رواية البر التاني الفصل الثالث والستون 63 بقلم لولو محمد
رواية البر التاني الجزء الثالث والستون
رواية البر التاني البارت الثالث والستون
رواية البر التاني الحلقة الثالثة والستون
عند مدخل البلد
العربيات تقف و ينط منها الرجاله كل واحد ماسك رشاش يضربوا الغفر و يفتحوا النار على الناس اللى ماشيه فى الشوارع اهل البلد يطلعوا سلاحهم و يضربوا النار هم كمان و يحصل تبادل نار و رجاله فيرا يرسموا صلبان على البيوت
………………….
فى القسم
عباس قاعد مع مغاورى لوحدهم
عباس / انت ليه ما قولتلوش على رشيد
مغاورى / من باقى عيلتى هو عشان اكشفله ورقى كله و لا ايه حلتنا كام رشيد هناك احنا عشان نفضحه
عباس / دا المحافظ كفيله عندنا
مغاورى / و الكلام هيعدى من بقه لودن كام واحد لحد ما يوصل للمحافظ و لا حتى ياخدوا اذن بطالعه من اياهم تضمن منين انت الكلام ما يتسربش و دم الراجل اللى هناك ده ما يتعلقش فى رقابينا
عباس / والله هى وجهه نظر بس احنا
مغاورى / اللى هنوصله هنبلغه بيه بنعرفه منين بقى ما يخصوش مهو كل شيخ و له طريقه و لا ايه يا ابنى
صوت ضرب النار عباس و مغاورى يقفوا
مغاورى / هو فى ايه
فجاه صوت انفجار عالى و الحيطه تتهد فوق مغاورى و عباس
………………………
قدام القسم
العساكر و زياد يطلعوا يضربوا النار واحد من رجاله فيرا يرفع السلاح و لسه هيضرب زياد حد يضربه بالنار زياد يبص وراه يلاقى امين طالع من فتحه السقف جاى من بعيد فى عربيه سايقها واحد تانى و عمال يصطاد فى الرجاله العربيه تركن قدام زياد و فى ثوانى ناصر يدخل بعربيه يفرمل و ينزل منها يضرب نار هو كمان ياخد طلقه فى كتفه زياد يضرب اللى ضربه يقتله و فى تبادل نارى عنيف بينهم و الناس عماله تقع و تموت من الناحيتين عربيات كتير تدخل تحاوط المكان و ينزل منها رجاله كتير يقتلوا رجاله فيرا لاخر واحد فيهم ناصر و الرجاله يطلعوا من ورا العربيات اللى كانوا متحاميين فيها و يتمشوا بحزر و كل واحد سلاحه فى ايده فى اطفال و ستات فى الارض امين يجرى يجس نبضهم
ناصر / قسما بالله لندمكوا يا ولاد الكلب يا كفره
امين يتنطت بين الناس فى الارض لحد ما يوصل لعيل صغير يجس نبضه
امين / الاسعاف يا رجاله
ناصر يجرى يشيل الولد و يجرى على عربيته و يطير و اهل البلد يتجمعوا حوالين الجثث و اللى بتصرخ و اللى بتعيط و اللى بيجس النبض و اللى بيشيل حد و اللى بيلف شاله الابيض على دراع حد متصاب و زياد واقف وسط كل دول و بيتفرج عليهم و هم بيتحركوا زى النحل يبص على القسم الحيطه مهدوده يدخل يجرى على جوه يفتح الباب يلاقى المكتب مدمر و مغاورى و عباس تحت الطوب يبدا يشيل من عليهم و يحاول يطلعهم الاتنين ما بيتحركوش
…………………………………….
فى سرايا الزنايته
سماح نازله تجري من فوق فاطمه توقفها
سماح / فجروا القسم فجروا القسم ولاد الكلب و مغاورى جواه
فاطمه/ اهدى يا سماح هيبقي كويس ان شاء الله
سماح / اطمن عليه ياما ابوس ايدك اروح اطمن عليه
انتصار تدخل
انتصار / لما الدنيا تهدى
سماح / مش هتهدى يا عمتى مش هتهدى
انتصار / الحكومه نزلت الشوارع و الكبير قال للناس يدخلوا بيوتهم و يقفلوها عليهم مفيش خروج الا اما يبان جديد
فاطمه / بيقولوا ما سابوش حد فى الطريق حتى العيال و الحريم ضربوهم بالنار
سماح / دول فجروا القسم فجروا القسم
هند / عاوزينها تبان ارهاب
فاتن / لا و انتى الصادقة فتنه بين المسلمين و المسيحين
هند / و المسيحين هيفجروا القسم ليه هو مسجد
سماح / انتوا بتتكلموا فى ايه احنا فى ايه و انتوا فى ايه
انتصار / اهدي يا سماحه ان شاء الله خير
سماح/ و هيجي منين الخير بس بعد اللي حصل
فاطمه /بس احنا لازم نروح المستشفى نطمن على الناس دي لو ما كناش احنا جنبهم في الوقت ده يبقى احنا لزمتنا ايه
انتصار /الصبر انا كلمت الكبير وقال لي هنروح بس مش دلوقت لما الشوارع تهدا وينظفوها
الكل يبصوا لبعض انتصار تتنهد
…………………….
فى المستشفى
الدكتور بيربط دراع ناصر و هو بيتالم امين يدخل
ناصر / طمنى
امين يبص على الدكتور
الدكتور / انا خلصت هنا الف سلامه عليك يا كبير
ناصر / تعبناك معانا يا دكتور
الدكتور / ما تقولش كدا دا واجبى عن اذنكوا ابص على باقي الحالات
الدكتور يطلع بره امين يقعد جنب ناصر
ناصر / قولها
امين / الجتت بره فوق بعضها اربعه من الغفر و عسكرى و تلاته من الحريم و عيلين و خمس رجاله غير الاصابات
ناصر يتنهد
امين / مغاورى و عباس كانوا فى الاوضه اللى فجروها فى القسم نقلوا عباس العنايه
ناصر / و مغاورى ؟
امين / لسه جاى من عنده خد سبع غرز فى دماغه و هيدخلوه الاشاعه يشوفوا فى كسور و لا لا
ناصر / و عباس ماله
امين / لا عباس وضعه صعب بيقولوا كان واقف قصاد مغاورى وقت الحيطه ما وقعت عليهم و خد عنه الصدمه كلها
ناصر يقوم يقف
ناصر / ربنا ينجيه لمراته و عياله و اهله
امين / على فين يا كبير
ناصر / هطمن على الناس اللى انصابت من غير ذنب دى اشوف اللى محتاج اى حاجه اقدر اعملهاله
امين / انت منصاب يا كبير
ناصر / انا كويس الحمد لله
ناصر يخرج من الاوضه و امين وراه الناس ماليه المستشفي و قاعدين على الارض فى الطرقه و على كراسي و الممرضين و الدكاتره بيحاولوا يعالجوهم ناصر يبص عليهم و الحزن مالى وشه
…………………..
على مدخل البلد
مختار يوصل بالعربيتين البوليس يوقفهم مختار يطلع بطاقته هو و الرجاله
مختار / مختار الزيني
عسكرى / هنفتش العربيه
الرجاله تبص لبعض و تنزل زياد يروح يبص مختار بيبص حواليه على منظر الرصاص اللى مرشق فى البيوت
العسكرى يدى لزياد البطايق
زياد / عديهم
زياد يروح ناحيه مختار
زياد / مختار الزيني مش كدا ؟
مختار يتعدله و يهز راسه
زياد / زياد نصر الله
عباده / الباشا الجديد … نورت … لا مؤاخذه عباده الزيني
زياد / اهلا و سهلا … اتحركت اسرع مننا و دلوقت الصحافه و التليفزيون مش هيبقالهم سيره غير اللى حصل فى البلد
مختار / و احنا بقي هنفضل دافنين راسنا فى الرمل و نعمل اللى هى عوزاه
زياد / الحقيقه لا احنا هنفاجئها برد فعل تانى خالص
مختار و عباده يبصوا لبعض و يبصوا لزياد
………………………
فى سرايا الجوارحه
ام مغاورى / جيب العواقب سليمه يارب … استرها علينا دا احنا غلابه يا رب
كوثر / هتفضلى تولولى لحد امتى قومى نروحلهم
ام مغاورى / نروح فين المستشفى ما فيهاش مكان نخطى فيه و جودنا هيزحم الدنيا و يعطلهم
كوثر / عوزه الناس تاكل وشنا و لا ايه هتلاقى ام فاتن و ام عباده واقفين فوق روس الناس هناك
ام مغاورى / عاوزه تروحى روحى انا فيا اللى مكفيني دا انتى و لا زن العيال
كوثر / انا ولا زن العيال
ماجده تنزل تجرى من فوق
ماجده / اما عمتى اللحقوا اللحقوا
ام مغاورى تقوم تقف
ام مغاورى / في ايه يا ماجده خير حد من اخواتك جراله حاجه
ماجده / لا استنى
ماجده تفتح التليفزيون و تقلب بالريمود
ماجده / كلمونى و قالولى التليفزيون بيتكلم عننا
كوثر / عننا احنا ؟ خيبه تحط عليهم ما يسيبونا فى حالنا
ماجده / القناه اهى اقعدوا اقعدوا
المذيعه / ايوه يا فندم بس الكلام ده خطير جدا و مرعب
صوت راجل / الحقيقه احنا شغالين على القضيه دى بقالنا شهور و فعلا قدرنا نقبض على كميه كبيره من الحبوب دى قبل نزولها فى الاسواق و اعدامها و القبض على مجموعه من الموزعين و جارى التحقيق معاهم
المذيعه / معلش اعذرنى بس انا بحاول افهم ايه علاقه الحبوب اللى حضرتك اتكلمت عليها بالحدث الارهابى اللى حصل النهرده
صوت الراجل / العلاقه وثيقه جدا ان كل العناصر اللى تمت تصفيتها النهرده … فى العمل ده كانت كلها بتنتمى للمنظمه المسؤله عن تصنيع و توزيع النوعيه دى من الحبوب و لما …. لاحظوا …اننا ضيقنا عليهم الخناق قاموا بعمليه اللهاء و زى ما حضرتك شوفتى فى الصور اللى عمل كدا كان بيحاول يبين ان فى فتنه طائفيه و مع كدا فجر القسم مع ان حضرتك القسم ما لوش اى دخل بالاديان سواء الدين الاسلامى او الدين المسيحى لا هو مسجد و لا كنيسه يعنى
المذيعه / الف شكر معالى مساعد وزير الداخليه على وقت حضرتك و توضيحك للحقيقه
الراجل / الحقيقه انا بعد اذن حضرتك يعنى
المذيعه / اتفضل حضرتك
الراجل / الحبوب دى للاسف بتتباع على انها منشطات جنسيه او مسكنات للالام لكن للاسف اعراضها الجانبيه خطيره جدا و…و… قاتله… الحقيقه الموضوع خطورته تكمن ان الادمان بيبدا من حبايه واحده و الموضوع بدا ان الحبوب دى نزلت الاسواق باسعار بسيطه للفئات الاكثر فقرا و … الاكثر جهلا ..مناطق العشوائيات مناطق العماله الناس اللى بتحتاج صحتها عشان تشتغل فللاسف دول كانوا اول ناس يقعوا ضحايا للفخ بتاع المجرمين دول … للاسف النوعيه دى من التنظيمات مش بتستهدف الناس المدمنين على الحبوب المخدره و حبوب الكمياء المعروفه من مهلوسات و مهدئات او منشطات الناس دى استهدفوا النوعيه العامله البسيطه و دى اشد خطرا و فتكا بالمجتمع لانك بتقتل عجله الانتاج و بتعوقها لانك بمجرد ما بتتعاطاها بتفقد الاحساس بكل شئ فى الحياه و تتحول لما يشبه الزومبى كانك … بمعنى انسان عايش و لكن مش بس فاقد للالم لا دا فاقد للحياه بكل معانيها و احاسيسها و … انا بعد اذنك لازم انوه ان بمجرد ما تاثير النوع ده من الحبوب بيروح بيبدا مباشره اعراض انسحابيه قاتله للاسف مش كل الناس قدرت تنجوا منها خصوصا انها سريعه و مش بتم تحت اشراف طبى
المذيعه / انا مش عاوزه ادخل فى تفاصيل علميه لكن لو حضرتك تقدر تفيدنا بمواصفات و اعراض و اى معلومات عن الحبوب دى ازاى الناس تعرف هى بتتعاطى ايه او شكلها ايه
الراجل / الحبوب لونها ابيض متوسطه الحجم محفور عليها حروف البى كاى اسم الدوا بتتواجد فى شرايط او علب او حتى سايبه فى اكياس
المذيعه / على قد ما الموضوع خطير بس ياريت حضرتك تطمن المواطنين عن ايه الدور اللى هتقوم بيه الحكومه او الخطوات اللى هتتبعها لمواجهه التنظيم اللى حضرتك اتكلمت عنه فى بدايه المداخله
الراجل / احنا جهزنا صفحه على الفايس بوك عليها مجموعه من الارقام الساخنه سواء للتبليغ عن اى معلومه عن اماكن بيع هذه الحبوب او الابلاغ عن اى معلومه عن اى شخص سواء متعاطى او بيتاجر فيها باى شكل من الاشكال و كمان هتلاقوا عليها صور و فيديوهات جارى رفعها لناس تعاطوا الحبوب دى و ازاى اثرت عليهم صور للحبوب و اشكالها اشكال العلب دى فى كمان ارقام ساخنه تانيه لاى حد متعاطى بيتم التعامل معاه فى مستشفيات تم تخصيصها لمتابعه و علاج هذا النوع من الادمان الخطير
المذيعه/ بعتزر جدا لمقاطعه حضرتك بس اللى فهمته من كلام حضرتك ان لحد اللحظه دى ما فيش علاج للموضوع و لا انا فهمت غلط
الراجل / مفيش علاج نهائى و لكن فى بروتوكولات متبعه بدون الدخول فى تفاصيل لانها مش تخصصى و لكن اللى اعرفه انها بتفرق من حاله للتانيه و مده التعاطى و الجرعات و شده الاعراض الجانبيه و طبعا قوه التحمل و الاستجابه للعلاج كل دى بتفرق و ان شاء الله ربنا حامى مصر و شعبها و ان شاء الله نخرج من الازمه دى على خير
المذيعه / باذن الله طبعا و عارفه اننا اخدنا من وقت حضرتك كتير جدا بس اسمحلى اسال حضرتك سؤال اخير
الراجل / اتفضلى طبعا تحت امرك
المذيعه / هل منظمه الصحه العالميه و المنظمات العالميه و الجهات الدوليه باشكالها ليها دور فى حل هذه المشكله و لا الموضوع ده مقتصر فقط فى مصر
الراجل / الحقيقه احنا فعلا تواصلنا مع اكتر من جهه و لكن لحد دلوقت ما فيش معلومات مؤكده على وجود هذه النوعيه من الادويه او عدمها و لكن فى تعاون دولى للوصول لعلاج ليها و دراستها و كمان فى تعاون دولى للقبض على عناصر التنظيم و القضاء عليه من المنبع
المذيعه / بالتوفيق ان شاء الله ظهر دلوقت على الشاشه صفحه الفايسبوك و ارقام التبليغ و بشكر حضرتك انك خصيتنا بالمداخله الحصريه و المعلومات الخطيره دى
الراجل / لا ابدا دا دورنا
المذيعه / ظهر دلوقت على الشاشه صور للحبوب حصريا معانا من الصفحه الرسميه و هنحاول نوصل عفوا نتواصل مع اى حد من وزاره الصحه لمعرفه معلومات اكتر عن اساليب العلاج المتبعه و اعراض الانسحاب و نحاول بشكل او باخر نطمن الناس هنطلع فاصل قصير ابقوا معنى
ماجده تقفل التليفزيون
كوثر / انتوا عارفين دا معناه ايه
ماجده / والله كنت عماله اسال نفسى هى الحكومه هتعمل ودن من طين و ودن من عجين لحد امتى فى الموضوع ده
ام مغاورى / سعاده المحافظ لما كان هنا اتكلم كتير مع ابوكى و طلع من عندنا على مصر و اتكلم مع معالى الوزير و كانوا ناويين يتحركوا بس شكلها عرفت و قالت تتغدى بيهم قبل ما يتعشوا بيها
كوثر / اديهم ضربوها فى مقتل بنت الحربايه تورينا هتبيع الحبوب ازاى بنت الوارمه
ست / بس الراجل ده كداب كلنا عارفين ان لا فى علاج و لا نيله هياخدوا الناس يحبسوهم فى المستشفيات لحد ما يفرفروا دا ان لقوا مكان يساعى كل الناس دى من اساسه
كوثر / ما يمكن لقيو علاج اش فهمك انتى
الست / امال مين يفهم لو ما فهمناش احنا يا ام عباس دا احنا اللى طافحينه من شهور
كوثر / بقولكوا ايه انا رايحه اطمن على الناس اللى انصابت و اعزى اهالى الناس اللى ماتوا مش هستنى اما الزنايته يسبقونا زى كل مره يلا فتكوا بعافيه
ام مغاورى / ما تسمعى الكلام يا ام عباس و تريحي نفسك و تريحينا
كوثر / خليكي فى حالك يا اختى انا خلاص نويت و خارجه تيجوا معايا و لا متجوش بكيفكوا يلا فتكوا بعافيه سلام
كوثر تمشى
ام مغاورى / ربنا يهدى
ماجده / بس انا كمان معاكى يا اما مفيش علاج الناس دى هتتلم و يحطوهم فين
ام مغاورى / يا بنتى يا عالم مش يمكن ربنا يجعل فى ايديهم الشفا و يلاقوا علاج احنا برده مش شويه
ماجده / ربنا يجيب العواقب سليمه انا من الصبح قلبى مقبوض قوى و مش مرتاحه
ام مغاورى / و هو اللى حصل النهرده ده شويه انا هقوم ابص على الاكل لحسن القاعده دى هتجيب اجلى
ام مغاورى تقوم
ماجده / بعد الشر
ام مغاورى تمشى و ماجده تقعد تشغل التليفزيون و تتنهد
……………………….
فى المستشفى
ست بتتخانق مع الاستقبال
الست/ يعنى انا اروح اكلم مين دلوقت البت فوق الساعتين فى العمليات يا ناس
البنت / لو سمحتى يا امى اهدى ان شاء الله خير اول ما تطلع من العمليات الدكتور هيطمنك ان شاء الله
الست / لا اله الا الله ما انتى بقالك فوق الساعتين بتقولى نفس الكلام
دكتور يعدى
البنت / دكتور شكرى دكتور شكرى
الدكتور يبص الست تجرى عليه
الست / ابوس ايدك يا سى الدكتور البت اللى حلتى جت هنا و بقالها فوق الساعتين كل ما اسال يقولولى فى العمليات
شكرى / اهدى يا امى حضرتك شايفه الدنيا و الناس هنا بيعملوا اللى عليهم و ان شاء الله خير
مختار و الرجاله يدخلوا
الست / يعنى هى الحاله خطيره اوى للدرجادى دى امانه فى رقابتى
تليفون الاستقبال يرن البنت ترد
البنت / دكتور شكرى
شكرى يبص
البنت / الحاله اتوفت
البنت تبص على الست عبد المجيد يجرى على الست
عبد المجيد / انتى بتعملى ايه هنا يا اما
مختار ياخد الدكتور فى جنب و يتكلم معاه
الست / عبد المجيد اللحقنى يا عبد المجيد البت هتروح مننا يا عبد المجيد
عبد المجيد / بت مين سنيه ؟
الست / بعتها تجيب الجمعيه من ام فرحات طلعوا عليها ولاد الحرام فى الطريق كلمونى و قالولى انها هنا بس من ساعه ما جيت ما حدش راضى يطمنى عليها
مختار يدخل
مختار / ازيك يا امى
الست / سى مختار ابوس ايدك يا سى مختار خليهم يطمنونى على البت اللى حلتنا دى امانه ابوس ايدك انت ليك خاطر عندهم و هيعملولك حساب انا حسى اتنبح من صباحيه ربنا ما حدش معبرنى يا ناس ارحمونى دا انا قد امكوا
مختار / اهدى يا امى خدها يا عبد المجيد الكافتريا فوق تشرب شويه ميه و لا اى حاجه و انا خمس دقايق
الست / انا مش هتحرك من هنا اشوف البت و بعد كدا ان شاء الله تولعوا فيا حتى بس اطمن على البت دا انا اللى بعتها بايدي ياريتنى كنت انا اللى روحت
مختار / تعالى يا امى تعالى معايا
الست تروح مع مختار يقعدها على كرسى و عباده و التانين يتلموا مختار ينزل على ركبته
مختار / حقك عليا يا امى حقك عليا
الست / حقى عليك فى ايه يا ابنى انت بس لو كلمتهم
مختار / كلمتهم يا امى كلمتهم
عبد المجيد / اهو شوفتى انتى بس لو
مختار / اسكت يا عبد المجيد … امى انتى ست مؤمنه بالله صح
الست / الحمد لله ايه السؤال ده
مختار / اممم انا اتكلمت مع الدكتور من ثوانى و قالى
مختار يبص لعبد المجيد
الست / قالك ايه يا ابنى ما توقعش قلبى ابوس ايدك انا قد امك مش حمل خضه
مختار / حقك عليا يا امى
مختار يقوم و يمشى و الكل بيبص لبعضه
عبد المجيد / هو فى ايه ؟ هو راح فين ؟ طب طب
عباده يخبط على كتف عبد المجيد
عبد المجيد / هو فى ايه يا سى عباده
عباده / البقاء لله يا عبد المجيد
الست تعيط و تخبط على رجليها
عبد المجيد / لا يا سى عباده لا الدنيا زحمه و الناس كتير و اكيد هما بيتكلموا عن حد تانى
عبد المجيد ينزل على ركبه قدام امه و يمسك ايديها
عبد المجيد / سنيه كويسه يا اما سنيه كويسه هم بس متلخبطين سنيه كويسه
خليل يقومه
خليل / عبد المجيد
عبد المجيد / عبد المجيد ايه ؟ اوعى كدا اوعى يا عم
عباده / اهدى يا عبد المجيد وحد ربنا انت راجل مؤمن
عبد المجيد / لا اله الا الله تمام يا سى عباده تمام بالاذن انا
عبد المجيد يمشى
عباده / وراه يا خليل لحسن دا مجنون ما يتسابش لوحده ده
خليل يجرى ورا عبد المجيد و عباده يقعد على ركبته قدام الست
عباده / قسما بالله حقها راجع
الست / تسلم يا ابنى تسلم و تعيش
الست تمسح دموعها و تبص لفوق و تغمض عنيها عباده يبص فى الارض و يقوم و يمشى
………………..
قدام اوضه الاشعه
مغاورى مسندينه يقعد على كرسى ناصر يدخل
ناصر / سلامتك يا مغاورى
مغاورى يحاول يقوم ناصر يمنعه
ناصر / ارتاح … عامل ايه دلوقت
مغاورى / كويس الحمد لله ياما دقت على الراس طبول سلامه كتفك
ناصر / دى اقل حاجه دى
مغاورى / سمعت … سمعت … و سمعت كمان على هفه الحكومه
ناصر / احسن خليها تتلفت حواليها
مغاورى / ما احنا اتكتفنا برده يا كبير و التار تقل … الكفه ما اتعودتش تشيل دم حريم و عيال يا سيد الناس
ناصر / و انت مين قالك الكلام ده احنا بس نخرج من المستشفى و نطمن على اهلنا و نكرم امواتنا و تانى يوم هنطلع نجيب عليها واطيها و فى حما الحكومه كمان
مغاورى / و دا من امتى الكلام ده
ناصر / بكره تشوف … هقوم اطمن على ابوك قالولى قاعد قدام الرعايه مستنى حد يطمنه على عباس
ناصر يقف
مغاورى / ابقى طمنى بالله عليك ما حدش مرسيني على حوار انا راخر شكلها كبيره المرادى و الا كانوا طمنونا الرصاص ما قتلوش تقوم حته حيطه
ناصر / ما تكملش ما تفولش عليه ان شاء الله يقوم بالسلامه … ادعيله … احنا ما فيش فى ايدينا غير الدعا ان كان ليه و لا لغيره ادعيله
ناصر يمشى و مغاورى يبص فى الارض
………………….
فى فيلا فيرا
فيرا ممدده على الكنبه و حاطه رجل على رجل و بتبرد ضوافيرها و جنبها الموبايل الاسبيكر مفتوح و رشيد بيزعق
رشيد / ما لو ناويه تلبسينا كلنا البدله الحمره قوليلى عشان اعمل حسابى من اولها
فيرا / انت مكبر الموضوع ليه
رشيد / يعنى تبعتى جيش و تفتحى النار فى الستات و العيال و تقولى مكبر الموضوع انتى ايه يا شيخه شيطانه
فيرا / هم الستات و العيال دول كانوا من باقى عيلتك زعلان عليهم اوى كدا ليه هى اول مره تشوف ناس بتموت في ايه يا رشيد مالك
رشيد / فى ان رشيد مش شخشيخه معاكى عشان تستنى اما امشى و تتصرفى على هواكى
فيرا / هههههههههههههههه لا سورى تانى كدا … اولا احب اوضحلك حاجه واضح انها تاهت عنك مش عارفه بقى دا عشان انا بحبك و لا عشان … اى كان السبب رشيد يا حبيبى انا مش باخد اذنك و لا بشورك فى شغلى اللى بيني و بينك بيزنس بتاخد منى عليه فلوس و شغلى انا ادرى بيه
رشيد / لا واضح اوى انك ادرى بيه الكل عرف عن الحبوب و ابقى قابليني لو قدرتى تبيعي حبايه واحده فى السوق بعد كدا هيخلوكى تغنى ظلموه
فيرا / مش حفظاها الاغنيه دى بقولك ايه انت ناوى ترجع امتى
رشيد / ارجع ايه هو انا عبيط بكره تلاقى الحكومه مطربقه الدنيا فوق دماغك
فيرا / و هتبيع سمر يا خاين اخص عليك كدا تخيب املى فيك هههههههههههههههههههههههه
رشيد / لا و انتى الصادقه النهرده فى عربيه بسواقها هتيجي الفيلا عندك سمر تركب فيها لحد ما نشوف هترسى على ايه
فيرا / تمام يا رشيد اللى يريحك و عشان تعرف انى بحبك و باقيه على ذكرياتنا الحلوه سوا هبعتلك مخزون حبوب يكفيها لحد ما تتاكد ان الدنيا هنا امان و ترجعلى برجليك تمام يا قلبى
رشيد / ربنا يستر بقى يلا سلام
فيرا / سلام
فيرا تمد ايدها تجيب الموبايل و تقفل المكالمه الباب يتفتح و ادواردوا يدخل شيل بوكس يروح يحطه على المكتب فير تقوم تقف و تروح تفتحه و تبص فيه و تبتسم
فيرا / جست ان تايم ( فى الوقت المناسب )
ادواردوا / ذا بوليس فورسيز ويل اتاك اس انى تايم ( قوات الشرطه هتهجم علينا فى اى وقت )
فيرا / اى هوب وي ويل بى ريدى اون تايم ( اتمنى نبقى جاهزين فى الوقت المناسب )
فيرا و ادواردوا يضحكوا بصوت عالى فيرا تسيب المكان و تمشى
……………………….
قدام العنايه
شاهين قاعد و ناصر قاعد جنبه كوثر تدخل بتجرى ناصر يغمز شاهين بكوعه شاهين يقوملها
كوثر / ايه اللى سمعته تحت ده ؟ ماله عباس ؟
شاهين / ان شاء الله خير هو بس
كوثر / فين الدكتور اللى هنا عاوزه ادخل اطمن على ابنى
شاهين / اهدى يا كوثر ان شاء الله خير
كوثر / و هيجي منين الخير طول ما انت ماشي وراهم
كوثر تشاور على ناصر ناصر يبص فى الارض
شاهين/ عيب الكلام ده يا ام عباس انا لولا مقدر صدمتك كنت والله العظيم
كوثر / ان كنت نسيت انا ما نسيتش ان كانت نارك برددت انا نارى بتولع فيا كل ليله و لا ايه يا كبير الزنايته
شاهين/ لا اله الا الله ما توحدى الله يا ام عباس بقي و خلى اليوم يعدى مش وقته اللى بتعمليه ده
كوثر / و لا عمره هيجي وقته طول ما الميت من عندنا عمره ما هيجي وقته لو كان مختار و لا سي عباده اللى راقدين جوه كانوا اكلوا ولاد الكلب دول بسنانهم انما احنا دمنا عندك رخيص
شاهين يشد كوثر من ايدها و هى بتقاومه و تصرخ
كوثر / سبنى سبنى اوعى
شاهين يمسكها جامد كوثر تقع فى الارض
كوثر / والله ما هسامحهم لو جراله حاجه ما هسامحهم
شاهين يحضن اخته و يطبطب عليها
شاهين / ان شاء الله هيقوم بالسلامه دا ابنى زى ما اهو ابنك
كوثر تعيط و شاهين يبص لناصر ناصر يسيب المكان و يمشي
…………………….
قدام المستشفي
عبد المجيد قاعد فى جنب بيعيط و خليل واقف بيراقبه من بعيد مختار يدخل
مختار /عامل ايه دلوقت
خليل / على حطه ايدك قاعد و كل ما اجى ناحيته يصرخ فيا و يقول سيبنى فى حالى
مختار / و امه حالتها مش احسن منه جوه
خليل / والله يا سي مختار الناس كلها حالتها تقطع القلب الخساير ما كانتش شويه سمعت ان فى عيله صغيره بنت خمس سنين ماتت من شويه جوه و ابوها ما رضيتش يشرحوها و عمال يتخانق عشان يدفنها
مختار/ اه عباده و امين جوه بيشوفوا الموضوع ده روح انت اقعد ارتاح و كلك لقمه و انا هقعد معاه
خليل / و مين ليه نفس ياكل فى الحاله دى بس
مختار / روح عندنا السرايا و هات اكل كتير و اكل الناس دى و خصوصا العيال الصغيره الناس ما فيهاش دماغ تفكر فيهم و لا فى روحهم
خليل / اعتبره حصل يا سي مختار
خليل يمشي و مختار يروح يقعد جنب عبد المجيد
……………
فى سرايا الجوارحه
ماجده بتتكلم فى التليفون و هى بتعيط
ماجده / انتى بتقولى ايه يا عمتى امتى دا حصل
كوثر / والله لولا شوفته بعيني ما كنت صدقت
ماجده / طب طمنيني عليه لحد ما اجى
كوثر / حاطينه على الاجهزه و مانعين عنه الزياره خلونى ابص عليه من بعيد لا قدرت احضنه و لا اشبع منه
ماجده / انا جايه مسافه السكه و جايه
ماجده تحط الطرحه على دماغها و تطلع الجنينه يقابلها اتنين رجاله
ماجده / عاوزه عربيه توصلنى المستشفي حالا
راجل ١ / كل العربيات طلعت يا ست الكل خمس دقايق بس نكلم حد يرجعلك
ماجده / و لا ثانيه واحده وقفلى اى عربيه من الطريق ان شالله كارو ولا حتى حماره عارجه اقولك انا هاخدها كعابى افتح البوابه دى
راجل ٢ / يا ست الكل البلد مقلوبه بره احنا خايفين عليكي
ماجده / يبقي تبعتوا معايا حد اخويا و جوزى فى المستشفي عاوزينى اقعد هنا اعمل ايه
الرجاله تبص لبعض
راجل ٢ / على عيني يا ست الكل انا هوصلك بنفسي اتفضلي افتح البوابه يا عارف
عارف يفتح البواب و ماجده و الراجل يمشوا بره
………………………
قدام المستشفى
مختار قاعد جنب عبد المجيد فى صمت
مختار / احم احم
عبد المجيد مفيش رد فعل
مختار / فى حاجات الكلام فيها زى قلته … لا هيرجع اللى راح و لا هيخفف الوجع
عبد المجيد / وجعنا احنا ما فيش حاجه هتداويه بس نقدر نريحهم فى تربتهم لما نجيب حقهم
مختار / هنجيبه لو اخر حاجه نعملها هنجيبه لو هنموت و احنا بنجيبه هنجيبه يا عبد المجيد
عبد المجيد / تعرف يا سى مختار ايه اللى مهون على الواحد
مختار / انها شهيده فى الاخره
عبد المجيد / لا دى حاجه تانيه … زمان و احنا صغيرين كنا لما نفتح كيس من بتوع الشيبسى و الحاجات الحلوه اللى فيها هدايا دى كانت دايما تكسب … كانت دايما تقول انها مرزقه و رزقها واسع … حتى امى لما كانت بتطفش فى عرسانها ما كانش عشان تجوزها لواحد زيي …لا … كان عشان تاخد حاجه نضيفه بصحيح فى الجنه
مختار / ربنا يرحمها و يصبركوا
عبد المجيد / كنت بسال نفسى لو وقفت قدام الوليه بنت السو دى هعمل ايه دا انا عمرى ما رفعت ايدى على حرمه
مختار / العين بالعين و البادى اظلم
عبد المجيد / لا يا سى مختار لا لا لا الموت للى زى دى لا … طب انا قتلتها طب و الباقين هياخدوا تارهم من مين هنتخانق مين فينا يقتلها يعنى و لا ايه اللى زى دى ما ينفعش تموت نارنا مش هتبرد و هى هترتاح
مختار / هترتاح ايه يا عبد المجيد اللى زى دى عمرها ما هترتاح ابدا لا دنيا و لا اخره ان شاء الله و اى كان العزاب اللى هتشوفه على ايدينا مهما كان مش هيجي حاجه جنب عذاب و عقاب ربنا
عبد المجيد / صح .. والله كلامك صح … بس دا كلام عقل كلام ناس عاقله بس لا انا و لا اى حد من الناس دى لسه فينا عقل يا سى مختار .. طب تصدق و تؤمن بايه
مختار / لا اله الا الله
عبد المجيد / كانت عارفه انى خارج اشوف عروسه غيرها و عارفه ان امى مش راضيه تجوزها غيرى و كانت واقفه و انا ماشى تدعيلى ربنا يسهل طريقى و يرجعنى بالسلامه … قال و انا اللى بتران عليها يا سى مختار
مختار / اهو ربنا استجاب لدعاها و رجعنا يا عبد المجيد
عبد المجيد / رجعت لمين ؟؟ رجعت ادفنها !!! طب يا ريتنى ما رجعت ياريتهم كانوا طلعوا علينا احنا فى الطريق و قتلونى انا و سابوهم
مختار / من كام يوم قدام القسم كلمتنى قالتلى هبكيك على حبايبك واحد ورا التانى
عبد المجيد يبصله
مختار / قالتلى هسيبك عايش و اشوف هتستحمل لحد فين
عبد المجيد / و سكتلها يا سى مختار
مختار / لا ما سكتش بس اخد الحق صنعه يا عبد المجيد
عبد المجيد / و لكم فى القصاص حياه يا سى مختار
مختار / هيحصل يا عبد المجيد و الله العظيم ليحصل بس ما يحصلش على حسابكوا ما اطلعش و اشوفكوا بتقعوا حواليا واحد ورا التانى اطلع بيكوا و ارجع بيكوا زى كل مره طلعنا سوا
عبد المجيد / و انا معاك يا سى مختار و ان ما رجعتش اهون عليا من انى افضل هنا و اعيش اموت راجل رافع راسى و لا ان ايد تتمد على واحده من حريمنا و لا ان شوارعنا تتغسل بدم العيال نموت رجاله يا سى مختار و لا نعيشى بطرح
مختار يبص فى الارض عبد المجيد يبص الناحيه التانيه
………………………
فى المستشفى
قدام العنايه دكتور يطلع من جوه الكل يقف الدكتور يبص عليهم و الكل مستنى كلمه من الدكتور
الدكتور / احنا عملنا كل اللى نقدر عليه
ماجده داخله بتجرى
الدكتور / البقاء لله
كوثر تصرخ شاهين يمسكها و يحاول يسكتها مغاورى يبص على ماجده واقف بعيد و مصدومه
كوثر / قتلتوه قتلتوا ابنى زى ما قتلتوا ابوه يا ولاد الكلب
شاهين / اسكتى و وحدى الله مش كدا
كوثر / هيدفنونا واحد ورا التانى لما نخلص خليك ماشى وراهم خليهم ينفعوك بكره يقتلوك زى ما قتلوا جوزى و ابنى
مغاورى / عمتى
كوثر / حسبى الله و نعم الوكيل فيكوا كلكوا حسبى الله و نعم الوكيل
ماجده تقرب بالراحه
كوثر / قتلوا جوزك و يتموا عيالك يا ماجده ابوكى هيضيع حق جوزك زى ما ضيع حق جوزى يا ماجده
شاهين / اسكتى بقى اسكتى
كوثر / كفايا انت ساكت يا خويا كفايا انت ساكت يا كبير الجوارحه
ماجده / مغاورى
مغاورى يبص لماجده بحزن تتكلم بضعف
ماجده / عباس كلمنى و قالى انه معاك فى القسم كلمنى و هو داخلك عباس كان معاك يا مغاورى
مغاورى / وحدى الله يا ماجده
ماجده / كان لسه مكلمنى كان لسه مكلمنى يا مغاورى
مغاورى / قسما بالله لجيب حقه
ماجده / لا لا لا انا مش عاوزه حقه انا عاوزه جوزى انا مش عاوزه حقه يا مغاورى
شاهين / اهدى يا ماجده اهدى يا ضنايا انتى موحده بالله و مؤمنه
ماجده / طب ما قولتليش ليه خبيت عنى ليه كنت شوفته كنت مليت عينى منه للدرجادى يابا مليش قيمه و لا خاطر عندك
شاهين / كنت خايف عليكي البلد كانت والعه
كوثر تصرخ فى ناصر
كوثر / قولتوا هتامنوا البلد يا ناصر قولنا ماشى قولتوا هتركبوا كاميرات فى كل حته يا ابن عمران قولنا ماشى امنت البلد يا ناصر امنت حريم و عيال البلد يا كبير البلد
شاهين / كفايا يا ام عباس بقى الله الميت ليه حرمه ما يصحش كدا
كوثر / حسبى الله و نعم الوكيل حسبى الله و نعم الوكيل حقى عندك يارب حقى و حق ابنى حقك يارب حقى و حق ابنى حقك يا رب
ناصر يسيب المكان و يمشى
كوثر / مش مسمحاك مش مسمحاك يا ناصر يا ابن عمران مش مسمحاك و لا مسامحه ابوك مش مسامحه ابوك يا ابن الزنايته
مغاورى / وحدى الله يا عمتى
كوثر / اخوك مات يا مغاورى اخوك راح يا مغاورى قسما بالله كان بيحبك كان بيحبك و عمره ما حب حد قدك كل رجاله الدنيا فى كفه و انت عنده كنت فى كفه
مغاورى / ربنا وحده اللى يعلم كان غالى عندى قد ايه الله يرحمه
كوثر / لو بتحبه لو بجد بتحبه و بتحبنى ما تتجوزش البت دى ما تتجوزش اللى قتلوا اخوك يا ابنى ابوس ايدك ما تضيعش دم اخوك يا مغاورى
كوثر تعيط ماجده تاخدها فى حضنها
ماجده / حقك عليا يا عمتى اهدى اهدى عشان خاطر عباس اهدى
كوثر / الغالى راح يا ماجده الغالى اللى ما كانلناش غيره راح يا ماجده رملوكى و يتموا عيالك يا ماجده
شاهين / استغفر الله العظيم استغر الله العظيم
شاهين يسيبهم و يمشى و ماجده عينها معاه و هى بتعيط هى و كوثر و مغاورى واقف قدامهم بيعيط و هو باصص فى الارض
…………………………
فى سرايا الزنايته
ناصر يدخل بيقدم رجل و ياخر رجل انتصار تجرى عليه يشاورلها و يطلع على فوق و هو بيتسند على الترابزين يقابل هند نازله
هند / سلامتك
ناصر يهز راسه و يطلع على اوضته و هند متبعاه انتصار تطلع وراه هند تنزل تلاقى مختار داخل
هند / حمد الله على السلامه
مختار يبتسم باستهزاء و يدخل المكتب هند تدخل وراه
هند / سمعت ان الاخبار وحشه اوى
مختار / عندنا بكره اكبر جنازه عدت على البلد من يوم ما اتولدت … و اصعبها … احنا دفنا رجاله كتير اوى فى البلد دى … اول مره … اول مره
مختار يعيط هند تروح تحضنه
مختار / كل دول ذنبهم فى رقبتى … كل دول ماتوا بسببى
هند تمسك وش مختار بين ايديها
هند / فوقلى هنا و صحصح انت ما لكش ذنب فى اللى حصل انت ما لكش اى ذنب فى اللى حصل لو كان انك تعمل الصح ذنب لو كان انك ما تغلطش ذنب
مختار / انتى مش فاهمه حاجه
هند / ان كان فى حد هيجيب حق الناس دى هو انت و مش هتجيبه بالعياط انت ارجل من كدا
مختار / النار اللى جوايا
هند / هو ده اللى هى عوزاه عوزه تعذبك عاوزه الوجع يضعفك فا ما تعرفش تحاربها بس انت مش كدا انت ما مش بتاع مشاكل بس لما المشاكل بتجيلك يبقى هى اللى جابته لنفسه … هى اللى جابته لنفسها
مختار / هدفن كام واحد تانى يا هند كام واحد تانى هيموت بسببى … بلاش الرجاله كام حرمه و كام عيل دا فيهم بنت
هند / يموتوا
مختار يبصلها
هند / كلنا نموت كلنا … نموت يا مختار بس نموت بكرامتنا بشرفنا … ام فاتن حكتلى كل حاجه قالتلى بنت الكلب دى بتاجر فى ايه … كام واحد من اهل البلد ماتوا … كام بنت ماتت النهرده … فى قصادها كام بنت تانيه الست دى بتاجر فيها … و انت ساكت و عارف و مغمى عنيك
مختار يتعصب
مختار / عمره ما حصل انا ما بغميش عيني عن الغلط الست دى حاولت قبل كدا و انا سلمت كل البنات دول للحكومه و سلمت معاهم رجاله من اهلى عشان مفيش بنت تعمل حاجه غصب عنها
هند / و ما جابتش غيرهم؟ …الحبوب دى … تفتكر هتجبر كام بنت انها تبيع نفسها … لو هتلوم نفسك بجد يبقى تلوم نفسك انك لحد دلوقت ما قدرتش على الست دى
مختار يهز راسه لا و يسيب هند و هو مخنوق و بيفتح زراير قميصه و يروح يسند على المكتب
هند / انت اكتر واحد يقدر يحاربها … الحيوانه دى و اللى معاها لو ما سابوش البلد فى اسرع وقت مش هيبقى فى بلد من اصله يا مختار
مختار يبصلها
هند / هى مش بتقولك هتقتل كل اللى بتحبهم … يبقى خلاص دفاع عن النفس و عن الشرف و عن الارض كمان
مختار يبتسم بسخريه
مختار / انتى عارفه انتى بتطلبى منى ايه
هند / انا كنت معترضه ان جوزى يبقى تاجر سلاح عشان حرام بس مش معترضه و لا عمرى هعترض ان جوزى يحمينى و يحمى اهلى من واحده بتهدد حياتنا حتى لو ما قتلتناش يا مختار هنعيش ازاى فى بلد كل اللى فيها ميتين بالحياه و عبيد لحبايه
باب المكتب يخبط و يتفتح عباده يدخل راسه
عباده / زياد باشا فى المضيفه عاوز يتكلم معاك
مختار يغمض و ياخد نفس عميق و يفتح و يهز راسه
…………………………..
فى اوضه ناصر
ناصر يلبس جلبيه نضيفه و انتصار بتساعده
انتصار / تتقطع ايدهم اللى اتمدت عليك يا خويا سلامتك
ناصر يهز راسه و ينام فى السرير انتصار تغطيه و تروح تنام جنبه الناحيه التانيه
ناصر / اطفى النور عاوز انام
انتصار تطفى النور و تقعد ساكته جنبه تبص عليه ناصر يتقلب و ينام فى حضنها
انتصار / واعلم أن الأمة لو اجتمعت على أن ينفعوك بشئ لم ينفعوك إلا بشئ قد كتبه اللَّه لك ، ولو اجتمعوا على أن يضروك بشئ لم يضروك إِلا بشئ قد كتبه اللَّهُ عليك ، رفعت الأقلام وجفت الصحف
ناصر / صدق رسول الله صلى الله عليه وسلم
انتصار / كان فى ايدك ايه و ما عملتوش
ناصر / كتييير
انتصار / ازاى بس ما تحملش نفسك فوق طاقتها يا خويا
ناصر / لاول مره يا انتصار اطاطى راسي و اكسر عيني مش قادر ابص فى وشوش الخلق مش قادر ارد عليهم انا لما بقيت الكبير وعدتهم احميهم وعدتهم اشوف مصالحهم و اراعيهم يا انتصار
انتصار / و شوفت و بلدنا بقت احسن بلد و بكره ربنا يزيح عنا الغمه دى و نبقي زى الفل
ناصر يقوم يقعد
انتصار / هون على قلبك يا خويا
ناصر / السرير كأنه شوك بيغرز فى جسمي و صدرى مقفول و نفسي مكتوب
انتصار تقيد النور و تروح تقعد قدامه
ناصر / انا هطلع اشم هوا على السطوح الحيطان بتضغط عليا
انتصار / ارحم نفسك يا خويا ارحم نفسك ما ينفعش كدا
ناصر يقوم يلبس العبايه و يفتح الباب انتصار تحط الطرحه على راسها و تطلع وراه
…………………………
فى المضيفه
زياد قاعد مع عباده و مختار و امين و كذا شاب
عباده/ يا زياد باشا كلامك على عينا و راسنا بس منين عاوزنا نساعدك و منين نبقي بعيد عن الصوره
زياد / جرا ايه يا عباده بيه حضرتك انا صحيح جديد عن البلد بس كان قدامى الملف بتاع البلد كامل قبل ما اجى هنا
مختار / و المطلوب مننا عشان زى ما سعادتك شايف احنا خلصانين و مش قادرين لكتر كلام و مقاوحه
زياد / انا عارف انكوا ما بتثقوش فيا بس انا بثق فيكوا و عشان اثبت اننا فى صف واحد دى فلاشه عليها كل المعلومات اللى قدرنا نوصلها عن فيرا و اللى معاها
زياد يطلع فلاشه من جيبه يحطها على ترابيزه
زياد / دا كل اللى عندى و زى ما انا اديتكوا كل المعلومات اللى عندى اتمنى تتعاونوا معايا و تدونى اى معلومه عندكوا اى حاجه ممكن تغير مسار القضيه دى
مختار / بس إحنا ما عندناش اكتر من اللى عندك
زياد / اللى حصل النهرده ممكن يتكرر فى اى وقت
مختار / ما افتكرش
زياد / افندم
مختار/ اللى حصل النهرده مش هيتكرر تانى و اوعد سيادتك بده
زياد / و يا ترى ممكن اعرف الثقه دى سببها ايه
عباده / عشان احنا هنامن البلد كويس
تليفون مختار يرن
مختار/ لا مؤاخذه يا باشا لازم ارد
زياد / اتفضل
مختار يطلع بره المضيفه و يرد
مختار / السلام عليكم
هشام / و عليكم السلام ايه اللى بيحصل عندكوا دا يا ابنى التليفزيون مقلوب
مختار / الحمد لله .. طمنى عليكوا عاملين ايه و ماجد عامل ايه
هشام / معاك اهو
ماجد / انت كويس يا ابنى
مختار / الحمد لله طمنى عليك
ماجد / يا عم طمنى انت عليك انا مش قادر امسك اعصابى من ساعه ما سمعت
مختار / انا بخير اللى حصل حصل وانا فى الطريق جايلك بس لما عرفت رجعت
ماجد / ما لازم ترجع طبعا حد من عندكوا جراله حاجه
مختار / كلنا بخير الحمد لله
ماجد / الحمد لله
مختار / كويس انى اطمنت عليكوا هكلمكوا بعدين عشان الدنيا هنا
ماجد / طبعا طبعا ربنا يعينكوا تمام سلام
مختار / فى حفظ الله
مختار يقفل يبص يلاقي زياد خارج من المضيفه
زياد/ فكروا فى كلامى كويس
امين / يا باشا احنا خدامين الحكومه و لو نعرف حاجه تانيه كنا قولناها
زياد يهز راسه و يمشي امين يبص لعباده
امين / انا مش فاهمك بصراحه انت عارف ان الباشا كلامه صح و انه لو
عباده / بعدين نتكلم على رواقه … المهم … بقولك يا مختار
مختار يبصله
عباده / عندى ليك حوار ابن لذينه لو اتنفذ صح هيبرد نارنا كلنا
امين / حوار ايه ده
عباده / مش لما نشوف سى مختار جاهز و لا ايه
مختار / جاهز و لو ناوى تسبق الباشا و نحط عليها
عباده / لا لا لا مفيش الكلام ده هى مش هبله و اكيد هتبقي مامنه روحها كويس
امين / صح و اكيد لو عملنا كدا هنقع جامد مع الحكومه
مختار / ما يهمنيش لو هيعدومونى حتى
عباده / اهدوا يا رجاله الحوار اللي فى دماغة ابسط من كدا بكتير و نتيجته باذنك يا رب مضمونه
مختار وامين يبصوا لبعض و يبصوا لعباده واقف مبتسم
…………………….
فى اوضه كوثر
ماجده داخله بطبق فيه اكل
كوثر / كلمتى اختك
ماجده / لا
كوثر/ ليه خايفه على زعلها
ماجده / مش وقته يا عمتى البت حامل
كوثر / واحده غيرها كانت جت جرى انما نقول ايه هو الميت كان يخصها و لا حتى يقربلها
ماجده/ ما تقوليش كدا يا عمتى انتى عارفه غلاوه عباس عند خديجه
كوثر / يا صغير على الهم يا ابنى ياللى لا كانلك حبيب و لا صاحب يا ضنايا
ماجده / ما تعمليش فى نفسك كدا … خدى كليلك لقمه عشان تاخدى دواكى
كوثر / و مين له نفس
ماجده / مش بالنفس يا عمتى .. لو على النفس فحتى الهوا اللى بنتفسه تقيل و يكتم النفس بس لازم طول ما فينا روح
كوثر / ما راحت روحى راحت وياه قلبي راح وياه عيني و كبدى راحوا وياه
ماجده / عشان خاطر عياله عشان خاطرى و خاطر عياله عشان خاطرى يا عمتى
خديجه تدخل بتجرى و تقف على الباب
كوثر / ما بدرى يا بنت الزنايته
خديجه تبص لماجده ماجده تبص فى الارض خديجه تبص لكوثر و تسكت
……………………
فى سرايا الزنايته
مختار / انت مجنون عارف كدا و لا لا
عباده / ما لهاش حل تانى
امين / بس حتى لو عملت اللى فى دماغك مهى برده هتبعت كلابها و هتفضل راس الحيه فى خنها
مختار / هى مش هبله عشان تعمل كدا
عباده / تمام دورنا بقي اننا نقعد و نفكر فى كل الحاجات اللى ممكن تعملها
امين / ما تاخذنيش بس لحد اللحظه دى الوليه دى ما عملتش حاجه واحده زى ما فكرنا دايما بتفكر بره الصندوق و سبقانا تلت اربع خطوات
عباده / المرادى مش كدا هى مستنيانا نهجم و احنا مش هنعمل كدا
مختار/ نهجم ازاى و الحكومه دى كلها هنا هى عارفه ان الحكومه هتامنها مننا
عباده / و عارفه كمان ان الحكومه هتهجم عليها
امين / و لا ما كانوش فجروا القسم
مختار / بس زى ما قال الظابط الدنيا مش بالبساطة دى مامنه نفسها بحصانه الكلب بتاعها
عباده / يعني انتوا مش موافقين على فكرتى
مختار / بالعكس هنفذها
امين / الله
مختار / انا لو فضلت فى مكانى هطق و اموت لازم اعمل حاجه و دا الطريق الوحيد اللى قدامى هعمل ايه يعني
امين / انت ممكن تموت انت و اللى معاك
مختار/ لا ما تخافش الطلعه دى هطلعها لوحدى
امين / الكبير مش هيقبل
مختار / سيبوا الحوار ده عليا
عباده / تمام فكروا و ظبطوا الدنيا و انا هحصل الجماعه عند الجوارحه
مختار / انا جاى معاك
عباده / لا خليك انت مع ناصر و تعالوا سوا
مختار / تمام
عباده يمشي و امين يبص لمختار
امين / انت لو مشيت ورا فكره عباده يبقي بتلعب بالنار
مختار / مهى بقالها كتير بتلعب بيا دورى مره
مختار يسيب امين و يمشي امين يخبط كف على كف
………………..
فى سريا الجوارحه
كوثر واقفه قدام خديجه و ماجده بينهم
كوثر / لو ليا عندك ذره غلاوه قد كدا لو اللى مات ده ليه عندك قيمه تطلقى من ابن الكلاب دول
خديجه / و ماله يا عمتى تؤمرى اطلق اطلق و اشرد ابنى و اخرب بيتى كمان ما دام ده هيريحك
كوثر / انهى بيت انهى بيت مع واحد زى ده
خديجه / بتتكلمى كان عباده اللى قتله
كوثر / هم اللى قتلوه هم اللى سلطوا علينا اللى يسوى و اللى ميسواش عملوا نفسهم كبرات البلد على حسابنا كنتى لسه ما اتولدتيش ما كنتيش اتولدتى و لا طلعتى من البيضه لا شوفتى اللى انا شوفته و لا عشتى اللى عشته عشان كدا كان سهل عليهم يغسلوا دماغك
ماجده / كفايا يا عمتى حكيتي الحكايه مليون مره و برده هنقولك نفس الكلام
كوثر / اشمعن عمران يرجع و جوزى لا … عمران اللى قتله قتله عشان ما يلاقيش اللى يقف قصاده و لا راس براسه
خديجه / ابويا كان معاهم و حكالك اللى حصل مليون مره عمى الله يرحمه هو اللى فداهم بروحه
ماجده / اللى فجر القسم ما كانش عارف ان عباس جواه اجله كان كدا يا عمتى
كوثر / هبله انا عشان اصدق الكلام ده و لا ايه دا على اساس انهم ما ضربوش عليه نار قبل كدا و حاولوا يقتلوه ان كنتى انتى نسيتي انا ما نسيتش
ماجده / و انا ازاى انسى هو اللى مات ده مش جوزى هو اللى اترملت دى مش انا اللى اتيتموا دول مش عيالى بس انا عارفه مين اللى قتل جوزى و حقى و حقه مش هسيبه
كوثر تبتسم بسخريه
خديجه / ما حدش هيسيبه حقه هيتجاب والله العظيم انا سايبه عباده فى السرايا مع الرجاله بيتكلموا
كوثر / بيتكلموا !!! هم لسه هيتكلموا ؟
خديجه / الناس اللى اتصابت كانوا كتير و لازم يطمنوا عليهم قبل ما يعملوا اى حاجه
باب الاوضه يخبط الكل يبص على الباب فاطمه و سماح و ام مغاورى واقفين
ام مغاورى / الحجه ام عباده و سماح جايين يعزوكى يا ام عباس
فاطمه / البقاء لله قلبى عندك
كوثر / ما تقلقيش دورك جاى
ام مغاورى تزغر لكوثر
فاطمه / كلو بايد ربنا ما حدش هيخلد فيها بس ربنا وحده اللى يعلم مين هيسبق مين
كوثر / لا يا فاطمه ما بتكلمش عن الموت بتكلم عن حرقه القلب اللى حاسه بيها دورك تعيشيها يا فجوزك يا فابنك
خديجه / عمتى
فاطمه تشاورلهم يسكتوا
فاطمه / ربنا يصبرك على ما بلاكى و هو وجع الضنا بيعمل كدا و اكتر
كوثر / بكره تشوفيه يا فاطمه بكره تشوفيه انتى و كل حريم الزنايته بكره اجى اعزيكوا واحده ورا التانيه اصل ما عدليش اللى تعزونى فيه خدتوهم كلهم
ام مغاورى / ليه كدا يا ام عباس دا الناس فى بيتك … عيب
فاطمه / يلا يا سماح
فاطمه تمشى و سماح تمشى وراها
خديجه / انا ماشيه
كوثر / لو روحتى وراهم لا انتى بنت اخويا و لا اعرفك
خديجه / ربنا يهديكى يا عمتى … سلام يا اما
ام مغاورى / سلام يا ضنايا
كوثر / بكره يبكوكى على مغاورى زى ما خدوا منى عباس
ام مغاورى / الصبر من عندك يا رب
ام مغاورى تمشى و ماجده تبص لكوثر تقعد تعيط و ماجده تطبطب عليها و تعيط معاها
……………………….
على السلم
سماح / الوليه اتجننت
فاطمه / ما اسمعش حسك
سماح / والله محتاجه علاج
خديجه تنزل تجرى و وراها ام مغاورى
خديجه / استنوا استنى يا اما
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
ارجو نشر باقي فصول الرواية
باقي الرواية
الفصل الرابع والستون
نرجو نشر الفصل الرابع والستون
باقي أجزاء الرواية