رواية البر التاني الفصل الثامن والستون 68 بقلم لولو محمد
رواية البر التاني الجزء الثامن والستون
رواية البر التاني البارت الثامن والستون
رواية البر التاني الحلقة الثامنة والستون
فيرا / الحكومه عارفه ده من زمان و مع كدا ما قدروش يعملولى حاجه
رشيد / عربيه سبعه وقفت
فيرا تروح تبص فى الشاشه
رشيد / هتعدى ما تقلقيش المهم رجالتك يمسكوا روحهم
فيرا / دول مش رجالتى دول سواقين المصنع و ما عندهمش اى فكره هم محملين ايه اصلا
رشيد / يبقي مصلحه
……………………
فى الكمين
العساكر بينزلوا كراتين الحلويات من العربيه و يفضوها فى الارض
السواق / طب فهمنى بس يا باشا لو بتدوروا على حاجه
الظابط / لما هنلاقيها هتعرف يا حبيبي
السواق / طب اكلم صاحب المصنع طيب اقوله اللى بيحصل ده
عسكري / مفيش حاجه يا باشا
السواق / شوفت يا باشا قولتلك شويه كيكه على بسكوت
الظابط / طب لم حاجتك دى و يلا من هنا … فتشلى يا ابنى العربيه اللى هناك دى
السواق يعبى الحلويات فى الكراتين هو والتباع اللى معاه الظابط يبصله
الظابط / انت هترصهملى واحده واحده خلصني
السواق / حاضر يا باشا حالا
السواق و التابع يعبوا بسرعه و يحملوا العربيه
…………………….
فى سرايا الزنايته
الرجاله كلهم قاعدين وقدامهم تليفوناتهم تليفون عباده يرن يشده بسرعه و يقوم يقف
عباده/ هاه طمنى
شاب / نضيفه يا سى عباده كلها حلويات و بسكوت
عباده يقعد و يبصلهم و يقفل السكه
مغاورى / يعني ايه
ناصر / بتمتحن رشيد
مختار / اكيد فى حاجه اكبر من كدا
ناصر / ما تفتشوش باقى العربيات
عباده / البضاعه موجوده فى العربيات التانيه يا كبير
ناصر / ما ينفعش كل العربيات تتفتش قولت كدا هتشك ان فى حد بلغ
مغاورى / ما يمكن فعلا مش واثقه فى رشيد و بتستغله تعمل تمويه
امين / قصدك ايه
مغاورى / تقول لرشيد اننا هنعدى البضاعه من الحته الفلانيه و هى فى نفس الوقت بتعديها من حته تانيه
ناصر / اهم حاجه عندنا نعرف البضاعه رايحه فين و عرفنا الباقي ناخده على الهادى
مختار / فى حاجه اكبر قلبي حاسس ان فى حاجه اكبر تدفع الفلوس دى كلها عشان تتاكد اذا كان رشيد بيخونها و لا لا تقتله و خلاص
ناصر / هى مش عاوزه رشيد هى عاوزه اللى هى متاكده ان رشيد هيوصلها ليه
عباده / لقيمه بنت كلب
مختار / بس الكبير معاه حق … ما ينفعش كل العربيات تعدى على كماين بس سيب كمينين تلاته كمان
مغاورى / اشمعن
مختار / ششنه لعل وعسي بس يكونوا بعاد عن بعض على طريق اسكندريه مثلا و ناحيه السويس كدا يعني
عباده / فهمتك حاضر
عباده يمسك التليفون ويتصل بحد
……………………..
فى شقه يوسف
محمود قاعد مع شاب يوسف يطلع يقعد معاهم يسكتوا
يوسف / ايه مالكوا سكتوا يعنى انا ممكن اقوم عادى على فكره
الشاب / عيب الكلام ده انا بس كنت عاوز عمى فى موضوع و خلصناه خلاص
يوسف / موضوع ايه خير
محمود / جوز اختك كان بيفكر يشغل عربيته اوبر بس ما نفعتش
يوسف / ما طبعا ما تنفعش دى اخرها تقلبها تاكس عداد
الشاب / لا ما انا قررت ابيعها و احط تمنها مقدم عربيه جديده اشغلها و من شغلها ادفع اقساطها
يوسف / فكره برده برافو عليك صورها و نزلها على اولكس و لا اعمل اعلان ممول على الفايس
محمود / لا ما انا نويت اشتريها منه
يوسف / والله طب كويس مبروك يا سيدى اهى اتحلت
الشاب / ما البركه فى عمى بقي
يوسف / تمام عن اذنكوا بقي
يوسف يقوم يدخل اوضته و يبص على ابوه و جوز اخته بيضحكوا سوا
……………………
فى فيلا فيرا
رشيد / اخر عربيه وصلت انا كدا عدانى العيب و ازح
فيرا / و ادى فلوسك
رشيد يفتح الشنطه و يقلب فيها
فيرا / من امتى الكلام ده
رشيد / انا دافع مقدم يعني القلم هيعلم
فيرا / بلاش الكلام ده ازعل منك
رشيد / بس انا مش قادر افهمك تدفعى بونديره كل الطرق دى ليه ما دام عارفه ان نص العربيات فاضي
فيرا / لان كل العربيات كان فيها البى كاى هههههههههه
رشيد / ازاى يعني و العربيات اللى اتفتشت
فيرا / هو انت فاكر انك ساحر لوحدك و بعدين هيلاقوا الحاجه ازاى و هم ما يعرفوش شكلها دا زى اعمى بيدور على ابره فى كوم قش هيلاقيها بس لما تغرز فى ايده و توجعه
رشيد / ناصحه … الا انتى ناويه تعملى ايه هتعتمدى علي ايه فى التسويق المرادى
فيرا / و لا اى حاجه انا بنزل المنتج السوق و هو بيثبت نفسه لوحده
رشيد / اه بس المنتج مش كويس و عيوبه اللى كانت مداريه بانت
فيرا / البى كاى اللى نزل مصر كان متين و خمسين بس فى منه ميه خمسه و عشرين و فى خمسميه
رشيد / ايه الفرق
فيرا / الخمسميه بيدى نفس تاثير المتين و خمسين بالظبط يبقي ليه اكلف نفسي ماده فعاله و انزل حبوب اغلى الا اذا كان ليه اعراض جانبيه اقوى
رشيد / اقوى من المتين و خمسين دا الناس كانت بتقطع شراينها
فيرا / بالتدريج بيروح الخمسميه بيحتاج وقت اطول و وجعه اشد
رشيد / و ده اللى هتنزليه دلوقت
فيرا / لا هنزل الميه خمسه و عشرين
رشيد / الله بقي
فيرا / الميه خمسه و عشرين مسكن قوى بس مش زى المتين و خمسين بتحتاج وقت عشان تفقد الاحساس يعني مش من اول حبايه زى التانى ممكن تتعاطاه اسبوع و يمكن شهر حسب جسمك و ممكن تبطله بسهوله جدا ما دام فى المرحله الاولى
رشيد / طب ما دا حلو
فيرا / لا مش حلو مع الاستخدام الكتير مش هيعمل حاجه و هتبقي بتاخد اكتر من حبايه فى اليوم و الوجع لسه شغال و مفيش حاجه هتضيع الوجع غير المتين و خمسين و ساعتها هتبدا الدوامه من الاول
رشيد / الناس مش هتعرف انها ادمنت غير بعد فتره
فيرا / مش هيرتاحوا غير عليه و كل ما حاجه توجعهم هيجيبوه و شويه شويه هم اللى هيطلبوا المتين و خمسين بنفسهم
رشيد / او هيقرروا يتعالجوا و يخفوا
فيرا / اكون بعت و كسبت و عملت زباين جديده و لعلمك فى ناس ما بتحبش تبطل زى ما انت عارف الوجع جزء اساسي من حياتهم بتوع الخناقات والبلطجيه دول عمرهم ما هيبطلوا
رشيد / دماغك سم
فيرا / انت عارف انا ليه بحب مصر
رشيد / حب الدبه اللى قتلت صاحبها ليه ؟
فيرا / عشان شعبها طيب اوى اى حاجه بتسعده بينشرها يعني لو ست عجوزه اخدت حبايه واحده من البى كاى و ارتاحت كل الشارع و الجيران و العيله و المعارف هياخدوا البى كاى
رشيد / حقيقه
فيرا / فى اجمل من كدا شعب
رشيد / بس قلبته وحشه خدى بالك
فيرا / تؤ دا شعب غلبان نفسه مقطوع من كتر الجرى طول النهار على لقمه العيش و طول الليل ورا ههههههه البنات
رشيد / انا خلصت شغلى هتعوزى منى حاجه
فيرا / اكيد … بس مش دلوقت هههههههههه
رشيد ياخد الشنطه و يمشي
………………..
فى سرايا الزنايته
سماح قاعده بترسم حنه و البنات بترقص حواليها و مشغلين اغانى فاطمه تدخل شايله مبخره و بتزغرط
فاطمه / رقيتك من كل من شافك و لا صلاش على النبي
الكل / عليه افضل الصلاه و السلام
انتصار / جرا ايه يا بطه انتى نسيتي ندرك و لا ايه
فاطمه / مين دى
فاطمه تحط المبخره فى جنب و تدخل وسط البنات
فاطمه / وسعى يا بت منك ليها .. ناوليني يا بت الحزام ده … عوزاكوا بقي ايه تركزوا و تتعلموا
هند / يا فطومه يا جامد
فاطمه / شغلى يا بت
مريم تشغل اغنيه و فاطمه ترقص و تروح تشد انتصار
انتصار / يا وليه اوعى
فاطمه / عندك اغلى منها ترقصيله و لا ايه
انتصار / ابدا اوعى هاتى الحزام ده
انتصار تشد الحزام من وسط فاطمه و ترقص مكانها مريم تصفر
فاطمه تروح تقوم هند انتصار تجرى تقعدها
انتصار / ادونى فرصتي انا قومت خلاص
هند تبتسم و تبص لشيرى و ترجع تبص حواليها و هى بتهرب بعنيها منهم
هند / هقوم اشوف لو الرجاله ناقصهم حاجه
هند تحط الطرحه على راسها و تطلع الجنينه
الرجاله قاعدين مولعين نار و عاملين دايره و بيسقفوا و يغنوا و يضحكوا
امين / يا ناس سيبونى فى حالى يا ناس سيبونى فى حالى صبحتونى عليل
الكل / صبحتونى عليل
امين / يا ناس سيبونى فى حالى يا ناس سيبونى فى حالى صبحتونى عليل
الكل / صبحتونى عليل
امين / تجرحنى يا ابو عين سوده تجرحنى يا ابو عين سوده و اللى يداويني مين
الكل / و اللى يداويني مين
امين / تجرحنى يا ابو عين سوده تجرحنى يا ابو عين سوده و اللى يداويني مين
الكل / و اللى يداويني مين
هند تعدى تروح الجنينه الورانيه ناصر يمسك زلطه صغيره فى الارض و يحدفها على مختار و يغمزله يبص يشوفها يقوم ينفض هدومه و يروح وراها يلاقيها قعدت على المرجيحه
مختار / اللى يتمرجح لوحده
هند تبصله و تبتسم يروح يقعد جنبها و يمرجح برجله
مختار / ايه القعده جوه زهقتك و لا ايه
هند / بالعكس عاملين جو جميل كنا محتاجينه اوى
مختار / امال ايه
هند تبص للسما و تدارى حزنها بابتسامه و تبصله
هند / ما فيش … لا فى عشان انا اتخنقت و تعبت و ما عدتش قادره استحمل
مختار / سامعك
هند / انا مش حامل
مختار / فين المشكله فى الموضوع
هند/ ما اعرفش اسالهم بقي
هند تبص الناحيه التانيه و ترجع تبصله
هند / طب لو ربنا مش كاتبلى هكمل باقى عمرى كدا طب طنط الله يرحمها مرات عمو شاكر كانت عايشه عشرين سنه فى الهم ده
مختار / هو ايه اللى حصل بالظبط
هند / اقعدى ما تقوميش ما تشيليش ما تتحركيش
مختار / و انتى مش لادد عليكي الدلع صح ما تدلعى يا هند
هند / بس انا مش حامل يا مختار
مختار / خلاص يعني كبرتى و شعرك شاب و انقطع فيكي الامل يعني ما تسبيها على الله
هند / ما يسيبونى هم فى حالى و يرحمونى
مختار / مش لما ترحمى نفسك انتى الاول افرضي ما بخلفش هتعملى ايه هتسبيني يا هند لو الدكتور قالك بيخلف و انتى بتخلفى بس لازم كل واحد يتجوز حد تانى عشان يخلف هتسبيني
هند / انت بتقول ايه يا مختار
مختار / بقول لو فاكره ان الكلام ده بيتقالك لوحدك تبقي غلطانه اتجدعن شد حيلك مش هنفرح بعيالك مش هنشيل خلفك دا اللى اتجوز بعدك ربنا كرمه اهو بسمع انا كمان بسمع روحوا شوفوا دكتور روحوا اعملوا عمليه و كلام كتير من ده شوفتيني مره خدت جنب كدا و عملت زيك … احنا بقالنا قد ايه متجوزين … احنا فى ايه و لا فى ايه اصلا عشان تسيبى كل الهم ده و يبقي اقصي همك الحمل اتاخر ليه قال يعني حياتنا ما تنفعش الا و انتى حامل طب انا يا ستى ما بخلفش اعتبريها كدا تحبى اروح اقولهم انى ما بخلفش عشان ترتاحى
هند تبصله و ساكته يجي يقوم تمسكه
مختار / تفتكرى سهله عليا لما يبقي كل الناس دى مبسوطه و مراتى انا لا كل ده ليه عشان ما خلوكيش ترقصي ارقصيلى انا يا ستى طب دا انا حتى يتيم
هند تضحك و ما تقدرش تكتمها مختار يقرب منها
مختار / ما توجعنيش عليكي يا هند انتى ما فكيش حاجه و الدكتوره شافتك و قالت هيجي باوانه و ان ما جاش يبقي اكيد ربنا شايف انه مش خير لينا … يا هند انا ما عنديش اغلى منك انا وعدت ابوكى انى هراعيكي و اخد بالى منك انا بحبك يا بت
هند تبتسم مختار ياخدها فى حضنه
مختار / ابقي ارقصيلى انا يا بت هم مش وش نعمه
هند / مش حوار رقص
مختار / لا انا عشمت نفسي خلاص احنا صعيده و اللى بيرجع فى كلامه يبقي عيل
هند / هههههههههههههههههه
مختار / هترقصيلى صح
هند / هرقصلك
مختار / وعد ؟
هند / وعد
عبد الله يتسحب من غير ما ياخدوا بالهم
مختار / و بعدين اللى يجيلها الدلع و ما تدلعش تبقي هبله يا بت و ان كان عليا انا قسما بالله
عبد الله يمسك فى المرجيحه فجاه و خضهم
عبد الله/ سايبنا هناك و بتعملوا ايه
هند تتفزع و مختار يقوم يجرى ورا عبد الله
مختار / انا هوريك بنعمل ايه يا جزمه انت يا جموسه
عبد الله يجرى و هو بيضحك و هند بتضحك مختار يقلع الجزمه و يحدفها فى عبد الله عبد الله يوطى ياخدها
عبد الله/ خليك حافى بقي
مختار / انت ياله يا جزمه هات الفرده يا فرده انت … عاجبك كدا
مختار يبصلها يلاقيها بتضحك يروحلها و هو بيزك
مختار / طب والله تستاهل
هند تضحك اكتر مختار يحط ايديه على خدها
مختار / قسما بالله ما ببقي عاوز حاجه تانى بعد الضحكه دى
عبد الله يدخل يديله الجزمه
عبد الله / خد يا عم صعبت عليا
مختار ياخدها و يبصله عبد الله مبتسم
عبد الله / عشان تعرف غلاوتك
مختار يحطها فى الارض و يلبسها
عبد الله / كان بيقولك ايه بقي بيعرف يقول و لا نعلمه كلمتين مختار يرفع الجزمه تانى عبد الله يجرى مختار يجرى وراه يحدفه بيها
عبد الله / مش اخلاق صعايده دى يا نجم الله
الدنيا تشتى الكل يقف مكانه و مختار يلبس الجزمه و يرجع لهند ماده ايديها للمطر
مختار / خشي جوه لتستهوى
هند / ادعى يا مختار
مختار / ربنا ما يوريني فيكي حاجه وحشه يلا تعالى
مختار يمسك ايدها و ياخدها على جوه
…………………..
فى اوضه سماح فى سرايا الجوارحه
مغاورى بيتكلم فى التليفون و هو بيلف و يفتح فى الاوضه
مغاورى / دا رزق
سماح / لا دول مسكونى تريقه اللى لاحسه المغرفه و هاتك يا ضحك
مغاورى / تعرفى انا بكلمك منين دلوقت
سماح / منين
مغاورى / من اوضتنا بطمن ان مفيش حاجه ناقصه
سماح / ما انا فارشه كل حاجه بايدي و مش ناقص اى حاجه
مغاورى / بس انا لقيت بس ان شاء الله هتكمل بكره
سماح / ليكون اللى فى بالى
مغاورى / اللى هو ؟
سماح / انا مش ناقصه يا سى مغاورى
مغاورى / الاوضه نقصاكى يا هبله الواحد ما يعرفش يقولكوا كلمه حلوه ابدا
سماح / ليه هو احنا كتير و لا ايه
مغاورى/ انا بقول نقفل احسن بدل ما شكل الليله بتغمق مننا كدا
سماح / هههههههههههههه دا بدل ما تراضينى تسبنى و تهرب
مغاورى / و هو انا زعلتك عشان اراضيكي
سماح / اهو … بدلع عليك و لا انا مش وش دلع يعني قال و على راى اللى قال ان ما كنتش انت تدلعنى مين هيدلعنى
مغاورى / بكره يجي و انا اوريكي الدلع اللى ما حدش شافه
سماح / توعدنى ؟
مغاورى / و انتى تعرفى عنى انى بقول اى كلام
سماح / فشر دا انت سيد الرجاله كلها … بقولك ايه هو انا ممكن اسالك حاجه كدا
مغاورى / اسالي
سماح / هو انت حبيتني و لا لسه … اقصد الحب الحب ده مش اللى هو الغلاوه والكلام ده … الحب بتاع السيما و الافلام ده
مغاورى / سيبك من شغل التمثيل ده انا اللى بيني و بينك هيبقي اكبر بكتير و بايدك يكبر و يزيد
سماح / بس ايد لوحدها ما تسقفش يا مغاورى لازم ايدك فى ايدي و لا عشان انت ضمنتني فى بيتك يبقي خلاص بقي
مغاورى / اخص عليكي يا سماح
سماح / كنت هتخسر ايه لو قولتلى بحبك يا سماح و جبرت بخاطرى فى ليله زى دى دا انت لو بتكدب حلال
مغاورى / بس انا لو قولتها مش هبقي بكدب يا سماح انا بحبك فعلا و ربنا يعلم انتى غاليه فى قلبي قد ايه
سماح / امال ما بتقولهاش ليه
مغاورى/ مش عارف
سماح / مش عارف تقولها و لا مش عارف ليه ما بتقولهاش
مغاورى / ما اعرفش انتى بتسالي فى حاجات غريبه اوى النهرده
سماح / على العموم انا فى حاجه هقولها و تقول اللى تقوله بقي
مغاورى / ايه هى
سماح / انا بحبك يا مغاورى
سماح تقفل السكه
مغاورى / الو الو … الله طب بتقفلى ليه طيب
مغاورى يحاول يتصل كذا مره ما بتردش مغاورى يفتح الواتس و يكتب رساله
مغاورى / ردى عليا
سماح تعمل سين و ما تردش مغاورى يكتب رساله تانيه
مغاورى / احنا فينا من الحركات دى
سماح تعمل سين و ما تردش مغاورى يبتسم و يكتب
مغاورى / هانت سواد الليل و تجيلى و ساعتها هنشوف هتروحى منى فين
سماح تبعت ايموجى القرد اللى مغمى عنيه مغاورى يضحك و يسيب الاوضه و يقفل الباب وراه
……………………….
فى اوضه مختار
هند بتقيس فستان قدام المرايه مختار يخرج من الحمام بينشف شعره هند تتكلم و هى بتبص فى المرايه
هند / مختار هو انا طخنت
مختار يبص من فوق لتحت هند تلفله
هند / انت بتبص على ايه
مختار / بشوف التضاريس الله مش سالتيني لازم ادرس الموضوع قبل ما اديكي اجابه
هند تبص لنفسها فى المرايه تانى
هند / شكرا حقيقي شكرا … حاسه ان الفستان ضيق مع انه نفس مقاس التانين مش معقول اكون طخنت امال الرياضه و الجرى دا كله ايه بس اوووف … انا شكلى مش هلبسه بكره
مختار / على فكره حلو عليكي مش مبين طخنك
هند تبصله بفزع
هند / ايه !!
مختار / قصدي مش مطخنك و لا حاجه مفيش حاجه اقصد حلو يعني و انتوا حريم فى بعض و كدا و المسأله دى نسبيه يعني
هند / يعني ايه نسبيه
مختار / هاه … المصانع … اقصد المصانع المقاسات بتبقي نسبيه بتفرق من مصنع لمصنع ممكن ايد الراجل ده كانت تقيله شويه فى القماش … الناس ما بقاش عندها ضمير خالص يا هند
هند / تصدق ممكن دا فعلا مركته مختلفه
مختار / بس والله مش ضيق و لا حاجه حلو و لمك .. قصدى لفك مبين جمالك اقصد .. والله حلو
هند / ماشي اصلا فعلا هنبقي حريم فى بعض و مش هنروح هناك فا شغال … اروح اقلعه بقي
هند تيجي تروح ناحيه الدولاب مختار يشدها من ايدها عليه
مختار / لو كان ضيق كنت قولتلك اكيد مش هرضي حد يشوف البسبوسه بالقشطه و المكسرات بتاعتى دى
هند / ههههه طب وسع خليني اغيره
مختار / ما تخليكي بيه شويه و لا الحاجات الحلوه دى بتطلع فى المناسبات بس طب دا انا حتى جوزك يعني
هند / هلبسلك الاحلى منه
مختار / وعد
هند / سبني بقي يا مختار الله
مختار يسيبها تروح تفتح الدولاب و هو متابعها و مبتسم
…………………
تانى يوم جنينه الزنايته
فرقه مزمار و الرجاله بترقص اربع عربيات توصل ورا بعض الزنايته يضربوا نار تحيه ينزل الجوارحه مغاورى و شاهين و مامته و ماجده و عيالها و عدد محدود من الرجاله الحريم يدخلوا السرايا و مغاورى يجرى يبوس ايد شاكر قاعد على كرسي
شاكر / هتاخد منى الغاليه خلاص
مغاورى / فى عنيا يا سيد الناس
شاكر يبتسم و يطبطب عليه عباده يروح يسلم
عباده / الماذون هنا بياكل لقمه على ما توصلوا
مغاورى يوطى عليه
مغاورى / ما تاخذنيش عمتى اللى كانت بتزن على الفرح عملت مناحه لما شافتنا خارجين و مسكت فى اختى عشان كدا اتاخرنا
عباده / عذرها معاها ربنا يصبرها
مغاورى/ وزعتوا اللحمه
عباده / من بدرى الناس بتدعيلكوا … انا هروح اشوف الماذون عن اذنك
مختار يضرب نار على الحصان و ينزل
مختار / مالك يا عم واقف لوحدك و لا كانك العريس ما تيجي على الحصان لفه
مغاورى / لو الماذون هيطول فى الاكل هطلع لو خلص يبقي بعد كتب الكتاب بقي
مختار / و ماله ارقص انا
مختار يروح يركب الحصان مغاورى يروح يقعد جنب شاكر و شاهين
شاهين / بس انت ما ينفعش تسكت يا حج ما دام الموضوع بيزيد يبقي اكيد الدوا مش مظبوط
مغاورى / فى ايه
شاكر / ههههههههههه اللحقنى من ابوك يا سيدى
شاهين / نفوق من حوار الفرح ده و انا بنفسي هاخدك على مصر و نشوفلك دكتور شاطر
شاكر / عندنا فى البلد احسن دكاتره و احدث مستشفيات الواحد كبر يا حج شاهين
مغاورى / ما تقولش كدا يا حج ربنا يديك الصحه و طوله العمر
شاكر / شكلك مش عاجبنى مالك
شاهين / ما انا حكيتلك يا سيد الناس … اللى حصل اكيد اثر عليه
شاكر / والله انا قولتلكوا ان ده هيحصل كنا اجلناها شويه
مغاورى / ناجل ايه يا سيد الناس و لا ساعه واحده دا انا لولا العيبه كنت قومت الشيخ من على اللقمه
شاكر / ههههههههههههههههه و اهو قاملك لوحده
الرجاله تحط ترابيزه و كراسي و الحريم يطلعوا التراس و زغاريط شاكر يقوم و هو مش قادر مختار و عباده يسندوه و مغاورى يعدله الكرسي و يجرى يقعد قدامه و يحط ايده فى ايده و الماذون يغطى ايديهم بالمنديل و الزغاريط ماليه السرايا
……………………..
فى فيلا فيرا
رشيد نايم باب الاوضه يخبط رشيد يفتح و يقوم يفتح يلاقي فيرا
فيرا / لو ما وراكش حاجه مهمه تعال عوزاك
رشيد / دلوقت
فيرا / براحتك
فيرا تبتسم و تمشي رشيد يدخل يغير هدومه توصله رساله يروح يجيب الموبايل
رشيد / لسه مخلصه الفيلم طلع حلو اوى لما تصحى هبقي احكيهولك انا داخله انام تصبح على خير
رشيد يبتسم و يكمل لبس
…………………….
فى سرايا الجوارحه
عربيات كتير جدا تقف و ينزل منها الجوارحه و الزنايته و مريم تفتح الباب لسماح و تعدلها الفستان هى و هند فى هدوء تام كوثر تطلع تقف على باب السرايا و الستات بيبوسوا سماح
كوثر / نورتى بيتنا يا عروسه
سماح / منور باهله يا عمتى
ناصر / جرا ايه يا عريس كنت مستعجل تروح يعني ايه
مغاورى يبص لناصر و يبتسم فاطمه تروح تقف جنب سماح و تعديها من كوثر
فاطمه / يلا يا جماعه وسعوا للعرسان يلا يا عريس يلا يا عروسه يلا يلا
فاطمه و انتصار يعدوا مع سماح و مغاورى يعدى و ماجده و ام مغاورى وراهم كوثر تطلع وراهم هند ترجع العربيه عباده يوشوش مختار
عباده / قلبي مش مرتاح اسيب اختى و الوليه دى فى مكان واحد
مختار / فعلا لسه معزينهم فى الراجل هتبقي تقيله لما نعزيهم فى امه بالسرعه دى
مختار يروح يركب مع هند و عباده متابعه و ما يقدرش يكتمها جواه و يروح يقف جنب خديجه قاعده فى العربيه
عباده / ما نزلتيش يعني
خديجه / نزلت بس لما شوفت عمتى اداريت قولت اللم اليوم
عباده / يتلم اكتر من كدا الا ما فى زغروطه واحده تجبر البت
خديجه / هى راضيه و بعدين انا اللى هقولك العروسه للعريس و الجرى للمتاعيس
عباده / و انا عريس ولا … من المتاعيس
خديجه / عباده !!!
……………….
فى فيلا فيرا
فيرا قاعده قدامها شاشات كتير عليها كاميرات مراقبه البلد و حاطه رجل فوق رجل على الترابيزة رشيد يدخل
فيرا / فكرت احتفل مع مين ما لقيتش اعز منك
رشيد / خير
فيرا / الشباب بتوعى قدروا يهاكوا السيستم بتاع البلد بصراحه الفاير وال بتاعهم جامد بس اهو دخلت و بقيت وسطيهم
رشيد / برافو بس يا ترى بقي و انتى بتدخلى وسطيهم خفيتى نفسك كويس و لا
فيرا / بيستخدموا برامج غاليه و اصليه بس هم نفسهم مستواهم ما يوصلهمش للمستوى ده و بعدين لما يدخلوا اكيد هعرف
رشيد / و هتعملى ايه ساعتها هتغيرى السيستم و لا هتقوى الفاير وال بتاعك … بس ساعتها هيكونوا دخلوا و صوروا كل اللى هم عاوزينه
فيرا / كل اللى انا عوزاه
رشيد / انا طالع انام
رشيد يسيبها و يمشي و هى قاعده مبسوطه
…………………
فى سرايا الجوارحه
فى اوضه سماح
مغاورى قاعد على كرسي و جنبه صينيه اكل كبيره يمد ايده و ياخد فرده حمامه و يلفها يبص عليها سماح تفتح الباب لابسه برنص قصير مغاورى يسيب الحمامه و يقوم يقف سماح تتكلم بخجل
سماح / بعد ما قلعت لقيتنى نسيت اخد معايا غيار ما لقيتش غير البرنص جوه
مغاورى واقف باصص عى سماح و مزبهل
سماح / ما تبصليش كدا الله
مغاورى يقرب
مغاورى / امال المفروض ابص ازاى
سماح / انا اتوضيت على ما تتوضي اكون طلعتلى اسدال اصلى بيه
مغاورى يبص عليها تقفل البرنص اكتر
سماح / عيب كدا الله
مغاورى يبتسم و يدخل الحمام بس ما يقفلش الباب و عمال يسرق نظرات سماح مدياله ضهرها بتفتح الدولاب و تشب تجيب اسدال و تفتح الروب و تبص وراها مغاورى يتوضي و ينوى بصوت عالى
مغاورى / نويت الوضوء باذن الله
سماح تروح و تقفل الباب و هى مبتسمه
……………………..
فى ممر بين الاوض
شاهين يفتح باب يلاقي فتوح قاعد على اللاب
شاهين / انت لسه صاحى يا ابنى دا الفجر قرب ياذن
فتوح/ خلاص يا كبير هانت … وشك حلو يا كبير دخلت
شاهين / كلم زياد باشا قوله
فتوح / دلوقت ؟
شاهين / ايوه دلوقت لو نايم يصحى عشان يكلم الجماعه المهندسين بتوعه يشتغلوا هم كمان … عفارم عليك يا ابن الجوارحه عاوزينها قاضيه المرادى يا وله
فتوح / ما يكونش عندك فكر
شاهين يقفل الباب و يمشي
……………….
فى اوضه فاطمه
فاطمه قاعده على حرف الشباك بتبص على السما شاكر ممدد على السرير يبصلها و يناديها
شاكر / فاطمه .. فاطمه .. فاطمه
فاطمه تنتبه و تجرى تقعد جنبه
شاكر / اللى واخد عقلك
فاطمه / ايوه يا خويا عاوز حاجه ؟
شاكر / مالك
فاطمه / البت قطعت بيا اوى اول مره تبات بره البيت
شاكر يبتسم و يطبطب عليها
شاكر / و هى بايته عند حد غريب دا فى بيتها مع جوزها
فاطمه / برده … المهم طمنى عليك لسه تعبان
شاكر / الحمد لله
فاطمه / بكره يا خويا تروح مصر تشوف دكتور تانى انت التعب كل يوم بيزيد عن اللى قبله
شاكر / يا فاطمه هو انا هقدر على مشوار مصر
فاطمه / و ما تقدرش ليه و بعدين انا هبقى معاك تريح عليا لو تعبت انما كدا ما ينفعش ان كنت جوزت عيالك و اطمنت عليهم فانا لسه ما اطمنتش عليا
شاكر يضحك و يبص الناحيه التانيه و يرجع يبصلها
فاطمه / انا ماليش غيرك و ربنا شاهد وجعك بيوجعنى
شاكر ياخدها فى حضنه تمسح دموعها
شاكر / ما بيهونش عليا وجعى الا وجودك جنبى يا بطتى ربنا شاهد عشت معاكى اجمل ايام حياتى بس مش هنضحك على روحنا انا عندى كام سنه
فاطمه / يا خويا ما تقولش كدا الشباب شباب القلب و انت قلبك مفيش منه ما تستسلمش للافكار دى بص حواليك لبتوع السيما اكبر منك و لسه بيتجوزوا … اجبلك عروسه
شاكر / هههههههههههههههه
فاطمه / والله لو ده هيخليك تقوم على رجليك لاعملها بس تقوم
شاكر / خليكي انتى جنبى كدا و انا هبقى كويس
فاطمه / خليني يا لهوى و انا فى ديك الساعه اللى ابقى فيها فى حضنك
شاكر يبوس راسها و تنام فى حضنه
………………….
فى اوضه سماح
سماح نايمه و مغاورى حاضنها المنبه يضرب يمد ايده بسرعه و يطفيه و يفرد ضهره ثانيه و يروح يصحى سماح
مغاورى / سماح … سماح … الفجر هياذن يا سماح … سماح … يا بت انا واخد عهد ما فوتش فجر لا انا و لا اهل بيتي قومى يا بت اصحى … يا لاهوى ايه النومه دى هههههههههه … سماح
سماح تتقلب و تديله ضهرها
مغاورى / طب كانوا بيصحوكى ازاى فى بيتكوا طيب … هههههههههه طب خليكي لحد ما اتشطف و اتوضى … سماح … ههههههههه راجعلك
مغاورى يقوم و ياخد غيار و يروح الحمام سماح تتقلب و تبدا تفوق تقوم تقعد و هى ماسكه دماغها تمسك الموبايل و تبص على الساعه
سماح / دا انت اصعب من امى
سماح تتمطع و تقوم تروح ناحيه الاستقبال بتاع اوضتها و تفتح التقفيل تطلع كنكه و فنجانين و تلقم و تعمل قهوه مغاورى يطلع من الحمام يلاقيها واقفه
مغاورى / صباح العسل
سماح / صباح الفل عملتلك قهوه
مغاورى / قهوه ايه انا لسه ما نمتش
سماح / اللى واخده عقلك
مغاورى يحضنها من ضهرها و يمسك الكنكه من ايدها
مغاورى / نصلى الفجر و اقولك مين هاتى انا هكمل خشى انتى عشان تجهزى قبل الفجر
سماح / لسه بدرى على الفجر انت بتصحى بدرى اوى
مغاورى / متعود بقى اقرا الورد بتاعى قبل الفجر
سماح / و انا اقول برده وشك بينور ليه تقبل الله
سماح تصب القهوه
سماح / دوق بقى قهوتى و قولى رايك
مغاورى / تسلم ايدك
سماح تناوله الفنجان و تدخل الحمام ياخد الفنجان و يروح يفتح البلكونه و يقعد يشرب و هو مبسوط
مغاورى / ما الجواز طلع حلو اهو امال سمعته مين مبوظها بس
مغاورى يشرب القهوه و هو مبسوط
………………………..
فى اوضه هند
مختار يصحى ما يلاقيش هند جنبه يقوم يقعد يلاقى هند عامله تمرين بلانك على الارض
مختار / عاش يا وحش كام ثانيه
هند / دقيقتين و نص
مختار / برافو بتتحسنى
هند تقع
هند / عينك رشقت
مختار / هههههههههههههههه دى عيني انا قومى ياختى قومى انتى داخله الاولمبيات قريب مالك كدا الفتره دى
هند تقوم تقعد قدامه
هند / مالى
مختار / عماله تحلوى
مختار يلعب فى خدها و يقوم يدخل الحمام هند تقوم تقف على الباب
هند / كنت بفكر
مختار من جوه / هى وصلت للدرجادى
هند / بطل بقى
مختار من جوه / طب استنى اطلعلك شكل الموضوع كبير
هند / ما اعرفش اكلمك جد ابدا
مختار من جوه / طب مفيش قهوه للحب و لا ما بتتعملش الا للكبير
هند / صبرنى يارب عنيا حاضر
هند تروح تفتح التقفيل و تعمل القهوه مختار يطلع من الحمام يروح يقف جنبها و يسند على التقفيل
مختار / سمعك خير
هند / انا فكرت و لقيت ان كلامهم صح
مختار / كلام مين
هند / نروح نكشف
مختار / هو انتى مع المجهود اللى بتعمليه ده متوقعه يحصل حمل يا هند
هند / انا ببقى عارفه بتمرن امتى تمام و مش ببذل المجهود اللى انت متخيله يعنى هم بيبالغوا
مختار / هههههههههههههههههه دا على اساس انى ما ليش عين اشوف بيها دا انتى فاضلك تكه و دراعك هيبقى انشف من دراعى
هند / انا بتكلم جد على فكره
مختار / تمام يا هند نروح بس مش عاوز اى ردود فعل من اياها تمام
هند / قصدك ايه يعنى
باب الاوضه يخبط جامد
مختار يبص لهند تجرى تدخل الحمام و توارب الباب و مختار يروح يفتح يلاقى مريم
مريم / اللحق يا عمى عم شاكر تعبان اوى و هينقلوه المستشفى
مختار / انتى بتقولى ايه
مختار يجرى يفتح الدولاب و يلبس و هند تطلع من الحمام تساعده
هند / استر يارب ان شاء الله خير
مختار / هو كان تعبان اوى الفتره اللى فاتت و عمال يكابر عشان فرح سماح
هند / ان شاء الله خير ان شاء الله هيبقى كويس
مختار يجرى و هند تطلع عبايه و تلبس هى كمان
……………………….
فى المستشفي
الكل واقف قدام العنايه المركزه و انتصار واخده فاطمه فى حضنها بتعيط و عباده رايح جاى الدكتور يطلع الكل يتجمع حواليه
ناصر / طمنا يا ابنى ايه الاخبار
الدكتور / احنا عملنا اللى علينا يا كبير بس للاسف الحاله مش مستقره عن اذنكوا
عباده / عن اذننا فين و ما دام الحاله مش مستقره سايبها ورايح فين دا ابويا اللى جوه ده
ناصر / عباده
مختار / تعال يا عباده
مختار يحاول ياخد عباده عباده يزقه
عباده / مش رايح فى حته
الدكتور / انا مقدر موقفك بس دى مستشفي و دى عنايه و اللى جوه كلهم حالتهم كلها زى والدك و يمكن اسوء بس برده فى مرضي كتير فى المستشفي و لكل واحد منهم له ابن زيك عاوزه يعيش
فاطمه / طب ينفع ادخله ؟ هو بيبقي كويس لما ببقي جنبه
الدكتور / ممنوع الزياره انا اسف
ناصر / حقك علينا يا دكتور شوف شغلك
الدكتور يمشي و عباده بيبصله بغل
ناصر/ ما تطلعش منك يا عباده
عباده يسيب المكان و يمشي ناصر يبص لمختار يجرى وراه
فاطمه / بيبقي كويس لما ببقي جنبه هو قالى والله هو قالى
انتصار/ اهدى يا ام عباده وحدى الله ما ينفعش كدا
فاطمه / لا اله الا الله
فاطمه تعيط و انتصار تطبطب عليها
……………………..
قدام المستشفي
عباده طالع بيغلى مختار يحصله و يوقفه
مختار / استنى هنا رايح فين
عباده / فى ستين داهيه هقعد هنا اعمل ايه فايدى ايه اعملهوله ابويا بيموت يا مختار هقعد جنبه استناه يموت يا مختار
مختار / ما حدش بيموت قبل اوانه اللى محدش عارفه غير اللى خلقنى و خلقك فاهدى و ادعيله
عباده / لو جراله حاجه انا … انا مش هستحمل يا مختار دا ضهرى اللى مسنود عليه
مختار / ادعيله انت مؤمن و الكلام ده ما يطلعش منك
عباده / مش قادر مش قادر
مختار / لما انت مش قادر امك المسكينه تعمل ايه اختك تعمل ايه هاه اجمد عشانهم
عباده كانه افتكر حاجه
عباده / و دى هعمل ايه دى كمان
عباده يفضل يروح و يجي
عباده / هنقولها ايه بدل ما نروح نصبح عليها هنكسر فرحتها مش كفايا انها اتجوزت كتيمي بالشكل ده مش كفايا … لا اله الا الله … لا اله الا الله
……………………
فى اوضه سماح
سماح قاعده بتاكل هى و مغاورى فى البلكونه هى تفصص و تاكله فى بقه
مغاورى / يا بت شبعت كلى انتى
سماح / ما انا باكل بس الحته دى طريه و حلوه بالله لتاكلها
مغاورى ياكلها و يبوس ايد سماح
سماح/ باستك العافيه
الباب يخبط
مغاورى / خليكي هنا هشوف مين
سماح تبتسم مغاورى يقوم يفتح يلاقي شاهين سماح تقوم تبص من ورا باب الاوضه تلاقي شاهين تطلع
سماح / صباح الخير يابا الحج اتفضل
شاهين / اتفضل فين يا عروسه انا بس بطمن عليكوا عشان خارج … خد بالك من عروستك يا عريس
مغاورى يهز راسه شاهين يمشي مغاورى يقفل الباب و يروح الحمام يغسل ايده
سماح/ الله مش تخلص اكلك الاول
مغاورى / شبعت يا ست البنات كلى انتى
سماح / لا انا شبعت هروح اشيل و اجى اغسل ايدي … اعملك حاجه تشربها شاى و لا قهوه تحبس و لا اجبلك ساقع …اغسلك فاكهه
مغاورى يبتسملها و يبوس راسها و يعديها و هو ساكت
سماح / الله … طب ما قولتش اعملك ايه طيب
…………………….
فى القسم
زياد بيتكلم فى التليفون و امين قاعد قدامه
زياد / تمام يا باشا … لا اكيد … تمام معاليك … باذن الله … تمام… فى حفظ الله سعادتك … مع السلامه مع السلامه
زياد يبص لامين
زياد / القيادات مبسوطه جدا من فكره تهكير الكاميرات و فى فرقه كامله تفرغت تماما لمراقبه و متابعه الكاميرات دى و تفريغها اول باول
امين يهز راسها
امين/ باشا انا فى حاجه كنت عاوز اقول لحضرتك عليها
زياد / اكيد اتفضل
امين / احنا ما بنتعاملش مع واحده عاديه
زياد / ما فيش حد ما بيغلطش يا امين و معظم العناصر اللى كانت بتساعدها تمت تصفيتها
امين / ايوه يا باشا انا فاهم بس … قالوها يعني لا تصدق كل ما ترى
زياد / فهمتك … بس برده ما فيش مانع انك تحطها تحت عينك و تستنالها غلطه
امين / ربنا معانا الموضوع ده بقي مع سعادتك بعد كدا ما افتكرش نقدر نساعد فيه بعد كدا … بس لو سعادتك
زياد / كتير خيركوا اوى … بس لو تسمحلى … مالك مش مظبوط النهرده خير
امين / لا مفيش حاجه عن اذنك
زياد / تمام تقدر تتفضل
امين يمشي و هو بيتكلم فى التليفون
امين / ايوه يا كبير سلام عليكم ايه الاخبار طمنى … لا خلصت و جايلك .. تمام تمام .. يلا فى حفظ الله سلام
امين يفتح عربيته و يركب
…………………
فى اوضه سماح
مغاورى قاعد حاطت ايده على خده سماح تروح تقعد جنبه و فى ايدها طبق فاكهه بتقطعها
سماح / مالك يا مغاورى فى حاجه صح
مغاورى يبصلها تناوله حته تفاحه متقشره
مغاورى / باين عليا يعني
مغاورى ياخدها منها
سماح / انت غير امبارح من ساعه ما ابويا الحج كلمك و انت سرحان … انا عارفه انى يمكن اكون ما بفهمش فى شغلتكوا بس اهو كانك بتفضفض مع روحك و انا والله لو على رقبتى ما هطلع سرك بره و ان حصل ادبحنى
مغاورى يبوس راسها
سماح / مهو سكوتك مضايقنى ما حدش بيبقي شايل الهم يوم صباحيته كدا الا لو عروسته ما ريحتوش
مغاورى يتعدل فى قعدته
مغاورى / سماح
سماح تتعدل و تبصله
مغاورى / انا هقولك حاجه بس توعديني تبقي هاديه تمام
سماح/ عيني حاضر اوعدك قول
مغاورى / ابوكى تعب شويه
سماح تبص لمغاورى من غير رد فعل
مغاورى / ما كانوش عاوزين يقولولك عشان ما يكسروش فرحتك بس بصراحه مش قادر اخبى عليكي ما ينفعش افرضى لا قدر الله
سماح / ما تكملش ما تقولهاش ابوس ايدك ما تقولهاش … هو احنا ممكن نروحله … تاخدنى اشوفه و اطمن عليه … ممكن
مغاورى / اكيد
سماح تقوم تجرى تلبس مغاورى يقوم يلبس
……………………..
فى اسكندريه
رشيد يفتح الباب بالراحه و يدخل و هو محتاس باكياس كتير يحطها فى الارض و يقفل الباب
رشيد / سمر انا جيت
سمر تطلع بشويش من جوه تشوفه تجرى عليه تحضنه
سمر / حمد الله على السلامه … ما قولتش انك جاى كنت عملتلك لقمه و لا وضبتلك اى حاجه
رشيد / قولت اعملها مفاجاه و كمان ما كنتش عاوز ادخل بايدي فاضيه فلفيت شويه فى البلد قبل ما اجى و كمان انا عارف انك بتسهرى و تصحي متاخر فخفت اجى وانتى نايمه تتفزعى
سمر / على العموم حمد الله على السلامه
رشيد / جبتلك بقي اكله بحارى اشى سمك على جنبرى على سبيط على كابوريا بالرز و السلطات حاجه كدا لزوم الفسفور خلينا ننور
سمر / ريحتها باينه على ما تغير و تغسل ايديك اكون فرشت السفره و ناكل
رشيد / جبتلك كمان شويه هدوم على زوقى مش مروح الا اما اقيسهملك واحده واحده
سمر / انت هتفضل ترغى و الاكل هيبرد يلا يا رشيد
رشيد / فوريره … ما تسبيه يبرد و تيجي افرجك الحاجات اللى اشتريتها
سمر / هههههههههههههههه رشيد
رشيد / خلاص ناكل الاول
رشيد يدخل الحمام و سمر تفرش مشمع على السفره و ترص الاكل
………………………..
فى سرايا الجوارحه
مغاورى نازل و سماح بتجرى وراه كوثر تقابلهم
كوثر/ قلبي عندك يا بنتى يادوب تروحى تطلى عليه قبل ما السر الالهى يطلع
مغاورى / ان شاء الله يقوم منها
كوثر / ياخويا على الاقل كبر عياله و جوزهم و اطمن عليهم ما سبهمش و هم صغيرين
سماح / ربنا يشفيه و يشيل عيال عياله كمان
مغاورى / عن اذنك يا عمتى مستعجلين
كوثر / طبعا يا حبيبي يارب بس تلحقوه
مغاورى يبص لكوثر سماح تسيب السرايا و مغاورى يمشي وراها يفتح العربيه تركب يركب و يسوق
مغاورى / ما تاخديش على كلامها
سماح / عشان الورد
مغاورى/ تعيشي يا بنت الاصول … ان شاء الله هيقوم بالسلامه
سماح / انا مش هقول لحد كلام عمتك كانه ما حصلش مش وقت النفوس تشيل من بعضيها
مغاورى / عين العقل
سماح / بسرعه شويه الله لا يسيئك
مغاورى / عيني حاضر
………………….
فى المستشفي
فاطمه / ما حدش كلم سماح يطمن عليها
انتصار / شويه كدا و اروح اشقر عليها ما تشغليش بالك ياختى
الدكتور يطلع من العنايه
الدكتور / الحمد لله الحاله استقرت
فاطمه / يعني ممكن اشوفه يا دكتور
الدكتور / بس ما تطوليش و ياريت ما تتعبيهوش فى الكلام
فاطمه / مش هفتح بقي هبص عليه من بعيد بس
الدكتور / تمام تقدرى تتفضلى
فاطمه تدخل ناصر يكلم الدكتور فى جنب
ناصر / طمنى يا دكتور هو حالته ايه
الدكتور / مش هقدر اخبى عليك يا كبير ادعوله احنا عملنا كل اللى نقدر عليه بس واضح انه خلاص كدا
ناصر / احنا ممكن ننقله مستشفي تانيه نسفره بره لو حكمت
الدكتور / يا كبير مش هيعملوا اكتر من اللى احنا عملناه
الدكتور يبص يمين و شمال
الدكتور / انا لولا حاله سى عباده كنت قولتلكوا خدوه يرتاح فى البيت
ناصر يبص فى الارض
الدكتور / الحج شاكر قلبه وقف مرتين لحد دلوقت و لحقناه
ناصر / طب و احنا ممكن نطل عليه
الدكتور / ممكن بس زى ما قولت للحجه ما تطولوش و ما تتعبوش الحاله
ناصر / تمام يا دكتور حقك علينا تعبناك
الدكتور / ازاى بس دا شغلى
الدكتور يمشي مغاورى و سماح يدخلوا كل الموجودين يتفاجؤا
شاهين / هو ده اللى اللهيها
سماح / هيخبى عليا ازاى طمنى يا كبير ابويا عامل ايه
ناصر / كويس امك جوه عنده تطلع و ادخلك تطمنى عليه
سماح / احمدك و اشكر فضلك يارب
سماح تقف عند الباب و تحاول تبص فاطمه تطلع بتعيط تشوف سماح تتفاجئ
سماح / ابويا عامل ايه ياما
فاطمه / انتى ايه اللى جابك مين اللى قالك
سماح / عديني ادخل اطمن عليه
سماح تدخل تلاقي شاكر متوصل بالاجهزه
سماح/ ما قدرتش على بعدى صح
شاكر يرفع ايده حاجه بسيطه سماح تجرى تمسك ايده متوصله بالكانوله و تبوسها
سماح / سلامتك يا سيد الناس ايه يابا مالك ايه اللى تاعبك
شاكر يبص لفوق و يرجع يبصلها
سماح / ما تتعبش روحك و انا هفضل جنبك لحد ما تقوم بالسلامة و لما نروح هعملك طاجن الباميه باللحمه الضانى اللى بتحبه و هحطلك قرن الفلفل زى ما بتحبها بالظبط و مش هكتر التوم و السمين عشان ما تتعبكش
سماح تعيط
سماح / و هقمرلك رغيفين من خبيز امى اللى انت بتحبه تغمس بيهم بس انت تقوم قوم يابا عشان خاطرى
الجهاز يزمر ممرضه تدخل جرى تبعد سماح و تطلعها بره و دكاتره و ممرضين يتلموا حوالين شاكر
سماح / هو ماله … ابويا ماله
مغاورى ياخد سماح بعيد و عباده يجرى على جوه يبص يلاقى دكتور تانى بيعمل لشاكر صدمات كهربا مره اتنين تلاته الدكاتره تبص لبعض عباده يزعق
عباده / وقفت ليه يا دكتور حاول تانى
ممرض يشد الغطا على وش شاكر عباده يزقه
عباده / انت بتعمل ايه حاول تانى بقولك حاول تانى
مختار و مغاورى و امين يشدوا عباده بره و الكل منهار و بيعيط
عباده / سيبونى سيبونى
مختار / فوق يا عباده و وحد الله دا انت مؤمن يا جدع
عباده / مش اول مره يقف و حاولوا اشمعن المرادى؟؟ يحاولوا تانى .. يحاولوا تانى و تالت يحاولوا لحد ما يصحى
ناصر / عباده … وحد الله … اكرام الميت دفنه
عباده يبص لناصر
ناصر / خلصوا الاجراءات و انا هغسله
فاطمه و عباده فى نفس واحد
فاطمه / لا
عباده / لا … ابويا كان محلفنى انا اللى اغسله … انا اللى هغسله
فاطمه / كان بيقعد يشرحله كتير و يقوله و يمرنه كان محلفنى ما حد يعملها غيره
فاطمه تعيط
فاطمه / كنت بتخانق معاه لما كان بيجيب السيره دى … الصبر من عندك يارب
مغاورى يروح يطبطب على سماح منهاره من العياط
مغاورى / لو تحبى اروحك على بيت ابوكى لحد ما نخلص الاجراءات
سماح / رجلى على رجل ابويا مش هسيبه الا اما اطمن عليه
مغاورى/ اللى يريحك
مغاورى يجي يمشي سماح تمسك ايده
سماح / ما تسبنيش بالله عليك ما تسبني
مغاورى ينزل على رجليه قدامها
مغاورى / هساعد اخوكى و اهلك … بس لو محتاجانى اخليني
سماح تبص على امها بتعيط بعيد لوحدها تقوم و تروحلها
انتصار / عاوزه تقعد لوحدها سبيها
سماح ما تسمعش و تروح تحضن امها فاطمه تعيط فى حضن سماح و مغاورى متابعها
انتصار / روح يا مغاورى احنا معاهم
مغاورى / خليني يمكن تحتاج حاجه
انتصار / خليك يا ابنى خليك
انتصار تغمض عنيها و تحاول تكتم دموعها جواها
………………………..
فى سرايا الزنايته
الصوان منصوب و الرجاله بره و الستات جوه زياد يدخل
زياد / البقاء لله يا كبير كان راجل فى قمه الاخلاق
ناصر / ربنا يعزك
زياد / البقاء لله يا عباده ربنا يصبرك
عباده / ما نجلكوش فى حاجه وحشه
زياد يسلم على الباقيين و يدخل يقعد جنب شاهين
زياد / البقاء لله يا حج
شاهين / و نعم بالله يا ابنى
زياد / انا عارف انه وقت مش مناسب بس ملف التحريات وصل و كل الاماكن اللى حضرتك بلغتنا بيها نضيفه و مفيش اى نشاط مشبوه حواليها
شاهين / الصباح رباح يا ابنى بكره اجيلك لحد عندك و نتكلم
زياد يهز راسه و يقوم يقعد وسط الناس
……………………….
فى السرايا
خديجه شايله صينيه قهوه و هند شايله صينيه عليها كبايات مايه و بيعدوا بالصوانى خديجه تعزم على كوثر
كوثر / تسلمي يا حبيبتي … صحيح ناس … و لا بلاش … روحى يا بنتى روحى … مشيلين الحامل و مشغلينها … يلا هنستنى ايه من الزنايته
ام مغاورى / عدى اليوم احنا فى عزا
هند تعدى و تعزم على اللى جنب كوثر
كوثر / الله يرحمها ورده بنت عبد الدايم لولاش انها من عيله
هند تعزم على كوثر
كوثر / كانت شافت مصير الغلبانه دى
هند تبص لكوثر كوثر تاخد كبايه المايه و تشرب هند تعديها و تعزم على ام مغاورى
كوثر / الا ما فيش حاجه تفرحنا يا بنت مصر
هند / فى ناس مهما يجرالهم ما بيفرحوش حتى لما بيضحكوا بيقلقوا و يقولوا لعله خير
هند تكمل لف
كوثر / شوفتى ربايه مصر يا اختى اهو ديتها سنه و لا اتنين و يخلصنا منها
هند تعمل مش سامعه و تكمل
ام مغاورى / قومى نروح ما دام ناويه على غم قومى نروح
كوثر / اروح فين عشنا مره و شوفنا العزا فى بيتهم اروح ليه
ام مغاورى / ربنا يهديكي هتجبيلنا الكلام
هند تروح تعزم على فاطمه بتعيط
فاطمه / مالك يا بت فيكي ايه
هند / مفيش حاجه
فاطمه تبص تشوف كوثر و ام مغاورى بيتودودوا تطبطب على كتف هند هند تعديها و تمشي فاطمه توطى على سماح قاعده جنبها بتعيط
فاطمه / هى الوليه ام عباس كلمتك فى حاجه
سماح / هتكلمنى فى ايه يعني عزتنى بس
فاطمه / طيب
هند تروح تقف جنب انتصار و تعزم عليها باخر كبايه
انتصار / تسلمي مش عايزه
هند / عارفه انه مش وقته بس هى مين ورده عبد الدايم دى
انتصار تبص لهند باستغراب
انتصار / مرات عمك شاكر الاولانيه بتسالي ليه
هند / لا خلاص مفيش بيتكلموا عنها بس
انتصار / الناس ما بتتعظش جايين يعزوا جايين يتاكدوا ان الدنيا ما بتدومش لحد بدل ما يخافوا و يتعظوا بيتكلموا فى سيره الاموات
هند / كانوا جايبين سيرتها بالخير
انتصار تبتسم و تمسح دموعها
انتصار / الله يرحمها الضحكه ما كانتش بتفارق وشها و اول ما يتقفل عليها باب و تفتكر كل الغمز و اللمز و التلسين ما كانتش بتعرف توقف دموعها الله يرحمه عمى شاكر كان الوحيد اللى بيهون عليها و يعرف يسكتها كان اصيل ابن اصول امير ابن امره الله يرحمه الله يرحمه
انتصار تعيط
هند / بيقولوا كانت من عيله كبيره
انتصار / ايوه ابوها الله يرحمه كان عمده بلد جنبنا كدا و كان عندهم اراضي و مواشي بس انتى عارفه الصعيد زمان ما كانوش بيورثوا البنات ارض قدرولها ورثها بقرشين و ادهوملها الله يرحمهم بقي فى ناس بتقول … الله يرحمهم بلاش نجيب فى سيره الناس ما حدش عارف الحقيقه انا كنت عيله وقتها ما اوعاش على الكلام ده
هند / ما ادوهاش حقها يعني
انتصار / فى ناس بتقول و ناس بتقول لا خدت حقها و ان ده كان تمن الارض وقتها الله اعلم بس اللى اعرفه ان من يومها قالت اللى كنت بروح بلدنا عشانه مات و ما عتبتش البلد تانى حتى لما ماتت كانت موصيه تندفن فى مقابرنا احنا مش فى بلدها
هند / الله يرحمها
انتصار / انا عارفه انك على رجلك من اول النهار بس سامحيني مش قادره اقوم النهرده
هند / لا ارتاحى قولى انا اعمل
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
