رواية البر التاني الفصل الثاني 2 بقلم لولو محمد
رواية البر التاني الجزء الثاني
رواية البر التاني البارت الثاني
رواية البر التاني الحلقة الثانية
فى بنزينه على طريق فوسط صحرا
عربيات الاجانب عربيه فخمه و اربع عربيات بوكس كبيره ورا بعض تقف تمون و عربيه مختار مرقباهم من بعيد و معاه تلت شباب
شاب 1/ مش هنلاقى فرصه احسن من دى
مختار يهز راسه الاربعه يطلعوا مسدساتهم و يشدوا الاجزاء و ينزلوا يتسحبوا و يحوطو البنزينه كل واحد فى اتجاه و مختار يتسحب يقرب من العربيات و يحط فوق العجل قنابل صغيره اول عربيه التانيه التالته واحد يحط مسدس على دماغه مختار يقف و يرفع ايده لفوق
راجل / مووف ( اتحرك )
مختار يمشى قدامه و يتحرك خطوه اتنين تلاته
الراجل / لوك وات اى هاف فاوند ( بصوا لقيت ايه )
الرجاله كلهم ينزلوا من العربيات و الراجل الكبير ينزل
الراجل الكبير / معقول اعجابك بالعربيه جابك ورايا لحد هنا
مختار / نقطه ضعفى
الراجل يخبطه بالمسدس فى ضهره مختار يقع فى الارض على ركبه
الراجل الكبير / ما كانش المفروض تيجي ورانا لوحدك
مختار يرفع عينه و يبصله و يبتسم
مختار / انا مش لوحدى
العربيه الغاليه و اول عربيه بوكس يمشوا الرجاله تتلخم و تضرب نار على العربيات مختار يقوم و يطلع مسدسه و يحط فى راس الراجل الكبير
مختار / بوت ال يور جانز داون اور اى ويل شوت ( حطوا اسلحتكوا بدل ما هضرب نار )
الراجل الكبير / يو ار اديد مان بوى ( انت ميت يا ولد )
مختار / كلنا هنموت يا خواجه اتحرك
عربيه مختار تتحرك بسرعه بين الرجاله تخبط واحد فيهم و تقف قدام مختار بالظبط
مختار / اركب يا خواجه اركب
مختار يركب الراجل و يركب جنبه و يقفل الباب و المسدس لسه على الراجل الكبير الشاب يسوق العربيه و يطير مختار يطلع المفجر من جيبه و هو مبتسم و يدوس عليه العربيات تنفجر و البنزينه كلها تنفجر
مختار / منور يا خواجه
الشاب / هههههههههههههههههههههههههههه تفتكر الناس اللى فى البنزينه حد منهم اتصاب
مختار / كلهم جريو اول ما الحلوف بتاعهم طلع مسدسه شوفتهم كلهم
الشاب / منور يا خواجه
مختار / على البيت يا ابنى خلينا نضايف الباشا الكبير
الشاب يسوق و الراجل بيبص لمختار بغل
……………………………
فى السرايا
عباده يركن العربيه و هو متعصب جدا و يجرى على المخزن يلاقى ناصر واقف وسط الرجاله و فى صناديق مقلوبه و فى مسدسات لعبه و سيوف بتنور و لعب بلستك ماليه الارض
ناصر / بيقولوا انت اللى استلمت السلاح يا عباده
عباده / يفتح فى الصناديق و يطلع من اللى جواها يلاقيها كلها كدا اول صندوق التانى التالت
ناصر / ما تتعبش نفسك كل الصناديق اللى فتشناها كدا
عباده يبص لناصر و هو بيغلى
عباده / انا مش هرحمهم انا يضحكوا عليا ولاد ال
ناصر / و هتجيبهم منين يا عباده هتسافرلهم هتعدى البحر عوم و لا طاير
عباده / ان شالله اخدها كعابى هجيبهم هجيبهم مش عباده الزيني اللى ياخد على قفاه هجيبهوملك مربطين و هجيبلك الفلوس كمان
ناصر / ما تتعبش نفسك مختار زمانه على وصول قام بالواجب و زياده
عباده / مختار
ناصر يسيبه و يمشى و عباده يبص للرجاله
راجل / سالم اتصل و طمنا جايين و معاهم الفلوس و الباشا بتاعهم و عربيه الباشا بتاعهم
عباده / مختار باشا طبعا لازم مختار باشا امال ايه
صوت عربيات بره عباده يطلع بره يلاقى مختار بينزل من العربيه
عباده / اهلا بالباشا اهلا بالباشا اللى انقذنا كلنا
مختار / كنت جاى اقولك انت اللى قعدت تتمالس عليا
عباده / هى اكمنها جت معاك سليمه هتنفخ ريشك لا فوق الدنيا هنا ما بتمشيش بالطريقه دى
ناصر / عباده
عباده يبص
ناصر / حطوه فى المخزن و حصلونى انتوا الاتنين جوه فى كلام كتير عاوزين نقوله
عباده / تحت امرك يا كبير
عباده يبص لمختار و الاتنين مش طايقين بعض و التلاته يدخلوا جوه و الرجاله ياخدوا الراجل و يحطوه فى المخزن
………………………………..
فى شقه هند
محمود قاعد مع محمد فى الصاله و فى جنبه على الارض شكاره رز و شكاره مكرونه و سباطه موز و قفص تفاح
محمود / يا جدع دا انا جاى اصالحك فى بيتك عاوز ايه تانى
محمد / حصل خير يا محمود ما تكبرش الموضوع
محمود / لا بالله عليك تقولى ايه اللى يرضيك .. يا محمد دا انت اخويا الصغير دا انا امى الله يرحمها موصيانى عليك لو ناقصك حاجه قولى
محمد / و الله ما ناقصني لو ناقص هقول مش هتكسف منك يعني
محمود / امال مالك فى ايه عبد الله تاعبك فى المزاكره يا سيدى وظيفته موجوده معايا الواد يوسف مش عاوز يمسك المحلات بيقول نفسه يفتح مشروع كبير و اهو يشارك هند
محمد يبص الناحيه التانيه
محمود / ااااه يبقي انت زعلان من يوسف طب بالله عليك بالله عليك فى حد بيحبك زى يوسف طب لعلمك بقي هو اللى باعتنى اصله ما يقدر على زعلك صحانى من النجمه عشان اجى اراضيك نزلنا صلينا الفجر انا و هو و طلعنا على السوق جبنا الحاجه و وصلنى بنفسه لحد هنا
محمد / يوسف دا ابني زيه زى هند و عبد الله و ياسمينا
محمود / امال بقي اتعصب شويه فيها ايه ما كلنا بنتعصب ما انا ياما اتعصبت عليك و انت اتعصبت عليا ما حصلش حاجه يعني خسرنا بعض
محمد / و لا عمرنا هنخسر بعض
محمود / و لا عمر يوسف و هند ما هيخسروا بعض ان اتخانقوا النهرده بكره يتصالحوا و هما دلوقت لسه شباب و طايشين بكره يكبروا و يعقلوا و نفتكر الايام دى و نضحك
محمد / ان شاء الله
محمود / يعني مش زعلان
محمد / يا محمود قولتلك مش زعلان احلفلك يعني طب والله ما زعلان
محمود / الحمد لله صالحنا واحد فاضل القماصه التانيه هى فين
محمد / مع امها و اخواتها فى اسكندريه
محمود / الله و سبتهم يروحوا لوحديهم اما انت امرك غريب يا محمد
محمد / و هما صغيرين يعني مهى مهم معاهم
محمود / لا يا محمد برده الشوارع مليانه بلطجيه و برشمجيه تسيبهم يتبهدوا لوحدهم فى المواصلات
محمد / مهو عبد الله معاهم
محمود / و هو عبد الله لوحده هيعمل ايه هيشيل الشنط و لا هيحوط على امه و لا على اخواته ما تنساش انه صغير برده
محمد / اهم زمانهم جايين
محمود / باستغرب على برودك يا اخى حقيقي باستغرب عليك لا طبعا انا هتصل بيوسف يروح يجيبهم بعربيته انا مش هبقى مرتاح و هما راكبين قطر و لا حتى مواصلات ليه يعنى
محمد يبص لمحمود و محمود طلع موبايله و بيتصل بيوسف
…………………..
فى السرايا
مختار / هو ده اللى حصل
ناصر يبص فى الارض و يبصلهم
ناصر / من يوم ما وعينا على الدنيا و هما بيعلمونا نحط ايدنا فى ايد بعض من يوم ما وعينا على الدنيا و هما بيعلمونا انا و اخويا على ابن عمى و انا و ابن عمى على الغريب
عباده / كان عارف ان الصناديق فاضيه و سكت عشان ينقذها و يكسب بنط على قفايا
ناصر يقف و يزعق
ناصر / و انت استلمت شحنه مضروبه ايه يا عباده جرا ايه يا عباده ايه نسيت وزن السلاح مش عارف تفرق بين صندوق معبي حديد و صندوق معبي بلاستيك
عباده يبص على مختار
عباده / انا ما شيلتش و لا صندوق فيهم كنت بعد الصناديق
ناصر / الطلعه دى مين رتبها
عباده / انا
ناصر / و الرجاله اللى معاك مين نقاهم مش انت برده
عباده / فهمت
ناصر / لو ما كانش مختار طلع معاكوا كان زمانا بندور على الحيوان اللى جوه ده دلوقت و بنتحسر على الفلوس اللى راحت و قبليها هبيتنا
عباده / كتر خيره مختار انقذ هيبه الزيني
ناصر / كتر خيره غلط برده و ما ساباكش تتهزق لوحدك
ناصر يروح ناحيه الباب
ناصر / انا ما نمتش من امبارح عن اذنكوا
ناصر يفتح الباب يلاقي انتصار واقفه على الباب يقفل الباب وراه
انتصار / قفلت الباب ليه خليني ادخل اطمن عليه
ناصر / سبيهم يتكلموا مع بعض شويه و هو هيطلعلك
انتصار تهز راسها و تمشي و ترجع تبص لناصر يبتسم و يطلع فوق تطلع وراه و كل شويه تبص على الباب
…………………………….
فى المكتب
عباده / يعني الحركات اللى عملتها حوالين العربيه دى
مختار / كنت بحط جهاز تتبع و لما حضنت الراجل كنت بحط واحد تاني عليه خفت يبدلوا العربيات في اى حته
عباده / كان ممكن تقولى
مختار / كنت هتعمل ايه هنبوظ العمليه و نفتح النار على بعض و نموت منهم و يموتوا منا
عباده / على الاقل كنت تقولنا كنا جينا معاك بدل ما تعمل فدائي و تروح لوحدك
مختار / ما كنتش لوحدى
عباده / كان ممكن تبوظ منك و ساعتها ذنب الرجاله دول فى رقبتك
مختار / انا اللى كنت فوش المدفع هما كانوا فى الامان
عباده / على العموم مش هقدر اقولك غير عفارم
مختار / هستاذن عشان اطمن على خالتى انتصار
عباده / واجب برده
مختار يمشي و عباده يبص عليه
……………………..
فى عربيه يوسف على الطريق
يوسف سايق و جنبه عبد الله و ورا شيرى و هند و بينهم ياسمينا
يوسف / لا يا ماما شيرى عمى محمد عندنا فى البيت اصل بابا عامل عزومه عشان يراضيه قدام العيله كلها و الناس كلها عندنا فى البيت
عبد الله / انتوا بتكبروا المواضيع ليه
يوسف / يا سيدى و لا تكبير و لا تصغير احنا فى الاول والاخر اهل و ياما بين الاهل بيحصل و لا ايه يا هند
هند تبص على يوسف فى المرايه باصصلها تبص تاني من الشباك
شيرى / معاك حق يا يوسف احنا فى الاول و الاخر اهل
يوسف / على العموم انا كدا كدا هراضيكي مع انى والله ما كنت اقصد ازعلك
هند / حصل خير
يوسف / صافيه لبن يعني
هند / خلاص يا يوسف الله
يوسف يبص لعبد الله بضيق و يسوق
هند / يوسف
يوسف يبصلها فى المرايه و يبتسم
يوسف / نعم
هند / انت هتعمل ايه مع مختار
يوسف / هعمل ايه فى ايه يعني
هند / انت روحت اتخانقت معاه و هو ملوش دعوه بحاجه
يوسف / هو اللى ضربني على فكره
هند / كان بيدافع عنى
يوسف / و يدافع عنك بمناسبه ايه و يدافع عنك من مين منى
هند / و انت ما كنتش شايف منظرك
يوسف / و اشمعن هو اللى اتحمقلك يعني
هند / مش انت اللى روحت اتخانقت معاه ورا انا سمعاك و انت بتقوله انت بتستهبل
يوسف / ما لكيش دعوه بيه و خلاص
هند / و انت كمان ما لكش دعوه بيه مش انت عاوز الموضوع يتقفل يبقي تقفله خالص
يوسف يبصلها فى المرايه باصه من الشباك
يوسف/ موافق
هند تبصله عنيهم تيجي فى بعض
يوسف / ما دام ده يرضيكي موافق و لو هيبسطك انى اروح اعتزرله و ابوس رجله كمان
هند / انا ما طلبتش منك كدا انا بس مش عوزاك تتخانق معاه تاني الناس فى الكليه مش هيسكتوا و انا اللى هبقي لبانه فى بقهم
يوسف / طب يبقي كلب يجيب اسمك على لسانه و انا اخلعهوله من زوره
هند / يووووه بقي انا بقول ايه و هو بيقول ايه
شيري / خلاص يا هند ما هو قالك اهو هيعمل اللى انتى عوزاه اهو
هند تبص لمامتها و ترجع تبص من الشباك
………………….
فى السرايا
مختار بيرتب شنطته و مريم بتساعده
مريم / ما لحقتش اشبع منك يا عمى
مختار / انا مش هاجى الاسبوع الجاى
مريم / ايه !!!
مختار / انتوا اللى هتيجوا ناصر نازل مصر اتفقت معاه هيجيبك انتى و خالتى
مريم / بجد يا عمى
مختار / هاخدك افسحك و اجبلك كل اللى انتى عوزاه
مريم / و سماح مش هتيجي
مختار / اللى عاوز يجي ينور
مريم / كدا الكل هيشبط و فى الاخر ابويا هيقول مش واخد حد معايا
مختار / لا ما تخافيش كدا كدا انتى و خالتى جايين هيبقي فى مكان و لا اتنين فى العربيه المهم وقتها تكونى مخلصه اللى وراكى ما تتحججيش بيا و انى عطلتك يمين بالله اخاصمك
مريم / لا والله ابدا دا حتى اسال امى انا م باجلش حاجه خالص
الباب يخبط مريم تفتح تلاقي انتصار
انتصار / عملتلك زواده تستاهل بقك
مختار / تسلم ايدك
انتصار / بقولك ايه يا مختار لو خلصت كلمنى ابعتلك تانى
مختار / ههههههههههههه دى هتخلص النهرده يا خالتى دا انا سايب وحوش فى مصر بيسنوا سنانهم مستنين فطيرك و بطك
انتصار / طب كنت قولتلى كنت زودت
مختار / و اشيل ازاى انا كدا حلو اوى
انتصار / طب انا هحاول اشوف حد نازل مصر و ابعتلك مهو مش كل ما اكلمك تقولى فول و جبنه و بيض
مختار / اعمل ايه ما انا ماليش فى اكل الشارع
مريم / طب بيقولوا مصر فيها محلات اكل حلو اوى
مختار / مفيش احلى من اكل البيت نضيف و نفسه حلو مش اى كلام زى بتاع بره بهارات و طعوم و شقلب و اقلب
انتصار / ربنا يكملك بعقلك عقبال كل اللى فى بالى
مختار يقفل الشنطه و يحطها فى الارض
انتصار / لحقت تخلص
مختار / الطريق طويل و عندى كليه الصبح
انتصار / سوق على مهلك و خد بالك من الطريق و تشغل القران جنبك
مختار / حاضر
……………..
فى شقه محمود
العيله كلها متجمعه و الكل بيضحك و هند قاعده فى النص مقفوله
حمدى / هما يخلصوا امتحانات من هنا و نطلع كلنا على اسكندريه من هنا
شاب / و هى الشقه هتساعينا كلنا
يوسف / يا سيدى نبقي ناجر شقه و لا اتنين جنبها هنغلب يعني
بنت / و احنا مش مكتوب لنا نروح غير اسكندريه مالها شرم و لا الغردقه يعني
الشاب / انا مش خدتك الساحل
البنت / دا كان فى اسبوع العسل اليتيم
محمود / مهى الاماكن دى معموله للعرسان و بس
يوسف / و غير العرسان كمان طب ايه رايكوا مصالحه منى لدودو هى اللى هتنقي المصيف السنادى للعيله كلها
هند تبص ليوسف
ام يوسف / انا لو منك يا دودو ادلع و انقي حته عليها القيمه
يوسف / هى بس تشاور
البنت / نقيلنا بقي حته بره مصر اما نشوف هيصدق و لا ايه
يوسف / طب جربي كدا و تشوفي
هند / اى حته مش فارقه المهم بحر و هوا و خلاص
حمدى / يا بت الفرصه بتيجي للواحد مره واحده ما تضيعيهاش اطلبي بقلب جامد
هند / المصيف فى اللمه يا عمى مش المكان
محمود / ربنا يكملك بعقلك يا ست البنات والله جبتي المفيد و لا ايه يا محمد
محمد / ربنا يديم لمتنا يا اخويا
الكل / امين
هند توشوش امها شيرى تهز راسها بحرج
شيرى / ما تاخذوناش يا جماعه بس العيال عندهم كليه الصبح و عبد الله وراه دروس
محمود / ملحقناش نقعد مع بعض يا ام عبد الله
محمد / مره تانيه نيجي بدرى و نقضي اليوم من اوله ما تنساش انهم كانوا على سفر
يوسف / انا هوصلكوا
محمود / خلاص اللى تشوفوه
الكل يقوم و يسلموا على بعض و يمشوا
…………………
فى السرايا
سماح و عباده و راجل كبير فى السن و فاطمه قاعدين فى اوضه كبيره قدام تليفزيون
فاطمه / ياختى و انتى ان شاء الله هتفضلى قاعده كدا قدام التليفزيون
سماح / فى ايه يا اما الحق عليا انى بتفرج معاكوا على الفيلم يعني
فاطمه / لا يا ختى كتر خيرك بس هو انتى مش وراكى مزاكره برده و لا ايه
سماح / بريح شويه ما فيهاش حاجه يعني دا حياله فيلم
الراجل / سبيها تكمل الفيلم يا فاطمه قرب يخلص
فاطمه / يا خويا عوزاها تفلح و ما تخيبش خيبه اخوها
عباده يبص لامه
فاطمه / و لا هستنى اما مريم بنت انتصار تجيب احسن منها كتير عليا يا ربي حد فى عيالي ينصفني
عباده / و هو انا ما نصفتكيش يا اما
فاطمه / طول النهار تتكلم عن السلاح اشى فيه ليزر و اشي بيتتبع الحراره و اشي بالبصمه ما عرفتش يا خويا الحاجات اللى بتحدد الاماكن ليه
الراجل / ما لكيش دعوه بالحاجات دى يا فاطمه
فاطمه / يا خويا الحق عليا ابنك بقي مالسه السرايا و البلد كلها عباده الزناتى معرفش يفرق بين الحديد و البلاستيك و مختار ابن المدارس علم عليه
عباده / يووووه بقي
عباده يقوم و هو متعصب سماح تبصلهم و تقوم
سماح / انا هقوم ازاكر
سماح تمشي و الراجل يتعدل فى قعدته
الراجل / جرا ايه فاطمه هو احنا مش هنخلص من الحوار ده و لا ايه
فاطمه تقوم تشمر الجلبيه و تقعد على السرير و تبين رجليها و تتكلم بمياصه و دلع
فاطمه / يا خويا كنت بوزعهم قاعدين الاتنين و كاتمين على نفسنا
الراجل يبصلها و يلم نفسه
الراجل / بس مش بالطريقه دى يعنى
فاطمه / يا خويا الغايه تبرر الوسيله و لا انا مش وحشاك تحب اناديهملك
الراجل / لا مش القصد يعنى
فاطمه / انت قاعد بعيد كدا ليه
فاطمه تمسح على السرير مكان الراجل يقوم يقعد جنبها
فاطمه / انا ما يهمنيش فى الدنيا الا رضاك عليا انت ابويا و اخويا و جوزى و حبيبي عوزه عيالك احسن عيال ان كنت بشد عليهم فدا عشان هما ولاد شاكر الزينى مش عاوزه حد يظلمهم زى ما عمران اخوك ظلمك و سلم الرياسه لناصر ابنه مش عاوزه ناصر يسلمها لابنه مع انه مشيل الشغل كله لعبده
شاكر / مختار مش ابن ناصر مختار ابن عمران اخويا
فاطمه/ قول الكلام ده لانتصار دى بتعامله احسن من جوزها ولما تكلمها تقولك ابنى البكرى
شاكر / كانت عروسه مسبعتش لما مرات اخويا ماتت و هى بتولده و انتصار اللى ربته كانه ابنها
فاطمه / ما انت لو كنت اتجوزتنى بدرى كنت راعيته لكن اعمل ايه
شاكر / بدرى عن كدا ايه دا انا متجوزك بنت اربعتاشر
فاطمه / صغيره بس فايره و ما فاتش تسع تشهر و جبتلك ابنك البكرى اللى مراتك الاولانيه معرفتش تجيبهولك فى عشرين سنه جواز
شاكر / تعيشي و تعيش البطن اللى جابت
فاطمه / يخليك ليا يا راجلى و سندى فى الدنيا ديه
فاطمه تعدى ايدها على خد شاكر بحنيه و ابتسامه دلع
…………………….
قدام بيت مختار
مختار بينزل الحاجه من العربيه يوسف يركن العربيه و هند و اهلها ينزلوا منها و مختار متابعهم من تحت لتحت
يوسف / ازيك يا مختار حمد الله على السلامه
مختار يبصله و يبتسم
مختار / الله يسلمك
محمد / نساعدك يا ابني تطلع الحاجه
مختار / تسلم يا حج ابو عبد الله ملوش لزوم اتعبك
عبد الله / ما فيهاش تعب و لا حاجه عنك
عبد الله يشيل مع مختار و يوسف يبص لهند يلاقيها مركزه معاه يبتسملها و يروح يشيل مع مختار
يوسف / عنك يا مختار اساعدك
مختار / ملوش لزمه تعبك
شيرى تشد هند و يطلعوا
شيري / يلا يا هند
هند و شيرى يطلعوا
يوسف / هند حكتلى على اللى حصل حقك عليا انا اتسرعت ما كنتش اعرف ان هى اللى طلبت منك توصلها انت صعيدى و دمك حامى لو خطيبتك حد قالك انها نازله من عربيه واحد غريب هتعمل ايه
مختار / حصل خير
يوسف / انا و هند مش اول مره نتخانق و لا اخر مره انت عارف البنات و دلعهم و لو ما ادلعتش على حبيبها هتدلع على مين يعني
مختار / ربنا يخليكوا لبعض عن اذنك عشان اطلع الحاجه
يوسف / يعنى ما انتش زعلان منى
مختار / على الله انت اللى ما تكونش زعلان
يوسف / تعال اما اطلع معاك الحاجه
يوسف يشيل مع مختار و مختار يقفل العربيه و يشيل اخر شنطه و يطلع وراه يلاقي عبد الله واقف مستنيه جنب الحاجه
مختار / تعبتك
عبد الله / تعبك راحه
يوسف / امال هند فين اسلم عليها قبل ما امشي
عبد الله / فى الحمام خدت غيار و هى داخله
يوسف / يبقي مش هتخرج فى سنتها ههههههههههههههه
يوسف يبص على مختار يلاقيه بيفتح الشقه و يدخل الحاجه و مش بيبصلهم
يوسف / قولها هعدى عليها الصبح اوصلها … سلام يا مختار
مختار / مع السلامه
مختار يدخل اخر شنطه و يبص لعبد الله لسه واقف عند الباب باصصله
عبد الله / حقك عليا دخلناك فى حوار ملكش دعوه بيه
مختار / ربنا يهدى سرهم
عبد الله / عن اذنك
عبد الله يدخل و يقفل الباب مختار يدخل و يقفل الباب و يروح يحط الحاجه من المطبخ و يطلع صينيه و يطلع فطيره و جوز حمام و يحطهم عليها و يروح يضرب الجرس على شقه محمد و يقف بعيد هند تفتح مختار يستغرب
مختار / الحج ابو عبد الله
هند تهز راسها و تدخل و مختار مستني على الباب
صوت هند / بابا
صوت محمد / مين يا هند
صوت هند / مختار
محمد يقوم يجرى يطلع
محمد / خير يا ابني اتفضل
مختار / اتفضل
محمد / ايه ده يا مختار يا ابني دا واجب علينا احنا
مختار / مفيش بينا الكلام ده يا عمى الف هنا
محمد / خليهم يا ابني حطهم فى الفريزر و لا التلاجه انت لوحدك
مختار / معايا والله يا عمى الف هنا عشان يبقي عيش و ملح اتفضل دا فلاحى و صابح مش هتلاقيه هنا
محمد يبتسم و ياخد الصينيه
محمد / تسلم الايادى
مختار / الف هنا عن اذنك
محمد / حقك عليا يا مختار
مختار / فى ايه بس
محمد / يعني ان كان يوسف عمل حاجه كدا و لا قالك كلمه كدا امسحها فيا انا
مختار / ما حصلش حاجه لكل ده يا عمى حقكوا عليا انا ان كنت ادخلت بينهم و لا اتسببت فى ان المشكله تكبر انا و الله ما كنت اعرف انهم مخطوبين و لا كانت نيتي اى حاجه
محمد / مخطوبين !!! هند مش مخطوبه يوسف ابن عمها و بيوصلها يعني من باب القرابه مش اكتر هو اه عصبي شويه مش هنكر بس اهو صحبك على عيبه و لا ايه انت مين قالك انهم مخطوبين و الكلام ده
مختار / لا ما حدش انا اللى فهمت غلط حقك عليا
محمد / انا عارف ان فى الصعيد الدنيا مش زى مصر و ما عندكوش الحاجات دى … سامحنى يا ابني موقفك على السلم و انت راجع من السفر تعبان اتفضل تعال اشرب شاى
مختار / مره تانيه يادوب اعين باقي الاكل و انام شويه قبل الكليه الصبح
محمد / تمام ربنا يعينك و لو احتجت اى حاجه فى اى وقت ما تتكسفش انا زى ابوك هنا
مختار / يدوم العز ان شاء الله
محمد يبتسم و مختار يدخل شقته
………………….
فى شقه يوسف
يوسف نايم على السرير و بيكلم وسام فى التليفون
وسام / ما كنتش متخيله انك هتصالحها بالسرعه دى
يوسف / انا قولتلك الموضوع مش مستاهل هو مختار اللى كبره يعني
وسام / و ناوى تعملها المفاجاه امتى بقي
يوسف / يومين تلاته كدا لما الحاجه تخلص فى المطبعه
وسام / ربنا يهنيكوا و يسعدكوا
يوسف / على فكره انتى اجدع واحده فى الكليه دى
وسام / شكرا قولى بقي كلمت عموا فى الحوار اياه
يوسف / طبعا فى يوميها ما انا قولتلك مش هيرفض دا حتى ادانى الفلوس اللى طلبتها و جه معايا النهرده صالحناهم
وسام / يعني تغلط و انت اللى تصالحها
يوسف / انا كبرت الموضوع برده ما كانش المفروض اتعصب فى المدرج و احرجها قدام الدفعه كدا
وسام / طب ما هى احرجتك قدامهم لما ركبت مع اللى اسمه مختار ده عملت معاه ايه صحيح
يوسف / الموضوع خلص و قولتله انه كان سوء تفاهم و اتراضينا
وسام / بعد اللى عمله معاك هتسامحه كدا
يوسف / مش هسامحه انا بس ههدى الجو الفتره دى لحد ما اخلص من حوار الخطوبه
وسام / اه فهمت هتعدى عليها برده تجيبها
يوسف / طبعا امال اسيبها تتبهدل فى المواصلات و لا حد يعاكسها و لا يضايقها
وسام / حقيقي يا بختها بيك بس اللى تقدر بقي
يوسف / انا مش ببقي مستني حاجه من اللى بعمله
وسام / عارفه قد ايه انك راجل و شهم بس دا حقك ما ينفعش تتعب عشانها بالشكل ده و هى تقابلك بجحود و مشاكل
يوسف / بكره لما يتقفل علينا باب واحد هتعوضني عن كل ده كسوفها اللى بتحاول تداريه بالحركات الهبله دى هتبطله و مش هيبقي فى بينا اى حواجز
وسام / ربنا يعملك اللى فيه الخير
يوسف / انا و انتى يا رب
……………………..
فى شقه هند
الكل نايم و هى فى اوضتها صاحيه و نايمه على جنبها و بتعيط و ياسمينا نايمه جنبها شيرى تفتح الباب و تدخل هند تمسح دموعها بسرعه
شيري / انتى لسه صاحيه
هند / هنام اهو
شيري تقعد جنب هند و تاخدها فى حضنها
هند / انا مش عاوزه اروح الكليه تانى
شيري / و اخرتها لنفرض انك سبتي الكليه ما هو ابن عمك هتسيبي البيت يعني
هند / بكره كل الكليه هتتكلم عليا و انا داخله مع يوسف
شيري / انتوا ولاد عم و اللى بيحصل معاكوا دا طبيعى
هند تبصلها و تسكت
شيرى / قوليلى اعمل ايه و انا اعمله
هند / و لا اى حاجه يا ماما عادى خدت على كدا خلاص
شيرى تبوس راسها و تقوم توصل لباب الاوضه و تبص عليها هند تبتسم شيرى تقفل الباب و تمشي هند تكمل عياط و شيرى واقفه على الباب و ماسكه الاوكره و هى زعلانه تبص جنبها تلاقي عبد الله واقف عند باب اوضته
عبد الله / هو ايه حكايه خطوبه هند و يوسف دى يا ماما
شيرى / ما فيش الكلام ده
عبد الله / كويس عشان انا مستعد استحمل اى حاجه فى الدنيا غير انى ادفن اختى بالحياه مع الحيوان ده
شيرى / تصبح على خير يا عبد الله يا تنام يا تقعد تزاكر
شيرى تسيب عبد الله و تدخل اوضتها و تقفل الباب عبد الله يفتح الباب على هند تعمل نايمه يتنهد و يقفل الباب و يروح اوضته
………………………
فى شقه مختار
مختار نايم على السرير عمال يتقلب يقوم يقعد و بعدين ينزل ف الارض و يعمل بوش ابس و هو باين عليه الضيق
تليفونه يرن يقوم يبص يلاقي عباده يقعد على السرير و يرد
مختار / السلام عليكم
عباده / و عليكم السلام
مختار / خير يا عباده فى حاجه حصلت و لا ايه
عباده / جماعه الراجل كلمت الكبير و اتفقت يدفعوا فديته و التسليم بكره الفجر
مختار / تمام
عباده / انا عارف انك لسه واصل و انك هتنشغل فى المدرسه بس قولت اقولك برضه يمكن
مختار / انت معاك حق انا مش هقدر احضر العمليه دى بس انا واثق انك هتعمل الواجب و زياده
عباده / صحيح خد بالك من نفسك انت برده لوحدك فى مصر و الراجل ان كان هيحط حد فى دماغه هيحطك انت
مختار / يانس و ينور
عباده / دكر يا ابن الزيني هسيبك تنام و لو فى جديد هكلمك
مختار / تمام … سلام
مختار يقفل التليفون و يرميه جنبه على السرير و يقوم يطلع البلكونه من غير ما يايد النور و يقف يمسك فى السور هند تدخل شايله طبق غسيل تحطه و لسه بترفع راسها تشوف خيال مختار تتخض
هند / بسم الله الحفيظ
مختار يقيد النور
هند / سورى ما شوفتكش
هند تنشر و مختار واقف بيبص قدامه تبص عليه و تكمل نشير و تطلع غلبها فى الهدوم
هند / هو انا ممكن اسالك سؤال
مختار / فى المنهج ؟
هند تبصله و تبتسم / لا
مختار / اسالي
هند / انت ليه ضربت يوسف فى المدرج
مختار / افتكرته بيضايقك
هند / بس انا ما اخصكش تدافع عنى
مختار / مش فاهم قصدك هو الراجل ما يدافعش غير عن اللى يخصه و بس يعني لو شوفت ست بتصرخ فى الشارع و تقول حرامى اعمل مش شايف و اقول و انا مالى
هند / و كانك اول مره تنزل مصر
مختار / هو ابوكى و اخوكى لو شافوا واحده فى موقف اى كان هيسيبوها و يمشوا
هند / ما اعرفش بس اكيد لا يعني بس مش ده قصدى انا اقصد ان الواحد مش لازم يدخل نفسه فى مشاكل ما تخصوش
مختار / من رأى منكم منكرا فليغيره
هند ترمى القميص اللى فى ايدها فى الطبق و تقف هى و مختار وشهم فى وش بعض كل واحد فى بلكونته
هند / انت فاكر ان يوسف كان هيسكت على ضربك ليه ما كانش هيهدى الا لما يكسحك انت هنا لوحدك لكن هو وسط اهله و صحابه انا لما طلبت توصلني طلبت تنزلنى بعيد عشان ما حدش يشوفك و احطك فى مشكله تقوم انت تروح تضربه
مختار / و انتى بقي اللى حوشتيه عنى
هند / مش انا دا بابا
مختار / يشكر جميله على راسي من فوق
هند تمد ايدها و تجيب القميص و تنطره بعنف و تنشر بعصبيه واضحه و مختار متابعها
مختار / هو ده بتاع عمى و لا بتاع عبد الله
هند تبصله
مختار / لو ضرورى يعنى تمزقي قميص عندى واحد جوه ما بحبوش خديه امزقيه
هند / و شايله على قلبك من البلد لحد هنا و انت ما بتحبوش
مختار / اصله مش على زوقي كان جايلى هديه و مريم كل ما تيجي تقفل معايا الشنطه تحطه و انا ما بحبش ازعلها
هند / مريم دى اختك
مختار / لا بنت اخويا
هند / عندها قد ايه
مختار / ستاشر
هند / دى عروسه ما شاء الله
مختار / اه استني
مختار يدخل ثوانى و هند مستنياه يطلع و هو شايل محفظه يطلع منها صوره بنت جميله بالحجاب اربعه فى سته
هند / مش شيفاها كويس من عندى بس اكيد حلوه بس على كدا اخوك اكبر منك بكتير
مختار / تلاته و عشرين سنه
هند / اخوك عنده تلاته و عشرين سنه و مخلف بنت ستاشر سنه
مختار / دا باماره ايه يعني خلفها و هو سبع سنين
هند / ههههههههههههههههههه ايه الغباء ده صحيح هههههههههههههههه
مختار / بيني و بينه تلاته و عشرين سنه هو اللى مربيني مريم دى اصغر بناته عنده اتنين كمان اكبر منها متجوزين و مخلفين
هند / ما شاء الله انا هبقي كدا مع ياسمينا بس فرق السن اصغر شويه
مختار / ربنا يباركلكوا فيها
هند / امين
هند تنشر و هى اهدى
هند / زمان جدى باع حته ارض و قرر يعمل مشروع بس زمان برده كانوا بيقولوا ان فاتك الميرى اتمرغ فى ترابه كان الناس بتحب شغل الحكومه بابا و جدى و عمامى كلهم موظفين كل واحد فى مكان ما عدا عموا محمود لما خلص الكليه اشتغل محاسب فى محل هدوم بتاع نسايبه المهم اقنع جدوا انه يعملهم المشروع و ان الملابس و التجاره بتكسب و فعلا اتفقوا انهم كلهم يتشاركوا عشان يبدؤا بمكان كبير مليان بضاعه بس للاسف القانون ما كانش يسمح فالمشروع اتكتب باسم عمى محمود
مختار / عمك محمود ده ابو يوسف صح
هند / ايوه
مختار / حط ايده على الفلوس
هند / لا لا لا بالعكس دا بيدينا اكتر من حقنا بكتير كمان عمى محمود مش حرامى و لا بيقبل على نفسه و لا بيته قرش حرام
مختار / اسف
هند / عمى وقتها كتب وصل امانه لكل واحد من اخواته بنصيبهم فى الفلوس و كل واحد كان ملهى فى شغله و يجوا اول الشهر عمى يحاسبهم و يديهم نصيبهم و عمره ما اتاخر على حد فينا فى حاجه
مختار / ربنا يباركله
هند / هو بس فيه عيب واحد بس انه جاب يوسف الصغير على خمس بنات دلعه اوى و حبه اوى اوى حتى مرات عمى شافت فى يوسف انه نصفها وقتها الناس برضه ما كانتش بتحب خلفه البنات و ما كانش فى الوعى انها من الراجل فلما يوسف جه كانه رد لمرات عمى قيمتها فى العيله انت فاهم قصدى
مختار يهز راسه
هند / يوسف يشاور بس كفايا انه يشاور و اى حاجه تانيه مش مهم الكل بيتمنى ليوسف الرضا عشا يضمنوا رضا عمى و عمى مستعد يخسر الكل عشان خاطر يوسف
مختار / و يوسف شاور عليكي مش كدا اسف انا مش من حقى ادخل انا …
هند / مفيش كلام رسمي هو مفيش كلام اصلا هو الموضوع كله انه … زى ما انت شوفت كدا طول الوقت اللبسي دا ما تلبسيش ده كلمى دى ما تكلميش دى بيوديني و يجبني من حقه حتى يقطع خروجتى مع صحباتي و يقولى دلوقت تروحى بالامر المباشر و الا ..
هند تتنهد
هند / بيتحكم حتى فى النفس اللى بتنفسه امتى اصحي امتى انام كل حاجه لما اتخنقت
مختار / و اهلك ابوكى و امك
هند / عجزه و ان يوم ابويا اتجرا و خدته الجلاله و وقف فى وش عمى تانى يوم هيسحب كل ده بشويه خزين انا اصلا مش عارفه انا بقولك الكلام ده ليه
مختار / لو جه يوم و طلبك رسمي
هند / كل بنات العيله هتحسدني هبقي ست الكل كلمتى هتمشي على العيله باللى فيها بما فيهم عمى و مراته هقعد و احط رجلى فى وش الطخين و بعدها هقطع شراييني او انط من هنا يمكن ارتاح اخلص
مختار يبص على الشارع
مختار / مش عارف ينفع اقولك و لا لا بس انتى لو نطيتي من هنا احتمال كبير ما تموتيش ممكن تتكسري او تتشلى على اسوء الاحتمالات
هند / هههههههههههههههههههههههههه يعني اخليني فى الشرايين اضمن
مختار / ممكن يلحقوكى برده ممكن اجبلك من البلد فرد تسعه ملى واحده فى النفوخ تجيب الناهيه علاطول
هند / مش عارفه من غيرك كنت عملت ايه
هند تكمل نشير و هى مبتسمه
هند / هو الصعيد زى ما بنشوفه فى الافلام كدا و لا دا فايك و كدا
مختار / كل مكان فيه الكدا و الكدا
هند / و انت من انهى كدا فيهم
مختار / انا من الكدا الطيبين
هند / هههههههههههههههههههههه
مختار / ما فيش حد بيموت من الجوع ارمى حمولك على اللى خلقك مش هينساكى
هند / و نعم بالله عن اذنك انا داخله انام
مختار / تصبحي على خير
هند تدخل و ترجع تانى
هند / انا مش عارفه انى اتكلمت معاك دا صح و لا غلط بس ممكن ما حدش يعرف اننا اتكلمنا فى الموضوع ده
مختار يهز راسه هند تبتسم و تاخد طبق الغسيل و تدخل جوه و مختار يدخل هو كمان
……………….
فى مكان التسليم
صحرا كبيره ما فيهاش معالم و عربيات عباده و الرجاله واقفين توصل عربيات تانيه و تقف و ما ينزلش منها حد خالص عباده و الرجاله يقلقوا باب يتفتح و تنزل بنت رشيقه لابسه بدى حماله اسود و شعر اسود طويل سايب على ضهرها و قصه لحد عنيها مكياج سموكى و روج غامق و مانيكير اسود و بوت اسود جلد على ليجن اسود عباده و الرجاله يبصوا لبعض البنت تروح تقف قدام عباده و تمد ايدها و تتكلم عربي باكسنت اجنبي
البنت / فيرا
عباده / هو الرجاله فى بلدكوا خلصوا بعتولنا حرمه
فيرا / دى عنصريه منك مستر
عباده / عباده انا مستر عباده
فيرا / دى عنصريه مستر عباده الست دلوقت زى الراجل بالظبط بس مفيش مشكله انا برده مقدره ثقافه المصريين انا بحب مصر و بحب المصريين مصر سوق مفتوح و منجم دهب مستر عباده
عباده / جبتي الفلوس
فيرا تشاور باب عربيه يتفتح و ينزل واحد و معاه شنطه يحطها عباده يشاور لواحد يروح يفتح الشنطه و يقلب فيها من فوق لتحت
فيرا / اللى حصل كانت غلطه مش مقصوده مستر عباده و اللى عملها صدقني هيدفع التمن
عباده يشاورلهم يفتحوا العربيه و يجيبوا الراجل متكمم بيقاوم و يرفص فى الارض اول ما يشوف فيرا و مش عايز يروحلها و هى بصاله بابتسامه و هو بيقاوم و عباده متابع اللى بيحصل لحد ما الراجل يدخل العربيه
فيرا / انا منعت رجالتى ينزلوا من العربيات و جيتلك بنفسي و صدقني دى ما بتحصلش كتير
عباده / تشرفنا يا ست
فيرا / الشغل معايا بيكسب فلوس كتير اوى مستر عباده و اسهل و اسرع
عباده / السكك المختصره يا شمال يا مكسره و احنا بنحب السالك لا مؤاخذه
فيرا / فكر كويس مستر عباده احنا عندنا شحنه كبيره عاوزين ندخلها مصر بس ما نقدرش نجازف بيها مره واحده خصوصا ان الحكومه المصريه مفتحه عنيها شويه اليومين دول بس انتوا مستر عباده عيله الزيني مشهورين بانكوا عارفين كل الطرق و حافظين المداخل و المخارج و تقدروا تدخلوا الشغل بتاعنا بامان
عباده / احنا ما بنشتغلش عند حد ان كنا بندخل فبندخل الشغل بتاعنا عارفين هو ايه و هيروح لمين و هيعملوا بيه ايه
فيرا / فكر مستر عباده و هنتقابل تاني
عباده يبتسم بسخريه و يمشي هو و الرجاله اللى معاه و فيرا واقفه تبص عليهم و مبتسمه
…………………..
فى شقه هند
هند نايمه شيرى تدخل تصحيها
شيرى / يا بنتي دى رابع مره اصحيكي يوسف جه بره
هند تشد المخده و تحطها على وشها
شيرى / قومى يا هند بقي بطلى دلع
هند تقوم و لسه هتفتح الباب
شيرى / انتى هتطلعى كدا بقولك يوسف بره
هند تشد الاسدال و تلبسه و تطلع بره
يوسف / نموسيتك كحلى ايه يا بنتي معقول لسه نايمه لحد دلوقت
هند تدخل اوضتها تانى و تفتح الدولاب و تطلع كل الهدوم اللى فيه و شيرى متبعاها تشيلها تطلع ترميها قدام يوسف
هند / شوف تحب اللبس ايه لحد ما ادخل الحمام
شيرى تطلع من الاوضه بتبص ليوسف و مغطيه بقها و هند تدخل الحمام يوسف يقعد على الارض و ينقي من الهدوم
يوسف / دول بيليقوا على بعض صح
شيرى / اه هى بتلبسهم على بعض
يوسف ياخد الطقم و يفرده على السرير و يشيل باقي الهدوم يعلقها فى الدولاب تانى و شيرى تساعده
…………………..
على السلم فى بيت هند
مختار شايل كيس فيه قرطاس طعميه و طالع السلم يلاقي عبد الله قاعد على السلم و حاطت كتبه على رجله و زعلان
مختار / مالك يا عبد الله ياسمينا احتلت الحمام تانى
عبد الله يبصله و ما يقدرش يكتم الابتسامه
مختار / و الله مش بيبقي قصدى اتسنط بس انتوا بيبقي صوتكوا عالى
عبد الله / عيله فضيحه بعيد عنك
مختار / قاعد كدا ليه
عبد الله / مستني معاد الدرس
مختار / هنا على السلم
عبد الله / مش احسن من الشارع
مختار / هو انت اتخانقت مع عمى محمد
عبد الله / لا بس يوسف فوق و انا مش طايقه فا اتسحبت و نزلت
مختار / و سبت اخواتك و الست الوالده لوحدهم
عبد الله / بابا فوق بس انا مش طايقه و مش هعرف امثل ان عادى اتصالحنا
مختار / فطرت انا جايب طعميه سخنه تعال افطر معايا بعيش بتاو فلاحى هيفتح نفسك
عبد الله / ما ليش نفس
مختار / انت بخيل و لا ايه قوم ياض تعال افتح نفسي قوم
عبد الله يبصله و يطلع معاه و هما مبتسمين
………………….
فى شقه هند
هند تطلع من الاوضه لابسه
هند / حلو ؟
يوسف / قمر تبارك الله بس دقيقتين كمان و المحاضره هتفوتنا انا خليتهم يحجزولنا
هند تبص لمامتها و تاخد شنطتها و تمشي و هو يمشي وراها و هو مبسوط و شيري بتابعها بحزن يوسف و هند يطلعوا الشارع يوسف يجرى يفتح باب العربيه لهند تركب و يركب جنبها و يمشي
يوسف / اما انا جهزت شويه اغانى
يوسف يجي يشغل الكاسيت
هند / كنت فاكره اننا متاخرين ما تسوق يلا
يوسف / حاضر من عنيا
يوسف ياخد العربيه و يمشي و هند باصه من الشباك
يوسف / تعرفي انى امبارح لما روحه لقيتهم لسه بيتكلموا فى حوار المصيف برده بفكر اشوف فيلا فى الساحل نقعد فيها كلنا
هند / لسه بدرى على الاجازه
يوسف / بدرى دا ايه دا خلاص اهو
هند / مش بكره يعني لسه فى وقت
يوسف / فى شيكولاته فى التابلوه انتى نزلتى من غير فطار و الله لو ما كنا متاخرين و الا ايه رايك نكنسل المحاضره و نشوفلنا مكان حلو نفطر فيه سوا انا كمان ما فطرتش
هند / يا سلام و اقول لبابا ايه لما يسالني خدتى ايه النهرده و لا افرض حد شافنا هيقول ايه
يوسف / يقول اللى يقوله هو انتى قاعده مع حد غريب دا انتى معايا
هند / سوق يا يوسف خلينا نحضر المحاضره عاوزه اروح انام
يوسف / لما نقرب هكلمهم يجيبولك قهوه تفوقك
هند تبص من الشباك و ساكته
……………………….
فى الكليه
مختار قاعد جنب صحابه
مختار / يا عم مش قولت الغدى عندى اهمد بقي فرهدتنى
شاب ١ / يا عم باكد عليك بس
مختار / عندى خلاص قولت
يوسف و هند يدخلوا مع بعض يسلموا على صحابهم و يقعدوا جنب بعض فى المدرج و يوسف بيتكلم مع هند و هى باصه فى الارض
شاب ٢ / دا ايه ده ان شاء الله
مختار / خليك فى حالك يا عم
شاب ٢ / اخليني فى حالى و انا اللى جاى النهرده حاطت ايدي على خدى من اللى حصل اخر مره دا انا حمدت ربنا انك سافرت البلد عشان الموضوع ما يتطورش
مختار / و دا اللى حصل فعلا انا سافرت البلد و رجعت لقيت الدنيا هديت
شاب ١ / هديت ايه دى والعه يا عم انتوا مش شايفين و لا ايه البت على تكه و تعيط
شاب ٢ / بصراحه الواد تقيل و بارد و دمه يلطش
شاب ١/ والله خساره فى امه شايف مكدرها ازاى و شغال ضحك ما عندوش دم البعيد
مختار / يا جدعان ملناش دعوه
شاب ٢ / امال مين اللى طار فوق البنجات
مختار / دى حاجه و دى حاجه تانيه
شاب ٢ / مش فاهم
مختار / يعني كان موقف و ليه ظروفه هو كمان استفزنى
شاب ١ / بس هو ايه بقي اصل الحوار و كدا
مختار / مفيش لحظه نرفزه بقولكوا ايه شكل الدكتور مش جاى ما تيجوا نروح نشرب شاى
شاب ٢ / دا انت لو اتعصرت هتنزل شاى قول نروح نفطر
مختار / ما انا فطرت بتاو و طعميه و بيض عيون
شاب ١ / العازب فطر و احنا اللى مع اهالينا ما فطرناش
مختار / انا اجلى على ايدك انا عارف بعينك دى
شاب / يا عم كنت لسه هقول ما شاء الله انت اللى قاطعتني
هند و وسام يقوموا و يروحوا الحمام و مختار و هند عنيهم تيجي فى عنين بعض
شاب ١ / مش كان ملناش دعوه دلوقت
مختار يبص لصحبه
مختار / انت سئيل كدا ليه يا اخى
شاب ١ / هههههههههههههههههه
…………………………..
فى السرايا
ناصر قاعد مع عباده و شاكر فى المكتب و قافلين عليهم الباب
ناصر / انا مش مرتاح للوليه دى
عباده / و الله و لا انا شكلها شمال حتى الجدع بتاعهم اللى كان عامل علينا دكر قلب قدامها قطه دا كان هيعملها على روحه لما شافها
شاكر / بس مش نعرف الاول نوع البضاعه اللى هيعدوها ايه
ناصر / ما تفرقش يا عمى احنا بنعدى بضاعتنا ما بناذيش حد و الحكومه عارفه شغلنا و لينا اسمنا مش هنضيع كل ده عشان ملاليم
عباده / و كمان يا بويا الست مريبه و مش سالكه دا انا خليت الرجاله يفلوا الفلوس ورقه ورقه و رمينا الشنطه فى النيل خفت تكون دسالنا حاجه كدا و لا كدا
ناصر / جدع يا عباده انا عاوزك علاطول كدا عينك فى وسط راسك و مفتح
عباده / ما تقلقش يا كبير اللى حصل المره اللى فاتت عمره ما هيتكرر
ناصر / و انا متاكد من ده
…………………..
فى شقه مختار
مختار و صحابه فارشين على الارض و بياكلوا
شاب ١ / والله انت احلى حاجه فى الكليه الفقر دى
مختار / مطرح ما يسري يمرى كل الحماميه دى كمان
مختار يحط حماميه على رغيف صاحبه
مختار / انا مش بعرف اسخنه كويس دا لما بيبقي سخن بيبقي حاجه تانيه
شاب ٢ / يا عم هو كدا حلو اوى احنا هننهب
جرس الباب يضرب مختار يمسح بقه و يقوم
مختار / خليكوا
مختار يروح يفتح الباب يلاقي عبد الله شايل صينيه عليها طبق رز معمر و طبق فيه ربع فرخه و بطاطس
عبد الله / ايه ده انت بتاكل امال اكل امى ده مين هياكله
مختار / ههههههههههههههه تعال حماتك بتحبك تعال ادخل
عبد الله / الف هنا انا هاكل معاهم انا بقي
مختار / يا ابني تعال ادخل
عبد الله / مره تانيه اسيبك مع صحابك
هند طالعه على السلم و وراها يوسف شايل كيس فيه علبه هند تبص على عبد الله و مختار و تدخل بيتها يوسف يروح يقف جنب مختار
يوسف / اوعوا تكونوا اتغديتوا من غيرى
عبد الله / اتاخرتوا كدا ليه
يوسف / كنا بنجيب حاجه حلوه نحلى بيها اما فى محل بيعمل ايسكريم جامد هبقي اخدك انت و ياسمينا تجربوه
عبد الله / ان شاء الله
يوسف / انتوا واقفين على الباب ليه
عبد الله / اصل مختار عازمنى على الغدى و امى صممت انى اخد منابى معايا
مختار / قوله يا يوسف دا يصح برده
يوسف / ما انت برده بعيد عن اهلك يا مختار مش هنخلصلك اللقمتين اللى جايبهم معاك من البلد يعني
مختار / لا ما تقلقش لقمه هنيه تكفى ميه ما تتفضل انت كمان
يوسف / لا اعفيني انا هتغدى معاهم جوه
مختار / اتفضل
يوسف يدخل و عبد الله ينفخ
عبد الله / ممكن اقعد عندك شويه عشان مش طايقه
مختار / اتفضل
عبد الله يدخل و هو محرج يلاقي صحاب مختار بياكلوا
شاب ٢ / خش عليا يا حبيبي خش
مختار / اعرفكوا ماجد .. هشام …دا عبد الله
عبد الله / تشرفنا
ماجد / ما تقعد يا ابني و لا انت مش بتعرف تاكل على الارض
مختار / نرفعه للسفره لو عاوز
عبد الله / لا والله عادى كدا حلو و كدا حلو
عبد الله يقعد مختار يحطله اكل و ماجد و هشام يحطوا و عبد الله مش بيمد ايده
مختار / اجبلك معلقه و لا بتاكل بايدك
عبد الله / لا باكل بايدي عادى
مختار / انا هقوم اعلق على الشاى
ماجد / اقسم بالله بحبك
مختار / ههههههههههههههههههههههه
مختار يقوم يدخل المطبخ
ماجد / هو انت اخو هند صح
عبد الله يهز راسه ماجد يبص لهشام
……………….
فى شقه هند
هند نايمه على سريرها بهدومها شيرى تفتح الباب
شيرى / هند انتى نمتى انا غرفت قومى
هند / تعبانه يا ماما سبيني انام
شيرى / طب قومى كلى لقمه و نامى
هند / كلت ايسكريم سد نفسي
شيري / ايسكريم ايه
هند / يوسف ركن قدام محل ايسكريم و نزل فتحلى الباب اقدر اقوله لا قالى كلى اقدر اقوله لا
شيري/ هند
هند / سبيني انام يا ماما ابوس ايدك سبيني انام
هند تعيط شيري تبصلها و تطلع تبص ليوسف واقف قدام الباب
شيري / نامت دخلت لقيتها نايمه بهدومها اصلها ما نامتش كويس امبارح
يوسف / لحقت تنام
شيري / حاولت اصحيها ما عرفتش تعال انت بقي اتغدى معايا نفتح نفس بعض
يوسف / مش جعان اتغدى حضرتك الف هنا لما هند تصحي خليها تكلمنى ممكن
شيري / ان شاء الله
يوسف يمشي و شيرى تقفل وراه الباب و تجرى على اوضه هند بتعيط فى صمت تجرى عليها و تاخدها فى حضنها
شيري / مشي خلاص مشي
هند / دا حتى اختارلى نكهه الايسكريم اللى كلته يا ماما ما سالنيش انتى عاوزه ايه حتى
شيرى / طب ما تتكلمى يا هند قوليله اللى انتى عوزاه قوليله
هند / اقوله ايه دا ما بيسمعش ما بيهتمش هو عارف كل حاجه و فاهم كل حاجه عوزانى اتكلم معاه عشان نتخانق انتى عوزانى اعصبه عليا فى المحل قدام الناس ماما انتى ليه مش حاسه بيا ليه ما حدش بيحس انا مش قادره استحمل مش قادره
شيري / خلاص ما تكلميهوش انا اللى هكلمه خلاص
هند / اوعديني
شيري / استني
شيري تروح تجيب الموبايل و تتصل بيوسف
شيري / ايوه يا يوسف ازيك
يوسف / الحمد لله خير يا طنط هند صحيت
شيري / اه صحيت و فى موضوع عاوزه اتكلم معاك فيه
يوسف / خير في حاجه و لا ايه الايسكريم تعبلها زورها اجبلها دكتور
شيري / لا يا حبيبي هند كويسه ما فيهاش حاجه هى بس
يوسف / طب اديهانى اكلمها اطمن عليها اشوف مالها فى ايه
شيري تبص لهند هند تسيب المكان و تطلع بره
شيري / يوسف لو سمحت اسمعنى
يوسف / اسف يا طنط اتفضلي
شيري / انا اتكلمت مع هند و قالتلى ان فى حاجه انت بتعملها بتضايقها منك
يوسف / و ما اتكلمتش فيها معايا علاطول ليه
شيري / مهى خافت تتعصب عليها
يوسف / حاجه ايه دى اللى بتضايقها منى
شيري / انك مش بتسالها هى عاوزه ايه يعني انت النهرده خدتها محل الايسكريم من غير ما تقولنا و انت عارف انى هعمل اكل
يوسف / هو حضرتك اللى زعلانه و لا هند
شيري / انت حتى ما خليتهاش تطلب اللى هى عوزاه
يوسف / ايه التفاهه دى ما تقول لو مش عاجبها اللى انا طلبته ما تقول لا انا عاوزه كذا هو انا عارف ايه فى مخها شيري / يا ابنى انا بكلمك عشان اوفق بينكوا و نحل الموضوع
يوسف / و انا هاجى مخصوص عشان نحله مع السلامه عشان سايق
يوسف يقفل السكه
شيري / يوسف يوسف
شيري تبص على الباب تلاقى هند واقفه تتصل بمحمود
شيري / ايوه يا محمود ازيك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
