رواية البر التاني الفصل الثاني عشر 12 بقلم لولو محمد
رواية البر التاني الجزء الثاني عشر
رواية البر التاني البارت الثاني عشر
رواية البر التاني الحلقة الثانية عشر
سماح / هو ده اللى بتفكروا فيه و مش خايفين لما عباده يشوفنى بالمكياج هيعمل فيا ايه
هند / انتى تقريبا مش حاطه حاجه
سماح / انتى ما تعرفيش عباده اخويا
مريم / مش هيعمل حاجه ما كلنا حاطين و بعدين هو انتى يعني جيتي هنا ليه ما دام مش هتحطى
سماح / انتى مشوفتيهوش و احنا بنقى الفستان ده لا ضيق دا مجرجر ده مطرز بزياده ده فاقع لما طهقت
هند / بس انتى فستانك حلو اوى يا سماح لايق جدا عليكي و على جسمك ما شاء الله
سماح / و انتى كمان فستانك حلو اوى
هند / عقبالك عقبالكوا كلكوا يا بنات
مريم / هو انتوا هترقصوا سلو مع بعض
البنات كلهم يضحكوا و هند تبصلهم باستغراب
هند / هو المفروض لا
بنت / هيمسك ايدك و يحضنك و انتوا لسه فى الخطوبه
هند / لا مش لدرجه الحضن يعني
مريم / يعني مش هيشيلك و يلف بيكي زى ما بنشوف فى الافلام و النت
هند / لا ما افتكرش ما ينفعش بيتهيالي
سماح / و لا حتى البوسه بتاعه التورته لما بيجيبوا حته كبيره على شوكه و يخلوكوا انتوا الاتنين تقطموا منها فتبوسوا بعض
هند / لا طبعا انتوا عندكوا الكلام ده
سماح / انتوا اللى عندكوا
هند / مش كل الناس على فكره
تليفون هند يرن بنت تجيبهولها ترد بخجل و البنات فوق راسها
هند / ازيك
مختار / احنا جاهزين نيجي و لا ايه
هند / لسه شويه ما خلصناش
مختار / مش عاوزين نتاخر الناس بدات تيجي فى القاعه و لسه هنروح الفوتوسيشن بتاعك ده
هند / احنا بسم الله ما شاء الله كتير دا لو كل واحده اخدت ربع ساعه مش هنلحق
مختار / طب قدامكوا قد ايه يعني
هند / ثوانى … لو سمحتى لو سمحتى
واحده من الكوافيرات تبص
هند / قدامنا قد ايه
الكوافيره / نص ساعه بالكتير ان شاء الله
مريم / انا لسه ما عملتش
الكوافيره / دقيقه واحده و اخلص و اخدك
هند / نص ساعه و تعالوا
مختار / تمام … انتى حاطه روج لونه ايه
هند / ايه !!!
مختار / المكياج بتاعك لونه ايه
هند / مش احمر ما تخافش
مختار / مش خايف ما كانش هيليق مع الازرق و كدا خليه فى الحنه و لا خليهولى
هند / اقفل يا مختار
مختار / عكيت تاني و لا ايه
هند / اقفل يا مختار اقفل مش وقتك سلام
هند تقفل
سماح / شوفوا شوفوا وشها احمر ازاى
هند و البنات يضحكوا
الكوافيره / انا خلصت مين عليها الدور
مريم / انا
مريم تروح تقعد مكان بنت تانيه
……………………
فى اوضه يوسف
يوسف و يس و على قاعدين بيتكلموا
يوسف / يعني كان ملاك نزل من السما ايه اللى يخلي واحد زى ده يتغرب و يجي يدرس هنا الا اذا كان فى حوار فى بلده
يس / مش شرط ما يمكن جاى يعط
يوسف / هو ده انا عاوز اثبت ده
على / معلش يعني دا منظر واحد بتاع بنات اصلا
يس / انت نسيت الصاروخ اللى جتله الجامعه مرتين
يوسف / انا قدامى لحد ما الامتحانات تخلص اكون عرفت قراره هنا و فى البلد و قسما بالله اللى هيجيبلى خبر يفرحنى له منى اللى عمره ما حلم بيه
على / احنا عنينا ليك من غير حاجه بس السؤال و التطقيس هيتكلف كتير خصوصا ان دى سكه سفر يعني
يوسف / و انا من امتى اتاخرت عليكوا فى جنيه يعني
على / مش القصد والله انا بس بتكلم ان اخوك مقشفر
يوسف يقوم و يفتح درج و يطلع رزمتين فلوس و يدى لكل واحد رزمه
يوسف / عاوز غسيله الاسود هو و عيلته لسابع جد
يس بيعد الفلوس
يس / اعتبره اتلط
على / و بعدين احنا هنروح بعيد ليه ان ما لقيناش نلطه احنا
يوسف / ازاى
على / ايه يا جو مالك مش مركز ليه نكرى عليه بت سكه تلاغيه و نطلع منها باللى نقدر عليه
يس / اما حته فكره ياض يا على صحيح يا يوسف ما تشوف الحوار ده
يوسف / انا ما اعرفش امشي فى الحوار ده ما انتوا عارفين ما ليش فى الشمال
يس / يا عم دا مفيش اسهل من الشقط خد انت بس عربيتك و اتمشي فى الشارع واخرى و انت بتشاور بكام ورقه من دول هتلاقيهم بيترموا تحت كاوتش عربيتك
على / لو عاوز سلفني عربيتك يومين تلاته اظبطلك الادارء و اخلصلك الحوار
يوسف ياخد مفتاح العربيه و يديه لعلى
يوسف / ما تغلاش عليك
على / اعتبر الجوازه باظت
……………………….
فى الكوافير
الكوافيره بتحط الرتوش النهائيه لهند
مريم / وصلوا وصلوا
هند / خلصنا ؟
الكوافيره / تمام
ست / حسابك كام يا عروسه عشان نمشي
الكوافيره / اتفضلى معايا
الست تروح مع الكوافيره
مريم / هروح اناديه يشوفك اعمليله مفاجاه و لفى و نشوف رد فعله على شكلك ماشي و انا هصور
هند / بلاش احسن خلينا نطلع عادى
مريم / عشان خاطرى عشان خاطرى صورى يا سماح على منادى لعمى مختار
سماح / انجزى
مريم تطلع بره و هند عماله تبص على سماح و البنات و مبسوطه بنت تلفها و هى واقفه قدام المرايه مختار يدخل و مريم بتشده
مختار / فى ايه بتسحبيني كدا ليه
مختار يشوف انعكاس هند فى المرايه و هى مدياله ضهرها و مكسوفه و عماله تعض فى شفايفها و تفرك فى ايديها يبتسم
مريم / شوف عروستك
مختار يوطى على مريم
مختار / هو انا المفروض اعمل ايه هنا
مريم / و انا اللى هقولك
مختار / الف جنيه و غشيشيني
مريم / ما اعرفش بيحضنوا بعض
مختار / صحيح اللى يمشي ورا العيال وسعى
مختار يتشجع و يقرب من هند
مختار / انا شايفك فى المرايه على فكره
هند تبتسم اوى و تبص فى الارض و تلفله
مختار / بس كدا احلى
مختار يمدلها ايده تانجه بطراطيف صوابعها
سماح / ايه مش هتقولها رايك و لا ايه
مختار يبص لسماح و يبص لهند بصاله و مبتسمه و الكل بيبص عليهم
مختار / حلو يلا بينا بقي
البنات يضحكوا و هند تبص فى الارض و تدارى كسوفها مختار يبتسم و يتحرك و هى تتحرك معاه اول ما تطلع من الكوافير الزغاريط من كل البنات و الستات و مريم تساعد هند تركب سماح تفتح الباب و تركب قدام مريم تبص لمختار بحزن
مختار / تعالى جنبنا
مريم تجرى تلف تركب من الناحيه التانيه و مختار متابعها لحد ما تقفل الباب يتنهد و يركب جنب هند مريم ماسكه فى ايد هند و فرحانين
مختار / طب اروح انا و لا ايه
مريم / مش انت قولتلى اركبى و لا انت كنت ناوى تمسك ايدها و لا ايه
مختار / شايفه بستحمل عشانك ايه عشان تعرفى
هند / هههههههههههههههههههه
مختار يبتسم و يقفل باب العربيه
……………………
فى القاعه
محمد واقف مع رجاله
راجل ١ / الف مبروك يا محمد لا ليك حق تدارى و ما تعرفناش الا اخر ثانيه
محمد / اقسم بالله كلنا عارفين فى اخر ثانيه كل حاجه جت بسرعه
راجل ٢ / امال انا مش شايف لا محمود و لا حمدى و لا حد من اخواتك خالص كنت عاوز اسلم عليهم
راجل ١ / تلاقيهم فى الزفه زمانهم جايين
محمد / هستاذن اسلم على باقي الناس
راجل ٢ / اتفضل اتفضل
راجل ١ / بس نبهنا لما البوفيه يفتح الله يخليك ههههههههههه
محمد / هههههههههههههههههه امال طبعا
محمد يروح لشيرى و هو زعلان هى مبسوطه جدا
شيري / انا ما كنتش متخيله ان كل الناس دى هتيجي انا تعبت من كتر السلام
محمد / ملناش حد فيهم يا شيريهان
شيري تبصله
محمد / عاوزين يكسروا فرحتى ببنتى
شيري / لما هتشوفها و هى داخله بالفستان و الطرحه هتنسي الدنيا باللى فيها
محمد يهز راسه بحزن ناصر يدخل
ناصر / انت هنا يا حج محمد و انا عمال ادور عليك
محمد / ليه خير فى حاجه و لا ايه
ناصر / هعرفك على واحد من اكبر تجار الفاكهه فى مصر و هخليه يعرفك بصحابه تجار البقاله عشان يوردولك فى المحل بتاعك
محمد / ما لوش لزوم الاحراج ده يا حج ناصر مش وقته
ناصر / لا وقته تعال لسه على ما العرسان يجوا الراجل ده انا بحجزله محصول الارض بالسنتين و التلاته قدام
محمد / ربنا يفتحها عليك يا حج ناصر
شيري / روح معاه يا محمد سلم على الراجل حتى لو من غير مصلحه دا ضيفك برده
ناصر / الله يفتح عليكي يا ست الكل
محمد / اتفضل يا حج ناصر
محمد يروح مع ناصر و انتصار تروح لشيري تروح تقعد جنب فاطمه مبوزه و عماله تهوى بمروحه
شيري / الفرح لسه ما بداش و الواحد رجله وجعته
فاطمه / اقعدى ارتاحى
شيري / على فكره انا سالت عليكي كتير
فاطمه / وصل انتصار كانت بتبلغنى فى التليفون
شيري / طب الحمد لله
فاطمه / و الله الواحد لو كان عارف كان جه بدرى و لا على الاقل قام بالواجب و جاب هديه تليق بمقامه
شيري / مقامك عالى يا بطوط كفايا اننا خلاص هنبقي نسايب هو فى احلى من كدا هديه
فاطمه / تعيشى كلك زوق
فاطمه تهوى بالمروحه بملل شيري تبص على الناس و هى مبتسمه
فاطمه / فرحى كان كدا برده السرايا كانت كلها اهل شاكر و نسايبه و انا كنت واقفه وسطيهم بطولى
شيري تبصلها
فاطمه / كان عندى اربعتاشر سنه حلو و مدوره و خدودى حمره و لا الطماطم
شيري / و لسه حلوه
فاطمه / انتى احلى عن اذنك اقوم اسلم على الناس بدل ما يزعلوا
فاطمه تبتسم و تقوم
…………………..
فى الاستوديو
الراجل قافل على مختار و هند و بيتصوروا وضعيات كلاسيك و هما متحفظين جدا
الراجل / كفايا كلاسيك بقي ندخل على الجد بقي
الراجل يسيب الكاميره و يروح يقف قدامهم
الراجل / حط ايدك على وسطها
مختار / خلينا فى الكلاسيك احسن لابوها يقتلنى
هند / هههههههههههههههههههه
الراجل / يا عريس دى صوره للذكرى
مختار / ما انا لو عملت اللى انت بتقول عليه انا اللى هبقي ذكرى خلي الجد بتاعك ده فى كتب الكتاب و الدخله ان شاء الله هعملك كل اللى انت عاوزه دلوقت بس شوفلنا كام صوره خفيفه كدا
الراجل / ينفع كدا يا عروسه
هند / كدا احسن
الراجل / طب بصوا لبعض و كانكوا بترقصوا سلو انت و هى و انت حط ايدك بس ما تلمسش يا سيدي وسطها ينفع معاك كدا
مختار / ينفع
مختار و هند ياخدوا الوضعيات
الراجل / بصوا لبعض بقى
هند تبص لمختار عنيهم تيجي فى عنين بعض يبتسموا تلقائي
الراجل / لفى بقي يا عروسه و بصي فى الارض بجنب و وشك عندى
هند تلف الراجل يروح يعدلها
الراجل / زى ما انت يا عريس كانك ماسكها من ضهرها ايدك على وسطها … ايوه كدا
الراجل يروح يصور
الراجل / تمام شايفين المرايه اللى هناك روحى يا عروسه بصي فيها و انت يا عريس بص على عروستك
الاتنين يروحوا يقفوا و الراجل يصورهم من الجنب بيبصوا لبعض و مبتسمين
الراجل / اقعدى على الارض هنا كدا يا عروسه
هند تبص لمختار يعمل ما اعرفش هند تبتسم و تروح تقعد و الراجل يفرش الفستان من حواليها و يعدلها و يصورها
الراجل / انت اقلع البدله بقي و اقعد على الفستان يا عريس
مختار يشاور على الارض
الراجل / ايوه فى ضهرها كدا و علق البدله على ضهره بصباعك و انت ساند على ايدك التانيه
مختار يعمل اللى الراجل طلبه و الراجل يصور
الراجل / ناخد صوره تانيه بقي
مختار / لا حلو كدا اوى نادى البنات بقي يتصوروا مع العروسه لحسن كدا هنتاخر
مختار يقوم و يساعد هند تقوم و يعدلها فستانها و هى بصاله و مستغربه و مبتسمه مختار يلبس بدلته و يفتح الباب
مختار / اللى عاوز يتصور معانا يجى
عبد الله و البنات يدخلوا و يتصوروا حبه بحبه
…………………….
فى القاعه
راجل بهيبه داخل و حواليه حراسه كبيره تقف على الباب الرجاله كلهم يروحوا يسلموا عليه
ناصر / اهلا و سهلا اهلا و سهلا بمعالي الوزير المحافظ اتارى الدنيا نورت
المحافظ / منوره باهلها يا حج ناصر ايه يا راجل ينفع كدا كل اما اشوفك عمال تصغر و تحلو قولى السر عشان اقلدك
ناصر / هههههههههههههههههه ما قولتلك قولتلى ما اقدرش على كدا
المحافظ / والله معاك حق الخضره و الاكل الصحي بس الواحد و مشاغله بيضطر ياكل اى حاجه فى المحافظه هعمل ايه
ناصر / كان الله فى العون كان الله فى العون
المحافظ / شكلى جيت بدرى واضح ان عريسنا لسه ما جاش مع انى زعلان منه دا انا كنت واعده بسلوى بنتى ههههههههههههه
ناصر / رزقها فى اللى احسن منه ان شاء الله
المحافظ / انا بهزر معاك يا حج ناصر انت عارف انت بالنسبالي ايه
ناصر / القلوب عند بعضيها والله
صوت ضرب نار كبير فى الشارع الحرس يدخلوا يحموا المحافظ
ناصر / ايه يا رجاله الزفه وصلت انتوا جداد و لا ايه دا انتوا وسط عيله الزيني
المحافظ / هههههههههههههههههههههه معلش يا حج ناصر شغلهم
ناصر / اتفضل معاليك ارتاح انت هتفضل واقف اتفضل اتفضل
………………..
قدام القاعه
الرجاله كلها بتضرب نار و عربيه الزفه مفتحه الاربع ابواب و مختار و مريم بيحاولوا ينزلوا هند من العربيه مش راضيه تنزل و كاتمه ودانها بايديها
مختار / يا بنتى ما تخافيش تعالى
هند / لا لما يبطلوا
مريم / ههههههههههههههههههههههه يا جبانه تعالى دول فرحانين بيكي
هند / صوته مرعب اوى خليهم يبطلوا
مختار يشاور للرجاله تبطل هند تنزل عباده يضرب نار فى الهوا هند تتحامى فى مختار و تكلبش فيه و البنات بيضحكوا
مختار / ما تبطل يا عباده مش قولت خلاص
عباده / هههههههههههههههههه انشفى يا عروسه دا انتى هتبقي مرات مختار الزيني
هند / و دى لازم تضرب نار يعني
عباده / انت ما قولتلهاش و لا ايه
مختار يشاور للمزمار يستغلوا و الكل يرقص و خصوصا عبد الله و صحابه و شيري تنزل ترقص مع هند يمسكوا ايدين بعض و مختار عينه عليهم و البنات بتسقف يروح ياخد هند و يتحركوا لجوه
مختار / المحافظ فوق مش عاوزين ناخره يا رجاله يلا نكمل فوق
الكل يتحرك و هند تانج مختار بطراطيف صوابعها و المزمار يزفهم و يدخلوا القاعه هند تدور بعنيها على اهلها مفيش حد اسماء الله الحسنى تشتغل هند عنيها تدمع مختار يوطى عليها
مختار / كان المفروض نشوف مكان اكبر الناس لحم فوق بعض
هند / ما اعرفش حد فيهم
مختار / الليله ليلتك انبسطى و ما تفكريش الا فى روحك بس ما تنبسطيش اوى فى الرقص يعني خفافي كدا زى تحت
هند / ما برقصش قدام رجاله اصلا مش محتاج تنبهنى
مختار / ما انا عارف انا بس بنكشك
هند / ماشي
مختار / ايه ده انكشك عادى
هند / ههههههههههههههههههه بس بقي
مختار / بسيت انا شاطر اوى فى البستسه
هند / هههههههههههههههههههه الناس
مختار / قولى لنفسك بضحكتك دى
هند تلم نفسها و تقف هى و هو و كل شويه يبصوا لبعض و يضحكوا
………………………
قدام القاعه
عربيه ليموزين تقف و الباب يتفتح و تنزل فيرا لابسه فستان احمر مفتوح على هايل عالى و شعرها نازل على ضهرها و مكياج فاقع و روج احمر تتحرك بثقه وسط الرجاله و تدخل و الكل بيبصوا لبعض لحد ما تبقي جوه القاعه و مختار و هند بيرقصوا سلو عباده يشوفها عنيه توسع و يبص على المحافظ و يبص على مختار و يروحلها
عباده / انتى بتعملى ايه هنا
فيرا / بعمل الواجب عقبالك عباده
عباده / امشي بالزوق احسنلك
فيرا / ان كنت خايف الناس تشوفني و تسال انا مين فللاسف اتاخرت اوى يا عباده حتى العرسان عينهم علينا دلوقت
فاطمه تدخل و تجيب فيرا من فوق لتحت و تبص لعباده
فاطمه / مين دى يا عباده
فيرا / انا الرقاصه الف مبروك
فاطمه تبص لعباده
عباده / زى ما قولت احنا ما اتفقناش مع رقاصات
فيرا تبص لمختار و هند عنيهم عليها و هما بيرقصوا ناصر يقوم يروح ناحيتها
فيرا / تمام
فيرا تمشي و ناصر يروح مع عباده
فاطمه / اهل العروسه جايبين رقاصه يا كبيرنا
عباده / مش هما يا اما
ناصر / روحى يا فاطمه اقعدى مع الحريم عاوز عباده فى كلمتين
فاطمه / تمام يا كبيرنا
فاطمه تروح تقعد و الكل يتودود
سماح / مين دى اللى كانت بتتكلم مع عباده يا اما
فاطمه / رقاصه بس اقطع دراعى من هنا هو الحكايه دى فيها ان
سماح / دى شكلها هتحلو على الاخر
فاطمه / اخرسي يا بت
فاطمه عينها على عباده بيسيب القاعه و هو عصبى و ناصر يروح يقعد مع محمد و المحافظ
هند و مختار يخلصوا الرقصه و يروحوا يقعدوا فى الكوشه
هند / مش دى البنت بتاعه الكليه
يمنى و صحاب مختار يروحوا يسلموا عليهم
ماجد / هو ابن عمك مشى الوحش ليه يا ميخو
مختار / وقتك دلوقت انت وقتك
ماجد / لا مؤاخذه الف مبروك يا هند
هند / الله يبارك فيك
يمنى تقرص هند فى ركبتها
هند / كفايا ورمت اقسم بالله من الصبح و هما نازلين تقريص
يمنى / ما جتش عليا و لا هتستخسريها فيا و لا ايه
هند / لا ازاى
يمنى / بس المكان جامد و الفستان جامد يخربيت كدا طالعه قمر
هند / شكرا
ماجد / يعني البوفيه بعد الشبكه علاطول مش كدا
هشام / استر فى حته يا ابني بقي
عبد الله يدخل
عبد الله / التورته جامده اوى يا هند تلت ادوار كبار و فوقيها ورد و عرايس و شكلها حلو اوى بجد
هند / صورتها
عبد الله / اه
الدى جاى / ياريت ضيوفنا الاعزاء يقعدوا مكانهم و ندى فرصه للعرسان يلبسوا الشبكه الاطفال من الدانس فلور لو سمحتوا يا جماعه
كل ام تشد ابنها و الكل يتفرق و تدخل ياسمينا شايله سبت ورد بترمى منه فى الارض و وراها طبور بنات مريم و سماح و باقي بنات العيله كل واحده شايله صينيه عليها دهب و الكاميرا مان بيصور انتصار و شيري يروحوا يقفوا جنب العرسان و البنات تتحرك ناحيه مختار و يلبسها صينيه صينيه فوق بعضوا
هند / مفيش مكان هلبس فين
مختار / هى لازم تلبس كلو
انتصار / على الاقل لبسها السلاسل و الغوايش
مختار يلبس هند و الكل بيزغرط
هند / شكلى بقي صعب اوى كفايا
انتصار / اجمدى يا عروسه هانت
هند / رقبتى وجعتنى والله
انتصار / هههههههههههههههههههه طب كفايا لفوا بيهم يا بنات فرجوا الناس
هند / لا استنوا خدوا دول انا مش عارفه ارفع ايدي حتى و الله رقبتي وجعتني
انتصار / يا بت بلاش دلع دول حياله كام غويشه امال لو لبستى كردال حماتى اللى ليكي عندى فى البلد هتعملى ايه
هند تبص لمختار متابعها و مبتسم
هند / طب بجد خدوهم
مختار / خلاص خلى الكام حته المدلعه اللى هتروح بيهم و خدوا الباقي عينوه
هند تقلع باقى الدهب و يرجعوه فى الصوانى و البنات تاخدوا و يلفوا بيه على الترابيزات و يطلعوا بره يعينوه تكون التورته نزلت الراجل يعمل الشوكه الواحده مختار يهز راسه لا و البوفيه ينزل اطباق ورا بعض و الترابيزات تتملى اكل الويدنج بلانر ياخدهم فى اوضه فيها اكل لوحدهم
هند / انا على لقمه الفطار و هموت من الجوع
مختار / الف هنا
هند / انا مش فاهمه ايه علاقه عباده بواحده زى دى
مختار / شغل للاسف يلا منه لله اللى دبسنا فى الشغل معاها
هند / مش فاهمه يعني دى بتشتغل ايه معاكوا
ماجد يدخل
ماجد / مش بقولك يا عم حطينلهم التقايل هنا
مختار / اسحب كرسي و تعال مد ايدك
ماجد / دا انا همد ايدي و رجلى لامؤاخذه يعني يا هند
هند / ههههههههههههه خد راحتك
هشام / بس دا انت طلعت غنى نفخ ياله و لا يبان عليك
مختار / ليه و انا كنت امتى ادعيت الفقر
هشام / يا عم ربنا يزيدك بدل ما تفتكرني بنق عليك و لا حاجه
ماجد / بس الليله دى تلاقيها كلفتك جامد اوى يا صحبي لا مؤاخذه يا هند يعني
هشام / يا عم خف يا عم سبلهم حاجه ياكلوها و بعدين احنا شكلنا رخم اوى
ماجد / معاك حق تعال تعال ننزل نلحق حاجه من اللى تحت
مختار / سيب حاجه للناس يا ابني
ماجد يشاور لمختار سلام و يمشوا و مختار و هند متابعينهم و هما بيضحكوا
مختار / دول اللى مصبريني على مصر و غربتها
هند / هما شكلهم محترم اوى
مختار / جدا و على فكره ماجد لولا انه واخد عليا و العشم واخده ما يتصرفش كدا
هند / و لا يتصرف براحته يعني
مختار / و هشام كمان من اجدع الناس اللى ممكن الواحد يقابلهم و من اول الناس اللى قابلتها فى الكليه تعرفي اول علاقتى بيه كانت خناقه
هند / ههههههههههههه ما محبه الا من بعد عداوه يعني
مختار / لا مش عداوه يعني بس انا كنت صغير و جاى من البلد طازه و كدا انا الغلطان
هند / مش سهل تلاقي حد يعترف انه كان غلطان يا ترى هتعمل كدا معايا و لا دا اوبشن لهشام بس
مختار / لا هعترف و هراضيكي كمان
هند / يكفيني تراضيني
مختار يبتسم
هند / بس فعلا الليله دى كلفت جامد اوى
مختار / اقل من مقامك كمان بس هو الواحد بس عشان الوقت
هند / بدات تتحسن اهو بس مش هعشم نفسي اوى يعني لتكون طلعت منك كدا يعني و لا حاجه
مختار / ههههههههههههههههه لا انا يجي منى والله بس انتى اصبرى عليا
هند / هههههههههههههههههههههه لا ما تقلقش هصبر احنا ورانا ايه المهم نوصل فى الاخر بس
مختار / لا هنوصل ان شاء الله مش بتقولى بتحسن
هند / هههههههههههههههههه
يمنى تدخل تسلم على هند
يمنى / لازم امشي عشان ما اتاخرش
هند / بدرى كدا
يمنى تبتسم بحرج
هند / طب تمام
مختار / احنا معانا عربيات لو عاوزه حد يوصلك
يمنى / ميرسي بس انا هاخد تاكس و خلاص
مختار / طب استنى تعالى
مختار يطلع بره مع يمنى و هند متابعه من بعيد مختار يقابل امين يوشوشه امين يهز راسه
امين / اتفضلي هوقفلك تاكس
يمنى تبتسم و تمشي مع امين و مختار يرجع لهند
مختار / خليته ياخد نمره التاكس
هند تبتسم اوى عبد الرحمن يدخل
عبد الرحمن / لا حقك طبعا
عبد الرحمن يحضن مختار
مختار / اتاخرت ليه يا ابني
عبد الرحمن / دا انا جاى بمعادى بالظبط ما فاتنيش البوفيه الحمد لله الف مبروك يا عروسه
هند / الله يبارك فيك اقعد اتفضل
عبد الرحمن / لا ما بحبش ابقي عازول هسيبكوا و انزل على ما اخد جوله على عمامى اصلا هيكون الفرح خلص
مختار / تمام يلا عيش
عبد الرحمن يمشي
مختار / دا عبد الرحمن ابن عمى زكريا الله يرحمه عايش هنا فى مصر فى اخر سنه فى كليه صيدله بس واد فلته دماغه عاليه جدا و عبقري و دكاترته بيشكروا فيه جدا و بيخلوه يساعدهم فى ابحاثهم
هند / ما شاء الله
مختار / ان شاء الله لو ما اتكوستش هيبقي معيد ان شاء الله
هند / شوفته جايلك مره
مختار / اه فاكر
الفوتجرافر يدخل و معاه مريم
الفوتوجرافر / ناخدكوا كام شوت كدا قبل ما البوفيه يتشال
مختار يبص لهند يلاقيها قامت وقفت يبتسم و يقوم يقف
……………………….
فى عماره هند
عيله مختار و اسره هند طالع بيضحكوا
شيري / انوى انت بس و انا اعملك اللى انت عاوزه
عبد الله / اعتبر ده وعد يعنى
شيري / مش هتبقى دكتور خلاص يبقى تعمل اللى انت عاوزه
عبد الله / شاهد يا مختار وعدتنى بفرح زى ده
مختار / اعمل انت بس اللى عليك و ما لكش دعوه و دا وعد منى انا
ناصر / ابن الزيني لما بيوعد يبقى تحط فى بطنك بطيخه صيفى
محمد و مختار كل واحد فيهم يفتح باب شقته انتصار تحضن هند
انتصار / عقبال الفرحه الكبيره
هند / ان شاء الله
انتصار / تصبحوا على خير
شيري / و انتى من اهله
الكل يدخل و هند و مختار و شيرى واقفين
شيرى / طب ادخل انا و لا ايه هتفضلوا على السلم
هند تبص لمامتها و ترجع تبص لمختار بحرج
هند / تصبح على خير
مختار / و انتى من اهله
هند تدخل شيرى تبتسم و تقفل الباب و مختار واقف يدخل يخبط على اوضه ست تفتح
مختار / مريم عندك
الست / بتغير
مختار / ما تخليهاش تنام عاوزها فى حاجه
انتصار تطلع من اوضتها
انتصار / فى ايه يا مختار عاوز مريم فى ايه السعادى
مختار / هتكلم معاها فى حاجه ايه مالك اتخضيتي كدا ليه
مختار يشيل كرسيين و يدخلهم المطبخ
انتصار / طب قولى لو كانت عملت حاجه
مختار / ما عملتش هتكلم معاها فى حاجه بسرعه قبل ما اتلخم و تسافروا
انتصار تبصله و تهز راسها و تطلع هى و هو الصاله الكل عينه على مختار انتصار تفتح باب الاوضه بتاعه مريم و تدخل تلاقيها بتلبس العبايه
انتصار / عملتى ايه يا بت
مريم / والله ما عملت و بعدين هو عمى يعنى ما بيتكلمش معايا الا لو كنت عامله مصيبه
انتصار / لا يا روح عمك مش قصه كلام قصه التوقيت لو ما كنتيش عامله مصيبه ما كانش صمم دلوقت و احنا راجعين تعبانين و هو ذات نفسه مهلوك
مريم / والله ما عملت
الست / هنعرف لما يكلمها قال يا خبر النهرده بفلوس بعد خمس دقايق يبقى ببلاش
مريم تطلع بره مختار يشاورلها على المطبخ تبصلهم يسبقها و يدخل تدخل وراه مختار يقفل الباب الستات تتجمع على الباب يحاولوا يتصنطوا
ناصر / احم احم
الستات تتفرق و هما محرجين من ناصر
………………………………
فى المطبخ
مختار يلف الكرسي و يقعد و يسند بايديه على ضهر الكرسى و مريم بتفرك ايديها و باصه فى الارض
مختار / مالك يا بت هو انا ماسكلك خرزانه انا بس عاوز اتكلم معاكى
مريم تبصه
مختار / فى الكوافير لما بقولك غشيشينى بتقولى احضنها
مريم / هما بيعملوا
مختار / احنا ربنا ادانا عقل يا مريم مش كل حاجه نشوفها نقلدها فى حلال و حرام و فى صح و غلط و فى فرق بين الاتنين يعنى مش دايما الصح بيكون حلال مش دايما ينفع نعمل الصح
مريم / مش فاهمه
مختار / واد حليوه و مقتدر و ابن ناس قابلك فى الكليه و عملك مفاجاه و ورد و بلالين و يفط تتجوزيني و الكل ملموم حواليكي بيسقفوا و يصفروا هتعملى ايه
مريم تبص لخالها و مش عارفه ترد مختار يبتسم
مختار / بلاش دى عريس ابن ناس دخل البيت من بابه و اهلك وافقوا عليه هل ده معناه انه بقى جوزك و لا لسه غريب عنك
مريم / غريب
مختار / يعنى ما ينفعش لا حضن و لا يشيلك و يلف بيكي و لا الكلام بتاع الفايس ده و مش معنى ان ناس بتعمل الغلط و فى ناس تانيه بتنبهر بيه انه بقى صح يا مريم
مريم / اكمن هند قهراويه و كدا
مختار / مش معنى انها قهراويه انها هتعمل الغلط مش كلهم كدا و هند لو كانت بتعمل الحاجات دى انا ما كنتش هربط اسمها باسمى هند عارفه الصح من الغلط و الحلال من الحرام زيك بالظبط
مريم تبص لمختار
مختار / تعرفى ان هند ابن عمها اتقدملها فى الكليه بالطريقه اللى قولتلك عليها من شويه و هى رفضت
مريم تتعدل فى قعدتها
مختار / قالتله هو انا ما ليش اب تطلبنى منه
مريم / كانت مستنياك
مختار / اصلى مرزق زى ما انا مرزق ان ليا بنت اخ حلوه زيك
مريم تبتسم
مختار / انا بكلمك عشان احنا صحاب مش عشان انا عمك
مريم / عارفه
مختار / فكرى فى كلامى كويس يا مريم مش معنى ان الحاجه دى هتعجب الناس و هيحكوا و يتحاكوا عليها و يحسدونى عليها كمان انها صح ما حدش يستاهل تضيعى اخرتك عشانها
مريم تبتسم
مختار / قومى يلا ارتاحى قدامك سفر طويل الصبح
مريم / اقوم ارتاح و لا اتوزع
مختار / بره يا جزمه
مريم / ههههههههههههههههههههههههه
مختار يبتسم مريم تقوم تحضنه
مريم / ده حضن حلال
مختار / احلى حضن ربنا ما يحرمنى منك يا مريم و افرح بيكي
مريم / امين
مختار / ههههههههههههههههههههههههه
مريم تفتح الباب و تطلع و مختار يقوم يقفل الباب وراها و يتصل بحد
فيرا / كنت متاكده انك مش هتقدر تنام الا لما تسمع صوتى
مختار / انتى اللى طلبتى اكلمك خير اؤمرى
فيرا / عاوزه اقابلك
مختار / مش هينفع قولى اللى عوزاه على التليفون
فيرا / ما تقلقش ما حدش هيشوفنا سوا هقابلك فى معمل ابن عمك على فكره عجبنى اوى
مختار / قسما بالله
فيرا / ما تخافش ما تخافش انا مش بهددك انا بمدح فيه انا اصلى بقدر المواهب الشابه و بشجعها قابلنى هناك دلوقت و انا افهمك كل حاجه
مختار يسند على الرخامه و يكتم جواه
مختار / مسافه السكه
فيرا / سلام يا مختار
مختار يقفل و يروح ياخد مفتاح العربيه و ينزل يسوق العربيه و يطير و هند فى البلكونه متبعاه و القلق باين على وشها انتصار تطلع تجرى على البلكونه تلاقى هند
هند / هو فى ايه
انتصار / مفيش يا حبيبتى تلاقى حد من المعازيم عربيته عطلت و لا حاجه نزل يساعده بس خير ان شاء الله ما تقلقيش
هند / انا هكلمه فى التليفون
انتصار / ماشى يا حبيبتي
هند تبتسم و تدخل جوه و انتصار تدخل تلاقى ناصر بيتكلم فى التليفون
ناصر / ارجع يا مختار ما تروحش
مختار / مش هينفع ما اروحش
ناصر / دا فخ يا مختار ما تروحش لوحدك
مختار / كلم عبد الرحمن اطمن عليه انا بكلمه مش بيرد
ناصر / هكلمه اقفل هكلمه و اكلمك
مختار / ماشى
ناصر / ابعتلى العنوان ابعته لعباده و الرجاله يجولك على هناك
مختار / عباده عارفه
ناصر / هكلمه يلا سلام
مختار / سلام
ناصر يقفل و يقوم يلبس
انتصار / فى ايه يا ناصر فخ ايه اللى بتقول عليه
ناصر / مفيش حاجه لما هرجع هفهمك
انتصار / ابوس ايدك ما تسبنى هنا على اعصابى فهمنى فى ايه
ناصر / حوار تبع الشغل
انتصار / هنا !!!
ناصر / لما افهم هفهمك اهدى عشان ما حدش ياخد باله و تفتحى علينا فتوحه لا ده زمانها و لا مكانها
انتصار تهز راسها ناصر يفتح الباب و يجى ينزل هند تفتح الباب ناصر يبص
ناصر / فى ايه يا هند يا بنتى ايه اللى مطلعك السعادى
هند / هو فى حاجه يا عموا مختار نزل يجرى و تليفونه مشغول و حضرتك نازل فى ايه
ناصر / ابن عمى عربيته عطلت و تليفونه هيفصل شحن عاوزين يعنى نلحق نوصله قبل ما تليفونه يفصل
هند / بس كدا !!
ناصر / هيكون ايه يعنى
هند تهز راسها
ناصر / خشى يا بنتى ارتاحى و اول ما مختار يرجع هخليه يكلمك يطمنك عليه
هند تبتسم بس القلق لسه باين عليها ناصر يبتسم و ينزل و هند تقفل الباب و تدخل
…………………………………
فى شارع المعمل
مختار يركن العربيه و ينزل يطلع يجرى يرزع على الباب فيرا تفتح و هى مبتسمه
مختار / انا على تكه و اخسر كل اللى اتربيت عليه بسببك
فيرا تبتسم و تدخل تقعد على كرسى و تحط رجل على رجل
فيرا / انت مش كلمت ابن عمك و اتاكدت انه نايم في بيته مع مامته و جوزها قلقان ليه
مختار / انجزى مش فضيلك
فيرا / تمام هخش فى الموضوع قبل ما عباده يدخل و يقطع علينا قعدتنا الحلوه
مختار / استفزيني كمان هاتى اخرى و ارجعى ازعلى
فيرا / هههههههههههههههههههههههههههه ليه كدا دا انا بحبك على فكره عجبتنى عروستك
مختار يمسكها من رقبتها بغل تمسك فى ايده و هى بتدحك
فيرا / خلاص خلاص نتكلم فى الجد
مختار يبعد و يروح يقف بعيد و هو بينفخ فيرا تكح و تقوم تعدل نفسها
فيرا / كان فى شاب طموح جدا زى عبد الرحمن ابن عمك بالظبط كان كميائى شاطر جدا برده كان دكتور صيدلى كان له حلم انه يلاقى مسكن قوى و فعلا لقاه و سماه البى كاى متين و خمسين اختصار باين كيلر متين و خمسين قاتل الالم و المتين و خمسين دى تركيزه العلاج بدئو يجربوه على الحيوانات و كان جايب نتايج مذهله و دخلوه فعلا للتجارب على البشر
مختار / بيجيب سرطان
فيرا / مش للدرجادى هو بس كان قوى شويه
مختار / مش فاهم
فيرا / المسكن ده يا مختار قوى لدرجه انه مش بس بيقتل الالم دا بيقتل اى حاجه تانيه ممكن تحس بيها انت مش هتحس باى حاجه طول ما تاثيره شغال انا ما كنتش مصدقه طبعا فقولت اجربه اديت الحبايه لواحد من رجالتى و ولعت فيه ههههههههههههههههههههههه
مختار يبصلها بقرف
فيرا / الراجل فضل واقف على رجله مش حاسس باى حاجه لحد ما مات لا جرى و لا صرخ و لا اتالم
مختار / انتى مجنونه عارفه كدا و لا لا
فيرا / مصر فيها اكبر نسبه بلطجيه عايشين على المسكنات اللى زى دى عشان الخناقات بيبلع شريط كامل و يدخل يتخانق و يتقطع بالسكاكين و هو مش حاسس
مختار / انتى عاوزه مننا ايه بالظبط
فيرا / احلام شاب مسكين هتدمر يا مختار
مختار / لا و انتى قلبك كبير اوى يا شيخه
فيرا / الحبوب دى يا مختار مش مخدرات دى علاج
مختار / كانت وزاره الصحه العالميه صرحت بيها و ان كان فيها مشاكل اكيد ليها حل مستحيل مسكن قوى زى ما بتقولى ما يكونش له اضرار غير انه بيمنع الاحساس و يمنعوه ما البنج مش ممنوع
فيرا / لسه ما فهمتش بص يا مختار انا انسانه صريحه مفيش دوا فى الدنيا ما لوش اعراض جانبيه الدوا ده له عرض واحد قوى جدا … مش السرطان و لا بياثر على اى عضو فى الجسم هو بس مش بيلغى الالم بس هو بيخزنه الدوا للاسف من التجارب اثبت ان اعراضه الانسحابيه اقوى بكتير من الالم فى وقتها
مختار / و الادمان من كام جرعه
فيرا تهز راسها و تقف بعيد و مختار متابعها باهتمام و ترفع صابع
مختار / جرعه واحده
فيرا / بمجرد ما الدوا دخل جسمك عمرك ما هتقدر تبطله
مختار / ليهم حق يوقفوه و دا يبقى دوا
فيرا / لو حاولت توقفه هتعيش وجع اقوى راجل فى العالم ما يقدرش يتحمله لكن مش بيطول يعنى لو كنت قوى و قدرت تستحمل هيروح بعد يومين بالظبط
مختار / دا لو
فيرا تبتسم
مختار / انتى كارهه البلد دى كدا ليه
فيرا / انا !!! ابدا طب على فكره بقى انا بحب مصر جدا انا قولت لعباده قبل كدا قد ايه انا بحب مصر و بحب المصريين مصر سوق مفتوح و منجم دهب انا لسه قيلالك مصر بتستهلك كميه عاليه جدا من الترمادول و فيها كميه بلطجيه مهوله
مختار / ما دا موجود فى كل حته فى العالم
فيرا / تؤ مصر مفيش زيها بره مش بيتخانقوا بالسكاكين و المطاوى مستر مختار بره بيضربوا بالرصاص علاطول مش هياخد مسكن و هو داخل يتخانق لانه عارف ان الخناقه دى يا قاتل يا مقتول مفيهاش اختيار تالت لكن هنا فى
مختار / و المطلوب
فيرا / انا هدخل الدوا مصر
مختار / بطلنا احنا حتى بطلنا نجيب لروحنا حاجه زى ما انتى شايفه العمليه اللى فاتت خسرتنا رجاله و فتحت عين الحكومه علينا شوفيلك حد تانى يساعدك و لو منك بلاها الفكره دى خالص الناس هنا غلابه مش هيقدروا يشتروا بضاعتك
فيرا / معقول انت مصرى و تقول كدا
مختار يبصلها باستغراب
فيرا / انت ازاى مش قادر تقدر قيمه بلدك كل العيون فى العالم عينها على مصر و عارفه قيمتها و قيمه الكنوز اللى فيها الا المصريين بجد عمرى ما فهمتكوا
مختار / يا ست انتى كفايا استفزاز بقى
فيرا / سورى سورى تمام مصر بلد غنيه جدا عمرك ما سمعت عن راجل باع عياله عشان المخدرات و لا راجل باع كليته عشان علاج ابنه
مختار / فرق السما من الارض
فيرا / واحد الراجل التعبان هيبيع عياله و يشترى منى و ابوه هيبيع كليته عشان برده يشترى منى و بالمناسبه انا كمان ممكن اشترى منه كليته بسعر كويس جدا اصل انا عاطفيه و بتاثر بالمواقف دى اوى
مختار / يا دمك
فيرا / انا بديك فرصه تانيه يا مختار
مختار / مش هينفع
فيرا / فكر تانى
عباده يدخل الشقه فيرا تبصله
فيرا / وقتى خلص بس الحمد لله انا تقريبا قولت كل اللى عندى لو عندك اى سؤال بخصوص الكوميشن بتاعتك تقدر تكلمنى على التليفون مش انت لسه برده مسجل رقمى
مختار يجيبها من فوق لتحت و يبص الناحيه التانيه فيرا تبتسم و تبص لعباده
فيرا / عقبالك مستر عباده سلام
فيرا تمشى و عباده متابعها و يروح لمختار
عباده / كانت عاوزه ايه الوليه دى
تليفون مختار يرن يطلعه يبص فيه يلاقي هند يتنهد بتعب و عباده متابع
…………………………………
فى الشارع عند هند الفجر
هند واقفه فى البلكونه متوتره مختار يركن العربيه و ينزل يبص عليها و يبتسم و يدخل العماره هند تروح تفتح باب الشقه و تستناه يطلع
هند / اتاخرت كدا ليه
مختار / مش انا كلمتك و قولتلك جاى فى الطريق قلقانه ليه بقي
هند / اخوك الكبير رجع قبليك و كل الرجاله رجعوا
مختار / ناصر موصليش اصلا كلمناه من نص السكه و قولناله الموضوع خلص لف و رجع تانى صلى الفجر و روح و انا صليت فى اقرب مسجد ليا وقتها و جيت
هند تهز راسها
مختار / هتفضلي واقفه على الباب كتير خشي ارتاحى انتى صاحيه من بدرى
هند تبتسم و تفضل واقفه
مختار / طب خشي و اكلمك فى التليفون لحد ما تنامى
هند تبتسم و تدخل جرى مختار يبتسم و يطلع موبايله و يتصل
بيها ترد
مختار / السلام عليكم وصلتى السرير و لا لسه
هند / و عليكم السلام ازيك داخله اهو انت وصلت
مختار يفتح باب الشقه و يدخل يلاقي الكل يقوموا يقفوا و يبصوله يبتسملهم و يسيبهم و يدخل المطبخ و يقفل على نفسه الباب
ناصر / كدا يبقي اقوم الحق ارتاح قبل الجمعه
الستات و البنات يضحكوا و يدخلوا يناموا
………………..
فى اوضه هند
هند نايمه فى السرير و بتتكلم فى التليفون
هند / لا طبعا اتفزعت انت ما كنتش شايف نفسك سايق ازاى
مختار/ و انتى ايه اللى طلعك البلكونه وقتها
هند / كنت هكلمك امسي عليك قبل ما انام
مختار / حقك عليا بس انا رديت عليكي وقتها و طمنتك
هند / عارفه برده ما عرفتش انام قبل ما اطمن انك روحت
مختار / اصيله
هند / هيمشوا بكره
مختار / النهرده هيصلوا الجمعه و ياكلوا لقمه و يمشوا
هند / و هتعمل ايه فى باقي اليوم
مختار / هتمرغ فى السراير
هند / ايه !!!
مختار / هنام على كل السراير اللى فى البيت انا من يوم ما جم و انا بنام على الارض هنتقم بقي
هند / ههههههههههههههههههه معلش يا هند استحملى
مختار / معلش يا هند !!!
هند / اصلى كالعاده كنت عشمت نفسى بردود تانيه خالص
مختار / طب حقنا للدماء ما تيجي نعمل اتفاق
هند / حلو التعبير ده قول
مختار / ما تستنيش منى حاجه و قوليلى انتى نفسك فى ايه وش كدا
هند / فى حاجات ما بتنطلبش
مختار / مفيش الكلام ده ما ضاع حق وراءه مطالب
هند/ بس فى فعلا حاجات ما ينفعش تنطلب لو ما جاتش منك انت مش هيبقى ليها معنى
مختار / و هو انى ما ارفضلكيش طلب و اعملك كل اللى انتى عوزاه ده ما لوش عندك معنى
هند / بس لما تبقى عارف ايه اللى يبسطنى و تعمله من غير ما اطلبه بيبقى ليها معنى اكبر
مختار / حلو الكلام ده قوليلى بقى ايه اللى بيبسطك عشان اعرفه و اعمله من غير ما تطلبيه
هند / انت بتخم على فكره
مختار / و انتى قلبك كبير و هصعب عليكي و هتساعديني طب والله محبوس فى المطبخ عشان اعرف اكلمك
هند / ليه كدا
مختار / اهو شده و تزول
هند / هههههههههههههههههههههههه خلاص انت كمان مطبق من امبارح روح نام و نبقى نتكلم بعدين
مختار / فكرى فى كلامى خلى كل واحد فينا يساعد التانى يسعده انا هقولك ايه اللى بحبه و ايه اللى ما بحبوش و انتى كمان قوليلى خلينا نختصر وقت طويل اننا نستكشف بعضينا و ندخل على مرحله التنفيذ علاطول عشان كدا كدا ما فيش وقت احنا كلها حاجه بسيطه و نتجوز اصل انا مستعجل اوى بصراحه
هند / ههههههههههههههههههههههه هو انا هبان واقعه لو قولت و انا كمان
مختار / انا مش بس عندى اعاقه انى اقول كلام حلو دا انا طلع عندى اعاقه اكبر انى ارد عليه
هند / هههههههههههههههههههههههه ما حدش بيكبر على العلام يا مختار بيه اتعلم عشان البنت بتحب بودانها على فكره
مختار / يا سوادك يا مختار
هند / ههههههههههههههههههههههه بقولك ايه روح نام و ارتاح و بكره نكمل كلامنا و اهو اكون حضرتلك لسته بايه بيسعدنى
مختار / تصبحى على خير
هند / و انت من اهله
هند تقفل و تحط الموبايل جنبها و تنام
…………………………………
فى شقه مختار بعد الصلاه
البنات فى الصاله حوالين السفره بيحشوا حمام و اللى بتلف محشي و اللى بتصبع كفته رز مريم تاخد صينيه مليانه كفته متصبعه و تدخل بيها المطبخ هند واقفه مع انتصار و شيري بيقلوها و هند شغاله بايدها
انتصار/ تسلم ايدك مختار لو كان هنا كان كلها من الزيت
شيري / والله ما له لزمه التعب دا كلو احنا كنا هنعمله
انتصار / عارفه و خيرك سابق انا بس بعلمها دى اكتر اكله مختار بيحبها و عوزاه لما يدوقها من ايدها يحلف ما داق فى حلاوتها و لا هيدوق و قال على راي المثل اقرب طريق لقلب جوزك معدته و لا ايه يا عروستنا الحلوه
هند تبتسم و وشها يحمر
انتصار / يلا طلعيها بقي و حطى غيرها شوفتى بقي لونها ايه لو سبتيها عن كدا تنشف و تقدد
هند / تمام عرفت
انتصار / سوى طاسه كمان لوحدك و اخدك تحشيلك حمامتين تلاته بايدك تتعلمى فيهم
هند / تمام
شيري / ما بلاش يا حجه دا اكل الرجاله و هند مش هتستر
هند تبص لمامتها شيري تبعدها عن البوتجاز
شيري/ حسبي هتحرقي الكفته وسعى
شيري تشيل الكفته من الطاسه
شيري / شوفتى
انتصار / يا ستى بكره تتعلم هو احنا حد فينا اتولد كدا ما كلنا ياما حرقنا و ياما بوظنا
شيري / لا هند مختلفه انا مدلعاها هند ما لهاش الا مذكرتها و بس حتى ما بتحطش ايدها فى اى حاجه فى الشقه
انتصار / و ماله احنا مش عاوزين اكتر من كدا تركز فى مزاكرتها و تتخرج و تجيب تقدير كبير عشان تبقي الباشمهندسه مرات الباشمهندس
هند باصه على مامتها بحزن انتصار تطبطب عليها دمعه تنزل من عين هند تروح الحمام و شيري متبعاها تعمل مشغوله فى المطبخ تليفون هند يرن
مريم / عمى مختار يا هند
هند تطلع من الحمام تاخد الموبايل و تروح شقتها من غير ما تبص لحد
ست / الله
انتصار / جرا ايه يا فاتن من لقى احبابه و لا نسيتي يا اختى
فاتن / هو انا اتكلمت
مريم / ههههههههههههههههههههههههه
فاتن / بس يا بت
مريم تسكت و تكمل تصبيع و شيري واقفه وسطيهم بتساعد و محرجه
……………………
على قهوه
مختار قاعد على ترابيزه لوحده
مختار / هههههههههههههههههههههههه
هند / تصدق انى استاهل ضرب الجزمه انى حكيتلك اصلا
مختار / لا اله الا الله تمام حقك عليا بس يعني انا الغريب فهمت امك انتى مش هتفهميها
هند / اولا اسمها مامتك مش امك ثانيا دى مش امى انا ماما ما بتقلش منى ابدا بالعكس
مختار / لما تتكلمى مع مامتك قولتها صح اهو
هند / هههه
مختار / هتعرفي انها عاوزه مصلحتك و بس مامتك مش بتقل منك مامتك بتقول لانتصار ان انتى مش بتاعه شقا فمتجوش على بنتى
هند / ايه !!
مختار / اتحداكى ان اكيد انتصار كمان فهمت و بعدين مامتك من اول يوم و هى واضحه انها مش عوزالك عيشه الشقا بتاعه بيت العيله فى الصعيد
هند / بس انا مش فارق معايا
مختار / عشان مجربتيهاش مش يمكن ما تقدريش
هند / هو انت بتحاول تخوفني
مختار / لا انا مش عاوز اخدعك انا مش هعملك البحر طحينه بصي يا هند لو مش عاوزه تساعدى فى البيت ما حدش هيجبرك بس انا عاوز لما اروح تعبان اكل لقمه من ايدك انتى عاوزك انتى اللى توضبيلى غيارى و فرشتي
هند / طب ما انا هعمل ده هنا او هناك يعني ايه الفرق
مختار / اكتر من كدا انا ما يهمنيش و بعدين الحجه ام عبد الله اتاخرت اوى ما انا دوقت اكلك خلاص هو صحيح محتاج شويه تظبيط بس حلو يعني
هند / يا سلام يعني مش عاجبك اكلى
مختار / لا حلو والله بس فى احسن عادى يعني بنعيش نتعلم يعني
هند / تعرف … انا نحست خلاص ما اتفاجئتش عادى من امتى قولتلى كلمه حلوه للاخر يعني
مختار / ههههههههههههههههههه
هند / يجوا يشوفوا بتوع و لان الحلال اجمل سانتظر انا هروح اساعدهم ليستعوقونى سلام
مختار / سلام
مختار يقفل و باين انه مضايق هشام و ماجد يدخلوا يقعدوا معاه
ماجد / عريسناااااااا
مختار يبتسم و يسلموا على بعض و يقعدوا
…………………
فى شقه هند
شيري / بتشتكيني لمختار يا هند
هند / ما كنتش بشتكيكي يا ماما انا بس
شيري / انتى لسه صغيره يا هند و مش فاهمه الدنيا كويس مش عارفه انتى داخله على ايه و لا عندك خبره كفايه انك تخشيها انتى عارفه الناس هناك غير هنا العيال هناك من اللى شافوه عندهم خبره عنك يجيبوكى و يودوكى عشان كدا بيجوزوهم صغيرين
هند / انتى بتقوليلي الكلام ده ليه انتى لسه مش موافقه على مختار بعد كل اللى عمله
شيري / انتى عندى اغلى من الدنيا كلها اغلى من كنوز الدنيا لا دهب و لا فساتين و لا افراح و لا اى حاجه ممكن تفرق معايا انا اللى يفرق معايا انتى يا هند عوزاكى مبسوطه و مرتاحه
هند / دول بيعاملونى كانى ملكه حتى عبد الله شايلينه من على الارض شيل و حضرتك و بابا دول بيعامولنا احسن من اهلنا
شيري / اديكي قولتيها احسن من اهلنا و مهما عملوا هيفضلوا بيعاملونا احسن من اهلنا لاننا ما لناش اهل يا هند ما لناش حد نتسند عليه و لا معانا فلوس تقوى ضهرنا ليا حق اخاف و لا لا
هند / مش محتاجين هما هيبقوا سندنا و ضهرنا يا ماما مختار بيحبني و شاريني و اهله كمان بيحبونى اطمنى
شيري / انتى عارفه كام واحد مستنيكى تقعى يا هند عشان يشمت فيكي
هند / مختار هو عوض ربنا لينا يا ماما ما تخافيش كلنا شايفين ده انتى اللى لسه خايفه و بكره الايام تثبتلك ان مختار يستاهل تثقى فيه
شيري تبتسم
شيري / ربنا يسعدك يا بنتي انا مش عاوزه من الدنيا حاجه تانيه
هند تبتسم باب الشقه يخبط شيري تقوم تفتح تلاقي مريم
مريم / ماما بتقول لحضرتك الاكل جاهز خلاص تحبوا تاكلوا دلوقت و لما لما الرجاله توصل
…………………….
على القهوه
ماجد / ايه يا عم التفاهه دى مش حوار تقفل عليه وشك يعني كلمه اتقالت بهزار
هشام / بالعكس حتى لو هزار ترعب كلنا بنقول لان الحلال اجمل سانتظر طب لو مش احلى هنعمل ايه هنروح للحرام يعني
ماجد / لا يا عم دا مجرد اكسبرشن يعني
مختار / الحلال عمره ما هيكون احلى
ماجد و هشام يبصوله
مختار / الشيطان بيزين المعاصى و يسهلها و بيظهر نواقص الطاعات و يصعبها عمرنا ما هنشوف الحلال اجمل و دا اسمه جهاد النفس
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
