رواية البر التاني الفصل الثامن والثلاثون 38 بقلم لولو محمد
رواية البر التاني الجزء الثامن والثلاثون
رواية البر التاني البارت الثامن والثلاثون
رواية البر التاني الحلقة الثامنة والثلاثون
سميحه و فاطمه بيركبوا ورا و شاكر بيتكلم مع عباده
شاكر / لما توصل طمنى و خد بالك منهم
عباده / ما تقلقش فى عنيا
امين يطلع من السرايا بيجرى
امين / استنوا انا جاى
عباده / جاى تعمل ايه
امين / يا عم انت مش كدا كدا رايح مصر خدنى معاك هتخسر ايه يعنى
عباده / اركب يا خويا ما احنا طالعين رحله
امين / امال طالعين تحاربوا
امين يركب جنب عباده
شاكر / مصلحه اهو يصحصحك فى الطريق و تبدلوا السواقه سوا و تريحوا بعض
عباده / تمام نمشى بقى عشان نلحق
شاكر / بالسلامه
………………………………
عباده يركب و يمشى و شاكر واقف متابعه لحد ما يطلع من البوابه يلف و يدخل السرايا يلاقى ناصر قاعد مع سليمان و انتصار
شاكر / مشيو خلاص
ناصر / يرجعوا بالسلامه
شاكر يقعد و هو بيتنهد
انتصار / اعملك شاى يا عمى
شاكر / لو قهوه يبقي كتر خيرك
انتصار / عنيا حد تانى
سليمان / تسلمى
انتصار تدخل المطبخ
شاكر / اخبار مختار ايه ما اتكلمش معاك فى حاجه
ناصر / لا حاجه زى ايه
شاكر / اى حاجه بطمن عليه النهرده اللى حصل ده اكيد ما جاش من فراغ
سليمان / كانوا بيقولوا انه ضغط عليها جامد امبارح فى الرمايه و مع اول كلمه من ام عباده انفجرت
شاكر / مهو ده اللى وصلنى و عشان كدا بطمن عليه
ناصر / بس اللى اعرفه ان ام عباده هى اللى بتضغط على هند من يوم ما جت السرايا دا اللى الحريم بيقولوه و اللى البت نفسها قالته قدامك
مختار ينزل من فوق
مختار / انا بقول بلاش نحكى فى المحكى لا هى اول و لا اخر خناقه حريم تحصل فى السرايا
ناصر / ايه اللى نزلك مش قولت هتطلع تنام
مختار / مجاليش نوم و هند نايمه قولت بدل ما اقلقها انزل اقعد معاكوا بلاش و لا ايه
ناصر / ازاى تنور اقعد
مختار يقعد انتصار تدخل تدى لشاكر القهوه
انتصار / القهوه يا عمى
انتصار تبص لمختار و تهز راسها فى ايه
مختار / نايمه و مش جايلى نوم
انتصار / كل ده نوم
مختار / من كتر العياط
انتصار / ليكون حمل يا مختار
مختار / يا الله يا ولى الصابرين
الرجاله تضحك
انتصار / جرا ايه نسيتوا البت فاتن و حملها كانت طول الوقت نايمه ازاى
مختار / مش احنا اتفقنا
انتصار / سكت
شاكر / هيبان يا ام فاتن كلو مع الوقت هيبان
ناصر / عمك بيقول ان اللى حصل مع هند بسبب ضغطك عليها فى الرمايه
مختار / مش قولنا مش هنحكى فى المحكى
ناصر / اللى حصل بين هند و ام عباده مش هنحكى فيه بس هنحكى فيك انت ليه عملت كدا
مختار / موقف و عدى
ناصر / مش معنى انها ادتك صابعها تطمع فى دراعها يا ابن الزيني
مختار / مش من حقى احاول يعنى
ناصر / لكل حاجه حدود هتكسر بنت الناس عشان تاخد اللى انت عاوزه
مختار / بقيت انا الغلطان يعنى
شاكر / احنا بنتكلم معاك عشان مصلحتك ما يليقش برجاله الزيني ما يكونوش قد كلمتهم
مختار / و انا عمرى ما اديت كلمه و ما وفتش بيها كل ده ليه هى اللى طلبت اعلمها انا ما جبرتهاش على حاجه بس على العموم لو لازمكوا كبش فدا يشيل ذنب اللى حصل النهرده مش هقول لا … عن اذنكوا
مختار يسيب المكان و يطلع فوق
انتصار / ليه كدا يا خويا
ناصر / لتكونى صدقتى انها نايمه
انتصار / مهو دى واحده من عيوب بيت العيله ما لكش فيه مهرب
ناصر / مهرب من ايه ما كانش اختياره من الاول
انتصار / و ادته الامل بدل المره اتنين و تلاته يحاول و ان ما كانش عشان كدا يبقى عشانها
سليمان / ان شالت حريمنا السلاح فدا زياده امان لكن مش معناها ابدا اننا موتنا و هتضطروا تدافعوا عن نفسكوا
انتصار / ما يضرش لو اتعلمت صح ما حدش عارف بكره مخبيلنا ايه
ناصر / انا بقول نطلع نرتاح يا ام فاتن شكلك تعبانه
انتصار / حاضر يا خويا عن اذنكوا
انتصار تقوم و تسيب المكان
ناصر / بالاذن يا عمى
شاكر يهز راسه ناصر يقوم يطلع ورا انتصار
…………………………..
فى سرايا الجوارحه
خديجه قاعده مع مامتها
خديجه / مين اللى قالك الكلام ده
الست / ام عباده حكتلى انا من اول مره شوفت فيها البت دى و انا مش بلعاها
خديجه / غريبه اوى بس الحكايه دى فيها ان مش زى ما انتى حكيتيها خالص
الست / و هى ام عباده هتكدب
خديجه / يعنى تمد ايدها على ام عباده و ام فاتن تروح تراضيها و الموضوع يعدى عادى كدا
الست / يا بت ما قولتلك ام فاتن جابتها تراضي ام عباده و جت هى و امها و اخوها امال يخربوا على البت … هى ام فاتن كدا من يومها قلبها زى ورقه الخسايه ما هانش عليها البت الغلبانه يتخرب بيتها قالت تديها فرصه تانيه
خديجه / برده الحكايه مش داخله دماغى فى حاجه ناقصه لا عمى شاكر و لا الكبير و لا حتى عباده هيعدوا الموضوع لو كان كدا
الست / مختار خاطره غالى و بيحبها هو مقوى قلبها كدا و معلى حسها على الكل غير حب مختار ليها
خديجه / هو من جهه بيحبها فاكيد بيحبها دا ساب السلاح عشانها
الست / سابه دا ايه ما هو رايح هو و هى على منطقه الرمايه يلعبوا نار و بيعلمها كل صغيره و كبيره فى السلاح
خديجه / و انتى عرفتى منين ام عباده اللى قالتلك برده
الست / امال يعنى ممشيه وراهم جواسيس
خديجه / بقولك ايه يا اما بلاش حد تانى يعرف بالكلام ده
الست / يا بت انا بحكيلك انتى عشان تعرفى انتى داخله على ايه دى هتبقى سلفتك و لازم تحزرى منها المصراويه يا بنتى مش سهلين دول يتفاتلهم بلاد يتمسكنوا لما يتمكنوا و يلدعوا من تحت لتحت
خديجه / ربنا يقدم اللى فيه الخير
الست / و نعم بالله بس برده بيقولك حزر و لا تخونش
خديجه تهز راسها و الست تبص فى الارض و تتنهد
……………………..
فى اوضه هند
مختار يدخل الاوضه يلاقى هند نايمه فى السرير و مدياله ضهرها يبصلها و يروح يغير هدومه و يعلق الجلبيه على الشماعه و عينه على هند ما بتتحركش و لا بتعمل صوت مختار يروح يمدد فى السرير و يربع ايديه تحت راسه و يبص على هند ثوانى و يبص قدامه و يتنهد
/////////////////////////
مختار / و اخرتها يا ابن الزيني ؟ انت صح و لا غلط … هى بتفكرك بمهرها و الكبير بيفكرك باتفاقك معاها … ما حدش حاسس بيك يا ابن الزيني … ما تضحكش على روحك كلو بكيفك و بمزاجك هند اختيارك و انك تسيب السلاح كان برده اختيارك … هند جبرنى عليها قلبى و السلاح جبرتنى عليه هند ما كانش حاجه فيهم اختيار … حتى لو صح سميها نصيب و لو مش عاجبك غيره طلقها و ارجع للسلاح بس ساعتها ما ترجعش تندم … اطلقها دا ايه هو لعب عيال و بعدين انا ما اقدرش ابعد عنها جربتها قبل كدا و عارف بتوجع قد ايه … طب ما تراضيها … انا ما عملتلهاش حاجه عشان اراضيها هى اللى غلطت لا و بتكابر كمان ازاى تسيب البيت من غير اذنى ازاى تصغرنى كدا قدام اهلى … ما تخليش الشيطان يدخل بينكوا يا ابن الزيني و راضيها يا سيدى خليك انت الكبير المرادى
////////////////////
مختار ياخد هند فى حضنه و يحط راسها على صدره و ينام
…………………..
فى شقه مختار فى مصر
عباده يفتح الباب و الكل يدخل
عباده / ريحوا هنا و افطروا و انا هروح اخلص مشوار كدا فى السريع على ما المحل يفتح هاجى اخدكوا و نروح
فاطمه / نفطر ايه هو فى فى الشقه هنا حاجه تتاكل
عباده / امال امين بيعمل ايه ؟؟؟ ايه يا عم ما تصحصح كدا و تشوف الدنيا
امين / هو انا مش هاجى معاك ؟
عباده / تيجي معايا تعمل ايه ؟ انزل هاتلهم فطار و افطر و شوف انت عاوز تعمل ايه و هكلمك و احنا مروحين
امين / ماشى
عباده / سلام انا عشان ما اتاخرش عليكوا … اقولكوا خلى مفتاح العربيه معاك يا امين عشان لو اتاخرت تاخدهم انت و تروح و على تليفونات بقى
فاطمه / و دا اسمه ايه دا بقى ان شاء الله ؟
عباده / سلام
عباده يدى مفتاح العربيه لامين و يمشى
سماح / هو رايح فين مستعجل اوى كدا
فاطمه / علمى علمك بس ما دام امين مش عارف تبقى مش حاجه تبع الشغل
سماح / يمكن خديجه كانت عاوزاه يجيبلها حاجه من هنا
فاطمه / يا خبر دلوقت بفلوس بكره يبقى ببلاش يلا يا امين انزل هاتلنا فطار و هات سندوتشات انا ما فييش حيل اوضب حاجه
امين / من عنيا ثوانى و احلى فطار يبقى قدامكوا
امين يفتح الباب و ينزل فاطمه تبص على الشقه و تروح تقعد و تشغل التليفزيون ما بيشتغلش سماح تروح تحط الفيشه يشتغل و تروح تقعد جنب امها و فاطمه بتقلب
……………………
فى السرايا
مختار يدخل الاوضه يلاقى هند بتلبس
مختار / على فين بدرى كدا
هند / مش متفقين نروح لماما
مختار / بدرى اوى كدا
هند / معلش اهو اساعدها لو محتاجه حاجه
مختار / طب اقعدى عاوز اتكلم معاكى
هند / لما نرجع
مختار / معلش اقعدى ما جتش من خمس دقايق
هند تروح تقعد و هى ضاربه بوز
مختار / بخصوص اللى حصل امبارح
هند / انا اعتزرت و خلاص
مختار / انا ما بتكلمش على اللى حصل بينك و بين ام عباده انا بتكلم عن غضبانك و سيبانك البيت
هند تبص الناحيه التانيه
مختار / كان ايه سببه
هند / كنت تعال شوف ترزيع مرات عمك على الباب و لا الكلام اللى كانت بتقوله
مختار / ما كلمتنيش ليه ما اتصلتيش بام فاتن تطلعلك ليه ما لمتيش عليها السرايا ليه و احرجتيها قدام الكل بدل ما احرجتيني انا
هند / احرجتك !!
مختار / هو انتى مش حاسه باللى عملتيه يا هند ؟
هند تبصله و تفتح بقها و تبص الناحيه التانيه و تتنهد و ترجع تبصله
هند / تعرف انت معاك حق انا غلطت حقك عليا مش هعمل كدا تانى
هند تقوم تكمل لبس الطرحه مختار يبتسم
مختار / بتاخديني على قد عقلى يعنى
هند / احسبها زى ما تحسبها انا مش فى المود لعتاب و لا لكلام اصلا
مختار / و يا ترى ايه اللى معكر مزاجك
هند / متاخدش فى بالك ما تشغلش نفسك انت بالتفاهات دى
مختار / انا بحاول اراضيكى هنا على فكره
هند / متاخر اوى يا باشمهندس متاخر اوى
هند تسيب الاوضه و تطلع بره و مختار متابعها يتنهد و يقوم وراها ينزل تحت هند تقابل انتصار
انتصار / على فين بدرى كدا
هند / هى مريم فين احنا متفقين نقضى اليوم مع ماما
انتصار / و ماله ما انا جايه معاكوا بس الاول كنت عوزاكى فى كلمتين
هند / خير
مختار / خير يا ام فاتن
انتصار / ايه ده !! انت ما وراكش شغل و لا ايه
مختار / والله كان ورايا بس
انتصار / روح شوف اللى وراك و نتقابل عند ام عبد الله انا هاخد البنات و نروح
مختار يبص لهند باصه الناحيه التانيه و مبوزه
انتصار / اهو على ما مريم تجهز
مختار / لما تجهزوا كلمونى اجى اوصلكوا
انتصار/ ما تشغلش بالك بينا احنا هنتصرف يلا انت بقى ما تعطلناش
مختار / ماشى يا ام فاتن يلا انا بقى بالاذن
مختار يمشى هند تبص عليه انتصار تبتسم
انتصار / تعالى نطلع فوق نتكلم على ما البت مريم تلبس
هند تهز راسها و تطلع هى و انتصار
………………………
على قهوه
يوسف يدخل يلاقى حامد قاعد
يوسف / خير يا عمى فى ايه ؟
حامد / ليك عندى خبر بمليون جنيه عشان تعرف انى مش ساكت و انك مش لوحدك
يوسف يقعد
يوسف / خير يا عمى
حامد / لقيتلك وسام الهانم فاتحه بوتيك ملابس حريمي فى الابراهيميه فى اسكندريه
يوسف / و انت عرفت منين
حامد / اللى يسال ما يتوهش انا من يوم ما اديتنى اكونتها على الفايس و انا عملتلها هى و كل صحباتها فولو لحد ما نزلت بوست امبارح اعلان للبوتيك بتاعها عامله تصفيات للصيفي تهبل
يوسف / مش عارف
حامد / هو ايه اللى مش عارف روح هات دهبك منها انت هنا محتاس و هى بتفتح مشاريع هناك و تتاجر بفلوسك انت اولى بالدهب ده … ده حقك
يوسف / ابويا شادد عليا اوى الفتره دى
حامد / خد اذن يوم صد رد اقولك روحلها يوم اجازتك مش انت بتاجز الجمعه
يوسف / اه
حامد / خلاص اتحلت هتعوز ايه اكتر من كدا
يوسف / تمام من هنا للجمعه يحلها حلال
حامد / على رايك
يوسف / انا لازم امشى والله يا عمى كان ممكن تقولى الكلام ده فى التليفون ابويا لو عرف انى زوغت دا بقى بيعد عليا اللقمه و كل يوم خناقه مع امى بسببى لما كرهت البيت و الاكل و العيشه كلها
حامد / ربنا يهديه و يخف اجوز اخواتك من على ودانه انا كلمته ما سمعليش
يوسف / حصل خير انا ماشى هتعوز حاجه
حامد / لا يا حبيبى هتعوز انت حاجه
يوسف / لا شكرا يلا اكلمك الجمعه بقى اقولك باقى الاخبار
حامد / تمام يا حبيبى بالسلامه انت
يوسف يمشى و حامد قاعد مبسوط
……………………..
فى اوضه هند
هند و انتصار ممديين على السرير و انتصار بتدحك
انتصار / ههههههههههههههههههههه مهو من خيبتك فى واحده عاقله تسيب بيتها تحت اى ظرف
هند / من خيبتى انا !! طب والله زعلت منك
انتصار / و انا ما اقدرش على زعل ست العرايس … انتى عارفه انا جبتك هنا ليه ؟
هند / تعاتبيني على اللى حصل
انتصار / لا مش عشان اعاتبك اصل هعاتبك ليه انا مالى
هند / عشان بتحبى مختار و انتى اللى مربياه و اكيد هتقفى فى صفه
انتصار/ لا هقف فى صفه و لا فى صفك تعرفى امبارح بيقولى انتى حماه مين فينا زى ما بتكلم معاكى انا اتكلمت معاه بس هو ما اتكلمش لا حكى اللى قولتيه و لا علق على اى حاجه … تعرفى يا هند انا عمرى ما هنسى اول مره قلناله انت كبرت خلاص كان عنده سبع سنين يوميها ناصر قال مختار كبر
هند / بس سبع سنين صغير اوى
انتصار / يا بنتى مش كبر بلغ يعنى لا كبر و بدا يفهم ما ينفعش اخده فى حضنى ما عدش عيل
هند / بدرى برده
انتصار / عندنا كدا لما تكمل سبعه نعاملك على انك راجل المهم كنت بقول ايه لا اله الا الله نسيتينى … فى يوم مختار اتخانق مع العيال و ضربوا بعض و ناصر زعقلهم جامد كل عيل جرى على امه و مختار جالى بس وقف على الباب و بصلى و مشى راح اوضته و قفل على نفسه اصل انا مش امه عشان يعيط فى حضنى و لا يشتكيلى عمرى ما هنسى النظره اللى كانت فى عينه … كبر قبل اوانه عنيه بطلت تلمع انطفت دفن نفسه فى التمرين و المزاكره و الشغل … لحد ما دخلتى حياته يا هند عنيه رجعت تلمع تانى و الروح ردت فيه … مختار بيحبك اكتر من اى حاجه فى حياته
هند / بيحبنى اه بس الراجل الشرقى اللى جواه
انتصار / احلى ما فيه احنا برده ستات شرقيه و الست الشرقىه حتى لو حاجات المحن دى كانت بتاكل معاها فى الاول و الاخر ما تلينش الا على ايد الراجل الشرقى الحمش اللى يغير عليها من الهوا و يغطيها برموش عنيه
هند / مش ده قصدى
انتصار / امال قصدك ايه ؟
هند / انتى عارفه انا قولتلك امبارح بقوله تعال يقولى اللى وداكى يجيبك
انتصار / معزور ما فيش ست تسيب بيتها و خصوصا من غير اذنه و لا سبب يستاهل حتى
هند تبص الناحيه التانيه
انتصار / بصى يا هند خلينا صرحه مع بعض لو كان نفس الموقف حصل فى يوم تانى انتى مش متخانقه فيه مع مختار صدقينى رد فعلك مع ام عباده كان هيبقى غير كدا خالص
هند / بس انا و مختار ما كناش متخانقين
انتصار / يمكن … بس كنتوا زعلانين من بعض … صحيح لا انتى حكيتى و لا هو حكى بس انا عرفت من عنيه و هو نازل … كان زعلان … و لما قالى ما حدش يخبط على هند … عرفت انك انتى كمان زعلانه
هند / كان عارف انى زعلانه و ما هانش عليه يصالحنى
انتصار / و انتى ما كنتيش عارفه انه زعلان ما انتى كمان ما صليحتيهوش يا هند
هند / حاولت اتكلم معاه ما رضيش
انتصار / فاكره كلامى معاكى انتى و مريم لما قولتلك ما تحاوليش زياده عن اللزوم بصى يا هند البيوت ياما بيحصل فيها و انتوا بتحبوا بعض لو مضايق او ساكت او شايل الهم اساليه مره حكالك تمام ما حكاش اصبرى لما يبقى جاهز يتكلم الرجاله مش من طبعهم يطلعوا اللى جواهم احنا بس اللى ما بنعرفش نصبر
هند / يعنى انا اللى طلعت غلطانه
انتصار / انتوا الاتنين غلطتوا و كبرتوا المواضيع بس زى ما كبرت هتكش و تختفى انتى بس اديها وقتها و بلاش البوز اللى كنتى نازله بيه ده الراجل ما طلعش على شغله و كان طالع يصالحك
هند / للاسف لا كان طالع يعاتبنى و يغلطنى
انتصار / لا عشان يصالحك انتى نسيتى انه شرقى مش هيجي يقولك انا اسف حقك عليا و يبوس القدم و يبكى الندم يعنى هيجيبها كدا فى وسط الكلام
هند / انا عمرى ما هسامحه على اللى عمله امبارح
انتصار / بس ما تقوليش عمرى
هند / لا المرادى مش هسامحه
انتصار / بكره نشوف المهم نرجع لموضوعنا الاوضه دى بيتك و مهما حصل ما تخرجيش منها دا انتى لو وصل بيكي الحال لاى سبب لا قدر الله انك ما ينفعش تباتى مع مختار تحت سقف واحد هو اللى يمشى مش انتى فهمتى يا بنتى
هند تبصلها
انتصار / على فكره ده مش كلامى دا شرع ربنا و احنا ناس بنفهم فى شرع ربنا كويس اوى
هند تبص الناحيه التانيه و تتنهد
انتصار / هيصالحك النهرده بكره هيصالحك مش هيقدر على زعلك بس انا عشان بحبك هقولك خيركم من يبدا بالسلام و الست الناصحه تكسب جوزها ان كانت ام عباده فيها ميزه انها مهما تعمل بتعرف تراضى عمى شاكر يا بت بقى واحده فى جمالك تسيب جوزها ينام زعلان امال لو ما كنتوش عرسان
هند تبص الناحيه التانيه و تبتسم بخجل
انتصار / شكلك خايبه قومى قومى نروح نلحق نساعد امك فى الاكل
هند / و لو قفلنى
انتصار / يبقى اهبل يبقى تسبيه يتفلق هيلف يلف و يجيلك يا خايبه و ساعتها تبقى عملتى اللى عليك و لما الشوق يجيبه ادللى
هند / بصراحه اخر واحده كنت استنى منها الكلام ده
انتصار / ليه مش ست
هند / لا ست و ست الستات كمان بس مش عارفه
انتصار / هههههههههههههههه قومى يا اختى قومى خلينا نمشى
انتصار و هند يقوموا و انتصار تعدل السرير هند تساعدها و يعدلوا طرحهم و يمشوا
……………………..
فى الصيدليه
شاب يدخل
الشاب / السلام عليكم
الصيدلى / عليكم السلام اؤمر يا ابن عمى
الشاب / معلش انا والدى كان اشترى الدوا ده من هنا امبارح و لما جه معاده لقاه مش هو
الصيدلى / ازاى يعنى
الشاب / الشريط محطوط فى علبه غلط
الصيدلى ياخد العلبه و يفتحها و يبص على الشريط
الصيدلى / ازاى ده انت متاكد ان الحج واخد الشريط ده من عندى
الشاب / هنتبلى عليك يعنى
الصيدلى / اصلها غلطه ما بتحصلش يعنى انا بصراحه مش مستوعب على العموم انا بعتزر جدا اكيد مش مقصوده
الشاب / طب ما علش بدلى الشريط و هات العلاج الصح
الصيدلى يروح يجيب شريط العلاج و يديه للشاب الشاب يمشى
الصيدلى / دا ايه البلد بنت الكلب دى
……………………….
فى شقه عبد الله
شيرى قاعده حاطه فوطه على رجلها و بتلف كرنب ياسمينا تطلع من اوضتها
ياسمينا / انا جعانه
شيرى / خشى خديلك حته كيكه من جوه لحد ما اخلص الاكل
ياسمينا تدخل المطبخ شيري تتكلم بصوت عالى
شيرى / حته واحده بس عشان الناس اللى جايه
جرس الباب يضرب شيرى تستغرب و تقوم تمسح ايدها فى الفوطه اللى على رجلها و تحط الطرحه على راسها و تفتح الباب تلاقى انتصار و هند و مريم
انتصار / اوعى تكونى خلصتى الاكل ازعل من هند اوى هى اللى ماخرانى
هند / انا !!!
انتصار / امال اقولها ان مريم قلبت الدولاب مش عارفه تلبس ايه
مريم / يا ختااااى
شيرى / هههههههههههههههههه اتفضلوا اتفضلوا
انتصار تدخل تشوف الصينيه على الترابيزه
انتصار / الحمد لله ما اتاخرناش اوى يلا الهمه يا بنات
مريم و هند و انتصار يقعدوا و يشمروا
شيرى / هتعملوا ايه هتوسخوا هدومكوا
انتصار / تتوسخ البركه فى الاوتوماتيك
ياسمينا تطلع من المطبخ شايله حتتين كيكه حته فى كل ايد
شيرى / بلوه من بلاوى الزمن … انا عامله كيكه حلوه اوى جوه ثوانى اجيبلكوا
ياسمينا تروح تقعد على رجل مريم مريم تبوسها من خدها شيرى تدخل المطبخ و انتصار بتلف الورق شيرى تنادى على هند
شيرى / هند … دودو
هند تقوم و تدخل المطبخ
شيرى / ايه الاخبار طمنينى
هند / فكك يا ماما اوعى اما ابص على الفراخ
هند تفتح حله الشوربه و تقلب الفراخ و تدوق الشوربه و تزودها ملح و تقلب
شيرى / ما اتكلمتوش
هند / مش عاوزه اتكلم فى الموضوع ده لو سمحتى
هند تاخد صينيه الكيكه و تطلع بره
هند / احلى كيكه دى و لا ايه
شيرى تروح تطلع شايله حله فاضيه تانيه و تلف و تحط جواها
انتصار / انا عارفه انك ما كنتيش عازمانى بس بصراحه
شيرى / ما تكمليش لازعل منك دا بيتك تنورى فى اى وقت و لعلمك بقى انا عامله حسابك
انتصار / ياختى و ان ما كنتيش لقمه هنيه تكفى ميه
شيرى / لا عامله و دا يجي ايه من بعد خيركوا
انتصار / كلمتى مختار يا هند طمنتيه اننا وصلنا بالسلامه
هند / لا ما كلمتوش
انتصار / طب مش تكلميه يا بنتى
هند / لو قلقان كان اتصل
انتصار / ربنا يهدى
انتصار تكمل لف و هى بتبص لشيرى و شيرى محرجه منها
……………………………….
فى الشارع
عبد الله مروح يشوف محل عطور و اكسسوارات يقف ثوانى يبص على الفاترينه و يدخل
عبد الله / السلام عليكم
شاب / و عليكم السلام
عبد الله يروح ناحيه استاند البرفيومز و يقعد يشم و ينقى البياع يروحله
شاب / بتدور على حاجه معينه
عبد الله / خلاص اخترت دى
الشاب / حريمى ؟
عبد الله / اه .. ممكن تلفها هديه
الشاب / عينى
عبد الله / تسلم … كام
الشاب / تلتميه و سبعين بالتغليف
عبد الله يطلع الفلوس و يحاسب
الشاب / جايلى حاجات حلوه اوى الاسبوع الجاى
عبد الله / الاسبوع الجاى ايه قول الشهر الجاى على الاقل
الشاب / ههههههههههههههههه اتفضل
الشاب يدى لعبد الله شنطه هدايا عبد الله يبتسم و يديله الفلوس و ياخد الشنطه و يجي يمشى يشوف ساعه رقيقه يحط ايده فى جيبه و يبص على الفلوس اللى باقيه معاه
عبد الله / بكام الساعه دى
الشاب / ميه و ستين و عشانك ميه و خمسين
عبد الله / و جاى على نفسك كدا ليه
الشاب / هههههههههههههههههه عنينا ليك يا سيد الناس اؤمر
عبد الله / لفهالى هديه هى كمان
الشاب / عيني التغليف علينا كمان
عبد الله / تسلم
الشاب يغلف الساعه
الشاب / فى هناك مكياجات حلوه اوى الحريم بتحب الحاجات دى اوى
عبد الله / مره تانيه بقى و عليك خير كدا الشهر ده باظ
الشاب / هههههههههههه اتفضل
الشاب يدى لعبد الله شنطه هدايا تانيه عبد الله ياخدها و يمشى يقابل مختار داخل بعربيته يضرب كلكس
مختار / عديت عليك فى الشونه لقيتك مشيت
عبد الله / ما فيش شغل الفتره دى قد كدا ما انت عارف
مختار / ههههههههههههههههه عارف اركب
عبد الله / يا عم اركنها البيت هناك اهو
مختار / على رايك
مختار يروح يركن العربيه و عبد الله بيمشى ناحيه البيت مختار ينزل ياخد اكياس فاكهه و يجرى وراه يحصله
مختار / النهرده مش عيد ميلاد مريم على فكره
عبد الله / صالحت هند
الابتسامه تروح من وش مختار و يبص الناحيه التانيه عبد الله يمد و مختار يمشى وراه يدخلوا الشارع اللى فيه البيت هند واقفه فى البلكونه بتنشر الغسيل مريم تطلع تقف جنبها و فى ايدها كبايه شاى
مريم / الله !! جم جم
مريم تدخل جوه و هند تبص على مختار و تبتسم يبص لفوق يشوفها تبوز و تدخل جوه مختار يبص فى الارض عبد الله يدخل العماره و مختار وراه مريم تجرى تفتح الباب
عبد الله / يا مساء العسل
مريم / حمد الله على السلامه
عبد الله / الله يسلمك حاجه بسيطه مش قد المقام
مريم / دى عشانى !!!
عبد الله / اول مره تدخلى بيتنا المفروض نسجل التاريخ ده و نحتفل بيه
مختار / طب عن اذنكوا بس عشان المراره
مختار يعدى و يدخل و مريم تبص فى الارض و تتكسف
عبد الله / يا سيدى لو غيران مننا اعمل زينا
مختار يبص على هند بتقلب فى التليفزيون و مدياله ضهرها تحط الريمود و تدخل المطبخ شيرى و انتصار يطلعوا من جوه كل وحده شايله سرفيس محشى
عبد الله / ابوا تعالوا كل يوم يا جدعان
شيرى / اخص عليك يا عبد الله و انا ما بعملكش محشى و لا ايه
انتصار / يا اختى دا بدل ما تقولى ينوروا
شيرى / هههههههههههههههه تنوروا طبعا
هند تطلع شايله سرفيس الفراخ المحمره و تدخل المطبخ و الكل بيبص لبعضه مختار يقعد و الكل يقعد فى صمت هند تطلع من المطبخ شايله اطباق فاضيه و شوك تحطها و شيرى توزع طبق قدام كل واحد و انتصار توزع الفراخ و يقعدوا ياكلوا فى صمت
مريم / شوفتى يا اما الهديه اللى جبهالى عبد الله
انتصار / يعيش و يجيبلك يا حبيبتى
عبد الله يوطى على هند بتاكل و هى زعلانه
عبد الله / على فكره ما نستكيش جبتلك هديه انتى كمان
هند تبتسم بحزن و تبص لمختار متابعها
هند / ربنا يخليك ليا كلفت نفسك
شيرى / ما تتقلوش فى الاكل البنات عملولنا شويه حلويات هتاكلوا صوابعكوا وراها
هند / عن اذنكو ثوانى
هند تقوم تدخل الحمام و تقفل الباب
انتصار / يا فرحتى بيك و انت داخل ايد ورا و ايد قدام
عبد الله / لا والله جايب فاكهه كتير هناك اهى … مش دى لينا برده ؟
انتصار / ههههههههههههههههههه طب والله انت عسل
انتصار تحط قدام عبد الله حته فرخه كمان
عبد الله / و الله انتى اجدع من امى
شيرى / اقدر اعترض ؟
انتصار / ههههههههههههههههه
مختار / انا نسيت اغسل ايدى … ثوانى
مختار يقوم يخبط على هند فى الحمام هند تفتح الباب و وشها مبلول و بتنشفه بالفوطه تيجي تعديه يمسك ايدها
مختار / زعلتى عشان ما جبتلكيش هديه صحيح
هند / مش مستنيه منك حاجه اصلا عن اذنك
هند تسيبه و تروح تقعد وسطيهم و تبتسم بافتعال
هند / خشوا عليا بقى بمحشى الفلفل
انتصار تغرف لهند
هند / تسلم ايدك يا ست الكل
مختار يدخل يقعد و هو هند يبصوا لبعض و هم مضايقين و الكل واخد باله بس عاملين نفسهم مش فاهمين
………………………
فى شقه مختار فى مصر
عباده بيتكلم فى التليفون
عباده / انا لسه داخل حالا
خديجه / قدمت يعنى
عباده / لا هتحتاجلها زياره تانيه للاسف بس عرفت الليله يعنى ان شاء الله المره الجايه اقدم
خديجه / لما نرجع من شهر العسل بقى
عباده / يا لهوى دا انا سقطت البتاع ده خالص
خديجه / كان قلبى حاسس و الله
عباده / عيب عليكي احنا لسه فيها لفى الخريطه و شاورى انتى بس و هتشوفى
خديجه / الف الخريطه
عباده / انا باسبورى جاهز
خديجه / و انا كمان على فكره لتكون فاكر يعنى
عباده / بجد !!!
خديجه / مش كنت مع امى فى العمره رمضان اللى فات
عباده / ما كنتش اعرف انك طلعتى معاها ما انا ما كنتش مركز معاكى وقتها
خديجه / مش مهم اللى فات مات المهم تركز فى اللى جاى
عباده / ما يكونش عندك فكر نرجع لموضوعنا القمر يحب يسافر فين
خديجه / لبنان
عباده / حلوه لبنان نروح لبنان
خديجه / روحتها قبل كدا
عباده / لا والله انا اخرى كان السعوديه و انا بحج او بعمل عمره غير كدا شكرا دا انا فى حتت كتير فى مصر ما شوفتهاش
خديجه / زى ايه
عباده / سيوه مختار راحها فى رحله تبع الكليه بتاعته و رجع مبهور بيها و كنت ناوى اروحها بس للاسف الايام خدتنى هبقى اخدك و نروح بس لما نرجع من لبنان
خديجه / لو عاوز تروح سيوه نروحها
عباده / لا دى بيرحوها فى الشتا بتبقى حر اوى فى الصيف
خديجه / اكتر من عندنا
عباده / و انتى اش عرفك بالحر اللى بره هو التكييف اللى فى السرايا باظ و لا ايه
خديجه / بتتمالس عليا كتر خيرك
عباده / بهزر معاكى
الباب يتفتح و فاطمه و سماح و امين يدخلوا
عباده / هكلمك بعدين … حمد الله على السلامه
فاطمه / انت جيت
عباده / لسه داخل ها عملتوا ايه
سماح / جبت حته فستان انما ايه خرافه
عباده / انا بعت فاروق يجيبلنا كباب و كفته نتغدى هدخل انام ساعه على ما يجي نتغدى و نسافر
فاطمه / احنا مش هنبات و لا ايه
عباده / احنا لسه بدرى اهو
فاطمه / احسن برده انا كمان هدخل اريح شويه
فاطمه تدخل الاوضه و تقفل الباب
عباده / هى مالها
سماح / شافت فستان حلو صورته و بعتته لام فاتن عشان نجيبه لمريم و لقتها بتتغدى عند هند
عباده / و جابت الفستان
سماح / لا طبعا
امين / هما قالوا هتنزل هى و هند يشتروا من البلد
عباده / والله احسن
سماح / ام عبد الله احسن من امك
عباده / بت لمى لسانك عندك كلمه حلوه قوليلها ناويه تشعلليها يبقى بناقص كلامك
سماح / انا مش ناويه على حاجه بس امك مضايقه انت عارف ام فاتن ايه بالنسبه لامك و هى حاسه انها بتفضل هند و اهلها عليها
عباده / تخاريف و مفيش الكلام ده بس ام فاتن بتعرف توزن الامور و هند و اهلها بقوا من العيله ما تنسيش ان فى بينا و بينهم بدل النسب اتنين
سماح / انا داخله ارتاح انا كمان و بالمره اشحن الموبايل عن اذنك
سماح تدخل اوضه امها
عباده / والله لو اشق جلبيتي منهم يبقى شويه
امين / هههههههههههههههه
عباده / انا داخل انام
امين / استنى هنا عملت ايه فى المشوار بتاعك
عباده / مش نبرتلى فيها وقف طبعا
امين / يا عم انا كلمتك هو كان ايه صحيح
عباده / هى ساعه اللى هنامها لما اصحى نبقى نتكلم
امين / تبقى مش عاوز تحكى
عباده / اذكى اخواتك لم روحك بقى
عباده يسيب امين و يدخل الاوضه
امين / يا خبر بفلوس بكره يبقى ببلاش الا ربع
………………………
فى اوضه هند فى السرايا
هند تدخل الاوضه و مختار وراها يقفل الباب بالمفتاح هند تفتح الدولاب و تطلع بجامه و تبصلها و تدخلها تانى و مختار متابعها
مختار / هتنامى بهدومك و لا ايه ؟
هند / اكيد لا بس ما ليش مزاج اللبس دى هلبس حاجه تانيه
مختار يسند على الدولاب و هو مبتسم
مختار / امال هتلبسي ايه ؟
هند تشد نفس البجامه تانى
هند / هلبسها
هند تدخل الحمام و تقفل الباب بالمفتاح مختار يغير هدومه
مختار / ايه اللى حصل لكل ده يعني ؟
هند ترد من جوه
هند / اسال نفسك
مختار / طب تعالى كلميني هنا
هند / اطلع عريانه يعني لما اللبس
مختار يبتسم و يروح يقعد على السرير ثوانى و هند تطلع تاخد الريمود من جنبه و تروح تقعد على السرير الناحيه التانيه و تشغل التليفزيون و تعلى الصوت مختار يخبط بصابعه على كتفها تبصله
مختار / بالنسبه انى عاوز اتكلم معاكى
هند تطفى التليفزيون و تبصله
مختار / لما كنتى جايه مع ام فاتن انا كنت رايح اجيبك
هند / ماشي
مختار / انتى غلطتى و اسلوب قلب الترابيزه ده مش هيفيدك بالعكس اديكي شايفه حاجه هبله كل يوم بتكبر ازاى
هند / مفيش فايده
هند تشغل التليفزيون
مختار / انا هروح بكره التجنيد اشوف هترسي على ايه هدخل الجيش و لا هاخد تاجيل
هند تبصله
مختار / لو دخلت هروح خمسه و اربعين يوم على اول اجازه … شهر و نص
هند تبص فى الارض مختار يبتسم
مختار / بعد كدا بقي هنزل يوم فى الاسبوع … شوفى انتى بقي واحد فى امكانياتى هيحطوه فين
هند / ممكن كل ده ما يحصلش و تاخد اعفا اصلا
مختار / لا الاعفا دى بعيد عنى لا انا وحيد ابويا و امى و لا نظرى ضعيف و لا حتى اللتصاق فخدين ههههههههه
هند / بتهزر يعني
مختار / والله بتكلم جد ممكن اعرف بوز بنات حوه ده لازمه امه ايه
هند / شوفت بتهزر
مختار / يا ستى بهزر هو الهزار حرم
هند / هو انت تعكنن عليا و تنيمني يومين معيطه و ترجع تقولى الهزار حرم بمزاجك هو
مختار / انتى هتجبيها فيا انا لا كلمتك و لا جيت جمبك انتى اللى طالبه معاكى نكد
هند / و ايه اللى جابرك على واحده نكديه زيي
مختار / شايفه انا بحاول اراضيكي و انتى عماله تنكشي على النكد بمنكاش
هند / ماشي يا مختار راضيني قولى ايه سبب كل ده انى خفت اعورك
مختار / انتى كنتى بتتكلمى مع ام فاتن فى ايه لما مشيت
هند / و انت مالك
مختار / اتكلمى عدل يا هند
هند / ما ردتش على سؤالى ليه مش لاقى رد صح
مختار / لا عندى الرد بس انتى مش جاهزه تسمعيه
هند / لا جاهزه و عمرى ما كنت محتاجه اسمع الرد غير دلوقت
مختار / عشان مش ضامن عمرى يا هند
هند / والله !!!
مختار / زمان كنت بطلع شايل راسي على كفى و مش فارق معايا حاجه … ليا اهل هيزعلوا عليا … اه ليا … لو جرالهم حاجه هزعل … ايوه هتقهر … بس انتى غيرهم … عندى الدنيا كلها فى كفه يا هند و انتى لوحدك فى كفه تانيه
هند / حلو الكلام ده … مين حفظهولك
مختار يبتسم و يديها ضهره و ينام و يستغطى
هند / ام فاتن قالتلى ما تسبيش بيتك تانى و انى لو مش عوزاك تبات معايا انا اطردك لكن الاوضه دى بيتي انا
مختار / ام فاتن قالت تطرديني
هند / اسالها
مختار / لا انا مش بكدبك انا بس بفكرك يمكن قالتها بصيغه تانيه و انتى فهمتى غلط انتى عارفه
هند / انا مش فيقالك
مختار / الكلام اللى قولته ما حدش حفظهولى انا ما بفكرش فى حاجه تانيه من يوم ما شوفتك و كل يوم بيعدى …كل حاجه تحصل … الكلام ده بيزيد جوايا
هند تتنهد
هند / انا الل طلبت منك تعلمنى طلبت عشان اقرب منك عشان اشاركك الحاجات اللى بتحبها مش انت اللى طلبت منى اتعلم انا اللى طلبت
مختار / عارف انتى اللى فتحتيلى السكه
هند / و دا كان جزاتى
مختار / غلطتى و انا غلطت خالصين
هند / انا ما غلطتش
مختار / بتكابرى برده
هند / انت ما كنتش موجود انت ما شوفتش حاجه
مختار / لو خدتلك بيت بره و ربنا سلط عليكي واحده مت جيرانك هتسبيلها البيت قال على راي المثل اصبر على جار السو ليرحل لتجيله مصيبه تاخده
هند / انت ما كنتش موجود
مختار / ما انا مش هسيب الدنيا و اقعد جنبك يا هند ناكل منين قال على راي المقل خد من التل يختل
هند / حلو اوى فى الامثال الشعبيه
مختار / حلوه اوى فى تغير المواضيع لما تتزنقى
هند / و لما اكلمك تقولى اللى وداكى يجيبك
مختار / كنت متعصب و لما هديت كنت هاجى اجيبك اسالى الكبير انا قولتله قدام عباده انى رايح اجيبك
هند / و لما سكت و انا واقفه قدام اهلك كلهم لوحدى
مختار / لو كنتى لوحدك زى ما بتقولى ما كنتش سكت لو كان حد اتكلم و لا قل منك ما كنتش سكت
هند / و لما فاطمه قالت انى مش متربيه
مختار / ام عباده قالت و ام فاتن ردت حريم فى بعض ندخل الرجاله و نولع الدنيا ليه
هند / حكموا عليا اعتزر و ما قدروش عليها
مختار / و انا ما ليش حكم عليها
هند / ما لكش غير عليا انا مش كدا
مختار / و هو انتى عملالى اعتبار يا هند ما شاء الله قولتلك ربنا خلقلنا ودنين ندخل من دى نطلع من دى تقومى سبحان الله كل الكلام يدخل و يلبد الا كلامى انا طريق الخروج سالك ما شاء الله
هند / انت شايف كدا يعني
مختار / قولتلك ما تدخليش الرجاله فى خناقات الحريم قولتلك الرجاله هتخسر بعض
هند / كلامكوا حلو بس ما بيمشيش غير عليا ليه مش هى اللى جابتكوا
مختار / ما ليش حكم عليها انتى ليه مش عاوزه تفهمى
هند / كلم عمك قوله يلمها
مختار / الموضوع خلص نفتحه تانى ليه
هند / عشان مش هيخلص و انا تعبت
مختار / ما فاتش كتير على جوازنا و تعبتى امال لما يبقي عندنا عيال و يطلعوا عينك هتعملى ايه
هند / ما عنديش لما يبقي عندى ابقي افكر فيهم و سبحان الله يمكن يكون انى ما حملتش حكمه من ربنا
مختار / قصدك ايه
هند / ما قصديش
هند تنام و تديله ضهرها
مختار / قصدك ايه يا هند
هند / انا تعبانه يا مختار لو سمحت نتكلم وقت تانى
مختار / احسن برده
مختار يديها ضهره و يطفى النور و ينام و الاتنين صاحيين
………………….
فى اوضه سماح
سماح بتعلق الفستان
مريم / حلو اوى ناويه تغطى على العروسه انتى و لا ايه
سماح / و هى العروسه حد قادر عليها دى مفصله فستان و بتخلى الخياطه تفصله عندها فى السرايا عشان ما حدش يشوفه
مريم / يا خبر بفلوس
سماح / امال انتى هتنزلى مع هند تشوفوا فستان امتى
مريم / والله بفكر اطلبه من النت فى فستان حلو اوى بس ما فيش وقت افصل
سماح / ياختى و لا تفصيل و لا اونلاين الحاجات دى مش مضمونه مفيش احسن من انك تشترى الحاجه على عينك
مريم / هجرب بيقولوا الحاجه بتوصل فى اربعه و عشرين ساعه وصل اهلا و سهلا ما وصلش هنزل وسط البلد اشوف حاجه حلوه
سماح / هتاخدى عبد الله معاكى و انتى بتنقى
مريم / اسكتى عبد الله النهرده لقيته داخل عليا بهديه بيقولى اول مره تدخلى عندنا لازم نحتفل بيها
سماح/ جابلك ايه بقي ان شاء الله
مريم / جابلى ازازه برفان ريحتها حلوه اوى بس شكلها برده غالى اوى
سماح / جابلك ريحه ليه و انتى كانت ريحتك وحشه و لا ايه
مريم / ايه الكلام ده
سماح / مش فاهمه انا اللى يروح يجيب لخطيبته شبكه بتلاته ابيض و بعدين يضيع فلوسه على الحاجات التافهه
مريم / حرام عليكي يا سماح طب والله فرحت بيها اوى
سماح / والله الواد ده مرزق دون عن بنات الدنيا كلها ربنا كرمه باهبل واحده
مريم / كتر خيره انه افتكرنى كان ممكن ما يجيبش خالص
سماح / مهو يا يجيب حاجه عليها القيمه يا ما يجيبش تقدرى تقوليلى الهديه دى اخرتها ايه
مريم / ناويه اعتقها و اعينها لحد ما اتجوز و ابقي احطله منها
سماح / يعني كانك يا ابو زيد ما غزيت
مريم / مش فاهمه
سماح / يعني لزمتها ايه الهديه ما دام هتتعان مش كان جابلك غويشه و لا خاتم يلعلطوا فى ايدك و الناس تشوفهم
مريم / و هو بيجيبلى و لا بيجيب للناس
سماح / الله امال يعني مش يعرفوا بيحبك قد ايه
مريم / ما ليش دعوه بحد انا لا ببص للناس و لا بحب الناس تبصلى
سماح / على العموم ربنا يهنيكوا ببعض انا مش عاوزه اكسر فرحتك باول هديه من خطيبك
مريم تبص لسماح و يبتسموا هم الاتنين
………………………
فى اوضه هند
هند و مختار الاتنين صاحيين
///////////
هند / برده نام عادى و احنا زعلانين من بعض
مختار / هى كانت تقصد ايه بان حكمه من ربنا ان ما يحصلش حمل
هند / هتقدرى تقعدى بعيد عنه شهر و نص
مختار / حاولت اصالحها بدل المره اتنين و تلاته اعمل ايه تانى
////////////////
هند تتنهد و تلف تبص على مختار مديها ضهره تمد ايدها و تمسك هدومه من ضهره بالراحه يلف و يبصلها
مختار / مش جايلك نوم و لا ايه
هند تقرب منه يفتح دراعه و ياخدها فى حضنه
مختار / انا ما كانش
هند / ششششش بلاش عتاب بلاش نتكلم اللى حصل عدى و خلاص مش عاوزه اتخانق معاك مش عاوزه نبقي زعلانين من بعض
مختار يبوس راسها
مختار / و لا انا
هند / لما تلاقيني متعصبه اوى كدا لما تلاقيني منفعله ما تتكلمش معايا احضنى انا ده بس اللى ببقي محتاجاه
مختار / هيجيب نتيجه يعني
هند / جرب
هند تبص لمختار تلاقيه باصصلها و مبتسم
مختار / احضن بس
هند تبتسم و تبص لتحت بخجل و ترجع تبصله
…………………….
فى المطبخ تانى يوم الصبح
انتصار تدخل تلاقى هند واقفه بتقلى طعميه
انتصار / هو النهرده عيد و لا ايه
هند / امال لو كانت بفتيك بقي
انتصار / ما دى بفتيك الغلابه … وشك نور شكله صالحك
هند / انا اللى صالحته
انتصار / جدعه خيركم من يبدا بالسلام
هند تشيل الطعميه من الزيت و تحط غيرها
انتصار / انا هقلى بيض
هند / انا سلقت هناك اهو و سلقت بطاطس بتوم كمان فاضل تتهرس بس
مريم تدخل شايله حله الومنيا كبيره محطوط جواها حاجه ملفوفه بقماشه
مريم / البتاو السخن
انتصار / دا النهرده طلع عيد بجد بقي
مريم / عجنته و خبزته لوحدى عشان تعرفى بس
هند / ما سعدتكيش انا يعني ؟ ماشي ماشي
انتصار / انتى صاحيه من امتى يا هند
هند / صاحيه ايه انا مطبقه قولت اعمل اللى ورايا بسرعه بسرعه قبل ما الكل يصحي و انام شويه بعد الفطار و اصحى لما مختار يرجع
انتصار يبان عليها الضيق و مريم بتهرس البطاطس
هند / كفايا طعميه كدا و لا اعمل كمان
مريم / كدا مش فاضل غير شويه السلطه تتقطع و يبقي الفطار جاهز
فاطمه تدخل
فاطمه / صباح الخير ايه الروايح دى
فاطمه تشوف هند فى المطبخ
فاطمه / مش تفتحوا الشفاط تطلعوا الريحه بره
انتصار / ساعديني نحول الحاجات دى الرجاله زمانهم نازلين
فاطمه / نازلين يصلوا مش ياكلوا الحاجات دى هتتاكل بارده و مقدده و الرجاله هتقرف تاكلها
انتصار / ياكلوا قبل ما يمشوا عملناها كتير ساعديني نحول الحاجه
انتصار تشيل فاطمه عيش و طبق الطعميه فاطمه تاخدهم و تمشي هند تمد ايدها تاخد رغيف و تلف فيه طعميتين
هند / انا هعمل ساندوتش و اطلع انام
انتصار / اقعدى افطرى معانا
هند / انا عملت الفطار لوحدى او على الاقل معظمه سامحيني عشان مش ناويه اشترك فى الغدى
انتصار / بلاش الكلام ده يا هند
هند / انا ما عنديش استعداد اتعامل معاها شغل التنبيط و رمى الكلام انا مش هبله و فاهمه هى بتقصد ايه
انتصار / كبرى دماغك
هند / انا هطلع اصحى مختار عن اذنك
هند تطلع من المطبخ تقابل فاطمه راجعه
فاطمه / على فين كدا ان شاء الله هو اذا حضرت الملايكه ذهبت الشياطين و لا ايه
هند تبتسم بسماجه و تطلع فوق تفتح باب الاوضه تلاقي مختار بيلبس
مختار / كنتى فين قلقتيني
هند / كنت بحضر الفطار قبل ما مرات عمك تصحي بس برده ما فلتش منها اعمل اكتر من كدا ايه
مختار / هههههههههههههههههه و جايلك بايه من دا كله
هند / اعصابى تعبت
مختار / و اللى يريح اعصابك
هند / دا انا ابوسه
مختار / يابركه دعاكى يا اما … خلاص انزلى نفطر ما دام جاهز بقي و نصلى قبل ما امشي و اوعدك اول ما ارجع هعملك مفاجاه تبسطك
هند / ما قولتلك ما ليش فى المفاجات
مختار / جعان و مش هرجع بعد الصلاه يرضيكي امشي جعان
هند / طب ما تنزل انت تاكل و انا خليني هنا انا كلت لقمه فى المطبخ
مختار / عيب يا هند
هند / ما تضغطش عليا
مختار / اخر مره لو حصل حاجه وعد منى القرار هيجي منى انا
هند / وعد ؟
مختار / عمرى خلفت وعدى ؟
هند تهز راسها لا
مختار / امال بقي يلا بقولك جعااااان
مختار ياخد هند تحت باطه و ينزلوا و يقفل الباب وراه
…………………..
على الاكل
الكل قاعد مختار يدخل و هند فى ايده
مختار / خيانه مش قادرين تستنونى
ناصر / اللحقلك لقمه عشان نلحق الصلاه
انتصار / النهرده مفيش غموس كلو ساندوتشات عشان مفيش وقت
فاطمه / كانوا فطروا بعد الصلاه بدل اللهوجه دى مش فاهمه ايه لزومها السربعه يعني
شاكر / بس الشهاده لله فطار عنب و جاى فى وقته انا كنت جعان
انتصار تناول مختار ساندوتش يقعد ياكل و هند تساعد فى عمايل السندوتشات
مريم / انا اللى عملت البتاو و هند اللى عملت باقي الفطار
شاكر / لوحديكوا ما شاء الله ايه الشطاره دى
ناصر / ناخد على كدا يا ست البنات و لا دى كانت لحظه نشاط و راحت لحالها
هند / ربنا يسهل
ناصر / تبقي لحظه و راحت لحالها
الكل يضحك و هند تدى لمختار ساندوتش كمان عباده ينزل بيجرى على بره
مختار / تسلم ايدك انا كدا تمام اوى يلا بالاذن
انتصار / اقعد كمل اكلك
مختار يمشى ما يردش
فاطمه / تلاقي الاكل ما عجبوش
شاكر / ما يعجبوش ليه دا يعجب الباشا
فاطمه / و انت مش عارف ابن اخوك بيحب الحاجه بمزاج
هند / هو اصلا مستعجل عشان رايح التجنيد
فاطمه / والله !!! طيب
انتصار / اقعدى يا هند كليلك لقمه
هند / لا انا مش جعانه ميرسي كلى انتى
فاطمه / جابرى الزاد يا حبيبتي دا حتى بيقولك طباخ السم بيدوقه
هند / دا طباخ السم بقي
انتصار تزغد هند بالراحه
هند / عن اذنكوا
هند تسيب المكان و تمشي
فاطمه / اجرى بقي وراها و خديلها اكلها فى الاوضه
شاكر / تاكل مكان ما تاكل كفايا تعبها فى الاكل
فاطمه تبص لشاكر
انتصار / البنت ما نامتش من امبارح عشان تعملنا الاكل ده والله
فاطمه / و ايه اللى جبرها ما احنا كلنا بنصحي سوا و بنساعد بعض لزمتها ايه الشملله يعني
ناصر / انا شبعت الحمد لله عن اذنكوا اللحق الصلاه
شاكر / خدنى معاك
ناصر و شاكر و باقي الرجاله يقوموا و يمشوا و فاطمه تحط شريحه قته فى بقها
انتصار / على الله تكونى ارتاحتى
فاطمه / دا حتى الاكل
هند تدخل توشوش انتصار
هند / معاكى رقم ام داوود
انتصار / معايا
هند / ممكن تديهونى هكلمها لو فاضيه تجيلى دلوقت مختار هيتاخر بره هيطلع من الصلاه على التجنيد على الارض فرصه يعني
انتصار / ناوليني موبايلي من هناك
انتصار تشاور على بوفيه هند تروح تجيبهولها انتصار تطلع النمره و تديها لهند و فاطمه متابعه و هند بتنقل الرقم من موبايل انتصار
فاطمه / خير فى حاجه و لا ايه
هند / هعمل بنصيحتك و ادلع نفسي
فاطمه / خير ما عملتى و كويس برده انك هتكلميها بدرى كدا يادوب تلحق تخلص
هند / فعلا انا عوزاها تعملى حاجات كتير اوى النهرده عشان كدا هعتزر انى اساعد فى البيت باقي اليوم … ميرسي يا ام فاتن … عن اذنكوا
هند تمشي و انتصار واقفه بتضحك
فاطمه / على هواكى تصرفاتها دى طبعا
انتصار / و هى يعني بتدلع نفسها لحد غريب هعوز ايه اكتر من كدا
فاطمه تسيب المكان و تقوم تمشي و هى بتتكلم فى التليفون
فاطمه / ازيك يا ام داوود فاضيه النهرده … بجد !!! لا خلاص مش مشكله هند اولى طبعا انتى كنتى لسه عندى من كام يوم انما هى ما حدش حط ايده فيها من يوم فرحها زمانها قشفت … نبقي نتفق نبقي نتفق … يلا سلام
فاطمه تقفل و تنفخ
فاطمه / اه يا بنت المسروعه
سماح تدخل
سماح / بقولك ايه يا اما عاوزه اروح لخديجه النهرده
فاطمه / اشمعن النهرده يعني
سماح / هنهيص معها و مع البنات شويه
فاطمه / ما تهيصي هنا مع البنات و لا احنا ما لناش نفس نفرح
سماح / ما اقصدش بس
فاطمه / حطى السماعات و لمى البنات و هيصوا هنا و سبيني السعادى انا مش طايقه روحى
فاطمه تطلع فوق و سماح واقفه تنفخ
سماح / انا قرفت
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
