رواية البر التاني الفصل الثاني والثلاثون 32 بقلم لولو محمد
رواية البر التاني الجزء الثاني والثلاثون
رواية البر التاني البارت الثاني والثلاثون
رواية البر التاني الحلقة الثانية والثلاثون
عباده يدخل و مغاورى يقف فى الجنينه تجيله رساله
////////////
سماح / ممكن تساعدنى ؟
////////////
مغاورى يقرا الرساله و هو مستغرب يدخل يبص جوه يلاقي سماح عينها عليه يبص على عباده قاعد جنب خديجه و بيلبسها الشبكه و الكل بيزغرط سماح تقوم و تروح توشوش عباده يديها مفتاح العربيه و الكل مبسوط سماح تروح ناحيه مغاورى و تعديه و تطلع بره يطلع وراها
مغاورى / خير !!
سماح / انا واقعه فى مشكله كبيره و لو قولت لاى حد من اهلى الموضوع هيكبر اكتر و مش هنعرف نلمه
مغاورى / مشكله ايه دى ؟
سماح تطلع موبايلها و تفتح رسايل الواتس بينها و بين عصام
سماح / كان المدرس بتاعى فى الاول كنت لما اغيب ابعتله الواجب او اساله فى حاجه و بعدين بقيت اما اغيب يتصل يطمن عليا و يدينى الجديد و الواجب عشان ما اتاخرش
مغاورى يقلب فى الرسايل
سماح / و بعدين فجاه بقي بيسال كتير و يتصل كتير و انا ما كنتش بعرف احرجه و لا اعمل ايه قولت لما الاجازه تيجي كل واحد هيروح لحاله لقيته بيتقدملى و مقتنع انى بحبه مع ان الكلام قدامك ما فيهوش اى حاجه تقول كدا
مغاورى يدى لسماح الموبايل
سماح / اتقدملى و رفضته و دلوقت بيهددنى يفضحنى فى البلد لو ما اتجوزتوش انا غلطت اقتلونى و اقطعوا رقبتى حتى بس اهلى ما لهمش دعوه انا مش هقدر اعيش لو جبتلهم الكلام
سماح تعيط
مغاورى / خلاص انا هحله
سماح / انا والله كنت بعامله على انه استاذى و قولتله بدل المره مليون انت استاذى يقولى بحبك
مغاورى / قولت خلاص ادخلى انتى قبل ما حد ياخد باله و اعتبرى الموضوع منتهى
سماح / هتقول لعباده
مغاورى / و نبقي عملنا ايه ادخلى يا سماح و ابقي خدى بالك من روحك بعد كدا و لا استاذ و لا غيره
سماح تبص فى الارض و تعيط اكتر مغاورى يبص يمين و شمال و يسيبها و يدخل جوه سماح ترفع عينها تلاقي عبد الله واقف بيبص عليها ترمى نفسها فى الارض
عبد الله / سماح وقعت سماح وقعت
الكل يقوم يجروا و عباده يشيلها و ينيمها على الكنبه و ست تناوله كلونيا
فاطمه / لا بقي الحكايه ما عدش يتسكت عليها
عبد الله يبص لمغاورى مركز مع سماح سماح تفوق
انتصار / مالك يا بت ايه اللى حصل
سماح / مفيش … ما اعرفش
خديجه تناولها كبايه عصير تمسكها و تبص لمغاورى و تبص فى الارض و عبد الله متابع
فاطمه / بكره ناخد التحاليل و نروح للدكتوره دى على الله المرادى تجيب الناهيه بقي و تريحنا
سماح / انا تعبانه ممكن حد يوصلنى
انتصار تقوم تقف
انتصار / احنا نسيب العريس يقعد شويه مع عروسته بقي و نروح احنا
سماح / انا مش عاوزه ابوظ لخديجه فرحتها
خديجه / و لا يهمك الجايات اكتر المهم سلامتك
سماح تبتسم و تحضن خديجه
سماح / الف مبروك
خديجه / عقبالك
الكل يقوم يسلموا على بعض
انتصار / خليك انت يا عباده لو تحب تقعد مع خطيبتك شويه و ابقي حصلنا
عباده يبص لخديجه تبص فى الارض يبتسم
ناصر / يلا نفوتكوا بعافيه
شاهين / ابقوا طمنونا
شاكر / اكيد باذن الله
الكل يمشى مغاورى يبص على عبد الله يلاقيه باصصله و ساكت عبد الله يمشى مع اهله مغاورى يبص فى الارض
شاهين / اقعد يا عباده واقف ليه
عباده يبتسم و يقعد
ام مغاورى / الرجاله يشربوا حاجه
مغاورى / انا مضطر استاذن عشان عندى حوار كدا اخلصه فى السريع
عباده / خير !!
مغاورى / خير ان شاء الله .. يلا بالاذن
مغاورى يمشي و الكل يروح يقعد على انتريه تانى و يسيبوا خديجه و عباده قاعدين على انتريه جنبهم بس بينهم مسافه و ساكتين و كل شويه يبصوا لبعض و يبتسموا
عباده / مبروك
خديجه / الله يبارك فيك
عباده / عقبال الفرح ان شاء الله
خديجه / ان شاء الله
عباده / باذن الله يومين تلاته ننزل نجيب العفش و لو فى حاجه فى دماغك او حاجه شوفتيها فى حته كدا و لا كدا
خديجه / لا ما فيش بس كويس انك لفت نظرى هحاول الكام يوم دول اكون فكره
عباده / باذن الله … و عاوزين ننزل نشوف حوار الفستان و كدا بس لو فى حاجه انتى مرتبه عليها
خديجه / هو انا الصراحه كان فى بس مش عارفه هيبقي قدامنا وقت قد ايه
عباده / تفصيل يعني و كدا
خديجه / بصراحه اه كان فى فستان عاجبنى اوى على النت انا حتى محتفظه بصورته معايا على الموبايل
خديجه تطلع الموبايل و عباده يقرب سنه يبص معاها توريله فستان اوفوايت كب
عباده / وحش
خديجه / دا حلو اوى
عباده / ان كان ابوكى هيسمحلك تطلعى بصدرك كدا انا مش هسمح
خديجه / لا طبعا هقفله و بعدين
عباده / و بعدين فستان الفرح بيبقي ابيض
خديجه / ما الاوفوايت درجه من الابيض على فكره
عباده / ما افهمش انا فى التقاليع بتاعتكوا دى ابيض يعني ابيض
خديجه / بسيطه نخليه ابيض تحب تؤمر باى حاجه تانيه
عباده / ما يؤمرش عليكي ظالم
خديجه تقعد مبوزه
عباده / العروسه بتلبس ابيض عشان تبقي ليلتها بيضه
خديجه / اومليت و لا عيون ؟
عباده / بتالشي على كلامى !!
خديجه / و العريس بيلبس اسود عشان تبقي ليلته سوده مش كدا ؟
عباده يبص لخديجه مبوزه يبتسم
عباده / خلاص هتنزل المرادى
خديجه تبصله تلاقيه مبتسم
عباده / بس تعملى حسابك المره الجايه لا ممكن تنزل الارض ابدا
خديجه تضحك و تبص الناحيه التانيه
عباده / اللبسي اللى يبسطك مش كل يوم تلبسي فستان فرح يعني بس يتقفل
خديجه / من غير ما تقول كنت هقفله
عباده / بس والله الابيض كان هيليق عليكي البت اللى فى الصوره كالحه وشها ما فيهوش نقطه دم فالابيض كان هيمسخها انما انتى الابيض هينورك
خديجه تبصله
عباده / بس اعملى اللى يريحك يعني مش هنقف على دى
خديجه / خلاص هتنزل المرادى
عباده يبصلها و يبتسم
خديجه / بس تعمل حسابك المره الجايه هنزلها برده بس بمزاجى هههههههههههههه
عباده / هههههههههههههههههه ما انتى حلوه اهو و بتعرفى تهزرى
خديجه/ و انت كنت فاكرنى رخمه و لا ايه
عباده / كنتى رخمه اوى و انتى صغيره فاكره دا انا كلت علقه بنت لزينه
خديجه / دا انت قلبك اسود اوى مش انت اللى شوطت الكوره فيا
عباده / و انتى ايه اللى كان خرجك من السرايا
خديجه / كنت هروح كنت هبات عندكوا و لا ايه
عباده / ما يمكن كنت بنكشك
خديجه تبصله يغمزلها
خديجه / لا حلوه بس مش هتخيل عليا دا انت ما كنتش بتطيقني
عباده / و الله لا انتى و لا جنس البنات كلو
خديجه / هههههههههههههههههه ايوه كدا اظبط فاكر انك هتضحك عليا و لا ايه
عباده / و انتى يضحك عليكي برده
خديجه / اقولك حاجه بس ما تزعلش
عباده / قولى
خديجه / و انت صغير برده ما كنتش تطاق الصراحه
عباده / و ايه اللى اتغير
خديجه / انا … انا نظرتى لكل حاجه اتغيرت لما روحت الكليه و لقيت الكل بيخاف منى حتى الدكاتره و المعيدين اول ما يقروا اسمى يترعشوا قدامى كداهو … انا عاوزه راجل يخاف على زعلى عشان بيحبنى مش عشان خايف من ابويا و اخويا فاهمنى ؟
عباده / فاهمك
خديجه / لما قولتلى مهما حصل هتبقي مرات عباده مش هبقي جوز الدكتوره بصراحه دخلت دماغى
عباده / طب الحمد لله هنعوز اكتر من كدا ايه عقبال ما ادخل قلبك بقي
خديجه تبص فى الارض بخجل
خديجه / قول ان شاء الله
عباده يبصلها و يبتسم
عباده/ ان شاء الله عن قريب
خديجه تبصله و تبص فى الارض تانى و هى مبتسمه و عباده عينه عليها و مبتسم
………………….
فى عرض الانيماشن فى الساحل
هند و مختار قاعدين بيتفرجوا على ناس بيعملوا استعراض مختار تليفونه يرن يوشوش هند تبتسم مختار يقوم يقف بعيد و هى عينها عليه كل شويه شكله مش مبسوط الابتسامه تروح من وشها تقوم و تاخد شنطتها و تروحله
مختار / لا ما تعملش انت حاجه و ما تقولش لحد و ما لكش دعوه بيها خالص … لا انت كدا عملت الصح انا هستلم من هنا بقي شكرا … تمام يا حبيبي سلام
مختار يقفل
مختار / ايه اللى قومك؟
هند / قلقت فى ايه ؟مالك ؟كان بيقولك ايه ؟
مختار / مفيش حوار عبيط فى الشغل و انا ان شاء الله لما ارجع هحلهوله
هند / طب الحمد لله بصراحه كان شكلك مضايق اوى و انت بتتكلم خوفت يكون فى حاجه
مختار / من الاخر كدا لو مش عاوزه تتفرجى على العرض نشوفلنا عرض تانى فى اوضتنا و لا ايه
هند / دا انت قفوش اوى يا ساتر هروح التويلت و نرجع نكمل
مختار/ قال يعني اوضتنا ما فيهاش تويلت
هند / يادى اوضتنا اللى انت ماسكها اللى يسمعك يقول محروم
مختار / مش هرد عليكي عشان انتى سفسطائيه و هضيع وقتى معاكى … هو الحمام منين ؟
هند / ههههههه من هناك … هنشوف موضوع سفسطائيه ده بعدين
هند تشاور يمين و تمشي و مختار يمشي وراها
مختار / طبعا مش هيحلالك الرغى غير لما نطلع فوق المواضيع كلها هتتفتح و نستعيد بقي زكريات الطفوله كلها و نقضيها لوكلوك لوكلوك و مفيش عمل ما احنا لو بنشتغل نص ما بتكلم هنبقي احسن بلد فى العالم
هند ماسكه نفسها عن الضحك بالعافيه تبصله تلاقيه مبتسم و تدخل الحمام و تقفل الباب و تدخل كابينه فيرا تدخل وسط تلت بنات بيضحكوا هند تطلع من الكابينه تلاقي فيرا بتضحك مع البنات تتخشب
فيرا / مين !! ازيك ؟ صدفه سعيده صحيح الايديز روم دا دنيا تانيه خالص تصدقى انا و صحباتى بنقضى فى اللايدز روم بتاع اى مكان اكتر ما بنقضي فى المكان نفسه
هند / عن اذنكوا
هند تيجي تمشي بنت تسد عليها الباب
فيرا / ايه لحقتى تزهقى مننا طب دا انا قعدتى ما يتشبعش منها
هند / هاتى من الاخر عشان مختار واقف بره مش عوزاه يزهق
فيرا / ما تخافيش شغلته بواحد اسكتلندى من حبايبي تايهه فى المكان و انا متاكده انه مش هيهون على مختار
هند / هتماطلى قد ايه خمس دقايق مثلا عشره و بعدين
فيرا / فى حاجات كتير اوى ممكن تحصل فى خمس ثوانى مش خمس دقايق و بعدين انتى ليه اجريسف كدا انا بحاول اكون لطيفه معاكى
هند / الله الغنى ممكن تعدونى بقي
فيرا / انتى زى اختى الصغيره و من حقك عليا اوعيكي شغلتنا دى ون واى يعني مفيش حاجه اسمها بطلت بتاعه جوزك دى
هند / بس مختار فعلا بطل
فيرا / و انتى صدقتى الحاله الوحيده اللى ممكن يبطل فيها انه يكون مات غير كدا تؤ
هند / ماشي ممكن امشي بقي
فيرا / لو بتحبيه بجد و خايفه عليه اتكلمى معاه و عقليه اصل انا صبرى قرب يخلص خالص و انا اللى مش معايا يبقي عليا
هند / انا لا بحبك و لا خايفه عليكي بس اعتبريه تحذير اخير فكك من مختار عشان ما ازعلكيش
فيرا تبتسم هند تبدا تقيم الموقف و البنات حواليها يتاهبوا تلت بنات يدخلوا الحمام و هم بيضحكوا بنات فيرا يلموا نفسهم و الحمام يتزحم هند تستغل الفرصه و تطلع بره تجرى على مختار
مختار / فى ايه مالك ؟ وشك اصفر كدا ليه ؟
هند تبص على باب الحمام فيرا و البنات خارجين فيرا تبتسم لمختار مختار ملامحه غضب ممزوج بخوف
مختار / انتى كويسه عملولك حاجه
هند / لا ما فيش حاجه يلا نطلع اوضتنا
مختار / انتى متاكده انك كويسه
هند / كويسه والله بس عشان خاطرى نطلع اوضتنا
مختار / تمام يا قلبي تعالى
مختار يانج هند و يمشوا و هى متعلقه فى دراعه اوى
………………….
على القهوه
حامد بيبص فى ورق و يوسف جنبه
حامد / يا ابن اللعيبه يا يوسف لحقت تعمل كل ده امتى
يوسف / من ساعه ما سبتك و انا ما بعملش حاجه غير الموضوع ده
حامد / بصراحه شغل ما يخرش الميه شغل فنادق وريت الورق ده لابوك
يوسف / لا لسه قولت اوريهولك الاول تقولى رايك و تلفت انتباهى لو فى حاجه ناقصه
حامد / حاجه ناقصه دا ايه دا حاجه فخيمه اوى
يوسف يبتسم
حامد / انا لو منك اطلع من هنا على ابوك اوريله الورق ده دلوقت حالا خليه يعرف ان اللى خلف ما مامتش و انك ما كنتش قافل على نفسك الباب بتلعب فى الموبايل زى ما كان بيقول عنك خليه يفتخر بيك بدل ما هو مطاطى راسه كدا اغسله دماغه من الكلام القرف اللى كل اللى حواليه مالين بيه دماغه عنك
يوسف / تعرف يا عمى انا مش هخبى عليك انا فكرت فعلا اول ما طبعت الحاجه انه يكون اول واحد يشوف الورق اللى معايا ده بس خفت معاملته ليا الفتره اللى فاتت خوفتنى منه خفت يقفلنى و لا يقطعلى الورق او يقل منى
حامد / يعني تقدمله مشروع زى ده و يقل منك لا بقي ما تاخذنيش ما يبقالوش حق ابدا دا انت مبدع دا انت ما سبتش تنتوفه فى التفاصيل ما عملتش حسابها اهو
يوسف / يعني اكلمه
حامد / دلوقت حالا
يوسف / طب ما تيجي معايا
حامد / اجى معاك فين يقول ان انا اللى بفكرلك ابوك مش لازم يعرف خالص ان ليا علاقه بالمشروع ده لازم الفضل و الفكره و الشغل كله يتنسبلك انت امال ايه
يوسف / ايوه فاهمك بس
حامد / ما بسش انت تاخد بعضك دلوقت و تطلع على ابوك كدا على الحامى
يوسف يتنهد و يهز راسه
حامد / انت لسه هتقعد بقولك قوم
يوسف يقوم و يحط ايده فى جيبه
حامد / بتعمل ايه الحساب النهرده عندى يلا اجرى على ابوك
يوسف يبتسم
حامد / بس تعمل حسابك لما ربنا يكرمك و تفتح الكافتريا بتاعتك تبقي تكرم عمرك العجوز
يوسف / عنيا
يوسف يمشي و هو متحمس و مبسوط و حامد متابعه
……………………
فى البلد عند مغاورى
مغاورى راكن قدام قهوه عصام يمشي فى الشارع مغاورى يضرب الكلاكس عصام يشوفه يروحله يركب
عصام / مساء الخير يا مغاورى بيه اؤمر قولت عاوزنى
مغاورى / هنا برده هاخدك حته حلوه نتكلم فيها على رواقه
مغاورى يقفل اللوك و يسوق فى صمت
عصام / بصراحه لما حضرتك كلمتنى انا استغربت جدا اصلى عارف ان ما فيش عندكوا حد خالص فى المرحله اللى بدرسلها
مغاورى / لا ما انا مش عاوزك فى الحوار ده
عصام / الله امال حضرتك عاوزنى فى ايه
مغاورى / هو انت يعني لازم تبقي انت الاستاذ كل مره ما ينفعش النهرده ابقي انا الاستاذ؟
عصام / ههههههههههههههه دا انا يشرفنى بس انا مش فاهم حضرتك هتعلمنى ايه يعني ؟
مغاورى / هعلمك الادب
عصام / افندم !!!
مغاورى / مهو دخول بيوت الناس مش لعبه مش يبقى اهل البيت مامنينك و انت تخون الامانه و لا ايه ؟
عصام / انا مش فاهم اى حاجه انت بتتكلم عن ايه؟ بالظبط ؟؟؟ هو انت رايح فين ؟؟؟
مغاورى / ايه ما تعرفش سكه الترب و لا ايه؟؟؟ ما بتروحش تزور السيد الوالد خالص ؟؟ دا انت حتى واحشه و بيسال عنك
عصام / على فكره انا بدات اضايق
مغاورى يركن و يبص لعصام
مغاورى / انزل يا حيلتها
عصام يبص لمغاورى و يفتح الباب و ينزل يمشي مغاورى ينزل و يطلع مسدس من جيبه و يضرب نار فى الارض عصام يقف و يبصله و مغاورى بيروح ناحيته
عصام / هو فى ايه بالظبط ؟
مغاورى / مالك بستك سماح يا ابن الكلب يا واطى انت
مغاورى يضربه بكعب المسدس فى مناخيره عصام يقع فى الارض و مناخيره بتجيب دم
عصام / مالى بيها دا ايه ؟ انا متقدملها على سنه الله و رسوله ما ينفعش كدا
مغاورى / و هم رفضوك و الموضوع خلص الليله تلم حاجتك انت و الست الوالده و تسيبوا البلد بدل اقسم بالله
عصام / انت بتتكلم بصفتك ايه اصلا اذا كان اهلها ما عملوش اللى انت بتعمله ده
مغاورى يضرب نار فى فخد عصام يصرخ
مغاورى / بسيطه نقول لاهلها انك بتكلمها و رامى بلاك عليها و نشوف هيخلوك تسيب البلد بس و لا هيسيبوك الدنيا بحالها
عصام / انت فاهم غلط انا عاوزها فى الحلال
مغاورى يضربه طلقه فى فاخده التانى عصام يصرخ
مغاورى / و هى مش عوزاك يا ابن البجم يا طور و ان طولت فى الكلام الطلقه التالته هتبقي فى النص و ابكيك زى الحريم عمرك كله اصل الموت خساره فى اللى زيك
عصام / خلاص خلاص اللى انت عاوزه
مغاورى / اسمع يا ابن الكلب انت انا هسيبك عشان خاطر امك ما لهاش غيرك بس لو لمحتك و لا حتى اتخايلت بيك تانى قسما بالله هبعتك انت و اللى يتشددلك تشقروا على الحج فاهم و لا لا
مغاورى يدوس برجله على جرح عصام عصام يصرخ و يتالم
عصام / خلاص خلاص هسيب البلد حاضر
مغاورى يمد ايده فى جيوب عصام يطلع الموبايل و يديه لعصام
مغاورى / لو فى يوم من الايام اسم ستك سماح اتجاب مع اسمك فى جمله واحده حتى لو مش مفيده هجيلك حتى لو فى اخر بلاد المسلمين هجيبك و ساعتها صدقني هبكيك بدل الدموع دم
عصام بيعيط
مغاورى / فرمط البتاع ده و اتصل بحد يجي يوديك المستشفى و ان سالوك قولهم قطاع طرق سامعنى و لا بكلم نفسي
مغاورى يغرز المسدس فى جرح عصام عصام يصرخ
عصام / حاضر والله حاضر كفايا بقي حاضر
مغاورى يقوم و يركب العربيه ويمشي و عصام بيتلوى فى الارض من الوجع
……………….
فى اوضه هند فى الساحل
هند نايمه فى حضن مختار و هو نايم على ضهره و صاحى و باصص قدامه هند تفتح
هند / انت لسه صاحي !!
مختار يبصلها و يبتسم
مختار / عندى نقص حاد فى هرمون الاوكسايتوسين
هند تبتسم
هند / طب قول كلام غير دا يمكن اصدقك
هند تتعدل و تقعد جنبه و تبصله
هند / انت بتفكر فى فيرا تعمل ايه تقوم تمسح بيها الارض و لا تخليك جنبى ؟
مختار يتعدل و هو مبتسم
هند / خليك جنبي احسن انا احلى منها و لا انت ايه رايك ؟
مختار / و دى فيها كلام دى … سكت فغر اعدائي السكوت
هند / ايوه انا عارفه القصيده دى بتاعه عنتره بن شداد خدناها فى المدرسه … بس فى حاجه بقي انقح منها بتقول انا مش مبيناله انا نوياله على ايه ساكته و مستحلفاله و مش قيلاله ساكته ليه
مختار / خليه يشوف بعنيه
هند / هخليه يخاف من خياله لما اجى و احط عليه
مختار / هههههههههههههههههه طب بالله عليكي مين فينا اللى مجرم
هند / من عاشر القوم و بعدين هو انا اجى جنبك حاجه دا انت الاستاذ يا استاذ
مختار / بس انا يا هند مش هقدر احط عليها ايديا مربطين
هند / بالعكس يا استاذ مختار تعرف دايما يقولوا المخ غلب العضلات و انت عندك مخ يلففها حوالين نفسها انت بس اللى مش عاوز تمخمخ يا ميخا
مختار / يا بت ما بطقش الاسم ده
هند / ما انت اللى اسمك تقيل ما لوش دلع … اقولك يا بيبي احسن
مختار / ههههههههههههههههههه بس مش قدام حد لحسن انا مش ناقص تحفيل
هند / ماشي يا بيبي نرجع لموضوعنا الست دى بتستفزك عشان ترجع زى الشيطان بالظبط ما تطاوعهاش انا خايفه عليك
مختار يبص الناحيه التانيه
هند / انا نايمه من بدرى كان ممكن تنيمنى و تروح تطلع عينها و كنت هصحى الاقيك جنبي و نكمل يومنا عادى و لا كان فى حاجه حصلت ما عملتش كدا ليه
مختار يتنهد
هند / انت قولتلى انك لو مديت ايدك الف من يناولك سلاح فاكر خلاص انا هغمض عيني و انت اضحك عليا
مختار / مش هعرف اول ما هبص فى عينك هقول الحقيقه
هند / بس انت كدبت عليا زمان
مختار / عشان مصلحتك عشان دا كان الصح وقتها لكن انا و انتى بقينا واحد ما عدش ينفع يبقي فى بينا اسرار و لا كدب لازم يبقي فى ثقه و صراحه و بس و بعدين انا وعدتك ابص لروحى فى المرايا ازاى و انا خلفت وعدى
هند / انت راجل لما بيوعد بيوفى حتى لو على رقبته
مختار يبتسم بحزن هند تقعد على ركبها و تمسك ايده
هند / السكه دى طول ما هى مفتوحه كل يوم هتترمى عليك بلوه جديده النهرده فيرا بكره يجى الالعن منها
مختار / السكه دى مش انا اللى فتحتها دى من ايام جدودى
هند / بس بايدك تقفلها
مختار / ما اقدرش
هند / تقدر
مختار / الموضوع اكبر منى بكتير انتى ليه مش عاوزه تفهمى دا اكبر حتى من الزنايته كلهم
هند / التغير صعب بس مش مستحيل
مختار / برده مش قادره تفهمى
هند / اصبر عليا
مختار / صابر و حتى لو ما فهمتيش يهمنى انك تكونى مرتاحه
هند تبتسم بحزن مختار يشدها فى حضنه
مختار / تعالى هنا يا بت فى حضنى
هند تبتسم
مختار / مش عاوزك تفكرى فى حاجه انا كنت جايبك هنا ابسطك
هند / انبسطت قضيت احلى يومين فى حياتى و ان شاء الله كل حياتى معاك تبقي حلوه كدا
مختار / امين
هند / نام بقي ورانا سفر الصبح
مختار يبوس راسها تنام فى حضنه و هو الحزن مالى ملامحه
……………………….
فى اوضه سماح
سماح رايحه جايه فى تراس و الموبايل فى ايدها و متوتره عباده يدخل
عباده / تفضلى تفركى فى روحك كدا و فى الاخر تقعى
سماح / خضيتني
عباده / ايه اللى مصحيكى لحد دلوقت
سماح / نايمه من ساعه ما رجعنا مش عارفه انام بقالى ساعتين بفرك فى الاوضه لما اتخنقت قولت انزل اشم هوا انت ايه اللى مصحيك
عباده / قلقت قولت اشقر على الدنيا … اشوف… يمكن
عربيه ناصر تدخل السرايا عباده ينتبه و سماح عينها عليه العربيه تركن عباده ينزل جرى و سماح متابعه من فوق
عباده / خير يا كبير فى حاجه و لا ايه
ناصر / ايه اللى مصحيك السعادى
عباده / الحمد لله انى صحيت فى حاجه و لا ايه مش بعاده تخرج السعادى
ناصر / بيقولوا قطاع طرق ثبتوا الاستاذ عصام و ضربوا عليه نار
عباده / لا اله الا الله امتى الكلام ده
ناصر / النهرده … بس الحوار ده مش داخل مخى اللى قلبوه دول هيسيبوا معاه الموبايل
عباده / قصدك انه
ناصر / انا اتكلمت مع الدكتور الطلقتين اللى فى فخاده مضروبين بعيد عن الشرايين و العضم و دا فى الطلقتين الاتنين
عباده / دا محترف بقي ؟
ناصر / حد خطر كفايه انه يخلي امه تلم حاجتها و تنقله بعربيه اسعاف لمستشفى تانيه بره البلد
عباده / وربنا الجدع ده ما كان مريحنى خصوصا الفتره اللى فاتت
ناصر / الناس شافوه بيركب عربيه مغاورى قدام قهوه صابر سبرته
عباده / و ايه اللى هيبقي بين مغاورى و الجدع ده يعني عشان يعمل فيه كدا
ناصر / والله ما اعرفش و ما اقدرش اروح اخبط عليهم السعادى اساله … و حتى لو سالته مش هيفرق فى حاجه المحضر اتقيد خلاص ضد مجهول و الجدع ركب عربيه الاسعاف و هج من البلد كلها
عباده / والله يا كبير مغاورى مش جديد عليك روحه فى مناخيره و خلقه ديق و الحكايه دى مش اول مره يعملها
ناصر / قولت كبر و عقل بس شكله ما فيش فايده
عباده / لو تسمحلى يا كبير
ناصر / قول يا عباده
عباده / احنا ما نعرفش اللى بين عصام ده و مغاورى و مغاورى عصبى اه بس مش مجنون يعني اكيد اللى اسمه عصام ده عمل حاجه
ناصر / مش بالشكل ده يا عباده
عباده / الفتره الجايه مش فتره عتاب دى فتره توحيد صفوف و احنا ما صدقنا النفوس كلها هاديه و صافيه بلاش تفتح علينا يا كبيره سيره لا هتزيدنا و لا هتنقصنا
ناصر / و صاحب الحج يا عباده ؟
عباده / كلو باوانه يا كبير
ناصر / ماشي هدورها فى دماغى و ربنا يعمل اللى فيه الخير
ناصر يبص لفوق
ناصر / الله دا البت سماح صاحيه هى كمان اهى
سماح تبتسم و تشاورله
ناصر / يلا بالاذن انا يادوب اطلع افرد ضهرى ساعه و لا اتنين قبل الفجر
ناصر يدخل و سماح واقفه فوق على وشها ابتسامه نصر
سماح / انت اللى جبته لروحك قولتلك ابعد بدل المره الف يلا ربنا يسامحه بقي
……………….
فى السرايا
هند قاعده و قدامها شنط هدايا كتير تدى واحده لسماح
هند / و الساعه دى ليكي يا سماح يارب تعجبك
سماح / تعبتى نفسك
هند / و دى هديه خديجه
انتصار / انتوا كنتوا بتتفسحوا و لا بتعملوا شوبينج دا انتى ما سبتيش حد
هند / المهم بس الحاجات تكون عجبتكوا انا و مختار لفينا المول كله لحد ما فيص منى
مريم / بس زوقك حلو اوى يا هند الساعه عجبانى اوى
هند تبتسم
سماح / هو انتى جايبه ايه لخديجه
هند / ساعه زيكوا والله
فاطمه / بس !! طب احنا اهلك جبتى و لا ما جبتيش كفايا دخلتك علينا بالسلامه انما خديجه سلفتك و دى مش اى واحده دى بنت الجوارحه يعني عندها بدل الساعه الف
هند / و المفروض كنت اجيبلها ايه يعني
انتصار / و لا اى حاجه انتى كدا عداكى العيب و ازح كفايا انك افتكرتيها انتى اصلا مش المفروض كنتى جبتى اى حاجه لاى حد كتر خيرك
فاطمه / ما هو اللى بيهادى بيهادى بقيمته يا ام فاتن يا تديها حاجه عليها القيمه يا بلاش
هند / والله دى ساعه سنيه اصلى و غاليه
فاطمه / يا بنتى انتى ليه مش عاوزه تفهمى لا اله الا الله يا حبيبتي الحاجه الوحيده هنا اللى ليها قيمه هى الدهب
انتصار / خفى يا فاطمه خديجه و هند دور بعض و زوقهم زى بعض و اللى يعجب هند اكيد هيعجب خديجه
فاطمه / من دور بعض اه لكن مش زى بعض
هند / بناقص هديتها خالص كانى ما جبتهاش … عن اذنكوا عشان راجعه تعبانه
هند تشد شنطه خديجه و تقوم تقف
انتصار / اقعدى بس شويه يا هند ما شبعناش منك
هند / بكره ان شاء الله هبقي انزل عن اذنكوا
هند تطلع فوق
انتصار / ارتاحتى كدا
فاطمه / دا بدل ما تفهميها و توعيها هند اتربت فى مصر انما خديجه متربيه هنا و هنا مش زى مصر
انتصار / و هى الساعه وحشه ما البنات كلهم فرحوا بيها اهو و بعدين النبى قبل الهديه ما اتنقورش عليها
فاطمه / و انا كنت اتنقورت على الهديه اللى جيباهالى هو انا ناقصنى عبايات
انتصار / لو سكتى تتحرقى
انتصار تقوم تطلع فوق
فاطمه / خليكي كدا اجرى وراها و امرعيها علينا
فاطمه تبص تلاقي الكل باصص عليها الكل يعمل مشغول فى هديته تزق الحاجه اللى قدامها و تقوم
سماح / وريني ساعتك كدا يا مريم
مريم تديها ساعتها تتفرج عليها
………………….
فى اوضه ناصر
ناصر / انت عملت الصح ما تدخلش عاركه غير و انت ضامن انك مش هتطلع غير و انت كسبان
مختار / انا ما يفرقش معايا والله لو كانت ضربتنى بالنار اهون من اللى حسيت بيه انا طول الليل عمال ابص لهند زى العاجز
ناصر / يا راجل ما تقولش كدا
مختار / طول الليل ابص لهند و اقول غلطتها مرتين و قولت هتتعلم اديك شلتها من تحت عينك تانى اهو … ربنا هيفضل يسترها معايا لحد امتى كان ممكن يجرالها حاجه
ناصر / و الحمد لله رجعتوا بالسلامه و الست دى خلاص احنا قرينا فتحتها و ان شاء الله نخلص منها
مختار / مش بقولك بقيت زى العاجز هقعد فى البيت زى الحريم و انتوا اللى تجيبولى حقى !!
ناصر / انت اللى اخترت من الاول
مختار / عارف و الله عارف مش ده اللى بتكلم فيه انت ليه شايفها سهله ليه مش حاسس بيا
ناصر / حاسس و ربنا حاسس بس دا لمصلحتك و انت عارف لا هتقدر تبعد عن هند و لا هى هتقدر تبعد عنك
مختار / عارف بس برده مش قادر ابعد و انسي اللى الوليه دى عملته
ناصر / ما عملتش حاجه دخلت الحمام زى اى حد و هند معاك ما فيهاش خربوش قسما بالله لو كانت مست شعره بس من هند شوف شعره لكنت ولعت فيها هى و اهلها لكن ما تقدرش تلوم حد انه دخل يعمل زى الناس دا حق يكفله الدستور يا جدع
مختار يضحك و يبص الناحيه التانيه ناصر يطبطب عليه و هو مبتسم
ناصر / عدى و ياما دقت على الراس طبول اهدى
باب الاوضه يتفتح و انتصار تدخل
انتصار / انت هنا يا مختار … السلام عليكم
مختار / و عليكم السلام كنت ماشي
ناصر / ما تفكرش كتير و اتجدعن فى اللى باقي من اجازتك عاوزين زيني صغير يشيل اسم عمران ابوك اعمل اللى ما فلحتش انا فيه
مختار / ما تقولش كدا كلو رزق و البنات خير
ناصر / ما انا عارف انا بهزر معاك عشان تفكها
انتصار واقفه مرتبكه
مختار / يلا بالاذن
مختار يطلع بره و يقفل الباب وراه
انتصار / هو ماله ؟
ناصر / كل حاجه بتبقي صعبه فى اولها بعد كدا الواحد بيتعود
انتصار / مش فاهمه … مش مشكله بقولك …فاطمه
ناصر يتنهد
انتصار / قفشت مع هند
ناصر / عشان تكمل ما احنا مش ناقصنا غير خناق الحريم
ناصر يروح ينام فى السرير انتصار تروح جنبه
انتصار / طب اعمل ايه يعني ؟
ناصر / هتعملى ايه يعني هى اول و لا اخر مره الحريم يمسكوا فى بعض فى السرايا دى دا انتى و فاطمه كان فاضلكوا تكه و تجيبوا بعض من شعوركوا قبل كدا و اهو الحمد لله اتصافيتوا و الدنيا مشيت
انتصار / ايوه يعنى اعمل ايه برده؟ ما تشور عليا اعمل ايه؟
ناصر / هتعمله ايه يعني يا انتصار عرفتى تصلحى بينهم كان بها ما عرفتيش لا يكلف الله نفسا الا وسعها هو ايه اللى حصل اصلا دا البت ما غيرتش هدومها
انتصار / اقولك ايه بس
ناصر / قولى
انتصار / هند كانت بتوزع علينا الهدايا اللى جابتهالنا ….
…………………..
فى اوضه هند
هند / لا ما حكيتش لماما حاجه ما قولتلك كانت بتنيم ياسمينا … كلمت عبد الله ؟
مختار / هنروح بكره نشوف الشقه
هند / اعمل ايه مع مرات عمك دى ؟
مختار /دخلى من هنا و خرجى من الناحيه التانيه
هند / طب و هديه خديجه ؟
مختار / عاوزه تديهالها اديهاها مش عاوزه انتى اولى
هند / جبتك يا عبد المعين
مختار / انتى عاوزه ايه يا هند دلوقت
هند تبصله و عنيها تتملى دموع
هند / مش عاوزه … هنام … تصبح على خير
هند تنام فى السرير و تتغطى مختار يتنهد و يروح يحضنها من ضهرها و يزنقها على الحرف
هند / انت عاوز ايه دلوقت ؟
مختار / عاوز اصالحك
هند / مش زعلانه
مختار / قولتلك مليون مره دخلى من هنا و طلعى من الناحيه التانيه
هند / حاولت بس هى اسلوبها وحش اوى
مختار / ريحيها مش عاوزاكى تدى لخديجه الساعه قولى حاضر عوزاكى تجيبى لخديجه هديه دهب بسيطه مش موضوع يعني
هند / انت بتقول ايه يا مختار الموضوع مش كدا خالص
مختار / بسطى الدنيا يا هند العمر قصير خساره نضيعه فى كلام فاضي … انتى عارفه ناصر قالى ايه النهرده ؟
هند /خير ؟
مختار / بيقولى اتجدعن و هات عيل … شايفه يا هانم اخويا الكبير فاكرنى مقصر … هيبتى … و سمعتى .. بقوا فى الارض
هند / هههههههههههههههههههه
مختار / انا على اخر الزمن … يتقالى اتجدعن
هند / بسط الدنيا يا مختار ما تخدهاش على اعصابك
مختار / كلو الا دى يا هند و الراجل مننا ليه ايه غير دى
هند / هههههههههههههههههههه معلش يا حبيبي اللى ما يعرفك يجهلك
مختار / لا بس انا مش هسكت
هند / هتعمل ايه يعني هههههههههههههه
مختار / هكثف الجهود
هند / يا لاهوى
مختار / هى يا لاهوى واحد دى هتبقي يا لاهوى للصبح
هند / هههههههههههههههههههههه
مختار / معااااانا يا رب
…………………..
فى اوضه شاكر
فاطمه / يعني انت هتسكت بعد كل اللى حكيتهولك ده
شاكر / امال عوزانى اعمل ايه
فاطمه / انتصار بتولعها حريقه ما بتصدق جنازه و تشبع فيها لطم بدل ما تعقل البت و تقولها ان كلامى صح و تفهمها الاصول و ان هنا غير مصر ماشيه وراها تطبلها … و ياريت على كدا و بس دى بتسخنها عليا بالحداقه … دى ما تقصدشي … فاطمه طيبه بس بتفلت منها ساعات … هى ايه دى اللى بتفلت منى ؟
شاكر / هى ما تقصدش هى بتحاول تهدى الامور
فاطمه / كدا بتهدى !!! امال لو بتشعللها تعمل ايه
شاكر / انتى يعني لسه هتعرفى ام فاتن دلوقت
فاطمه / ما انا برده مستغرباها عمرها ما ميزت حد عن التانى اشمعن ست هند دى اللى عملالها حساب اوى كدا ان كانت هى و لا امها
شاكر / اهى ماشيه
فاطمه / و الله انت طيب دا حوار قال ايه احنا هنمشي و انتوا هتمسكوا و يوم يجر شهر ندخل فى سنه و حلنى بقي
شاكر / هههههههههههه يخربيت شطانك
فاطمه / بكره تقول فاطمه قالت
شاكر / شهاده حق انا شخصيا مش عاوزهم يمشوا الواد عبد الله ما يتشبعش منه و لا من خفه دمه و شهاده لله الكل بيحبه
فاطمه / ايوه بس برده غريب و السرايا مليانه حريم
شاكر / الواد متربى و ما بيدخلش السرايا لوحده حتى لما بيعوز امه بيشيع حد من العيال و دا على يدى
فاطمه / ما اتكلمتش بس برده … انت فاهمنى
شاكر / عدنه واحد من الغفر اللى بيباتو فى الجنينه و على البوابه و لا دول مش رجاله يعني
فاطمه / ايوه بس عبد الله مصراوى مش زى رجالتنا
شاكر / يا شيخه اتقى الله انتى شوفتى اى حاجه من الواد دا ادب الدنيا كلها و عينه علاطول فى الارض
فاطمه / يا خويا و انا قولت انه وحش بس الحب ما لوش كبير و البيت فيه بنات فى سن الجواز
شاكر / طب ياريت والله اوافق
فاطمه / بتهزر طبعا
شاكر / بس هو يشاور ان كانت مريم و لا سماح
فاطمه / يعني ترفضوا مغاورى و توافقوا على عبد الله يا لاهوى هى العيله دى عملالكوا عمل و لا ايه فى ايه عبد الله عن اى حد تانى تشيلوه كدا هو انتوا لحقتوا تعرفوه دا لسه جاى من مفيش
شاكر / عاشرناه
فاطمه / لا تمدح و لا تشكر غير بعد سنه و ست اشهر
شاكر / انتى شوفتيه اتقدم اصلا بقولك ايه نامى نامى انا راجع مهدود و تعبان و لولا غلاوتك كان زمانى بشخر من بدرى
فاطمه من تحت الدرس / عشت
شاكر / يلا تصبحى على خير
شاكر ينام و يشد الغطا فوقيه و فاطمه قاعده بتفرك
……………………
فى عربيه مغاورى تانى يوم الصبح
مغاورى سايق تليفونه يرن برقم غريب ياخده يرد
مغاورى / السلام عليكم
سماح / و عليكم السلام انا مش هطول عليك انا بس حبيت اشكرك على اللى انت عملته معايا
مغاورى / حصل خير
سماح / مع انى عاتبه عليك و مش قادره اسامحك
سماح تعيط
مغاورى / لا اله الا الله ليه كدا ؟
سماح / والله لولا انك الوحيد اللى وقفت جنبي لكنت حسبنت عليك
مغاورى / للدرجادى !!
سماح / انا مش بت شمال و لا تربيتي وحشه ليه تقولى كدا ليه تبصلى و تكلمنى كدا ذنبى يعني
مغاورى / لا اله الا الله انا والله ما اقصد اى حاجه
سماح / اقسم بالله لولا انى خايفه من ربنا انا كنت موت نفسي و ارتحت و ريحتكوا
مغاورى / لا يا بنت الناس اعقلى الدنيا ما تستاهلش
سماح / سمعتى تستاهل و هى البت ايه غير سمعه
مغاورى / سمعتك محفوظه يا بنت الناس و ما فيش حد يستجرى يهوب منها
سماح / بتقول كدا لكن من جواك انت قولتها فى وشي اقسم بالله الدم ضرب فى نفوخى ما كنت شايفه قدامى حسيت ان روحى بتتسحب منى و الله لولا صوت امى و هى بتصرخ فى ودانى ما كنت اتمسكت بالدنيا دى و لا استعنيتها
مغاورى / لا اله الا الله والله ما كنت اقصد حاجه و يا ستى حقك عليا انا ان قولت كلمتين فمن عشمى انتى عندى فى مقام اخواتى البنات و بخاف عليكي زى ما بخاف عليهم بالظبط
سماح / بالله يا مغاورى بالله انت شايفنى كدا يعني انا ما نزلتش من نظرك يعني بجد لسه عندك فى نفس الكفه
مغاورى / والله بقول الحقيقه بالعكس كمان زعلك انك غلطتى بيشفعلك و بعدين هو انا لسه هعرفك النهرده دا احنا متربيين سوا
سماح / ربنا يكرمك والله انت ما تعرف كلامك ده فرق معايا ازاى والله انا غلبانه و هبله و الله انا ما ليا فى اى حاجه حقك عليا
مغاورى / ما حصلش حاجه الحمد لله عدت على خير
سماح / و تانى بشكرك والله لولاك ما كنت عارفه هعمل ايه
مغاورى / الحمد لله عدت
سماح / كتر خيرك .. يلا فى حفظ الله
مغاورى / مع السلامه
مغاورى يقفل و يركن العربيه فى جنب و يبص فى الموبايل و هو ماسك الدريكسيون و مضايق و يفكر
………………………
فى شقه فاضيه تانى يوم
شيري و عبد الله و مختار بيلفوا فى الشقه
شيري / لا مش هندخل جامد كدا من اولها هنجيب الضروريات بس
عبد الله / حددى بس معنى ضروريات فى قاموسك عشان دى كلمه واسعه اوى يا ست الكل
شيري / يعني ممكن نجيب اوضه كامله و سرير و مكتب هنحط فى اوضتى الدولاب و نحط فى اوضتك العسكري و كومدينو و سرير و مكتب و المطبخ بوتجاز و تلاجه و كام حله على كام كبايه على كام طبق و الصاله انتريه معقول لا سفره و لا بهرجه و لا انت ايه رايك يا مختار يا ابنى
مختار / و الله يا امى انا جاى معاكوا غصب و متمم الحوار غصب و لو عليا مش عاجبنى اللى بتعملوه من اساسه فخلو مختار ساكت
عبد الله / هو فى محلات موبليا كويسه هنا و سعرها حنين ؟
مختار / فى كل اللى انت عاوزه يا عبد الله
شيري / حلو اوى هنتعبك تلف بينا شويه النهرده
مختار / تعبك راحه يا امى اتفضلى
الكل يمشي
………………………..
تانى يوم فى السرايا
سماح نازله على السلم مختار يناديها
مختار / سماح
سماح تقف و تبصله
مختار / على فين كدا ؟
سماح / هروح فين يعني ! هروح المطبخ اساعدهم
مختار / الله و مش خايفه تقعى تانى و لا يحصلك حاجه
سماح / الحمد لله كويسه
مختار / عرفتى اللى حصل للاستاذ عصام
سماح / اه والله زعلت اوى من اللى حصل هو اه كدا كدا اكيد ما كانش ينفع يدرسلى السنادى بس برده على الاقل كان يوصى زمايله علينا
مختار / بيقولوا مغاورى اللى عملها
سماح / بجد !! و يعمل كدا ليه ؟ ما افتكرش فى بينهم حاجه عشان مغاورى يعمل فيه كدا
مختار / هفهم لما اتكلم معاه و اساله و هساله كمان كنتوا بتتكلموا فى ايه قبل ما تقعى عندهم فى السرايا
سماح / و انت عرفت منين ان شاء الله انى اتكلمت مع مغاورى فى السرايا عندهم انت ما كنتش هناك اصلا و بعدين ما كانش العشم يا ابن عمى دا بدل ما تطلع سلاحك و تطخ اللى يجيب سيرتى على لسانه و لا صحيح نسيت انك سلمت سلاحك
مختار / بس عباده لسه شايله تفتكرى لو حكيتله
سماح / احكيله ناديله و احكيله اللى على راسه بطحه هو اللى يحسس عليها و انا ما عملتش حاجه ادارى منها
مختار / يعني كلمتى مغاورى و لا لا
سماح / اكلمه فى ايه و انا بيني و بينه ايه عشان يبقي فى بينا كلام
مختار / حاجه تخليكي تعيطي مثلا
سماح / انا مش عارفه انت بتتكلم عن ايه كل اللى دار بينا انى نسيت موبايلي فى عربيه عباده خدت منه المفتاح عشان اروح اجيبه اصوره و هو بيلبس عروسته الشبكه مغاورى شافنى خارجه سالنى على فين قولتله هجيب الموبايل و لسه هروح اجيبه دوخت وقعت فى الارض و اللى يقولك غير كدا كداب و واجهنى بيه
فاطمه تدخل
فاطمه / فى ايه يا سماح ؟ فى حاجه يا مختار واقفين على السلم كدا ليه ؟
مختار / ما فيش يا مراه عمى عن اذنكوا
مختار يسيب المكان و يمشي
فاطمه / فى ايه يا سماح ايه اللى حصل
سماح / فى الخيبه البيه ابن عمى بيصدق الغريب و جاى يحاسبنى بس والله ما هسكت انا اللى هقول لابويا و اخويا انا مش هفيه فى البيت ده
فاطمه / هتقولى لابوكى على ايه يا بت فهميني
سماح / سى زفت عبد الله اتصل بيه فى الساحل مخصوص و الفله حكايتين تلاته قال ايه انا كنت واقفه بعيط مع مغاورى قبل ما اقع هناك
فاطمه / هى حصلت
سماح / و ابن عمى بدل ما يلطشه بالقلم و يعلمه الادب و يوقفه عند حده جار يعاتبنى و يقولى هيسال مغاورى كنت بتكلم معاه فى ايه قال يعني لو كان سالنى كنت هكدب حسبي الله و نعم الوكيل حسبي الله و نعم الوكيل
سماح تجرى على اوضتها و هى بتعيط و فاطمه تنزل المطبخ تقابل فاتن
فاطمه / الست ام العروسه فين يا فاتن ؟
فاتن / فى الجنينه الورانيه باين
فاطمه / و امك معاها ؟
فاتن / بيتهيالي برده
فاطمه تمشي و عنيها بتطق شرار
…………………
فى الجنينه
انتصار و شيري بيمرجحوا العيال الصغيرين و يضحكوا فاطمه تدخل
فاطمه / منوره يا ام العروسه
شيري / نورك خير
فاطمه / خلاصه الكلام تلمى ابنك عن بنتى بدل قسما عظما
شيري / و ابنى ايه علاقته ببنتك
فاطمه / انا عارفاله بقي رايح جاى يتكلم عليها و يولع الدنيا حريقه انا بنتى مش لبانه فى بق اللى يسوى و اللى ما يسواش
انتصار / فى ايه يا فاطمه الكلام ده
فاطمه / اسكتى انتى يا ام فاتن انا مش طايقه روحى و يا انا يا الناس دول فى السرايا النهرده
شيري / كدا كدا كنا ماشيين انتى بتتكلمى كدا ليه اصلا
فاطمه / اتكلم زى ما انا عاوزه و لا سكتناله دخل بحماره
انتصار / بس يا فاطمه عيب كدا
فاطمه / انا اللى عيب و اللى عمله ابنها مش عيب دا احنا فاتحينله بيتنا و اوينه عشان يتكلم عن بناتنا بالشكل ده
شيري / انا مش هرد عليكي و لا حتى هتكلم معاكى انا جبت اخرى منك ليكي راجل يترد عليه
فاطمه / اه طبعا ليا راجل هيجي دلوقت و احكيله كل حاجه انتوا فكرين البت ما لهاش اهل دا عيلتها تسد عين الشمس و اللى يقول عن بنتى كلمه نمحيه من على وش الدنيا
انتصار / اهدى يا فاطمه ما تكبريش المواضيع
فاطمه / لو كانت بنتك
انتصار / و هى سماح مش بنتى و لا ايه اهدى فرجتى علينا الغفر ما يصحش كدا
فاطمه / انا اصلا كلامى مش معاكوا انا كلامى مع الرجاله
…………………..
فى المكتب
الرجاله كلها ملمومه
عبد الله / انا والله اول مره جيت لحضرتك كلمتك علاطول المرادى كلمت مختار لانى خفت اتكلم اعمل مشكله لكن والله حصل و لو عاوزين تواجهونى بمغاورى و سماح واجهونى
مختار / كان عاوز يكلمك و انا اللى منعته قولت اكلم انا سماح الاول
عبد الله / بس انا والله ما قولت غير اللى شوفته
عباده / كتر خيرك يا عبد الله بس هستاذنك ترجع المضيفه
عبد الله / عن اذنكوا
عبد الله يمشى و يقفل الباب وراه عباده يقوم يقف قدام مختار
عباده / اقسم بالله لو كان حد غيرك ما كنت سكت
مختار / اظبط يا عباده
ناصر / مش عاوز اسمع صوت
عباده / يعنى عاجبك اللى اتقال ده يا كبير هى سيره الحريم كدا بقت لعبه
ناصر / قولت ما اسمعش نفس
شاكر / هو عبد الله هيمشى امتى يا مختار
مختار / بكره و لا بعده بالكتير الشقه مش ناقصها غير شويه رفايع
شاكر / يكون احسن برده
شاكر يسيب المكان و يمشى و يقفل الباب وراه
ناصر / الكلام ده لو اتكرر تانى و لو حتى حرف واحد مش هيحصل كويس انتوا سامعين
ناصر يمشى
مختار / عبد الله ما بيكدبش
عباده / و انا اختى الكل بيحلف باخلاقها يا سى مختار
مختار/ زى ما تخصك تخصنى بس ما حدش كبير على الغلط
عباده / انت بتسخنى عليهم عاوزنى اقتلها و اقتله
مختار / اكيد لا طبعا بس على الاقل تحطها تحت عينك الفتره اللى جايه
عباده / انا مش هرد عليك
عباده يسيب المكان و يمشى مختار يقف يضرب كف على كف
……………………..
فى اوضه شيرى
هند بتلم الهدوم فى شنطه و شيري قاعده على سرير بتعيط الباب يخبط هند تروح تفتح تلاقى انتصار
انتصار / والله انا مكسوفه منكوا
انتصار تقفل الباب و تروح تقعد جنب شيرى
انتصار / الواحد مش عارف يقولك ايه
شيرى / ما تقوليش احنا اللى اسفين و انا ليا كلام تانى مع عبد الله و كلام تانى خالص مع مختار
انتصار / عبد الله ما غلطش
شيرى / لا غلط مالنا احنا ما تكلم اللى تكلمه هو كان ولى امرها احنا فى الاول و الاخر ضيوف
انتصار / ضيوف ايه بس دا بيتكوا
شيرى / ابوس ايدك كفايا
هند تقفل الشنطه
هند / انا خلصت
شيرى / نادى مختار ينزلها
هند / هتمشوا دلوقت يا ماما
شيرى / ايوه همشى الحمد لله ان الموقف ده حصل و احنا لينا مكان نروحله
انتصار / ما تقوليش كدا بقى
شيرى / كتر خيركوا فى كل اللى عملتوه معانا و ربنا يقدرنى اردلكوا وقفتكوا جنبنا
انتصار / انا عينى منك فى الارض
شيرى / بالعكس انا اللى محروجه منكوا بعد كل اللى عملتوه معانا نمشى بالطريقه دى بس هند ما لهاش دعوه و انا همشي و انا مطمنه عليها و هى معاكى
انتصار تبص فى الارض و تتنهد
……………………..
فى اوضه سماح
عباده / بتحلفى بالله بتحلفى بالله
سماح / انت ليه مش عاوز تصدقنى
عباده / عشان مختار ما قالكيش ان عبد الله اللى قاله عرفتى منين انه بيتكلم عن عبد الله لو ما كانش شافك بجد
سماح / انا ما قولتش انى ما كلمتش عباده بس الحوار كله سالنى رايحه فين قولتله رايحه اجيب الموبايل و فعلا عبد الله شافنى انا ما انكرتش لكن هو بيقول انى رغيت مع مغاورى و عيطت
عباده / عارفه يا بت يا سماح ان كنتى
سماح / اولعلكوا فى نفسى عشان ترتاحوا اخويا مش مصدقنى امال مين هيصدقنى دا انت اللى مربيني امتى شوفت منى حاجه وحشه لو مش مصدقنى اسال مغاورى اسال الغريب و كدب اختك
عباده / بت يا سماح دور المسكنه ده ما يكلش معايا انتى اساسا بقالك فتره مش مظبوطه و الكل مش مرتاحلك
سماح تبص لعباده و تبص على ترابيزه طبق فاكهه فيه سكينه تروح تجيب السكينه و تبص لعباده
سماح / اياكش عبد الله ينفعكوا
سماح تقطع شراينها عباده يجرى يمنعها و سماح تصرخ
……………………
فى المضيفه
عبد الله بيقفل شنطته و مختار قاعد بيتفرج عليه
مختار / يا ابنى الشقه لسه فيها شغل كتير دا الخشب ما اتنصبش
عبد الله / المراتب موجوده نقضى اليوم بالطول و لا بالعرض على ما النجار يجى الصبح ينصبها
مختار / و دا اسمه كلام يعنى
عبد الله / انا سمعت كلامك من اول يوم و اديك شوفت النتيجه
مختار / يعنى انا الغلطان دلوقت
عبد الله / يا مختار انت اكتر واحد عارف ان من خرج من داره اتقل من داره و انا قولتلك من زمان امشى انت اللى قولت لا
مختار / مش انت يعنى اللى قولت مش عاوز امشى
عبد الله / انا يا سيدى السبب و انا السبب كمان انى ما اتعلمتش البت دى اقسم بالله ما بلعتها من اول مره شوفتها بس اخت عباده و انا بحب عباده انا اللى استاهل ضرب الجزمه
مختار / انت ما غلطتش
عبد الله / لا غلطت انا مالى انا بتكلم مغاورى و لا بتعيط و لا تتفلق انا مالى
مختار / موقف و عدى
عبد الله / لا يا مختار ما عداش انا ماشى انا و امى هنمشى و انت بكره و لا بعده هتنزل الشغل و هند هى اللى هتبقى فى وش المدفع و لوحدها
مختار / لا مش لوحدها
عبد الله / هو ايه اللى مش لوحدها دا الست ام عباده مش سيباها فى حالها و لا هى و لا امى و فى الرايحه و الجايه تحرق دمهم نقوم بعد ما نمشى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
