رواية البر التاني الفصل التاسع والثلاثون 39 بقلم لولو محمد
رواية البر التاني الجزء التاسع والثلاثون
رواية البر التاني البارت التاسع والثلاثون
رواية البر التاني الحلقة التاسعة والثلاثون
فاطمه / على هواكى تصرفاتها دى طبعا
انتصار / و هى يعني بتدلع نفسها لحد غريب هعوز ايه اكتر من كدا
فاطمه تسيب المكان و تقوم تمشي و هى بتتكلم فى التليفون
فاطمه / ازيك يا ام داوود فاضيه النهرده … بجد !!! لا خلاص مش مشكله هند اولى طبعا انتى كنتى لسه عندى من كام يوم انما هى ما حدش حط ايده فيها من يوم فرحها زمانها قشفت … نبقي نتفق نبقي نتفق … يلا سلام
فاطمه تقفل و تنفخ
فاطمه / اه يا بنت المسروعه
سماح تدخل
سماح / بقولك ايه يا اما عاوزه اروح لخديجه النهرده
فاطمه / اشمعن النهرده يعني
سماح / هنهيص معها و مع البنات شويه
فاطمه / ما تهيصي هنا مع البنات و لا احنا ما لناش نفس نفرح
سماح / ما اقصدش بس
فاطمه / حطى السماعات و لمى البنات و هيصوا هنا و سبيني السعادى انا مش طايقه روحى
فاطمه تطلع فوق و سماح واقفه تنفخ
سماح / انا قرفت
……………….
على طريق
مختار / حلوه لبنان انا ما روحتهاش بس اسمع يعني المهم عملت ايه امبارح فى الجامعه
عباده / ناقصنى شويه ورق هكمله و اقدم ان شاء الله بس شكلها هيبقي بعد شهر العسل بقي و عليك خير
مختار / على البركه كل تاخيره و فيها خيره
عباده / على رايك كله باوانه … بس انت مزاجك رايق النهرده يعني خير
مختار / عادى يعني
عباده / هو ايه اللى عادى و انا مش عارفك و لا ايه
مختار / خلي عينك انت كدا سايبه الدنيا و راشقه فى حياتي اياكش تخرب و ترتاح
عباده / و انا ايه يا خويا اللى هيريحني فى خراب حياتك
مختار / بهزر معاك مالك انت خير ايه اللى معكر مزاجك
عباده / مش حاجه بس الدنيا مكومه فوق راسي و عاوز انجز مليون حاجه فى وقت واحد
مختار / ليه يا عم امال لو ما كنتش انت مسؤل الترفيه الاول فى السرايا
عباده يبصله
مختار / دا الحوار شكله جامد اوى فى ايه يا ابني طب قولى ايه اللى ناقص و انا اعمله اقولك سيب حوار لبنان عليا هخلص حوار التجنيد و هظبطلك رحله تنسيك الدنيا يا سيدى و لا يكون عندك فكر
عباده / على يمينك هنا
مختار يركن عباده ينزل و يسند على الباب
عباده / الفتره الجايه فتره صعبه
مختار / سيب الكلام ده لغيرك ياما دقت على الراس طبول
عباده يبتسم مختار يمدله ايده عباده يمسكها
مختار / ركز فى فرحتك و الباقي محلول بامر الله
عباده / تسلم يا ابن الزيني
مختار / يلا بالاذن انا بقي عشان ما اتاخرش
عباده يمشي و مختار يمشي
……………….
فى السرايا
فاطمه تدخل المطبخ تلاقي انتصار بتحط صينيتين رز معمر فى فرن و صينيتين تانين فى فرن تانى و فى اربع حلل كبيره على البوتجاز بتغلى
فاطمه / انتى واقفه فى المطبخ بطولك
انتصار / اللوبيا على النار و الرز فى الفرن مش حوار يعني
فاطمه / كنتى ناديتيني اساعدك
انتصار / شيلاكى للتقيله اللوبيا كدا كدا متنقيه و منقوعه من امبارح يادوب ضربت الطماطم و قطعت البصله و مريم الله يباركلها ساعدتنى
فاطمه / و هى فين دلوقت ما شوفتهاش بترقص مع البنات بره يعني
انتصار / لا مريم مع هند فى الاوضه بيعملوا ماسك ايه كدا مش فاكره
فاطمه يبان على وشها الضيق
انتصار / انا قولت انك راجعه من السفر تعبانه و محتاجه ترتاحى عشان كدا ما ندهتش عليكي تحبى نقعد فى الجنينه الورانيه شويه على ما الرز يستوى
فاطمه / لا خلينا هنا بدل ما نسرح و الاكل يطير و زى ما انا شايفه مفيش غيرنا
انتصار / طب اقعدى هصبلك كبايه شاى معايا و تحكيلى عملتى ايه فى مصر من غيرى
فاطمه تقعد
فاطمه / لا و انتى الوحده كانت قتلاكى اوى من غيرى
انتصار / الست عزمتنى ما اروحش
فاطمه / طب قوليها لغيرى يمكن يصدقك الست عزمت مريم و عمها و عيالها بس ما جابتش سيرتك
انتصار تبتسم
انتصار / لما يبقي يكتب عليها تبقي تروح لوحديها عمها كان فى شغله
انتصار تناول فاطمه كبايه شاى و تمسك واحده تانيه و تقعد جنبها
انتصار / البيوت ياما بيحصل فيها ما تشيليش فى قلبك و فكيها
فاطمه / بطلى تبصى تحت رجليكي و قال على راى المثل اكسر للبت ضلع
انتصار / هبقي انا و الدنيا عليها يا فاطمه
فاطمه / و هو فى حد فى الدنيا قادر عليها انا بس نفسي افهم مسنوده على ايه للجباروت دا كله
انتصار / حرام عليكي دى اغلب من الغلب
فاطمه / والله ما فى اغلب منك
انتصار / يا بخت من بات مظلوم و لا باتش ظالم
فاطمه / ما شوفتيش الهدوم اللى اشتريتها جبتلى عبايتين سواريه واحده للحنه و التانيه للفرح
انتصار / انتى اللى بتحلى اللبس يا ام عباده نطفى على الاكل و نطلع تفرجيني عليهم و لا انتى ناويه تخليها مفاجاه
فاطمه / لا هفرجك و لو حاجه عجبتك فيهم خديها ما فيش حاجه تغلى على ام فاتن
انتصار / ما تبقيش عاقله و حلوه كدا علاطول ليه انا مش فاهمه
انتصار تقوم تبص فى الحلل و تقلب فاطمه تقوم تساعدها
انتصار / تفتكرى هيكفوا و لا ازود
فاطمه / هيكفوا اللوبيا بتفرط بتفرط
انتصار / على الله
انتصار تغطى الحله و توخ تقعد تكمل كبايه الشاى
………………….
فى اوضه هند
هند و مريم كل واحده حاطه ماسك و لفين شعرهم و كل واحده حاطه رجلها فى طبق بلاستيك مليان مايه و ام داوود بتعمل رجلين مريم و هند و مريم بيقلبوا فى الموبايل على صور الفساتين
هند / الفستان الفيروزى ده حلو اوى
مريم تقلب فى الصور
مريم / البتنجانى منه احلى
هند / تيجي نجبهم الاتنين
مريم / هنلبس زى بعض
هند / فى مصر كانت موضه البرايدز مايدز كل صحبات العروسه بيلبسوا زى بعض
مريم / لا مش بنعمل كدا احنا قلبي قلبي يمكن نلاقي حاجه احلا
هند تقلب
هند / لازم نبعد عن الاحمر و الدهبى عشان سماح جابتهم
مريم / و الابيض و الاوفوايت و درجاتهم عشان اكيد خديجه جابتهم
هند تقلب فى الصور تقف قدام صوره طقم سواريه بنطلون واسع عليه ميني دريس طويل من ناحيه و قصير من ناحيه
هند / ايه رايك
مريم / بنطلون !!!
هند / واسع اهو ما فيهاش حاجه و احنا بنات مع بعض
مريم / البلوزه قصيره من النحيادى لا لا ما ينفعش
هند تقلب فى الصور
هند / ده الفستان اطول اهو و واصل للارض
مريم / مهو قصير من الناحيه التانيه
هند / عاجبنى اوى بصراحه بصي هبعت الصوره لمختار و هو يقولى رايه
مريم / فى واحده تلبس بنطلون فى فرح
هند / شكله حلو اوى
مريم / خلاص ابعتيه لعمى لو كدا هاخد انا الفستان البتنجانى اللى كان عاجبنى
هند / خلاص وافق ما وافقش اطلبهولك و خلاص ما دام عاجبك
مريم / هيوصل بكره صحيح
هند / بكره او بعده بالكتير هم كاتبين كدا على الموقع
مريم / خلاص اطلبيهولى
هند ترجع للفستان و تدخل الداتا و ام داوود تنقل لرجل هند
…………………….
فى المكتب
ناصر قاعد بيبص فى ورق و لابس نضاره القرايه الباب يخبط
ناصر / ادخل
الباب يتفتح و هند تدخل شايله صينيه عليها فنجان قهوه و كبايه مايه ساقعه
ناصر / دى عشانى
هند تبتسم و تدخل تحطهم جنبه
هند / حضرتك ما طلبتش بس انا عملتهالك من نفسي
ناصر ياخد الفنجان و ياخد شفطه
ناصر / لا تسلم ايدك بصحيح … جت فى وقتها .. اقعدى بقي و قوليلى يا ست البنات الرشوه ام مزاج عالى دى وراها ايه
هند تبتسم و تروح تقعد
هند / هى مش وراها حاجه انا بس كنت عاوزه اتكلم مع حضرتك
ناصر / اتكلمى يا هند خير يا بنتى
هند / مختار قالى ان اللى زيه فى الجيش
ناصر / انتى مش عوزاه يخش الجيش
هند / انا مش عوزاه يتاذى مختار بيضرب نار كويس و لياقته حلوه انا خايفه يحطوه على الحدود و حضرتك شايف الدنيا
ناصر / اه فهمت … هسالك سؤال
هند / اتفضل
ناصر / هو اللى واقف على الحدود ده ما لوش ام تحزن عليه مالوش بت حلوه زيك كدا بيحبها و مستنياه يقضي خدمته و يرجع
هند / انا ماليش غيره و حضرتك تعرف المحافظ يعني ممكن يتوسطله يخدم فى مكان كويس
ناصر / ممكن بس و بعدين هتحطيه فى ؤمؤم و تقفلى عليه جوزك مش عيل صغير عشان تحميه بالشكل ده كدا يتخنق منك
هند تبص فى الارض بحزن
ناصر / انتى عارفه انتى مشكلتك ايه
هند / انى بحبه ؟
ناصر / ما كلنا بنحبه دا ابنى البكرى يا هند هو فى حد هيحب مختار قدى … انتى مشكلتك يا هند انك ما بترميش حمولك على ربنا مع ان هو لوحده اللى فى ايده كل حاجه اينما تكونوا يدرككم الموت و لو كنتم فى بروج مشيده يا بنتى
هند تبص فى الارض و عنيها تتملى دموع
ناصر / انا حاسس بيكي على فكره
هند تبصله و الدمعه تنزل من عنيها تمسحها
ناصر / انا مقدر اللى مريتي بيه فى حياتك بس زى ما قولت ارمى حمولك على الله ما يمكن ما يدخلش
هند / ازاى واحد زيه ازاى ما يدخلش
ناصر / هى مش فى دفعات كامله بتاخد تاجيل سبيها على الله
هند / طب كلمله المحافظ عشان خاطرى والله مش هطلب من حضرتك حاجه تانى عشان خاطرى
ناصر / طب سالتى مختار ؟ مش يمكن يكون عاوز يدخل الجيش
هند / هيعوز يبعد عنى خمسه و اربعين يوم بحالهم و بعدين اشوفه مره فى الاسبوع لمده سنه بحالها
ناصر / و ممكن تلاته
هند تبص لناصر
ناصر / هههههههههههههههههه انتى خايفه يتصاب و لا مش هتقدرى تبعدى عنه قولى الحقيقه
هند / ما ينفعش الاتنين
ناصر / ينفع
هند / طب كلمله المحافظ عشان خاطرى
ناصر / حاضر يا هند
هند / بجد !!! هتكلمه بجد ؟
ناصر / بس بشرط
هند / ايه ؟
ناصر / هاخدك الرمايه تضربى نار على اهداف بتتحرك
هند / ارانب ؟
ناصر / كبرتى بقي على الكلام الفاضي ده
هند / انا بخاف اعور حد و اللى بيلف البتاعه دى
ناصر / هلفهالك انا مختار مش هيبقي معانا
هند / و هو انا مش هخاف على حضرتك يعني
ناصر / ربنا يباركلك يا بنتى بس مهو لازم حد يلفها يعني
هند تبص فى الارض
ناصر / ها قولتى ايه
مختار يدخل
مختار / فى ايه ؟
ناصر / اتاخرت كدا ليه انا كان فاضلى خمس دقايق و هقولهم يحطوا الاكل و نبيعك
مختار / و اهون عليك يا كبير … فى ايه يا هند مالك ؟ … فى حاجه يا كبير و لا ايه ؟
ناصر / كنت بقولها اخدها بكره تضرب نار قدامى
مختار / ليه يعني اشمعن
ناصر / فاضي بكره و … و بعدين انا حر كيفي كدا هو كل حاجه لازم يبقالها سبب يعني اهو نتسلى و لا هو حلال ليك و حرام علينا يعني
مختار / ما اقصدش يا كبيرنا بس يعنى هند و ضرب النار يعني
ناصر / طب نسالها هى … تحبى تيجي معايا بكره يا هند و لا لا
هند / حضرتك تؤمر يا كبير
ناصر / على بركه الله ممكن بقي ناكل لقمه و لا ايه
هند / فى موضوع تانى كنت عاوزه اخد رايكوا فيه
ناصر / خير
هند تطلع صوره الفستان السواريه اللى على بنطلون و تفرجهلهم
هند / انا عاجبنى ده بس مريم بتقول ما ينفعش اللبسه لا فى الفرح و لا الحنه
ناصر / حلو للفرح بس بلاش الحنه
هند تبص لمختار
ناصر / انتى لسه هتبصيله بقولك جعان
هند / هههههههههههههه حالا
هند تقوم و تمشي مختار يقعد مكانها
مختار / هههههههههههههه فى ايه خير
ناصر / احلى فنجان قهوه شربته و اكاد اجزم
مختار / تكاد تجزم
ناصر / اكاد اجزم انه من عمايل ام فاتن او على الاقل اشرفت عليه
مختار / لا هند بتعمل قهوه حلو اوى و دا ما يمنعش انها وقفت كتير و اتعلمت من ام فاتن يعني المهم ايه حوار ضرب النار ده
ناصر / هند عوزانى اتوسطلك عند المحافظ يخلى خدمتك فى حته كويسه
مختار يبص الناحيه التانيه
ناصر / انا بكره هلفلها البكره لو ضربت كلو صح انا هكلمهولك
مختار / هتكلمه تقوله ايه دا احنا عمرنا ما عملناها
ناصر / هقوله اللى هقولهوله ما فيش حاجه فى الدنيا ما لهاش تمن و انا شربت فنجان القهوه خلاص
مختار يبتسم و يبص على الباب
……………….
على الاكل
هند بتغرف هى و انتصار و تحط طبق قدام مختار و توشوشه يبتسم و توطى يوشوشها تضحك و تغطى بقها و فاطمه متابعه تقوم تغرف و تحط طبق قدام شاكر
شاكر / تسلم ايدك
فاطمه / الف هنا
شاكر / الواحد واقع و لو حطيتوا قدامه خروف هياكله
انتصار / الاكل كتير يا عمى الف هنا
فاطمه / مهو ده بسبب انكوا فطرتوا بدرى اوى
شاكر / هى يعنى الساعه دى هى اللى كانت هتفرق اوى يعنى
فاطمه / لا بس الاكل بلهوجه عشان تلحق ما بيخليش الواحد يفطر كويس
شاكر / احنا نلاقى فطار زى ده كل يوم و انا راضي
هند / بس كدا غالى و الطلب رخيص
فاطمه / و انتى هتقدرى على التعب ده كل يوم
هند / تعب عمى شاكر راحه
فاطمه / بس ما تجيش بقي تقولى تعبت و اصحوا بدرى و ساعدونى
هند / لا ما تشيليش هم الموضوع ده انا اصلا واخده على السهر
فاطمه / مصلحه حد يقول للراحه لا كدا بقي يا ام فاتن الفطار بقي تخصص هند
انتصار / لا فطار ايه انا طمعانه فى الاكتر من كدا
هند / هشيل اكل اليوم كله و لا ايه
انتصار / لا بس البت مريم فتنت عليكي
هند تبص لمريم
مريم / كانت فى المطبخ و انا بتاكد ان المكونات كلها موجوده
فاطمه / مكونات ايه ؟
هند / شوفنا على النت طريقه عمل الباستا فلورا فقولت اجربها يعني على الله بس تفلح و تطلع حلوه
ناصر / ان شاء الله تفلح قال على راي ام فاتن الحلو ما يعملش الا الحلو
هند / كدا هيبقي شكلى وحش اوى لو باظت انا قولت هعملها فى السر نجحت ادوقكوا باظت ارميها و لا من شاف و لا من درى
امين / مفيش حاجه بتحصل فى السرايا دى و لا من شاف و لا من درى احنا لينا عيون فى كل حته
هند / ربنا يطمنك
مختار / و بعدين انك تعملى و تبوظى حاجه و انك ما تحاوليش خالص حاجه تانيه خالص
ناصر / جبت المفيد يا ابن الزيني و يا مكتر الخزين فى المطبخ
فاطمه / و اهو اللى ما نكلوش احنا نرميه للبط ما عندناش حاجه بتترمى فى الزباله
هند / خلاص ان شاء الله اخلص مواعين الغدى و ابدء فيها
مختار يشدها عليه و يوشوشها تشد ايدها منه و تغطى وشها و هى بتبص فى طبقها ناصر مركز معاهم و مبتسم و يملا المعلقه و ياكل انتصار تحطله حتتين لحمه كبار يبصلها و يبتسم
……………….
فى اوضه فاطمه
شاكر يفرد ضهره على السرير و واضح عليه التعب
فاطمه / اجهزلك الحمام
شاكر / والله ما قادر يا فاطمه ضهرى بيوجعنى
فاطمه / ايه حكايه وجع الضهر دى طولت اوى
شاكر / هاخد زمنى و زمن غيرى يعني يا فاطمه
فاطمه / ما تقولش الكلام ده ربنا يديك الصحه و طوله العمر
شاكر / تسلمى يا ست الستات
فاطمه / ست الستات !!
شاكر / ايه اول مره اقولهالك و لا ايه ؟
فاطمه / لا قولتهالى كتير بس دا كان زمان بقي قبل ست هند ما تشرفنا
شاكر / يادى هند اللى حطاها فى دماغك
فاطمه / شكرت فى الاكل على الفطار قولت حقها تعبت انما على الغدى بتشكرها تانى ليه دا بدل ما تشكرنى انا و ام فاتن على الغدى
شاكر / ههههههههههههههه تعالى يا بطه هنا جنبى
فاطمه تقهد جنبه على السرير و هى مقموصه
شاكر / الجماعه هيجوا بكره يفرشوا صحيح
فاطمه / اه و الجديد الست هند كالعاده عرفت تلاقيلها حجه تخلع بيها فى حياتي شوف فى حياتى ما شوفت فى خبث و لؤم البت دى
شاكر / يا شيخه اتقى الله طب والله ناصر هو اللى حكم عليها بكده
فاطمه / و انت صدقت … اما انا لو فى نص خبثها يا لاهوى … دا انا كنت سويت الهوايل … لا و اللى ينقط الكل شايفها غلبانه و منكسره و يلاهوى و يا خرابى
شاكر / ههههههههههههههههههههه الله يعينها خديجه اذا كنتى كدا مع هند امال هتعملى فيها ايه
فاطمه / اش جاب لجاب طب بكره تشوف خديجه و تعرف الفرق بين بنت الاصول و بنت مصر
شاكر / انا مش هدافع عن هند يمكن تكون بتعمل حاجه انا مش شايفها بس هقولك كبرى دماغك منها ابنك مش هيتجوز كل يوم ما تخليش حاجه تكسر فرحتك و تضيعها
فاطمه / فشر دا انا مجهزه بكره شويه اغانى ما قولكش
شاكر / ههههههههههههههههه اللعب يا سمك
فاطمه / هههههههههههههههههههه
…………….
فى اوضه مختار
مختار خارج من الحمام بينشف شعره يلاقي هند نايمه على جنبها و مدياله ضهرها يدخل ينام جنبها و يحضنها
مختار / انتى هتنامى و لا ايه
هند / مطبقه من امبارح و عاوزه اصحي بدرى
مختار / عاوز اتكلم معاكى كلمتين
هند تتقلب و تبصله
مختار / انا بحبك
هند / و انا اللى قولت هتقول كلام يضايقني
مختار / لا مهو الكلام لسه جاى
هند / قولت كدا والله قولت كدا
مختار / ليه طلبتى من ناصر يتوسطلى
هند / عشان خايفه عليك
مختار / انا محتاجك زوجه اكتر ما محتاجك امى
هند / و هى الزوجه ما بتخافش على جوزها يعني
مختار / بتخاف بس اللى يزيد عن حده يتقلب ضده … هند انا مقدر انك بتخافى عليا و انك بتحبيني و انك ما لكيش غيرى انا والله مقدر ده بس خوفك عليا بيزود خوفى عليكي
هند / يعني ايه
مختار / يعني ما حدش ضامن عمره هتعملى ايه لو جرالى حاجه يا هند
هند / هموت
مختار / و دا هيفرحنى يعني انا عاوزك تفوقى لروحك يا هند … عاوزك قويه
هند / كل ده عشان بخاف عليك
مختار / لا انا مبسوط انك بتخافى عليا بس و بعدين هتفضلى تقفلى عليا تقفلى عليا لحد ما تخنقيني تعرفى احنا حتى ما بنعملش كدا مع عيالنا عشان لو فضلنا نقفل عليهم هيخسروا ثقتهم فى نفسهم هيطلعوا جوبنا و ما يعرفوش يعتمدوا على نفسهم عوزانى جبان يا هند عوزانى خايب هتحبيني لو بقيت كدا
هند تنام على ضهرها و تبص للسقف و تتنهد
مختار / انا مقدر خوفك عليا بس ان استحملت تحفيلهم عليا انى سبت السلاح عشان مراتى امرت بده فمش هستحمل اقعد فى البيت زى الحريم يا هند
هند / بس انا ما طلبتش منك تقعد فى البيت على فكره
مختار / جايه يا هند … جايه … لو ما سيطرتيش على خوفك عليا هيسيطر هو عليكي و يوم و التانى هلاقيكي بتخافى تخرجيني من باب الاوضه حتى
هند / يا سلام
مختار / تعرفى نفسي فى ايه دلوقت
هند / ايه ؟
مختار / ننزل انا و انتى الجيم اصل حاسس ان ثقتك فيا اتهزت من ساعه ما غلبتيني قولت يعني يمكن لما احط عليكي تفتكرى مين فينا الراجل
هند / يا راجل
مختار / بس للاسف لو خسرت تانى هبتى هتبقي راحت للابد
هند / للاسف مش هننزل لسبب تانى خالص
مختار / خير
هند / اخاف يكون فى بيبي المره اللى فاتت غير دلوقت
مختار / معاكى حق فاتتنى دى
هند / و لعلمك بقي انا عارفه مين فينا الراجل كويس مش محتاجه تفكرنى و انا ما كنتش عارفه ان خوفى عليك ممكن يتفسر بالشكل ده
مختار / على العموم الكبير قال كلمته و مفيش كلام بعدها لو ضربتى النار بكره هيتوسطلى
هند / انت مش عاوزنى اضرب
مختار / عاوزك تضربى بس مش عشان يتوسطلى عشان انتى قدها و ما بتخافيش
هند / نام يا مختار نام نكدت عليا
مختار يشدها فى حضنه اوى
مختار / و انا ما اقدرش على زعلك
هند / مش باينلها نوم الليلادى
مختار / معانا يا رب
هند / هههههههههههههههه
……………………
فى اوضه خديجه فى السرايا تانى يوم
خديجه و اخواتها بيفرشوا اللبس فى الدولاب فاطمه تدخل شايله صينيه عليها كبايات شاى
فاطمه / الهمه يا بنات عاوزين نلحق اليوم من اوله
خديجه تقوم تاخد منها الصينيه
خديجه / تسلم ايدك تعبتى نفسك احنا كنا خمس دقايق هنخلص و ننزل نشربها معاكوا تحت
فاطمه / تعبك راحه يا ست العرايس البت سماح وصلت السماعات تحت و هنقطعها رقص النهرده و لا ايه يا بنات
البنات يبصولها و يبتسموا فاطمه تبص على الهدوم
فاطمه / لا لا لا مش كدا خالص الهدوم تترص بالالوان من الفاتح للغامق كل لون مع بعضه كدا عشان يبان الدولاب منظم
خديجه / دا احنا كدا مش هنخلص النهرده
فاطمه / ورانا ايه المهم الحاجه تطلع حلوه حتى لما تمشوا و عريسك يجي يفتح الدولاب يعرف ان عروسته منظمه
خديجه / نجرب حاضر
فاطمه / الله قد ايه كلمه حاضر بتريح و حلوه من بقك تيجي اللى ما تتسمي تسمع و تشوف الاخلاق و التربيه
خديجه تبتسم لفاطمه و تروح هى و اخواتها يغيروا ترتيب الهدوم فى الدولاب فاطمه تمد ايدها فى الشنط و تطلع و تعلق على الشماعات و هى عماله تبص على الهدوم و معجبه اوى و البنات بيبصوا لبعض
…………………..
فى منطقه الرمايه
ناصر بيلف و هند بتضرب بتجيب فى الاول و فى الاخر بتطلع اوت و مختار قاعد يتابع فى جنب يقوم ياخد منها المسدس
هند / ايه ؟
مختار / بتغلطى نفس الغلطه كل مره مش بتتعلمى
هند / بحاول على فكره
مختار / ركزى
هند / هو انت ليه بتضغطنى اوى كدا هى الحرب هتقوم بكره و انا هقف على الجبهه
مختار / لا بس
هند / ممكن نعتبرها لعب لو سمحت ممكن ما تتوترش اوى كدا و توترنى معاك انت اصلا ايه اللى جابك
مختار / والله العظيم !!!
ناصر يروحلهم
ناصر / فى ايه يا مختار
هند / مفيش حاجه يا كبير انا هحاول اخر مره
ناصر / و انا تعبت روح لف انت يا مختار و لا هو مختار غالى و احنا رخاص
هند تبصله يضحك
ناصر / روح لف يا مختار
مختار يروح يقف عند البكره و يغير العلامه و يلف البكره يرجع العلامه فى اول السير
ناصر / ما تتوتريش مره فى مره هتجيبيها
هند / هو ليه الموضوع ده مهم اوى بالنسباله كدا ليه بيتوتر بالشكل ده
ناصر / لا هو كدا حتى مع العيال الصغيره هو اتعلم كدا و اتربى كدا
هند / يا سلام
ناصر / ما تستعجليش على نفسك مره فى مره هتبقي احسن منه كمان
هند تهز راسها ناصر يشاور لمختار يلف هند عينها على مختار
ناصر / عينك على الهدف
مختار بيلف و هند مش بتضرب مختار يقف
ناصر / نجرب تانى و لا ايه
هند / انا اتوترت مش عارفه اضرب
ناصر / براحتك نروح و نيجي وقت تانى بس ما ليش دعوه بقي لو اتاخرنا على معالى البيه الوزير المحافظ
هند / طب اجرب تانى
ناصر يهز راسه و يشاور لمختار مختار ينفخ و يلف البكره يرجع العلامه مكانها
ناصر / انتى ضربتى و انا هناك هو انا مش غالى عليكي و لا انتى ما بتشوفيش الا مختار
ناصر يشاور لمختار يلف البكره هند تضرب اربع طلقات بسرعه الاربعه يجوا
ناصر / كدا جبرت و الحمد لله لم الحاجه يا مختار
هند / انا جبتهم !!!
ناصر / تفتكرى لو عدناها هتعرفى تعمليها تانى
هند / مش عارفه
ناصر / نبقي نشوف الحوار ده مره تانيه بس الاتفاق اتفاق انتى نشنتى صح و انا هكلم المحافظ
هند تبتسم اوى مختار يروحلها و فى ايده العلامه
مختار / انا هحتفظ بالورقه دى و اعلقها فوق سريرى
هند / يا سلام !!
مختار / شايف الشغل يا كبير
ناصر / هى شاطره اللهم بارك نروح بقي و لا ايه
هند / ياريت انا الشمس قورت دماغى
ناصر / بس الحمد لله يا مختار ضربت عليك انا كنت بدات اشك انها ما بتحبنيش
هند / والله ابدا
ناصر / لا والله كنت هزعل اوى
هند / و انا ما اقدرش على زعل حضرتك
ناصر / تعيشي
ناصر يسبقهم على العربيه
مختار / انا فخور بيكى اوى النهرده
هند / على فكره دا ما يمنعش انى لسه بخاف عليك
مختار / طبيعي تخافى بس بداتى تواجهيه و دا كويس
هند / بس ضغطك عليا مش كويس
مختار / معاكى حق حقك عليا بس بيجيب نتيجه فى الاخر اهوه
هند / على حساب اعصابى يا مختار
ناصر من العربيه
ناصر / لينا بيت يا بشر انتوا ما جعتوش و لا ايه
مختار / جايين اهو
ناصر / عاوزين نلحق المحشي و هو سخن
مختار / يلا يا بنتى ما تجبيلناش الكلام
هند / هههههههه انا برده
هند و مختار يركبوا و مختار يسوق
…………………..
فى السرايا
البنات بيرقصوا و الستات قاعده تسقف عيله صغيره تدخل تجرى
البنت / الرجاله وصلوا الرجاله وصلوا
الكل يلبس الطرح و يعدلوا نفسهم و يلموا الدنيا نتصار تشاور للبنت الصغيره تطلع و ثوانى ومختار و ناصر و هند يدخلوا
ناصر / اتارى السرايا منوره من اول البلد
ام مغاورى / منوره بناسها
ناصر / تسلمى … خدوا راحتكوا انا و مختار هنقعد فى المكتب لحد ما الرجاله توصل و تنادولنا نتغدى
انتصار / امال مش هناخد البشاره و لا ايه يا كبير
ناصر / مختار هيبروزها و يعلقها
انتصار / الله امال بقى يا هند
ناصر / لا ما خلاص عرفنا اللى فيها هو غالى واحد و الباقى مش مهم
هند / حرام عليك يا كبير طب بالله عليك مين اللى كان بيلف فى الورقه دى
ناصر / مختار بس كل اللى قبلها كان انا
مختار / بس دى احسنهم ما تنكرش
فاطمه / ما يمكن مزعلها و لا حاجه و حبت تفش غلها
مختار / و لا ابدا يا مرات عمى … يلا يا كبير و لا ايه
ناصر / يلا يا ابنى
ناصر ياخد مختار و يدخلوا المكتب
هند / هستاذنكوا اطلع اغير و انزلكوا
انتصار / خدى راحتك يا حبيبتى
هند تبتسملهم و تطلع فوق
فاطمه / عشان تصدقينى لما اقولك ان كل ده شغل محن
انتصار / الكبير قال خدو راحتكوا ما تضيعوش اليوم فى الكلام
فاطمه / طب اشهدى انتى يا ام مغاورى عملت فيلم و اتقمصت و خناقه قد كدا عشان مش عاوزه تضرب نار و النهرده عشان عاوزه الكبير يتوسط لمختار ما يدخلش الجيش بتضرب نار زى الاكس يبقى ده اسمه ايه
انتصار / البيوت ياما بيحصل فيها و ما تنسيش ان هند مش واخده على ضرب النار
خديجه / بس العلامه ما بتقولش كدا خالص يا ام فاتن ما شاء الله عليها بتضرب حلو اوى و بيقولوا بكره يعنى اهداف متحركه و لا ايه
انتصار / مختار بيضغط عليها اوى يا خديجه عاوزها تتعلم دا يا قلبى خدها فى نص الليل و نزلوا تحت و قعد يمرنها تدافع عن نفسها
ام مغاورى / و دا اسمه كلام يا ام فاتن
انتصار / غلبنا كلام معاه يا ابنى تكون حامل يا ابنى فى الاول و الاخر هى بنت و الغفر ما فيش اكتر منهم يا ابنى ما احنا كلنا حواليها يا ابنى ما تضغطش عليها
ست / تلاقيه نفسه يرجع للسلاح و فاكر انها لما تتعلم الحاجات دى هتجيب معاه
انتصار / هند اعتراضها مش على شيل السلاح على التجاره هى شيفاها غلط
فاطمه / و ايه الغلط فيها ان شاء الله ما دا سلونا من يوم ما وعينا على الدنيا
خديجه / سلونا احنا يا ام عباده مش سلوها هى
فاطمه / و احنا ايه اللى يرمينا على المر
ام مغاورى / الحب يا ام عباده و هو فى غيره
الستات تضحك
انتصار / بس والله طيبه و تستاهل
فاطمه / مين يشهد للعروسه
انتصار / ما خلاص بقى عندنا عروسه جديده دلوقت لا و الاتنين ما شاء الله دلعهم دودو كدا نتلخبط ههههههههه
فاطمه / و هو كل الدودو زى بعضه يا ام فاتن
مريم / خلاص هتروحوا لبنان فى شهر العسل
خديجه / ايوه عباده حجز خلاص بس مش دلوقت هنقعد هنا اسبوع الاول لحد ما الناس تباركلنا و تصبح علينا و بعدين هنسافر نقعد اسبوعين هناك
انتصار / حلوه لبنان بس خدوا معاكوا هدوم تقيله احتياطى اسمع ان الجبال دى بتبقى ساقعه بالليل
خديجه / ربنا يسهل
فاطمه / بيقولوا لبنان فيها زعتر ما حصلش
خديجه / لو قابلت اجبلك حاضر
فاطمه / يا اختى روحى و انبسطوا و انتى هتروحى لبنان عشان تجبيلى زعتر
هند تنزل من فوق شايله شنطه هدايا صغيره
هند / سورى لو كنت اتاخرت انا لبست اى حاجه بسرعه والله اصل هدومى كانت متربه اوى … اتفضلى يا خديجه
هند تدى لخديجه شنطه الهدايا
هند / كنت جيباهالك من الساحل و حصلت حاجات كتير ورا بعض و اتلخمت و نسيتها و ما افتكرتهاش الا و انا بطلع العبايه من الدولاب معلش سامحينى بقى
خديجه تفتح العلبه تلاقى جواها ساعه تلبسها
خديجه / حلوه اوى تسلم ايدك تعبتى نفسك اوى
هند / تعبك راحه انا ما كنتش اعرف زوقك فسامحينى لو
خديجه / لا ابدا دى حلوه جدا حتى كنت شوفتها على النت و كانت عجبانى
هند / طب الحمد لله
هند تقعد انتصار تطبطب على ايدها و خديجه تورى الساعه فى ايدها لمامتها الست تبتسم و فاطمه هتطق
انتصار / هند حبيبتى ما سابتش حد ما جابتلوش حاجه من اكبر كبير لاصغر صغير
مريم / عمى بيقول سحلته لف على الهدايا بيقول يادوب شاورلها على شنطه حلوه دخلت قلبت المول من فوق لتحت
ام مغاورى / لا و زوقها حلو ما شاء الله
خديجه / ميرسى اوى فرحت بيها جدا
هند / الحمد لله و بجد سورى جدا انها اتاخرت كل ده والله بعلبتها عندى فوق و كل ما اقول هديهالك تحصل حاجه
خديجه / كل تاخيره و فيها خيره
هند تبص لفاطمه و هى مبتسمه فاطمه تبتسملها بسماجه
……………………..
فى اوضه الكبير
ناصر / ضرب نار و ضربت دفاع عن النفس و اتعلمت ناويلها على ايه تانى
مختار / و انا كنت ناوى على ده انت ليه بتكلمنى على انى لئيم و عندى خطه
ناصر / و هو انا هتوه عنك
مختار / والله ظالمنى يا كبير
ناصر / يعنى خلاص كدا هتهدى بقى
مختار / و انا عملت ايه لكل ده
ناصر / كتر الضغط بيولد الانفجار
مختار / خلاص مش هضغط عليها تانى ما عدش فى حاجه اضغط عليها فيها اصلا
ناصر / الحمد لله
مختار / بقولك يا كبير ما تيجي ناجل الحوار بتاع الشونه ده لبعد الفرح خليه لما عباده يسافر
ناصر / اشمعن مهو عباده بنفسه هو اللى محدد المعاد
مختار / عباده السكينه سرقاه و ما افتكرش ان الحريم فى الجوارحه عارفين الدنيا و اللى فيها حرام نكسر فرحتهم
ناصر / هفكر فيها
مختار / تمام
……………………….
يوم الحنه
هند لابسه فستان اسود و بتلف طرحه فضى مختار يطلع من الحمام بينشف شعره يعدى من ورا هند يركبها الهوا هند تصرخ
هند / ليه كدا طيب
مختار / ههههههههههههههههه ايه الحلاوه دى
هند / و انا كنت وحشه قبل كدا و لا ايه
مختار / فشر انتى بس النهرده حلاوتك زايده حته
هند / ميرسى قولى بقى اللبس ايه يليق على الفستان ده
هند تفتح الدولاب و تطلع صندوق الدهب
هند / حاسه ان كوليه ماما رحمه الله يرحمها هيبقى اوفر اوى ايه رايك بفكر اللبس حاجه سمبل كدا
مختار / ما افهمش فى الحاجات دى بس بيتهيالى الستات بتستنى المناسبات دى عشان تلبس اللى عندها
هند / جبتك يا عبد المعين
مختار / عبد المعين لسه ما لبسش و دلوقت يخبطوا علينا عشان نمشى
هند / هو احنا صحيح هنمشى من هنا لحد سرايا الجوارحه
مختار / اينعم فشوفيلك جزمه مريحه بقى
هند / الله يطمنك الفستان ده مش هيليق غير على الهيل بتاعه اصلا
مختار يهز كتافه ما اعرفش هند تروح تقف قدام المرايه و تحط كحل
مختار / ما تتقليش انتى حلوه من غيره
هند / ما انا كنت حاطه فى الفرح بتاع مش فاكره مين اللى انت اخدتنى ليه و كل البنات كانوا حاطين
مختار / حطى بس ما تتقليش ما قولتش غير كدا انا برده بغير عليكي
هند تبتسم و تهز راسها مختار يفتح الدولاب و يطلع جلبيه و عبايه باب الاوضه يخبط
مختار / مين
صوت عيل / الكبير تحت بيستعجلكوا
مختار / اتفضلى
هند / انا عن نفسى جاهزه انت اللى قعدت ساعه فى الحمام
مختار / و ياريت ريحه الحنه راحت منى خلينى ساكت
هند / هههههههههههههههههههه
مختار يبدا يلبس و هند تحط روج
……………………
فى سرايا الجوارحه
الرجاله شايلين عباده و بيرقصوا بيه و داخلين السرايا كلها نور و مزمار و الرجاله بتسقف البنات و الستات يتسرسبوا من الجنب على السرايا البنات بترقص حوالين خديجه راسمه ايديها حنه و قاعده يسلموا و يبوسوا من غير ما يبوظوا ايدين خديجه
هند / ايه الحلاوه دى الف مبروك
خديجه / و انتى سبتيلنا منها حاجه
هند / لا بقولك ايه انا بضعف قدام الكلام الحلو
خديجه / تعالى اقعدى جنبي
هند / ياريت والله لحسن انا رجلى ورمت من الكعب ياريتني كنت سمعت كلام مختار و لبست حاجه مريحه
خديجه / اقلعيها اقلعيها و خدى راحتك بيتك و مطرحك
هند / تعيشي … امال فين مامتك اباركلها
خديجه / فى المضيفه اللى هناك بتتاكد ان الستات بتاكل
هند / المضيفه عندكوا مفتوحه على السرايا
خديجه / كانت كدا فى السرايا عندكوا زمان بس بنوا واحده تانيه بره لما احتاجوا اوض للعيال الصغيره
هند / اول مره اعرف
فاطمه / جرا ايه يا هند انتى جايه تاكلى ودان البت من رغيك دا بدل ما ترقصيلها و لا انتى مش فرحانالها و لا ايه
هند / ازاى بس … دا احنا سهرتنا صباحى اريح رجلى بس شويه من الجزمه و هقوم علاطول
خديجه / ما قولتلك اقلعيها
فاطمه / اوعى لو خلعتيها رجلك هتورم و مش هتدخل فى رجلك تانى استحمليها لحد ما تروحى و بعد كدا ابقي اللبسي اللى تسلكى فيه
انتصار تقوم تشيل صينيه الحنه على راسها و ترقص بيها هند تسقف انتصار تشد هند هند تقلع الجزمه و ترقص بكتافها بس بحرج
فاطمه / بتحاسب روحها على الحركه قال يعني لو رقصت عدل هتتكسر
اتنين ستات قاعدين بيتودودا فى جنب
الاولى / هى هند مراه مختار مش لابسه دهبها ليه و لا هى و لا مريم دا عندهم دهب يملا صاغه
التانيه / تلاقيهم اتفقوا على كدا عشان ما حدش يسال مريم عن شبكتها و يحرجوها
الاولى / بكره يبقي دكتور قد الدنيا و يفتح عياده و يكومهم على قلبه قد كدا و يعوضها
التانيه / يعوضها عن ايه و لا عن ايه ادى اخره البتر مش كان زمانها مراه مغاورى الجارحى دلوقت
الاولى / اسكتى اسكتى ام عباده بتبصلنا
هند تشد مريم ترقص قدامها و انتصار تروح تقعد
………………….
فى الجنينه بره
الكل بيرقص و فرحانين عبد الله يدخل شايل ياسمينا و جنبه شيرى تقف فى جنب و عبد الله يبص فى الزحمه يلاقى ناصر يروحله ناصر يحضنه
ناصر / ايه التاخير دا كله
عبد الله / انا روحتلكوا هناك قالولنا انكوا جيتوا هنا
ناصر / هو مختار ما قالكش
عبد الله / والله يادوب على ما روحت استحميت و لبسنا و جينا
ناصر يبص يشوف شيرى واقفه
ناصر / انت سايب الحجه واقفه كدا وسط الرجاله ما تخليها تدخل السرايا عند الحريم
عبد الله / ما انا كنت جاى اسال والله
ناصر / طب روحلها يلا ما تسيبهاش واقفه كدا
عبد الله يبتسم و يروح ناحيه مامته و يدخلها السرايا
شيرى / سالته ننقط هنا و لا بكره فى الفرح
عبد الله / انا مش فاهم كل الرغى ده مع هند و مش بتساليها فى اى حاجه فيده ليه و بتحرجينى انا مع الناس اساله ازاى انا فى حاجه زى دى لو كان مختار كنت سالته
شيرى / هو فين مختار صحيح
مختار يدخل يجرى يمسك ايدها يبوسها
مختار / هنا يا ست الكل
عبد الله / انت يا ابنى ركز معايا هنا بسرعه
مختار / خير
عبد الله / ننقط فين و لا مين و لا امتى
مختار / براحتك يا ابنى المهم تعالى يا امى ادخلك عند هند
مختار ياخد ياسمينا من عبد الله و يدخل جوه و شيرى وراه مغاورى يسلم على عبد الله
مغاورى / نورت
عبد الله / منور باهله
مغاورى / تعال اتعشى
عبد الله / لا مش جعان خلينى انا للاخر هستاذنك
عبد الله يدى لمغاورى ضهره و يبص ناحيه شاهين و يروحله و مغاورى مضايق عبد الله يروح يبوس ايد شاهين و يحضنه شاهين يطبطب على ضهره
شاهين / عقبال ليلتك
عبد الله / من بقك لباب السما
عبد الله يطلع ظرف و يديه لشاهين
عبد الله / انا عارف انها مش قد المقام بس
شاهين ياخد الظرف منه
شاهين / تتردلك فى الفرح
عبد الله / امين ربنا يتملهم على خير عقبال مغاورى
مغاورى يدخل
مغاورى / عن قريب ان شاء الله
عبد الله / انا هروح اهيص مع العريس بقى عن اذنكوا
عبد الله يروح ناحيه عباده و يرقص معاه
مغاورى / نقطك بكام
شاهين / كتر خيره جانا لحد عندينا و عمل الواجب و زياده
مغاورى / لا كتر خيره والله
مغاورى يمشى و شاهين بيبص على الناس بيبصوله يسقف و يعمل فرحان و يدارى انه مضايق
……………………..
فى السرايا جوه
شيرى / قالتلى بس انا والله ما اقدر امشى المسافه دى كلها قولت اجى على هنا علاطول انتى عارفه يا اختى الصحه بقت فى النازل خالص
انتصار / يا اختى ما تقوليش كدا
شيرى توطى على انتصار انتصار تديها ودانها
شيرى / عبد الله عمل ظرف هيديه للحاج شاهين فيه خمسميه جنيه حلو و لا شويه
انتصار / حلو كل واحد بينقط باللى يقدر عليه هو الحج شاهين نقط عبد الله باكتر من كدا
شيرى / اللى نقطوه بيه فى نجاحه رده زى ما مختار قال يوم نجاح خديجه
انتصار / تمام تمام كدا ان شاء الله لما نفرح بعبد الله و مريم الحاج شاهين هيرد لعبد الله النقطه الجديده دى
شيرى / يعنى تمام يعنى
انتصار / ما تعمليش تكليف يا ام عبد الله احنا فى الاول و الاخر اهل
شيرى / انا عارفه يا حبيبتى ربنا يديم المحبه انا مش بتكلم عليكي
انتصار / بقولك ايه النهرده فرح و احنا جايين نهيص ما تفكريش فى اى حاجه تانيه و لا تسمحى لاى حاجه تعكر مزاجك
شيرى / ربنا ما يحرمنى منك يا ام فاتن
انتصار / امين يا اختى و لا يحرمنى منك و لا من حلوياتك امال فين البسبوسه الصغيره
شيرى / والله ما اعرف اول ما شافت العيال جريت وراهم
انتصار / ما تقلقيش عليها الدار امان
شيرى / كلو على الله
انتصار / و نعم بالله تعالى نقعد بقى
انتصار و شيرى يروحوا يقعدوا انتصار تقعد جنب فاطمه و شيرى جنب هند
فاطمه / خلصتوا ودوده
انتصار تسقف و ما تردش
فاطمه / شوفتيها بتسلم عليا ازاى من طراطيف صوابعها
انتصار / جرا ايه يا ام العريس ما تفكيها كدا و تفرفشى
فاطمه / طبعا و انا بشتكى لمين
انتصار تبص لسماح
انتصار / بت يا سماح
سماح تبص
انتصار / اسمها ايه الاغنيه اللى امك رقصت عليها امبارح دى شغليها خلينا نشوف ام العريس بترقص احلا و لا ام العروسه
ام مغاورى / حرام عليكي يا ام فاتن هى ام العروسه فيها حيل ترقص
انتصار / لو ما رقصتيش لست العرايس ترقصى لمين قومى يا بطه شجعيها
انتصار تشد فاطمه فاطمه تقوم و هى بتبص لانتصار بطرف عينها و تروح تشد ام مغاورى يرقصوا قدام بعض فجاه صوت انفجار شديد الكل يتخض و يقوموا يقفوا و يصرخوا
شيرى / عبد الله … ياسمينا … عبد الله
كل الستات تجرى على اقرب شباك و يبصوا الرجاله كلهم بيجروا بره السرايا الستات يطلعوا يجروا
انتصار / فى ايه ايه اللى حصل
شاب / ادخلوا جوه فى حاجه ولعت هنروح نشوف فى ايه
ام مغاورى / حد اتهور
الشاب يجرى و فاطمه واقفه تدور بعنيها مفيش حد
انتصار / جيب العواقب سليمه يا رب
ام مغاورى / ادخلوا جوه كلو يدخل جوه
شيرى / ياسمينا فين انا مش لاقيه بنتى … ياسمينا … ياسمينا
الستات كلهم يدوروا و هند ماسكه الموبايل و بتتصل بحد بنت ترجع شايله ياسمينا و وراها عيال كتير
البنت / لقيتهم كانوا مستخبين من صوت الفرقعه
شيرى تشيل ياسمينا و تبوسها
خديجه / حد فيهم رد عليكي
هند / لا بس هم اكيد كلهم كويسين ما تقلقيش الفرقعه ما كانتش بره اطمنى
خديجه / ربنا يستر
خديجه تبص فى الارض و هى زعلانه هند تقعد جنبها و تمسك ايدها و الستات كلهم واقفين عند الباب و الشبابيك و بيتكلموا
هند / ما دام انتى بخير و هو بخير كل حاجه تانيه تهون
خديجه تبصلها و تبتسم
هند / ما تخليش حاجه تكسر فرحتك و ان شاء الله هتطلع حاجه بسيطه
خديجه / ما افتكرش يا هند الصوت ده ما يطلعش من حاجه بسيطه
هند / ان شاء الله خير اى يكن ما دام كلنا بخير يبقى اى حاجه تانيه مش مهم
خديجه تهز راسها و هند تحاول تتصل بالموبايل خديجه تحط ايدها على ايدها
خديجه / اكيد بيطفوا الحريقه مستحيل يعرفوا يردوا سبيهم يساعدوا احسن
هند تهز راسها و تبص على الستات واقفين عند الباب و متوترين و بيدعوا
هند / يا رب
…………………………
عند مخزن
النار واصله للسما و كل الرجاله بتحاول تطفى و تناول مايه منطقه جنبه بالظبط تنفجر
مختار / فين المطافى … فين نظام الطوارئ
مغاورى / كان المفروض يشتغل
شاهين / لازم نبعد الناس على قد ما نقدر المكان كلو هينفجر
مغاورى / انت عارف السلاح اللى جوه بكام
شاهين / الفلوس تتعوض الناس ما تتعوضش ابعدوا الناس
مغاورى / لا
مغاورى يبص لابوه
مغاورى / هاتولى بطانيه
عباده يجرى يمسكه
عباده / مش وقت تعمل نفسك فيه بطل
مغاورى / ممكن اشغل البخاخات من جوه و نطفى النار
عباده / فات الاوان على الكلام ده الداخل جوه مفقود المكان هينفجر فى اى ثانيه
مغاورى / هاتولى بطانيه
مختار / الفلوس تتعوض يا مغاورى
انفجار تالت اكبر يحصل ينطرهم كلهم فى الارض و النار تمسك من اللى كانوا قريبين اوى
…………………………….
فى سرايا الجوارحه
هند / انا مش هقعد هنا استنى
هند تتحرك ناحيه الباب و ستات تتشجع و تروح وراها انتصار تقفلهم
انتصار / مش وقت جنانك يا هند … ما حدش هيتحرك من مكانه
فاطمه تقعد فى الارض و تربع و تفرك فى رجليها بايديها
فاطمه / جيب العواقب سليمه يا رب … ما لناش غيرك يا رب
شيرى / ما ينفعش نقف نتفرج طب حد يكلم المطافى و لا اعملوا حاجه
ام مغاورى / كلمناهم و قالوا فى الطريق
هند تروح تقعد جنب خديجه و هى متوتره
خديجه / اللى انفجر ده مخزن السلاح
هند تبصلها
خديجه / اصوات الانفجارات العاليه دى ما تجيش غير من مخزن سلاح
هند / هيعرفوا يطفوه صح هيعرفوا مش كدا
خديجه / اللى اعرفه ان لو سجاره بس ولعت فى المخزن فى نظام رشاشات فى السقف هيغرق الدنيا و لا هنحتاج مطافى و لا غيره
هند / امال ايه اللى حصل
خديجه / ما اعرفش … ما اعرفش
ام مغاورى / بس يا بنات ما اسمعش نفس يا تسمعونا سكاتكوا يا تدعوا ما احناش ناقصين
فاتن / ان شاء الله خير يا جماعه ان شاء الله نلاقيهم كلهم راجعين دلوقت
انتصار / يارب … يارب
………………………
ناحيه الحريقه
الرجاله اللى ولعت نايمه فى الارض و ناس بتحاول تطفيهم عربيات المطافى تدخل و الرجاله ينزلوا يطفوا الدنيا و الناس بتساعد لحد ما تنطفى شويه بشويه مغاورى يجرى على جوه يلاقى بوكس متعلق فى الحيطه مكسور يجرى ناحيه بكره بعيد يلاقيها مكسوره
عباده / ممكن من الانفجار
مغاورى / و هو كان ايه سبب الانفجار ده من الاساس
مختار فى الناحيه التانيه من المخزن
مختار / رجاله
الكل يبص عليه واقف باصص فى الارض يجروا عليه يلاقوا تلت جثث متفحمين
مغاورى / الغفر
عباده / الله يرحمهم
شاهين يدخل و يبص على المكان ناصر يقف جنبه
شاهين / الحمد لله انها جت على قد كدا يلا يا رجاله كلكوا تعبتوا و الصباح رباح ننضفها
مغاورى / بس كدا
شاهين / هنقعد نعيط جنبيها و لا ايه خلاص اللى حصل حصل
مغاورى / و الناس اللى ماتت و السلاح اللى راح
شاهين / قولت اللى حصل حصل خلصنا
ناصر / تتعوض يا مغاورى
مغاورى / لو كان مخزنكوا
عباده / و احنا و انتوا ايه يا مغاورى
مغاورى يبص لعباده يسكت و الكل بينهج و متبهدل و بيتبادلوا نظرات شاهين يروح يقف جنب الجثث
شاهين / حد يطلب الاسعاف يجوا يشيلوا الناس عشان نتعرف عليهم اكرام الميت دفنه
مختار / طلبتهم جايين فى الطريق
مغاورى يسيب المكان و يمشى
……………………
قصاد فيلا فيرا
مغاورى داخل سايق على سرعه عاليه اول ما يقرب من البوابه البوابه تتفتح يفرمل و يقف يلاقى فيرا واقفه قدامه بعيد الناحيه التانيه يسحب سلاحه و يشد الاجزاء و ينزل الرجاله ترفع عليه السلاح
فيرا / هولد يور فاير
الرجاله تنزل السلاح و مغاورى واقف مصدوم فيرا تروحله و تبص عليه متبهدل تحاول تمسح الرماد اللى على وشه يبعد عنها
مغاورى / قسما بالله لادفعك تمن اللى عملتيه دا غالى اوى
فيرا / انا عرفت باللى حصل بس صدقنى انا ما ليش اى علاقه بيه نهائى و اقدر اثبتلك لو تحب
مغاورى / و انا هصدقك و لا ايه
فيرا / انا لو عاوزه ائذيك مستر مغاورى منعتهم ليه انت زى المجنون جاى بطولك انا كان ممكن افجرلك العربيه من على بعد ميل و انت جواها من قبل حتى ما توصل لبوابتى و بعدين منين بعرض عليك شغل و منين بحاربك انهى غبى يعمل كدا
مغاورى يبصلها
فيرا / كلكوا متجمعين فى نفس المكان ايه الصعب انى اضرب صاروخ على السرايا و ابقى ضربت كل العصافير بحجر واحد يا مستر مغاورى و خلصت من الجوارحه و الزنايته فى يوم واحد لا دا و من البلد كلها
مغاورى / و تبقى فتحتى على نفسك ابواب جهنم
فيرا / بالعكس هبقى ارتحت انما لو فجرت مخزن السلاح بتاعكوا كدا هبقى بضيف للاعدائى عدو جديد و اللى يحارب الكل يخسر يا مسيو مغاورى
مغاورى / مين غيرك ليه مصلحه فيها
فيرا / و انا ايه مصلحتى اصلا … تعال ورايا مسيو مغاورى … لو سمحت … انا لو كنت عاوزه ائذيك كنت خلصت عليك من زمان فلو سمحت اهدى و تعال معايا
فيرا تمشى ناحيه الفيلا و مغاورى هايج يحاول يهدى نفسه فيرا توصل لباب الفيلا و تشاورله تعال مغاورى يروح وراها فيرا تدخل و تروح ناحيه باب بيودى على سلم تنزل البدروم مليان سلاح و صواريخ و قنابل
فيرا / انا مش هبيع المايه فى حاره السقايين و اشرحلك كل واحد من دول ممكن يعمل ايه اكيد معلومات زى دى مش هتخفى عنك يا مسيو مغاورى
مغاورى بيبص حواليه
فيرا / انا لو عاوزه اخلص من الزنايته و الجوارحه فى ثانيه مش هتكلفونى غير شويه فكه … الا صحيح هو الزنايته كانوا بيفضوا الشونه بتاعتهم ليه
مغاورى يبصلها
فيرا / قالولك بينقلوا حاجتهم فين
مغاورى / انا ما سالتش عشان ما يخصنيش
فيرا / طب يا ترى هم برده ما بيسالوش عن ادق تفاصيل شغلك مهو لو ما يخصكش شغلهم يبقى باى ديفولت شغلك ما يخصهمش
مغاورى يبصلها و يبص على الاسلحه
فيرا / انا عارفه ان اكيد خسايرك كتير و خصوصا اللى نقى التوقيت ده عارف انكوا لسه عاملين عمليه حلوه جدا و المخازن مليانه مع ان كان بقالها فتره مش قليله فاضيه و لو كان الانفجار ده حصل بدرى شويه صغيرين الخساير كانت هتفرق كتير و لا ايه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
