رواية البر التاني الفصل التاسع والسبعون 79 بقلم لولو محمد
رواية البر التاني الجزء التاسع والسبعون
رواية البر التاني البارت التاسع والسبعون
رواية البر التاني الحلقة التاسعة والسبعون
فى ارض على اول البلد
عباده قاعد مع رجاله و غفر
غفير ١ / بس احنا هنفضل كدا لحد امتى يا سيد الناس الكل بيتكلم و الناس بقت تخاف تخرج عيالها حتى الكبارات منهم الحريم بتخاف تبعتهم الجامعه
غفير ٢ / خصوصا بعد اللى حصل لسي عبد الله
عباده/ و هو كان ايه اللى حصل لعبد الله مهو بات فى بيته و راح تانى يوم كليته عادى و لا كان حاجه حصلت و بعدين ما احنا وسطيكوا طول الوقت و اول الصف كمان
راجل ١ / يا سي عباده ما انتوا مننا و احنا منكوا و بنخاف عليكوا و بعدين مش حلوه فى حقنا ان اللى مبهدلانا بالشكل ده تطلع حرمه فى الاخر يعني احنا مش رجاله و لا ايه
عباده / حرمه !!! و الله ما عارف اقولك ايه بس ان شاء الله قريب اوى فى اخبار حلوه
خليفه يدخل
خليفه / السلام عليكم
عباده / و عليكم السلآم ايه يا عم خليفه ما روحتش ليه النهرده مش اجازتك
خليفه / روحت و طفشت من وش الوليه خفت ارجع السرايا اقلقهم قولت اجى اقعد معاكوا هنا
عباده / تنور
غفير ٢ / و انت جايلك ايه من دا كله ما تقعدها و لا تحولها اى جامعه تانيه هنا
خليفه / ناوى على كدا نعدى بس الهم ده و انا بايدي هرجعها ان شاء الله …. هصب شاى حد يشرب
غفير ١ / انا لسه عامل شاى طازه صب انت بس الكبايات
عباده / اعمل حسابى انا مش فاكر انا صاحي من امتى
راجل ٢ / طب ما تقوم تريحلك تحت اى شجره و احنا صاحيين ما تخافش
عباده / يعني انا سبت سريرى فى البيت عشان انام فى الطل ما دام جيت هسعر معاكوا و من هنا هنبدل مع بعض مش هنخلى ساعه فاضيه من غير حراسه احنا دى بقت شغلتنا لحد ما ربنا يزيح الغمه
خليفه يناول عباده كبايه شاى و ايده بترتعش تيجي تقع منه عباده يسندها توقع شويه على ايده ينطرها
خليفه / لا مؤاخذه يا سي عباده
عباده/ بقولك ايه يا خليفه انت شكلك تعبان لو مش عاوز تروح بيتك روح ارتاح فى السرايا بيتك برده
خليفه / لا ما دام جيت هسهر معاكوا
عباده يشرب و خليفه متابعه و يشرب و كل شويه يبص لعباده
……………………
فى مطبخ الجوارحه
سماح و ماجده بيتبلوا فراخ كتير قدامهم
ماجده / الفجر هياذن و احنا لسه ما خلصناش
سماح / نفسي هفتنى عليها اوى و انتى عارفه لازم تقعد كتير فى التتبيله عشان طعمها يتظبط كدا
ماجده / امال ايه لحسن الواد يطلعله ورك فى راسه
سماح / اخص عليكي يا ماجده و بعدين ما انا قولتلك لو تعبتى اطلعى
ماجده / انا عليكي انتى هيصحوكى الصبح و لا كانك سهرتى طول الليل
سماح / منها لله عمتك فضلت تزن على الحريم لحد ما قلبتهم عليا
ماجده / انا مش عارفه ايه اللى جرالها بس
سماح / ياختى هى طول عمرها كانت كدا بس ما كانتش بتتشطر غير عليكي و افتكرت انى زيك هسكتلها
ماجده تبصلها و تكمل تتبيل
سماح / انتى بنت اخوها و مرات ابنها تستحمليها لجل خاطر الدم و النسب انما انا حياله مرات ابن اخوها يعني بعيده اوى
ماجده / انتى كبيره العيله دلوقت
سماح / طب قوليها تانى كدا يمكن اصدق كبيره ايه و على مين دا انا عيله
ماجده / مش بالسن طب ما مغاورى شاب صغير و كبير على رجاله بشنبات
سماح / هو فى زى مغاورى و عقل مغاورى ربنا يحميه يارب
ماجده / امين
سماح / مغاورى شرب الليله من ابوكى الله يرحمه انما انا لا عمرى لا روحت و لا جيت
ماجده / بكره واحده واحده هتتعلمى كل حاجه
سماح / البركه فيكوا بقي … يا لهوى مش مصدقه خلصنا
ماجده تقوم تحط الفراخ فى التلاجه و سماح تنضف الترابيزه و الإتنين يغسلوا ايديهم
سماح / يادوب نلحق نغفل قبل الفجر بس على الله ما اطلعش الاقى مغاورى صاحي بيقرا الورد بتاعه
ماجده / ما تخافيش نايم لو صحي و ما لاقاكيش كان نزل جرى يدور عليكي
سماح / هههههههههههههههه على قولك يلا تصبحي على خير
سماح تطلع هى و ماجده ثوانى و كوثر تدخل المطبخ تطلع الفراخ و تطلع علبه القرفه و علبه الملح و تلعب فى التتبيله و تبوظها و ترجعهم مكانهم تانى
……………………
فى شقه يوسف
يوسف يدخل اسراء تجرى عليه
اسراء / لقيته
يوسف / لا انا لفيت عليه كل حته حتى روحت مكان ما سبته لقيت العربيه بس و مفتوحه كمان و الحمد لله البواب فضل جنبها بيقول نزل من العربيه و سابها و مشي و هو بيكلم نفسه و لما نداله عشان العربيه ما ردش عليه روحت كل الاقسام والمستشفيات مفيش خالص و القسم قال مش هينفع محضر قبل اربعه و عشرين ساعه و انا ما عدتش عارف اعمل ايه و تعبت انا ما اكلتش لقمه من الصبح
اسراء/ و مين ليه نفس ياكل و ابوك غايب بس
يوسف / انا كلمت عمامى و اجوازات اخواتى و بكره هننزل ندور عليه تانى و ان شاء الله نلاقيه انا خايف بس يكون بيربيني و مستخبى هنا و لا هنا عشان يعرفنى قيمته
اسراء / عارفينها كلنا عارفينها
يوسف / انا هدخل افرد ضهرى ساعتين لحد ما عمى حمدى يعدى عليا الصبح نكمل لف سوا على الاقل عشان اقدر اكمل
اسراء تهز راسها يوسف يدخل اوضته و يقفل الباب
……………………
فى شقه وسام
وسام بتتكلم فى التليفون
وسام / عشر تلاف ليه هو انا هاجره يخطف عيل
راجل / و انا اش عرفنى انتى مش طلبتى بلطجى ده اللى قدامى
وسام / طب دور تانى يمكن تلاقى حد احسن و ارخص
الراجل / ما بلاش يا وسام افرضي اتغاشم و قتله و بعدين اتقبض عليه هيقر عليكي من اول قلم
وسام / يا عمى انا لا عوزاه يقتله و لا يعوره حتى انا عوزاه يخوفه بس عشان يرجعلى فلوسي
الراجل / و ان ما خافش و لا افرضي دفع للبلطجى ده فلوس و خلاه يبيعك
وسام / ما انت تشوفلى واحد كدا ثقه
الراجل / ثقه !! صاحبى هو و عشره سنين
وسام/ يعني اروح لمين انا دلوقت
الراجل / بصي دا اللى عندى و بعتلك رقمه انتى حره بقي و اسمعى انا بره الحكايه و مش موافق عليها
وسام / ماشي ماشي انا هكلمه انا شكرا
الراجل / العفو و ياريت بعد كدا بدل ما تجيلى بعد الفاس ما تقع فى الراس و تقوليلى اللحقنى يا عمى تبقي تيجي بدرى شويه و تاخدى رايي فى قراراتك دى
وسام / تصدق انى ما كنتش عاوزه اكلمك عشان هتسمعنى البقين دول بس صحيح ايه اللى رماك على المر
الراجل / اقفلى يا وسام اقفلى
الراجل يقفل وسام تنفخ و تبص فى الموبايل
…………………..
فى سرايا الزنايته
عباده داخل فاطمه تقابله
فاطمه / حمد الله على السلامه يا كبدى اعملك لقمه تاكلها
عباده / انا طالع انام مش حاسس بنفسي من التعب
فاطمه / معلش يا حبيبي كله يهون شده و تزول ان شاء الله
فاطمه تطبطب على كتف عباده يبصلها باستغراب
فاطمه / فى حاجه يا عباده
عباده يبص على ايديه
فاطمه / فى ايه يا عباده
عباده يقرص ايده مش حاسس يغمض ثانيه و يفتح و يبص لامه
فاطمه / فى ايه يا وله ما تقلقنيش عليك
عباده / مش حاسس
فاطمه / ما انت لسه قايل من كتر التعب مش حاسس بجسمك
عباده / لا يا امى انا مش حاسس خالص
فاطمه / واد يا عباده
عباده عمال يقرص فى ايده فاطمه تلطشه على وشه يبصلها و يبتسم و يطلع على اوضته بمنتهى الهدوء و فاطمه مش مستوعبه انتصار و هند يطلعوا يجروا من المطبخ
انتصار / فى ايه يا ام عباده
فاطمه تقعد على اقرب كرسي و هند تسندها
هند / حاسبي حاسبي تعالى اقعدى
فاطمه / الواد اللى حلتى وقع يا ام فاتن
انتصار / وقع ازاى يعني
فاطمه الدموع تنزل منها تمسحها بسرعه و تبص يمين و شمال
انتصار / ماله عباده يا فاطمه انطقى
فاطمه / التليفون فين انا عاوزه ناصر … ناصر فين كبيرنا فين
فاطمه تقوم هند تشوف الموبايل على الترابيزه تناولهولها فاطمه تتصل بناصر
…………………..
فى اوضه عباده
خديجه حاطه ايدها على بقها من الصدمه و عباده قاعد على طرف السرير
خديجه / ازاى و مين
عباده / كنا كتير رجاله تقوم و رجاله تقعد شربت يجي خمس كبايات شاى
خديجه / مين
عباده / ما اعرفش بس كلهم اهلى ما حدش فيهم ممكن ياذيني دول اهلى اهلى يا خديجه
خديجه / فى قبلك حد وقع يا عباده … ايوه امال بتعرف اخبارنا منين ايوه
عباده / انا بقالى قد ايه واخدها
خديجه تبصله
عباده / فاضلي قد ايه
خديجه تقعد تحت رجليه
خديجه / انت اقوى من كدا انت قوى و هتعديها و احنا معانا العلاج و هنمشي عليه
عباده يهز راسه خديجه تدعك ايديها فى ركبته يبص على ايدها و يغمض و يقوم يروح ينام فى السرير
عباده / اطفى النور و ما تفتحيش عليا الباب سبونى انام و انا لسه قادر
خديجه تمسح دموعها و تقوم تغطيه و تبوسه من خده يغمض تفرد طولها و تمسح دموعها تانى و تمشي
………………..
فى شقه خليفه
خليفه / يعني ايه ما كانش ده اتفاقنا
فيرا / هند قصاد بنتك غير كدا انت بس بتكسب وقت لبنتك
خليفه / امال خلتيني احط لابنى السم فى بقه ليه
فيرا / ابنك !! هههههههههه ابنك ده مش هينفعك انا اللى هينفعك انا اللى هرجعلك بنتك سليمه لما تسلمنى هند
خليفه / و انا اضمن منين
فيرا / جرب ما تنفذش و انا ابعتلك كل يوم فيديو ليها يشرح قلبك
خليفه / يا شيخه بقي انتى عاوزه منى ايه دى عيله ما لهاش ذنب
فيرا / مين دى اللى عيله ؟؟ بنتك !!! طب دى حتى عليها انوثه مش عندى تطاوعنى ؟ اجبلك فيها سعر ما حصلش
خليفه / مش هقدر اجيبلك هند مش هقدر
فيرا / هسهلك الدنيا انت عليك التنفيذ
خليفه / حسبى الله و نعم الوكيل حسبي الله و نعم الوكيل
………………….
فى اوضه عباده
الرجاله متجمعه على الباب عباده يفتح الباب
ناصر / ازاى ده حصل
عباده يبتسم و يدخل يقعد و يسيب الباب مفتوح يدخلوا وراه
ناصر / مش شاكك فى حد
عباده / لا ولو شكيت هتفرق فى ايه اللى حصل حصل خلاص
مختار / هتعدى يا عباده هتتوجع شويه بس انت اقوى منها انت قدها
امين / صح ناس كتير خفوا الحمد لله و بعدين اعتبرها ولاده يعني
الكل يبص لامين
امين / ايه الحريم هيبقوا اجدع منه يعني
مختار / ما تفكرش و ارتاح و على بالليل هكون جبتلك المسكنات و شوفنا حد يتابعك
عباده يهز راسه باب الاوضه يخبط يبصوا مغاورى واقف جنب خديجه عباده يبتسم
عباده / لسه الفيلم ما بداش يا رجاله قرب الفجر كدا ان شاء الله
مغاورى/ بس يا اهبل انا جاى اطمن عليك
عباده / كويس اهو زى القرد قدامكوا
عباده يقوم يقف و يشاور على نفسه من فوق لتحت
امين / هنعمل ايه فى الطالعه
الكل يبص لامين
امين / عباده كان المفروض اللى هيستلم
مختار / مش هينفع مش هيقدر
ناصر / انا اللى هطلع بداله
مختار / من امتى الكلام ده
سليمان / انا كمان طالع
عباده / ما ينفعش لو حصل حاجه … الكبير ما بيطلعش
ناصر / مش هيحصل ان شاء الله خليك بس فى نفسك اهدى و ركز و ما توترش روحك هتعدى و انت قدها
مغاورى / انا ممكن اطلع مكانه
ناصر / قولت لا انا اللى هطلع يلا سبوه يرتاح … خليكي جنب جوزك يا خديجه … ياريت الدنيا تمشي عادى مش عشان واحد مننا ..
ناصر يبص لعباده متابعه
ناصر/ اتصاب كلنا هنقع كل حاجه لازم تمشي طبيعى ورانا اشغال و بلد كامله محتاجه حمايه يلا كل واحد على اشغاله يلا
الكل يتحرك و ينزلوا مختار واقف
ناصر / الكلام ليك انت كمان
مختار يهز راسه و يمشي
عباده / ما ينفعش انت اللى تطلع يا كبير انا هبقي كويس و ان ما كنتش امين موجود عمى سليمان موجود الرجاله كتير اشمعن انت
ناصر / عشان انا الكبير و الكبير وقت الجد ما بيداراش فى البيت زى الحريم يا عباده
عباده يبصله
ناصر / انت هتعدى من اللى انت فيه و هتثبت للكل انك تستاهل تبقي الكبير بعدى فاهم و لا لا
عباده يهز راسه ناصر يبتسم و يطلع بره و يقفل الباب عباده يقعد على السرير خديجه تقعد و تحضنه عباده يبتسم بحزن
عباده / افضلى جنبى للمسا بس لما الوجع يشتغل ابعتى امين و لا مختار و ما تعتبيش الاوضه لحد ما اطلعلك انا
خديجه / قول اللى يعجبك بس انا مش هقدر ابعد عنك و لا يبقي بيني و بينك ان شالله باب
عباده / خافى على اللى فى بطنك لو ما خفتيش على روحك
خديجه / مش هتاذيني هبقي جنبك
خديجه تحط ايديها بحنيه على وش عباده و تبص فى عنيه
عباده / انا مش خايف من الوجع اللى مستنيني على قد ما انا مش قادر استحمل انك تبقي لمسانى و مش حاسس
خديجه / دا سبب كفايا يخليك تعدى اللى انت فيه اسرع
عباده / انا عاوز ابقي لوحدى يا خديجه … على عيني بس مش عاوزك تشوفيني تعبان
خديجه/ انا اولى بيك منهم انا اولى بشيلك منهم انت جوزى انا
عباده / مش هتقدرى عليا
خديجه/ ربنا هيقدرنى
عباده / مش عاوزك تشوفيني كدا الجدع الظابط ده عملها على روحه قدامنا
خديجه / انا سترك و غطاك زى ما انت سترى و غطايا انا اولى بخدمتك انا مراتك
عباده ياخدها فى حضنه و يغمض
خديجه / انا بحبك يا عباده … على المره معاك قبل الحلوه و انا ياما شوفت معاك حلو … والله ما شوفت معاك الا الحلو و لا شوفت حلو قد اللى شوفته معاك
عباده / يخليكي ليا و ما يحرمنيش منك يا ست الناس يا بنت الاصول
…………………….
فى سرايا الجوارحه
ماجده و سماح يطلعوا الفراخ سماح تشمها ماجده تحط الحله على الرخامه
سماح / هو ينفع كدا يعني … عيال احنا فى البيت ده و لا ايه
ام مغاورى / فى ايه يا سماح
سماح / شمى يا امى الفراخ غرقانه قرفه
ماجده تشم و تبصلهم
سماح / يبقي نفسي فى الحاجه و اسهر طول الليل اتعب فيها و تيجي عيله ما اتربتش تبوظها
ام مغاورى / سماح
سماح / ايه هحط قرفه فى الاكل و انا حامل ليه غاويه سقوط و لا اللى عملت كدا كانت ناويه تسقطن ايه هبل احنا مش هناخد بالنا
ماجده / اهدى يا سماح
سماح/ ههدى بس لما احط كل واحد فى مكانه عشان انا سكت كتير لما نسيت نفسها
ام مغاورى / سماح … سماح
سماح تسيبهم و تطلع فوق و الكل يجرى وراها سماح تطلع تخبط على اوضه كوثر بترزيع
كوثر / ايه ايه جايه ايه
سماح / افتحى يا كبيره يا عاقله
كوثر تفتح و الستات تتلم
سماح / هديتي كدا يعني حسيتي ان ليكي قيمه فى البيت
كوثر / لمى نفسك يا بت ما تخلينيش اعيد ربايتك
سماح / متربيه غصب عنك الدور والباقي على اللى كل ما تكبر عقلها يصغر
ام مغاورى / عيب الكلام ده يا سماح
كوثر / خليها تقول اصل فى ناس لو ما خدتش على وشها ما بتهداش
سماح / اخر كلام عندى انا عملت اعتبار لفرق السن و النسب و لكل حاجه بس انتى بقي فكرتى سكوتى ضعف و قله حيله بس قسما عظما ان ما اتلميتي عنى و شلتيني من دماغك لاحطك انا فى دماغى و ساعتها هقلب نهارك ليل و ليلك نهار و انا قادره و اعملها
كوثر / شاهدين شاهدين عشان لما يجي جوزها ما تتخرسوش قدامه والله لاقوله
سماح / قوليله ما انا عوزاه يعرف عشان ياخد قراره يا ام ابنه يا عمته اللى قتلت ابوه
سماح تسيبهم و تمشي كوثر تجرى وراها تحصلها على طرف السلم تشدها من ايدها توقفها و سماح بتحاول تشد ايدها منها
كوثر / مين دى اللى قتلت ابوه هاه مين انا و لا انتى و عمايلك انتى و اهلك
سماح / سيبي ايدى يا ست انتى بدل ما
سماح تفلت و ترجع خطوه لورا ماتلاقيش ارض تحتها كوثر تحاول تلحقها سماح تقع من على السلم الستات ينزلوا وراها سماح مش بتتحرك الستات يبصوا فوق كوثر واقفه مصدومه
………………………
فى مستشفى نفسيه و عصبيه
يوسف و عمامه قاعدين فى مكتب دكتور و اسراء قاعده بتعيط
حمدى / دا كان زى الفل
الدكتور / الحاله زى ما شوفتوها كدا لحسن الحظ ان حد فاهم بلغ و الا كان اتبهدل جامد و حالته سائت عم كدا
حامد / طب هيخف يعني هيرجع زى الاول و لا اللى بيروح ما بيرجعش
الدكتور / الطب اتطور جدا و احنا هنعمل اللى علينا و دعواتكوا معانا
اسراء / يارب انا عملت ايه فى دنيتي عشان اعيش و اشوف اليوم ده
الدكتور / يا مدام المرض النفسي زيه زى اى مرض و كلنا عرضه اننا نتصاب بيه خصوصا تحت ضغوطات الحياه اللى بنعيشها
يوسف / طب احنا ما نقدرش نتكلم معاه هيفضل تايه كدا كتير
الدكتور / اكيد وجودكوا جنبه هيفرق كتير فى حالته بس مش فى المرحله دى اتمنى انكوا تثقوا فينا و احنا لما نوصل للمرحله دى هنبلغكوا
اسراء / يعني ايه هيفضل هنا لوحده
الدكتور / لوحده ايه بس يا مدام دا هيبقي خاضع للرعايه الطبيه من ناس متخصصين طول الوقت
حمدى / لا حول و لا قوه الا بالله لا حول و لا قوه الا بالله دا عقله كان يوزن بلد
يوسف / تمام يا دكتور شكرا … يلا يا جماعه يلا منضيعش وقت الدكتور اكتر من كدا
اسراء / مش هقدر اسيب ابوك هنا لوحده
يوسف / انا هبقي اتابعه و اطمنك كل يوم يلا يا جماعه اللمه دى ما لهاش لزمه
يوسف يقوم مامته و هى بتعيط و حمدى يمشي و هو بيضرب كف على كف و حامد عينه على يوسف
…………………….
فى المستشفى
الكل متجمع و فاطمه قاعده بتفرك
فاطمه / البت و الواد البت و الواد فى يوم واحد هقول لابوهم ايه ما عرفتش احافظ عليهم من بعدك
ناصر / الاتنين بخير و هتعدى
فاطمه / انا لو بنتى او اللى بطنها جرالهم حاجه مش هيكفينى فى الحيوانه بتاعتكوا دى انى اكل قلبها نى كدا فاهم و لا لا
ام مغاورى / ما كانتش تقصد والله ما كانت تقصد
فاطمه / ما كفاياكوا بقى من يوم ما البت جت بيتكوا و انتوا قارفينها و فى الاخر البت فى العمليات بين الحياه و الموت انتوا ايه جبابره
مغاورى / ما تقلقيش يا امى اللى حصل ده مش هيتكرر تانى
عباده يدخل و خديجه جنبه
عباده / فدى معاك حق مش هيتكرر تانى لانى مش هسيبها فى عصمتك تانى
مغاورى / عباده
عباده / انا مش هستنى اما استلم اللى باقي منها فى كيس ان ما كنتش عارف تحميها سبهالى انا
ناصر / مش وقته الكلام ده
عباده / لا يا كبير وقته و وقته و وقته ايه يا كبير الجوارحه مش عارف تحم مراتك و لا تسيطر على اهل بيتك
ام مغاورى / والله كانت حادثه شدو مع بعض على السلم و سماح رجلها فلتت و الله ام عباس لا زقتها و لا اى حاجه
فاطمه / و انتوا كنتوا فين سبتوهم بيتخانقوا و وقفتوا تتفرجوا ايه بتشجوا اللعبه الحلوه من بعيد
مغاورى / عمتى هتسيب البيت هتروح اسكندريه
عباده / دا اللى ربنا قدرك عليه
مغاورى / عاوزنى اعمل ايه يعني اقتلها عشان ترتاحوا
عباده / غور من وشي يا مغاورى دلوقت بدل ما اطلع اللى فيا فيك غور
مغاورى / اللى جوه دى مراتى و ابنى و قسما بالله لولا مقدر اللى انت فيه ما كنت سكتلك ففوق كدا و اصحى
الدكتور يطلع الكل يجرى عليه باصص فى الارض
ناصر / طمنى يا دكتور سماح عامله ايه
ام مغاورى/ العيل كويس؟ جراله حاجه
الدكتور/ سماح كويسه كسر مضاعف فى ايدها اليمين بس غير كدا كدمات
فاطمه / احمدك و اشكر فضلك يارب
ام مغاورى / و الواد الواد
الدكتور / انا اسف ربنا يعوض عليكوا
الدكتور يمشي و ام مغاورى تقعد على اقرب كرسي
عباده / ارمى اليمين و غور فى داهيه
مغاورى/ لا هطلق و لا همشي ان كانت اللى جوه دة اختك فهى مراتى و اللى مات ده ابنى فما تحطش بنزين على النار اللى جوايا بدل ما تولع فينا كلنا
ناصر / روح يا عباده انت تعبان و محتاج ترتاح
عباده / مش همشي و هو يستنى مش همشي و اسيبهاله يخلصوا عليها
مغاورى / انت ايه ما بتفهمش ما بتحس سماح دى مراتى مراتى
عباده / هتطلقها و لا هنخلعك بالمحكمه و لا على ايه تضيع الوقت و البهدله انا اخد تارى منك دلوقت اهو
عباده يطلع مسدسه و يشد الأجزاء خديجه تجرى تقف فى النص
خديجه / اهدى يا عباده ابوس ايدك
ناصر / نزل السلاح ده يا عباده نزله بقولك
عباده / طلقها بقولك
مغاورى/ اضرب
خديجه/ لا
مغاورى / اضرب يا عباده اضرب
ناصر / كلمه و مش هكررها نزل السلاح ده بقولك
ام مغاورى / استهدى بالله يا ابنى انا مقدره وجعك و قسما بالله موجوعين بقده و اكتر بس ما تزودش الطين بله
خديجه/ امشي يا مغاورى دلوقت بالله عليك امشي يا مغاورى ابوس ايدك … اهدى يا عباده
باب العمليات يتفتح و سماح تخرج نايمه على ترولى تعدى من وسطيهم فاطمه تلمسها و الكل بيبص عليها
الممرضه / هننقلها اوضتها و لما تفوق تقدروا تشوفوها
ناصر / وسعوا الطريق يا جدعان وسعوا الطريق مالكوا النهرده فيكوا ايه وسعوا
عباده يقعد فى الارض خديجه تقعد جنبه
خديجه / كويسه الحمد لله اهو اهدى بقي
مغاورى يمشي ورا السرير و الكل وراه فاطمه واقفه قدام عباده هى و ناصر و امين
فاطمه / قوم يا عباده روح
عباده / مش همشي من هنا
فاطمه / ما تخليش الناس تشوفك تعبان روح و انا جنبها
عباده / مش هتروح معاه
ناصر / تقوم بالسلامه و انت تقوم بالسلامه و نعمل قاعده و نتكلم لكن دلوقت اللى بيحصل ده مش هيحل و لا هيربط و ما تنساش ان الكلمه الاولى للى راقده جوه دى
عباده / دى عيله ما تعرفش مصلحتها
ناصر / ما كناش جوزناها لو كانت عيله و بعدين اوعى تفتكر ان سماح مش زيها عندى زى مريم و زعلان على اللى جرالها بس زى ما قولت دى حياتها و الكلمه كلمتها احنا علينا الشورى و السند
فاطمه / خدى جوزك و روحوا يا خديجه و خليكي جنبه و احنا هنطمنكوا بالتليفون يلا
ناصر / روحهم يا امين و خليك جنبهم
…………………….
فى اوضه سماح
سماح بتتالم و بتعيط فاطمه تبوس راسها
فاطمه / ربنا بكره يعوضك بالاحسن منه و بعدين لعله خير
سماح / حسبي الله و نعم الوكيل فيها ارتاحت كدا ارتاحت هى
ام مغاورى / يا سماح ما تقوليش كدا ما كانتش تقصد
سماح / انا عملتها ايه عملتلها ايه عشان تكرهنى كدا انا عملتلها ايه
انتصار / وحدى الله يا سماح وحدى الله
سماح/ لا اله الا الله
الباب يخبط و مغاورى يدخل
مغاورى / ممكن ادخل اتكلم مع سماح كلمتين
ام مغاورى تقوم تقف
ام مغاورى / يلا يا جماعه اطمنا على ست البنات نسيبها ترتاح بقي زياره العيان قصيره يلا
الكل يقوم و فاطمه قاعده انتصار تشدها تهز راسها لا توطى عليها
انتصار / نبهى عليهم ما يقولولهاش حاجه عن حوار عباده ما تشغليش البت و تزودى همها بهم اخوها ابنك محتاجك
فاطمه تبص فى الارض و تتنهد و تقوم
فاطمه / لو عوزانى اقعد يا سماح هخليني
سماح / ما اتحرمش يا امى روحى انتى ارتاحى مغاورى معايا
فاطمه تهز راسها و تمشي و اول ما تقف جنب مغاورى تشد كتفه يوطيلها
فاطمه / عشان اخوها تعبان بس غير كدا ليكوا روقه
مغاورى يهز راسه
فاطمه / ما تقولهاش حاجه خليها ترتاح
مغاورى يهز راسه فاطمه تمشي و تقفل الباب مغاورى يروح يقعد جنبها و يمسك ايدها
سماح / جبتلى سرايا و لا طقم اللماظ هتعوضنى عن ضنايا اللى راح ازاى
مغاورى / مفيش حاجه بتعوض الضنا يا سماح كان ضنايا انا كمان ضنايا اللى اتعلقت بيه قبل ما يجي و اتخيلته بيجرى ورا عبايتي و اعلمه كل اللى ابويا علمهولى دا انا من يوم ما عرفت انك حامل و انا بنام و اصحى احلم باليوم اللى اشيله فيه
سماح / يبقي تجيب حقه
مغاورى / قولت لامى تخليها تلم هدومها هتسافر اسكندريه تعيش هناك
سماح / بقولك حقى حقى
مغاورى / الكل قال كانت حادثه و دلوقت بسالك زقتك و لا رجلك اللى فلتت
سماح / انا ليا تار عند عمتك لو ما جبتهوليش انت اهلى هيجيبوهولى
مغاورى يبصلها و يبص فى الارض و يهز راسه
سماح / ابويا شاهين الله يرحمه وصاك عليها بس دى قتلت ضناك
مغاورى / مقدرش اقتلها ما كانتش تقصد ما كانتش تقصد
سماح / عباده فين لسه ما جاش
مغاورى / انتى عارفه ظروف البلد كان هنا لحد ما اطمن عليكي ان شاء الله هيبقي يجي يطل عليكي بس لما تشدى حيلك شويه
سماح تهز راسها و تغمض عنيها و تعيط مغاورى يمسك ايدها و يبوسها تبصله
سماح / كان نفسي افرحك
مغاورى / فرحان انك قومتى منها بالسلامه الباقي يتعوض
سماح تمسح دموعها مغاورى يروح يبوس راسها
………………
فى اوضه عباده
عباده بيرجع و خديجه سنداه يصرخ فيها
عباده / قولتلك اطلعى بره اطلعى بره
خديجه / انا ما اقدرش اديك مسكنات اكتر من كدا
عباده / بموت يا خديجه بموت عضمى بيتكسر و جسمي بيفور
عباده يرجع
خديجه / طب اهدى اهدى الدكتور زمانه جاى اهدى
عباده يقع فى الارض خديجه ما تقدرش تسنده تطلع تجرى تفتح الباب مختار و امين واقفين على الباب يشوفوها يدخلوا يجروا يشيلوه يحطوه على السرير ياخد وضع الجنين و عمال يان
خديجه / انا ما اقدرش اديله اى حاجه تانى يتعب كدا
مختار / هتبقي ليله صعبه و طويله بس هو قدها ان شاء الله
امين / انا بقول تروحى ترتاحى فى اى اوضه عشان الحمل و احنا جنبه للصبح ما تقلقيش عليه و ما دام ما لوش دوا تانى ياخده خلاص
عباده كرمش ملايه السرير فى ايده
عباده / كلكوا اطلعوا بره … اطلعوا بره قولت
عبد الله يخبط على الباب
عبد الله / الدكتور جه
الدكتور يدخل يحاول يكشف على عباده عباده منكمش فى نفسه
عباده / لاخر مره اطلعوا بره … اطلعوا بره
عباده يحاول يقوم يزقهم يقع فى الارض يتشنج
……………………
فى فيلا فيرا
فيرا بتشرب من كاس و بتتمشي على حمام السباحه رشيد يدخل
رشيد / مزاجك عالى و لا ايه
فيرا / النهرده يوم صعب اوى على الزنايته
رشيد / خير
فيرا / سماح فى المستشفى و عباده بيتلوى دلوقت فى الارض و بيصرخ و ما حدش قادر يساعده
رشيد / وقعتيه ؟
فيرا / ما كانش صعب و صدقنى لو كنت عاوزه ناصر نفسه كنت جبته
رشيد / امال اشمعن عباده
فيرا / عشان ما لهمش كبير بعده
رشيد / ناصر عايش
فيرا / كلنا هنموت يا رشيد سنه الحياه ما حدش بيعيش للابد
فيرا تمشي تحط الكاس على ترابيزه و تمشي و رشيد متابعها
………………….
فى اوضه عباده
الدكتور / انا اديته منوم بس البروتوكول اللى معايا مختلف عن حالته خالص واضح انه واخد حاجه اقوى
مختار / هنستاذنك تفضل معانا للصبح امين هياخدك اوضه جنبنا ترتاح فيها للصبح يمكن نحتاجك
الدكتور / اكيد
امين / اتفضل يا دكتور اتفضل
امين ياخد الدكتور و يمشي خديجه تروح تقعد جنبه و تاخد فوطه صغيره و تمسحله العرق من على وشه
خديجه / و انت يا مختار روح ارتاح انا جنبه للصبح
مختار / اخاف يفوق و انتى لوحدك مش هتقدرى عليه ارتاحى انتى و انا هخليني جنبه النهرده
خديجه / انا عرفاه انكوا تشوفوه موجوع بتوجعه اكتر من وجعه عاوزنا نطلع بره عشان نفسه يصرخ كاتم جواه يا قلبي
خديجه تعيط
مختار / هيعدى يومين بالكتير
خديجه / يومين كتير … يومين كتير اوى مش هيستحمل يومين
مختار/ هو نايم و انتى مش هتقوليله فانا هقولك حاجه مش هقولها قدامه
خديجه تبتسم و تمسح دموعها
مختار / عباده اقوى واحد فينا كلنا عشان كدا اصطادته الاول مش عارف لو كنت مكانه كنت هستحمل لحد دلوقت و لا لا
خديجه / لما ربنا هيكرمنا و يعدى منها هيبقى زى الوحش ما حدش هيقدر يمنعه
مختار/ ما حدش كدا كدا هيمنعه بالعكس الطلعه دى تعدى على خير و كلنا هنسن سنانا عليها
خديجه / قلبي مقبوض منها اوى
مختار / بصي … خليكي جنبه شويه ما دام لسه واخد الدوا و انا ساعه و لا اتنين و هاجى اشقر عليه من بعيد اقولك خدى راحتك هبعتلك هند و لا مريم و لا اى حد من الحريم
خديجه / روح و ارتاح و ما تقلقش انا هاخد بالى منه كويس
مختار يهز راسه و يطلع بره و يقفل الباب
………………….
فى اوضه ناصر
ناصر قاعد على كرسي و انتصار ساجده فى الارض تقوم و تتشهد و تسلم
انتصار / انا مش قادره اللى بيحصل ده كتير قلبي قايد نار من جوه
ناصر / روحى اقعدى مع ام عباده ما نطقتش حرف من ساعه ما مشينا من المستشفي
انتصار / و هو فى كلام ممكن يتقال ربنا يصبرها … انت هتعمل ايه مع مغاورى
ناصر / تخرج بالسلامه و نطمن على عباده و نفوقله مع انه صعبان عليا اوى
انتصار / و انا بس مش هينفع نسكت الدنيا بتوسع منهم و مش عارفين يلموها
ناصر/ اسيب الوليه بنت الكلب اللى هتوقعلى عيالى واحد ورا التانى واتفرغ لخناقات الحريم حاضر
انتصار / لا خليك انت فى اللى انت فيه بس انا بقي مش هسكت و مش هى خناقات حريم سبنى انا بقي اتصرف
ناصر يهز راسه انتصار تطلع بره
…………….
فى اوضه فاطمه
فاطمه بتعيط و هند قاعده جنبها بتطبطب عليها
هند / بكره ربنا يعوضها خير انا حاسه بيكي و بيها و الله بس صدقيني مغاورى شكله كان هيتجنن عليها و هى كمان بتتكلم عنه حلو اوى
فاطمه/ الاتنين فى يوم واحد يا هند
هند / ربنا هيفرجها و لعله خير ما حدش عارف
فاطمه / بس قسما بالله ما هسيب حق ولادى
هند / ما حدش هيسيبه هو بس يقوم بالسلامة و نطمن عليه و بعدين
فاطمه / شافوا مننا ايه وحش عشان يغدروا بينا دا احنا خيرنا على الكل … دا احنا بنبقيهم على روحنا يعملوا فينا كدا يعملوا فى عيالي انا كدا الاتنين الواد و البت فى يوم واحد … حسبي الله و نعم الوكيل اشكى لمين غيرك يارب حقى عندك يارب
هند / اهدى يا بطه بدل ما يجرالك حاجه
فاطمه / يجرا ياريته كان جرا و لا عشتش اليوم ده … ابنى بيتقطع جوه و خايفه اقوم ابص عليه انا ابنى ما يوقعش راجل … سيد الرجاله كلهم
هند تطبطب عليها
فاطمه / انا هقوم اصلى الكلام معاكى ما فيهوش فايده انا هقوم اتوضى و ادعيلهم الاتنين ما ليش غيرك يارب حقى عندك يارب
فاطمه تدخل الحمام و تطلع تانى
فاطمه / انا كويسه يا هند روحى شوفى جوزك
هند / طب خليني
فاطمه/ مش فايقه لزن و مناهده اسمعى الكلام ما تتعبينيش
هند / تمام تليفونى جنبى
فاطمه / يلا توكلى على الله يلا
هند تمشي و فاطمه تدخل الحمام
…………………
على القهوه تانى يوم
يوسف / نعم !!!! يعنى ايه
حامد / يعني فيها لاخفيها يا ابن اخويا ما انا مش هعرفك على المحامى و تطبخوها سوا و تطلعونى من المولد بلا حمص
يوسف / دا ابتزاز بقي
حامد / سميها شراكه احسن و لا هو انا فى الغم مدعى و فى الفرح منسي و على العموم انا مش هتقل عليك انا هاخد عربيه كمان اشغلها و نصيبي الشرعى فى ورث ابويا الله يرحمه و حلال عليك الباقي
يوسف/ ورث ايه و عربيه ايه انت مش اخدت فلوسك من بابا
حامد / نعم !!! و هى الفكه دى كانت حقى انا ليا ربع المحل ده بشرع الله
يوسف / دا عند امه الكلام ده
حامد / خلاص براحتك هطلع على امك و اخد حمدى فى ايدي و اخدهم و نروح نخرج ابوك من المستشفي و لما يبطل الهباب اللى بيدهوله هناك هيرجع لعقله و ساعتها هتبقي كانك يا ابو زيد ما غزيت
يوسف / هجبلك العربيه و ارضي عشان ما تخربهاش عليك و عليا و ساعتها لا هتطول العربيه و لا حتى الهوى
حامد / عربيتين
يوسف / مقدم العربيتين و انت ادفع اقساطهم
حامد / ماشي عشان انت ابن اخويا و حبيبي بس … هترفع القضيه امتى
يوسف / مش دلوقت المحامى قال استنى شهر و لا اتنين لما الدنيا فى المحل تقف و نحتاج امضه ابويا على اى حاجه ساعتها ما حدش لا هيشك و لا يتكلم
حامد / بس دا كدا كتير اوى و انا ورايا التزامات
يوسف / و انا ما عييش حتى المحامى بتاعك بيصرف من جيبه لحد ما احط ايدي على الفلوس
حامد / بالساهل كدا
يوسف / بالساهل ايه دا ممضيني على شيك بخمسين الف تحت الحساب
حامد / يابن النصابه ليه يا عم دا حتى المستشفى حكومى معفنه
يوسف / امال انت فاكر ايه دكتور و ممرضين و مستشفى كامله غير عربيه الاسعاف باللى فيها كل دول قبضوا مقدم غير مصاريفه هو شوف انت بقي
حامد / امال انا كدا بقي هاخد حقى امتى
يوسف / لما اكسب القضيه طبعا امال هجيبلك منين
حامد / لا كدا الكلام يتغير
يوسف / دا اللى عندى غير كدا وفر الليله دى كلها و روح قولهم لانى معيش فى جيبي جنيه حتى الشاى ده انت اللى هتحاسب عليه
حامد / نعم !!!
يوسف / ما انا لازم اتعلم منك برده عن اذنك
يوسف يسيب المكان و يمشي حامد ياخد باقى كبايه يوسف و يشربها
حامد / على النوته يا ابنى
حامد يمشي
………………….
فى كافيه
وسام / انا لا عاوزاه يموت و لا حتى يتعور يادوب تخوفه عشان يرجعلى فلوسي
بلطجى / بسيطه يا ست الكل اعتبرى فلوسك وصلتك
وسام / ما تقلقش دول مقدم
وسام تديله ظرف فيه فلوس
وسام / و ليك زيهم لما ترجع الفلوس
البلطجى يرجع الظرف من غير ما يبص فيه
البلطجى / عيب الكلام ده يا ست الكل ان شاء الله لما ارجعلك الفلوس يبقي كفايا عليا الحلاوه
وسام / لا معلش خدهم بس بالله عليك بالله عليك تجبلى الفلوس منه قبل ما يسافر و من غير اى مشاكل انا مش عاوزه اكتر من فلوسي
البلطجى / ما تقلقيش يا ست الكل هو انا تلميذ
وسام تبتسم و تهز راسها
………………..
فى اوضه عباده
عباده بيعض فى المخده و يكتم صريخه و مختار و سليمان مثبتينه
مختار / هتعدى يا عباده قسما بالله لتعدى و ندوقها الاه اهين بس انت اجمد و استحمل
عباده / مش قادر
مختار / لا تقدر
سليمان / سماح زمانها جايه اجمد عشان خاطرها هى مش ناقصه
مختار / اجمد يا عباده و على راي امين اجمد من وجع الطلق و الولاده يعني
عباده / عليك و على امين انا مش قادرلكوا ااااااااه
مختار / فين الدكتور يديله حقنه المنوم ما عدتش قادر عليه
سليمان / انادى خديجه
عباده يصرخ
عباده / لا خديجه لا
مختار /طب اهدى بقي اهدى
باب الاوضه يتفتح و الدكتور يدخل و ووراه خديجه
مختار يثبت عباده زياده و الدكتور يديله الحقنه ثوانى و عباده ينام مختار يرمى نفسه على الارض
مختار / فرهدتنى كنت روحت انا جبت سماح
خديجه واقفه على راس السرير بتبص على عباده بحزن
خديجه / انتوا هترتاحوا انما هو لا وجعه لسه شغال بس هو الوحيد اللى حاسس بيه
مختار يقوم خديجه تمسح دموعها
مختار / فات الكتير ما باقى الا القليل هتعدى ان شاء الله
خديجه / اطلعوا بره انا هخليني جنبه لحد ما يفوق ارتاحوا حبه عشان تقدروا تكملوا معاه
مختار يهز راسه
سليمان / مش هتحتاجى حاجه
خديجه / كتر خيرك
سليمان و مختار يمشوا خديجه تفتح الدولاب و تطلع غيار نضيف و تدخل الحمام تملا طبق بلاستيك مايه دافيه و صابونه و فوط و تروح تحطهم على السرير جنب عباده
خديجه / من يومك نضيف ما بتحبش ريحه عرقك
خديجه تقلع عباده التيشيرت
…………………….
فى المستشفى
ناصر / مش هتروح معاك يعني مش هتروح معاك احنا مش هنسيب اللى ورانا و اللى قدامنا و نيجي نخدمها فى بيتك لما تبقي تقوم بالسلامه و تقدر تقف على رجليها تبقي تقرر
ام مغاورى / يا اخويا دا احنا نشيلها جوى عنينا
فاطمه / جربنا عنيكوا يا ام الغوالى طلعت بترقد فى المستشفيات زى ما انتى شايفه
مغاورى / و انا مراتى مش هتبات بره بيتها
فاطمه / يبقي طلقها يا حبيبي
مغاورى / سالتيها ؟ دا بيني و بينها دى حياتنا احنا الاتنين
فاطمه / اللى راقده دى علاقتك بيها شهور انما انا شلتها فى بطنى و ربتها سنين و مش هقف اتفرج عليها بتضيع منى عشان السكينه سرقاها و حباك
ناصر / اسمع يا مغاورى احنا اللى فينا مكفينا و ورانا هم ما يتلم … لا اله الا الله سماح هتروح على بيتنا هتفضل تحت رعايتنا لحد ما نطمن عليها و تقدر تقف على رجليها و ساعتها هى تختار
مغاورى / طب ما نخيرها دلوقت
فاطمه / اختارتك قبل كدا و كانت شايفه القرف فى بيتك و ما كانتش قادره تفتح بقها يا كبدى خايفه من كلام الناس عليها بنتى فى حضنى و الحمد لله ان ما عدش فى لا حمل و لا عيال يجبرونا على الجوازه دى
ناصر / ام عباده
فاطمه/ انا تعبت انا ما ضيعتش عمرى فى ربايتها عشان ادفنها دا انا لو مجوزاها لواحد من الغفر ما كانش دا بقي حالها مش كبير الجوارحه
فاطمه تسيب المكان و تمشي
ام مغاورى / احنا مقدرين اللى هى فيه عباده و سماح … الله يعينها
مغاورى / بس انت عارف يا كبير ان اللى حصل ما كانش ليا ذنب فيه و ان اللى مات ده ابنى انا و ما حدش هيزعل عليه قدى
ناصر / ما كانش اتولد و لا لحقت تتعلق بيه و انت لسه صغير تتجوز و تجيب غيره انما الست اللى جوه دى ما فيش حاجه فى الدنيا هتعوضها عن بنتها
مغاورى / سماح مراتى و قسما بالله اغلى عندى من روحى و افديها بعنيا و عمتى هتسافر النهرده اسكندريه و تسيب البلد بحالها قولى اعمل ايه اكتر من كدا و انا اعمل اطخهالكوا يعني اطخها على حاجه هى ما كانتش تقصدها و لا حتى السبب فيها
ناصر / اسمع يا مغاورى انت زيك يا ولادى بس الدنيا ما بتمشيش كدا احنا هناخد سماح و لما الدنيا تهدى و احنا نهدى نتكلم تانى عشان العند دلوقت هيكبر الموضوع
مغاورى / عندى و لا عندكوا
ناصر / انا قولت اللى عندى فكر فى كلامى و اعمل اللى تعمله
ناصر يخبط على باب الاوضه و يدخل مغاورى يدخل وراه
مغاورى / سماح هتروح معايا ان شالله نقلبها بحر دم
ناصر يبص لمغاورى و امين يقوم يقف و يبص لمغاورى بغضب و سماح راقده فى السرير
ناصر / نقلبها يا مغاورى و بدل ما كنت هاخدها لحد ما تقوم بالسلامه هاخدها خالص و اقلبها دم يا مغاورى اقلبها
سماح / مغاورى
فاطمه / خليهم يكتبولها خروج يا امين
مغاورى / اختارى يا سماح انا و لا هم
ام مغاورى / مغاورى
ناصر / انت زودتها اوى هو مفيش احترام لكبير و لا ايه
مغاورى / على راسي يا كبير بس مش هقف اتفرج و انتوا بتاخدوا منى مراتى
ام مغاورى / خليها ترتاح يومين عند امها و بعدين نتكلم يا ابنى
مغاورى / سماح
ناصر / ما لكش دعوه بيها
مغاورى و ناصر يقفوا قصاد بعض
امين / اعقل يا مغاورى اعقل
مغاورى يبص لسماح بتعيط على اخرها
مغاورى / يومين … يومين بالعدد … تقومى بالسلامه و هاجى اخدك … يلا يا اما
مغاورى ياخد امه و يمشوا
فاطمه / دا اتجنن و لا ايه … بس يا ضنايا بس بس حسبي الله و نعم الوكيل فيهم
امين / لو تسمحلى يا كبير
ناصر / بعدين روح خليهم يكتبولها خروج خلينا نروح ورانا طالعه الفجر و لازم نجهزلها
امين / تمام
امين يمشي
………………………
فى اوضه عباده
خديجه / دا ما كالش حاجه من يوميها و لو فاق قبل ما المحلول بيخلص بيشده من ايده دا غير الترجيع طول الوقت بسبب الوجع دا غير عروقه اللى اتشرحت بسبب فركه فى السرير و الكانوله فى ايده
الدكتور / مهو طول ما هو صاحى ما بياكلش فالمحاليل هى انسب حل و ممكن نبقي نحاول نشيل الكانولا قبل ما يفوق
خديجه / بس انا مش حاسه باى تحسن
الدكتور / هو واخد جرعه زياده هتاخد وقت بس ان شاء الله هيخف
خديجه / تمام يا دكتور تعباك معلش
الدكتور / ازاى بس دا عباده خيره مغرقنا
خديجه / تسلم و تعيش
الدكتور يمشي فاطمه تدخل تبص عليه
فاطمه / عامل ايه؟
خديجه / احسن كتير الحمد لله قولتى لسماح
فاطمه / لا ما قدرتش ما بطلتش عياط من ساعه خناقه المستشفى
خديجه / خير ايه اللى حصل
فاطمه / كل حاجه قسمه و نصيب و هى قسمتها جت على كدا
خديجه / عشان مغاورى و لا تقصدى الجنين
فاطمه / العيش هناك فى السرايا انا ما اقدرش اعيش هنا و انا قلبي واكلنى عليها هستنى ايه هيجرالها ايه اكتر من كدا
خديجه / دى كانت حادثه
فاطمه / مهى لو عمتك كانت عدله ما كانتش سماح طلعتلها و لا كانت جريت ورا سماح على السلم و لا شدوا مع بعض لو كانت عدله من الاول ما كانتش حاجات كتير حصلت
خديجه / لا اله الا الله
فاطمه / روحى اتكلمى معاها كلمتين هديها قوليلها انى مش ناويه على خراب البيت بس مينفعش مغاورى يرد على الكبير كلمه بكلمه و حرف بحرف
خديجه / مغاورى عمل كدا
فاطمه / اقولك ايه بس
فاطمه تتنهد
خديجه / فاضله نص ساعه و يفوق مختار هيجي قبل ما تخلص خليكي جنبه بيان ساعات بس ما بيكونش صاحي
فاطمه / ريحته حلوه … و هدومه نضيفه
فاطمه تبص لخديجه
خديجه / بغيرهاله كل شويه و اغسله انتى عرفاه دا كان بيستحمى مرتين فى اليوم عشان بيكره حد يشم ريحه عرقه
فاطمه تبتسم و تطبطب على ضهر خديجه
فاطمه/ انا جنبه روحى لسماح شويه
خديجه / عيني حاضر
……………….
فى سرايا الجوارحه
مغاورى و امه يدخلوا السرايا يقابلوا ماجده و كوثر واقفين و فى غفير بياخد شنطهم
كوثر / هى ما جاتش معاكوا
مغاورى يبصلها و يعديها تمسك ايده
كوثر / انا ما زقتهاش قسما بالله ما زقتها و لا كنت اتمنى ان حاجه من دى تحصل
مغاورى / غريبه يا عمتى ما انك كنتى قايمه نايمه بتحلمى تخلصي منها اهى مشيت يا عمتي
ام مغاورى / يا ابنى الدنيا بس تهدى و هترجع
مغاورى / و ضنايا هيرجع و الحياه اللى كانت بين العيلتين هترجع
ماجده / ما طول عمركوا بتتخانقوا انت و مختار و عباده و الدنيا بتروق اللى بينا و بين الزنايته كبير
مغاورى / لو مش عاوزه تسافرى
ماجده / انا مش هسيبها لوحدها و العيال امى هتاخد بالها منهم لحد الاجازه هبقي ابعت اخدهم و لو عرفت انقلهك الترم التانى مدارس هناك يبقي خير و بركه
مغاورى يوطى على رأسها يبوسها
ماجده / انا أصلا بحب اسكندريه والشقه اللى جايبنهالنا على البحر و المنظر منها يرد الروح هعوز اكتر من كدا ايه
مغاورى / خدوا بالكوا من روحكوا و هبقي ازوركوا كل شويه
ماجده تهز راسها و تمسك ايد كوثر و تشدها يمشوا
ام مغاورى / انت هتسيبهم يمشوا بجد !!! مش خايف عليهم من الطريق
مغاورى / الطريق امان ما تقلقيش انا تقريبا بعت معاهم رجالتى كلهم
مغاورى يطلع
ام مغاورى/ على فين
مغاورى/ هطلع انام و ياريت ما حدش يصحيني مهما حصل
ام مغاورى / اجبلك تاكل
مغاورى/ تتمسي بالخير يا اما
مغاورى يطلع و امه بتبصله بحزن الستات تتجمع حواليها
ست / انتى مش قولتى سماح بقت كويسه امال ما جاتش معاكى ليه
ام مغاورى تتنهد و تسيبهم و تمشي
…………………..
فى فيلا فيرا
رشيد / شايفك هاديه اوى مش المفروض تكونى بترتبى لبليل
فيرا / و ايه هيحصل بالليل
رشيد / الزنايته عندهم طالعه
فيرا / ااااااه لا دى حكايه و خلصت خلاص انا دلوقت برتب لحاجه تانيه خالص
رشيد / خير
فيرا / هتعرف بالليل ههههههههههههه
رشيد / مالك كدا متغيره و مش مظبوطه
فيرا / نشوه الانتصار
رشيد / افندم
فيرا / انا خلاص يا رشيد بيني و بين هدفى خطوه ايام و اخلص اللى جيت مصر عشانه و ايام تانيه و اخلص شغلى فى مصر و امشي
رشيد / ازاى و البى كاى تقريبا بطل يتباع و خسرتى فلوس كتير اوى مش كان اولى انك تعوضيها
فيرا / انا ما خسرتش يا رشيد انا حقتت فى مصر مكاسب رهيبه انتوا شعب جميل اوى يا رشيد شعب مزاجنجى بيحب يبسط نفسه مع انه معهوش غير ملاليم انا بقي لميت الملاليم دى و طلعت مليارات
رشيد / للدرجادى
فيرا / للدرجادى … و مش بس كدا انا كمان حققت اهداف سياسيه قبضت عليها برضه ملايين تانين زى انى خليت الحكومه تتلهى فى الهبل اللى اسمه البى كاى ده و تجرى حوالين نفسها فى الوقت اللى فى عناصر تانيه بتشوف شغلها … قضيت على روس كبيره فى البلد ما كناش عارفين نشتغل معاهم انتحروا موتوا نفسهم بايديهم زى اخو حبيبتك و اللى زيه و مسك مكانهم ناس تانين و فى الاخر لما خلصت مصالحنا معاهم قتلناهم عشان ما حدش يقدر يوصلنا
رشيد / انتوا مين
فيرا / احنا كتير اوى بس تعرف ايه اهم حاجه فى كل ده
رشيد / الزنايته
فيرا / هيبقوا عبره الناس اللى زى الزنايته ما ينفعش يتسابوا هيصلحوا اللى بنعمله هيقفوا ضددنا وقت الجد اللى هيفضل لازم يكون ضعيف و مغيب عشان لما يجي الوقت يبقي تحت رجلينا
رشيد / انتى ياهوديه اسرائيليه صح
فيرا / روسيه ملحده الديانات و الجنسيات ما لهاش قيمه فى شغلنا يا رشيد انا زيك ولائي الاول للفلوس و ههههههه على فكره مش اسرائيل بس اللى ليها اطماع فى مصر انتوا ليه فاكرين انها العدو الاول ليكوا دا انتوا نفسكوا كمصريين مسلمين اعداء لبلدكوا اسوء من اليهود انتوا يا مصريين بتاذوا بعض و بتاذوا بلدكوا اكتر من اليهود
رشيد / يا سلام
فيرا / بص حواليك يا رشيد انا حققت كل النجاح ده باستخدام مصريين شويه الاجانب اللى معايا يتعدوا على الصوابع جيشي اللى بره تسعين فى الميه مصريين
رشيد يبصلها و ساكت تبتسم
فيرا / ساكت ليه مش عاوز تقولى حاجه
رشيد / انا اتعاملت مع سايكو كتير بس انتى … انتى معديه
فيرا / و انا اتعاملت مع رجاله كتير اوى … كنت بالنسبالى مختلف كان نفسي اوى ارسملك نهايه تانيه غير دى … كنا هنعمل شغل خطير مع بعض كنا هنحكم العالم
رشيد / ههههههههههه نحكم العالم ايه و شغل سبابستون و كارتون نيتورك دا ايه مفيش الكلام ده مفيش قوى الظلام و تحقيق اطماع الشر و ابو الغضب و الهبل ده ما فيش
فيرا / فعلا عشان دول كانوا شريرين و قايلين انهم اشرار بس الاخطر منهم الملايكه اللى عايشين فى الدور و هم فى الاصل اسوء من الشياطين … كنت هتفهم لو ما كانتش سمر دخلت حياتك و غيرتك
رشيد / انا كدا كدا هبطل خالص
فيرا / انا متاكده انك هتعمل كدا
رشيد / انا خارج هتعوزى حاجه
فيرا تبتسم رشيد يمشي و هو بيعانى انه يدارى التوتر اللى جواه
……………………
فى اوضه ناصر
انتصار بتساعده يلبس
انتصار / اشمعن المرادى اللى مصمم تطلع بنفسك
ناصر / عشان ما عدش فيا حمل اقف استناهم هيرجعوا و لا ما يرجعوش و بعدين ما تخافيش احنا مامنين المكان كويس اوى لو فكروا فى غدر هنتغدى بيهم قبل ما يتعشوا بينا
انتصار / تروحوا و ترجعوا بالسلامه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
