و اطلع من توبي مش هقدر و ان عملتها عشانك هضيع و اضيعك
هند / مش هعمل ده بس انت كمان كدا لا فيوم تقارنى بحد و لا تطلب منى اتغير اقبلنى كدا باكدج على بعضي
مختار / حصل تعرفي انا طول الوقت كنت بقول مش هننفع لبعض لا هتستحملى عيشتي و لا هستحمل طبعك و خصوصا بعد كلام خالتى ام عبد الله فى العربيه
هند / كلامها ضايقني اوى
مختار / كلامها صح
هند / يعني ايه
مختار / يعني لازم تبقي عارفه انتى داخله على ايه بس ما تخافيش انتى لا قليله و لا لوحدك
هند / مش خايفه
عباده / انت هنا يا نمس و احنا قالبين الدنيا عليك
هند / خضيتنى
امين يدخل
عباده/ لقيته فى الشارع
ناصر يطلع
ناصر / بتعمل ايه عندك يا مختار السعادى قلقتنا عليك
مختار / خلاص يا جدعان فضحتونى طالع اهو طالع
ناصر يبص لهند يلاقيها ماسكه فى السور و بتدحك
ناصر / لا مؤاخذه قطعنا كلامكوا يعني اصل اتخضينا افتكرناه راح يتخانق و لا حاجه
هند / عن اذنكوا
هند تدخل جوه و باب شقه مختار يتفتح
عباده / جرا ايه يا عريس ضاقت بيك الشقه نازل تتكلم فى الشارع الصبح ورد و بالليل روميو و جوليت دا انت طلعت نمس يا نمس
مختار / المره الجايه هتكلم من المريخ اياكش ترتاحوا
مختار يدخل الحمام و الكل بيضحك
عباده / غلبان يا روميو الشحاتين
امين / غلبنى ايه الا عنيكى
عباده / انا قلبى رق وأثر فيه
امين / صوتك ياكبدى على المسكين
ناصر / هيطلع ياكل كبدك دلوقت اتلموا
عباده / لله لله
امين / اسرح
عباده / لله لله
امين / روح
عباده / يا محسنين الغراااام … كلو على الله
مختار يفتح باب الحمام يجروا يقعدوا باحترامهم و ناصر بيضحك
ناصر / انا داخل انام قلقتونى على الفاضي
ناصر يدخل و مختار يقف قدام عباده و امين و حاطت ايده فى وسطه
عباده / لله لله
التلاته يضحكوا و مختار ينام فى الارض ينزلوا يناموا جنبه
مختار / عقبالك يا عباده
امين / طب و انا
مختار / لا انت لا
امين / اخص عليك يا خالى
مختار / هههههههههههه عقبالك يا امين
امين / يا حبيبي يا خالى
…………………..
فى شقه يوسف تانى يوم الصبح بدرى جدا
الباب يخبط اسراء تروح تفتح تلاقي رجاله كتير تتخض
راجل ١/ الباشمهندس يوسف الجمل موجود
اسراء / اقوله مين
راجل ١ / هو عارفنا بعد اذنك تناديله بس
اسراء / محمود … محمود تعال شوف مين
محمود يطلع من جوه و يوسف يطلع من اوضته
محمود / مين
راجل ١ / احنا جايين ناخد المحروس
اسراء / تاخدوه فين
الراجل / كدا كدا واخدينه ناخده سليم و نرجعه سليم و لا نسيبهولك جته
محمود / لو حد فيكوا قرب من ابنى
الرجاله تطلع مسدسات التلاته يرفعوا ايديهم و اسراء تجرى تقف قدام يوسف
محمود / طب انتوا مين طيب انا اتفقت مع المعلم
الراجل / هعد من واحد لتلاته يا البيه يجي معانا بالادب يشرب قهوته يا نشرب احنا قهوتكوا
محمود / طب اجى معاكوا
الراجل / ١
اسراء / حد يلحقن
الرجاله تشد الاجزاء
يوسف / هاجى معاكوا
اسراء / على جثتى اعمل حاجه يا محمود
محمود / انا جاى معاكوا الرجاله يدخلوا ياخدوا يوسف و يقفلوا الباب و يمنعوا اسراء و محمود يمشوا و اسراء بتعيط و تصرخ و ترزع فى الباب و محمود واقف مصدوم
………………..
فى بيت مختار
مختار يفتح باب شقته و يلبس الجزمه و كلهم واقفين يبصوا عليه و مبتسمين
مختار / خشوا جوه
مريم / هصبح على هند
مختار / و ماله بجمله
مختار يضرب الجرس
صوت هند / ثوانى
هند تفتح الباب تشوف مختار تبتسم تشوفهم تلم نفسها
هند / صباح الخير
انتصار / صباح العسل فطرتى يا ست الكل و لا اجبلك لقمه خشي يا فاتن اعمليلها سندوتشين
هند / لا لا فطرت والله
مريم / هنعمل الغدى على ما تخلصوا المحاضره
هند / هو احنا هنروح كلنا
بنت / ما احنا كمان عاوزين فساتين و كدا
هند تهز راسها و تبتسم
مختار / يلا
هند / يلا
مختار يسبق و هند تنزل وراه تشاورلهم باى يفضلوا متابعينها و يدخلوا يقفلوا الباب و يجروا على البلاكونه و يتزاحموا على السور لحد ما مختار يطلع من العماره يروح ناحيه باب هند و يبص لفوق و يعمل بيشيك على العجل و يرجع يقابل هند
مختار / احنا متراقبين اجلى حوار فتح الباب بقي لفرصه تانيه انا اتحفل عليا بما فيه الكفايه
هند / ههههههههههههههههههه كانك فتحته بالظبط
هند تركب و هى مبتسمه مختار يركب و يسوق
مختار / انا مستني الجمعه بفارغ الصبر
هند / حرام عليك دول حتى دمهم خفيف و ما يتشبعش منهم
مختار / دول الدم اللى بيجرى فى عروقي بس الواحد مش واخد على التحفيل ده دا انا حتى والله عمرى ما حفلت على اى حد منهم و كنت فى حالى
هند / انت اللى واخد الدنيا على اعصابك عادى يعني
مختار / انتى الدنيا عندك عامله ايه
هند / مفيش عادى دخلت نمت شويه و صحيت
مختار / انا ما عرفتش انام الواد امين بيتقلب كتير و بيشلت و هو نايم والله لولا الحوجه ما كنت قبلت انام جنبه تانى دا ابوه ما بينامش جمبه
هند / للدرجادى ليه دا شكله غلبان اوى
مختار / هو طيب و حنين اوى و مجدع بس عيبه بيعيش الحلم يعني مره و هو صغير سكع ابوه كف صحاه من عز نومته و خد فيها علقه بنت لذينه
هند / حرام دا كان نايم مش فى وعيه
مختار / اهو اللى حصل امبارح بقي كان بيحلم انه بيلعب كوره و هاتك يا شوط
هند / ههههههههههههههههههه و انت بقي بتبقي عامل ازاى و انت نايم
مختار / و انا هعرف منين ما انا ببقي نايم لما نتجوز ابقي اعرفى و قوليلى
هند / قصدك لما ادبس
مختار / ما انا هدبس انا كمان كنت قولت حاجه
هند / هههههههههههههههههه ان كان عاجبك
مختار / عاجبنى و بعدين انا شوفتك و انتى نايمه قبل كدا
هند / امتى ده
مختار / فى العربيه لما روحنا العقيقه رايح جاى و مره فى محاضره من محاضرات الساعه ٨ السنه اللى فاتت باين
هند / هههههههههههههههههههه دا انت كنت مركز معايا بقي
مختار / لا والله هى كانت محاضره ممله اساسا و انا كنت بحاول ما انامش فكنت عمال ابص يمين و شمال و كدا يعني بسلى نفسي
هند / العيب مش عليك والله ماشي ماشي
مختار / فى ايه
هند / يا ابني انا بقولك ايه و انت بتقولى ايه طب استني بكره يمكن لما نلبس الشبكه عقدتنا تتحل و تقول كلام حلو و كدا ولا ما عشمش نفسي ولا ايه
مختار / هههههههههههههههههههه طب والله بجتهد و بحاول بس مش عارف بصي انتى بتحبي التركى صح
هند / اه
مختار / خلاص انا الفتره الجايه هعسكر على اليوتيوب ازاكر كام مسلسل رومانسي اتعلم كام حركه على كام كلمه اجربهم فيكى
هند / تجربهم فيا
مختار / معاكى ؟ اطبقهم ؟ طب ايه؟
هند / هههههههههههههههههه تعرف انت خليك ضحكنى كدا و انا مش عاوزه اسمع اى كلام حب تانى خلاص
مختار / انا والله عاوز اقولك بحبك بس خايف ملاقيش كلام تانى اقوله بعدها ما انا اكيد مشاعرى هتزيد فانا مش عارف اقول ايه و لا اقولها ازاى
هند / ما تقولش هى كدا وصلت
مختار / بالله وصلت
هند / هههههههههههههههههه وصلت
مختار / طب الحمد لله عدت على خير
هند / هى ايه دى اللى عدت على خير ما تفصلنيش بقي يا مختار
مختار / اعمل ايه طيب اعمل ايه
هند / ما تعملش سوق خلينا نوصل
مختار / حاضر هركز فى السواقه اهو هركز
هند باصه من الشباك و كل شويه تبص بطرف عينها على مختار و تبتسم
…………………
فى شقه رجاله مختار فى الحته المقطوعه
يوسف رايح جاى فى اوضه راجل يدخل و معاه لاب توب و كيس فيه سندوتشات
يوسف / انا هفضل هنا كتير و لا ايه ما تشوفوا عاوزين منى ايه خلونى امشي
الراجل / ليه يا باشا هو احنا قصرنا معاك فى حاجه اتفضل احلى فطار سندوتشات فول و طعميه و احلى طورشي
يوسف / يا سيدى مش عاوز انا عاوز امشي هو انتوا خاطفيني مش قولتولى هتكلم مع كبيركوا و امشي
الراجل / مهو على ما الكبير يوصل سلى روحك بشويه فيديوهات من اللى على اللاب ده و عليه شويه اللعاب عنب بس لامؤاخذه النت لسه ما دخلش عندنا فكفى نفسك بالموجود بقي
يوسف / يا عم انا مش فاضي للكلام ده
الراجل / بقولك ايه يا استاذ ما تتخلقش علينا مش عشان الكبير قال نكرمك يبقي ما نقدرش ناذيك و صدقني انت غالى اوى لدرجه ان كل واحد فينا حايش روحه بالعافيه انه يوجب معاك فلم روحك و خلى اليوم يعدي بالاذن
الراجل يمشي و يوسف يلف حوالين نفسه و يشوط الكرسي يوقعه فى الارض
…………………..
فى الكليه
مختار يركن العربيه و ينزل و هند تنزل
مختار / كنت هفتحولك
هند / مش لازم تعال
هند و مختار يدخلوا جوه تقابل يمنى
يمنى / صباح الخير حجزتلكوا جنبي فى الاول
ماجد و هشام يشاوروا لمختار الناحيه التانيه و ماجد ماسك كشكول المحاضرات و عمال يطبل عليه و يعمل بيزغرط
مختار / عن اذنكوا
هند / طب هتجيب كشكولك بدل ما تفضل شايله
مختار يديهولها و يروحلهم البنات كلهم يتلموا حوالين هند
يمنى / عاوزه اعرف التفاصيل كامله
هند / مش عارفه ابدء منين
بنت ١/ امتى و ازاى احكى بقي انتى بقالك يومين مختفيه و فى الاخر نسمع انك اتقرت فتحتك
هند / لسه بكره و كلكوا معزومين و هبعتلكوا المكان عشان لسه هنحدد النهرده
يمنى / بتهزرى
هند / يا بنتي كل حاجه مجنونه لو حكيتلك مش هتصدقي الدنيا عامله ازاى
بنت ٢ / طب احكى بسرعه قبل ما يرجع
هند / هما كانوا عندنا بيطمنوا على بابا لسه طالع من العمليات و فجاه لقيتهم بيقولوا جاى نطلب ايد هند لمختار ساعتها كنت شايله اطباق وقعت كلها ادشدشت ستين حته
البنات يضحكوا
…………….
عند صحاب مختار
هشام / طبيعي يا عم هتقعد هناك و تبيعنا مهو من لقي احبابه نسي صحابه
ماجد / يا عم اقعد مكان ما تقعد و ركز معايا انا الفرح بكره فيه اكل
مختار / يا عم عيب عليك دا احنا هنخربها
ماجد / حبيبي يا ميخوووووووو
مختار / ياض ما بطقش الاسم ده
هشام / امال هى بتدلعك بايه و احنا ندلعك بيه
ماجد / تلاقيها بتقوله يا بيبي
مختار يسيبهم و يمشي هشام يمسكه و يرجعه
هشام / استني هنا رايح فين
ماجد / يا عم بنهزر معاك
هشام / بس اتارى ما حدش بيعمل حاجه لوجه الله الكام خناقه و طيرانك فوق البينجات
ماجد / جرب نار الغيره و قولى قولى
مختار / لا دا عباده و امين فى البيت اهون ما تخف يا ظريف منك ليه بدل ما
هشام / لا و على ايه
شباب معدى يسلموا على مختار و يباركوله
شاب ١ / مبروك يا مختار
مختار / هبعتلكوا مكان الفرح بالليل بكره لازم تيجوا
شاب ٢ / فرح مره واحده
مختار / شبكه يعني اقصد
هشام / انتوا جبتوا الشبكه ؟
مختار / امبارح
شاب ١ / سريع سريع يعنى
ماجد / مستعجله اوى مستعجله جدا
مختار يسيبهم و يمشي
ماجد / انت يا ابني تعال هنا
مختار يشاورلهم امشوا بقي و يروح لهند
هشام / لا حقك تتلكك يا عم الله يسهلوا
ماجد / سسسسسسس
ماجد يصفر مختار يرجعله ياخده تحت باطه و يضحكوا
ماجد / دا احنا هنولعها بكره
شله يوسف تعدى و يوسف مش وسطيهم مع تبادل نظرات من الشلتين لبعض
…………………
فى الشقه عند يوسف
يوسف عمال رايح جاى هيتجنن يبص على اللاب و يعدل الكرسي يقعد و يفتح اللاب يلاقي ملف اسمه اتفرج يفتحه يلاقي فيه الفيديوهات اللى البلطجى اداها لرجاله مختار يتفرج عليها و يقفل اللاب بعنف و يقوم يرزع على الباب الراجل يفتح بعنف يوسف يلم نفسه
يوسف / انتوا فاكرين ابويا مش هيبلغ البوليس عن خطفكوا ليا
الراجل / خطف ايه يا يوسف بيه دا احنا طالبينلك دليفرى هو فى مخطوف بياكل دليفرى برده
يوسف / انت ليك نفس تهزر اديني تليفونى اكلم ابويا اطمنه عليا
الراجل / احنا طمناه و بعتناله الفيديوهات من تليفونك و قولناله لو بلغ او اتحرك من شقته هو و لا خيلانك هنزلها من اكونتك على الفايس ما شاء الله الباقه عندك شغاله حلاوه
يوسف يبصله بغل
الراجل / اه فى عيل متنى كدا اسمه يس بعتلك صوره استني هوريهالك
الراجل يطلع موبايل يوسف من جيبه و يفتح الرساله و يوريله صوره مختار و هند قاعدين جنب بعض فى المدرج و هند بتضحك على اخرها يوسف يحاول ياخد الموبايل من الراجل الراجل يزقه يوقعه فى الارض و يروح يقومه
الراجل / ينفع كدا يا باشا الكبير يقول علينا ايه قوم قوم اجبلك شاى ؟
الراجل يسيب يوسف و يطلع بره و يقفل الباب و يوسف بيغلى
……………………
فى شقه محمود
اسراء / انت هتفضل قاعد كدا لحد ما الواد يضيع مننا ما تتصرف يا راجل
محمود / اعمل ايه عوزانى اعمل ايه ابنك متصور و لو نزلت و لا عملت اى حاجه هيروح فى ستين داهيه
اسراء / منك لله يا هند انتى و امك ادى اللى بناخده من اخوك
محمود / ما انتى كلمتى اخواتك يا اختى عملوا ايه كلموا الراجل والراجل قال ما تخافوش هيرجع و قال كمان انهم مش عاوزين الفلوس يبقي نسكت و لا نعمل زى ابنك و نفضل نزود الطين مايه لحد ما نتنيل كلنا
اسراء / دلوقت بقي ابنى مش انت اللى وعدته و خلفت وعدك
محمود / كنت مستني الدنيا تهدى
إسراء / و هتهدى ازاى و اخوك و بنتك نازلين فيها تسخين
محمود / بقولك ايه يا اسراء انا عفاريت الدنيا بتتنطت قدامى لمى الليله بدل ما نخسر بعض النهرده
اسراء / انت بتهددنى
محمود / يووووووه انا سايبلك البيت و ماشي
محمود يفتح باب الشقه و يزرعه
محمود/ ليكون حد مراقب البيت انا داخل اوضتى
محمود يدخل الاوضه و يرزع الباب
………………….
فى عربيه مختار
مختار / والله كنت عارف انك مش هتسترى
هند / طب والله ما حكيت كل حاجه
مختار / و لا تحكى بجمله الحفله و الله انا كنت شايل فكره الارتباط من دماغى بسبب الحوارات دى
هند / و ايه اللى غير رايك
مختار / ما حدش بيهرب من قدره و نصيبه
هند / يا اخى ارحمنى بقي من ردودك دى
مختار / ليه هو انا قولت ايه ؟
هند / ما قولتش ما انا نفسي تقول الا لما كلامنا يبقي كدا فى فرحه البدايات امال هنعمل ايه فى خوازيق النهايات
مختار / اعوذ بالله ايه اللى جاب سيره النهايات دلوقت ان شاء الله ما يبقاش فى نهايات
هند / امين
هند تبص من الشباك
مختار/ تعرفى نفسي فى ايه
هند تبصله باهتمام
هند / فى ايه
مختار/ نفسي عمى محمد يخليها كتب كتاب
هند / مش هيوافق
مختار / هو انا ما كلمتوش عشان مش هنلحق لكن ليه بتقولى انه مش هيوافق
هند / ما اعرفش بس بنت عمى ما رضيوش يكتبوا كتابها الا قبل الفرح بيومين مع ان جوزها كان بيتحايل عليهم بس اشمعن عاوز كتب كتاب علاطول
مختار / عشان الخطوبه دى حاجه رزله
هند / اللهم طولك ياروح انت متاكد انك مش مغصوب على الجوازه دى يا ابني قول من دلوقت قبل ما اتعلق بيك
مختار / نهارك مش فايت انتى لسه ما اتعلقتيش بيا
هند تتكلم بكبر
هند / هههههههههههههههههه انا لسه عرفاك من قريب على فكره يعني عادى
مختار / طب ليه كسره النفس دى
هند / هههههههههههههههههههه من اعمالكم … بس ما تهونش عليا بهزر معاك قولى بقي يا سيدى ليه الخطوبه رزله
مختار / زى اللى رقصوا على السلم لا عارفين يمسكوا روحهم و يعملوا حدود زى الاغراب و لا عارفين ياخدوا راحتهم زى المتجوزين و انا عاوز اخد راحتى معاكى الشيطان بيدخل من البيبان المتواربه دى و لو دخل و ساعدنى فى اللى هيجي على كيفي اخاف ياثر على اللى مش هيجي على كيفي
هند / انت بتحاول تقولى انك عاوز تسد على الشيطان اى سكه بينا
مختار / عاوزك حلالى كل الخطوبه و الكلام ده مش حلال يعني حتى لو حطين حدود الشيطان برده ممكن يعني حتى لو فى خيالنا انا مش عاوز اخسرك يا هند
هند / هو انا لو قولتلك بحبك هتفتكرنى واقعه و تقول عليا قليله الادب
مختار / طب اجيبلك عليها ورد و لا اعمل ايه ؟ طب والله لجيبلك ورد ان شالله يحفلوا عليا للصبح … مفيش محل ورد هنا يا ولاد
هند / ههههههههههههههههههههههههههه
مختار / لا اثبتى شكلك طمعانه فى الدبدوب
هند / لا خلى مرحله الوحش بعدين
مختار / حنينه و قلبك كبير
هند / هههههههههههههههههههههه
……………………
فى الشقه المهجوره
يوسف رايح جاى و قدامه فرخه مشويه بالعيش و السلطات و كنزايه و ازازه ميه يروح يرزع على الباب الراجل يفتح و باين عليه الزهق
الراجل / خير يا استاذ يوسف فى ايه المرادى
يوسف / انا زهقت
الراجل / فى مصحف عندك اقعد اقرالك فيه شويه و لا انت مش متوضي تحب اخدك الحمام تتوضي
يوسف / ماشي خدنى الحمام
الراجل / اتفضل
يوسف يروح مع الراجل الحمام و يجي يقفل الباب الراجل يمنعه
يوسف / هعمل حمام
الراجل / لا مؤاخذه خد راحتك
يوسف يقفل الباب بالترباس و يبص حواليه مفيش غير صابونه يروح يفتح شباك الحمام يلاقي عليه حديد يهزه جامد و ما بيتحركش يقفل الشباك تانى و هو مخنوق
يوسف / ماشي يا ولاد الكلب اخرج من هنا بس والله لوريكوا
………………
فى محل فساتين كبير جدا
المحل زحمه جدا و كل واحده ماسكه فستان و بتفرجه للتانيه و عمالين يتحركوا زى النحل و مختار قاعد مع عبد الله فى جنب هند تطلع من البروفه لابسه فستان منفوش كحلى من فوق و الدرجه بتبهت بالتدريج لحد ما توصل للبني تحت ومطرز مختار يقوم يقف
شيري / بسم الله تبارك الله هو ده
انتصار / طب ما تشوف التانى كمان عوزينها احلى حاجه
هند/ انا مرتاحه للاول اكتر
هند تبص لمختار باستعطاف
مختار / خلاص خدى التانى
انتصار / احمر يا مختار
مختار يبص لهند و شيري متبعاهم
شيري / على فكره ده عاملك كانك سندريلا بالظبط مش ناقصك غير التاج
انتصار / حتى بيقولوا اللى بتحب طور تلبسله احمر يرضيكى يقولوا على مختار طور
هند تبص لمختار و تبص فى الارض
مختار/ هناخد الاتنين
هند تبص لمختار
مختار / هنشترى الاتنين الاتنين حلوين و هناخدهم
انتصار / هتلبس فستانين
مختار / الخطوبه بكره يا جماعه مفيش وقت و لسه فاضل انتوا و البدل و الجرفاتات و الكوافير و القاعه و ليله فياريت ننجز … خشي غيرى عشان اخدك انتى و عبد الله ننقي بدلتى و الجرفاتات على ما الحريم يخلصوا هنا ننجز وقت
هند تهز راسها و تدخل انتصار تروح لمختار
انتصار / لو كنا فى البلد و الحريم لوحديها و الرجاله لوحديها كنت سكت بس القاعه هيبقي كلو على بعض الرجاله مش هيعجبها الكلام ده
مختار يبتسم و يهز راسه انتصار تهز راسها و تسكت شيري تروح للبنت
شيري / لو سمحتى هو الفستان تمنه كام
انتصار / اكرمينا احنا هناخد المحل كلو لازم تعملى معانا احسن واجب
مختار / بقولك يا امى هتيجي معانا تساعدى عبد الله ينقى بدلته و لا لسه هتنقي لنفسك حاجه انتى و ياسمينا الاول احنا هنرجع هنا تانى بس لما يخلصوا
شيري / هاجى معاكوا بس لما احاسب على فستان هند الاول
انتصار / تحاسبي !!! انتى عاوزه الكبير ياكل وشي دا محلفني ما تصرفوش جنيه
شيري / لا يا حجه انتصار الخطوبه معروف على العروسه ما يصحش
انتصار / يا ست الكل احنا ما عندناش الكلام ده ما تصغريناش
شيري / ابدا والله بس انا فعلا محمد مديني فلوس
مختار / يا امى عارفين بس الاصول عندنا معروفه
هند تطلع من جوه لابسه هدومها
هند / انا جاهزه
شيري / روح معاهم يا عبد الله و انا هنقى حاجه لياسو
عبد الله يهز رايه و يمشي هو و مختار و هند يطلعوا بره ثوانى و شيري تطلع وراهم
شيري / عبد الله ثوانى
عبد الله يروح لمامته تديله فلوس مختار يبان عليه الضيق و يركب العربيه عبد الله يهز راسه و يروح يركب مختار ما يعلقش و يسوق
مختار / الرجاله جابوا بدلهم من محل حلو اوى هنروح عليه على طول عشان الوقت
هند / و القاعه
مختار / بفكر نحجز الكبيره و خلاص احنا عازمين ناس كتير اوى دا غير اللى عندكوا
هند / تمام
مختار / هنبص عليهم برده بس ننجز حوار البدل ده لحد ما يخلصوا الفساتين ليلتهم طويله النهرده
هند / مختار
مختار / نعم
هند / انت مش عاجبك الفستان الاحمر صح
مختار / عاجبني كان حلو عليكي بس الازرق عاجبني اكتر
هند / و انت يا عبد الله
عبد الله / انتى حلوه فى اى حاجه يا هند
هند / يعني انهى واحد
مختار / احنا هنشترى الاتنين متضايقيش روحك
هند / مش عاوزه حد يقولك كلمه
مختار / ما حدش هيقول دا يومك انتى
هند تبص من الشباك و تتنهد
مختار / عندى فكره مش عارف هتعجبك و لا لا
هند تبصله
مختار / كدا كدا الفستانين بتوعك و هنشترى جرفتتين فبراحتك عجبك اللى هقوله نعمله ما عجبكيش يبقي اللبسي الفستانين عادى
هند / قول
مختار / عندنا فى البلد الحنه مفصوله الحريم لوحدهم فى السرايا و الرجاله بره فى الجنينه ايه رايك تخلى الاحمر فى السرايا و تلبسي الازرق بكره
هند تبصله
مختار / الحنه مش بعيد نخلص الدراسه و ندخل علاطول يعني كلها كام شهر يعني
عبد الله / هو انت ما عندكش جيش يا مختار
مختار / و ايه علاقه الجيش بالجواز يعنى
عبد الله / يعني اقصد انك هتفضل تسافر رايح جاى
مختار / يا سيدى سبها لله يمكن اخد اعفى و لا تاجيل المهم يعنى يا هند الاقتراحات كلها قدامك و انتى اعملى اللى يريحك
هند تهز راسها و تبص من الشباك و تفكر
…………………..
على القهوه فى المنطقه عند هند
ناصر و مجموعه من الرجاله و محمد قاعدين بيلبعوا طاوله توصلهم كلهم رسايل فى نفس الوقت كلو يطلع موبايله
ناصر / الله اكبر نقوا القاعه الحمد لله كلو يعزم يا رجاله القاعه واسعه و تساعى من الحبايب الف
محمد / عن اذنكوا اعمل كام تليفون اعزم زمايلى
ناصر / اتفضل يا حج محمد اتفضل
محمد يقوم
ناصر / الا عمى و باقي الجماعه ما جوش ليه يا سليمان
سليمان / لسه قافل معاهم من شويه فى الطريق
ناصر / جهزت السكن مش عاوز ناقصهم حاجه
سليمان / يا كبير انا و عباده اكدنا على كل حاجه بنفسنا عملنا حسابنا و بزياده
ناصر / شوفوا مكان بياجر عربيات و اجروا كام عربيه جامدين عاوزين زفه تسد عين الشمس
سليمان / ما العربيات اللى معانا كفايا
ناصر / العربيات اللى معانا على قدنا عاوزين نعمل حساب الحج محمد و اهله و معازيمه و صحبات هند و صحاب مختار و صحاب عبد الله و الناس اللى بتحب تمشي فى الزفه اقولك شوف كمان اوتوبيس كدا يفضل معانا الفرح اللى عاوز يوصل القاعه نتجمع قدام البيت و يروح الناس لو اتاخرنا مش عاوزين حد يبقي ناقصه حاجه و لا يقول كلمه
راجل / مش هتعزم المحافظ يا كبير
ناصر / كانت فيتانى ازاى دى اما اكلمه الراجل يزعل
ناصر يطلع التليفون
ناصر / السلام عليكم
………………….
فى شقه هند
هند تعلق الفساتين بتاعتها و بتاعه ياسمينا فى الدولاب
ياسمينا / اشمعن انتى جبتى اتنين و انا واحد
هند / انتى مش كان عندك واحد بتاع العيد و بعدين ايه النق ده خلى الجوازه تمشي ابوس ايدك
ياسمينا تروح تقعد على السرير
ياسمينا / بس انا مش عاوزاكى تمشي
هند تروح تقعد جنبها
ياسمينا / انا بخاف انام لوحدى
هند / هبقي اجى ازورك و ممكن اخدك تباتى معايا
ياسمينا / بجد هنروح الحفله تانى
هند / اه مش انتى انبسطتى هناك و بعدين انتى مش مبسوطه مع صحابك الجداد مهم كلهم هناك هتبقي تيجي تلعبي معاهم و بعدين هى مين اللى هتشيل الورد بكره مش انتى
ياسمينا / ماما مش هترضي تخليني احط روج و انا عاوزه احد روج
تليفون هند يرن
ياسمينا / اطلعى ارغى بره انا عاوزه انام
هند / يخربيت لماضتك طالعه
هند تاخد الموبايل و الاسدال و تطلع الصاله
هند / الو
مختار / بتعملى ايه
هند / بلبس الاسدال هطلع اتكلم فى البلكونه
مختار / انا مش فى البيت
هند / انت لسه ما روحتش
مختار / لاانا لسه فاضلي مشوار اخير بس خفت تنامى قبل ما اكلمك معلش اتاخرنا كنا بنسكن باقي الجماعه و نفرجهم الشبكه فى ناس كتير هتنزل بكره الصبح تجيب نواقص اصلهم ما كانوش عاملين حسابهم هما كمان
هند / الدنيا ملخطبه اوى فعلا
مختار / بالعكس دى متيسره على الاخر
هند / على فكره انا فكرت فى موضوع الفستان
مختار / بصي يا هند
هند / هخلى الاحمر للحنه
مختار / حد كلمك فى حاجه
هند / لا دا قرارى انت عملت كل ده عشانى ما ينفعش اسببلك احراج قدام اهلك
مختار / ما لكيش دعوه باهلى انا كفيل بيهم
هند / هو انت هتعاملنى حلو كدا علاطول يا مختار
مختار / لو فى يوم عاملتك غير كدا فكريني بمهرك
هند / افكرك بايه!! مهرى!!
مختار / هو انتى ما تعرفيش ابوكى اتفق معايا على ايه
هند / لا
مختار / انى احطك فى عيني و اتقى ربنا فيكي و عاوزك تعرفي ان ولاد الزيني لما بيدوا كلمه ما بيرجعوش فيها بس ان جيت عليكه سنه اعرفى ان الدنيا جايه عليا جامد
هند / ربنا ما يحرمنى منك ابدا
مختار / و لا يحرمنى منك خشي نامى عشان وصلت
هند/ لما تخلص ابعتلى رساله لو لسه صاحيه و لا انت عاوز تنام
مختار / تمام هبعتلك رساله سلام دلوقت
هند/ سلام
هند تقفل الموبايل و تدخل اوضتها تلاقي ياسمينا نايمه تروح تحضنها و تنام جنبها
……………………..
فى اوضه محمد
شيري نايمه جنب محمد وشيري
شيري / حلفت و قولت لا ان كان على حاجه عروسته ماشي انما احنا ليه و صممت احاسب
محمد / جدعه ما تصغريش البت
شيري / الشهاده لله يا محمد انا كل يوم مع الناس دى بحس اننا صغيرين اوى و خايفه يجي يوم و يعايروها
محمد / لا اله الا الله الجدع شاريها هو و اهله ليه بقي الفال الوحش ده
شيري / معرفش بس اسمع ان الفلاحين بيجبوا الشبكه و اول ما البت تخش يبيعوهالها و يجيبوا بتمنها بهايم و البت هتبقي بعيد عننا و لوحدها انا بخاف على هند اوى يا محمد / ما تقلقيش عليها مختار راجل و بعدين دول مش فلاحين دول صعايده يعني لو مش لاقيين ياكلوا مش هيفرطوا فى دهبهم
شيري / مش على الدهب والله
محمد / عارف ما تقلقيش الناس دول انا مستبشر بيهم خير و حبيتهم و مش مخليين فى جهدهم جهد عشان يبسطوا البت عاوزه ايه تاني انتى عارفه مين اللى جاى الخطوبه بكره
شيري / مين
محمد / المحافظ ناصر عزمه قدامى و حلفه ليجي
شيري / هى الناس دى واصله اوى كدا
محمد / يا شيريهان انتى عاوزه ايه اكتر من كدا الراجل اشترى محل الدهب كلو و محل الفساتين كلو انتى مش جيتي البلد و شوفتي القصر بتاعهم
شيري / ايوه كل دول عايشين فيه كل واحد ليه اوضه
محمد / دول ناس اغنيا اوى مشوفتيش الجناين و الزرايب اللى عندهم عارفه البر التانى ده اللى عديناله الكوبرى .. كله بتاعهم
شيري / بصراحه ما يبانش على مختار عادى فى لبسه و حياته ليكون بخيل يا محمد تبقي مصيبه
محمد / يا مثبت العقل و الدين يا وليه انتى وش نكد بقي الواد صارف ده كله و فى الاخر بخيل انتى عاوزه تفشكلى الجوازه و خلاص
شيري / ابدا بس خايفه على هند خايفه اعشمها تفرح تتصدم كفايا اللى شافته مش هتستحمل حاجه تانى من الدنيا
محمد / انا مطمن عليها و هى مع مختار و ان شاء الله يدخلوا علاطول ما يطولوش فى الخطوبه
شيري / مستعجل على ايه
محمد / و ليه استنى انا اتكلمت مع الحج ناصر و قالى ان كل حاجه جاهزه يخلصوا الدراسه و يدخلوا
شيري / طب و جهازها
محمد / مش هنجيب حاجه هما هيفرشولها جناح كبير من كل حاجه تعيش فيه مع جوزها وسطيهم
شيري / على زوقهم مش البت تنقى على الاقل السرير اللى هتنام عليه
محمد / تتكلم هى فى التفاهات دى مع خطيبها الجدع ما بيرفضلهاش طلب ما تعمليش مشاكل على حاجات هبله و ما تدخليش انتى خالص يا شيريهان
شيري / انت ليه بتكلمنى كانى فعلا مش عاوزه الجوازه تمشي هو انا مش عاوزه اطمن عليها و افرح بيها انا خايفه عليها
محمد / و انا مش هطمن عليها الا لما تسافر بيت مختار ارتاحتى
شيري تبصله يلف و يديها ضهره و يستغطى و ينام
…………………….
فى الشقه المهجوره
يوسف قاعد على الكرسى و ساند رجله على الترابيزه الباب يتفتح يقوم يقف يلاقى مختار فى وشه مختار يدخل و هو بيجر كرسى و يقفل الباب و يقعد و يشاور ليوسف يقعد يوسف ما يقعدش
مختار / انت مديونلى بنص مليون جنيه
يوسف يبتسم بسخريه و يبص الناحيه التانيه
مختار / دى كانت اخر مره اعمل حساب لعمى محمد و الدم اللى بينكوا و لعلمك لو كان نزل منى نقطه دم واحده ما كنتش هقدر احوش اهلى عنك و عن اهلك احنا صعايده و بيتهيالى انت فاهم
يوسف / انت خاطفنى و عامل الفيلم دا كلو عشان تقولى الكلمتين الحمضانين دول
مختار / انا بقولك عفوا رصيدك انتهى و هتبدا تحاسب من النهرده
يوسف / خلاصه الكلام انت و هند مش هيحصل على جثتى
مختار يقوم يقف
مختار / قدامك كام شهر اللحق اعملك فيهم كام حاجه تقابل بيهم ربنا
يوسف / اوعى تفتكر الحركه الهبله اللى عملتها النهرده هتهتنى لا فوق انا بس كنت مستنى اشوف اخركوا و لما همشى من هنا هدفعك تمنها غالى
مختار / خطوبتى على هند الجمل بكره فى ناس مهمين اوى هتحضر حبيت تنورنا بادبك و تقف مع عمك تستقبل المعازيم هنشيلك على الراس و ننسي اللى فات حبيت تكمل فى الهبل بتاعك ده بشوقك امك بس اللى هتعيط عليك
يوسف / اللى ما فلحش النهرده بكره يفلح يا مختار يا زيني
مختار يطلع مطوه من جيبه و يحطها فى ايد يوسف
مختار / الرجاله لما بتحب تعمل حاجه بتعملها بنفسها و انا قدامك اهو
مختار يفرد ايديه و يفتح صدره و يوسف يفتح المطوه و يقلبها فى ايده و هو بيبص عليها
………………………
فى اوضه هند
هند عماله تتقلب فى السرير مش عارفه تنام تقوم تروح اوضه عبد الله تفتح الباب بالراحه تلاقيه بيزاكر تيجي تقفل الباب
عبد الله / تعالى
هند تبتسم و تدخل
هند / مش عاوزه اعطلك
عبد الله / ياريت تعطلينى انا زهقت اصلا
هند / من ايه دا انت طول اليوم ضايع و بكره ضايع و خايفه السنه تضيع منك بسببى
هند تقعد جنب عبد الله يبصلها و يبتسم
هند /ايه ؟ بتبصلى كدا ليه
عبد الله / من يوم ما قابلته و انا بحبه بس حبيته اكتر لما شوفتك فرحانه كدا
هند / بطل
عبد الله / بطلت قررتى هتلبسى انهى فستان ؟
هند / الازرق
عبد الله / مع انك بتحبى اللون الاحمر اوى
هند / بحبه و عاجبنى اكتر بس قررت اللبس الازرق
عبد الله يبتسم
هند / هبعت الاحمر معاهم البلد مع الدهب هلبسه يوم الحنه بتاعتى زى ما مختار قال
عبد الله / طب من باب الرزاله يعنى ايه اللى خلاكى تتنازلى عن اكتر لون بتحبيه متاكده انك مش هتندمى
هند / تؤ و بعدين انت قولتها انا اللى بحلى الفستان انا متاكده ان الازرق عليا تحفه
عبد الله يبتسم
هند / و بعدين ما انا كدا كدا هلبس التانى برده اكيد مش هضايق صح
عبد الله / ايه اللى خلاكى تضحى من الاساس
هند / عوزاه مبسوط
عبد الله / ههههههههههههههههههه اوعى
هند / ما تضحكش ما تبقاش رخم
عبد الله / انا بقول تقومى تنامى و انا اقعد ازاكر عشان نعدى ام السنه دى و اروح الجامعه و الاقى بنت الحلال انا كمان عشان انتى كدا هتاثرى على هرموناتى و انا سنجل و كدا
هند / هههههههههههههههههههههه
عبد الله / ربنا يسعدك يا هند انتى تستاهلى كل خير و مختار الخير كله بصراحه
هند / انت بتحبه ليه اوى كدا
عبد الله / عشان راجل … انتى شوفتى فيديو الخناقه هو متصور من بعيد و مش باين فيه التفاصيل بس ايه مختار بوم طاخ رقدهم
هند / ما تفكرنيش
عبد الله / اتحداكى انه يوسف
هند / لا مش للدرجادى
عبد الله / اقولك حاجه و ما تضايقيش
هند / خير
عبد الله / بابا اتصل بعيلتنا كلها ما حدش فيهم هيجي بكره عموا محمود منعهم ما حدش رضي يرد على بابا الا عموا حمدى لما بابا اللح و قالهاله وش احنا مش موافقين على الجوازه و اللى يشيل قربه مخرومه و الكلام العبيط ده
هند / هما بيعملوا معايا كدا ليه
عبد الله / ربنا بدلك عنهم بعيله تسد عين الشمس دا المحافظ بنفسه هيحضر
هند / هقف فى وسط اهل جوزى من غير اهل يا عبد الله
عبد الله / ليه و احنا موتنا و لا ايه
هند تحضن عبد الله
هند / ربنا يخليكوا ليا
عبد الله / و يخليكي لينا بقولك ايه ما تعمليلى حاجه اكولها و انا بزاكر و لا حتى كبايه نسكافيه
هند / بس كدا من عنيا ثوانى
هند تقوم و عبد الله متابعها و مبتسم
…………………..
فى الشقه المهجوره
يوسف بيقلب السكينه فى ايده و يمسك طرف التيشيرت بتاعه و يمسحها و يقفلها و يشيل من عليها بصماته و يرميها تحت رجل مختار
يوسف / انت فاكرنى عبيط انا عارف المطوه دى معمول بيها ايه قبل كدا و لا يمكن بتصورنى
مختار / ههههههههههههههه طب ما انا صورتك فعلا و انت بتتفق مع الراجل انت عارف ان هند كانت جنبي بالظبط و هما بيهجموا … كان ممكن تتاذى
يوسف / اتاذت يوم ما سمحتلك تدخل حياتها على فكره العيله عندنا ما حدش موافق على الجوازه و كلهم هيقاطعوا عمى
مختار / مع احترامى للجميع خصوصا السيد الوالد … طظ
يوسف عنيه توسع
مختار / انا ضيعت وقت كتير بالرغى معاك كنت فاكر ان دماغك دى فيها مخ طلعت ويكا امشي يا يوسف روح لابوك زمان امك ماتت من قلقها عليك روح و لم نفسك ما تخلينيش ازعلهم عليك
يوسف / انت لسه ما تعرفنيش
مختار / انت اللى ما تعرفنيش انا صعيدى و اللى يبص لحرمه صعيدى بيقلعله عنيه و مش هعيدها دى اخر مره اعمل حساب لعم محمد يلا امشي
يوسف / الايام بينا يا مختار
مختار / ما تقطعش الجوابات عشان بتوحشنى
يوسف يمشي الراجل يقف يبص لمختار
مختار / وراه
الراجل يمشي و مختار يوطى يجيب المطوه يحطها فى جيبه و يمشي
………………….
فى شقه هند تانى يوم الصبح
باب الاوضه يتفتح بالراحه و مريم و سماح و البنات يدخلوا يصحوا هند تقوم تقعد و هى مبسوطه
مريم / صباح الخير انتى لسه نايمه
سماح / تلاقيها سهرانه طول الليل تحب فى التليفون
هند / والله ابدا ازيك يا سماح وحشتيني
سماح / الحمد لله قولت اسلم عليكي قبل ما انزل معاهم اجبلى فستان
بنت / قومى عشان نلحق نفطر قبل ما ننزل
هند / تمام يلا
هند تقوم معاهم تلاقي الشقه بره مليانه ستات تسلم عليهم و تحضنهم
ست / بسم الله تبارك الله يا اختى حتى و هى صاحيه من النوم قمر
انتصار / ما شاء الله
هند / هستاذنكوا الحمام
شيري / فاضي خشي
هند تدخل الحمام
انتصار / كلمتى عباده يا سماح
سماح / اه قالى رنولى اجى اخدكوا هنفطر و نمشي علاطوا
انتصار / لو خلصتوا بدرى تعالوا اتغدوا لو ما لحقتوش هجبلكوا سندوتشات على الكوافير
سماح / تمام
شيري / هى فاطمه ما جتش معاكوا ليه
سماح / بتجهز حاجات كتير عشان الفرح اصل احنا ما كناش عاملين حسابنا و كدا
شيري / تمام مفيش مشكله اسلم عليها بالليل بقي
هند تليفونها يرن سماح تروح تجيبه و توريهم اسم مختار يضحكوا هند تطلع من الحمام يجروا عليها
انتصار/ بلاش رخامه يا بنات
هند تاخد التليفون منهم و هى مكسوفه و تكنسل
مريم / ليه ما تردى
سماح / تلاقيها مكسوفه مننا
مختار يرن تانى ترد بخجل و عنين الكل عليها مش عارفه ترفع عينها من الارض
هند / الو
مختار / صباح الخير
هند / صباح النور
مختار / انا هروح انا و عبد الله نحلق و بعدين ابقي معاكى طول اليوم لو محتاجه تروحى اى مشوار
هند / تمام
مختار / ناقصك اى حاجه اجبهالك و انا جاى
هند / شكرا
مختار / تمام لما اخلص هكلمك
هند / اوك
مختار / سلام
هند / سلام
هند تقفل و تبصلهم
هند / رايح يحلق و لما يرجع هيوصلنا
مريم / ايه ده مالكوا كلامكوا ناشف كدا
سماح / عشان واقفين يا عبيطه الكلام الطرى ما بيتقالش قدام الناس
انتصار / طب مش هنخف كدا و ننجز عشان لسه يومنا طويل و لا ايه
شيري / الفطار جاهز اهو يا جماعه اتفضلوا اتفضلوا
…………………..
فى شغل محمد
الباب يخبط و محمود يدخل محمد يكمل شغل و هو مضايق محمود يروح يقعد
محمود / صباح الخير
محمد / صباح النور خير
محمود / انت سالت عن عريس بنتك
محمد يرزع القلم على المكتب
محمد / مش هنخلص صح
محمود / انت عارف ايه اللى حصلى انا و ابنى امبارح
محمد / ايه راح بلغ عنكوا و عن البلطجيه بتوعكوا يا اخى انا مش فاهم ابنك ده ايه مشكلته يبعتله بلطجيه يقتلوه
محمود / ما كانتش هتوصل للقتل
محمد / انت شوفت الفيديو
محمود / شوفته و شوفت الباشا و هو بيبعت بلطجيه يخطفوا يوسف من بيته و يحبسونا فيه
محمد / يوسف حصله حاجه
محمود / انا حصلى انا كنت بموت فى كل ثانيه لحد ما رجع و انا عاجز مش عارف مين خطف ابني و لا عملوا فيه ايه
محمد / و ولاد الناس كمان غاليين عليهم
محمود / قصدك ايه
محمد / ان كان مختار غلط فابنك اللى بدء بالغلط انا عمرى ما هنسي منظر بنتى و هى مصدومه فى المدخل من رعبتها من عمله ابنك ما فكرش ان عبد الله ممكن يدخل انا اى حد من الجيران لم ابنك يا محمود مختار صعيدي و اهله عندهم التار يعني لو خايف على ابنك لمه
محمود / دى اخره اللى بينا يا محمد تبعنى انا و ابنى عشان الواد ده ماسك عليكوا ايه
محمد / خد قلوبنا باخلاقه بعقله الكبير اللى يوزن بلد
محمود / اللى يشيل قربه مخرومه عن اذنك
محمود يمشي و محمد يمسك التليفون
محمد / ايوه يا مختار ازيك
………………..
عند الحلاق
عبد الله / لا يا مختار غلطان الكلب لو عضك ما ينفعش تعضه
مختار / عندنا الكلب اللى بيتسعر بينضرب بالنار
عبد الله يبص لمختار
مختار / انت فاكره سكت حتى بعد اللى عملته الباشا بيهددنى بيقولى اللى ما فلحش بكره يفلح
عبد الله يبص فى الارض
مختار / البيه راح خطب و لسه عينه فى مراتى
عبد الله يبتسم
عبد الله/ لسه ما بقتش مراتك
مختار / يعني يبص لها عادى
عبد الله / ههههههههههه لا يا عم انت شايفنا بارايل انا اقصد ان مش انت اللى تدخل يعني
مختار / كلها كام ساعه و يبقالي ادخل
عبد الله / مش عارف ايه اللى جاب الموضوع ده فى دماغى دلوقت مره و احنا صغيرين المدرسه اتصلت و قالت ان هند وقعت من على السلم و نقلوها المستشفي قالت انها داخت يوسف قعد الست شهور الجبس مقيم عندنا كان بياكلها و يشربها بايده ويعيط جنبها كان ميتله ميت كان بينام فى اوضتى ملالها الاوضه عرايس و دباديب و هدايا و لما خفت و يوسف مشي هند حكت اللى حصل كانت بتلعب مع ولد معاهم فى الفصل يوسف ضربها وقعها من على السلم بابا عرف و ما عملش حاجه حتى العيال فى الفصل خافوا يتكلموا
مختار / الواد اللى كان بيلعب معاها
عبد الله / مش فاكر ما اعرفش هند ما راحتش المدرسه غير على الامتحانات فما اعرفش اللى حصل
مختار / و بعدين
عبد الله / الكلام ده لما هند كانت فى اولى اعدادى عد بقي مواقف كتير زى دى يمكن ده كان اشدهم عشان نصيب هند الحوار يحصل جنب السلم كلها كام ساعه و يبقالك تدخل
عبد الله يسيب المحل و يطلع بره الحلاق يخلص الراجل اللى فى ايده
الحلاق / معاك يا عريس فضيتلك اتفضل
مختار يبتسم و يقوم يقعد على الكرسى و عينه على الباب
……………………..
فى شقه يوسف
يوسف عمال يزعق و هايج و عمامه و خيلانه بيهدوه
يوسف / هو ده اللى ربنا قدركوا عليه هيخطفونى و تسكتوا
حمدى / يا ابني ما نقدرش نعمل حاجه يحبسوك بالفيديوهات اللى عليك
خال ١/ على الاقل استني اما اهله يمشوا
العم / دا بيقولوا المحافظ بتاعهم جاى الفرح كمان
يوسف / ان شالله يكون رئيس الجمهوريه الفرح ده مش هيتم و الخطوبه دى لازم تنتهى
محمود / و لا بالطبل البلدى
يوسف يبص لمحمود باستغراب
محمود / من الاخر كدا عمك لو ايه باللذى حصل مش هيفركش الجوازى دى
يوسف / ليه ان شاء الله ساحرلهم
اسراء / دا هم اللى سحروله زى ما سحرولك و خلوك مدهول كدا
يوسف / بطلى تخاريفك دى بقي
اسراء / قوله يا حامد قوله الشبكه بتاعه ست المحروسه بكام
العم / على كلامهم معديه التمنميه الف بالمصنعيه
يوسف / دا باماره ايه دا اكيد ضاحك عليهم الواد ده شحات ما حلتوش غير عربيته
محمود / فوق بقي يا يوسف الواد فلاح قرارى بيعرف يحط القرش على القرش و مكومهم على قلبه و حتى يوم ما صرف اشترى دهب
يوسف / هيبيعهولها بعد كدا
اسراء / ان شالله يولعوا فى بعض انت خليك يا ابني فى عروستك هتعمل ايه لو عرفت انك هايج اوى كدا دى يا حبيبتي اتصلت عليا فوق الخمسين مره تطمن عليك ان كنت روحت و لا لا
يوسف / خطيبه مين انا مش خاطب
محمود / بقولك ايه يا يوسف اهدى و ما تركبناش الغلط اكتر من كدا و راعى ربنا فى بنات الناس دخول البيوت مش لعبه
يوسف / يوووووووه بقي مش هنخلص
يوسف يحاول ينزل عمامه و خلانه يمنعوه
خال ١ / استنى هنا رايح فين انت مش نازل من البيت النهرده
يوسف / يعني ايه هتحبسونى
خال ١ / خلى اليوم يعدي يا يوسف و حقك هيجيلك
يوسف / كلكوا بتقولوا كدا و خلاص
خال ١ / عيب يا يوسف انا عمرى وعدتك و خلفت حقك هيجيلك اهدى
يوسف / الخطوبه دى
خال٢ / لسه خطوبه اهدى
اسراء / منك لله يا هند انتى و امك كان مستخبيلنا فين دا بس يا ربي
…………………….
فى الكوافير
هند لابسه تاج على طرحه ستان نفس درجه الفستان من فوق و مكياج سمبل جدا و الكوافير زحمه جدا
مريم / كان المفروض نتقسم على اكتر من مكان كدا هيكروتونا انا لسه ما عملتش حاجه
هند / براحتنا لسه بدرى
بنت / انا خايفه المكياج يسيح
سماح / هو ده اللى بتفكروا فيه و مش خايفين لما عباده يشوفنى بالمكياج هيعمل فيا ايه
هند / انتى تقريبا مش حاطه حاجه
سماح / انتى ما تعرفيش عباده اخويا
مريم / مش هيعمل حاجه ما كلنا حاطين و بعدين هو انتى يعني جيتي هنا ليه ما دام مش هتحطى
سماح / انتى مشوفتيهوش و احنا بنقى الفستان ده لا ضيق دا مجرجر ده مطرز بزياده ده فاقع لما طهقت
هند / بس انتى فستانك حلو اوى يا سماح لايق جدا عليكي و على جسمك ما شاء الله
سماح / و انتى كمان فستانك حلو اوى
هند / عقبالك عقبالكوا كلكوا يا بنات
مريم / هو انتوا هترقصوا سلو مع بعض
البنات كلهم يضحكوا و هند تبصلهم باستغراب
هند / هو المفروض لا
بنت / هيمسك ايدك و يحضنك و انتوا لسه فى الخطوبه
هند / لا مش لدرجه الحضن يعني
مريم / يعني مش هيشيلك و يلف بيكي زى ما بنشوف فى الافلام و النت
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
