رواية البر التاني الفصل الثامن 8 بقلم لولو محمد
رواية البر التاني الجزء الثامن
رواية البر التاني البارت الثامن
رواية البر التاني الحلقة الثامنة
شيري / شيكتى على كل حاجه
هند / ايوه والله كلو تمام
باب الاوضه يخبط هند تروح تفتح تلاقي عبد الله
شيري / انت فين من الصبح
عبد الله / اما اصطدت شويه سمك انما ايه و اتصورنا صور جامده اوى
محمد / طب يلا خش غير هدومك دى يلا و اللبس هدومك عشان هنتغدى و نمشي
عبد الله يبص لابوه بحزن
عبد الله / بالسرعه دى !!!
شيري / مش هنسيب اللى ورانا و نعيش هنا يعني
عبد الله يهز راسه و يمشي يدخل الاوضه
هند / تعرفوا انه ما نامش من امبارح من كتر ما هو مبسوط و متحمس
شيري / انا شخصيا حطيت راسي على المخده و سافرت من التعب و شايله هم الطريق راجع بصراحه
محمد / يلا يا عبد الله خلينا نلحق نروح فى النور
………………….
فى كافيه
يوسف قاعد مع وسام و وسام قدامها طبق فيه كيك شيكولاته بالايسكريم بتاكل فيه
يوسف / ايوه يعني احنا ناويين نطول
وسام / لو زهقت نفضها سيره انا مش فيقه كل يوم و التانى نعيد نفس الحوار انا جايلى ايه من ده كله يعني
يوسف / ما انا بتكلم عشانك برده يا وسام انا مش مرتاح لخروجنا مع بعض و التصوير كل شويه و انا عارف انها فتره و هتروح لحالها فكره ايه اللى هيحصل بعد ما كل حاجه تبان شكلى و شكل اهلى قدام والدتك انا لما باجى عندك البيت ببقي من جوايا يا ارض اتشقي و ابلعيني
وسام / تصدق سديت نفسي انا كنت مستمتعه بالكيك دلوقت
يوسف / تمام اسف كملى الكيك بتاعك
وسام / اقولك حاجه و ما تفهمنيش غلط
يوسف / قولى
وسام / انا بحسد هند عليك اوى حبك و اصرارك عليها الحاجات اللى مستعد تعملهالها مش كل البنات محظوظين زى هند انا شخصيا كان نفسي اوى يوم ما اتخطب لحد يعملى اللى عملته لهند و فى نفس الوقت مضايقه منها جدا قد ايه هى جاحده و مدلعه قد ايه مش مقدره النعمه اللى معاها هى عاوزه ايه اكتر من كدا
يوسف / انا برده عصبي اوى
وسام / مهى برده ضغطاك طب ما انا معاك اهو عمرنا ما اتخانقنا و لا عمرك اتعصبت عليا هى مستفزه بتفضل تضغط فيك تضغط فيك لحد ما تتعصب و تنفجر و فى الاخر تقولك شايف انت وحش ازاى دا يوم ما اتخانقت انت و مختار فى الكليه شوفتها اتحركت ناحيتك و لا حتى فرقت معاها فى المرتين وقفت تتفرج و عادى
يوسف / هيدفع تمن اللى عمله على فكره
وسام / انا متاكده من ده بس اصلا تخيل كدا واحده واقفه فى وسط الدفعه و معمول عشانها اللى انت عملته تقابله بكل برود و تحرجك طب كانت بزوق مثلا كلم بابا و لمت الدور و لما تروحوا يبقي يحلها حلال مش كدا يعني بجد انسانه غريبه اوى
وسام تبص ليوسف تلاقيه مضايق
وسام / استني كنت هنسي
وسام تفتح شنطتها و تطلع علبه صغيره
وسام / دى حاجه صغيره منى هى مش مقامك يعني بس
يوسف يفتح العلبه يلاقي فيها سلسله
وسام / لما شوفتها عجبتنى و افتكرتك ساعتها جبتهالك ما اعرفش بقي هتلبسها و لا هتكسفني
يوسف يبتسم و يلبسها وسام تبتسم
يوسف / حلوه اوى شكرا
وسام / دى فضه مطلى مش بتطوس و لا تسود يعني مش محتاج تقلعها و انت بتستحمى كدا هبقي معاك طول الوقت تفتكرنى كل ما تبصلها
يوسف / بجد شكرا تعبتى نفسك اوى
وسام / طب ياريت كل التعب زى تعبى عشانك يا يوسف
يوسف يبتسم و وسام تبتسم و تكمل اكل و يوسف بيلعب فى السلسله
…………………
فى عربيه مختار
مختار سايق و كلهم نايمين هند تصحي و هى مكسره تتمطع و تفرد ايديها تبص لمختار فى المرايه باصصلها تبتسم و تغطى وشها و تعدل نفسها و تنكسف
مختار / صح النوم
هند / يارب ما اكونش كنت بشخر و انا نايمه
مختار/ لا ما تقلقيش هههههههههههههههههه
هند / هههههههههههههه طمنتنى الحمد لله
مختار و هند يبتسموا
مختار / انبسطتوا عندنا
هند / جدا بس اكيد عبد الله خد نصيب الاسد من الفسحه دى احنا قضينا اليوم فى البيت
مختار / المره الجايه اخلى مريم تفرجك البلد هتحبيها اوى
هند / حبيتها اوى الصراحه تعرف انا زمان كنت بقول ازاى الناس كانوا عايشين من غير نت و تليفزيون و موبايل اليومين اللى فاتوا اثبتولى ان الناس زمان كانوا عايشين فعلا عايشين بجد انا اليومين اللى فاتوا ما مسكتش موبايلي ثانيه ما اتفرجتش على التليفزيون ما فتحتش النت اللى كنت بقضي عليهم معظم وقتى استمتعت بكل ثانيه فيهم
مختار / طب الحمد لله
هند / بجد كانت تجربه حلوه مش هنكسف اقول انى نفسي اكررها تانى
شيري / هى تجربه حلوه فعلا بس انتى حظك حلو انها زياره فى وقت زى ده يعني اكيد هما مش حياتهم كدا طول الوقت
شيري تبص لمختار فى المرايه متابعها
شيري / احنا النهرده نمنا و صحينا براحتنا و روحنا اكلنا و مشينا لكن ستات البيت و البنات كانوا مهلوكين طول اليوم فى الاكل ده احنا استمتعنا اننا كنا ضيوف لكن تخيلى لو العكس
مختار / دعوه الغلابه و هى بتاكل حته لحمه متعه تانيه يا خالتى ام عبد الله بتهون التعب كله و اه الحريم عندنا بيشقوا بس جوه بيتهم وقت ما ضهرها يوجعها تفرده و بيشيلوا بعض من كترهم لو كل واحده عملت حاجه الشغل كله خلص و يقضوا باقي اليوم عادى انما لو واحده لوحدها بتشيل بيت بحاله حضرتك اكيد فاهمه
شيري / كل الناس دى عايشه فى مكان واحد مستحيل الست تكون بتاخد راحتها
مختار / كل واحد ليه جناحه هو و مراته و عياله اللمه بتقرب المسافات بتخلى العيله ليها طعم اللقمه ليها طعم كل واحده فى مصر قافله بابها عليها صله الرحم مقطوعه و الزيارات بقت تقيله لكن عندنا لمه الراجل و حواليه احفاده زرعه فى الدنيا اللى هيسيبه من بعده بالدنيا حضرتك لما هتكبرى هتبقي عاوزه تلمى عيالك و عيالهم حواليكي و تحت عنيكي تطمنى عليهم و تراعيهم و يراعوكى
شيري / ايوه بس الاحتكاك الزياده بيجيب مشاكل
مختار / كل حاجه و ليها مميزاتها و عيوبها
شيري / انا من يومى ضد بيت العيله و زى ما قولت مستحيل اى واحده منهم تكون بتاخد راحتها حتى لو فى جناحها زى ما انت بتقول بكره لما تتجوز ان شاء الله هتفهم قصدى يعني ايه الست طول النهار بالعبايه و الطرحه
مختار / الرجاله بتصلى الفجر و تطلع على اشغالها و بيرجعوا على العشا يتعشوا و كل واحد يدخل اوضته و ينام و ما حدش بيجبر حد يخرج من اوضته و حتى النهرده تعبهم فى الاكل و الضيافه مع انهم واخدين عليه لاننا الحمد لله بندبح طول الوقت و نطلع لله برده في ستات كتير من اهل البلد بيساعدوا و اللى بترقد عندنا بتلاقي اللى تمرضها و تاخد بالها منها و من عيالها
شيري / زى ما انت قولت كل مكان ليه مميزاته و عيوبه بس مش كل الناس ينفع تعيش حياه كل الناس
مختار / حضرتك معاكى حق
مختار يبص لهند فى المرايه مش مبسوطه يركز فى السواقه هند تبص لمامتها شيري تبص من الشباك هند تقعد مضايقه
……………………..
فى السرايا
ناصر / طب تبقي تيجي نتحاسب و لا تهوب من هنا هى افتكرت سكوتنا ضعف و لا ايه دا احنا نجيب عليها وطيها هى و اللى يتشددلها
شاكر / انا قولت من الاول المسايسه ما تنفعش مع الاشكال دى
عباده / احنا ما خسرناش حاجه
ناصر / اتنين من رجالتنا و الفلوس دى كلها و ما خسرناش
عباده / ايوه يا كبير ما خسرناش احنا على الاقل كسبنا وقت
شاكر / و هو الوقت بيستنى يا عباده بكره يعدى و نلاقيها نطالنا تانى
عباده / تبقي هبله احنا فشله بالنسبالها و مش هتجازف معانا تانى ديتها تيجي تحكها فى قرشين قال يعني باقي حقها
ناصر / الحراسه تزيد فى البلد و رجالتنا اللى بره البلد يفتحوا عنيهم و تزودوا الحراسات عليهم برده خصوصا مختار هو اللى تحت العين هناك
سليمان / ما تقلقش على مختار مختار مفتح و عارف هو بيعمل ايه كويس
ناصر / الحرص واجب و حزر و ما تخونش و لا ايه يا رجاله
عباده / اعتبره حصل يا كبيرنا
…………………..
فى اوضه هند
عبد الله يفتح الباب و يدخل يلاقيها قاعده على السرير و ماسكه الموبايل و عماله تقلبه فى ايدها
عبد الله / اللى واخد عقلك
هند تتخض عبد الله يدخل يقعد جنبها و ياسمينا نايمه جنبها
هند / خضيتني
عبد الله / هههههههههههههههههه سرحانه فى ايه
هند / فى امبارح و النهرده
عبد الله / احلى يومين فى حياتي
هند / و انا كمان ياريتنا ما كنا رجعنا
عبد الله / و انا كمان
هند / ماما بتقول اننا ما نقدرش على العيشه دى
عبد الله / نقدر و نص انا شخصيا اقدر تعرفي انا بفكر لما اتخرج اطلب ان تكليفي يبقي هناك
هند / عاوز تسبني يا واطى
عبد الله / تعالوا معايا بعيد عن الزحمه و القرف اللى هنا بعيد عن عمامنا و رخامتهم بقي دى عيله دى شوفتي عيله مختار كبيره ازاى شوفتي بيقضوا وقتهم مع بعض ازاى
هند / فيهم مشاكل برده مختار مره قالى انه هنا عشان بيضايقوه هناك
عبد الله / كل مكان فيه الحلو و الوحش بس مختار وسطيهم ليه مكانه تانيه عشان متعلم ما بالك بقي لو دكتور
هند / ربنا ينولهالك
عبد الله / تعرفي ان مختار بالرغم من العز اللى هما فيه بيشتغل من و هو عيل صغير انا شخصيا اتفاجئت لما شوفت القصر اللى عايشين فيه و لا لما عرفت ان كل ده بتاعهم انا لما قضيت معاه الفتره اللى فاتت قد ايه هو متواضع فى لبسه و اكله و عيشته قولت عادى يعني
هند / مختار راكب عربيه حلوه و لبشه شيك و ساعته و موبايله انا كنت متاكده انه من عيله
عبد الله / يا بنتي فى ناس بتاكل عيش حاف و تلبس و تركب فى ناس المظاهر عندها مهمه بس هو شخص متواضع
هند / انت بتحبه يا عبد الله
عبد الله / جدا بحبه جدا بحب اخرج معاه و اتكلم معاه حتى عن صحابي صحابي هايفين مختار عقله اكبر من سنه بيقرا كتير فى كل حاجه عنده معلومات عن كل حاجه انا نفسي لما ابقي قده ابقي زيه كدا
هند / ياريت كل الناس كانت زيه
عبد الله / ما حدش يعرف يبقي زيه مختار واخد كورسات تنميه بشريه و بدى لانجوش و اهله صرفين عليه كويس اوى مختار متربي انه يكون راجل
هند / دا انت معجب بيه اوى
عبد الله / و كل يوم بقرب منه بيزيد اعجابى بيه انا ناوى فى الاجازه اروح المراكز اللى قالي عليها و اعمل زيه و انمى مهاراتى
هند / ممكن تبقي تاخدنى معلك
عبد الله /ماشي انا هقوم انام بقي عشان انا هتنفخ فى الدروس بكره
هند / ههههههههههههههه تمام تصبح على خير
عبد الله يقوم و هند مبتسمه ثوانى و تقوم تلبس الاسدال و تدخل البلكونه تبص على بلكونه مختار مقفوله تقف و تسند على السور و تبص للنجوم و هى مبتسمه
……………………
فى المحل تانى يوم
شيري و محمد واقفين مع راجل
شيري / يعني البضاعه هتوصل النهرده
راجل/ العربيه هتوصل النهرده نزلى منها كل اللى هتحتاجوه و رقمي معاكوا اى حاجه تحتاجوها كلمونى
محمد / عاوزينها تعدى بشكل دورى
الراجل / ما تقلقش يا استاذ محمد المحل عندكوا مش هيبقي ناقصه حاجه
محمد / كتر خيرك
الراجل يمشي
شيري / انا هروح اعمل الاكل و اخلص اللى ورايا خليك انت مع العمال لحد ما يخلصوا تركيب اليافطه و الباب السوكريت و هجيب عبد الله و البنات معايا بالليل يساعدنا فى الفرش
محمد / خلى هند تقعد باختها ياسمينا هتعطلنا و هتبهدل الدنيا خليهم فى البيت احسن
شيري / تمام يا حبيبي … مع السلامه
محمد / سلام
شيري تبتسم و تمشي و محمد يطلع بره المحل يتابع العمال
…………………….
فى شقه وسام بالليل
يوسف قاعد مع وسام و عصبي
يوسف / ايه الكلام الفارغ ده
وسام / لو مش مصدقني اسالها شوفتها و هى بتورى الصور ليمنى هند كانت بايته فى بيت مختار و قضوا اليومين اللى فاتوا عنده فى البلد
يوسف / انا مكلم عمى و قالى انها مش معاه
وسام / و هو عمك كان قالك ان عبد الله معاه اصلا و لا انه بايت عند مختار الحوار جاى على هوا عمك بس العيب مش عليه كل اب بيتمنى سعاده بنته و هى شكلها كدا اختارت مختار
يوسف / اقسم بالله اقتلها
وسام / و تضيع نفسك عشان واحده فضلت عليك حته فلاح
يوسف / امال اسكت اشوفها ماشيه على حل شعرها و اسكت قسما بالله ما هعديها
يوسف يقوم و وسام تحاول تمنعه ما تلحقوش
وسام / اياكش تاكلوا بعض حتي انا مالى
…………………….
فى المحل عند محمد
راجل بينزل حاجات من العربيه و عبد الله بيحولها للمحل و شيري بترصها و محمد بيساعد
شيري / ما تشيلش تقيل يا عبد الله ما تكترش على نفسك
عبد الله / ما تقلقيش الحاجات خفيفه و واخد بالى
عبد الله يمشي محمد يجيب بتاليتات ساقع و يحطها و يفتح التلاجه
شيري / خليها للاخر دى انا هعملها خلص بس الراجل اللى بره
عبد الله يدخل شايل كرتونه شيري تساعده يحطها فى الارض
شيري / يا لهوى دى تقيله اوى كنت سبتها بره و زقيناها و الله انت ما هتجيبها لبر
عبد الله / يا ماما انا بشيل اوزان اكتر من كدا بكتير فى الجيم اهدى انتى بس و بطلى افوره الامهات دى و كلو هيبقي تمام
شيري / روح اقف مع ابوك بيحاسب الراجل
عبد الله / تمام
……………….
فى شقه هند
ياسمينا قاعده على الرخامه فى المطبخ و هند بتعمل مهلبيه و مشغلين اغانى على الموبايل و معليين الصوت و مفرفشين هند تطفى البوتجاز و تطلع البولات و تغرف
هند / يا حركاته يا تكاته يا مهلبياته
الاغنيه تفصل و التليفون يرن هند تروح تبص تلاقي يوسف
هند / كنسلى كنسلى
ياسمينا تكنسل و تيجي تشغل الاغنيه يرن تانى هند تنفخ و تاخد الموبايل و ترد يوسف بيزعق و عصبى
يوسف / ما بترديش عليا ليه يا بت
هند / مين دى اللى بت هى الحاله جتلك تانى و لا ايه
يوسف / هو سؤال واحد انتى كنتى بايته عند الكلب اللى اسمه مختار ده
هند / احترم نفسك و اتكلم عدل انا كنت هناك مع بابا و ماما و اخواتى و بعدين انت مالك اصلا بتكلمنى بصفتك ايه انا قرفت من طريقتك دى
يوسف / انا جايلك يا حلوه فى الطريق و هعرفك صفتى كويس و اللى ابوكى مكسل يعمله انا هعمله و اربيكي صح
هند / تصدق انا غلطانه انى برد علي حيوان زيك اصلا
هند تقفل السكه و تتصل بالتليفون و تتكلم و هى متعصبه
هند / ايوه يا بابا انا قرفت من الكلب اللى اسمه يوسف ده بيتصل يتخانق معايا و يشتمنى… والله ما عملتله حاجه دا عشان روحنا عند مختار البلد … يا بابا دا بيقولى ابوكى مربيكيش انا هربيكي
رساله توصل لهند تفتحها
هند / باعتلى رساله يا بابا بيقولى بتقفلى فى وشى السكه انا هولع فيكي … عشان خاطرى ما تتاخرش … ما اكيد هقفل على نفسي الباب يعني هعمل ايه يعني اكيد مش هتهبل و افتحله
رساله تانيه توصل
هند / باعتلى بترغى مع مين يا بنت الكلب انا جاى اربيكي
هند الدموع تنزل من عنيها
هند / طب انتوا فين طيب ليجي بجد … قافله الزفت قفلاه … بالله عليك ما تتاخر
هند تقفل السكه التليفون يرن يوسف تبص لياسمينا تلاقيها خايفه تاخدها و تجرى على اوضتها تلبس الاسدال و الموبايل ما بيبطلش رن
ياسمينا / هو يوسف هيولع فيكي بجد
هند / و لا يقدر
ياسمينا / امال بتلبسي الاسدال ليه
هند تبصلها و ترد بقوه
هند / بابا جاى على فكره و وريني هتعمل ايه
يوسف / انا بركن العربيه و طالعلك اهو انا تقفلى السكه فوشي انا هعرفك تردى عليا ازاى
هند تقفل الخط و تشيل ياسمينا و تطلع تقفل الباب و تخبط على مختار جامد و تضرب الجرس يفتح مخضوض
هند / بالله عليك تخليني عندك لحد بابا ما يجي
مختار يوسع هند تدخل بسرعه و تقفل الباب و مختار مش فاهم و ياسيمنا تبدا تعيط
مختار / فى ايه هو الباب قفل عليكوا و انتوا بره
صوت رزع على الباب عند هند
يوسف / افتحى يا بنت الكلب
مختار / هو بيقول كدا لمين
ياسمينا / يوسف هيولع فى هند
مختار هيفتح الباب هند تمنعه و تتكلم بصوت واطى
هند / ابوس ايدك ابوس ايدك بالله عليك ما تفتح بابا جاى و هيتعامل معاه
يوسف / قسما بالله لاولع فيكي افتحى انا عارف انك جوه و سامع الموبايل و التليفزيون افتحى
مختار / خدى ياسمينا و ادخلى جوه انا هتكلم معاه
هند / لا ابوس ايدك لا ما تفتحش دا مجنون
يوسف يرزع على باب مختار ياسمينا تصرخ على دراع هند
يوسف / افتح يا ابن الجزمه موتك على ايدي النهرده
هند عنيها توسع و تبص لمختار مختار يشدها على اوضه و يقفل عليها الباب تقف ورا الباب بتعيط و ياسمينا بتعيط على ايدها مختار يروح يفتح و يمسك يوسف من رقبته يرفعه و يرزعه فى الارض و يقفل باب الشقه وراه
مختار / الجزمه هى اللى ربت دكر بط زيك بيتشطر على الحريم
يوسف يقوم و يهجم على مختار يحضنه من بطنه و يزقه يخبط فى الباب مختار يضربه بالكوع فى ضهره يوسف يتوجع مختار يضربه واحده تانيه يوسف يسيب و ينزل على ركبته مختار يديله بالركبه فى وشه يوسف يقع فى الارض
يوسف يحاول يقوم مختار يسحله من رجله على السلم يوسف يزقه برجله التانيه و يفلت منه و يقوم يجرى على تحت مختار يجري وراه يوسف يجي يطلع من العماره مختار يجيبه من قفاه صحاب يوسف بيركنوا عربيتهم و ينزلوا منها اربعه يتخانقوا مع مختار و يسحبوه بعيد يوسف يروح يفتح العربيه و يطلع مفتاح العجل الحديد و يروح ناحيه مختار و بيرفع ايده بالمفتاح راجل بشنب تقيل يمسك ايد يوسف و تلت رجاله يدخلوا يمسكوا يوسف و صحابه يعدموهم العافيه يدخل محمد بيجرى يفض الخناقه و عبد الله يجرى على فوق هو و شيري
محمد / بس بس كفايا
الرجاله تبص لمختار يهز راسه هزه خفيفه جدا
راجل ١ / دى عيال بلطجيه ناقصها ربايه يا حج
محمد / كتر خيركوا يا رجاله احنا طلبنا البوليس و هيجي يلمهم دلوقت
يوسف / نعم
محمد يلطشه بالقلم يوسف يزق محمد مختار يشد مسدس من جيب واحد من الرجاله و يسحب الاجزاء و ينشن على يوسف محمد يصرخ
محمد / لا يا مختار لا
محمد يقوم يقف بين مختار و يوسف و عنين الاتنين قايده شرار
محمد / عيل و غلط هنربيه
مختار يدى المسدس للراجل و يطلع فوق محمد يبص ليوسف
محمد / دى كانت اخر فرصه ليك
محمد يطلع
يس / بيقولك كلم البوليس يا عم
على / يوسف الموضوع شكله وسع و المرادى جد
يس / يلا يا يوسف
صحاب يوسف يشدوه و يمشوا و الكل يتفرق
……………………..
قدام شقه هند
الباب مفتوح عبد الله يطلع يلاقي مختار طالع على السلم
عبد الله / اخواتى مش جوه
مختار / عندى جوه
مختار يفتح الباب عبد الله و شيري يدخلوا يدوروا و مختار عارف هما فى انهى اوضه يفتح الباب ميلاقيهمش شيري تدخل
شيري / هما فين بناتى فين
مختار / هند هند
هند تفتح الدولاب و تطلع هى و ياسمينا و هما مفلوقين عياط هند تترمى فى حضن امها عبد الله يدخل يشيل ياسمينا و هى بتعيط
ياسمينا / يوسف هيولع فى هند
عبد الله / دا انا كنت ولعت فيه و فى اللى جابوه خلاص يا قلبي خلاص
مختار ينسحب و يقف بعيد و هند عماله تعيط
هند / انا لما قالى بركن العربيه خفت يكسر عليا الباب كان بيصرخ و يشتم ما عرفتش اعمل ايه
شيري / عملتى الصح عملتى الصح
محمد يدخل
محمد / هما هنا
هند تجرى تحضن ابوها
محمد / انا هطلع على القسم و اعمل فيه محضر و مش هتنازل مهما حصل ان كان ابوه مش عاوز يلمه انا مش هسكت انا مش هستني اما ياذيكي بجد دا مجنون و لا ايه
هند / دا بيتخانق عشان انا كنت معاكوا فى البلد دا مجنون يا بابا مش مهم انى كنت معاكى شتمني يا بابا و زعق فيا
عبد الله / يلا يا بابا على القسم قبل ما عمى يجي و يضيع حقها زى كل مره ما تسكتش المرادى يا بابا صله الرحم اللى لوين دراعنا بيها يحترموها الاول
محمد / يلا يا عبد الله
شيري / كلنا جايين و هناخد الموبايل بالرسايل اللى عليه
عبد الله/ هو فين
هند / فى الشقه عندنا جوه
عبد الله يروح يجيبه و هند تبص لمختار متابعها من بعيد و هى عماله تعيط
…………………….
فى القسم
محمود يدخل هايج و معاه حمدى و اخوه التالت و وراه تلاته محاميين يروح ناحيه محمد و يشخط فيه
محمود / جرا ايه يا محمد بيه هو سكتناله دخل بحماره و لا ايه
محمد / انا حزرتك قولتلك تلم ابنك
حمدى / عيب يا محمد انتوا برده اخوات مشاكلنا ما تتحلش فى القسم
محمد / البيه عاوز يولعلى فى البت ليه ان شاء الله اذا كان بيهددها و يتهجم عليها و انا عايش امال لما اموت هتعملوا فيها ايه
الراجل / بعد الشر عنك يا محمد بس برده الدنيا ما بتتحلش كدا
محمد / لكن بتتحل ان البيه يمد ايده عليا قدام الناس فى الشارع
حمدى / لا غلطان بس نربيه بالادب له اب تشتكيله
محمد / و هو ابوه له كلمه عليه
محمود / احترم نفسك يا محمد ما تخلينيش اتغابي عليك
محمد / هتولع فيا و لا هتمد ايدك عليا و لا هتشتمنى بالاب و الام زى ابنك ما عمل انا قولتلك لو كررها هبلغ عنه و بلغت و سلمتهم رسايل التهديد على موبايل هند و مش هسكت انا مرجعش الاقي بناتى مرهوقين من الفزع و اسكت
محمود / ماشي يا محمد اعمل اللى فى دماغك بس ما ترجعش تزعل
حمدى / اهدى بس يا محمود محمد عاقل و احنا فى الاول و الاخر عيله
محمد / انا مش هتنازل و ان ما كنتش انت عاوز تربي ابنك خلي الحكومه تربيه بس المرادى بقي مش هتنازل
محمود / ما تتنازلش و محضر قصاد محضر و هتاخد منى واد هاخد منك واد و ابنك ثانويه عامه يا محمد و لو السنه راحت عليه مش هتعرف تعوضها
محمد / بتهددنى بالزور حلو يا محمود افترى و شوف ربنا هيعمل فيك ايه
محمود / يوسف خارج خارج فهاتها جميله من عندك بدل ما تتبهدل انت و مراتك و عيالك و انا ان عملت حساب انك اخويا اهل امه مش هيعملوا
حمدى / استهدى بالله يا محمود يا اخويا و روح ارتاح فى جنب و انا هتكلم مع محمد فى كلمتين
محمود يمشي هو و اخوهم و حمدى واقف مع محمد
حمدى / العند بيولد الكفر و انت عارف يوسف ايه فى اهله لا امه هتسكت و لا ابوه هيسكت
محمد / اعلى ما فى خيلهم يركبوه
حمدى/ هتخسر اخوك
محمد / لو كان باقي عليا كان لم ابنه
حمدى / هيلمه اتنازل عن المحضر و اعمل صلح و اديله اخر فرصه ان كررها اتكلم اخر فرصه انت لا قد محمود و لا قد عيله غنيم الناس دى مش هتسكت هيبهدلوك انت و مراتك و عيالك و احنا مش هنعرف نساعدك
محمد / كتر خيركوا
حمدى / اعقل يا محمد و اسمع الكلام
محمد / لو كانت بنتك
حمدى / بنتى و اكتر و انت عارف غلاوه هند عندى اقولك اعمله محضر عدم تعرض و ساعتها تبقي عملت اللى عليك و ما لهمش حجه دا ابن اخوك الوحيد دا ما حدش فرح بخلفته قدك
محمد ساكت
حمدى / هند نفسها ما ترضاش انه يتحبس و يضيع مستقبله و انت عارف اخوك هيراضيك
محمد يزعق
محمد / انا مش عاوز حد يراضيني انا مش عاوز حاجه منكوا
محمود يزعق الناحيه التانيه
محمود / كشك البقاله بتاعه قوى قلبه سمعنا حسه
حمدى / بس يا محمود خلينا نلم الليله
محمود يسكت و يديهم ضهره اتنين رجاله يدخلوا يروحوا ناحيه محمود
حمدى / كملت اسراء كلمت اخواتها لم الدور بقي يا محمد لمصلحتك انت والله عشان ما تعندش انت تعند و هما يعندوا و الدنيا تولع
محمد / يعني استني لما البت تنتحر تانى و لا استني اما هو اللى يقتلها يعني هفضل مغمض عيني لحد امتى
حمدى / اخر مره و اضمنهولك
راجل من خيلان يوسف يدخل حمدى ياخده بعيد
حمدى / تعال بس ما لوش لزوم اى كلام هو هيتنازل
حمدى ياخد الراجل و يرجع ناحيه محمود و محمد بيبص على لمتهم كلهم و هو واقف لوحده و يبص فى الارض بحزن
محمود / قالك ايه قسما بالله ان ما عقل و حط عقله فى راسه
صوت حاجه بتقع و الناس تتلم محمود و اللى معاه يبصوا يلاقوا محمد فى الارض مغم عليه
…………………
فى شقه هند
هند و اسراء و شيري قاعدين و معاهم ستات كتير
اسراء / و هو كان ولع فيكي بجد لكل ده خبط و ما فتحتيش لولاش بس سى زفت اللى عمال يدخل و يكبر المشاكل ده
شيري / حاضر هنستني لما يولع فيها بجد و بعدين نشتكيه حاضر
ست / يا شيري انتى اعقل من كدا احنا اهل و كلنا عارفين يوسف طيب و قلبه ابيض هو بس شويه العصبيه اللى فيه
اسراء / و بعدين ما نعصبوش و نخرجه عن شعوره و نرجع نزعل و لا ايه يا ست هند
هند / و انا عملت ايه ان شاء الله
اسراء / شوفى انتى بقي عرف عنك ايه جديد و لا سي مختار ابن الجيران بيتحمقلك ليه
شيري تقوم تقف و تتعصب
شيري / اطلعى بره انتى جايه فى بيتنا تهنينا
اسراء/ انتى بتترضيني يا شيرهان انتى نسيتي نفسك و لا ايه دا اللى انتى فيه ده انتى و عيالك من خيرى و خير اهلى كان زمانك انتى و جوزك عايشين على ملاليم جوزك
ست / استهدوا بالله يا جماعه
اسراء / انا ابنى خارج خارج بالزوق خارج بالعافيه خارج الدور و الباقي بقي عليكى انتى و عيالك ان كنتى فاكره ان محمود ممكن يسكت على حبس ابنه فا خيلانه مش هيسكتوا و ديتكوا ايه يعنى
الست / بس بقي يا اسراء احنا جايين نهدى الدنيا
اسراء / افتكروا سكوتنا ليهم ضعف و اتمرعوا لا فوقوا احنا بس عاملين حساب للعشره و صله الرحم
شيري / يا شيخه يقطع دى عشره و يقطع دة صله رحم فاضل ايه تانى فينا ما عملتوهوش
اسراء / فاضل زى ما شبعناكوا نجوعكوا
شيري / اعلى ما فى خيلك اركبيه الارزاق على الله مش بايدك و تنازل مش هنتنازل
اسراء / تمام كدا عدانى العيب بالاذن انا
اسراء تقوم و الستات يقوموا وراها
ست / ليه كدا يا شيريهان بس حد يعمل كدا
الكل يمشي و شيري تقعد مكانها
هند / هنادى عبد الله و ياسو من عند مختار
شيري تهز راسها و تمسح وشها هند تروح تخبط على مختار عبد الله يفتح
عبد الله / غاروا ؟
هند / اه … هو كويس
عبد الله / كدمتين خفاف بيقولوا يوسف اطحن
هند / استاذن و هات ياسو و تعال ماما مش مظبوطه الناس دول عصبوها اوى
عبد الله / اسبقيني انا جاى وراكى
هند تدخل و عبد الله يروح ناحيه مختار قاعد و جنبه ياسمينا
عبد الله / هنروح نقعد مع ماما شويه هتعوز حاجه
مختار / انا مش نازل لو احتجت اى حاجه خبط
هند تدخل تجري و فى ايدها التليفون
هند / اللحق يا عبد الله بابا تعب فى القسم و نقلوه المستشفي
عبد الله / انا قولت ما اسيبوش لوحده
مختار يجيب مفاتيحه و ينزلوا كلهم
………………..
فى السرايا
عباده بيتكلم فى التليفون
عباده / يعني ايه مختار سكتكوا … انتوا اصلا داخلين تتخانقوا بايديكوا ليه ما عكوش سلاح
ناصر يدخل
ناصر / فى ايه يا عباده بتزعق ليه
عباده / لا يا خويا ما تعملش انا هجيب الرجاله و جايلك سلام
عباده يقفل و يحط الموبايل فى جيبه
ناصر / فى حاجه حصلت فى مصر و لا ايه
عباده / عيل ابن كلب اتخانق مع مختار فى بيته و كان جايب شويه صيع زيه يتخانقوله
ناصر / و مختار
عباده / عيب يا كبيرنا ابن الزيني علمهم الادب بس شكله كدا والله اعلم حوار بخصوص عيله الحج محمد ابو عبد الله اصل مختار كان هيقتل الواد ده بالنار لولا الحج منعه
ناصر / مختار اعقل من كدا ايه اللى يوصل الدنيا لكدا
ناصر يطلع الموبايل و يتصل
ناصر / انت فين يا مختار و ايه اللى حصل عندك … مستشفي مستشفي ايه قالولى انك سليم … لا اله الا الله … لا اله الا الله
عباده / فى ايه يا كبير
ناصر / انا جاى معاهم … كدا كدا عباده كان جايلك بالرجاله بس كدا هاجى معاهم اطمن على الراجل … مسافه السكه … سلام
عباده / هروح اجهز الرجاله
عباده يمشي و ناصر باين عليه انه مضايق
………………….
فى المستشفي
الكل واقف على باب العمليات كلهم فى جنب و اسره هند و جنبهم مختار فى جنب و محمود و اسراء و اخواتها بيبصوله بغل و هو و لا على باله و شيري و هند بيعيطوا مختار يوطى لياسمينا
مختار / تيجي معايا يا ياسو نجيب حاجه حلوه
ياسمينا / لا انا عاوزه ابقي جنب بابا
مختار / طب اجبلك ايه معايا و انا جاى
ياسمينا / مش عاوزه حاجه
ياسمينا تخبى نفسها فى حضن شيري و هند تبص لمختار بحزن يبصلها
مختار / اجبلك حاجه
محمود / كتر خيرك يا حنين لو عازت حاجه اهلها موجودين
عبد الله / و انتوا بتسموا نفسكوا اهل
شيري / بس يا عبد الله خده معاك معلش يا مختار يا ابني يبعد عن التوتر اللى هنا خلي اليوم ده يعدي على خير
عبد الله / اسيبكوا وسطيهم لوحدكم ازاى
محمود / ما تحترم نفسك يا عديم الربايه بدل ما امد ايدي عليك و احنا هناكلهم و لا ايه
عبد الله / اضربني زى ما ابنك ضرب ابويا امبارح
شيري / خد عبد الله و امشوا يا مختار ابوس ايدك
مختار يشد عبد الله و يمشوا ياسمينا تنزل من على رجل مامتها و تجري ورا مختار يشيلها و هند متباهم بحزن
اسراء / ما تعدلى رقبتك هنا يا حبيبتي بدل ما توجعك
اخو اسراء / انا هروح اشرب شاي اجبلكوا
اسراء / هات اتنين لمون هنا عشان يروقوا دمهم
شيري / حسبي الله و نعم الوكيل
اسراء / حسبني حسبني
شيري تبصلها و تنفخ هند تمسك ايدها و تطبطب عليها
……………………
فى الحجز
يس / الموضوع هيطول و لا ايه يا يوسف
على / انا قولت نكلم ابهاتنا احنا كمان يسندونا
يس / انا ما اقدرش اكلم ابويا ابويا لو عرف انى فى الحجز هيجي ينفخنى هنا الحجز ساعتها هيبقى امان عن بيتنا انت ما تعرفش ابويا
يوسف / نقطنى بسكاتك الموضوع خلص اساسا و دى الاجراءات بس مش اكتر
يس / ربع الثقه اللى عندك
يوسف / و انت فاكر ان ابويا هيسبنى فى القرف ده يوم واحد و لا ايه
على / بس عمك ما طلعش بق زى كل مره و بلغ البوليس
يوسف / و انت فاكر ان ابويا هيعديهاله دا هيتربى هو و ابن الكلب التانى ده اموت بس و اعرف مين ولاد الكلب اللى ادخلوا دول كان زمانى خلصت على امه
يس / يا عم احمد ربنا ان عمك ادخل كان زمانه هو مخلص عليك
على / لا يا عم لحظه نرفزه بس ما يعملهاش يعنى كلنا عارفين ان مختار غلبان و بيمشى جنب الحيط يعنى
شاب 1/ لا مؤاخذه اللى شوفناه من مختار الفتره اللى فاتت ما يقولش كدا و لو لسه قافشين فى صوره مختار الفديمه يبقى احنا نستاهل اللى يجرالنا الواد مختار ده طلع سهن
يوسف / له نصيب يعيشله كام يوم كمان
على / معلش يا يوسف انا ما فهمتش هو الحوار كان على ايه اصلا انت اتصلت بينا تعالوا عند مختار جينا و ادينا مشرفين جنب بعض اهو على البرش بس برده مش فاهم ايه اللى حصل يعنى من باب العلم بالشئ يعني
يوسف / نقطنى بسكاتك انا مش فايقلك
يس / طب ما ينفعش تظبط حد من العساكر يخليك تكلم حد من اهلك تانى يطمنك الدنيا فيها ايه
يوسف / ما خالى قدامك قالى اطمن
يس / ما انا مطمن يا صحبى بس القاعده هنا هى اللى ما تطمنش
يوسف يبصله و يبص قدامه و هو مضايق
………………………………………
فى شقه وسام
وسام بتكلم اسراء فى التليفون
وسام / ولاد الكلب هما هينسوا نفسهم و لا ايه
اسراء / ما تقلقيش يا وسام يوسف كدا كدا خارج
وسام / ولو يا ماما برده هى قاعده الحجز سهله و لا ساعه واحده حتى
اسراء / اللى اخرنا سى محمد زفت وقع من طوله و اتلخموا بيه فى المستشفى بس اول ما يفوق هيروح يتنازل علاطول و يوسف يطلع
وسام / و الموضوع يتقفل على كدا يعنى
اسراء / امال هيعملوا ايه يعنى
وسام / و هما كمان هيعملوا احنا اللى نعمل نعلمهم الادب عشان ما يفكروش يرفعوا عينهم على اسيادهم تانى ايه يعنى سى زفت ده فاكر نفسه بلطجى
اسراء / لا مختار ده عمك مستحلفله من زمان هو بس كان مستنى اما الدنيا تهدى
وسام / و اهى ما بتهداش بالعكس بيفكروا سكوتنا ده ضعف و عمال يسوق فيها دى تالت مره يمد ايده عليه نسى نفسه الفلاح اللى جاى من ورا الجموسه ده
اسراء / العيب مش عليه العيب على اللى مقوى قلبه و ناصره على اللى من دمه
وسام / انا ما اقدرش اتكلم فى الحته دى
اسراء / انا اللى اتكلمت بس قسما بالله لربيهم من اول و جديد على عمايلهم دى
وسام تبتسم
……………………………………..
فى الكافتريا
مختار واقف هو و عبد الله شايل كيس مليان علب عصير و ازايز ميه و شيكولاتات و ياسمينا ماسكه علبه عصير فى ايد و شيكولاته فى الايد التانيه
عبد الله /شوفت بجاحه اكتر من كدا لا و بعد كل ده احنا الغلطانين طبعا يا عالم استفزوه ازاى فى القسم وصلوه للحاله دى
مختار / هدى نفسك يقوم ابوك بالسلامه و بعدها نشوف
عبد الله / مش هيسيبوه يا مختار مش هيهدوا الا لما يجيبوا اجله و يا عالم ساعتها هيسيبونا احنا فى حالنا و لا هيكملوا افترا
خيلان يوسف يدخلوا عبد الله يبص الناحيه التانيه
عبد الله / شويه بلطجيه فاكرين نفسهم فوق الكل
مختار / مين دول
عبد الله / خيلان يوسف تجار ملابس برده بس واخدين الدنيا بالدراع و قله الادب
مختار / بسيطه
عبد الله / هى ايه اللى بسيطه
مختار يبصله و يبتسم و يوطى عليه
مختار / قليل الادب يا عبد الله يتربى نطمن بس على الحج و بعد كدا يحلها حلال
الراجل يحط كبايتين قهوه عبد الله و مختار ياخدوهم و يمشوا و مختار و الرجاله عينهم على بعض
………………………………
فى اوضه محمد
شيري / الف سلامه عليك يا حبيبى
محمود / حمد الله على السلامه يا خويا كدا تخضنا عليك
عبد الله / قال يعنى
شيري / اطلع بره يا عبد الله خد اخواتك و روحوا
عبد الله يبص لامه و ابوه هند تقوم و تطلع بره مختار قاعد جنب الباب و خيلان يوسف قاعدين قدامه مختار يشوفها يقوم يقف عبد الله يطلع وراها و شايل ياسمينا شيرى تقفل الباب و تقعد جنب محمد
حمدى/ محمود اتكفل بكل مصاريف المستشفى و العمليه دا كان هيموت من خضته عليك
محمود / اللى انت عاوزه يا خويا هيحصل هنعمل محضر عدم التعرض و تبقى دى اخر فرصه ليوسف و انا قسما بالله ليا كلام تانى معاه
شيري / انتوا بتتكلموا فى ايه
حمدى / اهدى يا شيريهان جوزك تعبان
شيري / و هو مين اللى تعبه
حمدى / مش وقته يا شريهان مش وقته
شيري تبص لمحمد مغمض عنيه و التعب باين عليه
محمود / الواد هيبات الليله فى الحجز لحد ما تقوم بالسلامه و تقف على رجلك و تروح تتنازل هتربيه اكتر من كدا ايه
محمد / ماشى يا محمود
شيري / محمد
حمدى / ربنا يكملك بعقلك يا محمد يا اخويا احنا فى الاول و الاخر اهل
شيرى تسيب ايد محمد و تطلع بره متلاقيش حد اسراء تطلع
اسراء / مالك كنتى فاكره انه هيقف قدام اخواته و اخواتى بطوله جوزك ازكى منك خاف عليكي و على عياله اتعلمى منه
شيرى / ربنا اكبر من الكل حسبى الله و نعم الوكيل فيكوا
اسراء / بتدعى علينا !!! دا بدل ما تدعيلنا اننا نجينالك جوزك من الموت كان حلتك ياختى تدفعيله علاجه فى مكان نضيف زى ده و لا انتى كان عندك اهون انك تعالجيه وسط الصراصير و الفيران فى مستشفيات الحكومه انتى عارفه جوزك كلفنا كام
شيري / ما طلبناش منكوا حاجه ما ترقدوش الراجل و تمنوا علينا بعلاجه جوزى كان زى الفل لحد عمايل ابنك عديم الربايه
اسراء / انا ابنى سيد الرجاله على الاقل مش مركب قرايل لاخته و هى بتتسرمح مع جارها
شيري / انا بنتى اشرف منك و من بناتك و لو على السرمحه كلنا عارفين انتى اتجوزتى محمود ازاى عن اذنك يا ام البنات
شيري تسيبها و تدخل و اسراء واقفه بتغلى
……………………………..
قدام بيت مختار
مختار يركن العربيه و فى على الناصيه عربيه تانيه بتركن و هند و عبد الله و ياسمينا ينزلوا و مختار لسه راكب عبد الله يبصله من الشباك
عبد الله / هو انت مش جاى و لا ايه
مختار / هجيب حاجه و اجى علاطول
عبد الله / اجى معاك
مختار / خليك مع اخواتك ما تسيبهمش لوحدهم انا ان شاء الله مش هتاخر اجبلك حاجه و انا جاى
عبد الله / خلى بس بالك من نفسك
مختار يبتسم و يهز راسه و يبص للطريق عبد الله يبص لهند و يطلعوا و هند عينها على مختار ياخد العربيه و يسوق و العربيه اللى على الناصيه تمشى وراه هند تاخد بالها و تطلع الشارع تانى عبد الله يطلع وراها
عبد الله / فى ايه
هند / مش عارفه بس مش مرتاحه
عبد الله / و لا انا هاين عليا ارجع المستشفى و ما سبش امى يستفردوا بيها هناك زمانهم مبهدلينها و برده مش قادر اسيبكوا لوحدكوا
هند / اطلع يا عبد الله اطلع
هند و عبد الله يطلعوا و فى البيت اللى قدامهم راجل من الرجاله اللى ادخلوا فى الخناقه متابع اللى بيحصل
………………………………
فى المستشفي
شيري بتبص فى الارض و الكل قاعد سعيد و بيضحكوا
اسراء / طب ايه يا جماعه مش نروح و نسيبهم يرتاحوا شيري بتنام و هى قاعده
شيري ترفع راسها و تبصلها الرجاله تقوم
محمود / الف سلامه عليك يا اخويا من النجمه هبقي عندك
محمد يهز راسه
حمدى / لو احتاجتى حاجه كلميني
شيري ما تعبرش حمدى يبص فى الارض و يمشي و يقفلوا الباب وراهم شيري تبص لمحمد باصصلها و حزين
محمد / قوليها
شيري / اقول ايه
محمد / قولى ضيعت حق بنتك قوليها
شيري / انت ابوها انت امانها فى الدنيا انت ادرى واحد بمصلحتها بنت اتحامت فى جارنا عشان ما كناش موجودين نحميها طب فكرت لحظه ايه كان ممكن يحصل لو مختار ما كانش موجود
محمد / هددونى بعبد الله
شيري / بلغ عنهم هما كمان قول انهم بيهددوك
محمد / عبد الله ثانويه عامه عبد الله نفسه يبقي دكتور
شيري / و هند نفسها تعيش
محمد / مش هيقربلها تانى هعمل محضر عدم تعرض
شيري / انا مش هقول لعيالك قرارك لما يلاقوا يوسف واقف بيطلعلهم لسانه ابقي واجهم انت بس قوم بالسلامه الاول
محمد / كان نفسي تحسي بيا زى كل مره
شيري / بنتك قطعت شراينها وصل بيها القهر انها تقطع لحمها انهى احساس بعد كدا اللى بتتكلم عنه
محمد / انا هتكلم مع هند هى نفسها هتقولك انى صح
شيري / ما تيجي نسافر
محمد / ههههههههههه
شيري / مش بهزر تعال نسافر نروح اى حته اسكندريه سينا اسوان قنا اى حته
محمد / هنهرب يعني
شيري / هنعيش و عيالنا هتعيش هند هتتخرج السنادى نقدم لعبد الله فى جامعه هناك و نروح كلنا معاه تتنقل من شغلك و نصفي المحل و نفتحه هناك و نهرب
محمد / هو ده الحل من وجهه نظرك
شيري / ما عدش عندى حل كل يوم اسوء كل يوم يوسف بيكبر اكتر و جنونه و دلعه بيزيدوا و كل ما اهله بيسكتوا و ينصروه بيزيد و يزيد المره الجايه هيقتلهالك و مش هياخد فيها يوم هتطلع هى الغلطانه المرادى غلطت عشان سافرت معانا المره الجايه هتغلط عشان بتتنفس من غير اذنه
محمد نفسه يعلى و ينهج شيري تجرى تمسك ايده
شيري / حقك عليا يا محمد حقك عليا اهدى انا هنادى حد بس انت اهدى
محمد مش عارف يتنفس شيري تضرب الجرس و تفتح الباب تلاقي الممرضه جايه شيري تجرى عليها
………………………..
فى الشارع
مختار سايق و مبتسم و بيبص فى المرايه فى عربيه ماشيه وراه راكب فيها خيلان يوسف مختار يعدى تقاطع العربيه تيجي تعدى عربيه تانيه تخبطها من الجنب و ينزل منها اربع رجاله يتخانقوا من خيلان يوسف
راجل ١ / مش تفتح يا اعمى
خال ١ / انا اللى اعمى تخبطنى و تبجح كمان
راجل ٢ / انت كمان بترد دا انت عاوز تتربي بقي
خال ١ / راجل ربيني
الاربعه يمسكوا خيلان يوسف يكسروهم و يدغدغوا العربيه و مختار راكن العربيه مش بعيد اوى بيتابع من المرايه اللى جنب الشباك يسوق و هو مبتسم
………………………
فى شقه هند
عبد الله ماسك حله المهلبيه بياكل منها
عبد الله / تصدقي ما كنتش متخيل انى اعيش و اشوف اهم حلم فى حياتي و هو بيتحقق
هند / و دا ايه بقي الحلم ده ان شاء الله
عبد الله / اكل حله المهلبيه بحالها بدل ما كل شويه كنت اسحب طبق ورا طبق
هند / منه لله كنت لسه بغرفها سبتها زى ما هى
عبد الله / بس مختار عدمه العافيه
هند / هو صحيح ضرب بابا
عبد الله / انا ما شوفتش بس سمعت يعني
هند تتنهد تليفون عبد الله يرن
عبد الله / دا مختار … السلام عليكم
مختار / و عليكم السلام نمتوا
عبد الله / ياسو نامت بس انا و هند صاحين خير عاوز حاجه
مختار / جعان و واقف قدام محل بيعمل طواجن و حاجات تاكلوا ايه
عبد الله / يا ابني طواجن ايه دلوقت تعال تعال هند عامله مهلبيه عنب و بعدين انت مش ما لكش فى اكل الشارع
هند / خليه يجي هعمله انا اللى هو عاوزه
هند تقوم تدخل المطبخ
عبد الله / هند بتقولك تعال هى هتعملنا عشا حلو تعال انت بس
مختار / يا ابني المكان زحمه و شكله نضيف نجربه بدل ما نتعبها
عبد الله / قامت خلاص دخلت المطبخ تعال
مختار / تمام انت ادرى انا فى الطريق
عبد الله/ تيجي بالسلامه … مع السلامه سلام
عبد الله يقوم يلاقي هند بتطلع بانيه من الفريزر و بتغلى مايه
عبد الله / بانيه و مكرونه
هند / و بطاطس محمره كمان
عبد الله / هساعدك
عبد الله يطلع كيس البطاطس من التربو
هند / ما تدخل تزاكر انت مش بتزاكر كويس الفتره دى
عبد الله / ما تقلقيش انا بعرف الم نفسي
هند / طب لم نفسك و روح زاكر و انا لما احتاج مساعده هناديك
عبد الله يبصلها و يبتسم و يمشي تمسك البطاطس و تقشرها
……………………
فى شقه اسراء
محمود نايم تليفونه يرن يرد و هو نايم
محمود / الو … ايوه انا
محمود يقوم يتفزع
محمود / ايه !!! امتى و ازاى
اسراء تقوم مفزوعه
اسراء / فى ايه يا محمود
محمود / انهى مستشفي … مسافه السكه
محمود يقوم يلبس بسرعه
اسراء / على فين السعادى
محمود / على المستشفي هو يوم باين من اوله
اسراء تتكلم ببرود
اسراء / خير فى ايه حصل
محمود / اخواتك عملوا حادثه و اتخانقوا و ضربوهم و كسرولهم العربيه
اسراء تقوم مفزوعه تلبس
اسراء / اخواتى !!! يلاهوى يلاهوى يلاهوى
…………………
قدام شقه عبد الله
مختار شايل اكياس مليانه حاجه ساقعه و عصير و شيبسي و شيكولاته يضرب جرس شقه هند و يروح يفتح باب شقته عبد الله يفتح الباب
عبد الله / ايه يا عم التاخير دا كله الاكل برد استني هجيب الصينيه و اجيلك
مختار / طب خد دول و انا مستنيك
مختار يدى لعبد الله الكيستين
عبد الله / ايه كل ده يا عم
مختار / دا عشان ياسمينا وعدتها اجبلها حاجه حلوه البنت اتخضت جامد النهرده
عبد الله / طب استنانى
عبد الله ياخد الكيسين يدخلهم المطبخ و ياخد الصينيه و يروح لمختار و يقفل الباب
عبد الله / هند من الفرافير مش بتتعشي الحاجات دى بس عادى ممكن تنسف الحاجات اللى انت جايبها جوه
مختار يبتسم و عبد الله يدخل مختار يقفل الباب
……………………
فى المستشفي عند محمد
عبد الله بيساعد شيري تلم الحاجه و محمد قاعد على السرير باصص فى الارض عبد الله يقعد تحت رجليه يلبسه الجزمه
محمد / سيبها هلبسها لوحدى
عبد الله / ناقصك حاجه
محمد يلعب في شعره عبد الله يبتسم محمود يدخل الابتسامه تروح من وش عبد الله و يقوم يقف
محمود / كتبولك خروج و خلصت الحسابات لو كلو تمام نتحرك
شيري تبص لمحمد مش بيبصلها
محمود / ايه يا شريهان لسه ما لمتيش الحاجه و لا ايه
شيري ما تردش و تكمل لم الحاجه و ترزع الشنطه فى الارض محمد يبصلها حمدى يدخل
حمدى / الحمد لله لحقتكوا كنت خايف اكون اتاخرت
محمود / ماشيين اهو يلا يا محمد
حمدى يشيل الشنطه و يروح يسند محمد و عبد الله يسنده من ايده التانيه
شيري / عبد الله خلى عمك محمود هو اللى يسنده
عبد الله يبصلها
شيري / انا و انت هنروح مشوار قبل ما نروح
عبد الله / مشوار ايه يا ماما مش وقته
شيري / معلش ما يتاجلش
محمد / روح مع مامتك يا عبد الله انا هحصلكوا
عبد الله / هو حضرتك لسه فاكرنى صغير و مش هفهم يعني
شيري / عبد الله بابا تعبان
عبد الله يبص لمامته و يبص لباباه
شيري / هعملك لقمه على ما ترجعلنا بالسلامه يلا يا عبد الله
عبد الله يبص لباباه بحزن شيري تروح تشده من ايده تمشي و هو لسه عينه مع باباه
…………………..
فى الكليه
الدكتور يطلع من المدرج و الكل بيلم حاجته و يمشي وسام تروح ناحيه هند
وسام / جالك قلب تيجي الكليه و تضحكي عادى و ابن عمك مرمى فى الحجز يا قليله الاصل
هند / شوفيلك حد غيرى تتسلى عليه عن اذنك
هند تقوم تقف و تمشي
يمنى / ناويه تنزلى تروحى فين بعد كدا
يمنى تمشي
وسام / يوسف طالع النهرده و هيحضر محاضره بكره عادى
هند ترجعلها
هند / اوعى تصدقى نفسك اوعى
يمنى / يلا يا هند
وسام / يوسف طالع و هتشوفي
هند / اكيد هيطلع و مش هيهون على بابا و اللى حصل امبارح كان قرصه ودن مش اكتر انا بتكلم عليكي انتى اوعى تصدقى نفسك انا فهماكى كويس و عارفه انتى بتعملى كل ده ليه و صدقيني مش هتوصلى لحاجه فى الاخر او على الاقل مش هتوصلى للى فى دماغك و هتاخدى البومبه الكبيره
وسام / الغيره هتاكل منك حته
يمنى / يلا يا هند دى عبيطه باين
هند / ههههههههههههههههههه لا دى مسكينه يلا يلا
هند و يمنى يمشوا
وسام / هيخرج و هتشوفوا
هند و يمنى يمشوا و ما يعبروهاش
……………………..
فى شقه مختار
مختار قاعد وسط رجاله كتير
ناصر / ههههههههههههههههههههههه طب والله رجاله
عباده / مش كفايه الناس دى لازم تعرف انك مسنود و مسنود جامد اوى كمان عشان مش كل يوم و التانى ينطولك
مختار / يا سيدى اهو حاجه تكسر الملل و الروتين
سليمان / بس انت مقصر يا مختار برده كان واجب عليك تبعت للراجل زياره فى الحجز و توجب معاه
مختار / حرام عليك دا الضرب اللى كله يرقده شهرين قدام
صوت زعيق فى شقه عبد الله
عبد الله / انا ما طلبتش حاجه منكوا انصفونا مره حسسونا ان لينا اهل و لو مره هاتوا حقنا مره
صوت رزع باب الشقه
ناصر / اللحقه هديه
مختار يقوم و يمشي
عباده / اللى يشوفهم يقول عيله هاديه و متربيين ازاى يعلى حسه على اهله كدا
ناصر / شكل الحج محمد هيتنازل و يخرج يوسف
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
