رواية البر التاني الفصل الثالث والثلاثون 33 بقلم لولو محمد
رواية البر التاني الجزء الثالث والثلاثون
رواية البر التاني البارت الثالث والثلاثون
رواية البر التاني الحلقة الثالثة والثلاثون
مختار / يا ابنى الشقه لسه فيها شغل كتير دا الخشب ما اتنصبش
عبد الله / المراتب موجوده نقضى اليوم بالطول و لا بالعرض على ما النجار يجى الصبح ينصبها
مختار / و دا اسمه كلام يعنى
عبد الله / انا سمعت كلامك من اول يوم و اديك شوفت النتيجه
مختار / يعنى انا الغلطان دلوقت
عبد الله / يا مختار انت اكتر واحد عارف ان من خرج من داره اتقل من داره و انا قولتلك من زمان امشى انت اللى قولت لا
مختار / مش انت يعنى اللى قولت مش عاوز امشى
عبد الله / انا يا سيدى السبب و انا السبب كمان انى ما اتعلمتش البت دى اقسم بالله ما بلعتها من اول مره شوفتها بس اخت عباده و انا بحب عباده انا اللى استاهل ضرب الجزمه
مختار / انت ما غلطتش
عبد الله / لا غلطت انا مالى انا بتكلم مغاورى و لا بتعيط و لا تتفلق انا مالى
مختار / موقف و عدى
عبد الله / لا يا مختار ما عداش انا ماشى انا و امى هنمشى و انت بكره و لا بعده هتنزل الشغل و هند هى اللى هتبقى فى وش المدفع و لوحدها
مختار / لا مش لوحدها
عبد الله / هو ايه اللى مش لوحدها دا الست ام عباده مش سيباها فى حالها و لا هى و لا امى و فى الرايحه و الجايه تحرق دمهم نقوم بعد ما نمشى
مختار / ما تشيلش هم هند و بعدين انت مصدق انكوا هتمشوا بجد دا على الورق بس انما يا انتوا عندنا يا احنا عندكوا
عبد الله / تنورونا
صوت صريخ فى الجنينه عبد الله و مختار يطلعوا يجروا يلاقوا عباده شايل سماح و بيركبها العربيه و العيله كلها متجمعه الرجاله يركبوا العربيات و يطلعوا وراه على المستشفى عبد الله يشوف هند و شيرى واقفين فى جنب
عبد الله / هو ايه اللى حصل
هند / بيقولوا قطعت شراينها لما عباده اتخانق معاها بسبب اللى حصل
شيرى / يعنى انت ما كنتش عارف تقفل بقك ده شويه
هند / خلاص بقى يا ماما اللى حصل حصل
عبد الله / طب هنعمل ايه دلوقت هنمشى و لا هنستنى يرجعوا
شيرى / شوف تاكس و لا حاجه و ودى الشنط الشقه و انتى كلمى مختار شوفى خدوها لانهى مستشفى و اطمنى عليها
هند / حاضر الموبايل فى المضيفه جوه هدخل اجيبه
هند تدخل المضيفه و عبد الله واقف مع شيرى
………………………
فى المستشفى
دكتوره تطلع من اوضه و العيله كلها واقفه بره تجرى عليها
الدكتوره / اطمنوا هى كويسه جدا انتوا لحقتوها علاطول
فاطمه / مش هنوصيكى يا دكتوره
الدكتوره / حضرتك الاكتئاب بقى سمه الجيل كله الواحد كل يوم بيشوف حالات غريبه و على فكره يا جماعه الاكتئاب برده ممكن يكون سبب الدوخه اللى كانت بتحصلها الفتره اللى فاتت واضح انها كانت تحت ضغط شديد الفتره اللى فاتت هى اللى اتسببت فى اللى حصل ده
شاكر / كتر خيرك يا بنتى استاذنك ادخل اشوفها انا ابوها
الدكتوره / طبعا حضرتك اتفضل
شاكر يدخل عباده يجى يدخل
شاكر / هتكلم معاها شويه
عباده يهز راسه شاكر يقفل الباب
الدكتوره / اهم حاجه الفتره الجايه ان اى كان السبب فى الضغط ده تسيطروا عليه عشان تضمنوا ان الموضوع ده ما يتكررش تانى
فاطمه / اقول ايه بس حسبى الله و نعم الوكيل فى اللى كان السبب
مختار يدخل و معاه هند و شيرى فاطمه تشوفهم تروح تتخانق معاهم و الدكتوره تمشى
فاطمه / يعملوها و يخيلوا تقتلوا القتيل و تمشوا فى جنازته
ناصر / ام عباده
فاطمه / يعنى عاوزنى اشوف اللى عملوا كدا فى بنتى و اقف ساكته يا كبير
عباده / مش هم يا امى و بعدين سماح و الدوخه اللى كانت بتجيلها قبل الحوار ده بكتير
انتصار / يا جماعه خلاص موضوع و خلص و البيوت ياما بيحصل فيها و مصارين البطن بتتخانق لموا الموضوع ما تفرجوش علينا الخلق فى المستشفى
فاطمه / طبعا و انتى هتحابى لمين غيرها
ناصر / يعنى كل الرجاله دى مش ماليين عينك يا ام عباده
فاطمه / اتكتمت
فاطمه تبص لهند و شيرى و تجيبهم من فوق لتحت و تبص الناحيه التانيه مختار يروح يقف مع عباده
عباده / لو كان جرالها حاجه عمرى ما كنت هسامح نفسى
مختار / ايه اللى وصل الدنيا لكدا
عباده / والله ما اعرف فى ثانيه لقيتها ساحبه السكينه و قاطعه ايدها ما لحقتش امنعها
مختار/ عبد الله مشى
عباده / بيتهيالى بعد اللى حصل ده مستحيل تكون بتكدب العمر مش بعزقه و لا ايه
مختار / انا مش عارف اقولك ايه بصراحه
عباده / مهو يمكن هو فهم غلط يمكن كانت باصه فى الارض محرجه ان مغاورى كلمها
مختار / ممكن
عباده / و بعدين مغاورى برده ما كانش يصح يكلمها و انا كمان كان هيحصل ايه لو قومت انا جبتلها الموبايل
مختار يطبطب على كتف عباده و الاتنين يبصوا فى الارض
…………………………..
فى الاوضه عند سماح
سماح ممدده على السرير و شاكر قاعد على كرسى جنبها و الاتنين باصيين فى الارض
سماح / انت زعلان منى
شاكر / لو كان جرالك حاجه انا عمرى ما كنت هسامحك
سماح / انا تعبت ما حدش مصدقنى
شاكر / ما عنهم صدقوا ما دام ما غلطتيش حطى صابعك فى عين الطخين
سماح / غصب عنى .. اول و اخر مره .. اوعدك .. انا ممكن استحمل اى حاجه غير انك تزعل منى
شاكر يهز راسه
سماح / عباده زعلان منى ؟
شاكر / عباده بره هيتجنن عليكي الكل بره هيتجنن عليكي و عبد الله و امه سابوا السرايا خلاص
سماح / انا مش عارفه هو ليه عمل معايا كدا دا ما شافش منى حاجه وحشه
شاكر / خلاص يا سماح
سماح تبص فى الارض
شاكر / انا هخليهم يدخلوا يطمنوا عليكى و هقولهم ما حدش يتكلم فى اللى حصل
سماح / اللى تشوفه
شاكر يقوم يبوس راس سماح تمسك ايده و تبوسها يطلع يفتح الباب
شاكر / اللى عاوز يطمن عليها يدخل و اللى عاوز يتكلم فى اى حاجه من اللى حصل ما يدخلش
عباده يجرى على جوه و وراه فاطمه و الكل يدخل يسلموا على سماح و يطمنوا عليها شاكر يبص بره يلاقى مختار واقف جنب هند و شيرى يروحلهم
شاكر / لو عاوزين تطمنوا عليها هى كويسه دلوقت
شيرى / حقك عليا
شاكر / خلاص يا ست الكل موضوع و اتقفل و احنا فى الاول و الاخر اهل و انا متاكد ان عبد الله ما كانش يقصد
شيرى تبتسم و تروح هى و هند يقفوا عند الباب من كتر الزحمه اللى جوه
……………………..
فى عربيه مغاورى
مغاورى سايق جنبه شاهين و ورا خديجه و مامتها
خديجه / ما اعرفش عملت كدا ليه بيقول عملتها فى ثانيه
الست / يا كبدى يا بنتى ام فاتن قالتلى انها الفتره اللى فاتت كانت قافله على نفسها الاوضه و ما بتبطلش عياط يا كبدى و كل ما حد يكلمها تقول مخنوقه و محبوسه
خديجه / عباده هيموت عليها صوته كانه كان بيتكلم لجوه و الكلام بيطلع بصعوبه
شاهين / اخته الوحيده يا خديجه
الست / بس كل ده عشان ما بتخرجش ما انا بقالى سنين ما بخرجش من السرايا غير عشان اقضى مشاويرى المهمه كنت ولعت فى روحى من زمان
شاهين / مش كل الناس زى بعضها جيل اليومين دول طرى ما بيستحملوش
الست / ولو برده بس مش لدرجه انها تقطع شراينها
خديجه / تعرفى سمعت ان هند مراه مختار قطعت شراينها مره كانوا عاوزين يجوزوها لابن عمها و لحقوها الحمد لله
الست / انا سمعت كلام كتير عن ابن عمها المجنون ده
شاهين / سيره و اتفضت
الست / حاضر يا خويا
الست تبص لخديجه و تزغرلها
مغاورى / وصلنا
الست / دا البلد كلها هنا
ناس كتير قدام المستشفى و عربيات كتير راكنه مغاورى يضرب كلاكس الناس توسعله يركن و ينزل هو و شاهين و الستات تنزل و الناس توسعلهم يدخلوا
………………………..
فى فيلا ضخمه
سور عالى و عليه كاميرات مراقبه فى اماكن كتير و ابراج مراقبه فى الاركان و رجاله كتير بادى بيلدينج ماسكين سلاح و بيتحركوا جوه البوابه تتفتح و تدخل عربيه مصفحه و تركن قدام فيلا ضخمه و باب العربيه يتفتح و تنزل فيرا و تدخل الفيلا و تنزل سلالم رجاله كتير لابسين ابيض و كمامات و قدامهم ادوات كيميا كتير انابيب اختبار و محاليل ملونه و حاجات بتغلى تعدى من وسطهم تدخل مكتب فى تلت رجاله قاعدين
فيرا / سورى على التاخير انتوا عارفين الستات و مواعيدهم
الرجاله تضحك
فيرا / تمام ندخل فى الجد .. اخبار الشغل ايه
فيرا تقعد على المكتب
راجل 1/ حاجه عظيمه الصراحه بس السعر .. حراق حبتين
فيرا / الغالى تمنه فيه
راجل 1/ ايوه بس احنا لسه بنربى زبون و الناس بتكح تراب
فيرا تبص بعيد
فيرا / اوك انا هعملكوا ون تايم اوفر فيفتى بيرسنت اوف
الرجاله تبص لبعض
فيرا / هديكوا البضاعه بنص التمن بس المرادى بس
راجل 2/ يدوم العز يا ست الكل
فيرا / بس انا عندى شرط صغنون قد كدا
راجل 1/ اؤمرى
فيرا / البضاعه لازم تتوزع فى كل مكان فى الجمهوريه خصوصا مكان معين كدا قريب من قلبى اوى
الرجاله تبص لبعض
فيرا /على قد ما هتوزعوا فى المنطقه دى هتاخدوا قدامها عشر اضعاف الكميه فور فرى … ببلاش يعنى
راجل 1/ انهى مكان بالظبط
فيرا تبتسم و الرجاله بتبص لبعض و تبصلها
……………………….
فى المستشفى
الست / يا ستى و احنا فيها اطلعى من هنا بس و انا هاخدك و ننزل اسكندريه البت خديجه و اخواتها ينزلوا يجيبوا شوارها و انا اخدك و نلف اسكندريه دى شبر شبر
فاطمه / و الله فكره حلوه بس هى تقوم بالسلامه
خديجه تبص على الباب و تطلع بره تلاقى عباده واقف مع مغاورى و هند واقفه مع مختار تروح تقف مع مغاورى و عباده
خديجه / عامل ايه دلوقت
عباده / الحمد لله احسن كتير بيقولوا ممكن تروح معانا و الجماعه بيكتبولها خروج
خديجه / الحمد لله
مغاورى / البلد كلها بره
عباده / عارف كتر خيرهم هم ما يرفوش ايه اللى حصل بالظبط بس لما عرفوا ان اختى فى المستشفى الكل جاى يقوم بالواجب
مغاورى / خيركم على الكل
عباده / تسلم
عباده يبص لخديجه
خديجه / هروح اسلم على هند
عباده يبتسم خديجه تمشى
عباده / كان فى حوار كدا بصراحه انا محرج منك اوى بس تقدر تقول لازم افتحه عشان ارتاح
مغاورى / حوار ايه ده ؟
عباده / انت اخويا صح ؟
مغاورى / انت بتسال !!
عباده / انت ضربت مختار فى ضهره قبل كدا
مغاورى / يا جدع احنا كنا عيال و كنا بنلعب لا اله الا الله انت اللى بتقول كدا يا عباده
عباده / قبل ما تتعصب احنا داخلين على ايام صعبه
مغاورى / و لو ما انتش عارف عدوك من حبيبك هتبقى اصعب يا ابن الزيني
مغاورى يسيب المكان و يمشى عباده يبص لمختار يلاقيه باصصله مختار يجرى ورا مغاورى و عباده يجرى وراهم هند و خديجه متابعينهم مختار يحصل مغاورى يوقفه فى كرودور فاضى
مختار / استنى يا مغاورى
عباده يحصلهم
مختار / اقطع عرق و سيح دم يا عباده
عباده يبص فى الارض و يبص لمغاورى
مغاورى / فى ايه يا رجاله حد يفهمنى فى ايه ؟
عباده يبص لمختار برجاء
عباده / مختار كان عاوز يطلع بدالك
مختار يتفاجئ
مغاورى / ايه ده !! هى الست هند سمحت اخيرا و لا ايه ؟
مختار و عباده يبصوا لمغاورى بصدمه و يبصوا لبعض
مختار / لا بس مش متاكد ان فى رجاله كفايه … عن اذنكوا
مختار يرجع تانى و عباده يبص لمغاورى و يجرى ورا مختار .. مختار يدخل الاوضه عند سماح الكل حواليها بما فيهم خديجه و هند
مختار / السلام عليكم لو ما حدش عاوز منى هاخد هند و نروح نشوف الجماعه ان كان ناقصهم حاجه
فاتن / ابقي طمنى و لو ناقص اي حاجه
مختار / مفيش مشكله … يلا يا هند
هند تبص للكل و تقوم تسلم و تمشي معاه و الكل عينه على مختار متجهم حتى هند خدت بالها مختار يمسك ايدها و يقفل الباب
عباده / انا اسف
مختار / يلا يا هند
عباده / حقك عليا اقسم بالله
مختار / اللى بيشيل قربه مخرومه …
عباده / غصب عنى اقسم بالله انت لو …
مختار / يلا يا هند
مختار يشد هند من ايدها و هند بتبص لعباده و مش فاهمه يقابلوا مغاورى
مغاورى / على فين ؟
مختار يشد هند و يمشوا
هند / هو فى ايه ؟اتخانقتوا و لا ايه ؟
مختار ما يردش
هند / هو فى حاجه عند ماما ؟ فى حاجه حصلت ؟
مختار / لا كل حاجه تمام ما تقلقيش
هند / طب هتفهمنى ايه اللى حصل طيب ؟
مختار / اه شدينا سوا
مختار يطلع من المستشف و معاه هند
راجل / ايه الاخبار يا سى مختار
مختار / الحمد لله يا رجاله كل حاجه تمام … بس دى مستشفى و اللمه دى ما تنفعش كل واحد يروح يشوف اشغاله
مختار يعدى هند و فتح العربيه لهند تركب و يروح يركب من الناحيه التانيه و يسوق و هند متبعاه و هو بيحاول يكتم الغضب جواه و بيفرك فى الدريكسيون بايديه و هند متبعاه ترفع ايدها الشمال و تمسك ايده اليمين و هى بتفرك فى الدريكسيون يبصلها القلق باين عليها يهدى و يتنهد
مختار/ اليوم كان صعب من اوله و انا ما كنتش مستحمل كلمه من حد
هند / ربنا خلقلنا ودنين ليه
مختار يهز راسه و يركز فى السواقه
هند / انا عارفه انك مش هتتكلم بس
مختار يبصلها
هند / انا اسفه
مختار / على ايه انتى ما لكيش دعوه خالص
هند / ليه هو مش عبد الله اخويا و انت بتحابيله عشانى
مختار/ انا مع الحق حتى لو كان ضدك يا هند انتى ما لكيش دعوه باللى حصل
هند تهز راسها و تبص الناحيه التانيه مختار يبص عليها و يتنهد
مختار / من قبل حتى ما تدخلى حياتى يا هند من يوم ما وعيت على الدنيا و بدات افهم و انا و مغاورى و عباده على حطه ايدك كل يوم حكايه
هند / بس عباده بيحبك
مختار / و مغاورى كمان بيحبنى و انا بحبهم بس زى ما قولتلك توم و جيرى ناقر و نقير و الواحد كان بيعدى بس كل واحد و ليه طاقه
هند / اعتزرلك جرى وراك و حاول يراضيك
مختار/ ما كنتش زعلان منه انا زعلان عليه مع انى برده عازره
هند / اخته الوحيده فى المستشفى يا مختار و هو يا عيني برده … الموقف كان قدامه
مختار / فاهم و مقدر والله فاهم الكل و حاسس بيهم بس انا بقي مين حاسس بيا
هند تتنهد و تبص الناحيه التانيه
مختار / كل حاجه فى اولها صعبه بعد كدا الواحد بيتعود
هند تبصله
مختار / اهو انا مشكلتى انى عمرى ما هتعود لانى مش عاوز اتعود … انا مش عاوز اتعود
مختار يركن العربيه و ينزل منها يقف جنب الباب هند تعيط
هند / عبد الله كان معاه حق مش سهل اعوض فراغ السلاح
هند تمسح دموعها و تاخد نفس عميق و تطلع الموبايل و تكتب رساله و تبعتها لمختار موبايله يرن فى جيبه يطلعه و يبص فيه
//////////
هند / بحبك
///////////
مختار يبتسم بحزن و يحط الموبايل فى جيبه تانى و يركب هند بتبصله برجاء
مختار / و انا كمان بحبك … و بحبك اوى كمان
هند / عارفه
مختار و هند يبتسموا
مختار / ايه رايك لو بيتنا النهرده معاهم فى الشقه و ساعدناهم يفرشوا ؟
هند / بس النجار …..
مختار / هعدى اخده فى ايدى دلوقت مش هنسيبهم يباتوا على الارض يعني
هند تبتسم مختار يسوق
………………….
فى شقه عبد الله
شيري واقفه فى المطبخ قدامها بوتجاز اربع عيون بتوصله بالانبوبه و المطبخ ما فيهوش الا تلاجه و كراتين كتير فى الارض عبد الله يدخل
عبد الله / انا كنست الاوضه و فرشت كرتونه التلاجه تحت المرتبه لحد الصبح
شيري / انا وصلت البوتجاز اهو عاوزين النجار اللى يجي بكره ياخد يعملنا حتتين كدا فوقهم رخامه ارص جواهم المواعين دى
عبد الله / نشوف لو عنده حتتين جاهزين زى اللى عباده جابهم لهند
شيري تهز راسها
عبد الله / ياسمينا نايمه على الكنبه فى الصاله و انا جعان هنزل اشوف حاجه اجيبها ماشي
جرس الباب يضرب
عبد الله / هشوف مين
عبد الله يروح يفتح يلاقي راجل شايل صينيه اكل
الراجل / السلام عليكم انا رشدى العباسي جاركوا فى الشقه اللى فوق … لا مؤاخذه حاجه كدا على قد ما قسم
عبد الله ياخد منه الصينيه و هو مستغرب
عبد الله / شكرا … بس والله ما كان له لزوم حضرتك تعبت نفسك
رشدى / ازاى بس دا الجيران لبعضيها يا راجل
عبد الله / والله انا نفسي اعزم على حضرتك تدخل تشرب حاجه بس احنا لسه ما فرشناش زى ما حضرتك شايف
عبد الله يروح يحط الصينيه على ترابيزه الانتريه رشدى يشوف ياسمينا نايمه على الكنبه
رشدى / يا كبدى يا بنتى … بقولك ايه انا هروح اجيبلك النجار من ايده يجي ينصبلك العفش ده
عبد الله / هو كدا كدا كان هيجي الصبح
رشدى / و الصبح ليه يجي دلوقت دى شغلانه ساعه زمن و ان ما كانش فاضي نشوف غيره البلد مليانه نجارين يعني
مختار يطلع السلم و وراه النجار و هند فى الاخر
مختار / السلام عليكم
الرجاله تعدى هند عبد الله يشاورلها على المطبخ تدخل جوه و الرجاله تقف تتكلم
رشدى / و عليكم السلام يا مختار بيه ابن حلال كنت لسه هنزل اجيب الاسطى ناصر اديك انت جبته اهو
مختار / كتر خيرك يا استاذ رشدى طول عمرك صاحب واجب … الاستاذ رشدى يا عبد الله محاسب كبير فى شركه الكهربا يعني ما تقلقش الكهربا عمرها ما هتقطع عندكوا
رشدى / هههههههههههههههههه
مختار / بص بقي يا حج ناصر انا عاوز الشقه دى مفروشه النهرده
عبد الله / دا حوار دولاب و سريرين و شويه رفايع يعني
ناصر / ان شاء الله يتم كله النهرده
عبد الله / و كنا عاوزين كمان تقفيله فى المطبخ لو فى يعني فى عندك اى حاجه جاهزه
ناصر / اشوف المقاسات و ان شاء الله خير
مختار / انا كنت متاكد انك مش هتكسفنى
صوت شيري من جوه
شيري / عبد الله
عبد الله / عن اذنكوا ثوانى
عبد الله يدخل جوه يلاقي شيري شايله صينيه عليها كبايات شاى
عبد الله / كتر خيرك جت فى وقتها
شيري / شوفلنا اى حاجه نقعد عليها لحد ما تخلصوا مش هنفضل متزنبين هنا لحد ما تخلصوا
عبد الله/ حالا ثوانى بس
عبد الله يطلع بره و شيري ترجع المطبخ
…………………
فى السرايا
سماح بتنام فى سريرها و فاطمه تقعد جنبها
انتصار / نورتى بيتك يا مجنونه
سماح / ههههههههههههههه
انتصار / اقسم بالله لو اتهبلتى فى عقلك تانى لكون معلقاكى زى الدبيحه
سماح / لا و على ايه حرمت
شاكر / نسيبها بقي ترتاح و اهو نرتاح شويه احنا كمان
فاطمه / انا هخليني جنبها النهرده
شاكر / خليكي يلا تصبحوا على خير
سماح / و انت من اهله
شاكر يمشي و الكل يمشي وراه و يسلموا على سماح و يتبقي سماح و فاطمه
فاطمه / انا زعلانه منك اوى
سماح / انا !!!
فاطمه / عاوزه تقهرى قلبي يا سماح
سماح / حقك عليا والله كان غصب عنى
فاطمه / سماح … انا اتجوزت ابوكى و خلفت اخوكى و شيلت المسؤليه و انا اصغر منك عشان كدا يا بنتى كنت بعاملك على انك كبيره بس اللى عملتيه خلانى احس قد ايه انتى صغيره انتى صغيره اوى يا سماح صغيره على الموت يا بنتى
سماح / الاعمار بيد الله و الحمد لله عباده كان واقف و دى كانت لحظه شيطان … و بصراحه ما افتكرش انى كنت هتجرا اعمل كدا لو ما كانش عباده موجود و واقف و متاكده انه هيلحقنى
فاطمه / كان ممكن يلحقك و ينقلك للمستشفي يا بنتى و برده ما يعرفوش يلحقوكى و يبقي ده اجلك
سماح / ما فكرتش فيها من النحيادى بصراحه ما فكرتش فيها خالص وقتها كل اللى كنت بفكر فيه ان ازاى اخويا يشك فيا قلبي كان موجوع
فاطمه / انا مش مسمحاهم و حقك منهم هجيبه هجيبه حتى لو
سماح / هو ما عملش حاجه يا اما ما تظلميهوش
فاطمه / بتدافعى عنه بعد كل اللى حصل
سماح / لما روحت المستشفي فكرت و كمان كلام ابويا و الكل عبد الله ما كانش يقصد يعمل مشاكل عبد الله كان خايف عليا
فاطمه / و هو ماله بيكي اصلا ما يخليه فى خيبته مركز معاكى ليه
سماح / هو اللى لحقنى يوم ما وقعت فى شبكه عباده
فاطمه تبص الناحيه التانيه
سماح / و كمان هو مش هنا و ما يعرفش عاداتنا
فاطمه / مش قادره اصفالهم بصراحه
سماح / عشان خاطر مختار على الاقل ما تنسيش انهم نسايبه … عشان خاطرى
فاطمه / عشان خاطرك ايه ؟
سماح / فضيها سيره و قفلوا الحكايه دى
فاطمه / انتى شكلك مش هتبطلى رغى للصبح انا الحق عليا انى سايبه ابوكى لوحدك و قاعده جنبك
سماح / ما تقولى انه وحشك و مش قادره على بعده يا فاطومه
فاطمه / مسيرى هقطلع لسانك ده يا قليله الحيا
سماح / ههههههههههههههههه تصبحى على خير يا ست الكل
فاطمه تبوس راح سماح و تطلع بره و تقفل الباب سماح تقوم تجرى تفتح الباب تبص يمين و شمال تشوف فى حد و لا لا و تدخل تجرى تجيب التليفون و تتصل بمغاورى
مغاورى / السلام عليكم
سماح / انا اسفه انى بتصل بيك بس فى حاجه مهمه لازم تعرفها
مغاورى / خير … مع انى عاتب عليكي فى اللى عملتيه
سماح / ما انت ما تعرفش حاجه لو كنت مكانى كنت عملت اكتر من كدا
مغاورى / مش فاهم حاجه
سماح / عبد الله شافنى لما كنت بكلمك عندكوا فى السرايا و قالهم هنا و ولع الدنيا حريقه …اااه لو سمعت الكلام اللى اتقالى الموت كان عندى اهون
مغاورى / للدرجادى !!!
سماح / اقسم بالله ما بكدب … انا قولتلهم انك لما شوفتنى خارجه من السرايا سالتنى على فين قولتلك هجيب الموبايل من العربيه عشان لو عباده سالك و لا اى حد من عندى يبقي كلامنا واحد تمام
مغاورى / انا كدا فهمت كل حاجه … على العموم تمام كويس انى عرفت
باب الاوضه يتفتح و مريم تدخل سماح عنيها توسع
………………….
فى شقه عبد الله
هند و شيري بيفرشوا السراير و مختار و عبد الله بيعدلوا الاوضه التانيه ياسمينا تطلع تتنطت على سرير عبد الله
عبد الله / يا جزمه بوظتى السرير
ياسمينا تجرى على بره
عبد الله / طب والله ما انا عادله اهو
عبد الله يطلع بره مختار يعدله بسرعه و يطلع وراه يلاقيه بيقلب فى القنوات بتاعه التليفزيون
مختار / انت بتتلكك و لا ايه ما الدنيا فل جوه اهو
عبد الله / اقعد اقعد الماطش هيبدا
هند تطلع و وراها شيري
هند / كدا الحمد لله الشقه فل بس للاسف المراوح مش عامله حاجه انا سيحت فى الحر ده
هند تقعد جنب مختار
عبد الله / انتى اللى اخدتى على التكييف
هند / انا الغلطانه
شيري / هدخل اعلق على العشا
هند تقوم تروح مع شيري
هند / استنى هاجى اساعدك
عبد الله / اخيرا اهى القناه اللى عليها الماتش اهى … كبايتين شاى بقي يا دودو
…………………..
فى السرايا
عباده رايح جاى فى الجنينه ناصر واقف فى الفرانده متابعه ينادى عليه
ناصر / عباده
عباده يبص
ناصر / تعال عاوزك
عباده / حالا يا كبير
عباده يدخل يجرى يروح لناصر
عباده / خير يا كبير اؤمر
ناصر / ما يؤمرش عليك ظالم خير طمنى مالك بقالك ساعه بتبص فى الساعه كل شويه و رايح جاى فى ايه؟ خير ؟
عباده / مفيش يا كبير بس مختار مجاش لحد دلوقت و ما بيردش على تليفونه فقلقت
ناصر / قاعد عند عبد الله بيساعده فى فرش الشقه الجديده لسه قافل معاه من شويه
عباده / طب الحمد لله
ناصر / هو فى حاجه يا عباده انتوا زعلتوا مع بعض فى حاجه
عباده / العادى بتاعنا يا كبير ما تشغلش انت بالك
ناصر / حاول تراضيه حتى لو غلط اعزره
عباده / لا يا كبير انا اللى غلطت جيت عليه بس والله كان غصب عنى النهرده كان يوم صعب على الكل
ناصر / فى دى معاك حق و الفتره الجايه للاسف مش هتكون اسهل لا فى السرايا و لا فى غيرها
عباده / ان شاء الله خير
ناصر / كلو على الله هسيبك انا و اروح انام
عباده / تصبح على خير يا كبير
ناصر / و انت من اهله
ناصر يدخل و عباده يسند على السور و يبص على الجنينه
……………….
فى اوضه شاكر
فاطمه / و انا اتكلمت و لا فتحت بقى
شاكر / لا ما اتكلمتيش بس البت مش هنا انا بتكلم لما ترجع
فاطمه / و انا يعني هاخد عاطل مع باطل هى ما لهاش دعوه باللى حصل
شاكر / اهى دى فاطمه اللى بحبها
فاطمه / طب تصدق البت سماح كانت بتكلمنى فى ايه
شاكر / خير
فاطمه / بتقولى عبد الله ما كانش يقصد
شاكر / ما احنا كلنا عارفين ده عبد الله واد غلبان و طيب و ابن حلال و اللى حصل كلو سوء تفاهم انتى عارفه الغلطان فى كل ده مين
فاطمه / مين
شاكر / مختار … كان جالى و لا راح لعباده
فاطمه / لا يا اخويا ما تاخذنيش احنا ما ربيناهمش على كدا مختار فى مقام عباده و اللى كان هيعمله عباده يعمله مختار امال ايه
شاكر / لا بس مختار وضعه مختلف عشان دول نسايبه
فاطمه / مهم نسايبنا احنا كمان و عشنا معاهم و كلنا عيش و ملح
شاكر / امال مين الغلطان يا فاطمه
فاطمه / عاوز الحق و لا ابن عمه
شاكر / الحق طبعا
فاطمه / ما اعرفش
شاكر / ههههههههههههههه طب ابن عمه
فاطمه / كلنا غلطانين من اول مغاورى لحد انا كلنا غلطانين
شاكر / ههههههههههههههه دا ازاى بقي يعني
فاطمه / يعني كلنا غلطنا بس كل واحد معاه عزره و كلنا نيتنا خير
شاكر / والله و كبرتى يا بطه و دماغك كبرت معاكى
فاطمه / النهرده يا سى شاكر كان اصعب يوم فى حياتى كنت بدعى ربنا ياخد من عمرى و يطول فى عمرها
شاكر / بعد الشر عليكوا انتوا الاتنين
فاطمه / بقى انا بنتى توصل لمرحله تتمنى فيها الموت !!! ليه انا قصرت معاها فى ايه ؟ دى عندها كل حاجه .. دا البلد كلها بتحسدها على النعم اللى هى فيها… طب تصدق يا سي شاكر احنا اتحسدنا احنا اللى صابنا ده عين من الصاغه
شاكر / هههههههههههههههههه و ادى فاطمه اللى اعرفها طلعت اهى
فاطمه / الله !!! دا الحسد مذكور فى القران
شاكر / بقولك ايه انا تعبان و عاوز انام اطفى النور و ارتاحى انتى كمان شويه و الصباح رباح يلا تصبحى على خير
فاطمه / و انت من اهله يا سيدى و تاج راسي
فاطمه تطفى النور و تنام جنبه
…………………….
فى شقه عبد الله
مختار نايم جنب عبد الله و هند نايمه جنب ياسمينا و مامتها فى الاوضه التانيه
عبد الله / مهو حكايه مش قادرين على بعادنا دى مش داخله دماغى
مختار / ههههههههههههههه اقوم اخدها و امشي يعني
عبد الله / يا جدع عيب عليك بس افهم عشان اطمن انت يعني قولت تبعد هند النهرده يعني لحد ما الدنيا تهدى عشان ما تحصلش مشاكل
مختار / اقسم بالله ابدا كدا كدا الحوار خلص و هند كانت بتضحك معاهم فى المستشفي عادى جدا
عبد الله / امال
مختار / يا عم اقوم اخدها و امشي يا عم
عبد الله / يا جدع ما تجننيش بقي تمشي فين هو دخول الحمام زى خروجه
مختار / ههههههههههههههههههه
عبد الله / اقولك الحقيقه
مختار / قول طبعا
عبد الله / ماما زعلانه اننا ما مشيناش من هناك من زمان و بتقول اتاخرنا اوى لحد ما جبنا لنفسنا الكلام بس انا جبله و زعلان عشان مشينا فى الاساس
مختار / صدقنى انا كمان متاكد ان كلهم هناك زعلانين انكوا مشيتوا
عبد الله / تفتكر
مختار / عندك شك و لا ايه
عبد الله / عندى سؤال مُلح
مختار / مُلح !!!
عبد الله / جدا
مختار / هى مش باينلها نومه قول يا سيدى اتفضل اسال
عبد الله / هو الاستاذ عصام اللى كان متقدم لسماح ده
مختار / هو انت عرفت !!!
عبد الله / سمعتهم بيتكلموا والله
مختار / كمل كمل ماله الاستاذ عصام
عبد الله / كان غنى زيكوا كدا
مختار / لا عادى ليه ؟
عبد الله / و كنتوا موافقين ؟
مختار / كان فى ناس موافقه و ناس معترضه بس الراى فى الاول و الاخر كان للعروسه
عبد الله / طب لو كانت وافقت النظام كان هيبقي ازاى
مختار / انت بتسال فى الموضوع ده ليه
عبد الله / لا مش هقولك دلوقت
مختار / مهو خليني معاك فى الصوره عشان اوفر عليك
عبد الله / ما تجاوب يا مختار و خلاص هو كل العرايس عندكوا لازم شبكه كبيره زى بتاعه هند و خديجه كدا
مختار / لا خالص كل واحد و امكانياته احنا بنشترى راجل
عبد الله / بنشترى راجل بجد و لا اللى هو احنا بنشترى راجل و عاوزها بشنطه هدومها و فى الاخر الجوازه تتفشكل على فوطتين و ملايه و لا ايه
مختار / ههههههههههههههههههههه يخرب عقلك دا انت مشكله ههههههههههههههههههه
عبد الله / بتكلم جد … تعرف اخوك ناصر كان بيقولى نقى عروسه و اجوزهالك و كدا
مختار / ايوه خش معايا دوغرى مين هى بقي ؟
عبد الله / انا مش جاهز
مختار / من عندنا ؟
عبد الله / انا ما اعرفهاش حتى
مختار يبتسم
عبد الله / هو انتوا البنات عندكوا بيتجوزوا صغير اوى كدا ليه يعني انا لسه قدامى على الاقل سبع سنين و البنات بيجيلهم عرسان اروح يعني انقى واحده من صحبات ياسمينا فى الحضانه عشان اللحقها على ما اجهز
مختار / مين يا عبد الله
عبد الله / مريم
مختار / مريم !!!
عبد الله / انا والله لا كلمتها و لا قربت منها خالص بس مش عارف من اول مره شوفتها عندنا فى البيت فى مصر … دا هيفضل سر بينا صح
مختار / لا
عبد الله / بتهزر يا مختار يعني الحق عليا انى اعتبرتك اخويا و بفضفض معاك
مختار / مهو عشان انت اخويا و هى بنت اخويا انا مش هخلى الموضوع ده سر بس هقولك حاجه احسن
عبد الله / ما تحرجنيش مع اهلك اكتر من كدا يقولوا عليا طمعان فيكوا انا ما حلتيش حاجه و لا شهاده و لا شقه
مختار / عندك شغلك و بكره تتخرج و تبقي دكتور قد الدنيا
عبد الله / بشتغل عندكوا يا مختار عشان خاطرى ما تخلينيش اندم انى حكيتلك عشان خاطرى يا مختار
مختار / ماشي كانى ما عرفتش حاجه بس انا عاوزك الفتره دى تفكر فى حاجتين مهمين اوى انت فعلا عاوز مريم و هتصونها و لا دى هرمونات مراهقه
عبد الله / و الحاجه التانيه
مختار / هتسكت لحد امتى و انت عارف ان البنات عندنا ما بيقعدوش هتقدر تشوفها بتتزف لغيرك
عبد الله / انت طالع شرير لمين دا اهلك كلهم طيبين و ولاد حلال
مختار / ههههههههههههههههههه ياض انا بحبك و عاوز مصلحتك
عبد الله / مش عاوز استعجل اخسرها و خايف اتاخر اخسرها برده
مختار / اللى انت عاوزه دى حياتك و انت حر فيها
عبد الله / تفتكر هى ممكن توافق عليا ؟
مختار / تبقي غبيه لو رفضتك و ما افتكرش مريم غبيه
عبد الله / اسكت بقي اسكت انا غلطان انى انسحبت من لسانى و قولتلك
مختار / انت تبقي غلطان بجد لو ما جريتش ورا الحلال و ضيعتها منك
عبد الله / هقولهم ايه هخطبها بانهى وش الناس هتقول الكبير خطب بنته لعيل فى كليه
مختار / انت مش عيل دا اولا ثانيا انت راجل بتشتغل و كسيب ثانيا انت عندك شقتك فى مصر و الدكان بيدخلولك قرشين يعني هتعيشها مرتاحه و بعدين انت مش هتتجوزها بكره يعني
عبد الله / ما تعشمنيش بقي و تخليني احلم انا بقالى كتير اوى بحاول اعمل العكس بحاول بكل طاقتى اشيلها من جوايا
مختار / فكر و قولى بقولك ايه
عبد الله / قول
مختار / انا وعدتك انك لو دخلت كليه طب هعملك اللى انت عاوزه ايه رايك ابنيلك مستشفى هديه جوازك و على ما تتخرج ان شاء الله تكون اتبنت و اتفرشت و كل حاجه جاهزه تتخرج تلاقى نفسك جاهز
عبد الله / لما قولتلك هستنى اطلب حاجه عليها القيمه كنت ناوى وقت الجد اطلب منك تساعدنى اتجوز مريم
مختار / و احنا فيها بكره الصبح اكلم ناصر
عبد الله / و لو رفض موقفى هيبقي ايه موقف هند هيبقي ازاى دول رفضوا مغاورى هيوافقوا عليا انا
مختار / عليك نور رفضوا مغاورى حصل ايه يعني و لا علاقتنا بيه اتاثرت و لا الرفض ده منع جواز اخته من عباده عادى و بعدين اجمد كدا و خليك اسد و ارمى تكالك على الله اللى ليك نصيب فيه هتاخده
عبد الله / لا يا مختار لا انت عمال تشجعنى و هتقلب بنكد فى الاخر
مختار / براحتك تصبح على خير بقي عشان انا عاوز انام و بعدين انت مش عندك شغل الصبح ما تنام بقي
عبد الله / و هو بعد كلامنا ده هشوف نوم
مختار / هههههههههههههههه احسن احسن يلا تصبح على خير
مختار يلف و يدى لعبد الله ضهره و عبد الله بيفرك و هو عمال يفكر
…………………….
فى اوضه سماح
مريم و سماح واقفين فى شباك الاوضه بيتفرجوا على الجنينه
مريم / هى هند و هى بتكلمك تطمن عليكي قالتلك انها هتبات
سماح / لا
مريم / طب ما تكلميها تساليها
سماح / ما تبات و لا ما تباتش مش معاها جوزها و بعدين انا اللى هكلمها برده اسالها انتى فين تقول عليا ايه
مريم / معاكى حق
سماح / و بعدين تبات و لا ما تباتش انتى شاغلك نفسك بيها ليه
مريم / عادى بطمن عليها
سماح / بتطمنى عليها هى برده !!!
سماح تبص لمريم بطرف عينها و هى مبتسمه
مريم / هو انتى يا بت مش هتبطى بقي دا انتى كنتى هتموتى النهرده
سماح / يا بت والله افرحلك
مريم / تصدقى انا الغلطانه انى مش هاين عليا اسيبك لوحدك و انتى تعبانه
سماح / اتخضيتي عليا يا بت يا مريم ؟
مريم / انتى عبيطه يا سماح ؟ طبعا كلنا كنا هنموت من الخضه عليكي اوعى تعملى كدا تانى
سماح / لا ما تخافيش لحظه شيطان و راحت لحالها
مريم / انا اصلا مش فاهمه ايه فى الدنيا يخليكي تعملى كدا
سماح/ خلاص بقي فضيها سيره
مريم / تفتكرى الجماعه مشيو زعلانين
سماح / ما اعرفش بس هم كدا كدا كانوا هيمشوا النهرده بكره بعده الاسبوع الجاى
مريم / برده يا سماح ما كانوش يمشوا بالطريقه دى
سماح / ما تقلقيش هيرجعوا تانى اكيد
مريم / انتى بتقولى ايه ؟
سماح / الله بكره و لا بعده هند تحمل و الحجه ام عبد الله تيجي تقعد جنبها
مريم / و هتسيب عبد الله و ياسمينا لوحدهم يعني و بعدين هو احنا يعني مش هناخد بالنا من هند فى حملها
سماح / اللى اعرفه ان المصراويه لما البت تحمل تروح لامها او امها تجيلها بس انا سمعت ان الشقه اللى خدوها صغيره اكيد مش هياخدوا هند عندهم و هيجوا هم
مريم / ما افتكرش برده كلها كام شهر و الدراسه تبدا و الشقه هناك قريبه من الجامعه
سماح / انا ما قولتش عبد الله هيرجع انا بقول الحجه ام عبد الله هى اللى هتيجي تاخد بالها من هند انما هو هيجي يعملها ايه
مريم / هيسيبوه لوحده يعني
سماح / عيل و لا ايه و بعدين انتى شايله همه كدا ليه ابقي روحى ياختى اقعدى معاه
مريم / انتى قليله الادب
سماح / هههههههههههههههههه يا بت بهزر معاكى
مريم / الحاجات دى ما فيهاش هزار
سماح / ما تحبكيهاش بقي هو فى غيرنا هنا
مريم / برده
سماح / خلاص خلاص حقك عليا بقولك ايه اقفلى الشباك خلينا ننام و لا روحى اسهرى فى اوضتك انا تعبت و عاوزه انام
مريم / لا هنام يلا نامى
مريم تقفل الشباك و تقلع طرحتها و تروح هى و سماح يناموا فى السرير سماح تمسك الموبايل تلعب فيه
مريم / بتعملى ايه مش قولتى هتنامى
سماح / هنام بس بحمل برنامج و مش لاقيه مساحه فعماله امسحله فى حاجات و برده مش راضي ينزل
مريم / برنامج ايه ده
سماح / برنامج للكاميره بيلعب فى الصور و يحطلك مكياج و يغير لون شعرك
مريم / ههههههههههههههه و انتى هتعملى ايه بالبرنامج ده بقي ان شاء الله
سماح / اديني بلعب نامى نامى
سماح تحط الموبايل جنبها
سماح / الصباح رباح بقي و عليكي خير يلا تصبحى على خير
مريم / و انتى من اهله
سماح تطفى النور و يناموا
……………….
فى السرايا
انتصار بتساعد ناصر يلبس العبايه قبل الفجر
انتصار / برده كلمه خليه يرجع
ناصر / هو ايه اللى خليه يرجع هو كان حد قالك انه غضبان و بعدين انا مش مكلمه امبارح قدامك و قال ياسمينا شبطت هند اللى تنيمها نامت جنبها و الوقت اتاخر فمسكوا فيهم
انتصار / و انت صدقته برده
ناصر / مختار ما بيكدبش على الاقل مش عليا
انتصار / برده يا خويا اهو يعرف اننا مهتمين برجوعه مش ما صدقنا
ناصر / طب ما تكلميه انتى
انتصار / منك انت حاجه تانيه برده يا خويا
ناصر / حاضر يا انتصار هكلمه هقوله ارجع بدل ما ابعتلك ام فاتن تجيبك من قفاك حلو كدا ؟
انتصار / هههههههههههههههههه بطل هزارك ده بقي بتكلم جد
ناصر / حاضر يا ام فاتن هكلمه
انتصار / ما اتحرمش منك يا سيد الناس
ناصر / و لا اتحرم منك ممكن بقي اللحق الفجر و لا هنقضيها رغى كدا
انتصار / لا ازاى يلا ربنا معاك و انا هروح اصحى البنات
ناصر / تمام ربنا معاكى
ناصر يطلع بره و انتصار تروح تلبس الطرحه
……………………….
فى شقه عبد الله
باب الشقه يخبط شيري تحط الطرحه و تروح تفتح تلاقي مختار شايل عيش و فطار
مختار / السلام عليكم
شيري / امال فين عبد الله
مختار / طلع على الشونه عنده شغل الله يعينه
شيري / مش هيفطر
مختار / هيفطر هناك مع الرجاله ما تشيليش انتى هم
شيري تبص فى الارض و تاخد منه الحاجه
شيري / ثوانى هحط الفطار
مختار / هى هند لسه نايمه و لا ايه
هند تطلع من اوضه عبد الله و شيرى تدخل المطبخ
هند / لا هنا بس كنت بعدل الاوضه جوه
مختار / غيرى هدومك هناكل لقمه و اوصلك السرايا قبل ما انزل الارض
هند / هتنزل النهرده
مختار / هفضل فى البيت لحد امتى هنكمل باقي شهر العسل فى حاجه عليها القيمه انا وعدتك
هند / خلاص اللى تشوفه
هند تدخل اوضتها و مختار يروح المطبخ
شيري / فى حاجه يا حبيبي
مختار / لا تسلمى ما اتحرمش قولت اساعدك
شيري / ربنا يخليك انا خلاص خلصت روح اقعد ارتاح و انا دقيقه و هجيب الصينيه و احصلك
مختار / طب هاتيها اشيلها عنك
شيري / شيلها و انا هبقي اجيب طاسه البيض و احصلك
مختار يبتسم و يشيل الصينيه و يطلع بره و شيري متبعاه و مبتسمه
…………………..
فى السرايا
مريم بتحضر الفطار هى و سماح و فاتن
فاتن / امى لسه قافله معاه هيفطروا و يجوا علاطول
مريم / يجوا بالسلامه
سماح / انا خلصت هودى الاطباق دى و انتوا انجزوا شويه مش هنقضي اليوم كله فى المطبخ
سماح تاخد طبقين كبار فول و تمشي
مريم / انا ما عرفتش انام طول الليل من التفكير فى اللى حصل
فاتن / انا حطيت راسي على المخده سافرت ما حستش غير بامك و هى بتخبط على الباب حتى ما حسيتش بابو على و هو بيلبس و ينزل الله اعلم بقي صحانى و ما صحيتش و لا سبنى انام و نزل من نفسه
مريم / ربنا يكملك على خير
فاتن / عقبالك
فاطمه تدخل
فاطمه / الهمه يا بنات انتوا واقفين ترغوا و الرجاله وصلت
مريم / خلصت والله
فاتن / اخر طاره بس هطلع الطعميه و اجيب الطبق و اجى
فاطمه / طب بسرعه شويه اساعد فى حاجه
مريم / لا تسلمى خلصت اهو
مريم تشيل طبقين كبار جبنه بطماطم و تطلع بره و فاطمه تشيل صينيه عليها اطباق مخلل و شرايح خيار مقطع و جرجير
فاتن / سبيها هوديها مع الطعميه
فاطمه / هاتى الطعميه و تعالى و اوعى تحرقيها
فاتن / لا ما تخافيش انا صحيالها اوى
فاطمه / والله ما بخاف الا من الكلمه دى
فاطمه تاخد الصينيه و تمشي و فاتن بتضحك
…………………..
فى جنينه السرايا
مختار يركن العربيه
هند / انت مش هتنزل معايا ؟
مختار / انا اتاخرت عاوز اللحق اليوم من اوله
هند / هدخل لوحدى؟
مختار / دا بيتك يا هند
هند تبص فى الارض
هند / هتتاخر ؟
مختار / ان شاء الله اجى علاطول
هند / تمام يلا سلام
هند تبتسم لمختار يبتسملها و تنزل و تروح ناحيه السرايا و تدخل و هو متابعها لحد ما تدخل يدور العربيه عباده يطلع من السرايا بيجرى ناحيه العربيه يفتح الباب و يركب
عباده / كويس انى لحقتك وصلنى فى طريقك بقي
عباده يقفل الباب و يبص لمختار و يبتسم مختار يسوق
مختار / خير ان شاء الله مالها عربيتك
عباده / هو فرح كلنا هنطلع بعربياتنا ما فى الاخر سكتنا واحده نوفر بنزين و اهو نقلل التلوث
مختار / ما عدتش متاكد ان سكتنا واحده
عباده / لا واحده و طول عمرها واحده
مختار يهز راسه و يكمل
عباده / مش هبوس ايدك يعني تسامحنى دا انا جيتلك و راضيتك دا انا عمرى ما عملتها
مختار / ماشي
عباده / هى اول مره يعني ارميلك كلمتين فى جنابك دا احنا من يوم ما وعينا على الدنيا و احنا بنتناقر و بنحفل على بعض
مختار / امال اشمعن المرادى بتراضينى يعني ؟
عباده / عشان المرادى غلطان بس والله معزور انت لو مكانى ….
مختار / انا فاهم يا عباده فاهم
عباده / يعنى مش زعلان ؟ انا طالع مع الرجاله بالليل يرضيك يجرالى حاجه
مختار / بعد الشر عنك يا بتاع انت بشروا و لا تنفروا
عباده / نزلنى هنا بقي عند مزرعه المواشي و لا انت رايح فين
مختار / هروح فين يعني هروح للباشمهندس عمر هنزل معاه النهرده
عباده / ماشي يا عم ربنا يصلحلك الحال
مختار / امين
مختار يركن العربيه عباده ينزل و مختار يكمل سواقه و عباده متابعه
………………….
فى السرايا
هند تدخل اوضتها و تقفل الباب و تروح تطلع غيار من الدولاب الباب يخبط
هند / مين ؟
مريم / انا مريم
هند / تعالى يا مريم ادخلى الباب مفتوح
مريم تدخل و تقفل الباب وراها هند تبتسم
مريم / اخبارك ايه ؟ و اخبار الجماعه ايه ؟
هند / الحمد لله ربنا كرمنا امبارح اخر كرم و فرشنا الشقه كلها امبارح مش فاضل غير شويه رفايع عبد الله و مختار هيبقوا يجيبوها
مريم / طب ما ننزل انا و انتى نجيبهالهم فى السريع
هند / تسلمى يا قلبي بس ما لوش لزمه تعبك بصي الاوضه اوضتك هغير فى الحمام ثوانى و ارجعلك ما تروحيش فى حته
مريم / ماشي
هند تاخد الهدوم و تدخل الحمام و مريم تقعد على كرسي فى جنب و تطلع الموبايل تلعب فيه الباب يخبط مريم تقوم تروح تفتح تلاقى فاطمه
فاطمه / مريم !!
مريم / هند فى الحمام بتغير هدومها اقولها حاجه ؟
فاطمه / اه ابقي هاتيها و انزلى عندنا شغل كتير فى المطبخ سماح ايدها تعبانه زى ما انتى عارفه و فاتن حامل مش عاوزين نتقل عليها
مريم توطى على فاطمه
مريم / بس دى عروسه
فاطمه / و هى هتفضل عروسه طول عمرها ما مختار نزل الشغل قوليلها تنزل و ما تتاخروش
مريم / حاضر
فاطمه تمشي و مريم تقفل الباب و هى مضايقه هند تطلع من الحمام
هند / مين
مريم / دة ام عباده عوزانا ننزل المطبخ
هند / ثوانى اللبس الطرحه و انزل معاكى
مريم / ماشي
………………….
فى الارض
مختار بيتمشي مع راجل كبير فى السن
عمر / دا بدل ما تقولى كفايا عليك كدا انت تعبت كتير و ارتاح و انا هشيل عنك
مختار / ههههههههههههههههه لا احلم على قدك يا بشمهندس عاوز تحرمنا من خبراتك و لا ايه
عمر / ههههههههههههههههه ماشي يا سيدى بس ما تاخدش على كدا انا وعدت الكبير انى هكمل لحد ما انت تتخرج انا اللى فى سنى طلعوا معاش من سنين
مختار / و تسيب الارض دى لمين طب دا قاعده البيت تجيب المرض
عمر / فى دى معاك حق بس السن له احكام برده يا مختار يا ابنى و بعدين البركه فيك بقي و انت ما شاء الله عليك شاطر و ابن حلال
مختار / الله يحفظك دا من كرم اخلاقك يا باشمهندس
عمر يبتسم و يتمشوا فى الارض
……………………
فى المحل عند محمود
عمال بيفرشوا الهدوم و محمود قاعد بيبص فى الدفاتر مع اجواز بناته يوسف يدخل
يوسف / صباح الخير
محمود / صباح النور كنت فين انا مش مصحيك الصبح و انا نازل الفجر و تليفونك مقفول ليه بكلمك مش بترد
يوسف / بابا لو سمحت كنت عاوز اتكلم معاك ضرورى
محمود / الموضوع اياه برده
يوسف / يا بابا هو حضرتك مدينى فرصه اتكل خالص كل ما اجى اكلمك تقولى تعبان راجع تعبان متاخر ورايا معاد
محمود / و سبتلى الورق و بصيت فيه و جميل ما شاء الله عاوز ايه تانى
يوسف / هعوز ايه يعنى يا بابا عاوز انفذه
محمود / و انا منعتك ما تنفذه انت مش فكرت و خطت و جهزت كل حاجه ايه اللى مانعك
يوسف / هيكون ايه يعنى يا بابا محتاج فلوس
محمود / و انا عمرى يا ابنى استخسرت فيك حاجه
يوسف / لا
محمود / يعنى عارف انى لو معايا مش هتاخر صح
يوسف / يعنى ايه
محمود / يعنى تصبر سنه و لا اتنين لحد ما المحل يقف على رجله و يبدا يجيب فلوس و ان شاء الله اول قرش اجمده هديهولك تفتح بيه الكافيه بتاعك
يوسف / انت بتنيمنى يا بابا
محمود / اتكلم عدل يا يوسف ايه بتيمنى دى
يوسف / مهو يعنى ايه استنى سنتين تلاته دى
محمود / مهو انت لو كنت صحيت بدرى و جيت معايا كنت راجعت الحسابات و شوفت انى ما عييش جنيه و عمالين ندبقها من اليمين و الشمال لحد الافتتاح
يوسف / ليه يعنى عاوز تفهمنى ان فلوس الشقه و العربيتين ما كفوش
محمود / ما انت برده لو بتنزل معانا و متابع الشغل بجد مش تيجي ساعه و تزوغ كنت شوفت بعينك المصاريف و شوفت البضاعه اللى جبناها بكام
يوسف / و انا مالى بكل ده
محمود / امشى يا يوسف انا مش قادرلك و مش عاوز اقل منك قدام العمال
يوسف يبص حواليه و يبص لابوه و يمشى و هو متعصب
محمود / مش عارف اعمل فيه ايه الواد ده
جوز بنته يطبطب عليه و محمود بينفخ
…………………….
فى المطبخ
هند و مريم يدخلوا
انتصار / صباحك عسل يا ست العرايس
هند / صباح الفل اقدر اساعد فى ايه
انتصار / ياختى مستعجله على الشقا ليها دا انتى عروسه
هند و مريم يبصوا لفاطمه
هند / لا عروسه ايه بقي ما خلاص و بعدين فاتن و سماح تعبانين قوليلى بقي المنيو ايه النهرده
فاطمه / هنعجن فطير مشلتت بالسمنه الفلاحى
هند / اوبا دا انا دخلت فى الغويط مره واحده
مريم / دا سهل خالص تعالى اقعدى انا هفرد قدامك
فاطمه / حظك حلو احنا بنعجن بدرى جيتي فى السهل
هند / اللى فاتنى المرادى اتعلمه المره الجايه الجايات اكتر
مريم تقعد هى و هند على طبليه قدامهم صينيه و جنبهم طبق مليان كور عجين مريم تحط سمنه و تبطط الكوره هند تشوف فاطمه و انتصار بيفردوا قدام بعض تعمل زيهم
مريم / دى الطريقه السهله فى طريقه تانيه بس انا فشلت فيها فشل زريع لو كانت فاتن هنا كنتى هتلاقيهم شغالين بيها
فاطمه / و انتى هتفضلى خايبه طول عمرك مش هيجى عليكي يوم و تنصفينا دا انا قدك كنت بعجن الفطير ده و اخبزه لوحدى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
