رواية البر التاني الفصل الثلاثون 30 بقلم لولو محمد
رواية البر التاني الجزء الثلاثون
رواية البر التاني البارت الثلاثون
رواية البر التاني الحلقة الثلاثون
سماح / قولتلك كنت بكلمك على انك استاذى انا عمرى قولتلك بحبك و لا حتى لمحتلك
عصام / و انتى بقى بتكلمى كل اساتذتك بالطريقه اللى كنتى بتكلميني بيها
سماح / و احنا مين دخل بيتنا غيرك
عصام / انا طول الليل امبارح بقلب فى المحادثات و اقول ازاى ما بتحبنيش امال كانت تقصد ايه بالكلام ده
سماح / و اخرتها يعني
عصام / ان ما اتكلمتيش انتى مع ابوكى هتكلم انا هقولهم على كل حاجه
سماح / هتقولهم ايه
عصام / هقولهم انك بتحبيني زى ما بحبك هقولهم انك عوزانى زى ما انا عاوزك
سماح / انت شارب حاجه و لا مسطول و لا ايه حكايتك يقتلوك يا اهبل
عصام / ما يهمنيش يقتلونى يا يجوزوكى ليا يا يقتلونى انما كدا دى ما تبقاش عيشه
سماح تقفل السكه يتصل تانى
سماح / مش هنخلص بقي من الوقعه الهباب دى
………………………
سماح ترد
سماح / هتكلم معاهم انا خلاص
عصام / ماشي
سماح / ممكن اقفل بقي عشان انزل اشوف اللى ورايا
عصام / ماشي سلام
سماح تقفل و هى بتنفخ
سماح / مش هينفع كدا لازم تتصرفى يا سماح لازم تلاقيلك حل لتروحى بلاش
سماح رايحه جايه فى الاوضه و هى بتفرك
……………………..
فى الريسبشن
مختار واقف يتكلم مع فيرا
مختار / يعني عارفه انى سبت تجاره السلاح و برده جايه ورايا لاخر الدنيا
فيرا / اخر الدنيا ايه يا مختار دى العالم كله بقي مجرد قريه صغيره ما تكبرش المواضيع
مختار / لخصى و هاتى من الاخر عاوزه ايه
فيرا / انا الفتره اللى فاتت نقلت مقر شغلى لمصر
مختار/ يا فرحتى
فيرا / بدانا فعلا بتصنيع البى كاى متين و خمسين و مش هنكر لو قولت اننا بدانا التوزيع بس على صغنن كدا
مختار / ما شاء الله دا انتى سريعه اوى
فيرا / انت اللى سايب الدنيا بتتحرك من حواليك و عمال تجرى ورا … هى حلوه مش هنكر بس ما تستاهلش تضحى اوى كدا عشانها
مختار يبصلها بقرف
فيرا / ما علينا مش بتقولوا عندكوا برده الغربال الجديد له شده باين ؟
مختار / انا بضيع وقتى معاكى تعرفى كدا ؟
فيرا / تمام الملخص انى محتاجه فلوس
مختار / مش قولتى انك صنعتى و بعتى
فيرا / البيزنس ده لسه فى اوله يا مختار و لسه ما عملتش لا اسم و لا زباين امال لو ما كنتش بيزنس مان و عارف السوق
مختار / اللى اعرفه انك دخلتى عليا دخله اللى معاها مال قارون و انى لو اشتغلت معاكى هتحطى الدنيا تحت رجليا دلوقت جايه تطلبى منى فلوس !!
فيرا / ههههههههههههههههههههه اطلب منك فلوس ايه بس … انت ليه مش قادر تفهمنى
مختار / اختصرى
فيرا / شباب كتير اوى يا قلبي بيغرقوا فى البحر و هم بيحاولوا يخرجوا من البلد دى … للاسف مصر مش مقدره الثروات البشريه اللى فيها
مختار / قولت اختصرى
فيرا / كونتاينر محمل شباب محتاجين يطلعوا بره يشتغلوا و انا و انت هنساعدهم
مختار / و انا دخلى ايه بالموضوع ده
فيرا / انا مش عارفه الحدود ايه مشكلتها الفتره دى لو مش الحكومه مطاريد الجبل و اخيرا اهلك انا مش عاوزه رجالتى يشتبكوا مع اهلك يا مختار احنا الاتنين هنزعل ما انا هعدى هعدى فنتفق احسن ما تخسر كتير
مختار / ههههههههههه انتى بتهدديني باهلى ؟
فيرا / بيزنس ايز بيزنس مختار
مختار / مش هقدر اساعدك انا سبت الشغلانه دى
فيرا / و اهلك كمان سابو ؟
مختار / ما عادليش كلمه فى الموضوع حتى ما عادوش بيتكلموا فيه قدامى
فيرا / انا متاكده ان دى مش هتبقي مشكله بالنسبالك
موبايل مختار يرن يبص فيه
فيرا / عروستك صحيت و لا ايه
مختار يبص لفيرا
فيرا / رقمى زى ما هو هستناك تكلمنى .. سى يو
فيرا تسيبه و تمشي و مختار واقف مضايق
………………………
فى السرايا
ناس بتعلق فراشه و ناصر واقف وسطيهم
ناصر / الهمه يا رجاله عاوزين نخلص قبل المغرب
راجل ١ / الف مبروك يا كبير
ناصر / عقبال عندكوا جميعا
راجل ٢/ يدوم الفرح يا كبير
ناصر / لينا و ليكوا تسلم
امين يدخل
امين / الجزار خلص يا كبير و بينضفوا مكانه
ناصر / امال العريس فين يعني مش باين لا يكون نايم
امين / نايم ايه يا كبير دا فى الشونه من صباحيه ربنا
ناصر / الشونه !!! هو ما حدش قاله اننا عاملينله ليله و لا ايه
امين / قولتله و كلمته تانى فى التليفون بيقول الليله بالليل هيخلص الشغل سريع سريع و يجى هنعمله ايه
ناصر / يلا ربنا يوفقه
ناصر يدخل السرايا الستات رايحه جايه يدخل المكتب و يقفل الباب ويروح يقعد ثوانى و الباب يتفتح و عباده يدخل
ناصر / على الله تكون جايب اخبار زينه
عباده / والله يا كبير انا مش عارف اقولك ايه بس الرجاله شغالين
ناصر / و انت جاى تفرحنى بجمله الرجاله شغالين هلاقيها منك و لا من ابو دماغ ناشفه التانى
عباده/ ما تقلقش عليه يا كبير مختار مش لقمه طريه
ناصر / انا خايف على الغلبانه اللى معاه لا ليها لا فى الطور و لا فى الطحين
عباده / هى يعني لوحدها على العموم اطمن انا بعت رجاله بزياده و حريم كمان
ناصر / حلوه حكايه الحريم دى قولت لمختار
عباده / قولتله بس مش هيقولها بيقول انه ما صدق نسيت اللى حصل امبارح و رجعت اندمجت
ناصر / قولتله يرجع ما راضيش
عباده / حقه
ناصر يبص لعباده
عباده / كلمه حق يا كبير انا لو مكانه هعمل كدا ما انا مش هتحبس فى البيت بسبب حرمه سعرانه يعني ديتها ايه دى يعني عشان نعملها الحساب دا كله
ناصر / ما احنا لو نعرف ديتها يا عباده كنا خلصنا انما المشكله اننا ما نعرفش مين اللى وراها و زى ما ما كناش عاملين حسابها لما خطفنا الراجل اياه لازم نفكر قبل ما نجر اللى كاريها و لا ايه
عباده / اللى تشوفه يا كبير
ناصر / على العموم انا كلمت معالى الوزير المحافظ و هو قالى اطمن و هيكلم حبايبه هناك و ان شاء الله خير
عباده / تمام … انا هروح اشوف الدنيا بره قبل ما الناس يوصلوا
ناصر / اكدت على الجماعه بتوع المزمار
عباده / كلو تمام يا كبير دا فرحه الغالى
ناصر / يتردلك فى فرحك
عباده يتنهد و يبتسم و يمشي ناصر يضحك
……………………….
فى الساحل
هند و مختار بيتمشوا
هند / مهو انا ما ليش فى لعب العيال ده يا تفهمنى ايه اللى بيحصل يا هسيبك و ارجع الاوضه
مختار / ما قولتلك مفاجاه اصبرى شويه مالك خلقك بقي ضيق كدا ليه
هند / اصحى ما تلاقينيش جنبك و اتصل عليا اطنشك و ما اردش و شوف خلقك هيضيق و لا لا
مختار / لا اله الا الله ما قولتلك كنت بحضرلك مفاجاه تبسطك
هند / اما نشوف عارف لو ما انبسطش ؟
مختار / احكمى بنفسك و قولى
مختار يقف قدام برجوله حوالين حمام سباحه متغطيه بستاير ملمومه على العمدان و فى كرسين بحر محطوطين بينهم ترابيزه عليها فاكهه و عصير و جاتوه و حلويات و جنبها ايسبوكس هند تبص للمكان
مختار/ ايه رايك فى المفاجاه دى
هند / ايه دى
مختار/ مش كنت عاوزه تنزلى المايه اهو انا و انتى و بس و ننزل الستاير دى عشان ما حدش يشوفنا و عندنا كل اللى هنحتاجه اكل و فاكهه و عصير و ساقع و مش بس كدا دا فى اتنين شغلتهم يخدموا علينا لو احتاجنا اى حاجه بس هيفضلوا واقفين بعيد لحد ما نناديهم
هند / انت بتتكلم جد يا مختار
مختار / عاوزين ننول الرضا بس
هند تبتسم مختار يوطى عليها و يوشوشها
مختار / انا اشتريت مايوه
هند تبصله
مختار / و اجرت الاوضه دى عشان نغير فيها انا و انتى و لما نخلص ندخل نستحمى و نلبس هدومنا تانى
هند / انا مش عارفه اقول ايه
مختار / قولى ان المفاجاه عجبتك و انك مبسوطه امال انا عملت كل ده ليه
هند / انا بجد بحبك اوى
مختار / و انا كمان والله بحبك اوى يلا بقي عشان ناخد اليوم من اوله
هند / تمام يا حبيبي يلا
هند و مختار يدخلوا اوضه قدام البرجوله و مختار يقفل الباب
…………………………..
فى السرايا
ستات كتير فى المطبخ و شيري و انتصار بيشرفوا عليهم
شيري / والله ما عارفه اقول ايه كتير كل ده والله
انتصار / ما يكترش على الغالى عقبال فرحه
شيري / طب قولى يتخرج الاول
انتصار / بكره ربنا يكرمه و يتخرج و يبقي دكتور قد الدنيا طب دا زمان مختار طاير هناك طير
شيري / مش كنا استنيناهم يفرحوا معانا
انتصار / نفرح تانى يا سلام طب دا انا الود ودى اعمل كل يوم فى السرايا هنا فرح بس اعمل ايه يرضيكى يقولوا الوليه ام فاتن اتجننت
شيري / هههههههههههههه ازاى بس ربنا يديم عليكوا الفرح يارب
انتصار / امين يارب … الهمه يا جماعه الناس على وصول
انتصار تطلع بره المطبخ و تطلع بره السرايا تلاقي عباده واقف مع عبد الله بيضحكوا تروح تقف معاهم من فوق سماح بتبص عليهم من بلكونه
//////////////
سماح / الدكتور عبد الله … الكل بيحبه و خاطره غالى … و هو يعني مراه الدكتور زى مراه الاستاذ … بس عصام لو قالهم انى كنت بكلمه … مصراوى و ما لوش فى الكلام ده و هيقف فى صفى … بس مش هيحوش عنك عباده … الخوف كله من عباده … ما انا مش هعيش عمرى كله كومبارس … انا يوم ما اتجوز لازم اخد حد عليه القيمه
//////////////
عربيه مغاورى تركن و ينزل ياخد عبد الله بالحضن و يضحكوا
/////////////
سماح / بس يا بت بلاش هبل و انتى عشان تهربى من السرايا ترمى روحك لمغاورى … ماله مغاورى و اهو تبقي كبيره الجوارحه … كبيره الجوارحه !!! … الجوارحه مالهمش الا كبير واحد و من بعده برده كبير واحد انما هنا حتى لو مختار ساب السلاح و عباده هو اللى مسكها مختار كلمته مسموعه و عمرك ما هتبانى وسطيهم … وسط مين خديجه و لا هند و لا انتصار و لا حتى امك … بس لو عرف بحوار عصام … ما حدش يقدر يوقفه عند حده غيره … دا مجنون … على روحه و انتى يعني هتغلبي … اعقلى يا سماح مش عشان تخلصي من نقره تقعى فى ضحضيره
//////////////
مغاورى يبص لفوق عينه تيجي فى عين سماح سرحانه و بتفكر مغاورى يبص لعبد الله و يكملوا ضحك
مغاورى / و كل ما تسال حد يقولك قلب زى مجدى يعقوب و فى الاخر بترسي مسالك بوليه
عبد الله / هههههههههههههههه و لما ارد عليك تزعل
عباده / لا دا دمه عسل هز براحتك انت بس اللى كان بختك وحش معاه
مغاورى / و انت لسه فاكرهالى دا انت قلبك اسود اوى
عبد الله / اعتبرنى نسيت
مغاورى / بقولك ايه ما تسيبك انت من الحفله الاورديحي دى و تيجي نطلع الجبل
عباده / و انا مش هكسر كلامك هنخلص هنا و نطلع كلنا الجبل و اهو يكون الرجاله جهزولنا الليله
عبد الله / انا باس انا صاحي من بدرى و لو طولت السرير هسافر
مغاورى / يا جدع دا الليله ليلتك هتضيعها فى النوم
عبد الله / تخيل
مغاورى / ملحوقه نخلى الطلعه الخميس و لا الجمعه اللى يناسبك
عبد الله / تمام كدا دايس
سماح تعدى من جنبهم ما حدش ياخد باله منها تطلع بره السرايا
……………………
فى الساحل
هند فى المايه و مختار قاعد على الكرسي سرحان هند ترشه بالمايه يبصلها تضحك يبتسم
هند / هو انت خايف تبوش ما تنزل يا ابني طب والله المايه جميله و منعشه
مختار / رحم الله امرئ عرف قدر نفسه و دى راحت و لا جت ستاير
هند / لا ما تخافش لو لقيتك هتغوض هفرملك تعال بميوهك الحلو ده
مختار يبتسم و يقوم يقلع التيشيرت و ينزل معاها
مختار / يغوط ايه دا شبر و نص الواحد هينزل يقرفص و لا يربع و برده يبقاله طول
هند / حلو على قد البرجوله شغال المهم نتبل
مختار يقعد و هند تتعلق فى رقبته
هند / ايه رايك
مختار / شوفتى انتى بقي لما نبقي لوحدينا بناخد راحتنا ازاى
هند / هههههههههههههههههههه طب اقولك ايه بس
مختار / و فى حاجه كمان انتى مش واخده بالك منها
هند / ايه ؟
مختار / كنتى عوزانى انزل بالمايوه وسط الاجانب دول كانوا يلهطونى لهط
هند / ليه ما وراكش رجاله و لا ايه دا انا كنت كلتهم بسنانى
هند تقعد على رجل مختار
مختار / يختاااااى يختاى يختاى يختاى انتى كدا بتفرمليني !!!
هند تقوم تقعد بعيد
هند / ههههههههههههههههههههههههههههه
مختار يروح ناحيتها و يشدها جنبه
هند / الله !!!
مختار / الجاذبيه عاليه اوى اليمادى و السحب عالى
هند / هههههههههههههههههههه طب اوعى تغرق
مختار / غرقت و اللى كان كان
هند / انا كنت شايله همك بعد الجواز تفضل ساكت زى ما كنت بس الصراحه ابهرتنى
مختار / بالفعل و لا بالقول
هند / السؤال ده خبيث صح
مختار / هو ما كانش خبيث بس نمشيها خبيث اصل انا بحب الخباثه اوى
هند / هههههههههههههههههههههه و ربنا مجرم
…………………………
قرب السرايا على الطريق
سماح ماشيه لوحدها على الطريق بشويش خالص تبص وراها تلاقي عربيه مغاورى جايه تبص فى الارض و تكمل يعديها تبص عليه تلاقيه بيفرمل تبص فى الارض و تلم نفسها مغاورى ينزل من العربيه
مغاورى / السلام عليكم
سماح تبصله بحزن و تبص فى الارض
مغاورى / ماشيه لحالك كدا و الشمس هتغيب لو رايحه فى حته اوصلك
سماح / كتر خيرك عن اذنك
سماح تعديه و تمشي
مغاورى / خطر عليكي كدا يا بنت الناس
سماح تبصله و تعيط و ترجع ناحيه السرايا
مغاورى / لا اله الا الله
مغاورى يفضل متابعها لحد ما تدخل السرايا
مغاورى / هو فى ايه !!!
مغاورى يبص فى الارض و يرجع يبص على باب السرايا و يروح يركب العربيه و يمشي
………………….
فى حمام السباحه
مختار / و ليه السيره النكد دى
هند / انا بس عاوزه افهم … على الاقل اطمن
مختار / اطمنى
هند / طب قولى بجد ناوى تعمل ايه
مختار / و لا حاجه مش ناوى اعمل انا اساسا ما اقدرش اعمل
هند / يعني ايه
مختار / يعني لا اقدر اساعدها و لا اقدر احاربها فهمتى
هند تبص فى الارض و تبصله
مختار / بس انا مش لوحدى عندى اهل و عزوه هم هيتصرفوا معاها فما تقلقيش
هند / طب ان كان على القلع و اللبس اهو الجهاز بتاعك اللى بتتمشي بيه من اوضه لاوضه ده نافعنا طب و الاكل و الشرب تضمن منين انها مش هتحطلك حاجه
مختار / هههههههههههههههههههههه يخربيت الخيال الواسع بصي لو ده هيبطلك اكل الشارع هقولك ما اضمنش و انا الكسبان بس انا هقولك الحقيقه و رزقي على الله هى مش هتاذينا هى ما تجرؤش هتفتح على روحها ابواب جهنم لا هى و لا الاجعص منها يعرفوا يسدوها تعرفى لو لوحدى كان يمكن اقلق بس و انتى معايا لا
هند / ازاى يعني
مختار / الوليه دى زكيه مش هبله هى عارفه بتتعامل مع مين و بتتعامل معاه ازاى و عند الصعيدى حاجتين ما تهوبيش نحيتهم الارض و العرض غير كدا ممكن يسامح
هند تهز راسها و تبصله
مختار / مش هنخلص احنا صح
هند / طب والله يا مختار ما بطلتش تفكير فى الموضوع ده
مختار / ما تفكريش و ما تخافيش مش دى على اخر الزمن اللى هيتعملها حساب يعني
هند / هو انت معاك مسدس ؟
مختار / ههههههههههههههه لا مش معايا … انتى اخدتيه منى فاكره و لا لا
هند / واد يا مختار
مختار / واد يا مختار !!!
هند / لتكون دى تمثيليه منك عشان تخوفنى و ترجع للسلاح
مختار / ههههههههههههههههههههه اقولك هى كدا قولت اجرب بس يا خساره طلعتى واعيه و فقستى الليله
هند / يووووه بقي
مختار / لو على السلاح انا متحاوط بجيش بحاله و كلهم بسلاحهم و وقت الجد همد ايدى كدا
مختار يفرد دراعه اليمين للجنب
مختار / الاقى فيها مسدس … امد ايدى كدا
مختار يفرد دراعه الشمال للجنب
مختار / الاقي فيها رشاش … بس للاسف مش هنحتاجهم مع انى مش هنكر ان ضرب النار وحشنى و الوليه دى بتخلى ايدي تحكنى
هند / هو احنا ممكن نروح اوضتنا
مختار / يا ليله بيضا يا ولاد دا انا عاصر على نفسي لمونه من الصبح عشان ابسطك فى الميه
هند تبصله و تبتسم ابتسامه فيها حزن
مختار / من بكره و لحد ما نروح اى يوم تحبى تنزلى فيه الميه نخليهم يعملولنا البرجوله دى انتى بس اؤمرى
هند / انا تعبت خلينا ننام
مختار / ماشي يلا اطلعى اتنشفي و لا تعالى نتشطف و نريح فى الاوضه دى
هند / احسن برده يلا يلا
هند تطلع و تعصر المايوه و تلف نفسها بالبشكير و مختار يطلع وراها و يتنشف و يلبس التيشيرت
………………………
فى السرايا
سماح داخله باصه فى الارض تقابل عبد الله تمسح وشها و تعدى ياخد باله بس ما يعلقش ناصر يدخل
ناصر / عريسنا
عبد الله / هههههههههههههههه افضل قول عريسنا عريسنا لما اصدق نفسي
ناصر / و انا عند كلامى شاور انت بس و انا اخطبلك الليله
عبد الله / ههههههههههههههه لسه بدرى اوى يا كبير على الحوار ده مع انى ابقي كداب لو قولت انى مش مستعجل
ناصر / يا ابنى الجواز ما لوش وقت من استطاع منكم الباءه فليتزوج
عبد الله / عليه الصلاه و السلام بس انا لو مش على الدراسه انا مش جاهز هى بنت الناس دى مش هيلزمها مهر و شبكه و عفش و فيلم ابيض على دماغى و لا هاخدها بالمجهود
ناصر / ههههههههههههههههههههه يخرب عقلك يا ابنى الحاجات دى امرها محلول ان كان على الفلوس ما تشلش همها المشكله اللى بجد انك تلاقيها نص التانى اللى هتصطبح و تتمسي بيها كل يوم العشره الطيبه و الكلمه الحلوه هى دى اللى تشيل همها
عبد الله / اديك حضرتك حطيت العقده فى المنشار و ادى الاقيها فين دى بقي
ناصر / هتلاقيه ما تقلقش انوى انت بس الحلال و ربنا هيرزقك بيها و يحطها فى طريقك ما تشلش هم ارمى حمولك على الله
عبد الله / و نعم بالله … صحيح يا كبير … اممم سماح يعني
ملامح ناصر تبقي جد
ناصر / مالها
عبد الله / كانت داخله من بره بتعيط باين مش عارف
ناصر / خير فى حاجه حصلت و لا ايه
عبد الله / ما اعرفش ما انا ما ليش كلام معاها و حضرتك اول واحد قابلته دى لسه معديه قبل ما حضرتك تدخل علاطول انا قولت هقول لعباده بس حضرتك قابلتنى بقي فقولتلك و خلاص
ناصر / تمام يا ابنى خلاص انا هشوف و انت يلا اتشطف و اللبس الناس على وصول
عبد الله يبتسم ناصر يطبطب عليه و يمشي
……………..
فى اوضه هند
مختار نايم على جنبه و مدى لهند ضهره و هى نايمه على ضهرها بتبص للسقف و بتفكر تبص لمختار و تتنهد تقوم تنزل من على السرير و تلف ناحيه مختار و تدخل فى حضنه يبوس راسها و يكمل نوم و ثوانى و يفتح يلاقيها صاحيه يبص فى الموبايل
مختار/ ايه اللى مصحيكي بدرى كدا؟
هند / مش عارفه انام
مختار / ليه ؟ بتفكرى فى ايه ؟
هند تبصله
مختار / ليه يا هند ؟
هند / غصب عنى
مختار / لا اله الا الله … ايه الدماغ دى يا بت !! الواحد عمل البدع و جاب اخره و برده اللى فى دماغك فى دماغك
هند / والله ما عليا
مختار / و انا مش صغير عشان تشيلى همى … على فكره انا الراجل هنا … و لا انا مش عارف املى مركزى و لا ايه ؟
هند تبتسم و تبص الناحيه التانيه يمسكها من دقنها و يخليها تبصله
مختار / مش عارف املاه ؟
هند / بطل هبل انت عارف كويس ان مش دا قصدى و بعدين لعلمك بقي انا مش خايفه من الموضوع ده كله غير عليك … مختار انت ليه مش قادر تفهم انت ايه بالنسبالى انا مجرد فكره ان ممكن لا قدر الله يجرالك حاجه بتقتلنى كابوس
مختار / ما انتى مش هتحطيني فى أومؤم و تقفلى عليا
هند / على فكره انا خوفى عليك مش عشان انا مش واثقه فيك او انك ضعيف بالعكس انا خوفى العكس الواحد لما بيبقي ضعيف بيمشي جنب الحيط لكن لما بيبقي زيك كدا بيفتح صدره و مش بيخاف بالظبط زى العيال السبيحه فى البحر بيقعدوا يتسابقوا و هم دول اللى بيغرقوا فى الاخر انما اللى مش بيعرفوا يعوموا بيفضلوا فى الامان على الشط فاهمنى
مختار / من غير ما تتكلمى والله فاهمك بس انا مش اهبل و كمان الحذر لا يمنع القدر … اقولك اوعدك انى اخد بالى جدا من نفسي
هند / وعد بجد ؟
مختار / وعد بجد
هند تحضنه و تحط راسها فى حضنه
مختار / اقولك حاجه يا هند
هند تبصله
مختار / على قد ما حلمت كتير باللحظه اللى تبقي فيها فى حضنى بس قسما بالله الحقيقه غير خالص انا كمان مستحيل اجازف انى اخسر الحضن ده
هند تبتسم
هند / انت الفضائين بدلوك صح
مختار / هههههههههههههههههههههه هو انا مهما اعمل مش بيعجب خالص كدا
هند / والله عاجب فى اى حاجه و كل حاجه
مختار / طب ينفع نبقي صاحيين احنا الاتنين و نقضيها رغى كدا
هند تدفس وشها فى حضنه
هند / انا نمت خلاص
مختار / جزمه
هند / هههههههههههههههههههههه
مختار / دا انا امى طلعت دعيالي يا ولاد
……………………….
فى السرايا
انتصار بتتقلب فى السرير تلاقى ناصر صاحى و سرحان تقوم تقعد
انتصار / مالك يا خويا فى حاجه و لا ايه
ناصر / لا ما فيش ما تشغليش بالك انتى
انتصار / عليا برده امال انت ايه اللى مصحيك و قالق منامك
ناصر / هو حد فيكوا زعل البت سماح و لا قالها كلمه تضايقها
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
