رواية البر التاني الفصل الثامن عشر 18 بقلم لولو محمد
رواية البر التاني الجزء الثامن عشر
رواية البر التاني البارت الثامن عشر
رواية البر التاني الحلقة الثامنة عشر
فى السرايا
عصام قاعد سماح تدخل عصام يبتسم
سماح / مساء الخير يا استاذ
عصام / مساء النور اخبارك ايه النهرده احسن
سماح / تمام الحمد لله اتفضل الواجب
سماح تقعد و عصام يفتح الكراسه و يصحح
عصام / برافو عليكي انتى حتى حاله الحاجات اللى غبتى فيها
سماح / ما انا خليت مريم شرحتلى الحاجات الجديده
عصام / احلى حاجه فيكي يا سماح انك ما بتخليش حاجه تعطلك بجد ياريت كل البنات يبقوا زيك
سماح / بعد الشر على كل البنات
عصام / انتى لسه مقتنعه بالهبل ده انا قولتلك مليون مره ان مفيش انسان حياته كامله كل الناس عندها مشاكل و انتى ذكيه تقدرى تتعاملى مع المشاكل دى و تستفيدي منها
سماح / استفيد من المشاكل !!
عصام / ايوه تتعلمى و تكتسبي خبرات
سماح / ازاى
عصام يبص حواليه
عصام / مع الوقت هتتعلمى خلينا دلوقت فى الدرس
سماح تبص حواليها و عصام يديها الكشكول تقوم تقعد جنب مريم
……………………….
فى المستشفى
وسام قاعده بتعيط و يوسف قاعد جنبها
يوسف / انتى بتعيطي ليه دلوقت انتى مش الدكتور طمنك
وسام تبصله و تكمل عياط
وسام / انا عارفه انك هنا غصب عنك و ان لو عليك تسبني و تمشي
يوسف يقعد جنبها
يوسف / مش حقيقي
وسام / انا ماليش فى الدنيا غيرها لو جرالها حاجه
يوسف / ان شاء الله مش هيجرالها حاجه و هتخف و تبقي زى الفل
وسام تعيط يوسف يطبطب عليها
وسام / امشى يا يوسف امشى خلينى اتعود انك مش موجود مش عاوزه اتسند عليك و تسبنى فجاه اقع
يوسف / مش هسيبك
وسام تبتسم بسخريه
يوسف / هتقوم بالسلامه و هتخف و هتبقى زى الفل
وسام تبصله
يوسف / انا مش وحش اوى كدا و ان كنت عاوز نسيب بعض فمش عشانى قد ما هو عشانك عشان ما اربطكيش بيا على الفاضى
وسام / ما عدتش تفرق
يوسف / تفرق بالنسبالى انا مش قليل الاصل و لا ناسي اللى عملتيه عشانى و لا اللى عشناه سوا
وسام / ما تقوليش كلام يعلقنى بيك فاكتر وقت انا ضعيفه فيه ما تلعبش بيا
وسام تبص قدامها و تعيط
يوسف / هجيبلك ازازه ميه و كبايه ينسون و لا كركديه تهديكى
وسام تبصله يروح ناحيه الكافتريا
……………………………….
فى شقه هند
هند قاعده بترص العشا مع مامتها و هى بتحكى اللى حصل بمنتهى الحماس
هند / والله انا لحد دلوقت ما عارفه انا عملت كدا ازاى
شيرى / برده يا هند ما ينفعش افرضى يا بنتى كانوا ضربوكى و لا عملوا فيكى حاجه و بعدين الناس اللى فى الشارع دول ايه حكايتهم بيتفرجوا و خلاص ما حدش يدخل ما حدش يحوش
عبد الله / يحوشوا عن مين دا احنا شخصيا خفنا ندخل لحسن ناخد رجل و لا ايد مش كدا يا مختار
مختار / من خاف سلم يا عم
هند / بطلوا رخامه بقى
مختار يعمل انه بيقفل بقه سوسته و يبص لعبد الله و ماسكين نفسهم من الضحك
شيرى / انا اقصد قبل ما تضربى اقصد لما كانوا بيعاكسوكى ما حدش يقولهم عيب اختشوا دى زى اختكوا
عبد الله / الزمن ده ولا يا ست الكل
شيرى / مش حقيقى يعنى انت لو كنت واقف كنت هتتفرج و لا كنت هتعمل حاجه
عبد الله / اكيد كنت هعمل كنت هعاكس معاهم
مختار يضربه على دماغه من ورا و هم بيضحكوا
شيرى / حطيت صوابعى العشره منك فى الشق قوموا يلا كلو لقمه عشان تشوفوا اللى وراكوا و تزاكرولكوا كلمتين على الله الجيم اللى بتضيعوا فيه الساعات ده ما يجيش على دماغكوا فى النتيجه فى الاخر
هند / ازاى بس يا ماما يعنى بعد اللى حصل و لسه مش شايفه فايده للجيم و التمرين
شيرى / والله لو ما كنتيش روحتى الجيم ما كنتيش قابلتى الكلاب دول و لا كان الموضوع حصل من اساسه
هند / لو مش فى الجيم كان وارد جدا يحصل فى اى حته فى الجامعه قدام البيت فى اى حته على فكره بقى بعد اللى حصل ده انا بقيت متاكده انى صح و لازم كل البنات تتعلم تدافع عن نفسها الرجاله ماتو فى الحرب سورى يعنى يا مختار
عبد الله / هو ايه اللى سورى يا مختار طب و انا ايه
هند / تيجى فى الهايفه و تتصدر دا اللى انت فالح فيه
عبد الله / يا ستى احمدى ربنا مش احسن ما كنت ما فلحتش فى حاجه خالص كلى كلى
مختار/ و بتقولى عليا انا اللى مجرم
هند / ههههههههههههههههههههههههههههه
شيري تبصلهم و هى مبتسمه بحزن و تبص فى طبقها و تاكل
………………………..
على قهوه
خيلان يوسف قاعدين مع شاب وسيم
الشاب / هو انا لقيت فرصه ادخل يادوب هدخل اضربهم و احوش عنها لقيتها طاخ طيخ طوخ مطوحاهم فى الارض
خال 1 / انت بتتكلم عن مين هند دى اغلب من الغلب دى لو بصيتلها بس تعيط دا ان ما اغماش عليها
الشاب / اقسم بالله زى ما حكيتلك البت خارجه من الجيم مربيه رجاله فى درعاتها
الخيلان تبص لبعض و يستغربوا
الشاب / على العموم يا بهوات احنا لسه فيها ما خسرناش غير شويه وقت و ان كانت الدخله دى قلشت فالدخلات كتير
خال 2/ المهم عندنا الوقت و السرعه عاوزين ننجز
الشاب / لا ما تقلقش انت جيت للراجل الصح اسبوعين تلاته بالكتير و تحلق للواد الصايع اللى معلقها بيه ده خالص
خال 1 / و حلاوتك عندى
الشاب / حلاوه ايه يا باشا احنا برده عندنا ولايا انا بعمل الحاجات دى لوجه الله ما بخدش الا مصاريف ايدى و دخانى و كلك نظر الرجاله بتوع النهرده يعنى
خال 2/ انت مش لسه واخد على قلبك قد كدا
الشاب / يا باشا العيال اللى اتعوروا دول علاجهم هيكلف و لو ما كتمناش بقهم ممكن يروحوا للسنيوره و يكشفوا المستور
الخيلان تبص لبعضيها خال واحد يطلع فلوس
خال 1/ ماشى اما نشوف اخرتها
الشاب ياخدها و يعدها
الشاب / اخرتها خير ان شاء الله … من يد ما نعدمها … كام دول ؟
………………………….
فى اوضه محمود
محمود / انا مش عارف ازاى قلبى طاوعنى اوافقك على خطه الابالسه دى
اسراء / والله جربنا معاها كل الطرق و بعدين بقولك ايه امشى عدل يحتار عدوك فيك
محمود / قصدك ايه
اسراء / قصدى انها لو بتحب مختار بجد و ميته فى دباديبه زى ما بتقولنا عمرها ما هتبص للواد ده و ما تاخذنيش فى اللى هقوله برده لو كانت محترمه و متربيه هتصون خطيبها و عمرها ما هتبصله برده
محمود / و ما دام عارفه كدا بتغرمينا فلوس على الفاضى ليه ما دام كدا كدا فكره بايظه
اسراء / وطى صوتك يا راجل ايه ما شافوهمش و هم بيسرقوا شافوهم و هم بيتقاسموا انت عارف لو يوسف عرف حاجه زى دى هيعمل ايه
محمود/ هو فين صحيح
اسراء / مع وسام امها تعبانه و فى المستشفى
محمود يتفزع و يقوم
محمود / يا نهار ابيض و انتى قاعده كدا يا وليه و حماه ابنك راقده فى المستشفى
اسراء / ما انا كلمتها كذا مره و قالولى مانعين عنها الزياره اروح اعمل ايه
محمود / اما انتى … يا وليه البت دى هتبقى مرات ابنك قومى اقفى جنبها فى محنتها
اسراء / اما امرك غريب انت و ابنك انت مش لسه قايلى فشكلى الجوازه دى و كانت غلط من الاول و ابنك النهرده كان رايح ينهى معاها و يشوف طلباتها فجاه انتوا الاتنين بقيتوا هتموتوا على البت و بقت مراه ابنى
محمود / الواجب يا اسراء الواجب و انتى بنت اصول
اسراء / ادينى قايمه اللبس اما اشوف اخره الشحطته دى ايه انا بقكر اجر اوضه فى المستشفى انقل فيها اقامتى بدل الشحطته و الرايح جاى كل شويه دول
محمود / اللهى انت تعلم كيف حالى فهل يا سيدى فرج قريب
اسراء / شوف الراجل
………………………………..
فى السرايا
انتصار بتتكلم فى التليفون فى اوضتها
انتصار / يعنى ايه مش هتيجي خالص لحد ما تخلص امتحانات
مختار / مش عارف بس فعلا مش حاسس ان ينفع اسيبهم لوحدهم
انتصار / طب عامل ايه فى الاكل
مختار / هههههههههههههههههههههه ايه يا ست الكل هند لو سمعتك تزعل
انتصار / طب هدمتك مين هيغسلهالك ما تقوليش دى كمان هند هتعملها
مختار / انا هعملها و لا اودى المغسله و خلاص
انتصار / امرى لله مع انها فتره طويله اوى
مختار / بقولك ايه ما تجيبى مريم و تيجوا يوم تغيروا جو
انتصار / مريم بتزاكر الامتحانات قربت
مختار / خليها تيجي يوم تغير جو قبل الامتحانات صدقينى هتفرق معاها خالص و بصراحه مجيتكوا هتفرق مع هند و خالتى اوى صدقينى بيحاولوا بس اللى فى القلب فى القلب
انتصار / لا اله الا الله ربنا يعينهم و يصبرهم هقول ايه هشور على اخوك و ارد عليك
مختار / تمام يا ست الكل هستاذن انا بقى عشان فاصل على الاخر
انتصار / تصبح على خير يا ابنى
انتصار تقفل ناصر يفتح الباب و يدخل
ناصر / يا ربى على دا يوم
انتصار / على خير ان شاء الله
ناصر / ان شاء الله خير ها كلمتى مختار
انتصار / لسه قافله معاه مش هيجي خالص مش عايز يسيب نسايبه لوحديهم
ناصر / ههههههههههههههههه مش عايز يسبهم لوحديهم و لا مش قادر على بعادهم
انتصار / ههههههههههههههههههههههههه يا خويا و ماله ربنا يهنيهم و يسعدهم
ناصر / طب والله ساعات بغير منه
انتصار / يا لهوى تغير من ابنك طب و ربنا المعبود انا الدنيا كلها عندى فى كفه و انت لوحدك كدا فى الكفه التانيه
ناصر / كلت انا من الشويتين دول
انتصار / شكلك جعان قولى تحب تاكل ايه و انا اعملهولك
ناصر يركبها الهوا
ناصر / اكلك انتى يا قمر
انتصار / يا لهوى يا ناصر ما تكبر بقى الله انت بقيت جد
ناصر / الشباب شباب القلب
انتصار / هههههههههههههههههههههههههههههههههه
………………………………
فى اوضه مريم تانى يوم
سماح قاعده جنبها على السرير
سماح / والله ما هيوافقوا
مريم / ما يمكن يوافقوا ليه الكئابه دى بس يا بومه
سماح / عشان انا عارفه امى
مريم / امك هتبقى فى الغردقه و الكبير لو قال لعباده
سماح / انا مش هعشم نفسى بحاجه
مريم / بكره تشوفى المرادى هتيجي معايا مصر
سماح / ان شاء الله بقولك ايه انا مصدعه هقوم انام
مريم / انا عندى دوا للصداع
سماح / لا انتى عارفه الحاجات دى بتتعبلى معدتى هنام و هيروح لوحده تصبحى على خير
مريم / و انتى من اهله
سماح تطلع بره و تروح اوضه مامتها و تخبط
فاطمه / ادخل
سماح تقتح الباب تلاقى امها بتتمكيج قدام المرايه
فاطمه / هو انتى افتكرت ابوكى
سماح / هيروحوا مصر يتفسحوا و يزوروا هند
فاطمه / هم مين دول
سماح / مريم و امين و خالتى انتصار
فاطمه / اااه و ماله يروحوا
سماح / ممكن
فاطمه / اتكلمنا فى الحكايه دى كام مره
سماح / قولتيلى رجلك على رجلى فى كل حته و اديكى اهو هتسافرى و تسبيني هنا لوحدى
فاطمه / هو انا سيباكى فى الشارع يا بت
سماح / لا بس انا اتخنقت
فاطمه / و الله و كبرتى يا سماح و طلعلك حس
شاكر يدخل سماح تمشى
شاكر / هو فى ايه مالها سماح
فاطمه / والله انا تعبت مع البت دى و مش عارفه اعمل ايه دلع ناصر فى بنته هيبوظلى بنتى و البت كبرت و مش قادره عليها
شاكر / ايه الكلام ده ان كانت مريم و لا سماح الاتنين ما يتخيروش عن بعض قمه الادب و الاخلاق
فاطمه / ايوه يا خويا امال ايه بس الدنيا اتغيرت و التربيه بقت صعبه طب دا الواحد بقى بيخاف يفتح الفايس بوك من كتر القرف اللى بيقراه عليه و انا بخاف على بنتى ايه مش من حقى يعنى
شاكر / ازاى بس
فاطمه / المهم
فاطمه تقرب من شاكر
فاطمه / ما قولتليش رايك فى الريحه الجديده بتاعتى جيباهالك مخصوص
شاكر / انتى اللى مديه للريحه قيمه يا بطتى
فاطمه / هههههههههههههههههههههههههههههه تسلملى
……………………………
فى الكليه
الكافتيريا زحمه جدا و مفيش مكان
مختار / بقولك ايه انا هروح اجيب اتنين نسكافيه و انتى استنينى فى الضله اللى هناك دى و لا اقولك خشى المبنى تراوه شويه عن هنا
هند / تمام
مختار / والله لولا انى مصدع كنت فضيتها سيره بس فعلا محتاجله
هند / خلاص تمام
هند تبتسم لمختار و تدخل المبنى الشاب الوسيم يوقفها
الشاب / لو سمحتى هى المكتبه فين اصل انا اول مره اجى هنا
هند / المكتبه مش فى المبنى ده خالص دى فى المبنى التانى اللى هناك
الشاب / اه شكرا …انا اسف والله هو احنا اتقابلنا قبل كدا
هند تبصله باستهجان
الشاب / اقسم بالله ما بعاكس بس فعلا … افتكرت خلاص شكرا
هند نظراتها تتحول لاستغراب
الشاب / تانى انا مش بعاكس تمام لحسن تضربيني زى العيال بتوع الجيم
هند تبص فى الارض و تغطى وشها بايديها
الشاب / بصراحه هم يستاهلوا انا شخصيا كنت ناوى ادخل بس لما لقيتك مسيطره بصراحه خفت حتى اسالك ان كنتى كويسه و لا لا
هند تبصله و تهز راسها بخجل
الشاب / انا ممدوح على فكره دكتور صيدلى
هند / تشرفنا عن اذنك
هند تيجي تمشى الشاب يقف قدامها
ممدوح / انا والله مش بعاكسك
هند / حضرتك سالتنى عن المكتبه و انا قولتلك و مش معنى اننا اتقابلنا لا احنا ما اتقابلناش اننا كنا موجودين فى نفس المكان ان ده مبرر اننا نتعرف
ممدوح يبتسم
ممدوح / معاكى حق بعتزر
هند تمشى و ممدوح متابعها
………………………….
فى السرايا
ناصر / ليه بس يا عمى كل مره ترجعنى مكسور كدا
شاكر / ما عاش و لا كان اللى يكسرك بس المشكله ان فاطمه مش هتبقى معاها و انت عارفها موسوسه و مدنونه و هتصدعنى و كل شويه البت البت البت البت خليها مكنونه هنا لحد ما نرجع و المره الجايه ان شاء الله يروحوا هم الاتنين يغيروا جوا و كل اللى انت عاوزه بس عشان خاطرى المره دى
ناصر / اللى تشوفه يا عمى احنا بس قولنا عشان يغيروا جو قبل الامتحانات و كدا
شاكر / يا ناصر ابوس ايدك
ناصر / خلاص يا عمى اللى تشوفه خلاص انا هسكت خالص
شاكر / هههههههههههههههههههههه صحيح ما فيش اخبار عن وهدان
ناصر / لا الحكومه مشدده الحراسه على الحدود ما فيش دبانه بتدخل و لا بتخرج
شاكر / ربنا يقويهم و يصلحلنا الحال
ناصر / امين يا عمى امين
…………………………..
فى شقه هند
مختار / هنروح بكره من الكليه ان شاء الله هنلاقيهم هنا
شيرى / المرادى بقى تنبه عليهم ما يجيبوش معاهم اكل لازم يدوقوا اكلى
مختار / فدى بقى ما اوعدش حضرتك انتى عرفاهم اكتر منى
عبد الله / اكلك و لا اكلهم مش مهم المهم اننا اخيرا هنتفسح و نغير جو انا معاكوا فى الخروجه دى لا انا قتيل الخروجه دى
مختار / ههههههههههههههههههههههههههههه كلنا محتاجينها مش لوحدك يعنى
هند / بقولك ايه هو احنا ينفع بعد الكليه نروح ننقى كادو صغنن كدا لمريم
مختار / يا سلام جيتي فى جمل من عنيا حاضر
هند / ربنا يخليك ليا
مختار / و اه كمان انتصار جيبالنا صور الاوضه بتاعتنا عشان تنقى الالوان و كام كتالوج للعفش عشان تنقى اوضه النوم مفيش وقت و عاوزين ننجز الموضوع ده
الكل يبص لشيرى باصه فى الارض و ساكته
مختار / حضرتك عارفه يا امى ان العمال بيغيبوا اوى فى الحاجات و كمان ما حدش عارف ان كانت هند هتلاقى حاجه تعجبها فى الحاجات دى و لا هنبقى نلف على الجاهز
عبد الله / طب ما تنجزوا روحكوا و تشوفوا حاجه من النت
مختار / مش دلوقت خالص حوار النت ده احنا دلوقت نركز فى الكلمتين اللى هنزاكرهم عشان احنا ورانا يومين ضايعين و لا انتى على هواكى الوقت الضايع ده
هند / ههههههههههههههههههههههههههه مش هرد عليك على فكره طب لعلمك بقى انا بقيت اشطر منك
مختار / اساسى يا ست الكل بس انا مش سهل برده ما تستهونيش بيا
هند / ههههههههههههههههههههههههههه ماشى يا سيدى هنشوف
شيرى / عن اذنكوا افرد ضهرى عشان تعبانه من القعده طول اليوم فى الدكان
مختار / سلامتك يا امى
شيرى تدخل اوضتها و مختار يناول هند كتاب تاخده و هى بتنفخ و عبد الله متابعهم و بيضحك
…………………………………
فى الملاهى تانى يوم
مريم و هند و ياسمينا نازلين من لعبه شيرى و انتصار واقفين مستنينهم
مريم / امال عمى مختار فين
انتصار / هيكون فين يعنى عند النشان اللى هناك اتراهن مع امين مين يجيب اكتر
مريم / هو امين ده ما بيتعبش من الخساره .. عمى مختار نشانجى بريمو يلا نروح نتفرج
مريم تشد هند و يروحوا ناحيه مختار و امين و عبد الله مختار اللى بينشن
عبد الله / يعنى ده يقولك يا خالى و مريم تقولك يا عمى
مختار / ابقى اسال ياسمينا بقى عن احساسها لما تكبر هتبقى زى حلاتى كدا بالظبط
امين / احنا كنا بنلعب سوا و احنا عيال و كان بيزعل لو ما قولنالوش يا خالى
مختار / حقى و لا بنهبه
امين / حقك بس كفايا بقى
مختار / ايه عليت عليك جامد مش هتعرف تجبنى
امين / امال لو ما كنتش ابن اختك كنت عملت فيا ايه
مريم / هاتلى العروسه دى يا عمى
مريم تشاور على عروسه الراجل يناولها لمختار يديها لمريم
عبد الله / و انا المفروض اعمل ايه بقى عشان اجيب واحده لهند
الراجل / تجيب خمس طلقات صح من عشره و كل ما جبت اكتر كل ما الهديه بقت اقيم و احلى
عبد الله / ادعيلى بقى
هند / ههههههههههههههههههههه مش معشمه نفسى اوى مختار يبقي يجيبلى واحده و لا ايه يا مختار
عبد الله يضرب اول واحده ما تجيش التانيه مختار يعدله السلاح يجيبها
امين / دا غش دا يا حكم
مختار / اسكت يا ابنى لسه بيتعلم
امين / حاضر يا خالى مع انها مش اول مره تتعلم يا عبد الله و لا ايه بس معلش عشان خاطر هديه ست الكل بس
الكل يبص لامين و يضحكوا و مختار يساعد عبد الله يجيب التمانيه الباقين
الراجل / نقى
هند / حلو البو ده
الراجل يناولهولها
امين / طب وسعوا بقى اما اجيب انا حاجه للسنيوره الصغيره
مختار / ورينا هتجيب كام
امين / استنى
امين يجيب العشره ورا بعض صح
عبد الله / ما شاء الله انتوا رجالتكوا كلهم كدا و لا ايه
مختار / من اصغر عيل لاكبر كبير طب دا مريم بتعرف تنشن تعالى يا مريم جربى
مريم تروح تشيل البندقيه و تجيب سته من عشره
مريم / بقالى ياما ما اتمرنتش
هند / انتى بتعرفى تمسكى سلاح
مريم / و مين فى الصعيد ما بيعرفش انا حتى على قدى دا امى تجيب العصفوره طايره فى السما و لا تجليش
عبد الله / ما تجربى
هند / و احرج نفسى ليه انا عمرى ما مسكت سلاح فى حياتى اكيد هجيب صفر
مريم / جربى هتخسرى ايه
هند / تمام
هند تجرب
هند / سن نمله الدبانه اسفل منتصف الهدف
الكل يضحك تضرب ما تجيش
هند / المرادى هتيجي ان شاء الله المرادى هتيجي
هند تحاول تانى ما تجيش
مختار / ثبتى دراعك ايدك بترتعش
هند تحاول تانى واحده تفرقع
هند / هههههههههههههههههه ما كنتش بنشن على دى بس قشطه
ريم / ههههههههههههههههه تانى تانى نشنى بقى بره الهدف يمكن تجيبيها
هند / استنى بقى استنى ما تشتيتينش
هند تنشن و تركز و تطول
عبد الله / ما تضربى و خلاص
هند / ما توترنيش سبنى اركز
هند تضرب تطلع اوت
هند / ما كنتش بنشن على الهدف المرادى امال فى ايه بقى
مختار / هههههههههههههههههه تانى تانى ما تياسيش لسه ليكي سبع محاولات
هند / لا انا دراعى وجعنى شكرا على كدا
مختار ياخد منها السلاح و يجيب السبعه الباقين
عبد الله / انت ايه يا ابنى كلاشينكوف
مختار / يا ابنى انا بلعب اللعبه دى و انا طول ركبتك دى لعبه عيال عندينا
عبد الله / ماشى يا عم ,,, هات يا عم التويتي ده
الراجل يناوله تويتي و مختار يحاسب و يرجعوا لاهلهم امين يدى لياسمينا الدبدوب
انتصار / مين رفع راسنا
امين / كلنا ما شاء الله دا حتى الباشمهندسه هند جابت نقطه
هند / كنت بنشن على واحده جت فى واحده تانيه
انتصار / هههههههههههههههههه مش المهم جت هنعوز ايه تانى
مريم / هتودونا فين بقى تانى
مختار / انتى ما تعبتيش
مريم / انت وعدتنى يا عمى بالله عليك بالله عليك
مختار / عاوزه ايه
مريم / نخش فيلم السقا الجديد فى السينما
انتصار / انا مش هقدر اكمل الفيلم هيطفوا النور من هنا و انا هنام من هنا
مريم / بالله عليكى يا امى بالله عليكى
انتصار / بقولكوا ايه انتوا شباب مع بعضيكوا روحوا السيما سوا و احنا هنروح نرتاح فى البيت ايه رايك يا شوشو و اهو نتكلم انا و انتى فى تفاصيل الفرح عشان نبقى على نور
شيرى / والله ما عنديش مانع و الصراحه انا كمان تعبت
انتصار / خلاص ما تتاخروش و خدوا بالكوا من اللى معاكوا
امين / طب نوصلكوا
شيرى / ما تقلقوش هناخد تاكس سلام
انتصار و شيرى يمسكوا فى ايد بعض و ياسمينا معاهم و مختار و اللى معاه يمشوا الناحيه التانيه
…………………………….
قدام السينما
مريم / النهرده احلى يوم فى حياتى
مختار / اتفسحنا اهو نزاكر بقى لو سمحتوا الكلام للجميع و انا اولكم
هند / قال و انت محتاج وصايه
مختار / لا اله الا الله مستقبلنا واحد يا بنت الناس بتنقى عليا ليه بقى
هند / هههههههههههههههههه لا والله ما شاء الله اهو عشان لو حصل حاجه ما تبقاش عيني ما شاء الله ما شاء الله
مختار / المهم نروح بقى و لا فى اى حاجه تانيه نفسك تحققيها يا ست مريم اصل الخروجه دى كلها معموله عشان خاطر عيونها
عبد الله / ابقى تعالى كتير الواحد كان خلل
هند / امال لو ما كناش مقطعينها خروجات يا عبد الله بيه
امين / بقولكوا ايه ما تيجوا نتعشى
مريم / انسى عمى ما بياكلش اكل شوارع بيقرف
مختار / اه بقرف
عبد الله / ما انت بتاكل فول و طعميه مش دول اكل شوارع و لا ايه فكها المرادى بقى
مختار / عاوزين تاكلوا بره تمام هعزمكوا و كلوا انتوا بالهنا و الشفا
هند / هيفوتك كتير اوى يا مختار
مختار / والله حاولت بطنى وجعتنى و مش مره و لا اتنين انا راجل متعود على اللقمه النضيفه اعمل ايه يعنى
هند / انا تعبت معاك كلام فى الموضوع ده اعمل اللى يريحك بس فعلا انت فايتك كتير
مختار / يا ستى هانت بكره نتجوز و تطبخيلى انتى الحلو كلو امال انا هتجوزك ليه
عبد الله / يا جامد
هند / و انت متجوزنى اطبخلك لا يا سيدى الفاضل فى حاجات تانيه بنتجوز عشانها على فكره حتى فى الدين الست مش مجبره تطبخ لجوزها
مختار / الدين على راسى من فوق بس زى ما بحبك و هشقى طول النهار عشان اجبلك اللقمه ما فيش مانع انك تدلعينى باكله حلوه من ايديكى ترم عضمى اخر النهار
هند / سورى يا مختار فى فرق برده اولا انك تشتغل و تصرف عليا دا فرض عليك تتحاسب لو ما عملتوش انما انا مش مجبره
امين / بت يا مريم انتى لا شوفتى و لا سمعتى حاجه كلمه من الكلام ده توصل لحريم البلد اقطع خبرك
مختار / ههههههههههههههههههههههه بس يا ابنى بصى يا ست الكل انا معاكى فى كل ده بس اللى بيحب حد بيحب يبسطه ما لهاش دعوه بقى فرض و لا فضل و احنا لما ربنا يكرمنا و نتجوز هتلاقى نفسك شيلانى على كفوف الراحه و هتنسى كل الكلام ده و هتقفى بالساعات قصاد حراره الفرن عشان اقولك تسلم ايدك يا ست الستات
امين / و قال على راى المثل اقرب طريق لقلب جوزك معدته
عبد الله / عاجبنى الحوار ده اوى بس مش عشان الاكل عشان اللى بيحب حد بيحبه مبسوط مش مهم هيتعب قد ايه عشان يسعده المهم فى الاخر يسعده و ان كنا ناسين حله المحشى
مختار / بقولك ايه ما تنكدش علينا يلا شوفوا تحبوا تاكلوا فين
مريم / و ربنا انت اجدع عم فى الدنيا
مختار / على الله يتمر اتحركى قدامى
مريم / هههههههههههههههههههههههههههههههه
الكل يتحرك و هند باين عليها الحزن مختار يوطى عليها
مختار / ايه الدبدوب مش عاجبك ايه ما بيقولش امووواه اى لاف يو و لا ايه
هند تبتسم و تبص فى الارض و تمشى معاهم
……………………………….
فى شقه هند
شيري / انا مش هكدب عليكي انا كمان مستعجله على جوازه هند النهرده قبل بكره
انتصار / الله امال بقي
شيري / انا مش هتكسف منك و بعدين ما هو كلو على يدك هخبى ايه اديكي شايفه
شيري تتنهد
شيري / عمرى ما هنسي كلمه محمد الله يرحمه لما قالى انا مش هطمن على هند الا فى بيت جوزها بس اعمل ايه هقف لوحدى يعني
شيري تعيط
شيري / هتقف يا قلبي فى فرحها بطولها حتى من غير ابوها
انتصار / احنا معاها
شيري / بالله عليكي يا انتصار بالله عليكي هند زى بنتك ما تيجوا عليها و لا تعيروها انا مش عاوزه بنتى تشوف اللى انا شوفته عشان ما ليش اهل
انتصار / عيب يا شوشو طب يبقي حد يجي جنبها و لو ببصه و هتشوفى هعمل ايه
شيرى تبتسم انتصار تطبطب عليها
انتصار / بصي يا اختى انا مقدره اللى انتوا فيه و الناس بس على الاقل نكتب الكتاب اهو ساعتها اهل ابوها مش هيبقالهم حكم عليها يمكن ساعتها يهدوا شويه
شيري تهز راسها
………………….
فى شقه حامد
حامد قاعد مع مراته بتقطعله تفاح
الست / بس شبكه بالمبلغ ده يبقي اكيد الجدع مليان
حامد / و هو لو ما كانش مليان كان المحافظ بجلاله قدره حضر الفرح
الست / غريبه و ما دام انت عارف كدا عمال تعادى الراجل ليه دا بدل ما تحط ايدك فى ايده و تقف مع بنت اخوك بعد ما ابوها الله يرحمه مات
حامد / عبيطه و بتبصي تحت رجليكي بقي يا وليه كل اللى بيحصل حواليكى و مش قادره تفهمى
الست / طب فهمنى
حامد / محمود مش هيسمح بالجوازه دى تتم و لو على جثته و الجدع ان استحمل المشاكل النهرده بكره هيخلع اروح انا احط ايدي فى ايده و اخسر اخويا و الاقيه خلع ابقي لا طولت سما و لا ارض
الست / لا يا حامد الجدع شكله شارى
حامد / يبقي خير و بركه وقت كتب الكتاب هيلاقي ايدي فى ايده قبل كدا ما يلاقيش
الست / بس ما تاخذنيش يا خويا انا لو منك اتمسك بالجدع و زى ما محمود بيعمل المستحيل عشان الجوازه ما تمش انت تعمل المستحيل عشان تتم و اهو يمكن تعرف تشبك واحد من قرايبه لواحده من بناتنا
حامد / ما يقدر على القدره الا ربنا يا اختى هعمله ايه يعني دا احنا طول عمرنا فى حالنا و اخرنا نربط الحمار مطرح ما يعوز صاحبه انما محمود مسنود بنسايبه و ممكن يقطع عننا مايه و نور و اكيد مش همد ايدي لمختار اقوله اصرف علينا لحد ما ربنا يفرجها
الست / الله طب و بعدين ما حتى لو مختار و هند اتجوزوا احنا هنفضل فى نفس الهم
حامد / انا رايح بكره الصبح هكلم محمود و اديله الشيك و اخد الفلوس
الست / و هو ده حقك برده يا راجل
حامد / ههههههههههههههههه تعرفى ان محمود لسه بيبعت لعيال محمد نصيبهم فى الارباح حتى بعد كل اللى حصل
الست / صبرنى يارب هو فى كدا
حامد / انا هاخد الفلوس اشغلهم مع واحد صاحبي فى تجاره العربيات و اهو نصيبي فى المحل محفوظ
الست / و هو محمود هيوافق
حامد / هيوافق هو قالنا اللى عاوز فلوسه هديهاله و انا احتاجتها اهو
الست / اما نشوف
………………..
فى شقه هند
عبد الله يفتح الباب و الكل داخل بيضحك
شيري / حمد الله على السلامه اتاخرتوا كدا ليه
مريم / اما كانت فسحه ما حصلتش
انتصار / الحمد لله نروح نزاكر بقي و نلتفت لمستقبلنا
مريم / الوعد وعد
شيري / هقوم اعملكوا تتعشوا
مختار / سبقناكوا او سبقوكوا
هند / هههههههههههه هعملك انت ساندوتش انت ما اكلتش حاجه
هند تدخل المطبخ و الكل يقعد
مختار / يا ترى حد هيقولى خبر حلو و لا ايه
انتصار / ان شاء الله كتب الكتاب هيبقي اخر يوم فى الامتحانات
مريم / هنعمله هنا و لا فى البلد
شيري / فى البلد ان شاء الله
مريم / احسن و احسن و اهو هند تلبس الفستان الاحمر و نولعها
شيري تبتسم و تقوم تلاقي هند بتقلي بيض
شيري / مبروك
هند تبتسم
هند / الله يبارك فيكي انا عملت بزياده قولت اللى ياكل
شيري / خليني اساعدك
شيري تطلع الجبن من التلاجه
…………
فى المستشفي تانى يوم
وسام ماشيه فى الترقه خارجه من الاوضه تشوف يوسف جاى من الناحيه التانيه شايل كيس كبير تقف لحد ما يوصلها
يوسف / ازيك
وسام / الحمد لله
يوسف / جبت اكل طنط عامله ايه دلوقت
وسام / احسن كتبولها خروج الحمد لله رايحه اهو الحسابات
يوسف / خليكي هروح انا
وسام / بمناسبه ايه لا معلش انا ما بحبش حد يتصدق عليا
وسام تيجي تسيبه و تمشي يمسك ايدها
يوسف / بلاش الاسلوب ده
وسام / صدقنى ما عنديش طاقه نهائي انا واقفه على رجلى بالعافيه
يوسف / روحى ارتاحى و كلى لقمه انتى و طنط جبتلها شوربه و فراخ مشويه عشان مش عارف هى ممكن تاكل ايه و انا هخلص الحسابات و اجيلك
وسام / و اخره اللى بتعمله ايه
يوسف / لما طنط تقوم بالسلامه يبقي يحلها حلال بلاش نكد بقي
وسام / انا نكديه !!!!
يوسف / ههههههههههههههههههه بهزر معاكى بقي خدى
وسام تاخد الكيس و تهز راسها موافقه و تبتسم
يوسف / هاجى علاطول سبيلى حاجه اكلها
وسام / انت رخم على فكره
يوسف / ههههههههههههههههههه سلام
يوسف يرجع و وسام تتابعه لحد ما يدخل يمين و يختفى ترجع اوضه مامتها
………………….
فى المحل عند محمود
حامد / انا والله لولا انى شايفها فرصه ما كنت اتكلمت
محمود / و انا ما اتاخرش عليك يا حامد بس اليومين دول الدنيا … انت عارف مصاريف المستشفي بتاعه اخوك الله يرحمه و دفنته بس ما تقلقش اديني بس يومين و هظبطلك الفلوس
حامد يهز راسه حمدى يدخل
حمدى / صباح الخير يا رجاله متجمعين عند النبى ان شاء الله
محمود / حامد هيديني الشيك و ياخد فلوسه لو عاوز يا حمدى قول عشان اجهزهالك انت كمان
حمدى يبص لحامد
حمدى / خير يا حامد لو محتاج حاجه قولى
حامد / اقولك ايه يا ابني الحوار غير كدا خالص هو بس انا قدامى واحد صاحبي شغال فى العربيات قولت يعني اوسع رزقى
حمدى / و انت بتفهم فى العربيات يا حامد
حامد / و انا يعني كنت بفهم فى الهدوم اهى فلوس و بنشغلها و الرزق بيحب السعى
حمدى / انا بطمن عليك بس
حامد / لا ما تقلقش انا دارس الموضوع كويس لو عاوز ادخلك معايا
حمدى / لا شكرا انا مبسوط كدا اوى
محمود / كدا كدا هجهزلك فلوسك انت كمان
حمدى / اللى تشوفه بس انا مش مستعجل
حامد يبص لحمدى
………………..
فى شقه هند تانى يوم
هند نايمه تليفونها يرن تبص تلاقي رقم غريب تكنسل يتصل تانى ترد
هند / الو
شاب / ازيك يا هند
هند / مين
الشاب / انا ممدوح
هند / سورى مش واخده بالى ممدوح مين
ممدوح / ممدوح الشنوانى انا اللى قابلتك فى الكليه لما سالتك عن المكتبه
هند / افندم !!! و انت جبت رقمى منين ان شاء الله و ازاى تتصل بيا اصلا
ممدوح / انتى بتنامى بدرى و لا ايه
هند / رد عليا جبت رقمى منين
ممدوح / هو صعب اوى يعني سالت عنك فى الكليه
هند / و انت تعرفنى عشان تسال عنى
ممدوح / انتى ما لكيش فى التكنولوجيا و لا ايه انا يادوب بعدت عنك خطوتين و ظهرتيلى فى بيبول يو ماى نو عرفت اسمك و سالت عنك
هند / انت عبيط ؟
ممدوح / لا ليه
هند تقفل و هى متعصبه ممدوح يتصل تانى تكنسل يتصل تعمله بلوك
هند / دا مجنون و لا ايه
هند تقعد مضايقه تمسك التليفون و تتصل بمختار
مختار / السلام عليكم
هند / صحيتك ؟
مختار / مالك ؟ فى حاجه حصلت و لا ايه
هند / بصراحه اه و مش عارفه اعمل ايه و لا احكى لمين
مختار / احكيلى و انا اقولك تعملى ايه
هند / طب من غير ما تتعصب تمام
مختار / تمام احكى
هند تاخد نفس عميق و تجمع نفسها
…………………….
فى السرايا
ناصر و عباده قاعدين فى المكتب خليفه يدخل
خليفه / لا مؤاخذه يا كبير بس وهدان القط بره و بيستاذن يدخل
ناصر يبص لعباده
ناصر / خليه يدخل بسرعه
وهدان يدخل
وهدان / مساء الخير يا كبير لا مؤاخذه ان كنت جيت من غير معاد بس كان فى حركه غريبه ورا الجبل النهرده قولت ابلغ جنابك
ناصر / و عملت زى ما قولتلك
وهدان / بلغنا الحكومه يا كبير
ناصر / فتح عينك يا وهدان انت عيني فى الحته دى
وهدان / ما تقلقش يا كبير مفيش دبانه هتعدى تدخل البلد او تخرج منها الا بامر جنابك
ناصر / تمام يا وهدان و انت خارج هتقابل خليفه هيحليلك بقك
وهدان / كفايا رضاك علينا يا كبير
ناصر يهز راسه وهدان يطلع
عباده / تفتكر هى
ناصر / هى او غيرها ما حدش عارف يمكن تكون بتدخل البضاعه دى مع حد غيرنا
عباده / الحذر لا يمنع القدر يا كبير و الست دى مش سهله و مش هتغلب و هتدخلها هتدخلها
ناصر / الحكومه الفتره دى مفتحه عنيها و ادينا بنساعدهم باللى نقدر عليه اكتر من كدا مش فى ايدينا يا ابن عمى
عباده / اللى تشوفه يا كبير
………………….
تانى يوم فى شقه هند
جرس الباب يضرب هند تروح تفتح تلاقي بتاع دليفرى شايل ورد هند تبتسم
الشاب / ورد للاستاذه هند
هند / انا
هند تمضى و تستلم الورد و تبص على باب مختار و الشاب يمشي و تفتح الكارت
//////////////////
هند / انا ما كنتش بعاكس انا غرضي شريف و هثبتلك .. ممدوح
///////////////
هند تحدف الورد فى الباسكت اللى على السلم
هند / دا مجنون رسمى اكيد مش طبيعي يعني
هند تدخل الشقه و ترزع الباب
………………….
فى الدكان
شيري قاعده جوه و ياسمينا جنبها بتلون على المكتب و على الباب كرسيين قاعد عليهم فاروق و عيسي ممدوح يدخل فاروق يقوم يدخل وراه
ممدوح / السلام عليكم
فاروق / اؤمر يا باشا
ممدوح / شكرا انا كنت عاوز الاستاذه شريهان فى حوار خاص شويه
شيري تستغرب و تبص لفاروق باصصلها ممدوح يقرب منها
ممدوح / انا ممدوح الشنوانى دكتور صيدلى شغال فى شركه ادويه كبيره فى دبى بس نزلت مصر عشان الدكتوراه بتاعتى
شيري / اهلا و سهلا خير اؤمر
ممدوح / انا الحقيقه كان نفسي اقابل حضرتك فى ظروف احسن من دى لانى لما سالت للاسف عرفت ان زوج حضرتك توفى
شيري / سالت !!
ممدوح / انا قابلت الانسه هند اكتر من مره و الحقيقه مش هنكر انها لفتت انتباهى و سالت عليكوا و
شيري / و انت لما سالت ما قالولكش انها مخطوبه
ممدوح / مخطوبه !!
شيري / انا بنتى مخطوبه يا دكتور ممدوح و كتب كتابها الشهر الجاى
ممدوح / غريبه اوى دى
شيري / هو حضرتك سالت مين بالظبط
ممدوح / على العموم بعتزر عن سوء التفاهم ده و هكون قليل الزوق و اقولك انى مش هفقد الامل عن اذنك
ممدوح يمشي
شيري / مجنون دا و لا ايه
فاروق / فى حاجه يا ست الكل
شيري / اهى بلاوى بتتحدف
فاروق يشاور لعيسي يجرى ورا ممدوح و فاروق يقعد مكانه و شيرى تقعد و هى بتضرب كف على كف
…………………….
فى شقه هند
جرس الباب يضرب تروح تبص من العين تلاقي مختار مبتسم تفتح و هى مبتسمه
مختار / ما تديني موبايلك اعمل منه مكالمه
هند/ ثوانى اجيبهولك
هند تدخل تجيبه و تديه له مختار يتصل بحد
هند / اتفضل… هو انت موبايلك فصل ؟
مختار / الو
ممدوح / مين !!
مختار / حضرتك الدكتور ممدوح
هند تحط ايدها على بقها
ممدوح / انا مين معايا
مختار / معاك مختار الزيني خطيب الباشمهندسه هند الجمل بحاول اكلمك من رقمى بس حضرتك بتكنسل و غالبا عاملى بلوك يعنى
ممدوح / اهلا و سهلا خير اؤمر
مختار / لا ازاى حضرتك اللى تؤمر خير بتسال عن خطيبتي فقولت بدل ما تغلب نفسك فى السؤال اجاوبك انا
ممدوح / خطيبها !! انا ما كنتش اعرف انها مخطوبه
مختار / طب الحمد لله اديك عرفت
هند تروح تفتح الباسكت و توريله الورد
مختار / و شكرا على الورد كلفت نفسك على الفاضي
ممدوح / انا اسف على الازعاج انا فعلا ما اخدتش بالى و لا هى قالتلى اى حاجه عن انها مخطوبه
مختار / و هى تعرفك عشان تقولك و لا حتى تحكى معاك دا حياله مرتين صدفه مره منهم ما شافتكش اساسا
ممدوح / على العموم بعتزر مره تانيه على اللبس اللى حصل
مختار/ لا يا سيدى ما حصلش حاجه … سلام
مختار يقفل و يرجع البلوك و يدى الموبايل لهند و هو مبتسم و هى ساكته يوسف يطلع هند تشوفه عنيها توسع مختار يلف يشوفه
يوسف / جميله وقفه السلم دى حلوه اوى
مختار / اؤمر
يوسف / كنت عاوز بنت عمى فى حوار عائلي ليك فيه
هند / مختار من العيله يا يوسف دا خطيبي
يوسف / نتكلم فى الموضوع بعدين وسعى خليني ادخل
هند / انا لوحدى
يوسف / من انبهار لانبهار انقح منه انتى فاتحاله الباب و انتى لوحدك
مختار / هههههههههههههههههههههه
يوسف / صبرنى يارب
مختار / يصبرك انت
يوسف / بقولك ايه يا جدع انت انا مش فايقلك لو سمحت عاوز اتكلم مع بنت عمى كلمتين و لعلمك بخصوص وسام
هند / مالها وسام
يوسف / ولدتها كانت تعبانه اوى الفتره اللى فاتت و ماثر فى نفسيتها انها لوحدها انتوا صحاب من سنين و
هند / هبقي اكلمها اطمن عليها حاجه تانى
يوسف / مره تانيه طنط تبقي موجوده … ادخلى
هند تبص لمختار يهز راسه تدخل و تقفل الباب
يوسف / هى تلاقيح جتت احنا مش فضيناها سيره و فسخنا الخطوبه دى
مختار / اهرى مع نفسك
مختار يدخل و يقفل الباب و يوسف مضايق يتوف فى الارض و يمشي
………………………
فى شقه حمدى
حمدى بياكل مع مراته
الست / لا ليه هم يعني هيزيدو عند اخوك
حمدى / اهم قرشين للزمن
الست / كنت اكل من الكلام ده زمان انما دلوقت لا يشفعوا و لا ينفعوا لو كنت خدتهم زمان و عمتلك مشروع لوحدك كان زمانك بقيت حاجه تانيه
حمدى / و احنا يعني ناقصنا حاجه
الست / هو احنا يعني لازم يبقي ناقصنا ما ينفعش نعيش عيشه احسن
حمدى / اهو هيجيبهم اما نشوف هتصرفيهم فى قد ايه
الست / تقولش بصرف على نفسي
حمدى / بقولك ايه خلينا ناكل اللقمه فى هدوء مش قادر لخناق
الست / بقولك ايه ما تشارك حامد
حمدى / اشارك حامد فى ايه
الست / فى العربيات انت عارف حامد طول عمره دقرم ما بيحطش جنيه فى حاجه الا اذا كان متاكد منها مليون فى الميه
حمدى / هو احنا بنفهم فى العربيات
الست / يا خويا هو احنا بنفهم فى حاجه خالص
حمدى يبصلها و يحط معلقه رز كبيره فى بقه و يمضغ
…………………………
فى شقه مختار
عيسي / انا صورته من بعيد و عرفت عنوانه بس ما اعرفش كان بيكلمها فى ايه
مختار / تمام .. اخبار الشغل ايه
عيسي / والله مريح ادينا بلغنا كل البوابين فى المنطقه و علقنا ورق فى مداخل العمارات بس اهو ادينا مستنين
مختار / و تستني ليه اشترى انت و الرجاله بس من غير ما تاخد بالها
عيسي / هو احنا عيال و لا ايه ما تقلقش يومين و هتلاقي المحل على البلاطه
مختار / شوفت بقي … ركز و اهدى … بالهداوه كل يوم توصيله اتنين تلاته ما تكترش عشان الموضوع يتبلع
عيسي / ههههههههههههههعه فاتتنى دى تمام حاضر
مختار / اه صحيح الشاى بتاعك انت و فاروق انا عارفكوا
عيسي / اقسم بالله ما رضيت قولنا نشترى باكو الشاى و كيس السكر ما رضيتش و حلفت لتزعل حتى فاروق قالها هنجيب من القهوه ما رضيتش و قامت عملت الشاى بنفسيها
مختار / تمام روح ارتاح انت تلاقيك تعبان طول النهار
عيسي / تعبك راحه يا سي مختار
مختار / عشت
عيسي يمشي و مختار يقفل وراه الباب و يطلع البلكونه يلاقي هند بتنشر الغسيل كلو اسود
مختار / احم احم
هند تبصله و تبتسم
مختار / عامله ايه
هند / انا تمام تحب تيجي تزاكر معايا
مختار / احب اوى مش هتعمليلى قهوه من ايديكي الحلوه
هند / اعملك
هند تكمل نشير
هند / بقيت بغسل و بنشر كل يوم بفكر بكره انزل اشترى كام طقم اسود ابدل فيهم
مختار / ننزل نجيب و بالمره نبص على الشوار بتاعك
هند تبصله باستغراب
مختار / ايه انتوا ما عنكوش شوار هنا
هند / اسمه سيشوار و بعدين انا مش بستخدم الحاجات دى على فكره شعرى ناعم
مختار / هههههههههههههههههههههه اولا عارف ثانيا الشوار ده الجهاز بتاعك اللبس و الفرش مش بتاع الشعر
هند / قول والله
مختار / هههههههههههههههههه والله
هند / ايه ده استنى انت شوفت شعرى فين
مختار / قالولى ايه دا الحريم ما بتتوصاش فى الحاجات دى
هند تكمل نشير
هند / يلا ربنا يباركلهم ما ادونيش فرصه ابهرك
مختار / ههههههههههههههههههه لا ما تقلقيش مش شويه الشعر اللى هيبهرونى
هند تحط تسند على السور و تبصله
هند / امال ايه اللى يبهرك بقي كدا بالصلاه على النبي
مختار / عليه الصلاه و السلام
هند / قول ايه يبهرك
مختار / موقف الجيم حقيقي انبهرت و كنت مبسوط جدا
هند / شكلك بتحب الضرب
مختار/ ضرب مين تضربيني !!! كان غيرك اشطر يا ست الكل و بعدين انا انسان مسالم ما ليش فى العنف و لا المشاكل
هند / لا يا شيخ
مختار / عمرك شوفتيني بدئت مشكله انا دايما رد فعل بحل امورى بالتفاهم بس دا ما يمنعش ان اللى يهوب نحيتي او ناحيه اهلى ادافع عنهم و لا ايه يا ست البنات
هند / معاك حق
مختار / اه بالمناسبه يعني بصي يا هند انا و انتى بيني و بين بعض دنيا و قدام الناس دنيا تانيه خالص
هند / ازاى
مختار / يعني مثلا زى حوار الكلام اللى قولتيه فى الملاهى انا مش معترض عليه بس بيني و بينك انما قدام الناس لا
هند / برده مش فاهمه سورى وضح
مختار / احنا صعايده الراجل عندنا له هيبه و الست معروفه يعني انها بسكوتايه كدا البسكوت لما بينشف بيبقي بقسماط تحبي تبقي بسكوته و لا بقسماط
هند / اااااااه يعني ابان قدام الناس ضعيفه و منكسره و نظام سى السيد و امينه صح
مختار / ههههههههههههههههه لا مش للدرجادى انا اقصد الناس مش هتفهمك هيقولوا جايه تقومى حريمنا علينا و هياكلوا دماغى انت مدلعها مراتك مش عشان قهراويه هتيجي تغير الدنيا و كلام من ده
هند / انا قولت ايه لكل ده
مختار / ما قولتيش اتكمتى فى الشرع و ده حق ربنا لا خلاف عليه الفكره فى التوقيت و الاسلوب و الاقرار
هند / مختار كلمنى كلام افهمه ابوس ايدك
مختار / لا اله الا الله بصي يا بنت الناس الحياه بين الست و جوزها و اهله مش لوى دراع بيني و بينك بالحب تاخدى عنيا انما تقفى قدام اهلى و تقولى انا ما اعملكش و مش مطالبه و الكلام ده بتحرجيني قدامهم و تخلى شكلى وحش و اقسم بالله ما عندى ابسط من كدا يارب تكونى فهمتى
هند / فهمت طبعا انا مش غبيه
مختار / العفو استغفر الله
هند / انت عاوزنى ارسمك وسط اهلك حاضر
مختار / تعرفي ام عباده مرات عمى
هند / اه فاطمه
مختار / اه هى دى بقي استاذه بصراحه هههههههههههه بتعجبنى
هند / افندم
مختار / لا اله الا الله يا بنتى افهمى بصي قدام الناس الخدومه اللى تديكي عنيها انما فى الحقيقه وقت الجد شويه ملح اترموا فى البحر و اختفوا
هند / ااااااه
مختار / و عندها بدل الحجه مليون و دكر ابن دكر امسك عليا غلطه و بالنسبه لعمى بقي معيشاه فى دنيا تانيه خالص ما بيرفضلهاش طلب و لا بيعاتبها على حاجه مش عشان هو مش راجل بس عشان هى حرفيا ما بيتمسكش عليها غلطه
هند / سورى يا مختار لو هسال بس هو ازاى فرق السن الكبير اوى بينهم ده
مختار/ انا وعيت على الدنيا لقيت الوضع كدا و ما ليش انى اسال الحاجات دى اكيد كانت وقتها عادى و الا ما كانتش حصلت و اعتراضي عليها او سؤالى عنها مش هيغير فى الوضع انا و عباده من دور بعض ما لهاش عندى غير الاحترام
هند تهز راسها
مختار / واحده واحده هتفهمى و تاخدى على الجو و فى الاول اكيد هتبقي فى حاجات كدا هنعديها سوا و نتعلم منها ما تقلقيش
هند تبتسم
هند / انا خلصت تعال بقي اعملك القهوه
مختار / تمام يلا
مختار و هند يدخلوا و يقفلوا البلكونات
……………………..
فى السرايا
فى اوضه ناصر
انتصار / بس مريم لسه صغيره
ناصر / هو انا قولتلك وافقت انا بقولك البت جايلها عريس انا ما رديتش على الراجل و قولت هصلى استخاره و افكر
انتصار / ايوه بس مغاورى صعب و عصبي و مريم صغيره و بعدين مريم عاوزه تكمل تعليمها البت شاطره و مغاورى تعليمه على قده
ناصر / ههههههههههههههههههههه هو بالعلام مغاورى راجل كسيب و له هيبته فى البلد و بعدين فاتحيها فى الموضوع و شوفي رايها و هى مياله لايه
انتصار / لا يا اخويا افتح عنيها على الحاجات دى
ناصر / هههههههههههههههههه تفتحى عنيها دا ايه جرا ايه يا انتصار هى فاتن مش اتخطبت و هى قدها و اتجوزت بنت تمنتاشر
انتصار / يا ناصر يا خويا فاتن حاجه و مريم حاجه تانيه و بعدين انت ناوى تفتح على نفسك فتوحه اقولك انا مش هتكلم اتصل بمختار كدا و قوله مغاورى عاوز مريم
ناصر / و هو انا اللى ابوها و لا مختار انا بجد بقيت بغير من مختار يا انتصار ما يصحش كدا
انتصار / هههههههههههههههههه بطل هزارك ده احنا بنتكلم جد انت نسيت كان مضايق ازاى فى جوازه فاتن و انها سابت المدرسه مريم حاجه تانيه
ناصر / ماشي مش عاوزه تكلمى البت ناديها و اكلمها انا
انتصار / يا لهوى هو ما عدش في صبر هكلمها بس مش دلوقت اصبر اما الاجازه تيجي
ناصر / يعني ارد على الراجل اقوله اصبر اما البت تخلص امتحانات اما نشوف هتوافق لسه و لا لا ما يا اه يا لا و خلصنا
انتصار / حاضر حاضر هكلمها حاضر على الله تنبسط
ناصر / هههههههههههههههه مبسوط كتر خيرك
انتصار / يارب دايما
……………………
تانى يوم فى مول كبير
مختار قاعد مع ياسمينا فى كافيه الوايتر يدخل يحط طبق ايسكريم كبير و فنجان قهوه
مختار / شكرا
مختار يبص على ياسمينا بتفرد المنديل و تحطه على صدرها و تفرد التانى على رجليها مختار يبتسم و يتابعها ياسمينا تاكل بالراحه خالص
مختار / انتى شطوره خالص فى اكل الايسكريم
ياسمينا تبتسم
ياسمينا / تاخد حته
مختار / لا انا هشرب قهوه شكرا كلى انتى بس نو نو عشان زورك
ياسمينا تهز راسها و تاكل مختار تليفونه يرن يرد
مختار / السلام عليكم
عبد الله / انا وصلت المول اهو
مختار / انا فى الكافيه اللى فى الوش
عبد الله يبان من بعيد مختار يرفع ايده
مختار / انا قدامك بالظبط
عبد الله/ شوفتك جايلك اهو
مختار يقفل و ثوانى و عبد الله يدخل يسحب كرسي و يقعد
عبد الله / ايه يا جدعان المشوار ده … اعتقى
ياسمينا تشاورله ابعد
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
